Agosto

Náa versículo rígi̱ naʼthí a̱jma̱ dí gíʼdoo wéñuʼ numuu: 1) Xa̱bu̱ jmbiin nuraʼníí xkujndu 2) Jeobá naʼni káwáanʼ náa xúgíʼ xkujndu. Mbá dí naʼni Jeobá mu maʼni káwáanʼ náa xkujndu nindxu̱u̱ dí nambáyulúʼ mbuʼyáá awáán xóo kuwáanʼ náa numbaaʼ rígi̱. Gajkhun má dí Jeobá nakudaminaʼ dí makuwáánʼ gagi á mu nuʼni ñajuunʼ, mú raʼkháa rúʼko̱ eyoo gáʼthí dí xáguaʼdáá xkujndu (Is. 66:14). Ikhaa nandoo dí mbuʼyáá má xúʼko̱ dí kuaʼti̱i̱n nda̱wa̱á, ga̱jma̱a̱ nandoo makuwáánʼ náa ku̱ba̱ʼ mitsaanʼ (2 Cor. 4:​16-18). Mú, rí xúgi̱ ikhaa nambáyulúʼ makuwáánʼ mámbá mbiʼi (Lam. 3:​22-24). Ndiéjunʼ ejmañulúʼ náa xkridún xa̱bi̱i̱ Jeobá bi̱ naguájun jmbu, xó ma bi̱ nikúwá nákhá wajyúuʼ ga̱jma̱a̱ bi̱ kúwá dí mbiʼi xúgi̱ rá. Mbáa nguáná muraʼníí xkujndu rí tséguaʼthi̱i̱n, mú á mu numbayúmíjná náa Jeobá ikhaa mambáyulú má xúʼko̱ (Sal. 55:22). w23.04 15 kutriga̱ 3, 4

Ma̱ndoo majmañulú mbaʼa náa xkridoo José ga̱jma̱a̱ María. Ikhiin nikúwíin xawii munimbu̱ún kuñún xa̱bu̱ ñajunʼ maski ajndu nguáná xóo kúwá ninindxu̱u̱ gakhi̱i̱ (Luc. 2:​1-6). Mbá xkri̱da, índo̱ María niguewáan ada̱ mbá mijna gu̱wa̱ʼ igu̱nʼ. César Augusto niʼthí dí maguma mbóoʼ censo. José ga̱jma̱a̱ María ndiyóoʼ dí magún náa Belén, nigún mbá 150 kilómetros ndiyóoʼ manújngún kúbá. Rí nigún ninindxu̱u̱ mingíjyúuʼ itháán mú itháán ga̱jma̱a̱ numuu María. Nixmiéjúúnʼ ga̱jma̱a̱ numún ikhiin ma̱ngaa ga̱jma̱a̱ numuu ada̱. Numuu rí, á mu magiʼdaa a̱ʼdióo xá. ¡María kaguewáan ada̱ bi̱ mani̱ndxu̱u̱ Mesías! O á mu rígi̱ maʼni dí xúnimbu̱u̱n kuyáá xa̱bu̱ ñajunʼ xá. José ga̱jma̱a̱ María na̱nguá niniñaaʼ dí rúʼko̱ maʼni maxmiéjúúnʼ ga̱jma̱a̱ rí xúnimbu̱u̱n xtángoo. Jeobá niʼni tsajkurámíinʼ numuu dí ninimbu̱u̱n. María ni̱jkha̱nú májánʼ náa Belén ma̱ngaa nixtáa májánʼ a̱ʼdióo ga̱jma̱a̱ niyambáá mu mambanúu dí naʼthí náa profecía ndrígóo Biblia (Miq. 5:2). w23.10 8 kutriga̱ 9; 9 kutriga̱ 11, 12

Mbaʼin a̱ngiu̱lú namiñun índo̱ nundxaʼwamíjna̱ rí muni̱i̱ comentar náa reunión. Mbá dí ma̱ndoo mambáyáaʼ nindxu̱u̱ dí matanirataminaʼ májánʼ (Prov. 21:5). Índo̱ itháán gatanigajmaa dí ma̱ta̱ya̱a̱, mambáyáaʼ mu xámiñaaʼ mataxujxí ñawáanʼ. Imbo̱ʼ dí mambáyáaʼ nindxu̱u̱ dí xárata wéñuuʼ índo̱ gátani̱ comentar (Prov. 15:23; 17:27). Á mu ikháán tsératá wéñuuʼ ga̱jma̱a̱ najmaaʼ ajngáaʼ índo̱ natani̱ comentar, maʼni dí eʼwíinʼ mbuyáá dí nitani̱ rataminaʼ májánʼ ga̱jma̱a̱ nakruaʼaa dí kuwáanʼ ruʼnigajmaa. Ndiéjunʼ gándoo gátani̱ á mu kaʼníí namíñáaʼ matani̱i̱ comentar mbaʼa nuthu maski ajndu nitani̱ ma dí ndiʼyáálu rá. Garmáʼáan a̱jkia̱a̱nʼ dí Jeobá nangajo̱o̱ tsiakii dí natani̱ mu matani̱i̱ comentar (Luc. 21:​1-4). Mú Jeobá tségiʼthu̱u̱n matani̱ itháán dí tséʼnga̱a̱ʼ (Filip. 4:5). Atayáá nguáthá comentario gáʼngo̱o̱ gáraxna, atanirataminaʼ ga̱jma̱a̱ atanda̱ʼa̱a̱ Jeobá dí xámiñaaʼ. Atagíʼdi̱i̱ maraxna mbóoʼ comentario chíʼgíiʼ. w23.04 21 kutriga̱ 6-8

Apóstol Pablo niʼni mbríguáanʼlú xóo mbáa soldado bi̱ xtaa má xúʼko̱ xawii ga̱jma̱a̱ kagíʼ ajua̱nʼ rí mañewu̱u̱n. Índo̱ narígá guerra, mbáa soldado gíʼmaa maxtáá má xúʼko̱ xawii, ikhaa má kayuuʼ gíʼmaa muʼnilú mangáán. Nusngajma rí kuwáanʼ xawii náa mbiʼi ndrígóo Jeobá índo̱ nuʼgíʼ ajua̱nʼ rí nañewu̱u̱n tsuxtulú rí nindxu̱u̱ fe ga̱jma̱a̱ ngajua ma̱ngaa nugrígúlú casco rí kua̱ʼthi̱i̱n. Ikháá xó má ajua̱nʼ nañewu̱u̱n a̱jkiu̱u̱n mbáa soldado, fe ga̱jma̱a̱ ngajua nañewu̱u̱n dí nakumulú. Cualidades rígi̱ nambáyulú mu muʼni má xúʼko̱ ñajuunʼ Jeobá ga̱jma̱a̱ mbuʼyaridáá Jesús. Núma̱aʼ má fe, nduʼyáálú gajkhun dí Jeobá naʼni tsajkurámíinʼ bi̱ nuni̱ tsiakimijna mbuyáaʼ (Heb. 11:6). Ma̱ngaa fe naxkajxáan’ mu muguajún jmbu náa bi̱ nayéjkha̱ edxu̱u̱ náa ikháanʼ, Jesús, tséʼñuu má ndiéjunʼ xkujndu nuraʼníí. Mu ma̱ndoo muʼni itháan gujkhuʼ fe ndrígulú ga̱jma̱a̱ maʼngulú muraʼníí xkujndu ndrígulú, guʼyarídúún a̱ngiu̱lú bi̱ niʼngu̱u̱n niguájun jmbu índo̱ nijuixkúún o índo̱ niguáʼdáá xkujndu ga̱jma̱a̱ numuu mbújkha̱a̱. Ma̱ngaa mu xánigulú muguáʼdáá wéñuuʼ mbújkha̱a̱ ga̱jma̱a̱ i̱ʼwáʼ, guʼyarídúún bi̱ nunimíjna̱ mu xúguáʼdáá itháan ga̱jma̱a̱ nugíʼ muni ginii ñajunʼ ndrígóo Dios. w23.06 10 kutriga̱ 8, 9

Xa̱bu̱ bi̱ nañewu̱u̱n rí naʼni najmañuu nañewu̱u̱n xóo ku̱mu̱u̱. Itháán índo̱ naʼniulú gakhi̱i̱ ga̱jma̱a̱ nánguá edxuu a̱jkiu̱lú. Garmáʼáan a̱jkiu̱lú rí matiewa̱a̱n rí matani nindxu̱u̱ rí naxná espíritu santo, ikha jngóo á mu nunda̱ʼa̱a̱ Jeobá espíritu santo, ma̱ndoo maguaʼdáá cualidad dí gíʼdoo numuu rígi̱ (Luc. 11:13; Gál. 5:​22, 23). Xáraʼthi̱i̱n maraxtaa xóo eyaaʼ ikháán. Á mu i̱ndó kua̱ʼthi̱i̱n maʼgánú mbiʼi dí makuwáán májánʼ mbáa nditháan xáʼngulú guʼnimbáníí meta ndrígulú numuu dí náa numbaaʼ rígi̱ naʼni mingíjyúuʼ maraxtaa májánʼ. Atani̱ xó má dí naʼnga̱a̱ʼ. Á mu dí naku̱ma̱a̱ʼ dí xáʼnga̱a̱ʼ gátanimbaníí mbóoʼ meta dí nitagímináʼ matani̱. Atagíʼdi̱i̱ matani̱ dí xáʼniaaʼ miʼskhoo. Á mu dí nandaaʼ maraʼdáá mbóoʼ cualidad atagíʼdi̱i̱ matasnga̱jmá náa gándoo. Á mu nandaaʼ matraxnuu káxi̱ Biblia, atríya̱ʼ májánʼ awan, mú xátraxnuu mba̱a̱ wéñuuʼ. w23.05 29 kutriga̱ 11-13

Náa iwáá mbiʼi Jeobá najmuu xuajñuu mu maxnúlú má xúʼko̱ ganitsu dí na̱ʼkha̱ náa ikhaa dí nambayúlú majngruigulú má xúʼko̱ náa “Kamba̱a̱ rí Kaʼwu” (Is. 35:8; 48:17; 60:17). Índo̱ mbáa nagruigú maʼnigajmaa Biblia nindxu̱u̱ xóo nakhánáá ma̱ngaa majngruigo̱o̱ náa “Kamba̱a̱ rí Kaʼwu”. Tikhuin káaʼ chíʼmbaʼ egún numuu dí nda̱wa̱á nuraʼwíí muniñaaʼ. Mú eʼwíinʼ nagún má xúʼko̱ asndu maguánú náa egún. Mú, náá egún xá. Bi̱ kuaʼti̱i̱n makuwá náa mekhuíí “Kamba̱a̱ rí Kaʼwu” na̱jkha̱ kagui̱i̱n náa “ku̱ba̱ʼ mitsaanʼ ndrígóo Dios” dí rígá mekhuíí (Apoc. 2:7). Bi̱ kuaʼti̱i̱n makuwá náa tsu̱du̱u̱ ku̱ba̱ʼ, kamba̱a̱ rígi̱ na̱jkha̱ kagui̱i̱n nda̱wa̱á dí gájngoo mbá Míí tsiguʼ dí Cristo gáʼtañajunʼ, índo̱ xúgíinʼ xa̱bu̱ ganindxu̱ún jmbiin. Á mu ikháán mangáán nadxuʼ náa kamba̱a̱ rígi̱ xátangaán matiejxi̱ kidííʼ, ayuʼ má xúʼko̱ asndu mi̱dxu̱ʼnú náa numbaaʼ nuxi̱ʼ. w23.05 17 kutriga̱ 15; 17-19 kutriga̱ 16-18

Á mu natatsaʼwáminaʼ xúgíʼ rí niʼni Jeobá ga̱jma̱á nindxa̱a̱ʼ, xáʼniaaʼ gakhi̱i̱ maraxna̱a̱ núma̱aʼ (Sal. 116:​12-14). Náa Biblia naʼthí “xúgíʼ dí nakánulú rí na̱ʼkha̱ rijma̱a̱ nindxu̱u̱ májánʼ” numuu dí na̱ʼkha̱ náa Jeobá (Sant. 1:17). Rí itháán mba̱a̱ rí nimínáanʼ Dios, ikhaa nindxu̱u̱ A̱ʼdióo. Núma̱aʼ má ga̱jma̱a̱ numuu rígi̱, ikháán ma̱ndoo mambajxáaʼ ga̱jma̱a̱ Dios ma̱ngaa ma̱ndoo maraxtaa kámuu mbiʼi (1 Juan 4:​9, 10). Mbá xóo ma̱ndoo muxnáa núma̱aʼ rí niʼni ga̱jma̱á nindxu̱lú, ga̱jma̱a̱ dí nandoo kaʼyulú, dí muxnaxímíjná náa ikhaa (Deut. 16:17; 2 Cor. 5:15). w24.03 5 kutriga̱ 8

Índo̱ nduʼyáá xú káʼnii nindxúu̱n xa̱bu̱ numbaaʼ nakumulú xóo nikumu̱u̱ Lot, bi̱ nindxu̱u̱ xa̱bu̱ májáanʼ bi̱ nixtáa nákha wajyúuʼ. “Bi̱ nixmiéjuunʼ wéñuuʼ ga̱jma̱a̱ numuu xúgíʼ enii rí xkawiʼ rí nini̱ xa̱bu̱ bi̱ ra̱míjíinʼ” numuu rí ikhaa ndaʼyoo dí Anu̱lú bi̱ xtáa náa mekhuíí nawiyuuʼ kaʼñúún xa̱bu̱ bi̱ nindxu̱ún xúʼko̱ kaʼnii (2 Ped. 2:​7, 8). Numuu rí Lot nindoo kaʼyoo Jeobá ga̱jma̱a̱ ndiʼyamajkuu wéñuuʼ, ikhaa niwiyuuʼ xóo nikúwíin xa̱bu̱ bi̱ nixtáa gajmíi̱n. Ikháá má kayuuʼ mangáán, kuwáánʼlú náa numbaaʼ rí na̱nguá eyamajkuíí wéñuuʼ rí nandoo Dios o asndu tséyamajkuíí xó má eyoo ikhaa, maski asndu xúʼko̱, ikháanʼ ma̱ndoo manindxu̱lú kaʼwáanʼ xó má eyoo Dios, á mu nandulú kuʼyáá ga̱jma̱a̱ najmañulú mbuʼyamajkuíí. Mú ma̱ndoo muʼni rígi̱, Jeobá nambáyulú ga̱jma̱a̱ naxnúlú tsiakii ga̱jma̱a̱ rí na̱ʼkha̱ raʼthí náa libro ndrígóo Proverbios. Xúgiáanʼlú xóo xa̱bekha, gu̱ʼu̱, jiámá, xabuanii ma̱ndoo majmañulú ga̱jma̱a̱ xúgíʼ consejos rí na̱ʼkha̱ náa ináa ndrígóo. Índo̱ namíñulú kuʼyáá Jeobá muñewa̱a̱n rí xambáxulú gajmiulúʼ xa̱bu̱ bi̱ nuni̱ dí raʼkhí. w23.06 20 kutriga̱ 1, 2; 21 kutriga̱ 5

Mbáa ikháán nitraʼníí má xkujndu, rí tsíñún gúyáaʼ bi̱ xtañún o nitasíñaaʼ ñajunʼ ndrígáaʼ mu matani ginii ñajuunʼ Dios (Mat. 6:33). Á mu xúʼko̱ ma̱ndoo ma̱ta̱ya̱a̱ gajkhun dí Jeobá ndaʼyoo xúgíʼ dí nitani̱ ga̱jma̱a̱ numuu (Heb. 6:10). Ni̱dxu̱ʼnú nitayáá rí gajkhun nindxu̱u̱ ajngáa rí niʼthí Jesús: “Nathalá gajkhun rí asndu tsáa bi̱ niniñuuʼ goʼwóo, a̱ngui̱i̱n, anu̱u̱, ru̱dúu̱, e̱ji̱i̱n o mbayuuʼ ga̱jma̱a̱ numuʼ ma̱ngaa ga̱jma̱a̱ numuu ajngáa rí májánʼ, rí mbiʼi xúgi̱ magruigúu mbá 100 nuthu itháan, goʼwóo, a̱ngui̱i̱n, anu̱u̱, ru̱dúu̱, e̱ji̱i̱n o mbayuuʼ, maski ajndu maguma gínáa, ga̱jma̱a̱ nda̱wa̱á, maxtáa kámuu mbiʼi” (Mar. 10:​29, 30). Rí xóo magumaa tsajkurámááʼ mani̱ndxu̱u̱ itháán mba̱a̱, ki xóo tsiakii rí ikháán nitani̱ (Sal. 37:4). w24.03 9 kutriga̱ 5

Índo̱ cristianos bi̱ nikúwá náa Judea niraʼníí ewiʼ, a̱ngiu̱lú bi̱ kúwá náa Antioquía dí rígá náa Siria nidxawíín, ‹niri̱ya̱ʼ awan rí muxu̱ʼma̱ rí mumbañún a̱ngiu̱lú bi̱ kúwá náa Judea, mámbáa nixná xó má rí gíʼdoo› (Hech. 11:​27-30). Maski ajndu a̱ngiu̱lú bi̱ niraʼníí ewiʼ nikúwíin tsínguáʼ, cristianos bi̱ kúwá náa Antioquía nimbáñún (1 Juan 3:​17, 18). Índo̱ nuʼdxawíín dí a̱ngiu̱lú nuraʼníí mbá gamiéjunʼ dí tséguaʼthi̱i̱n, mangáanʼ ma̱ndoo musngajmá dí nagáwiinʼ a̱jkiu̱lú kuʼñúún. Ma̱ndoo muʼni rígi̱: Ma̱ndoo muraxu̱u̱n bi̱ kuya̱ edxu̱u̱ xú káʼni ma̱ndoo mumbáñun, muxnalú mbújkha̱a̱ náa obra mundial ma̱ngaa muʼtájkáan ga̱jma̱a̱ numún bi̱ numíníiʼ. Mbáa asndu a̱ngiu̱lú mbaʼyóoʼ mixtambáñún mu makánún dí makuwíin ga̱jma̱a̱. Índo̱ gáʼkha̱ Rey Jesucristo mu maʼthí dí gagíʼnún xa̱bu̱, nandulú rí ikhaa mbaʼyoo rí nusngajmá dí nagáwíinʼ a̱jkiu̱lú kuʼñúún eʼwíinʼ. Ikhú gáʼthúlú: “Gundrígúula rí májánʼ dí maxná Xa̱bu̱ Ñajunʼ ndrígóo Dios” (Mat. 25:​34-40). w23.07 4 kutriga̱ 9, 10; 6 kutriga̱ 12

Jesús nakro̱ʼo̱o̱ kaʼyulú xó má Jeobá, nisngájmaa rígi̱ índo̱ ni̱ʼkha̱ náa Ku̱ba̱ʼ. Maski asndu nixuʼmaa maʼga gáñiinʼ xa̱bu̱ mu maʼtáruʼun náa xuajin Israel bi̱ nindxu̱ún “xóo mugu̱ bi̱ nindáti̱gi̱i̱n”, ikhaa mbá miʼtsu nimbáyúu mbáa a̱ʼgu̱ bi̱ na̱nguá nindxu̱u̱ israelita. A̱ʼgu̱ bugi̱ nindo̱ʼo̱o̱ rí maʼni thanuu a̱ʼdióo “bi̱ gíʼdaa mbáa giñán xkawi̱i̱ʼ” bi̱ naʼni ngínáa wéñuuʼ, Jesús nigáwíinʼ a̱jkiu̱u̱n kaʼyoo a̱ʼgu̱ ga̱jma̱a̱ niʼni thanuu a̱ʼdióo (Mat. 15:​21-28). Gundxaʼwamíjna̱ imbo̱o̱ xkri̱da, nda̱wa̱á rí Jesús nigíʼdúu niʼtáráʼa, Jesús niʼthí: “Mú, á mu mbáa naʼthí rí tséniniúnʼ [...], xúʼko̱ má gátha rí tséniʼníiʼ mangúún” (Mat. 10:33). Lá Jesús niʼni gáʼdu̱u̱n rí naniniiʼ Pedro numuu rí ikhaa ajtsú nuthu niʼthí rí tániniiʼ ráʼ. Na̱nguá Jesús ndiʼyoo rí Pedro nitanga̱a̱ a̱jkiu̱u̱n ga̱jma̱a̱ dí ikhaa nindxu̱u̱ mbáa xa̱bu̱ jmbii. Nda̱wa̱á rí Jesús nigabi̱i̱ ikhaa nisngájmaminaʼ náa Pedro ga̱jma̱a̱ asndu mbáa niʼthún rí niʼni mba̱a̱ a̱jkiu̱u̱n kaʼyoo ga̱jma̱a̱ rí nandoo kaʼyoo (Luc. 24:​33, 34). Xóo má Jeobá ga̱jma̱a̱ Jesús nakru̱ʼu̱u̱n kuyulú. Ikháanʼlu rá. Jeobá gíʼthu̱u̱n rí mangáánʼ manindxu̱lú xúʼko̱ kaʼnii. w23.07 21, 22 kutriga̱ 6, 7

Ndiéjunʼ gándoo muʼthúún eʼwíinʼ dí Dios gajkhun maʼnimbánuu dí naʼthí rá. Timbá: Mínaaʼ má Jeobá nakudaminaʼ. Náa Apocalipsis naʼthí: “Bi̱ nigi̱ʼi̱ náa xílí niʼthí: ‹¡Atayáá! Xtáá ra̱ni̱ xúgíʼ nuxi̱ʼ›”. Ikhaa nandoo maʼnimbánuu dí nikudaminaʼ ga̱jma̱a̱ gíʼdoo ku̱ma̱ ma̱ngaa tsiaki̱i̱ mu maʼngo̱o̱ maʼni. Ragajma: Jeobá ndaʼyoo dí gajkhun nindxu̱u̱ rí asndu xóo nimbánuu má dí niʼthí. Ikha jngóo naʼthí: “Nindxu̱u̱ gajkhun ga̱jma̱a̱ jmbu”. Ga̱jma̱a̱ niʼthí xóó: “¡Nimbánuu má!”. Ragajtsú: Índo̱ Jeobá nagíʼdu̱u̱ mbá, na̱jkha̱nú naguámbóo. Rúʼko̱ eyoo gáʼthúu̱n rígi̱ “Alfa ga̱jma̱a̱ Omega” (Apoc. 21:6). Jeobá masngájma rí Gixa̱a̱ naʼninduwaʼ ga̱jma̱a̱ rí tséjmaa. Ikha jngóo á mu dí xa̱bu̱ gaʼtháanʼ “Mitsaanʼ eʼthí, mu tsiánguá á mu gajkhun mambanúu”. Mbáa májánʼ gáʼni dí matraxnuu ga̱jma̱a̱ maratha̱a̱n dí naʼthí náa Apocalipsis 21:​5, 6. Atasngájmáá xa̱bu̱ mbaʼyoo dí xúʼko̱ káʼnii gáʼnimbánuu dí nikudaminaʼ Jeobá. Rí asndu xóo nixnúu mbá firma (Is. 65:16). w23.11 7 kutriga̱ 18, 19

Jeobá niʼthúu̱n rígi̱ Abrahán índo̱ ikhaa gíʼdoo má 75 tsiguuʼ ga̱jma̱a̱ xóo tségiʼdaa ada̱. Lá ndiʼyoo Abrahán xu káʼnii Jeobá niʼnimbánuu ajngóo ráʼ. Na̱nguá ndiʼyoo mbá xúgíʼ, ndiyóoʼ magiʼthu̱u̱n mbá 25 tsiguʼ. Nda̱wa̱á dí ninújngoo náa mañu Éufrates, ikhú nirígá mbá milagro, ikhaa nigiʼdaa Isaac. Ga̱jma̱a̱ 60 tsiguʼ nda̱wa̱á nigumiin ejín xíñíiʼ bi̱ mbiʼyuu Esaú ga̱jma̱a̱ Jacob (Heb. 6:15). Mu Abrahán táʼngo̱o̱ gáʼyoo xú káʼnii bi̱ naguwáʼ náa ikhaa nini mbaʼin ga̱jma̱a̱ xú káʼnii nindrigúu ku̱ba̱ʼ dí nijuiʼthá makánún. Maski ajndu xúʼko̱ ikhaa nimbájxu̱u̱ májánʼ ga̱jma̱a̱ bi̱ niʼniwíi xúgíʼ dí rígá (Sant. 2:23). Lá natatsaʼwáminaʼ xú káʼnii Abrahán gáʼdxuun índo̱ gátujxi̱i̱ ráʼ. Índo̱ Gáʼyoo dí núma̱aʼ má ga̱jma̱a̱ numuu fe dí nigiʼdoo ga̱jma̱a̱ dí nijngoo a̱jkiu̱u̱n niʼni dí xúgíinʼ xa̱bu̱ maguma tsajkurámiinʼ (Gén. 22:18). Ndiéjunʼ ejmañulúʼ rá. Mbáa xáʼngo̱o̱ gúʼyáá xú káʼnii Jeobá gáʼnimbánuu xúgíʼ dí nikudaminaʼ maʼni. Mú, a mu naʼngo̱o̱ a̱jkiu̱lú xó má Abrahán, ma̱ndoo mbuʼyáá gajkhun dí Jeobá maʼni tsajkurámáánʼ xúgi̱, mú itháan náa numbaaʼ nuxi̱ʼ (Mar. 10:​29, 30). w23.08 24 kutriga̱ 14

Nákha nindxu̱u̱ dxámáa rey Uzías ninindxu̱u̱ xa̱bu̱ guabaaʼ ga̱jma̱a̱ nijmañuu mu “mbayamajkuu Dios bi̱ gajkhun”. Nixtáa mbá 68 tsiguʼ ga̱jma̱a̱ mba̱yu̱u̱ʼ tsiguʼ, nini tsajkurámaaʼ Jeobá (2 Crón. 26:​1-4). Uzías niʼni gámbáa mbaʼa xuajin náa kúwá xa̱bu̱ bi̱ sia̱nʼ gajmíi̱n ga̱jma̱a̱ niʼni dí xuajin Jerusalén maxtiewa̱a̱n májánʼ (2 Crón. 26:​6-15). Mbáa nixtáa gagi ga̱jma̱a̱ numuu xúgíʼ dí niʼngo̱o̱ niʼni, numuu dí Jeobá nimbáyúu (Ecl. 3:​12, 13). Rey Uzías naguʼun dí maʼthí ndiéjunʼ muni xa̱bu̱. Mbáa rúʼko̱ niʼñuu mandxaʼwáminaʼ dí ma̱ndoo maʼni asndu ndiéjunʼ má eyoo ikhaa. Mbá mbiʼi nito̱ʼo̱o̱ náa templo ndrígóo Jeobá ga̱jma̱a̱ nitsikarámuu rí ndataun náa Altar, mbá dí reyes xándoo muni (2 Crón. 26:​16-18). Bi̱ kayá edxu̱u̱ náa ndxajkun Azarías nixprígúu mú, Uzías nikiʼnáa. Phú ngíná, dí Uzías niʼni mbatíga̱ xúgíʼ dí niʼni náa xuajñuu Jeobá ma̱ngaa niʼni dí magiʼdoo nandii lepra (2 Crón. 26:​19-21). ¡Phú mixtiʼkhu kayuuʼ gáxtáa a mu ikhaa ninindxu̱u̱ ma xúʼko̱ xa̱bu̱ guabaaʼ! w23.09 10 kutriga̱ 9, 10

Nda̱wa̱á rí nixtiʼyáaʼ ga̱jma̱a̱ espíritu santo apóstol Pedro, ikhaa ndiyóoʼ rí mani tsiakimínáʼ má xúʼko̱ mu mariʼkuminaʼ. Índo̱ niʼni tsiguʼ 36, Pedro ndiʼyoo índo̱ nixtiʼyáaʼ Cornelio ga̱jma̱a̱ espíritu santo. Ikhú ni̱jkha̱nú ndiʼyoo gajkhun dí Dios “tséraʼwíin xa̱bu̱” ga̱jma̱a̱ rí eʼwíinʼ ma̱ndoo makuwá mangiin náa congregación cristiana (Hech. 10:​34, 44, 45). Asndu má nákha ikhú Pedro na̱nguá niʼniuu gakhi̱i̱ rí makuiʼtsú mbóó gajmíi̱n xa̱bu̱ bi̱ na̱nguá nindxu̱ún judío, mbá rí nákha ginii na̱nguá niʼni. Ma̱ngaa nikúwá tikhuun cristianos bi̱ naguwáʼ náa judío nundxaʼwamíjna̱ dí raʼkhí nindxu̱u̱ dí muphiʼtsu mbóó gajmiún bi̱ na̱nguá nindxu̱ún judío. Índo̱ tikhuun cristianos bugi̱ nigún náa Antioquía, Pedro na̱nguá nikuiʼtsu gajmíi̱n bi̱ na̱nguá nindxu̱ún judío, mbáa niʼni rígi̱ numuu rí nimíñuu rí maʼni gawúún cristiano bi̱ naguwáʼ náa judío. Índo̱ ndiʼyoo apóstol Pablo rígi̱, dí Pedro naʼni a̱jma̱ inuu, niríyúu náa inún mbá xúgíinʼ (Gál. 2:​13, 14). Maski ajndu xúʼko̱, Pedro táʼni dí rígi̱ majmáa a̱jkiu̱u̱n; ikhaa niʼni má xúʼko̱ ñajuunʼ Dios. w23.09 22 kutriga̱ 8

Índo̱ natrajximínáʼ rígi̱, natayáá dí ndayóoʼ matani̱ xóo itháán, xájmaa. “Garmáʼáan a̱jkia̱a̱nʼ rí tátá májánʼ a̱jkiu̱u̱n” ga̱jma̱a̱ ikhaa mambáyaaʼ matani itháán májánʼ ñajuunʼ (1 Ped. 2:3). Apóstol Pedro naʼthulú dí “Dios [...] gámbóo raʼniratáanʼla; ikhaa gáʼni rí maguajún jmbu”. Mbá miʼtsú Pedro nikumu̱u̱ dí nda̱a̱ numuu maxtáa náá inuu a̱ʼdióo Dios numuu rí nindxu̱u̱ xa̱bu̱ aʼkhá (Luc. 5:8). Mu núma̱aʼ má Jeobá ga̱jma̱a̱ Jesús dí nisngájmáá dí nandún kuyáá, Pedro niñajunʼ ni̱jkha̱ má xúʼko̱ tsu̱du̱u̱ Jesús. Ikha jngóo mata̱ʼa̱a̱ʼ “náa rí Jesucristo bi̱ nindxu̱u̱ Tátá ndrígúlú ga̱jma̱a̱ bi̱ naʼni káwáánʼ maʼtáñajunʼ asndu kámuu” (2 Ped. 1:11). ¡Ra̱ʼkhá tháán mitsaanʼ dí nikhánáá! Xúʼko̱ má mangáán á mu natani̱ ma xúʼko̱ dí nikhánaaʼ matani xó ma niʼni Pedro ga̱jma̱a̱ natasíñaaʼ dí Jeobá maʼniratáánʼ, xúʼko̱ maraxtaa kámuu mbiʼi. “Ga̱jma̱a̱ numuu fe ndrígáa makríña̱a̱nʼ” (1 Ped. 1:9). w23.09 31 kutriga̱ 16, 17

Náa tabernáculo nirígá mbá rexo̱o̱ guʼwá: Paʼtati̱ga̱ ga̱jma̱a̱ kúgumaʼá náa dí nuni̱ ñajunʼ ndxajkun. Náa rexo̱o̱ guʼwá rúʼko̱ rígá náa nakarámáʼ tsigijñaʼ dí mba̱a̱ rí niguma ga̱jma̱a̱ cobre. Ma̱ngaa rígá mbá náa ga̱jnu̱ʼ iyaʼ dí najmún ndxajkun mujña̱a̱ rajkúún ga̱jma̱a̱ ñawúúnʼ nákha xóó tségíʼdi̱i̱ muñejunʼ (Éx. 30:​17-20; 40:​6-8). Rí mbiʼi xúgi̱ a̱ngui̱i̱n Cristo bi̱ kaʼníí kúwá náa tsu̱du̱u̱ ku̱ba̱ʼ nunimíjna̱ muni̱ má xúʼko̱ ñajuunʼ Jeobá náa rexo̱o̱ guʼwá. Iyaʼ dí ra̱ʼkhá tháán mba̱ji̱nʼ dí rígá náa tabernáculo ga̱jma̱a̱ náa guʼwá rí nduyamajkuíí Dios, naʼni marmáʼáan a̱jkiu̱lú mbá xúgiáánʼ bi̱ nindxu̱lú cristianos, rígi̱ naʼni mbuʼyáá dí ra̱ʼkhá tháán gíʼdoo numuu manindxu̱lú mikaʼwáánʼ, xóo dí nuʼni ga̱jma̱a̱ dí nundxáʼwami̱jna̱. Náá eyamajkuíí Dios bi̱ nindxu̱ún “mbaʼin xa̱bu̱” rá. Apóstol Juan ndiʼñún “guájun náa inuu xílí” ga̱jma̱a̱ nuni̱ ñajuunʼ Dios dí nindxu̱u̱ “mitsúʼkháan mbiʼíí mbruʼun”. Xa̱bu̱ bi̱ mbaʼin nuni̱ rígi̱ náa xúgíʼ tsu̱du̱u̱ ku̱ba̱ʼ, xóo muʼtá náa rexo̱o̱ goʼwóo Dios (Apoc. 7:​9, 13-15). ¡Ra̱ʼkhá tháán edxulú dí kuáʼdáá mbá guʼwá náa muxnáá gamajkhu Jeobá! w23.10 28, 29 kutriga̱ 15, 16

Jeobá ma̱ngaa najmiuu bi̱ kuya̱ edxu̱u̱ mu muxnúlú tsiaki̱i̱. (Is. 32:​1, 2). Ikha jngóo, aratamíjná gajmiáanʼ á mu rígá dí naʼni maxmiéjuanʼ. Á mu nutha̱a̱nʼ dí mumbayáaʼ atandrigú ga̱jma̱a̱ xúgíʼ a̱jkia̱a̱nʼ, Jeobá najmiuu ikhiin mu muxnaaʼ tsiaki̱i̱. Ma̱ngaa dí naʼtulúʼ náa Biblia dí marigá nda̱wa̱á dí makuwáanʼ kámuu’ mbiʼi tséʼniuu á mu mekhuíí o náa tsu̱du̱u̱ ku̱ba̱ʼ (Rom. 4:​3, 18, 19). Naʼni rí muguaʼdáá tsiaki̱i̱ mu maʼngulú náa tsáʼkhá, muʼtáraʼa ajngáa rí májánʼ ga̱jma̱a̱ muʼnimbáníí ñajunʼ dí kuaʼdáá náa guʼwá nagimbáanʼ (1 Tes. 1:3). Rígi̱ nimbáyúʼ apóstol Pablo ma̱ngaa. Niʼthí rí nini gínáa, nixkháá ga̱jma̱a̱ rí nánguá ndiʼyoo rí maʼni. Asndu nguáná nigíʼ makhañuu (2 Cor. 4:​8-10). Ndiéjunʼ nixnúu tsiaki̱i̱ Pablo mu maʼngo̱o̱ rá. Ikhaa nindxa̱ʼwáminaʼ dí marigá nda̱wa̱á (2 Cor. 4:​16-18). Pablo nidxaʼwáminaʼ náa dí kiʼthúún makánáá nda̱wa̱á, rígi̱ “nixnúu tsiaki̱i̱ mámbá mbiʼi”. w23.10 15, 16 kutriga̱ 14-17

Índo̱ gáratajkáan, atayáá á mu nindxu̱u̱ mbiʼi rí Jeobá ma̱ndoo maxnáa natanda̱ʼa̱a̱. Mbáa nundxaʼwamíjna̱ dí ndayóoʼ maxtiʼña̱a̱ nacha̱ rí niʼtájkáan. Mú, Jeobá nindxu̱u̱ bi̱ ndaʼyoo nguáná nindxu̱u̱ itháan májánʼ mu mambáyulú (Heb. 4:16). Á mu Jeobá tsériʼña̱a̱ nacha̱ dí nuʼtájkáan, ma̱ndoo makumulú dí ikhaa naʼtulúʼ rí “Nanguá”. Mú rí ikhaa nandoo gáʼtúlú nindxu̱u̱ dí “Xóó na̱nguá”. Mbá xkri̱da, mbáa ndxáma bi̱ naʼtájkáan mu ní xándoo kháñún. Mú, na̱nguá niʼni a̱jkiu̱u̱n. Á mu Jeobá najmuu tsiakii ndrígóo mu maʼni thanuu, Gixa̱a̱ ma̱ndoo maʼthí rí ndxáma bugi̱ i̱ndó xtáa raʼni ñajuunʼ Jeobá numuu rí niʼni thanuu (Job 1:​9-11; 2:4). Mú Jeobá nigíʼ má mbiʼi mu maʼni gámbáa xúgíʼ nandii (Is. 33:24; Apoc. 21:​3, 4). Ikha jngóo, xúguaʼthi̱i̱n rí xúgi̱ Jeobá majmuu tsiakii ndrígóo mu maʼni thanulúʼ. Á mu xúʼko̱, ndiéjunʼ gándoo ma̱ndo̱ʼo̱o̱ Jeobá ndxáma bugi̱ rá. Dí maxnúu tsiakii ga̱jma̱a̱ rí maxtáa tsímáá mu xúʼko̱ ikhaa maʼni ñajuunʼ maski ajndu gíʼdoo nandii. w23.11 23, 24 kutriga̱ 13

Sansón nikiéʼkhun, mú tákha guabaaʼ a̱jkiu̱u̱n. Nindoo maʼnimbánuu má xúʼko̱ ñajunʼ rí Jeobá nixnájxu̱u̱, dí magi̱ʼdu̱u̱ gajmíi̱n filisteos (Juec. 16:​28-30). Ikha jngóo nindo̱ʼo̱o̱ Jeobá: “Atatsíñúnʼ dí ma̱ni̱ gámbíin filisteos”. Dios niʼdxawuun dí niʼtájkáan Sansón ga̱jma̱a̱ nixnúu itháán tsiaki̱i̱ ki xóo rí nigiʼdoo nákha ginii. Sansón nigudíin itháán filisteos mbiʼi rúʼko̱ ki xóo náa xúgíʼ mbiʼi rí nixtáa. Maski ajndu Sansón nimínuuʼ ga̱jma̱a̱ dí niraʼwíí maʼni, mú tániñuuʼ raʼnimbánuu dí nandoo Jeobá. Xúʼko̱ má mangáánʼ, xáʼyoo makanájkulú á mu nuxuʼdamíjná aʼkhá ga̱jma̱a̱ muxprigulú o asndu mandáti̱gu̱lú ñajunʼ dí kuaʼdáá náa guʼwá nagimbáanʼ. Gármáʼáanʼ a̱jkiu̱lú dí Jeobá, maʼndoo kaʼyulú má xúʼko̱ (Sal. 103:​8, 9). Maski ajndu makiéʼkúlú, mú ma̱ndoo majmiuu má xúʼko̱ ga̱jma̱á nindxu̱lú, xó má niʼni ga̱jma̱a̱ Sansón. w23.09 6 kutriga̱ 15, 16

Jeobá nadxuu a̱jkiu̱u̱n índo̱ ndaʼyoo rí ikháán naʼnga̱a̱ʼ natraʼníí xkujndu. Phú gajkhun rí maxnáaʼ tsiaki̱i̱ ma̱ta̱ya̱a̱, dí á mu nariejun jmbu, naʼngo̱o̱ a̱jkia̱a̱nʼ naraʼti̱i̱n, ma̱ndoo matani̱ rí maʼdxuu a̱jkiu̱u̱n Jeobá (Sal. 5:12). Gundxaʼwamíjna̱ ga̱jma̱a̱ numuu Abrahán. Ikhaa niʼngo̱o̱ náa xkujndu dí niraʼnuu ikha jngóo nidxuu a̱jkiu̱u̱n kaʼyoo Jeobá, ma̱ngaa ndiʼyoo xóo mbáa bi̱ nambájxu̱u̱ ga̱jma̱a̱ mbáa xa̱bu̱ bi̱ naʼni rí májánʼ (Gén. 15:6; Rom. 4:​13, 22). Xúʼko̱ má mbaʼyóoʼ muʼni mangáánʼ, mu Dios maʼndoo kaʼyulú, ndayóoʼ rí muguajún jmbu ga̱jma̱a̱ rí maʼngo̱o̱ a̱jkiu̱lú muguaʼthi̱i̱n, raʼkháa ga̱jma̱a̱ numuu xóo muʼni ñajuunʼ ikhaa o ñajunʼ dí naguáʼdáá náa congregación. Rígi̱ dí ma̱ndoo muʼni xúgiáanʼ, tséʼniuu má nguáthá tsigulú, xóo kuwáanʼ o rí najmáán nuʼnilú. Xtáa ikháán ratraʼníí mbá xkujndu xúgi̱ ráʼ. Atayáá gajkhun á mu nariejun jmbu Jeobá ma̱ndoo kaʼyáaʼ. Índo̱ nadxuʼnú natayáá rí ikhaa nandoo kaʼyaaʼ: Rígi̱ nambáyaaʼ naʼni matatsimbaʼ itháán náa rí xta̱ʼthi̱i̱n marigá nda̱wa̱á. w23.12 11 kutriga̱ 13, 14

Rí majmañaaʼ maratamíjná májánʼ gajmiáanʼ eʼwíinʼ gíʼdoo wéñuuʼ numuu náa a̱ngiu̱lú jiámá. Rígi̱ nandoo gáʼthúu̱n rí mbaʼyóoʼ majmañáaʼ matadxawíín ga̱jma̱a̱ makrua̱ʼa̱a̱ʼ xóo endxaʼwamíjna̱ ga̱jma̱a̱ xóo ekumu̱ún eʼwíinʼ (Prov. 20:5). Ataniminaʼ majmañaaʼ ma̱ta̱ya̱a̱ ndiéjuunʼ eyoo gáʼtháanʼ ga̱jma̱a̱ aʼwá xóo najmuu, xóo naʼni inuu ga̱jma̱a̱ xóo naʼthí. Ma̱ndoo majmañaaʼ rígi̱ á mu naratamijná gajmiáanʼ xa̱bu̱. Numuu rí á mu najmaa correo electrónico, mensaje, rígi̱ maʼniaaʼ gakhi̱i̱ maratha̱a̱n xa̱bu̱ índo̱ gátayaa. Ikha jngóo ataniminaʼ maratamijná gajmiáanʼ xa̱bu̱ (2 Juan 12). Mbáa cristiano bi̱ nandxa̱ʼóo májánʼ edxu̱u̱ najmaa mañewumínaʼ ikhaa ga̱jma̱a̱ bi̱ kúwá náa goʼwóo (1 Tim. 5:8). Májánʼ dí majmañulú muʼni mbá ñajunʼ dí mambáyulúʼ muʼdaa mbújkha̱a̱ (Hech. 18:​2, 3; 20:34; Efes. 4:28). Atiejunʼ gakhi̱i̱ ga̱jma̱a̱ xátatsiʼñáánʼ káaʼ tu̱mba̱a̱. Xúʼko̱ ma̱ndoo muthi rí májánʼ ga̱jma̱a̱ numaaʼ ma̱ngaa xáʼni gakhi̱i̱ makhánáaʼ ñajunʼ rí matani, ma̱ngaa rí xándatiga̱a̱ʼ. w23.12 27 kutriga̱ 12, 13

Índo̱ náa Biblia najmuu ajngáa “mbiʼi ndrígóo Jeobá”, mu maʼthí ga̱jma̱a̱ numuu mbiʼi dí ikhaa maʼni gámbíin xa̱bu̱ sia̱nʼ ndrígióo ga̱jma̱a̱ maʼni kríyaaʼ xuajñuu. Nákha wajyúuʼ, Jeobá ninda̱ʼa̱a̱ cuenta tikhu xuajen (Is. 13:​1, 6; Ezeq. 13:5; Sof. 1:8). Inu má magi̱ʼdu̱u̱ “Mbiʼi ndrígóo Jeobá”, magi̱ʼdu̱u̱ índo̱ gúni gámbáa Babilonia rí Mba̱a̱ ga̱jma̱a̱ mambá mbiʼi rúʼko̱ índo̱ magi̱ʼdu̱u̱ Armagedón. Mu ma̱ndoo muʼni káwúmijná náa “mbiʼi” rúʼko̱ gíʼmaa muʼni ratamíjná asndu nákhá má xúgi̱. Jesús niʼsngáa dí gíʼmaa “makuwáanʼ xawii” ma̱ngaa nandoo gáʼthúu̱n gíʼmaa makuwáanʼ má xúʼko̱ xawii ga̱jma̱a̱ numuu “majphú mba̱a̱ gaʼkhu”, rígi̱ nasngájma dí xúniʼñáánʼlú makuwáanʼ má xúʼko̱ xawii (Luc. 12:40; Mat. 24:21). Náa Timbá I̱yi̱i̱ʼ rí na̱jkha̱ inún Tesalonicenses, apóstol Pablo nijmuu mbaʼa xkri̱da mu mambáñún cristianos mu makuwíin xawii índo̱ gáʼkha̱nú mbiʼi ndrígóo Jeobá. Pablo ndiʼyoo dí ndayóoʼ má xóó ma̱ʼkha̱ mbiʼi rígi̱ (2 Tes. 2:​1-3). Mú, Pablo niʼthún di gíʼdoo wéñuuʼ numuu muniratamijná xóo ma mbiʼi rúʼko̱ inuu ma ma̱ʼkha̱. Mangáanʼ ma̱ndoo mbuyaridáá ajngáa rúʼko̱. w23.06 8 kutriga̱ 1, 2

Náa Tokio, Japón nákha tsiguʼ 1978 niguma mbá guʼwá mitsídánʼ dí nigiʼdoo mbá 60 pisos. Índo̱ xa̱bu̱ kúwíin ranújngún nduyáá guʼwá rígi̱, niraximíjna̱ á mu maʼngo̱o̱ mawi̱ji̱ numuu rí náa xuajin rígi̱ seguro eʼxma. Ndiéjunʼ nini̱ ingeniero mu mutsiji jxa̱ʼ rá. Nini̱ májáanʼ guʼwá mu mawi̱ji̱ gújkhúʼ ga̱jma̱a̱ índo̱ gaʼxma maʼba̱a̱n wáa kayuʼ. Ikháán nindxu̱lú xígi̱ kaʼnii. Ndíjkha jngóo rá. Mbáa xa̱bu̱ bi̱ naʼni ñajuunʼ Jeobá gíʼmaa mbaʼyoo awa̱án mu mawi̱ji̱ jmbu ga̱jma̱a̱ dí makro̱ʼo̱o̱ kaʼñún eʼwíinʼ índo̱ guruguambáá ikha ga̱jma̱a̱ xtángoo ndrígóo Jeobá. Gíʼmaa maxtáa “xawii mu maʼnimbo̱o̱” ga̱jma̱a̱ xánújngurámu ikha ndrígóo Dios. Mú ma̱ngaa gíʼmaa maʼni “gua̱ba̱ʼ a̱jkiu̱u̱n”, xó muʼthá, gíʼmaa makro̱ʼo̱o̱ kaʼñún eʼwíinʼ asndu náá máʼ eʼngo̱o̱ o á mu ndayóoʼ (Sant. 3:17). Á mu nindxu̱lú xígi̱ kaʼnii, xúnda̱ʼa̱ itháan dí kaʼyoo ni má xúniʼñáánʼ dí maguma dí raʼkhí. w23.07 14 kutriga̱ 1, 2

Jesús ndiyóoʼ maraʼnuu tsáʼkhá dí nigrui̱ga̱ Gixa̱a̱ náa inuu mu xáwi̱ji̱ jmbu náa Jeobá (Mat. 4:​1-11). Gixa̱a̱ niʼni xó má niʼngo̱o̱ mu maʼni rí makiéʼkhun Jesús mu xúʼko̱ xáʼtsiwáánʼ. Índo̱ nigíʼdu̱u̱ niʼtáraʼa, Jesús niraʼnuu i̱ʼwáʼ tsáʼkhá. Mbá xkri̱da, xa̱bu̱ bi̱ táʼndúún gúyáá nixkháá ga̱jma̱a̱ nindúún muxiyáa (Luc. 4:​28, 29; 13:31). Ndiyóoʼ rí maʼngo̱o̱ a̱jkiu̱u̱n kaʼñúún discípulos ndrígóo (Mar. 9:​33, 34). Índo̱ inu muxiyáa, nini gínáa ga̱jma̱a̱ nitsijmaa. Nda̱wa̱á nirajkhaa náa mbá ixi̱, nini̱i̱ xóo mbáa xa̱bu̱ bi̱ nagudíin a̱ngui̱i̱n, rígi̱ niʼni dí mamínuuʼ wéñuuʼ (Heb. 12:​1-3). Índo̱ inu makhañúu, ikhú Jeobá na̱nguá niña̱wu̱u̱n, ndiyóoʼ dí maraʼnuu mbáwíí tsáʼkhá rígi̱ (Mat. 27:46). Nakujmaa kaʼwu rí Jesús ra̱ʼkhá tháán mba̱a̱ rí niʼni mu maʼtsiwáánʼlú. Índo̱ nundxa̱ʼwa̱míjna̱ xúgíʼ tsiaki̱i̱ rí ndiyóoʼ maʼni ga̱jma̱á numulú, naxkajxáánʼ rí maʼndulú kuʼyáá. w24.01 10, 11 kutriga̱ 7-9

Dí maʼngo̱o̱ a̱jkiu̱lú nambáyulú mu mambajxúlú májánʼ gajmiúlú eʼwíinʼ. Á mu naʼngo̱o̱ a̱jkiu̱lú, muʼdxawíín tsu̱máá dí gúthi eʼwíinʼ (Sant. 1:19). Ma̱ngaa muʼni marigá dí tsímáá. Xúʼni ma̱ngaa xúʼthá mbá nacha̱ rí maʼni gawúúnʼ eʼwíinʼ maski ajndu kuáʼdáá mbá náa edxu̱lúʼ dí tséʼni mundxaʼwamíjna̱ májánʼ. Ma̱ngaa índo̱ mbáa naʼniulú mbá dí raʼkhí xákiʼnáanʼ nacha̱ ni ma xutangaánʼ muʼni̱i̱ xó má niʼniulúʼ. Itháán májánʼ dí maʼngo̱o̱ a̱jkiu̱lú ga̱jma̱a̱ muʼni mba̱a̱ a̱jkiu̱lú kuʼyamijná (Col. 3:​12, 13). Dí maʼngo̱o̱ a̱jkiu̱lú, ma̱ngaa nambáyulú mu muraʼwíí májánʼ dí gúʼni. Guriʼyáʼ mbiʼi mu mbuʼyáá ndiéjunʼ dí itháán májánʼ dí muraʼwíí muʼni, raʼkháa dí muʼni mbá nacha̱. Gundxaʼwamíjna̱ á mu kuwáanʼ ruʼyáʼ mbóoʼ ñajunʼ, a mu tséʼngo̱o̱ a̱jkiu̱lú guguaʼthi̱i̱n, mbáa mundrígú asndu guáʼyaa má ñajunʼ dí gakhánulú. Á mu naʼngo̱o̱ a̱jkiu̱lú, ginii gíʼmaa mbuʼyáá xu káʼnii gumbayúlú familia ndrígulú o xóo nambájxulu gajmiúlú Jeobá. Rí maʼngo̱o̱ a̱jkiu̱lú muguaʼthi̱i̱n mambáyulú mu xúraʼwíí dí raʼkhí. w23.08 22 kutriga̱ 8, 9

Mbáa maraxtaa ngíná numuu ndayóoʼ mataniminaʼ má xúʼko̱ ga̱jma̱a̱ rí nagua̱ʼa̱ xuyaaʼ. Rí matatsaʼwamínáʼ ga̱jma̱a̱ numuu rí nitaxúdaminaʼ náa Jeobá índo̱ niraxnáximinaʼ náa ikhaa maxnáa tsiakii mu ma̱ngaa matraʼníí tsáʼkhá. Índo̱ mbáa naxnájximinaʼ náa Jeobá naniñuuʼ raʼni dí nandoo ikhaa. Rúʼko̱ nandoo gáʼthúu̱n rí naʼni gaʼduunʼ xúgíʼ rí nagua̱ʼa̱ maʼni. Ikha jngóo índo̱ gúraʼníí mbá tsáʼkhá, xáʼniulú mingíjyúuʼ mbuʼyáá ndiéjunʼ guʼni. Numuu rí i̱ndó ma̱ndoo murawíi muguajún jmbu náa Jeobá. Makuwaanʼ ma xúʼko̱ xawii muʼni rí ikhaa nanigu̱u̱ʼ. Índo̱ nixnajxi̱mijna̱ náa Jeobá niraʼwíí muʼni índo̱ ñajuunʼ ikhaa. Manindxu̱lú xóo Job, rí maski asndu niraʼnuu mbaʼa gamiéjunʼ ikhaa niʼthí: “Káxi̱ má xúʼko̱ a̱jkiu̱nʼ gání” (Job 27:5). w24.03 9 kutriga̱ 6, 7

Jeobá nindxu̱u̱ mbáa ‹Dios bi̱ nandoo kaʼyulú› (2 Cor. 13:11). Ikhaa naxmiéjunʼ kaʼyoo mambáa rí ikháánʼlú.“Naʼni marigá ma xúʼko̱ ngajua rí nditháan tsétumuu náa ikhaa” (Sal. 32:10). Índo̱ nundxaʼwamíjna̱ itháán xú káʼnii esngájmulú rí nandoo kaʼyulú, nduʼyáá rí nindxu̱u̱ jmbii ga̱jma̱a̱ nakumulú rí kuwáanʼ itháán mijngii gajmiúlú ikhaa. Ikhaa jngóo ma̱ndoo muʼtákáñii ga̱jma̱a̱ muʼthán xúgíʼ rí gíwánʼ náa a̱jkiu̱lú ga̱jma̱a̱ munda̱ʼa̱a̱ rí ndayúlú ngajua ndrígóo. Ma̱ndoo muthán xúgíʼ rí naʼni maxmiéjunlú, ikhaa makro̱ʼo̱o̱ kaʼyulú ga̱jma̱a̱ mambáyulú (Sal. 145:19). Ngajua ndrígóo Jeobá nindxu̱u̱ xóo mbá aguʼ índo̱ naʼni migúwán rí mbruʼun. Nandulúʼ rí makuwáanʼ má xúʼko̱ mijngii náa ikhaa. Ngajua ndrígóo gíʼdoo wéñuuʼ tsiaki̱i̱, nagáwíinʼ a̱jkiu̱u̱n kaʼyulú. Nakuwáanʼ tsímáá rí Jeobá nandoo kaʼyulú wéñuuʼ. Xúgiáanʼ nandulúʼ muʼthá: “Nandoʼ kayoo Jeobá” (Sal. 116:1). w24.01 31 kutriga̱ 19, 20

Jesús raʼkháa índo̱ niʼthún xa̱bu̱ xú káʼnii mbiʼyuu Dios. Numuu rí judíos nduyáá má rígi̱. Ikhaa niʼthún “xú káʼnii nindxu̱u̱ Dios” (Juan 1:​17, 18). Mbá xkri̱da náa Escrituras Hebreas naʼthí rí Jeobá nagawíin a̱jkiu̱u̱n (Éx. 34:​5-7). Jesús niʼni rí mbaʼin xa̱bu̱ makru̱ʼu̱u̱n májánʼ rígi̱ índo̱ niʼthí xkri̱da ndrígóo ada̱ bi̱ nitanga̱a̱ a̱jkiu̱u̱n. Índo̱ nuraxnuu náa naʼthí rí anu̱u̱ niʼngo̱o̱ ndiʼyoo “na̱ʼkha̱ mitsínguánʼ” nigáyúu ni̱jkha̱ gátsijnuu ga̱jma̱a̱ ndiyaraʼa niʼni mba̱a̱ a̱jkiu̱u̱n kaʼyoo, nakujmaa kaʼwu xú káʼni nindxu̱u̱ Jeobá phú gajkhun rí nagawíin a̱jkiu̱u̱n (Luc. 15:​11-32). Jesús nimbáñun xa̱bu̱ mbuyáá xú káʼnii nindxu̱u̱ Jeobá. w24.02 10 kutriga̱ 8, 9

Xúʼko̱ má Jeobá naʼni̱i̱ a̱jkiu̱ún xa̱bu̱ bi̱ kúwá rumíniiʼ. Ndiéjunʼ gámbáyulú mu magáwíinʼ a̱jkiu̱lú ga̱jma̱a̱ muʼni̱i̱ a̱jkiu̱ún eʼwíinʼ xó má eʼni Jeobá rá. Rí maguaʼdáálu cualidad rí mambáyulú muʼni a̱jkiu̱ún eʼwíinʼ. Ndiéjunʼ gambáyúlú mu maʼndulú kuʼyamijná má xúʼko̱ ga̱jma̱a̱ rí muʼni̱i̱ a̱jkiu̱lú xúgíʼ mbiʼi rá. (1 Tes. 4:18.) Rí maguaʼdáálu cualidad xóo rígi̱, rí makumulú xóó eʼwíinʼ, rí maʼndulú kuʼyamijná gajkhun ga̱jma̱a̱ gúʼnilú rí májánʼ (Col. 3:12; 1 Ped. 3:8). Índo̱ rí nagáwíinʼ a̱jkiu̱lú ga̱jma̱a̱ i̱ʼwáʼ cualidad xóo rígi̱, naguáʼdáá rúʼko̱ naxkaxáanʼ mu muʼni̱i̱ a̱jkiu̱ún bi̱ kúwá rumíniiʼ ga̱jma̱a̱ numuu xkujndu. Jesús niʼthí: “Numuu dí gíwánʼ náa a̱jkiu̱u̱n xa̱bu̱, rúʼko̱ má eʼthí. Mbáa xa̱bu̱ májáanʼ, májánʼ má dí eguwíi náa a̱jkiu̱u̱n” (Mat. 12:​34, 35). Nakujmaa kaʼwu rí muʼni̱i̱ a̱jkiu̱ún a̱ngiu̱lú gíʼdoo wéñuuʼ numuu, xúʼko̱ nusngajmún rí nandulúʼ kuʼñúún. w23.11 10 kutriga̱ 10, 11

Mu makru̱ʼu̱lú májánʼ profecía dí na̱ʼkha̱ náa Biblia, ndayóoʼ munda̱ʼa̱ rí mumbayulúʼ. Gundxawamíjna̱ náa xkri̱da rígi̱. Atatsaʼwáminaʼ dí xtáa náa mbá xuajin dí nditháan na̱nguá xóó nidxu̱ʼ, mú xtaa ga̱jma̱a̱ʼ mbáa mígiaʼ ga̱jma̱a̱ nagujthuun ñawáanʼ. Mígiaʼ ndaʼyoo májánʼ náá xtaa ga̱jma̱a̱ʼ ma̱ngaa náá ejkha̱ mámbá calle. ¡Raʼkhá tháán májánʼ dí ni̱jkha̱ ga̱jma̱á nindxa̱a̱ʼ! Xúʼko̱ má kayuuʼ, Jeobá ndaʼyoo nguáthá xóó mba̱yu̱u̱ʼ mbiʼi guanuu. Ikha jngóo mu ma̱ndoo makru̱ʼu̱lú profecía dí na̱ʼkha̱ náa Biblia ndayóoʼ rí munda̱ʼa̱a̱ rí mambáyulú (Dan. 2:28; 2 Ped. 1:​19, 20). Xó má xabuanii nandún rí e̱jñu̱ún makuwá májánʼ, xúʼko̱ má Jeobá ma̱ngaa nandoo rí e̱ji̱i̱n makuwá májánʼ nda̱wa̱á (Jer. 29:11). Mú rí naʼni mixtiʼkuii Jeobá, ikhaa nindxu̱u̱ rí najmaa maʼtáriyaʼ dí marigá nda̱wa̱á. Nindoo dí náa Ajngá rawuunʼ magumaraʼmáʼ profecía mu xúʼko̱ mbuʼyáá dí gíʼdoo numuu marigá nda̱wa̱á (Is. 46:10). w23.08 8 kutriga̱ 3, 4