Septiembre

Dios nixnúu tsiakii Jesús mu maʼnigámbáa xúgíʼ xkujndu dí guaʼdáá xa̱bu̱. Rígá xkujndu dí ikháanʼ nditháan xáʼngulú guʼnimbánii. Mú ga̱jma̱a̱ milagro dí niʼni Jesús nisngájma dí ikhaa majmaa. Mbá xkri̱da, gíʼdoo tsiakii maʼnigámbáa náa phú nikumu̱u̱ dí naʼni mumíniiʼ xa̱bu̱ numbaaʼ, xóo muʼthá, maʼngo̱o̱ maʼnigámbáa aʼkhá rí kuaʼdáá ga̱jma̱a̱ xúgíʼ rí naʼni mumíniiʼ, xóo nandii ga̱jma̱a̱ dí nakháñulú (Mat. 9:​1-6; Rom. 5:​12, 18, 19). Ga̱jma̱a̱ milagro dí niʼni nasngájma dí ikhaa ma̱ndoo maʼni thanún xa̱bu̱ náa “xúgíʼ enii nandii” dí kuaʼdáá ga̱jma̱a̱ rí asndu ma̱ndoo maʼni dí matuxi̱ín xa̱bu̱ (Mat. 4:23; Juan 11:​43, 44). Ma̱ngaa gíʼdoo tsiakii matsijii giñán mbiʼ ga̱jma̱a̱ maʼni gajmíi̱n xa̱bu̱ wéñiʼ (Mar. 4:​37-39; Luc. 8:2). Naʼni̱i̱ a̱jkiu̱lú índo̱ nduʼyáá dí Jeobá nixnúu wéñuʼ tsiakii A̱ʼdióo. Ma̱ndoo mbuʼyáá dí gajkhun mambanúu xúgíʼ dí maʼni Reino ndrígóo Dios. w23.04 3, 4 kutriga̱ 5-7

Á mu náa congregación ndrígáaʼ nindxu̱u̱ mba̱a̱, mbáa mbaʼa nuthu tsétani̱ comentar numuu dí kúwi̱i̱n mbaʼin a̱ngiu̱lú bi̱ nandún muriʼña̱a̱. Mú xátatsiʼñááʼ rataxújxi ñawáanʼ. Ma̱ndoo matani ratháá mbaʼa comentario mú xúʼko̱ á mu na̱nguá kanáa’ náa nagi̱ʼdu̱u̱ artículo ma̱ndoo marata náa i̱ʼwáʼ kutriga̱. Índo̱ gatanirataminaʼ ga̱jma̱a̱ i̱yi̱ʼ Bi̱ Nayejngoo, atatsaʼwáminaʼ xú káʼni mbríguii mámbá kutriga̱ ga̱jma̱a̱ dí kayá edxu̱u̱ artículo, mu xúʼko̱ maraʼdáá májánʼ dí marata. Imbo̱ʼ dí ma̱ndoo matani nindxu̱u̱ di matanirataminaʼ náa kutriga̱ di na̱ʼkha̱ kisngáa di naʼni itháán miʼskhaa makrua̱ʼa̱a̱ʼ. Numuu dí ikhí ndawi̱i̱n wéñuuʼ bi̱ muxna comentario. Mú ndiéjunʼ ma̱ndoo matani á mu xóó na̱nguá kanáa’ marata rá. Aratha̱a̱n ndxájulú bi̱ naʼsngáa, náá graxe̱ nandaʼ matriʼña̱a̱. w23.04 21, 22 kutriga̱ 9, 10

Dí táʼni a̱jma̱ a̱jkiu̱u̱n José maʼnimbo̱o̱ kaʼyoo Jeobá niʼni dí mani̱ndxu̱u̱ mbá májáanʼ xa̱bu̱ nikhi̱i̱. Náa ajtsú ikha dí nixnúu Dios maʼni ga̱jma̱a̱ numún bi̱ kúwá náa goʼwóo. Ikhaa mbá nacha̱ niʼni maski ma gakhi̱i̱ niʼniuu maʼnimbánuu (Mat. 1:20; 2:​13-15, 19-21). José nijmaa niñewu̱u̱n María numuu dí niʼnimbo̱o̱ kaʼyoo Jeobá. Rígi̱ niʼni dí María maʼndoo kaʼyoo ga̱jma̱a̱ mbaʼyamajkuu itháán. Ikháanʼla xabuanii ma̱ndoo manindxa̱la xóo José ga̱jma̱a̱ mbuʼyala consejo dí kagu̱ Biblia dí ma̱ndoo mambáyala muñewu̱u̱n bi̱ kúwíin náa guʼwála. Índo̱ nuʼgíʼ nunimbanííla, maski ajndu rígi̱ gáʼni dí mbaʼa náa mbaʼyóoʼ muriʼkhumijnála mú xígi̱ gusngajmá dí gajkhun nandala kuñu̱u̱n guʼyala. Ma̱ngaa rígi̱ gáʼni dí xúniʼñáánʼ raʼndala kuyamíjna̱. Mbáa ndxájulú bi̱ na̱ʼkha̱ náa Vanuatu bi̱ nayéjkha̱ má 20 tsiguʼ dí ninuju̱nʼ naʼthí: “Índo̱ nda̱yo̱o̱ dí a̱jmbio̱ʼ ndayáʼ ikha ndrígóo Jeobá ga̱jma̱a̱ nagíʼ naʼnimbánuu naʼni dí mbayamajkuu itháán ma̱ngaa naʼni dí xámiñuʼ ga̱jma̱a̱ rígi̱ naʼni mba̱yo̱o̱ dí májánʼ nindxu̱u̱ dí niraʼwíí maʼni”. w23.05 21 kutriga̱ 5

Judíos bi̱ matangi̱ín náa Babilonia gíʼmaa maguánú mani̱ndxu̱ún mbá ‹xuajen kaʼwu› náa Dios (Deut. 7:6). Rígi̱ na̱nguá eyoo gáʼthúu̱n dí bi̱ nigájni̱ín náa Babilonia nini̱ xúgííʼ dí májánʼ. Ndiyóoʼ muriʼkhumijnáá mu xúʼko̱ muni̱ dí naniguuʼ Jeobá. Judíos bi̱ nigumiin náa Babilonia, mbaʼin dí ikhiin nindxaʼwamíjna̱ ga̱jma̱a̱ nini̱ xó má eni̱ babilonios. Nda̱wa̱á dí nitangiín timbíin judíos náa Israel. Nda̱wa̱á xa̱bu̱ ñajunʼ Nehemías niʼñuu tsiánguá índo̱ ndiʼyoo dí e̱jñu̱ún ikhiin tséjmañún gúthi ajngáa hebreo (Deut. 6:​6, 7; Neh. 13:​23, 24). Xú káʼnii gáguánú maʼndún kuyáá ga̱jma̱a̱ mbuyamajkuíí Jeobá á mu na̱nguá ekru̱ʼu̱u̱n ajngáa dí kiʼniraʼmáʼ Ajngá rawuunʼ xá. (Esd. 10:​3, 44.) Ikha jngóo judíos buʼko̱ ndiyóoʼ dí muriʼkhumijná, mú itháán má xáʼniún gakhi̱i̱ muriʼkumijnáá náa Israel, náa nunimíjna̱ mbuyamajkuíí Jeobá xó má kaʼyoo (Neh. 8:​8, 9). w23.05 15 kutriga̱ 6, 7

Maski ajndu ra̱ʼkhá tháán nandulú muʼnimbaníí dí niʼgímijná muʼni. Mú mbáa nguáná naʼniulú gakhi̱i̱ muʼnimbaníí ga̱jma̱a̱ narígú kaʼyulú mbiʼi índo̱ nuraʼníí mbóoʼ “gamiéjunʼ rí na̱nguá kuáʼti̱i̱n” (Ecl. 9:11). Nguáná nuraʼníílu xkujndu dí naʼni makáguabáanʼ ga̱jma̱a̱ naʼni dí nánguá maguaʼdáálu itháán tsiakii (Prov. 24:10). Numuu dí nindxu̱lú xa̱bu̱ aʼkhá ikha jngóo nguáná nuʼnilú mbóoʼ dí xambáyulú muʼnimbaníí dí niʼgími̱jna̱ muʼni (Rom. 7:23). O tseʼgíʼ muʼni numuu dí naʼni néʼngulú (Mat. 26:43). Ndiéjunʼ gámbáyulú mu xákanajkulú rá. Xakanájkaaʼ á mu rígá náa nakaguábáánʼ. Náa Biblia naʼthí dí muraʼníí mbaʼa xkujndu, mú ikhí ma naʼthí dí Jeobá ma gámbáyulú mu xákanajkulú. Á mu dí tsékanájkulú maski ajndu nuraʼníí xkujndu nusngajmáá Jeobá dí nandulú muʼni dí naniguuʼ. Lá naʼngo̱o̱ natatsaʼwáminaʼ xú káʼnii edxu̱u̱ Jeobá kaʼyaaʼ índo̱ ndaʼyoo dí natani̱ tsiakimínáʼ matanimbaníí meta ndrígáaʼ ráʼ. w23.05 30 kutriga̱ 14, 15

Mbaʼin a̱ngiu̱lú bi̱ xúgi̱ nuni̱ kájxi̱ ñajuunʼ Dios, nigi̱ʼdi̱i̱ ninindxu̱ún precursor asndu nákha ninindxu̱ún jiámá. Á mu nanindxa̱a̱ʼ precursor, majmañaaʼ matiejunʼ gajmiáanʼ mixtiʼkhun enii xa̱bu̱ ga̱jma̱a̱ majmañaaʼ majmaaʼ májánʼ mbújkha̱a̱ (Filip. 4:​11-13). Rí mani̱ndxu̱ún precursor auxiliar nimbáñún mbaʼin mu mani̱ndxu̱ún precursor regular. Ga̱jma̱a̱ rúʼko̱ maʼni rí matani i̱ʼwáʼ ñajuunʼ Dios, xóo mbá xkri̱da rí matiembáá náa naguma guʼwá o betelita. Xúgíinʼ a̱ngiu̱lú gíʼmaa rí muni tsiakimíjna̱ mu mani̱ndxu̱ún anciano náa congregación. Náa Biblia naʼthí dí bi̱ guaʼdáá meta rí muñajunʼ xígi̱ kaʼnii náa a̱ngiu̱lú rí nandún muni̱ “mbá ñajunʼ májánʼ” (1 Tim. 3:1). Ginii ndayóoʼ ma̱nindxa̱a̱ʼ siervo ministerial nda̱wa̱á anciano. Siervo ministerial numbañún wéñuuʼ anciano. Xó má anciano ga̱jma̱a̱ siervo ministerial nindxu̱ún xa̱bu̱ guabiinʼ ga̱jma̱a̱ numbañún a̱ngiu̱lú ma̱ngaa nutaraʼa ga̱jma̱a̱ gagi. w23.12 28 kutriga̱ 14-16

Rey Josías nákha ninindxu̱u̱ dxámáa nigíʼdu̱u̱ ndiyáaʼ Jeobá. Nindoo majmañuu itháán ga̱jma̱a̱ numuu Dios ndrígóo ga̱jma̱a̱ maʼni dí nandoo. Josías ndiʼyoo dí mani̱ndxu̱u̱ rey, nindxu̱u̱ gakhi̱i̱; numuu rí mbaʼin xa̱bu̱ bi̱ nikúwá ikhú nduyamajkhún dioses bi̱ ragájkhun. Ikhaa jngóo ndiyóoʼ dí xámíñuu mu maʼni rí mbuyamajkuíí Dios xóo ma kaʼyoo. ¡Phú májánʼ nigájnuu dí niʼni! Asndu xóo tséya̱a̱ 20 tsiguuʼ índo̱ nigíʼdúu niʼni gámbóo xúgíʼ dí kaʼyoo náa nduyamajkhún dioses bi̱ ragájkhun náa xuajin (2 Crón. 34:​1, 2). Maski ajndu kaʼníí nindxa̱a̱ʼ ndxáma̱á ma̱ndoo matani̱ xó má niʼni Josías. Xú káʼnii rá. Atayáaʼ Jeobá ma̱ngaa gajmañaaʼ xóo itháan ga̱jma̱a̱ numuu. Rígi̱ gáxkajxi̱i̱n mu maraxnajximinaʼ náa ikhaa. Xú kaʼnii gámbáyáaʼ dí matani rígi̱ rá. Luke bi̱ nijngún iyááʼ índo̱ ndiyáa 14 tsiguʼ, ikhaa niʼthí: “Xúgi̱ mani ginii náa vida ndrígóʼ dí nandoo Jeobá ga̱jma̱a̱ mani tsiakimínáʼ mu maxtáa gagi” (Mar. 12:30). Ra̱ʼkhá tháán maguma tsajkurámááʼ a mu natraʼwíí matani xúʼko̱ mangáanʼ. w23.09 11 kutriga̱ 12, 13

Índo̱ apóstol Pablo niʼnirámáʼ carta náa inún. Mbáa asndu bi̱ nuyégún edxu̱u̱ na̱nguá ejmañún wéñuuʼ ga̱jma̱a̱ nini̱ dí raʼkhí mú ndiyóoʼ dí mbiʼyamajkhúún. Na̱ʼkha̱ má mijngii mbiʼi dí magi̱ʼdu̱u̱ majphú mba̱a̱ gaʼkhu, ikha jngóo itháán mbaʼyóoʼ dí mumbáyúmíjná náa bi̱ kuya̱ edxu̱u̱, numuu rí asndu mbáa ní xándoo mundrígúlú ikha dí na̱ʼkha̱ náa sucursal ga̱jma̱a̱ náa guʼwá dí phú na̱ʼkha̱ ikha. Ikha jngóo gíʼdoo numuu dí majmañulú maʼndulú kuʼñúún ga̱jma̱a̱ guʼyamajkún bi̱ nuyégún edxu̱u̱ náa nagimbáanʼ. Tséʼñuu má dí gárígá, gundxaʼwamíjna̱ má xúʼko̱ dí májánʼ ga̱jma̱a̱ xúʼyáá i̱ndó náa nakiéʼkúun. Itháán májánʼ dí muʼnilú nindxu̱u̱ dí mbuʼyáá dí Jeobá najmiuu Cristo mu maxnún ikha xa̱bu̱ bugi̱. Xó má casco rí nambáyúu edxu̱u̱ mbá soldado, rí nuguaʼthi̱i̱n nda̱wa̱á nañewu̱u̱n xóo endxaʼwamíjna̱lú. Nduʼyáálú dí rígá náa numbaaʼ rígi̱ nda̱a̱ numuu (Filip. 3:8). Rí nuguaʼthi̱i̱n nda̱wa̱á naʼni maʼni a̱jkiu̱lú ga̱jma̱a̱ tséʼni rí maxmiéjunlú. w23.06 11, 12 kutriga̱ 11, 12

Xúgínʼ bi̱ nudxawíín aʼwóo “a̱ʼgú skágunʼ” gíʼma muraʼwíí ndiéjunʼ muni: Á mu mundrígú invitación o na̱nguá. Rígá mbaʼa rí gíʼdoo numuu mu xúʼbulú xkawiʼ kayuuʼ gajmiulúʼ mbáa. Libro ndrígóo Proverbios naʼthí dí “a̱ʼgú skágunʼ”naʼthí dí “itháan taun iyaʼ rí niguma kuʼwáʼ” (Prov. 9:17). Ndiéjunʼ eyoo gáʼthúu̱n “iyaʼ rí niguma kuʼwáʼ” rá. Náa Biblia nambríguii iyaʼ dí naxnáa tsiakii ga̱jma̱a̱ índo̱ xa̱bu̱ bi̱ nidamijná nubu̱únʼ mbríguu (Prov. 5:​15-18). Bi̱ ninigu̱u̱nʼ ma̱ndoo má mubu̱únʼ gajmiún guʼñu̱ún xó má kaʼyoo. Mú, “iyaʼ rí niguma kuʼwáʼ” nindxu̱u̱ mixtiʼkhu kayuuʼ. Mbáa rígi̱ nandoo gáʼthúu̱n índo̱ xa̱bu̱ bi̱ tsédamijná, nubu̱únʼ xkawiiʼ kayuuʼ. Mbaʼa nuthu naguma nguʼwáá, ikháá xó mbá kuʼwáʼ naʼni índo̱ tséyáá. Bi̱ nuni̱ rígi̱ asndu naku̱mu̱ún dí taun nindxu̱u̱ “iyaʼ rí niguma kuʼwáʼ” numuu dí eʼwíinʼ tséyáá dí nuni̱i̱. Mú nuninduwamijná. Jeobá ndaʼyoo xúgíʼ dí erígá, xándoo muʼninduwaalú ikhaa. Nda̱a̱ imbo̱o̱ dí itháán miʼkhu̱u̱n ki xóo ni xámbájxulú gajmiulú Jeobá. Ra̱ʼkhá tháán miʼkhu̱u̱n rúʼko̱ (1 Cor. 6:​9, 10). w23.06 22 kutriga̱ 7-9

Á mu nda̱wa̱á dí nijnguáanʼ iyááʼ naku̱ma̱a̱ʼ dí kikháá ajngáa ejmaaʼ índo̱ naratájkáan o nakumaaʼ dí kikháá ñajunʼ rí natani̱. Numuu rí nindxu̱lú xa̱bu̱ aʼkhá, mbá nguáná makanájkulú. A mu naku̱ma̱a̱ʼ rí nánguá xtáa gagi ga̱jma̱a̱ rí natani̱, atatsaʼwáminaʼ náa xkri̱doo apóstol Pablo. Maski ma ikhaa niʼniminaʼ mbaʼyáridoo Jesús, ndiʼyoo dí nguáná maʼniuu gakhii mu maʼni dí májánʼ. Pablo nindoo manimbánuu ñajunʼ ndrígóo tséʼniuu má asndu xkáʼnii xtáa. Xákumaaʼ rí ga̱jma̱a̱ numuu rí nindxa̱a̱ʼ xa̱bu̱ aʼkhá xándoo matraʼwíí májánʼ rí matani̱. Araxtaa má xúʼko̱ xawii matani̱ rí májánʼ, itháan má índo̱ e̱ʼkha̱ a̱jkia̱a̱nʼ matani̱ (1 Cor. 9:16). w24.03 11, 12 kutriga̱ 12, 13

Ma̱ndoo musngajmúún a̱ngiu̱lú dí nandulú kuʼñúún, índo̱ nundriguíin mu mambájxulú májánʼ gajmulú (2 Cor. 6:​11-13). Kúwáanʼ náa congregación dí kúwíin a̱ngiu̱lú bi̱ mixtiʼkhu kayuuʼ xóo nindxu̱ún ga̱jma̱a̱ xóo ndi̱ji̱i̱n. Ndiéjunʼ gámbáyulú mu maʼndulú kuʼñúún itháán rá. Guʼyáá dí májánʼ náa a̱ngiu̱lú. Xú káʼnii ma̱ndoo musngajmá dí nandulú kuʼñúún a̱ngiu̱lú rá. Gúʼni tsiakimijna mu mbuʼñún xó má eʼñún Jeobá. Magiʼdoo itháan numuu dí maʼndulú kuyamijná índo̱ gakuwáánʼ náa ga̱ʼkhu̱ rí majphú mba̱a̱. Xú káʼnii gañewunlúʼ Jeobá rá. Gundxaʼwamíjna̱ ga̱jma̱a̱ numuu ikha dí nixnúu xuajñuu mu makawiin índo̱ gágumaa gámbáa Babilonia: “Ayuʼ, xuajñuʼ. Ata̱ʼa̱ʼ náa awúu̱n guʼwáaʼ, ga̱jma̱a̱ índo̱ nita̱ʼa̱ʼ má atrugua̱a̱ xkrugua. Atarkaʼuminaʼ mbá xngaa asndu índo̱ gánujngoo rí nakiʼnún” (Is. 26:20). Mbáa asndu mangáanʼ mbaʼyóoʼ munimbulú ikha rígi̱ índo̱ gákuwáanʼ náa ga̱ʼkhu̱ rí majphú mba̱a̱. w23.07 6, 7 kutriga̱ 14-16

Ma̱ndoo mani̱ndxa̱a̱ʼ mbáa xa̱bu̱ bi̱ nakro̱ʼo̱o̱. Atrajxi̱mínáʼ: “Lá nduyáá eʼwíinʼ rí ikhúún nindxu̱u̱ mbáa xa̱bu̱ bi̱ nakro̱ʼo̱o̱ rí maratha̱a̱n ráʼ. O nduyáá rí nindxu̱u̱ mbáa xa̱bu̱ bi̱ tséʼdxuun rí maratha̱a̱n dxe̱ʼ. Naniguʼ madxawun rí ethi eʼwíinʼ ga̱jma̱a̱ rí maguma xó má eñún ikhiin xáʼ.” Índo̱ itháán nakru̱ʼu̱lú kuʼñúún eʼwíinʼ itháán manindxu̱lú xó má nindxu̱u̱ Jeobá ga̱jma̱a̱ Jesús. Rí mundxaʼwáá májánʼ edxu̱lúʼ ma̱ngaa nandoo gáʼthúu̱n rí makru̱ʼu̱lú rí xóo kuwáanʼ ma̱ndoo maxtiʼkhuu. Numuu rí maguaʼdáá mbá nandii mbiiʼ o xaguaʼdáá mbújkha̱a̱ ga̱jma̱a̱ xkujndu ndrígóo política. Xúgíʼ rígi̱ ma̱ndoo maʼni dí maxtiʼkhuu kayuʼ xóo kuwáánʼlú ga̱jma̱a̱ muraʼní xkujndu rí tséguaʼthi̱i̱n (Ecl. 9:11). Mbá asignación rí nirigúlú náa xuajñuu Jeobá ma̱ndoo mariʼkhuu xóo kuwáánʼlú. Ma̱ndoo magu̱ʼu̱nlú xóo naxtiʼkhuu rí kuwáánʼlú á mu nuʼnimbánii a̱jkhu̱ consejo rígi̱: Timbá, rí mbuʼyáá xóo kuwáanʼ nindxu̱u̱ mixtiʼkhu xúgi̱, ragajma, atayáá rí matani nda̱wa̱á, ragajtsú, atayáá xúgíʼ rí májánʼ rí xtaʼdáá, raga̱jkhu̱ atambáñun eʼwíinʼ. w23.07 22 kutriga̱ 7, 8

Índo̱ Daniel kaʼníí dxámá, ikhú xa̱bu̱ babilonios nini guerra ga̱jma̱a̱ nigún kuya̱a̱ Daniel, nigún kuya̱ mitsínguánʼ náa xuajñuu ga̱jma̱a̱ náa goʼwóo. Maski asndu kaʼníí nindxu̱u̱ mbáa dxámáa mú xa̱bu̱ babilonios ndiyáá rí najmañuu, ikha jngóo ninigu̱u̱nʼ kuyáá: Nindxu̱u̱ mbáa dxámá “bi̱ na̱nguá eyoo káñún ga̱jma̱a̱ tsíʼyáa” ga̱jma̱a̱ rí na̱ʼkha̱ náa mbá familia bi̱ gíʼdoo numuu (1 Sam. 16:7). Ikha jngóo nisngáá mu xúʼko̱ maxtáa náa bi̱ nuni̱ ñajunʼ dí gíʼdoo numuu náa Babilonia (Dan. 1:​3, 4 6). Jeobá nindoo kaʼyoo Daniel, raʼkháa numuu rí mitsiʼyáa o rí bi̱ naguwaʼ náa goʼwóo guaʼdáá numún, nindoo kaʼyoo ga̱jma̱a̱ numuu xóo ikhaa nindoo mani̱ndxu̱u̱. Nduʼyáá rígi̱, numuu rí índo̱ Daniel nigiʼdoo 20 tsiguʼ, Jeobá niʼthí rí nindxu̱u̱ xa̱bu̱ jmbii xó má Noé ga̱jma̱a̱ Job bi̱ nini̱ ñajuunʼ mbayuuʼ tsiguʼ (Gén. 5:32; 6:​9, 10; Job 42:​16, 17; Ezeq. 14:14). Jeobá na̱nguá niniñuuʼ randoo kaʼyoo Daniel bi̱ nixtáa mbayuuʼ (Dan. 10:​11, 19). w23.08 2 kutriga̱ 1, 2

Atatsaʼwáminaʼ rí nandaaʼ maratsi̱ mbóoʼ guʼwá. Mbáa maʼndaaʼ midxu̱ʼ gátayaa xóo káʼnii guʼwá. Ikhaa má kayuuʼ ma̱ndoo muʼni índo̱ nuraxnuu ga̱jma̱a̱ índo̱ nuʼnigajmaa Biblia. A mu natraxnuu mbá nacha̱, i̱ndó majmañaaʼ dí ragákhíi, xóo má nákha “dí nigíʼdi̱i̱ nijmañala ga̱jma̱a̱ numuu ajngá rawuunʼ Dios” (Heb. 5:12). Itháán májánʼ rí muʼni xóo má niʼthá ga̱jma̱a̱ numuu xkridoo guʼwá: Rí mbuʼyáá májánʼ awúún mu mbuʼyáá májánʼ xóo niguma. Rí muʼnigajma̱a̱ májánʼ Biblia, xúʼko̱ mbuʼyáá xú kaʼnii embánii mixtiʼkhu versículo dí na̱ʼkha̱ náa Biblia. Raʼkháa i̱ndó ndayóoʼ mbuʼyáá ndiéjuunʼ eʼnimbulúʼ, ma̱ngaa ndayóoʼ mbuʼyáá náá numuu eʼnimbulúʼ. Mu makru̱ʼu̱lú itháán májánʼ Ajngá rawuunʼ Dios, gíʼmaa muʼnigajma̱a̱ mi̱jnu̱ʼ dí na̱ʼkha̱ náa Biblia. Apóstol Pablo niʼthúún xúgíinʼ cristianos rí munigajma̱a̱ májánʼ Ajngá rawuunʼ Dios mu xúʼko̱ “majmiin mikru̱ʼu̱u̱n, nguáthá ma̱ja̱nʼ, mbaʼ, mitsídánʼ ga̱jma̱a̱ mi̱jnu̱ʼ”, dí gajkhun. Xúʼko̱ maʼni ‹gújkhúʼ fe ndrígu̱ún ga̱jma̱a̱ maʼni xóo mbá ixi̱ mba̱a̱ rí na̱jkha̱ mi̱jnu̱ʼ ajmu̱u̱› (Efes. 3:​14-19). Xúʼko̱ má gáʼyóoʼ muʼni mangáánʼ. w23.10 18 kutriga̱ 1-3

Náa Biblia ma̱ndoo muxkamaa xkridún mbaʼin xa̱bu̱ bi̱ niʼngo̱o̱ a̱jkiu̱ún. Náá numuu dí tsétríya̱ʼ mbiʼi mu matanigajma̱a̱ numuu ikhiin xá. Xóo xkridoo David, ikhaa nixtaʼwíi mu mani̱ndxu̱u̱ rey náa Israel nakha xóó nindxu̱u̱ ndxáma, mú ndiyóoʼ magiʼthu̱u̱n mba̱yu̱u̱ʼ tsiguʼ mu magi̱ʼi̱ maʼtáñajunʼ. Simeón ga̱jma̱a̱ Ana niʼngo̱o̱ a̱jkiu̱ún niguáʼthi̱i̱n Mesías, náa xúgíʼ tsiguʼ rúʼko̱ nini̱ má xúʼko̱ ñajuunʼ Jeobá (Luc. 2:​25, 36-38). Índo̱ gátanigajma̱a̱ xkridún xa̱bi̱i̱ Jeobá bugi̱, atrajxi̱mínáʼ: “Ndiéjuunʼ lá nimbáñún mu maʼngo̱o̱ a̱jkiu̱ún xá. Xú káʼnii niguma tsajkurámiinʼ ga̱jma̱a̱ numuu dí niguáʼdáá cualidad rígi̱ xá. Xú káʼnii gándoo gáyaridoo xkridún xá.” Ma̱ngaa ma̱ndoo matanigajma̱a̱ ga̱jma̱a̱ numún xa̱bu̱ bi̱ na̱nguá niʼngo̱o̱ a̱jkiu̱ún (1 Sam. 13:​8-14). Ma̱ndoo matrajximínáʼ. Náa numuu dí táʼngo̱o̱ a̱jkiu̱ún xá. Ndiéjuunʼ nigíʼníí ga̱jma̱a̱ numuu dí túsngajma cualidad rígi̱ xá. w23.08 25 kutriga̱ 15

Apóstol Pedro niwi̱ji̱ jmbu. Tániñuuʼ rí nimbá maʼni makanájkoo. Mbá xkri̱da, ikhaa niwi̱ji̱ jmbu índo̱ Jesús niʼthí mbá dí discípulos na̱nguá nikru̱ʼu̱u̱n (Juan 6:68). Mbaʼin xa̱bi̱i̱ Jesús niniñaaʼ, mú Pedro asndu táʼni nimbá graxe̱ ni má tági̱ʼthu̱u̱n rí Jesús maʼthí ga̱jma̱a̱ numuu rúʼko̱. Ikhaa niguanúu ga̱jma̱a̱ Jesús. Ikhaa niʼthí náa inún mbá xúgíinʼ rí mbawíí Jesús ‹naʼthí rí makuwíin kámuu mbiʼi›. Jesús ndiʼyoo májánʼ dí Pedro ga̱jma̱a̱ eʼwíinʼ apóstoles muniñaaʼ. Mú maski ajndu xúʼko̱, nikumu̱u̱ kaʼyoo Pedro ga̱jma̱a̱ rí mawiji̱ jmbu (Luc. 22:​31, 32). Jesús ndiʼyoo “gajkhun má rí xa̱bu̱ nandoo maʼni rí májánʼ, mú xuyuuʼ tséʼngo̱o̱” (Mar. 14:38). Ikha jngóo maski ajndu índo̱ Pedro niʼthí rí na̱nguá eʼninuwíin, mú Jesús na̱nguá niniñuuʼ. Nda̱wa̱á rí nigabi̱i̱ nisngájmaminaʼ náa Pedro (Mar. 16:7; Luc. 24:34; 1 Cor. 15:5). Rígi̱ nimbáyúu wéñu Pedro mu xáxtáa gíná. w23.09 22 kutriga̱ 9, 10

Dios naʼni jngudi̱i̱ mbá xúgíʼ aʼkhúún xa̱bu̱ bi̱ ndaʼyoo rí guáʼdaa fe náa ikhaa, nagumuu mbá kayuuʼ (Sal. 32:​1, 2). Xa̱bu̱ buʼko̱, Jeobá ndaʼñún xóo jmbiin ma̱ngaa rí nánguá guaʼdáá aʼkhúún ga̱jma̱a̱ numuu fe ndrígún. Maski ajndu Abrahán, David ga̱jma̱a̱ eʼwíinʼ xa̱bi̱i̱ Dios bi̱ niguájun jmbuu ninindxu̱ún xa̱bu̱ jmbiin túniña̱a̱ʼ ranindxu̱ún xa̱bu̱ aʼkhá. Mú ga̱jma̱a̱ numuu fe rí niguaʼdáá, Dios ndiʼñún asndu xóo nda̱a̱ aʼkhúún, ki xóo xa̱bu̱ bi̱ tséyamajkuíí ikhaa (Efes. 2:12). Náa carta rí nijkha inún Romanos, apóstol Pablo niʼthí kaʼwu rí gíʼdoo numuu muguaʼdáá fe mu ma̱ndoo mambáxulu gajmiúlú Jeobá. Xúʼkhíin niʼni Abrahán ga̱jma̱a̱ David, xúʼkhíin má ma̱ndoo muʼnilú mangáanʼ. w23.12 3 kutriga̱ 6, 7

Xúgiáánʼ bi̱ nindxu̱lú cristianos nikhánulú mbá rí gíʼdoo wéñuuʼ numuu dí ma̱ndoo muxnájxi̱ tsigijñaʼ náa Jeobá. Xú káʼnii gándoo gúʼni̱ rá. Ma̱ndoo majmulú mbiʼi, tsiaki̱i̱, ga̱jma̱a̱ mbújkhu̱lú mu mu̱ʼni̱ ñajuunʼ Reino. Á mu dí nuxnáá Jeobá dí kuaʼdáá musngajmáá dí nuxnáalu núma̱a̱ dí naniñulú mu̱ʼni̱ mba̱a̱. Apóstol Pablo niʼthí mbaʼa rí xóo ma̱ndoo mu̱ʼni̱ mu xúniʼñáánʼ ru̱ʼni̱ mba̱a̱ Jeobá. Tikhuu dí niʼthí, nindxu̱u̱ dí gíʼdoo wéñuuʼ numuu muʼtákáñíí Jeobá, rí muʼthúún eʼwíinʼ dí kua̱ʼthi̱i̱n nda̱wa̱á, dí magimbáánʼ gajmiúlú a̱ngiu̱lú ma̱ngaa dí muxnámíjná tsiaki̱i̱, “itháan xúgi̱ rí mbiʼi [ndrígóo Jeobá] na̱ʼkha̱ rajngiyuu” (Heb. 10:​22-25). Náa iwáá capítulos dí na̱ʼkha̱ náa Apocalipsis, ikhí niʼthí ángel ndrígóo Jeobá: “¡Atayamajkuíí Dios!”. Asndu a̱jma̱ nuthu e̱ʼkha̱ ajngáa rígi̱ mu mbuʼyáá dí gíʼdoo wéñuuʼ numuu mbuʼyamajkuíí Dios (Apoc. 19:10; 22:9). Xámbumulú dí nijmañulúʼ ga̱jma̱a̱ numuu guʼwá náa nduyamajkuíí Jeobá, ma̱ngaa dí nikhánulú dí mbuʼyamajkuíí Dios ndrígúlú. w23.10 29 kutriga̱ 17, 18

Xúgiáanʼ ndayóoʼ muʼnimbulú kiʼthá ñajunʼ rígi̱: “Gaʼndulúʼ kuʼyamijná má xúʼko̱ kaníkháanʼ”. Mú ragíʼmaa magumulúʼ rí niʼthí Jesús: “Mbaʼin xa̱bu̱ ni xáʼndúún kuyamijná” (Mat. 24:12). Índo̱ niʼthí Jesús rígi̱, na̱nguá nindoo gaʼthí rí mbaʼin xa̱bi̱i̱ muniñaaʼ raʼndúún kuyamijná maski asndu xúʼko̱ gíʼmaa muñeumíjna̱lú mu xúʼni̱ xó má enii xa̱bu̱ náa numbaaʼ rígi̱. Xúgi̱ dí nikru̱ʼu̱lú má rígi̱, muriʼña̱a̱lú graxe̱ rígi̱ rá. Lá rígá imbo̱o̱ xóo ma̱ndoo muʼni mu maʼndulú kuʼñúún itháán a̱ngiu̱lú rá. Mbáa xóo ma̱ndoo mbuʼyáálú á mu nandulúʼ kuʼñúún itháán a̱ngiu̱lú, nindxu̱u̱ xóo índo̱ rígá mbá dí nuraʼniilú (2 Cor. 8:8). Mbá dí rígi̱ niʼthí apóstol Pedro: “Mú gaʼndala kuyamíjna̱ wéñuuʼ numuu rí ngajua narugurámuuʼ mbaʼa aʼkhá” (1 Ped. 4:8). Ikha jngóo índo̱ a̱ngiu̱lú najngawi̱i̱n o nunigawúnlú ikhú ma̱ndoo mbuʼyáá nguáthá mba̱a̱ nandulúʼ kuʼñúún. w23.11 10, 11 kutriga̱ 12, 13

A mu i̱ndó nusngajmá dí nandulúʼ kuʼñúún káaʼ tikhuun a̱ngiu̱lú náá nagimbáanʼ, tseʼnimbulú dí niʼthí Jesús ga̱jma̱a̱ numuu ngajua. Gajkhun má dí mambáxulu itháan gajmiúlú tikhuun a̱ngiu̱lú, xó má niʼni Jesús gajmíi̱n tikhuun xa̱bi̱i̱ (Juan 13:23; 20:2). Apóstol Pedro naʼni marmáʼáan a̱jkiu̱lú dí gíʼmaa musngajmá dí “guáʼdáá ngajua” xóo kaníkháan náa a̱ngiu̱lú, xóo muʼthá, ikhaa xóo dí nandulúʼ kuʼñúún a̱ngiu̱lú bi̱ kúwíin náa guʼulúʼ (1 Ped. 2:17). Pedro nixnulu consejo rígi̱: “Gáʼndalá kuyamijná ga̱jma̱a̱ xúgi̱ a̱jkia̱la” (1 Ped. 1:22). Índo̱ niʼthí rígi̱, ga̱jma̱a̱ “xúgi̱ a̱jkia̱la” nandoo gáʼthúu̱n dí maʼndulú kuʼñúún eʼwíinʼ, bi̱ naʼniulú gakhi̱i̱ muʼniu̱u̱n dí májánʼ. Mbá xkri̱da, ndiéjunʼ gúʼnilú a mu mbáa ndxájulú naʼni gawúnlú rá. Mbáa xáʼndulú kuʼyáá, maʼndulú muʼni̱i̱ ikháá má xóo niʼniulúʼ. Rígi̱ xániguuʼ Jeobá, xó má Jesús nisngóo Pedro (Juan 18:​10, 11). Apóstol Pedro niʼnirámáʼ: “Xátangáanʼ muniu̱u̱n dí ra̱májánʼ bi̱ niniala dí raʼkhí, xútha wéñúúnʼ bi̱ nutawéñala. Rí phú gíʼmaa mu̱ni̱, gu̱ni̱ tsajkurámíin” (1 Ped. 3:9). Á mu nandaaʼ xtayáá mbáa ga̱jma̱a̱ xúgi̱ a̱jkia̱a̱nʼ, maratha̱a̱n májánʼ ga̱jma̱a̱ matani̱ májánʼ. w23.09 28, 29 kutriga̱ 9-11

Mitsaanʼ nindxu̱u̱ xóo nda̱ja̱a̱ mbáa ada̱ ga̱jma̱a̱ na̱jkha̱nú asndu nakhi̱i̱. Rígi̱ narígá ikháá, mú rí mambájxulú gajmiúlú Dios na̱nguá nindxu̱u̱ xúʼko̱ (1 Cor. 13:11; Heb. 6:1). Mu mbáa maʼga̱nú mambájxu̱u̱ májánʼ ga̱jma̱a̱ Dios, ndayóoʼ rí mambájxu̱u̱ májánʼ ga̱jma̱a̱ ikhaa. Ma̱ngaa rí mambáyulú nindxu̱u̱ espíritu santo mu xúʼko̱ ma̱ndoo maguaʼdáá cualidades, gajmañulú muʼni tikhuʼ ga̱jma̱a̱ gúʼniratamijná mu majmáanʼ muʼni ñajunʼ rí gákánulú nda̱wa̱á (Prov. 1:5). Jeobá niʼni rí makuwá xa̱bu̱: Ikhaa niʼnii xa̱biya̱ ga̱jma̱a̱ a̱ʼgu̱ (Gén. 1:27). Xó má eʼyáá xa̱biya̱ ga̱jma̱a̱ mbáa a̱ʼgu̱ nindxu̱ún mixtiʼkuiin kayuuʼ. Mbá xkri̱da, Jeobá nixnúún mixtiʼkhu ñajunʼ muni xa̱bekha ga̱jma̱a̱ gu̱ʼu̱ i̱mba̱ ñajunʼ, mu maʼngu̱u̱n munimbánii ñajunʼ rígi̱ mambáa rí ikhiin ndayóoʼ magiʼdoo cualidades ga̱jma̱a̱ rí majmañún muni (Gén. 2:18). w23.12 18 kutriga̱ 1, 2

Lá nindoo Jesús dí eʼwíinʼ ma̱ngaa majmúún nambiʼyuu Anu̱u̱ ráʼ. Xúʼko̱, numuu dí nákha ikhú nikúwíin bi̱ kuya̱ edxu̱u̱ náa i̱ʼwáʼ religión bi̱ nikumu̱ún rí mbiʼyuu Dios nindxu̱u̱ mitsúʼkháan ga̱jma̱a̱ ragíʼmaa majmuluʼ. Mú Jesús na̱nguá niniñuʼ dí ku̱ma̱ rúʼko̱, rí na̱nguá e̱ʼkha̱ raʼthí náa kiʼniraʼmáʼ maʼni rí xájmúún mbiʼyuu Anu̱u̱. Gundxaʼwámíjná índo̱ niʼni thanuu xa̱bu̱ bi̱ gíʼdiin giñánʼ xkawi̱i̱nʼ náa xuyuʼ náa mba̱a̱ʼ ndrígún gerasenos. Xa̱bu̱ ra̱ʼkhá tháán nimíñúún rí asndu ninda̱ʼa̱a̱ Jesús dí magajnáa ikhí (Mar. 5:​16, 17). Mú, nákha Jesús xóo tsegájnaa, niʼthúu̱n xa̱bu̱ bi̱ niʼni thanuu rí maʼthúún eʼwíinʼ rí Jeobá niʼni ga̱jma̱a̱ nindxu̱u̱, raʼkháa Jesús (Mar. 5:19). Jesús bi̱ nindxu̱u̱ Rey ndrígúluʼ, ikhaa nandoo rí mangáanʼ muʼnilú xúʼko̱ rí muʼsngúún xa̱bu̱ bi̱ kúwá náa xúgíʼ tsu̱du̱u̱ numbaaʼ mbiʼyuu Jeobá (Mat. 24:14; 28:20). Índo̱ nuʼnilú xúʼkhíin, naʼni rí maxtáa gagi. w24.02 10 kutriga̱ 10

¡Ra̱ʼkhá tháán mitsaanʼ nindxu̱u̱ rí makuwáanʼ náa xuajñuu Jeobá! Maski ajndu kuwáanʼ náa iwáá mbiʼi rí naʼni mingíjyúuʼ, núma̱aʼ má Jeobá kuáʼdíin mbaʼin a̱ngiu̱lú (Sal. 133:1). Dios naxnúlú ikha rí nambáyulú makuwáanʼ gagi mbá guʼwáanʼ (Efes. 5:​33–6:1). Ikhaa naxnúlú ku̱ma̱ rí ndayúlú, mu muʼnimíjna̱ gajmiúlú rí naʼni makuwáanʼ ngíná ga̱jma̱a̱ xúʼko̱ makuwáanʼ gagi. Maski asndu xúʼko̱ tsékanájkulú rí muʼni ñajuunʼ Jeobá, mbáa nguáná mbaʼyóoʼ muʼni tsiakimijna. Náá numuu rá. Rí nuni̱ o rí nuthi eʼwíinʼ maʼni gawúnlú ma̱ngaa rí majmáa a̱jkiu̱lú índo̱ nakiéʼkulu itháán á mu nakiéʼkulu mbaʼa nuthu. Guʼni má xúʼko̱ ñajuunʼ Jeobá maski asndu nuraʼníí xóo rígi̱: 1) Índo̱ mbáa ndxájulú naʼni gawúnlú, 2) índo̱ ajmbiu̱lú o a̱ʼgiu̱lú naʼni gawúnlú, 3) índo̱ nuʼni gawumíjná má ikháanʼ. w24.03 14 kutriga̱ 1, 2

Nguáná matadxun experiencia ndrígu̱ún a̱ngiu̱lú bi̱ niraʼwi̱i̱ muni̱ itháán ñajuunʼ Jeobá. Mbáa nigún náa Najuiʼsngúún bi̱ Nutaraʼa numuu Reino o nigún gákuwá náa ndayóo’ majuiʼtáraʼa itháan. Lá maʼngo̱o̱ mangáánʼ matani̱ xúʼko̱ ráʼ. ¡Á mu xúʼko̱, atani̱! Xa̱bi̱i̱ Jeobá nduyaʼ má xúʼko̱ xóo muʼni ñajuunʼ (Hech. 16:9). Á mu xáʼnga̱a̱ʼ gátani̱. Xákumaaʼ rí na̱nguá xtaʼdáá numaaʼ, numuu rí gíʼdoo itháan numuu nindxu̱u̱ rí xákanajkhaaʼ (Mat. 10:22). Xámbumaaʼ rí Jeobá xtáa gagi ga̱jma̱a̱ numuu rí ikháán natani̱ xóo má eʼnga̱a̱ʼ ga̱jma̱a̱ rí naraxnáá rí itháan májánʼ. Xúʼko̱ ma̱ndoo mi̱dxu̱ʼ má xúʼko̱ kidxuuʼ Jesús nda̱wa̱á dí nijnguáanʼ iyááʼ (Sal. 26:1). w24.03 10 kutriga̱ 11

Anu̱lú bi̱ xtáa mekhuíí nakudaminaʼ maʼni mba̱a̱ a̱jkiu̱u̱n kaʼyulú a mu natanga̱a̱ a̱jkiu̱lú (Sal. 86:5). Ikha jngóo á mu nagáwíinʼ a̱jkiu̱lú ga̱jma̱a̱ numuu aʼkhá dí ni̱ʼni̱, xúʼni̱ a̱jma̱ a̱jkiu̱lú dí Jeobá naʼnimbánuu rí naʼthí: Ikhaa gajkhun niʼni mba̱a̱ a̱jkiu̱u̱n kaʼyulú. Garmáʼáan a̱jkiu̱lú dí ikhaa na̱nguá gakhi̱i̱ a̱jkiu̱u̱n, ikhaa nakro̱ʼo̱o̱ kaʼyulú ga̱jma̱a̱ nditháan tséndu̱ʼu̱lú mu̱ʼni̱ rí xáʼngulú gúʼni̱. Á mu nuʼni ñajuunʼ xó má eʼngulú tséʼniuu á mu chíʼgíiʼ, ikhaa nangajo̱o̱ wéñuuʼ rí nuʼni. Gundxaʼwámíjná ga̱jma̱a̱ numún xa̱bu̱ bi̱ nikúwá nákha wajyúúʼ bi̱ ni̱ni̱ ñajuunʼ Jeobá ga̱jma̱a̱ xúgíʼ a̱jkiu̱ún. Mbá xkri̱da, apóstol Pablo niñejunʼ gakhi̱i̱ wéñuuʼ mba̱yu̱u̱ʼ tsiguʼ, ni̱jkha̱ mitsínguánʼ rataráʼa ga̱jma̱a̱ niʼngo̱o̱ nigruiga̱ mbaʼa congregación. Mú, ni̱jkha̱nú nixtiʼkhuu xóo nixtáa ga̱jma̱a̱ nánguá nindoo gáʼtaraʼa xóo má nakha ginii. Lá Jeobá nánguá nixtáa gagi ga̱jma̱a̱ numuu ikhaa xáʼ. Na̱nguá, Pablo niʼni má xúʼko̱ xóo eʼngo̱o̱ ga̱jma̱a̱ Jeobá niʼni tsajkurámaaʼ (Hech. 28:​30, 31). Ikháá má kayuuʼ, raʼkháa xúgíʼ mbiʼi ma̱ndoo muxnáá Jeobá ikhaa má, mú dí itháan gíʼdoo numuu eʼyoo ikhaa nindxu̱u̱ dí nuʼnilú. w24.03 27 kutriga̱ 7, 9

Jesús nigíʼ mbá májánʼ xkri̱da náa xa̱bi̱i̱. Ikhaa niʼtájkháan má xúʼko̱ índo̱ nixtáa raʼnimbánuu ñajunʼ rí nigiʼdoo. Ikhaa ndiyóoʼ maríya̱ʼ mbiʼi mu maʼtájkháan numuu dí nigiʼdoo mbaʼa ñajunʼ ga̱jma̱a̱ xa̱bu̱ nagún má xúʼko̱ kidxuuʼ (Mar. 6:​31, 45, 46). Ikhaa na̱gi̱xi̱i̱ miʼcha̱ mu xúʼko̱ maxtáa mbáwii maʼtámíjná ga̱jma̱a̱ Anu̱u̱. Mbá miʼtsu, nákha xóó tséraʼwíí mbá rí gíʼdoo wéñuuʼ numuu dí maʼni, ikhaa niguanúu kañiiʼ mbruʼun mu maʼtájkháan (Luc. 6:​12, 13). Xúʼko̱ má niʼni ma̱ngaa nákha inu makhañúu, Jesús niʼtákáñuu nángi eʼni Jeobá numuu rí ndiʼyoo dí wíji̱ magíʼnuu nindxu̱u̱ mbóoʼ dí itháán gakhi̱i̱ dí magíʼnuu náa tsu̱du̱u̱ ku̱ba̱ʼ (Mat. 26:​39, 42, 44). Dí niʼni Jesús naʼsngúlú dí maski ajndu ra̱ʼkhá tháán kuaʼdáá ñajunʼ ndayóoʼ muríyaʼ mbiʼi mu muʼtákáñíí Jeobá. Mbáa mbaʼyóoʼ muriʼyáʼ májánʼ awan mu mbuʼyáá náa mbiʼi guʼtájkáan; ma̱ndoo muguaxúu̱n itháán miʼcha̱ o xúʼnuʼlú guapháá. Á mu nuʼnilú xúʼko̱ musngajmáá Jeobá dí raʼkháa tháán nangajulú rí ikhaa nimínáanʼlu. w23.05 3 kutriga̱ 4, 5

Náa mbá diccionario niʼthí ga̱jma̱a̱ numuu ajngáa “naxídirámuuʼ”, nandoo gáʼthúu̱n xó mbá mañu dí na̱ʼkha̱ náa ikháanʼ. ¡Ra̱ʼkhá tháán mitsaanʼ xóo Jeobá nasngájma rí nandoo kaʼñúún bi̱ kaxtaʼwíin! Ikhiin nduyáá rí ‹Dios nandoo kaʼñún› (Jud. 1). Xúgíinʼ ikhiin naku̱mu̱ún ikháá má xóo niʼthí apóstol Juan: “¡Gu̱ya̱a̱la dí Anu̱lú ra̱ʼkhá tháán eyoo kaʼyulú, rí asndu naxná mbiʼyulú e̱ji̱i̱n Dios!” (1 Juan 3:1). Lá i̱ndó bi̱ kaxtaʼwíin nandoo kaʼñúún Jeobá ráʼ. Na̱nguá, xó má gúʼyáá dí ikhaa nandoo kaʼñúún xúgíinʼ xa̱bi̱i̱. Ndiéjuunʼ eʼni mbuʼyáá dí Jeobá gajkhun nandoo kaʼyulú rá. Rí niʼtsiwáanʼ. Niʼni rígi̱ numuu rí ndawa̱a̱ imba̱a̱ bi̱ nandoo kaʼyulú ki xóo ikhaa (Juan 3:16; Rom. 5:8). w24.01 28 kutriga̱ 9, 10

Náa versículo rí na̱ʼkha̱ ginii naʼni mbuʼyáá imbo̱o̱ rí niʼni David mu maniñuuʼ mamiñúu: Nindxa̱ʼwáminaʼ dí gáʼni Jeobá ga̱jma̱a̱ numuu nda̱wa̱á. Ndiʼyoo rí Dios maʼni kríyaaʼ mbiʼi rí kaʼyoo. Numuu rí Jeobá niʼthí dí David mani̱ndxu̱u̱ rey ndrígóo Israel (1 Sam. 16:​1, 13). David ndiʼyoo gajkhun dí á mu Jeobá nikudaminaʼ maʼni, ikhaa ma gáʼnimbánuu dí niʼthí. Ndiéjunʼ nikudaminaʼ Jeobá maʼni ga̱jma̱á ni̱ndxu̱lú rá. Gajkhun ma dí tsékudaminaʼ dí xúgi̱ xúguaʼdáá xkujndu. Mú, tséʼniuu dí gúraʼníí náa numbaaʼ rígi̱, Jeobá nikudaminaʼ dí náa numbaaʼ nuxi̱ʼ maʼni gámbáa xúgíʼ xkujndu dí rígá (Is. 25:​7-9). Ikhaa gíʼdoo tsiakii mu makujxi̱ín bi̱ nikháñún, mu maʼni thanulú ma̱ngaa maʼnijngudi̱i̱ rí naʼni gawúnlú ga̱jma̱a̱ maʼni gámbíin xa̱bu̱ sia̱nʼ ndrígulú (1 Juan 4:4). w24.01 6 kutriga̱ 12, 13

Gundxaʼwamíjna̱ náa numuu dí nixnaxímíjná ga̱jma̱a̱ nijngúlú iyááʼ. Niʼnilú numuu dí nandulú muʼni dí nandoo Jeobá. Garmáʼáan a̱jkia̱a̱nʼ ndiéjunʼ niʼni dí matayaa dí nitaxkamaa rí gajkhun. Nitatsiniʼ Jeobá, nitayáá xóo Ana̱a̱ʼ bi̱ xtáá mekhuíí ma̱ngaa nitagíʼdi̱i̱ nitayamajkuíí ga̱jma̱a̱ nindaaʼ xtayáá. Fe ndrígáʼ nijkha ra̱ja̱a̱, ikhaa nixkajxi̱i̱n mu matanga̱a̱ a̱jkia̱a̱nʼ náa xúgíʼ dí raʼkhí rí nitani̱. Nitatsíñaaʼ nitani̱ xúgíʼ dí Jeobá nawiyuuʼ, nitagíʼdi̱i̱ nitani̱ dí naniguuʼ ikhaa. Asndu niʼni̱i̱ a̱jkia̱a̱nʼ índo̱ nitayáá dí Dios niʼni mba̱a̱ a̱jkiu̱u̱n kaʼyaaʼ (Sal. 32:2). Nitagíʼdi̱i̱ nidxuʼ reunión, nirathúún eʼwíinʼ xúgíʼ rí mitsaanʼ dí nidxuʼ rajmañaʼ. Xúgi̱ dí nitaxnájximinaʼ ga̱jma̱a̱ nijnguáan má náa iyááʼ nagrui̱ga̱ náa kamba̱a̱ʼ dí maʼni dí maraxtaa ga̱jma̱a̱ natani̱ tsiakiminaʼ mu xátatsíʼñánʼ (Mat. 7:​13, 14). Ariejún jmbu, atani̱ má xúʼko̱ rí naniguuʼ Dios ga̱jma̱a̱ atanimba̱a̱ʼ kiʼtáñajunʼ ndrígóo. w23.07 17 kutriga̱ 14; 19 kutriga̱ 19

Rí mundxaʼwamíjna̱ ga̱jma̱a̱ numuu rí nixudamíjna̱ muʼni ñajuunʼ Jeobá maxnúlú tsiakii mu muraʼníí tsáʼkhá. Mbá xkri̱da, raʼkhí kayuuʼ gánindxu̱u̱ rí mbáa bi̱ xóo tsénigunʼ o xóo tsénújúnʼ maʼnirájáa mbáa bi̱ gíʼdaa aʼgiu̱u̱ o gíʼdaa má ajmbio̱o̱. Numuu rí índo̱ nuxnaximi̱jna̱ náa Jeobá xándoo muʼni rúʼko̱. Numuu rí asndu nákha wapháá na̱nguá eniʼñáán rí mbaja̱a̱ náa a̱jkiu̱lú dí nagua̱ʼa̱ muʼni dí ra̱májánʼ, rúʼko̱ gani dí xáʼniulú miʼskhaa muni̱ gaʼduunʼ nda̱wa̱á. Muʼni tsíngumi̱jna̱ mbá kayuuʼ náa “kambu̱ún xa̱bu̱ bi̱ ramíjíin’” (Prov. 4:​14, 15). Jesús ma̱ndoo mambáyulú, xóo ma ikhaa nindoo maʼni rí nanigu̱u̱ʼ anu̱u̱ʼ, mangáánʼ nandulúʼ muʼnigaʼduunʼ mbá nacha̱ xúgíʼ rí nduʼyáá dí Dios tsénigu̱u̱ʼ (Mat. 4:10; Juan 8:29). Xkujndu ga̱jma̱a̱ tsáʼkhá dí nuraʼníílú nambáyulú musngajma a mu gajkhun najkua̱lú ma xúʼko̱ kidxuuʼ Jesús. Nduʼyáá má dí Jeobá mambáyulú mu maʼngulú. w24.03 9, 10 kutriga̱ 8-10