Gumbáñún e̱jña̱la muguáʼdáá mbá fe gújkhúʼ

1, 2. Ndiéjunʼ gíʼmaa muni̱ xabuanii índo̱ e̱jñu̱ún gúniu̱u̱n grajxe̱ ga̱jma̱a̱ numuu Dios ma̱ngaa ga̱jma̱a̱ numuu Biblia rá.

MBAʼIN xa̱bu̱ nuthi dí maraʼdiin e̱ji̱n nindxu̱u̱ mbá ñajunʼ gakhi̱i̱ wéñuuʼ. Á mu ikháán xtaʼdiin e̱ji̱n majkhiinʼ ga̱jma̱a̱ natani̱ tsiakimínáʼ mu matambáñún maguáʼdáá mbá fe gújkhúʼ, ra̱ʼkhá tháán edxuu Jeobá ga̱jma̱a̱ numuu ñajunʼ dí natani̱ (Deut. 6:​6, 7). Mbáa índo̱ gáʼga ranuu muni̱ grajxe̱ ga̱jma̱a̱ numuu dí nuʼnimbulú, xóo, náá numuu dí rígá tikhuu dí Jeobá tsénigu̱u̱ʼ mu̱ʼni̱ o náá numuu dí Jeobá naxnúlú tikhuu kiʼtáñajunʼ ga̱jma̱a̱ náá numuu dí náa Biblia naʼsngáa dí rígá tikhuu dí nindxu̱u̱ májánʼ ga̱jma̱a̱ ra̱májánʼ.

² Mbáa maku̱ma̱a̱ʼ dí a̱ʼdiáaʼ ragíʼdoo mba̱a̱ fe ikha jngóo naʼni grajxe̱ xóo rígi̱. Mú gíʼmaa makru̱ʼu̱lú dí e̱ji̱n ndayóoʼ muni̱ grajxe̱ mu xúʼko̱ maʼni gújkhúʼ fe ndrígu̱ún (1 Cor. 13:11). Ikha jngóo índo̱ nurajxa̱a̱ ma̱ndoo majmaaʼ mbiʼi rúʼko̱ mu matambáñún makru̱ʼu̱u̱n itháan májánʼ. Xúʼko̱ gáʼni dí fe ndrígu̱ún maʼni itháan gújkhúʼ náa Dios ga̱jma̱a̱ dí naʼthí náa Biblia.

3. Ndiéjunʼ gúʼyáá náa artículo rígi̱ rá.

³ Náa artículo rígi̱ majmañulú xóo gándoo xabuanii mumbañún e̱jñu̱ún, 1) mu maʼni gújkhúʼ fe ndrígu̱ún, 2) mu mbuyáá dí gíʼdoo numuu dí naʼthí náa Biblia, 3) mu majmañún muthún eʼwíinʼ dí nunimbu̱u̱n. Ma̱ngaa mbuʼyáá náá numuu rí májánʼ dí e̱ji̱n muni̱ grajxe̱, ga̱jma̱a̱ mbuʼyáá tikhuu dí xabuanii ma̱ndoo muni̱ gajmiún e̱jñu̱ún mu xúʼko̱ muthún ga̱jma̱a̱ numuu dí nuʼnimbulú.

ATAMBÁÑÚN MAGUÁʼDÁÁ MBÁ FE GÚJKHÚʼ

4. Ndiéjunʼ grajxe̱ ma̱ndoo muni̱ e̱ji̱n ga̱jma̱a̱ náá numuu rá.

⁴ Raʼkháa numuu dí ikháán xtaʼdáá fe náa Dios ikhaa jngóo ejña̱a̱nʼ mangiin maguáʼdáá. Índo̱ nigumaa, raʼkháa núkhu niraʼdáá fe náa Jeobá, xúʼko̱ má ejña̱a̱nʼ mangiin. Ikha jngóo májánʼ má dí ikhiin murajxi̱: “Xú káʼnii e̱yo̱o̱ ikhúún dí xtáa Dios rá. Xú káʼnii e̱yo̱o̱ á mu gajkhun dí naʼthí náa Biblia rá.” Dios najmuu Biblia mu maʼthúún cristianos dí majmúún ‹májánʼ rí nundxa̱ʼwa̱a̱ edxu̱ún› ga̱jma̱a̱ ‹dí mbuyáá á mu xúgíʼ nindxu̱u̱ gajkhun› (Rom. 12:1; 1 Tes. 5:21). Xú káʼnii gándoo gúmbáñún e̱jña̱la mu maʼni gújkhúʼ fe ndrígu̱ún rá.

5. Xú káʼnii gándoo gátambáñún ejña̱a̱nʼ mu munimbu̱u̱n dí naʼthí náa Biblia rá. (Romanos 12:2.)

⁵ Atambáñúún mbuyáá dí gajkhun nindxu̱u̱ dí nuʼnimbulú (atraxnuu Romanos 12:2). Índo̱ ejña̱a̱nʼ gúni̱ grajxe̱, atambáñúún maxtiʼña̱a̱ grajxe̱ ndrígu̱ún, ma̱ndoo marathu̱u̱n mbuyáʼ náa artículos ga̱jma̱a̱ video dí ma̱ndoo mambáñún mbuyáá dí Biblia na̱nguá nindxu̱u̱ mbá libro dí niniraʼmáʼ xa̱bu̱ú, dí ikhaa nindxu̱u̱ “ajngóo Dios” (1 Tes. 2:13). Mbá xkri̱da, ma̱ndoo mbuyáʼ majmañún itháan ga̱jma̱a̱ numuu xuajin asiria dí nirígá náa Nínive. Nákha wajyúuʼ tikhuun xa̱bu̱ bi̱ nuniga̱jma̱a̱ Biblia nuthi dí xuajin rígi̱ nditháan tárígá. Mú nákha tsiguʼ 1850 nixkamaa náa nigi̱ʼi̱ xuajin Nínive dí niguma gámbáa, rígi̱ nasngájma dí naʼthí náa Biblia nindxu̱u̱ gajkhun (Sof. 2:​13-15). Ma̱ngaa ma̱ndoo mbuyáá xóo nimbánuu kiʼtáriyaʼ dí naʼthí náa Biblia ga̱jma̱a̱ numuu dí magíʼnuu Nínive náa níʼkhóo “Lá natayáá má ráʼ.” Dí na̱ʼkha̱ náa i̱yi̱i̱ʼ Bi̱ Nayejngoo dí nigájnuu noviembre tsiguʼ 2021. Índo̱ ejña̱a̱nʼ gúni̱ mbríguii dí naʼsngáa náa i̱yu̱lúʼ ga̱jma̱a̱ dí naʼthí náa i̱ʼwáʼ i̱yi̱i̱ʼ dí nurawíi xa̱bu̱, rúʼko̱ gámbáñún mbuyáá dí naʼthí náa Biblia nindxu̱u̱ gajkhun.

6. Xú káʼnii gándoo gúmbáñún e̱jña̱la mu mbuyáá dí gajkhun nindxu̱u̱ dí naʼthí náa Biblia rá. Atagíʼ mbá xkri̱da. (Atayáá ma̱ngaa xtiʼkhuu.)

⁶ Atambáñúún makru̱ʼu̱u̱n dí gajkhun nindxu̱u̱ dí naʼsngáa náa Biblia. Atayáʼ xóo maratamíjná gajmiáanʼ ejña̱a̱nʼ ga̱jma̱a̱ numuu dí naʼthí náa Biblia ma̱ngaa dí naku̱ma̱a̱ʼ xtayáá Dios. Mbáa índo̱ gídxúʼ gajmiáanʼ náa mbá museo, náa mbá parque o náa mbá exposición dí narígá náa sucursal ndrígu̱ún testigos de Jeobá. Mbá xkri̱da, ma̱ndoo ma̱ta̱ya̱a̱ gajmiáanʼ libros o videos náa nasngájma tikhuu dí nirígá nákha wajyúuʼ dí nambríguii ga̱jma̱a̱ dí naʼthí náa Biblia, rígi̱ ma̱ndoo mambáñún ejña̱a̱nʼ mu mbuyáá dí gajkhun nindxu̱u̱ dí naʼthí náa Biblia. Ma̱ndoo matasngajmún ejña̱a̱nʼ itsí dí najmaʼnuuʼ xóo moabita dí naʼni má 3,000 tsiguʼ dí rígá, ikhí na̱ʼkha̱ mbiʼyuu Jeobá. Itsí rígá náa museo dí rígá náa Francia. Ma̱ndoo ma̱ta̱ya̱a̱ ga̱jma̱a̱ʼ a̱ʼdiáaʼ xtiʼkhuu itsí moabita dí na̱ʼkha̱ náa i̱yu̱lúʼ. Náa itsí moabita naʼthí dí rey Mesá bi̱ nixtáa náa Moab nikujximínáʼ náa inún xa̱bu̱ Israel, rígi̱ nambríguii ga̱jma̱a̱ dí naʼthí náa Biblia (2 Rey. 3:​4, 5). Maʼni itháan gújkhúʼ fe ndrígu̱ún ejña̱a̱nʼ índo̱ míniiʼ gúyáá dí naʼthí náa Biblia nindxu̱u̱ gajkhun ga̱jma̱a̱ dí ikhí naʼthí mbájmbu (atanimbríguii ga̱jma̱a̱ 2 Crónicas 9:6).

7, 8. a) Ndiéjunʼ gándoo gájmañulú náa dí ra̱ʼkhá tháán mitsaanʼ dí nigumawíi rá. (Atayáá ma̱ngaa xtiʼkhuu.) b) Ndiéjunʼ grajxe̱ gándoo gámbáñún e̱ji̱n mu munimbu̱u̱n dí xtáa mbáa bi̱ niʼni dí rígá rá.

⁷ Atambáñúún ejña̱a̱nʼ mbuyáá xúgíʼ dí Jeobá niʼniwíi. Índo̱ gídxúʼ gátiejunʼ gajmiáanʼ xanáá o índo̱ gúʼguala náa kúbá. Atasngájmún mbuyáá xóo nagui̱i̱ nigumawíi xúgíʼ, mu maguánú mbuyáá dí xtáa mbáa bi̱ ra̱ʼkhá tháán ejmañuu ga̱jma̱a̱ nakro̱ʼo̱o̱ bi̱ niʼni xúgíʼ rúʼko̱. Mbá xkri̱da, á mu nduʼyáʼ mbu̱ya̱a̱la xóo niguma jxo̱o̱ caracol, ri̱ʼi̱, iná o xóo tri̱gi̱i̱n a̱ʼgua̱a̱n muʼgua̱nú mbu̱ya̱a̱la dí ra̱ʼkhá tháán mitsaanʼ xóo niguma. Mba̱yu̱u̱ʼ má tsiguʼ científicos ninigajma̱a̱ ga̱jma̱a̱ numuu rígi̱ mu mbuyáá xóo nigumawíi.a

⁸ Náa escuela ma̱ndoo majmañún e̱jña̱la mbaʼa enii xóo nigumawíi. Mbá xkri̱da, mbaʼa ixi̱ nawiʼtóo ñawúunʼ ga̱jma̱a̱ náa ñawúunʼ nawiʼtóo eʼwáʼ ñawúunʼ itháán majkhaʼ, mbaʼa enii náa nigumawíi xóo rígi̱. Mú, tsáá lá nindxu̱u̱ bi̱ niʼniwíi xúgíʼ dí naʼgui̱i̱ rígi̱ rá. Á mu e̱jña̱la nuni̱ grajxe̱ xóo rígi̱, mbáa maguánú mbuyáá rí Dios nindxu̱u̱ bi̱ niʼniwíi xúgíʼ dí rígá (Heb. 3:4). Ikhú ikháanʼla ma̱ndoo murajxu̱u̱n e̱jña̱la: “Á mu Dios niʼniáánlu, lá xáʼyóoʼ ma̱ngaa maxnúlú ikha dí mambáyúlú mu makuwáánʼ gagi xáʼ.” Nda̱wa̱á ma̱ndoo musngajmúún ikha dí gíʼdoo wéñuuʼ numuu rí na̱ʼkha̱ náa Biblia.

NASA, ESA, and the Hubble Heritage (STScl/AURA)-ESA/Hubble Collaboration

ATAMBÁÑÚN MBUYÁÁ DÍ GÍʼDOO NUMUU DÍ NAʼTHÍ NÁA BIBLIA

9. Náá numuu dí ejña̱a̱nʼ ma̱ndoo muni̱ a̱jma̱ a̱jkiu̱ún ga̱jma̱a̱ numuu dí naʼthí náa Biblia rá.

⁹ Á mu ejña̱a̱nʼ nuni̱ grajxe̱ ga̱jma̱a̱ numuu dí náa Biblia naʼthí dí nindxu̱u̱ raʼkhí, atagíminaʼ ma̱ta̱ya̱a̱ náá numuu dí nuni̱ grajxe̱ rúʼko̱. Lá ga̱jma̱a̱ numuu dí ikhiin tsénimbu̱u̱n dí naʼthí náa Biblia xáʼ. O numuu rí na̱nguá eyááʼ xóo gúthún eʼwíinʼ dí nunimbu̱u̱n dxe̱ʼ. Tséʼniuu má asndu xú kaʼnii, mú mbá dí mambáñún mu mbuyáá dí gíʼdoo numuu dí naʼthí náa Biblia nindxu̱u̱ dí munigajma̱a̱ libro ¡Araxtaa gagi kámuu mbiʼi!b

10. Xú káʼnii gándoo matambáñún ejña̱a̱nʼ mu mambajxúún itháan májánʼ gajmiún Jeobá rá.

¹⁰ Atambáñúún ejña̱a̱nʼ mambajxúún májánʼ gajmiún Jeobá. Ga̱jma̱a̱ʼ grajxe̱ índo̱ gátanigajma̱a̱ Biblia gajmiáanʼ, ma̱ngaa ga̱jma̱a̱ʼ xkri̱da dí na̱ʼkha̱ náa libro ¡Araxtaa gagi kámuu mbiʼi! Mu xúʼko̱ ikhiin ma̱ndoo muthi dí nakru̱ʼu̱u̱n o dí nundxaʼwamíjna̱ (Prov. 20:5). Mbá xkri̱da, náa kíxnuu 8 naʼni mbríguii Jeobá ga̱jma̱a̱ mbáa bi̱ nambájxulú májánʼ gajmiúlú, bi̱ naʼni marmáʼáan a̱jkiu̱lú ndiéjunʼ gíʼmaa mu̱ʼni̱ mu makuwáánʼ májánʼ ga̱jma̱a̱ mu xúmíniiʼ. Nda̱wa̱á dí niraxnuula 1 Juan 5:​3, ma̱ndoo matrajxu̱u̱n ejña̱a̱nʼ: “Numuu dí Jeobá nindxu̱u̱ mbáa bi̱ nambájxulú májánʼ gajmiúlú, xú káʼnii gíʼmaa mbuʼyáá dí ikhaa naʼthúlú mu̱ʼni̱ xá.” Mbáa maku̱ma̱a̱ʼ dí grajxe̱ rígi̱ na̱nguá gíʼdoo wéñuuʼ numuu, mú ma̱ndoo mambáñún ejña̱a̱nʼ mbuyáá dí Dios naxnúlú xtángoo numuu dí nandoo kaʼyulú (Is. 48:​17, 18).

11. Xú káʼnii gándoo gátambáñún ejña̱a̱nʼ mu maʼndún munimbu̱u̱n dí naʼthí náa Biblia rá. (Proverbios 2:​10, 11.)

¹¹ Arathún xú káʼnii eyambáá dí matanimba̱a̱ʼ dí naʼsngáa náa Biblia. Índo̱ gátra̱xnuu Biblia gajmiáanʼ ejña̱a̱nʼ o índo̱ gúraxnuu texto rí kaʼyoo mámbá mbiʼi, arathún xú káʼnii nimbáyáa ikháán ikha dí na̱ʼkha̱ náa Biblia. Ma̱ndoo matambáñún ejña̱a̱nʼ makru̱ʼu̱u̱n dí májánʼ nindxu̱u̱ rí muñajunʼ gakhi̱i̱ ga̱jma̱a̱ dí xúni̱ nduwaʼ (Heb. 13:18). Ma̱ngaa ma̱ndoo marathu̱u̱n dí índo̱ nuʼnimbulú consejo dí na̱ʼkha̱ náa Biblia nambáyulú makuwáánʼ itháan májánʼ ga̱jma̱a̱ gagi (Prov. 14:​29, 30). Á mu ejña̱a̱nʼ nakru̱ʼu̱u̱n dí nindxu̱u̱ májánʼ rí matanimba̱a̱ʼ dí naʼthí náa Biblia, mbáa ikhiin mangiin maʼndún munimbu̱u̱n (atraxnuu Proverbios 2:​10, 11).c

12. Ndiéjunʼ eni̱ xa̱bu̱ gajmii mu mumbayíí aʼdiún makro̱ʼo̱o̱ rí májánʼ nindxu̱u̱ dí matanimba̱a̱ʼ consejo dí na̱ʼkha̱ náa Biblia rá.

¹² Steve, bi̱ xtáa náa Francia naʼthí ndiéjunʼ eʼni ikhaa ga̱jma̱a̱ a̱ʼgiu̱u̱ mu mumbayíí aʼdiún bi̱ mbiʼyuu Ethan, mu xúʼko̱ makro̱ʼo̱o̱ dí Jeobá naxnúlú xtángoo ndrígóo numuu dí nandoo kaʼyulú, Steve naʼthí: “Nu̱ni̱xu̱ grajxe̱ xóo rígi̱: ‹Náá numuu dí Jeobá nandoo dí muʼnimbulú ikha rígi̱ rá. Xú káʼnii esngájma ikha rígi̱ dí ikhaa nandoo kaʼyulú xá. Ndiéjunʼ gárígá á mu tsétanimba̱a̱n rá.›” Grajxe̱ xóo rígi̱ nimbáyúu Ethan mu maʼnimbo̱o̱ xtángoo ndrígóo Jeobá. Steve naʼthí xóó: “Nanduxuʼ dí Ethan makro̱ʼo̱o̱ dí ku̱ma̱ rí na̱ʼkha̱ náa Biblia nindxu̱u̱ itháan májánʼ ki xóo ku̱ma̱ ndrígóo mbáa xa̱bu̱ú”.

13. Xú káʼnii gándoo gátambáñún ejña̱a̱nʼ mu munimbu̱u̱n consejo dí na̱ʼkha̱ náa Biblia rá. Atagíʼ mbá xkri̱da.

¹³ Arasngún munimbáníí consejo dí na̱ʼkha̱ náa Biblia. Mbá xkri̱da, mbáa maestros nuthúún ejña̱a̱nʼ dí muraxnuu mbá libro náa escuela, mbáa náa libro rígi̱ na̱ʼkha̱ raʼthí ga̱jma̱a̱ numún xa̱bu̱ bi̱ nuni̱ dí ra̱májánʼ kayuuʼ o nuni̱ ngíníin eʼwíinʼ. Xabuanii, ma̱ndoo muthu̱u̱n e̱jña̱la xú káʼnii ku̱mu̱u̱ Jeobá ga̱jma̱a̱ numún xa̱bu̱ bugi̱ bi̱ nuni̱ dí ra̱májánʼ (Prov. 22:​24, 25; 1 Cor. 15:33; Filip. 4:8). Rígi̱ ma̱ndoo mambáñún e̱jña̱la makru̱ʼu̱u̱n dí májánʼ nindxu̱u̱ rí matanimba̱a̱ʼ xtayáá Jeobá ga̱jma̱a̱ rígi̱ gámbáñún mu xámíñún muthún maestriu̱ún ga̱jma̱a̱ compañeriu̱ún dí kúwá rajmañún.

ARASNGÚN MUTHÚN EʼWÍINʼ DÍ NUNIMBU̱U̱N

14. Ndiéjunʼ dí jiámá ga̱jma̱a̱ wa̱ʼxa̱ʼ naʼniún mingíjyúuʼ muthún eʼwíinʼ ga̱jma̱a̱ náá numuu rá.

¹⁴ Mbáa tikhuun jiámá ga̱jma̱a̱ wa̱ʼxa̱ʼ naʼniún mingíjyúuʼ muthún eʼwíinʼ ga̱jma̱a̱ numuu dí nunimbu̱u̱n. Mbá namíñúún o nati̱ñu̱u̱nʼ índo̱ náa escuela nuthi ga̱jma̱a̱ numuu evolución. Numuu dí mbaʼin maestros nuthi dí gajkhun nindxu̱u̱ evolución. Xú káʼnii gándoo gúmbáñún e̱jña̱la mbuyáá dí gajkhun nindxu̱u̱ dí ikhiin nunimbu̱u̱n rá.

15. Ndiéjunʼ gándoo gámbáñún jiámá ga̱jma̱a̱ wa̱ʼxa̱ʼ mu mbuyáá rí gajkhun nindxu̱u̱ dí nunimbu̱u̱n xá.

¹⁵ Atambáñúún mbuyáá rí gajkhun nindxu̱u̱ dí nunimbu̱u̱n. Ejña̱a̱nʼ ragíʼmaa mati̱ñu̱u̱nʼ ga̱jma̱a̱ numuu dí nunimbu̱u̱n dí xtáa mbáa bi̱ niʼniwíi xúgíʼ dí rígá (2 Tim. 1:8). Kúwá mbaʼin científicos bi̱ niguánú nikru̱ʼu̱u̱n dí xa̱bu̱ na̱nguá nigumiin mbaʼ xúʼkhíin. Índo̱ nduyáá dí ra̱ʼkhá tháán nagui̱i̱ xóo nigumawáán, naguánú nduyáá dí xtáa mbáa bi̱ niʼniáánʼ bi̱ najmañuu wéñuuʼ. Ikha jngóo tsénimbu̱u̱n ga̱jma̱a̱ numuu evolución dí nusngáa náa mbaʼa escuela dí rígá náa xúgíʼ numbaaʼ. Mbá dí ma̱ndoo mambáñún ejña̱a̱nʼ mu maʼni gújkhúʼ fe ndrígu̱ún nindxu̱u̱ dí mbuyáá ndiéjunʼ nimbáñún eʼwíinʼ a̱ngiu̱lú xa̱bekha ga̱jma̱a̱ gu̱ʼu̱, mu xúʼko̱ maguánú mbuyáá dí gajkhun xtáa mbáa bi̱ niʼniáánlu.d

16. Ndiéjunʼ gátani̱ mu matambáñún ejña̱a̱nʼ muthún eʼwíinʼ dí xtáa mbáa bi̱ niʼni xúgíʼ dí rígá rá. (1 Pedro 3:15; atayáá ma̱ngaa xtiʼkhuu.)

¹⁶ Ataniratiin mu muthún eʼwíinʼ dí xtáa mbáa bi̱ niʼni xúgíʼ dí rígá (atraxnuu 1 Pedro 3:15). Ma̱ndoo ma̱ta̱ya̱a̱ gajmiáanʼ artículos dí rígá náa jw.org náa na̱ʼkha̱ raʼthí ga̱jma̱a̱ numuu dí nigumawíi ma̱ngaa ga̱jma̱a̱ numuu evolución. Ikhí ma̱ndoo muraʼwi̱i̱ mbá dí muthún eʼwíinʼ mu mumbañún makru̱ʼu̱u̱n dí xtáa mbáa bi̱ niʼni xúgíʼ dí rígá. Nda̱wa̱á atanirataminaʼ mbóó ga̱jma̱a̱ʼ a̱ʼdiáaʼ, atani̱ marmáʼáan a̱jkiu̱u̱n dí ragíʼmaa magi̱ʼdu̱u̱ gajmíi̱n compañériu̱u̱. Mú, á mu mbáa nanigu̱u̱ʼ maʼdxaun ma̱ndoo majmuu xkri̱da dí ra̱mingíjyúuʼ mu maʼthúu̱n ga̱jma̱a̱. Mbá xkri̱da, mbáa compañériu̱u̱ ma̱ndoo maʼthí: “Ikhúún nani̱mbo̱ʼ náa dí i̱ndó nda̱yo̱o̱, ga̱jma̱a̱ nimbá míʼtsú na̱nguá ndi̱yo̱o̱ Dios”. A̱ʼdiáaʼ ma̱ndoo mariʼña̱a̱: “Atatsaʼwáminaʼ dí xtaa náa mbá kúbá xaxi̱ náa nditháan nda̱a̱ dí rígá, mú natayáá dí ikhí gíʼ mbá guʼwá mitsaanʼ. Lá ragájkhun dí marata̱ dí xtáa mbáa bi̱ niʼni guʼwá rúʼko̱ ráʼ. Á mu xtáa mbáa bi̱ niʼni guʼwá rúʼko̱, xúʼko̱ má ma̱ndoo muʼnimbulú dí xtáa mbáa bi̱ ra̱ʼkhá tháán ejmañuu bi̱ niʼni xúgíʼ dí rígá náa numbaaʼ”.

17. Xú káʼnii gándoo gátambáyíí a̱ʼdiáaʼ maʼthí ga̱jma̱a̱ numuu dí najmañuu náa Biblia rá. Atagíʼ mbá xkri̱da ndiéjunʼ gándoo marajxu̱u̱ compañériu̱u̱ mbáa dxámá o dxáʼgú.

¹⁷ Atambáñúún mu mbuyáʼ xóo muthún eʼwíinʼ ga̱jma̱a̱ numuu Biblia (Rom. 10:10). Dí marasngáa ga̱jma̱a̱ numuu Biblia nambríguii ga̱jma̱a̱ dí xóo majmañaaʼ matadi̱i̱ mbá ajua̱nʼ. Mbáa nákha ndiʼkúú tagíʼdi̱i̱ maʼniaaʼ miʼskoo, mú nda̱wa̱á índo̱ gídxúʼ ratanigajma̱a̱ itháan, mbáa ni xáʼniaaʼ miʼskoo wéñuuʼ. Xúʼko̱ má kayuuʼ ma̱ngaa índo̱ nuʼthá ga̱jma̱a̱ numuu fe dí kuaʼdáá, itháan májánʼ dí a̱ʼdiáaʼ magíʼdu̱u̱ maʼthí mbá dí ra̱mingíjyúuʼ. Mbá xkri̱da, ma̱ndoo marajxu̱u̱ mbáa compañériu̱u̱ náa escuela: “Lá natayáá dí mbaʼin xa̱bu̱ bi̱ najmañún nduyaridáá náa dí nigumawíi mu muni̱ tikhuu ajua̱nʼ ráʼ. Índo̱ gágajnáán masngajmáaʼ mbá video dí nagui̱i̱, dí naʼthí: ¿Lo diseñó alguien?”. Ga̱jma̱a̱ marajxu̱u̱: “Á mu nuxnáá gamajkhu científico ga̱jma̱a̱ numuu dí naʼniwíi dí rígá, tsáá gíʼmaa mixnáá gamajkhu ga̱jma̱a̱ numuu rí nduʼyáá dí nigumawíi dí rígá náa tsu̱du̱u̱ ku̱ba̱ʼ rá.” Mbáa rígi̱ gáʼni dí compañériu̱u̱ manigu̱u̱ʼ mbaʼyoo itháan ga̱jma̱a̱ numuu Jeobá.

GUMBÁÑÚN MÁ XÚʼKO̱ MU MAʼNI ITHÁAN GÚJKHÚʼ FE NDRÍGU̱ÚN

18. Xú káʼnii gándoo gúmbáñún e̱jña̱la maʼni itháan gújkhúʼ fe ndrígu̱ún náa Dios rá.

¹⁸ Kuwáánʼ náa mbá numbaaʼ náa mbaʼin xa̱bu̱ tsénimbu̱u̱n dí xtáa Jeobá (2 Ped. 3:3). Ikha jngóo, xabuanii índo̱ gúniga̱jma̱a̱ Biblia gajmiála e̱jña̱la, gumbáñún mbuyáá dí gajkhun nindxu̱u̱ dí naʼthí náa Ajngá rawuunʼ Dios ga̱jma̱a̱ dí májánʼ nindxu̱u̱ dí muʼnimbulú ikha dí naxná Jeobá. Gusngajmún mbuyáá xúgíʼ dí Jeobá niʼniwíi. Gumbáñún makru̱ʼu̱u̱n kiʼtáriyaʼ dí na̱ʼkha̱ náa Biblia dí nimbánuu má. Dí itháan gíʼdoo numuu mu̱nila, nindxu̱u̱ dí mutajkáan mbóó gajmiála e̱jña̱la. Ma̱ndoo mbuya̱a̱ dí Jeobá gajkhun maʼni tsajkurámuuʼ tsiaki̱i̱ dí nu̱nila mu mumbáñún e̱jña̱la maʼni itháan gújkhúʼ fe ndrígu̱ún (2 Crón. 15:7).