“Nditháan na̱nguá nixtáa mbáwún”

XKRIDOO ANU̱ʼ GA̱JMA̱A̱ RU̱DÚʼ

Anu̱ʼ ga̱jma̱a̱ ru̱dúʼ ra̱ʼkhá tháán ninindxu̱ún católicos, mú índo̱ ndiyáá dí náa Biblia naʼthí dí Dios mbiʼyuu Jeobá, niguánú ninindxu̱ún testigos de Jeobá. Anu̱ʼ nindxu̱u̱ carpintero nákha ginii naʼniwíi xtiʼkhuu ndrígóo Jesús, mu nda̱wa̱á niniñuuʼ ga̱jma̱a̱ nigíʼdu̱u̱ niʼni mbá Guʼwá náa magimbáanʼ mu maguáʼdáá reunión. Rígi̱ ninindxu̱u̱ timbá Guʼwá náa nagimbáanʼ dí nirígá náa San Juan del Monte, mbá xuajen rí kaʼyoo Manila, náa naʼtáñajunʼ Filipinas.

Nixtáá nákha 1952. Anu̱ʼ ga̱jma̱a̱ ru̱dúʼ nisngoʼ ga̱jma̱a̱ numuu Jeobá xó má ninii gajmiún a̱jkhui̱i̱n a̱ngui̱nʼ jiámá bi̱ wanii ga̱jma̱a̱ ajtsíin a̱ngui̱nʼ wa̱ʼxa̱ʼ. Awan xóo nijkha rakiu̱u̱n, anu̱ʼ naʼthúnʼ maguxnuu mámbá capítulo ndrígóo Biblia xúgíʼ mbiʼi, ma̱ngaa nanigajma̱a̱ gajmuʼ mbo̱o̱ tikhu i̱yi̱i̱ʼ dí naguwíi xuajñún Jeobá. Anu̱ʼ ga̱jma̱a̱ ru̱dúʼ nguáná nuthúún a̱ngiu̱lú circuitos ga̱jma̱a̱ betelitas mu maguanún náa guʼwúxu, ikhiin nuthuxu̱ tikhuu experiencia dí naʼni makuwáanʼxu gagi ga̱jma̱a̱ naxnúxu tsiaki̱i̱. Ga̱jma̱a̱ rígi̱ nimbáyuʼ ikhúún ga̱jma̱a̱ a̱ngui̱i̱n mu mbuya̱xu̱ rí gíʼdoo itháán numuu dí munixu ñajuunʼ Jeobá.

Anu̱ʼ ga̱jma̱a̱ ru̱dúʼ niguájun jmbu náa Jeobá ga̱jma̱a̱ mbaʼa dí nijmañuʼ náa ikhiin. Nákha 1971 nda̱wa̱á dí ru̱dúʼ niʼniuu nandii ga̱jma̱a̱ nikháñuu, ikhúún gájmuʼ anu̱ʼ ninindxu̱xuʼ precursores, mú índo̱ ikhúún nigúʼdoo 20 tsiguʼ nákhá 1973, anu̱ʼ nikháñuu. Nijkhánú niku̱mu̱ʼ dí mbáwúún xtáá, mú xó ma eʼthí náa Biblia dí kuáʼti̱i̱n nda̱wa̱á “nindxu̱u̱ gajkhun ga̱jma̱a̱ wíji̱ jxa̱ʼ”, rígi̱ nimbáyuʼ mu xáxtáá ngíná, mu xákawabúúnʼ ga̱jma̱a̱ mu xániʼñúuʼ rani̱ ñajuunʼ Jeobá (Heb. 6:19). Nda̱wa̱á dí nikháñuu anu̱ʼ nithu̱nʼ mani̱ndxu̱ʼ precursor especial náa mbá isla dí rígá mitsínguánʼ rí mbiʼyuu Coron, dí gíʼ náa jmbayuuʼ Palawan.

ÑAJUNʼ DÍ NIKHÁNUʼ NÁA NIXTÁÁ MBÁWÚN

Nigúʼdoo 21 tsiguʼ índo̱ nijkhánú náa Coron, numuu dí ikhúún ndi̱ju̱u̱n náa mbá xuajen mba̱a̱, ikha jngóo niʼniuʼ tsiánguá índo̱ ndi̱yo̱o̱ dí náa xuajen rúʼko̱ ndaa aguʼ, ndaa iyáʼ, ndaa carros ni má motos. Maski ajndu kúwá tikhuun a̱ngiu̱lú, mú ndáwaa mbáa bi̱ magajnúʼ gátaraʼa gajmuʼ, ikha jngóo nguáná nagájnuʼ mbáwun. Timbá gu̱nʼ dí nixtáá ikhí niʼniuʼ gakhi̱i̱ numuu dí ndiʼñíín bi̱ kúwá náa goʼwóʼ ga̱jma̱a̱ bi̱ nambájxu̱ʼ gajmíi̱n. Xúgíʼ mbruʼun nambiyaʼ ga̱jma̱a̱ nayejxi̱ mekhuíí mu mba̱ñu̱u̱n a̱ʼgua̱a̱n, asndu nindoʼ maniʼñúuʼ asignación ndrígóʼ mu maʼgáaʼ goʼwóo.

Índo̱ niku̱mu̱ʼ dí xtáá mbáwún, ni̱thu̱u̱n Jeobá xóo ku̱mu̱ʼ, nani marmáʼán a̱jkiu̱nʼ dí naguxnuu náa Biblia ga̱jma̱a̱ náa tikhu i̱yi̱i̱ʼ dí ma̱ndoo maxnúʼ tsiaki̱i̱. Nindxa̱ʼwáminaʼ dí naʼthí náa Salmo 19:14 ga̱jma̱a̱ nijkhánú ndi̱yo̱o̱ dí Jeobá mani̱ndxu̱u̱ “Itsí mba̱a̱ ndrígóʼ ga̱jma̱a̱ bi̱ Naʼtsiríñu̱u̱nʼ” á mu ikhúún nandxa̱ʼwa̱mínáʼ dí ikhaa naniguuʼ, xóo dí niʼniwíi ga̱jma̱a̱ xóo nindxu̱u̱. Mbá artículo dí nigájnuu náa La Atalaya, dí kayá edxu̱u̱ “Usted nunca está solo”,a nimbáyuʼ wéñuuʼ, numuu dí índo̱ nixtáá mbáwún, Jeobá nixtáa ga̱jma̱a̱ nindxu̱ʼ ga̱jma̱a̱ nijmuʼ mbiʼi rígi̱ mu matakáñuu, mu manigajma̱a̱ ma̱ngaa mandxaʼwáminaʼ dí naguxnuu.

Xóó tséʼni mbayuʼ dí nijkhánú náa Coron índo̱ nithu̱nʼ dí mani̱ndxu̱ʼ anciano. Numuu dí i̱ndó ikhúún nindxu̱ʼ anciano ikhí, ikha jngóo ndiyóoʼ mayéʼgá edxu̱u̱ náa Najuiʼsngáa Miʼtáraʼa Májánʼ, náa Najmañulúʼ xú Miʼni Kuduun Ñajunʼ Dios, náa Najmañulú ga̱jma̱a̱ numuu Biblia náa Congregación, ga̱jma̱a̱ náa nuʼnigajmaa revista Bi̱ Nayejngoo ma̱ngaa mámbá semana ndayóoʼ maxna discurso público. Mú rígi̱ nimbáyúʼ dí ajndu nánguá niwaphún maku̱mu̱ʼ dí xtáá mbáwún

Ra̱ʼkhá tháán mitsaanʼ dí marataráʼa náa Coron, tikhuun bi̱ nasngún ikhí ga̱jma̱a̱ Biblia nijngún iyááʼ. Mú nirígá tikhuu dí niʼniuʼ gakhi̱i̱ mbá xkri̱da, mu magajnúʼ mataráʼaʼ nagájnuʼ asndu nákhá miʼcha̱ ga̱jma̱a̱ na̱jkhánú asndu wakhaʼ ma̱ngaa asndu na̱nguá eyoo náa gáguanúʼ migú índo̱ gáʼgánú ikhí. Congregación ma̱ngaa kaʼyoo maʼtáraʼa náa mbaʼa islas ma̱jkha̱ʼ, mu maguánuxu ikhí, ndayóoʼ mu̱ʼgua̱ ga̱jma̱a̱ lancha, maski ajndu lamáa nambujxu̱u̱ wéñuuʼ ga̱jma̱a̱ ikhúún tséjmún gáʼgá náa iyáʼ, mú Jeobá niñewu̱nʼ ga̱jma̱a̱ nimbáyuʼ. Ga̱jma̱a̱ nda̱wa̱á ndi̱yo̱o̱ dí ikhaa xtáa raʼni rathúún mu xúʼko̱ manimbánuu i̱mba̱ ñajunʼ dí gákhánúʼ náa maraʼnuu dí itháán mingíjyúuʼ.

XUAJEN PAPÚA NUEVA GUINEA

Nákhá 1978 nixuʼmún maʼgá náa xuajen Papúa Nueva Guinea, dí naguanú xígi̱ náa norte ndrígóo Australia. Papúa Nueva Guinea mbá xuajen rí mba̱a̱ xóo España ga̱jma̱a̱ rígá wéñuuʼ kúbá, maski ajndu kúwá mbá ajtsú millón xa̱bu̱, ikhí nuthi itháán dí 800 ajngáa, mú ra̱ʼkhá tháán májánʼ dí itháán má mbaʼin xa̱bu̱ bi̱ nuthi ajngáa pidgin náa Nueva Guinea, dí ma̱ngaa nagumbiʼyuu tok pisin.

Ginii kayuuʼ nixuʼmún maʼgá náa mbá congregación dí nuthi inglés náa capital ndrígóo xuajen dí mbiʼyuu Port Moresby, mu tájyúuʼ má mbayuʼ ikhí numuu dí nda̱wa̱á nixuʼmún maʼgá náa congregación dí nuthi ajngáa tok pisin ga̱jma̱a̱ nigíʼdúu ninigajma̱a̱ ajngáa rígi̱. Xúgíʼ dí xtáá rajmañuʼ najmuʼ náa nataráʼa ga̱jma̱a̱ rígi̱ nimbáyuʼ mu majmañuʼ itháán nacha̱. Tájyúuʼ má mba̱yu̱u̱ʼ índo̱ nijmúún nixna̱ discurso público náa ajngáa tok pisin. Ajndu xóó tséʼni mbá tsiguʼ dí xtáá náa Nueva Guinea, índo̱ nithu̱nʼ dí mani̱ndxu̱ʼ superintendente ndrígóo circuito ga̱jma̱a̱ nixuʼmún maʼgá náa mbaʼa xuajen mba̱ʼu̱ náa rígá congregación dí a̱ngiu̱lú nuthi ajngáa tok pisin.

Mitsínguánʼ tri̱ga̱ mámbá congregación, ikha jngóo ndiyóoʼ dí marigá mbaʼa asamblea ndrígóo circuito ga̱jma̱a̱ na̱jkhá má xúʼko̱ náa mámbá xuajen. Nákhá wapháá niku̱mu̱ʼ dí mbáwún xtáá numuu dí na̱nguá e̱ya̱ náa xuajen ga̱jma̱a̱ na̱nguá e̱jma̱ñúʼ ma̱ta̱ ajngáa ma̱ngaa mixtiʼkhu xóo kúwá xa̱bu̱ ikhí. Numuu dí nindxu̱u̱ mbá xuajen dí rígá wéñuuʼ kúbá, ikha jngóo mu maʼgánú náa mbá congregación ndayóoʼ dí maʼgá ga̱jma̱a̱ avión, nguáná i̱ndó ikhúún ejkhá náa mbá avioneta dí nánguá má májánʼ wéñuuʼ, índo̱ na̱jkhá ikhí ra̱ʼkhá tháán namíñúʼ xó má índo̱ nijngruigo̱ʼ ga̱jma̱a̱ lancha.

Káaʼ nguéjmi̱i̱n xa̱bu̱ guáʼdáá teléfono, ikha jngóo ndayóoʼ makuʼma carta náa congregación mu matamínáʼ gajmí a̱ngiu̱lú. Nguáná itháán má wapháá ejkhánú ikhúún ki xóo carta rí nakuʼmá, ikha jngóo ndayóoʼ marajxu̱u̱n xa̱bu̱ bi̱ kúwá ikhí mu mba̱yo̱o̱ náa kúwá a̱ngiu̱lú. Índo̱ naxkami̱i̱n ra̱ʼkhá tháán májánʼ endrigún ga̱jma̱a̱ nusngájmuʼ dí ra̱ʼkhá tháán nandún kuyoʼ, rígi̱ naʼni marmáʼán a̱jkiu̱nʼ náá numuu dí na̱ni̱ xúgi̱ rígi̱. Ndi̱yo̱o̱ mbaʼa enii xóo Jeobá nimbáyuʼ ga̱jma̱a̱ rígi̱ niʼni maxtáá itháán mijngii náa ikhaa.

Náa timbá reunión dí nixtáá náa mbá isla dí mbiʼyuu Bougainville, niguwáʼ kanuu xa̱bu̱ gajmii bi̱ ra̱ʼkhá tháán nadxún ga̱jma̱a̱ nirajxu̱ʼ: “Lá narmáʼáan a̱jkia̱a̱nʼ xtayuxu rá”. Narmáʼáan a̱jkiu̱u̱n ka̱ñu̱u̱n numuu dí nitarúʼún nákhá ndiʼkhu̱ún nijkhánú náa xuajen Port Moresby, nisngúún ga̱jma̱a̱ numuu Biblia mbá nguáthá mbayuʼ, nda̱wa̱á ninigajma̱a̱ gajmiún i̱mba̱a̱ ndxájulú bi̱ xtáa ikhí. Rí xúgi̱ nijngún má iyááʼ, rígi̱ ninindxu̱u̱ mbá xóo nigumaʼ tsajkurámúúnʼ náa mbá ajtsú tsiguʼ rí nixtáá náa Papúa Nueva Guinea.

FAMILIOʼ NA̱NGUÁ MBAʼIN MÚ NIGUÁʼDÁÁ MBAʼA ÑAJUNʼ

Tsiguʼ 1978 nákhá xóó xtáá náa xuajen Coron, niniʼníiʼ mbáa ndxájulú bi̱ mbiʼyuu Adel, ikhaa ra̱ʼkhá tháán májánʼ a̱jkiu̱u̱n naniguuʼ maʼtáraʼa ga̱jma̱a̱ tséskoo. Ikhaa xtáa raʼni mba̱ji̱nʼ a̱jmi̱i̱n e̱ji̱i̱n bi̱ mbiʼyuu Samuel ga̱jma̱a̱ Shirley ma̱ngaa nañewu̱nʼ ru̱dúu̱ ga̱jma̱a̱ nindxu̱u̱ precursora regular. Nákhá mayo tsiguʼ 1981, ikhúún nitangu̱ún náa Filipinas mu maniʼgúnʼ gajmuʼ Adel, niguáʼdi̱i̱ ninindxu̱xuʼ precursores regulares ga̱jma̱a̱ niñewu̱u̱n bi̱ kúwá náa guʼwúxu.

Maski ajndu gúʼdiin familioʼ, mú nákhá 1983 nithu̱nʼ mbu̱júu̱ mani̱ndxu̱ʼ precursor especial, nixuʼmún maʼgá náa xuajen Linapacan, jmbayuuʼ Palawan. Maski ajndu nindxu̱u̱ mbá xuajen dí rígá mitsínguánʼ náa ndawi̱i̱n Testigos. Mú, ni̱jkuáxu xúgiáanʼ gákúwá ikhí. Índo̱ naʼni má xóo mbá tsiguʼ rí kúwá ikhí, ru̱dúu̱ Adel nikháñuu, mbá dí nimbáyuxu mu xákúwáxu ngíná nindxu̱u̱ dí mutaráʼaxu má xúʼko̱. Niguáʼdiin mbaʼin bi̱ nusngúún ga̱jma̱a̱ numuu Biblia bi̱ nandún magún reunión, ikha jngóo nijkuánuxu ndiya̱a̱ dí náa isla rúʼko̱ ndayóoʼ mbá guʼwá náa magimbáanʼ, ikhú niguáʼdi̱i̱ ninixu̱ mbá guʼwá chíʼgíiʼ. Ra̱ʼkhá tháán nidxu̱xu̱ índo̱ ndi̱ya̱xu̱ dí ndiʼkúú eʼni ajtsú tsiguʼ dí kuwaanʼ ikhí, mbá 110 xa̱bu̱ nikúwá náa conmemoración. Ma̱ngaa mbaʼin dí ikhiin nijngúun iyááʼ nda̱wa̱á dí ikháanʼxu̱ ni̱jkuá i̱mba̱ ni̱ʼkhá.

Nákhá 1986 nixuʼmún maʼgá náa isla dí mbiʼyuu Culion. Ikhí rígá mbá colonia dí kúwá xa̱bu̱ bi̱ kuáʼdáá nandii lepra, nda̱wa̱á Adel ma̱ngaa ninindxu̱u̱ precursora especial. Nákhá ndiʼkhún ni̱jkuánuxu namíñuxu mutaruʼun xa̱bu̱ bi̱ numíniiʼ ga̱jma̱a̱ numuu nandii lepra. Mú publicadores bi̱ kúwá ikhí, nituxu̱ dí xúgíinʼ xa̱bu̱ bi̱ kúwá náa colonia rígi̱, nindrigú thana ga̱jma̱a̱ dí na̱nguá má gamíi dí ikháanʼxu̱ maʼniuxu̱ nandii rígi̱. Tikhuun dí ikhiin nagún reunión náa goʼwóo mbáa ndxájulú. Mbá nacha̱ niguʼwunxu ga̱jma̱a̱ niniguxu̱ʼ muthu̱u̱n xúgíinʼ xa̱bu̱ bugi̱ dí eʼthí náa Biblia ga̱jma̱a̱ numuu rí kuáʼti̱i̱n marigá nda̱wa̱á, numuu dí ikhiin naku̱mu̱u̱n dí Dios tsíyoo gáʼñúún xó má enii xa̱bu̱. Ra̱ʼkhá tháán nadxuʼ índo̱ nda̱yo̱o̱ dí ikhiin nadxún índo̱ najmañún dí maʼga̱nú mbo̱o̱ mbiʼi dí ní xáʼniún nandii (Luc. 5:​12, 13).

Lá nigúʼwún e̱jñu̱xu̱ náa isla dí mbiʼyuu Culion ráʼ. Adel ga̱jma̱a̱ ikhúún ni̱thu̱u̱n maguwáʼ ga̱jma̱a̱ nindxu̱xu̱ a̱jmi̱i̱n a̱ngiu̱lú wáʼxaʼ bi̱ kúwá náa Coron mú xúʼko̱ e̱jñu̱xu̱ maguaʼdíin bi̱ mambájxuun gajmiún. A̱ngiu̱lú wáʼxaʼ ga̱jma̱a̱ Samuel ma̱ngaa Shirley nanigúúnʼ musngúún eʼwíinʼ dí gajkhun, ikhiin nusngúún mbaʼin e̱ji̱i̱n. Adel ga̱jma̱a̱ Ikhúún nusngúún anu̱ún e̱ji̱i̱n buʼko̱. Nijkuánuxu nisngúún mbá 11 familia, ga̱jma̱a̱ tséʼni má mbayuʼ dí ra̱ʼkhá tháán mbaʼin xa̱bu̱ nagún kanuu náa Jeobá, ikha jngóo nindoo nigi̱ʼi̱ i̱mba̱ nuxi̱ʼ congregación.

Nákhá ikhú, i̱ndó ikhúún nindxu̱ʼ anciano náa Culion, ikha jngóo Sucursal niʼthúnʼ dí mayéʼgá edxu̱u̱ náa reunión dí narígá mámbá semana náa Culion náa kúwá mbá migiñiiʼ publicadores ga̱jma̱a̱ xúʼko̱ má náa mbá xuajen dí mbiʼyuu Marily náa kúwá mbá mijna guwiinʼ publicadores. Mú muguánu náa Marily ndayóoʼ mu̱ʼguáxu mbá ajtsú hora ga̱jma̱a̱ barco. Nda̱wa̱á dí najngoo reunión, mbá xúgiáanʼ najkuáxu mitsínguánʼ mu mu̱ʼguáxu náa mbá xuajen dí mbiʼyuu Halsey.

Nda̱wa̱á mbaʼin xa̱bu̱ bi̱ kúwá náa Marily ga̱jma̱a̱ náa Halsey niguánu ninindxu̱ún Testigos, ikha jngóo ndiyóoʼ maguma Guʼwá náa magímbíin náa mbá nájmaan xuajen rúʼko̱. Xó má náa Linapacan, a̱ngiu̱lú ga̱jma̱a̱ xa̱bu̱ bi̱ nanigu̱u̱nʼ mudxawíín nixna mbaʼa dí mbaʼyóoʼ majmaa ga̱jma̱a̱ ikhiin niñajunʼ mu maguma guʼwá rígi̱. Guʼwá dí niguma náa Marily naʼngo̱o̱ nakúwá mbá 200 xa̱bu̱, ga̱jma̱a̱ ma̱ndoo maʼni itháán mba̱a̱ mu marigá asamblea ikhí.

NIMÍNÚUʼ, NIXTÁÁ MBÁWÚN GA̱JMA̱A̱ NDA̱WA̱Á NIXTÁÁ GAGI

Nákhá 1993 índo̱ e̱jñu̱xu̱ ninuuʼ má. Adel ga̱jma̱a̱ ikhúún niyambáá xóo circuito náa Filipinas. Nda̱wa̱á, dí tsiguʼ 2000 nithu̱nʼ maʼgá náa Escuela de Entrenamiento Ministerial mu musngoʼ mani̱ndxu̱u̱ instructor náa escuela rígi̱, ikhúún nikumu̱u̱ dí xájmúún gani ñajunʼ rígi̱, mú Adel nixnúʼ tsiaki̱i̱ ga̱jma̱a̱ naʼni marmáʼáan a̱jkiu̱nʼ dí Jeobá má gámbáyúʼ mu ma̱ni̱ ñajunʼ rígi̱ (Filip. 4:13). Adel ndiʼyoo dí Jeobá gajkhun mambáyuʼ numuu dí xúʼko̱ xtáa rambáyúu ikhaa, maski ajndu naʼniuu nandii mú naʼnimbánuu ñajunʼ rí nikhánaaʼ maʼni.

Tsiguʼ 2006, nákhá ikhúún nindxu̱ʼ instructor, Adel nitháán dí gíʼdoo párkinson, na̱nguá niguáʼthi̱i̱nxu dí marigá rígi̱. Ikhúún ni̱thu̱u̱n dí muniʼñááxu asignación ndrígúxu̱ mu muʼguáxu̱ náa guʼwúxu mu mañewu̱u̱n. Mú ikhaa niʼthúnʼ: “Mbá péñu atayáaʼ mbáa médico bi̱ maʼni thanuʼ, ga̱jma̱a̱ nda̱yo̱o̱ má dí Jeobá gámbáyulú muʼnimbáníí ñajunʼ ndrígúlú”. Mbá majun tsiguʼ xóó nixtáa Adel raʼni ñajuunʼ Jeobá, índo̱ nánguá nijmaa maʼga kruígo̱o̱, naʼtaraʼa ga̱jma̱a̱ silla de ruedas ga̱jma̱a̱ índo̱ nánguá nijmaa gaʼthí naxná comentario náa reunión maski ajndu káaʼ mbóó o a̱jma̱ ajngáa eʼthí. Adel nagruigú má xúʼko̱ mensaje ndrígu̱ún a̱ngiu̱lú náa nuxna̱a̱ núma̱aʼ ga̱jma̱a̱ numuu dí nagíʼ mbá májánʼ xkri̱da, asndu índo̱ nikháñuu nákhá tsiguʼ 2013. Índo̱ ikhaa nikháñuu nixtáá ngíná ga̱jma̱a̱ mbu̱júu̱ má niku̱mu̱ʼ dí xtáá mbáwún, numuu dí nixtáá gajmuʼ Adel itháán dí 30 tsiguʼ, ikhaa nindoo kaʼyoʼ ga̱jma̱a̱ nixtáa má xúʼko̱ ga̱jma̱a̱ nindxu̱ʼ.

Tániʼñúuʼ asignación ndrígóʼ xó má Adel nindoo ma̱ni̱. Nini̱ má xúʼko̱ ñajuunʼ Jeobá ga̱jma̱a̱ rígi̱ nimbáyuʼ mu xáku̱mu̱ʼ dí xtáá mbáwún. Asndu nákhá 2014 asndu 2017 nithu̱nʼ maʼgá gáñún a̱ngiu̱lú bi̱ kúwá náa congregación dí nuthi ajngáa tagalo náa xuajen dí tséniñuuʼ mutaraʼa. Nda̱wa̱á dí rúʼko̱ ni̱jkhá gáñu̱u̱n a̱ngiu̱lú bi̱ kúwá náa congregación dí rígá náa Taiwán, Estados Unidos ga̱jma̱a̱ Canadá bi̱ nuthi ikháá má ajngáa tagalo. Nákhá 2019, ninindxu̱ʼ instructor náa Najuiʼsngúún bi̱ Nutaraʼa numuu Reino, dí narígá náa ajngáa inglés náa India ga̱jma̱a̱ náa Tailandia. Ra̱ʼkhá tháán nidxu̱ʼ dí manimbánuu xúgíʼ ñajunʼ rígi̱, índo̱ itháán má xtáá rani̱ ñajuunʼ Jeobá itháán má xtáá gagi.

MAKUWÁ BI̱ MUMBAYÁAʼ

Náa mámbá xuajen dí ni̱jkhá rayambáá nigu̱ʼu̱nʼ nini a̱ngiu̱lú, ikha jngóo niʼniuʼ gakhi̱i̱ maniʼñúúnʼ, mú rígi̱ niʼsngóʼ maku̱mu̱u̱ ka̱yo̱o̱ kájxi̱ Jeobá, mbaʼa nuthu ndi̱yo̱o̱ xóo nimbáyuʼ ga̱jma̱a̱ rígi̱, niʼni dí xáni a̱jma̱ a̱jkiu̱nʼ magruígú i̱ʼwáʼ asignación dí nakhánúʼ. Rí xúgi̱ nayambáá xóo precursor especial náa Filipinas, naniguʼ congregación náa xtáá ga̱jma̱a̱ ikhiin niguánuʼ ninindxu̱u̱n xóo familioʼ bi̱ ra̱ʼkhá tháán nañewu̱nʼ ga̱jma̱a̱ nandún kuyoʼ. Nadxuʼ índo̱ nda̱yo̱o̱ dí Samuel ga̱jma̱a̱ Shirley nduyaridáá xkri̱da dí nigíʼ rudún (3 Juan 4).

Niraʼnuu mbaʼa gaʼkhu ga̱jma̱a̱ nimínuuʼ índo̱ ndi̱yo̱o̱ dí a̱ʼgiu̱ʼ niʼniuu nandii ga̱jma̱a̱ mañu mañúú ni̱jkha̱ rakáñuu. Ma̱ngaa ndiyóoʼ magu̱ʼu̱nʼ índo̱ nixtiʼkhuu xóo nixtáá. Mú ndi̱yo̱o̱ dí Jeobá “na̱nguá xtáa mitsínguánʼ náa mámbáa rí ikháanʼlu” (Hech. 17:27). “Ñawúunʼ Jeobá na̱nguá má chíʼmbaʼ” kayuuʼ mu xáʼngo̱o̱ gámbañún ga̱jma̱a̱ maxnún tsiaki̱i̱ xa̱bi̱i̱, maski ajndu kúwáanʼ náa mbá xuajen mitsínguánʼ (Is. 59:1). Ra̱ʼkhá tháán naxna̱a̱ núma̱aʼ Jeobá numuu dí ikhaa ninindxu̱u̱ Itsí mba̱a̱ ndrígóʼ, ma̱ngaa ga̱jma̱a̱ numuu dí ikhaa nixtáa ga̱jma̱a̱ nindxu̱ʼ. Nditháan na̱nguá nixtáa mbáwún.