Ke aboi bi jitra natabo alí ke niráami nipo japi riká wikabé pagótami

¿ACHI mi iné japi wikabé pagótami jipi rawé we natéami ka nili alí mayé japi narésaré wiká namuti jarecho yúa? Tákoré aminabi wiká iyáliwa, echi ko aminabi nata japi narésaré wikabé namuti. Alí ata machí japi echi riká ju jiti echi Biblia anili japi jipi jubá rawé echi pagótami echi riká nima riweili, japi aboi bi jitra natama alí ke matétara nijíami nima (2 Tim. 3:2).

We be nalí, ma chabé jonsa echi pagótami echi riká nokáami nili. Japi riká, Adán alí Eva mayeli japi aboi anisáré piri namuti aʼlá ju alí piri ke aʼlá ju, alí echi jitra sinéami ta risoa nilia piré. Pe aminana, ma wiká bamíali simírisa, echi silíami Uzías echoná Judá nuláami, mayeli japi binoy nijísaré echi incienso echoná templo, tákoré ke echi riká isisa riweili (2 Crón. 26:18, 19). Ayénachó echi fariseos alí saduceos mayeli japi Onorúami aʼláala nísaré echi yúa jiti Abrahán téemala nili (Mat. 3:9).

Jiti ta piré japoná wikabé pagótami we niráami ju alí aboi bi jitra nata, a keʼré japi tamujé kilipi niraa echi riká cho nílisipo (Gál. 5:26). Ati natáboré japi ta narésaré bilé nóchali we natéami o japi jarecho aʼlá namuti nokimea tamujé yúa jiti ta natéami ka nili. Jiti la, ¿piri ta nokisáré jiti ke echi riká cho nipo? Bachá, ati aʼlá inámisaré piri nata Jeobá echi namuti jitra. Ma inepo okuá busuréliami japi aní echi Biblia.

Jeobá ju japi aní piri ta narésaré. Ma inepo jaré ejemplos.

• Echoná bitichí, Jeobá ko nakí japi echi upila riwíwima echi kunala, alí japi echi kunala we galema echi upila (Efes. 5:33). Ayénachó nakí japi echi japi niwíkami ju galema echi upila bi o kunala ma, alí ke ko bilecho (1 Cor. 7:3). Alí nakí japi echi kúchuwala nijéwima echi wénwala, alí japi echi wénwala we aʼlá tibuma alí we galema echi kúchuwala (2 Cor. 12:14; Efes. 6:2).

• Echoná congregación, Jeobá ko aní japi ta riwíwisaré echi ancianos jiti we nóchami ju (1 Tes. 5:12, TNM). Nalí ayénachó aní japi echi ancianos ke nulésaré ibili hermano alí hermana echi namuti japi nokisáré (1 Ped. 5:2, 3).

• Jeobá ko riwé japi echi gobiernos nulama jenaʼí Wichimóbachi, jiti la tamujé ko nijísaré echi winomí japi tani alí ti riwíwisaré (Rom. 13:1, 6, 7).

Jeobá ko we galéami ju alí rasíruka wiká namuti tamó iyá, tákoré ti ke namú nokali jiti echi narepo. Jiti ta ke sébali aʼlá nokáami ju, ata suwisáré (Rom. 6:23, TNM). Nalí be, jiti Jeobá we galéami ju, echi ko tamó iyá wiká namuti aʼláala (Sal. 103:10, 11). Ibili namuti aʼláala alí ibili nóchali we natéami japi echi tamó iyá ko ju, jiti echi ko we aʼláala ju tamujé yúa alí ke ko jiti tamujé nokali bilé namuti jiti echi narepo (Rom. 12:6-8; Efes. 2:8).

PIRI TAMÓ IʼWÍRIMA KE NIRÁAMI NIYA ALÍ KE ABOI BI JITRA NATIA

Ata tibuka nokisáré jiti ke natabo japi riká echi pagótami. Ke ti tibuka nokisáaká, ati natáboré japi ta wiká namuti narésaré jarecho yúa. Siné kaachi Jesús ko anili bilé historia japi ruyé echi namuti jitra. Echi ko raʼíchili bilé walúala nuláami jitra japi níwami nili bilé kawíwalachi wiká uvas ichirúami alí nuleli jaré rijoi japi nochama suwaba rawé natétika bilé denario, japi nili bilé moneda plata jitra niwárami japi natetie bilé nóchami japi nochie suwaba rawé. Miná ko echi walúala nuláami bayeli jarecho rijoi jiti ayénachó nochama, nalí pe kuabi horas. Ma alíwachi, echi ko natétili sinéami bilé denario. Nalí japi biʼá jonsa nóchili mayeli japi wikabé narésaré jiti wiká horas nóchili we ratáachi (Mat. 20:1-16). Jepuná jitra Jesús ko binérili echi najátowala japi kanílisaré echi namuti jitra japi Jeobá iyánali echi.

Ke tániami nipo, nalí waʼlú matétara nijíami nipo (1 Tes. 5:18). Nokiboa japi riká echi apóstol Pablo, japi ke tánili echi hermanos Corinto piréami japi iyama echi namuti japi newaléi, tákoré a risensia olali jiti echi riká isima (1 Cor. 9:11-14). Tamujé ayénachó ke tániami nipo, nalí waʼlú matétara nijíami nipo echi namuti jitra japi ta naré.

Ke niráami nipo. Japalí bilé nata japi we natéami ju, echi ko mayé japi narésaré wikabé namuti. Nalí ke niráami niya tamó iʼwírima jiti ke siné echi riká natabo.

Echi profeta Daniel ke niráami nili. Echi alí echi téemala we natéami nili, ayénachó we baʼóami nili, we aʼlá nátami alí machíami. Nalí echi ko ke nátili japi narésaré bilé nóchali we natéami alí japi jarecho simá nokáami nísaré echi yúa (Dan. 1:3, 4, 19, 20). Alí jiti ke niráami nili, Jeobá ko we natéami niraa ineli echi (Dan. 2:30; 10:11, 12).

Ke niráami nipo alí ke aboi bi jitra natabo japi riká wikabé pagótami jenaʼí Wichimóbachi piréami. Nalí we ti kanílipo echi namuti aʼláala jitra japi Jeobá tamó iyá jiti we aʼláala ju tamujé yúa.