Mayo

Cristianos bi̱ nikúwá nákhá siglo timbá na̱nguá nikáwíin índo̱ nirígá ewiʼ náa “xúgíʼ numbaaʼ”. Mbáa bi̱ niguáʼdiin e̱jñún nixmiéjuunʼ ga̱jma̱a̱ numuu rí xóo gúni muxniʼtsun bi̱ kúwá náa guʼwún. Bi̱ ninindxu̱ún jiámá bi̱ nikumu̱ún muni itháan ñajuunʼ Jeobá mbáa nindxaʼwamíjná muni itháan nda̱wa̱á. Tséʼyáá xúgíʼ dí nirígá, mú cristianos ninimíjna̱ xó má eʼngo̱o̱ náa nitaraʼa ga̱jma̱a̱ nixnún ga̱jma̱a̱ xúgíʼ a̱jkiu̱ún dí guaʼdáá a̱ngiu̱lú bi̱ nikúwá náa Judea (Hech. 11:​29, 30). Bi̱ nindrigú ganitsu, ndiyáá xú káʼnii Jeobá xtáa rañewu̱u̱n (Mat. 6:​31-33). Mbáa nimbájxu̱u̱n itháan májánʼ gajmiún a̱ngiu̱lú bi̱ nixnúún dí guaʼdáá. Ma̱ngaa nikúwá gagi wéñuʼ bi̱ nixna mbújkha̱a̱ o i̱mba̱ xóo niyambáá náa mixtambáñuun a̱ngiu̱lú (Hech. 20:35). w23.04 16 kutriga̱ 12, 13

Jeobá nguáná naʼni rí xa̱bu̱ bi̱ tséyamajkuíí mumbáñún xa̱bi̱i̱ mu mariʼña̱a̱ dí nutajkháan. Mbá xkri̱da, niʼni dí rey Artajerjes maniñuuʼ Nehemías mu matanga̱a̱ náa Jerusalén mu mañambáá náa maguma májáanʼ xuajen (Neh. 2:​3-6). Rí mbiʼi xúgi̱ Jeobá ma̱ndoo maʼni rí asndu xa̱bu̱ bi̱ na̱nguá nindxu̱ún Testigos ma̱ndoo mumbayulúʼ náa ndayúlú. Jeobá na̱nguá eriʼña̱a̱ pa̱jnu rí nuʼtájkáan. Mú índo̱ nariʼñulú nambáyulú mu maguajún jmbu. Ikha jngóo gíʼmaa muʼgími̱jna̱ mbuʼyáálú xú káʼnii eriʼñulú Anu̱lú bi̱ xtáa mekhuíí. Májánʼ gaʼni rí nguáná muriʼyáʼ mbiʼi mu mundxaʼwamíjna̱ xú káʼnii eriʼña̱a̱ Jeobá dí nuʼtájkáan (Sal. 66:​19, 20). Raʼkháa i̱ndó ndayóoʼ maguaʼdáá fe mu muʼtákáñíí Jeobá, ma̱ngaa ndayóoʼ mundrígúlu asndu káʼnii má xóo eriʼña̱a̱ (Heb. 11:6). w23.05 11 kutriga̱ 13; 12 kutriga̱ 15, 16

Índo̱ nixnaxímíjná náa Jeobá, nixuʼdámíjná mbuʼyamajkuíí ga̱jma̱a̱ muʼni i̱ndó rí nandoo ikhaa. Gíʼmaa muʼnimbáníí ajngáa rí niʼthá. Dí mu’ni rígi̱ na̱nguá nindxu̱u̱ ki̱wu̱n numuu dí Jeobá niʼniáanʼ mu muʼni rí naniguuʼ ikhaa (Apoc. 4:11). Ikhaa ni̱jkuáa náa a̱jkiu̱lú rí maʼndulú muʼninuwiinʼ ga̱jma̱a̱ mbuʼyamajkuíí ma̱ngaa niʼniáánʼ xó má kaʼnii ikhaa. Ikha jngóo ma̱ndoo muʼgua kanuu náa Jeobá, ma̱ngaa muʼnilú dí naniguuʼ ikhaa ga̱jma̱a̱ gagi. Raʼkháa i̱ndó rúʼko̱, naʼni a̱jkiu̱lú índo̱ nuʼni rí nandoo Jeobá ga̱jma̱a̱ nduʼyaridáá a̱ʼdióo (Mat. 11:​28-30). Gaʼndaaʼ itháán xtayáá Jeobá. Á mu natatsaʼwáminaʼ xúgíʼ dí niʼni ikhaa ga̱jma̱a̱ numaaʼ ga̱jma̱a̱ xúgíʼ mitsaanʼ dí maraʼdáá nda̱wa̱á, maʼndaaʼ xtayáá xóó itháan, rígi̱ mambáyáaʼ mu xáʼniaaʼ miʼskhoo matatsimbaʼ rí na̱nda̱ʼa̱a̱. Ma̱ta̱ya̱a̱ rí “kiʼtáñajunʼ ndrígóo na̱nguá nindxu̱u̱ mingíjyúuʼ” (1 Juan 5:3). Jesús niʼngo̱o̱ niʼnimbánuu dí nandoo Jeobá, numuu rí nindoʼoo mambáyúu ga̱jma̱a̱ nirmáʼáan a̱jkiu̱u̱n má xúʼko̱ dí makhánáʼ nda̱wa̱á (Heb. 5:7; 12:2). Ikhaa má xóo Jesús, atanda̱ʼa̱a̱ Jeobá maxnáa tsiaki̱i̱, garmáʼáan a̱jkia̱a̱nʼ má xúʼko̱ dí maraxtaa kámuu mbiʼi. w23.08 27, 28 kutriga̱ 4, 5

Xúgiáanʼ nanigulúʼ xóo kaʼniún xa̱bu̱ bi̱ naʼngo̱o̱ a̱jkiu̱ún, numuu rí tsekíʼniin índo̱ nuguaʼthi̱i̱n. Ma̱ngaa nanigulúʼ dí maʼngo̱o̱ a̱jkiu̱ún kuyulú índo̱ najngawáanlúʼ. Ga̱jma̱a̱ nuxnáalu númaaʼ ndxájulú bi̱ niʼsngúlú ga̱jma̱a̱ numuu Biblia numuu dí niʼngo̱o̱ a̱jkiu̱u̱n kaʼyulú índo̱ niʼniulúʼ miʼskhaa makru̱ʼu̱lú, mundrígúlu o muʼni mbáníí rí nijmañulúʼ. Mu nuxnáa numaaʼ, itháán Jeobá numuu dí naʼngo̱o̱ a̱jkiu̱ún kaʼyulú. Maski asndu ikháanʼ nanigulúʼ dí eʼwíinʼ maʼngo̱o̱ a̱jkiu̱ún kuyulú, mu mbáa ikháanʼ naʼniulú miʼskhaa. Mbáa xkri̱da, atatsaʼwáminaʼ dí natani̱ mbáa fíla mu ra̱ʼkhá tháan mbaʼ ga̱jma̱a̱ ikháán naʼniaaʼ má wakhaʼ. Mbáa maʼniulú miʼskhaa dí xákiʼnáanʼlu, mbáa xígi̱ egíʼnáaʼ índo̱ naku̱ma̱a̱ʼ dí Jeobá ra̱ʼkhá tháán ejyúuʼ mu maʼni̱i̱ mbá ku̱ba̱ʼ nuxi̱ʼ. Tséʼniuu má asndu xóo eku̱mu̱lú ndayóoʼ dí maʼngo̱o̱ itháan a̱jkiu̱lú. w23.08 20 kutriga̱ 1, 2

Jeobá niʼthúu̱n Gedeón maguanúu gajmíi̱n nguéjmi̱i̱n soldado ndrígióo. Mbáa ikhaa nidxaʼwáminaʼ: “Lá ndayóoʼ mani xúʼko̱ ráʼ. Lá magajnúu májánʼ á mu nani xúʼko̱ ráʼ.” Maski ajndu xúʼko̱, Gedeón ninimbo̱o̱. Xú káʼnii eyaridáá ikhaa a̱ngiu̱lú bi̱ kuya̱ edxu̱u̱ rá. Índo̱ xuajñuu Jeobá naʼthí dí rígá dí naxtiʼkhu̱u̱ ikhiin nunimbánii (Heb. 13:17). Gedeón ninimbo̱o̱ kaʼyoo Jeobá maski ajndu nirígá migamíi ga̱jma̱a̱ ikhaa nimíñuu (Juec. 9:17). Nda̱wa̱á dí Jeobá niʼni mbaʼyoo dí gajkhun mambáyúu, Gedeón ni̱jkha̱nú ndiʼyoo dí Dios má gambáyúu mañewu̱u̱n xuajñuu. A̱ngiu̱lú bi̱ ku̱ya̱ edxu̱u̱ bi̱ kúwá náa xuajen dí tséniñu̱u̱n mutaraʼa nindxu̱ún xóo Gedeón. Tsémiñún muriyaʼ awan xóo marigá reunión ga̱jma̱a̱ nuyegu̱u̱n edxu̱u̱ náa miʼtáraʼa maski ajndu migamíi muxudi̱i̱n guʼwá ejua̱n, muniu̱u̱n mbaʼa graxe̱, muxkawíinʼ náa nuñajunʼ o maguma gíníi wéñuʼ. Índo̱ gáʼni majphú mba̱a̱ gaʼkhu, a̱ngiu̱lú bi̱ kuya̱ edxu̱u̱ mbaʼyóoʼ dí xámíñúún índo̱ gunimbu̱ún ikha dí gakhánún tséʼniuu má asndu ndiéjunʼ guraʼníí. w23.06 5, 6 kutriga̱ 12, 13

Jeobá niʼni rí magumaraʼmáʼ xúgíʼ ñajunʼ rí májánʼ dí niʼni ndxajkuun Jehoiadá, mu mbuʼyaridáá xkridoo (Rom. 15:4). Ga̱jma̱a̱ índo̱ Jehoiadá nikháñuu nigruigú mbá gamajkhu kiejuunʼ: ‹Nijuiʼdi̱i̱ náa xuajñuu David náa nibi̱ínʼ reyes numuu rí niʼni dí májánʼ ga̱jma̱a̱ numuu Israel ma̱ngaa ga̱jma̱a̱ numuu Dios bi̱ gajkhun ga̱jma̱a̱ náa goʼwóo› (2 Crón. 24:​15, 16). Xóo nixtáa Jehoiadá mambáyulú xúgiáánʼ mu mbuʼyamajkuíí itháán Dios. Bi̱ kuya̱a̱ edxu̱ún ma̱ndoo mbuyaridáá índo̱ nduyáʼ xú káʼnii ma̱ndoo muñewa̱a̱n congregación (Hech. 20:28). Xabuanuu ma̱ndoo majmañún rí á mu nduyamajkuíí Jeobá ga̱jma̱a̱ nuguájun jmbu, muguaʼdáá má xúʼko̱ dí muni̱ náa rí nandoo ikhaa. Jiámá ga̱jma̱a̱ wa̱ʼxa̱ʼ ma̱ndoo mbu̱ya̱a̱ xú káʼnii Jeobá niʼni ga̱jmá Jehoiadá, ga̱jma̱a̱ gusngajmá gamajkhu xó má kaʼyoo náa xabuanii, itháan bi̱ mbayuuʼ má tsiguʼ nuni̱ ñajuunʼ Jeobá (Prov. 16:31). Gíʼmaa mumbáñún xúgíʼ xó má eʼngo̱o̱ ga̱jma̱a̱ muʼnimbulú dí gúthulu bi̱ nuyegún edxu̱u̱ náa ikháanʼlu (Heb. 13:17). w23.06 17 kutriga̱ 14, 15

Índo̱ narígá reunión atatsaʼwáminaʼ májánʼ nguáthá nuthu ma̱ndoo mataxújxí ñawáanʼ mu marata, á mu nataxújxi̱ ñawáanʼ náa xúgííʼ reunión, mbáa ndxájulú bi̱ nayéjkha̱ edxu̱u̱ maku̱mu̱u̱ dí nutsudaa mu maxnúlú mbaʼa comentario maski ajndu eʼwíinʼ xóó tsékánún muthi. Ma̱ngaa ma̱ndoo maʼni dí eʼwíinʼ maku̱mu̱ún di na̱nguá má gíʼdoo numuu muxujxi ñawúúnʼ (Ecl. 3:7). Índo̱ kúwi̱i̱n mbaʼin a̱ngiu̱lú bi̱ nuxujxi̱ ñawúúnʼ, mbá a̱ʼkhu̱ dí ikháanʼlu xándoo muʼtá xúgíʼ náa eyulú ikháan. O asndu xakánulú nimbá comentario índo̱ gámbá reunión. Gajkhun má rúʼko̱ maʼni makumulú dí raguáʼdáá numulú. Mú ragíʼmaa makiʼnáanʼlu (Ecl. 7:9). Maski ma tákánáaʼ marata xó má ikháán nindaaʼ, dí ma̱ndoo matani̱ nindxu̱u̱ dí matadxun dí nuthi eʼwíinʼ ga̱jma̱a̱ marathu̱u̱n dí májánʼ nini̱ índo̱ naguámbá reunión. Mbáa ajngáa mitsaanʼ dí gárathu̱u̱n a̱ngiu̱lú maxnúún tsiakii ikháá xó má comentario dí nindaaʼ maraxna. w23.04 23, 24 kutriga̱ 14-16

Gúʼnigajma̱a̱ ma̱ngaa gundxaʼwamíjna̱ di nuraxnuu náa Ajngáa rawuunʼ Dios. Mu mawi̱ji̱ jmbu mbá ixi̱ ndayóoʼ dí ajmu̱u̱ majngún asndu mi̱jnu̱ʼ. Ikháá má kayuuʼ mangáanʼ, á mu fe ndrígulú na’ni gujkhuʼ náa Ajngáa rawuunʼ Dios, muguajúnlu jmbu. Índo̱ mbá ixi̱ na̱jkha̱ ra̱ja̱a̱, ajmu̱u̱ ma̱ngaa na̱jkha̱ raʼni mba̱ʼo̱ ga̱jma̱a̱ nagujtuminaʼ itháán gakhi̱i̱ náa ku̱ba̱ʼ. Índo̱ nuʼnigajma̱a̱ ma̱ngaa nundxaʼwamíjna̱, fe ndrígulú naʼni itháan gujkhuʼ ga̱jma̱a̱ naʼni kañiiʼ a̱jkiu̱lú dí kiʼsngáa ndrígóo Dios nindxu̱u̱ itháan májánʼ (Col. 2:​6, 7). Gundxaʼwamíjna̱ xú káʼni nimbáñún xa̱bi̱i̱ Jeobá bi̱ nikúwíin nákha wajyúuʼ, ikha, consejo ga̱jma̱a̱ dí niñewu̱u̱n. Mbá xkri̱da, Ezequiel tsumáá ndiʼyoo náa mbá visión xú káʼni mbá ángel nagiéwan tsumáá templo. Visión raʼkháa i̱ndó nimbáyúu Ezequiel mu maʼni gújkhúʼ fe ndrígóo ma̱ngaa naʼsngúlú mangáanʼ ga̱jma̱a̱ xú káʼni gíʼmaa mbuʼyamajkuíí dí naʼthúlú Jeobá, rí gíʼmaa muʼni mu mbuʼyamajkuíí xó má kaʼyoo (Ezeq. 40:​1-4; 43:​10-12). Mangáanʼ phú nambáyulú muríyaaʼ mbiʼi mu muʼnigajma̱a̱ dí tséʼngulú gakruʼulú mbá nache̱ dí naʼthí náa Ajngáa rawuunʼ Dios ga̱jma̱a̱ gundxaʼwamíjna̱ dí niraxnuu mu ma̱ndoo muguajún jmbu ga̱jma̱a̱ makumulú kuʼyáá kájxi̱ Jeobá (Sal. 112:7). w23.07 18 kutriga̱ 15, 16

Ma̱ndoo matanigajma̱a̱ ga̱jma̱a̱ numún xa̱bu̱ jmbiin bi̱ naʼthí náa Biblia bi̱ nindúún kuyáá Dios ga̱jma̱a̱ niñewa̱a̱n xuajñuu. Mbáa náa guʼwáaʼ o náa congregación kúwíin a̱ngiu̱lú bi̱ nuni̱ má mba̱yu̱u̱ʼ ñajuunʼ Dios bi̱ ma̱ndoo matayaridúún (Heb. 13:7). Ma̱ngaa ma̱ndoo mambáyáaʼ xkridoo Jesús (1 Ped. 2:21). Índo̱ gátanigajma̱a̱ xkri̱da ndrígu̱ún, atatsaʼwáminaʼ ndiéjuunʼ rí nanigua̱ʼ náa ikhiin (Heb. 12:​1, 2). Nda̱wa̱á atatsaʼwáminaʼ ndiéjuunʼ rí gáʼyóoʼ matani̱ mu mani̱ndxa̱a̱ʼ xúʼko̱ mangáánʼ. Xa̱bekha bi̱ nindxu̱ún xígi̱ kaʼnii, nuriyaʼ mbiʼi mundxaʼwamíjna̱ májánʼ índo̱ nuraʼwi̱i̱ mbá rí muni. Ikha jngóo ataniminaʼ rí mani̱ndxa̱a̱ʼ mangáánʼ xígi̱ kaʼnii. Ginii gíʼmaa majmañaaʼ ikha rí na̱ʼkha̱ náa Biblia, ma̱ngaa matatsaʼwamínáʼ ndíjkha rí mambáyáaʼ rí naʼthí Jeobá. Nda̱wa̱á gajmaaʼ rí nijmañaaʼ mu matraʼwi̱i̱ matani̱ rí nanigu̱u̱ʼ Jeobá (Sal. 119:9). Rúʼko̱ gíʼdoo wéñuuʼ numuu náa mbáa cristiano (Prov. 2:​11, 12; Heb. 5:14). w23.12 24, 25 kutriga̱ 4, 5

Xabuanii ma̱ndoo muniratiin e̱jña̱la, mu índo̱ mbáa gárajxu̱u̱n ga̱jma̱a̱ numuu rí nakumu̱ún, muriʼña̱a̱ ga̱jma̱a̱ ajngáa guabaaʼ (Sant. 3:13). Tikhuun xabuanii nuniratamijná índo̱ nuniga̱jma̱a̱ mbá guʼwíin. Nduyáá ndiéjunʼ ma̱ndoo muthi náa escuela ga̱jma̱a̱ xú káʼni guriʼña̱a̱ náa escuela. Ma̱ngaa nusngúún e̱jñu̱ún xú káʼnii gúriʼña̱a̱ ga̱jma̱a̱ ajngáa guabaaʼ ga̱jma̱a̱ maniguún eʼwíinʼ mudxawíín rí gúthi. Dí muniratamijná wapháá mbá guʼwíin raʼkháa i̱ndó nambáñun jiámá ga̱jma̱a̱ wa̱ʼxa̱ʼ mu muthi májánʼ ndiéjunʼ ku̱mu̱ún. Ma̱ngaa mambáñún ikhiin mbuyáá dí raʼkháa minduwaaʼ nindxu̱u̱ dí nakumu̱ún. Náa jw.org rígá mbá sección rí mbiʼyuu “Los jóvenes”, rígi̱ nigumaa mu maʼni itháán gujkhuʼ fe ndrígún jiámá ga̱jma̱a̱ wa̱ʼxa̱ʼ, ma̱ngaa mambáñún mu majmiin mutha májánʼ ndiéjunʼ nindxu̱u̱ rí naku̱mu̱ún ikhiin. Á mu nuʼnigajma̱a̱ mbá guʼwáanʼ xúgiáanʼ ma̱ndoo mbuʼyáá xú káʼnii nindxu̱u̱ sección “Los jóvenes preguntan”, ma̱ndoo muriʼña̱a̱ májánʼ ga̱jma̱a̱ mbá ajngáa guabaaʼ ga̱jma̱a̱ numuu fe ndrígulú. w23.09 17 kutriga̱ 10; 18 kutriga̱ 15, 16

Lá nitagíminaʼ matani̱ mbá dí niʼniaaʼ gakhi̱i̱ matanimbaníí rá’. A mu xúʼko̱, raʼkháa i̱ndó ikháán egíʼnaaʼ xúʼko̱, mbá xkri̱da, Philip nindoo maʼtájkháan xúgííʼ mbiʼi ma̱ngaa maʼtákáñuu itháan májánʼ Jeobá, mu niʼniuu gakhi̱i̱ maríyá’ mbiʼi. Erika nigíminaʼ maʼga̱nú wapháá náa magajnúu maʼtáraʼa, maski ajndu xúʼko̱ wakhaʼ e̱jkha̱nú. Xákanajkhaaʼ á mu dí tséʼnga̱a̱ʼ gátanimbaníí mbóoʼ meta dí xtaʼdáá. Mu matanimbaníí mbóoʼ meta tséʼniuu á mu dí ragákhi̱i̱ ndayóoʼ mbiʼi ga̱jma̱a̱ tsiakii. Á mu tsékanájkaaʼ matasnga̱jmá dí nandaaʼ mambajxáaʼ má xúʼko̱ ga̱jma̱a̱ Jeobá ga̱jma̱a̱ dí nandaaʼ maraxna̱ dí itháán májánʼ. Xúgíʼ rígi̱ Jeobá ndaʼyoo ga̱jma̱a̱ ikhaa tsénda̱ʼa̱a̱ʼ matani mbóoʼ dí xáʼnga̱a̱ʼ gátani̱ (Sal. 103:14; Miq. 6:8). Ikha jngóo gíʼmaa matayaa á mu meta dí nitraʼwíí matani̱ gajkhun maʼnga̱a̱ʼ matanimbaníí. w23.05 26 kutriga̱ 1, 2

Xa̱bu̱ bi̱ gakhi̱i̱ a̱jkiu̱ún ma̱ndoo mamiñún, mú tséniña̱a̱ʼ dí rúʼko̱ marikhún mu xúni̱ rí májánʼ. Daniel ninindxu̱u̱ mbáa dxámá bi̱ támiñuu. Ikhaa naʼnigajmaa má xúʼko̱ rí niniraʼmáʼ profetas ndrígióo Dios, mbá dí ikhaa niʼnirámáʼ Jeremías. Rúʼko̱ nimbáyúu mbaʼyoo rí gítháán má tígo̱o̱ dí magajníín náa Babilonia xuajin náa ni̱jkha̱ kiʼdiin mu matangi̱ín náa xuajñuu (Dan. 9:2). Mbáa índo̱ ndiʼyoo xú kaʼnii ejkha̱ rambánuu profecía dí na̱ʼkha̱ náa Biblia, xúʼko̱ nikumu̱u̱ kaʼyoo itháán Jeobá. Índo̱ mbáa xa̱bu̱ naku̱mu̱u̱ kaʼyoo Jeobá tsémíñúu (atani̱ mbríguii ga̱jma̱a̱ rí naʼthí náa Romanos 8:​32, 37-39). Rí itháán embáyúu Daniel rí naʼtákáñuu Anu̱u̱ bi̱ xtaa mekhuíí (Dan. 6:10). Naʼthúu̱n rí nakiéʼkúun, xúgíʼ dí naʼni maxmiéjuunʼ ga̱jma̱a̱ na̱ndo̱ʼo̱o̱ rí mambáyúu (Dan. 9:​4, 5, 19). Xó má ikháánʼlú, Daniel na̱nguá nigumaa rí xámíñuu. Ndiyóoʼ dí maʼga ragiʼdoo mañúú cualidad rígi̱, niʼngo̱o̱ niʼni rígi̱ numuu rí naʼnigajmaa, naʼtájkáan ga̱jma̱a̱ naku̱mu̱u̱ kaʼyoo Jeobá. w23.08 3 kutriga̱ 4; 4 kutriga̱ 7

Á mu nuʼnimbulú kuʼñúún xa̱bu̱ ñajunʼ nambáyulú ikháánʼ ga̱jma̱a̱ eʼwíinʼ. Xú kaʼnii rá. Xúʼko̱ xúmíniiʼ ga̱jma̱a̱ numuu castigo rí nuniu̱u̱ bi̱ tsénimbu̱ún xtángóo xóo rígi̱ (Rom. 13:​1, 4). Dí xóo nuʼnimbulú ikháanʼ rúʼko̱ gáʼni dí xa̱bu̱ ñajunʼ mbuñún xa̱bi̱i̱ Jeobá rí kúwá mbá kambájxu̱u̱n. Mbá xkri̱da, rúʼko̱ rí nirígá náa Nigeria nákha tsiguʼ kidííʼ. Mbá nguáthi̱i̱n soldados nitu̱ʼu̱u̱n náa guʼwá nagimbáanʼ índo̱ xtáa rarígá reunión. Nituʼu̱u̱n gúñíiʼ xa̱bu̱ bi̱ nuni ajngáa ga̱jma̱a̱ numuu rí muni numáá impuesto. Mú bi̱ naʼtáñajúúnʼ niʼthún dí magajnáánʼ ikhí. Niʼthún rí testigos de Jeobá na̱nguá eni ajngáa ga̱jma̱a̱ numuu rí muni numáá impuesto. Índo̱ ikháanʼ nuʼnimbulú xtángoo, xúʼko̱ nuʼni dí xuajñuu Jeobá majuiʼthá rí májánʼ ga̱jma̱a̱ numuu. Ga̱jma̱a̱ maʼga̱nú mbóoʼ mbiʼi rí a̱ngiu̱lú mambáñún rígi̱. w23.10 9 kutriga̱ 13

Tikhun xa̱bi̱i̱ Jeobá guaʼti̱i̱n mbayuuʼ tsiguʼ dí mambáa dí raʼkhí. Xóo xa̱bu̱ numbaaʼ nindxu̱lú naku̱mu̱lú dí ndajyúuʼ wéñuuʼ dí ma̱ʼkha̱ fin. Jeobá nakro̱ʼo̱o̱ xóo ku̱mu̱ún xa̱bi̱i̱. Ikhaa niʼthúu̱n gaʼyee Habacuc: “Numuu rí xóó ndayóoʼ mambanúu visión, na̱jkha̱ ragi̱ʼi̱ nacha̱ rí mambanúu, gajkhun rí mambanúu. Maski ajndu mbajyúuʼ, ¡araʼthi̱i̱n má xúʼko̱! Numuu rí gajkhun mambanúu. ¡Xájyúuʼ má gáʼkha̱!” (Hab. 2:3). Lá ajngáa rúʼko̱ i̱ndó ni̱jkha̱ náa inuu Habacuc o nambáyulúʼ asndu mangáánʼ rí mbiʼi xúgi̱ dxe̱ʼ. Jeobá niʼni rí apóstol Pablo maʼthúún ajngáa rúʼko̱ cristianos bi̱ guáʼthi̱i̱n numbaaʼ nuxi̱ʼ (Heb. 10:37). Á mu nakumulú rí Jeobá ndajyúuʼ maʼnimbánuu rí nakudaminaʼ maʼni, garmáʼáan a̱jkiu̱lú dí xúgíʼ dí nikudaminaʼ maʼni “gajkhun mambanúu. ¡Xájyúuʼ má gáʼkha̱!”. w23.04 30 kutriga̱ 16

Israelitas na̱nguá ninimbu̱ún dí Jeobá nindxu̱u̱ bi̱ niraʼwíi Moisés mu maxná ikhúún (Núm. 14:​10, 11). Numuu rí mbaʼa nuthu túnimbu̱u̱n kuyáá Moisés, ikha jngóo Jeobá tániñúúnʼ rí mataʼáán náa Ku̱ba̱ʼ rí nijuiʼthá makánún (Núm. 14:30). Nikuwa tikhuun israelitas bi̱ ninimbu̱u̱n ikha ndrígóo Jeobá. Mbá xkri̱da, Jeobá niʼthí: “Caleb [...] niʼnimbo̱o̱ ga̱jma̱a̱ xúgíʼ a̱jkiu̱u̱n” (Núm. 14:24). Dios nini tsajkurámaaʼ ga̱jma̱a̱ asndu niniñuuʼ maraʼwíi náa mínaaʼ xuajin dí rígá náa Canaán maxtáa (Jos. 14:​12-14). Ikhaa má xóo Caleb, bi̱ niguwáʼ rakúwá itháán nda̱wa̱á náa israelitas niniñami̱jna̱ rí Jeobá maxnún ikha. Ikha jngóo, xúgíʼ mbiʼi rí nixtáa Josué, ndiyamajkuíí wéñuuʼ xa̱biya̱ bi̱ Jeobá nigíiʼ mu mariʼkuriyaaʼ Moisés mu mayéʼga edxu̱u̱ náa xuajin rúʼko̱ (Jos. 4:14). Ikha jngóo Jeobá niʼni tsajkurámiinʼ ga̱jma̱a̱ niniñuuʼ makuwá náa Ku̱ba̱ʼ rí niʼthí maxnún (Jos. 21:​43, 44). w24.02 21 kutriga̱ 6, 7

Xó má eʼni mbáa doctor índo̱ nakujmbi̱i̱ aphuu ñawuun xa̱bu̱ bi̱ naʼni thanuu, mu mbaʼyoo xú káʼnii ñajunʼ a̱jkiu̱u̱n á mu rí na̱jkha̱ rakáguámbáa o gújkuiiʼ xóó, xúʼko̱ má mangáánʼ ma̱ndoo mbuʼyáálú xú káʼnii eyulú kuʼñúún eʼwíinʼ. Rúʼko̱ gámbáyulú mbuʼyáa nguáthá mba̱a̱ ngajua rí kuaʼdáálú náa Jeobá, á mu nduʼyáá rí na̱jkha̱ raguámbáa rí xóo nandulúʼ kuʼñúún a̱ngiu̱lú, mbáa xúʼko̱ má ma̱ngaa rí nandulúʼ kuʼyáá Jeobá. Mú á mu naguʼunlú rí musngajmúún a̱ngiu̱lú rí nandulúʼ kuʼñúún, rúʼko̱ nandoo gaʼthí rí xóo nandulúʼ kuʼyáá Jeobá na̱jkha̱ raʼni itháán mba̱a̱. Ndíjkha rí ndayóoʼ maxmiéjunlú á mu rí na̱jkha̱ raguámbáa xóo rí nandulúʼ kuʼñúún a̱ngiu̱lú rá. Numuu dí rúʼko̱ gamíi maʼni rí nánguá ma̱ndoo mambájxulú májánʼ gajmiúlú Dios. Rígi̱ nasngájma kaʼwu ajngáa rí niʼthí apóstol Juan: “Bi̱ tsíyoo kaʼyoo ndxájuu bi̱ ndaʼyoo ga̱jma̱a̱ iduu, nda̱a̱ xóo maʼndoo kaʼyoo Dios bi̱ na̱nguá eʼngo̱o̱ gáʼyoo” (1 Juan 4:20). Ndiéjunʼ eʼsngúlú rá. Rí i̱ndó ma̱ndoo muʼni mba̱a̱ Jeobá á mu nandulúʼ kuʼyamijná (1 Juan 4:​7-9, 11). w23.11 8 kutriga̱ 3; 9 kutriga̱ 5, 6

Índo̱ Jehoás kaʼníí chíʼgíiʼ, anu̱u̱ nikháñuu ga̱jma̱a̱ bi̱ Kayá Edxu̱u̱ náa Ndxajkun Jehoiadá, niʼni mbaja̱a̱ xóo mbáa a̱ʼdióo ma̱ngaa niʼsngóo ga̱jma̱a̱ numuu Jeobá. Jehoás nigiʼdoo ku̱ma̱ numuu dí niʼdxawuun consejo rí nixnúu Jehoiadá, ga̱jma̱a̱ numaaʼ má numuu ikhaa, Jehoás niraʼwíí maʼni ñajuunʼ Dios ga̱jma̱a̱ nimbáñún xa̱bu̱ xuajin dí muni̱ xúʼko̱ mangiin, ma̱ngaa niniratoo dí maguma májáanʼ templo (2 Crón. 24:​1, 2, 4, 13, 14). A mu ana̱a̱ʼ, ru̱dáaʼ o i̱mba̱a̱ xa̱bu̱ naʼsngáa rí maʼndaaʼ xtayáá Jeobá ga̱jma̱a̱ dí matani mbáníí ikha ndrígóo, rúʼko̱ nindxu̱u̱ mbá regalo dí ra̱ʼkhá tháan mitsaanʼ (Prov. 2:​1, 10-12). Ana̱a̱ʼ ga̱jma̱a̱ ru̱dáaʼ mbaʼa enii xóo ma̱ndoo musngáa. A mu natanimbáníí consejo dí na̱ʼkha̱ náa Biblia dí naxnáaʼ ana̱a̱ʼ o ru̱dáaʼ matani̱ dí makuwíin gagi. Mú itháán Jeobá, rúʼko̱ gáʼni dí mambajxáaʼ ga̱jma̱a̱ kámuu (Prov. 22:6; 23:​15, 24). Ra̱ʼkhá tháán májánʼ rí matayaridáá xkridoo Jehoás. w23.09 8, 9 kutriga̱ 3-5

Jeobá nakudaminaʼ dí maʼdxawuun dí nuʼtákáñii. Dios ndrígúlú nandoo kaʼñún xa̱bi̱i̱ ga̱jma̱a̱ maʼdxaun má xúʼko̱ dí nutajkháan (Sal. 10:17; 37:28). Mú, raʼkháa rúʼko̱ eyoo gáʼthí dí maxnúlú xúgíʼ dí nunda̱ʼa̱a̱. Mbáa mbaʼyóoʼ muguaʼthi̱i̱n asndu náa numbaaʼ nuxi̱ʼ mu Jeobá maxnúlú tikhu dí nunda̱ʼa̱a̱. Jeobá ndaʼyoo ndiéjunʼ dí májánʼ gárígá dí ikhaa nandoo índo̱ nariʼña̱a̱ dí nuʼtajkháan (Is. 55:​8, 9). Mbá dí ikhaa nandoo nindxu̱u̱ dí náa tsu̱du̱u̱ Ku̱ba̱ʼ makuwá mbaʼin xabekha̱ ga̱jma̱a̱ gu̱ʼu̱ bi̱ munimbu̱ún dí ikhaa naʼtáñajunʼ ma̱ngaa dí makuwá gagi ga̱jma̱a̱ mbá kambájxu̱u̱n. Mú, Gixa̱a̱ niʼthí dí makuwáánʼ itháan májánʼ á mu ikháanʼ má eʼtáñajumijnálú (Gén. 3:​1-5). Mu Jeobá masngájma dí Gixa̱a̱ minduwaaʼ, niniñuuʼ dí xa̱bu̱ mutañajumijná, mú rúʼko̱ niʼni marigá wéñuuʼ xkujndu dí rígá mbiʼi xúgi̱ (Ecl. 8:9). Nduʼyáá dí mbiʼi xúgi̱ Jeobá xáʼnimbánuu xúgíʼ xkujndu rúʼko̱. w23.11 21 kutriga̱ 4, 5

Jeobá nikuʼdáminaʼ náa Abrahán, rí magumaa tsajkhuramáaʼ numuu rí náa ikhaa maguwáʼ “mbaʼa xuajen mba̱ʼu̱”. Mú índo̱ Abrahán nigiʼdoo 100 tsiguʼ ga̱jma̱a̱ Sara 90 tsiguʼ, xóo na̱nguá guáʼdiin e̱jñu̱ún. Á mu mbáa ikháanʼ nagíʼnulú xúʼko̱ kaʼnii, mbáa majkhá guabáanʼ rí mundrígúu rí nitulú. Maski mbáa rúʼko̱ niʼniuu mingíjyúuʼ Abrahán, “ikhaa nigi̱ʼthu̱u̱n ga̱jma̱a̱ nigiʼdoo fe dí maʼga̱nú mani̱ndxu̱u̱ anu̱ún xa̱bu̱ bi̱ gákúwá náa mbaʼa xuajen mba̱ʼu̱” (Rom. 4:​18, 19). Nda̱wa̱á, rí nigi̱ʼthu̱u̱n nimbánuu: Abrahán ninindxu̱u̱ anu̱u̱ Isaac, a̱ʼdióo bi̱ ra̱ʼkhá tháán nindoo magiʼdaa (Rom. 4:​20-22). Ikhaa má kayuuʼ xóo Abrahán, ikháanʼ ma̱ndoo muʼni rí Dios mbaʼyulú xóo mbáa xa̱bu̱ jmbii ga̱jma̱a̱ mambájxulú gajmiúlú. Ikha jngóo ajngáa rí Pablo nijmuu mu maʼthí ga̱jma̱a̱ numuu Abrahán, niʼthí: “Mú ajngáa ‹Dios ndiʼyoo rí nindxu̱u̱› tágumaraʼmáʼ i̱ndó ga̱jma̱a̱ numuu ikhaa, ma̱ngaa nigumarámáʼ ga̱jma̱a̱ numulú, bi̱ Dios mbaʼyoo rí ni̱ndxu̱lú jmbiáánʼ, numuu rí nuʼnimbulú kuʼyáá bi̱ nitujxi̱i̱ náa majñúnʼ wajinʼ ikhaa nindxu̱u̱ Jesús Tátá ndrígúlú” (Rom. 4:​23, 24). Ndayóo maguaʼdáá ajtsú enii rí xóo nigiʼdoo Abrahán: fe, ñajunʼ rí nuʼni, ga̱jma̱a̱ rí kua̱ʼthi̱i̱n nda̱wa̱á. w23.12 7 kutriga̱ 16, 17

Á mu xtáa natraʼníí mbá xkujndu gakhi̱i̱ ga̱jma̱a̱ namíñáaʼ, garmáʼáan a̱jkia̱a̱nʼ dí Jeobá raʼkháa i̱ndó ndaʼyoo dí xtáa ratagíʼníí, ma̱ngaa xú káʼnii ku̱ma̱a̱ʼ. Mbá xkri̱da nákha ninindxu̱ún ñumbáá xa̱bi̱i̱ náa Egipto, Jeobá ndaʼyoo májánʼ ‹rí nimíníiʼ› (Éx. 3:7). Á mu kuwáanʼ náa xkujndu rí naʼni mamiñulúʼ, mbáa maʼniulú gakhi̱i̱ mbuʼyáá dí Jeobá xtáa nambáyulú. Ndiéjuunʼ ma̱ndoo mu̱ʼni̱ rá. Guʼtákáñíí mu mambáyulú mbuʼyáá dí xtáa raʼni ga̱jma̱á nindxu̱lú (2 Rey. 6:​15-17). Nda̱wa̱á gundxaʼwáá edxu̱lúʼ: Lá nixnulú tsiaki̱i̱ mbá comentario o mbá discurso rí niʼdxawíín náa reunión ráʼ. Lá nixnulú tsiaki̱i̱ mbá i̱yi̱ʼ, video o mbá ajmúú ráʼ. Lá niguxnuu mbá texto ndrígóo Biblia dí nixnulú tsiaki̱i̱ mbáa ndxájulú ráʼ. Nguáná itháán má ragákhi̱i̱ rí mambumulú rí xóo nandún kuyulú a̱ngiu̱lú ga̱jma̱a̱ xúgíʼ rí gíʼdoo numuu rí naxnulúʼ Jeobá (Is. 65:13; Mar. 10:​29, 30). Rúʼko̱ nasngájma rí ikhaa naxmiéjuunʼ kaʼyulú ga̱jma̱a̱ rí ikháanʼ makumulúʼ kuʼyáá (Is. 49:​14-16). w24.01 4, 5 kutriga̱ 9, 10

Índo̱ inu mata̱nga̱a̱ Jesús mekhuíí niʼni marmáʼáan a̱jkiu̱ún xa̱bi̱i̱ dí gíʼdoo numuu muthi ga̱jma̱a̱ numuu ikhaa “náa Jerusalén, náa xúgíʼ Judea ga̱jma̱a̱ náa Samaria, ma̱ngaa asndu náa naguámbári̱go̱o̱ numbaaʼ” (Hech. 1:8; Luc. 24:​46-48). Nda̱wa̱á tikhun judío nirugua̱a̱ Pedro ga̱jma̱a̱ Juan, nigún kudiin náa xa̱bu̱ ede̱ ndrígiu̱ún. Ikhí nithúún rí muniñaaʼ rutaraʼa ga̱jma̱a̱ ninimiñún (Hech. 4:​18, 21). Pedro ga̱jma̱a̱ Juan niriʼña: “Á mu rí májánʼ eya̱a̱la náa inuu Dios rí munimbuxu ku̱ya̱la ikháanʼ, raʼkháa náa Dios, ikháanʼ má gúya̱a̱la. Mú ikháanʼxu xándoo muniʼñááʼ ru̱ta̱ rí ndi̱ya̱a̱xu ga̱jma̱a̱ dí nidxáwinxu” (Hech. 4:​19, 20). Índo̱ xa̱bu̱ ede̱ judío niniñu̱u̱nʼ magúun, nájmiin apóstoles bugi̱ ndiwi̱ín gajmiún eʼwíinʼ discípulos. Mbá kambájxu̱u̱n nitakáñíí Jeobá mu mambáñún muni má xúʼko̱ rí nandoo ikhaa. Jeobá niriʼña̱a̱ dí nitajkháan (Hech. 4:31). w23.05 5 kutriga̱ 11, 12

Jeobá ga̱jma̱a̱ Jesús bi̱ nandoo kaʼyoo, mba̱yu̱u̱ʼ tsiguʼ kúwá mbóó. Ikha jngóo kúwá jnduʼ ga̱jma̱a̱ nandún kuyamijná. Ikhiin nindxu̱ún bi̱ itháán mba̱yu̱u̱ʼ kúwá mbóó. Náa texto rí kaʼyoo mbiʼi xúgi̱. Jeobá niʼthúu̱n mbájmbu Jesús rí nandoo kaʼyoo. Ikhaa raʼkháa i̱ndó niʼthí “naʼni rí maʼdxuu a̱jkiu̱nʼ”, ikhaa nindoo mbuʼyáá nguáthá mba̱a̱ nandoo kaʼyoo Jesús bi̱ nindxu̱u̱ A̱ʼdióo ma̱ngaa rí nadxuu kaʼyoo ga̱jma̱a̱ rí inu maʼni, ikha jngóo niʼthí: “Bugi̱ nindxu̱u̱ A̱ʼdióʼ bi̱ nandoʼ ka̱yo̱o̱” (Efes. 1:7). Jesús mbaʼa nuthu niʼthí dí Jeobá nandoo kaʼyoo, numuu rí ndiʼyoo dí gajkhun nandoo kaʼyoo Anu̱u̱ (Juan 3:35; 10:17; 17:24). w24.01 28 kutriga̱ 8

Atatsaʼwáminaʼ rí mbáa bi̱ nandaaʼ xtayáá naʼthí mbá dí raʼkhí ga̱jma̱a̱ numaaʼ. Ikháán natayáá dí nindxu̱u̱ nduwaʼ, mú, tikhuun nunimbu̱ún ma̱ngaa nuthi má xúʼko̱, rúʼko̱ naʼni dí mudxawíín eʼwíinʼ. Xú káʼnii gákuma̱a̱ʼ rá. Mbáa maʼni maxmiéjuaanʼ. Lá ragájkhun ráʼ. Xkri̱da rígi̱, ma̱ndoo mambáyulú mbuʼyáá xú káʼnii nikumu̱u̱ Jeobá índo̱ mbáa a̱ʼdióo niʼthí rí minduwaʼ ga̱jma̱a̱ numuu, ma̱ngaa niʼni gachúu mbiʼyuu. Eva niʼnimbo̱o̱ nduwaʼ rúʼko̱, rígi̱ niʼni dí timbíin xa̱bu̱ bi̱ nikúwá na̱nguá ninimbu̱ún kuyáá Jeobá. Ikha jngóo xúgiáanʼ nakiéʼkulu ga̱jma̱a̱ nakháñulú (Gén. 3:​1-6; Rom. 5:12). Nduwaʼ dí niʼthí Gixa̱a̱ niʼni rí maguaʼdáá xkujndu xa̱bu̱ náa xúgíʼ numbaaʼ, xóo rí nakháñún, guerra ga̱jma̱a̱ rí numíniiʼ. Phú gajkhun dí Jeobá nagawúunʼ ga̱jma̱a̱ numuu xúgíʼ nduwaʼ rúʼko̱ ga̱jma̱a̱ dí naʼni marigá. Mú Dios, tséʼni dí rúʼko̱ majmúuʼ, náa Biblia naʼthí rí nindxu̱u̱ mbáa “Dios gagi” (1 Tim. 1:11). w24.02 8 kutriga̱ 1, 2

Xú káʼnii gándoo guʼyaridáá José ga̱jma̱a̱ muguajún jmbu rá. Gundxaʼwamíjna̱ asndu nákha xúgi̱, ndiéjuunʼ gúʼthá índo̱ gúraʼníí mbá tsáʼkhá. Ndayóoʼ muʼni gaʼduunʼ xúgíʼ dí Jeobá nawiyuuʼ kaʼyoo, rí asndu xundxa̱ʼwa̱míjna̱ mbáxngaa (Sal. 97:10; 119:165). Rúʼko̱ gámbáyulú mu xúʼni̱ mbá aʼkhá mbiiʼ. Mbáa ikháanʼ nitayáá dí nitaxkamaa kamba̱a̱ rí gajkhun ga̱jma̱a̱ nandaaʼ matani̱ ñajuunʼ Jeobá ga̱jma̱a̱ xúgíʼ a̱jkia̱a̱nʼ. Lá rígá mbá dí narikhaaʼ mu xáraxnaxíminaʼ náa Dios ga̱jma̱a̱ majnguáanʼ iyááʼ ráʼ. Ma̱ndoo matani̱ xó má niʼni David ga̱jma̱a̱ maratakáñíí Jeobá: “Atayáaʼ náa ikhúúnʼ, oh Dios, ga̱jma̱a̱ atayáá xú káʼnii nindxu̱u̱ a̱jkiu̱nʼ. Atayáaʼ náa ikhúúnʼ ga̱jma̱a̱ atayáá xú káʼnii endxa̱ʼwáminaʼ ma̱ngaa rí naʼni maxmiéjunʼ, ga̱jma̱a̱ atayáá á mu rígá náa ikhúúnʼ mbá dí ra̱májánʼ. Ga̱jma̱a̱ araxnúʼ ikha náa kamba̱a̱ rí maxtáá kámuu mbiʼi” (Sal. 139:​23, 24). Índo̱ natani̱ tsiakimínáʼ rí maraxnaxíminaʼ ga̱jma̱a̱ majnguáanʼ iyááʼ, xúʼko̱ natasngájma rí gajkhun natayáaʼ Jeobá. Náa Biblia naʼthí dí ikhaa naʼni tsajkurámiinʼ bi̱ nuni̱ xúʼko̱ (Heb. 11:6). w24.03 6 kutriga̱ 13-15

Ndxajkun bi̱ phú kayá edxu̱u̱ nindxu̱u̱ bi̱ naʼthí ga̱jma̱a̱ numuu xuajen náa inuu Dios. Timbáa ndxajkun náa Israel ninindxu̱u̱ Aarón, Jeobá nigíiʼ índo̱ niguáxi guʼwá xtíin. Apóstol Pablo niʼthí: “Numuu rí nakháñún rúʼko̱ naʼni rí ndxajkun nánguá eyoo muni̱ itháan ñajunʼ ndrígu̱ún, ikha jngóo ndiyóoʼ makuwá mbaʼin ndxajkun bi̱ muriʼkuwíín eʼwíinʼ” (Heb. 7:​23-26). Ndxajkun nindxu̱ún xa̱bu̱ aʼkhá ikha jngóo ndiyóoʼ muxnaxi tsigijñaʼ ga̱jma̱a̱ numuu aʼkhúún. Rúʼko̱ rí naʼni mixtiʼkhu wéñuuʼ náa ndxajkun bi̱ nikúwá náa Israel ga̱jma̱a̱ Ndxajkun bi̱ phú kayá edxu̱u̱, Jesucristo. Ndxajkun bi̱ phú kayá edxu̱u̱, Jesucristo, “nindxu̱u̱ bi̱ nañambáá […] náa guʼwá xtíin rí gajkhun rí nikujxi̱ Jeobá, raʼkháa xa̱bu̱ú” (Heb. 8:​1, 2). Pablo niʼthí dí, numuu dí Jesús “xtáa kámuu mbiʼi, tséyóoʼ bi̱ muriʼkuriya̱a̱ʼ dí manindxu̱ún ndxajkun”. Ma̱ngaa, niʼthí dí Jesús “na̱nguá tsagaa, ni má na̱nguá xtáa gajmíi̱n xa̱bu̱ bi̱ nuni̱ aʼkhá” ga̱jma̱a̱ dí mixtiʼkuii ikhaa ki xóo ndxajkun bi̱ ndiya̱ edxu̱u̱ náa Israel, “tséyóoʼ dí maxnájxi̱ tsiijñaʼ nángí eʼni” ga̱jma̱a̱ numuu aʼkhúun. w23.10 26 kutriga̱ 8, 9

“Mekhu dí nirígá nákha ginii” nandoo gáʼthúu̱n xa̱bu̱ ñajunʼ bi̱ kúwá náa majñu̱u̱ʼ Gixa̱a̱ ga̱jma̱a̱ xa̱bu̱ wéñiiʼ (Mat. 4:​8, 9; 1 Juan 5:19). Nguáná náa Biblia índo̱ naʼthí ku̱ba̱ʼ nandoo gaʼthí ga̱jma̱a̱ numún xa̱bu̱ bi̱ kúwá náa numbaaʼ (Gén. 11:1; Sal. 96:1). Ikha jngóo “ku̱ba̱ʼ dí nirígá nákha ginii” nandoo gáʼthúu̱n xa̱bu̱ xkawiinʼ bi̱ kúwá rí mbiʼi xúgi̱. Rígi̱ nandoo gáʼthúu̱n rí Jeobá, xaʼni̱i̱ wáa kayuuʼ “mekhu” ga̱jma̱a̱ “ku̱ba̱ʼ”, rí phú gáʼni maʼni gámbáa kájxi̱ ga̱jma̱a̱ maʼni̱i̱ “nuxi̱ʼ mekhu ga̱jma̱a̱ mbá nuxi̱ʼ ku̱ba̱ʼ”, xóo muʼthá imba̱a̱ xa̱bu̱ ñajunʼ ga̱jma̱a̱ i̱mba̱ nuthu xóo gákúwíin xa̱bu̱. Jeobá maʼni májáanʼ ku̱ba̱ʼ ga̱jma̱a̱ xa̱bu̱ maʼni rí nánguá maguaʼdáá aʼkhá. Xó má niʼtáriyaʼ Isaías, rí náa xúgíʼ numbaaʼ maʼni̱i̱ mitsaanʼ. Maʼni mitsaanʼ wéñuuʼ xó má ninindxu̱u̱ ixi̱ ri̱ʼi̱ Edén. Xúʼko̱ má mangáánʼ maʼni̱i̱ nuxiáanʼlú. Jeobá maʼni thanún xa̱bu̱ bi̱ guʼxíinʼ, bi̱ tsékruigu̱u̱n ga̱jma̱a̱ bi̱ tsédxuun asndu maʼnigabiín xa̱bu̱ bi̱ nikháñúún (Is. 25:8; 35:​1-7). w23.11 4 kutriga̱ 9, 10

Nda̱a̱ tsumáá gági̱ʼdu̱u̱ “ga̱ʼkhu̱ rí majphú mba̱a̱” (Mat. 24:21). Xúgíinʼ xa̱bu̱ xáʼniún tsiánguá, xó má narígá ga̱jma̱a̱ i̱ʼwáʼ gamiéjunʼ, numuu rí niʼni má 2,000 tsiguʼ dí Jesús niʼthún xa̱bi̱i̱ dí gíʼmaa makuwíin xawii índo̱ gáʼkha̱ mbiʼi rúʼko̱. Á mu nuʼnimbáníí consejo rígi̱, xáʼniulú miʼskhaa muʼni kríyamíjnálú ma̱ngaa dí mumbáñún eʼwíinʼ mu makáwíin náa mbiʼi mingíjyúuʼ dí ma̱ʼkha̱ (Luc. 21:36). Ikhú mbaʼyóoʼ muʼnimbulú kuʼyáá Jeobá, ikha jngóo gíʼmaa rí maʼngo̱o̱ a̱jkiu̱lú mu xámiñulu ga̱jma̱a̱ makumulú dí ikhaa má gañewunlúʼ. Ndiéjunʼ guʼni á mu a̱ngiu̱lú nandáti̱gu̱u̱n tikhu o mbá xúgíʼ dí guáʼdáá rá. (Hab. 3:​17, 18.) Ikhú gíʼmaa musngajmá dí nagáwíinʼ a̱jkiu̱lú kuʼñúún mu mumbáñún ma̱ngaa dí muxnún dí ndañún. Ndiéjunʼ gúʼni índo̱ gúni gináánʼ mbá nguéjmi̱i̱n xa̱bu̱ rá. Dí gúʼni á mu mbá mbiʼi mbaʼyóoʼ makuwáánʼ mbá jnduʼ gajmiúlú a̱ngiu̱lú rá. (Ezeq. 38:​10-12.) Ikhú mbaʼyóoʼ musngajmá dí gajkhun nandulú kuʼyamijná. w23.07 2 kutriga̱ 2, 3

Rígá mbaʼa dí ma̱ndoo majmañún bi̱ nidamijná náa xkri̱da ndrígóo Áquila ga̱jma̱a̱ Priscila xa̱bu̱ gajmii bi̱ nikúwi̱i̱n nákha siglo timbá (Rom. 16:​3, 4). Mbóó niñajunʼ ma̱ngaa nitaraʼa ga̱jma̱a̱ xúʼko̱ má mbóó nimbañúún eʼwíinʼ (Hech. 18:​2, 3, 24-26). Xkáʼnii gándoo xa̱bu̱ bi̱ nidamijná mbuyaridúún ikhiin xá. Gundxaʼwámíjná náa xúgííʼ ñajunʼ dí ndayóoʼ maʼni mámbáa dí ikháanʼla. Lá rígá tikhu ñajunʼ dí ma̱ndoo muni̱ mbá nájmáanʼla rá. Garmáʼáan a̱jkiu̱lú, Áquila ga̱jma̱a̱ Priscila nitaraʼa mbóó, lá naguʼwanla muni̱ xúʼko̱ mangáanʼ ráʼ. Ma̱ngaa Áquila ga̱jma̱a̱ Priscila niñajunʼ mbá kambájxu̱u̱n. Gajkhun ma dí na̱nguá kuaʼdáá ikháá ñajunʼ dí nuni̱la. Mú ma̱ndoo munila mbóó jnduʼ ñajunʼ dí rígá náa guʼwála (Ecl. 4:9). Á mu numbayúmijnala maʼni dí maku̱ma̱la dí kúwáanʼ mbá kambájxala ga̱jma̱a̱ ma̱ndoo mutamíjnála. w23.05 22, 23 kutriga̱ 10-12

Xúgíinʼ xa̱bu̱ namiñun nguáná. Mbá xkri̱da índo̱ Rey Saúl nixkoo David mu maxíyáa, nigáyúu ni̱jkha̱ náa xuajin Gat, náa xuajñún filisteos. Índo̱ nitháán Akís rey bi̱ xtáa náa Gat, rí David nindxu̱u̱ mbáa Soldado mixkujiiʼ ga̱jma̱a̱ nigudíin “mbaʼin” filisteos, ikhú David “nimíñuu wéñuuʼ” (1 Sam. 21:​10-12). Ra̱ʼkhá tháán nixmiéjuunʼ, numuu dí tséʼyoo ndiéjuunʼ gáʼniuu rey. Ndiéjunʼ niʼni David mu nánguá mamiñúu rá. Náa Salmo 56 na̱ʼkha̱ raʼthí xú káʼnii niku̱mu̱u̱ David índo̱ nixtáa náa xuajin Gat. Náa Salmo má rúʼko̱ naʼthí, náá numuu rí namíñuu ga̱jma̱a̱ ndiéjuunʼ nimbáyúu mu nánguá mamiñúu: Rí maku̱mu̱u̱ kaʼyoo Jeobá (Sal. 56:​1-3, 11). Dí niraʼwíí maʼni ninindxu̱u̱ májánʼ. Jeobá nimbáyúu David, numuu rí ndiyáʼ xóo maʼni: Niʼníí rí xóo nakágu̱u̱nʼ. ¡Ga̱jma̱a̱ nigájnuu májánʼ rígi̱! Ikha jngóo rey Akís, na̱nguá ndiʼyoo xóo mbáa xa̱bu̱ gamíi, ndiʼyoo xóo mbáa bi̱ naʼni xkájkiu̱u̱n. Xúʼko̱ káʼnii niʼni rí David niʼngo̱o̱ nigáyúu (1 Sam. 21:​13–22:1). w24.01 2 kutriga̱ 1-3

Tsíín nindxu̱ún bi̱ na̱ʼkha̱ raʼthí numuu náa texto rí kaʼyoo mbiʼi rígi̱ rá. Xúgíinʼ bi̱ kaxtaʼwíin bi̱ makuwa mekhuíí, ñajunʼ dí majuixnúún ginii nindxu̱u̱ dí muxmijná. Índo̱ gakuwá mekhuíí, mumbayíí Cristo gajmíi̱n ángeles ndrígóo mu muni̱ gámbíin xúgíinʼ bi̱ nini̱ dí raʼkhí ga̱jma̱a̱ bi̱ taʼndun gúyaa Dios. Gundxaʼwamíjna̱ ga̱jma̱a̱ numuu rígi̱: Tikhuun bi̱ kaxtaʼwíin bi̱ kúwíin náa tsu̱du̱u̱ Ku̱ba̱ʼ guanii má ga̱jma̱a̱ nánguá guaʼdáá tsiakii. Mú índo̱ gakuwá mekhuíí, mani̱ndxu̱ún espíritu ga̱jma̱a̱ maguaʼdáá tsiakii, magún guxmijná gajmiún Rey bi̱ gíʼdoo tsiakii bi̱ nindxu̱u̱ Jesucristo. Nda̱wa̱á índo̱ gájngoo guerra ndrígóo Armagedón, mumbañún xa̱bu̱ mu nánguá maguaʼdáá aʼkhá. Ikhiin mumbañún itháán a̱ngiu̱ún índo̱ gakuwá mekhuíí, ki xóo nákha kúwá náa tsu̱du̱u̱ ku̱ba̱ʼ xóo xa̱bu̱ aʼkhá. w24.02 6, 7 kutriga̱ 15, 16

Tikhuun, kúwá má xawii muxnaximíjna náa Dios ga̱jma̱a̱ majngún iyááʼ, mú tséraʼwi̱i̱ muni̱ rígi̱. Mbáa namíñúún dí muni̱ mbá aʼkhá mbi̱i̱ʼ ga̱jma̱a̱ magumiin expulsar. Mú, náa Biblia naʼthí dí Jeobá má gáxnúún rí mbaʼñúuʼ xa̱bi̱i̱ mu majngruigu̱u̱n “xó má nanigu̱u̱ʼ Jeobá” ga̱jma̱a̱ ‹muni̱ maʼdxuun a̱jkiu̱u̱n náa xúgíʼ dí gúni̱› (Col. 1:10). Á mu ikháánʼ xtaʼdáá gamíi rígi̱, ma̱ndoo ma̱ta̱ya̱a̱ gajkhun dí Jeobá maxnáaʼ tsiaki̱i̱ mu matani̱ rí májánʼ. Numuu rí xúʼko̱ má niʼni gajmíi̱n eʼwíinʼ (1 Cor. 10:13). Ikha jngóo dí na̱nguá má mbaʼin egumiin expulsar, numuu rí Jeobá má nambáñúún mu maguajún jmbu. Numuu rí nindxu̱lú xa̱bu̱ aʼkhá xúgiáanʼ nagua̱ʼa̱ muʼni dí raʼkhí (Sant. 1:14). Ndayóoʼ muraʼwíí májánʼ ndiéjuunʼ gíʼmaa muʼni, índo̱ gáʼkha̱nú mbá tsáʼkhá náa inulú, numuu dí ikháanʼ má kaʼyulú. Tikhuun xa̱bu̱ nuthi, dí naʼni gakhi̱i̱ rí xátani̱ dí nagua̱ʼa̱ xuyaaʼ. Ragájkhun nindxu̱u̱ rígi̱, ma̱ndoo muñewa̱a̱n xóo nakumulú ga̱jma̱a̱ rí nuʼni. w24.03 5 kutriga̱ 11, 12