Xúʼni̱ tsíngumijná náa Jeobá maski ajndu eʼwíinʼ nuni̱ gawúnlú

1. Xú káʼnii eguma tsajkurámáanʼlu rí kuwáanʼ náa xuajñuu Jeobá rá.

¡RA̱ʼKHÁ tháán mitsaanʼ nindxu̱u̱ rí makuwáanʼ náa xuajñuu Jeobá! Maski ajndu kuwáanʼ náa iwáá mbiʼi rí naʼni mingíjyúuʼ, núma̱aʼ má Jeobá kuáʼdíin mbaʼin a̱ngiu̱lú (Sal. 133:1). Dios naxnúlú ikha rí nambáyulú makuwáanʼ gagi mbá guʼwáanʼ (Efes. 5:​33–6:1). Ikhaa naxnúlú ku̱ma̱ rí ndayúlú, mu muʼnimíjna̱ gajmiúlú rí naʼni makuwáanʼ ngíná ga̱jma̱a̱ xúʼko̱ makuwáanʼ gagi.

2. Ndiéjunʼ gíʼmaa muʼni, ga̱jma̱a̱ náá numuu rá.

² Maski asndu xúʼko̱ tsékanájkulú rí muʼni ñajuunʼ Jeobá, mbáa nguáná mbaʼyóoʼ muʼni tsiakimijna. Náá numuu rá. Rí nuni̱ o rí nuthi eʼwíinʼ maʼni gawúnlú ma̱ngaa rí majmáa a̱jkiu̱lú índo̱ nakiéʼkulu itháán á mu nakiéʼkulu mbaʼa nuthu. Náa artículo rígi̱ mambáyulú muʼni má xúʼko̱ ñajuunʼ Jeobá maski asndu nuraʼníí xóo rígi̱: 1) Índo̱ mbáa ndxájulú naʼni gawúnlú, 2) índo̱ ajmbiu̱lú o a̱ʼgiu̱lú naʼni gawúnlú, 3) índo̱ nuʼni gawumíjná má ikháanʼ. Mambá índo̱ gúʼyáá rígi̱, mbuʼyáá xú káʼnii gambáyulúʼ ga̱jma̱a̱ numún bi̱ na̱ʼkha̱ raʼthí náa Biblia.

ÍNDO̱ MBÁA NDXÁJULÚ NAʼNI RÍ MAKIʼNÁANʼLÚ

3. Ndiéjunʼ xkujndu eraʼníí xa̱bi̱i̱ Jeobá rá.

³ Xkujndu. Gajkhun má rí makuwíin a̱ngiu̱lú bi̱ muni̱ rí makiʼnáanʼlú. Eʼwíinʼ muni̱ gawúnlú, muthulú o muniulúʼ mbá rí tsékumulú. Mbáa nguáná a̱ngiu̱lú bi̱ kuya̱ edxu̱u̱ nakiéʼkúún. Xúgíʼ rígi̱ ma̱ndoo maʼni rí tikhuiin maʼni a̱jma̱ a̱jkiu̱ún, dí rígi̱ nindxu̱u̱ xuajñuu Jeobá. Rígi̱ gáʼni dí ‹muniñaaʼ runi̱ ñajuunʼ Jeobá mbá kambájxu̱u̱n› gajmiún a̱ngiu̱lú, ma̱ngaa muniña̱a̱nʼ rutamíjná gajmiún niʼni gawúúnʼ, mbáa asndu muniña̱a̱nʼ ragún reunión (Sof. 3:9). Lá májánʼ nindxu̱u̱ rúʼko̱ ráʼ. Mbuʼyáá ndiéjunʼ gándoo gajmañulú ga̱jma̱a̱ numuu mbáa xa̱bu̱ bi̱ na̱ʼkha̱ raʼthí náa Biblia bi̱ niraʼnuu xkujndu xóo rígi̱.

4. Ndiéjunʼ xkujndu niraʼnuu apóstol Pablo rá.

⁴ Xa̱bu̱ bi̱ na̱ʼkha̱ raʼthí náa Biblia. Apóstol Pablo ndiʼyoo májánʼ rí a̱ngui̱i̱n nakieʼkhúún. Mbá xkri̱da, índo̱ nigíʼdúu ni̱jkha̱ náa congregación dí rígá náa Jerusalén, mbaʼin dí ikhiin tsékumu̱ún kuyáá ga̱jma̱a̱ namíñúún kuyáá (Hech. 9:26). Nda̱wa̱á, mbaʼin dí ikhiin nithi dí raʼkhí ga̱jma̱a̱ numuu (2 Cor. 10:10). Pablo ndiʼyoo mbáa ndxájulú bi̱ gíʼdoo mbá ñajunʼ dí xtáa raraʼwíí maʼni, nindxu̱u̱ ra̱májánʼ ga̱jma̱a̱ maʼni majngrádiinʼ eʼwíinʼ (Gál. 2:​11, 12). Ma̱ngaa rí nixtáa ngíná wéñuuʼ niʼni Marcos, mbáa bi̱ itháán nambájxu májánʼ ga̱jma̱a̱ (Hech. 15:​37, 38). Pablo ma̱ndoo mandxaʼwáminaʼ dí májánʼ gaʼni rí maniñuuʼ rambájxu̱u̱ gajmíi̱n a̱ngiu̱lú bi̱ ninigawíínʼ ga̱jma̱a̱ rí maʼni tsínguminaʼ náa Jeobá. Rí phú niʼni ikhaa, nindoo kaʼñún má xúʼko̱ ga̱jma̱a̱ tániñuuʼ raʼni ñajuunʼ Jeobá. Ndiéjunʼ nimbáyúu xá.

5. Ndiéjunʼ nimbáyúu Pablo mu xáʼni tsínguminaʼ náa a̱ngui̱i̱n rá. (Colosenses 3:​13, 14; atayáá ma̱ngaa xtiʼkhuu.)

⁵ Pablo nindoo kaʼñún wéñuuʼ a̱ngui̱i̱n ikha jngóo na̱nguá ndiʼyoo náa nikiéʼkhun, i̱ndó náa cualidad rí ikhiin kuáʼdáá. Ngajua nimbáyúu mú maʼni mba̱a̱ a̱jkiu̱u̱n kaʼñún xóo má niʼnirámáʼ náa Colosenses 3:​13, 14 (atraxnuu). Mbá xkri̱da, lá niʼni mbánúu xkujndu ga̱jma̱a̱ Marcos xáʼ. Xúʼko̱. Maski ma Marcos niniñuuʼ índo̱ timbá miʼtsú xóo misioneros, mu Pablo na̱nguá nikiʼnáa kaʼyoo. Nda̱wa̱á niʼnirámáʼ mbóo carta nikuʼma maʼga̱ náa congregación dí rígá náa Colosas náa niʼthí dí Marcos nindxu̱u̱ mbáa bi̱ gíʼdoo numuu ga̱jma̱a̱ dí “ikhaa ni̱ndxu̱u̱ʼ bi̱ naʼni̱i̱ a̱jkiu̱u̱n” (Col. 4:​10, 11). Ma̱ngaa, índo̱ nixtáa náa guʼwá ejua̱a̱nʼ náa Roma ninda̱ʼa̱ rí Marcos maʼga̱ gámbáyúu (2 Tim. 4:11). Apóstol Pablo tániñuuʼ rambájxuʼ gajmíi̱n a̱ngui̱i̱n. Ndiéjunʼ eʼsngúlú xkri̱da ndrígóo xá.

6, 7. Ndiéjunʼ gámbáyulú mu maʼndulú kuʼñúún má xúʼkhíin a̱ngiu̱lú maski ajndu nakiéʼkúún xá. (1 Juan 4:7.)

⁶ Rí naʼsngúlú. Jeobá nandoo rí maʼndulú kuʼñúún má xúʼko̱ xúgíinʼ a̱ngiu̱lú (atraxnuu 1 Juan 4:7). Á mu náa congregación ndrígulú xtáa mbáa ndxájulú bi̱ niʼni gawúnlú, mbáa makumulú rí niʼni kiejuunʼ. Mú, gundxaʼwa̱mijna̱ rí na̱nguá nindoo maʼni, ga̱jma̱a̱ rí xtaa raʼni tsíakimínaʼ mú maʼni rí májánʼ (Prov. 12:18). Maski asndu nindxu̱lú xa̱bu̱ aʼkhá Jeobá nandoo kaʼyulú wéñuuʼ. Ikhaa tséniñuuʼ randoo kaʼyulú índo̱ nakiéʼkulu ní má tséyexi̱i̱ sia̱nʼ (Sal. 103:9). Gíʼdoo wéñuuʼ numuu rí mbuʼyaridáá Anu̱lú Jeobá ga̱jma̱a̱ guʼni mba̱a̱ a̱jkiu̱lú kuʼñúún eʼwíinʼ (Efes. 4:32–5:1).

⁷ Ma̱ngaa garmáʼáan a̱jkiu̱lú rí kuwáanʼ náa iwáá mbiʼi, ikha jngóo gíʼmaa makuwaanʼ mbá jnduʼ gajmiúlú a̱ngiu̱lú. Xúgiáánʼ nduʼyáá rí muxkulú, mbáa tikhuun dí ikháanʼ muʼgua náa guʼwá e̱jua̱nʼ. Ikhú mbaʼyulú dí a̱ngiu̱lú mumbayulúʼ (Prov. 17:17). Xígi̱ káʼnii nigíʼnuu mbáa ndxájulú bi̱ ka̱ya̱ edxu̱u̱ bi̱ xtaa náa España bi̱ mbiʼyuu Josep.a Numuu rí niwi̱ji̱ jmbu ikha jngóo nixuda̱a̱ʼ náa guʼwá ejua̱a̱nʼ gajmíi̱n eʼwíinʼ a̱ngiu̱lú. Ikhaa naʼthí: “Numuu rí mbóó náa kajcháanʼxu̱, tséjyúu kayuuʼ ekiʼnáanʼxu kuyamijná. Ikha jngóo, ndiyóoʼ rí maʼngo̱o̱ a̱jkiu̱xu̱ kuyamíjna̱ ga̱jma̱a̱ rí muni̱ mba̱a̱ a̱jkiu̱xu̱. Rígi̱ nimbáyuxu rí makuwáanʼ mbaʼ jnduʼ ga̱jma̱a̱ muñeumíjna̱xu náa eʼwíinʼ bi̱ kajchún náa guʼwá e̱jua̱nʼ bi̱ na̱nguá nindxu̱ún Testigos. Narmáʼáan a̱jkiu̱nʼ rí mbá miʼtsu nigawúunʼ ñawúunʼ ga̱jma̱a̱ tsíyoo ma̱ni̱ nimbá ñajunʼ. Ikhú mbáa ndxájulú niʼjñáa xtíñúʼ ga̱jma̱a̱ nambáyuʼ náa i̱ʼwáʼ ñajunʼ. Nijkhánú ndi̱yo̱o̱ rí phú ndiyóʼ ikhú, nindxu̱u̱ ngajua rí gajkhun”. ¡Ra̱ʼkhá tháán gíʼdoo numuu rí muʼnimbáníí asndu xúgi̱, xkujndu rí kuáʼdáá gajmiúlú a̱ngiu̱lú!

ÍNDO̱ BI̱ NDIʼYÁA NAʼNI GAWÚNLÚ

8. Xú káʼnii xkujndu eraʼníí xa̱bu̱ bi̱ nidamijná rá.

⁸ Xkujndu. Xúgíinʼ xa̱bu̱ gajmii “maguaʼdáá xkujndu” eʼthí náa Biblia (1 Cor. 7:28). Náá numuu rá. Numuu rí mbáa nájmi̱i̱n nindxu̱ún xa̱bu̱ aʼkhá. Ma̱ngaa mixtiʼkhu rí nanigu̱u̱nʼ ga̱jma̱a̱ xóo nindxu̱ún. Mbáa ga̱jma̱a̱ numuu rí mixtiʼkhu xuajin náa guwáʼ o mixtiʼkhu xóo ninii. Ga̱jma̱a̱ índo̱ gáʼga ranújngoo mbiʼi rí kúwá, mbáa ndiʼkhún maguanúu mbuyáá náa rí nakiéʼkúun, mbáa rí nákha ninindxu̱ún novios na̱nguá ndiyáá. Rígi̱ gaʼni rí makiʼníin kuyamijná. Ga̱jma̱a̱ xáʼndúún mbuyáá náa najngawi̱i̱n mu ma̱ndoo munimbáníí xkujndu. Ga̱jma̱a̱ i̱ndó muni tsudi̱i̱ bi̱ ndi̱ya̱a̱ o asndu maguanúu mundxaʼwamíjna̱ rí itháan májánʼ gaʼni rí muniñamíjna. Lá májánʼ ganindxu̱u̱ rúʼko̱ rá.b Mbuʼyáá ndiéjunʼ rí nigíʼnuu mbáa a̱ʼgu̱ bi̱ na̱ʼkha̱ raʼthí náa Biblia rí ikhaa táʼni wabaminaʼ índo̱ niraʼnuu xkujndu xóo rígi̱.

9. Xú káʼnii xkujndu niraʼnuu Abigaíl rá.

⁹ Xa̱bu̱ bi̱ na̱ʼkha̱ raʼthí náa Biblia. Abigaíl ndiyáa mbáa xa̱bu̱ bi̱ mbiʼyuu Nabal, náa Biblia naʼthí rí xa̱bu̱ bugi̱ tséndxaʼwamína májánʼ ga̱jma̱a̱ naʼni dí ra̱májánʼ (1 Sam. 25:3). Gajkhun rí gakhi̱i̱ wéñuuʼ nindxu̱u̱ rí maraxtaa ga̱jma̱a̱ʼ mbáa xa̱bu̱ bi̱ xígi̱ kaʼnii. Nirígá mbiʼi dí Abigaíl ma̱ndoo maniñaaʼ Nabal. Mú, David bi̱ mani̱ndxu̱u̱ rey náa Israel, nindoo máxiyáá Nabal ga̱jma̱a̱ numuu rí niʼthí wéñuuʼ gajmíi̱n xa̱bi̱i̱ (1 Sam. 25:​9-13). Abigaíl ma̱ndoo magayúu ga̱jma̱a̱ maniñuuʼ rí David máxiyáá Nabal, mú ikhaa táʼni xúʼko̱, ikhaa niʼthúu̱n David rí maʼni mba̱a̱ a̱jkiu̱u̱n kaʼyoo Nabal (1 Sam. 25:​23-27). Ndiéjunʼ nixkajxi̱i̱ maʼni rúʼko̱ xá.

10. Ndiéjunʼ nixkajxi̱i̱ Abigaíl mu xáʼni guabaminaʼ maski ajndu nigiʼdoo xkujndu xá.

¹⁰ Abigaíl nindoo kaʼyoo wéñuuʼ Jeobá ga̱jma̱a̱ ni̱jkha̱nú ndiʼyoo rí nidamijná xa̱bu̱ na̱nguá nindxu̱u̱ mbá gitsíin. Ikhaa ndaʼyoo ndiéjuunʼ rí niʼthí Jeobá índo̱ Adán ga̱jma̱a̱ Eva nidamijná (Gén. 2:24). Abigaíl ndiʼyoo kaʼwu rí índo̱ nudamijná xa̱bu̱ nindxu̱u̱ mitsúʼkháan eʼyoo Jeobá. Ikha jngóo, nandoo maʼni rí naniguuʼ Jeobá, rúʼko̱ nixkaxi̱i̱ rí maʼni kríyaaʼ ajmbio̱o̱ ga̱jma̱a̱ xúgíinʼ bi̱ kúwíin náa goʼwóo. Mu David xaxíyáa Nabal, mbá nacha̱ ni̱jkha̱ gatamíjna ga̱jma̱a̱, mu maʼni mba̱a̱ a̱jkiu̱u̱n kaʼyoo Nabal. Gajkhun rí Jeobá nindoo kaʼyoo wéñuuʼ a̱ʼgu̱ bugi̱ bi̱ támiñuu. Ndiéjunʼ gándoo gajmañún xa̱bu̱ gajmii náa xkri̱doo Abigaíl rá. Guʼyáá.

11. a) Ndiéjunʼ eyoo Jeobá dí mu̱ni̱ xa̱bu̱ bi̱ nidamijná rá. (Efesios 5:33.) b) Ndiéjunʼ ejmañulúʼ náa xkri̱doo Carmen rá. (Atayáá ma̱ngaa xtiʼkhuu.)

¹¹ Dí naʼsngúlú. Jeobá nandoo rí xa̱bu̱ gajmii mbuyamajkumijná maski ajndu má nájmi̱i̱n nakiéʼkúún. Dios naxtáa gagi índo̱ ndaʼyoo rí xa̱bu̱ gajmii nuni̱ tsiakimíjna̱ mu muni̱ mbáníí xkujndu ga̱jma̱a̱ nusngajmá dí nandún kuyamijná ga̱jma̱a̱ nduyámajkumíjná (atraxnuu Efesios 5:33). Guʼyáá xkri̱da ndrígóo ndxájulú a̱ʼgu̱ bi̱ mbiʼyuu Carmen. Niʼni má majun tsiguʼ rí ikhaa ninuju̱nʼ, índo̱ nigíʼdúu niʼnigajmaa Biblia gajmíi̱n testigos de Jeobá ga̱jma̱a̱ nda̱wa̱á nijngún iyááʼ. Ikhaa naʼthí: “A̱jmbio̱ʼ nditháan tánigu̱u̱ʼ rí ikhúún niraʼwíí ma̱ni̱. Nikiʼnáa kaʼyoo Jeobá, niʼthá wéñuʼ ga̱jma̱a̱ niʼthúnʼ rí maniñuʼ”. Maski asndu xúʼko̱ Carmen táʼni wabaminaʼ. Mbá 50 tsiguʼ niʼni xó má eʼngo̱o̱ mu maʼndoo kaʼyoo ga̱jma̱a̱ mbaʼyamajkuu ajmbio̱o̱. Ikhaa naʼthí xóó: “Índo̱ ninújngoo tsiguʼ nijkhánú nikro̱ʼo̱ʼ májánʼ kaʼyoo ajmbio̱ʼ ma̱ngaa dí mathu̱u̱n ga̱jma̱a̱ ajngáa wabaaʼ. Nikro̱ʼo̱o̱ májánʼ xú kaʼnii endxa̱ʼwa̱mínáʼ Jeobá ga̱jma̱a̱ numún xa̱bu̱ gajmii. Ikha jngóo ni̱ni̱ xúgíʼ xó má eʼngo̱ʼ mu maʼni xó má enigu̱u̱ʼ Jeobá. Rí nandoʼ ka̱yo̱o̱ Jeobá rúʼko̱ nimbáyuʼ mu xajkanajkoʼ”c. Á mu naraʼdáá xkujndu ga̱jma̱a̱ xa̱bu̱ bi̱ ndiyáa, ma̱ndoo ma̱ta̱ya̱a̱ gajkhun dí Jeobá mambáyaaʼ mu xákanajkhaaʼ.

ÍNDO̱ NUʼNI GAWUMIJNALÚ MÁ IKHÁANʼ

12. Xú káʼnii eʼni makumulú índo̱ nuxuʼdamíjná mbá aʼkhá mbiiʼ rá.

¹² Xkujndu. Mbáa nguáná makumulú dí nandaaʼ numulúʼ índo̱ nuxuʼdamíjná mbá aʼkhá mbiiʼ. Náa Biblia naʼthí rí aʼkhá ndrígulú ma̱ndoo maʼni rí “majmáán a̱jkiu̱lú” (Sal. 51:17). Rúʼko̱ nindxu̱u̱ rí nigíʼnuu Roberto, mbáa ndxájulú bi̱ niʼniminaʼ mbayuuʼ tsiguʼ rí mani̱ndxu̱u̱ siervo ministerial. Nikudaminaʼ mbá aʼkhá mbiiʼ, ndiʼyoo má dí niʼni gawúunʼ Jeobá. Ikhaa naʼthí: “Nikumu̱ʼ kúʼdoo aʼkhúnʼ, rí asndu xóo ki̱wu̱n dí nijpátramáʼ náa tsu̱du̱ʼ. Nda̱wa̱á asndu wéʼtsí niʼni tsojxto̱ʼ, nigíʼdúu nimbiyaʼ wéñuuʼ ga̱jma̱a̱ nitakáñuu Jeobá. Niku̱mu̱ʼ dí Jeobá ni xándoo gaʼdxawunʼ ga̱jma̱a̱ numuu rí nini gawúunʼ”. Á mu nuxuʼdámijná mbá aʼkhá mbiiʼ, mbáa a̱jkiu̱lú maʼni makumulú rí Jeobá niniñulú, ga̱jma̱a̱ dí nánguá má gíʼdoo numuu dí muʼni ñajuunʼ ikhaa (Sal. 38:4). Lá nikumaaʼ xúʼko̱ mbá miʼtsú ráʼ. Á mu xúʼko̱, xkri̱doo xa̱bi̱i̱ Jeobá bi̱ nixtáa nákha wajyúuʼ ma̱ndoo mambáyáaʼ, maski ajndu ikhaa nikudaminaʼ mbá aʼkhá mbiiʼ, táʼni tsínguminaʼ náa Jeobá.

13. Xú káʼnii aʼkhá nikudaminaʼ Pedro ga̱jma̱a̱ ndiéjunʼ nijkha kayáa maʼni rúʼko̱ xá.

¹³ Xa̱bu̱ bi̱ na̱ʼkha̱ raʼthí náa Biblia: Mbruʼun nákha inu makhañúu Jesús, apóstol Pedro nijngawa̱a̱n mbaʼa nuthu, rúʼko̱ niʼni rí maxtáa ngíná wéñuuʼ, ginii kayuuʼ ikhaa niʼthí dí xániñuuʼ Jesús maski má eʼwíinʼ apóstoles muniñaaʼ (Mar. 14:​27-29). Nda̱wa̱á náa ixi̱ ri̱ʼi̱ rí mbiʼyuu Getsemaní, niʼgu mbaʼa nuthu (Mar. 14:​32, 37-41). Ikhaa niniñuuʼ Jesús índo̱ nirugua̱a̱ (Mar. 14:50). Nda̱wa̱á kayuuʼ, Pedro niʼthí ga̱jma̱a̱ xúgíʼ a̱jkiu̱u̱n mbá ajtsú nuthu rí tseniʼniiʼ Jesús (Mar. 14:​66-71). Xu káʼnii nikumu̱u̱ índo̱ ndiʼyoo rí nikudaminaʼ mbá aʼkhá mbiiʼ xá. Nixtáa ngíná, nismbáti̱go̱o̱ʼ ga̱jma̱a̱ nimbi̱ya̱ʼ wéñuuʼ (Mar. 14:72). Lá natatsaʼwa̱minaʼ ikháán xú káʼnii nikumu̱u̱ índo̱ ndiʼyoo Jesús frájkhaa náa ixi̱ xáʼ. Mbáa raʼkháa tháan nixtáa ngíná mbiʼi rúʼko̱, rí asndu nikumu̱u̱ rí nándáa numuu.

14. Ndiéjunʼ nimbáyúu Pedro mu xáʼni tsínguminaʼ náa Jeobá rá. (Atayáá xtiʼkhuu dí na̱ʼkha̱ náa timbá ináa.)

¹⁴ Pedro tániñuuʼ raʼni má xúʼko̱ ñajuunʼ Jeobá. Ndiéjunʼ nimbáyúu xá. Táʼni tsínguminaʼ náa Jeobá ga̱jma̱a̱ nimbájxu̱u̱ má xúʼko̱ gajmíi̱n a̱ngui̱i̱n, gajkhun dí nitháán ajngáa rí maʼni a̱jkiu̱u̱n (Luc. 24:33). Índo̱ Jesús nigabii nisngájmaminaʼ náa Pedro mu maxnuu tsiaki̱i̱ (Luc. 24:34; 1 Cor. 15:5). Jesús na̱nguá nikiʼnáa kaʼyoo Pedro ga̱jma̱a̱ numuu dí niʼni, Jesús niʼthúu̱n migiúu rí makánúu itháan ñajunʼ maʼni (Juan 21:​15-17). Pedro ndiʼyoo má dí nikudaminaʼ mbá aʼkhá mbiiʼ, mu táʼni wabaminaʼ. Náá numuu rá. Numuu rí ndiʼyoo gajkhun rí Jesús nditháan taniñatiga̱a̱ ga̱jma̱a̱ ndiʼyoo rí a̱ngui̱i̱n kúwá mumbayíí. Guʼyáá ndiéjunʼ gajmañulú náa xkri̱doo.

15. Ndiéjunʼ eyoo Jeobá dí makuwáanʼ gajkhun rá. (Salmo 86:5; Romanos 8:​38, 39; Atayáá ma̱ngaa xtiʼkhuu.)

¹⁵ Dí naʼsngúlú. Jeobá nandoo mbuʼyáá gajkhun dí ikhaa nandoo kaʼyulú wéñuuʼ ga̱jma̱a̱ rí xtáa xawii maʼni mba̱a̱ a̱jkiu̱u̱nʼ kaʼyulú (atraxnuu Salmo 86:5;d Romanos 8:​38, 39). Gajkhun má dí índo̱ nuxuʼdamíjná mbá aʼkhá mbiiʼ nakuwáanʼlu ngíná. Mú ragíʼmaa mundxaʼwamíjna̱ dí Jeobá nánguá eyoo kaʼyulú ga̱jma̱a̱ rí nditháan ni xáʼni mba̱a̱ a̱jkiu̱u̱n kaʼyulú. Dí phú gíʼmaa muʼni nindxu̱u̱ rí mbuʼyáʼ mixtambáyulúʼ. Robert, bi̱ niʼthá ga̱jma̱a̱ numuu náa kutriga̱ 12, naʼthí: “Dí nijkha kañún makuʼdaminaʼ aʼkhá nindxu̱u̱ rí nikumu̱u̱ dí maʼngo̱ʼ maniminaʼ gajmuʼ mbáwun tsáʼkhá rígi̱”. Ikhaa ndiʼyoo rí ndayóoʼ maʼtamijná gajmíi̱n bi̱ kuya̱ edxu̱u̱. Robert naʼthí: “Índo̱ ni̱thu̱u̱n xóo ku̱mu̱ʼ, ikhiin nimbáyuʼ mba̱yo̱o̱ dí Jeobá xóó nandoo kaʼyoʼ. Bi̱ kuya̱ edxu̱u̱ na̱nguá nithu̱nʼ dí nándáa numuʼ, ikhiin nini̱ mba̱yo̱o̱ dí Jeobá tániñuʼ”. Xó má Robert, ma̱ndoo mukuwáánʼ gajkhun dí Jeobá nandoo kaʼyulú wéñuuʼ ga̱jma̱a̱ rí naʼni mba̱a̱ a̱jkiu̱u̱n kaʼyulú, á mu natanga̱a̱ a̱jkiu̱lú náa aʼkhá dí ni’ni, nduʼyáá dí mixtambáyulúʼ ga̱jma̱a̱ nuʼni tsiakimijna mu ni xátangaán muʼni ikhaa má aʼkhá (1 Juan 1:​8, 9). Dí mundxaʼwamíjna̱ dí Jeobá xóó nandoo kaʼyulú, rúʼko̱ gámbáyulú mu xákanajkulú índo̱ nuraʼníí tsáʼkhá.

16. Náá numuu dí nandaaʼ matani̱ má xúʼko̱ ñajuunʼ Jeobá ga̱jma̱a̱ dí xákanájkaaʼ rá.

¹⁶ Jeobá ndaʼyoo dí gíʼdoo wéñuuʼ numuu tsiaki̱i̱ dí nuʼni mu muʼni ñajuunʼ ikhaa náa iwáá mbiʼi rígi̱. Mambáyulúʼ mu xúʼni̱ wabamijná ga̱jma̱a̱ xarajñulú náa ikhaa maski ajndu nuni̱ gawúnlú. Ma̱ndoo musngajma ngajua náa a̱ngiu̱lú ga̱jma̱a̱ muʼni mba̱a̱ a̱jkiu̱lú kuʼñúún índo̱ nuni gawúnlú. Ma̱ndoo musngajmáá Jeobá dí nandulúʼ kuʼyáá wéñuuʼ ga̱jma̱a̱ dí nudamijná xa̱bu̱ nindxu̱u̱ misuʼkháanʼ, ikha jngóo nuʼni tsiakimijna muʼnimbánii xkujndu dí naguáʼdáá gajmiúlú bi̱ ndiʼyáaʼ. Á mu nuxuʼdamíjna̱ mbá aʼkhá mbiiʼ, ma̱ndoo mbuʼyáa gajkhun dí Jeobá mambáyulú, mundrígú ngajua ndrígóo ga̱jma̱a̱ rí naʼni mba̱a̱ a̱jkiu̱u̱n kaʼyulú mu xúʼko̱ ma̱ndoo muʼni̱ ñajuunʼ ikhaa. “Ikha jngóo xuniʼñááʼ ru̱ʼni̱ ma xúʼko̱ rí nindxu̱u̱ májánʼ”, numuu rí nduʼyáá dí Jeobá maʼni tsajkurámáanʼlu wéñuuʼ (Gál. 6:9).