Tagutáma yiíca tangẽmagü

1-2. (a) Tüꞌcüü̃ nagu tayaõgü na taguma yiíca iĩgü i gutchaü̃güwa? (b) Taꞌacü tá nüü̃ tadaugü i nhaa nguꞌwa?

NGẼGUMA taü̃tchiü̃ gutchaü̃ tüü̃ ngupetügügu nagu tarüĩnüẽcüraü̃ na nhuguãcü yiíca iĩgüü̃, nhama tchi nguegu íranegu iũü̃rüü̃ i ngãü̃tügu ngẽma taü̃tchiü̃ buanecü tüü̃ iürüü̃. Notürü aicuma niĩ tama yiíca iĩgüü̃. Tanatü ya Ngetchaü̃waꞌecü ya Yeuwa nüü̃ nadau i torü gutchaü̃gü. Rü nhuꞌmatchi nüma rü tamaã inauneta na tüü̃ narüngü̃ẽẽ rü ngẽmagagu nhanagürü tüü̃: “Pexü̃ charüngü̃xẽẽxü̃.” — Isa. 41:10.

² Nhaa nguꞌwa nüü̃ tadaugü na nhuãcü Yeuwa tüna nadau i ãgümücü i nacümagüwa, rü nhaa niĩgü: (1) nüma tamaã naũpeꞌe, (2) tüna nanaã i taꞌacü inawaꞌegüü̃wa, (3) tüü̃ ínapoü̃ rü (4) tüü̃ nataãẽẽẽ. Nüétama i gutchaü̃gü i torü maü̃wa nangupetügu, Yeuwa taguma tüü̃ inarüngüma rü bai nhugu tüna niũgatchiü̃. Rü ngẽmacaꞌ, yiemagü tagutáma yiícaꞌ tiĩgü.

YEUWA TAMAÃ NAŨPEꞌE

3-4. Nhuãcü Yeuwa tamaã naũpeꞌe? (Salmo 48:14)

³ Nawa naugütae Salmo 48:14. Yeuwa nüü̃ nacuaꞌ na yiemagü tama meã yigümaãtama ícuágüü̃ rü tanawaꞌegü i norü ucuꞌẽgü. Nhuãcü Yeuwa tamaã naũpeꞌe? Nüma rü nanaü i ngẽma i Norü Orewa. (Sal. 119:105) Rü Norü Orewa tüü̃ nangúẽẽ na nhuãcü meü̃ i uneta iügüü̃ rü nhuãcü meü̃ nacümagü tüü̃ nangẽma na ngẽmaãcü taãẽãcü imaẽü̃caꞌ i nhuꞌma rü tüü̃ nangẽmaü̃caꞌ i maü̃ i taguma gúü̃ i wipeꞌewa.a Cuaꞌãtchiruü̃, nüma rü tüü̃ nangúeẽẽ natchiga togüeü̃ nüü̃ ingetchaü̃ rü tama tümamaã inueetchaü̃ rü nhuãcü guü̃guma tiaicumagüü̃ rü nhuꞌmatchi aicuma yigü ingetchaü̃gü i guü̃ i torü maü̃nemaã. (Sal. 37:8; Ebr. 13:18; 1 Pe. 1:22) Ngẽguma ngẽma iügügu rü meü̃ nanatügü tiĩgü, meü̃ namaꞌgü tiĩgü, meü̃ i nategü tiĩgü rü meü̃ namücügü ta tiĩgü.

⁴ Rü Norü Orewa ya Yeuwa rü duü̃ü̃gü aicuma maẽü̃ nautchiga ta na nhuãcü nümagü rü nüü̃ narüporamaẽgüü̃ i gutchaü̃gü rü namaã nawüigu i nhamaãcüü i torü gutchaü̃gü. (1 Cor. 10:13; Tia. 5:17) Nawa taugütaegü i ngẽma duü̃ü̃güarü ore rü ngẽma nguꞌẽẽtaegu taĩ rü torü mecaꞌ niĩ i tare i nacümawa. Norü wüi niĩ, nüü̃ ticuaꞌãtchitanü tama tüü̃rica nangupetüü̃ i gutchaü̃gü erü togüegü nüü̃ tarüporamaegü i Yeuwaarü ngü̃ẽẽmaã i gutchaü̃gü. (1 Pe. 5:9) Rü norü tare niĩ, nawa nüü̃ tacuaꞌgü na nhuãcü torü gutchaü̃maã yana iĩnüeü̃. — Rom. 15:4.

5. Teéwa Yeuwa tamaã naũpeꞌe?

⁵ Yeuwa tamaã naũpeꞌe i taenegüwa rü taeyagüwa ta.b Cuaꞌãtchiruü̃, natücumügüarü ngugütaeruü̃gü rü nüü̃ iniadaugü i yaõgüü̃tücumü na nüü̃ naporaẽẽgüü̃caꞌ. Norü ore i meü̃maãgü, nümagü rü tüü̃ naporaẽẽgü i torü õwa rü tüü̃ narüngü̃ẽẽgü na wüigu rüĩnüẽü̃caꞌ. (Pur. 15:40–16:5) Rü õgüü̃tanüü̃arü dauruü̃gü ta nügü naporaẽẽgü na tüü̃ narüngü̃ẽẽü̃caꞌ i wüeitchigü i yiemagü na yeraãcü Tupanana ingaicamagüü̃caꞌ. (1 Pe. 5:2, 3) Rü nanatügü rü naacügüü̃ nangúeẽẽ natchiga ya Yeuwaü̃ nangetchaü̃güü̃caꞌ rü nhuãcü meü̃ i uneta naügüü̃caꞌ rü nhuãcü meü̃ i nacüma nüü̃ nangẽmagüü̃caꞌ. (Pro. 22:6) Rü taeya i yeeraãcü nüü̃ cuaꞌgüe rü tüü̃ tarüngü̃ẽẽ i taeyagü i paegü ngẽguma meã tüü̃ taucuꞌẽgu rü tüü̃ taporaẽẽgu. — Titu 2:3-5.

6. Taꞌacü tá iügüü̃ na tanaweꞌü̃caꞌ na moẽ nüna iãgütchaü̃caꞌ i nagagu tamaã naũpeꞌe?

⁶ Yeuwa meã tamaã naũpeꞌe. Taꞌacü tá iügüü̃ na tanaweꞌü̃caꞌ na moẽ nüna iãgütchaü̃caꞌ i ngẽmagagu? Provérbios 3:5, 6wa nhanagürü: “¡Guxü̃ne ya curü maxü̃nemaxã nüxna rüyoe ya [Yeuwa ya] Cori ya Tupana, rü taxṹ i nüxna curüyoexü̃ i curü cua̱x!” Tchi ngẽma iügügu, ‘nüma rü tá tamaã inacuaꞌ rü meã tá tüü̃́ ínanguutchi i ngẽma iügüü̃wa’. Ngẽma rü nüü̃ niutchaü̃ na Yeuwa rü tüü̃ narüngü̃ẽẽ na nüna tiĩgatchiü̃caꞌ i gutchaü̃ rü taãẽãcü imaẽü̃caꞌ. Poraãcü Yeuwana moẽ taãgü nagagu nüma meã tüü̃ nacuaꞌü̃ i wüietchigü i yiãgü rü tüü̃ ngetchaü̃ãcü tüü̃ naucuꞌẽ. — Sal. 32:8.

YEUWA TÜNA NAÃ I TAꞌACÜ TANAWAꞌEGÜÜ̃WA

7. Nhuãcü tüna naã i taꞌacü inawaꞌegüü̃wa? (Piripucü̃ãꞌ 4:19)

⁷ Nawa naugütae Piripucü̃ãꞌ 4:19. Yeuwa tamaã naũpeꞌe i torü õwa rü nüma rü tüna nanaã i taꞌacü inawaꞌegüü̃wa. Nhuãcü? Nüma rü tüü̃ narüngü̃ẽẽ i ngẽguma yigü iporaẽẽgügu na tüü̃ nangẽmaü̃caꞌ i õna rü tatchiru rü wüi natchica na nagu ipegüü̃caꞌ. (Mat. 6:33; 2 Te. 3:12) Taũma natchie nacaꞌ tagutchaãẽ i ngẽma, notürü Yeuwa nüü̃ niu na tama name poraãcü taoẽgaãẽ i torü ngẽmaü̃caꞌ. (Mat. 6:25.) Nüma namaã ínauneta na tagutáma nüü̃ inawogü i norü duü̃ü̃gü i norü gutchaü̃güwa. (Mat. 6:8; Ebr. 13:5) Name aicuma nagu tiaõgü na Yeuwa nayanguẽẽ i norü uneta i natchiga tüna nadauü̃ i taꞌacü inawaꞌegüü̃wa.

8. Nhuãcü Yeuwa nüü̃ narüngü̃ẽẽ ga Dawí?

⁸ Nüü̃ nadau nhuãcü Yeuwa nüü̃ narüngü̃ẽẽ ga Dawí. Rü Dawí muü̃ma ga taunecügu Chaútchawa ninha. Yema gutchaü̃wa, Yeuwa nüü̃ narüngü̃ẽẽ ga nüma rü norü duü̃ü̃gü ga taꞌacü nanawaꞌegüü̃wa na ngẽmaãcü namaẽamaü̃caꞌ. Dawí yeguma nagu rüĩnügu na nhuãcü Yeuwa nüna nadau rü nhanagürü: “Rü yexguma changextü̱xügu rü ñu̱xma nax chayáxü̃gu rü taguma nüxü̃ chadau nax ngexta nata̱xmarexü̃ ya wüxi ya yatü ya mexü̃ ücü, rü woo i nanegü i nüxü̃ chadauxü̃ i ngextá paũca̱x nax naca̱a̱xü̃wa̱xegüxü̃.” (Sal. 37:25) Bemana cuma rü marü nüü̃ quicuaꞌãtchi i Yeuwaarü ngetchaü̃ ngẽguma cuna rü taenegüna nadaugu i gutchaü̃güwa.

9. Ngẽguma taütchiü̃ i gutchaü̃ ngupetügu, nhuãcü Yeuwa tüna nadau i taꞌacü inawaꞌegüü̃wa? (Nüü̃ nadau ta i natchicünaꞌãgü.)

⁹ Yeuwa tüna nadau i taꞌacü inawaꞌegüü̃wa ngẽguma taütchiü̃ i gutchaü̃ ngupetügu. Cuaꞌãtchiruü̃, yeguma nũcümaü̃tchima wüi taiya i taü ínangugu i Yerucharéü̃wa, yaõgüü̃ ngéma nanamugü i ngẽmaü̃gü i nacaꞌ naenegü i yéma yemagüü̃. (Pur. 11:27-30; Rom. 15:25, 26) Nhamaãcüü Yeuwaarü duü̃ü̃gü ngẽmaãcütama nanaügü. Ngẽguma taütchiü̃ i gutchaü̃ ngupetügu, Yeuwa taenegüwa nüna nanaã i deá, õnagü, natchirügü rü toomatchigü na taenegü i ngẽma gutchaü̃wa ngẽmagüü̃ na naãgüü̃caꞌ. Natücumü i cuaꞌüü̃pataü̃arü üruü̃gü, nanameẽẽgü i ĩpatagü rü ngutaqueꞌepataü̃gü nagagu i taütchiü̃gü i gutchaü̃gü erü nawaꞌtaü̃gü . Rü nhuꞌmatchi, Yeuwaarü duü̃ü̃gü rü paa Tupanaarü Oremaã tüü̃ nataãẽẽẽ rü tüü̃ naporaẽẽ ya yíema tüü̃ taue i ĩpata rü ngẽguma tayugu i duẽẽ i tüü̃ ngetchaü̃güe.c

10-11. Taꞌacü Borys arü cuaꞌruü̃wa nüü̃ cucuaꞌ?

¹⁰ Yeuwa ta tüna nadau ya yíema taũta nacaꞌ maẽe. Yeuwarüü̃, yiemagü yigü taporaẽẽ na tümamaã imecümaü̃caꞌ i yíema i tama taenegü iĩgüe. (Gár. 6:10) Ngẽguma ngẽma tanaügügu, mueꞌpüꞌcüna meã tá ínanguutchi. Nüü̃ nadau i Borys arü cuaꞌruü̃, wüi yatü i ngúepataü̃éru niĩ i Ucrâniawa. Woo tama Yeuwaarü Orearü Uruü̃ niĩ, nüma rü guü̃guma namaã namecüma i norü ngúetanüü̃gü i Yeuwaarü Orearü Uruü̃gü iĩgüü̃. Yeguma Borys to natchicawa naũgu nagagu i dai, taenegü rü nüü̃ narüngü̃ẽẽ. Nawena, nüma rü nüü̃ nadawenü i Ngutaqueꞌe ya Ngetchutchuarü yuna cuaꞌãtchiü̃. Nüma rü nagu narüĩnü i guü̃ma i taꞌacü taenegü nacaꞌ naügüü̃ rü nhanagürü: “Yeuwaarü Orearü Uruü̃gü ãũrima tchamaã namecümagü rü tchona nadaugü. Rü moẽ nüna tchaãtchaü̃!”

¹¹ Narüü̃ ya Yeuwa nüü̃́ tangetchaü̃tümüü̃gücü rü yiemagü rü tanawaꞌegü tüü̃ tangetchaü̃gü ya guẽma teé nawaꞌeü̃ i ngü̃ẽẽ woo tama Yeuwaarü duü̃ü̃gü iĩgüe. (Luca 6:31, 36) Ãũrima tanawaꞌegü na ngẽguma togüemaã ingetchaü̃waꞌegügu rü tümagü rü Tupanana tangaicamagü tá. (1 Pe. 2:12) Notürü nüétama tchi ngẽma rü nangupetügu, tataãẽgüama erü ‘narümemae niĩ i yiema na toguena inaãü̃’. — Pur. 20:35.

YEUWA TÜÜ̃ ÍNAPOÜ̃

12. Nhuãcü tá Yeuwa norü duü̃ü̃güü̃ ínapoü̃? (Salmo 91:1, 2, 14)

¹² Nawa naugütae Salmo 91:1, 2, 14. Nhamaãcüü, Yeuwa tamaã inauneta na tüü̃ ínapoü̃ i nacaꞌ i guü̃ma i taꞌacü i nüna tüü̃ iĩgatchiẽẽtchaü̃. Yeuwa taguma Tchatanáü̃ nanatautchaẽẽ na yaguꞌẽẽãü̃ i cuaꞌüü̃ i aicumaü̃. (Juã́ũ 17:15) Rü ngẽguma ‘ngúü̃ i taü’ ingugu, Yeuwa nayanguẽẽ tá i norü uneta rü tüü̃ ínapoü̃ i torü õwa rü tüü̃ ínanguü̃ẽẽ tá. — Apo. 7:9, 14.

13. Nhuãcü Yeuwa ínanapoü̃ i wüitchigü i norü duü̃ü̃gü?

¹³ Nhuãcü Yeuwa nüü̃ ínapoü̃ i wüitchigü i norü duü̃ü̃gü? Namaã i Norü Ore Yeuwa tüü̃ narüngü̃ẽẽ na meã nüü̃ cuaꞌü̃caꞌ ngeü̃rüüü̃ metchinüü̃ rü ngeü̃rüüü̃ gutchinüü̃. (Ebr. 5:14) Ngẽguma aicumaü̃tchi naügügu ngẽma Norü Oreãcü, rü tüü̃ ínapoü̃ i torü õwa rü taü̃newa. (Sal. 91:4) Yeuwa ta yaõgüü̃tücumüwa tüü̃ ínapoü̃. (Isa. 32:1, 2) Taenegü rü Yeuwaü̃ ngetchaü̃güü̃ rü norü ucuꞌẽgüãcüma namaẽ. Rü ngẽguma taenegüü̃tawa ingẽmagügu, tanayaugü tá i taãẽ rü pora na nüna tiĩgatchiü̃caꞌ i ngẽma tchieü̃. — Pro. 13:20.

14. (a) Tüꞌcüü̃ Yeuwa tama nanatchuꞌu na norü duü̃ü̃gü niõẽgüü̃? (b) Taꞌacü Salmo 9:10wa tamaã inauneta? (Nüü̃ nadau ta i nhatüguama wüü̃.)

¹⁴ Aicumaü̃tchi niĩ nũcümaü̃tchi Yeuwa nhuguãcü nüü̃ ínapoü̃ i nümaü̃ i norü duü̃ü̃gü i yuwagü rü cuaiꞌgüwa. Notürü muü̃tchiü̃ niõẽgü rü nayue i gutchaü̃gagu. Tupanaarü Ore tüü̃ nanguꞌẽẽ na ngeü̃rüüü̃mare i duü̃ü̃gümaã ngürüãtchi nangupetüü̃ i gutchaü̃gü. (Ecl. 9:11) Rü nhuꞌmatchi, nümaü̃ i Yeuwaarü duü̃ü̃gü i nũcümagüü̃ rü nawe ningeü̃tanü nhuꞌmata nayue, rü ngẽma rü tá ta tamaã nangupetüü̃ i nhamaãcüü. Rü ngẽmawa Yeuwa nanaweꞌ na Tchataná wüi dorataꞌaü̃ niĩ. (Jó 2:4-6; Mat. 23:34) Yeuwa bemana tama tüü̃ ínanguü̃ẽẽü̃ tá i guü̃ma i torü gutchaü̃güwa. Notürü Tupanaarü Ore tamaã inauneta na nüma rü tagutáma tüna niũgatchi ya yíema nüü̃ ngetchaü̃güe.d — Sal. 9:10.

YEUWA TÜÜ̃ NATAÃẼẼẼ

15. Nhuãcü Yeuwa tüü̃ nataãẽẽẽü̃ i yumüẽwa, Norü Orewa rü ngutaqueꞌegüwa? (2 Corĩ́tiucü̃ãꞌ 1:3, 4)

¹⁵ Nawa naugütae 2 Corĩ́tiucü̃ãꞌ 1:3, 4. Nhuguãcü, tangetchaü̃gü, taiꞌãtchiãẽgü rüeꞌna taoegaãẽgü. Bemana ngẽma rü cuü̃ nangupetüü̃ i nhuꞌma. Eꞌna teé nüü̃ tacuaꞌ na ngẽma rü cuü̃ nangupetüü̃? Yeuwa meãma nüü̃ nacuaꞌ. Nüma rü wüigu tamaã ngúü̃ ninge, rü nhuꞌmatchi ‘ngẽguma ngúü̃ ingegügu, rü nüma ya Tupana niĩ i tüü̃ nataãẽẽẽü̃’. Nhuãcü nüma nanaü i ngẽma? Ngẽguma iyumüẽgügu rü nüna nacaꞌ icaetchagu i norü ngü̃ẽẽ, nüma rü tüna naã i “norü taãxẽ i guxü̃ma i taãxẽ i nüxü̃ icuáxü̃arü yexera mexẽchixü̃”. (Pir. 4:6, 7) Rü nhuꞌmatchi tüü̃ nataãẽẽẽ ngẽguma Norü Orewa iugütaegügu. Tupanaarü Ore tüü̃ nanaweꞌ na nhuãcü Yeuwa tüü̃ nangetchaü̃, tüü̃ nanguꞌẽẽ na taãẽü̃ ícuaꞌü̃caꞌ rü tüna nanaã i meü̃ i unetagü. Rü ngutaqueꞌegüwa ta tüü̃ nataãẽẽẽ. Ngéma, taenegü tüü̃ nangetchaü̃gü rü tüü̃ nataãẽẽẽ i Tupanaarü Oremaãgü.

16. Taꞌacü Natan rü Priscila arü cuaꞌruü̃wa tüü̃ nanguꞌẽẽ?

¹⁶ Nüü̃ nadau i taꞌacü nüü̃ ngupetügüü̃ i Natan rü Priscilamaã i Estados Unidosgu pegüü̃. Norü cuaꞌruü̃wa tüü̃ nanaweꞌ na Yeuwa tüü̃ nataãẽẽẽü̃ rü tüü̃ naporaẽẽü̃ i Norü Orewa. Nümaü̃ i taunecü ngupetügu, nümagü rü nüü̃ nauneta na nüü̃ narüngü̃ẽẽ ngetá inanawaꞌeü̃wa i ngü̃ẽẽgü. Natan nhanagürü: “Tomagü aicumaü̃tchi nagu tayaõgü na Yeuwa toétü nawémeꞌ i torü porawa.” Notürü yeguma ngéma nangugügu, ngürüãtchi nüü̃ nangẽma i gutchaü̃gü i naü̃newa rü dĩẽrugüwa. Nümaü̃ i nguneü̃guwena, nümagü nanawaꞌe na napatacaꞌ nawoeguü̃arü, notürü norü gutchaü̃gü rü nidaama i ngéma i dĩẽruwagü. Rü Natan rü natchigaü̃ niu i nhaü̃: “Yeuwa tama toétü nawémeꞌ i toma tanawaꞌeü̃ãcüwa, rü nüü̃ tchacuaꞌtchaü̃ na tüꞌcüü̃ me i ngẽma. Nagu tcharüĩnü: ‘Eꞌna tchieü̃ tchaüü̃?’”. Notürü nawena, Natan rü Priscila nüü̃ nicuaꞌãtchitanü na Yeuwa tama nüna niũgatchi i ngẽma norü gutchaü̃wa. Nüma rü nhanagürü: “Yema gutchaü̃wa, Tupanaarü Ore rü tchoü̃ naucuꞌẽ rü tchoü̃ nataãẽẽẽ nhama tchi meü̃ i tchamücürüü̃ niĩ. Nagu tarüĩnüẽ na nhuãcü Yeuwa marü toü̃ narüngü̃ẽẽü̃ rü tama i torü gutchaü̃gu tarüĩnüẽü̃caꞌ rü toü̃ narüngü̃ẽẽ na nagu tayaõgüü̃caꞌ na Yeuwa rü wipeꞌewa toü̃ narüngü̃ẽẽ tá ta.”

17. Nhuãcü Yeuwa tüü̃ nataãẽẽẽ a Helga? (Nüü̃ nadau ta i natchicünaꞌãgü.)

¹⁷ Taenegü rü taeyagü rü tüü̃ naporaẽẽgü rü tüü̃ nataãẽgüẽẽ. Nüü̃ nadau i taꞌacü taeya Helga maã ngupetüü̃ Hungriagu pee. Muü̃tchi i taunecügu, tüma rü tüü̃ nangẽma i gutchaü̃gü i tüü̃ oegaãẽ rü tüü̃ rümaãtchiẽẽü̃. Notürü ngẽguma tüma rü nagu tarüĩnügu i ngẽma gutchaü̃, tüma rü nüü̃ ticuaꞌãtchi na nhuãcü Yeuwa guü̃guma tüna nadau i taenegüwa. Helga nhatarügü: “Yeuwa guü̃guma tchoü̃ narüngü̃ẽẽ ngẽguma tchaturagu nagagu i tchorü puracüwa rü tchaune i daꞌaweü̃na tchadau rü yana namaã tchaĩnü ta i toomatchigü i gutchaü̃güwa. Rü ngẽma 30 taunecüguyane, Yeuwa guü̃guma tchoü̃ nataẽẽẽẽ. Mueꞌpüꞌcüna nüma rü ngẽma naü i taenegüarü dea i meü̃güwa. Ngẽguma tchama rü tchanawaꞌeü̃tchigu rü guü̃guma tchanayau i wüi ore i meü̃ i poperaguwümatügüü̃ rü toomatchigü i meü̃gü.”

18. Nhuãcü tá togüeü̃ itaãẽgüẽẽü̃?

¹⁸ Rü togüeü̃ itaãẽgüẽẽü̃ rü wüi nacüma i meü̃ niĩ na Yeuwacümaãcü naügüü̃, rü tacaꞌ ngẽma rü nameẽtchi. Notürü nhuãcü ngẽma iügüü̃? Rü yanaãcü tümacaꞌ rüĩnüẽü̃, rü taãẽãcü tümamaã ideagüü̃ rü tüü̃ rüngü̃ẽẽgüü̃ ya yíema ngü̃ẽẽwaꞌegüe. (Pro. 3:27) Rü yiemagü yigü taporaẽẽgü na tüü̃ itaãẽgüẽẽü̃caꞌ ya yíema i õẽgüe rü tauata Tupanacaꞌ maẽe. Ngẽguma torü dauetchita tayutanügu, urü tidaꞌawegu rüeꞌna tanaiꞌãtchiãẽgügu, yiemagü tanawaꞌegü na tüü̃ tiadaugü, meã tümacaꞌ tarüĩnüẽ rü tümamaã nüü̃ tiugü i wetchicurugü i tüü̃ taãẽẽẽü̃. Ngẽguma nüü̃ irüdauü̃gu ya Yeuwa ya tüü̃ taãẽẽẽcü rü taenegüü̃ tarüngü̃ẽẽgü na tama nüü̃ narütchaueü̃caꞌ rü nhuꞌmatchi nüü̃ tanangútchaü̃ẽẽ ya yiema taũta Yeuwacaꞌ maẽe na aicumaü̃tchigaü̃ nacuaꞌeü̃caꞌ. — Mat. 5:16.

YEUWA GUÜ̃GUMA TACÜWAWA NANGẼMA

19. (a) Nhuãcü Yeuwa tüna nadau? (b) Nhuãcü tá narüü̃ naügüü̃?

¹⁹ Yeuwa aicuma tümacaꞌ nagutchaãẽ ya yíema nüü̃ ngetchaü̃güe. Nüma rü taguma tüna niũgatchi ngẽguma gutchaü̃wa tangẽmagügu. Yeuwa tüna nadau nhama tchi wüi nanatü ngetchaü̃ãcü nanena nadauü̃rüü̃ niĩ. Nüma rü tamaã naũpeꞌe, rü tüna nanaã i taꞌacü tanawaꞌegüü̃wa, rü tüü̃ ínapoü̃ rü tüü̃ nataãẽẽẽ. Tanatü i ngetchaü̃waꞌecürüü̃ tiĩgü ngẽguma tüü̃ itaãẽgüẽẽgu rü tüü̃ rüngü̃ẽẽgügu ya yíema gutchaü̃wa ngẽmagüe. Woo gutchaü̃gü rü õẽgü torü maü̃wa nangupetügu, nagu tayaõgüama na Yeuwa rü tacüwawa nangẽmaü̃ erü nüma rü tamaã inauneta i nhaü̃: “¡Taxṹ i pemuü̃exü̃ . . .! Erü choma rü chapexü̃tagu.” (Isa. 41:10) Ngẽmaãcü, aicuma nagu tayaõgü na taguma yiíca ingẽmagüü̃!