“Ke ni siné bineli asali”

JAPI NI BINELI NIJÉ WÉNWALA JITRA

Nijé onolá alí nijé iyela católicos nili. Nalí japalí ineli echoná Biblia japi echi Onorúami riwalá Jeobá ju, echi ko testigo Jeobá nílili. Japi riká nijé onolá namuti niwáami nili echi usí jitra, echi ko niwayé imágenes Jesús jitra. Nalí riweli niwayá jepuná alí néeli echi namuti japi machí, niwamia bilé Salón del Reino bachá piso tamujé bitélachi. Echi nili echi bachá salón japi niwaari echoná San Juan del Monte, japi ju echomí Manila, Filipinas.

Ani ochériki bamíali 1952 alí nijé wénwala ko sapú tamí binérili Jeobá jitra, japi riká binérili echi naó nijé bachilá alí echi bikiá nijé ochilá. Japalí ni aminabi ochérisiki, nijé onolá tamí anéi japi ni leérima bilé capítulo echi Biblia jitra sinibí rawé. Ayénachó tamí yúa binéi jaré publicaciones. Isini kaachi nijé wénwala bayéi echi hermano circuito alí betelitas jiti tamujé bitélachi ripima. Japi raʼichie echi hermanos, we tamó iʼwérili iyayé sinéami. Jepuná tamó iʼwírili bachá we natéami niraa inea nóchilia Jeobá.

Ani bineli wiká namuti nijé wénwala jitra japi we bichíyami nili. Japalí mukuli nijé iyela bilé nayulí jitra, nijé onolá alí nijé ati chotásiki napawika nochia japi riká precursores bamíali 1971. Nalí, bamíali 1973, japalí ni 20 bamíbami ke, nijé onolá ayénachó mukuli. We ni omona nilie alí bineli ka. Nalí echi namuti japi ta buwea piré japi aní echi Biblia, tamí iʼwírili jiti ni ke wabé omonama alí ni ke riwema Jeobá amígowala niya (Heb. 6:19, TNM). Japalí mukuli nijé onolá, miná ko ani wilaari japi riká precursor especial echoná bilé isla Coron riwéami, japi ju echomí Palawan.

JILÍRAMI NÓCHALI JAPONÁ NI BINELI ASALI

Ani nawaki Coron japalí ni 21 bamíbami ke. Ani ochériki echoná bilé ciudad alí we jilí nili tamí jitra bitea biléana isla japoná ke niruili luz, baʼwí, carros alí motos. Tákoré echoná kuabi hermanos piréi, ke ni olayé bilé compañero japi precursor nili, jiti la ni isini kaachi bineli simiyé nawisasia. Echi bacháwala michá wabé jilí nili tamí jitra, jiti ni we niwéi nijé téemala alí amigos. Sinibí rokojó ani nalae ripá siyónachi inea asá. Ani riwénalie echi nóchali alí ku simiyá nijé bitélachi.

Japalí ni bineli ka nilie, ani ruyéi Jeobá suwaba japi ni inilie. Ayénachó ni néwalayé jaré namuti japi tamí iʼwérili iyayé japi ni ma leérili echoná Biblia alí echoná publicaciones. Ani we natie japi aní Salmo 19:14, jiti la ni machiki japi Jeobá tamí iʼwírima ani natásaká echi namuti japi echi galé, japi riká japi echi isimí alí echi cualidades japi echi olá. Echoná oselí La Atalaya niruili bilé artículo riwéami “Usted nunca está solo”,a japi we tamí iʼwírili. Wisabé niraa ni leériki echi. Echalí ko nili japi riká ko Jeobá bi yúa atiká, jiti ni ikirie Jeobá yúa raʼichia, binea alí natia.

Japalí ni ma pe teeli asali echoná Coron, ani anciano wilaari, alí jiti nijé bi anciano nili, ani simerie echi Escuela del Ministerio Teocrático, Reunión de Servicio, Estudio del Libro de Congregación alí echi binelíwami echi oselí Echi Nawésami. Ayénachó ni nijisa riweili echi nawésali sinibí tarali japi nirú sábado o oméachi ma. Isiá suwaba jepuná namuti tamí iʼwírili jiti ni ma ke bineli ka nílima.

Echoná Coron, echi pagótami we aʼlá kipúe alí pe aminana jaré echi japi ni binerie echi Biblia, pakoli. Nalí ayénachó jilí nili nawesia echoná, jiti sibamia japoná piré echi pagótami, isini kaachi ani nasipa rawé isié wichí wiliká simiyá alí ni ke machiyé kumi ni ripima ma rokojó nílisa. Echi congregación ayénachó anérami nili japi nawisama wiká kuuchi islas. Sibamia echoná, ani lancha simiyé tákoré isini kaachi echi mar we jiwérami nokéi. ¡Alí nijé ko ke machiyé akea! Nalí Jeobá sinibí tamí tibuli alí tamí iʼwírili. Ani machiki japi echi namuti jitra Jeobá ko tamí binerie japi chúriká ni isima japalí ni ikisaa namuti we jilírami echoná jarecho nóchali japi tamí iyama.

PAPÚA NUEVA GUINEA

Bamíali 1978, ani juláari Papúa Nueva Guinea, japi ju echomí norte echoná Australia. Bilé país ju japi olá wiká kawí alí ne sojí chulú ju japi riká España. Tákoré echoná piréi bikiá millones pagótami, raʼichie simírikami 800 raʼicháliami. Nalí ne sojí sinéami echi pagótami machiyé raʼichia pidgin, japi ayénachó rewé tok pisin, japi raʼicháliwa echomí Nueva Guinea.

Bachá ani juláari bilé congregación japi raʼichie inglés echomí Port Moresby. Nalí ke ni wilí asali echoná jiti ni simiki bilé congregación japi raʼichie tok pisin alí chotásiki binea echi raʼicháliami. Echi namuti japi tamí binerie, ani neei japalí ni nawesie, alí echi tamí iʼwírili sapú binea echi raʼicháliami. Ke wilí simírili japalí ni ma nijíe nawésali tok pisin niraa. Alí kecho bilé bamíali simíriachi japalí ni séaki echoná Papúa Nueva Guinea, ani wilaari japi riká superintendente de circuito alí tamí aneri japi ni simea iʼwérili iyasia echi congregaciones japi raʼicha tok pisin japi wikanami niruili.

Echi congregaciones miká niraa jali, jiti la ni niwayé wiká waʼlú napawíliwami japi bilé rawé rojorá alí ne sojí sinibí simíami nili biléana. Ne kulí ko, japi riká ni ke machiyé echi país alí japi riká raʼíchiami alí nokáami nili echi pagótami, ani bineli ka nilie. Alí japi riká echoná niruili wiká kawí alí ke niruili carreteras, we jilí nili simiyá biléana congregación, jiti la ni ne sojí sinibí tarali avionchi simiyé. Isini kaachi nijé bi nili japi aseka inarie echoná avioneta japi ke me aʼlá nili, jiti la ni we majaa nilie japi riká ko lancha simiyá.

Pe kuabi pagótami nili japi olali teléfonos. Jiti la ni carta néeka raʼichie echi congregaciones yúa. Isini kaachi nijé bachá nawayé echoná congregaciones kecho nawáachi echi cartas, jiti la ni anéi echi pagótami echoná piréami japi tamí anema kumi piré echi hermanos. Japalí ni ma riwisá, echi ko sinibí we kanílika tamí naréi alí we simárika, echi namuti tamí newalarie chúsiá ni we iʼwérili isié. Wisabé niraa ni ineki chúriká Jeobá tamí iʼwirie, alí jepuná ko we tamí mulipi inílitili Jeobá yúa.

Echoná bacháwala napawíliwachi echoná bilé isla Bougainville riwéami, tamí mulíwiki bilé niwíkami we kanílika. Echi ko tamí náriki: “¿Ami tamujé newalá?”. ¡Ayena, nijé ko a néwalayé echi jitra! Echi nili japi ni yúa raʼíchiki echi Biblia jitra japalí ni kulí nawaki echoná Port Moresby, alí ni chotásiki bineria echi Biblia jitra, nalí miná ko bilecho hermano echoná bitéami aminabi binérili echi. ¡Alí jipi ko ma pakótami nili! Jepuná ko nili bilé namuti aʼláala japi ni ikili japalí ni asali echoná Papúa Nueva Guinea.

WE TI NÓCHIKI SINÉAMI KA NAPAWIKA

Ani ku simiki Coron jonsa bamíali 1978, nalí japalí ni asali echoná, ani machiki bilé hermana we semati alí we nóchami, Adel riwéami. Echi ko bineli weelia asali echi kúchuwala, Samuel alí Shirley riwéami, ayénachó tibúe echi iyela alí precursora regular nili. Echalí michá mayo bamíali 1981, ani ku roʼiki echomí Filipinas niwimia Adel yúa. Okuaka ti chotásiki napawika nóchilia Jeobá japi riká precursores regulares alí ayénachó ati tibúe tamujé kúchuwala alí echi Adel iyela.

Tákoré ni upéami nili alí kúchuwami, bamíali 1983 checho ni ku wilaari japi riká precursor especial. Ani juláari echoná isla Linapacan echomí Palawan. Tákoré we miká nili echomí alí ke niruili Testigos, ati sinéami ka echomí simíaki pirélisia. Japalí ti ma ne sojí bilé bamíali mochili echoná, echi Adel iyela mukuli. Bilé namuti japi tamó iʼwírili ke we omona nilia, echi ko nili sinibí we nóchilia Jeobá. Ati wiká pagótami binerie echi Biblia jitra alí wiká echi chotásili nijewia Jeobá, jiti la ti niwaki bilé taa Salón del Reino echoná isla. Ma bikiá bamíali simírisa, ¡we ti kaníliki inea japi 110 pagótami napawili Conmemoración kaachi! Alí wiká echi pakoli japalí ti ku simíaki.

Echalí bamíali 1986, ani juláari bilé isla Culion riwéami, japoná ayénachó pireili jaré pagótami japi lepra nayúami nili. Miná ko, Adel ayénachó wilaari japi riká precursora especial. Ne kulí ko, ati we majaa nilie nawesia echi pagótami japi we nayúami nili lepra jitra. Nalí echi publicadores echoná piréami, tamó aneli japi echi nayúami ma ówitami nili alí jilí nima japi tamó nachútima echi nayulí. Jaré echi nayúami simíaye napawíliwachi echoná bilé hermana bitélachi. We ti sapú riweli majaa nilia alí ti we kanila nawesie echi raʼíchali aʼláala echi Biblia jitra, echi pagótami japi inilie japi ke galérami ju Onorúami jitra alí ayénachó echi pagótami jitra. Alí we semati nili inea japi echi ko we kanilie machiyá japi pe aminana ma ke nayúa pirélima (Luc. 5:12, 13).

¿Piri iʼwírili tamujé kúchuwala kanila pirea echoná Culion? Adel alí nijé, ati bayeki okuá hermanas Coron jonsa tamó yúa nawisamia, jiti tamujé kúchuwala olama aʼláala amigos. Samuel, Shirley alí jepuná okuá hermanas, we kanilie iʼwiria jarecho jiti machimea echi bichíwali. Echi ko binerie wiká kuuchi echi Biblia jitra alí Adel alí nijé ati binerie echi wénwala. Isini kaachi ati binerie 11 niwíkami alí echi kúchuwala. Alí japi riká pe aminana niruili wiká pagótami japi mulíwisili Jeobá, ati niwaki bilé kulíwami congregación.

Japi riká ne kulí ko nijé bi anciano nili, echi sucursal tamí aneki japi ni simérima echi napawíliwami sinibí tarali, jiti echi riká kipuma echi osá naó publicadores japi piréi echoná Culion, alí japi echi riká cho isima echi kima publicadores jitra japi piréi echoná bilé pueblo Marily riwéami. Sibamia echi pueblo, ati bikiá horas nokayé simaria echoná mar. Ma sunisa echi napawíliwami, sinéami ka ati wiká horas nokayé ripá rabó simaria simíaya binérimia echi pagótami echoná bilé pueblo Halsey riwéami.

Pe aminana, wiká pagótami testigo Jeobá nílili echoná Marily alí Halsey, jiti la ti niwaki bilé Salón del Reino echoná okuá pueblos. Alí echi hermanos alí echi pagótami japi we aʼlá kipuli, iʼwírili niwayá alí nijili ne sojí suwaba echi namuti japi newalelie niwamia echi salón, japi riká nokali japalí niwárami nili echi salón echomí Linapacan. Echoná salón japi wilí echomí Marily, omérili mochía 200 pagótami alí ayénachó omérili aminá waʼlú niwayá jiti echoná nirúlima echi waʼlú napawíliwami.

WE NI RISOA ALÍ BINELI KA NÍLIKI, NALÍ MINÁ KU KANÍLIKI

Bamíali 1993, japalí tamujé kúchuwala ma ochérili, ani wilaari japi riká superintendente de circuito echoná Filipinas alí Adel tamí yúa nóchili. Pe aminana, bamíali 2000, ani bayeri jiti ni simea Escuela de Entrenamiento Ministerial jiti tamí binérima chúriká bineria echoná escuela. Ani natie japi ni ke omérima aʼlá bineria, nalí Adel sinibí tamí iʼwérili iyayé alí tamí iʼwirie néwalayá japi Jeobá tamí iyama echi jiwérali jiti ni omérima isiá echi nóchali (Filip. 4:13, TNM). Echi ko we aʼlá machiyé japi jepuná ne bichíwali ju, jiti we nóchili Jeobá tákoré nayúami nili.

Echalí bamíali 2006, japalí ni binériami nili, Adel aneri japi nayúami nili párkinson jitra. We ti majaki machisaa echi namuti. Jiti la ni aneki Adel japi riwepo nóchilia Jeobá echoná jiti echi ko ówitami nima, nalí echi ko tamí jéaneli: “Périkó, aa bilé doctor japi tamí iʼwírima owia, alí ni machí japi Jeobá tamó iʼwírima jiti ta aminabi nóchilipo echi jenaʼí”. Adel we kanila nóchili Jeobá aminabi usani bamíali. Japalí ma ke omerie iyenia, echi ko nawesie néeka silla de ruedas. Alí japalí ma ke me aʼlá raʼichie, echi ko comentario nijíe echoná napawíliwachi kuabi raʼíchali aniká. Echi hermanos ko sinibí júulili mensajes Adel aneka japi iʼwérili naréi inea chúriká Adel we anáchami nili. Nalí echalí bamíali 2013, Adel ko mukuli. Ata napawika pireili simírikami 30 bamíali, jiti la ni we omona nilie alí bineli ka, jiti ma ke biteili nijé upila japi we galéami nili alí sinibí tamí yúa asali.

Echoná ni ripiki nóchilia Jeobá japoná ni asali japi riká nakimeli Adel japi ni isima. Echi riká isiá tamí iʼwírili ke me bineli ka nilia. Bamíali 2014 aminá 2017, ani aneri japi ni simea inesia echi congregaciones japi tagalo raʼíchami ju echoná países japoná echi gobierno ke risensia iyayé japi nawisama. Miná ko ni simiki Taiwán, Estados Unidos alí Canadá iʼwírimia echi congregaciones japi ayénachó tagalo raʼíchami ju. Bamíali 2019, ani simiki India alí Tailandia binérimia echoná Escuela japi Biné echi Nawésami Raʼíchali Kalabé inglés niraa. Ani we kanílika nóchiki Jeobá isiá jepuná nóchali. Japalí ni aminabi we nochi Jeobá, aminabi ni we kaníliami ju.

SINIBÍ TI IʼWÍRILIWA JAPALÍ TI NEWALÉ

Sinibí ni we galeki echi hermanos japoná ni asali nóchilia Jeobá. Jiti la ni we jilí niraki ku simiyá, nalí ani bineki sinibí we bichiwia Jeobá. Wisabé niraa ni ineki chúriká tamí iʼwiri, jiti la ni sinibí we kanílika nijewi echi, tákoré ni isini kaachi sinúrika namuti ikí. Jipi ko ni precursor especial ju echomí Filipinas alí ni we kanila nocha echoná congregación, japoná sinéami echi hermanos ju japi riká nijé téemala japi we aʼlá tamí tibú alí galé. Ayénachó we ni kanili jiti Samuel alí Shirley we bichíyami ju Jeobá japi riká echi iyela (3 Juan 4).

A bichíwali ju japi ni ikili wiká namuti we jilírami, japi riká inea nijé upila we risoa níliachi alí mukúachi bilé nayulí we chati jitra. Ayénachó ani bineki wikanami bitelia alí sinúrika niraa. We be nalí, ani sinibí ineki japi Jeobá “ketasi mikabé atí tamujé yuwa” (Hech. 17:27). “Echi Jeobá sikala ko ke me kúrili ju” jiti ke omérima iʼwiria alí iʼwérili iyayá japi echi nijéwami ju, tákoré we miká muchuwi (Is. 59:1). Ani waʼlú matétara iyá Jeobá jiti echi ko sinibí tamí iʼwírili. Ke ni siné bineli asali.