Gakuwáánʼ má xúʼko̱ xawii ga̱jma̱a̱ mbiʼi ndrígóo Jeobá

1. Ndiéjunʼ gúʼni mu makáwáánʼ índo̱ gáʼkha̱ mbiʼi ndrígóo Jeobá rá.

BIBLIA najmuu ajngáa “mbiʼi ndrígóo Jeobá”, mu maʼthí ga̱jma̱a̱ numuu mbiʼi dí ikhaa maʼni gámbíin xa̱bu̱ sia̱nʼ ndrígióo ga̱jma̱a̱ maʼni kríyaaʼ xuajñuu. Nákha wajyúuʼ, Jeobá ninda̱ʼa̱a̱ cuenta tikhu xuajen (Is. 13:1, 6; Ezeq. 13:5; Sof. 1:8). Inu má magi̱ʼdu̱u̱ “Mbiʼi ndrígóo Jeobá”, magi̱ʼdu̱u̱ índo̱ gúni gámbáa Babilonia rí Mba̱a̱ ga̱jma̱a̱ mambá mbiʼi rúʼko̱ índo̱ magi̱ʼdu̱u̱ Armagedón. Mu ma̱ndoo muʼni káwúmijná náa “mbiʼi” rúʼko̱ gíʼmaa muʼni ratamíjná asndu nákhá má xúgi̱. Jesús niʼsngáa dí gíʼmaa “makuwáanʼ xawii” ma̱ngaa nandoo gáʼthúu̱n gíʼmaa makuwáanʼ má xúʼko̱ xawii ga̱jma̱a̱ numuu “majphú mba̱a̱ gaʼkhu”, rígi̱ nasngájma dí xúniʼñáánʼlú makuwáanʼ má xúʼko̱ xawii (Luc. 12:40; Mat. 24:21).

2. Ndíjkha dí gíʼdoo numuu muʼnigajmaa Timbá I̱yi̱i̱ʼ rí na̱jkha̱ inún Tesalonicenses rá.

² Náa Timbá I̱yi̱i̱ʼ rí na̱jkha̱ inún Tesalonicenses, apóstol Pablo nijmuu mbaʼa xkri̱da mu mambáñún cristianos mu makuwíin xawii índo̱ gáʼkha̱nú mbiʼi ndrígóo Jeobá. Pablo ndiʼyoo dí ndayóoʼ má xóó ma̱ʼkha̱ mbiʼi rígi̱ (2 Tes. 2:1-3). Mú, Pablo niʼthún di gíʼdoo wéñuuʼ numuu muniratamijná xóo ma mbiʼi rúʼko̱ inuu ma ma̱ʼkha̱. Mangáanʼ ma̱ndoo mbuyaridáá ajngáa rúʼko̱. Guʼyáálú ndiéjunʼ dí niʼthí, timbá, xú káʼnii gáʼkha̱ mbiʼi ndrígóo Jeobá, ragajma, tsíin xákáwíinʼ, ragajtsú, ndiéjunʼ ma̱ndoo muʼni mu makuwáanʼ ma xúʼko̱ xawii.

XÚ KÁʼNII GÁʼKHA̱ MBIʼI NDRÍGÓO JEOBÁ RÁ.

3. Ndíjkha nuʼthá di mbiʼi ndrígóo Jeobá ma̱ʼkha̱ xóo mbá kuʼwáʼ dí mbruʼun rá. (Atayáá xtiʼkhuu ma̱ngaa.)

³ “Xóo mbáa kuʼwáʼ rí mbruʼun” (1 Tes. 5:2). Pablo nijmuu ajtsú xkri̱da mu maʼthí xú káʼnii gáʼkha̱ mbiʼi ndrígóo Jeobá. Rígi̱ nindxu̱u̱ timbá. Xóo má mbáa kuʼwáʼ naʼni kúwáʼ mbá nacha̱ dí mbruʼun, índo̱ nimbáa tségiʼthu̱u̱n. Ikháá ma kayuuʼ mbiʼi ndrígóo Jeobá ma̱ʼkha̱ mbá nacha̱ ga̱jma̱a̱ mbaʼin xa̱bu̱ náa xúgíʼ numba xúguaʼthi̱i̱n. Mbáa asndu cristiano bi̱ phú gajkhun, maʼniún tsiánguá dí marigá xúgíʼ mbá nacha̱. Mú, ikháanʼ xáguma gámbáanʼ i̱ndó maguma gámbíin xa̱bu̱ bi̱ nuni̱ dí raʼkhí.

4. Ndíjkha nuʼthá di mbiʼi ndrígóo Jeobá nindxu̱u̱ xóo ga̱ʼkhu̱ rí naxnúu mbáa a̱ʼgu̱ bi̱ nacho̱o̱ magiʼdaa a̱ʼdióo rá.

⁴ “Xóo ga̱ʼkhu̱ rí naxnúu mbáa a̱ʼgu̱ bi̱ nacho̱o̱ magiʼdaa a̱ʼdióo” (1 Tes. 5:3). Mbáa a̱ʼgu̱ bi̱ nagi̱ʼthu̱u̱n magumaa a̱ʼdióo na̱nguá eʼyoo náa phú mbiʼi magumaa, mú, ikhaa ndaʼyoo má dí maʼga̱nú mbiʼi rúʼko̱ ga̱jma̱a̱ maʼni mbá mbiʼi rí tségi̱ʼtu̱u̱n, rí maxnuu ga̱ʼkhu̱ ga̱jma̱a̱ ikhaa xándoo marikhoo. Ikháá ma kayuuʼ maski ajndu na̱nguá eʼyáá náa mbiʼi ga̱jma̱a̱ náa hora gági̱ʼdu̱u̱ mbiʼi ndrígóo Jeobá, mu nduʼyáá gajkhun di ma̱ʼkha̱. Nduʼyáálú má gajkhun di ikhaa maʼnimbánuu mbá nacha̱ di niʼthí maʼni, ga̱jma̱a̱ xa̱bu̱ bi̱ nuni̱ dí raʼkhí xáguma káwíin.

5. Ndíjkha nuʼthá di mbiʼi ndrígóo Jeobá nindxu̱u̱ xóo di na̱jkha̱ rajtsiriga̱ rá.

⁵ Xóo di na̱jkha̱ rajtsiriga̱. Náa ragajtsú xkri̱da dí nijmuu Pablo na̱ʼkha̱ raʼthí mbu̱júu̱ ga̱jma̱a̱ numún bi̱ nuni̱ kuʼwáʼ rí mbruʼun, mú, dí xúgi̱ naʼthí wáa kayuuʼ mixtiʼkhu. Nakujmaa dí nambríguii mbiʼi ndrígóo Jeobá ga̱jmá dí wajtsiriga (1 Tes. 5:4). Mbáa bi̱ nuni̱ kuʼwáʼ ra̱ʼkhá tháán egíʼ edxu̱ún rí nuni̱, dí asndu na̱nguá ku̱mu̱ún xóo ejkha̱ hora, mbáa asndu na̱nguá eyááʼ xóo ejkha̱ raʼni miʼcha̱, ga̱jma̱a̱ dí mbiʼi maʼni rí makujmiin. Ikháá má kayuuʼ índo̱ gáʼkha̱ mbá ga̱ʼkhu̱ rí majphú mba̱a̱, makujmiin tsíin nindxu̱ún xa̱bu̱ bi̱ nuni̱ má xúʼko̱ dí na̱nguá nigu̱u̱ Dios. Ikháanʼ na̱nguá ni̱ndxu̱lú xúʼko̱ kaʼnii, ikháanʼ nusngajmá dí kuwáánʼ xawii índo̱ gáʼkha̱ mbiʼi ndrígóo Jeobá. Xú káʼnii rá. Nuʼni gáʼdu̱u̱n xúgíʼ dí na̱nguá nigu̱u̱ Jeobá ga̱jma̱a̱ nuʼni tsiakimijna muʼnilú “xúgíʼ enii rí májánʼ, rí jmbu ga̱jma̱a̱ rí gajkhun” (Efes. 5:8-12). Nda̱wa̱á Pablo najmuu a̱jma̱ xkri̱da dí naʼthí xú káʼnii nindxu̱ún bi̱ xákáwíinʼ náa mbiʼi ndrígóo Jeobá.

TSÍIN XÁKÁWÍINʼ NÁA MBIʼI NDRÍGÓO JEOBÁ RÁ.

6. Ndíjkha nuʼthá dí mbaʼin xa̱bu̱ nunuʼ rá. (1 Tesalonicenses 5:6, 7.)

⁶ “Bi̱ nunuʼ” (atraxnuu 1 Tesalonicenses 5:6, 7). Pablo niʼthí dí bi̱ xákáwíinʼ náa mbiʼi ndrígóo Jeobá nindxu̱ún xóo bi̱ nunuʼ. Índo̱ mbáa xa̱bu̱ naʼgu, na̱nguá eʼyoo ndiéjunʼ erígá náa xtáa o xú káʼnii enújngoo mbiʼi. Ikha jngóo na̱nguá eʼngu̱u̱n gúyáá índo̱ narígá mbá di gíʼdoo numuu. Ikhaa má kaʼyuuʼ erígá dí mbiʼi xúgi̱, mbaʼin xa̱bu̱ nindxu̱ún xó má bi̱ nunuʼ (Rom. 11:8). Na̱nguá enimbu̱ún dí xúgi̱ kuwáanʼ “náa iwáá mbiʼi” ga̱jma̱a̱ dí inuu ma̱ʼkha̱ majphú mba̱a̱ ga̱ʼkhu̱. Índo̱ naxtiʼkhuu xóo kuwáanʼ náa numbaaʼ rígi̱, tikhuun nandún mbuyáá ga̱jma̱a̱ numuu Reino, mu kúwíin mbaʼin bi̱ i̱ndó nandún munuʼ. Asndu kúwíin mbaʼin xa̱bu̱ dí nakumu̱ún má dí marigá mbá mbiʼi rí Dios manda̱ʼa̱a̱ cuenta, mú, nakumu̱ún dí ndayóoʼ má xóó (2 Ped. 3:3, 4). Mú ikháanʼlu nduʼyáá dí mámbá mbiʼi dí nanújngoo itháan gíʼdoo numuu dí xáguanúlú muʼnuʼ.

7. Ndíjkha nuʼthá dí xa̱bu̱ bi̱ Dios maʼni gámbíin nindxu̱ún xóo bi̱ najngi̱i̱n rá.

⁷ “Bi̱ najngi̱i̱n”. Pablo niʼni mbríguíi xa̱bu̱ bi̱ Dios maʼni gámbíin gajmíi̱nʼ bi̱ najngi̱i̱n. Mbáa xa̱bu̱ bi̱ najnga̱a̱, tségíiʼ a̱jkiu̱u̱n dí maratha̱a̱n ga̱jma̱a̱ nánguá ejma̱a̱ garaʼwíí májánʼ dí maʼni. Ikháá má kayuuʼ eni̱ xa̱bu̱ bi̱ ra̱míjíinʼ, na̱nguá egíiʼ a̱jkiu̱ún dí naʼthúún Dios ga̱jma̱a̱ nuraʼwi̱i̱ makuwíin xóo dí Dios na̱nguá nigu̱u̱, ikha jngóo ikhaa magudíin. Mú, apóstol Pablo naʼthúún cristianos dí gundxaʼwamíjna̱ xó má kaʼyoo, raʼkháa xóo eni̱ xa̱bu̱ najngi̱i̱n (1 Tes. 5:6). Mbá xa̱bu̱ bi̱ naʼnigajmaa̱ Biblia naʼthí, dí mbá xa̱bu̱ bi̱ nagíiʼ a̱jkiu̱u̱n nandxa̱ʼwáminaʼ májánʼ ga̱jma̱a̱ tséraʼwíí mbá nacha̱ rí maʼni. Mú, ndíjkha ndayóo’ manindxu̱lú xúʼko̱ kaʼnii rá. Numuu rí numbaaʼ rígi̱ nandoo dí muxuʼdámíjná náa política ga̱jma̱a̱ xóo endxaʼwamíjna̱ ikhiin. Mutsudáánʼ itháan mu muʼni xó má eʼni numbaaʼ, numuu dí na̱ʼkha̱ mijngii mbiʼi ndrígóo Jeobá. Mú, tséyóoʼ maxmiéjunlú mu mbuʼyáá xú káʼnii guriʼña̱a̱, numuu rí espíritu ndrígóo Dios maxnúlú tsímáá ga̱jma̱a̱ maʼni dí xájmulú ma̱ngaa mambáyúlú mu muraʼwíí májánʼ rí gúʼni (Luc. 12:11, 12).

NDIÉJUNʼ MA̱NDOO MUʼNI MU MAKUWÁANʼ MA XÚʼKO̱ XAWII RÁ.

8. Xó má eʼthí náa 1 Tesalonicenses 5:8, ndiéjunʼ eyulú mu makuwáanʼ xawii ga̱jma̱a̱ mundxaʼwamíjnalú má xúʼko̱ rí májánʼ rá. (Atayáá xtiʼkhuu ma̱ngaa.)

⁸ “Guʼgíʼ ajua̱nʼ rí mañewu̱u̱n tsuxtulú [...] ma̱ngaa gugrígulú casco”. Pablo niʼni mbríguáanʼlú xóo mbáa soldado bi̱ xtaa má xúʼko̱ xawii ga̱jma̱a̱ kagíʼ ajua̱nʼ rí mañewu̱u̱n (atraxnuu 1 Tesalonicenses 5:8). Índo̱ narígá guerra, mbáa soldado gíʼmaa maxtáá má xúʼko̱ xawii, ikhaa má kayuuʼ gíʼmaa muʼnilú mangáán. Nusngajma rí kuwáanʼ xawii náa mbiʼi ndrígóo Jeobá índo̱ nuʼgíʼ ajua̱nʼ rí nañewu̱u̱n tsuxtulú rí nindxu̱u̱ fe ga̱jma̱a̱ ngajua ma̱ngaa nugrígúlú casco rí kua̱ʼthi̱i̱n. Rígi̱ nindxu̱u̱ tikhuu cualidades dí ma̱ndoo mambáyulú.

9. Xú káʼnii eñewu̱nlú fe rá.

⁹ Ikháá xó má ajua̱nʼ nañewu̱u̱n a̱jkiu̱u̱n mbáa soldado, fe ga̱jma̱a̱ ngajua nañewu̱u̱n dí nakumulú. Cualidades rígi̱ nambáyulú mu muʼni má xúʼko̱ ñajuunʼ Jeobá ga̱jma̱a̱ mbuʼyaridáá Jesús. Núma̱aʼ má fe, nduʼyáálú gajkhun dí Jeobá naʼni tsajkurámíinʼ bi̱ nuni̱ tsiakimijna mbuyáaʼ (Heb. 11:6). Ma̱ngaa fe naxkajxáan’ mu muguajún jmbu náa bi̱ nayéjkha̱ edxu̱u̱ náa ikháanʼ, Jesús, tséʼñuu má ndiéjunʼ xkujndu nuraʼníí. Mu ma̱ndoo muʼni itháan gujkhuʼ fe ndrígulú ga̱jma̱a̱ maʼngulú muraʼníí xkujndu ndrígulú, guʼyarídúún a̱ngiu̱lú bi̱ niʼngu̱u̱n niguájun jmbu índo̱ nijuixkúún o índo̱ niguáʼdáá xkujndu ga̱jma̱a̱ numuu mbújkha̱a̱. Ma̱ngaa mu xánigulú muguáʼdáá wéñuuʼ mbújkha̱a̱ ga̱jma̱a̱ i̱ʼwáʼ, guʼyarídúún bi̱ nunimíjna̱ mu xúguáʼdáá itháan ga̱jma̱a̱ nugíʼ muni ginii ñajunʼ ndrígóo Dios.b

10. Xú káʼnii embáyulú dí nandulú kuʼyáá Dios mangiin xa̱bu̱ rá.

¹⁰ Ngajua gíʼdoo numuu mu xáguanúlú muʼnuʼ ga̱jma̱a̱ rí mundxaʼwamíjna̱ má xúʼko̱ dí májánʼ (Mat. 22:37-39). Mbá xkri̱da, dí nandulú kuʼyáá Dios nambáyulú mu muʼtáraʼa maski ajndu nuraʼníí xkujndu (2 Tim. 1:7, 8). Numuu rí nandulú kuʼñúún xa̱bu̱ bi̱ na̱nguá ku̱mu̱ún xó má ikháanʼ, nuʼnilú xúgíʼ xó má eʼngulú mu muʼtáruʼúún, asndu nuʼniraʼmáʼ carta náa inún o nuʼtáruʼúún ga̱jma̱a̱ teléfono. Nuguaʼthi̱i̱n dí maʼga̱nú mbóoʼ mbiʼi dí muriʼkhumijná ga̱jma̱a̱ dí muni̱ dí májánʼ (Ezeq. 18:27, 28).

11. Xú káʼnii embáyulú dí maʼndulú kuʼñúún a̱ngiu̱lú rá. (1 Tesalonicenses 5:11.)

¹¹ Ma̱ngaa nandulú kuʼñúún a̱ngiu̱lú, ikha jngóo nuxnámíjnálú tsiakii, ga̱jma̱a̱ numbayúmíjnálú (atraxnuu 1 Tesalonicenses 5:11). Ikháá má kayuuʼ xóo soldados bi̱ numbayúmíjná kaníkiin, gajkhun má dí mbáa soldado ma̱ndoo maʼni gawúunʼ i̱mba̱a̱ índo̱ nugi̱ʼdu̱u̱n, mu tseni gajuunʼ. Xúʼko̱ má mangáanʼ xúʼni gajuunʼ rí muʼni gawúúnʼ a̱ngiu̱lú ga̱jma̱a̱ xurtanga̱a̱ dí raʼkhí niniulúʼ (1 Tes. 5:13, 15). I̱mba̱ dí xóo nusngajmá dí nandulú kuʼñúún a̱ngiu̱lú nindxu̱u̱ dí mbuʼyamajkún bi̱ kuya̱ edxu̱u̱ náa nagimbáanʼ (1 Tes. 5:12). Gundxaʼwamíjna̱ ga̱jma̱a̱ numuu congregación ndrígóo Tesalónica, xóo tséʼni mbá tsiguʼ dí nigi̱ʼi̱ índo̱ Pablo niʼnirámáʼ carta náa inún. Mbáa asndu bi̱ nuyégún edxu̱u̱ na̱nguá ejmañún wéñuuʼ ga̱jma̱a̱ nini̱ dí raʼkhí mú ndiyóoʼ dí mbiʼyamajkhúún. Na̱ʼkha̱ má mijngii mbiʼi dí magi̱ʼdu̱u̱ majphú mba̱a̱ gaʼkhu, ikha jngóo itháán mbaʼyóoʼ dí mumbáyúmíjná náa bi̱ kuya̱ edxu̱u̱, numuu rí asndu mbáa ní xándoo mundrígúlú ikha dí na̱ʼkha̱ náa sucursal ga̱jma̱a̱ náa guʼwá dí phú na̱ʼkha̱ ikha. Ikha jngóo gíʼdoo numuu dí majmañulú maʼndulú kuʼñúún ga̱jma̱a̱ guʼyamajkún bi̱ nuyégún edxu̱u̱ náa nagimbáanʼ. Tséʼñuu má dí gárígá, gundxaʼwamíjna̱ má xúʼko̱ dí májánʼ ga̱jma̱a̱ xúʼyáá i̱ndó náa nakiéʼkúun. Itháán májánʼ dí muʼnilú nindxu̱u̱ dí mbuʼyáá dí Jeobá najmiuu Cristo mu maxnún ikha xa̱bu̱ bugi̱.

12. Xú káʼnii embáyulú rí kuáʼti̱i̱n marigá nda̱wa̱á rá.

¹² Xó má casco rí nambáyúu edxu̱u̱ mbá soldado, rí nuguaʼthi̱i̱n nda̱wa̱á nañewu̱u̱n xóo endxaʼwamíjna̱lú numuu rí nduʼyáá gajkhun dí ma̱ʼkha̱ rí nuguaʼthi̱i̱n, nduʼyáálú dí rígá náa numbaaʼ rígi̱ nda̱a̱ numuu (Filip. 3:8). Rí nuguaʼthi̱i̱n nda̱wa̱á naʼni maʼni a̱jkiu̱lú ga̱jma̱a̱ tséʼni rí maxmiéjunlú, rígi̱ nigíʼnun ndxájulú Wallace ga̱jma̱a̱ Laurinda, bi̱ kúwíin ruñambáá náa África. Mbáa nindáti̱ga̱a̱ anu̱u̱ imba̱a̱ nindáti̱ga̱a̱ ru̱dúu̱. Asndu tséʼni ajtsú xmáná ninújngoo rígi̱, nánguá nindoo matangi̱ín náa xuajñún ga̱jma̱a̱ numuu nandii COVID-19. Ikhaa niʼnirámáʼ: “Rí nagúʼtúu̱n magabiín bi̱ nikháñún nambáyuʼ wéñuʼ. Numuu rí naʼni mandxa̱ʼwa̱mínáʼ xú kaʼnii gúni̱ timbá mbiʼi dí magabi̱ín, raʼkháa xóo nimíniiʼ náa iwáá mbiʼi dí nikúwá náa numbaaʼ xkawiʼ rígi̱. Núma̱aʼ má ga̱jma̱a̱ numuu rígi̱, nambáyúʼ dí xáxtáá gíná wéñuʼ ga̱jma̱a̱ numuu dí nikháñún bi̱ nandoʼ ka̱ñu̱u̱n”.

13. Ndiéjunʼ ma̱ndoo muʼnilú mu Jeobá maxnúlú espíritu santo rá.

¹³ “Xúndijuíi̱ʼ agiuuʼ espíritu” (1 Tes. 5:19). Pablo nimbríguii espíritu santo ga̱jma̱a̱ mbá aguʼ dí kuaʼdáá. Núma̱aʼ má espíritu santo nuguaʼdáá mba̱a̱ gagi ga̱jma̱a̱ nandulú muʼni dí májánʼ ga̱jma̱a̱ kuaʼdáálú tsiakii mu muʼni ñajuunʼ Jeobá (Rom. 12:11). Ndiéjunʼ ma̱ndoo muʼnilú mu Jeobá maxnúlú espíritu santo ndrígóo rá. Gunda̱ʼa̱a̱lú, gúʼnigajma̱a̱ Ajngáa rawuunʼ ga̱jma̱a̱ gakuwáánʼ mbá kambájxu̱lú náa xuajñuu dí ikhaa nayéjkha̱ edxu̱u̱ ga̱jma̱a̱ xi̱ʼ kaʼwu ndrígóo. Á mu nuʼnilú rígi̱, mambáyulú muguaʼdáá “rí naxná espíritu santo” (Gál. 5:22, 23).

14. Ndiéjunʼ gíʼmaa muʼni gáʼdu̱u̱n á mu nandulú mundrígú espíritu santo ndrígóo Dios rá. (Atayáá xtiʼkhu ma̱ngaa.)

¹⁴ Jeobá naxnúlú espíritu santo ndrígóo, mú gíʼmaa muʼnilú tsu̱máá mu “xúndijuíi̱ʼ agiuuʼ espíritu”. Mu, Jeobá maxnúlú rígi̱, dí nuʼnilú ga̱jma̱a̱ dí nundxaʼwamíjna̱ gíʼmaa maʼni kaʼwu. Á mu nuniʼñáánʼ dí mba̱ja̱a̱ dí ra̱májánʼ náa nundxaʼwamíjna̱ ga̱jma̱a̱ nuʼnilú dí raʼkhí, rígi̱ maʼni dí mandáti̱gu̱lú espíritu santo ndrígóo (1 Tes. 4:7, 8). Ndiéjunʼ imbo̱o̱ ma̱ndoo muʼnilú rá. Pablo niʼthí: “Xúsngajmála rí tsémajkuala rí kiʼtáriyaʼ” (1 Tes. 5:20). Náa versículo rígi̱, ajngáa “kiʼtáriyaʼ” nandoo gáʼthúu̱n xúgíʼ ajngáa dí Dios naxnúlú ga̱jma̱a̱ espíritu ndrígóo. Xó má ajngáa ga̱jma̱a̱ numuu mbiʼi ndrígóo ga̱jma̱a̱ dí mijngii má e̱ʼkha̱. Ikháanʼlu na̱nguá endxaʼwamíjna̱ dí ndayóoʼ xóó ma̱ʼkha̱ mbiʼi ndrígóo Jeobá o dí ikháanʼlu xúʼyáá Armagedón. Dí itháán nuʼnilú nindxu̱u̱ dí nusngajmá dí nuguaʼthi̱i̱n mbiʼi rúʼko̱, dí inu má ma̱ʼkha̱, ikha jngóo nuñewa̱a̱n dí nuʼnilú ga̱jma̱a̱ nuʼni má xúʼko̱ “rí maxnúu gamajkhu Dios” xúgíʼ mbiʼi (2 Ped. 3:11, 12).

“GU̱YA̱A̱ Á MU XÚGÍʼ NINDXU̱U̱ GAJKHUN”

15. Ndiéjunʼ gíʼmaa muʼni mu nimbáa xáni nduwáánʼ rá. (1 Tesalonicenses 5:21.)

¹⁵ Ginuu má xa̱bu̱ sia̱nʼ ndrígóo Dios muthi rí “¡Kuwáanʼlú tsímáá ga̱jma̱a̱ nándáa rí gúgíʼníí!” (1 Tes. 5:3). Mugi̱ʼdi̱i̱ muthi ajngáa minduwaʼ rí nindxu̱u̱ ajngáa rí nuthi xa̱bu̱ wéñiiʼ, rígi̱ maʼni nduwiinʼ xúgíinʼ xa̱bu̱ (Apoc. 16:13, 14). Ga̱jma̱a̱ ikháanʼlu rá. Lá muniʼñámíjná dí muni nduwáánʼlú xáʼ. Na̱nguá, á mu nuʼnimbáníí consejo rígi̱: “Gu̱ya̱a̱ á mu xúgíʼ nindxu̱u̱ gajkhun” (atraxnuu 1 Tesalonicenses 5:21). Ajngáa griega rí najmaa gi̱i̱, “gu̱ya̱a̱”. Nijmaa mu ma̱ndoo mbuyáá xa̱bu̱ á mu mbá itsí xóo oro o plata nindxu̱u̱ gajkhun. Ikháanʼlu gíʼmaa muʼnilú ikhaa má káyuuʼ, xóo dí nuraxnuu o dí nuʼdxawíín nindxu̱u̱ gajkhun. Gíʼdoo numuu rí bi̱ tesalonicenses muni rígi̱, mú itháán gíʼdoo numuu rí muʼnilú ikháanʼ ma̱ngaa, numuu dí na̱ʼkha̱ má mijngíí majphú mba̱a̱ gaʼkhu. Ragíʼmaa muʼnimbulú xúgíʼ rí nuthulu, itháán májánʼ rí muʼni nindxu̱u̱ dí mundxa̱ʼwa̱míjna̱ rí nuraxnuu, rí nuʼdxawíín ga̱jma̱a̱ guʼni mbríguii rí na̱ʼkha̱ raʼthí náa Biblia o rí naʼthí náa xuajñuu Jeobá. Á mu nuʼnilú xúʼko̱ kaʼnii nimbá ajngáa rí minduwaʼ rí nindxu̱u̱ ajngáa rí nuthi xa̱bu̱ wéñiiʼ muni nduwáanʼlú (Prov. 14:15; 1 Tim. 4:1).

16. a) Ndiéjunʼ rí mitsaanʼ kuáʼti̱i̱n nda̱wa̱á rá. b) Ndiéjunʼ gíʼmaa muʼnilú xúgi̱ rá.

¹⁶ Nduʼyáálú rí xuajñuu Jeobá makríya̱a̱ʼ náa majphú mba̱a̱ ga̱ʼkhu̱, mú tséʼyáálú rí gúgiʼníí gajtsíí mámbáa dí ikháanʼ (Sant. 4:14). Tséʼniuu á mu nanújngulú náa majphú mba̱a̱ gaʼkhu o nakháñulú ginii, Jeobá maʼni rí makuwáánʼlu kámuu mbiʼi á mu naguajún jmbu. Bi̱ kaxtaʼwíin magúun mekhuíí gajmiún Cristo, ga̱jma̱a̱ eʼwíinʼ mugu̱ makuwíin náa numbaaʼ nuxi̱ʼ gi̱i̱. Dí xúgi̱ rá. Gundxaʼwamíjna̱lú rí kuáʼti̱i̱n nda̱wa̱á ga̱jma̱a̱ gakuwáánʼ xawii mu ma̱ʼkha̱ mbiʼi ndrígóo Jeobá.