Lá naʼnga̱a̱ʼ natayáá ndiéjunʼ dí nindxu̱u̱ gajkhun ráʼ.

1. Ndiéjunʼ ku̱ma̱a̱ ikháán ga̱jma̱a̱ numuu dí gajkhun rá.

BI̱ NINDXU̱LÚ xa̱bi̱i̱ Jeobá nandulúʼ kuʼyáá dí nindxu̱u̱ gajkhun, ikha jngóo xúgíʼ dí nuʼnimbulú na̱ʼkha̱ náa Ajngá rawuunʼ Dios (Rom. 10:17). Nduʼyáá gajkhun rí Jeobá nigíʼ congregación “rí nambáyúu ga̱jma̱a̱ wíji̱ kayóo rí gajkhun” (1 Tim. 3:15). Ga̱jma̱a̱ nuʼnimbulú kuʼñúún bi̱ nuyégún edxu̱u̱, numuu rí nusnguluʼ ga̱jma̱a̱ numuu Biblia ga̱jma̱a̱ nuxnulúʼ ikha dí nambáyulú muʼni ñajuunʼ Dios (Heb. 13:17).

2. Xó má eʼthí Santiago 5:​19, ndiéjunʼ gamíi mugíʼníí nda̱wa̱á dí nijmañulúʼ rí gajkhun rá.

² Maski ajndu nijmañulúʼ má rí gajkhun ga̱jma̱a̱ nduʼyáá dí ndayóoʼ muʼnimbulú ikha dí naxnúlú xuajñuu Dios, mú gamíi muʼni tsíngumíjnálú (atraxnuu Santiago 5:19). Gixa̱a̱ nandoo dí muniʼñáaʼ rí nuʼnimbulú dí na̱ʼkha̱ náa Biblia ga̱jma̱a̱ ikha rí naxnúlú xuajñuu Jeobá (Efes. 4:14).

3. Ndíjkha dí gíʼmaa muʼnimbulú dí nindxu̱u̱ gajkhun rá. (Efesios 6:​13, 14.)

³ (Atraxnuu Efesios 6:​13, 14). Inuu má Gixa̱a̱ maʼni nduwiinʼ xúgíinʼ xa̱bu̱ xuajin mu xúnimbu̱ún kuyáá Jeobá (Apoc. 16:​13, 14). Ma̱ngaa nduʼyáá rí Gixa̱a̱ maʼni tsiakiiminaʼ maʼni nduwiinʼ xa̱bi̱i̱ Jeobá (Apoc. 12:9). Ikha jngóo gíʼdoo wéñuuʼ numuu mbuʼyáá ndiéjunʼ nindxu̱u̱ dí gajkhun ga̱jma̱a̱ dí nduwaʼ, ga̱jma̱a̱ gíʼdoo muʼnimbulú náa rí gajkhun (Rom. 6:17; 1 Ped. 1:22). Rígi̱ gíʼdoo wéñuuʼ numuu muʼni, mu maguma káwáanʼ náa majphú mba̱a̱ gaʼkhu.

4. Ndiéjunʼ gúʼyáá náa artículo rígi̱ rá.

⁴ Náa artículo rígi̱ muʼthá ga̱jma̱a̱ numuu a̱jma̱ enii dí mambáyulú mu muniʼnuuʼ gajkhun dí na̱ʼkha̱ náa Biblia ga̱jma̱a̱ mu mundrígú ikha dí naxnúlú xuajñuu Jeobá. Ma̱ngaa mbuʼyáá ajtsú enii dí ndayóoʼ muʼni mu muʼnimbulú má xúʼko̱ náa dí nindxu̱u̱ gajkhun.

RÍ MAMBÁYULÚ MBUʼYÁÁ NDIÉJUNʼ NINDXU̱U̱ GAJKHUN

5. Xú káʼnii embáyulú rí mamiñulúʼ kuʼyáá Jeobá mu mbuʼyáá ndiéjunʼ nindxu̱u̱ rí gajkhun rá.

⁵ Rí mamiñulúʼ kuʼyáá Jeobá. Rí mamiñulúʼ kuʼyáá Jeobá nandoo gáʼthúu̱n dí ra̱ʼkhá tháán nandulúʼ kuʼyáá ga̱jma̱a̱ nditháan xúʼni̱ nimbá rí tsénigu̱u̱ʼ. Nandulúʼ mbuʼyáá ndiéjunʼ nindxu̱u̱ rí májánʼ ga̱jma̱a̱ dí ra̱májánʼ ma̱ngaa rí gajkhun ga̱jma̱a̱ dí nduwaʼ, mu Jeobá magruiguáanʼ (Prov. 2:​3-6; Heb. 5:14). Nditháan xúniʼñáʼ rí namíñulú kuʼyáá mbáa xa̱bu̱ mani̱ndxu̱u̱ itháán mba̱a̱ ki xóo rí nandulúʼ kuʼyáá Jeobá, numuu dí mbaʼa rí nanigu̱u̱nʼ xa̱bu̱ tsénigu̱u̱ʼ Jeobá.

6. Ndiéjunʼ nithi bi̱ mbá gu̱wi̱i̱nʼ bi̱ niyama ga̱jma̱a̱ numuu dí nimíñún kuñún xa̱bu̱ rá.

⁶ Á mu itháán má namíñulú kuʼñúún xa̱bu̱ numbaaʼ ki xóo Jeobá, gamíi maʼni dí muʼnimbulú nduwaʼ dí nuthi ga̱jma̱a̱ numuu gajkhun dí na̱ʼkha̱ náa ikhaa. Gundxaʼwamíjna̱ ga̱jma̱a̱ numún mbá 12 bi̱ niyama. Bi̱ nigún gúyáá ku̱ba̱ʼ dí Jeobá niʼthí maxnún israelitas. Mbá gu̱wi̱i̱nʼ dí ikhiin itháán má nimíñúún kuñúún cananeos ki xóo rí nindúún kuyáá Jeobá, ikha jngóo nithi: “Xándoo gútsimulú gúxmijná gajmiúlú xa̱bu̱ buʼko̱, numuu rí itháan xkujiinʼ ki xóo ikháánʼlú” (Núm. 13:​27-31). Gajkhun má dí cananeos itháán xkujiinʼ ki xóo israelitas, mú índo̱ nithi dí xáʼngu̱u̱n guxmijná gajmiún xa̱bu̱ sia̱nʼ, nimbumún kuyáá Jeobá. Ndiyóoʼ mundxaʼwamíjna̱ ndiéjunʼ nindxu̱u̱ rí Jeobá nindoo rí muni̱ israelitas, ma̱ngaa ndiyóoʼ marmáʼáan a̱jkiu̱ún rí niʼni ga̱jma̱a̱ numún nákhá wapháá, mu xúʼko̱ mbuyáá rí cananeos xáʼngu̱u̱n guni̱ gajmiún Bi̱ gíʼdoo xúgíʼ tsiaki̱i̱. Mú Josué ga̱jma̱a̱ Caleb ninindxu̱ún mixtiʼkuiin, ikhiin niguáʼdáá fe ga̱jma̱a̱ nindúún dí Dios magruiguíin, ikha jngóo nithúún xa̱bu̱ xuajin: “Á mu Jeobá nadxuu kaʼyulú, ikhaa maʼga kaguáánʼ náa ku̱ba̱ʼ rúʼko̱ ga̱jma̱a̱ maxnúlú” (Núm. 14:​6-9).

7. Ndiéjunʼ gúʼni mu rí namíñulú kuʼyáá Jeobá mani̱ndxu̱u̱ itháán mba̱a̱ rá. (Atayáá ma̱ngaa xtiʼkhu.)

⁷ Mbá rí mambáyulú mu mamiñulúʼ kuʼyáá itháán Jeobá, nindxu̱u̱ rí muʼni dí naniguuʼ náa mámbá dí gúraʼwíí muʼni (Sal. 16:8). Índo̱ gátra̱xnuu dí naʼthí náa Biblia atrajxi̱mínáʼ: “Á mu ikhúún xtáa ikhí, ndiéjunʼ gáraʼwíí ma̱ni̱ rá.” Mbá xkri̱da, atatsaʼwáminaʼ rí xtaa ratadxawíín dí nithi bi̱ mbá gu̱wi̱i̱nʼ israelitas bi̱ niyama, bi̱ nithi dí xáʼngu̱u̱n guxmijná gajmiún cananeos. Lá matanimbaaʼ dí nithi ga̱jma̱a̱ mamiñáʼ xtañún xa̱bu̱ ráʼ. O itháán nandaaʼ xtaʼyáá Jeobá ga̱jma̱a̱ nandaaʼ matani̱ rí ikhaa nandoo nindxu̱u̱ itháán mba̱a̱ dxe̱ʼ. Xúgíinʼ xa̱bu̱ israelitas táʼngu̱u̱n gúyáá dí Caleb ga̱jma̱a̱ Josué nithi dí gajkhun. Ndiéjunʼ nirígá rá. Táta̱ʼa̱án náa ku̱ba̱ʼ dí Jeobá nikuʼmaminaʼ maxnún (Núm. 14:​10, 22, 23).

8. Xú káʼni xa̱bu̱ gíʼmaa manindxu̱lú ga̱jma̱a̱ náá numuu rá.

⁸ Rí manindxu̱lú xa̱bu̱ guabaaʼ. Jeobá nasngájmúún mbuyáá dí gajkhun bi̱ nindxu̱ún xa̱bu̱ guabiinʼ (Mat. 11:25). Ganindxu̱lú xa̱bu̱ guabaaʼ, guniʼñááʼ rí eʼwíinʼ mumbayulúʼ mu majmañulúʼ dí gajkhun (Hech. 8:​30, 31). Maski ajndu xúʼko̱, ndayóoʼ muñeumíjna̱lú mú xúʼni̱ mbaʼumíjna̱. Á mu nu̱ʼni̱ mbaʼumíjna̱, gamíi mundxaʼwamíjná rí nuʼthá ikháán nindxu̱u̱ májánʼ, xó má ikha dí na̱ʼkha̱ náa Biblia ga̱jma̱a̱ ikha dí nakánulú náa xuajñuu Jeobá.

9. Ndiéjunʼ gámbáyulú mu manindxu̱lú má xúʼko̱ xa̱bu̱ guabaaʼ rá.

⁹ Mu manindxu̱lú má xúʼko̱ xa̱bu̱ guabaaʼ ndayóoʼ marmáʼáan a̱jkiu̱lú rí Jeobá nindxu̱u̱ itháán mba̱a̱ ki xóo ikháánʼ (Sal. 8:​3, 4). Ma̱ngaa gíʼmaa muʼtákáñii rí mambáyulú mu manindxu̱lú xa̱bu̱ guabaaʼ ga̱jma̱a̱ muniʼñááʼ dí maʼsngulúʼ. Jeobá má gámbáyulú mu mbuʼyáá rí itháán gíʼdoo numuu dí nijmañulúʼ náa Biblia ga̱jma̱a̱ ikha dí naxnúlú náa xuajñuu ki xóo rí nundxaʼwamíjna̱ ikháánʼ. Índo̱ gátra̱xnuu Biblia atayáaʼ xú káʼnii Jeobá nasngájma dí nandoo dí manindxu̱lú xa̱bu̱ guabaaʼ, ikhaa tsénigu̱u̱ʼ rí muʼni mbaʼumíjna̱ o rí mbuʼyáá dí itháán kuáʼdáá numulú ikháánʼ. Ga̱jma̱a̱ atani̱ tsiakiiminaʼ mani̱ndxa̱a̱ʼ mbáa xa̱bu̱ guabaaʼ á mu nakánáá mbá ñajunʼ náa congregación, rí maʼni dí eʼwíinʼ mbuyáá dí xtaʼdáá numaaʼ.

GUʼNIMBULÚʼ MÁ XÚʼKO̱ RÍ NINDXU̱U̱ GAJKHUN

10. Tsíín nijmiuu Jeobá mu maxnún ikha xa̱bi̱i̱ rá.

¹⁰ Gákuma̱a̱ʼ xtayáá ikha dí naxná xuajñuu Jeobá. Nákhá wájyúuʼ, náa xuajin Israel, Jeobá nijmiuu Moisés ga̱jma̱a̱ nda̱wa̱á Josué mu maxnún ikha xuajñuu (Jos. 1:​16, 17). Jeobá niʼni tsajkurámiinʼ israelitas índo̱ ninimbu̱ún kuñún bi̱ ikhaa nigruiguíin. Mbayuʼ tsiguʼ nda̱wa̱á, índo̱ nigi̱ʼi̱i̱ congregación cristiana, Jeobá nijmiuu bi̱ mbá 12 apóstoles mu maxnún ikha a̱ngiu̱lú (Hech. 8:​14, 15). Itháán nda̱wa̱á nitri̱gi̱i̱n eʼwíinʼ bi̱ mbuya edxu̱u̱ náa bi̱ kúwá náa Jerusalén. Numuu dí a̱ngiu̱lú ninimbu̱u̱n má xúʼko̱ ikha dí nikhánúu náa xa̱bu̱ bi̱ niguájun jmbu náa Dios, ‹bi̱ nagimbíi̱n niʼni itháán gújkhúʼ fe ndrígu̱ún, ga̱jma̱a̱ ni̱jkha̱ raʼni itháán mbaʼin mámbá mbiʼi› (Hech. 16:​4, 5). Rí mbiʼi xúgi̱ Jeobá ma̱ngaa naʼni tsajkurámáánʼlú índo̱ nuʼnimbulú ikha dí naxniulúʼ náa xuajñuu. Mú, xú káʼnii xtáa índo̱ tséʼnimbulú kuʼñúún a̱ngiu̱lú bi̱ ikhaa nigruigi̱i̱n mu muyégun edxu̱u̱ rá. Mu mbuʼyáá, guʼyáá ndiéjunʼ nirígá índo̱ israelitas kúwá ragún mu mata̱ʼa̱án náa Ku̱ba̱ʼ dí ikhaa niʼthí maxnún.

11. Ndiéjunʼ nigíʼniin bi̱ túnimbu̱ún kuyáá Moisés bi̱ Jeobá nigíiʼ mu mayéʼga edxu̱u̱ rá. (Atayáá xtiʼkhu ma̱ngaa.)

¹¹ Índo̱ israelitas kúwá ragún náa kamba̱a̱ mu mata̱ʼa̱án náa Ku̱ba̱ʼ dí Jeobá niʼthí maxnún. Tikhuun xa̱bekha bi̱ guáʼdáá numún nigíʼdi̱i̱ nixuximi̱jna̱ náa inuu Moisés ga̱jma̱a̱ náa ñajunʼ dí Jeobá nixnún, nithi: “Xúgíinʼ xa̱bu̱ xuajin [raʼkháa i̱ndó Moisés] ni̱ndxu̱ún mikaʼwun, xúgíinʼ ikhiin, Jeobá xtáa náa majñu̱únʼ ikhiin” (Núm. 16:​1-3). Gajkhun má rí Jeobá ndaʼñún dí nindxúu̱n mikaʼwiin xúgíinʼ xa̱bu̱ xuajin, mú ikha nigíiʼ Moisés mu mayéʼga edxu̱u̱ (Núm. 16:28). Ikha jngóo, índo̱ nithi dí raʼkhí ga̱jma̱a̱ numuu Moisés, nikúwá ruthi dí raʼkhí ga̱jma̱a̱ numuu Jeobá. Na̱nguá ndiyáá dí Jeobá nindoo maʼni ga̱jma̱a̱ numún, ikhiin nindúún maguaʼdáá itháán numún náa xúgíinʼ xa̱bu̱. Jeobá niʼni gámbíin bi̱ kuya̱ edxu̱u̱ náa bi̱ nixuximi̱jna̱ náa ikhaa ga̱jma̱a̱ xúgíinʼ bi̱ nimbáñún ikhiin (Núm. 16:​30-35, 41, 49). Rí mbiʼi xúgi̱ nandoo nduʼyáá gajkhun dí Jeobá tségruiguíin bi̱ tsénimbu̱ún ikha dí naxnún náa xuajñuu.

12. Náá numuu ndayóoʼ makumulú kuʼyáá xuajñuu Jeobá rá.

¹² Rígá mbaʼa numuu dí gíʼmaa makumulú kuʼyáá má xúʼko̱ xuajñuu Jeobá. Índo̱ a̱ngiu̱lú bi̱ nuyegun edxu̱u̱, nduyáá dí rígá rí mbaʼyóoʼ maxtiʼkhuu, xóo tikhuu dí nuʼnimbulú, dí na̱ʼkha̱ náa Biblia o xóo eʼyamajkuíí Jeobá, ikhiin mbá nacha̱ nuriʼkhuu (Prov. 4:18). Nuni̱ rígi̱ numuu dí nandún muni̱ maʼdxuu a̱jkiu̱u̱n Jeobá, ma̱ngaa mu muraʼwíí dí muni̱ najmú Ajngá rawuunʼ Dios, ikhaa nindxu̱u̱ dí xúgiáanʼ bi̱ nindxu̱lú xa̱bi̱i̱ Jeobá ndayóoʼ muʼnimbulú.

13. Ndiéjunʼ nindxu̱u̱ “xkridóo ajngáa májánʼ” rá. Ga̱jma̱a̱ ndiéjunʼ gíʼmaa muʼni rá.

¹³ “Atayaridáá má xúʼko̱ xkridóo ajngáa májánʼ” (2 Tim. 1:13). Ndiéjunʼ nindxu̱u̱ “xkri̱dóo ajngáa májánʼ” rá. Nindxu̱u̱ kiʼsngáa dí na̱ʼkha̱ náa Biblia (Juan 17:17). Náa kiʼsngáa rígi̱ nindxu̱u̱ náa na̱ʼkha̱ xúgíʼ dí nuʼnimbulú. Xuajñuu Jeobá niʼsngúlú dí gíʼmaa mbuʼyaridáá májánʼ xkri̱doo ajngáa rúʼko̱, á mu nuʼni xúʼko̱ makuwáanʼlu májánʼ.

14. Xú káʼnii niniñaaʼ runimbu̱ún “xkridóo ajngáa májánʼ” tikhuun cristianos rá.

¹⁴ Ndiéjunʼ gárígá á mu nuniñááʼ ruʼnimbulú náa “xkridóo ajngáa májánʼ” rá. Guʼyáá rí nirígá nákhá siglo timbá. Tikhuun cristianos nithi mbá dí ragájkhun, dí mbiʼi ndrígóo Jeobá ni̱jkha̱nú má. Mbáa nirígá mbá carta náa na̱ʼkha̱ raʼthí ga̱jma̱a̱ numuu rúʼko̱, ga̱jma̱a̱ xa̱bu̱ nikumu̱ún rí apóstol Pablo niʼnirámáʼ. Túyáʼ mbuyáá itháán ga̱jma̱a̱ numuu rúʼko̱, tikhuun cristianos bi̱ kúwá náa Tesalónica ninimbu̱ún nduwaʼ rúʼko̱ ga̱jma̱a̱ nigíʼdi̱i̱ nithúún eʼwíinʼ. Tágumaa nduwiinʼ á mu nirmáʼáan a̱jkiu̱ún dí Pablo niʼsngúún nákhá nixtáa gajmii (2 Tes. 2:​1-5). Apóstol Pablo niʼthún dí ragíʼmaa munimbu̱ún xúgíʼ rí nudxa̱wíín. Ga̱jma̱a̱ mu xátanga̱a̱ maguáʼníí ikháá má, niʼthún ajngáa rígi̱ náa raga̱jma̱ carta dí niʼnirámáʼ: “Ikhúúnʼ Pablo, nanirámáʼ i̱yi̱i̱ʼ rígi̱ ga̱jma̱a̱ ñawúnʼ mu marajxáanʼla. Rígi̱ nasngájma xóo nindxu̱u̱ i̱yi̱i̱ʼ ndrígóʼ, xúgi̱ kaʼnii eniraʼmáʼ” (2 Tes. 3: 17).

15. Xú káʼni guñeumíjna̱ náa nduwaʼ rí nakujmaa dí nindxu̱u̱ gajkhun rá. Atagíʼ mbá xkri̱da. (Atayáá xtiʼkhuu ma̱ngaa).

¹⁵ Ndiéjunʼ eʼsngúlú ajngáa dí niʼnirámáʼ Pablo náa inún bi̱ tesalonicenses rá. Á mu nudxawíín mbá rí tsémbríguii ga̱jma̱a̱ dí nijmañulúʼ náa Biblia, gundxaʼwámíjná májánʼ ma̱ngaa guʼni ga̱jma̱a̱ tsumáá. Náa xuajin rí nákhá niʼníí nigumbiʼyuu Unión Soviética, xa̱bu̱ sia̱nʼ ndrígulú nini mbá carta, dí mbaʼin nikumu̱ún dí na̱ʼkha̱ náa Guʼwá dí phú na̱ʼkha̱ ikha, náa naʼthúún tikhuun a̱ngiu̱lú dí murawími̱jna̱ mu mugíiʼ i̱mba̱ nuxi̱ʼ grupo. Maski ajndu carta nakujmaa dí niniraʼmáʼ a̱ngiu̱lú. Mú a̱ngiu̱lú bi̱ nikumu̱ún kuyáá Jeobá tajngutíguíin náa tsáʼkhá, ndiyáá dí na̱ʼkha̱ raʼthí na̱nguá embríguíiʼ ga̱jma̱a̱ numuu dí nijmañún náa Biblia. Rí mbiʼi xúgi̱ xa̱bu̱ sia̱nʼ ndrígulú nguáná najmún Internet mu munijngraʼáanʼ ga̱jma̱a̱ mu muʼni wajimijna náa xuajñuu Dios. Ndayóoʼ muñeumíjna̱ mu ‹xúniʼñámíjná rí muni̱ nduwáánʼlú›, gíʼmaa mbuʼyáá á mu dí xúgíʼ dí nuʼdxawíín o dí nuraxnuu nambríguii ga̱jma̱a̱ gajkhun dí nijmañulúʼ náa Biblia (2 Tes. 2:2; 1 Juan 4:1).

16. Xó má eʼthí Romanos 16:​17, 18, ndiéjunʼ gíʼmaa muʼni á mu mbáa naniñuuʼ dí gajkhun rá.

¹⁶ Araxtaa mbóó gajmiáanʼ bi̱ nuguajún jmbu náa Jeobá. Dios nandoo dí muʼni ñajuunʼ ikhaa mbóó jnduʼ gajmiúlú a̱ngiu̱lú, ma̱ndoo muʼni rígi̱ á mu nuʼnimbulú náa rí gajkhun. Bi̱ nuni̱ tsíngumijná náa dí gajkhun, nuni̱ dí eʼwíinʼ bi̱ kúwá náa Guʼwá nagimbáanʼ muni̱ wajimijna mangiin, ikha jngóo Dios naʼthúlúʼ dí xambáxulú gajmiúlú ikhiin mu xúʼni̱ tsíngumijná náa dí gajkhun (atraxnuu Romanos 16:​17, 18).

17. Xú káʼnii embáyulú dí muʼnimbulú ga̱jma̱a̱ dí mbuʼyáá rí nindxu̱u̱ gajkhun rá.

¹⁷ Á mu nduʼyáá ndiéjunʼ nindxu̱u̱ dí gajkhun, ga̱jma̱a̱ nditháan tséniʼñááʼ, rúʼko̱ gáʼni dí xúʼni̱ tsíngumijná náa Jeobá ga̱jma̱a̱ xájkhá guabaaʼ fe ndrígulú (Efes. 4:​15, 16). Xúniʼñámíjná dí maguma nduwáánʼ ga̱jma̱a̱ kisngáa ndrígóo Gixa̱a̱ dí ragájkhun, Jeobá má gáñewunlúʼ índo̱ gárígá majphú mba̱a̱ gaʼkhu. Atanimba̱a̱ʼ má xúʼko̱ náa rí gajkhun ga̱jma̱a̱ “Dios bi̱ naxná rí tsímáá” maxtáa ga̱jma̱á nindxa̱a̱ʼ (Filip. 4:​8, 9).