Xánindxu̱lú mbáa xa̱bu̱ bi̱ naʼnimbamínáʼ o bi̱ naxmiéjunʼ kaʼyaminaʼ i̱ndó ikhaa

LÁ NATAYÁÁ mangáanʼ dí mbaʼin xa̱bu̱ bi̱ kúwá rí mbiʼi xúgi̱ i̱ndó ikhiin nandún rí mbiʼyamajkhúún ga̱jma̱a̱ makánún ñajunʼ mba̱ʼu̱ muni̱ ráʼ. Tséʼniuu á mu guaʼdáá má, nandún mbiʼyamajkhúún itháán ga̱jma̱a̱ makánún itháán ñajunʼ. Ikháanʼ rígi̱ tséʼniulú tsiánguá numuu dí náa Biblia má niʼtáriyaʼ rí índo̱ gaʼni iwáá mbiʼi xa̱bu̱ i̱ndó maʼndún kuyamíjna̱ ikhiin ga̱jma̱a̱ xúxnáá núma̱aʼ (2 Tim. 3:2).

Rígi̱ asndu nákhá wajyúuʼ má nirígá. Adán ga̱jma̱a̱ Eva nikumu̱ún dí ikhiin mangiin kaʼñún mbuyáá ndiéjunʼ nindxu̱u̱ rí májánʼ ga̱jma̱a̱ dí ra̱májánʼ, mú ga̱jma̱a̱ numuu dí ikhiin nini̱ xígi̱ kaʼnii asndu mangáanʼ kuwáánʼlú rumíniiʼ dí mbiʼi xúgi̱. Tsiguʼ nda̱wa̱á rey Uzías bi̱ nixtáa raʼtáñajunʼ náa Judá ma̱ngaa nikumu̱u̱ dí kaʼyoo matsikhá rí ndataun náa guwáʼ rí nduyamajkuíí Dios, maski má ikhaa na̱nguá kaʼyoo maʼni rúʼko̱ (2 Crón. 26:18, 19). Xúʼko̱ má nini fariseos ga̱jma̱a̱ saduceos, ikhiin nikumu̱ún dí numuu rí nindxu̱ún e̱ji̱i̱n Abrahán, Dios mbaʼya ngajui̱i̱n itháán (Mat. 3:9).

Ikháanʼ mangáanʼ gamíi muguánu manindxu̱lú mbáa xa̱bu̱ bi̱ i̱ndó naxmiéjunʼ kaʼyaminaʼ ikhaa ga̱jma̱a̱ mbáa xa̱bu̱ bi̱ naʼnimbamínáʼ, numuu rí xa̱bu̱ bi̱ kúwá náa numbaaʼ rí kuwanlú xúʼko̱ kaʼnii nindxu̱ún (Gál. 5:26). Gamíi muguáʼdi̱i̱ mundxa̱ʼwa̱míjna̱ dí índo̱ ikháanʼ kaʼyulú muʼni ñajunʼ dí gíʼdoo numuu o rí xa̱bu̱ gíʼmaa mbuyamajkulú. Mú, ndiéjunʼ guʼni mu xáguanú manindxu̱lú xúʼko̱ kaʼnii rá. Dí ginii gíʼmaa muʼni nindxu̱u̱ dí makru̱ʼu̱lú xú káʼnii eʼyoo Jeobá xúgíʼ rígi̱ ma̱ngaa mbuyáá a̱jma̱ ikha rí na̱ʼkha̱ náa Biblia.

Jeobá nindxu̱u̱ bi̱ kaʼyoo maraʼwíí ndiéjunʼ rí mudrígúlú. Guʼyáá tikhuu xkri̱da.

Náa mbá guʼwíin xa̱bu̱, Jeobá nandoo rí a̱ʼgu̱ nikhi̱i̱ mbaʼyamajkuu ajmbio̱o̱, xúʼko̱ má xa̱bu̱ nikhi̱i̱ gíʼmaa maʼndoo kaʼyoo a̱ʼgiu̱u̱ (Efes. 5:33). Xa̱bu̱ gajmii xáʼyóoʼ musngájma dí nanigiunʼ eʼwíinʼ. I̱ndó ndayóoʼ masngájma dí nanigiuʼ eʼni bi̱ ndiyáa (1 Cor. 7:3). E̱ji̱i̱n kaʼñún munimbu̱ún kuñún anu̱ún ga̱jma̱a̱ ru̱du̱ún. Xúʼko̱ má xabuanii kaʼñún muñewu̱u̱n e̱jñu̱ún ga̱jma̱a̱ maʼndún kuñún (2 Cor. 12:14; Efes. 6:2).
Náa Guʼwá nagimbáanʼ ndayóoʼ dí mbuʼyamajkún a̱ngiu̱lú bi̱ kuya̱ edxu̱u̱ numuu dí ikhiin nuñajunʼ gakhi̱i̱ ga̱jma̱a̱ numulú (1 Tes. 5:12). Mú, ikhiin na̱nguá kaʼñún muthún ndiéjunʼ ma̱ndoo muni̱ a̱ngiu̱lú (1 Ped. 5:2, 3).
Dios niniñuuʼ dí xa̱bu̱ ñajunʼ mundu̱ʼu̱u̱n mbújkha̱a̱ xa̱bu̱ xuajen. Ma̱ngaa dí mundu̱ʼu̱u̱n rí mbuyamajkún (Rom. 13:1, 6, 7).

Jeobá ra̱ʼkhá tháán eyoo kaʼyulú ga̱jma̱a̱ naxnúlú itháán dí ikháanʼ rakáʼyulú mundrígú. Ga̱jma̱a̱ numuu dí nindxu̱lú xa̱bu̱ aʼkhá, ikháanʼ i̱ndó rí kaʼyulú nindxu̱u̱ dí makhañúlúʼ (Rom. 6:23). Mú ga̱jma̱a̱ numuu dí Jeobá ra̱ʼkhá tháán eyoo kaʼyulú naxnúlú mbaʼa enii dí májánʼ (Sal. 103:10, 11). Xúgíʼ ñajunʼ rí nundrígúlú ga̱jma̱a̱ dí naguma tsajkurámáanʼ, nakánulú numuu dí Jeobá ra̱ʼkhá tháán eyoo kaʼyulú ga̱jma̱a̱ májáanʼ wéñuuʼ a̱jkiu̱u̱n, raʼkháa numuu dí kaʼyulú mundrígú (Rom. 12:6-8; Efes. 2:8).

NDIÉJUNʼ GUʼNI MU XÁNINDXU̱LÚ MBÁA XA̱BU̱ BI̱ I̱NDÓ NAXMIÉJUNʼ KAYAMÍNAʼ IKHAA O MBÁA BI̱ NAʼNIMBAMÍNÁʼ RÁ.

Xundxa̱ʼwa̱míjna̱ xóo eni̱ xa̱bu̱ numbaaʼ. Gamíi makumulú dí ikháanʼ kaʼyulú mudrigúu itháán ki xóo eʼwíinʼ. Mbá míʼtsú Jesús niʼthí mbá xkri̱da náa nasngájma dí gamíi muguánu mundxa̱ʼwa̱míjna̱ xúʼko̱. Niʼthí ga̱jma̱a̱ numuu mbáa xa̱bu̱ bi̱ gíʼdoo mbá mbaaʼ náa kiʼdu uva, bi̱ nindu̱ʼu̱u̱n tikhuun xa̱bu̱ dí muñajunʼ náa mbayuuʼ káñii mbiʼi ga̱jma̱a̱ maʼni numún mbá denario. Itháán nda̱wa̱á ni̱ʼkha̱ kagui̱i̱n eʼwíinʼ xa̱bu̱ bi̱ muñajunʼ. Tikhuun ka niñajunʼ mbá hora. Mú índo̱ niʼni kíná niʼni numún mbá xúgíinʼ ga̱jma̱a̱ mbá denario, bi̱ niguáʼdi̱i̱ niñajunʼ ajndu nákhá miʼcha̱, nikumu̱ún dí kaʼñún muda̱a̱ itháán mba̱a̱ numuu dí mbayuʼ niñajunʼ náa naʼni mijkha (Mat. 20:1-16). Ikhú Jesús niʼsngúún xa̱bi̱i̱ ga̱jma̱a̱ xkri̱da rígi̱ dí gíʼmaa maʼdxúún ga̱jma̱a̱ numuu dí Dios gáxnúún.

Náa xkri̱da dí niʼthí Jesús, tikhuun xa̱bu̱ bi̱ niñajunʼ, nakiʼníin kuyáá xa̱bu̱ bi̱ gíʼdoo mbá mbaaʼ náa kiʼdu uva. — Xa̱bu̱ bi̱ niñajunʼ káñii mbiʼi nikumu̱ún dí kaʼñún mudaaʼ itháán mba̱a̱.

Guxnáa núma̱aʼ ga̱jma̱a̱ xúguaʼthi̱i̱n makánulú itháán (1 Tes. 5:18). Guʼyaridáá apóstol Pablo, ikhaa tándu̱ʼu̱u̱n a̱ngiu̱lú bi̱ kúwá náa Corinto dí muxnáá dí ndayóo majmuu maski ajndu kaʼyoo má manda̱ʼa̱a̱ (1 Cor. 9:11-14). Gíʼmaa rí muxnáa núma̱aʼ ga̱jma̱a̱ numuu xúgíʼ rí eʼwíinʼ nuxnulúʼ ga̱jma̱a̱ xúguaʼthi̱i̱n dí muxnúlú itháán.

Apóstol Pablo xtáa raʼni mbá guʼwá xtiin gajmíi̱n a̱jmi̱i̱n xa̱bekha. — Apóstol Pablo tánda̱ʼa̱ dí muxnáá mbújkha̱a̱.

Ganindxu̱lú xa̱bu̱ wabaaʼ. Índo̱ mbáa naku̱mu̱u̱ dí ra̱ʼkhá tháán gíʼdoo numuu, na̱jkha̱nú nandxa̱ʼwáminaʼ dí kaʼyoo dí makhánaa itháán ki xóo dí gíʼdoo. Á mu nindxu̱lú xa̱bu̱ wabaaʼ xúndxaʼwamíjna xígi̱ kaʼnii.

Mbaʼa xtiʼkhuu: 1. Profeta Daniel índo̱ nikhi̱i̱ má. 2. Xuajen Babilonia. 3. Nakujmaa Daniel nákhá nindxu̱u̱ dxámá, ikhaa xtáa gajmíi̱n ajtsíin bi̱ nambájxu̱u̱ gajmíi̱n bi̱ nindxu̱ún hebreos. — Numuu dí Daniel ninindxu̱u̱ xa̱bu̱ wabaaʼ, ikha jngóo Jeobá ndiʼyoo dí gíʼdoo wéñuuʼ numuu.

Profeta Daniel nigíʼ mbá májánʼ xkri̱da xóo manindxu̱lú mbáa xa̱bu̱ wabaaʼ. Ikhaa mitsiʼyáa, familióo guáʼdáá numún, najmañuu ga̱jma̱a̱ mbaʼa dí najmaa naʼni. Ikha jngóo mbáa ikhaa ma̱ndoo mandxaʼwáminaʼ dí kaʼyoo má dí ikhaa muni̱i̱ dí májánʼ (Dan. 1:3, 4, 19, 20). Mú na̱nguá niʼni xúʼko̱, ikhaa ninindxu̱u̱ xa̱bu̱ wabaaʼ. Ikha jngóo Jeobá niʼthí dí nindxu̱u̱ mbáa xa̱bu̱ bi̱ gíʼdoo wéñuuʼ numuu (Dan. 2:30; 10:11, 12).

Xánindxu̱lú xóo xa̱bu̱ numbaaʼ bi̱ i̱ndó naxmiéjunʼ kuyamijná ikhiin ga̱jma̱a̱ nuni mbaʼwumíjna̱. Dí phú gíʼmaa muni̱ nindxu̱u̱ dí makuwáanʼ gagi ga̱jma̱a̱ numuu xúgíʼ rí Jeobá naxnúlú numuu dí májánʼ wéñuuʼ a̱jkiu̱u̱n.