Lá nariʼña̱a̱ dí nuʼtájkáan Jeobá rá.

1, 2. Ndíjkha dí nguáná nakumulú dí Jeobá na̱nguá eriʼña̱a̱ dí nuʼtajkháan rá.

“Gaʼdxaanʼ ga̱jma̱a̱ numuu Jeobá, ga̱jma̱a̱ ikhaa maxnáaʼ rí nandoo a̱jkia̱a̱nʼ” (Sal. 37:4). ¡Ra̱ʼkhá tháán mitsaanʼ dí nikudaminaʼ maʼni! Mú, lá rúʼko̱ eyoo gáʼthí dí Jeobá maxnúlú xúgíʼ dí nunda̱ʼa̱a̱lu ráʼ. Májánʼ gáʼni dí mundxaʼwamíjna̱ ga̱jma̱a̱ numuu graxe̱ rígi̱. Ndíjkha rá. Gundxaʼwamíjna̱ dí narígá rígi̱. Mbáa ndxájulú a̱ʼgu̱ naʼthúu̱n Jeobá dí nandoo maʼga̱ náa Najuiʼsngúún bi̱ Nutaraʼa numuu Reino, mú, nanújngoo tsiguʼ ga̱jma̱a̱ na̱nguá etháán maʼga̱. Mbáa ndxájulú dxámá bi̱ nandoo kháñuu wéñuuʼ naʼthúu̱n Jeobá dí nandoo maʼni thanuu mu xúʼko̱ ma̱ndoo maʼni itháan náa congregación, mú na̱nguá eʼni̱i̱ a̱jkiu̱u̱n. Tikhuun xabuanii nutajkháan mu aʼdiún maxtáa má xúʼko̱ náa gajkhun, mú ikhaa naraʼwíí maniñuuʼ.

² Mbáa ikháán nitanda̱ʼa̱a̱ Jeobá dí xóó na̱nguá exnáaʼ. Rúʼko̱ gáʼni matatsaʼwamínáʼ dí Jeobá nariʼña̱a̱ dí nutajkáan eʼwíinʼ mú na̱nguá eriʼña̱a̱ dí ikháán naratháán, o na̱nguá eriʼña̱a̱ numuu dí ikháán nitani̱ mbá dí raʼkhí. Mbáa ndxájulú bi̱ mbiʼyuu Janice nikumu̱u̱ xúʼko̱.b Ikhaa ga̱jma̱a̱ ajmbio̱o̱ nitháán Jeobá dí nandún magún Betel. Janice naʼthí: “Niku̱mu̱ʼ gajkhun dí xanújngoo má mbayuuʼ mbiʼi dí mundxaʼwuxu”. Mú ninújngoo mbayuuʼ igu̱nʼ ga̱jma̱a̱ mbayuuʼ tsiguʼ, na̱nguá nithúún magún. Ikhaa naʼthí: “Nixtáá ngíná ga̱jma̱a̱ na̱nguá ndi̱yo̱o̱ dí mani. Nirajximinaʼ ndiéjunʼ nikiéʼkhúnʼ náa inuu. Ikhúún ni̱thu̱u̱n Jeobá mbájmbu dí nindoʼ, mú na̱nguá nikro̱ʼo̱ʼ náa numuu dí xóó tsériʼña̱a̱”.

3. Ndiéjunʼ guʼyáá náa artículo rígi̱ rá.

³ Mbáa nguáná nurajximíjnalu á mu Jeobá naʼdxawuun dí nuʼtajkháan. Mbaʼin xa̱bi̱i̱ Dios bi̱ nikúwá nákha wajyúuʼ nirajximíjna̱ xúʼko̱ (Job 30:20; Sal. 22:2; Hab. 1:2). Ndiéjunʼ gámbáyáaʼ ma̱ta̱ya̱a̱ gajkhun dí Jeobá nariʼña̱a̱ dí nuʼtajkháan rá. (Sal. 65:2.) Mu muriʼña̱a̱ graxe̱ rúʼko̱, ginii guʼyáá ajtsú ku̱ma̱ rígi̱: 1) Ndiéjunʼ gándoo muguaʼthi̱i̱n náa Jeobá rá. 2) Ndiéjunʼ gíʼthu̱u̱n Jeobá náa ikháanʼlu rá. Ga̱jma̱a̱ 3) ndíjkha mbaʼyóoʼ muriʼkhu̱u̱ nguáná tikhu dí nunda̱ʼa̱ rá.

NDIÉJUNʼ GÁNDOO MUGUAʼTHI̱I̱N NÁA JEOBÁ RÁ.

4. Xó má naʼthí náa Jeremías 29:​12, ndiéjunʼ nikudaminaʼ maʼni Jeobá rá.

⁴ Jeobá nakudaminaʼ dí maʼdxawuun dí nuʼtákáñii (atraxnuu Jeremías 29:12).c Dios ndrígúlú nandoo kaʼñún xa̱bi̱i̱ ga̱jma̱a̱ maʼdxaun má xúʼko̱ dí nutajkháan (Sal. 10:17; 37:28). Mú, raʼkháa rúʼko̱ eyoo gáʼthí dí maxnúlú xúgíʼ dí nunda̱ʼa̱a̱. Mbáa mbaʼyóoʼ muguaʼthi̱i̱n asndu náa numbaaʼ nuxi̱ʼ mu Jeobá maxnúlú tikhu dí nunda̱ʼa̱a̱.

5. Ndiéjunʼ eʼyoo Jeobá índo̱ nariʼña̱a̱ dí nuʼtájkáan rá.

⁵ Jeobá ndaʼyoo ndiéjunʼ dí májánʼ gárígá dí ikhaa nandoo índo̱ nariʼña̱a̱ dí nuʼtajkháan (Is. 55:​8, 9). Mbá dí ikhaa nandoo nindxu̱u̱ dí náa tsu̱du̱u̱ Ku̱ba̱ʼ makuwá mbaʼin xabekha̱ ga̱jma̱a̱ gu̱ʼu̱ bi̱ munimbu̱ún dí ikhaa naʼtáñajunʼ ma̱ngaa dí makuwá gagi ga̱jma̱a̱ mbá kambájxu̱u̱n. Mú, Gixa̱a̱ niʼthí dí makuwáánʼ itháan májánʼ á mu ikháanʼ má eʼtáñajumijnálú (Gén. 3:​1-5). Mu Jeobá masngájma dí Gixa̱a̱ minduwaaʼ, niniñuuʼ dí xa̱bu̱ mutañajumijná, mú rúʼko̱ niʼni marigá wéñuuʼ xkujndu dí rígá mbiʼi xúgi̱ (Ecl. 8:9). Nduʼyáá dí mbiʼi xúgi̱ Jeobá xáʼnimbánuu xúgíʼ xkujndu rúʼko̱. Á mu naʼni, tikhuun ma̱ndoo mundxaʼwami̱jna̱ dí xa̱bu̱ numbaaʼ ma̱ndoo mutañajumijná májánʼ ga̱jma̱a̱ majmiin munimbánii xkujndu dí rígá náa numbaaʼ.

6. Ndíjkha gíʼdoo numuu mbuʼyáá gajkhun dí Jeobá nandoo kaʼyulú ga̱jma̱a̱ dí naʼni dí jmbu xá.

⁶ Mixtiʼkhu enii xóo eriʼña̱a̱ Jeobá ikháá dí nutajkháan. Mbá xkri̱da, índo̱ rey Ezequías nindoo kháñuu wéñuuʼ, nindo̱ʼo̱o̱ Jeobá dí mambáyúu maʼni̱i̱ a̱jkiu̱u̱n, Jeobá niʼni dí maʼni̱i̱ a̱jkiu̱u̱n (2 Rey. 20:​1-6). Mú índo̱ apóstol Pablo nindo̱ʼo̱o̱ dí marígúu náa “xuyuuʼ mbá tsuwanʼ”, mbáa ninindxu̱u̱ mbá nandii, mú Jeobá na̱nguá nirígúu (2 Cor. 12:​7-9). Garmáʼáan a̱jkiu̱lú dí nigíʼnuu apóstol Santiago ga̱jma̱a̱ Pedro. Rey Herodes nindoo magudíin mbá nájmi̱i̱n. Maski ajndu bi̱ nikúwá náa congregación nitajkháan ga̱jma̱a̱ numuu Pedro, mbáa nitajkháan ga̱jma̱a̱ numuu Santiago ma̱ngaa, Pedro nigumakríyáaʼ ga̱jma̱a̱ mbá milagro dí niʼni Jeobá, mú Santiago nixiyáa (Hech. 12:​1-11). Mbáa nurajximíjnalu, ndíjkha dí Jeobá niʼnikríyáaʼ Pedro mú Santiago na̱nguá rá. Maski ajndu náa Biblia na̱nguá eʼthí, mú nandoo nduʼyáá gajkhun dí Jeobá “nditháan tséʼni dí raʼkhí” ga̱jma̱a̱ dí nindoo kaʼyoo wéñuuʼ Pedro ga̱jma̱a̱ Santiago (Deut. 32:4; Apoc. 21:14).d Mbáa nguáná na̱nguá exti̱ʼña̱a̱ xó má eyulú ikháanʼ. Mú nditháan má na̱nguá exiéʼkhálu xú káʼnii eriʼña̱a̱ Jeobá, numuu dí nduʼyáá gajkhun dí nandoo kaʼyulú ga̱jma̱a̱ naʼni dí jmbu (Job 33:13).

7. Ndiéjunʼ dí tséʼnilu ga̱jma̱a̱ náá numuu rá.

⁷ Nuʼnimi̱jna̱ dí xúʼnimbríguíi xóo kuwáánʼ ikháanʼ ga̱jma̱a̱ xóo kúwá eʼwíinʼ. Mbá xkri̱da, mbáa ikháanʼ ninda̱ʼa̱a̱ mbájmbu Jeobá dí nandulúʼ mú ikhaa na̱nguá exnúlú. Nda̱wa̱á, na̱jkuánu nuʼdxawíín dí imba̱a̱ ninda̱ʼa̱ ikháá kayuʼ xó má ikháanʼ ga̱jma̱a̱ Jeobá niriʼñuu. Xúʼko̱ nigíʼnuu mbáa ndxájulú bi̱ mbiʼyuu Anna. Ajmbio̱o̱ bi̱ mbiʼyuu Matthew, gíʼdoo nandii cáncer, ikhaa niʼtákáñuu Jeobá mu maʼni̱i̱ a̱jkiu̱u̱n. Ma̱ngaa nákha ikhú, a̱jmi̱i̱n a̱ngiu̱lú gu̱ʼu̱ bi̱ guanii má, guaʼdáá nandii cancer, Anna niʼtákáñuu wéñuuʼ Jeobá ga̱jma̱a̱ numuu mbá nájtsíin. A̱ngiu̱lú gu̱ʼu̱ niʼni̱i̱ a̱jkiu̱ún, mú Matthew nikháñuu. Nákha ginii, Anna nirajximi̱na̱ʼ á mu Jeobá niyambáá mu maʼni̱i̱ a̱jkiu̱ún a̱ngiu̱lú gu̱ʼu̱, náá numuu dí tambáyúu ajmbio̱o̱ xá. Na̱nguá eʼyáá náá numuu dí a̱ngiu̱lú gu̱ʼu̱ niʼni̱i̱ a̱jkiu̱ún, mú rígá mbá dí nduʼyáá: Dí Jeobá marígú mbá kayuuʼ xúgíʼ dí naʼni mumíniiʼ ga̱jma̱a̱ dí raʼkhá tháán eyoo maʼni matujxi̱ín xa̱bi̱i̱ bi̱ nikháñúún (Job 14:15).

8. a) Xó má naʼthí náa Isaías 43:​2, ndiéjunʼ eʼni Jeobá mu mambáyulú rá. b) Xú káʼnii embáyulú dí nuʼtajkháan índo̱ nuraʼníí xkujndu dí gakhi̱i̱ rá. (Atayáá video Rí muʼtájkáan nambáyulú mu maʼngulú.)

⁸ Jeobá mambáyulúʼ má xúʼko̱. Anu̱lú Jeobá, nandoo kaʼyulú wéñuuʼ ga̱jma̱a̱ tsinígu̱u̱ʼ índo̱ ndaʼyoo dí numíníiʼ (Is. 63:9). Mú, na̱nguá eʼni káwáanʼ náa xúgíʼ xkujndu dí kuaʼdáá, dí náa Biblia naxná mbiʼyuu xóo mañu ga̱jma̱a̱ riʼyuu aguʼ (atraxnuu Isaías 43:2).e Ikhaa nakudaminaʼ dí mambáyulúʼ “muraʼníí” asndu xkáʼnii xkujndu ga̱jma̱a̱ xániñuuʼ dí nimbá maʼnigínáaʼlu kámuu. Ma̱ngaa, Jeobá naxnúlú tsiakii ndrígóo mu mambáyulúʼ maʼngulú (Luc. 11:13; Filip. 4:13). Ikha jngóo ma̱ndoo mbuʼyáá gajkhun dí ikhaa maxnúlú má xúʼko̱ dí ndayúlú mu maʼngulú ga̱jma̱a̱ dí muguajúnlu jmbu má xúʼko̱.f

DÍ JEOBÁ NAGI̱ʼTHU̱U̱N MUʼNILÚ IKHÁANʼ

9. Xó má egájnuri̱yo̱o̱ʼ náa Santiago 1:​6, 7, ndíjkha gíʼdoo numuu makumulú kuʼyáá dí gajkhun Jeobá mambáyulú rá.

⁹ Jeobá nagi̱ʼthu̱u̱n dí makumulú kuʼyáá ikhaa (Heb. 11:6). Mbáa nguáná nakumulú dí tsáʼkhá dí kuwáanʼ ruraʼníí nindxu̱u̱ ra̱ʼkhá tháán gakhi̱i̱ dí asndu makumulú rí Jeobá xambáyulúʼ. Mú náa Biblia naʼthúlú rí ga̱jma̱a̱ tsiakii ndrígóo Dios ma̱ndoo ‹matsimulúʼ náa mbá xtájtsí› (Sal. 18:29). Ikha jngóo xáʼyóoʼ muʼni a̱jma̱ a̱jkiu̱lú. Rí gíʼmaa muʼnilú nindxu̱u̱ rí muʼtájkáan ga̱jma̱a̱ xúgíʼ a̱jkiu̱lú ga̱jma̱a̱ gakumulú gajkhun dí Jeobá mariʼña̱a̱ rí muʼtájkáan (atraxnuu Santiago 1:​6, 7).

10. Atagíʼ mbá xkri̱da náa nasngájmaa ndiéjunʼ gándoo muʼnilú ikháanʼ nda̱wa̱á dí nuʼtájkáan.

¹⁰ Jeobá nagi̱ʼthu̱u̱n rí nda̱wa̱á dí nuʼtájkáan muʼnilú dí kaʼyoo muʼnilú ikháanʼ. Gundxaʼwámíjná ga̱jma̱a̱ numuu mbáa ndxájulú xa̱biya̱ bi̱ nandoo maʼga náa asamblea rí ndajyúuʼ ajtsú mbiʼi ga̱jma̱a̱ na̱ndo̱ʼo̱o̱ Jeobá dí mambáyúu mu magiʼdoo permiso náa nañajunʼ.Ndiéjunʼ gándoo maʼni Jeobá mu mariʼña̱a̱ dí niʼtájkáan xá. Mbáa maxnúu tsiakii mu maʼtámíjná ga̱jma̱a̱ jefe ndrígóo. Mú, ndxájulú ndayóoʼ maʼni dí kaʼyoo. Gíʼmaa maʼtáminaʼ ga̱jma̱a̱ jefe ndrígóo, mbáa asndu mbaʼyóoʼ maʼthúu̱n mbaʼa nuthu. Asndu ma̱ndoo maʼthúu̱n dí ma̱ndoo mariʼkhuu hora ndrígóo ga̱jma̱a̱ imba̱a̱ bi̱ nañajunʼ ga̱jma̱a̱. Ma̱ngaa á mu ndaʼyóoʼ ma̱ndoo maʼthúu̱n rí xtáa xawii dí xúni̱ numáá mbiʼi rúʼko̱.

11. Ndíjkha gíʼmaa muʼtájkáan má xúʼko̱ rá.

¹¹ Jeobá nagi̱ʼthu̱u̱n dí muʼtákáñii má xúʼko̱ ga̱jma̱a̱ numuu mbá rí naʼni maxmiéjunlú (1 Tes. 5:17). Jesús niʼni makru̱ʼu̱lú dí nguáná rí gúndaʼalú xáxtiʼña̱a̱ nacha̱ (Luc. 11:9). ¡Ikha jngóo xákanajkulú! Guʼtájkáan ga̱jma̱a̱ xúgíʼ a̱jkiu̱lú ga̱jma̱a̱ xúniʼñáʼ ruʼtájkáan (Luc. 18:​1-7). Índo̱ nuʼtájkáan mbaʼa nuthu ga̱jma̱a̱ numuu mbá rí naʼni maxmiéjunlú, kuwa̱án rusngajmáá Jeobá dí raʼkháa mbaʼ nunda̱ʼa̱ xuʼkhíinʼ, nunda̱ʼa̱ numuu rí nduʼyáá gajkhun rí ikhaa ma̱ndoo mambáyulú má.

NDÍJKHA NGUÁNÁ MBAʼYÓOʼ MURIʼKHU̱U̱ DÍ NUNDA̱ʼA̱LÚ RÁ.

12. a) Ndiéjunʼ gándoo murajximíjnalú ga̱jma̱a̱ náá numuu rá. b) Ndiéjunʼ gíʼmaa mbuʼyáá mu índo̱ gúʼtájkáan makujmaa dí guáʼdáá gamajkulú rá. (Atayáá náa kúgumaʼá “Lá nasngajmá índo̱ natajkáan rí ndayamajkhuu Jeobá ráʼ.”)

¹² Á mu na̱nguá edriʼgulúʼ rí ninda̱ʼa̱a̱ Jeobá, mbáa maʼni murajximíjnalú ajtsú graxe̱ rígi̱. Timbá: “Lá rí xtáá randa̱ʼa̱, nindxu̱u̱ itháan májánʼ ráʼ.” Nguáná ikháanʼ nakumulú rí nduʼyáá ndiéjunʼ nindxu̱u̱ rí itháan mambáyulú, mú mbáa rí kuwa̱án runda̱ʼa̱ xambáyulú mbayuuʼ. Mbáa kuwa̱án ruʼtájkáan mu mambánuu mbá xkujndu xó má eyulú ikháanʼ, mú, mbáa rígá imba̱a̱ núthu xóo ma̱ndoo magumambánúu itháan májánʼ. Mbáa nguáná rí nunda̱ʼa̱lú, na̱nguá embánii xóo rí nandoo Jeobá (1 Juan 5:14). Mbá xkri̱da gundxaʼwamíjna̱ ga̱jma̱a̱ numún xabuanii bi̱ niʼtálú náa kutriga̱ 1. Ikhiin ninda̱ʼa̱a̱ Jeobá dí aʼdiu̱ún maʼni má xúʼko̱ dí Dios nanigu̱u̱ʼ. Ma̱ndoo makumulú dí ninda̱ʼa̱ mbá dí májánʼ. Mú Jeobá tséʼni tsu̱da̱a̱ʼ rí mbáa maʼni ñajuunʼ. Ikhaa nandoo rí xúgíinʼ, asndu ejñulúʼ, mbuʼyamajkuíí numuu rí ikháanʼ nandulúʼ muʼni (Deut. 10:​12, 13; 30:​19, 20). Á mu xúʼko̱, ndiéjunʼ gándoo gunda̱ʼa̱a̱ xabuanii buʼko̱ Jeobá rá. Rí Jeobá mambáñun ikhiin, mu rí índo̱ gúsngúún aʼdiún maʼga̱nú asndu náa a̱jkiu̱u̱n mú xúʼko̱ ikhaa ma̱ndoo kaʼyoo Jeobá ga̱jma̱a̱ dí maʼndoo mambájxu̱u̱ ga̱jma̱a̱ (Prov. 22:6; Efes. 6:4).

13. Xó má eʼthí Hebreos 4:​16, nguáná embáyulú Jeobá rá.

¹³ Raga̱jma̱ graxe̱ nindxu̱u̱: “Lá ndaʼyoo Jeobá dí rígi̱ nindxu̱u̱ mbiʼi rí ma̱ndoo maxnúʼ rí na̱ndo̱ʼo̱o̱ ráʼ.” Mbáa nundxaʼwamíjna̱ dí ndayóoʼ maxtiʼña̱a̱ nacha̱ rí niʼtájkáan. Mú, Jeobá nindxu̱u̱ bi̱ ndaʼyoo nguáná nindxu̱u̱ itháan májánʼ mu mambáyulú (atraxnuu Hebreos 4:16). Á mu Jeobá tsériʼña̱a̱ nacha̱ dí nuʼtájkáan, ma̱ndoo makumulú dí ikhaa naʼtulúʼ rí “Nanguá”. Mú rí ikhaa nandoo gáʼtúlú nindxu̱u̱ dí “Xóó na̱nguá”. Gutangaánʼ mbuʼyáá xkridoo ndxáma bi̱ naʼtájkáan mu ní xándoo kháñún. Á mu Jeobá najmuu tsiakii ndrígóo mu maʼni thanuu, Gixa̱a̱ ma̱ndoo maʼthí rí ndxáma bugi̱ i̱ndó xtáa raʼni ñajuunʼ Jeobá numuu rí niʼni thanuu (Job 1:​9-11; 2:4). Mú Jeobá nigíʼ má mbiʼi mu maʼni gámbáa xúgíʼ nandii (Is. 33:24; Apoc. 21:​3, 4). Ikha jngóo, xúguaʼthi̱i̱n rí xúgi̱ Jeobá majmuu tsiakii ndrígóo mu maʼni thanulúʼ. Á mu xúʼko̱, ndiéjunʼ gándoo ma̱ndo̱ʼo̱o̱ Jeobá ndxáma bugi̱ rá. Dí maxnúu tsiakii ga̱jma̱a̱ rí maxtáa tsímáá mu xúʼko̱ ikhaa maʼni ñajuunʼ maski ajndu gíʼdoo nandii (Sal. 29:11).

14. Ndiéjunʼ eʼsngáa xkridoo Janice rá.

¹⁴ Narmáʼáan a̱jkia̱a̱nʼ eʼni Janice bi̱ niʼtájkáan mu maʼga náa Betel ráʼ. Ndiyóoʼ manújngoo witsu tsiguʼ mu makro̱ʼo̱o̱ xú káʼni Jeobá niriʼña̱a̱ rí niʼtájkáan. Ikhaa eʼthí: “Xúgíʼ mbiʼi rúʼko̱ Jeobá niʼni rathúún ga̱jma̱a̱ nimbáyúʼ mu mani̱ndxu̱ʼ itháan májánʼ xa̱bu̱. Mbá xkri̱da ndiyóoʼ maku̱mu̱ʼ ka̱yo̱o̱ itháan Jeobá, manigajmaa itháan májánʼ ga̱jma̱a̱ maxtáá gagi tséʼniuu asndu xkáʼnii má xtáá. Nda̱wa̱á Janice ga̱jma̱a̱ ajmbio̱o̱ nijuiʼthúún rí magún xóo circuito. Ikhaa narmáʼáan a̱jkiu̱u̱n: “Nda̱yo̱o̱ gajkhun rí Jeobá niriʼña̱a̱ xóo nitajkáan, mú ndiyóoʼ magúʼthu̱u̱n. Ndiyóoʼ manújngoo mbayuuʼ tsiguʼ mu mba̱yo̱o̱ rí mitsaanʼ wéñuuʼ xóo niriʼña̱a̱. Ra̱ʼkhá tháán exna̱a̱ núma̱aʼ numuu rí ikhaa nisngájmuʼ dí nandoo kaʼyoo ga̱jma̱a̱ nixnúʼ rí májánʼ.

15. Ndíjkha dí nguáná míjiánʼ gáʼni dí xúʼtajkáan má mbájmbu wéñuuʼ rá. (Atayáá ma̱ngaa xtiʼkhu.)

¹⁵ Ragajtsú graxe̱: “Lá rí natajkáan nindxu̱u̱ mbájmbu wéñuuʼ ráʼ.” Gajkhun má rí májánʼ nindxu̱u̱ rí mutajkáan mbájmbu, mú nguáná marigá dí xáʼyóoʼ muʼthá mbájmbu wéñuuʼ, mu ma̱ndoo mbuʼyáá ndiéjunʼ endoo Jeobá náa ikháánʼlú. Gundxaʼwámíjnálú ga̱jma̱a̱ numuu ndxájulú a̱ʼgu̱ bi̱ naʼtájkáan mu maʼga náa Najuiʼsngúún bi̱ Nutaraʼa numuu Reino. Ikhaa nandoo maʼga náa escuela rígi̱ mu mañajunʼ náa ndayóoʼ miʼtáraʼa itháán. Maski ajndu ikhaa ma̱ndoo maʼtájkáan ga̱jma̱a̱ numuu rígi̱, mú ndiéjunʼ i̱ʼwáʼ ma̱ndoo ma̱ndo̱ʼo̱o̱ Jeobá xá. Rí mambáyúu mbaʼyoo xú káʼni ma̱ndoo maʼtáraʼa itháan (Hech. 16:​9, 10). Nda̱wa̱á rí niguámbóo niʼtájkáan ma̱ndoo maʼni rí kaʼyoo ikhaa, ma̱ndoo marajxu̱u̱ superintendente ndrígóo circuito á mu ndañún precursores náa mbá congregación dí rígá mijngii. Ma̱ngaa ma̱ndoo maʼnirámáʼ náa Betel mu mbaʼyoo náa eñúunʼ mixtambáñún mu miʼtáraʼa itháan.g

16. Ndiéjunʼ rí nduʼyáá gajkhun rá.

¹⁶ Xó má niʼnigajmaa nángii, ma̱ndoo mbuʼyáá gajkhun rí índo̱ Jeobá gáriʼña̱a̱ rí guʼtájkáan maʼni ga̱jma̱a̱ ngajua ma̱ngaa maʼni rí májánʼ (Sal. 4:3; Is. 30:18). Mbáa nguáná xóo eriʼña̱a̱ ikhaa, tsénindxu̱u̱ xóo ikháanʼ kua̱ʼthi̱i̱nlú, mú ikhaa naʼdxawuun rí nuʼtájkáan. Nandoo kaʼyulú wéñuuʼ ga̱jma̱a̱ nditháan xániñulú (Sal. 9:10). Ikha jngóo, gákumulú kuʼyáá Jeobá “xúgíʼ mbiʼi” ma̱ngaa guʼtájkáan ga̱jma̱a̱ xúgi̱ a̱jkiu̱lú (Sal. 62:8).