¿Acha Onorúami atí omáana Wichimóbachi?
Japi aní echi Biblia
Onorúami ko iné suwaba japi ikí nirú jenaʼí alí ayénachó omero néea echi jiwérala kumi ke (Proverbios 15:3; Hebreos 4:13, TNM). Nalí be, echi Biblia ko ke ruyé japi omáana atí Onorúami. Nalí, bineri japi echi ko bilé espíritu ju alí a biléana bité.
Chu iyiri ju Onorúami: Echi ko ju bilé espíritu (Juan 4:24). Jiti la, ke bilé pagótami omero inea (Juan 1:18). Echoná Biblia aní japi Onorúami biléana bi atí. Nalí ke siné aní japi omáana atí (Isaías 6:1, 2; Apocalipsis 4:2, 3, 8, TNM).
Kumi bité: Echi ko bité japoná piré echi espíritus, sinúrika japi riká ta piré. Onorúami ko a olá biléana japoná bité “ripá rewegachi” (1 Reyes 8:30). Echi Biblia ko aní japi echi ángeles siné kaachi moʼili echoná japoná atí Jeobá,a echi riká néwariwéliti japi Jeobá bité biléanachó (Job 1:6).
Jiti Onorúami ke atí omáana Wichimóbachi, ¿achi omérima tamí tibúa?
Ayena. Tákoré Onorúami bité ripá rewegachi, echi ko we galé japi piré jenaʼí Wichimóbachi. Echi ko a iné echi japi a jiwérika noká nijewia alí ayénachó tamó kuʼiro (1 Reyes 8:39; 2 Crónicas 16:9). ¿Chúriká néwariwéliti Onorúami japi tamó we galé alí tamó tibú?
Japalí ti echi yúa raʼicha: Jeobá ko we sapuka kipú japalí ta echi yúa raʼicha (2 Crónicas 18:31).
Japalí ti we omona nili: “Jeobá ko mulipi atí echi yúa japi omona alí iʼwiri echi japi risoa nílika muchuwi” (Salmo 34:18).
Japalí ti newalé busuréliami: Echi ko nee echi Biblia, jiti ta machiboa chúriká ti aʼlá nokáami nibo (Salmo 32:8).
Japi aní jaré pagótami japi ke bichíwali ju
Japi aní jaré pagótami: Onorúami ko atí echoná suwaba namuti japi niwali.
Japi bichíwali ju: Onorúami ko ke bité jenaʼí Wichimóbachi alí ke biléanachó echoná universo (1 Reyes 8:27). A bichíwali ju japi echi Biblia aní japi echi sipolí alí jarecho namuti japi Jeobá niwali newaré japi “Onorúami Walubéala ju” (Salmo 19:1). Nalí, jepuná ko ke aniwáami ju japi Onorúami ko bité echoná suwaba namuti japi echi niwali, japi riká bilé pintáriami ke bité echoná iyóktami japi niwali. Nalí, ata biné chu isíami ju echi pintáriami japalí ti iné echi iyóktami. Echi riká cho ju japalí ti iné echi namuti japi Jeobá niwali, ata biné chu isíami ju echi, japi riká japi we jiwérami ju, we machíami alí we galéami (Romanos 1:20).
Japi aní jaré pagótami: Onorúami ke suwaba omériami ju alí ke machí suwaba namuti jiti echi ko ke atí omáana Wichimóbachi.
Japi bichíwali ju: Echi espíritu santo ko ju echi Onorúami jiwérala. Jiti bela, Onorúami ko machí suwaba namuti japi ikí, alí ayénachó sinibí omero isiá suwaba namuti japi nakí kumi ke, tákoré ke atiké echoná (Salmo 139:7).
Japi aní jaré pagótami: Salmo 139:8 aní japi Onorúami atí omáana Wichimóbachi jiti jériká aní: “Ani simisáaká ripá, echoná mi asimea, alí ni tótaka boʼisáaká rilé, mujé echoná cho asimea”.
Japi bichíwali ju: Jepuná texto ke aniwáami ju japi Onorúami atí omáana Wichimóbachi, nalí tamó ruyé japi Onorúami a omero tamujé kuʼiria kumi ke muchuwi.
a Echi Biblia ko aní japi Onorúami Jeobá rewé.