Kiti wikawabo tania Jeobá jarecho jitra

1. ¿Chúriká ti machí japi Jeobá ko we natéami niraa iné japi ta echi yúa raʼichabo?

JEOBÁ yúa raʼichia bilé chiliwéliami we natéami ju. Natabo jepuná: Jeobá ko iyali jaré nóchali echi ángeles alí ayénachó iyali nóchali we natéami echi binoy Nolá (Sal. 91:11; Mat. 28:18). Nalí be, Jeobá ju japi tamó kipú japalí ta echi yúa raʼicha; jepuná ju bilé nóchali japi echi binoy nakili isínalia (Sal. 65:2). Jeobá ko binoy niraa tamujé kipúnali japalí ti echi yúa raʼicha.

2. ¿Piri ta biné echi apóstol Pablo jitra?

² Ati oméripo ruyea Jeobá suwaba echi namuti japi ta nata, nalí ayénachó tánisaré jarecho jitra. Echi riká isili echi apóstol Pablo. Japi riká, aneli echi cristianos congregación Éfeso muchúwami: “Nijeni ke siné ariwé [...] Riosi yuwa tániga raʼicha siʼnéami ʼyemi jiti” (Efes. 1:16). Nalí ayénachó tánili Jeobá jaré echi cristianos jitra. Japi riká, echi ko osélili Timoteo: “Nijeni walú natétara ʼya Riosi mapujítini sinibí rawé we ʼnata mujé jiti, sinibí rokogó ayénachó, mapalini tániga raʼícha Riosi yuwa” (2 Tim. 1:3). Pablo ko ikiyé wiká namuti we jilírami japi jitra iʼwírili tánima Jeobá. Nalí be, echi ko iʼwérili isili tania Jeobá jarecho pagótami jitra (2 Cor. 11:23; 12:7, 8).

3. ¿Chúsiá ta isini kaachi ke newaláboré tania Jeobá jarecho jitra?

³ A keʼré japi isini kaachi ke newalabo tania Jeobá jarecho jitra. ¿Chúsiá? Bilé hermana Sabrinaa riwéami jéaní: “Ati noká wiká namuti, jiti la ti ke ikiri tania Jeobá jarecho jitra. A keʼré japi ta we nata echi namuti jilírami japi ta ikí, jiti la ti tániporé Jeobá japi tamujé bi newalé”. Ati echi riká ikiyáaká, jepuná binelíwami we tamó iʼwírima. Bachá binepo chúsiá we natéami ju tania Jeobá jarecho jitra. Alí miná ko binepo jaré namuti japi chúriká ti omeri nokayá.

¿CHÚSIÁ WE NATÉAMI JU TANIA JARECHO JITRA?

4, 5. ¿Chúriká ta machí japi ne bichíwali iʼwiri japi ta tani jarecho jitra? (Santiago 5:16).

⁴ Tania jarecho jitra “we aʼlá iʼwiri” (leeri Santiago 5:16, TNM). ¿Chúriká ta machí japi ne bichíwali iʼwiri japalí ti tani jarecho jitra? Inepo jaré ejemplos. Jesús, japi machili japi Pedro animea japi ke machí echi, jéaneli: “Nijeni we tánali mapurigá Riosi mi waminabi galá bichíirama” (Luc. 22:32). Pablo ayénachó aʼlá machiyé japi tania jarecho jitra we aʼlá iʼwiri. Jiti la, japalí erta achárami nili echoná bitichí echomí Roma, osélili Filemón: “Mayé mapu nijeni ke ʼme ayó ku machí pátami níima, [...] mapujiti ʼyémitamo wabé tánali mapurigá Riosi tamí kuʼwírama” (Filem. 22). Alí echi riká ikili, ke wilí simírili japalí echi ko ku machí pátami nili alí omérili ku nawesia.

⁵ Nalí be, jepuná ko ke aniwáami ju japi ta iʼwérili anepo Jeobá japi isima japi ta tani. Nalí Jeobá ko a natéami niraa iné echi namuti japi ta we nata, alí isini kaachi a isimí japi ta tani. Machiyá jepuná tamó iʼwírima jiti ne sulachí jonsa tánipo Jeobá echi namuti japi ta we nata, alí miná ko bichiwia japi echi ko isima japi ta tani, a aʼlá niraa inésaká (Sal. 37:5; iné japi aní 2 Corintios 1:11, TNM, alí echi notas de estudio).

6. ¿Chúsiá tania Jeobá jarecho jitra tamó iʼwiri chilíwiami niya? (1 Pedro 3:8).

⁶ Tania Jeobá jarecho jitra tamó iʼwiri chilíwiami niya (leeri 1 Pedro 3:8, TNM). Echi pagótami japi chilíwiami ju, echi ko iné japi chu inili jarecho alí isimí bilé namuti echi iʼwírimia (Mar. 1:40, 41). Bilé anciano Michael riwéami jéaní: “Japalí ni tani Jeobá japi iyama japi newalé jarecho, ani aminabi machí japi echi ko we jilí niraa, alí jepuná isimí japi ni aminabi we galema. Tákoré echi hermanos ko ke machí, nijé ko aminabi mulipi ka nili echi yúa”. Richard, japi ayénachó anciano ju, ruyé bilecho namuti aʼláala japi ikí japalí tani Jeobá jarecho jitra: “Japalí ti iʼwírili tani Jeobá bilé jitra, ati aminabi inili iʼwírinalia”. Alí ayénachó jéaní: “Iʼwiria echi pagótami japi ta jitra tánili Jeobá, ju japi riká ko tamujé si iʼwiria jiti ikimea japi riká ti ma tánili”.

7. ¿Chúsiá tania jarecho jitra tamó iʼwiri natia japi echi chati namuti japi ta ikí ke me jilírami ju? (Filipenses 2:3, 4; ayénachó iné echi imágenes).

⁷ Tania jarecho jitra tamó iʼwiri natia japi echi chati namuti japi ta ikí ke me jilírami ju (leeri Filipenses 2:3, 4, TNM). Jiti ta piré japoná nulá echi Diablo, sinéami ta ikí namuti we jilírami (1 Juan 5:19; Apoc. 12:12). Japalí ti sinibí tani jarecho jitra, jepuná tamó newalari japi sinéami hermanos omáana Wichimóbachi piréami ayénachó risoa nili japi riká tamujé (1 Ped. 5:9, TNM). Bilé precursora Katherine riwéami jéaní: “Japalí ni tani jarecho jitra tamí newalari japi ke nijé bi ju japi ikí namuti jilírami, alí tamí iʼwiri ke nijé binoy bi jitra natia”.

¿JÉPUKÁ NEWALÉ JAPI ECHI JITRA TÁNIPO?

8. ¿Jépuká jitra ati tánisaré Jeobá?

⁸ ¿Jépuká jitra ati tánisaré Jeobá? Japi riká, echi jitra japi nayúami ju, echi remalí japi kawélitami ju alí echi japi iʼwérili anéliwa echoná escuela japi cha nokimea. Ayénachó ti omeri tania echi jitra japi ochérami o wiláami nílisimi. Wiká hermanos sayéritami ju, jaré ko echi téemala jitra alí jarecho ko echi gobiernos jitra (Mat. 10:18, 36; Hech. 12:5). Jaré ko riwesa simíali echi bitela jiti echi gobiernos naʼáwika piré alí jarecho ko risoa nili echi desastres naturales jitra. A keʼré japi ta ke machí echi hermanos. Nalí japalí ti tani echi jitra, ati néwariwéliti japi ta nijewi echi nulalíwami japi Jesús anili, japi ta anakupi galepo (Juan 13:34).

9. ¿Chúsiá ti tánisaré echi hermanos jitra japi noká nóchali echoná Jeobá níwala organización alí echi upila jitra?

⁹ Ayénachó ti omeri tania echi hermanos jitra japi noká nóchali echoná Jeobá níwala organización. Japi riká echi Aʼlá Nisériami alí echi kuʼíriami, Comités de Sucursal, echi japi jawárami ju echoná departamentos echi sucursales jitra, superintendentes de circuito, ancianos echoná congregaciones alí echi siervos ministeriales. Wiká echi hermanos aboi ikí namuti we jilírami, nalí ayénachó iʼwérili noká tamó iʼwiria (2 Cor. 12:15, TNM). Japi riká, Mark, japi ju superintendente de circuito, jéaní: “Bilé namuti japi ni we jilírami niraa ko ju ke asiyá kini wénwala yúa, japi okuánika ma ochérami ju alí nayúami. Ani aʼlá machí japi nijé ochilá alí echi kunala we aʼlá tibú, nalí ani omona nili jiti ni ke me omeri iʼwiria japi riká nijé nakí”. Tákoré ke ti aʼlá machí suwaba echi jilírami namuti japi ikí echi hermanos, we aʼlá ju japi tánipo Jeobá echi jitra (1 Tes. 5:12, 13). Ayénachó ati omeri tania echi upila jitra, japi iʼwérili noká iʼwiria echi kunala jiti ke riwema iʼwiria echi hermanos.

10, 11. ¿Achi galé Jeobá japi tánipo wiká hermanos jitra?

¹⁰ Japi riká ti ma bineli, wisabé niraa ti tani Jeobá wiká hermanos jitra. A keʼré japi tánipo japi iʼwírima echi hermanos japi cárcel muchuwi alí japi ku kanílitima echi hermanos japi mukuli bilé japi echi galé. Bilé anciano Donald riwéami jéaní: “Nirú wiká hermanos alí hermanas japi ikí namuti we jilírami, jiti la ti tani sinéami echi jitra”.

¹¹ ¿Achi galé Jeobá japi tánipo wiká hermanos jitra? ¡Ayénaʼá! Jiti ta ke machí piri namuti newalé ibili niraa echi hermanos. Jiti la, aʼlá ju japi tánipo sinéami jitra (Juan 17:20; Efes. 6:18). Echi riká ti néwariwélitipo japi ta galé sinéami hermanos (1 Ped. 2:17).

¿PIRI TA OMERI NOKAYÁ JAPALÍ TI TANI IBILI HERMANOS JITRA?

12. ¿Chúriká tamó iʼwiri aʼlá inéami niya?

¹² Aʼlá inéami nipo. Tákoré aʼlá ju japi tánipo wiká hermanos jitra, ayénachó aʼlá ju japi tánipo ibili hermanos jitra. Japi riká, ¿achi nirú bilé hermano echoná congregación japi olá bilé nayulí we jilírami? ¿Achi nirú bilé remalí japi siwea nili jiti echi compañeros echoná escuela iʼwérili ané japi isima chati namuti? ¿O achi nirú bilé hermano o hermana japi bineli weelia atí echi ranala bineria Jeobá jitra? (Efes. 6:4, TNM). Ati aʼlá inéami nísaká, ati natabo chu inili echi hermanos alí jepuná tamó iʼwírima jiti tánipo echi jitra (Rom. 12:15).b

13. ¿Chúriká tánipo Jeobá echi hermanos jitra japi ta ke machí?

¹³ Néepo echi riwalá. Echi riká ti omeri nokayá tákoré ti ke machí echi hermanos. Japi riká, natabo echi hermanos jitra japi erta muchuwi echomí Crimea, Eritrea, Rusia alí Singapur. Echoná jw.org ati riwiboa echi riwalá.c Bilé superintendente de circuito Brian riwéami, jéaní: “Japalí ni osá bilé hermano riwalá japi erta atí alí ni jiwérika aní echi riwalá, ani ke me jilí niraa néwalayá alí tania echi jitra japalí ni Jeobá yúa raʼicha”.

14, 15. ¿Piri tamó iʼwírima aʼlá machiyá piri newalé echi hermanos?

¹⁴ Tánipo Jeobá echi namuti jitra japi newalé echi hermanos. Michael, japi ta jitra raʼíchiki echoná párrafo 6, tamó ané japi binoy isimí: “Japalí ni leeri echoná jw.org echi hermanos jitra japi cárcel muchuwi, ani iʼwérili isimí natia japi chu inílimili nijé echi riká cho ikílaká; ani machí japi nijé we natámili nijé upila jitra alí ni nakimeli japi olama japi newalé. Jepuná tamí iʼwiri jiti ni tánima Jeobá echi namuti japi newalé echi hermanos japi niwíkami ju alí erta muchuwi” (Heb. 13:3, TNM).

¹⁵ Japalí ti nata japi ikí sinibí rawé echi hermanos japi cárcel muchuwi, tamó iʼwírima machiyá piri namuti tánipo echi jitra japalí ti raʼichi Jeobá yúa. Japi riká, ati omeri tania Jeobá japi echi cárcel tibúami simá nokáami nima echi yúa o japi echi weli jáwami riwema japi omérima nóchilia Jeobá (1 Tim. 2:1, 2). Ayénachó ti omeri tania japi echi namuti japi noká echi hermanos we nijéwami, iʼwérili iyama echi congregación japi echoná mulipi wilí alí iʼwírima japi echi pagótami japi ke Testigos ju machinálima Jeobá jitra (1 Ped. 2:12). A bichíwali ju japi aʼlá inéami niya, néea echi riwalá alí tania echi namuti japi newalé, ati omeri nokayá japalí ti tani chuwé hermano jitra, ke bi echi jitra japi cárcel muchuwi. Echi riká néwariwélitipo japi ta we galéami ju anakupi niraa (1 Tes. 3:12).

AʼLÁ NÁTIKA NOKIBOA JAPALÍ TI RAʼICHA JEOBÁ YÚA

16. ¿Chúsiá ti aʼlá nátika nokisáré japalí ti tani echi hermanos jitra? (Mateo 6:8).

¹⁶ Japi riká ti ma bineli, japalí ti tani Jeobá echi hermanos jitra, ati iʼwiria riwélipo echi hermanos. Nalí be, ati aʼlá nátika nokisáré. ¿Chúsiá? Jiti japalí ti raʼicha Jeobá yúa, ke ti bilé kulíwami namuti ruyé jiti echi ko ma suwaba machí. Ayénachó ke ti busuré iyásaré japi chúriká isima bilé namuti jitra. Jeobá ko machí piri newalé japi echi nijéwami ju japalí echi aboi kecho bijí machí o japalí tamujé kecho bijí machí (leeri Mateo 6:8). Jiti la, ¿chúsiá ti tánisaré jarecho jitra? Jenaʼí binelíwami ati bineli jaré namuti. Nalí nirú bilecho namuti: echi riká noká echi pagótami japi nata jarecho jitra. Jiti ta we galé echi hermanos, ati tani Jeobá echi jitra. Alí echi ko we kanili inea japi ta iʼwérili noká niya japi riká binoy ju.

17, 18. ¿Chúriká ti machí japi Jeobá we kanili japalí ti tani jarecho jitra? Ruyé bilé ejemplo.

¹⁷ Tákoré ti nata japi ke iʼwiri echi oraciones japi ta niwá jarecho jitra, jepuná néwariwéliti japi ta we galé echi hermanos, alí Jeobá ko iné japi ta noká. Natabo bilé onolá japi olá bilé towí alí bilé tiwé. Echi taa towí nayúa boʼí echoná cama alí echi taa tiwé wisabé ané echi onolá japi iʼwírima echi rejimala. Echi onolá ko ma machí, we galé echi ranala alí we aʼlá tibú. Nalí be, echi ko we kanili inea japi echi taa tiwé tani japi iʼwírima echi rejimala jiti we galé.

¹⁸ Echi riká cho, Jeobá ko nakí japi ta natéami niraa inepo jarecho alí tánipo echi jitra. Echi riká néwariwélitipo japi ke tamujé bi jitra nata nalí ayénachó echi hermanos jitra, alí Jeobá ko newalama japi ta noká (2 Tes. 1:3; Heb. 6:10). Ayénachó, japi riká ti ma bineli, isini kaachi Jeobá ko a isima japi riká ti tánili. Jiti la, ¡kiti siné wikawabo tania echi hermanos jitra japalí ti raʼicha Jeobá yúa!