Dí gíʼmaa matani mu maraxtaa kámuu

1. Ndiéjuunʼ endxaʼwamíjna̱ tikhuun xa̱bu̱ ga̱jma̱a̱ numuu dí makuwá kámuu mbiʼi rá.

MBAʼIN xa̱bu̱ nuñewa̱a̱n dí naʼphu̱ ga̱jma̱a̱ nuni̱ ejercicio xúgíʼ mbiʼi mu makuwá májánʼ. Maski ajndu xúʼko̱ tséguaʼthi̱i̱n makuwá kámuu mbiʼi. Mbáa nundxaʼwamíjna̱ rí xándoo makuwá kámuu o asndu tsíñún mumíniiʼ índo̱ gaʼni guanii. Mú, Jesús niʼthí dí xa̱bu̱ ma̱ndoo “makuwá kámuu mbiʼi” xó má eʼthí náa Juan 3:16 ga̱jma̱a̱ 5:24.

2. Ndiéjunʼ eʼthí náa Juan capítulo 6 ga̱jma̱a̱ numuu dí makuwáánʼ kámuu mbiʼi rá. (Juan 6:​39, 40.)

² Mbá mbiʼi Jesús niʼni milagro mu maʼni marigá mbaʼa pan ga̱jma̱a̱ e̱gi̱ʼ mu maxniʼtsún mbaʼin wéñuuʼ xa̱bu̱.a Dí niʼni ninindxu̱u̱ nagui̱i̱ wéñuuʼ mu dí niʼthí imbo̱ʼ mbiʼi ninindxu̱u̱ itháan nagui̱i̱. Xa̱bu̱ buʼko̱ nigún kidxuuʼ asndu náa Capernaúm, náa rawuunʼ lamáa ndrígóo Galilea, ikhí niʼthúún dí xa̱bu̱ ma̱ndoo matujxi̱ín ga̱jma̱a̱ dí makuwá kámuu mbiʼi (atraxnuu Juan 6:​39, 40). Atatsaʼwáminaʼ ga̱jma̱a̱ numún bi̱ xtañún ga̱jma̱a̱ bi̱ nambájxáaʼ gajmiáanʼ bi̱ nikháñún. Dí niʼthí Jesús naʼsngúlú dí mbaʼin xa̱bu̱ bi̱ nikháñún matujxi̱ín ga̱jma̱a̱ rí ikháán gajmiáanʼ bi̱ xtañún ma̱ndoo makuwáanʼ kámuu mbiʼi. Mú náa Juan capítulo 6, Jesús niʼthí i̱ʼwáʼ ajngáa dí mbaʼin niʼniún mingíjyúuʼ makru̱ʼu̱u̱n. Guʼyáá ndiéjunʼ niʼthí.

3. Ndiéjunʼ niʼthí Jesús ga̱jma̱a̱ numuu ikhaa náa Juan 6:51 rá.

³ Mbaʼin xa̱bu̱ bi̱ nigún náa Capernaúm, nda̱wa̱á dí ndiyáá xóo Jesús niʼni milagro mu maxniʼtsún mbaʼin xa̱bu̱, niguánu nindxaʼwamíjna̱ ga̱jma̱a̱ numuu maná dí Jeobá nixnún muphu israelitas nákha nikúwá náa ku̱ba̱ʼ mijxooʼ. Náa Biblia naxná mbiʼyuu maná xóo “ganitsu dí na̱ʼkha̱ mekhuíí” (Sal. 105:40; Juan 6:31). Ikhú nigíʼdu̱u̱ niʼsngúún xa̱bu̱ mbá dí gíʼdoo numuu ga̱jma̱a̱ numuu maná. Maski ajndu maná ninindxu̱u̱ mbá milagro dí Dios nixná, mú bi̱ ni̱ʼphu̱ nikháñún má tsiaki̱i̱ (Juan 6:49). Mú Jesús niʼthí dí ikhaa nindxu̱u̱ “ganitsu [...] bi̱ nigajtaa mekhuíí”, “ganitsu ndrígóo Dios” ga̱jma̱a̱ “ganitsu rí ndaʼya” (Juan 6:​32, 33, 35). Nda̱wa̱á niʼthí ndiéjunʼ eʼni mixtiʼkhu maná ga̱jma̱a̱ ikhaa, niʼthí: “Ikhúúnʼ ni̱ndxu̱ʼ ganitsu rí ndaʼya rí nigajtaa mekhuíí, bi̱ gíkhu ganitsu rígi̱ maxtáa kámuu mbiʼi” (atraxnuu Juan 6:51). Ajngáa rígi̱ niʼni maguanún tsiánguá judíos. Na̱nguá niʼngo̱o̱ gákru̱ʼu̱u̱n ndíjkha dí Jesús niʼthí dí ikhaa nindxu̱u̱ ganitsu bi̱ nigajtaa mekhuíí dí itháan májánʼ, ki xóo maná dí Jeobá nixnún israelitas náa ku̱ba̱ʼ mijxooʼ. Ikhú Jesús niʼthí: “Ganitsu rí ikhúún maxnajxí [...] nindxu̱u̱ xuyuʼ”. Ndiéjunʼ nindoo gáʼthí xá. Gíʼdoo wéñuuʼ numuu makru̱ʼu̱lú ndiéjunʼ nindoo gáʼthí, mu xúʼko̱ ma̱ndoo mbuʼyáá ndiéjunʼ eʼni dí ikháanʼ ga̱jma̱a̱ bi̱ kuʼñúún ma̱ndoo makuwáánʼ kámuu mbiʼi. Guʼyáá ndiéjunʼ nindoo gáʼthí Jesús.

“GANITSU RÍ NDAʼYA” GA̱JMA̱A̱ XUYUUʼ

4. Ndíjkha dí tikhuun xa̱bu̱ niʼniún tsiánguá ga̱jma̱a̱ numuu dí niʼthí Jesús rá.

⁴ Tikhuun xa̱bu̱ niʼniún tsiánguá índo̱ nidxawíín dí Jesús niʼthí maxnájxi̱ xuyuuʼ mu xúʼko̱ xa̱bu̱ ma̱ndoo makuwá. Mbáa nikumu̱ún dí mbaʼyóoʼ mu̱phu̱ xuyuuʼ Jesús (Juan 6:52). Mú nda̱wa̱á Jesús niʼthí i̱mba̱ dí niʼni maʼniún itháan tsiánguá: “Á mu tséphu xuyuuʼ A̱ʼdióo xa̱biya̱ ni má tséwanla eʼdiuu, nda̱a̱ rí ndaʼya náa ikháanʼla” (Juan 6:53).

5. Xú káʼnii eʼyáá dí Jesús na̱nguá xtáa raʼthún xa̱bu̱ dí muwa̱a̱n gajkhun eʼdiuu xá.

⁵ Nákha mbiʼi dí nixtáa Noé Dios niʼthúún rí xa̱bu̱ xándoo muphu eʼdi (Gén. 9:​3, 4). Ga̱jma̱a̱ itháan nda̱wa̱á Jeobá niʼthún israelitas dí xúphu̱ eʼdi. Xúgíinʼ bi̱ gúphu̱ eʼdi ‹mbaʼyóoʼ dí makhañún› (Lev. 7:27). Jesús niʼthí dí gíʼmaa munimbu̱ún Xtángoo dí niʼnirámáʼ Moisés (Mat. 5:​17-19). Ikha jngóo xándoo mundxaʼwamíjná dí ikhaa niʼthún judíos dí gajkhun muphu xuyuuʼ ga̱jma̱a̱ dí muwa̱a̱n eʼdiuu. Rí phú xtáa raʼsngúún xa̱bu̱ nindxu̱u̱ xú káʼnii gándoo gúni̱ mu makuwá “kámuu mbiʼi” (Juan 6:54).

6. Xú káʼnii eʼyáá dí ninindxu̱u̱ mbá xkri̱da dí Jesús niʼthí dí muphu xuyuuʼ ga̱jma̱a̱ dí muwa̱a̱n eʼdiuu xá.

⁶ Nakujmaa kaʼwu dí Jesús xtáa rajmuu mbá xkri̱da mu maʼsngúún xa̱bu̱. Numuu dí mbaʼa má nuthu najmuu xkri̱da, xóo índo̱ niʼthúu̱n a̱ʼgú samaritana: “Bi̱ gágáan iyaʼ rí ikhúún’ gáxnu̱u̱ ni xátanga̱a̱ makandawuuʼ. Numuu rí iyaʼ dí ikhúún’ gáxnu̱u̱ maʼga̱nú mani̱ndxu̱u̱ mbá iduu iyaʼ náa ikhaa, rí maʼni maxtáa kámuu mbiʼi” (Juan 4:​7, 14).b Jesús na̱nguá nindoo gáʼthí dí samaritana káaʼ i̱ndó ndayóoʼ maga̱a̱n iyaʼ dí kajni náa mbá pozo mu maxtáa kámuu mbiʼi. Xúʼko̱ má, na̱nguá niʼthúún xa̱bu̱ náa Capernaúm dí makuwá kámuu mbiʼi á mu na̱ʼphu̱ gajkhun xuyuuʼ ga̱jma̱a̱ á mu naʼwa̱a̱n eʼdiuu.

LÁ NAMBRÍGUII DÍ NIʼTHÍ JESÚS GA̱JMA̱A̱ NUMUU GANITSU WAÑUU TÁTÁ RÁʼ.

7. Ndiéjunʼ ethi tikhuun xa̱bu̱ ga̱jma̱a̱ numuu dí niʼthí Jesús náa Juan 6:53 rá.

⁷ Tikhuun xa̱bu̱ bi̱ nagún náa i̱ʼwáʼ religión nuthi dí Jesús niʼthí náa Juan 6:53 ga̱jma̱a̱ numuu dí muphu xuyuuʼ ma̱ngaa dí muwa̱a̱n eʼdiuu, xtáa raʼthí ga̱jma̱a̱ numuu dí gíʼmaa muni̱ náa Ganitsu wañuu Táta. Nuthi xúʼko̱ ga̱jma̱a̱ numuu dí nda̱wa̱á nijmuu ikháá má kayuuʼ ajngáa (Mat. 26:​26-28). Ikhiin nuthi dí xúgíinʼ bi̱ nagún náa nagumariya̱a̱ʼ Ganitsu wañuu Tátá gíʼmaa mu̱phu̱ pan ga̱jma̱a̱ muwa̱a̱n vino dí nanújngoo náa ikhiin. Lá gajkhun nindxu̱u̱ dí nuthi xáʼ. Gíʼdoo numuu dí mbuʼyáá xóo exti̱ʼña̱a̱ grajxe̱ rígi̱, numuu dí náa xúgíʼ tsiguʼ mbaʼin xa̱bu̱ nagimbíi̱n ga̱jma̱á nindxu̱lú mu muniriyaaʼ Ganitsu wañuu Tátá. Guʼyáá mbaʼa dí naʼni mani̱ndxu̱u̱ mixtiʼkhu ajngáa dí niʼthí náa Juan 6:53 ga̱jma̱a̱ dí niʼthí índo̱ xtáa raʼniriya̱a̱ʼ Ganitsu wañuu Tátá.

8. Ndiéjunʼ ni̱ndxu̱u̱ a̱jma̱ enii dí naʼni mani̱ndxu̱u̱ mixtiʼkhu ajngáa dí niʼthí Jesús náa a̱jma̱ nuthu rígi̱ rá. (Atayáá ma̱ngaa xtiʼkhuu.)

⁸ Guʼyáá a̱jma̱ enii ajngáa dí niʼthí Jesús náa a̱jma̱ nuthu rígi̱. Ginii, nguáná ga̱jma̱a̱ náá niʼthí Jesús ajngáa dí na̱ʼkha̱ náa Juan 6:​53-56 rá. Niʼthún mbaʼin judíos náa Galilea nákha tsiguʼ 32 tsiguʼ nda̱wa̱á. Mbá tsiguʼ wapháá nákha xóó tséʼni Ganitsu wañuu Tátá náa Jerusalén. Raga̱jma̱, tsíin niʼthúún ajngáa rígi̱ xá. Náa Galilea, mbaʼin bi̱ kúwá rudxawíín dí niʼthí Jesús nixmiéjúúnʼ itháan dí makánún dí muphu ki xóo dí mambáxu̱u̱n gajmiún Dios (Juan 6:26). Ga̱jma̱a̱, índo̱ Jesús niʼthún mbá dí maʼniún mingíjyúuʼ makru̱ʼu̱u̱n, mbá nacha̱ niniñaaʼ ragún kidxuuʼ. Asndu tikhuun xa̱bi̱i̱ niniñaaʼ (Juan 6:​14, 36, 42, 60, 64, 66). Rí nirígá nákha ikhú ninindxu̱u̱ mixtiʼkhu kayuuʼ dí nirígá mbá tsiguʼ nda̱wa̱á, tsiguʼ 33, índo̱ Jesús nigíʼ mu maguma Ganitsu wañuu Tátá. Ikhú nikúwá mbá 11 apóstoles ndrígióo bi̱ niguájun jmbu, maski ajndu na̱nguá nikru̱ʼu̱u̱n xúgíʼ dí ikhaa xtáa raʼsngáa. Mú, ikhiin na̱nguá ninindxu̱ún xóo xa̱bu̱ bi̱ nikúwá náa Galilea. Apóstoles bi̱ niguájun jmbu ndiyáá gajkhun dí Jesús nindxu̱u̱ A̱ʼdióo Dios bi̱ nigajtaa mekhuíí (Mat. 16:16). Ikha jngóo Jesús niʼthúún: “Ikháanʼ nindxa̱la bi̱ nikuwáanʼ ga̱jma̱á ni̱ndxu̱ʼ náa xúgíʼ rí nigíʼnuu” (Luc. 22:28). I̱ndó rí mbuʼyáá a̱jma̱ dí naʼni mixtiʼkhu rígi̱, nambáyulúʼ makru̱ʼu̱lú dí Jesús na̱nguá niʼthí náa Juan 6:53 dí gíʼmaa muni̱ índo̱ guniriya̱a̱ Ganitsu wañuu Tátá. Mú rígá i̱ʼwáʼ náa nasngájma.

AJNGÁA DÍ NIʼTHÍ JESÚS GA̱JMA̱A̱ IKHÁÁN

9. Tsíín ejkha̱ inún ajngáa dí niʼthí Jesús náa Ganitsu wañuu Tátá rá.

⁹ Náa ganitsu wañuu Tátá, Jesús nixnún apóstoles ndrígóo pan dí ragíʼdoo levadura ga̱jma̱a̱ niʼthúún dí nandoo gáthúu̱n xuyuuʼ. Nda̱wa̱á niʼni manújngoo vino ga̱jma̱a̱ niʼthúún dí nandoo gáʼthúnʼ “eʼdi rí nambánuu” (Mar. 14:​22-25; Luc. 22:20; 1 Cor. 11:24). Dí niʼthí iwáá kayuuʼ gíʼdoo wéñuuʼ numuu. Dí nambánuu nuxi̱ʼ rígi̱, na̱nguá nindxu̱u̱ ga̱jma̱a̱ numún xúgíinʼ xa̱bu̱, i̱ndó ga̱jma̱a̱ numún bi̱ kúwá náa “goʼwóo Israel”, xóo muʼthá, bi̱ mutañajunʼ gajmiún Cristo náa “Xa̱bu̱ Ñajunʼ ndrígóo Dios” (Heb. 8:​6, 10; 9:15). Nákha ikhú apóstoles na̱nguá nikru̱ʼu̱u̱n ndiéjunʼ nindoo gáʼthúu̱n rúʼko̱. Mú tájyúuʼ má dí nixtaʼwíin ga̱jma̱a̱ xi̱ʼ kaʼwu mu makuwá náa nimbánuu nuxi̱ʼ mu makuwá mbóó gajmiún Jesús náa mekhuíí (Juan 14:​2, 3).

10. Ndiéjunʼ nindxu̱u̱ imbo̱ʼ dí mixtiʼkhu niʼthí Jesús náa Galilea ga̱jma̱a̱ dí niʼthí náa Ganitsu wañuu Tátá rá. (Atayáá ma̱ngaa xtiʼkhuu.)

¹⁰ Náa Ganitsu wañuu Tátá, Jesús niʼthí ga̱jma̱a̱ numún “mugu̱ bi̱ rambáʼiin”. Mbáa nguéjmi̱i̱n xa̱bu̱ buʼko̱ ginii kayuuʼ ninindxu̱ún apóstoles bi̱ niguájun jmbu bi̱ nixtáa gajmíi̱n náa ganitsu wañuu wakíʼ rúʼko̱ (Luc. 12:32). Xó má ikhiin ga̱jma̱a̱ eʼwíinʼ xa̱bu̱ makuwá náa mbá nguéjmi̱i̱n xa̱bu̱ bugi̱ bi̱ ma̱ndoo mu̱phu̱ pan ga̱jma̱a̱ muwa̱a̱n vino. Xúgíinʼ ikhiin ma̱ndoo makuwá gajmiún Jesús náa mekhuíí. Dí niʼthúún apóstoles ndrígióo nákha ikhú ninindxu̱u̱ mixtiʼkhu dí niʼthúún mbaʼin xa̱bu̱ náa Galilea. Ikhí Jesús nindxa̱ʼwáminaʼ ga̱jma̱a̱ numún mbaʼin xa̱bu̱, ikha jngóo rí niʼthí na̱jkha̱ inún itháan mbaʼin xa̱bu̱.

11. Xú káʼnii eʼyáá dí ajngáa dí niʼthí Jesús náa Galilea raʼkháa káaʼ nguéjmi̱i̱n xa̱bu̱ gáguma tsajkurámiinʼ rá.

¹¹ Índo̱ Jesús nixtáa náa Galilea tsiguʼ 32, xtáa raʼthún judíos bi̱ i̱ndó nindún makánún ganitsu. Mú ikhaa niʼthún mbá dí gíʼdoo wéñuuʼ numuu ki xóo ganitsu: Mbá dí mambáñún makuwá kámuu. Ma̱ngaa niʼthúún dí bi̱ gákháñún matujxi̱ín índo̱ gáʼni iwáá mbiʼi mu makuwá kámuu mbiʼi. Ikhaa na̱nguá niʼthí dí i̱ndó bi̱ niraʼwíin maguma tsajkurámiinʼ xó má niʼthí náa Ganitsu wañuu Tátá. Náa Galilea nindoo gáʼthí dí maguma tsajkurámiinʼ xúgíinʼ xa̱bu̱. Ikhaa niʼthí: “Bi̱ gíkhu ganitsu rígi̱ maxtáa kámuu mbiʼi. Ganitsu rí ikhúúnʼ maxnajxí mu xa̱bu̱ numbaaʼ makáwíin nindxu̱u̱ xuyuʼ” (Juan 6:51).c

12. Ndiéjunʼ gáʼyóoʼ muʼni mu makuwáánʼ kámuu mbiʼi xó má niʼthí Jesús náa Galilea rá.

¹² Náa Galilea, Jesús na̱nguá niʼthúún judíos dí xúgíinʼ xa̱bu̱, xóo bi̱ nikúwá nákha wajyúuʼ ga̱jma̱a̱ bi̱ gágumiin nda̱wa̱á, mbájkhu má gaguma tsajkurámiinʼ. Niʼthí dí i̱ndó bi̱ gúphu̱ pan, xóo muʼthá bi̱ gaguaʼdáá fe maguma tsajkurámiinʼ. Mbaʼin bi̱ nuthi dí nindxu̱ún cristianos nundxaʼwamíjna̱ dí makáwíin á mu i̱ndó ‹nunimbu̱ún› kuyáá Jesús ga̱jma̱a̱ nduyáá xóo bi̱ Maʼnikáwíin (Juan 6:​29, Nueva Versión Internacional). Mú xó má eʼyáá dí tikhuun xa̱bu̱ bi̱ mbaʼin buʼko̱ nákha ginii ninimbu̱ún kuyáá Jesús mú nda̱wa̱á niniñaaʼ. Náá numuu niniñaaʼ xá.

13. Ndiéjunʼ phú eyóoʼ mu mani̱ndxa̱a̱ʼ xa̱bi̱i̱ Jesús rá.

¹³ Mbaʼin xa̱bu̱ bi̱ Jesús nixniʼtsun, nikúwá xawii magún má xúʼko̱ kidxuuʼ i̱ndó á mu naxnún dí ikhiin nandún. I̱ndó dí ikhiin nindúún nindxu̱u̱ dí maguma thanún, makánún ganitsu ga̱jma̱a̱ dí majuiʼsngúún dí nambruíguíi ga̱jma̱a̱ dí ikhiin nandún mudxawíín. Mú ikhaa nisngájmúún dí táʼkha̱ náa tsu̱du̱u̱ Ku̱ba̱ʼ i̱ndó mu maxnún dí nda̱ñúnʼ xa̱bu̱. Ikhaa nisngájmúún ndiéjunʼ gáyóo muni̱ bi̱ nandún mani̱ndxu̱ún xa̱bi̱i̱ ikhaa, dí ndayóoʼ “magún” náa Jesús, xóo muʼthá mudrigú ga̱jma̱a̱ munimbu̱ún xúgíʼ dí ikhaa naʼsngáa (Juan 5:40; 6:44).

14. Ndiéjunʼ gándoo muʼni mu mambáyulúʼ xuyuuʼ ga̱jma̱a̱ eʼdiuu Jesús rá.

¹⁴ Jesús niʼthí dí ikhiin gíʼmaa musngajmá rí kuaʼdáá fe náa xuyuuʼ ga̱jma̱a̱ náa eʼdiuu dí ikhaa gaxnájxi̱ mu ikhiin ma̱ndoo makuwá kámuu mbiʼi. Rígi̱ nigiʼdoo wéñuuʼ numuu náa bi̱ judíos, xúʼko̱ má náa mangáanʼ dí mbiʼi xúgi̱ (Juan 6:40). Mu mambáyulú xuyuuʼ ga̱jma̱a̱ eʼdiuu Jesús dí na̱ʼkha̱ raʼthí náa Juan 6:​53, ndayóoʼ dí musngajmá fe náa dí nijuiʼtsiwáánʼ. Mbaʼin xa̱bu̱ ma̱ndoo maguma tsajkurámiinʼ ga̱jma̱a̱ numuu rígi̱ (Efes. 1:7).

15, 16. Ndiéjunʼ dí gíʼdoo numuu nijmañulúʼ náa Juan capítulo 6 rá.

¹⁵ Dí na̱ʼkha̱ raʼthí náa Juan capítulo 6 gíʼdoo wéñuuʼ numuu náa ikháánʼlú ga̱jma̱a̱ náa bi̱ kuʼñúún. Nasngájma dí Jesús ra̱ʼkhá tháán eyoo kaʼñún xa̱bu̱. Náa Galilea niʼni thanún xa̱bu̱ bi̱ niʼniún nandii, niʼsngúún ga̱jma̱a̱ numuu Xa̱bu̱ ñajunʼ ndrígóo Dios ga̱jma̱a̱ nixniʼtsún bi̱ nixkidxu̱u̱n (Luc. 9:11; Juan 6:​2, 11, 12). Mú raʼkháa i̱ndó rúʼko̱, ma̱ngaa niʼsngúún dí ikhaa nindxu̱u̱ “ganitsu rí ndaʼya” (Juan 6:​35, 48).

¹⁶ Xa̱bu̱ bi̱ Jesús nixná mbiʼñún bi̱ “eʼwíinʼ mugu̱” ragíʼmaa mu̱phu̱ pan ni má muwa̱a̱n vino índo̱ nagumariya̱a̱ mámbá tsiguʼ Ganitsu wañuu Tátá (Juan 10:16). Mú nambáñúún xuyuuʼ ga̱jma̱a̱ eʼdiuu Jesús, índo̱ ikhiin naguáʼdáá fe náa dí nixnáximinaʼ makhañúu ikhaa, mu maʼnikáwíin (Juan 6:53). Mú bi̱ gíʼmaa mu̱phu̱ pan ga̱jma̱a̱ muwa̱a̱n vino nusngajma dí kúwá mangiin náa i̱mba̱ nuxi̱ʼ dí nimbánuu ga̱jma̱a̱ dí makuwá náa Xa̱bu̱ ñajunʼ bi̱ xtáa mekhuíí. Ikha jngóo dí na̱ʼkha̱ náa Juan capítulo 6 gíʼdoo wéñuuʼ numuu náa xúgiáanʼ ikháanʼ, tséʼniuu á mu nindxu̱lú bi̱ kaxtaʼwáánʼ o bi̱ eʼwíinʼ mugu̱. Ikha jngóo gíʼmaa musngajmá fe mu xúʼko̱ makuwáánʼlu kámuu mbiʼi.