Junio

Jeobá niʼni tsajkurámíinʼ cristianos bi̱ nikúwá nákha siglo timbá índo̱ niʼngu̱u̱n, ikhiin niguma gíníín mbaʼa nuthu, nguáná asndu mbiʼi dí ikhiin nditháan na̱nguá niguaʼti̱i̱n. Guʼyáá dí nigíʼnuu Bernabé ga̱jma̱a̱ apóstol Pablo índo̱ kúwá rutaraʼa náa mbayuuʼ xuajen Listra. Nákha ginii, xa̱bu̱ nidriguíin májánʼ ga̱jma̱a̱ nidxawíín. Mú mbiʼi má rúʼko̱, tikhun xa̱bu̱ sia̱nʼ nini dí xa̱bu̱ makiʼníin kuñúún ga̱jma̱a̱ tikhun dí ikhiin nixnáá ga̱jma̱a̱ itsí Pablo rí asndu nikumu̱ún dí nixiyáa (Hech. 14:19). Mú Bernabé ga̱jma̱a̱ Pablo nigún i̱mba̱ ríʼkhá̱ gutaraʼa. Ndiéjunʼ nirígá rá. “Niʼngu̱u̱n nini dí mbaʼin maguánu mani̱ndxu̱ún xa̱bi̱i̱ Jesús” ma̱ngaa nixnúún tsiakii a̱ngiu̱lú ga̱jma̱a̱ ajngáa dí nithi ma̱ngaa numuu xkri̱da dí niniñanʼ (Hech. 14:​21, 22). Bernabé ga̱jma̱a̱ Pablo takanájkhún maski ajndu niguma gíníín ga̱jma̱a̱ rúʼko̱ nimbáñun mbaʼin xa̱bu̱. Xúʼko̱ má kayuuʼ, á mu na̱nguá ekanájkhulú ga̱jma̱a̱ nuʼni má xúʼko̱ ñajuunʼ dí Jeobá nixnúlú, maguma tsajkurámáanʼlu wéñuʼ. w23.04 16, 17 kutriga̱ 13, 14

Rey David nixmijná gajmíi̱n xa̱bu̱ tsianʼ bi̱ ramíjíin náa mbayuʼ mbiʼi rí nixtáa, ga̱jma̱a̱ índo̱ niʼtákáñuu má xúʼko̱ Jeobá rí mambáyúu. David ndiʼyoo gajkhun rí Jeobá niʼdxawuun ga̱jma̱a̱ nariʼña̱a̱ rí niʼtájkáan. Ikháán mangáán ma̱ndoo matayaa dí gajkhun nindxu̱u̱ ajngáa rígi̱. Náa Biblia nasngájmulú rí Jeobá maxnúlú ku̱ma̱ ga̱jma̱a̱ tsiakii rí ndayúlú mu maʼngulú, xó má ndiʼyáá dí ikhaa ma̱ndoo majmiuu a̱ngiu̱lú bi̱ kúwíin náa xuajñuu o eʼwíinʼ xa̱bu̱ bi̱ na̱nguá eyamajkuíí mu mumbayúlú. Nduʼyáá rí Jeobá gajkhun mariʼña̱a̱ rí nuʼtájkáan maski ajndu nguáná ikhaa xáriʼñulú xó má ikháanʼlu eyulú. Ikhaa maxnúlú rí ndayúlú mbiʼi rí gáʼyulúʼ. Ikha jngóo índo̱ guʼtajkháan guguaʼdáá fe rí Jeobá mañewu̱nlú xúgi̱ ga̱jma̱a̱ náa numbaaʼ nuxi̱ʼ “maxnún rí nda̱ñúunʼ xúgíinʼ bi̱ kúwá nduya” (Sal. 145:16). w23.05 8 kutriga̱ 4; 12, 13 kutriga̱ 17, 18

Májánʼ ma̱ta̱ya̱a̱ xóo eguma tsajkurámáánʼ índo̱ natanimbaníí mbá meta. Náá dí gáʼyóoʼ ma̱ta̱ya̱a̱ rá. Á mu meta ndrígáaʼ nindxu̱u̱ dí matraxnuu Biblia o dí maratajkáan itháán májánʼ, atayáá ndiéjunʼ dí májánʼ gátandrígúu, atatsaʼwáminaʼ xú káʼnii gaʼni mambaxáaʼ itháán májánʼ ga̱jma̱a̱ Jeobá (Sal. 145:​18, 19). Á mu nandaaʼ ma̱nindxa̱a̱ʼ itháán májáanʼ xa̱bu̱, atayáá xú káʼnii gámbáyáaʼ dí mambaxáʼ gajmiáanʼ eʼwíinʼ (Col. 3:14). Ndiéjunʼ i̱ʼwáʼ ma̱ndoo matani̱ rá. Ataniraʼmáʼ náá numuu dí nandaʼ matanimbánii meta rúʼko̱. Araxtaa itháan mba̱yu̱u̱ʼ gajmiáanʼ bi̱ ma̱ndoo mumbayáaʼ (Prov. 13:20). Gajkhun má, xúgiáanʼ rígá mbiʼi dí na̱nguá edxuu a̱jkiu̱lú muʼni nimbá. Lá rúʼko̱ eʼyoo gáʼthúu̱n rí muniʼñááʼ ruʼnimbaníí meta ndrígulú rá. Na̱nguá. Gíʼmaa muʼnimíjna muʼnimbáníí meta ndrígulú maski má na̱nguá edxu̱u̱ a̱jkiu̱lú muʼni, gajkhun má mbaʼyóoʼ mba̱a̱ tsiakii, mú magiʼdoo numuu dí gúʼni. w23.05 27, 28 kutriga̱ 5-8

Á mu nandaaʼ matriʼkhu̱u̱ ga̱jma̱a̱ dí nitani̱ xátatsaʼwamínáʼ wéñuuʼ ga̱jma̱a̱ numuu dí nirígá, á mu nikiéʼkháanʼ xátani gámaa imba̱a̱ ga̱jma̱a̱ numuu dí nitani̱. Dí itháán májánʼ nindxu̱u̱ dí marata náa nijngawaan ga̱jma̱a̱ matani̱ xúgíʼ dí eʼngo̱o̱ mú xúʼko̱ maguma májánʼ dí nirígá. Á mu nagáwíinʼ a̱jkia̱a̱nʼ ga̱jma̱a̱ numuu dí nitani̱, ganindxa̱a̱ʼ xa̱bu̱ guabaaʼ, aratákháñíí Jeobá, aratháán náa nijngawaan ga̱jma̱a̱ atanda̱ʼa̱a̱ dí maʼni mba̱a̱ a̱jkiu̱u̱n kaʼyaaʼ (Sal. 25:11; 51:​3, 4). Á mu nitani̱ gawíínʼ mbáa, atanda̱ʼa̱a̱ dí maʼni mba̱a̱ a̱jkiu̱u̱n kaʼyaaʼ ga̱jma̱a̱ á mu ndayóoʼ atandu̱ʼu̱u̱n bi̱ kuya̱ edxu̱u̱ dí mumbayáaʼ (Sant. 5:​14, 15). Gajmañaaʼ náa nijngawa̱ánʼ ga̱jma̱a̱ ni xátani mbu̱júu̱. Ma̱ndoo ma̱ta̱ya̱a̱ gajkhun dí Jeobá mambáyáaʼ ga̱jma̱a̱ masngájma dí májánʼ a̱jkiu̱u̱n kaʼyaaʼ (Sal. 103:​8-13). w23.08 28, 29 kutriga̱ 8, 9

Índo̱ rey Jehoás ninindxu̱u̱ xóo ndxáma̱á, niʼni tsiakiiminaʼ mu maʼni mbá xúgíʼ rí nanigu̱u̱ʼ Jeobá, numuu rí nimbáyúu Jehoiadá. Mú, nda̱wa̱á rí nikháñuu Jehoiadá, Jehoás niʼdxawun rí nithi príncipes ndrígóo Judá bi̱ niniña̱a̱ʼ ruyamajkuíí xó má kaʼyoo Jeobá (2 Crón. 24:​4, 17, 18). Maski asndu Jeobá nigawúúnʼ wéñuuʼ ga̱jma̱a̱ numuu rí nini̱ “ikhaa na̱nguá niniñuuʼ makuʼmiin profetas mu matangi̱ín” mu “ikhiin na̱nguá nindúún mudxawíín” asndu na̱nguá nini caso Zacarías, a̱ʼdióo Jehoiadá, bi̱ nindxu̱u̱ profeta ga̱jma̱a̱ ndxajkuun, ga̱jma̱a̱ nindxu̱u̱ prímii Jehoás. Ga̱jma̱a̱, rey Jehoás nikujmii muxiyáá Zacarías. (2 Crón. 22:11; 24:​19-22). Jehoás na̱nguá nimíñuu kaʼyoo Dios, numuu rí Jeobá má niʼthí: “Bi̱ na̱nguá eyamajkuʼ xúyamajkún má mangiin” (1 Sam. 2:30). Mbiʼi nda̱wa̱á, “mbá nguéjmi̱i̱n xa̱bu̱” bi̱ náa ejército sirio nigún nini gajmiún soldado ndrígióo Jehoás, maski asndu ikhiin “ra̱ʼkhá tháán mbaʼin”, ikhaa “nigawúúnʼ wéñuuʼ” (2 Crón. 24:​24, 25). Índo̱ sirios nitangiín náa xuajñún, xa̱bi̱i̱ má Jehoás nixiyáá numuu rí ikhaa nixíyáa Zacarías. w23.06 18, 19 kutriga̱ 16, 17

Niʼni má guwáʼ tsiguʼ dí apóstol Pablo nixtáa rataráʼa náa Éfeso ga̱jma̱a̱ niʼsngáa ajngáa rí májánʼ (Hech. 19:​1, 8-10; 20:​20, 21). Ikhaa ra̱ʼkhá tháán nindoo kaʼñún a̱ngui̱i̱n ga̱jma̱a̱ nindoo mambáñún mu muguajún jmbu má xúʼko̱ náa Jeobá. Bi̱ efesios nunimbu̱ún náa religión dí minduwaʼ ga̱jma̱a̱ nagún náa xa̱bu̱ xawan. Xa̱bu̱ bi̱ nikúwá náa Éfeso ninigu̱u̱nʼ muni̱ xúgíʼ rí tséjmaa, náa ndxa̱a̱ rí nuni̱ nanigu̱u̱nʼ muthi ga̱jma̱a̱ numuu rí nubúúnʼ xkawiʼ kayuuʼ xa̱bu̱ rí asndu tsétiñu̱u̱nʼ (Efes. 5:3). Xóo muʼthá, na̱nguá eʼni gawúúnʼ ga̱jma̱a̱ numuu rí nuni̱ (Efes. 4:​17-19). Tsixmiéjúún ga̱jma̱a̱ numuu xóo eku̱mu̱u̱ Jeobá, numuu rí na̱nguá eyááʼ dí nindxu̱u̱ májánʼ ga̱jma̱a̱ dí ra̱májánʼ. Ikhaa jngóo Pablo niʼthúún rí ku̱ma̱ ndrígu̱ún rígá náa “mikrína ga̱jma̱a̱ kúwá wájíʼ náa vida rí kaʼyoo Dios”. Tikhuun xa̱bu̱ Éfeso nigájni̱i̱n náa religión rí minduwaʼ. w24.03 20 kutriga̱ 2; 21 kutriga̱ 4-6

Gedeón ndiyóoʼ maʼngo̱o̱ wéñuʼ. Índo̱ xa̱bu̱ madianita nigájnún ragáñún mbruʼun, ikhaa ni̱jkha̱ raxkhúún náa matha̱ ndrígóo Jezreel asndu náa mañu Jordán (Juec. 7:22). Ndiéjunʼ niʼni ikhú xá. Lá aʼkue̱ má niwi̱ji̱ xáʼ. ¡Na̱nguá! Maski ajndu ikhaa gajmíi̱n mbá 300 xa̱bi̱i̱ niʼni néʼngu̱u̱n wéñuʼ, nikidiin náa mañu ga̱jma̱a̱ nigún ruxkhúún má xúʼko̱. Nda̱wa̱á, niʼngu̱u̱n nixkamiin ga̱jma̱a̱ nigudíin (Juec. 8:​4-12). Gakumala kuya̱a̱ Jeobá rí ikhaa má gaxnala tsiakii. Rúʼko̱ dí niʼni Gedeón, ga̱jma̱a̱ Jeobá nditháan tániñuuʼ (Juec. 6:​14, 34). Mbá miʼtsú, Gedeón gajmíi̱n xa̱bi̱i̱ nigún rajkhúún ruxkhún a̱jmi̱i̱n rey madianita bi̱ nagáñún gajmiún camello ndrígu̱ún (Juec. 8:​12, 21). Mú numuu rí Jeobá nimbáñún, israelita bugi̱ bi̱ túni kawabamijná niʼngu̱u̱n nixkamiin ga̱jma̱a̱ niradíin. Xúʼko̱ má kayuuʼ a̱ngiu̱lú bi̱ kuya̱ edxu̱u̱ rí mbiʼi xúgi̱ mangiin ma̱ndoo maku̱mu̱ún kuyáá Jeobá, Dios bi̱ “na̱nguá egaʼ asndu má tsekhanajkhoʼ”. Ikhaa maxnún má xúʼko̱ tsiakii índo̱ gáʼyóoʼ (Is. 40:​28, 29). w23.06 6, 7 kutriga̱ 14, 16

Tséʼniuu ma asndu ndiéjunʼ tsáʼkhá dí gúraʼníí ma̱ndoo muguajún jmbu. Ikha jngóo gákumulú kuʼyáá Jeobá. Gundxaʼwamíjna̱ náa xkridoo juez Barac ga̱jma̱a̱ xú káʼni nigájnuu májánʼ numuu dí niraʼwíí maʼnimbo̱o̱ kaʼyoo Jeobá. Maski ajndu mbiʼi rúʼko̱ israelitas takúwi̱i̱n xawii mu magún magi̱ʼdu̱u̱n, táguaʼdáa escudo ni ma lanza, maski ajndu xúʼko̱ Jeobá niʼthúu̱n Barac dí maʼga gági̱ʼdu̱u̱ ga̱jma̱á Sísara gajmíi̱n soldados cananeos bi̱ seguro guáʼdaa ajua̱nʼ mu magi̱ʼdu̱u̱n (Juec. 5:8). Profetisa Débora niʼthúu̱n Barac dí magajtaa náa kúbá Tabor náa xkua̱ mu magi̱ʼdu̱u̱ gajmíi̱n Sísara ga̱jma̱a̱ mbá 900 carro dí gíʼdoo ikhaa. Maski ajndu nakujmaa dí náa xkua̱ carros ma̱ndoo maʼngu̱u̱n, mú Barac niʼnimbo̱o̱ dí nijuiʼtháán. Índo̱ soldados kúwíin ruguájtha̱án náa kúbá, Jeobá nikuʼmaa mbá ruʼwa mbiʼ. Carro nijuiʼduma̱ʼán náa iyaʼ ku̱ba̱ʼ ga̱jma̱a̱ Jeobá niʼni dí Barac maʼngo̱o̱ (Juec. 4:​1-7, 10, 13-16). Xúʼko̱ má kayuuʼ mangáanʼ: Jeobá maʼni dí maʼngulú á mu nakumulú kuʼyáá ga̱jma̱a̱ nuʼnimbulú ikha dí naxnúlú náa xuajñuu. w23.07 19 kutriga̱ 17, 18

Mu makáwáanʼ gíʼdoo numuu dí maʼngo̱o̱ a̱jkiu̱lú. Ikhaa má xóo xa̱bu̱ bi̱ nikúwá nákha wajyúuʼ, ndayóoʼ maʼngo̱o̱ a̱jkiu̱lú mu muguaʼthi̱i̱n rí Dios manimbánuu dí nikudaminaʼ maʼni (Heb. 6:​11, 12). Náa Biblia naʼni mbríguáanʼlú ga̱jma̱a̱ mbáa xa̱bu̱ bi̱ naʼdu (Sant. 5:​7, 8). Xa̱bu̱ bi̱ naʼdu ikhaa naxíjyooʼ mú na̱nguá eʼyoo nguáná ga̱jma̱a̱ dí naʼdu. Maski ajndu xúʼko̱, ikhaa naʼngo̱o̱ a̱jkiu̱u̱n nagi̱ʼthu̱u̱n numuu dí ndaʼyoo dí maxná ma dí niʼdu. Ikhaa ma kayuuʼ, ikháanʼ nuñajunʼlú gakhi̱i̱ mu muʼni dí nandoo Jeobá maski ajndu ‹tséʼyáá nguáná gátanga̱a̱ Tátá› (Mat. 24:42). Gaʼngo̱o̱ a̱jkiu̱lú, guguaʼthi̱i̱n numuu dí nduʼyáá dí Jeobá ma maʼnimbánuu dí nikudaminaʼ maʼni. Á mu dí tséʼngo̱o̱ a̱jkiu̱lú, rígi̱ gáʼni dí maʼni néʼngulú ga̱jma̱a̱ mañu mañúú muʼni tsíngumijná náa rí gajkhun. Ma̱ngaa rígi̱ maʼni rí mbuʼyáʼ muʼni gagimijná rí káaʼ mbá xngaa. Mú, a mu najmáánʼlu nuguaʼthi̱i̱n xúʼko̱ maʼngulú asndu índo̱ gáʼkha̱ fin ga̱jma̱a̱ makáwáánʼ (Miq. 7:7). w23.08 22 kutriga̱ 7

Índo̱ nuʼnimbrígui̱i̱ profecía rí na̱ʼkha̱ náa Daniel 2:​41-43 ga̱jma̱a̱ i̱ʼwáʼ dí na̱ʼkha̱ náa Daniel ma̱ngaa náa Apocalipsis, na̱jkua̱nú nduʼyáá dí rajkhúu xándú nindxu̱u̱ Reino Unido ga̱jma̱a̱ Estados Unidos, bi̱ nindxu̱ún potencia mundial dí mbiʼi xúgi̱. Índo̱ Daniel niʼthúu̱n Nabucodonosor dí nandoo gáʼthúu̱n xnuʼndoo, xígi̱ niʼthí ga̱jma̱a̱ numuu potencia mundial bugi̱: “Reino mbá tapha maʼni gujkhuʼ ga̱jma̱a̱ mbá tapha mani wabaʼ”. Numuu rí ku̱ba̱ʼ nandoo gáʼthúu̱n xa̱bu̱, rí naʼni dí ajua̱nʼ xágiʼdoo tsiaki̱i̱. Rí niʼthí Daniel ga̱jma̱a̱ numuu xándú bi̱ nigundajmaa Nabucodonosor, mú itháán náa dí rajkhúu naʼni makru̱ʼu̱lú mbaʼa dí gíʼdoo numuu. Timbá, potencia mundial rí nindxu̱u̱ Reino Unido ga̱jma̱a̱ Estados Unidos, nisngajma̱ rí kuaʼdáá tsiaki̱i̱. Mbá xkri̱da, índo̱ nirígá Timbá ga̱jma̱a̱ raga̱jma̱ Guerra náa xúgíʼ Numbaaʼ ikhiin niʼngu̱u̱n. Mú potencia rígi̱, maʼga̱ randátigo̱o̱ itháán tsiaki̱i̱ ga̱jma̱a̱ numuu xkujndu rí nuni̱ xa̱bu̱. Ragajma, potencia bugi̱ nindxu̱u̱ bi̱ iwáá bi̱ maxtáa, numuu dí Xa̱bu̱ ñajunʼ ndrígóo Dios maʼni gámbíin xúgíinʼ xa̱bu̱ ñajunʼ. w23.08 11 kutriga̱ 12, 13

David niraʼnuu mbaʼa xkujndu rí nguáná ni̱jkha̱nú nijmúu (Sal. 18:​4, 5). Índo̱ ndaʼyoo xóo nandoo kaʼyoo ga̱jma̱a̱ rí nañewu̱u̱n májánʼ Jeobá, nimbáyúu mbayáa tsiaki̱i̱ mbu̱júu̱. Nikumu̱u̱ rí mígiu̱u̱ Jeobá na̱jkha̱ gátiga̱a̱ “náa rígá rajxa̱ maxaʼ” ga̱jma̱a̱ rí “mba̱ya̱a̱ jxu̱ʼ náa rígá mba̱ji̱nʼ iyaʼ”. Xúʼko̱ niʼni rí nigiʼdoo mbu̱júu̱ tsiaki̱i̱ mu maʼni ñajuunʼ ga̱jma̱a̱ gagi (Sal. 18:​28-32; 23:2). Índo̱ gúraʼníí xkujndu, mangáánʼ ma̱ndoo muʼthá: “Núma̱a̱ má ngajua ndrígóo Jeobá rí nditháan tsétumuu dí kuwáanlú xóó” (Lam. 3:22; Col. 1:11). David nigiʼdiin bi̱ táʼndúún gúyáá ga̱jma̱a̱ asndu nindúún muxiyáa mbaʼa nuthu. Mú ga̱jma̱a̱ numuu rí nindoo kaʼyoo Jeobá, niʼni maxtáa májánʼ. Nikumu̱u̱ rí asndu xóo náa níjniúu xtáa Jeobá. Ikha jngóo niʼni ajmúú: “Náa xúgíʼ xkujndu rí gúʼdoo ikhaa niʼni kríñunʼ” (Sal. 34:4). Gajkhun nindxu̱u̱ xúgíʼ rí nigíʼnuu David, mú rí nandoo kaʼyoo Jeobá ninindxu̱u̱ itháán mba̱a̱ ki xóo gamíi rí gíʼdoo. w24.01 30 kutriga̱ 15-17

Gajmañaaʼ náa dí táraʼwíi májánʼ maʼni Jehoás. Nda̱wa̱á dí nikháñúu Jehoiadá ndxajkun bi̱ phú kayá edxu̱u̱, Jehoás táraʼwíin májánʼ bi̱ mambajxúu gajmii (2 Crón. 24:​17, 18). Niraʼwíí maʼdxaun consejo ndrígún príncipes bi̱ kúwíin náa Judá bi̱ na̱nguá nindúún kuyáá Jeobá. Lá ragájkhun dí táʼyóoʼ maʼnimbo̱o̱ kaʼñúún xáʼ. Mu táraʼwíi májánʼ dí maʼni ga̱jma̱a̱ niʼni xó ma nindúún bi̱ nambájxu gajmíi gajmaaʼ. Índo̱ Zacarías bi̱ nindxu̱u̱ prímíi nindoo gáxprígúu, ikhaa niʼthí dí muxiyáa (2 Crón. 24:​20, 21; Mat. 23:35). Phú raʼkhí kayuuʼ rígi̱. Jehoás ninindxu̱u̱ mbáa skágunʼ. Nákha ginii niʼni májánʼ, phú ngíná dí nda̱wa̱á ninindxu̱u̱ mbáa apóstata ga̱jma̱a̱ nigudíin eʼwíinʼ. Nda̱wa̱á xa̱bi̱i̱ má nixiyáa (2 Crón. 24:​22-25). Mixtiʼkhu xóo gáxtáa a mu niʼdxawun dí niʼthúu̱n Jeobá ga̱jma̱a̱ á mu niʼdxawun dí nitháán xa̱bu̱ bi̱ nandún kuyáá Dios. w23.09 9 kutriga̱ 6

Mú Jesús ndiʼyoo dí apóstol Pedro ma̱ndoo mawi̱ji̱ jmbu, ikha jngóo niʼthúu̱n ga̱jma̱a̱ ajngáa májánʼ: “Xámiñaaʼ”. Índo̱ Pedro ndiʼyoo dí Jesús nikumu̱u̱ kaʼyoo, rúʼko̱ ni̱jkha̱nú asndu náa a̱jkiu̱u̱n. Nda̱wa̱á Pedro ga̱jma̱a̱ Andrés bi̱ nindxu̱u̱ giʼtio̱o̱ niniñaaʼ ruñiíi e̱gi̱ʼ ga̱jma̱a̱ xúʼko̱ nindoo nigún kidxuuʼ Mesías. Niguma tsajkurámiinʼ wéñuʼ ga̱jma̱a̱ numuu rí xúʼko̱ niraʼwi̱i̱ muni (Mar. 1:​16-18). Pedro rí ninindxu̱u̱ xa̱bi̱i̱ Cristo mbaʼa rí nijmañuu Ndiʼyoo xú káʼnii Jesús niʼni thanún bi̱ naʼniún nandii, nixkawíin xa̱bu̱ wéñiiʼ ga̱jma̱a̱ asndu niʼnigabi̱ín xa̱bu̱ (Mat. 8:​14-17; Mar. 5:​37, 41, 42). Ma̱ngaa niwasngájmáá xú káʼnii gáʼtáñajunʼ Jesús náa Xa̱bu̱ Ñajunʼ ndrígóo Dios. Rígi̱ nikawoo asndu náa a̱jkiu̱u̱n (Mar. 9:​1-8; 2 Ped. 1:​16-18). Pedro ndiʼyoo rí asndu ikhaa tákumu̱u̱ rí mbaʼyoo. ¡Ra̱ʼkhá tháán nidxuu rí na̱nguá niʼni guabaminaʼ rí xóo nindxu̱u̱! Numuu rí á mu niʼni xúʼko̱, xáʼyoo xúgíʼ rígi̱. w23.09 21 kutriga̱ 4, 5

Náa timbá i̱yi̱ʼ dí niʼnirámáʼ apóstol Pedro ma̱ngaa niʼthí “gáʼndalá kuyamijná”. Ngajua rúʼko̱ raʼkháa i̱ndó nambumuu nguáthá aʼkhá, ikhaa “nanújngorámuuʼ mbaʼa aʼkhá” (1 Ped. 4:8). Índo̱ niʼnirámáʼ rígi̱, Pedro mbáa nirmáʼáan a̱jkiu̱u̱n índo̱ Jesús niʼsngóo ga̱jma̱a̱ numuu dí maʼni mba̱a̱ a̱jkiu̱u̱n rí nitamíjná má ginii. Índo̱ Pedro niʼthí dí ma̱ndoo maʼni mba̱a̱ a̱jkiu̱u̱n mbá “asndu 7 nuthu”, mbá nindxa̱ʼwáminaʼ dí ra̱ʼkhá tháán májáanʼ xa̱bu̱ nindxu̱u̱. Mu Jesús niʼsngóo dí mbaʼyóoʼ maʼni mba̱a̱ a̱jkiu̱u̱n “asndu 77 nuthu”, dí ragíʼmaa martumuu dí maʼni mba̱a̱ a̱jkiu̱u̱n kaʼñúún eʼwíinʼ. Rígi̱ gíʼdoo numuu náa mangáánʼ (Mat. 18:21). Lá naʼniaaʼ miʼskhaa matani̱ mbáníí consejo rígi̱ ráʼ. Xájmaa má, numuu dí nindxu̱lú xa̱bu̱ aʼkhá, mbáa xúgíinʼ xa̱bi̱i̱ Jeobá naʼniún mingíjyúuʼ muni mba̱a̱ kuñún eʼwíinʼ. Ikha jngóo, ndiéjunʼ gándoo matani rá. Rí itháan gíʼdoo numuu nindxu̱u̱ dí matani xúgíʼ xó má eʼngo̱o̱ mu matani̱ mba̱a̱ a̱jkia̱a̱nʼ xtáyá ndxájuaaʼ ga̱jma̱a̱ maraxtaa tsímáá ga̱jma̱a̱. w23.09 29 kutriga̱ 12

Asndu náa awúu̱n e̱gi̱ʼ rí kua̱ʼa̱a̱nʼ, niʼtákáñuu Jeobá, Jonás nikumu̱u̱ kaʼyoo Jeobá dí ikhaa maʼdxaun dí gáʼtájkáan, numuu dí nitanga̱a̱ a̱jkiu̱u̱n ma̱ngaa nikumu̱u̱ kaʼyoo Jeobá dí ikhaa mambáyúu, índo̱ nigájnáa náa wúu̱n e̱gi̱ʼ, nixtáa xawii maʼnimbánuu ñajunʼ dí nikhánáá (Jon. 2:​10–3:4). Índo̱ natraʼníí mbá tsáʼkhá, lá najmaaʼ wéñuuʼ dí asndu naʼniaaʼ gakhi̱i̱ maratajkáan ráʼ. O naku̱ma̱a̱ʼ dí nánguá xtaʼdáá tsiakii mú matanigajma̱a̱ ráʼ. Garmáʼáan a̱jkia̱a̱nʼ dí Jeobá nakro̱ʼo̱o̱ dí xtáa ratraʼníí. Ikha jngóo maski ajndu xáratha wéñuuʼ índo̱ gáratajkáan, mata̱ya̱a̱ gajkhun dí ikhaa maʼdxawaanʼ (Efes. 3:20). Á mu dí ga̱jma̱a̱ dí xtaa ratraʼníí naʼniaaʼ mingíjyúuʼ matraxnuu o matanigajma̱a̱, mbáa itháán májánʼ gáʼni á mu natadxawíín audio ndrígóo Biblia o iyulú. Imbo̱ʼ dí ma̱ndoo mambáyáaʼ ni̱ndxu̱ʼ dí matadxawíín ajmúú gájma matayaa video ndrígóo jw.org. Índo̱ gáratakháñíí Jeobá ga̱jma̱a̱ atayáʼ xóo naxtiʼña̱a̱ dí niratájkáan, náa iyulú o i̱ʼwáʼ rí na̱ʼkha̱ náa Jeobá, rí nindxu̱u̱ asndu xóo naratháán “Mbá péñu araxnúʼ tsiakii”. w23.10 13 kutriga̱ 6; 14 kutriga̱ 9

Guʼwá xtíin ga̱jma̱a̱ templo dí nigumaa nda̱wa̱á náa Jerusalén nigumaa ikha̱á kayuuʼ. Nigiʼdoo a̱jma̱ cuarto dí nawiʼtáa ga̱jma̱a̱ cortina: Rí mikaʼwu ga̱jma̱a̱ náa rí phú mikaʼwu (Heb. 9:​2-5; Éx. 26:​31-33). Náa rí Mikaʼwu rígá mbá candelabro dí mbawíí oro, mbá náa nakarámáʼ dí ndataun ga̱jma̱a̱ mbá mesa náa kadrámaʼ pan dí mixnájxi̱. I̱ndó “ndxajkun bi̱ nixtaʼwíin” ma̱ndoo matuʼwu̱únʼ náa rí mikaʼwu mu munimbánii ñajunʼ mitsúʼkháan rí kaʼñún muni̱ (Núm. 3:​3, 7, 10). Náa rí Phú Mikaʼwu dí rígá náa e̱jna̱ dí nimbánúún gajmiún Dios rí kagu̱u̱ mbawíí oro, rí nandoo gáʼthúu̱n rí ikhí xtáa Jeobá (Éx. 25:​21, 22). I̱ndó ndxajkun bi̱ phú kayá edxu̱u̱ ma̱ndoo manújngoo náa cortina mu mato̱ʼo̱o̱ náa rí phú Mikaʼwu. Náa Mbiʼi rí Majngudi̱i̱ aʼkhá, nagumariya̱a̱ʼ mbá míʼtsú mámbá tsiguʼ, ndxajkun bi̱ phú kayá edxu̱u̱ nato̱ʼo̱o̱ ga̱jma̱a̱ eʼdi ndrígóo xujkhúʼ mu maʼni jngudi̱i̱ aʼkhá ndrígóo ga̱jma̱a̱ aʼkhúún xúgíinʼ xa̱bu̱ xuajin (Lev. 16:​2, 17). Mba̱yu̱ʼ tsiguʼ nda̱wa̱á Jeobá nisngájmaa ndiéjunʼ phú eyoo gáʼthúu̱n dí rígá náa tabernáculo (Heb. 9:​6, 7). w23.10 27 kutriga̱ 12

Náa Biblia nuxkamaa mbaʼa nuthu kiʼtáñajunʼ rígi̱: “Rí maʼndalá kuyamíjna̱” (Juan 15:12; Rom. 13:8; 1 Tes. 4:9; 1 Ped. 1:22; 1 Juan 4:11). Mú ngajua nindxu̱u̱ rí nda̱ja̱a̱ náa a̱jkiu̱lú; náa rí nimbáa xándoo mbaʼyoo. Á mu xúʼko̱, xú káʼnii gándoo gusngajmalúʼ, mu eʼwíinʼ mbuyáá dí rígá náa awúún a̱jkiu̱lú rá. Xóo nuʼthá ga̱jma̱a̱ rí nuʼni. Mbaʼa xóo ma̱ndoo musngajmá rí nandulúʼ kuʼñúún a̱ngiu̱lú. Náa Biblia naʼthí tikhuʼ xkri̱da. Rí “guthu̱u̱n rí gajkhun eʼwíinʼ” (Zac. 8:16). “Gakuwáanʼ tsímáá má xúʼko̱” (Mar. 9:50). “Gináanʼ ikháanʼ gúyamajkúnla eʼwíinʼ” (Rom. 12:10). “Gundríguíin eʼwíinʼ ga̱jma̱a̱ gagi” (Rom. 15:7). “Gu̱ni̱ [...] mba̱a̱ a̱jkia̱la kuyamíjna̱” (Col. 3:13). “Gumbáyumíjnála má xúʼko̱ ga̱jma̱a̱ rí ku̱da” (Gál. 6:2). “Guxnamíjnála má xúʼko̱ tsiakii” (1 Tes. 4:18). “Ikha jngóo [...] gumbáyumijnálá” (1 Tes. 5:11). “Gutajkáan ga̱jma̱a̱ numún eʼwíinʼ” (Sant. 5:16). w23.11 9 kutriga̱ 7, 8

Xúgíʼ mbiʼi ndayúlú mbá fe gújkhúʼ mu ma̱ndoo muraʼwíí muʼni. Mbá xkri̱da, rígá mbaʼa dí nuraʼwíí ga̱jma̱a̱ numuu bi̱ nambáxuluʼ gajmiulúʼ, dí nuʼni gagimijná, rí nuʼnigajmaa, dí nuʼdamijná, ga̱jma̱a̱ numún e̱ji̱n ma̱ngaa numuu ñajunʼ. Ma̱ndoo murajximíjna̱: “Ndiéjunʼ esngájma dí naraʼwíí rí nani rá. Lá nasngajmá rí naku̱mu̱ʼ dí rígá náa tsu̱du̱u̱ ku̱ba̱ʼ nindxu̱u̱ mbá xngaa ga̱jma̱a̱ dí nacha̱ má gágumaa gámbáa mu maʼni mbá numbaaʼ nuxi̱ʼ rí nakudaminaʼ maʼni Dios ráʼ. O nindxa̱a̱ʼ xóo xa̱bu̱ bi̱ nuthi dí káaʼ i̱ndó vida rígi̱ kuaʼdáá dxe̱ʼ” (Mat. 6:​19, 20; Luc. 12:​16-21). Á mu nuʼni gújkhúʼ fe ndrígúlú rí ku̱ba̱ʼ nuxi̱ʼ gíʼ mijngii, maʼni rí muraʼwíi májánʼ dí muʼni. Ma̱ngaa nuraʼníí tsáʼkhá náa dí ndayóʼ muguaʼdáá mbá fe gújkhúʼ, xóo índo̱ nunigínáanʼlu, nandii rí ndaa thanuu, o i̱ʼwáʼ rí naʼni makáguabáanʼlú. Mbáa nákha ginii nuraʼníí májánʼ asndu xkáʼnii má xkujndu. Mú índo̱ nagajyúuʼ mbayuuʼ, ndayóoʼ maguaʼdáá mbá fe gújkhúʼ mu maʼngulú muraʼníí ga̱jma̱a̱ muʼni má xúʼkhíin ñajuunʼ Jeobá ga̱jma̱a̱ gagi (1 Ped. 1:​6, 7). w23.04 27 kutriga̱ 4, 5

Jeobá nagi̱ʼthu̱u̱n rí nda̱wa̱á dí nuʼtájkáan muʼnilú dí kaʼyoo muʼnilú ikháanʼ. Gundxaʼwámíjná ga̱jma̱a̱ numuu mbáa ndxájulú xa̱biya̱ bi̱ nandoo maʼga náa asamblea rí ndajyúuʼ ajtsú mbiʼi ga̱jma̱a̱ na̱ndo̱ʼo̱o̱ Jeobá dí mambáyúu mu magiʼdoo permiso náa nañajunʼ.Ndiéjunʼ gándoo maʼni Jeobá mu mariʼña̱a̱ dí niʼtájkáan xá. Mbáa maxnúu tsiakii mu maʼtámíjná ga̱jma̱a̱ jefe ndrígóo. Mú, ndxájulú ndayóoʼ maʼni dí kaʼyoo. Gíʼmaa maʼtáminaʼ ga̱jma̱a̱ jefe ndrígóo, mbáa asndu mbaʼyóoʼ maʼthúu̱n mbaʼa nuthu. Asndu ma̱ndoo maʼthúu̱n dí ma̱ndoo mariʼkhuu hora ndrígóo ga̱jma̱a̱ imba̱a̱ bi̱ nañajunʼ ga̱jma̱a̱ o ma̱ndoo maʼthúu̱n rí xtáa xawii dí xúni̱ numáá mbiʼi rúʼko̱. Jeobá nagi̱ʼthu̱u̱n dí muʼtákáñii má xúʼko̱ ga̱jma̱a̱ numuu mbá rí naʼni maxmiéjunlú. Jesús niʼni makru̱ʼu̱lú dí nguáná rí gúndaʼalú xáxtiʼña̱a̱ nacha̱ (Luc. 11:9). ¡Ikha jngóo xákanajkulú! Guʼtájkáan ga̱jma̱a̱ xúgíʼ a̱jkiu̱lú ga̱jma̱a̱ xúniʼñáʼ ruʼtájkáan (Luc. 18:​1-7). Índo̱ nuʼtájkáan kuwa̱án rusngajmáá Jeobá dí raʼkháa mbaʼ nunda̱ʼa̱ xuʼkhíinʼ, nunda̱ʼa̱ numuu rí nduʼyáá gajkhun rí ikhaa ma̱ndoo mambáyulú má. w23.11 22 kutriga̱ 10, 11

Jeobá nikudaminaʼ náa Abrahán rí mbáa bi̱ ga̱ʼkha̱ náa ikhaa maʼni rí mbá xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ makhánún rí maguma tsajkurámiinʼ (Gén. 15:5; 22:18). Numuu rí Abrahán nigiʼdoo mbá fe mba̱a̱ náa Dios, ikha jngóo ndiʼyoo gajkhun dí ikhaa maʼnimbánuu rí nikudaminaʼ. Índo̱ Abrahán gítháán magiʼdoo 100 tsiguuʼ ga̱jma̱a̱ a̱ʼgiu̱u̱ 90, ikhiin na̱nguá guáʼdaaʼ nimbáa ada̱ (Gén. 21:​1-7). Náa Biblia naʼthí dí Abrahán “nigiʼdoo fe dí maʼga̱nú mani̱ndxu̱u̱ anu̱ún xa̱bu̱ bi̱ gákúwá náa mbaʼa xuajen mba̱ʼu̱, maski ajndu ndiʼyoo dí rakáʼnii marigá, mú ikhaa niʼnimbo̱o̱ rí nijuiʼtháán” (Rom. 4:18). Xó má eʼyáá ni̱jkha̱nú nimbánuu rí nigi̱ʼthu̱u̱n: Abrahán ni̱jkha̱nú ninindxu̱u̱ anu̱u̱ Isaac, nigiʼdaa a̱ʼdióo bi̱ ra̱ʼkhá tháán nindoo magiʼdaaʼ. Náá numuu ndiʼyoo gajkhun Abrahán dí Jeobá maʼnimbánuu gajkhun dí nikudaminaʼ rá. Numuu rí Abrahán nanuwiinʼ má Jeobá, ndiʼyoo gajkhun dí maʼnimbánuu rí nikudaminaʼ náa ikhaa (Rom. 4:21). Ga̱jma̱a̱ numuu fe rí nigiʼdoo, Jeobá ndiʼyoo rí nindxu̱u̱ jmbii ga̱jma̱a̱ nindoo kaʼyoo (Sant. 2:23). w23.12 8 kutriga̱ 1, 2

Ganindxa̱a̱ʼ bi̱ káʼnii munimbu̱ún kuyáá. Ma̱ngaa rígi̱ nandoo gaʼthí rí matanimbánii ñajunʼ rí nakánáʼ. Atsaʼwáminaʼ náa xkridoo Jesús. Ikhaa niʼnimbánuu ñajunʼ rí nikhánáá. Niʼni xúgíʼ rí Jeobá nikuʼmaa maʼni, niʼni asndu rí itháán gakhi̱i̱ maguma. Nindoo kaʼñúún xa̱bu̱ mú itháán xa̱bi̱i̱, nixtáa xawii makhañúu ga̱jma̱a̱ numún ikhiin (Juan 13:1). Xó má Jesús ataniminaʼ mangáánʼ rí matanimbáníí asndu ndiéjuunʼ má ñajunʼ rí nakhánaaʼ. Á mu tsétayáá xóo matani̱, ganindxa̱a̱ʼ xa̱bu̱ guabaaʼ ga̱jma̱a̱ atanda̱ʼa̱a̱ rí mambáyáaʼ mbáa ndxájulú bi̱ naʼni májánʼ ñajuunʼ Dios. Xáguanáaʼ ga̱jma̱a̱ rí natayáá má (Rom. 12:11). Gambáaʼ xúgíʼ rí najuixnájxa̱a̱ʼ; numuu rí nindxu̱u̱ “ñajuunʼ Jeobá, raʼkháa náa xa̱bu̱ú” (Col. 3:23). Gajkhun má, na̱nguá nindxa̱a̱ʼ xa̱bu̱ jmbii, ikha jngóo atayáá náa mbrígáa eʼngo̱o̱ matani̱ ga̱jma̱a̱ atayáá náa rí nakiéʼkhaan (Prov. 11:2). w23.12 26 kutriga̱ 8

Índo̱ mbáa najngúun iyaʼ na̱jkha̱nú naxtáa náa xuajñuu Jeobá. ¡Ra̱ʼkhá tháán gagi! Bi̱ nambájxu̱u̱n májánʼ gajmiún Jeobá, nduyáá rí gajkhun nindxu̱u̱ ajngáa dí ni’thí David: “Gagi xtáa xa̱bu̱ bi̱ ikháán natraʼwíí maxtáa mijngii ga̱jma̱a̱ nindxa̱a̱ʼ” (Sal. 65:4). Jeobá tsembajxu̱u̱ ga̱jma̱a̱ asndu tsáá má xa̱bu̱. Ikhaa na̱jkha̱ kanuu náa xa̱bu̱ bi̱ gajkhun nandún mambajxúún gajmiún ikhaa (Sant. 4:8). Índo̱ nuxnajximijna náa Jeobá ga̱jma̱a̱ najngún iyááʼ, Jeobá naʼthúnʼ ajngáa rígi̱: “Gúyaa mambáʼtoo xkrugoo mekhu mu xúʼko̱ xáʼyálá nditháan” (Mal. 3:10; Jer. 17:8). Rí majnguáanʼ iyááʼ dí ndiʼkhún egi̱ʼdu̱u̱. Xúgiáanʼ bi̱ ni̱ndxu̱lú cristianos nandulúʼ muʼnimbáníí dí niʼthá muʼni, maski ajndu nuraʼníí tsáʼkhá ga̱jma̱a̱ xkujndu dí maʼni makáwabaaʼ fe ndrígúlú (Ecl. 5:​4, 5). Ma̱ngaa gíʼma mbuʼyaridáá xkri̱doo Jesús ga̱jma̱a̱ munimbulú kiʼtáñajunʼ ndrígóo (Mat. 28:​19, 20; 1 Ped. 2:21). w24.03 8 kutriga̱ 1-3

Á mu tsénigualá muríyaʼ mbiʼi makuwáanʼla mbóó jnduʼ rá. Á mu xúʼko̱ káʼnii kuwáanʼla. Gudxa̱ʼwa̱míjna̱ ga̱jma̱a̱ numuu aguʼ, índo̱ ndiʼkhún matagídáʼ mi̱kha, káaʼ chíʼgíiʼ riʼyu̱u̱ agiuuʼ eʼni, mu mikatiyo̱o̱ʼ itháán ndayóoʼ mañu mañúú matadríyáʼ xuíʼtóo ixi̱ dí itháán mba̱ʼu̱, ikhaa ma kayuuʼ ma̱ndoo munila mangáanʼ, ma̱ndoo muríyaʼla káaʼ mbá xngaa dí mámbá mbiʼi mu ma̱ndoo makuwáanʼla jnduʼ (Sant. 3:18). Á mu nugíʼdi̱i̱ nuni̱ xúgííʼ rígi̱, maʼni dí matangaán maʼndalá kuyamijná mbu̱júu̱. Gíʼdoo wéñuuʼ numuu dí mbuyamajkumijná xa̱bu̱ bi̱ nidamijná. Nindxu̱u̱ xóo mataxpiñaʼ aguʼ, á mu tsetaxpiñaaʼ xájyúuʼ gaguíyúuʼ, ikháá ma kayuuʼ rígá náa xa̱bu̱ bi̱ nidamijná ma̱ngaa á mu dí tséyamajkumijná gamíi muniñaaʼ raʼndúún kuyamijná. Garmáʼáan a̱jkia̱a̱nʼ dí itháán gíʼdoo numuu nindxu̱u̱ dí imba̱a̱ xa̱bu̱ mbaʼyoo dí natayamajkuíí, raʼkháa dí naku̱ma̱a̱ʼ ikháán dí xtaʼdáá gamajkuaʼ. w23.05 22 kutriga̱ 9; 23, 24 kutriga̱ 14, 15

Náa Biblia na̱ʼkha̱ raʼthí tikhuʼ numún xa̱bi̱i̱ Dios bi̱ niku̱mu̱ún xúʼko̱ káʼnii ma̱ngaa, rí asndu naguaʼiin rí namíñún eni̱ xa̱bu̱ sia̱nʼ ndrígu̱ún o i̱ʼwáʼ xkujndu gakhi̱i̱ dí niraʼníí (Sal. 18:4; 55:​1, 5). Ikháánʼlú rá. Lá kuwáanʼ rumíniiʼ eni̱ a̱ngiu̱lú bi̱ náa nuʼnigajma̱a̱, náa nuñajunʼ, familia ndrígulú o xa̱bu̱ ñajunʼ ráʼ. Lá na̱jkha̱ rajngiyuu makhañúlúʼ ga̱jma̱a̱ numuu nandii rí nda̱a̱ thanuu dí kuaʼdáá ráʼ. Náa xóo rígi̱, nguáná maʼga̱nú makumulúʼ dí nánguá kuaʼdáá tsiaki̱i̱, xó má mbáa ada̱ chíʼgíiʼ. Ndiéjuunʼ eʼni Jeobá mu mambáyulú rá. Ikhaa naʼni̱i̱ a̱jkiu̱lú, ikha jngóo gíʼdoo wéñuuʼ numuu rí muʼni guʼumíjná rí muʼtájkáan má xúʼko̱ ga̱jma̱a̱ muraxnuu Ajngá rawuunʼ Dios (Sal. 77:​1, 12-14). Ikha jngóo índo̱ gákuwáanʼ xígi̱ káʼnii, mbáa itháán májánʼ rí muʼni ginii, dí muʼtákáñii Jeobá. Guʼtháán rí naʼni maxmiéjunlú, rí naʼni mamiñulúʼ ga̱jma̱a̱ guniʼñááʼ dí ikhaa mariʼñulúʼ ma̱ngaa dí maʼni̱i̱ a̱jkiu̱lú ga̱jma̱a̱ Biblia (Sal. 119:28). w24.01 24, 25 kutriga̱ 14-16

Mu muʼnimbánii dí niʼgimijná muʼni gíʼdoo numuu dí muxkajximijna muʼni. Náá numuu rá. A mu nuʼgíʼ muʼnimbaníí dí nimbanumíjná muʼnimíjna xó má eʼngo̱o̱. Ga̱jma̱a̱ índo̱ nataxkajximinaʼ matani mbá dí nitraʼwíí matani̱, natani̱ xó má eʼngo̱o̱ mu matanimbaníí. Mú ndiéjunʼ gámbáyáaʼ mataxkajximinaʼ matani itháan rá. Atanda̱ʼa̱a̱ Jeobá dí mambáyáaʼ mataxkajximinaʼ matani itháan. Ga̱jma̱a̱ espíritu santo ndrígóo gámbáyáaʼ mu mataxkajximinaʼ matanimbaníí dí nitagíminaʼ matani̱. Na̱nguá ma nindxu̱u̱ raʼkhí dí muʼgímijná muʼni mbá dí nakumulú dí gíʼmáanʼ muʼni. Mú mbáa náa awúu̱n a̱jkiu̱lú na̱nguá eyulú muʼni. Atatsaʼwáminaʼ xúgííʼ dí niʼni Jeobá ga̱jma̱a̱ numaaʼ (Sal. 143:5). Apóstol Pablo nindxa̱ʼwáminaʼ xúgíʼ xú káʼnii májánʼ a̱jkiu̱u̱n Jeobá, rígi̱ nixkájxi̱i̱ mu maʼni ñajunʼ ga̱jma̱a̱ xúgíʼ a̱jkiu̱u̱n (1 Cor. 15:​9, 10; 1 Tim. 1:​12-14). Ikhaa má kayuʼ á mu itháán natatsaʼwáminaʼ xú káʼnii nimbáyaʼ Jeobá, rígi̱ gáxkajxi̱i̱n dí matanimbánii meta rí xtaʼdáá (Sal. 116:12). w23.05 26, 27 kutriga̱ 3-5

Jeobá nindxu̱u̱ Anu̱lú bi̱ xtáa mekhuíí ikhaa naniguuʼ rí muʼni mba̱a̱ mbiʼyuu (Sal. 119:108). Lá nandoo gáʼthúu̱n rúʼko̱ rí mbáa Dios bi̱ gíʼdoo xúgíʼ tsiakii ndayóoʼ rí mbáa xa̱bu̱ aʼkhá maʼni mba̱a̱ mbiʼyuu mu xúʼko̱ maxtáa májánʼ ga̱jma̱a̱ gagi ráʼ. Na̱nguá. Gixa̱a̱ niʼthí mbá minduwaaʼ rí naʼni marikulú. Ikhaa niʼthí: Nimbáa xa̱bu̱ xáwi̱ji̱ jmbu náa Dios ni má xaʼtambáyuuʼ mbiʼyuu índo̱ gáraʼnuu mbá tsáʼkhá. Numuu rí ikhaa naʼthí rí xúgíinʼ muniñaʼ Dios mu xúʼko̱ makuwá májánʼ (Job 1:​9-11; 2:4). Mu, Job bi̱ niwi̱ji̱ jmbu náa Dios nisngájma rí Gixa̱a̱ nindxu̱u̱ mbáa bi̱ naʼthí rí minduwaʼ. Ikháánʼlú rá. Índo̱ nuʼni mba̱a̱ Jeobá xúʼko̱ nusngajmá rí Gixa̱a̱ nindxu̱u̱ mbáa bi̱ naʼthí dí ragájkhun. Mambáa dí ikháanʼ kajkuáa ñawúunʼ rígi̱ ñajunʼ, rí muʼtámbáyíí mbiʼyuu Jeobá, ga̱jma̱a̱ rígi̱ muʼni rí maxtáa gagi á mu nuguajún jmbu náa ikhaa (Prov. 27:11). w24.02 8, 9 kutriga̱ 3-5

Nda̱wa̱á dí nixtáa Moisés ga̱jma̱a̱ Josué, Jeobá nigruigi̱i̱n jueces mú muxnún ikha xa̱bu̱ xuajñuu. Ikhú índo̱ nikúwá reyes, nigruigi̱i̱n profetas mu muni̱ ñajuunʼ. Reyes bi̱ niguájun jmbu náa Dios nidxawíín consejo rí nixna profetas bugi̱. Mbá xkri̱da, rey David nigruigú ga̱jma̱a̱ xúgíʼ a̱jkiu̱u̱n rí nixprigúu profeta Natán (2 Sam. 12:​7, 13; 1 Crón. 17:​3, 4). Rey Jehosafat niʼnimbo̱o̱ rí niʼthúu̱n profeta Jahaziel ga̱jma̱a̱ niʼni rí israelitas bi̱ kúwá náa Judá muguaʼdáá fe náa profetas ndrígóo Dios (2 Crón. 20:​14, 15). Ga̱jma̱a̱ náa mbiʼi mingíjyúuʼ, rey Ezequías nindo̱ʼo̱o̱ profeta Isaías rí mambáyúu (Is. 37:​1-6). Mámbá índo̱ reyes nunimbu̱ún ikha ndrígóo Jeobá ikhaa naʼni tsajkurámiinʼ ga̱jma̱a̱ nañewu̱u̱n xa̱bu̱ xuajin (2 Crón. 20:​29, 30; 32:22). Nikujmaa kaʼwu rí Jeobá nijmiuu profetas ndrígóo mu maxnún ikha xuajñuu. w24.02 21 kutriga̱ 8

Gixa̱a̱ nandoo dí mambájxulú gajmiúlú xa̱bu̱ bi̱ tsénimbu̱ún xtángoo ndrígóo Jeobá. Mu ikháanʼ ndayóoʼ muñeumíjna̱lú, numuu dí raʼkháa i̱ndó mambajxulúʼ gajmiúlú xa̱bu̱ bi̱ nduʼñún rí asndu ma̱ngaa ma̱ndoo muʼtámíjná gajmiúlú náa Internet. Maski ajndu xa̱bu̱ numbaaʼ nuthi rí muʼni xúgíʼ enii dí xkawiʼ na̱nguá má nindxu̱u̱ ra̱májánʼ, mú xúniʼñáaʼ maguma nduwáánʼ; numuu dí rúʼko̱ nindxu̱u̱ nduwaʼ (Efes. 4:​19, 20). Gurajximijnalú: “Lá na̱ni̱ mbá tsiakii mú xámbájxu̱ gajmíʼ compañeriúʼ náa escuela, náa nañajunʼ o eʼwíinʼ xa̱bu̱ bi̱ tsénimbu̱ún xtángoo ndrígóo Jeobá ráʼ. Lá tsémiñuu mata ga̱jma̱a̱ nambáyúu kisngáa ndrígóo Biblia maski ajndu xa̱bu̱ nuthu̱nʼ rí tséyamajkhuu rí nuni xáʼ.” Ma̱ngaa xóo ma eʼthí náa 2 Timoteo 2:​20-22, rí náa congregación ma̱ngaa gíʼmaa muraʼwíin májánʼ bi̱ mambájxulú gajmiúlú. Garmáʼáan a̱jkiu̱lú dí raʼkháa xúgíinʼ ma̱ndoo mumbayulúʼ mu mu̱ʼni̱ ñajuunʼ Jeobá. w24.03 22, 23 kutriga̱ 11, 12

Lá nitaniminaʼ mbá miʼtsú ikháánʼ dí matatsaʼwa̱a̱ edxa̱a̱ʼ xóo nindxu̱u̱ Jeobá ráʼ. Gajkhun má, ikhaa xándoo mbuʼyáá mú náa Biblia naʼthí mbaʼa numuu xóo nindxu̱u̱ ikhaa. Mbá xkri̱da, naʼthí rí nindxu̱u̱ xóo “a̱jkha̱ʼ ga̱jma̱a̱ escudo” ma̱ngaa “mbá aguʼ rí nakha” (Sal. 84:11; Heb. 12:29). Náa mbá rí niwasngájmáá Ezequiel niʼthí rí Jeobá nindxu̱u̱ xóo itsí rí mbiʼyuu zafiro, mbá ajua̱nʼ rí nambiʼi ga̱jma̱a̱ agiuuʼ kutayaʼ (Ezeq. 1:​26-28). Numuu rí tséʼyáá Jeobá, mbáa maʼniulú gakhi̱i̱ mbuʼyáá rí nandoo kaʼyulú. O mbáa ga̱jma̱a̱ numuu dí niraʼníí náa vida ndrígulú, ikha jngóo ma̱ndoo mundxaʼwáá edxulú dí Jeobá nditháan xándoo kaʼyulú. Ra̱ʼkhá tháán májánʼ dí Jeobá nakro̱ʼo̱o̱ kaʼyulú ga̱jma̱a̱ ndaʼyoo xú káʼnii nikuwáanʼ nákha ginii. Mu mbuʼyáá dí gajkhun nandoo kaʼyulú, ikhaa naʼthí kuduun náa Ajngá rawuunʼ xóo nindxu̱u̱. Rí itháán naʼthí ga̱jma̱a̱ numuu Jeobá ikhaa nindxu̱u̱ ngajua (1 Juan 4:8). Cualidad rígi̱ naʼthí; ikhaa naʼni xúgíʼ ga̱jma̱a̱ ngajua. Ngajua ndrígóo nindxu̱u̱ mba̱a̱ rí asndu nandoo kaʼñúún bi̱ tsíñún kuyáá ikhaa (Mat. 5:​44, 45). w24.01 26 kutriga̱ 1-3

Jeobá nigíiʼ Moisés mu maguwíin israelitas náa Egipto ga̱jma̱a̱ nisngájmúún mbá du̱u̱n rí naxná ikhúún rí mbiʼi ga̱jma̱a̱ mbá aguʼ rí mbruʼun (Éx. 13:21). Moisés ni̱jkha̱ xó má na̱jkha̱ du̱u̱n ga̱jma̱a̱ rígi̱ niʼni dí muguánu náa lamáa Maña̱ʼ. Ikhú ra̱ʼkhá tháán nimíñúún israelitas nikumu̱ún rí nándáa náa magún, numuu dí náa inún rígá lamáa ga̱jma̱a̱ náa kidxu̱únʼ soldados egipcios. Mú, raʼkháa xúʼko̱ kaʼnii nindxu̱u̱, Jeobá nindxu̱u̱ bi̱ niʼni rí Moisés maʼga̱ kagui̱i̱n ikhí (Éx. 14:2). Nda̱wa̱á niʼni káwíin ga̱jma̱a̱ mbá milagro (Éx. 14:​26-28). Náa mbá 40 tsiguʼ, Moisés nijkha kidxuuʼ du̱u̱n rí Dios nitsiji náa ku̱ba̱ʼ mijxooʼ mu maxnún ikha xa̱bi̱i̱ (Éx. 33:​7, 9, 10). Asndu náa du̱u̱n rúʼko̱ Jeobá naʼtámíjná ga̱jma̱a̱ Moisés, nda̱wa̱á ikhaa naʼthúún xa̱bu̱ xuajin rí niʼthúu̱n Jeobá. Ikha jngóo israelitas ndiyáá kaʼwu xú káʼnii Jeobá najmiuu Moisés mu maxná ikhúún. w24.02 21 kutriga̱ 4, 5