Lucas

1 Tuir loloos, ema barak hakaʼas an ona atu halibur hamutuk informasaun kona-ba buat sira neʼebé mosu, neʼebé ita fiar duni. 2 No iha mós ema balu neʼebé uluk haree ho matan rasik no haklaken mensajen neʼe, no sira fó-hatene ida-neʼe mai ita. 3 Entaun, ba Ita-Boot Teófilo, haʼu mós buka didiʼak informasaun hotu husi nia hun atu hakerek neʼe ho loloos ba Ita. 4 Hodi nuneʼe, Ita bele hatene ho didiʼak no fiar katak buat neʼebé Ita aprende ona mak loos.

5 Iha tempu neʼebé Herodes ukun nuʼudar liurai ba Judeia, iha amlulik ida naran Zacarias neʼebé husi grupu amlulik Abias nia umakain, no nia kaben ho feto ida naran Isabel husi família Aarão nian. 6 Sira naʼin-rua mak ema loos iha Maromak nia haree no la halo sala, tanba sira halo tuir Jeová nia ukun-fuan hotu. 7 Maibé sira la iha oan, tanba Isabel la bele koʼus, no sira mós idade ona.

8 No kuandu nia halaʼo daudaun ninia knaar iha Maromak nia oin nuʼudar amlulik husi ninia grupu, 9 tuir toman husi amlulik sira, nia simu knaar atu tama iha Jeová nia templu atu sunu insensu.* 10 No ema-lubun halo orasaun iha liʼur iha oras atu sunu insensu nian. 11 No Jeová nia anju mosu ba nia hodi hamriik iha altár insensu nia sorin loos. 12 Maibé, Zacarias hakfodak ho buat neʼebé nia haree, no nia sai taʼuk. 13 Tuirmai, anju neʼe hatete ba nia: “Keta taʼuk Zacarias, tanba Maromak rona ona ó-nia orasaun. Ó-nia feen Isabel sei koʼus oan-mane ida ba ó, no ó tenke hanaran nia João. 14 Ó sei haksolok no kontente tebetebes, no ema barak sei haksolok tanba nia moris mai, 15 tanba nia sei sai ema-boot iha Jeová nia oin. Maibé nia labele hemu tua-uvas no tua seluk, no nia sei nakonu ho espíritu santu husi tempu neʼebé nia iha ninia inan nia knotak. 16 No nia sei lori Izraél nia oan barak hodi fila fali ba Jeová, sira-nia Maromak. 17 No nia sei laʼo iha Maromak nia oin ho kbiit* hanesan Elias nian. Nia sei troka aman sira-nia laran hodi sai hanesan labarik sira-nian no nia sei troka ema sira neʼebé kontra lei hodi sira iha matenek hanesan ema loos, atu nuneʼe sira bele sai povu neʼebé Jeová simu.”

18 No Zacarias hatete ba anju neʼe: “Oinsá mak haʼu bele fiar ida-neʼe? Tanba haʼu idade ona no haʼu-nia feen mós idade ona.” 19 Anju neʼe hatán ba nia dehan: “Haʼu Gabriel, ida neʼebé hamriik iha Maromak nia oin, no Maromak haruka haʼu atu koʼalia ho ó no fó-hatene liafuan diʼak sira-neʼe ba ó. 20 No haree! ó sei sai monok no la bele koʼalia toʼo loron neʼebé ó haree buat sira-neʼe sai loos, tanba ó la fiar haʼu-nia liafuan neʼebé sei sai loos iha tempu neʼebé hili tiha ona.” 21 Iha tempu neʼe, ema-lubun kontinua hein Zacarias, no sira komesa hanoin tansá nia demora iha templu. 22 Maibé kuandu Zacarias sai husi templu, nia la bele koʼalia ba sira, no sira komprende katak nia haree vizaun ida iha templu laran. Nia kontinua halo sinál ba sira, maibé nia nafatin monok. 23 Kuandu loron atu halo nia knaar ramata ona, nia fila fali ba ninia uma.

24 No liutiha loron sira-neʼe, ninia feen Isabel sai isin-rua no la sai husi uma ba fulan lima. Nia dehan: 25 “Neʼe mak buat neʼebé Jeová halo ba haʼu iha loron sira-neʼe. Nia fila oin ba haʼu hodi hasai tiha moe neʼebé haʼu sente iha ema nia leet.”

26 Kuandu Isabel isin-rua ba fulan neen ona, Maromak haruka anju Gabriel ba sidade Galileia nian ida naran Nazaré, 27 hodi hasoru feto virjen ida neʼebé promete ona atu kaben ho mane ida naran José husi David nia umakain. No feto virjen neʼe naran Maria. 28 No kuandu nia tama no hamriik iha feto neʼe nia oin, nia dehan: “Dame hela ho ó, ó neʼebé hetan bensaun boot. Jeová hamutuk ho ó.” 29 Maibé nia hakfodak tebetebes kuandu rona liafuan sira-neʼe no hahú hanoin kona-ba liafuan* sira-neʼe katak sá. 30 Entaun, anju neʼe dehan ba nia: “Keta taʼuk Maria, tanba ó monu loos ba Maromak nia laran, 31 no haree! ó sei sai isin-rua no sei tuur ahi oan-mane ida, no ó tenke hanaran nia Jesus. 32 Nia sei sai naran-boot no ema sei bolu nia nuʼudar Oan-Mane husi Ida neʼebé Aas Liu Hotu. No Maromak Jeová sei fó ba nia ninia aman David nia kadunan. 33 No nia sei ukun nuʼudar liurai ba Jacob nia umakain ba nafatin. Ninia ukun sei la iha rohan.”

34 Maibé Maria hatete ba anju neʼe: “Oinsá mak haʼu bele iha oan, basá haʼu seidauk hola mane ida?”* 35 Anju neʼe hatán ba nia dehan: “Espíritu santu sei tun ba ó, no kbiit husi Ida neʼebé Aas Liu Hotu sei proteje ó. Tan neʼe, ida neʼebé sei moris mai mak santu no Maromak nia Oan-Mane. 36 No haree! ó-nia família Isabel mós sai isin-rua ona ba fulan neen, maski nia idade ona no ema dehan katak nia la bele iha oan. 37 Tanba ba Maromak la iha buat ida neʼebé la bele.”* 38 Tuirmai Maria hatete: “Haree! Haʼu mak Jeová nia atan-feto! Halo buat hotu sai loos ba haʼu hodi tuir liafuan neʼebé Ita fó sai.” Ho ida-neʼe, anju husik hela nia.

39 Iha loron sira-neʼe, Maria prepara an no ho laran-manas nia laʼo ba sidade Judá nian ida iha foho, 40 no nia tama ba Zacarias nia uma no kumprimenta Isabel. 41 No kuandu Isabel rona Maria nia kumprimenta, labarik neʼebé iha Isabel nia knotak book an makaʼas, no Isabel sai nakonu ho espíritu santu, 42 no nia koʼalia ho lian makaʼas dehan: “Ita hetan bensaun boot liu fali feto sira seluk, no Maromak haraik nia bensaun ba oan neʼebé iha Ita-nia knotak! 43 No haʼu simu buat furak loos tanba haʼu-nia Naʼi nia inan mai vizita haʼu. 44 Basá, haree! kuandu Ita-nia kumprimenta toʼo haʼu-nia tilun, labarik neʼebé iha haʼu-nia knotak book an makaʼas hodi haksolok tebetebes. 45 No ksolok ba feto neʼebé fiar buat neʼebé nia rona, basá sei sai loos duni ba nia tuir buat neʼebé Jeová fó sai ona.”

46 No Maria dehan: “Haʼu fó hahiʼi ba Jeová, 47 no haʼu-nia laran la para atu haksolok iha Maromak haʼu-nia Salvadór, 48 tanba nia haree ona ba ninia atan-feto, maski atan neʼe mak ema baibain deʼit. No haree! husi tempu neʼe ba oin, jerasaun hotu sei fó sai katak haʼu kontente, 49 tanba Ida neʼebé iha kbiit boot halo ona buat furak mai haʼu, no ninia naran mak santu. 50 No husi jerasaun ba jerasaun, nia hatudu laran-sadiʼa ba sira neʼebé taʼuk ba nia. 51 Ho nia liman rasik, nia halo buat boot, nia halo namkari ema sira neʼebé foti-an iha sira-nia laran. 52 Nia hatún ona ukun-naʼin sira husi sira-nia kadunan no foti aas ema neʼebé kiʼik. 53 No nia halo bosu ema neʼebé hamlaha hodi fó ba sira buat neʼebé diʼak, no nia duni sai ema riku sira hodi bá ho liman-mamuk. 54 Nia mai ona atu fó ajuda ba ninia atan Izraél, atu hatudu katak nia hanoin-hetan nafatin ninia promete atu hatudu laran-sadiʼa 55 ba Abraão no ba ninia bei-oan sira, hanesan nia fó-hatene ona ba ita-nia beiʼala sira.” 56 Tuirmai Maria hela ho Isabel ba fulan tolu, no depois neʼe nia fila fali ba ninia uma rasik.

57 Tempu toʼo ona atu Isabel tuur ahi, no nia sai inan ba oan-mane ida. 58 Ninia viziñu no família sira rona katak Jeová hatudu laran-sadiʼa neʼebé boot ba Isabel, no sira hahú haksolok hamutuk ho nia. 59 No kuandu toʼo ona loron ualu, sira mai hodi halo sirkunsizaun ba labarik neʼe, no sira hakarak atu hanaran nia Zacarias hodi tuir ninia aman nia naran. 60 Maibé labarik neʼe nia inan hatán: “Labele! Tenke hanaran nia João.” 61 Ho ida-neʼe, sira hatete ba nia: “La iha ema ida iha Ita-nia família neʼebé iha naran neʼe.” 62 Tuirmai, sira bá hodi husu labarik neʼe nia aman liuhusi sinál atu hatene naran saida mak nia hakarak atu tau ba labarik neʼe. 63 No nia husu ai-kabelak ida hodi hakerek: “Nia naran mak João.” Ho ida-neʼe, sira hotu hakfodak. 64 Iha tempu neʼe kedas, ninia nanál sai mamar fali no nia bele koʼalia fali hodi fó hahiʼi ba Maromak. 65 No sira hotu neʼebé hela besik hahú sai taʼuk, no ema hotu iha área foho nian iha Judeia hahú koʼalia kona-ba buat hotu neʼe, 66 no sira hotu neʼebé rona kona-ba neʼe, sira rai ida-neʼe iha sira-nia laran no dehan: “Labarik neʼe sei sai oinsá loos?” Tanba loloos Jeová nia liman hamutuk ho labarik neʼe.

67 No labarik neʼe nia aman Zacarias sai nakonu ho espíritu santu* no nia fó sai Maromak nia mensajen hodi dehan: 68 “Hahiʼi ba Jeová, Maromak Izraél nian, tanba nia fila oin hodi fó salvasaun ba ninia povu. 69 Nia fó ona mai ita salvadór boot* ida husi ninia atan David nia umakain. 70 Neʼe mak buat neʼebé nia promete ona hodi fó sai liuhusi ninia profeta santu sira-nia ibun iha tempu uluk. 71 Nia promete atu salva ita husi ita-nia inimigu sira no husi sira hotu neʼebé odi ita. 72 Nia sei hatudu laran-sadiʼa ba ita hanesan nia promete ona ba ita-nia beiʼala sira, no nia sei hanoin-hetan ninia aliansa santu. 73 Neʼe mak promete neʼebé nia fó-hatene ona ba ita-nia beiʼala Abraão. 74 Nia promete katak depois nia salva tiha ita husi ita-nia inimigu, ita sei halo serbisu santu ba nia la ho taʼuk, 75 no ho laran-metin no iha dalan loos durante ita-nia moris tomak. 76 Maibé kona-ba ó, haʼu-nia oan, ó sei sai profeta ba Ida neʼebé Aas Liu Hotu, no ó sei laʼo uluk iha Jeová nia oin atu hadiʼa nia dalan, 77 no fó sai ba ninia povu katak nia sei salva sira hodi fó perdua ba sira-nia sala 78 tanba ita-nia Maromak nia laran-sadiʼa. Maromak nia laran-sadiʼa neʼe sei fó naroman ba ita husi lalehan, hanesan loro-matan saʼe, 79 atu fó naroman ba sira neʼebé tuur iha nakukun laran no iha lalatak mate nian, no atu ajuda ita laʼo ho didiʼak iha dalan dame nian.”

80 No labarik neʼe kontinua sai boot iha isin no iha neon, no nia kontinua hela iha rai-fuik maran toʼo loron neʼebé nia hatudu an iha Izraél nia oin.

2 No iha loron sira neʼebá, Liurai Agusto* fó mandamentu ida atu ema hotu iha mundu tomak bá tau naran, 2 neʼe mak dala primeiru ba ema atu tau naran, no ida-neʼe akontese kuandu Kirino mak governadór ba rai-Síria. 3 No ema hotu laʼo ba sira-nia sidade rasik hodi tau naran. 4 Tanba José husi umakain David nian, entaun nia laʼo husi sidade Nazaré iha Galileia, no fila fali ba David nia sidade iha Judeia, neʼebé bolu Belein. 5 Nia bá atu tau naran hamutuk ho Maria, neʼebé sai ona ninia kaben, no iha tempu neʼebá Maria isin-rua todan. 6 Kuandu sira toʼo iha neʼebá, Maria nia loron atu tuur ahi toʼo ona. 7 No nia tuur ahi oan-mane ida, ninia oan primeiru, no haneras hodi hatoba nia iha animál nia han-fatin, tanba la iha fatin ba sira atu hela.

8 No iha área neʼebá, iha bibi-atan balu neʼebé hein sira-nia bibi iha rai-luan* durante kalan tomak. 9 Derrepente deʼit, Jeová nia anju ida mosu ba sira, no Jeová nia glória nabilan haleʼu sira, no sira sai taʼuk tebetebes. 10 Maibé anju neʼe hatete ba sira: “Keta taʼuk, basá, haree! haʼu fó sai ba imi liafuan diʼak neʼebé sei lori ksolok boot ba ema hotu, 11 tanba ohin, moris ona ba imi Salvadór ida iha David nia sidade, nia mak Kristu, Naʼi. 12 Neʼe mak sinál ba imi: Imi sei hetan bebé ida neʼebé haneras no hatoba hela iha animál nia han-fatin.” 13 No derrepente deʼit, hamutuk ho anju neʼe, iha anju lubun boot husi tropa lalehan nian, no sira hahiʼi Maromak hodi dehan: 14 “Glória ba Maromak neʼebé iha fatin aas, no dame ba ema sira neʼebé Maromak simu iha rai.”

15 Kuandu anju sira-neʼe husik hela sira hodi bá fali lalehan, bibi-atan sira hahú hatete ba malu: “Mai ita bá Belein no haree buat neʼebé mosu, neʼebé Jeová fó-hatene ona ba ita.” 16 Sira bá ho ansi no sira hetan Maria ho José, no mós bebé neʼebé hatoba hela iha animál nia han-fatin. 17 Kuandu sira haree nia, sira konta fali liafuan neʼebé fó sai ona ba sira kona-ba bebé neʼe. 18 No ema hotu neʼebé rona sai hakfodak ho buat neʼebé bibi-atan sira fó sai. 19 Maibé Maria hahú rai metin liafuan sira-neʼe iha ninia laran no hanoin kleʼan kona-ba buat sira-neʼe katak sá. 20 Tuirmai, bibi-atan sira fila fali, no sira fó glória no hahiʼi Maromak kona-ba buat hotu neʼebé sira rona no haree, neʼebé tuir duni liafuan neʼebé fó sai ona ba sira.

21 No kuandu toʼo ona loron ualu atu halo sirkunsizaun ba nia, sira hanaran nia Jesus, naran neʼebé anju fó-hatene ona antes Maria sai isin-rua.

22 No mós, kuandu sira-nia loron atu hamoos an ramata ona tuir Moisés nia Ukun-Fuan, sira lori labarik neʼe ba Jeruzalein atu hatudu iha Jeová nia oin katak labarik neʼe mak ninian. 23 Neʼe tuir buat neʼebé hakerek nanis ona iha Jeová nia Ukun-Fuan: “Oan-mane primeiru hotu sei sai santu ba Jeová.” 24 No sira hasaʼe sakrifísiu hodi tuir buat neʼebé fó sai iha Jeová nia Ukun-Fuan: “Imi tenke hasaʼe manu-falur rua ka manu-pombu oan rua.”

25 No haree! iha Jeruzalein iha mane ida naran Simeão. Mane neʼe ema laran-loos no hamtaʼuk ba Maromak, no nia hein hela tempu neʼebé Maromak sei fó ksolok ba Izraél, no espíritu santu hamutuk ho nia. 26 No mós, liuhusi espíritu santu Maromak hatudu ba nia katak nia sei la mate antes nia haree Ida neʼebé Jeová hili.* 27 Hodi tuir espíritu santu* nia matadalan nia bá templu, no Maria no José mós lori Jesus neʼebé sei bebé hodi tama ba templu atu bele halo tuir toman neʼebé hakerek iha Ukun-Fuan kona-ba oan-mane primeiru. 28 No Simeão rasik simu labarik neʼe iha nia liman no fó hahiʼi ba Maromak hodi dehan: 29 “Naʼi Ukun-Naʼin Boot Liu, ohin haʼu rasik haree ona labarik neʼe hanesan Ita hatete, no agora haʼu bele mate ho dame, 30 tanba haʼu-nia matan haree ona dalan neʼebé Ita sei lori salvasaun, 31 neʼebé Ita prepara ona no agora ema hotu bele haree nia. 32 Nia mak naroman neʼebé sei hasai tiha hena neʼebé taka netik nasaun sira-nia matan, no nia mak glória ba ema Izraél.” 33 No bebé neʼe nia inan-aman hakfodak ho buat neʼebé Simeão fó sai kona-ba bebé neʼe. 34 No mós, Simeão husu Maromak nia bensaun ba sira, no hatete ba Maria, labarik neʼe nia inan, hodi dehan: “Maromak haruka mane neʼe mai, no tanba nia ema Izraél balu sei sidi no sira seluk sei hamriik fali. No maski Maromak sei hatudu sinál sira ba ema katak Maromak hamutuk ho nia, maibé ema barak sei koʼalia kontra nia. 35 Maromak hili nia atu nuneʼe bele hatudu sai ema barak nia laran, no kona-ba ó, surik naruk ida sei sona borus ó-nia laran.”*

36 No iha mós profeta ida naran Ana, Fanuel nia oan-feto, husi suku Aser, no nia idade boot ona. Nia kaben iha nia tempu joven,* no nia moris hamutuk ho nia laʼen ba tinan hitu deʼit. 37 No agora nia feto-faluk ida, no nia tinan ualunulu-resin-haat. Kalan-loron nia sempre bá iha templu atu adora Maromak hodi halo jejún no harohan. 38 No iha tempu neʼe duni mak nia hakbesik no hahú fó-agradese ba Maromak, no koʼalia kona-ba labarik neʼe ba sira hotu neʼebé hein hela ba Jeruzalein nia salvasaun.

39 No kuandu sira halo ona buat hotu hodi tuir Jeová nia Ukun-Fuan, sira fila fali ba Galileia hodi bá sira-nia sidade Nazaré. 40 Labarik neʼe kontinua sai boot no forsa. Nia sai nakonu ho matenek, no Maromak kontinua apoia nia.

41 No, ninia inan-aman iha toman atu bá Jeruzalein tinan-tinan hodi tuir Festa Salvasaun nian. 42 Kuandu nia tinan sanulu-resin-rua ona, sira bá festa iha Jeruzalein hodi tuir sira-nia toman. 43 Sira hela iha neʼebá toʼo loron festa nian ramata. No nuʼudar sira fila daudaun, Jesus la fila hamutuk ho sira maibé hela iha Jeruzalein, no ninia inan-aman la hatene kona-ba neʼe. 44 Sira hanoin katak nia laʼo hamutuk ho família sira. No laʼo tiha ba loron ida, sira hahú buka nia iha família no maluk sira leet. 45 Maibé kuandu sira la hetan nia, sira fila fali ba Jeruzalein hodi buka nia. 46 Liutiha loron tolu, sira hetan nia iha templu no nia tuur hela iha mestre sira-nia leet hodi rona ba sira no husu pergunta ba sira. 47 No sira hotu neʼebé rona ba nia hakfodak tebes kona-ba ninia matenek no ninia resposta sira. 48 Kuandu nia inan-aman haree nia, sira hakfodak, no nia inan hatete ba nia: “Oan, tansá ó halo nuneʼe mai ami? Haʼu no mós ó-nia aman laran-susar tebes hodi buka ó.” 49 Maibé nia hatete ba sira: “Tansá mak imi buka haʼu? Imi la hatene katak haʼu sei hela iha haʼu-nia Aman nia uma?” 50 Maski nuneʼe, sira la komprende liafuan neʼebé nia dehan ba sira.

51 No nia bá fali hamutuk ho sira no sira toʼo ba Nazaré. Nia kontinua halo tuir sira. No mós ninia inan rai liafuan hotu neʼe iha ninia laran. 52 No Jesus kontinua sai boot, simu matenek, no kontinua iha naran diʼak ho Maromak no mós iha ema nia oin.

3 Kuandu Liurai* Tibério nia ukun atu tama ba tinan sanulu-resin-lima, no Pónsio Pilatos mak governadór Judeia nian, no Herodes mak ukun-naʼin ba área Galileia, no mós ninia maun Filipe mak ukun-naʼin iha Itureia no Trakonitis, no kuandu Lisánias mak ukun-naʼin ba área Abilene, 2 no mós kuandu Anas no Caifás mak ulun-naʼin amlulik sira, iha tempu neʼe Maromak fó sai ninia mensajen ba João, Zacarias nia oan-mane neʼebé iha rai-fuik.

3 No João laʼo ba fatin hotu besik Mota Jordaun hodi haklaken ba ema atu hetan batizmu hodi hatudu katak sira hakribi sala no hetan perdua, 4 neʼe tuir buat neʼebé hakerek nanis ona iha profeta Isaías nia livru neʼebé dehan: “Rona bá! Ema ida iha rai-fuik hakilar: ‘Prepara dalan ba Jeová! Halo loos nia dalan sira. 5 No foho-leet hotu tenke taka tiha, no foho hotu tenke halo tetuk, no dalan kleʼuk hotu tenke halo loos tiha no dalan aat hotu tenke halo kabeer. 6 No ema hotu sei haree oinsá Maromak sei fó salvasaun.’”

7 Tan neʼe, João hahú hatete ba ema-lubun neʼebé mai atu hetan batizmu husi nia, hodi dehan: “Imi samea nia oan sira, sé mak hatete ba imi katak imi bele halai-sees husi Maromak nia hirus neʼebé atu mai? 8 Tan neʼe, hatudu liuhusi imi-nia hahalok* katak imi hakribi sala. No keta dehan ba imi-nia an: ‘Ami-nia aman mak Abraão.’ Basá haʼu hatete ba imi katak Maromak iha kbiit atu halo fatuk sira-neʼe sai Abraão nia oan. 9 Tuir loloos, baliu tau ona iha ai nia hun, no tan neʼe, ai hotu neʼebé la fó fuan diʼak sei tesi tiha no soe ba ahi.”

10 No ema-lubun husu ba nia: “Entaun, ami tenke halo saida?” 11 Nia hatán ba sira: “Ema neʼebé iha hatais tahan rua, fahe ida ba ema neʼebé la iha, no ema neʼebé iha ai-han, halo mós nuneʼe bá.” 12 No ema kobradór impostu nian mós mai atu hetan batizmu, no sira dehan ba nia: “Mestre, ami tenke halo saida?” 13 Nia hatete ba sira: “Keta husu osan liu fali buat neʼebé fó sai tiha ona tuir lei kona-ba impostu.” 14 No sira neʼebé serbisu nuʼudar tropa husu nia: “Ami mós tenke halo saida?” No nia hatán ba sira: “Keta halo aat ba ema ida ka duun matak ema, maibé haksolok bá ho kolen neʼebé imi simu.”

15 No ema hein namanas hela ba Kristu, tan neʼe sira hanoin kona-ba João hodi dehan iha sira-nia laran: “Nia mak Kristu ka?” 16 João esplika ba sira hotu: “Haʼu fó batizmu ba imi ho bee, maibé ida neʼebé iha kbiit boot liu fali haʼu sei mai, no ninia sandálias talin deʼit mós haʼu la merese atu kore. Nia sei fó batizmu ba imi ho espíritu santu no ho ahi. 17 Iha nia liman, nia kaer ona buat neʼebé uza atu haketak trigu,* no nia sei hamoos hotu fatin sama trigu nian no nia sei haloot trigu ba fatin trigu nian, maibé trigu nia kulit nia sei sunu ho ahi neʼebé sei la mate.”

18 Tan neʼe, João mós hanorin buat barak seluk tan, no nia kontinua haklaken liafuan diʼak ba ema. 19 Maibé Herodes, ukun-naʼin distritu nian, simu konsellu husi João kona-ba Herodia, ninia maun nia feen, no kona-ba hahalok aat sira neʼebé Herodes halo. 20 No Herodes halo hahalok aat ida tan: Nia hatama João iha komarka.

21 Kuandu ema hotu hetan batizmu, Jesus mós hetan batizmu. No nuʼudar nia halo orasaun, lalehan nakloke, 22 no espíritu santu neʼebé hanesan manu-pombu ida tun ba nia leten, no lian ida sai husi lalehan dehan: “Ó mak haʼu-nia Oan-Mane neʼebé haʼu hadomi, ida neʼebé halo haʼu-nia laran kontente.”

23 No mós, kuandu Jesus hahú ninia serbisu, nia tinan tolunulu. No ema barak hanoin katak nia mak

4 Nakonu ho espíritu santu, Jesus husik hela Mota Jordaun, no espíritu santu lori nia ba rai-fuik 2 ba loron haatnulu, no iha neʼebá Diabu tenta nia. No durante loron sira-neʼe nia la han buat ida, entaun, kuandu loron sira-neʼe ramata nia sente hamlaha. 3 Ho ida-neʼe Diabu hatete ba nia: “Se ó Maromak nia oan ida karik, haruka fatuk neʼe sai paun.” 4 Maibé Jesus hatán ba nia: “Hakerek nanis ona: ‘Ema sei la moris deʼit ho paun.’”

5 Entaun, nia lori Jesus ba foho ida no hatudu ba nia mundu nia ukun hotu. 6 No Diabu hatete ba Jesus: “Haʼu sei fó ba ó kbiit husi ukun sira-neʼe hotu no sira-nia glória, tanba buat sira-neʼe fó tiha ona mai haʼu, no haʼu bele fó ba ida neʼebé haʼu hakarak. 7 Tan neʼe, se ó adora haʼu,* buat hotu neʼe sei sai ó-nian.” 8 Jesus hatán ba nia: “Hakerek nanis ona: ‘Ó tenke adora Jeová ó-nia Maromak, no ba nia deʼit mak ó tenke halo serbisu santu.’”

9 Nia mós lori Jesus ba Jeruzalein no tau nia iha templu nia moru leten, no hatete ba nia: “Se ó Maromak nia oan ida karik, soe ó-nia an ba kraik, 10 basá hakerek nanis ona: ‘Nia sei haruka nia anju sira atu proteje ó’, 11 no: ‘Sira sei lori ó iha sira-nia liman, atu nuneʼe ó-nia ain sei la kona fatuk ida.’” 12 Jesus hatete ba nia: “Hakerek nanis ona: ‘Ó labele koko Jeová ó-nia Maromak.’” 13 Tuirmai, kuandu Diabu koko hotu tiha Jesus, nia husik Jesus toʼo tempu diʼak seluk.

14 Ho kbiit husi espíritu santu Jesus fila fali ba Galileia. No ema habelar liafuan diʼak kona-ba nia iha fatin hotu. 15 No mós, nia hahú hanorin iha sira-nia sinagoga sira, no ema barak koʼalia diʼak kona-ba nia.

16 Nia toʼo ba Nazaré, fatin neʼebé nia sai boot, no hodi tuir ninia toman iha loron Sábadu, nia tama ba sinagoga, no hamriik atu lee. 17 Entaun, ema fó ba nia livru* profeta Isaías nian no nia loke no hetan fatin ida neʼebé hakerek: 18 “Jeová fó ona ninia espíritu mai haʼu, tanba nia hili haʼu atu haklaken liafuan diʼak ba kiak sira. Nia haruka haʼu atu haklaken ba atan sira katak sira sei livre, atu halo ema matan-delek sira haree fali, no atu halo livre ema neʼebé hetan terus, 19 atu haklaken kona-ba tempu neʼebé sira bele hetan fali bensaun husi Jeová.” 20 Neʼe hotu tiha, nia taka livru neʼe no fó fali ba serbisu-naʼin sinagoga nian no nia tuur. Ema hotu iha sinagoga laran matan hateke ba nia. 21 Tuirmai, nia hatete ba sira: “Ohin, eskritura neʼebé imi foin rona, sai loos ona.”

22 No sira hotu hahú koʼalia diʼak kona-ba nia no hakfodak ho liafuan furak sira neʼebé sai husi ninia ibun, no sira dehan: “Nia mak José nia oan ida, loos ka lae?” 23 Ho ida-neʼe nia hatete ba sira: “Ho loloos, imi sei konta ai-knanoik neʼe kona-ba haʼu: ‘Doutór, kura ó-nia an rasik bá. Buat neʼebé ami rona mosu iha Kafarnaum, halo mós iha neʼe, iha ó-nia rai rasik.’” 24 Maibé nia dehan ba sira: “Haʼu hatete loloos ba imi katak ema sei la simu profeta ida iha nia rai rasik. 25 Tebes haʼu dehan ba imi: Iha tempu Elias nian, kuandu lalehan taka tiha ba tinan tolu no fulan neen, hodi hamosu hamlaha boot ba rai tomak, iha tempu neʼebá iha feto-faluk barak iha Izraél. 26 Maski nuneʼe, Maromak la haruka Elias ba feto sira-neʼe, maibé ba deʼit feto-faluk ida iha Sarepta iha rai-Sidon. 27 No mós, iha profeta Eliseu nia tempu iha ema moras-lepra barak iha Izraél, maibé la iha ida mak hetan isin-diʼak, só deʼit Naaman husi rai-Síria.” 28 No ema hotu iha sinagoga laran neʼebé rona buat sira-neʼe sai hirus tebes, 29 no sira hamriik hodi lori nia ba sidade nia liʼur. Sira lori nia ba foho ninin, foho neʼebé sira harii sira-nia sidade, atu bele soe nia ba kraik. 30 Maibé nia laʼo liu sira-nia klaran no sai husi fatin neʼe.

31 No nia tun ba Galileia nia sidade ida naran Kafarnaum. Iha neʼebá nia hanorin ema iha loron Sábadu, 32 no sira hakfodak ho nia dalan atu hanorin, tanba buat neʼebé nia hanorin mai husi Maromak.* 33 Iha sinagoga neʼe, iha mane ida neʼebé anju aat domina, no nia hakilar ho lian makaʼas dehan: 34 “Hei! Tansá mak Ita mai iha neʼe, Jesus, ema Nazaré? Ita mai atu halakon ami ka? Haʼu hatene ho loloos Ita mak sé. Ita mak Ida neʼebé santu husi Maromak.” 35 Maibé Jesus siʼak nia hodi dehan: “Nonook, no sai husi mane neʼe!” No depois anju aat soe tiha mane neʼe ba rai iha sira-nia leet, anju aat sai husi mane neʼe hodi la halo aat ba nia. 36 Ho ida-neʼe, ema hotu sai hakfodak, no sira hahú koʼalia ba malu dehan: “Haree! Liafuan saida mak nia koʼalia neʼe? Ho kbiit nia haruka anju aat sira sai, no sira sai duni!” 37 No ema kontinua konta kona-ba nia iha fatin hotu iha rai neʼe.

38 Kuandu Jesus sai husi sinagoga neʼe, nia bá hodi tama Simão nia uma. Iha tempu neʼe, Simão nia banin-feto terus tanba moras isin-manas tebes, no sira husu ba Jesus atu ajuda. 39 Entaun, Jesus hakbesik ba fatin neʼebé feto neʼe toba no kura feto neʼe nia moras isin-manas. Ho ida-neʼe, feto neʼe hadeer kedas no hahú prepara hahán ba sira.

40 Kuandu loron tun daudaun, sira hotu neʼebé iha ema moras iha sira-nia uma, sira lori ba Jesus. Sira iha moras oioin, no nia tau liman ba sira ida-idak, no kura sira. 41 Anju aat sira mós sai husi ema barak, no sira hakilar ho lian makaʼas dehan: “Ó mak Maromak nia Oan-Mane!” Maibé, nia siʼak sira, hodi la husik sira atu koʼalia, tanba sira hatene katak nia mak Kristu.

42 Loron tuirmai, nia sai hodi laʼo ba fatin fuik ida. Maibé ema-lubun buka tuir nia no sira toʼo ba fatin neʼebé nia bá, no sira koko atu tahan netik nia atu labele husik hela sira. 43 Ho ida-neʼe, nia hatete ba sira: “Haʼu tenke haklaken mós liafuan diʼak kona-ba Maromak nia Ukun iha sidade seluk, basá tan neʼe mak Maromak haruka haʼu mai.” 44 Neʼe duni, nia bá hodi haklaken iha sinagoga sira iha Judeia.

5 Loron ida, Jesus hamriik iha tasi-ibun Genesaré* nian hodi hanorin. No ema-lubun hahú hakbesik nia hodi rona Maromak nia liafuan no ema barak sena nia. 2 No nia haree ró rua neʼebé para hela iha tasi ninin, maibé peskadór sira tun tiha ona husi ró sira-neʼe no fase hela sira-nia rede. 3 Saʼe tiha ba ró ida, nia husu Simão neʼebé mak ró-naʼin atu lori ró neʼe dook uitoan husi tasi-ibun. Tuirmai, nia tuur no hahú hanorin ema-lubun husi ró neʼe. 4 Kuandu nia koʼalia hotu tiha, nia hatete ba Simão dehan: “Lori ró ba tasi klaran, no soe imi-nia rede ba tasi.” 5 Simão hatán: “Mestre, ami serbisu makaʼas ba kalan tomak no la hetan buat ida, maibé tanba Ita mak haruka, haʼu sei soe rede neʼe.” 6 Maibé, kuandu sira halo ida-neʼe, sira kaer ikan barak tebes toʼo sira-nia rede hahú sai naklees. 7 Nuneʼe, sira halo sinál hodi bolu sira-nia maluk iha ró seluk atu mai no ajuda sira, no sira mai. Sira halo nakonu ró rua neʼe ho ikan toʼo ró sira-neʼe besik atu mout. 8 Haree tiha neʼe, Simão Pedro hakneʼak iha Jesus nia oin no dehan: “Naʼi, hadook an husi haʼu, tanba haʼu ema sala-naʼin.” 9 Nia hatete ida-neʼe tanba sira kaer ikan barak tebes no neʼe halo nia no mós sira neʼebé hamutuk ho nia sai hakfodak loos, 10 nuneʼe mós ho Tiago no João, Zebedeu nia oan-mane sira, neʼebé serbisu hamutuk ho Simão. Maibé Jesus hatete ba Simão: “Keta taʼuk. Hahú ohin, ó sei kail ema.” 11 Entaun, sira lori fali ró ba rai-maran, no husik tiha buat hotu, sira laʼo tuir nia.

12 Iha tempu seluk, kuandu Jesus iha sidade ida, mane ida neʼebé isin nakonu ho moras-lepra haree nia, no mane neʼe hakneʼak ho oin ba rai no husu Jesus dehan: “Naʼi, haʼu hatene katak se Ita-Boot hakarak, Ita bele halo haʼu sai moos.” 13 Ho ida-neʼe, Jesus lolo nia liman hodi kona mane neʼe, no dehan: “Haʼu hakarak. Sai moos bá.” No mane neʼe nia moras-lepra lakon kedas. 14 No Jesus bandu mane neʼe atu labele fó-hatene ema ida. No nia dehan ba mane neʼe: “Bá hatudu ó-nia an ba amlulik, no hasaʼe ba Maromak prezente neʼebé tuir Moisés nia Ukun-Fuan tanba ó sai moos ona, no neʼe sai nuʼudar sasin ba sira.” 15 No ema habelar liután liafuan kona-ba nia, no ema-lubun boot mai atu rona nia no atu nia kura sira-nia moras. 16 Maibé, nia kontinua bá fatin fuik hodi halo orasaun.

17 Loron ida kuandu nia hanorin, ema farizeu sira no mestre Ukun-Fuan nian, neʼebé mai husi knua oioin iha Galileia no Judeia no husi Jeruzalein, sira mós tuur hela iha neʼebá, no Jeová nia kbiit hamutuk ho Jesus hodi kura ema. 18 No haree! ema lori mane ida iha ninia toba-fatin no mane neʼe moras isin-matek, no sira buka dalan atu lori nia ba Jesus atu tau iha Jesus nia oin. 19 Maibé tanba ema barak, sira la hetan dalan atu lori mane neʼe tama, entaun sira saʼe ba uma-kakuluk, no liuhusi kakuluk sira hatún mane neʼe hamutuk ho ninia toba-fatin toʼo iha Jesus nia oin. 20 Haree tiha sira-nia fiar, Jesus hatete: “Haʼu-nia maluk, ó-nia sala perdua tiha ona.” 21 Ho ida-neʼe, ema eskriba no farizeu sira hahú koʼalia ba malu dehan: “Sé mak ema neʼe hodi nia brani koʼalia kontra Maromak? La iha ema ida bele perdua sala, só Maromak deʼit.” 22 Maibé, tanba hatene sira-nia hanoin, Jesus hatete ba sira: “Saida mak imi hanoin iha imi-nia laran? 23 Ida neʼebé mak fasil liu atu dehan: ‘Ó-nia sala perdua tiha ona’, ka ‘Hamriik no laʼo bá’? 24 Maibé, haʼu sei hatudu ba imi katak Oan-Mane husi ema iha kbiit atu perdua sala iha rai.” Tuirmai, nia dehan ba ema moras isin-matek neʼe: “Haʼu hatete ba ó: Hamriik, foti ó-nia toba-fatin no bá ó-nia uma.” 25 No ema neʼe hamriik kedas iha sira hotu nia oin, no foti ninia toba-fatin no laʼo ba ninia uma hodi hahiʼi Maromak. 26 Ema hotu hakfodak ho ida-neʼe, no sira hahú atu hahiʼi Maromak, no sira sai taʼuk tebes no dehan: “Buat neʼebé ita haree ohin mak oin-seluk duni!”

27 Depois sai tiha husi fatin neʼe, nia haree kobradór impostu nian ida naran Levi tuur hela iha fatin impostu nian, no nia hatete ba Levi: “Mai tuir haʼu.” 28 Husik tiha buat hotu, Levi hamriik no laʼo tuir Jesus. 29 No Levi halo festa boot ba Jesus iha nia uma, no iha mós ema kobradór impostu nian barak no ema seluk hamutuk ho sira hodi tuur iha meza atu han. 30 Kuandu haree ida-neʼe, ema farizeu sira no mós sira-nia eskriba hahú muramura no dehan ba Jesus nia dixípulu sira: “Tansá mak imi han no hemu hamutuk ho kobradór impostu nian no sala-naʼin sira?” 31 Jesus hatán ba sira: “Ema neʼebé isin-diʼak la presiza doutór, maibé ema neʼebé moras presiza. 32 Haʼu mai laʼós atu bolu ema loos, maibé atu bolu ema sala-naʼin atu hakribi sala.”

33 Sira hatete ba nia: “João nia dixípulu sira halo jejún beibeik no harohan, nuneʼe mós ho farizeu sira-nia dixípulu, maibé ó-nia dixípulu sira han no hemu.” 34 Jesus hatete ba sira: “Imi labele haruka noivu nia belun sira atu jejún kuandu noivu sei hamutuk ho sira, loos ka lae? 35 Maibé, loron sei toʼo mai kuandu noivu la iha tan iha sira-nia leet, iha tempu neʼe mak sira sei jejún.”

36 Liután neʼe, nia hatoʼo ai-knanoik ba sira dehan: “La iha ema ida neʼebé tesi hena foun hodi taka roupa tuan nia kuak, basá se nia halo ida-neʼe, hena foun sei halo roupa tuan nia kuak sai boot liután, no mós hena foun haree la hanesan ho roupa tuan. 37 Liután neʼe, la iha ema ida neʼebé sei tau tua foun ba tua-fatin neʼebé tuan, basá se nia halo ida-neʼe, tua foun sei halo tua-fatin neʼe nakfera no sai aat, no tua sei fakar. 38 Maibé tua foun tenke tau iha tua-fatin neʼebé foun. 39 Ema neʼebé hemu ona tua neʼebé tuan lakohi atu hemu tua foun, tanba nia dehan: ‘Tua neʼebé tuan mak diʼak.’”

6 Iha loron Sábadu ida, Jesus laʼo liu toʼos trigu nian, no ninia dixípulu kuʼu trigu-musan, no dulas neʼe ho liman no han. 2 Haree ida-neʼe, ema farizeu balu dehan: “Tansá mak imi halo buat neʼebé bandu iha loron Sábadu?” 3 Maibé Jesus hatán ba sira: “Imi la lee buat neʼebé David halo, kuandu nia no ema sira neʼebé hamutuk ho nia hamlaha? 4 Nia tama ba Maromak nia uma no simu paun neʼebé santu hodi han no fó mós ba ema sira neʼebé hamutuk ho nia, maski lei bandu katak ema ida labele han só amlulik sira deʼit mak bele.” 5 Nia dehan tan ba sira: “Oan-Mane husi ema mak loron Sábadu nia Naʼi.”

6 Iha loron Sábadu seluk, nia tama ba sinagoga no hahú hanorin. Iha fatin neʼe iha mós mane ida neʼebé ninia liman-loos matek. 7 Eskriba no farizeu sira haree didiʼak se nia atu kura ema iha loron Sábadu ka lae, tanba sira buka razaun atu duun nia. 8 Maibé, tanba nia hatene sira-nia hanoin, nia hatete ba mane neʼebé liman-matek neʼe: “Hamriik no mai iha klaran.” No nia mai hodi hamriik duni iha klaran. 9 Tuirmai, Jesus hatete ba sira: “Haʼu husu imi: Sala atu halo hahalok diʼak ka aat iha loron Sábadu, atu salva ka oho ema* ka lae?” 10 Depois hateke haleʼu tiha ba sira hotu, Jesus dehan ba mane neʼe: “Lolo ó-nia liman.” Nia lolo nia liman, no nia liman sai diʼak. 11 Maibé sira sai hirus tebes, no sira hahú koʼalia ba malu kona-ba saida mak sira sei halo ba Jesus.

12 Iha loron sira neʼebá, nia sai hodi bá foho atu halo orasaun, no nia halo orasaun ba Maromak kalan tomak. 13 No kuandu rai loron ona, nia bolu ninia dixípulu sira atu hakbesik ba nia no husi sira leet nia hili ema naʼin sanulu-resin-rua, no nia bolu sira apóstolu. 14 Sira-nia naran mak Simão, ida neʼebé nia bolu Pedro; no ninia alin André;* Tiago no João; Filipe no Bartolomeu; 15 Mateus no Tomé; Tiago, Alfeu nia oan-mane; no Simão, ida neʼebé bolu “laran-manas”; 16 Judas, Tiago nia oan-mane; no Judas Iscariotes, ida neʼebé ikusmai sai traidór.

17 No nia tun fali husi foho hamutuk ho sira toʼo fatin tetuk ida, no iha neʼebá iha dixípulu lubun boot, no mós ema barak seluk neʼebé husi Judeia tomak no Jeruzalein, no mós husi área tasi nian iha rai-Tiro no Sidon, sira mai atu rona nia no atu nia kura sira-nia moras. 18 No nia mós kura sira hotu neʼebé hetan susar tanba anju aat sira. 19 No ema-lubun hotu buka atu kona Jesus, basá kuandu sira kona nia, kbiit sai husi nia no kura sira hotu.

20 Tuirmai, nia foti matan ba nia dixípulu sira no hahú dehan:

“Kontente ba imi neʼebé kiak, tanba Maromak nia Ukun mak imi-nian.

21 “Kontente ba imi neʼebé ohin hamlaha, tanba imi sei bosu.

“Kontente ba imi neʼebé ohin tanis, tanba imi sei hamnasa.

22 “Kontente ba imi bainhira ema odi imi, la simu imi, no koʼalia aat imi no hafoʼer imi-nia naran tanba Oan-Mane husi ema. 23 Haksolok bá iha loron neʼe no haksoit bá, tanba haree! imi-nia kolen boot tebes iha lalehan, basá iha dalan hanesan neʼe sira-nia beiʼala mós halo ba profeta sira.

24 “Maibé susar ba imi neʼebé riku, tanba imi hetan ona imi-nia ksolok hotu.

25 “Susar ba imi neʼebé ohin bosu, tanba imi sei hamlaha.

“Susar ba imi neʼebé ohin hamnasa, tanba imi sei tanis no halerik.

26 “Susar ba imi kuandu ema hotu koʼalia diʼak kona-ba imi, tanba iha dalan hanesan neʼe sira-nia beiʼala mós halo ba profeta falsu sira.

27 “Maibé haʼu hatete ba imi neʼebé rona: Hadomi nafatin imi-nia inimigu, no halo diʼak ba sira neʼebé odi imi, 28 husu Maromak atu haraik bensaun ba sira neʼebé fó-malisan ba imi, no harohan ba sira neʼebé koʼalia aat imi. 29 Se ema basa ó-nia hasan sorin ida, see tan ba nia ó-nia hasan sorin seluk, no se ema hadau ó-nia roupa ida, fó tan ba nia ó-nia roupa seluk neʼebé ó hatais. 30 Fó ba ema neʼebé husu buat ruma ba imi, no keta husu fali imi-nia sasán kuandu ema hadau husi imi.

31 “No mós, buat neʼebé imi hakarak ema halo ba imi, halo mós nuneʼe ba sira.

32 “Sé mak atu gaba imi se imi hadomi deʼit ema neʼebé hadomi imi? Ema sala-naʼin mós hadomi ema neʼebé hadomi sira. 33 No, sé mak atu gaba imi se imi hatudu hahalok diʼak ba deʼit sira neʼebé halo diʼak ba imi? Ema sala-naʼin mós halo buat neʼebé hanesan. 34 No mós, sé mak atu gaba imi se imi fó debe deʼit ba ema neʼebé imi fiar katak sira sei selu fali? Ema sala-naʼin mós fó debe ba sala-naʼin seluk no hein katak sira sei selu fali debe hotu. 35 Duké halo ida-neʼe, hadomi nafatin imi-nia inimigu sira no halo buat diʼak ba ema no fó debe hodi la hein atu ema selu fali. Se nuneʼe imi-nia kolen sei boot tebes, no imi sei sai nuʼudar oan ba Ida neʼebé Aas Liu Hotu, tanba nia hatudu laran-diʼak ba ema neʼebé la fó-agradese no ba ema aat. 36 Kontinua hatudu laran-sadiʼa, hanesan imi-nia Aman mós hatudu laran-sadiʼa.

37 “Liután neʼe, keta* tesi lia ba ema, no Maromak sei la tesi lia ba imi, no keta duun ema, no Maromak mós sei la duun imi. Kontinua perdua ema seluk, no Maromak mós sei perdua imi. 38 Fó ba ema seluk, no sira mós sei fó ba imi. Ho laran-diʼak sira sei fakar iha imi-nia bolsu,* doko tan, hanehan tun, no sai nakonu liu. Basá buat neʼebé imi sukat ba ema, nuneʼe mós ema sei sukat ba imi.”

39 Tuirmai, nia mós konta ai-knanoik ida ba sira: “Matan-delek ida bele hatudu dalan ba matan-delek seluk ka lae? Sira naʼin-rua sei monu ba rai-kuak, loos ka lae? 40 Baibain eskolante ida la bele sai diʼak liu fali nia mestre, maibé ema hotu neʼebé simu hanorin didiʼak sei sai hanesan nia mestre. 41 Entaun, tansá ó haree duʼut-lahan iha ó-nia maluk nia matan, maibé ó la haree ai-kabelak* iha ó-nia matan rasik? 42 Oinsá mak ó bele dehan ba ó-nia maluk: ‘Husik haʼu hasai duʼut-lahan neʼe husi ó-nia matan’, maibé ó la haree ai-kabelak iha ó-nia matan rasik? Ema laran-makerek! Hasai uluklai ai-kabelak husi ó-nia matan rasik, no depois neʼe ó bele haree ho momoos oinsá atu hasai duʼut-lahan husi ó-nia maluk nia matan.

43 “Basá ai-hun diʼak nunka fó fuan aat, no ai-hun dodok nunka fó fuan diʼak. 44 Basá ema hatene ai ida-idak liuhusi nia fuan. Ema nunka kuʼu uvas ka ai-figeira fuan husi ai-tarak. 45 Ema diʼak lori sai buat diʼak neʼebé rai hela iha nia laran, maibé ema aat lori sai buat aat neʼebé rai hela iha nia laran, basá ema koʼalia sai buat neʼebé rai iha sira-nia laran.

46 “Entaun, tansá mak imi bolu haʼu Naʼi! Naʼi! maibé la halo tuir buat neʼebé haʼu hatete? 47 Ema hotu neʼebé mai besik haʼu no rona haʼu-nia liafuan no halo tuir, haʼu sei hatudu sai ba imi, nia ema hanesan saida: 48 Nia hanesan mane ida neʼebé harii uma hodi keʼe toʼo kleʼan no tau uma nia hun iha fatuk-boot nia leten. Tan neʼe, kuandu bee saʼe, mota tun hasoru uma neʼe, maibé la bele halo uma neʼe nakdoko, tanba uma neʼe harii ho didiʼak. 49 Maibé, ema neʼebé rona no la halo tuir, nia hanesan mane ida neʼebé harii uma iha rai leten deʼit no ninia hun la metin. Kuandu mota tun hasoru uma neʼe, ida-neʼe monu kedas no sai aat tebes.”

7 Kuandu nia koʼalia tiha liafuan sira-neʼe ba ema, nia laʼo hodi tama iha Kafarnaum. 2 No iha neʼebá, kapitaun tropa nian ida iha atan neʼebé nia hadomi tebes, no atan neʼe moras todan no besik ona atu mate. 3 No kuandu kapitaun neʼe rona kona-ba Jesus, nia haruka katuas judeu nian sira atu husu Jesus hodi bá iha nia uma hodi kura ninia atan neʼe. 4 Tuirmai, sira neʼebé mai hasoru Jesus hahú husu namanas ba Jesus hodi dehan: “Nia merese atu simu ajuda husi Ita-Boot, 5 tanba nia hadomi ita-nia nasaun no nia harii sinagoga ba ami.” 6 Entaun Jesus bá hamutuk sira. Maibé kuandu nia besik ona uma neʼe, kapitaun neʼe haruka ninia belun sira atu fó-hatene Jesus: “Señór, keta halo kole Ita-nia an, basá haʼu la merese atu simu Ita-Boot iha haʼu-nia uma. 7 Tan neʼe mak haʼu sente katak haʼu la merese atu bá hasoru Ita. Maibé hatoʼo deʼit liafuan ruma bá, no haʼu-nia atan sei sai isin-diʼak. 8 Haʼu mós iha ema seluk neʼebé ukun haʼu, no haʼu iha soldadu sira neʼebé haʼu manda. Kuandu haʼu hatete ba soldadu ida-neʼe: ‘Laʼo bá’, nia bá, no ba ida seluk: ‘Mai!’ nia mai, no kuandu haʼu haruka haʼu-nia atan: ‘Halo ida-neʼe!’ nia halo.” 9 Kuandu Jesus rona liafuan sira-neʼe, nia sai hakfodak ho kapitaun neʼe, no nia fila oin ba ema-lubun neʼebé laʼo tuir nia no dehan: “Haʼu hatete ba imi: Haʼu seidauk hetan ema ida neʼebé iha fiar boot hanesan neʼe iha Izraél tomak.” 10 No kuandu ema sira neʼebé kapitaun haruka atu hasoru nia toʼo fali uma, sira haree katak atan neʼe isin-diʼak ona.

11 Lakleur depois neʼe, nia laʼo ba sidade ida naran Naim, no ninia dixípulu sira no mós ema-lubun boot laʼo hamutuk ho nia. 12 Kuandu nia toʼo besik sidade nia odamatan boot, haree! ema lori hela mate-isin ida atu bá hakoi, neʼe mak feto-faluk ida nia oan-mane mesak. Ema barak husi sidade neʼe mós laʼo hamutuk nia. 13 No kuandu Naʼi haree feto-faluk neʼe, nia hanoin tebetebes ba feto neʼe, no nia hatete: “Keta tanis.” 14 Depois neʼe, Jesus hakbesik no kaer fatin neʼebé sira tau mate-isin bá, no ema neʼebé lori mate neʼe para no sira hamriik iha nafatin, no Jesus dehan: “Joven, haʼu hatete ba ó: Hadeer bá!” 15 Mane neʼe hadeer hodi tuur no hahú koʼalia, no Jesus fó nia ba ninia inan. 16 Sira hotu sai taʼuk, no sira hahú fó hahiʼi ba Maromak hodi dehan: “Profeta boot ida mai ona iha ita-nia leet”, no: “Maromak hanoin fali ona ninia povu.” 17 No ema habelar liafuan kona-ba nia iha Judeia tomak no iha rai sira neʼebé besik neʼebá.

18 No João nia dixípulu sira konta ba João kona-ba buat sira-neʼe. 19 Ho ida-neʼe, João bolu ninia dixípulu naʼin-rua no haruka sira bá hasoru Naʼi atu husu: “Ita mak Ida neʼebé atu mai, ka ami sei hein ema seluk?” 20 Kuandu sira toʼo ba Jesus, sira dehan: “João Batista haruka ami mai atu husu ba Ita: ‘Ita mak Ida neʼebé atu mai, ka ami sei hein ema seluk?’” 21 Iha oras neʼebá nia kura hela ema barak neʼebé iha moras oioin, no nia duni sai anju aat sira, no nia halo ema matan-delek sira haree fali. 22 Entaun, nia dehan ba sira naʼin-rua neʼe: “Fila bá, no fó-hatene ba João buat neʼebé imi haree no rona: Ema matan-delek sira haree, ema ain-kudeʼik sira laʼo, ema moras-lepra sira sai moos, ema tilun-diuk sira rona, ema mate moris fali, no ema kiak sira rona liafuan diʼak. 23 Kontente ba ema neʼebé la sidi tanba haʼu.”

24 Kuandu João nia dixípulu sira fila tiha, nia hahú koʼalia ba ema-lubun kona-ba João: “Imi bá rai-fuik atu haree saida? Atu haree duʼut-kain ida neʼebé anin huu bá-mai ka? 25 Entaun, imi bá atu haree saida? Atu haree mane ida neʼebé hatais roupa furak ka? Loloos, sira neʼebé hatais roupa furak no moris diʼak, sira hela iha liurai nia uma. 26 Entaun, imi bá haree saida? Imi bá atu haree profeta ida ka? Sin, nia mak profeta duni. Maibé haʼu dehan ba imi katak nia boot liu fali profeta sira. 27 Kona-ba nia mak hakerek nanis ona: ‘Haree! Haʼu haruka haʼu-nia manu-ain iha ó-nia oin, neʼebé sei prepara dalan ba ó!’ 28 Haʼu hatete ba imi: Toʼo agora, seidauk iha ema ida iha rai neʼebé boot liu fali João. Maski nuneʼe, ema neʼebé kiʼik liu iha Maromak nia Ukun mak boot liu fali nia.” 29 Kuandu ema kobradór impostu nian no mós ema hotu rona kona-ba neʼe, sira fó sai kona-ba Maromak nia hahalok loos, tanba sira hetan ona batizmu husi João. 30 Maibé ema farizeu sira no ema sira neʼebé hatene didiʼak kona-ba Ukun-Fuan, sira la simu Maromak nia konsellu tanba sira seidauk hetan batizmu husi João.

31 “Tan neʼe, haʼu sei kompara ema husi jerasaun neʼe ho saida, no sira hanesan sé? 32 Sira hanesan labarik kiʼik neʼebé tuur hela iha merkadu hodi dehan ba malu: ‘Ami toka múzika* ba imi, maibé imi la dansa. Ami tanis hakilar, maibé imi la tanis.’ 33 Hanesan neʼe mós, João Batista mai no nia la han paun no la hemu tua-uvas, maibé imi dehan: ‘Nia iha anju aat.’ 34 Oan-Mane husi ema mai hodi han no hemu, maibé imi dehan: ‘Haree! Mane neʼe kaan-teen no lanu-teen,* ema kobradór impostu nian no ema sala-naʼin sira-nia belun.’ 35 Maibé, liuhusi ema nia hahalok loos mak nia hatudu sai ninia matenek.”

36 No ema farizeu ida husu beibeik ba Jesus atu han hamutuk ho nia. Tan neʼe, Jesus tama ba ema farizeu neʼe nia uma no tuur iha meza. 37 No iha feto ida neʼebé ema barak hatene nuʼudar feto-aat, no feto neʼe mai iha ema farizeu neʼe nia uma tanba nia rona katak Jesus han hela iha neʼebá. Entaun, nia lori mina-morin iha botir* 38 no mai husi kotuk hodi hakneʼak iha Jesus nia ain, no nia tanis no hahú habokon Jesus nia ain ho nia matan-been no hamaran ho ninia fuuk. Nia mós reʼi no kose mina-morin ba Jesus nia ain. 39 Kuandu haree ida-neʼe, ema farizeu neʼebé konvida Jesus koʼalia ba nia an hodi dehan: “Se mane neʼe mak profeta ida, nia sei hatene kona-ba feto neʼebé kona daudaun ninia ain, katak feto neʼe mak feto-aat ida.” 40 Maibé Jesus dehan ba nia: “Simão, haʼu hakarak hatete buat ruma ba ó.” Nia hatán: “Mestre, dehan bá!”

41 “Mane naʼin-rua debe osan husi ema ida. Mane ida debe osan denáriu* 500, no ida seluk limanulu. 42 Kuandu sira la bele selu fali, nia husik sira naʼin-rua livre* husi sira-nia tusan. Entaun, husi sira naʼin-rua neʼe, ida-neʼebé mak sei hadomi liu ema neʼe?” 43 Simão hatán dehan: “Tuir haʼu-nia hanoin, ida neʼebé iha debe boot liu.” Jesus hatete ba nia: “Ó koʼalia loos.” 44 Ho ida-neʼe, Jesus fila oin ba feto neʼe no koʼalia ba Simão hodi dehan: “Ó haree feto neʼe ka lae? Haʼu tama iha ó-nia uma; ó la fó bee atu fase haʼu-nia ain. Maibé feto neʼe habokon haʼu-nia ain ho nia matan-been no hamaran ho nia fuuk. 45 Ó la fó reʼi ba haʼu, maibé hahú husi tempu neʼebé haʼu tama, feto neʼe la para atu reʼi haʼu-nia ain. 46 Ó la kose mina ba haʼu-nia ulun, maibé feto neʼe kose mina-morin ba haʼu-nia ain. 47 Haʼu hatete ba ó: Maski feto neʼe iha sala neʼebé barak, maibé nia hetan ona perdua; tan neʼe mak nia hatudu domin boot; maibé kuandu ema ida hetan perdua uitoan, nia hatudu domin uitoan.” 48 Tuirmai, Jesus dehan ba feto neʼe: “Ó-nia sala sira perdua ona.” 49 Ho ida-neʼe, sira neʼebé tuur iha meza hahú hanoin iha sira-nia laran: “Sé mak ema neʼe hodi nia fó perdua ba ema nia sala?” 50 Maibé Jesus hatete ba feto neʼe: “Ó-nia fiar salva ona ó, laʼo bá ho dame.”

8 Lakleur depois neʼe nia laʼo husi sidade ba sidade no knua ba knua atu haklaken no fó sai liafuan diʼak kona-ba Maromak nia Ukun. No sira naʼin sanulu-resin-rua laʼo hamutuk ho nia, 2 no iha mós feto balu neʼebé laʼo hamutuk ho nia. Feto sira-neʼe sai livre ona husi anju aat no sai diʼak husi sira-nia moras. Feto sira-neʼe mak Maria neʼebé bolu nuʼudar Madalena, neʼebé sai livre husi anju aat hitu; 3 no Joana, Kuza nia feen, Kuza mak ema neʼebé tau matan ba Herodes nia uma; no Suzana no mós feto barak seluk neʼebé uza sira-nia rikusoin rasik atu fó apoia ba Jesus no ninia apóstolu sira.

4 No ema-lubun halibur hamutuk ho sira neʼebé sempre laʼo tuir nia husi sidade ba sidade. Iha tempu neʼe nia konta ai-knanoik ba sira hodi dehan: 5 “Toʼos-naʼin ida bá hodi kari fini. Nuʼudar nia kari, fini balu monu iha dalan ninin no ema sama, no manu sira iha lalehan mai hodi han. 6 Fini seluk monu iha fatuk leten no kuandu moris tiha, fini neʼe mate fali tanba bee la iha. 7 Fini seluk monu iha ai-tarak laran, no ai-tarak moris hamutuk ho fini sira-neʼe no hanehan sira. 8 Fini seluk tan monu iha rai neʼebé diʼak, no depois sira moris no sai boot, sira hahú fó fuan dala atus ida.” Koʼalia tiha kona-ba neʼe, nia dehan ho lian makaʼas: “Ema neʼebé iha tilun atu rona, rona bá.”

9 Maibé ninia dixípulu sira husu nia kona-ba ai-knanoik neʼe katak sá. 10 Nia hatete: “Ba imi, Maromak mak ajuda imi atu komprende segredu santu sira kona-ba ninia Ukun, maibé ba sira seluk, buat hotu fó sai deʼit ho ai-knanoik. Nuneʼe, maski sira haree, maibé sira la haree buat ida, no maski sira rona, maibé la komprende neʼe katak sá loos. 11 Ai-knanoik neʼe nia arti mak neʼe: Fini mak Maromak nia liafuan. 12 Fini sira neʼebé monu iha dalan ninin mak ema sira neʼebé rona liafuan neʼe, no Diabu mai no foti sai liafuan neʼe husi sira-nia laran atu nuneʼe sira labele fiar no hetan salvasaun. 13 Fini sira neʼebé monu iha fatuk leten mak sira neʼebé rona tiha liafuan neʼe; sira simu ho laran-haksolok, maibé sira la iha abut, sira tau fiar ba tempu uitoan, no kuandu hetan koko sira monu tiha. 14 No mós kona-ba fini neʼebé monu iha ai-tarak laran, sira mak ema neʼebé rona liafuan neʼe, maibé tanba hanoin resin, no rikusoin nia lasu, no mós ksolok moris nian, buat sira-neʼe hanehan liafuan no sira la fó fuan neʼebé tasak. 15 No kona-ba fini sira neʼebé monu iha rai diʼak, sira mak ema neʼebé rona tiha liafuan neʼe ho laran neʼebé diʼak no rai metin hodi tahan nafatin no sira fó fuan.

16 “La iha ema ida neʼebé sunu tiha ahi-oan, taka netik fali ho raga ka tau iha kama okos, maibé nia tau iha fatin aas, atu nuneʼe ema hotu neʼebé tama bele haree naroman. 17 Basá buat sira neʼebé taka hela sei hatudu sai, no buat hotu neʼebé subar ho didiʼak ema sei hatene. 18 Tan neʼe, haree didiʼak oinsá imi rona, basá ema neʼebé iha sei simu barak tan, maibé ema neʼebé la iha, buat neʼebé nia hanoin katak nia iha mós sei foti tiha husi nia.”

19 Iha tempu neʼe Jesus nia inan no alin-mane sira mai atu hasoru nia, maibé sira la bele hakbesik ba nia tanba ema-lubun. 20 No ema dehan ba nia: “Ita-nia inan no alin sira hamriik iha liʼur, no sira buka Ita.” 21 Nia hatán ba sira: “Haʼu-nia inan no haʼu-nia alin sira mak ema sira-neʼe, neʼebé rona Maromak nia liafuan no halo tuir.”

22 Iha loron ida, Jesus no ninia dixípulu sira saʼe ró ida, no nia dehan ba sira: “Mai ita hakur ba tasi sorin.” Entaun, sira komesa lori ró hodi bá tasi sorin. 23 Nuʼudar ró laʼo daudaun, Jesus toba. No anin-boot mosu iha tasi hodi halo tasi-been tama ba ró, no sira iha perigu laran. 24 Ikusmai, sira hakbesik nia no fanu nia dehan: “Mestre, Mestre, ita besik ona atu mate!” No kuandu Jesus hadeer, nia siʼak anin no tasi nia laloran, no buat hotu sai hakmatek no sai nonook. 25 Tuirmai, nia hatete ba sira: “Imi-nia fiar iha-neʼebé?” Maibé, sira hakfodak no taʼuk no dehan ba malu: “Sé mak ema neʼe? Tanba nia haruka anin no tasi, no sira halo tuir nia!”

26 No sira toʼo ba tasi sorin iha rai-Gerasa, iha Galileia nia sorin bá. 27 Kuandu Jesus tun husi ró, mane ida husi sidade neʼe laʼo hasoru nia, no mane neʼe anju aat sira mak domina. No ba tempu kleur ona mane neʼe la hatais roupa, no nia la hela iha uma maibé iha rate sira leet. 28 Haree tiha Jesus, nia hakilar no monu ain ba Jesus, no ho lian makaʼas nia dehan: “Saida mak ó hakarak husi haʼu, Jesus, Maromak Aas Liu Hotu nia Oan? Haʼu husu ba ó, keta fó kastigu ba haʼu.” 29 Basá Jesus haruka anju aat atu sai husi mane neʼe. No ba tempu kleur ona anju aat domina mane neʼe, no ema tau guarda hodi hein nia no kesi metin nia beibeik ho korrente, maibé nia sempre hakotu korrente sira-neʼe no anju aat lori nia ba rai-fuik. 30 No Jesus husu nia: “Ó naran sá?” Nia hatán: “Lubun Boot”,* tanba anju aat barak mak tama ba nia. 31 No sira husu beibeik atu Jesus la haruka sira tama ba rai-kuak kleʼan. 32 No iha tempu neʼe, iha fahi-lubun boot neʼebé han hela iha foho neʼebá. Entaun, sira husu ba Jesus atu sira bele tama ba fahi sira-neʼe, no nia husik sira atu halo nuneʼe. 33 No anju aat sira sai husi mane neʼe no tama ba fahi. No fahi-lubun neʼe halai lalais hodi haksoit husi rai naruk no tama ba tasi, no sira mout. 34 Maibé, kuandu ema sira neʼebé hein fahi haree buat neʼebé mosu, sira halai no fó-hatene ba ema iha sidade no knua sira.

35 Entaun ema mai atu haree buat neʼebé mosu. No kuandu sira toʼo ba Jesus, sira haree mane neʼebé uluk anju aat sira domina, no nia neon moos ona no hatais roupa hodi tuur hela iha Jesus nia ain. No sira sai taʼuk. 36 No sira neʼebé haree buat neʼebé Jesus halo atu kura mane neʼe, konta fali ba sira seluk. 37 Ho ida-neʼe, ema hotu husi rai-Gerasa husu Jesus atu sai husi neʼebá tanba sira taʼuk loos. Entaun, nia saʼe ba ró hodi husik hela sira. 38 Maibé, mane neʼebé uluk anju aat domina husu beibeik atu bá hamutuk ho Jesus, maibé nia haruka mane neʼe, hodi dehan: 39 “Fila ba ó-nia uma, no kontinua fó sai buat neʼebé Maromak halo ona ba ó.” Entaun, nia bá hodi haklaken iha sidade tomak kona-ba buat neʼebé Jesus halo ba nia.

40 Kuandu Jesus fila, ema-lubun simu nia ho laran-diʼak tanba sira hotu hein nia. 41 No haree! mane ida naran Jairo mai, no mane neʼe mak sinagoga nia ulun ida. No nia monu ain ba Jesus no husu nia atu tama ba nia uma, 42 tanba ninia oan-feto mesak, neʼebé tinan sanulu-resin-rua, besik ona atu mate.

Nuʼudar Jesus laʼo ba neʼebá, ema-lubun habit nia. 43 No iha feto ida neʼebé hetan terus ba tinan sanulu-resin-rua tanba moras raan fakar, no la iha ema ida neʼebé bele kura nia. 44 No feto neʼe hakbesik Jesus husi kotuk no kona ninia roupa ninin, no iha tempu neʼe kedas ninia raan la fakar tan. 45 Tan neʼe Jesus hatete: “Sé mak kona haʼu?” No kuandu sira hotu nega kona-ba neʼe, Pedro dehan: “Mestre, ema-lubun neʼe haleʼu no habit daudaun Ita.” 46 Maibé, Jesus dehan: “Haʼu hatene ema ida kona haʼu, tanba kbiit sai husi haʼu.” 47 Kuandu feto neʼe haree katak nia la bele ona subar an husi Jesus, nia ho nakdedar hakbesik no monu ain ba Jesus. No nia fó sai iha ema hotu nia oin tansá nia kona Jesus no mós kona-ba oinsá nia sai isin-diʼak kedas. 48 Maibé Jesus hatete ba nia: “Oan-feto, ó-nia fiar mak halo ó sai diʼak. Laʼo bá ho dame.”

49 Kuandu Jesus koʼalia hela, ema ida mai husi Jairo nia uma, no dehan: “Ita-nia oan-feto mate ona! Keta hakole tan Mestre.” 50 Rona tiha ida-neʼe, Jesus dehan ba nia: “Keta taʼuk, hatudu fiar bá, no nia sei moris.”* 51 Toʼo tiha uma neʼe, nia la husik ema ida atu tama hamutuk nia, só deʼit Pedro, João, Tiago, no labarik-feto neʼe nia inan no aman. 52 Maibé ema hotu tanis no baku sira-nia hirus-matan ho triste tanba labarik neʼe mate. Tan neʼe nia dehan: “Keta tanis, tanba nia la mate, maibé nia toba deʼit.” 53 Ho ida-neʼe sira hahú hamnasa nia, tanba sira hatene katak labarik neʼe mate ona. 54 Maibé, Jesus kaer nia liman no bolu ho lian makaʼas: “Noi, hadeer bá!” 55 No nia moris fali* no hamriik kedas. No Jesus haruka ema atu fó-han ba nia. 56 Ho ida-neʼe, labarik nia inan-aman kontente tebes. Maibé Jesus haruka sira atu la fó-hatene ba ema kona-ba buat neʼebé mosu.

9 Tuirmai nia bolu sira naʼin sanulu-resin-rua no fó kbiit ba sira atu duni sai anju aat hotu no atu kura moras oioin. 2 No nia haruka sira atu bá haklaken Maromak nia Ukun no atu kura ema, 3 no nia dehan ba sira: “Kuandu imi bá, keta lori buat ida, keta lori ai-tonka ka fatin ai-han nian, ka paun ka osan-mutin, ka roupa tahan rua. 4 Maibé kuandu imi tama iha uma ida, hela iha neʼebá toʼo imi husik fatin neʼe. 5 No iha sidade naran deʼit neʼebé ema la simu imi, kuandu imi sai husi sidade neʼe, liki tiha rai-rahun husi imi-nia ain nuʼudar sasin hasoru sira.” 6 Ho ida-neʼe, sira hahú laʼo ba knua sira hotu hodi haklaken liafuan diʼak no kura ema.

7 No Herodes, ukun-naʼin distritu nian, rona kona-ba buat hotu neʼebé mosu no nia hakfodak tebes tanba ema balu dehan katak João moris hiʼas fali ona husi mate. 8 Maibé ema balu tan dehan katak Elias mosu fali ona, no balu seluk dehan katak profeta ida husi tempu uluk moris fali ona. 9 Herodes hatete: “Haʼu tesi tiha ona João nia ulun. Entaun, sé mak ema neʼe, basá haʼu rona buat oioin kona-ba nia?” Tan neʼe nia hakarak tebes atu haree ema neʼe.

10 Kuandu apóstolu sira fila fali, sira konta ba Jesus buat hotu neʼebé sira halo ona. Ho ida-neʼe, nia lori sira ba sidade ida naran Betsaida, hodi bele mesamesak ho sira. 11 Maibé, kuandu ema-lubun hatene kona-ba neʼe, sira bá tuir nia. No nia simu sira ho laran-diʼak no hahú koʼalia ba sira kona-ba Maromak nia Ukun, no kura sira neʼebé moras. 12 Kuandu rai besik kalan ona, sira naʼin sanulu-resin-rua hakbesik nia no dehan: “Haruka ema-lubun neʼe bá, hodi sira bele bá knua sira neʼebé besik no bele hetan fatin atu toba no bele hetan ai-han, tanba fatin neʼe fuik.” 13 Maibé nia hatete ba sira: “Imi mak fó sira buat ruma atu han.” Sira hatán: “Ami iha deʼit paun fuan lima no ikan rua, entaun ami rasik tenke bá atu sosa hahán ba ema sira-neʼe hotu atu han ka?” 14 Ema-lubun neʼe, maizumenus mane naʼin-5.000. Maibé nia dehan ba nia dixípulu sira: “Haruka ema sira-neʼe tuur hodi fahe ba grupu. No iha grupu ida-idak maizumenus iha ema naʼin-limanulu.” 15 Sira halo tuir hodi haruka ema hotu tuur. 16 Foti tiha paun fuan lima no ikan rua neʼe, nia hateke ba lalehan hodi halo orasaun no nia silu hodi fó ba ninia dixípulu sira atu fahe ba ema-lubun. 17 Nuneʼe sira hotu han toʼo bosu, no sira halibur hahán resin ba bote sanulu-resin-rua.

18 Loron ida, kuandu Jesus mesamesak no halo orasaun, dixípulu sira hakbesik ba nia, no nia husu sira dehan: “Ema-lubun dehan haʼu neʼe sé?” 19 Sira hatán: “Ema balu dehan João Batista, seluk dehan Elias, seluk fali dehan profeta ruma husi tempu uluk mak moris fali ona.” 20 Tuirmai, nia dehan ba sira: “Maibé, tuir imi-nia hanoin haʼu neʼe sé?” Pedro hatán: “Ita mak Kristu neʼebé Maromak haruka mai.” 21 Tuirmai, nia fó avizu makaʼas ba sira atu labele fó-hatene ba ema ida kona-ba neʼe. 22 Nia mós dehan: “Oan-Mane husi ema tenke hetan terus barak, no katuas sira, ulun-naʼin amlulik sira no eskriba sira sei la simu nia no oho nia, no liutiha loron tolu nia sei moris hiʼas fali.”

23 Tuirmai, nia dehan tan ba sira hotu: “Se ema ruma hakarak tuir haʼu, nia tenke nega ninia an rasik no lori ninia ai-riin terus nian loron-loron no kontinua laʼo tuir haʼu. 24 Tanba ema neʼebé hakarak salva nia moris sei lakon nia moris, maibé ema neʼebé lakon nia moris tanba haʼu sei salva nia moris. 25 Tuir loloos, buat diʼak saida mak ema ida hetan se nia manán mundu tomak maibé lori susar ba nia an ka lakon nia moris? 26 Basá ema naran deʼit neʼebé moe kona-ba haʼu no kona-ba haʼu-nia liafuan sira, Oan-Mane husi ema mós sei moe kona-ba nia kuandu nia mai iha ninia glória no Aman nia glória no anju santu sira-nia glória. 27 Maibé haʼu hatete loloos ba imi katak ema balu neʼebé hamriik iha neʼe sei la mate toʼo sira haree uluk Maromak nia Ukun.”

28 Tuir loloos, liutiha loron ualu husi tempu neʼebé nia koʼalia liafuan sira-neʼe, nia lori Pedro, João no Tiago hodi saʼe ba foho atu halo orasaun. 29 No nuʼudar nia halo hela orasaun, ninia oin troka no ninia hena sai mutin loos no nabilan. 30 No haree! iha mane naʼin-rua neʼebé koʼalia daudaun ho nia, sira mak Moisés no Elias. 31 Sira naʼin-rua neʼe mosu ho glória no hahú koʼalia ho Jesus kona-ba oinsá nia sei husik hela mundu hanesan fó-hatene nanis ona atu sai loos iha Jeruzalein. 32 Iha tempu neʼe Pedro no mós sira neʼebé hamutuk ho nia matan-dukur loos, maibé kuandu sira hadeer sira haree Jesus nia glória no mane naʼin-rua hamriik hamutuk ho nia. 33 No kuandu ema naʼin-rua neʼe besik ona atu husik hela Jesus, Pedro hatete ba Jesus: “Mestre, ami kontente tebes atu mai iha neʼe, entaun husik ami harii tenda tolu, ida ba Ita, ida ba Moisés, no ida ba Elias.” Pedro la hatene saida mak nia koʼalia. 34 Maibé, nuʼudar nia koʼalia daudaun kona-ba buat sira-neʼe, kalohan ida mosu no hahú taka sira, no sira sai taʼuk tebes. 35 Tuirmai, lian ida sai husi kalohan dehan: “Neʼe mak haʼu-nia Oan-Mane, ida neʼebé haʼu hili ona. Rona nia bá.” 36 No kuandu sira rona lian neʼe, sira haree katak Jesus mesak deʼit. Maibé sira nafatin nonook deʼit no sira la fó-hatene ema ida iha tempu neʼebá kona-ba buat neʼebé sira haree.

37 Iha loron tuirmai, kuandu sira tun husi foho, ema-lubun mai hasoru nia. 38 No haree! mane ida hakilar husi ema-lubun nia leet hodi dehan: “Mestre, haʼu husu ho laran atu Ita-Boot haree lai haʼu-nia oan, tanba nia mak haʼu-nia oan-mane mesak. 39 No kuandu anju aat ida kaer nia, derrepente deʼit nia hakilar makaʼas, no anju aat neʼe doko makaʼas nia toʼo kabeen nafurin, no lakohi atu husik maski hakanek ona nia. 40 No haʼu husu Ita-nia dixípulu sira atu duni sai anju aat neʼe, maibé sira la bele.” 41 Jesus hatán hodi dehan: “Oh jerasaun neʼebé la iha fiar no aat, ba tempu hira tan mak haʼu sei hamutuk ho imi? Tempu hira tan mak haʼu tenke tahan imi? Lori ó-nia oan mai iha neʼe.” 42 Maibé kuandu labarik neʼe hakbesik daudaun, anju aat soe nia ba rai no doko nia makaʼas. No Jesus siʼak anju aat neʼe no kura labarik neʼe no tuirmai fó nia ba ninia aman. 43 Ema hotu hakfodak ho Maromak nia kbiit boot.

No kuandu sira hotu sei hakfodak hela ho buat hotu neʼebé nia halo, nia hatete ba ninia dixípulu sira dehan: 44 “See tilun didiʼak no hanoin-hetan liafuan sira-neʼe, basá fó-hatene nanis ona katak ema sei entrega Oan-Mane husi ema ba inimigu nia liman.” 45 Maibé sira nafatin la hatene kona-ba liafuan sira-neʼe. Tuir loloos, ida-neʼe subar husi sira atu sira labele komprende, no sira taʼuk atu husu ba nia.

46 Tuirmai, sira haksesuk malu kona-ba sé mak boot liu iha sira-nia leet. 47 Tanba Jesus hatene buat neʼebé iha sira-nia laran, nia bolu labarik kiʼik ida hodi hamriik iha nia sorin, 48 no dehan: “Ema naran deʼit neʼebé simu labarik ida hanesan neʼe tanba haʼu-nia naran, nia simu mós haʼu, no ema naran deʼit neʼebé simu haʼu, simu mós ida neʼebé haruka haʼu mai. Basá ema neʼebé hatudu hahalok nuʼudar ema neʼebé kiʼik liu iha imi hotu nia leet, nia mak ida neʼebé boot liu.”

49 João hatán: “Mestre, ami haree mane ida duni sai anju aat hodi Ita-nia naran no ami koko atu hapara nia, tanba nia la laʼo tuir ita.” 50 Maibé Jesus hatete ba nia: “Keta koko atu hapara nia, tanba ema neʼebé la kontra imi, nia apoia imi.”

51 Kuandu tempu besik ona ba Jesus atu saʼe ba lalehan, ninia laran sai metin liután hodi laʼo ba Jeruzalein. 52 Nuneʼe, nia haruka manu-ain sira hodi bá uluk liu nia. No sira bá hodi tama iha knua ema Samaria nian ida atu prepara fatin ba nia, 53 maibé ema iha knua neʼe la simu nia tanba nia planu metin ona atu bá Jeruzalein. 54 Kuandu dixípulu Tiago no João haree ida-neʼe, sira dehan: “Naʼi, Ita hakarak ami atu husu ahi tun husi lalehan hodi han sira hotu?” 55 Maibé, nia fila oin no siʼak sira. 56 Depois neʼe sira laʼo fali ba knua seluk.

57 No kuandu sira laʼo daudaun tuir dalan, ema ida hatete ba Jesus: “Haʼu sei laʼo tuir Ita ba fatin naran deʼit neʼebé Ita bá.” 58 No Jesus hatete ba nia: “Asu-fuik* sira iha fatin atu toba no manu sira iha lalehan iha knuuk, maibé Oan-Mane husi ema, nia laiha fatin atu sadere nia ulun.” 59 Tuirmai, nia hatete ba ema ida seluk: “Mai tuir haʼu.” Ema neʼe hatán: “Fó lisensa mai haʼu atu bá hodi hakoi uluklai haʼu-nia aman.” 60 Jesus hatete ba nia: “Husik ema mate hakoi sira-nia mate, maibé ó laʼo bá hodi haklaken Maromak nia Ukun iha fatin seluk.” 61 No ema seluk fali dehan: “Naʼi, haʼu sei laʼo tuir Ita. Maibé, fó lisensa mai haʼu atu fó adeus uluklai ba ema sira neʼebé iha haʼu-nia uma laran.” 62 Jesus hatete ba nia: “Ema neʼebé tau ona liman ba xarrua* no hateke fali ba kotuk, nia la merese ba Maromak nia Ukun.”

10 Depois neʼe, Naʼi hili ema naʼin-hitunulu seluk no haruka sira naʼin rua-rua hodi laʼo uluk liu nia atu tama ba sidade no fatin hotu neʼebé nia rasik sei bá. 2 Tuirmai, nia dehan ba sira: “Tuir loloos, serbisu koʼa nian boot tebes, maibé serbisu-naʼin uitoan deʼit. Tan neʼe, husu ba toʼos-naʼin atu haruka tan ema hodi halo serbisu koʼa nian. 3 Laʼo bá. No haree! haʼu haruka imi bá hanesan bibi-malae oan iha asu-fuik sira leet. 4 Keta lori osan-fatin, ka ai-han fatin, ka sandálias, no kuandu tuir dalan keta fó kumprimenta ema hodi hakoʼak sira. 5 Iha fatin naran deʼit neʼebé ema simu imi iha sira-nia uma, dehan uluk: ‘Maromak haraik dame ba imi-nia uma.’ 6 No se iha uma neʼe iha ema neʼebé hadomi dame, imi-nia dame sei hela ho nia. Maibé, se la iha, imi-nia dame sei fila fali ba imi. 7 No hela iha uma neʼe hodi han no hemu buat neʼebé fó ba imi, tanba serbisu-naʼin ida merese simu nia kolen. Keta muda husi uma ida hodi hela fali iha uma seluk.

8 “No mós, kuandu imi tama ba sidade ida no sira simu imi, han bá buat neʼebé sira tau iha imi-nia oin, 9 no kura ema sira neʼebé moras iha sidade neʼe, no haklaken ba sira dehan: ‘Maromak nia Ukun besik ona imi.’ 10 Maibé kuandu imi tama ba sidade ida no ema la simu imi, laʼo ba dalan boot sidade nian no dehan: 11 ‘Rai-rahun husi imi-nia sidade neʼebé belit iha ami-nia ain, ami hamoos tiha hodi sai nuʼudar sasin hasoru imi. Maibé, hanoin-hetan katak Maromak nia Ukun besik ona.’ 12 Haʼu hatete ba imi katak iha loron neʼebá* rai-Sodoma nia kastigu sei sai kmaan liu fali sidade neʼe nian.

13 “Susar ba ó, Korozain! Susar bá ó, Betsaida! tanba se milagre boot sira neʼebé mosu iha imi leet mak mosu ba Tiro no Sidon, karik kleur ona sira sei hakribi sira-nia sala hodi hatais hena karón nian* no tuur iha ahi-kadesan. 14 Tan neʼe, iha tempu tesi-lia nian, Tiro no Sidon nia kastigu sei sai kmaan liu fali imi-nian. 15 No kona-ba ó Kafarnaum, ó hanoin katak Maromak sei foti ó toʼo lalehan? Lae! Nia sei hatún ó toʼo rate.*

16 “Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós ida neʼebé haruka haʼu mai.”

17 Tuirmai, sira naʼin-hitunulu fila ho haksolok no dehan: “Naʼi, hodi uza Ita-Boot nia naran, anju aat sira mós hakruʼuk ba ami.” 18 Ho ida-neʼe, nia hatete ba sira: “Haʼu haree ona Satanás monu hanesan rai-lakan husi lalehan. 19 Haʼu fó ona kbiit ba imi atu sama samea no sakunar sira, no fó imi kbiit atu manán inimigu nia kbiit tomak, no la iha buat ida neʼebé sei hakanek imi. 20 Maski nuneʼe, keta haksolok tanba anju aat sira hakruʼuk ba imi, maibé haksolok tanba imi-nia naran hakerek tiha ona iha lalehan.” 21 Iha oras neʼe duni mak nia haksolok tebetebes iha espíritu santu no dehan: “Aman, Naʼi lalehan no rai nian, haʼu hahiʼi Ita-Boot iha ema nia oin, tanba Ita subar didiʼak buat sira-neʼe husi ema matenek sira, hodi fó sai ba labarik kiʼik sira. Loos duni, Aman, tan halo nuneʼe mak tuir Ita-nia hakarak. 22 Haʼu-nia Aman entrega ona buat hotu mai haʼu, no la iha ema ida neʼebé hatene Oan-Mane, só deʼit Aman. No, la iha ema ida neʼebé hatene Aman, só deʼit Oan-Mane no mós ema neʼebé Oan-Mane hakarak hanorin kona-ba Aman.”

23 Depois neʼe, nia koʼalia ba ninia dixípulu sira kuandu sira mesak hodi dehan: “Ksolok ba matan sira neʼebé haree buat neʼebé imi haree. 24 Basá haʼu dehan ba imi katak profeta no liurai barak hakarak atu haree buat neʼebé imi haree, maibé sira la haree, no atu rona buat neʼebé imi rona, maibé sira la rona.”

25 No haree! ema ida neʼebé hatene didiʼak kona-ba Ukun-Fuan hamriik atu koko nia hodi dehan: “Mestre, saida mak haʼu tenke halo atu hetan moris rohan-laek?” 26 Jesus hatete ba nia: “Ukun-Fuan dehan saida? Ó komprende oinsá?” 27 Mane neʼe hatán: “‘Ó tenke hadomi Jeová ó nia Maromak ho ó-nia laran tomak, ho ó-nia moris* tomak, ho ó-nia kbiit tomak no ho ó-nia neon tomak’, no ‘hadomi ó-nia maluk hanesan ó-nia an rasik’.” 28 Jesus hatete ba nia: “Ó hatán loos. ‘Kontinua halo ida-neʼe no ó sei hetan moris.’”

29 Maibé tanba nia hakarak hatudu nia an nuʼudar ema loos, mane neʼe hatete ba Jesus: “Sé mak haʼu-nia maluk?” 30 Jesus hatán dehan: “Mane ida tun husi Jeruzalein hodi bá Jerikó no nia monu iha naʼok-teen sira-nia liman. Sira hadau ninia sasán no roupa hotu no baku nia, depois neʼe sira bá hodi husik hela nia besik mate. 31 No iha tempu neʼe, amlulik ida laʼo tun hodi liu dalan neʼe, no kuandu nia haree mane neʼe, nia hakat ba dalan ninin seluk hodi laʼo liu deʼit. 32 Nuneʼe mós ho ema Levi ida neʼebé laʼo tun toʼo fatin neʼe; kuandu nia haree mane neʼe, nia hakat ba dalan ninin seluk hodi laʼo liu deʼit. 33 Maibé, iha ema Samaria ida neʼebé laʼo liu dalan neʼe, no kuandu nia haree, nia hanoin tebetebes ba mane neʼe. 34 Entaun, nia hakbesik no falun mane neʼe nia kanek hodi kose mina no tua-uvas ba nia kanek. Tuirmai, nia tula mane neʼe iha nia kuda-burru no lori ba uma ida* no tau matan ba mane neʼe. 35 Loron tuirmai nia hasai osan denáriu* rua no fó ba uma-naʼin no dehan: ‘Tau matan ba nia, no se Ita gasta osan liu fali ida-neʼe, haʼu sei selu fali bainhira haʼu fila mai.’ 36 Entaun tuir ó-nia hanoin, husi ema naʼin-tolu neʼe, ida-neʼebé mak sai nuʼudar maluk ba ema neʼebé monu iha naʼok-teen nia liman?” 37 Nia hatán: “Ida neʼebé hatudu laran-sadiʼa ba mane neʼe.” No Jesus dehan ba nia: “Ó rasik bá no halo mós buat neʼebé hanesan.”

38 Depois neʼe, sira kontinua laʼo hodi toʼo ba knua ida. Iha fatin neʼe iha feto ida naran Marta, no nia simu Jesus nuʼudar bainaka iha ninia uma. 39 Feto neʼe mós iha alin ida neʼebé naran Maria, no Maria tuur besik iha Naʼi nia ain hodi rona didiʼak ba buat neʼebé nia koʼalia. 40 Maibé Marta fali sai okupadu loos tanba halo serbisu barak. Nuneʼe, nia mai besik Jesus no dehan: “Naʼi, Ita la haree katak haʼu-nia alin husik haʼu mesak atu halo serbisu oioin ka? Tan neʼe, favór ida haruka nia atu ajuda haʼu.” 41 Ho ida-neʼe Naʼi hatán: “Marta, Marta, ó hanoin resin kona-ba buat barak. 42 Ita la presiza buat barak, karik ida deʼit toʼo ona mai ita. Tuir loloos, Maria hili buat neʼebé diʼak, no ema ida sei la foti ida-neʼe husi nia.”

11 Loron ida, Jesus halo orasaun iha fatin ida, no kuandu nia hotu ona, ninia dixípulu ida dehan ba nia: “Naʼi, hanorin ami atu halo orasaun, hanesan João mós hanorin ninia dixípulu sira.”

2 Nuneʼe, nia dehan ba sira: “Kuandu imi harohan, hatete nuneʼe bá: ‘Aman, halo Ita-nia naran sai santu. Halo Ita-nia Ukun toʼo mai rai. 3 Fó ba ami ai-han* loroloron hodi tuir ami-nia presiza ba loron neʼe. 4 No perdua ami-nia sala, hanesan ami mós perdua ona ema hotu neʼebé halo sala* mai ami, no keta husik ami monu ba tentasaun.’”*

5 Nia hatutan tan ba sira dehan: “Hanoin toʼok katak imi iha belun ida no imi bá nia uma iha kalan-boot no dehan ba nia: ‘Belun, bele fó ba haʼu paun fuan tolu ka? 6 Tanba haʼu-nia maluk ida foin toʼo mai husi dook no haʼu la iha buat ida hodi fó ba nia atu han.’ 7 No ema neʼe hatán husi nia uma laran dehan: ‘Keta halo susar tan ba haʼu. Odamatan xave metin ona, no haʼu-nia oan sira toba ona hamutuk ho haʼu. Tan neʼe, haʼu la bele hadeer hodi fó buat ruma ba ó.’ 8 Maski nuneʼe, haʼu hatete ba imi katak nia sei hadeer atu fó buat neʼebé ninia belun presiza, laʼós deʼit tanba ema neʼe mak nia belun, maibé tanba ninia belun husu beibeik. 9 Tan neʼe, haʼu hatete ba imi: Kontinua husu, no neʼe sei fó ba imi. Kontinua buka, no imi sei hetan. Kontinua tuku odamatan, no odamatan sei loke ba imi. 10 Tanba ema neʼebé husu sei simu, no ema neʼebé buka sei hetan, no ema neʼebé tuku odamatan, odamatan sei loke. 11 Tuir loloos, iha imi-nia leet, aman ida-neʼebé mak sei fó samea ba nia oan se nia oan husu ikan? 12 No se nia oan husu manu-tolun, nia sei fó sakunar ka? 13 Tan neʼe, maski imi ema sala-naʼin hatene fó buat diʼak ba imi-nia oan sira, oinsá liután ho imi-nia Aman iha lalehan! Nia sei fó duni espíritu santu ba sira neʼebé husu ba nia.”

14 Tuirmai, nia duni sai anju aat neʼebé domina mane ida hodi halo nia monok. No kuandu anju aat neʼe sai tiha, mane neʼe bele koʼalia fali. No ema-lubun hakfodak tebes kona-ba neʼe. 15 Maibé ema balu dehan: “Ho kbiit husi Belzebu,* anju aat sira-nia ukun-naʼin, mak nia duni sai anju aat sira.” 16 Maibé, ema seluk koko nia hodi husu nia atu hatudu sinál ida husi lalehan. 17 Tanba Jesus hatene sira-nia hanoin, nia dehan ba sira: “Ukun ida sei lakon se ninia povu funu hasoru malu, no umakain ida sei monu se ninia ema funu hasoru malu. 18 Entaun, se Satanás halo funu hasoru nia an rasik, oinsá mak ninia ukun bele metin? Basá imi hatete katak haʼu duni sai anju aat sira ho kbiit husi Belzebu. 19 No se haʼu duni sai anju aat ho kbiit husi Belzebu, ho sé-nia kbiit mak imi-nia oan duni sai sira? Tan neʼe mak imi-nia oan sira rasik sei hatudu sai katak imi koʼalia sala. 20 Maibé, se haʼu duni sai anju aat sira ho Maromak nia kbiit,* neʼe katak Maromak nia Ukun toʼo ona ba imi no imi la hatene. 21 Se mane forsa boot ida iha kroʼat hodi hein nia uma, la iha ema ida sei naʼok ninia rikusoin. 22 Maibé kuandu ema neʼebé forsa boot liu nia mak mai hodi funu hasoru no manán nia, ema neʼe sei foti hotu ninia sasán funu nian neʼebé nia tau fiar atu proteje nia, no ema neʼe sei fahe ninia rikusoin hotu. 23 Ema neʼebé la tuir haʼu, nia kontra haʼu. No ema neʼebé la serbisu hamutuk ho haʼu hodi ajuda ema seluk atu hakbesik haʼu, nia hadook ema husi haʼu.

24 “Kuandu anju aat ida sai husi ema, nia laʼo liu rai-fuik maran hodi buka uma. Se nia la hetan, nia dehan: ‘Haʼu sei fila ba haʼu-nia uma neʼebé haʼu husik tiha.’ 25 No kuandu nia toʼo, nia hetan uma neʼe dasa moos no furak ona. 26 Entaun, anju aat neʼe laʼo bá hodi lori tan anju aat hitu neʼebé aat liu nia. Depois sira tama tiha ba laran, sira hela iha neʼebá, no ikusmai ema neʼe nia situasaun sai aat liu fali uluk.”

27 No kuandu nia koʼalia liafuan sira-neʼe, feto ida husi ema-lubun nia leet hakilar dehan: “Ksolok ba feto neʼebé koʼus Ita iha nia knotak, no neʼebé fó-susu ba Ita.” 28 Maibé nia hatete: “Lae! Maibé ksolok ba sira neʼebé rona Maromak nia liafuan no halo tuir!”

29 Kuandu ema-lubun halibur daudaun ona, nia hahú dehan: “Jerasaun neʼe mak jerasaun neʼebé aat no buka sinál. Maibé sinál ida sei la fó ba sira, só deʼit sinál Jonas nian. 30 Basá hanesan Jonas sai nuʼudar sinál ba ema Nínive sira, Oan-Mane husi ema mós sei sai nuʼudar sinál ba jerasaun neʼe. 31 Iha tempu tesi-lia nian, liurai-feto husi parte súl sei moris hiʼas fali hamutuk ho ema husi jerasaun neʼe no nia sei hatudu sai katak ema sira-neʼe merese kastigu. Basá nia mai husi rai neʼebé dook atu rona Salomão nia matenek. Maibé, haree! iha neʼe iha ida neʼebé boot liu fali Salomão. 32 Iha tempu tesi-lia nian, ema Nínive sira sei moris hiʼas hamutuk ho jerasaun neʼe no dehan sai katak ema sira-neʼe merese kastigu. Basá, kuandu Jonas haklaken, ema Nínive hakribi sira-nia sala. Maibé, haree! iha neʼe iha ida neʼebé boot liu fali Jonas. 33 Ema sunu ahi-oan laʼós atu subar deʼit, maibé tau iha fatin aas atu nuneʼe ema neʼebé tama uma neʼe bele haree naroman. 34 Ó-nia isin nia ahi-oan mak ó-nia matan. Tan neʼe, se ó-nia matan haree momoos,* ó-nia isin-lolon tomak sei nabilan. Maibé sé ó-nia matan hateke ba buat neʼebé aat, ó-nia isin-lolon tomak sei nakukun. 35 Neʼe duni, matan-moris bá atu ahi-oan iha ó-nia laran la sai nakukun. 36 Tan neʼe, se ó-nia isin-lolon tomak naroman no la iha parte ida mak nakukun, ida-neʼe sei nabilan loos hanesan ahi-oan neʼebé fó nia naroman ba ó.”

37 Kuandu Jesus koʼalia tiha ida-neʼe, ema farizeu ida konvida nia atu han iha ninia uma. Entaun, Jesus tama ba uma neʼe hodi tuur iha meza atu han. 38 Maibé, ema farizeu neʼe hakfodak tebes kuandu haree nia la fase liman* antes han. 39 Maibé Naʼi hatán ba nia: “Imi ema farizeu sira, imi hamoos kopu no bikan nia liʼur, maibé iha imi-nia laran nakonu ho hahalok kaan-teen no hahalok aat. 40 Ema beik-teen! Maromak neʼebé kria buat neʼebé iha liʼur, nia mós kria buat neʼebé iha laran, loos ka lae? 41 Nuneʼe, husik imi-nia laran book imi atu halo diʼak ba ema kiak sira. No haree! se imi halo ida-neʼe, imi sei sai moos iha buat hotu. 42 Maibé susar ba imi farizeu sira, basá imi fó parte sanulu husi ortelaun no ai-ruda* no modo oioin, maibé imi la halo tuir Maromak nia dalan neʼebé loos no ninia domin! Maski fó parte kiʼik sira-neʼe mak importante atu halo, maibé keta haluha buat sira seluk. 43 Susar ba imi ema farizeu sira, tanba iha sinagoga sira, imi gosta atu tuur iha oin no mós imi gosta atu ema kumprimenta imi iha merkadu. 44 Susar ba imi, tanba imi hanesan rate neʼebé ema la bele haree-hetan, atu nuneʼe maski ema laʼo iha leten, sira la hatene.”

45 Depois neʼe, ema ida neʼebé hatene didiʼak kona-ba Ukun-Fuan hatete ba Jesus: “Mestre, kuandu Ita-Boot koʼalia hanesan neʼe, Ita hatete aat mós ami.” 46 Tuirmai, Jesus hatán: “Susar mós ba imi neʼebé hatene didiʼak kona-ba Ukun-Fuan, tanba imi hatodan ema ho naha neʼebé todan no susar atu lori, maibé imi rasik lakohi atu kaer ho imi-nia liman-fuan ida.

47 “Susar ba imi, tanba imi hada profeta sira-nia rate, maibé imi-nia beiʼala mak oho sira! 48 Tuir loloos, imi hatene imi-nia beiʼala sira-nia hahalok, maski nuneʼe imi apoia sira. Sira oho profeta no imi mak hada sira-nia rate. 49 Tan neʼe, Maromak nia matenek mós dehan: ‘Haʼu sei haruka ba sira profeta no apóstolu sira, no sira sei oho no haterus balu. 50 Tan razaun neʼe, jerasaun neʼe sei lori todan ba profeta hotu nia raan neʼebé fakar husi mundu hahú,* 51 husi Abel nia raan toʼo Zacarias nia raan, ida neʼebé ema oho iha altár no templu nia klaran.’ Haʼu hatete loloos ba imi katak jerasaun neʼe mak sei hetan kastigu tanba sira-nia raan.

52 “Susar ba imi neʼebé hatene didiʼak kona-ba Ukun-Fuan, tanba imi halakon tiha oportunidade ba ema atu hatene kona-ba Maromak; imi rasik la tama, no imi mós hanetik sira neʼebé hakarak tama!”

53 Entaun, kuandu nia sai husi neʼebá, eskriba no farizeu sira hahú rabat hodi haleʼu nia no husu nia pergunta barak tan, 54 tanba sira hakarak buka sala husi liafuan neʼebé sai husi nia ibun.

12 Iha tempu neʼebá, ema rihun ba rihun halibur an hamutuk toʼo sira hanehan malu, no Jesus hahú dehan ba ninia dixípulu sira: “Matan-moris bá ho farizeu sira-nia fermentu, katak sira-nia laran-makerek. 2 Buat hotu neʼebé taka hela sei nakloke, no buat hotu neʼebé segredu ema sei hatene. 3 Tan neʼe, buat neʼebé imi koʼalia iha nakukun laran ema sei rona iha naroman, no buat neʼebé imi bisibisi iha kuartu laran sei fó sai husi uma-leten. 4 Liután neʼe, haʼu hatete ba imi haʼu-nia belun: Keta taʼuk sira neʼebé oho isin-lolon no depois neʼe la bele halo buat seluk tan. 5 Maibé haʼu sei fó-hatene imi kona-ba sé loos mak imi tenke taʼuk: Taʼuk bá nia neʼebé bele oho imi no iha kbiit mós atu soe imi ba Gehena.* Haʼu hatete loloos ba imi, taʼuk nia bá. 6 Ema faʼan manu-liin lima ho osan-besi rua neʼebé folin kiʼik, loos ka lae? Maski nuneʼe, Maromak la haluha sira ida. 7 Liután neʼe, fuuk-lahan iha imi-nia ulun mós nia sura hotu. Keta taʼuk; imi iha folin-boot liu fali manu-liin barak.

8 “Haʼu hatete ba imi: Ema hotu neʼebé fó sai iha ema seluk nia oin katak nia hamutuk ho haʼu, Oan-Mane husi ema mós sei fó sai iha Maromak nia anju sira-nia oin katak nia hamutuk ho sira. 9 Maibé ema neʼebé nega haʼu iha ema seluk nia oin, haʼu mós sei nega nia iha Maromak nia anju sira-nia oin. 10 No ema naran deʼit neʼebé koʼalia liafuan ruma hasoru Oan-Mane husi ema, nia sei hetan perdua; maibé ema neʼebé koʼalia aat espíritu santu sei la hetan perdua. 11 Maibé kuandu sira lori imi ba ema-lubun nia oin no ba ema-boot governu nian no ba ukun-naʼin sira-nia oin, keta hanoin barak kona-ba saida mak imi sei koʼalia atu defende imi an ka saida mak imi sei hatete, 12 tanba espíritu santu rasik sei hanorin imi iha oras neʼebá kona-ba saida mak imi sei hatete.”

13 Tuirmai, ema ida husi ema-lubun dehan ba nia: “Mestre, haruka haʼu-nia maun atu fahe liman-rohan ho haʼu.” 14 Jesus hatete ba nia: “Sé mak hili haʼu nuʼudar juis atu tesi lia kona-ba imi-nia sasán?” 15 Tuirmai nia hatete ba sira: “Matan-moris bá no hasees an husi hahalok kaan-teen oioin, tanba maski ema ida hetan rikusoin barak, ninia moris la mai husi buat neʼebé nia iha.” 16 Ho ida-neʼe, nia konta ai-knanoik ida ba sira dehan: “Ema riku ida hetan ai-han barak husi ninia toʼos. 17 Tan neʼe, nia hahú hanoin iha ninia laran, dehan: ‘Saida mak haʼu tenke halo? Agora haʼu la iha fatin atu rai haʼu-nia ai-han.’ 18 Entaun nia hatete: ‘Haʼu sei halo ida-neʼe: Haʼu sei sobu haʼu-nia fatin sira atu rai ai-han no harii fali sira neʼebé boot liu, no iha neʼebá mak haʼu sei halibur haʼu-nia fini sira no buat hotu seluk; 19 no haʼu sei hatete ba haʼu-nia an: “Ó iha buat diʼak barak neʼebé bele uza ba tinan barak; hakmatek bá, han, hemu no halo kontente ó-nia an.”’ 20 Maibé Maromak hatete ba nia: ‘Ema beik-teen, iha kalan neʼe kedas sira sei husu ó-nia moris* husi ó. Neʼe duni, sasán sira neʼebé ó rai hela sei sai sé-nian?’ 21 Nuneʼe mós sei mosu ba ema neʼebé halibur deʼit rikusoin ba nia an maibé la sai riku ba Maromak.”

22 Tuirmai, nia hatete ba ninia dixípulu sira: “Tan neʼe haʼu hatete ba imi, keta* hanoin resin kona-ba imi-nia moris atu han saida, ka kona-ba imi-nia isin atu hatais saida. 23 Tanba moris iha folin boot liu fali ai-han no isin iha folin boot liu fali hatais. 24 Haree didiʼak ba manu-metan sira, sira la kuda no koʼa, no sira la harii uma ka fatin rai ai-han nian, maski nuneʼe Maromak fó-han sira. Laʼós imi mak folin-boot liu fali manu sira? 25 Imi ida neʼebé mak hodi hanoin barak bele hanaruk ninia moris ba tempu uitoan tan? 26 Entaun, se imi la bele halo buat kiʼik hanesan neʼe, tansá mak imi hanoin resin kona-ba buat seluk? 27 Haree didiʼak oinsá ai-funan moris; sira la serbisu no la suku, maibé haʼu hatete ba imi: Maski Salomão iha buat furak oioin, nia la hatais hanesan ai-funan sira-neʼe ida. 28 Entaun, se Maromak fó hatais ba ai-horis iha rai-luan neʼebé agora iha no aban soe tiha ba ahi, nia sei hakarak liután atu fó hatais ba imi neʼebé fiar kiʼik, loos ka lae? 29 Tan neʼe, keta* hanoin resin kona-ba buat neʼebé imi atu han no hemu, no keta hanoin demais, 30 tanba buat sira-neʼe hotu mak nasaun seluk iha rai buka namanas, maibé imi-nia Aman hatene imi presiza buat sira-neʼe. 31 Tan neʼe, kontinua buka ninia Ukun, no buat sira-neʼe sei fó tan ba imi.

32 “Keta taʼuk, bibi-lubun kiʼik, tanba imi-nia Aman deside ona atu fó ba imi Ukun neʼe. 33 Faʼan imi-nia rikusoin no fó ida-neʼe atu ajuda ema kiak sira. Prepara ba imi-nia an osan-fatin neʼebé la sai bosan, katak rikusoin iha lalehan neʼebé nunka lakon, iha neʼebé naʼok-teen la besik ka ular sira la han. 34 Basá iha fatin neʼebé imi rai imi-nia rikusoin, imi-nia laran mós sei hela iha neʼebá.

35 “Prepara imi-nia an no sai prontu bá* no halakan imi-nia ahi-oan, 36 no imi tenke sai hanesan ema sira neʼebé hein hela sira-nia naʼi atu fila husi festa kaben nian, atu nuneʼe kuandu nia toʼo no tuku odamatan, sira loke kedas ba nia. 37 Ksolok ba atan sira neʼebé matan-moris hela kuandu sira-nia naʼi fila! Haʼu hatete loloos ba imi: Sira-nia naʼi sei prepara ninia an atu halo serbisu no haruka sira tuur iha meza no nia sei mai atu serbí sira. 38 No se sira-nia naʼi toʼo iha kalan fahe-rua, ka kuandu manu kokoreek, no hetan sira matan-moris hela, sira haksolok duni! 39 Maibé hanoin-hetan ida-neʼe bá, se uma-naʼin hatene tuku hira mak naʼok-teen sei mai, nia sei kontinua matan-moris no sei la husik naʼok-teen tama nia uma. 40 Imi mós matan-moris bá, tanba imi la hatene iha oras saida mak Oan-Mane husi ema sei mai.”

41 Tuirmai Pedro dehan: “Naʼi, ita konta ai-knanoik neʼe ba ami deʼit ka ba ema hotu?” 42 No Naʼi hatete: “Sé mak loloos atan* laran-metin no matenek neʼebé ninia Naʼi hili atu tau matan ba atan sira seluk hodi kontinua fó ba sira ai-han neʼebé sira presiza iha tempu loloos? 43 Ksolok ba atan neʼe, se ninia Naʼi mai no hetan nia halo nuneʼe! 44 Haʼu hatete loloos ba imi: Nia sei hili atan neʼe atu tau matan ba ninia rikusoin tomak. 45 Maibé se atan neʼe koʼalia iha nia laran: ‘Haʼu-nia naʼi sei demora’, no nia hahú baku atan-feto ka atan-mane seluk, no han no hemu no sai lanu, 46 atan neʼe nia Naʼi sei mai iha loron neʼebé nia la hein no iha oras neʼebé nia la hatene, no nia Naʼi sei fó kastigu todan ba nia no sei tau nia hamutuk ho ema neʼebé la laran-metin ba Maromak. 47 No kona-ba atan neʼebé hatene ninia naʼi nia hakarak maibé la prepara an ka la halo tuir ninia naʼi nia hakarak, nia naʼi sei baku nia dala barak. 48 Maibé ba atan neʼebé la hatene no halo buat neʼebé merese atu hetan baku, nia sei hetan baku uitoan deʼit. Tuir loloos, se ema ida simu responsabilidade barak, nia tenke kumpre ida-neʼe; no se ema ida simu knaar atu tau matan ba buat barak, ema sei husu nia atu kumpre knaar hotu neʼe ho didiʼak.

49 “Haʼu mai atu hamosu ahi iha rai, no se haʼu halo lakan ona ida-neʼe, saida tan mak haʼu tenke halo? 50 Tuir loloos, iha batizmu ida neʼebé haʼu sei hetan, no haʼu sei laran-susar duni toʼo buat hotu neʼe ramata! 51 Imi hanoin katak haʼu mai atu lori dame ba rai ka? Lae, loloos, haʼu hatete ba imi, haʼu mai atu halo ema haketak malu. 52 Hahú ohin ba oin, ema naʼin-lima iha uma-laran sei haketak malu, naʼin-tolu husi naʼin-rua no naʼin-rua husi naʼin-tolu. 53 Sira sei haketak malu, aman husi oan no oan husi aman, inan husi oan-feto no oan-feto husi inan, banin-feto husi feto-foun no feto-foun husi banin-feto.”

54 Tuirmai, nia hatete mós ba ema-lubun: “Kuandu imi haree kalohan mosu husi parte oeste, imi dehan kedas: ‘Anin no udan-boot ida sei mosu’, no ida-neʼe mosu duni. 55 No kuandu imi haree katak anin huu husi parte súl, imi hatete: ‘Rai sei manas’, no ida-neʼe mosu duni. 56 Ema laran-makerek, imi hatene oinsá haree buat neʼebé mosu iha rai no lalehan, maibé tansá mak imi la hatene loloos buat neʼebé mosu iha tempu neʼe? 57 Tansá mak imi la hanoin atu halo buat neʼebé loos? 58 Porezemplu, kuandu imi* ida laʼo hamutuk ho imi-nia inimigu neʼebé iha lia ida hasoru imi, no imi bá atu hasoru ukun-naʼin, buka atu hadiʼa imi-nia problema ho nia nuʼudar imi laʼo iha dalan, atu nuneʼe nia sei la fó imi ba juis, no juis fó imi ba guarda komarka nian, no guarda sei hatama imi iha komarka. 59 Haʼu hatete ba imi: Imi sei nunka sai husi fatin neʼe toʼo imi selu hotu osan neʼebé imi debe.”

13 Iha tempu neʼebá, ema balu mai no fó-hatene nia katak Pilatos oho ona ema Galileia sira neʼebé hasaʼe hela sakrifísiu iha templu. 2 Entaun, Jesus dehan ba sira: “Tuir imi-nia hanoin, ema Galileia sira-neʼe mate tanba sira halo sala barak liu fali ema Galileia sira seluk ka lae? 3 Lae! Maibé haʼu hatete loloos ba imi katak se imi la hakribi imi-nia sala, imi mós sei mate hanesan sira. 4 Ka ema naʼin sanulu-resin-ualu neʼebé mate tanba uma-andár iha Siloé monu no oho sira, tuir imi-nia hanoin sira aat liu fali ema seluk neʼebé hela iha Jeruzalein ka lae? 5 Lae! Maibé haʼu hatete loloos ba imi katak se imi la hakribi imi-nia sala, imi mós sei mate hanesan sira.”

6 Tuirmai, Jesus hatoʼo ai-knanoik neʼe ba sira: “Mane ida iha ai-figeira hun ida iha ninia toʼos uvas nian, no nia mai atu buka nia fuan maibé la iha. 7 Entaun, nia mai no dehan ba ema neʼebé serbisu iha toʼos uvas nian: ‘Tinan tolu ona haʼu mai atu buka fuan husi ai-figeira neʼe, maibé la hetan fuan ida. Tesi tiha nia. Tansá mak husik nia moris saugati deʼit iha rai?’ 8 Serbisu-naʼin neʼe hatán: ‘Naʼi, husik lai nia moris tan ba tinan neʼe toʼo haʼu keʼe rai haleʼu nia hun no tau rai-metan; 9 no se nia fó fuan, neʼe diʼak; maibé se lae, Ita tenke tesi tiha nia.’”

10 No kuandu Jesus hanorin daudaun iha sinagoga ida iha loron Sábadu, 11 iha mós feto ida neʼebé anju aat sira halo nia moras ba tinan sanulu-resin-ualu, nia bonko no la bele hamriik loos. 12 Kuandu Jesus haree nia, Jesus koʼalia ba nia: “Feto, agora ó livre ona husi ó-nia moras.” 13 No Jesus tau liman ba nia, no iha tempu neʼe kedas nia hamriik loos no hahú fó glória ba Maromak. 14 Maibé sinagoga nia ulun ida sai hirus tanba Jesus kura ema iha loron Sábadu, no nia hahú dehan ba ema-lubun: “Iha loron neen atu bele halo serbisu, tan neʼe iha loron sira-neʼe deʼit mak imi bele mai no hetan isin-diʼak, laʼós iha loron Sábadu.” 15 Maibé, Naʼi hatán ba nia dehan: “Ema laran-makerek, laʼós imi ida-idak mós kore imi-nia karau-aman ka kuda-burru oan husi ninia luhan iha loron Sábadu no lori nia hodi fó buat ruma ba nia atu hemu? 16 Neʼe duni, feto neʼe, neʼebé mós Abraão nia bei-oan, no neʼebé Satanás kesi metin ba tinan sanulu-resin-ualu ona, nia merese atu sai livre husi ninia situasaun iha loron Sábadu, loos ka lae?” 17 Kuandu nia koʼalia tiha buat sira-neʼe, ninia inimigu sira sente moe, maibé ema-lubun tomak haksolok tebes ho buat furak neʼebé nia halo.

18 Tan neʼe, nia dehan tan ba sira: “Maromak nia Ukun hanesan saida? No haʼu sei kompara ida-neʼe ho saida? 19 Ida-neʼe hanesan mostarda-musan neʼebé ema ida lori no kuda iha ninia toʼos, no nia moris no sai boot hanesan ai-hun ida, no manu sira iha lalehan hela iha ninia sanak sira.”

20 No dala ida tan nia dehan: “Haʼu sei kompara Maromak nia Ukun ho saida? 21 Ida-neʼe hanesan fermentu neʼebé feto ida foti no kahur hamutuk ho trigu sukat tolu,* toʼo masa tomak saʼe.”

22 Nuʼudar nia laʼo ba Jeruzalein, nia laʼo liu sidade ida ba sidade seluk no knua ida ba knua seluk hodi hanorin ema. 23 Tuirmai, ema ida dehan ba nia: “Naʼi, ema uitoan deʼit mak sei hetan salvasaun, loos ka lae?” Nia hatete ba sira: 24 “Hakaʼas an makaʼas* atu tama liuhusi odamatan kloot, tanba haʼu hatete ba imi katak ema barak sei koko atu tama maibé la bele. 25 Tanba se uma-naʼin hamriik no xave ona odamatan, no imi hamriik iha liʼur no hahú tuku odamatan dehan: ‘Naʼi, loke odamatan ba ami’, nia sei hatán ba imi: ‘Haʼu la hatene imi mai husi neʼebé!’ 26 Tuirmai imi sei dehan: ‘Ami han no hemu iha Ita-nia oin, no Ita hanorin ami iha dalan boot sira.’ 27 Maibé nia sei hatete ba imi: ‘Haʼu la hatene imi mai husi neʼebé! Dook tiha husi haʼu, imi hotu neʼebé halo hahalok aat!’ 28 No kuandu imi haree Abraão, Isaac, Jacob no profeta sira hotu iha Maromak nia Ukun, imi sei tanis no ruun nehan; maibé imi sei soe tiha ba liʼur. 29 Liután neʼe, ema sei mai husi parte leste no oeste no husi parte norte no súl no sira sei tuur iha meza iha Maromak nia Ukun. 30 No, haree! sira balu neʼebé ikus sei sai uluk, no sira balu neʼebé uluk sei sai ikus.”

31 Iha oras neʼe, ema farizeu balu mai no dehan ba nia: “Sai husi fatin neʼe no laʼo bá, tanba Herodes hakarak atu oho ó.” 32 No nia hatete ba sira: “Bá no dehan ba lohidór* neʼe: ‘Haree! ohin no aban haʼu duni sai anju aat sira no kura ema, no loron tuirmai mak haʼu sei ramata’, 33 no haʼu tenke kontinua laʼo ba Jeruzalein ohin no aban no loron tuirmai, basá profeta ida la bele mate iha Jeruzalein nia liʼur. 34 Jeruzalein, Jeruzalein, ó neʼebé oho profeta sira no tuda ema neʼebé Maromak haruka ba ó! Dala hira ona mak haʼu hakarak atu halibur ó-nia oan sira hanesan manu-inan halibur nia oan iha nia liras okos, maibé imi lakohi! 35 Haree! Maromak husik ona imi-nia uma. Haʼu hatete ba imi, imi sei la haree tan haʼu toʼo imi dehan: ‘Bensaun ba ida neʼebé mai ho Jeová nia naran!’”

14 Iha loron Sábadu ida kuandu nia tama ba ukun-naʼin farizeu ida nia uma atu han, sira hotu hateke ba nia. 2 No haree! iha nia oin iha mane ida neʼebé moras isin-bubu. 3 Entaun, Jesus koʼalia ba ema sira neʼebé hatene didiʼak kona-ba Ukun-Fuan no ba farizeu sira dehan: “Tuir lei, bele kura ema iha loron Sábadu ka lae?” 4 Maibé sira nonook deʼit. Ho ida-neʼe, nia tau liman ba mane neʼe, kura nia no haruka nia bá. 5 No nia hatete ba sira: “Husi imi hotu, sé mak sei la bá lalais hodi dada sai ninia oan ka karau-aman neʼebé monu iha bee-matan maski iha loron Sábadu?” 6 No sira la bele hatán buat ida kona-ba neʼe.

7 Tuirmai, nia konta ai-knanoik ida ba bainaka sira, tanba nia haree oinsá sira hili atu tuur iha fatin neʼebé importante liu. Nia dehan: 8 “Kuandu ema konvida ó ba festa kaben nian, keta tuur iha fatin neʼebé importante liu. Tanba karik nia mós konvida ona ema neʼebé boot liu ó, 9 no nia neʼebé konvida ó sei mai no dehan ba ó: ‘Fó fatin neʼe ba mane neʼe.’ No ó sei moe boot hodi hamriik no bá tuur iha fatin neʼebé kotuk liu. 10 Maibé kuandu ema konvida ó, bá no tuur iha kotuk liu, atu nuneʼe kuandu mane neʼebé konvida ó mai, nia sei dehan ba ó: ‘Belun, bá no tuur iha oin.’ Ho ida-neʼe nia sei hatudu respeitu ba ó iha bainaka hotu nia oin. 11 Tanba ema neʼebé foti an Maromak sei hatún no ema neʼebé haraik an Maromak sei foti aas nia.”

12 Tuirmai, Jesus dehan ba mane neʼebé konvida nia: “Kuandu ó halo festa ka han-kalan, keta bolu ó-nia belun sira, ó-nia maun-alin, ó-nia família, ka ó-nia viziñu neʼebé riku; tanba se ó halo nuneʼe, karik loron ida sira mós sei konvida fali ó, no ida-neʼe katak sira selu fali ona buat neʼebé ó halo. 13 Maibé kuandu ó halo festa, konvida ema kiak, ain-kudeʼik, matan-delek, no ema aleijadu seluk; 14 no ó sei haksolok, tanba sira la iha kbiit atu selu fali ó. Basá ó sei simu kolen kuandu ema laran-loos sira moris hiʼas.”

15 Rona tiha buat sira-neʼe, bainaka ida hatete ba nia: “Ksolok ba ema neʼebé han paun iha Maromak nia Ukun.”

16 Jesus hatete ba nia: “Mane ida halo festa boot, no nia konvida ona ema barak. 17 Kuandu tempu festa nian toʼo ona, nia haruka ninia atan bá hodi bolu ema neʼebé nia konvida ona, dehan: ‘Mai, tanba buat hotu prontu ona.’ 18 Maibé sira hotu hahú fó razaun oioin. Ida primeiru dehan ba nia: ‘Haʼu husu deskulpa. Haʼu la bele bá tanba haʼu foin sosa toʼos ida no haʼu presiza bá atu haree ida-neʼe.’ 19 No ida seluk dehan: ‘Haʼu husu deskulpa. Haʼu la bele bá tanba haʼu foin sosa karau pár lima no haʼu sei bá atu haree toʼok karau sira-neʼe.’ 20 Ida seluk tan dehan: ‘Haʼu la bele bá tanba haʼu foin kaben.’ 21 Ho ida-neʼe, atan neʼe bá no fó-hatene buat hotu ba nia naʼi. Tuirmai, uma-naʼin sai hirus no dehan ba ninia atan: ‘Bá lalais iha dalan boot sira no dalan sidade nian, no lori mai iha neʼe ema neʼebé kiak, ain-aat, matan-delek no kudeʼik.’ 22 Kuandu atan neʼe fila fali nia dehan: ‘Naʼi haʼu halo tiha ona buat neʼebé Ita haruka, maibé sei iha fatin mamuk.’ 23 No naʼi neʼe dehan ba nia atan: ‘Laʼo ba dalan boot no dalan kiʼik sira, no obriga ema atu mai, atu nuneʼe haʼu-nia uma bele sai nakonu. 24 Tanba haʼu hatete ba imi katak sira hotu neʼebé haʼu konvida uluk sei la koko han-kalan neʼebé haʼu prepara.’”

25 No ema-lubun laʼo tuir nia, no nia fila oin ba sira hodi dehan: 26 “Se ema ida mai besik haʼu no la odi ninia inan no aman, feen no oan, maun no biin, no mós ninia moris* rasik, nia la bele sai haʼu-nia dixípulu. 27 Ema naran deʼit neʼebé la lori ninia ai-riin terus nian hodi tuir haʼu, nia la bele sai haʼu-nia dixípulu. 28 Porezemplu, kuandu ema ida hakarak harii uma-andár, nia sei tuur uluklai hodi sura ninia osan, loos ka lae? Nia halo ida-neʼe hodi haree se nia iha osan toʼo atu halo hotu uma neʼe. 29 Se nia la halo ida-neʼe karik, nia sei tau deʼit uma nia hun maibé la bele halo toʼo hotu, no ema neʼebé haree sei goza nia, 30 dehan: ‘Ema neʼe hahú atu harii maibé la bele halo toʼo hotu.’ 31 Ka se liurai ida ho tropa 10.000 bá atu halo funu hasoru liurai seluk neʼebé iha tropa 20.000, nia sei tuur uluklai no husu konsellu husi ema seluk atu haree se nia bele manán ka lae. 32 Tuir loloos, se nia la bele manán, kuandu nia dook hela nia sei haruka uluk ninia manu-ain sira hodi buka dame. 33 Nuneʼe mós se imi la husik hela imi-nia rikusoin tomak imi la bele sai haʼu-nia dixípulu.

34 “Masin mak diʼak. Maibé se masin lakon ninia meer, oinsá mak ita bele halo nia sai meer fali? 35 Masin neʼe la diʼak atu kahur ho rai ka atu halo rai bokur. Ema sei soe deʼit nia ba liʼur. Ema neʼebé iha tilun atu rona, rona bá.”

15 Ema kobradór impostu nian no sala-naʼin sira hotu kontinua hakbesik atu rona ba nia. 2 Ho ida-neʼe, ema farizeu no eskriba sira kontinua muramura kona-ba nia dehan: “Mane neʼe simu ema sala-naʼin no han hamutuk ho sira.” 3 Tuirmai nia konta ai-knanoik ida-neʼe ba sira hodi dehan: 4 “Se ema ida husi imi iha bibi-malae atus ida, no lakon tiha bibi ida, nia sei husik hela bibi sianulu-resin-sia seluk iha rai-fuik no bá buka ida neʼebé lakon toʼo nia hetan, loos ka lae? 5 No kuandu nia hetan tiha bibi neʼe, nia tau iha nia kabaas no kontente loos. 6 Kuandu nia toʼo nia uma, nia bolu ninia belun no viziñu sira atu mai hamutuk no nia dehan: ‘Haksolok ho haʼu, tanba haʼu hetan ona haʼu-nia bibi neʼebé lakon.’ 7 Haʼu hatete ba imi katak kuandu ema sala-naʼin ida hakribi nia sala, sei iha ksolok boot iha lalehan, duké ho ema loos naʼin sianulu-resin-sia neʼebé la presiza hakribi sala.

8 “Ka se feto ida iha osan-besi drakma sanulu,* no lakon tiha drakma ida, nia sei sunu ahi-oan no dasa ninia uma laran hodi buka didiʼak toʼo nia hetan fali, loos ka lae? 9 No kuandu nia hetan tiha, nia bolu ninia belun no viziñu sira atu mai hamutuk no nia dehan: ‘Haksolok ho haʼu, tanba haʼu hetan ona haʼu-nia osan drakma neʼebé lakon.’ 10 Nuneʼe mós haʼu hatete ba imi, Maromak nia anju sira sei haksolok kuandu ema sala-naʼin ida hakribi nia sala.”

11 Tuirmai nia dehan: “Ema ida iha oan-mane naʼin-rua. 12 Oan ida kiʼik hatete ba nia aman: ‘Aman, fó mai haʼu liman-rohan neʼebé haʼu-nian.’ Entaun nia fahe liman-rohan ba sira. 13 Loron balu liu tiha, oan kiʼik neʼe halibur buat hotu hamutuk no laʼo ba rai seluk, no iha neʼebá nia halakon ninia rikusoin hodi moris arbiru deʼit. 14 Kuandu nia gasta hotu tiha buat neʼebé nia iha, hamlaha boot mosu iha rai neʼe, no nia hahú hetan susar. 15 No nia bá hodi sai atan ba ema iha rai neʼe, no ema neʼe haruka nia bá nia toʼos hodi tau matan ba fahi sira. 16 No nia hakarak tebes atu han fahi nia hahán, maibé ema ida la fó buat ida ba nia.

17 “Ikusmai nia hanoin hodi dehan ba nia an: ‘Haʼu-nia aman nia atan sira iha paun barak, maibé haʼu iha neʼe atu mate tan deʼit hamlaha! 18 Haʼu sei hamriik no laʼo ba haʼu-nia aman no dehan: “Aman haʼu halo sala ona hasoru lalehan no mós hasoru Ita. 19 Haʼu la merese tan atu Ita bolu haʼu nuʼudar oan. Halo haʼu sai nuʼudar Ita-nia atan ida.”’ 20 Entaun, nia hamriik no laʼo ba ninia aman. Kuandu nia sei dook hela, ninia aman haree nia no hanoin tebetebes ba nia, no ninia aman halai hasoru nia hodi hakoʼak no reʼi nia. 21 Tuirmai ninia oan hatete ba nia: ‘Aman haʼu halo sala ona hasoru lalehan no mós hasoru Ita. Haʼu la merese tan atu Ita bolu haʼu nuʼudar oan. Halo haʼu sai nuʼudar Ita-nia atan ida.’ 22 Maibé aman neʼe hatete ba nia atan sira: ‘Lalais! Lori mai unuk neʼebé furak liu, no fó ba nia atu hatais, tau kadeli ba nia liman no tau sandálias iha nia ain. 23 No lori mai karau-oan bokur hodi oho, no mai ita han no haksolok, 24 tanba haʼu-nia oan neʼe mate tiha no moris fali ona; nia lakon tiha no hetan fali ona.’ No sira hahú haksolok hamutuk.

25 “Iha tempu neʼe ninia oan boot sei iha toʼos hela; no kuandu nia fila no besik ba uma, nia rona múzika lian no ema dansa. 26 Entaun nia bolu atan ida no husu kona-ba saida mak mosu. 27 Atan neʼe hatete: ‘Ó-nia alin mai fali ona ho isin-diʼak, no tan neʼe ó-nia aman oho karau-oan neʼebé bokur.’ 28 Ho ida-neʼe nia sai hirus no lakohi atu tama ba laran. Tuirmai, ninia aman sai hodi hamaus nia atu tama. 29 Nia hatán ba nia aman: ‘Ba tinan barak ona haʼu sai atan ba Ita, no haʼu sempre halo tuir Ita-nia hakarak, maski nuneʼe Ita seidauk fó haʼu bibi-timur oan ida atu haʼu bele haksolok hamutuk ho haʼu-nia belun sira. 30 Maibé kuandu Ita-nia oan neʼe mai, neʼebé halo mohu Ita-nia rikusoin hodi hela ho feto-aat sira, Ita oho karau-oan neʼebé bokur ba nia.’ 31 Tuirmai nia hatete ba nia oan: ‘Oan, ó sempre hamutuk ho haʼu, no buat hotu neʼebé haʼu-nian, ida-neʼe mós ó-nian; 32 maibé ita presiza haksolok no kontente, tanba ó-nia alin neʼe mate tiha no moris fali, lakon tiha no hetan fali.’”

16 Tuirmai Jesus dehan ba ninia dixípulu sira: “Iha ema riku ida, no nia iha atan neʼebé tau matan ba ninia umakain, no ema duun atan neʼe katak nia halakon ninia naʼi nia rikusoin sira. 2 Entaun, nia bolu atan neʼe no dehan: ‘Haʼu rona buat la diʼak kona-ba ó. Tan neʼe, entrega ó-nia knaar hotu nuʼudar atan tanba ó labele ona atu tau matan ba haʼu-nia uma.’ 3 Tuirmai atan neʼe dehan ba nia an: ‘Saida mak haʼu sei halo kuandu haʼu-nia naʼi hasai haʼu husi serbisu nuʼudar atan? Haʼu la iha forsa atu keʼe rai, no haʼu moe atu husu ezmola. 4 Aa! Haʼu hatene ona saida mak haʼu sei halo, atu nuneʼe, kuandu haʼu sai husi haʼu-nia serbisu nuʼudar atan, ema sei simu haʼu iha sira-nia uma.’ 5 No nia bolu ema ida-idak neʼebé debe ninia naʼi, no nia dehan ba ida uluk: ‘Ó debe hira husi haʼu-nia naʼi?’ 6 Ema neʼe hatán: ‘Mina oliveira bidón sanulu.’* Nia dehan: ‘Tuur lai, foti lalais kontratu neʼebé ó halo no hakerek fali bidón lima.’ 7 Tuirmai, nia dehan ba ida seluk: ‘Oinsá ho ó, ó debe hira husi haʼu-nia naʼi?’ Ema neʼe hatán: ‘Trigu bidón atus ida.’* Nia dehan: ‘Foti kontratu neʼebé ó halo no hakerek fali ualunulu.’ 8 Maski atan neʼe laʼós ema loos, maibé ninia naʼi gaba nia tanba nia hatudu matenek. Haʼu hatete ba imi katak ema iha mundu neʼe matenek kona-ba oinsá atu halaʼo sira-nia moris; sira matenek liu fali ema sira neʼebé laʼo iha naroman.

9 “No mós, haʼu hatete ba imi: Halo belun ba ó-nia an liuhusi rikusoin mundu aat neʼe nian, atu nuneʼe, kuandu buat sira-neʼe lakon, belun sira-neʼe sei simu imi atu hela iha fatin rohan-laek nian. 10 Ema neʼebé laran-metin iha buat kiʼik sei laran-metin mós iha buat boot, no ema neʼebé la laran-moos iha buat kiʼik sei la laran-moos iha buat boot. 11 Tan neʼe, se imi hatudu katak imi la laran-metin ba Maromak hodi la tau matan didiʼak ba rikusoin mundu aat neʼe nian, sé mak sei fó ba imi rikusoin neʼebé loos? 12 No se imi la laran-metin kona-ba buat neʼebé ema seluk nian, sé mak sei fó ba imi buat neʼebé imi-nian? 13 Atan ida la bele serbí naʼi rua; tanba nia sei odi ida no hadomi ida seluk ka nia sei laran-metin ba ida no hakribi ida seluk. Imi la bele sai atan ba Maromak no ba rikusoin.”

14 No kuandu ema farizeu sira rona kona-ba buat sira-neʼe, sira hahú goza nia, tanba sira hadomi deʼit osan. 15 Ho ida-neʼe, nia dehan ba sira: “Imi mak ema neʼebé hatudu an nuʼudar ema loos iha ema nia oin, maibé Maromak hatene imi-nia laran, tanba buat neʼebé folin-boot ba ema mak aat liu iha Maromak nia oin.

16 “Ema haklaken Ukun-Fuan no liafuan profeta sira-nian toʼo deʼit João nia tempu. No husi tempu neʼe ba oin ema haklaken Maromak nia Ukun nuʼudar liafuan diʼak, no ema oioin hakaʼas an atu hetan nia. 17 Tuir loloos, maski karik lalehan no rai sei lakon, maibé sinál kiʼik ida husi letra iha Ukun-Fuan sei la lakon toʼo sira hotu sei sai loos.

18 “Ema naran deʼit neʼebé soe nia feen no kaben fali ho ema seluk halo sala-foʼer,* no ema neʼebé kaben ho feto neʼebé ninia laʼen soe ona, ema neʼe halo sala-foʼer.*

19 “Iha mane riku ida neʼebé baibain hatais unuk kór-uvas neʼebé karun, no loron-loron nia haksolok ho moris diʼak neʼebé nia iha. 20 Maibé iha mós mane ida naran Lázaro neʼebé ema sempre lori hodi tau iha ema riku nia odamatan boot atu husu ezmola, no nia iha kanek barak iha nia kulit. 21 Nia hakarak atu han ai-han neʼebé monu husi ema riku neʼe nia meza no asu sira mós mai hodi lambe nia kanek. 22 No loron ida, ema kiak neʼe mate no anju sira lori nia hodi tuur iha Abraão nia sorin.*

“No ema riku neʼe mós mate no ema hakoi nia. 23 No iha fatin ema mate nian* nia hetan terus barak, no nia foti matan hodi haree Abraão husi dook no Lázaro hamutuk ho Abraão hodi tuur iha ninia sorin. 24 Ho ida-neʼe nia bolu hodi dehan: ‘Aman Abraão hatudu laran-sadiʼa mai haʼu, no haruka Lázaro atu hatama nia liman-fuan tutun ba bee hodi halo malirin haʼu-nia nanál, tanba haʼu terus tebes ho ahi neʼe nia lakan.’ 25 Maibé Abraão hatete: ‘Oan, hanoin-hetan katak ó hetan ona buat diʼak iha ó-nia moris tomak, maibé Lázaro fali hetan susar deʼit. Maibé, agora nia hetan ksolok iha neʼe no ó simu terus barak. 26 No liután neʼe, iha rai-kuak kleʼan neʼebé haketak ami no imi, atu nuneʼe sira neʼebé hakarak laʼo ba imi husi neʼe la bele, nuneʼe mós imi la bele hakat mai ami.’ 27 Tuirmai nia dehan: ‘Se nuneʼe, haʼu husu ba Ita Aman, atu haruka Lázaro ba haʼu-nia aman nia uma, 28 tanba haʼu iha maun-alin naʼin-lima. No nia bele fó sasin ho didiʼak ba sira, hodi nuneʼe sira mós labele tama iha fatin terus nian neʼe.’ 29 Maibé Abraão hatete: ‘Sira iha ona Moisés no profeta sira, entaun husik sira atu rona ba ema sira-neʼe.’ 30 Tuirmai nia dehan: ‘Lae Aman Abraão, se ema ida moris hiʼas husi mate mak bá hasoru sira, sira sei hakribi sira-nia sala.’ 31 Maibé Abraão hatete ba nia: ‘Se sira la rona ba Moisés no profeta sira, neʼe katak sira mós sei la rona maski ema ida moris hiʼas husi mate.’”

17 Depois neʼe, Jesus hatete ba ninia dixípulu sira: “Tuir loloos, buat neʼebé halo ema sidi sei mai duni. Maibé, susar ba ema neʼebé liuhusi nia mak ema seluk sidi. 2 Se nia halo sidi kiʼikoan sira-neʼe ida, diʼak liu tara fatuk boot* ba nia kakorok no soe nia ba tasi. 3 Imi kuidadu imi-nia an bá. Se imi-nia maun ka alin halo sala, siʼak nia bá, no se nia hakribi ninia sala, fó perdua ba nia. 4 Maski nia halo sala hasoru ó dala hitu iha loron ida no nia mai hasoru ó dala hitu hodi dehan: ‘Haʼu hakribi haʼu-nia sala’, ó tenke fó perdua ba nia.”

5 No apóstolu sira hatete ba Naʼi: “Halo boot liután ami-nia fiar.” 6 Tuirmai Naʼi hatete: “Se imi iha fiar hanesan mostarda-musan, imi bele dehan ba ai-hun neʼe:* ‘Fokit ó-nia an no kuda fali iha tasi laran!’ no ai neʼe sei halo tuir imi.

7 “Se ema ida iha atan no atan neʼe fila husi toʼos depois halo tiha serbisu atu fila rai ka hein bibi, atan neʼe nia naʼi sei la dehan: ‘Mai lalais iha neʼe no tuur iha meza’, loos ka lae? 8 Duké halo ida-neʼe, nia sei dehan ba atan neʼe: ‘Prepara buat ruma ba haʼu atu han kalan, no tau ó-nia roupa serbisu-nian no serbí haʼu toʼo haʼu han no hemu hotu tiha, no depois neʼe mak ó bele han no hemu.’ 9 Ema neʼe sei la gaba ninia atan tan deʼit atan neʼe halo ninia knaar, loos ka lae? 10 Nuneʼe mós ho imi, kuandu imi halo tiha ona imi-nia knaar hotu, dehan nuneʼe bá: ‘Ami atan folin-laek. Serbisu neʼebé ami halo mak ami-nia knaar deʼit.’”

11 No nuʼudar Jesus laʼo ba Jeruzalein, nia laʼo liu Samaria no mós Galileia. 12 No kuandu nia tama ba sidade ida, mane naʼin-sanulu neʼebé moras-lepra mai hasoru nia, no sira hamriik deʼit iha dook. 13 No sira bolu makaʼas dehan: “Mestre, Jesus, hatudu laran-sadiʼa mai ami!” 14 No kuandu nia haree sira, nia hatete ba sira: “Bá no hatudu imi-nia an ba amlulik sira.” Tuirmai, kuandu sira bá, sira-nia isin sai moos. 15 Kuandu ema sira-neʼe ida haree katak nia sai isin-diʼak ona, nia fila fali hodi fó hahiʼi ba Maromak ho lian makaʼas. 16 No nia monu ain ba Jesus, no fó obrigadu; liután neʼe, nia mak ema Samaria ida. 17 Jesus dehan ba nia: “Ema naʼin-sanulu mak hetan isin-diʼak, loos ka lae? Entaun, sira naʼin-sia seluk iha neʼebé? 18 Tansá mak ema sira-neʼe ida la mai fali hodi fó glória ba Maromak, só deʼit ema neʼe neʼebé husi nasaun seluk?” 19 Tuirmai, nia dehan ba mane neʼe: “Hamriik no laʼo bá. Ó-nia fiar mak halo ó sai isin-diʼak.”

20 Loron ida kuandu ema farizeu sira husu kona-ba bainhira mak Maromak nia Ukun sei mai, nia dehan ba sira: “Maromak nia Ukun la mai iha dalan neʼebé ema hotu hatene. 21 No ema mós sei la dehan: ‘Haree iha neʼe!’ ka, ‘Iha neʼebá!’ Tanba loloos, Maromak nia Ukun iha imi-nia leet.”

22 Tuirmai, nia hatete ba nia dixípulu sira dehan: “Loron sei toʼo mai kuandu imi hakarak atu haree tempu neʼebé Oan-Mane husi ema sei hamutuk ho imi, maibé imi sei la haree ida-neʼe.” 23 No ema sei hatete ba imi: ‘Haree iha neʼebá!’ ka, ‘Haree iha neʼe!’ Keta bá ka keta laʼo tuir sira. 24 Basá hanesan rai-lakan fó sai nia naroman, hodi halo nabilan lalehan nia rohan ida toʼo rohan seluk, nuneʼe mós ho loron neʼebé Oan-Mane husi ema hatudu sai nia an. 25 Maibé, ulukliu, nia tenke hasoru susar barak no ema iha jerasaun neʼe sei la simu nia. 26 Liután neʼe, hanesan mosu iha Noé nia loron, nuneʼe mós iha Oan-Mane husi ema nia loron sira: 27 Sira han no hemu, mane no feto sira kaben, toʼo loron neʼebé Noé tama ba ró* laran, no rai-nabeen mosu hodi halakon sira hotu. 28 Nuneʼe mós, hanesan mosu iha Lot nia loron: Ema han, hemu, sosa no faʼan, kuda no harii uma sira. 29 Maibé iha loron neʼebé Lot sai husi Sodoma, ahi no fatuk neʼebé lakan tun husi lalehan hodi halakon sira hotu. 30 Ida-neʼe mós sei mosu iha loron neʼe kuandu Oan-Mane husi ema hatudu nia an.

31 “Iha loron neʼe, ema neʼebé iha uma-leten keta tun atu foti ninia sasán sira iha uma laran, nuneʼe mós ema neʼebé iha toʼos keta fila fali ba buat sira neʼebé nia husik hela. 32 Hanoin-hetan Lot nia feen. 33 Ema neʼebé buka atu salva nia moris* sei lakon nia moris, maibé ema neʼebé lakon nia moris sei salva nia moris. 34 Haʼu hatete ba imi: Iha kalan neʼebá ema naʼin-rua toba iha kama ida; ida sei lori tiha, no ida seluk sei husik hela. 35 Sei iha feto naʼin-rua neʼebé dulas hela fini hamutuk; ida sei lori tiha, no ida seluk sei husik hela.” 36 ——* 37 Entaun sira dehan ba nia: “Iha neʼebé, Naʼi?” Nia hatán ba sira: “Iha fatin neʼebé mate-isin iha, iha neʼebá mós manu-makikit sira halibur an.”

18 Tuirmai, nia konta ai-knanoik ida ba sira kona-ba tansá sira presiza atu halo orasaun nafatin no la rende an. 2 Nia dehan: “Iha sidade ida, iha juis neʼebé la taʼuk Maromak no la respeitu ema. 3 Maibé iha sidade neʼe, iha mós feto-faluk ida neʼebé kontinua bá hasoru juis neʼe no dehan: ‘Haʼu-nia inimigu foti lia hasoru haʼu, tan neʼe favór ida ajuda haʼu atu hetan justisa.’ 4 Foufoun juis neʼe lakohi, maibé depois neʼe nia hatete ba nia an: ‘Maski haʼu la taʼuk Maromak no la respeitu ema, 5 maibé tanba feto-faluk neʼe kontinua halo problema ba haʼu, haʼu sei hakaʼas an atu nia hetan justisa, atu nuneʼe nia labele mai beibeik no halo haʼu kole.’” 6 Tuirmai Naʼi hatete: “Hanoin toʼok saida mak juis neʼe dehan maski nia laʼós ema loos! 7 Entaun, oinsá ho Maromak? Maromak hatudu duni pasiénsia ba sira neʼebé nia hili ona, neʼebé hakilar ba nia loron-kalan, no nia sei halo sira hetan duni justisa. 8 Haʼu hatete ba imi: Nia sei halo sira hetan justisa lalais. Maski nuneʼe, kuandu Oan-Mane husi ema mai, nia sei hetan fiar hanesan neʼe iha rai ka lae?”

9 Maibé, nia konta ai-knanoik tuirmai neʼe ba ema balu neʼebé haree sira-nia an nuʼudar ema loos, no sira haree ema seluk folin-laek: 10 “Ema naʼin-rua bá templu atu halo orasaun, ida ema farizeu no ida seluk ema kobradór impostu nian. 11 Ema farizeu neʼe hamriik no komesa halo orasaun hodi dehan iha ninia laran: ‘Oh Maromak, haʼu fó obrigadu ba Ita-Boot, tanba haʼu la hanesan ema seluk neʼebé naʼok-teen, ema aat, neʼebé halo sala-foʼer, no haʼu mós la hanesan ho ema kobradór impostu neʼe. 12 Haʼu halo jejún dala rua iha semana ida nia laran; haʼu fó parte sanulu husi buat hotu neʼebé haʼu simu.’ 13 Maibé, ema kobradór impostu nian hamriik husi dook, no nia la brani atu foti nia matan ba leten. Nia baku beibeik ninia hirus-matan hodi dehan: ‘Oh Maromak, hatudu laran-sadiʼa mai haʼu, haʼu ema sala-naʼin.’ 14 Haʼu dehan ba imi: Kuandu mane neʼe fila ba uma, Maromak haree nia nuʼudar ema loos liu fali ema farizeu neʼe. Basá ema neʼebé foti an, Maromak sei hamoe, no ema neʼebé haraik an, Maromak sei foti aas.”

15 No ema hahú lori ba nia sira-nia oan atu nia tau liman ba sira, maibé kuandu dixípulu sira haree ida-neʼe, sira hahú siʼak ema sira-neʼe. 16 Maski nuneʼe, Jesus bolu labarik kiʼik sira-neʼe hodi besik nia, no nia dehan: “Husik labarik sira-neʼe mai besik haʼu, no keta koko atu hapara sira. Basá ema hanesan labarik sira-neʼe mak sei simu Maromak nia Ukun. 17 Haʼu hatete loloos ba imi: Ema naran deʼit neʼebé la simu Maromak nia Ukun hanesan labarik ida, nia sei la tama duni ba Ukun neʼe.”

18 No ukun-naʼin ida husu Jesus dehan: “Mestre Diʼak, saida mak haʼu tenke halo atu hetan moris rohan-laek?” 19 Jesus hatán ba nia: “Tansá ó bolu haʼu diʼak? La iha ema ida diʼak; Maromak mesak deʼit mak diʼak. 20 Ó hatene ukun-fuan sira: ‘Keta halo sala-foʼer;* keta oho; keta naʼok; keta fó sasin falsu; hatudu respeitu ba ó-nia inan no aman.’” 21 Mane neʼe hatán: “Haʼu halo tuir buat hotu neʼe husi tempu kiʼik kedas.” 22 Depois rona tiha neʼe, Jesus hatete ba nia: “Iha buat ida deʼit mak ó kuran: Faʼan buat hotu neʼebé ó iha no fahe ba ema kiak sira, no ó sei hetan rikusoin iha lalehan, no mai tuir haʼu.” 23 Rona tiha ida-neʼe, nia sai laran-triste tebes, tanba nia riku loos.

24 Jesus hateke ba nia no dehan: “Susar duni ba ema sira neʼebé iha osan barak atu tama ba Maromak nia Ukun! 25 Fasil liu ba kuda-kamelu ida atu tama liuhusi daun nia kuak duké ema riku ida tama ba Maromak nia Ukun.” 26 Sira neʼebé rona ida-neʼe dehan: “Sé loos mak bele hetan salvasaun?” 27 Nia dehan: “Buat neʼebé ba ema la bele, ba Maromak bele.” 28 Maibé, Pedro hatete: “Haree! Ami husik ona ami-nia sasán hodi laʼo tuir Ita.” 29 Jesus dehan ba sira: “Haʼu hatete loloos ba imi: Ema neʼebé husik ona uma, feen, maun-alin, inan-aman, ka oan tanba Maromak nia Ukun 30 sei simu barak liu fali iha tempu neʼe, no iha tempu neʼebé atu mai sei simu moris rohan-laek.”

31 Tuirmai, nia lori ketak sira naʼin sanulu-resin-rua no dehan ba sira: “Haree! Agora ita saʼe ba Jeruzalein, no buat hotu neʼebé hakerek ona liuhusi profeta sira kona-ba Oan-Mane husi ema sei sai loos. 32 Porezemplu, ema sei entrega nia ba ema husi nasaun seluk no sira sei goza nia, halo aat ba nia no tafui kabeen ba nia, 33 no kuandu sira baku tiha nia ho xikote, sira sei oho nia; maibé liutiha loron tolu nia sei moris hiʼas.” 34 Maski nuneʼe, sira la hatene liafuan sira-neʼe katak sá, tanba buat sira-neʼe subar husi sira, no sira la komprende buat neʼebé nia koʼalia.

35 No nuʼudar nia besik daudaun ba Jerikó, ema matan-delek ida tuur hela iha dalan ninin hodi husu ezmola. 36 Tanba nia rona ema-lubun laʼo liu daudaun, nia hahú husu kona-ba saida mak mosu. 37 Sira hatete ba nia: “Jesus Nazaré mak liu daudaun!” 38 Ho ida-neʼe nia hakilar, dehan: “Jesus, David nia Oan, hatudu laran-sadiʼa mai haʼu!” 39 No ema sira neʼebé laʼo uluk hahú siʼak nia makaʼas atu nonook, maibé ida-neʼe halo nia hakilar makaʼas liután: “David nia Oan, hatudu laran-sadiʼa mai haʼu!” 40 Tuirmai, Jesus para no haruka ema atu lori mane neʼe ba nia. Kuandu mane neʼe hakbesik, Jesus husu nia: 41 “Saida mak ó hakarak haʼu halo ba ó?” Nia dehan: “Naʼi, halo haʼu haree fali.” 42 No Jesus hatete ba nia: “Haree fali bá; ó-nia fiar mak halo ó sai diʼak.” 43 No iha oras neʼe kedas nia haree fali, no nia hahú laʼo tuir Jesus hodi hahiʼi Maromak. No mós, ema hotu neʼebé haree ida-neʼe fó hahiʼi ba Maromak.

19 Tuirmai, nia toʼo ba sidade Jerikó no laʼo liuhusi sidade neʼe. 2 No iha neʼebá iha mane ida naran Zakeus, nia mak ulun-naʼin ba kobradór impostu nian, no nia ema riku ida. 3 Nia hakarak tebes atu haree Jesus, maibé tanba ema-lubun neʼe nia la bele haree basá nia ain-badak. 4 Entaun nia halai uluk no saʼe ba ai-figeira ida atu bele haree Jesus tanba Jesus atu laʼo liu dalan neʼe. 5 Kuandu Jesus toʼo ba fatin neʼe, nia hateke ba leten no dehan: “Zakeus, tun lalais mai, basá ohin haʼu sei hela iha ó-nia uma.” 6 Ho ida-neʼe nia tun lalais no ho haksolok simu Jesus nuʼudar ninia bainaka. 7 Maibé kuandu haree ida-neʼe, ema hotu muramura no dehan: “Nia bá atu hela iha ema sala-naʼin nia uma.” 8 No Zakeus hamriik hodi dehan ba Naʼi: “Naʼi, haʼu sei fahe haʼu-nia rikusoin ba rua hodi fó ida ba ema kiak sira, no buat naran deʼit neʼebé haʼu foti husi ema hodi hamatak sira, haʼu sei fó fali dala haat liu fali buat neʼebé haʼu foti.” 9 Ho ida-neʼe Jesus dehan ba nia: “Ohin salvasaun mai ona iha uma neʼe, tanba nia mós Abraão nia oan ida. 10 Basá kona-ba Oan-Mane husi ema, nia mai atu buka no salva sira neʼebé lakon.”

11 Nuʼudar dixípulu sira rona buat sira-neʼe, nia konta tan ai-knanoik ida tanba sira hanoin katak kuandu sira toʼo iha Jeruzalein Maromak nia Ukun sei mosu mai derrepente deʼit. 12 Tan neʼe nia dehan: “Ema ida husi família liurai nian prepara an atu laʼo ba rai dook hodi simu knaar nuʼudar liurai no depois neʼe nia sei fila fali. 13 Antes bá, nia bolu ninia atan naʼin-sanulu hodi fó sira osan-mutin* sanulu no dehan ba sira: ‘Fila liman bá toʼo haʼu mai fali.’ 14 Maibé povu iha ninia rai odi nia no haruka manu-ain sira hodi bá tuir nia no dehan: ‘Ami lakohi atu mane neʼe sai ami-nia liurai.’

15 “Ikusmai, kuandu sai tiha liurai nia fila fali, no nia haruka ema atu bolu atan sira neʼebé nia fó osan-mutin, atu nuneʼe nia bele hatene osan hira mak sira manán husi fila-liman. 16 Ida primeiru mai no dehan: ‘Naʼi, ho Ita-nia osan-mutin sanulu, haʼu manán sanulu tan.’ 17 Ho ida-neʼe nia naʼi dehan: ‘Ó atan diʼak, ó halo diʼak loos! Tanba ó hatudu laran-metin iha buat kiʼik, entaun haʼu fó ó knaar atu ukun sidade sanulu.’ 18 No atan ida segundu mai no dehan: ‘Naʼi, ho Ita-nia osan-mutin lima haʼu manán lima tan.’ 19 Naʼi dehan mós ba atan neʼe: ‘Haʼu mós fó knaar ba ó atu ukun sidade lima.’ 20 Maibé ida seluk mai no dehan: ‘Naʼi, Ita-nia osan-mutin mak neʼe. Haʼu falun ho hena no subar tiha. 21 Loloos, haʼu taʼuk Ita-Boot, tanba Ita mak ema siʼak-teen; Ita foti osan neʼebé Ita la rai hela, no Ita koʼa buat neʼebé Ita la kuda.’ 22 Nia hatete ba atan neʼe: ‘Husi ó-nia ibun rasik mak haʼu tesi lia ba ó, atan aat. Ó rasik hatene katak haʼu ema siʼak-teen, haʼu foti osan neʼebé haʼu la rai no haʼu koʼa buat neʼebé haʼu la kuda. 23 Entaun, tansá mak ó la rai haʼu-nia osan-mutin iha banku? Atu nuneʼe kuandu haʼu fila haʼu bele foti osan neʼe hamutuk ho nia funan.’

24 “Ho ida-neʼe, nia hatete ba sira neʼebé hamriik besik: ‘Foti tiha osan-mutin neʼe husi nia no fó fali ba ida neʼebé iha osan-mutin sanulu.’ 25 Maibé sira hatete: ‘Naʼi, nia iha ona osan-mutin sanulu!’ Nia hatán: 26 ‘Haʼu hatete ba imi: Ba ema neʼebé iha ona, sei fó tan ba nia, maibé ba ema neʼebé la iha, buat neʼebé nia iha mós sei foti husi nia. 27 Liután neʼe, kona-ba haʼu-nia inimigu sira neʼebé lakohi atu haʼu ukun sira, imi lori sira mai no oho sira iha haʼu-nia oin.’”

28 Depois, nia koʼalia tiha buat sira-neʼe, nia kontinua laʼo hodi saʼe ba Jeruzalein. 29 No kuandu nia besik ona Betfage no Betánia iha foho neʼebé bolu nuʼudar Foho Oliveira, nia haruka dixípulu naʼin-rua, 30 hodi dehan: “Bá hodi tama ba knua neʼebé imi haree daudaun, no depois imi tama tiha, imi sei hetan kuda-burru oan kesi hela, no ema ida seidauk saʼe kuda-burru neʼe. Imi kore nia no lori mai. 31 Maibé se ema ruma husu: ‘Tansá mak imi kore kuda-burru neʼe?’ imi tenke hatán: ‘Naʼi presiza ida-neʼe.’” 32 Entaun, dixípulu naʼin-rua neʼe bá no hetan ida-neʼe tuir buat neʼebé nia hatete ba sira. 33 Maibé kuandu sira kore daudaun kuda-burru oan neʼe, nia naʼin hatete ba sira: “Tansá mak imi kore kuda-burru oan neʼe?” 34 Sira hatete: “Naʼi presiza ida-neʼe.” 35 Sira lori kuda-burru neʼe ba Jesus, no sira tau sira-nia hatais ba kuda nia leten no Jesus tuur iha kuda-burru nia leten.

36 No nuʼudar nia liu daudaun, sira nahe sira-nia hatais iha dalan. 37 Kuandu nia besik ona dalan atu tun husi Foho Oliveira, ninia dixípulu lubun boot hahú haksolok no hahiʼi Maromak ho lian makaʼas kona-ba milagre barak neʼebé sira haree ona. 38 Sira dehan: “Bensaun ba Ida neʼebé mai nuʼudar Liurai hodi Jeová nia naran! Dame iha lalehan, no glória iha fatin aas!” 39 Maibé ema farizeu balu neʼebé hamutuk ho ema-lubun hatete ba nia: “Mestre, haruka Ita-nia dixípulu sira nonook.” 40 Maibé nia hatán ba sira: “Haʼu hatete ba imi, se ema sira-neʼe nonook, fatuk sira mak sei hakilar.”

41 No kuandu nia besik Jeruzalein, nia hateke ba sidade neʼe no tanis, 42 hodi dehan: “Haʼu hakarak katak ó hatene buat neʼebé sei lori dame ba ó, maibé agora buat sira-neʼe subar ona husi ó. 43 Tanba loron sei mai kuandu ó-nia inimigu harii lutu ho ai-meik hodi haleʼu ó, no sira sei ataka ó husi fatin hotu. 44 Sira sei harahun ó no ó-nia oan sira, no sira sei la husik fatuk ida tula iha fatuk seluk nia leten, tanba Maromak mai hodi tesi lia ba ó maibé ó la hatene ida-neʼe.”

45 Tuirmai, nia tama ba templu no hahú duni sai ema sira neʼebé faʼan iha neʼebá. 46 Nia dehan ba sira: “Hakerek nanis ona: ‘Haʼu-nia uma sei sai nuʼudar uma orasaun nian’, maibé imi halo ida-neʼe sai fali naʼok-teen sira-nia knuuk.”

47 Liután neʼe, loron-loron nia bá hanorin iha templu. No ulun-naʼin amlulik sira, eskriba sira no mós ema-boot sira husi povu nia leet buka atu oho nia. 48 Maibé, sira la hetan dalan atu halo nuneʼe tanba povu hotu gosta tebes atu rona ba nia.

20 Iha loron ida kuandu nia hanorin hela ema iha templu no fó sai liafuan diʼak, ulun-naʼin amlulik sira no eskriba sira hamutuk ho katuas povu nian mai hakbesik nia, 2 no dehan ba nia: “Fó-hatene mai ami, ho kbiit saida mak ó halo buat sira-neʼe? Ka sé mak fó kbiit neʼe ba ó?” 3 Nia dehan ba sira: “Haʼu mós sei husu imi pergunta ida, no imi fó-hatene haʼu: 4 João nia batizmu mai husi Maromak* ka husi ema?” 5 Sira hahú koʼalia ba malu dehan: “Se ita dehan: ‘Husi Maromak’, nia sei hatán: ‘Tansá mak imi la fiar nia?’ 6 Maibé se ita dehan: ‘Husi ema’, povu tomak sei tuda mate ita ho fatuk, tanba sira fiar katak João mak profeta ida.” 7 Entaun, sira hatán ba nia katak sira la hatene João simu kbiit husi neʼebé. 8 No Jesus dehan ba sira: “Haʼu mós sei la fó-hatene imi ho kbiit saida mak haʼu halo buat sira-neʼe.”

9 Tuirmai, nia konta ai-knanoik neʼe ba povu sira: “Mane ida halo toʼos uvas nian no nia fó-aluga* ba toʼos-atan sira, depois neʼe nia laʼo ba rai liʼur ba tempu kleur. 10 Kuandu tempu koʼa nian toʼo ona, nia haruka ninia ema ida ba toʼos-atan sira, atu nuneʼe sira bele fó ba nia uvas-fuan balu husi ninia toʼos. Maibé, toʼos-atan sira baku nia no haruka nia fila ho liman-mamuk. 11 Dala ida tan, nia haruka ema seluk. Toʼos-atan sira mós baku nia, hamoe nia, no haruka nia fila ho liman-mamuk. 12 Ba dala tolu nia haruka tan ema ida; sira mós hakanek ema neʼe no soe nia ba liʼur. 13 Ho ida-neʼe, toʼos-naʼin dehan: ‘Saida mak haʼu tenke halo? Haʼu sei haruka haʼu-nia oan neʼebé haʼu hadomi. Karik sira sei respeitu nia.’ 14 Kuandu toʼos-atan sira haree nia, sira koʼalia ba malu dehan: ‘Nia mak ida neʼebé sei simu toʼos neʼe nuʼudar liman-rohan; mai ita oho tiha nia, atu nuneʼe ninia liman-rohan bele sai ita-nian.’ 15 Ho ida-neʼe sira lori nia ba toʼos liʼur no oho nia. Entaun, toʼos-naʼin sei halo saida ba sira? 16 Toʼos-naʼin sei mai no oho toʼos-atan sira-neʼe no nia sei fó toʼos uvas nian ba ema seluk.”

Rona tiha ida-neʼe, sira dehan: “Buat sira-neʼe sei nunka mosu!” 17 Maibé nia hateke ba sira no dehan: “Entaun, eskritura tuirmai neʼe katak sá? ‘Fatuk neʼebé badain sira la simu sai ona fatuk neʼebé importante liu.’* 18 No ema hotu neʼebé monu iha fatuk neʼe nia leten sei rahun. Nuneʼe mós, ema neʼebé fatuk neʼe monu iha nia leten, ema neʼe sei rahun.”

19 Ema eskriba sira no ulun-naʼin amlulik sira buka atu kaer nia iha tempu neʼebá kedas tanba sira hatene katak nia koʼalia kona-ba sira kuandu nia konta ai-knanoik neʼe. Maibé sira taʼuk povu. 20 Entaun, sira buka atu lasu Jesus, tan neʼe ho subasubar sira haruka ema balu neʼebé sira selu hodi finje katak sira ema laran-loos, atu sira bele hetan sala ruma iha ninia liafuan hodi bele kaer nia no lori ba ema-boot sira no governadór sira. 21 No ema sira-neʼe husu nia, dehan: “Mestre, ami hatene katak Ita-Boot koʼalia no hanorin ho loloos, no Ita la todan ba sorin, tanba Ita hanorin Maromak nia dalan hodi tuir lia-loos: 22 Nuneʼe, sala ka lae atu selu impostu ba Liurai Roma nian?”* 23 Maibé tanba hatene sira-nia laran-aat, nia hatete ba sira: 24 “Hatudu mai haʼu osan denáriu ida. Sé-nia oin no naran mak neʼe?” Sira hatán: “Liurai Roma nian.” 25 Nia hatete ba sira: “Neʼe duni, fó ba Liurai Roma buat neʼebé Liurai Roma nian, no ba Maromak buat neʼebé Maromak nian.” 26 No sira la bele hetan sala ruma ho ninia liafuan, maibé sira hakfodak ho ninia resposta, no sira sai nonook.

27 Maibé ema saduseu* balu hakbesik nia, basá sira dehan katak la iha moris-hiʼas, no sira husu nia 28 hodi dehan: “Mestre, Moisés hakerek mai ita: ‘Se ema ida nia maun mate no husik hela nia feen no nia la iha oan, ninia alin* tenke hola feto neʼe no iha oan ba ninia maun.’ 29 Iha maun-alin naʼin-hitu; no ida primeiru hola feto no depois neʼe mate no nia la iha oan. 30 Nuneʼe mós ida segundu, 31 no mós ida terseiru hola feto neʼe. Entaun sira naʼin-hitu hotu hola feto neʼe no mate, no sira la iha oan. 32 Ikusmai feto neʼe mós mate. 33 Neʼe duni, iha tempu moris-hiʼas nian, feto neʼe sei sai sé-nia feen? Basá sira naʼin-hitu hotu hola nia.”

34 Jesus hatete ba sira: “Mundu neʼe nia oan sira kaben no fó-kaben, 35 maibé ba sira neʼebé merese atu hetan moris-hiʼas husi mate no hetan moris iha tempu neʼebé atu mai, sira sei la kaben ka fó-kaben. 36 Tuir loloos, sira sei la mate tan, basá sira sei sai hanesan anju sira; sira mak Maromak nia oan tanba sira hetan moris-hiʼas. 37 Kona-ba moris-hiʼas husi mate, Moisés rasik hatudu ona ida-neʼe. Iha istória kona-ba ai-hun* neʼebé lakan, Moisés bolu Jeová nuʼudar ‘Abraão nia Maromak no Isaac nia Maromak no Jacob nia Maromak’. 38 Nia laʼós Maromak ba ema neʼebé mate, maibé Maromak ba ema neʼebé moris, basá ba nia sira hotu sei moris hela.” 39 Ema eskriba balu dehan: “Mestre, Ita-Boot koʼalia loos.” 40 No sira la brani atu husu tan nia pergunta ida.

41 Entaun nia dehan ba sira: “Tansá ema hatete katak Kristu mak David nia oan? 42 Tanba David rasik dehan iha livru Salmu: ‘Jeová hatete ba haʼu-nia Naʼi: “Tuur iha haʼu-nia liman-loos 43 toʼo haʼu tau ó-nia inimigu sira iha ó-nia ain okos.”’ 44 Se David bolu nia ‘Naʼi’, oinsá mak nia David nia oan?”

45 Tuirmai, nuʼudar ema sira rona hela, nia hatete ba ninia dixípulu: 46 “Matan-moris bá, tanba eskriba sira laʼo bá-mai ho unuk neʼebé naruk no hakarak ema kumprimenta sira iha merkadu, no iha sinagoga laran, sira gosta atu tuur iha oin. No kuandu sira han iha festa, sira mós hakarak tuur iha fatin neʼebé importante liu. 47 Sira hadau feto-faluk sira-nia sasán,* no halo orasaun neʼebé naruk iha ema nia oin. Sira sei hetan kastigu neʼebé makaʼas liu.”

21 Kuandu Jesus foti matan, nia haree ema riku sira tau osan ba osan-fatin templu nian. 2 Tuirmai, nia mós haree feto-faluk kiak ida tau osan kiʼik rua ho folin neʼebé kiʼik tebes. 3 No nia hatete: “Haʼu dehan loloos ba imi: Feto-faluk neʼe, maski nia kiak, maibé nia tau barak liu fali sira seluk hotu. 4 Basá sira hotu tau buat neʼebé resin husi sira-nia rikusoin, maibé feto neʼe, maski nia kiak, nia fó buat hotu neʼebé nia iha.”

5 Tuirmai, kuandu ema balu koʼalia kona-ba templu neʼebé nakonu ho fatuk folin-boot no mós buat santu sira neʼebé ema fó ona ba Maromak, 6 nia hatete: “Kona-ba buat sira neʼebé imi haree daudaun neʼe, loron sei toʼo mai bainhira fatuk sira la tula tan iha fatuk ida nia leten, sira hotu sei naksobu.” 7 Entaun sira husu ba nia: “Mestre, bainhira loos mak buat sira-neʼe sei mosu, no sinál saida mak sei hatudu katak buat sira-neʼe atu mosu?” 8 Nia hatete: “Kuidadu bá atu ema la lohi imi, tanba ema barak sei mai hodi haʼu-nia naran, no dehan: ‘Haʼu mak nia’, no mós: ‘Tempu besik ona.’ Imi keta tuir sira. 9 Liután neʼe, kuandu imi rona kona-ba funu no problema sira, keta sai taʼuk. Tanba buat sira-neʼe tenke mosu uluk, maibé rohan sei la mai kedas.”

10 Tuirmai, nia hatete ba sira: “Nasaun sei hamriik hasoru nasaun seluk, no ukun ida sei hamriik hasoru ukun seluk; 11 iha fatin barak sei iha rai-nakdoko makaʼas, no iha fatin oioin sei iha moras aat no hahán menus; no ema sei haree buat neʼebé halo sira taʼuk no sei mosu sinál boot sira iha lalehan.

12 “Maibé antes buat sira-neʼe, ema sei kaer imi no fó-terus ba imi, no sei lori imi ba sinagoga sira no ba komarka. Sira mós sei lori imi ba liurai sira no governadór sira-nia oin tanba haʼu-nia naran. 13 Ida-neʼe sei loke dalan ba imi atu fó sasin. 14 Tan neʼe, imi la presiza prepara nanis kona-ba oinsá atu koʼalia hodi defende imi-nia an, 15 tanba haʼu sei fó ba imi liafuan no matenek neʼebé imi-nia inimigu sira hotu la bele koʼalia buat ida atu hatán. 16 Liután neʼe, imi-nia inan-aman, maun-alin, família, no belun sira rasik mak sei entrega imi ba juis sira hodi oho imi balu; 17 no ema hotu sei odi imi tanba haʼu-nia naran. 18 Maski nuneʼe, imi-nia fuuk-lahan ida mós sei la lakon husi imi-nia ulun. 19 No hodi tahan nafatin mak imi sei hetan imi-nia moris.*

20 “Liután neʼe, kuandu imi haree soldadu sira haleʼu Jeruzalein, imi hatene bá katak nia besik ona atu lakon. 21 Iha oras neʼe, ema neʼebé iha Judeia presiza halai ba foho, no sira neʼebé iha sidade laran tenke sai, no sira neʼebé iha toʼos labele tama fali ba sidade, 22 tanba loron sira-neʼe mak loron kastigu nian, atu nuneʼe buat hotu neʼebé hakerek nanis ona bele sai loos. 23 Susar ba feto sira neʼebé isin-rua no mós ba sira neʼebé fó-susu ba bebé iha loron sira-neʼe! Tanba sei mosu susar boot iha rai no povu neʼe sei hetan kastigu; 24 no sira sei mate tanba surik no ema sei lori sira nuʼudar dadur iha nasaun hotu, no nasaun sira sei sama Jeruzalein toʼo tempu nasaun sira-nian kumpre ona.

25 “No mós, sei mosu sinál iha loro-matan, fulan no fitun sira, no nasaun sira iha rai sei laran-susar tebetebes, no sira sei la hatene atu halo saida tanba tasi nia siʼak no laloran nia tarutu makaʼas, 26 no ema sei dezmaia tanba taʼuk hodi hein hela buat neʼebé sei mosu ba ema iha rai; tanba lalehan nia kbiit sei nakdoko. 27 Tuirmai sira sei haree Oan-Mane husi ema, no nia sei mai iha kalohan ho kbiit no ho glória boot. 28 Maibé kuandu buat sira-neʼe hahú mosu, hamriik loos bá no foti imi-nia ulun, tanba imi-nia salvasaun mai besik daudaun ona.”

29 Ho ida-neʼe nia konta ai-knanoik ida ba sira: “Haree ba ai-figeira no ai sira seluk: 30 Kuandu imi haree sira hahú iha dikin, imi hatene katak tempu bailoro* besik ona. 31 Nuneʼe mós kuandu imi haree buat sira-neʼe mosu, imi hatene bá katak Maromak nia Ukun besik ona. 32 Haʼu hatete loloos ba imi: Jerasaun neʼe sei la lakon toʼo buat hotu neʼe mosu. 33 Maski lalehan no rai sei lakon, maibé haʼu-nia liafuan sira sei la lakon.

34 “Maibé kuidadu didiʼak imi-nia an bá, atu nuneʼe imi-nia laran la todan tanba han demais no hemu barak, no hanoin resin kona-ba moris neʼe, no derrepente deʼit loron neʼe monu ba imi 35 hanesan lasu ida. Basá loron neʼe sei monu ba ema hotu neʼebé hela iha rai. 36 Tan neʼe, matan-moris bá, no harohan bá iha tempu hotu, atu nuneʼe imi bele hetan salvasaun husi buat sira-neʼe hotu neʼebé fó-hatene nanis ona atu mosu, no atu Oan-Mane husi ema bele simu imi.”

37 No durante rai-loron, Jesus hanorin iha templu, maibé iha kalan nia sai hodi bá deskansa iha foho ida naran Foho Oliveira. 38 No iha dadeer-saan ema hotu sempre mai sedu iha templu atu rona ba nia.

22 No Festa Paun Fermentu-Laek nian, neʼebé mós bolu nuʼudar Festa Salvasaun nian, besik daudaun ona. 2 Ulun-naʼin amlulik sira no eskriba sira buka dalan diʼak atu oho nia, maibé sira taʼuk povu. 3 Tuirmai Satanás tama ba Judas Iscariotes, neʼebé mós ida husi sira naʼin sanulu-resin-rua, 4 no nia sai hodi bá koʼalia ho ulun-naʼin amlulik sira no kapitaun templu nian kona-ba oinsá atu entrega Jesus ba sira. 5 Sira kontente no promete atu fó ba nia osan-mutin. 6 Entaun nia simu sira-nia liafuan, no nia hahú buka tempu neʼebé diʼak atu fó Jesus ba sira-nia liman kuandu ema-lubun la iha.

7 Loron ba Festa Paun Fermentu-Laek nian toʼo ona, no iha tempu neʼe mak ema tenke hasaʼe animál ba Festa Salvasaun nian. 8 No Jesus haruka Pedro no João hodi dehan: “Bá no prepara hahán ba Festa Salvasaun nian atu ita han.” 9 Sira hatete ba nia: “Ita hakarak ami atu prepara neʼe iha neʼebé?” 10 Nia dehan ba sira: “Kuandu imi tama ba sidade, mane ida neʼebé lori hela sanan-rai bee nian sei hasoru imi. Laʼo tuir nia hodi tama iha uma neʼebé nia tama. 11 No imi tenke hatete ba uma-naʼin: ‘Mestre dehan: “Kuartu ida-neʼebé mak haʼu sei uza atu selebra Festa Salvasaun nian hamutuk ho haʼu-nia dixípulu sira?”’ 12 No ema neʼe sei hatudu ba imi kuartu boot ida iha andár leten, neʼebé iha ona buat neʼebé presiza, no iha neʼebá mak imi prepara hahán.” 13 Entaun, sira bá no hetan buat hotu tuir ninia liafuan ba sira, no sira prepara hahán ba Festa Salvasaun nian.

14 Kuandu tempu toʼo ona, nia tuur iha meza no ninia apóstolu sira hamutuk ho nia. 15 Nia dehan ba sira: “Haʼu haksolok tebes hodi han ai-han ba Festa Salvasaun nian neʼe hamutuk ho imi antes haʼu hetan terus, 16 tanba haʼu hatete ba imi: Haʼu sei la han tan ida-neʼe toʼo tempu neʼebé buat hotu sai loos ona iha Maromak nia Ukun.” 17 No simu tiha kopu ida, nia hatoʼo agradese no dehan: “Simu ida-neʼe no fahe ba malu hodi hemu, 18 haʼu hatete ba imi: Husi ohin ba oin haʼu sei la hemu tan tua-uvas toʼo Maromak nia Ukun mai.”

19 No mós, nia foti paun ida, no fó tiha agradese nia silu hodi fó ba sira atu han no dehan: “Neʼe reprezenta haʼu-nia isin neʼebé haʼu fó tanba imi. Kontinua halo ida-neʼe hodi hanoin haʼu.” 20 No depois han-kalan tiha, nia halo hanesan ho kopu neʼe hodi dehan: “Kopu neʼe reprezenta aliansa foun liuhusi haʼu-nia raan, neʼebé sei fakar tanba imi.”

21 “Maibé, haree! ema neʼebé sei entrega haʼu ba inimigu mós hamutuk ho haʼu iha meza neʼe. 22 Tuir loloos, Oan-Mane husi ema sei mate duni hodi tuir buat neʼebé fó-hatene nanis ona; maski nuneʼe, susar ba ema neʼebé fó Oan-Mane ba inimigu nia liman!” 23 Entaun sira hahú husu ba malu kona-ba sé loos mak atu halo ida-neʼe.

24 Maibé, apóstolu sira-neʼe mós haksesuk malu makaʼas kona-ba sé mak boot liu entre sira. 25 No nia dehan ba sira: “Liurai nasaun seluk nian domina sira-nia povu, no sira neʼebé iha kbiit boot simu naran espesiál.* 26 Maibé imi labele sai hanesan neʼe. Ida neʼebé ema haree nuʼudar boot liu iha imi leet tenke sai hanesan ida neʼebé kiʼik liu, no ida neʼebé sai nuʼudar xefe tenke serbí sira seluk. 27 Nuneʼe, sé mak boot liu: Ema neʼebé tuur iha meza ka ema neʼebé serbí? Ema neʼebé tuur iha meza, loos ka lae? Maibé haʼu iha imi leet hodi serbí imi.

28 “Imi laran-metin ona ba haʼu durante haʼu-nia susar sira; 29 no haʼu halo aliansa ida ho imi kona-ba Ukun ida, hanesan haʼu-nia Aman halo aliansa ho haʼu, 30 atu nuneʼe imi bele han no hemu iha meza iha haʼu-nia Ukun, no imi sei tuur iha kadunan atu tesi lia ba Izraél nia suku sanulu-resin-rua.

31 “Simão, Simão, haree! Satanás husu atu nia bele haketak imi hanesan ema neʼebé haketak trigu husi nia kulit. 32 Maibé haʼu harohan ona ba Maromak kona-ba ó, atu nuneʼe ó-nia fiar labele sai fraku; no kuandu ó fila, hametin ó-nia maluk sira-nia fiar.” 33 No Pedro dehan ba Jesus: “Naʼi, haʼu prontu atu bá hamutuk ho ita iha komarka no mós mate.” 34 Maibé Jesus dehan: “Haʼu hatete ba ó, Pedro, ohin antes manu kokoreek ó sei nega haʼu dala tolu katak ó la hatene haʼu.”

35 Nia mós hatete ba sira: “Kuandu haʼu haruka imi hodi la lori osan-fatin no fatin ai-han nian no sandálias, imi la kuran buat ida, loos ka lae?” Sira hatán: “Loos duni!” 36 Tuirmai, nia dehan ba sira: “Maibé agora, ba ema neʼebé iha osan-fatin, lori bá, nuneʼe mós ho fatin ai-han nian; no ba ema neʼebé la iha surik, faʼan ninia hatais hodi sosa surik ida. 37 Basá haʼu hatete ba imi katak eskritura tuirmai neʼe sei sai loos iha haʼu: ‘Ema sei sura nia hamutuk ho ema neʼebé la tuir lei.’ Tanba buat neʼebé fó sai ona kona-ba haʼu kumpre daudaun.” 38 No sira dehan ba nia: “Naʼi, haree! iha neʼe iha surik rua.” Nia hatete ba sira: “Neʼe toʼo ona.”

39 Sai tiha husi neʼebá, hodi tuir nia toman nia laʼo ba Foho Oliveira; no ninia dixípulu sira mós laʼo tuir nia. 40 Kuandu toʼo tiha ba fatin neʼe, nia hatete ba sira: “Kontinua harohan, atu nuneʼe imi labele monu ba tentasaun.” 41 No nia rasik laʼo dook uitoan* husi sira, tuirmai nia hakneʼak no hahú halo orasaun, 42 dehan: “Aman, se Ita hakarak, hasai tiha kopu neʼe husi haʼu. Maski nuneʼe, laʼós tuir haʼu-nia hakarak, maibé tuir Ita-nia hakarak.” 43 Tuirmai, anju ida husi lalehan mosu ba nia no hametin nia. 44 Maibé nia sente laran-susar tebetebes, no nia kontinua harohan ho laran-manas liután, toʼo ninia kosar sai hanesan raan monu ba rai. 45 Harohan hotu tiha, nia hamriik hodi laʼo besik ba ninia dixípulu sira no hetan sira toba hela, tanba sira-nia laran-triste halo sira kole, 46 no nia dehan ba sira: “Tansá mak imi toba? Hadeer no harohan nafatin bá, atu nuneʼe imi labele monu ba tentasaun.”

47 Kuandu nia koʼalia hela, haree! ema-lubun mai ho mane ida naran Judas, neʼebé mós husi sira naʼin sanulu-resin-rua, nia laʼo iha sira-nia oin; no nia hakbesik hodi reʼi Jesus. 48 Maibé Jesus dehan ba nia: “Judas, ho reʼi mak ó entrega Oan-Mane husi ema ba inimigu nia liman ka?” 49 Kuandu sira neʼebé hamutuk ho Jesus haree buat neʼebé mosu daudaun, sira dehan: “Naʼi, Ita hakarak ami ataka ho surik?” 50 Loloos, sira ida ataka duni amlulik boot nia atan no sabir nia tilun sorin loos. 51 Maibé Jesus dehan: “Toʼo ona.” No nia kaer atan neʼe nia tilun no kura nia. 52 Tuirmai Jesus hatete ba ulun-naʼin amlulik no kapitaun templu nian no katuas sira, neʼebé mai hasoru nia, dehan: “Imi mai ho surik no ai-dona hanesan hasoru naʼok-teen ida ka? 53 Loron-loron haʼu hamutuk ho imi iha templu, maibé imi la kaer haʼu. Maski nuneʼe, agora mak imi-nia tempu no mós tempu ba nakukun atu ukun.”

54 Tuirmai, sira kaer nia no lori nia ba amlulik boot nia uma; no Pedro laʼo tuir husi dook. 55 Kuandu sira halakan ahi iha uma nia klaran no tuur hamutuk, Pedro mós tuur iha sira-nia leet. 56 Maibé atan-feto ida neʼebé haree nia tuur atu haneruk ahi, hateke didiʼak ba nia no dehan: “Mane neʼe mós hamutuk ho Jesus.” 57 Maibé nia nega no dehan: “Feto, haʼu la hatene nia.” 58 No liutiha tempu uitoan ema seluk haree nia no dehan: “Ó mós ida husi sira.” Maibé Pedro dehan: “Haʼu lae.” 59 No oras ida liu tiha, mane ida tan koʼalia makaʼas hodi dehan: “Loloos, mane neʼe mós hamutuk duni ho nia, tanba nia ema Galileia ida!” 60 Maibé Pedro hatán: “Haʼu la hatene buat neʼebé ó dehan.” No iha oras neʼe kedas, kuandu nia koʼalia hela, manu ida kokoreek. 61 No Naʼi fila oin hodi hateke ba Pedro, no Pedro hanoin-hetan fali Naʼi nia liafuan kuandu Naʼi dehan ba nia: “Ohin antes manu kokoreek, ó sei nega haʼu ba dala tolu.” 62 Tuirmai, nia sai ba liʼur hodi tanis tanba triste tebetebes.

63 No ema sira neʼebé kaer Jesus hahú goza no baku nia, 64 no depois taka tiha nia oin, sira husu nia dehan: “Siʼik toʼok, sé mak baku ó?” 65 No sira koʼalia buat aat barak tan hasoru nia.

66 Kuandu rai loron ona, katuas povu nian, inklui ulun-naʼin amlulik sira no eskriba sira, halibur an, no sira lori nia ba fatin Sinédriu nian, no dehan: 67 “Fó-hatene ami se ó mak Kristu ka lae.” Maibé nia hatete ba sira: “Maski haʼu fó-hatene imi, maibé imi sei la fiar. 68 Liután neʼe, se haʼu husu imi, imi mós sei la hatán buat ida. 69 Maibé, komesa husi ohin ba oin, Oan-Mane husi ema sei tuur iha Maromak kbiit-naʼin nia liman-loos.” 70 Ho ida-neʼe sira hotu dehan ba nia: “Entaun, ó mak Maromak nia Oan ka?” Nia hatete ba sira: “Imi rasik mak dehan katak haʼu Maromak nia Oan.” 71 Sira dehan: “Ita presiza sasin saida tan? Ita rasik rona ida-neʼe husi nia ibun.”

23 Entaun, sira hotu hamriik hodi lori nia ba Pilatos. 2 Tuirmai, sira hahú duun nia dehan: “Ami haree ema neʼe lohi ami-nia nasaun, nia bandu ema atu selu impostu ba Liurai Roma nian,* no nia hatete katak nia mak Kristu, liurai ida.” 3 No Pilatos husu ba nia: “Ó mak Liurai judeu sira-nian ka?” Nia hatán: “Ita rasik mak hatete nuneʼe.” 4 Tuirmai, Pilatos dehan ba ulun-naʼin amlulik sira no ema-lubun: “Haʼu la hetan sala ida iha ema neʼe.” 5 Maibé sira koʼalia hodi obriga dehan: “Nia soran povu hodi hanorin iha Judeia tomak, hahú husi Galileia toʼo iha neʼe.” 6 Rona tiha ida-neʼe, Pilatos husu se ema neʼe mak ema Galileia ka lae. 7 Kuandu hatene tiha katak nia mai husi área neʼebé Herodes mak ukun, Pilatos haruka ema lori nia ba Herodes, neʼebé mós iha Jeruzalein iha tempu neʼebá.

8 Kuandu Herodes haree Jesus, nia haksolok tebetebes, basá ba tempu kleur ona nia hakarak atu haree Jesus tanba nia rona ona kona-ba Jesus, no nia hakarak atu haree milagre ruma. 9 No Herodes hahú husu pergunta barak ba Jesus, maibé Jesus la hatán buat ida. 10 No ulun-naʼin amlulik sira no eskriba sira hamriik no ho hirus duun nia. 11 Tuirmai, Herodes no mós ninia soldadu sira hamoe nia, no Herodes goza nia hodi tau ba nia unuk ida neʼebé nabilan no haruka nia ba Pilatos. 12 Iha loron neʼe kedas mak Herodes no Pilatos sai belun fali, tanba antes neʼe sira haree malu la diʼak.

13 Tuirmai, Pilatos bolu ulun-naʼin amlulik sira no ukun-naʼin sira no mós povu atu halibur hamutuk. 14 No nia hatete ba sira: “Imi lori ema neʼe mai tanba imi dehan katak nia soran povu, maibé, haree! haʼu husu nia iha imi-nia oin no haʼu la hetan sala ida husi ema neʼe tuir buat neʼebé imi duun ba nia. 15 Tuir loloos, Herodes mós la hetan buat ida, tan neʼe nia haruka fali ema neʼe mai ita. Haree! ema neʼe la halo sala ida atu nia simu kastigu-mate. 16 Tan neʼe, haʼu sei baku nia, depois neʼe husik nia livre.” 17 ——* 18 Maibé ema-lubun tomak hakilar: “Oho nia, no husik Barrabas livre!” 19 (Mane neʼe tama iha komarka tanba nia book ema iha sidade laran atu kontra governu no nia oho ema.) 20 Dala ida tan Pilatos koʼalia ba sira, tanba nia hakarak atu husik Jesus livre. 21 Tuirmai sira hahú hakilar dehan: “Hedi nia! Hedi nia!” 22 Ba dala terseiru nia dehan ba sira: “Tanbasá? Nia halo sala saida? Haʼu la hetan sala ida neʼebé halo nia merese simu kastigu-mate; tan neʼe haʼu sei baku nia no husik nia livre.” 23 Ho ida-neʼe sira husu ho lian makaʼas hodi obriga atu hedi nia, no sira hakilar makaʼas toʼo Pilatos rende an. 24 Entaun, Pilatos halo desizaun hodi tuir buat neʼebé sira husu. 25 Nuneʼe, nia husik livre ema neʼebé sira husu, ema neʼebé tama komarka tanba kontra governu no oho ema, maibé nia entrega Jesus atu hetan kastigu-mate hodi tuir sira-nia hakarak.

26 No nuʼudar sira lori sai nia, sira kaer Simão, ema husi Sirene, neʼebé foin mai husi toʼos, no sira tau ai-riin terus nian iha nia kabaas no nia laʼo iha Jesus nia kotuk. 27 No ema barak laʼo tuir nia, no feto sira kontinua baku sira-nia hirus-matan ho triste no sira lelir tanba nia. 28 Jesus fila oin ba feto sira-neʼe no dehan: “Jeruzalein nia oan-feto sira, keta tanis tanba haʼu. Maibé, tanis ba imi-nia an rasik no ba imi-nia oan sira; 29 tanba loron sei mai iha neʼebé ema sei dehan: ‘Ksolok ba feto sira neʼebé la koʼus oan, no ba sira neʼebé la tuur ahi no ba sira neʼebé la fó-susu!’ 30 Tuirmai, sira sei dehan ba foho aas sira: ‘Monu ba ami-nia leten!’ no ba foho kiʼik sira: ‘Taka tiha ami!’ 31 Tanba se sira halo buat sira-neʼe kuandu ai-hun sei matak hela, entaun saida mak sei mosu kuandu ai neʼe sai maran?”

32 No sira mós lori ema aat naʼin-rua atu bá hodi oho hamutuk ho nia. 33 No kuandu sira toʼo ba fatin naran Ulun-Ruin, sira tau nia ba ai-riin hamutuk ho ema aat sira, ida iha liman-loos no ida iha liman-karuk. 34 [Maibé Jesus dehan: “Aman, perdua sira bá, basá sira la hatene buat neʼebé sira halo.”]* Liután neʼe, sira fahe ninia hatais hodi dada sorte. 35 No ema hamriik hodi hateke ba nia. Maibé ukun-naʼin sira soe lia kona-ba nia dehan: “Nia salva ema seluk, entaun se nia mak Kristu neʼebé Maromak hili, husik nia salva nia an rasik.” 36 Soldadu sira mós goza nia hodi hakbesik no fó ba nia tua-uvas siin, 37 no dehan: “Se ó mak Liurai judeu sira-nian, salva ó-nia an bá.” 38 No iha mós liafuan neʼebé hakerek iha ninia ulun leten dehan: “Neʼe mak Liurai judeu sira-nian.”

39 Maibé ema aat ida neʼebé mós tara iha nia sorin hahú koʼalia aat nia dehan: “Se ó mak Kristu, salva ó-nia an bá no mós ami.” 40 Ema aat ida seluk siʼak nia hodi dehan: “Ó la taʼuk ba Maromak ka? Ó mós hetan kastigu hanesan nia. 41 No ba ita, tuir loloos, ita merese duni atu simu kastigu neʼe, tanba ita simu kastigu tuir duni buat neʼebé ita halo ona. Maibé mane neʼe la halo sala ida.” 42 Tuirmai nia dehan: “Jesus, hanoin-hetan haʼu bá kuandu Ita tama iha Ita-nia Ukun.” 43 No Jesus hatete ba nia: “Haʼu hatete loloos ba ó ohin, ó sei hamutuk ho haʼu iha Paraízu.”*

44 No agora maizumenus tuku sanulu-resin-rua ona, maibé rai tomak sai nakukun toʼo tuku tolu lokraik 45 tanba loro-matan la fó naroman; tuirmai kortina templu nian lees fahe ba rua iha ninia klaran. 46 No Jesus hakilar ho lian makaʼas dehan: “Aman, iha Ita-Boot nia liman mak haʼu entrega haʼu-nia moris.”* Koʼalia tiha ida-neʼe, nia iis kotu. 47 Haree tiha buat neʼebé mosu, kapitaun tropa nian komesa fó hahiʼi ba Maromak dehan: “Tebes duni, ema neʼe mak ema loos.” 48 No kuandu ema hotu neʼebé halibur iha fatin neʼe haree buat neʼebé mosu, sira fila ba uma no baku sira-nia hirus-matan ho triste. 49 Liután neʼe, ema hotu neʼebé koñese nia hamriik iha dook no haree buat sira neʼebé mosu, neʼe inklui mós feto sira neʼebé laʼo tuir nia husi Galileia.

50 No haree! iha mane ida naran José, neʼebé mós membru Sinédriu nian, nia ema diʼak no laran-loos. 51 Mane neʼe la apoia sira-nia desizaun no hahalok sira. Nia husi Arimateia, sidade Judeia nian ida, no nia hein daudaun ba Maromak nia Ukun. 52 Nia bá hasoru Pilatos hodi husu Jesus nia mate-isin. 53 Kuandu nia hatún tiha Jesus nia mate-isin, nia falun ho hena diʼak, no nia tau iha rate ida neʼebé keʼe iha fatuk, no rate neʼe seidauk uza atu hakoi ema ida. 54 No neʼe mak loron Prepara nian, no loron Sábadu besik atu hahú ona. 55 Maibé feto sira neʼebé laʼo tuir Jesus husi Galileia mós tuir hodi haree rate neʼe no oinsá ema hakoi Jesus nia mate-isin, 56 no sira fila hodi prepara nanis buat morin oioin no mós mina-morin. Maibé, sira deskansa iha loron Sábadu hodi tuir ukun-fuan.

24 Iha loron primeiru semana nian, iha dadeer-saan loos, sira bá rate no lori buat morin oioin neʼebé sira prepara ona. 2 Maibé kuandu sira toʼo iha neʼebá sira haree fatuk duir sai tiha ona husi rate, 3 no bainhira sira tama, sira la hetan Naʼi Jesus nia isin. 4 Nuʼudar sira hanoin hela kona-ba ida-neʼe, haree! mane naʼin-rua mosu ba sira ho hatais neʼebé nabilan. 5 Feto sira-neʼe sai taʼuk, no sira hakruʼuk deʼit. No mane sira-neʼe dehan ba sira: “Tansá mak imi buka Ida neʼebé moris ona husi mate sira leet? 6 [Nia la iha neʼe, maibé nia moris hiʼas ona.]* Imi hanoin-hetan ka lae buat neʼebé nia hatete ba imi kuandu nia sei iha Galileia? 7 Nia dehan katak ema sei entrega Oan-Mane husi ema ba sala-naʼin sira-nia liman no hedi nia, maibé liutiha loron tolu, nia sei moris fali.” 8 Sira hahú hanoin-hetan fali liafuan sira-neʼe, 9 no kuandu sira fila tiha husi rate, sira konta fali buat hotu neʼe ba sira naʼin sanulu-resin-ida no ba sira seluk hotu. 10 Feto sira neʼebé konta fali buat sira-neʼe ba apóstolu sira mak Maria Madalena, Joana, Maria Tiago nia inan, no mós feto sira seluk neʼebé hamutuk ho sira. 11 Maibé, apóstolu sira no dixípulu sira seluk hanoin katak liafuan neʼebé feto sira-neʼe hatete mak lia bulak, entaun sira la fiar.

12 [Maibé Pedro hamriik no halai ba rate, no hakruʼuk tiha, nia haree deʼit hena. Entaun nia sai no hanoin iha laran kona-ba saida mak mosu.]*

13 No iha loron neʼe mós dixípulu naʼin-rua laʼo ba knua ida naran Emaus, neʼebé dook kilómetru sanulu-resin-ida husi Jeruzalein, 14 no sira koʼalia ba malu kona-ba buat hotu neʼebé mosu ona.

15 Nuʼudar sira koʼalia hela, Jesus rasik hakbesik no hahú laʼo ho sira, 16 maibé sira la bele hatene nia mak sé. 17 Nia hatete ba sira: “Saida mak imi koʼalia ba malu nuʼudar imi laʼo?” Ho ida-neʼe sira para ho oin-triste. 18 No sira ida naran Cléofas hatete: “Oinsá mak Ita la hatene kona-ba buat neʼebé mosu iha Jeruzalein maski Ita hela iha neʼebá? Ita ema estranjeiru ka?” 19 No nia hatete ba sira: “Kona-ba saida?” Sira dehan ba nia: “Kona-ba Jesus ema Nazaré. Nia mak profeta ida, no nia koʼalia ho kbiit no halo milagre sira iha Maromak nia oin no mós iha ema hotu nia oin. 20 No ita-nia ulun-naʼin amlulik sira no ukun-naʼin sira entrega nia ba ema atu hetan kastigu-mate no hedi nia. 21 Maibé ami hanoin katak mane neʼe mak ida neʼebé Maromak hili atu salva Izraél; no agora loron tolu ona husi tempu neʼebé buat sira-neʼe mosu. 22 Liután neʼe, feto balu neʼebé hamutuk ho ami mós konta buat neʼebé halo ami hakfodak; basá iha dadeer-saan hela sira bá rate, 23 maibé sira la hetan ninia mate-isin no sira mai fali hodi dehan katak sira haree anju sira neʼebé fó-hatene katak nia moris hiʼas ona. 24 Liután neʼe, balu husi ami mós bá rate; no sira hetan buat hotu hanesan feto sira hatete, maibé sira la haree nia.”

25 Entaun, nia hatete ba sira: “Hei, imi neʼebé neineik atu komprende no neineik atu fiar ba buat hotu neʼebé profeta sira dehan! 26 Kristu tenke hetan terus kona-ba buat sira-neʼe hodi tama ba ninia glória, loos ka lae?” 27 No hahú husi Moisés no profeta sira hotu nia liafuan, nia esplika ba sira buat neʼebé hakerek kona-ba nia iha Eskritura.

28 Ikusmai, kuandu sira besik ona ba knua neʼebé sira atu tama, nia kontinua laʼo hanesan atu bá fatin seluk. 29 Maibé sira obriga nia, dehan: “Hela ho ami, tanba loro-matan monu ona no rai besik kalan.” Ho ida-neʼe nia tama atu hela ho sira. 30 No kuandu nia tuur hamutuk sira iha meza atu han, nia foti paun, no halo tiha orasaun nia silu ida-neʼe no hahú fahe ba sira. 31 Ho ida-neʼe sira-nia matan nakloke no sira koñese nia, no nia lakon kedas husi sira leet. 32 No sira hatete ba malu: “Ita sente laran-manas tebes kuandu nia koʼalia ba ita tuir dalan no kuandu nia esplika Eskritura sira ba ita ho klaru, loos ka lae?” 33 Iha oras neʼe kedas sira hamriik hodi fila ba Jeruzalein, no sira hasoru malu ho sira naʼin sanulu-resin-ida no mós dixípulu seluk neʼebé hamutuk ho sira. 34 No sira dehan ba dixípulu naʼin-rua neʼe: “Loloos, Naʼi moris hiʼas ona, no nia mosu ba Simão!” 35 No tuirmai, dixípulu naʼin-rua neʼe konta kona-ba buat neʼebé mosu nuʼudar sira laʼo iha dalan no kona-ba oinsá sira koñese Naʼi kuandu nia silu paun.

36 Kuandu sira sei koʼalia hela kona-ba buat sira-neʼe, nia rasik hamriik iha sira-nia klaran [no dehan ba sira: “Dame hela ho imi.”]* 37 Maibé sira hakfodak, no sai taʼuk, tanba sira hanoin katak sira haree anju* ida. 38 Entaun, nia hatete ba sira: “Tansá mak imi laran-taridu, no tansá mak imi laran-rua? 39 Haree haʼu-nia liman no ain bá, neʼe haʼu duni; kaer haʼu bá no haree, tanba anju ida la iha isin no ruin hanesan imi haree iha haʼu.” 40 [No nuʼudar nia koʼalia daudaun kona-ba neʼe nia hatudu nia liman no ain ba sira.]* 41 Maibé, sira seidauk fiar tanba sira hakfodak loos no mós haksolok. No nia dehan ba sira: “Imi iha buat ruma atu han ka lae?” 42 No sira fó ba nia ikan tunu baluk ida, 43 no nia foti ida-neʼe no han iha sira-nia oin.

44 Nia hatete ba sira: “Neʼe mak liafuan sira neʼebé haʼu koʼalia ba imi kuandu haʼu sei hamutuk ho imi, katak buat hotu neʼebé hakerek iha Ukun-Fuan Moisés nian no profeta sira no mós Salmu sira kona-ba haʼu tenke sai loos.” 45 Tuirmai, nia loke sira-nia neon hodi hatene didiʼak Eskritura, 46 no nia dehan ba sira: “Eskritura hakerek nanis ona katak Kristu sei hetan terus no liutiha loron tolu nia sei moris hiʼas husi mate, 47 no hodi nia naran mak ema sei haklaken ba nasaun hotu kona-ba hakribi sala hodi hetan perdua; no ida-neʼe sei hahú husi Jeruzalein. 48 No imi mak sei sai sasin kona-ba buat sira-neʼe. 49 No haree! haʼu sei haruka ba imi buat neʼebé haʼu-nia Aman promete ona. Maibé, kona-ba imi, hein iha sidade toʼo imi sai nakonu ho kbiit husi leten.”

50 No nia lori sira toʼo besik Betánia, no nia foti nia liman hodi haraik bensaun ba sira. 51 Nuʼudar nia haraik daudaun bensaun ba sira, nia husik sira no hahú saʼe ba lalehan. 52 No sira hakneʼak iha nia oin, depois neʼe sira fila fali ba Jeruzalein ho ksolok boot. 53 No sira kontinua bá iha templu atu hahiʼi Maromak.

[Nota–rodapé]