João

1 Horiuluk kedas iha ida neʼebé bolu nuʼudar Liafuan, no Liafuan neʼe hamutuk ho Maromak no Liafuan neʼe hanesan maromak ida.* 2 Nia hamutuk ona ho Maromak horiuluk kedas. 3 Liuhusi nia mak buat hotu mosu, no la iha buat ida neʼebé mosu se la liuhusi nia.

Buat neʼebé mosu 4 liuhusi nia mak moris, no moris neʼe mak naroman ba ema. 5 No naroman neʼe fó nabilan iha nakukun laran, maibé nakukun la bele halakon nia.

6 No mane ida mosu mai neʼebé Maromak haruka: nia naran mak João. 7 Mane neʼe mai atu fó sasin kona-ba naroman hodi nuneʼe ema oioin bele fiar liuhusi ninia liafuan. 8 Nia laʼós naroman neʼe, maibé nia mai atu fó sasin kona-ba naroman.

9 No kona-ba naroman loloos neʼebé fó nabilan ba ema hotu, nia besik ona atu mai iha mundu. 10 No tuir loloos nia hela iha mundu, no liuhusi nia mak mundu iha, maibé mundu la hatene nia. 11 Nia mai iha nia rai rasik, maibé ninia ema sira la simu nia. 12 Maibé, kona-ba ema sira neʼebé simu nia, nia loke dalan ba sira atu sai nuʼudar Maromak nia oan, tanba sira hatudu fiar ba nia naran; 13 no sira moris mai laʼós husi raan ka husi isin ka husi ema nia hakarak, maibé husi Maromak.

14 No Liafuan sai nuʼudar ema no hela iha ita-nia leet, no ita haree ninia glória; glória neʼebé oan-mane mesak simu husi aman; no nia nakonu ho Maromak nia laran-diʼak boot no lia-loos. 15 (João fó sasin kona-ba nia, no ho lian makaʼas nia dehan liafuan tuirmai neʼe: “Ida neʼebé mai tuir haʼu mak laʼo uluk liu haʼu, tanba nia moris ona antes haʼu.”) 16 Nia nakonu ho laran-diʼak neʼebé boot no lia-loos, tan neʼe mak ita hotu simu beibeik laran-diʼak neʼe. 17 Basá Maromak fó Ukun-Fuan liuhusi Moisés, maibé laran-diʼak boot no lia-loos mai liuhusi Jesus Kristu. 18 Ema ida seidauk haree Maromak, só deʼit Maromak nia oan-mane mesak* neʼebé iha Aman nia sorin mak esplika kona-ba Aman.

19 Ida-neʼe mak sasin neʼebé João fó kuandu ema judeu sira haruka amlulik no ema Levi sira husi Jeruzalein hodi husu ba nia: “Ó neʼe sé?” 20 No nia la nega, maibé nia fó sai ho loloos dehan: “Haʼu laʼós Kristu.” 21 Sira dehan ba nia: “Entaun ó mak Elias ka?” Nia hatán: “Lae.” “Ó mak Profeta ida-neʼebé fó-hatene nanis ona ka?” Nia dehan: “Lae!” 22 Tan neʼe sira hatete ba nia: “Ó neʼe sé? Fó-hatene ami atu nuneʼe ami bele fó-hatene fali ba sira neʼebé haruka ami mai. Ó sei dehan sá kona-ba ó-nia an?” 23 Nia hatete: “Haʼu mak ema neʼebé hakilar iha rai-fuik: ‘Halo loos Jeová nia dalan’, hanesan profeta Isaías dehan ona.” 24 Tuir loloos, farizeu* sira mak haruka ema sira-neʼe mai. 25 Entaun sira husu nia no dehan: “Se nuneʼe, tansá mak ó fó batizmu ba ema se ó rasik laʼós Kristu ka Elias ka Profeta ida neʼebé fó-hatene nanis ona?” 26 João hatán ba sira dehan: “Haʼu fó batizmu ho bee. Maibé iha imi-nia leet iha ema ida neʼebé imi la hatene, 27 nia mak ida neʼebé mai tuir haʼu, no ninia sandálias talin deʼit mós haʼu la merese atu kore.” 28 No buat hotu neʼe mosu iha Betánia, iha Mota Jordaun nia sorin bá, iha fatin neʼebé João fó batizmu daudaun ba ema.

29 Loron tuirmai, nia haree Jesus mai besik nia, no nia dehan: “Haree, nia mak Bibi-Oan neʼebé Maromak fó atu hasai tiha mundu nia sala! 30 Nia mak ida neʼebé haʼu dehan: Mane ida sei mai tuir haʼu, nia mak ida neʼebé laʼo uluk liu haʼu, tanba nia moris ona antes haʼu. 31 Maski haʼu la hatene nia, maibé razaun tansá haʼu fó batizmu ba imi ho bee mak atu nia bele hatudu sai nia an ba Izraél.” 32 João mós fó sasin dehan: “Haʼu haree espíritu santu tun husi lalehan hanesan manu-pombu ida, no espíritu neʼe hela iha nia. 33 Maski haʼu la hatene nia, maibé Ida neʼebé haruka haʼu mai atu fó batizmu ho bee mak dehan rasik ba haʼu: ‘Ema neʼebé ó haree espíritu santu tun ba nia no hela iha nia mak ema neʼebé fó batizmu ho espíritu santu.’ 34 Haʼu haree ona ida-neʼe, no haʼu fó sasin ona katak nia mak Maromak nia Oan-Mane.”

35 No loron tuirmai kuandu João hamriik hela ho ninia dixípulu naʼin-rua, 36 nia haree Jesus laʼo daudaun, no nia hatete: “Haree, neʼe mak Maromak nia Bibi-Oan!” 37 Bainhira ninia dixípulu naʼin-rua rona tiha ninia liafuan, sira laʼo tuir Jesus. 38 Kuandu Jesus fila oin no haree sira laʼo tuir nia, nia hatete ba sira: “Imi hakarak saida?” Sira dehan ba nia: “Rabbi, (katak Mestre,) Ita-Boot hela iha neʼebé?” 39 Nia hatete ba sira: “Mai, no imi sei haree.” Ho ida-neʼe sira bá no haree fatin neʼebé nia hela, no sira hela ho nia iha loron neʼe; oras neʼe maizumenus tuku haat lokraik. 40 Simão Pedro nia alin André* mak ida husi sira naʼin-rua neʼebé rona João nia liafuan no laʼo tuir Jesus. 41 No uluk liu André buka-hetan ninia maun Simão, no dehan: “Ami hetan ona Mesias” (katak Kristu). 42 Nia lori Simão ba Jesus. Kuandu Jesus haree nia, Jesus dehan: “Ó mak Simão, João nia oan, no haʼu sei hanaran ó Cefas” (katak Pedro).

43 Loron tuirmai, Jesus hakarak atu laʼo ba Galileia. No kuandu nia hetan Filipe, nia dehan: “Mai tuir haʼu.” 44 Filipe mak ema Betsaida, hanesan mós ho André no Pedro. 45 Filipe hasoru Natanael no hatete: “Ami hetan ona ida neʼebé Moisés hakerek iha Ukun-Fuan, no profeta sira mós hakerek kona-ba nia, neʼe mak Jesus, José nia oan, husi Nazaré.” 46 Natanael hatete ba nia: “Ema diʼak ida bele mai husi Nazaré ka?” Filipe hatán: “Mai no haree.” 47 Jesus haree Natanael laʼo besik ba nia no Jesus koʼalia kona-ba nia dehan: “Haree, nia mak ema Izraél neʼebé la iha lia-bosok iha nia.” 48 Natanael hatete ba Jesus: “Oinsá mak Ita hatene haʼu?” Jesus hatán ba nia: “Antes Filipe bolu ó, haʼu haree ona ó kuandu ó iha ai-figeira nia okos.” 49 Natanael dehan ba nia: “Mestre, Ita-Boot mak Maromak nia Oan, Ita mak Liurai Izraél nian.” 50 Jesus hatete ba nia: “Ó fiar haʼu tanba haʼu dehan katak haʼu haree ó iha ai-figeira nia okos ka? Ó sei haree buat neʼebé furak liu fali ida-neʼe.” 51 Jesus dehan tan ba nia: “Tebes haʼu hatete loloos ba imi katak imi sei haree lalehan nakloke no Maromak nia anju sira saʼe no tun ba Oan-Mane husi ema.”

2 No loron tolu depois neʼe, ema halo festa kaben nian ida iha Kaná rai Galileia nian, no Jesus nia inan mós iha neʼebá. 2 Jesus no nia dixípulu sira mós simu konvite ba festa kaben nian neʼe.

3 Kuandu tua-uvas besik atu hotu, Jesus nia inan dehan ba nia: “Sira-nia tua-uvas hotu ona.” 4 Maibé Jesus dehan ba nia inan: “Tansá Ita fó-hatene ida-neʼe ba haʼu?* Haʼu-nia oras seidauk toʼo.” 5 Depois neʼe, ninia inan dehan ba atan sira: “Halo tuir buat naran deʼit neʼebé nia dehan ba imi.” 6 No iha neʼebá iha sanan-fatuk bee nian hamutuk neen neʼebé ema judeu sira uza atu hamoos sira-nia an hodi tuir sira-nia ukun-fuan. Sanan ida-idak bele tau bee litru haatnulu-resin-haat toʼo neenulu-resin-neen. 7 Jesus hatete ba sira: “Halo nakonu sanan sira-neʼe ho bee.” Entaun sira tau bee nakonu toʼo ibun. 8 No nia hatete ba sira: “Agora, foti balu no lori ba ulun-naʼin festa nian.” No sira lori duni bá. 9 Ulun-naʼin festa nian koko bee neʼebé sai ona tua, maibé nia la hatene ida-neʼe mai husi neʼebé. Maibé atan sira neʼebé kuru bee hatene ida-neʼe. Tuirmai, ulun-naʼin festa nian bolu noivu, 10 no dehan ba nia: “Ema seluk fó uluk tua-uvas diʼak, no kuandu bainaka sira lanu ona mak foin fó tua neʼebé ladún diʼak. Maibé ó rai hela tua diʼak toʼo agora.” 11 Ida-neʼe mak Jesus nia milagre primeiru, no nia halo neʼe iha Kaná rai Galileia nian. Nia hatudu sai ninia glória, no ninia dixípulu sira tau fiar ba nia.

12 Depois neʼe, Jesus no ninia inan no alin sira no mós dixípulu sira laʼo tun ba Kafarnaum, maibé sira la hela loron barak iha neʼebá.

13 Agora ema judeu nia Festa Salvasaun nian besik ona, no Jesus saʼe ba Jeruzalein. 14 No iha templu laran nia haree ema neʼebé faʼan karau, bibi-malae, no manu-pombu, no nia mós haree sira neʼebé troka osan tuur hela iha sira-nia fatin. 15 Bobar tiha tali hodi halo xikote, nia duni sai sira hotu husi templu hamutuk ho sira-nia karau no bibi sira, no nia fakar sai osan-besi husi ema troka osan nian no taka fila sira-nia meza. 16 No nia dehan ba sira neʼebé faʼan manu-pombu: “Hasai tiha buat sira-neʼe husi neʼe! Keta halo haʼu-nia Aman nia uma sai hanesan fatin fila-liman nian!” 17 Ninia dixípulu sira hanoin-hetan buat neʼebé hakerek nanis ona: “Laran-manas ba Ita-nia uma sei han mohu haʼu.”

18 Tan neʼe, ema judeu sira hatete ba nia: “Sinál saida mak ó bele hatudu mai ami katak ó iha direitu atu halo buat sira-neʼe?” 19 Jesus hatán ba sira dehan: “Harahun tiha templu neʼe, no iha loron tolu nia laran haʼu sei harii fali.” 20 Tan neʼe ema judeu sira dehan: “Templu neʼe harii iha tinan haatnulu-resin-neen nia laran, no ó dehan fali ó sei harii iha loron tolu?” 21 Maibé templu neʼebé nia dehan mak ninia isin rasik. 22 No kuandu nia moris hiʼas husi mate, ninia dixípulu sira hanoin-hetan fali katak uluk nia koʼalia hanesan neʼe; no sira fiar Eskritura no mós fiar buat neʼebé Jesus hatete.

23 Maibé kuandu nia sei iha Jeruzalein durante Festa Salvasaun nian, ema barak tau fiar ba ninia naran tanba haree sinál sira neʼebé nia hatudu. 24 Maski nuneʼe, Jesus la fiar sira tanba nia hatene sira hotu, 25 no mós tanba nia la presiza ema ida atu fó-hatene nia kona-ba ema, basá nia rasik hatene saida mak iha ema nia laran.

3 No iha ema farizeu ida naran Nicodemos, nia mak ulun-naʼin judeu nian ida. 2 Nia mai hasoru Jesus iha kalan no dehan: “Mestre, ami hatene katak Ita-Boot mai husi Maromak; tanba ema ida la bele halo milagre sira neʼebé Ita halo se Maromak la hamutuk ho nia.” 3 Jesus hatán ba nia: “Tebes haʼu hatete loloos ba ó: Se ema ida la moris dala ida tan,* nia la bele haree Maromak nia Ukun.” 4 Nicodemos dehan ba nia: “Oinsá mak ema ida bele moris dala ida tan kuandu nia sai katuas ona? Nia la bele tama fali ba nia inan nia knotak ba dala segundu no moris dala ida tan, loos ka lae?” 5 Jesus hatán: “Tebes haʼu hatete loloos ba ó: Se ema ida la moris dala ida tan husi bee no espíritu santu, nia la bele tama ba Maromak nia Ukun. 6 Buat neʼebé moris husi isin mak isin nian, no buat neʼebé moris husi espíritu santu mak lalehan nian.* 7 Keta hakfodak tanba deʼit haʼu dehan ba ó: Imi tenke moris dala ida tan. 8 Anin huu ba fatin neʼebé nia hakarak, no imi rona ninia lian, maibé imi la hatene neʼe mai husi neʼebé no atu bá neʼebé. Nuneʼe mós ho ema sira neʼebé moris ona husi espíritu.”

9 Nicodemos hatán ba Jesus dehan: “Oinsá mak buat sira-neʼe bele sai loos?” 10 Jesus dehan ba nia: “Ó mestre Izraél nian ida, entaun oinsá mak ó la hatene buat sira-neʼe? 11 Tebes haʼu hatete loloos ba ó: Ami koʼalia buat neʼebé ami hatene no ami fó sasin kona-ba buat neʼebé ami haree ona, maibé imi la simu sasin neʼebé ami fó. 12 Haʼu fó-hatene ona ba ó kona-ba buat sira iha mundu neʼe, maibé ó la fiar, entaun oinsá mak ó sei fiar se haʼu fó-hatene ó kona-ba buat sira iha lalehan? 13 Liután neʼe, la iha ema ida neʼebé saʼe ona ba lalehan, maibé ida neʼebé tun husi lalehan mak Oan-Mane husi ema. 14 No hanesan Moisés hiʼit saʼe samea iha ai-riin* kuandu iha rai-fuik, nuneʼe mós ema sei hiʼit saʼe Oan-Mane husi ema. 15 Atu nuneʼe ema hotu neʼebé fiar iha nia bele hetan moris rohan-laek.

16 “Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar iha nia sei la lakon maibé hetan moris rohan-laek. 17 Basá Maromak haruka nia Oan mai iha mundu, laʼós atu tesi lia ba mundu neʼe, maibé atu mundu bele hetan salvasaun liuhusi nia. 18 Nia sei la tesi lia ba ema neʼebé hatudu fiar iha nia. No ema neʼebé la hatudu fiar hetan tiha ona tesi-lia, tanba nia la hatudu fiar iha Maromak nia Oan-Mane mesak nia naran. 19 Ema neʼe hetan tesi-lia tan razaun neʼe: Tanba naroman neʼe mai tiha ona iha mundu; maibé ema hadomi deʼit nakukun duké naroman, basá sira-nia hahalok mak aat. 20 Ema neʼebé halo aat odi naroman neʼe no la tama ba naroman, atu nuneʼe labele hatudu sai ninia hahalok aat. 21 Maibé ema neʼebé halo buat loos, nia tama ba naroman, atu nuneʼe ninia hahalok bele hatudu sai nuʼudar hahalok neʼebé tuir Maromak nia hakarak.”

22 Neʼe hotu tiha, Jesus no ninia dixípulu sira laʼo hodi tama ba Judeia, no iha neʼebá nia uza tempu balu atu hamutuk ho sira no fó batizmu ba ema.* 23 Maibé João mós fó batizmu iha Enom besik Salim, tanba iha neʼebá iha bee barak, no ema kontinua mai hasoru nia no hetan batizmu, 24 tanba iha tempu neʼe ema seidauk hatama João iha komarka.

25 Tuirmai, João nia dixípulu sira haksesuk malu ho ema judeu ida kona-ba lisan hamoos an nian. 26 Entaun sira mai hasoru João no dehan: “Mestre, mane neʼebé hamutuk ho Ita iha Mota Jordaun nia sorin bá, ida neʼebé Ita fó sasin, nia fó batizmu ba ema no ema hotu laʼo ba nia.” 27 João hatán: “Ema la bele simu buat ida, se Maromak la fó ida-neʼe ba nia. 28 Imi rasik fó sasin kona-ba haʼu katak haʼu dehan, haʼu laʼós Kristu, maibé, haʼu mak ida neʼebé Maromak haruka uluk liu ema neʼe. 29 Noiva mak noivu ninian. Maibé, kuandu noivu nia belun hamriik besik noivu no rona noivu koʼalia, nia sai haksolok tebes. Tan neʼe, haʼu-nia ksolok neʼe sai kompletu ona. 30 Kristu sei kontinua sai boot liu, maibé haʼu kontinua sai kiʼik liu.”

31 Ida neʼebé mai husi leten mak aas liu ema hotu. No ida neʼebé mai husi rai, nia rai neʼe nian no koʼalia buat neʼebé rai neʼe nian. Nia neʼebé mai husi lalehan, nia aas liu ema hotu. 32 Buat neʼebé nia haree no rona, nia fó sasin kona-ba neʼe, maibé la iha ema ida simu sasin neʼebé nia fó. 33 Ema neʼebé simu Kristu nia sasin iha fiar tomak katak Maromak mak loos. 34 Tanba ida neʼebé Maromak haruka, nia koʼalia Maromak nia liafuan, basá Maromak la dada an kuandu fó ninia espíritu santu.* 35 Aman hadomi Oan no nia fó ona buat hotu ba Oan nia liman. 36 Ema neʼebé hatudu fiar ba Oan-Mane hetan moris rohan-laek; no ema neʼebé lakohi halo tuir Oan-Mane sei la haree moris, maibé Maromak nia hirus hela iha nia.

4 No Jesus hatene katak ema farizeu sira rona ona kona-ba oinsá nia hetan no fó batizmu ba dixípulu barak liu fali João. 2 Tuir loloos, Jesus rasik la fó batizmu ba ema, maibé ninia dixípulu sira mak halo ida-neʼe. 3 Entaun Jesus husik Judeia no laʼo fali ba Galileia. 4 Maibé nia tenke laʼo liu Samaria. 5 Nuneʼe, nia toʼo ba sidade Samaria nian ida naran Sikar neʼebé besik ba toʼos neʼebé Jacob fó ba ninia oan José. 6 Tuir loloos, Jacob nia bee-matan mós iha fatin neʼebá. No Jesus tuur besik bee-matan neʼe basá nia sente kole tanba laʼo rai. Iha tempu neʼebá besik tuku sanulu-resin-rua meiudia.

7 Feto Samaria nian ida mai atu kuru bee. Jesus dehan ba nia: “Fó bee mai haʼu atu hemu.” 8 (Tanba ninia dixípulu sira bá tiha sidade atu sosa ai-han.) 9 Tan neʼe, feto Samaria neʼe dehan ba nia: “Tansá mak Ita husu bee ba haʼu atu hemu maski Ita ema judeu no haʼu feto Samaria?” (Basá ema judeu sira la koʼalia ho ema Samaria.) 10 Jesus hatán ba nia dehan: “Tuir loloos, ó la hatene prezente* neʼebé Maromak fó no ó la hatene ida neʼebé dehan ba ó: ‘Fó bee mai haʼu atu hemu.’ Tanba se ó hatene karik, ó sei husu ba nia no nia sei fó ba ó bee moris nian.” 11 Nia dehan ba Jesus: “Señór, Ita-Boot la iha kanaban no bee-matan mós kleʼan tebes. Tan neʼe, Ita hetan bee moris nian husi neʼebé? 12 Ita la boot liu fali ami-nia beiʼala Jacob, loos ka lae? Nia mak fó ba ami bee-matan neʼe no nia rasik hamutuk ho ninia oan sira no ninia animál sira mós hemu husi bee-matan neʼe.” 13 Jesus hatán ba nia dehan: “Ema naran deʼit neʼebé hemu husi bee neʼe sei hamrook fali. 14 Maibé ema neʼebé hemu bee neʼebé haʼu fó, nia sei nunka sente hamrook tan, basá bee neʼebé haʼu fó ba nia sei sai hanesan bee-matan neʼebé suli iha nia laran hodi fó ba nia moris rohan-laek.” 15 Feto neʼe dehan ba Jesus: “Señór, fó bee neʼe mai haʼu, atu nuneʼe haʼu la sai hamrook tan no la mai beibeik iha fatin neʼe atu kuru bee.”

16 Jesus dehan ba nia: “Bá, no bolu ó-nia laʼen mai iha fatin neʼe.” 17 Nia hatán: “Haʼu la iha laʼen.” Jesus hatete: “Ó koʼalia loos kuandu ó dehan: ‘Haʼu la iha laʼen.’ 18 Basá ó iha ona laʼen lima, no mane neʼebé agora ó moris hamutuk daudaun laʼós ó-nia laʼen. Kona-ba neʼe ó koʼalia loos.” 19 Feto neʼe dehan ba nia: “Señór, haʼu haree katak Ita mak profeta ida. 20 Ami-nia beiʼala sira halo adorasaun iha foho neʼe; maibé imi dehan katak iha Jeruzalein deʼit mak fatin atu ema halo adorasaun.” 21 Jesus hatete: “Feto, fiar haʼu bá: Loron sei toʼo mai bainhira imi la presiza tan atu adora Aman iha foho neʼe no mós iha Jeruzalein. 22 Imi adora buat neʼebé imi la hatene; ami adora buat neʼebé ami hatene, tanba salvasaun mai liuhusi ema judeu sira. 23 Maski nuneʼe, tempu besik ona, no neʼe mak agora, kuandu ema neʼebé adora Maromak iha dalan loos sei adora Aman ho espíritu no lia-loos, basá Aman buka ema sira hanesan neʼe atu adora nia. 24 Maromak mak espíritu,* no sira neʼebé adora nia tenke adora ho espíritu no lia-loos.” 25 Feto neʼe hatete ba nia: “Haʼu hatene katak Mesias, neʼebé bolu Kristu, sei mai. No kuandu nia toʼo mai, nia sei fó-hatene buat hotu ba ami.” 26 Jesus hatete ba nia: “Haʼu mak ema neʼe.”

27 Iha oras neʼe, ninia dixípulu sira toʼo mai, no sira hakfodak haree nia koʼalia ho feto ida. Maski nuneʼe, sira ida la husu ba nia kona-ba tansá mak nia koʼalia ho feto neʼe ka saida mak nia hakarak. 28 No feto neʼe husik hela ninia sanan-rai bee nian no halai hodi tama ba sidade no fó-hatene ba mane sira: 29 “Mai iha neʼe, haree ba mane neʼebé fó sai ona buat hotu neʼebé haʼu halo. Keta nia mak Kristu karik?” 30 Sira sai husi sidade neʼe no hahú mai hasoru nia.

31 Durante tempu neʼe, ninia dixípulu sira mós kontinua dehan ba nia: “Mestre, han lai.” 32 Maibé nia dehan ba sira: “Haʼu iha ona ai-han atu han no imi la hatene ida-neʼe.” 33 Tan neʼe, dixípulu sira dehan ba malu: “Ema ida seidauk lori buat ruma ba nia atu han, loos ka lae?” 34 Jesus hatete ba sira: “Haʼu-nia ai-han mak halo tuir Ida neʼebé haruka haʼu mai nia hakarak no atu halo hotu ninia serbisu. 35 Imi dehan katak tempu koʼa nian sei fulan haat tan, loos ka lae? Maibé haree! Haʼu hatete ba imi: Foti imi-nia matan bá no haree toʼos sira-neʼe, sira hotu prontu ona atu koʼa. Agora 36 ema neʼebé koʼa simu daudaun nia kolen no halibur ai-fuan ba moris rohan-laek nian, atu nuneʼe ida neʼebé kari no ida neʼebé koʼa bele haksolok hamutuk. 37 Kona-ba neʼe mak liafuan tuirmai neʼe loos duni: Ema ida kari no ida seluk koʼa. 38 Haʼu haruka imi atu koʼa buat neʼebé laʼós imi mak kari, no imi hetan buat diʼak husi ema seluk nia serbisu.”

39 No ema Samaria barak husi sidade neʼe tau fiar ba Jesus tanba liafuan neʼebé feto neʼe fó sai ba sira hodi dehan: “Nia fó sai ona buat hotu neʼebé haʼu halo.” 40 Tan neʼe, kuandu ema Samaria sira mai hasoru nia, sira hahú husu nia atu hela ho sira; no nia hela iha neʼebá ba loron rua. 41 No ema barak tan tau fiar tanba buat neʼebé nia hatete, 42 no sira hatete ba feto neʼe: “Agora ami fiar laʼós deʼit tanba liafuan neʼebé ó dehan; basá ami rasik rona no ami hatene katak mane neʼe mak ida neʼebé salva mundu.”

43 Liutiha loron rua, nia husik fatin neʼe no laʼo ba Galileia. 44 No Jesus rasik fó sasin katak ema la hafolin profeta ida iha nia rai rasik. 45 Maibé kuandu nia toʼo iha Galileia, ema Galileia sira simu nia, tanba sira haree ona buat hotu neʼebé nia halo iha festa iha Jeruzalein, basá sira mós bá tuir festa neʼe.

46 Tuirmai, nia tama fali ba Kaná rai Galileia nian, iha neʼebé nia halo bee sai tua. No iha neʼebá iha liurai nia atan ida, no ninia oan-mane moras hela iha Kafarnaum. 47 Kuandu mane neʼe rona katak Jesus mai husi Judeia no toʼo ona Galileia, nia bá hasoru Jesus no husu Jesus atu bá hamutuk nia hodi kura ninia oan-mane, basá labarik neʼe besik ona atu mate. 48 Maibé, Jesus hatete ba nia: “Se imi la haree karik sinál no milagre sira, imi sei la fiar.” 49 Liurai nia atan neʼe hatete ba Jesus: “Naʼi, mai ho haʼu antes labarik neʼe mate.” 50 Jesus dehan ba nia: “Laʼo bá; ó-nia oan diʼak ona.” No mane neʼe fiar liafuan neʼebé Jesus hatete ba nia no nia bá. 51 Maibé nuʼudar nia laʼo tun daudaun, ninia atan mai hasoru nia no dehan katak nia oan diʼak ona. 52 Tan neʼe, nia husu sira iha oras sá mak ninia oan sai isin-diʼak. Ho ida-neʼe sira dehan ba nia: “Horisehik, iha tuku ida lokraik, nia isin-manas lakon.” 53 Aman neʼe hatene katak iha oras neʼe duni mak Jesus hatete ba nia: “Ó-nia oan diʼak ona.” Ho ida-neʼe, nia no ninia umakain tomak fiar Jesus. 54 No neʼe mak sinál segundu neʼebé Jesus halo kuandu nia mai husi Judeia hodi tama ba Galileia.

5 Liutiha buat sira-neʼe, tempu ba festa judeu nian ida toʼo ona, no Jesus saʼe ba Jeruzalein. 2 No iha Jeruzalein, besik odamatan bibi sira-nian, iha pixina neʼebé iha lia-ebraiku naran Betesda, no iha koluna barak neʼebé haleʼu pixina neʼe.* 3 Iha neʼebá mak ema moras barak toba, sira neʼebé matan-aat, ain-aat, no mós sira neʼebé liman no ain matek. 4 ——* 5 No iha neʼebá iha mane ida neʼebé moras ba tinan tolunulu-resin-ualu ona. 6 Kuandu Jesus haree mane neʼe toba latan iha neʼebá, no hatene katak nia moras ba tinan barak ona, Jesus hatete ba nia: “Ó hakarak hetan isin-diʼak?” 7 Ema moras neʼe dehan: “Señór, la iha ema ida ajuda haʼu atu tama ba pixina neʼe kuandu bee nafurin; no kuandu haʼu atu tun, ema seluk tun ulukliu haʼu.” 8 Jesus hatete ba nia: “Hamriik, no foti ó-nia toba-fatin no laʼo bá.” 9 Ho ida-neʼe, mane neʼe sai diʼak kedas, no nia foti ninia toba-fatin no hahú laʼo.

No loron neʼe mak loron Sábadu. 10 Tan neʼe, ema judeu sira hahú dehan ba mane neʼe: “Agora mak loron Sábadu, no tuir lei ó labele lori ó-nia toba-fatin.” 11 Maibé nia hatán ba sira: “Ida neʼebé halo haʼu isin-diʼak mak hatete ba haʼu: ‘Foti ó-nia toba-fatin no laʼo bá.’” 12 Sira husu ba nia: “Sé mak dehan ba ó: ‘Foti ó-nia toba-fatin no laʼo bá’?” 13 Maibé mane neʼe la hatene sé mak kura nia, tanba iha neʼebá iha ema-lubun no Jesus sai ona husi fatin neʼe.

14 Tuirmai, Jesus hetan fali nia iha templu no dehan ba nia: “Haree, ó sai isin-diʼak ona. Keta halo tan sala, atu nuneʼe buat neʼebé aat liu labele kona ó.” 15 Mane neʼe bá no fó-hatene ba ema judeu sira katak Jesus mak halo nia isin-diʼak. 16 Ho ida-neʼe, ema judeu sira hahú halo problema ba Jesus tanba nia halo buat sira-neʼe iha loron Sábadu. 17 Maibé nia hatán ba sira: “Haʼu-nia Aman kontinua serbisu toʼo ohin, no haʼu mós kontinua serbisu.” 18 Ho ida-neʼe, ema judeu sira hahú hakaʼas an liután atu oho nia, tanba nia laʼós deʼit kontra loron Sábadu, maibé mós bolu Maromak nuʼudar ninia Aman, hodi halo nia an hanesan ho Maromak.

19 Tan neʼe, Jesus dehan ba sira: “Tebes haʼu hatete loloos ba imi: Oan la bele halo buat ida tuir ninia hakarak rasik, maibé nia halo deʼit buat neʼebé nia haree Aman halo. Basá buat neʼebé Aman halo, Oan mós halo. 20 Tanba Aman hadomi Oan no nia hatudu ba Oan buat hotu neʼebé nia rasik halo, no nia sei hatudu ba Oan buat neʼebé boot liu fali sira-neʼe, atu nuneʼe imi sei hakfodak. 21 Hanesan Aman halo ema mate sira hamriik no moris fali, nuneʼe mós Oan fó moris ba ema neʼebé nia hakarak. 22 No Aman la tesi lia ba ema ida, maibé nia fó knaar hotu ba Oan atu tesi lia, 23 atu nuneʼe, ema hotu respeitu Oan hanesan sira respeitu Aman. Ema neʼebé la respeitu Oan, la respeitu mós Aman neʼebé haruka nia mai. 24 Tebes haʼu hatete loloos ba imi: Ema neʼebé rona haʼu-nia liafuan no fiar ida neʼebé haruka haʼu mai, nia hetan moris rohan-laek, no nia sei la hetan tesi-lia, basá nia sai ona husi mate ba moris.

25 “Tebes haʼu hatete loloos ba imi: Oras besik ona mai, no neʼe agora, kuandu sira neʼebé mate ona sei rona Maromak nia Oan-Mane nia lian no sira neʼebé rona sei moris. 26 Basá hanesan Aman iha kbiit atu fó moris, nuneʼe mós nia fó ona kbiit ba Oan atu fó moris. 27 No nia fó ona kbiit ba Oan atu tesi lia tanba nia mak Oan-Mane husi ema. 28 Keta hakfodak kona-ba neʼe, tanba oras sei toʼo mai kuandu ema hotu neʼebé iha rate laran sei rona nia lian 29 no sai husi rate. Sira neʼebé halo buat diʼak hetan moris-hiʼas ba moris rohan-laek, no sira neʼebé halo hahalok aat sei moris hiʼas atu hetan tesi-lia. 30 Haʼu la bele halo buat ida tuir haʼu-nia hakarak rasik. Haʼu tesi lia tuir buat neʼebé haʼu rona; no haʼu-nia tesi-lia mak loos, tanba haʼu la buka haʼu-nia hakarak rasik, maibé ida neʼebé haruka haʼu mai nia hakarak.

31 “Se haʼu rasik mak fó sasin kona-ba haʼu-nia an, haʼu-nia sasin la loos. 32 Iha ida seluk neʼebé fó sasin kona-ba haʼu, no haʼu hatene katak sasin neʼebé nia fó kona-ba haʼu mak loos. 33 Imi haruka ona ema ba João, no nia fó sasin ona kona-ba lia-loos. 34 Haʼu la presiza ema nia lia-sasin, maibé haʼu koʼalia buat sira-neʼe atu imi bele hetan salvasaun. 35 Ema neʼe mak ahi-oan neʼebé lakan no nabilan, no ba tempu uitoan imi hakarak atu haksolok iha ninia naroman. 36 Maibé haʼu iha sasin neʼebé boot liu fali João nian, tanba Aman fó ba haʼu serbisu atu kumpre, no serbisu neʼebé haʼu halo daudaun mak fó sasin kona-ba haʼu katak Aman haruka haʼu mai. 37 No mós Aman neʼebé haruka haʼu mai, nia rasik mak fó sasin kona-ba haʼu. Imi seidauk rona nia lian ka haree nia oin. 38 No ninia liafuan la hela iha imi-nia laran tanba imi la fiar ida neʼebé nia haruka mai.

39 “Imi buka didiʼak Eskritura, tanba imi hanoin katak liuhusi sira mak imi sei hetan moris rohan-laek; no Eskritura sira-neʼe rasik mak fó sasin kona-ba haʼu. 40 Maski nuneʼe, imi lakohi atu hakbesik ba haʼu hodi imi bele hetan moris. 41 Haʼu la simu glória husi ema, 42 maibé haʼu hatene ho loloos katak imi la iha domin ba Maromak iha imi-nia laran. 43 Haʼu mai hodi haʼu-nia Aman nia naran, maibé imi la simu haʼu; se ema seluk mai hodi nia naran rasik, imi sei simu nia. 44 Oinsá mak imi bele fiar haʼu se imi gosta simu no fó glória ba ema no imi la buka glória husi Maromak? 45 Keta hanoin katak haʼu sei duun imi ba Aman; basá iha ida neʼebé duun imi, neʼe mak Moisés, ida neʼebé imi tau fiar. 46 Tuir loloos, se imi fiar Moisés, imi sei fiar haʼu, tanba nia hakerek kona-ba haʼu. 47 Maibé se imi la fiar buat neʼebé nia hakerek, oinsá mak imi sei fiar buat neʼebé haʼu hatete?”

6 Liutiha buat sira-neʼe, Jesus hakur Tasi Galileia, neʼebé mós bolu nuʼudar Tiberiades. 2 No ema-lubun kontinua tuir nia tanba sira haree ona milagre neʼebé nia halo ba ema moras sira. 3 Tan neʼe, Jesus saʼe ba foho ida, no nia tuur iha neʼebá hamutuk ho nia dixípulu sira. 4 No iha tempu neʼe besik ona Festa Salvasaun nian, katak festa ema judeu sira-nian. 5 Kuandu Jesus foti nia matan no haree ema-lubun mai hasoru nia, nia dehan ba Filipe: “Ita sei sosa paun iha neʼebé atu ema sira-neʼe bele han?” 6 Maibé nia koʼalia ida-neʼe atu koko Filipe, tanba nia hatene ona saida mak nia atu halo. 7 Filipe dehan ba nia: “Maski sosa paun ho osan denáriu* 200, maibé neʼe mós la toʼo hodi fó uitoan ba sira ida-idak.” 8 Ninia dixípulu ida naran André, Simão Pedro nia alin,* dehan ba nia: 9 “Iha neʼe, iha labarik kiʼik ida neʼebé iha paun fuan lima* no ikan kiʼik rua. Maibé, oinsá mak ida-neʼe toʼo ba ema barak neʼe?”

10 Jesus hatete: “Haruka ema sira-neʼe tuur.” Iha fatin neʼe iha duʼut barak, no ema sira neʼebé tuur iha neʼebá hamutuk maizumenus mane naʼin-5.000. 11 Entaun nia foti paun sira-neʼe, no depois fó tiha agradese, nia fahe neʼe ba sira neʼebé tuur, no nia mós halo hanesan ho ikan kiʼik, no sira han toʼo bosu. 12 Maibé kuandu ema sira-neʼe bosu ona, nia hatete ba ninia dixípulu sira: “Halibur tiha hahán neʼebé resin, atu nuneʼe labele soe estraga deʼit.” 13 Ho ida-neʼe, sira halibur no halo nakonu bote sanulu-resin-rua ho resin husi paun fuan lima neʼebé ema han.

14 Kuandu ema sira-neʼe haree sinál sira neʼebé nia halo, sira hahú dehan: “Loloos, nia mak profeta ida neʼebé fó-hatene nanis ona atu mai iha mundu.” 15 No Jesus hatene katak sira atu mai kaer nia hodi obriga nia atu sai liurai, tan neʼe nia hasees an hodi saʼe ba foho mesamesak.

16 Kuandu rai kalan ona, ninia dixípulu sira laʼo tun ba tasi-ibun, 17 no depois sira saʼe tiha ró ida, sira hakur tasi hodi bá Kafarnaum. Maski rai sai nakukun ona, maibé Jesus seidauk mai hamutuk ho sira. 18 No tasi hahú sai boot tanba anin huu makaʼas loos. 19 Kuandu sira hean ona ró ba kilómetru lima liu, sira haree Jesus laʼo iha tasi leten no hakbesik daudaun ba ró neʼe; no sira sai taʼuk tebes. 20 Maibé nia hatete ba sira: “Neʼe mak haʼu; keta taʼuk!” 21 Ho ida-neʼe, sira kontente hodi simu nia tama iha ró laran no lakleur deʼit sira toʼo ba fatin neʼebé sira atu bá.

22 Loron tuirmai, ema-lubun neʼebé hela iha tasi sorin bá haree katak iha neʼebá la iha ró seluk só deʼit ró kiʼik ida, no sira hatene katak Jesus la saʼe ba ró neʼe hamutuk ho ninia dixípulu sira, maibé dixípulu sira bá mesak deʼit. 23 Maibé ró balu mai husi Tiberiades toʼo besik fatin neʼebé ema-lubun han paun neʼebé Naʼi fó tiha agradese. 24 Kuandu ema-lubun haree katak Jesus no ninia dixípulu sira la iha fatin neʼe, sira saʼe sira-nia ró no bá Kafarnaum hodi buka Jesus.

25 Entaun kuandu sira hetan nia iha tasi sorin bá, sira dehan ba nia: “Mestre, bainhira mak Ita-Boot toʼo iha neʼe?” 26 Jesus hatán ba sira: “Tebes haʼu hatete loloos ba imi: Imi buka haʼu laʼós tanba imi haree sinál sira, maibé tanba imi han paun toʼo bosu. 27 Keta hakaʼas an atu hetan hahán neʼebé sei mohu, maibé hakaʼas an atu hetan hahán neʼebé la mohu, neʼebé fó moris rohan-laek. Hahán neʼe mak Oan-Mane husi ema sei fó ba imi; basá Aman Maromak tau tiha sinál ba nia hodi hatudu katak Aman simu nia.”

28 Tan neʼe, sira hatete ba nia: “Saida mak ami tenke halo atu Maromak simu ami?” 29 Jesus dehan ba sira: “Atu Maromak simu imi, imi presiza hatudu fiar ba ida neʼebé nia haruka mai.” 30 Sira dehan ba nia: “Entaun, sinál saida mak ó sei halo ba ami, atu nuneʼe ami bele haree no fiar ó? Saida mak ó sei halo? 31 Ami-nia beiʼala sira han maná* iha rai-fuik, hanesan hakerek nanis ona: ‘Nia fó ba sira paun husi lalehan atu sira han.’” 32 Ho ida-neʼe, Jesus dehan ba sira: “Tebes haʼu hatete loloos ba imi: Moisés la fó imi paun husi lalehan, maibé haʼu-nia Aman fó ba imi paun neʼebé loos husi lalehan. 33 Tanba paun husi Maromak mak ida neʼebé tun husi lalehan no fó moris ba mundu.” 34 Sira dehan ba nia: “Naʼi, fó nafatin paun neʼe ba ami.”

35 Jesus hatete ba sira: “Haʼu mak paun moris nian. Ema neʼebé mai besik haʼu sei la hamlaha tan, no ema neʼebé hatudu fiar mai haʼu sei la sai hamrook tan. 36 Haʼu hatete ona ba imi: Imi haree ona haʼu, maibé imi la fiar. 37 Ema naran deʼit neʼebé Aman fó ba haʼu sei mai besik haʼu, no ema neʼebé mai besik haʼu, haʼu sei la duni sai nia; 38 tanba haʼu tun mai husi lalehan laʼós atu halo haʼu-nia hakarak, maibé atu halo ida neʼebé haruka haʼu mai nia hakarak. 39 Ida neʼebé haruka haʼu mai nia hakarak mak atu haʼu labele lakon ema ida husi sira hotu neʼebé nia fó ona mai haʼu, maibé haʼu tenke fó moris-hiʼas ba sira iha loron ikus. 40 Basá haʼu-nia Aman hakarak katak ema hotu neʼebé haree Oan-Mane no hatudu fiar ba nia tenke hetan moris rohan-laek, no haʼu sei fó moris-hiʼas ba nia iha loron ikus.”

41 Tan neʼe ema judeu sira hahú muramura kona-ba nia tanba nia dehan: “Haʼu mak paun neʼebé tun mai husi lalehan”; 42 no sira hahú dehan: “Laʼós neʼe mak Jesus, José nia oan? Ita hatene ninia inan no aman, loos ka lae? Entaun, oinsá mak agora nia dehan: ‘Haʼu tun mai husi lalehan’?” 43 Jesus dehan ba sira: “Keta muramura ba malu. 44 La iha ema ida neʼebé bele hakbesik haʼu se haʼu-nia Aman neʼebé haruka haʼu mai la dada nia; no haʼu sei fó moris-hiʼas ba nia iha loron ikus. 45 Profeta sira hakerek nanis ona dehan: ‘No sira hotu sei simu hanorin husi Jeová.’ Ema naran deʼit neʼebé rona ona husi Aman no simu ona ninia hanorin sira, nia mai besik haʼu. 46 La iha ema ida neʼebé haree ona Aman, só deʼit nia neʼebé husi Maromak; nia mak haree ona Aman. 47 Tebes haʼu hatete loloos ba imi: Ema neʼebé fiar sei hetan moris rohan-laek.

48 “Haʼu mak paun moris nian. 49 Imi-nia beiʼala sira han maná iha rai-fuik, maski nuneʼe sira mate. 50 Maibé ema naran deʼit neʼebé han paun neʼebé tun husi lalehan, nia sei la mate. 51 Haʼu mak paun moris nian neʼebé tun mai husi lalehan; se ema ruma han paun neʼe nia sei moris ba nafatin; no loloos, paun neʼebé haʼu sei fó mak haʼu-nia isin atu fó moris ba mundu.”

52 Ho ida-neʼe, ema judeu sira hahú diskute malu dehan: “Oinsá mak ema neʼe bele fó nia isin mai ita atu han?” 53 Jesus hatete ba sira: “Tebes haʼu hatete loloos ba imi: Se imi la han Oan-Mane* nia isin no la hemu nia raan, imi sei la hetan moris.* 54 Ema neʼebé han haʼu-nia isin no hemu haʼu-nia raan sei hetan moris rohan-laek, no haʼu sei fó moris-hiʼas ba nia iha loron ikus; 55 basá haʼu-nia isin mak ai-han neʼebé loos, no haʼu-nia raan mak hemu neʼebé loos. 56 Ema neʼebé han haʼu-nia isin no hemu haʼu-nia raan, nia hamutuk ho haʼu no haʼu hamutuk ho nia. 57 Aman neʼebé moris mak haruka haʼu mai, no haʼu moris tanba Aman, nuneʼe mós ema neʼebé han haʼu-nia isin, ema neʼe sei moris tanba haʼu. 58 Entaun, neʼe mak paun neʼebé tun mai husi lalehan. Ida-neʼe la hanesan ho tempu neʼebé imi-nia beiʼala sira han no mate. Maibé ema neʼebé han paun neʼe sei moris ba nafatin.” 59 Jesus koʼalia buat sira-neʼe nuʼudar nia hanorin ema-lubun iha Kafarnaum.

60 Kuandu ninia dixípulu rona tiha ida-neʼe, sira barak dehan: “Liafuan sira-neʼe todan tebes; sé mak bele rona ida-neʼe?” 61 Maibé Jesus hatene katak ninia dixípulu sira muramura kona-ba neʼe, no nia dehan ba sira: “Ida-neʼe halo imi hakfodak ka? 62 Entaun, imi sei hakfodak liután se imi haree Oan-Mane husi ema saʼe ba fatin neʼebé nia hela uluk! 63 Maromak nia espíritu mak fó moris; isin la folin buat ida. Liafuan sira neʼebé haʼu dehan ona ba imi mai husi espíritu santu no fó moris. 64 Maibé imi balu la fiar.” Basá Jesus hatene nanis ona kona-ba sira neʼebé la fiar no mós ida neʼebé sei entrega nia ba inimigu nia liman. 65 No nia koʼalia tan ba sira: “Tan neʼe mak haʼu dehan ba imi: La iha ema ida bele hakbesik haʼu se Aman la fó lisensa.”

66 Ho ida-neʼe, ninia dixípulu barak fila fali ba buat neʼebé sira halo uluk no la laʼo tuir tan nia. 67 Tan neʼe, Jesus hatete ba sira naʼin sanulu-resin-rua: “Imi mós hakarak atu bá ka?” 68 Simão Pedro hatán ba nia: “Naʼi, ami atu bá ho sé loos? Ita iha liafuan moris rohan-laek nian; 69 no ami fiar ona no hatene katak Ita-Boot mak Ida neʼebé Santu husi Maromak.” 70 Jesus hatán ba sira: “Haʼu mak hili imi naʼin sanulu-resin-rua, loos ka lae? Maibé imi ida mak bosok-teen.”* 71 Tuir loloos, nia koʼalia kona-ba Judas, Simão Iscariotes nia oan; basá Judas sei entrega nia ba inimigu nia liman, maski nia mak ida husi sira naʼin sanulu-resin-rua.

7 No liutiha buat sira-neʼe, Jesus kontinua halaʼo ninia knaar iha Galileia, basá nia lakohi atu halo ida-neʼe iha Judeia tanba ema judeu buka atu oho nia. 2 Maibé, ema judeu sira-nia Festa Tenda nian besik ona. 3 Tan neʼe, ninia alin sira dehan ba nia: “Husik fatin neʼe no laʼo ba Judeia, atu nuneʼe ó-nia dixípulu sira mós bele haree buat neʼebé ó halo. 4 Basá se ema ida hakarak atu ema barak hatene kona-ba nia, nia sei la halo buat ida subasubar deʼit. Nuneʼe, se ó halo buat sira-neʼe, hatudu ó-nia an ba mundu.” 5 Tuir loloos, ninia alin sira la hatudu fiar ba nia. 6 Tan neʼe, Jesus hatete ba sira: “Haʼu-nia tempu seidauk toʼo, maibé ba imi, imi bele bá festa neʼe iha tempu naran deʼit. 7 Mundu la iha razaun atu odi imi, maibé mundu odi haʼu, tanba haʼu fó sasin kona-ba nia katak ninia hahalok sira mak aat. 8 Imi saʼe bá hodi tuir festa; haʼu seidauk bá festa neʼe tanba haʼu-nia tempu seidauk toʼo.” 9 Depois koʼalia tiha buat sira-neʼe, nia kontinua hela iha Galileia.

10 Maski nuneʼe, kuandu ninia alin sira bá tiha festa neʼe, nia mós saʼe bá, maibé subasubar deʼit. 11 Tan neʼe, ema judeu sira hahú buka nia iha festa neʼe no dehan: “Ema neʼe iha neʼebé?” 12 No ema barak bisibisi ba malu kona-ba nia. Sira balu dehan: “Nia ema diʼak.” Seluk fali dehan: “Nia laʼós ema diʼak, maibé nia lohi ema-lubun.” 13 No loloos, la iha ema ida koʼalia kona-ba nia iha ema barak nia oin tanba taʼuk ema judeu sira.

14 Kuandu festa neʼe toʼo iha klaran ona, Jesus tama ba templu no hahú hanorin. 15 No ema judeu sira hakfodak hodi dehan: “Oinsá mak mane neʼe hetan matenek no komprende buat sira-neʼe se nia la aprende iha eskola?”* 16 Jesus fali dehan ba sira: “Buat neʼebé haʼu hanorin ba imi laʼós haʼu-nian, maibé husi ida neʼebé haruka haʼu mai. 17 Se ema ruma hakarak atu halo Maromak nia hakarak, ema neʼe sei hatene se haʼu-nia hanorin mai husi Maromak ka mai husi haʼu-nia an rasik. 18 Ema neʼebé koʼalia tuir deʼit ninia hanoin rasik buka glória ba nia an rasik; maibé ema neʼebé buka glória husi ida neʼebé haruka nia mai, ema neʼe mak loos, no la iha lia-bosok ida iha nia. 19 Moisés mak fó imi Ukun-Fuan, loos ka lae? Maibé imi ida mós la halo tuir Ukun-Fuan. Tansá imi buka atu oho haʼu?” 20 Ema-lubun dehan: “Ó iha anju aat. Sé mak buka atu oho ó?” 21 Jesus hatán hodi dehan: “Haʼu halo deʼit buat ida, no imi hotu hakfodak kona-ba neʼe. 22 Nuneʼe, hanoin toʼok kona-ba ida-neʼe: Moisés fó ba imi ukun-fuan kona-ba sirkunsizaun, no imi fó sirkunsizaun ba ema iha loron Sábadu. No tuir loloos, sirkunsizaun laʼós husi Moisés, maibé husi beiʼala sira. 23 Se ema hetan sirkunsizaun iha loron Sábadu hodi la kontra Moisés nia ukun-fuan, tansá mak imi hirus tebes mai haʼu tanba haʼu fó isin-diʼak ba mane ida iha loron Sábadu? 24 Keta tesi lia tuir deʼit buat neʼebé imi haree, maibé tesi lia tuir dalan neʼebé loos.”

25 Ho ida-neʼe, ema neʼebé hela iha Jeruzalein hahú dehan: “Nia mak ida neʼebé sira buka atu oho, loos ka lae? 26 Maibé haree! nia koʼalia iha ema barak nia oin no sira la dehan buat ida ba nia. Karik ukun-naʼin sira hatene ona katak nia mak Kristu ka? 27 Maibé ita hatene ema neʼe mai husi neʼebé; loloos kuandu Kristu mai, ema ida la hatene nia husi neʼebé.” 28 Tuirmai, Jesus koʼalia ho lian makaʼas nuʼudar nia hanorin iha templu hodi dehan: “Imi hatene haʼu no hatene mós haʼu mai husi neʼebé. No mós, haʼu mai laʼós ho haʼu-nia hakarak rasik, maibé ida neʼebé haruka haʼu mai, nia iha duni, no imi la hatene nia. 29 Haʼu hatene nia, tanba haʼu mai hodi reprezenta nia, no nia mak haruka haʼu mai.” 30 Ho ida-neʼe, sira buka atu kaer nia, maibé sira ida mós la bele kaer nia, tanba ninia oras seidauk toʼo. 31 Maski nuneʼe, ema barak tau fiar ba nia no sira dehan: “Kuandu Kristu mai, nia sei la hatudu sinál barak liu fali ema neʼe, loos ka lae?”

32 Ema farizeu sira rona ema-lubun bisibisi buat sira-neʼe kona-ba nia, no ulun-naʼin amlulik sira no farizeu sira haruka guarda sira atu kaer nia. 33 Jesus hatete: “Haʼu hela ho imi ba tempu uitoan tan toʼo haʼu fila ba ida neʼebé haruka haʼu mai. 34 Imi sei buka haʼu, maibé imi sei la hetan haʼu, no fatin neʼebé haʼu hela, imi la bele bá.” 35 Tan neʼe ema judeu sira koʼalia ba malu dehan: “Ema neʼe atu bá neʼebé hodi nuneʼe ita labele hetan nia? Nia sei la bá hodi hela ho ema judeu sira neʼebé namkari iha ema gregu nia leet, hodi hanorin ema gregu, loos ka lae? 36 Nuneʼe, ninia liafuan sira-neʼe katak sá loos? Basá nia dehan: ‘Imi sei buka haʼu, maibé imi sei la hetan haʼu, no fatin neʼebé haʼu hela, imi la bele bá.’”

37 No loron ikus ba festa neʼe mak loron neʼebé boot liu, no iha loron neʼe Jesus hamriik no koʼalia ho lian makaʼas dehan: “Se ema ruma hamrook, mai besik haʼu no haʼu sei fó bee ba nia atu hemu. 38 Ema neʼebé tau fiar mai haʼu, hanesan Eskritura fó-hatene ona: ‘Husi nia laran mak sei suli sai bee moris nian.’” 39 Maibé, nia koʼalia liafuan sira-neʼe kona-ba espíritu neʼebé lakleur tan sei fó ba sira neʼebé tau fiar ba nia; basá sira seidauk simu espíritu neʼe, tanba nia seidauk hetan glória. 40 Tan neʼe, ema balu husi ema-lubun neʼebé rona liafuan sira-neʼe hahú dehan: “Ema neʼe mak loloos Profeta neʼebé fó-hatene nanis ona.” 41 Ema seluk dehan: “Nia mak Kristu.” Maibé balu tan dehan: “Kristu la mai husi Galileia, loos ka lae? 42 Eskritura dehan katak Kristu mak David nia bei-oan, no nia sei mai husi Belein, knua neʼebé David hela bá, loos ka lae?” 43 Tan neʼe, ema-lubun iha hanoin neʼebé la hanesan kona-ba nia. 44 No sira balu hakarak atu kaer nia, maibé la iha ema ida bele kaer nia.

45 Tan neʼe, kuandu guarda sira fila fali, ulun-naʼin amlulik sira no ema farizeu sira dehan: “Tansá mak imi la lori nia mai?” 46 Guarda sira hatán: “Seidauk iha ema ida koʼalia hanesan nia.” 47 Ho ida-neʼe ema farizeu dehan: “Nia mós lohi ona imi ka? 48 La iha ukun-naʼin ida ka ema farizeu ida mak tau fiar ba nia, loos ka lae? 49 Maibé ema-lubun neʼe neʼebé la hatene Ukun-Fuan mak ema neʼebé Maromak la simu.” 50 Sira ida naran Nicodemos, neʼebé uluk bá hasoru Jesus, dehan ba sira: 51 “Ita-nia ukun-fuan la tesi lia kedas ba ema se seidauk rona husi nia no hatene saida mak nia halo, loos ka lae?” 52 Sira dehan ba nia: “Ó mós husi Galileia ka? Buka no haree iha Eskritura se profeta ida sei mai husi Galileia ka lae.”

Manuskritu balu neʼebé antigu no importante la iha liafuan sira husi versíkulu 53 toʼo kapítulu 8 versíkulu 11. Manuskritu seluk (livru lia-gregu balu la hanesan uitoan) dehan buat tuirmai neʼe:

53 Nuneʼe, sira ida-idak fila ba sira-nia uma rasik.

8 No Jesus laʼo ba Foho Oliveira. 2 Maibé iha dadeer, nia tama fali iha templu, no ema hotu hakbesik ba nia, no nia tuur hodi hahú hanorin sira. 3 No ema eskriba no farizeu sira kaer feto ida neʼebé halo sala-foʼer ho mane neʼebé laʼós ninia laʼen, no sira lori nia mai hodi hamriik iha sira-nia klaran. 4 Sira dehan ba Jesus: “Mestre, ami kaer-toman feto neʼe halo sala-foʼer. 5 Ukun-Fuan Moisés nian dehan katak ita tenke tuda mate feto sira hanesan neʼe. Tuir Ita-nia hanoin oinsá?” 6 Tuir loloos, sira koʼalia ida-neʼe hodi koko Jesus, atu nuneʼe sira bele hetan sala ruma hodi duun nia. Maibé Jesus hakruʼuk no hahú hakerek iha rai ho ninia liman-fuan. 7 Kuandu sira kontinua husu nia, nia hamriik no dehan ba sira: “Imi ida-neʼebé mak la iha sala, nia mak bele tuda uluk feto neʼe.” 8 Tuirmai, nia hakruʼuk fali no kontinua hakerek iha rai. 9 Maibé, sira neʼebé rona ida-neʼe komesa sai ida-idak, hahú husi katuas povu nian; ikusmai hela deʼit nia no feto neʼe. 10 Hamriik loos tiha, Jesus hatete ba feto neʼe: “Feto, sira iha neʼebé? Ema ida la tesi lia ba ó ka?” 11 Feto neʼe hatete: “La iha, señór.” Jesus dehan: “Haʼu mós la tesi lia ba ó. Laʼo bá; hahú husi ohin ba oin keta halo sala tan.”

12 Tan neʼe, Jesus dehan tan ba sira: “Haʼu mak naroman ba mundu. Ema neʼebé laʼo tuir haʼu sei la laʼo iha nakukun laran, maibé sei hetan naroman neʼebé fó moris.” 13 Tuirmai, ema farizeu sira hatete ba nia: “Ó fó sasin kona-ba ó-nia an rasik; ó-nia sasin la loos.” 14 Jesus hatán ba sira: “Maski haʼu fó sasin kona-ba haʼu-nia an rasik, haʼu-nia sasin mak loos, tanba haʼu hatene haʼu mai husi neʼebé no atu bá neʼebé. Maibé imi la hatene haʼu mai husi neʼebé no atu bá neʼebé. 15 Imi tesi lia tuir deʼit buat neʼebé haree iha liʼur; haʼu la tesi lia ba ema ida. 16 Maibé se haʼu tesi lia, haʼu-nia tesi-lia mak loos, tanba haʼu laʼós mesak, basá Aman neʼebé haruka haʼu mai mós hamutuk ho haʼu. 17 No mós iha imi-nia Ukun-Fuan rasik hakerek nanis dehan: ‘Sasin husi ema naʼin-rua mak loos.’ 18 Haʼu mak ida neʼebé fó sasin kona-ba haʼu-nia an rasik, no Aman neʼebé haruka haʼu mai mós fó sasin kona-ba haʼu.” 19 Ho ida-neʼe sira dehan ba nia: “Ó-nia Aman iha neʼebé?” Jesus hatán: “Imi la hatene haʼu no mós haʼu-nia Aman. Se imi hatene haʼu, imi mós sei hatene haʼu-nia Aman.” 20 Nia koʼalia liafuan sira-neʼe nuʼudar nia hanorin hela iha templu, iha fatin neʼebé tau kaixa osan nian. Maibé la iha ema ida kaer nia, tanba ninia oras seidauk toʼo.

21 Tuirmai nia dehan tan ba sira: “Haʼu sei bá, no imi sei buka haʼu, maibé imi sei mate tanba imi-nia sala. Fatin neʼebé haʼu bá, imi la bele bá.” 22 Tan neʼe ema judeu sira hahú dehan: “Nia sei la oho nia an rasik, loos ka lae? Basá nia dehan: ‘Fatin neʼebé haʼu bá, imi la bele bá.’” 23 Entaun, nia dehan tan ba sira: “Imi husi rai; no haʼu husi leten. Imi husi mundu neʼe; Haʼu laʼós husi mundu neʼe. 24 Nuneʼe haʼu hatete ba imi, Imi sei mate iha imi-nia sala. Basá se imi la fiar katak haʼu mak ida neʼebé atu mai, imi sei mate iha imi-nia sala.” 25 Tan neʼe sira hahú dehan ba nia: “Ó sé?” Jesus hatete ba sira: “Haʼu lakon tempu deʼit atu koʼalia ba imi. 26 Iha buat barak neʼebé haʼu hakarak atu koʼalia ba imi no iha buat barak neʼebé haʼu sei tesi lia. Tuir loloos, haʼu koʼalia buat neʼebé haʼu rona husi ida neʼebé haruka haʼu mai iha mundu. Nia sempre loos.” 27 Sira la hatene katak nia koʼalia ba sira kona-ba Aman. 28 Tan neʼe Jesus hatete: “Kuandu imi hiʼit saʼe* Oan-Mane husi ema, iha tempu neʼe imi sei hatene katak haʼu mak ema neʼe, no katak haʼu la halo buat ida tuir deʼit haʼu-nia hakarak; maibé hanesan Aman hanorin ba haʼu, haʼu koʼalia buat sira-neʼe. 29 Nia neʼebé haruka haʼu mai, nia hamutuk ho haʼu; nia la husik haʼu mesak tanba haʼu sempre halo buat neʼebé fó ksolok ba nia.” 30 No nuʼudar nia koʼalia buat sira-neʼe, ema barak tau fiar ba nia.

31 No Jesus dehan tan ba ema judeu neʼebé tau fiar ba nia: “Se imi sempre halo tuir haʼu-nia liafuan, imi mak haʼu-nia dixípulu duni, 32 no imi sei hatene lia-loos, no lia-loos sei halo imi livre.” 33 Sira hatán: “Ami mak Abraão nia bei-oan no ami nunka sai atan ba ema ida. Entaun, oinsá mak ó dehan: ‘Imi sei sai livre’?” 34 Jesus dehan ba sira: “Tebes haʼu hatete loloos ba imi: Ema neʼebé halo sala, nia atan ba sala. 35 Liután neʼe, atan ida la hela nafatin iha nia naʼi nia uma; maibé oan hela nafatin. 36 Tan neʼe, se Oan halo imi livre, imi sei sai livre duni. 37 Haʼu hatene katak imi Abraão nia bei-oan; maibé imi buka atu oho haʼu tanba imi la simu haʼu-nia hanorin. 38 Haʼu koʼalia buat neʼebé haʼu haree kuandu haʼu hamutuk ho Aman; no kona-ba imi, imi halo buat neʼebé imi rona husi imi-nia aman.” 39 Sira hatán: “Ami-nia aman mak Abraão.” Jesus dehan ba sira: “Se imi mak Abraão nia oan, halo tuir Abraão nia hahalok bá. 40 Maibé agora imi buka atu oho haʼu, ida neʼebé fó sai ona ba imi lia-loos neʼebé haʼu rona husi Maromak. Abraão la halo ida-neʼe. 41 Imi halo imi-nia aman nia serbisu.” Sira dehan ba nia: “Ami la moris mai tanba sala-foʼer;* ami iha Aman ida deʼit, neʼe mak Maromak.”

42 Jesus hatete ba sira: “Se Maromak mak imi-nia Aman, imi sei hadomi haʼu, tanba haʼu mai husi Maromak no liuhusi Nia mak haʼu iha neʼe. Haʼu la mai tanba haʼu-nia hakarak rasik, maibé Nia mak haruka haʼu mai. 43 Entaun tansá mak imi la hatene buat neʼebé haʼu dehan ba imi? Neʼe tanba imi lakohi simu haʼu-nia liafuan. 44 Imi husi imi-nia aman Diabu, no imi hakarak halo tuir imi-nia aman nia hakarak. Horiuluk kedas, nia mak ohodór, no nia la hamriik metin iha lia-loos, tanba lia-loos la iha nia. Kuandu nia koʼalia bosok, nia koʼalia tuir ninia an rasik, tanba nia mak bosok-teen no lia-bosok nia aman. 45 Maibé, tanba haʼu koʼalia lia-loos mak imi la fiar haʼu. 46 Imi ida neʼebé mak bele hatudu mai haʼu katak haʼu sala? Se haʼu koʼalia lia-loos, tansá mak imi la fiar haʼu? 47 Ema neʼebé husi Maromak rona Maromak nia liafuan. Tanba imi laʼós husi Maromak, nuneʼe mak imi la rona.”

48 Ema judeu sira dehan ba nia: “Ami koʼalia loos kuandu ami dehan: ‘Ó ema Samaria no ó iha anju aat’, loos ka lae?” 49 Jesus hatán: “Haʼu la iha anju aat, no haʼu respeitu Aman, maibé imi la respeitu haʼu. 50 Haʼu la buka atu fó glória ba haʼu-nia an rasik; maibé iha Ida neʼebé hakarak fó glória mai haʼu no nia mak tesi-lia naʼin. 51 Tebes haʼu hatete loloos ba imi: Se ema ida halo tuir haʼu-nia liafuan, nia sei nunka mate.” 52 Ema judeu sira dehan ba nia: “Agora ami hatene ona katak ó iha anju aat. Abraão mate, no profeta sira mós mate ona; maibé ó dehan: ‘Se ema ida halo tuir haʼu-nia liafuan, nia sei nunka mate.’ 53 Ó la boot liu fali ami-nia aman Abraão neʼebé mate ona, loos ka lae? No profeta sira mós mate ona. Entaun, ó hanoin ó sé?” 54 Jesus hatán: “Se haʼu fó glória ba haʼu-nia an, haʼu-nia glória la iha folin. Haʼu-nia Aman mak fó glória mai haʼu, no nia mak ida neʼebé imi bolu nuʼudar imi-nia Maromak; 55 maski nuneʼe imi la hatene nia. Maibé haʼu hatene nia. No se haʼu dehan katak haʼu la hatene nia, haʼu sai hanesan deʼit ho imi, haʼu bosok-teen. Maibé haʼu hatene nia no haʼu halo tuir ninia liafuan. 56 Imi-nia aman Abraão haksolok tebes ho esperansa atu haree haʼu-nia loron, no nia haree ida-neʼe no kontente.” 57 Tan neʼe, ema judeu sira dehan ba nia: “Ó-nia tinan seidauk limanulu, no ó haree ona Abraão ka?” 58 Jesus dehan ba sira: “Tebes haʼu hatete loloos ba imi: Antes Abraão moris, haʼu iha ona.” 59 Ho ida-neʼe, sira foti fatuk atu tuda nia, maibé Jesus subar no sai husi templu.

9 No nuʼudar nia laʼo liu daudaun, nia haree mane ida neʼebé matan-delek husi moris-mai kedas. 2 Ninia dixípulu sira husu ba nia: “Mestre, nia mak sala, ka ninia inan-aman mak sala, hodi nuneʼe nia moris mai matan-delek kedas?” 3 Jesus hatán: “Laʼós mane neʼe ka ninia inan-aman mak sala, maibé liuhusi ninia situasaun neʼe mak ema bele haree Maromak nia serbisu. 4 Kuandu rai sei loron hela ita tenke halo serbisu husi ida neʼebé haruka haʼu mai; basá kalan sei toʼo mai bainhira ema ida la bele halo tan serbisu. 5 Kuandu haʼu sei iha mundu neʼe, haʼu mak mundu nia naroman.” 6 Koʼalia tiha buat sira-neʼe, nia tafui kabeen ba rai-mean no kahur hamutuk tiha, nia tau ba ema neʼe nia matan, 7 no Jesus dehan ba nia: “Bá no fase ó-nia matan iha bee-lihun Siloé nian” (katak ‘Bee neʼebé suli sai’). Entaun, nia bá no fase nia matan, no nia fila fali hodi haree ona.

8 Tan neʼe, ninia viziñu sira no sira neʼebé uluk sempre haree nia husu ezmola, hahú dehan: “Nia mak ema neʼebé sempre tuur hodi husu ezmola, loos ka lae?” 9 Ema balu dehan: “Nia mak neʼe.” Seluk dehan: “Lae, maibé neʼe mak ema seluk neʼebé haree hanesan nia.” Mane neʼe hatán: “Haʼu mak nia.” 10 Ho ida-neʼe, sira dehan ba nia: “Entaun, oinsá mak ó-nia matan loke?” 11 Nia hatán: “Mane ida naran Jesus kahur rai-mean no kose ba haʼu-nia matan no dehan: ‘Bá iha Siloé no fase ó-nia matan.’ Entaun haʼu bá no fase no haʼu bele haree fali.” 12 Nuneʼe sira husu ba nia: “Mane neʼe iha neʼebé?” Nia hatán: “Haʼu la hatene.”

13 Sira lori mane neʼebé uluk matan-delek ba ema farizeu sira. 14 No loron neʼebé Jesus kahur rai-mean no loke ema neʼe nia matan mak loron Sábadu. 15 No agora, ema farizeu sira mós hahú husu nia kona-ba oinsá nia bele haree fali. Nia dehan ba sira: “Mane neʼe tau tahu iha haʼu-nia matan, no haʼu fase, tuirmai haʼu haree fali.” 16 Tan neʼe, ema farizeu balu hahú dehan: “Ema neʼe laʼós husi Maromak, tanba nia la halo tuir loron Sábadu.” Sira seluk dehan: “Oinsá mak ema sala-naʼin ida bele halo sinál hanesan neʼe?” Nuneʼe, sira iha hanoin neʼebé la hanesan. 17 Tan neʼe, sira dehan tan ba mane matan-delek neʼe: “Oinsá ó-nia hanoin kona-ba ema neʼebé loke ó-nia matan?” Mane neʼe hatán: “Nia mak profeta ida.”

18 Maibé, ema judeu sira la fiar katak uluk mane neʼe matan-delek no bele haree fali. Sira bolu mane neʼe nia inan-aman, 19 no husu: “Neʼe mak imi-nia oan neʼebé imi dehan katak moris mai matan-delek ona ka? Entaun, oinsá mak agora nia haree fali?” 20 Tuirmai, mane neʼe nia inan-aman dehan: “Ami hatene katak nia mak ami-nia oan duni no katak nia matan-delek husi moris-mai kedas. 21 Maibé kona-ba oinsá mak nia agora haree fali, ami la hatene, ka sé mak loke nia matan, ami la hatene. Imi husu ba nia. Nia boot ona. Nia bele hatán kona-ba nia an.” 22 Ninia inan-aman koʼalia hanesan neʼe tanba sira taʼuk ema judeu sira, basá ema judeu sira konkorda ona katak, se ema ida fó sai katak Jesus mak Kristu, ema neʼe tenke hasai tiha husi sinagoga. 23 Tan ida-neʼe mak mane neʼe nia inan-aman dehan: “Nia boot ona. Imi husu ba nia.”

24 Nuneʼe, sira bolu fali mane neʼebé uluk matan-delek no sira dehan ba nia: “Fó glória ba Maromak hodi koʼalia lia-loos; ami hatene katak ema neʼe mak ema sala-naʼin.” 25 Mane neʼe hatán: “Haʼu la hatene se nia sala-naʼin ka laʼós. Maibé haʼu hatene deʼit katak uluk haʼu matan-delek, no agora haʼu haree fali.” 26 Tan neʼe sira husu nia: “Saida mak nia halo ba ó? Oinsá mak nia loke ó-nia matan?” 27 Nia hatán ba sira: “Haʼu fó-hatene tiha ona ba imi, maibé imi lakohi rona. Tansá mak imi hakarak rona dala ida tan? Imi mós hakarak atu sai ninia dixípulu ka?” 28 Ho ida-neʼe sira hatún nia no dehan: “Ó mak ema neʼe nia dixípulu, maibé ami Moisés nia dixípulu. 29 Ami hatene katak Maromak koʼalia ba Moisés; maibé kona-ba ema neʼe, ami la hatene nia mai husi neʼebé.” 30 Mane neʼe hatán ba sira: “Ida-neʼe halo haʼu hakfodak. Maski nia loke haʼu-nia matan, maibé imi dehan katak imi la hatene nia mai husi neʼebé. 31 Ita hatene katak Maromak la rona ba ema sala-naʼin, maibé se ema ruma hamtaʼuk Maromak no halo ninia hakarak, Maromak sei rona ba ema neʼe. 32 Basá horiuluk kedas seidauk iha ema ida neʼebé loke ema matan-delek nia matan. 33 Se mane neʼe la mai husi Maromak, nia la bele halo buat ida.” 34 Sira hatán ba nia: “Ó moris mai iha sala laran, no oinsá mak ó hanorin fali ami?” Ho ida-neʼe sira duni sai nia ba liʼur.

35 Jesus rona katak sira duni sai mane neʼe, entaun kuandu hasoru nia, Jesus dehan: “Ó tau fiar ba Oan-Mane husi ema ka lae?” 36 Mane neʼe hatán: “Nia mak sé, señór? Fó-hatene haʼu atu haʼu bele tau fiar ba nia.” 37 Jesus hatete ba nia: “Ó haree ona nia, no liután neʼe, ida neʼebé koʼalia ho ó mak ema neʼe.” 38 Tuirmai nia hatete: “Naʼi, haʼu tau fiar duni ba nia.” Ho ida-neʼe, nia hakruʼuk an iha Jesus nia oin. 39 No Jesus hatete: “Haʼu mai iha mundu neʼe atu mundu hetan tesi-lia; hodi nuneʼe ema matan-delek bele haree no ema neʼebé haree sai matan-delek.” 40 Kuandu ema farizeu sira neʼebé hamutuk ho nia rona buat sira-neʼe, sira dehan: “Ami laʼós ema matan-delek, loos ka lae?” 41 Jesus hatete ba sira: “Se imi matan-delek, imi la iha sala. Maibé agora imi dehan: ‘Ami haree.’ Imi-nia sala iha nafatin.”

10 “Tebes haʼu hatete loloos ba imi katak ema neʼebé tama ba bibi luhan la liuhusi odamatan, maibé saʼe husi fatin seluk, ema neʼe mak naʼok-teen ida no hadau sasán. 2 Maibé ema neʼebé tama liuhusi odamatan mak bibi-atan. 3 Ema neʼebé hein odamatan sei loke ba nia, no bibi-malae sira rona nia lian no nia bolu ninia bibi sira ho sira-nia naran ida-idak no nia lori sira sai. 4 Kuandu nia hasai hotu tiha ninia bibi sira, nia sei laʼo iha sira-nia oin, no bibi sira laʼo tuir nia tanba sira hatene nia lian. 5 Bibi sira sei la laʼo tuir ema fuik maibé sei halai husi nia, tanba sira la hatene ema neʼe nia lian.” 6 Jesus konta ai-knanoik neʼe ba sira; maibé sira la hatene buat neʼebé nia koʼalia ba sira katak sá.

7 Tan neʼe, Jesus dehan tan ba sira: “Tebes haʼu hatete loloos ba imi: Haʼu mak odamatan ba bibi-malae sira. 8 Ema hotu neʼebé mai no bolu sira-nia an nuʼudar bibi-atan loos, sira mak naʼok-teen no hadau sasán; maibé bibi-malae la rona ba sira. 9 Haʼu mak odamatan. Ema naran deʼit neʼebé tama liuhusi haʼu sei hetan salvasaun, no nia sei tama no sai no hetan fatin neʼebé iha duʼut. 10 Naʼok-teen mai atu naʼok, atu oho, no atu estraga. Maibé haʼu mai atu sira bele iha moris no sei hetan moris rohan-laek. 11 Haʼu mak bibi-atan diʼak; bibi-atan diʼak fó nia moris ba ninia bibi-malae sira. 12 Ema neʼebé simu osan hodi hein bibi, nia laʼós bibi-atan no bibi sira-neʼe laʼós ninian. Kuandu nia haree asu-fuik mai, nia husik hela bibi-malae sira no halai, no asu-fuik hadau bibi sira-neʼe no halo sira namkari. 13 Nia la hanoin bibi-malae sira tanba nia mak serbisu-naʼin deʼit. 14 Haʼu mak bibi-atan diʼak; haʼu hatene haʼu-nia bibi-malae sira no haʼu-nia bibi sira hatene haʼu 15 hanesan haʼu-nia Aman hatene haʼu no haʼu hatene Aman. No haʼu fó haʼu-nia moris* ba bibi-malae sira.

16 “No haʼu iha bibi seluk tan neʼebé seidauk tama iha luhan neʼe, sira mós haʼu tenke lori, no sira sei rona haʼu-nia lian, no sira sei sai luhan ida deʼit, no iha bibi-atan ida deʼit. 17 Aman hadomi haʼu tanba haʼu fó haʼu-nia moris, atu nuneʼe haʼu sei hetan fali. 18 La iha ema ida hasai haʼu-nia moris, haʼu rasik mak hakarak atu fó ida-neʼe. Haʼu iha direitu atu fó haʼu-nia moris, no haʼu iha direitu atu hetan fali ida-neʼe. Mandamentu neʼe haʼu simu husi Aman.”

19 Dala ida tan, ema judeu sira iha hanoin neʼebé la hanesan tanba liafuan sira-neʼe. 20 Sira barak dehan: “Nia iha anju aat no nia bulak. Tansá mak imi rona nia?” 21 Sira seluk dehan: “Ema neʼebé iha anju aat la bele koʼalia liafuan sira-neʼe. Anju aat ida la bele loke ema nia matan, loos ka lae?”

22 Iha tempu neʼe, Festa Dedikasaun nian* halaʼo hela iha Jeruzalein. Neʼe mak tempu malirin, 23 no Jesus laʼo iha templu iha área neʼebé bolu nuʼudar dalan* Salomão nian. 24 Tan neʼe, ema judeu sira haleʼu nia no hahú husu ba nia: “Ba tempu hira tan mak ó sei husik ami atu laran-rua? Se ó mak Kristu koʼalia loloos mai ami.” 25 Jesus hatán ba sira: “Haʼu dehan ona ba imi, maibé imi la fiar. Serbisu neʼebé haʼu halo hodi haʼu-nia Aman nia naran, ida-neʼe mak fó sasin kona-ba haʼu. 26 Maibé imi la fiar, tanba imi laʼós haʼu-nia bibi-malae sira. 27 Haʼu-nia bibi sira rona haʼu-nia lian, no haʼu hatene sira, no sira laʼo tuir haʼu. 28 No haʼu fó ba sira moris ba nafatin, no sira sei la lakon, no la iha ema ida sei hadau sira husi haʼu-nia liman. 29 Buat neʼebé haʼu-nia Aman fó ona mai haʼu mak folin-boot liu fali buat seluk hotu, no la iha ema ida bele hadau sira husi Aman nia liman. 30 Haʼu ho Aman ida deʼit.”

31 Dala ida tan ema judeu sira foti fatuk atu tuda nia. 32 Jesus dehan ba sira: “Haʼu hatudu ba imi Aman nia serbisu barak neʼebé diʼak. Entaun, serbisu ida-neʼebé mak halo imi tuda haʼu?” 33 Ema judeu sira hatán: “Ami tuda ó laʼós tanba serbisu diʼak ida, maibé tanba ó koʼalia kontra Maromak, basá maski ó mak ema deʼit, maibé ó halo ó-nia an hanesan maromak.” 34 Jesus dehan ba sira: “Laʼós imi-nia Ukun-Fuan rasik hakerek nuneʼe: ‘Haʼu dehan: “Imi mak maromak sira.”’? 35 Nuneʼe, Maromak uza liafuan ‘Imi mak maromak sira’ ba sira neʼebé kontra buat neʼebé hakerek iha ninia liafuan, no ema ida la bele hasai buat neʼebé Eskritura dehan. 36 Maibé haʼu, haʼu mak ida neʼebé Maromak halo santu no haruka ba mundu, nuneʼe tanbasá mak imi dehan mai haʼu: ‘Ó koʼalia kontra Maromak’ tan deʼit haʼu dehan: ‘Haʼu Maromak nia Oan’? 37 Se haʼu la halo haʼu-nia Aman nia serbisu, imi lalika fiar haʼu. 38 Maibé se haʼu halo ida-neʼe, imi tau fiar ba serbisu neʼe, maski imi la fiar ba haʼu. Atu nuneʼe imi bele hatene no kontinua hatene katak Aman hamutuk ho haʼu no haʼu hamutuk ho Aman.” 39 Ho ida-neʼe, sira koko dala ida tan atu kaer nia; maibé nia sai husi sira-nia leet.

40 Entaun, nia laʼo fali ba Mota Jordaun nia sorin bá, hodi bá iha fatin neʼebé uluk João fó batizmu, no nia hela iha neʼebá. 41 No ema barak mai hasoru nia, no sira hahú dehan: “Loloos, João la hatudu sinál ida, maibé buat sira neʼebé João fó sai kona-ba ema neʼe, sira hotu sai loos.” 42 No iha neʼebá, ema barak tau fiar ba Jesus.

11 No iha tempu neʼe mane ida naran Lázaro moras, nia ema Betánia, husi Maria no nia biin Marta* nia knua. 2 Tuir loloos, Maria neʼe mak ida neʼebé tau mina-morin ba Naʼi no hamaran Naʼi nia ain ho nia fuuk. Maria neʼe nia alin Lázaro* mak moras. 3 Tan neʼe, nia feton sira haruka lia-menon ba Jesus dehan: “Naʼi, ida neʼebé Ita hadomi tebes, sai moras.” 4 Maibé rona tiha ida-neʼe, Jesus dehan: “Moras neʼe laʼós atu lori ba mate, maibé ba Maromak nia glória, atu nuneʼe Maromak nia Oan-Mane hetan glória liuhusi ida-neʼe.”

5 Jesus hadomi Marta no nia alin no mós Lázaro. 6 Maibé kuandu nia rona katak Lázaro moras, nia sei hein tan loron rua iha fatin neʼebé nia hela daudaun. 7 No liutiha neʼe, nia dehan ba ninia dixípulu sira: “Mai ita laʼo fali ba Judeia.” 8 Dixípulu sira dehan ba nia: “Mestre, foin lalais neʼe ema Judeia sira buka atu tuda Ita, no agora Ita hakarak fila fali ba neʼebá ka?” 9 Jesus hatán: “Rai-loron iha oras sanulu-resin-rua, loos ka lae? Ema neʼebé laʼo iha loron la sidi ba buat ida, tanba nia haree naroman husi mundu neʼe. 10 Maibé se ema ruma laʼo iha kalan, nia sidi buat ruma, tanba nia iha nakukun laran.”

11 Koʼalia tiha buat sira-neʼe, nia dehan tan ba sira: “Lázaro, ita-nia belun toba ona, maibé haʼu sei bá hodi fanu nia.” 12 Tan neʼe dixípulu sira dehan ba nia: “Naʼi, se nia toba hela, nia sei sai diʼak fali.” 13 Tuir loloos, Jesus koʼalia kona-ba Lázaro nia mate. Maibé sira hanoin katak nia koʼalia kona-ba Lázaro toba hanesan baibain. 14 Ho ida-neʼe, Jesus koʼalia nakloke ba sira dehan: “Lázaro mate ona, 15 no haʼu haksolok ba imi tanba haʼu la iha neʼebá, atu nuneʼe imi bele fiar. Entaun, mai ita bá haree nia.” 16 Tan neʼe Tomé, ida neʼebé bolu nuʼudar Kaduak, hatete ba dixípulu seluk: “Mai ita bá, atu nuneʼe ita bele mate hamutuk ho nia.”

17 No kuandu Jesus toʼo, Lázaro hakoi tiha ona iha rate ba loron haat. 18 No Betánia dook maizumenus kilómetru tolu husi Jeruzalein. 19 Ho ida-neʼe, ema judeu barak mai ona atu hasoru Marta no Maria hodi fó ksolok ba sira tanba sira-nia alin mate. 20 No kuandu nia rona katak Jesus mai ona, Marta bá hasoru Jesus; maibé Maria tuur nafatin iha uma. 21 Marta hatete ba Jesus: “Naʼi, se Ita-Boot iha neʼe karik, haʼu-nia alin sei la mate. 22 No maski nuneʼe, agora mós haʼu sei fiar katak buat naran deʼit neʼebé Ita husu ba Maromak, nia sei fó ba Ita.” 23 Jesus hatete ba nia: “Ó-nia alin sei moris fali.” 24 Marta hatete ba Jesus: “Haʼu hatene katak nia sei moris fali iha tempu moris-hiʼas nian iha loron ikus.” 25 Jesus hatete ba nia: “Haʼu mak moris-hiʼas no moris. Ema neʼebé hatudu fiar mai haʼu, maski nia mate, nia sei moris fali; 26 no ema naran deʼit neʼebé moris no hatudu fiar mai haʼu, nia sei nunka mate. Ó fiar ida-neʼe ka lae?” 27 Nia dehan ba Jesus: “Loos Naʼi, haʼu fiar ona katak Ita mak Kristu, Maromak nia Oan-Mane, Ida neʼebé fó-hatene nanis ona atu mai iha mundu.” 28 No koʼalia tiha ida-neʼe, nia bá no bolu Maria, no dehan ba nia subasubar: “Mestre mai ona no nia bolu ó.” 29 Kuandu rona tiha ida-neʼe, Maria hamriik lalais no laʼo bá hodi hasoru nia.

30 Loloos, Jesus seidauk tama iha knua laran, maibé nia sei iha fatin neʼebé Marta hasoru nia. 31 Iha tempu neʼebá, iha ema judeu balu hamutuk ho Maria iha uma laran atu fó ksolok ba nia. No kuandu sira haree Maria hamriik lalais no sai, sira laʼo tuir nia, basá sira hanoin katak nia sei bá rate atu tanis iha neʼebá. 32 No kona-ba Maria, kuandu nia toʼo fatin neʼebé Jesus iha no nia haree Jesus, nia monu ain no dehan: “Naʼi, se Ita-Boot iha neʼe karik, haʼu-nia alin sei la mate.” 33 No kuandu Jesus haree nia tanis no haree ema judeu neʼebé mai hamutuk nia tanis, Jesus sai laran-triste tebes* no neon-susar; 34 no nia dehan: “Imi tau nia iha neʼebé?” Sira hatete: “Naʼi, mai no haree.” 35 Jesus tanis. 36 Tan neʼe, ema judeu balu hahú dehan: “Haree bá oinsá Naʼi hadomi tebes nia!” 37 Maibé balu fali dehan: “Nia neʼebé loke ona ema matan-delek nia matan, tansá nia la bele hanetik Lázaro atu la mate?”

38 Jesus sai laran-triste tebes ba dala ida tan, tuirmai nia bá iha rate. Tuir loloos, rate neʼe mak fatuk-kuak ida, no ema duir fatuk boot ida hodi taka netik. 39 Jesus hatete: “Imi hasai tiha fatuk neʼe.” No Marta, mane neʼebé mate neʼe nia feton, hatete ba Jesus: “Naʼi, agora ninia isin dois ona, basá neʼe loron haat ona.” 40 Jesus dehan ba nia: “Haʼu hatete ona ba ó katak se ó fiar, ó sei haree Maromak nia glória, loos ka lae?” 41 Tan neʼe sira duir sai fatuk neʼe. No Jesus foti nia matan ba lalehan no dehan: “Aman, haʼu hatoʼo obrigadu ba Ita-Boot tanba Ita rona ona haʼu. 42 Haʼu hatene katak Ita-Boot sempre rona haʼu; maibé tanba ema-lubun neʼebé hamriik haleʼu mak haʼu dehan nuneʼe, atu sira bele fiar katak Ita mak haruka haʼu mai.” 43 No koʼalia tiha buat sira-neʼe, nia bolu ho lian makaʼas: “Lázaro, sai mai liʼur!” 44 Mane neʼebé mate ona sai mai liʼur ho hena bobar hela iha nia liman no ain, no ninia oin falun ho hena. Jesus hatete ba sira: “Kore hena neʼe no husik nia laʼo bá.”

45 Tan neʼe, ema judeu barak neʼebé mai hasoru Maria no haree buat sira neʼebé Jesus halo, tau fiar ba Jesus; 46 maibé sira balu bá hodi fó-hatene ba ema farizeu sira kona-ba buat neʼebé Jesus halo. 47 Ho ida-neʼe, ulun-naʼin amlulik sira no farizeu sira halibur Sinédriu hamutuk no hahú dehan: “Ita sei halo saida tanba ema neʼe hatudu sinál barak? 48 Se ita husik deʼit nia hanesan neʼe, sira hotu sei tau fiar ba nia, no ema Roma sira sei mai hodi hasai ita-nia fatin adorasaun nian no mós ita-nia nasaun.” 49 Maibé sira ida naran Caifás, neʼebé nuʼudar amlulik boot iha tempu neʼebá, hatete ba sira: “Imi la hatene buat ida. 50 Imi la haree katak nasaun mak importante liu fali ema ida ka? Diʼak liu se ema ida mak mate duké nasaun tomak lakon.” 51 Nia koʼalia ida-neʼe laʼós husi ninia hanoin rasik, maibé tanba nia mak amlulik boot iha tinan neʼe, no nia fó sai nanis katak Jesus tenke mate ba nasaun neʼe, 52 no laʼós deʼit ba nasaun, maibé mós atu halibur Maromak nia oan sira neʼebé namkari hodi sai grupu ida deʼit. 53 Entaun, hahú husi loron neʼebá sira planu atu oho Jesus.

54 Tan neʼe, Jesus la bele tan atu hatudu an iha ema judeu nia oin, no nia sai husi fatin neʼe hodi bá fatin besik rai-fuik, no nia tama ba sidade ida naran Efraim, no iha neʼebá mak nia hela ho ninia dixípulu sira. 55 No agora ema judeu nia Festa Salvasaun nian besik ona, nuneʼe ema barak husi rai hotu saʼe ba Jeruzalein antes festa neʼe hodi bele hamoos sira-nia an tuir lei. 56 Tan neʼe sira buka Jesus, no sira dehan ba malu nuʼudar sira hamriik iha templu: “Imi hanoin oinsá? Nia sei mai iha festa neʼe ka lae?” 57 Maibé, ulun-naʼin amlulik sira no ema farizeu sira fó ukun-fuan katak se ema ruma hatene nia iha neʼebé, ema neʼe tenke fó-hatene, atu nuneʼe sira bele kaer nia.

12 Loron neen antes Festa Salvasaun nian, Jesus toʼo ba Betánia, fatin neʼebé Lázaro hela bá. No Lázaro mak ida neʼebé Jesus fó moris-hiʼas husi mate. 2 Tan neʼe, sira prepara han-kalan ba nia, no Marta serbí sira, maibé Lázaro tuur hamutuk ho sira neʼebé tuur iha meza ho Jesus. 3 No Maria foti mina-morin nardu* besik litru sorin,* no neʼe iha folin-boot, no nia kose ba Jesus nia ain no hamaran ho nia fuuk. Nuneʼe uma tomak nakonu ho mina nia morin. 4 Maibé ninia dixípulu ida naran Judas Iscariotes, neʼebé atu fó nia ba inimigu nia liman, dehan: 5 “Tansá mak la faʼan deʼit mina-morin neʼe ba osan denáriu* 300 no fó neʼe ba ema kiak sira?” 6 Nia koʼalia buat sira-neʼe laʼós tanba nia hanoin ema kiak, maibé tanba nia mak naʼok-teen ida, no nia kaer kaixa osan nian, no nia iha toman atu naʼok osan neʼebé tau iha laran. 7 Tan neʼe, Jesus hatete: “Husik nia atu halo neʼe hodi prepara ba haʼu-nia loron hakoi nian. 8 Basá ema kiak sira sempre hamutuk ho imi, maibé haʼu la hamutuk ho imi nafatin.”

9 Kuandu ema judeu lubun boot hatene katak nia iha neʼebá, sira mai fatin neʼe, laʼós deʼit atu haree Jesus, maibé mós atu haree Lázaro, ida neʼebé Jesus fó moris-hiʼas husi mate. 10 Iha tempu neʼe, ulun-naʼin amlulik sira koʼalia hamutuk atu oho mós Lázaro, 11 basá hodi nia mak ema judeu barak bá iha fatin neʼebá no tau fiar ba Jesus.

12 Loron tuirmai, ema-lubun neʼebé toʼo ona Jeruzalein atu tuir festa rona katak Jesus atu mai. 13 Ho ida-neʼe, sira foti ai-sanak husi ai-palmeira no sai bá hasoru nia no sira hahú hakilar: “Ami harohan, salva nia bá! Bensaun ba ida neʼebé mai ho Jeová nia naran! Bensaun ba Izráel nia liurai!” 14 No kuandu Jesus hetan tiha kuda-burru oan ida, nia tuur iha kuda-burru neʼe nia leten, hanesan hakerek nanis ona: 15 “Keta taʼuk, Siaun nia oan-feto. Haree! Ó-nia liurai mai no nia tuur iha kuda-burru oan nia leten!” 16 Foufoun, ninia dixípulu sira la komprende buat sira-neʼe. Maibé kuandu Jesus hetan ona glória, dixípulu sira hanoin-hetan fali buat neʼebé ema-lubun halo ona ba nia, no mós katak buat sira-neʼe hakerek ona iha Eskritura kona-ba nia.

17 No mós, ema sira neʼebé hamutuk ho Jesus kuandu nia bolu Lázaro sai husi rate hodi fó moris-hiʼas ba nia, ema sira-neʼe kontinua fó sasin kona-ba Jesus. 18 Ho ida-neʼe, ema-lubun mós sai hodi hasoru nia tanba sira rona ona katak nia hatudu sinál neʼe. 19 Tan neʼe ema farizeu dehan ba malu: “Imi haree ona ka lae? Ita la hetan susesu ida. Haree! Mundu tomak laʼo tuir nia.”

20 No iha neʼebá, iha ema gregu balu neʼebé mós hamutuk ho ema sira neʼebé mai atu halo adorasaun iha festa neʼe. 21 Ema gregu sira-neʼe hakbesik Filipe, neʼebé husi Betsaida iha Galileia, hodi husu ba nia: “Señór, ami hakarak haree Jesus.” 22 Filipe bá hodi fó-hatene André. Tuirmai, André no Filipe bá hodi fó-hatene Jesus.

23 Maibé Jesus dehan ba sira: “Oras toʼo ona ba Oan-Mane husi ema atu hetan glória. 24 Tebes haʼu hatete loloos ba imi: Se fini trigu nian ida la monu ba rai no mate, nia mak hanesan fini ida deʼit; maibé se nia mate, ida-neʼe sei fó fulin. 25 Ema neʼebé hadomi nia moris* sei lakon nia moris, maibé ema neʼebé odi ninia moris iha mundu neʼe sei salva nia moris hodi hetan moris rohan-laek. 26 Se ema ruma hakarak serbí haʼu, husik nia laʼo tuir haʼu. Ema neʼebé serbí haʼu sei hela iha fatin neʼebé haʼu hela. Se ema ruma serbí haʼu, haʼu-nia Aman sei fó bensaun ba nia. 27 Agora haʼu-nia neon* susar tebes, no saida mak haʼu tenke dehan? Aman, salva haʼu husi oras neʼe. Maski nuneʼe, haʼu tenke hetan susar neʼe, basá tan ida-neʼe mak haʼu mai. 28 Aman, fó glória ba Ita-nia naran.” Ho ida-neʼe, lian ida sai husi lalehan dehan: “Haʼu fó glória tiha ona no haʼu sei fó glória tan.”

29 Kuandu ema-lubun neʼebé hamriik iha neʼebá rona ida-neʼe, sira hahú dehan katak neʼe mak rai-tarutu ida. Maibé balu seluk dehan: “Anju ida mak koʼalia ba nia.” 30 Jesus hatete ba sira: “Lian neʼebé imi rona, ida-neʼe mosu laʼós ba haʼu-nia diʼak, maibé ba imi-nia diʼak. 31 Agora oras atu tesi lia ba mundu neʼe toʼo ona, no ukun-naʼin mundu neʼe nian sei soe tiha ba liʼur. 32 No kona-ba haʼu, kuandu ema hiʼit saʼe tiha haʼu husi rai, haʼu sei dada ema oioin ba haʼu.” 33 Nia koʼalia nuneʼe atu hatudu dalan oinsá mak nia sei mate lakleur tan. 34 Tan neʼe, ema-lubun dehan ba nia: “Ami rona husi Ukun-Fuan katak Kristu hela nafatin; entaun tansá mak ó dehan katak Oan-Mane husi ema sei hiʼit saʼe tiha? Sé mak Oan-Mane husi ema?” 35 Tan neʼe Jesus dehan ba sira: “Naroman neʼe sei iha imi-nia leet ba tempu uitoan tan. Laʼo bá kuandu sei iha naroman, atu nuneʼe nakukun labele taka imi; ema neʼebé laʼo iha nakukun laran la hatene atu bá neʼebé. 36 Kuandu naroman sei iha, hatudu fiar ba naroman neʼe, atu nuneʼe imi bele sai naroman nia oan sira.”

Koʼalia tiha buat sira-neʼe, Jesus sai hodi subar husi sira. 37 Maski nia hatudu sinál barak iha sira-nia oin, maibé sira la tau fiar ba nia, 38 atu nuneʼe liafuan sira husi profeta Isaías bele sai loos. Isaías dehan: “Jeová, sé mak tau fiar ona ba buat neʼebé ami rona? No kona-ba Jeová nia liman, nia hatudu sai ida-neʼe ba sé?” 39 Isaías mós fó-hatene razaun tansá sira la fiar ba nia. Isaías dehan: 40 “Nia halo sira-nia matan sai delek ona no halo sira-nia laran sai toos, hodi nuneʼe sira la bele haree no hatene buat neʼebé sira tenke halo atu fila fali ba nia no nia kura sira.” 41 Isaías koʼalia buat sira-neʼe kona-ba Kristu tanba nia haree ninia glória. 42 Maski nuneʼe ema barak, inklui mós ukun-naʼin sira, tau fiar ba nia, maibé tanba sira taʼuk ema farizeu, sira la fó sai sira-nia fiar kona-ba nia, atu nuneʼe ema labele hasai sira husi sinagoga; 43 basá sira gosta liu atu ema simu sira duké Maromak simu sira.

44 Maibé, Jesus koʼalia ho lian makaʼas no dehan: “Ema neʼebé tau fiar mai haʼu, nia laʼós deʼit fiar haʼu, maibé mós tau fiar ba ida neʼebé haruka haʼu mai; 45 no ema neʼebé haree haʼu haree mós ida neʼebé haruka haʼu mai. 46 Haʼu mai nuʼudar naroman ba mundu, atu nuneʼe ema naran deʼit neʼebé tau fiar mai haʼu la bele hela nafatin iha nakukun laran. 47 Maibé se ema ruma rona haʼu-nia liafuan no la halo tuir, haʼu la tesi lia ba nia; basá haʼu mai laʼós atu tesi lia ba mundu, maibé atu salva mundu. 48 No kona-ba ema neʼebé la simu haʼu no la simu haʼu-nia liafuan, iha ida neʼebé sei tesi lia ba nia. Liafuan neʼebé haʼu koʼalia ona mak buat neʼebé tesi lia ba nia iha loron ikus; 49 tanba haʼu la koʼalia husi haʼu-nia hakarak rasik, maibé Aman neʼebé haruka haʼu mai mak fó ona mandamentu kona-ba saida mak haʼu sei dehan no koʼalia. 50 No mós, haʼu hatene katak ninia mandamentu mak moris rohan-laek. Tan neʼe buat neʼebé haʼu koʼalia, haʼu koʼalia ida-neʼe tuir buat neʼebé Aman fó-hatene ona ba haʼu.”

13 Antes Festa Salvasaun nian toʼo mai, Jesus hatene ona katak ninia oras toʼo ona atu husik mundu hodi bá Aman. Nia hadomi ninia dixípulu sira, no nia hadomi sira toʼo rohan. 2 Diabu tau ona iha Judas Iscariotes nia laran atu entrega Jesus ba inimigu nia liman. Judas mak Simão Iscariotes nia oan. No iha tempu neʼebá sira han-kalan daudaun. 3 No Jesus hatene katak Aman fó tiha ona buat hotu ba nia liman, no katak nia mai husi Maromak no nia atu fila fali ba Maromak. 4 No nuʼudar sira han hela, Jesus hamriik husi meza no tuirmai nia hasai ninia unuk liʼur, no nia foti toalla hodi kesi ba nia knotak. 5 No depois tau tiha bee iha basia laran, nia hahú fase dixípulu sira-nia ain no hamaran ho toalla neʼebé kesi hela iha nia knotak. 6 Kuandu Jesus toʼo ba Simão Pedro, nia dehan ba Jesus: “Naʼi, Ita-Boot atu fase haʼu-nia ain ka?” 7 Jesus dehan ba nia: “Agora ó seidauk bele komprende buat neʼebé haʼu halo daudaun, maibé depois neʼe ó sei komprende.” 8 Pedro hatete ba nia: “Ita keta fase haʼu-nia ain.” Jesus hatán: “Se haʼu la fase ó-nia ain, ó sei la hamutuk ho haʼu.” 9 Simão Pedro dehan: “Naʼi, keta fase deʼit haʼu-nia ain, maibé fase mós haʼu-nia liman no ulun.” 10 Jesus hatete ba nia: “Ema neʼebé hariis ona, presiza deʼit atu fase ninia ain, basá ninia isin-lolon tomak moos ona. No imi moos ona, maibé laʼós imi hotu.” 11 Tuir loloos, Jesus hatene ona mane neʼebé atu fó nia ba inimigu nia liman. Tan neʼe mak nia dehan: “Laʼós imi hotu mak moos.”

12 No kuandu nia fase hotu tiha sira-nia ain no tau fali ninia unuk no tuur iha meza, nia dehan: “Imi hatene saida mak haʼu foin halo ba imi? 13 Imi bolu haʼu nuʼudar ‘Mestre’ no ‘Naʼi’, no ida-neʼe loos, tanba haʼu hanesan neʼe duni. 14 Entaun, maski haʼu mak Naʼi no Mestre, maibé haʼu fase imi-nia ain, se nuneʼe imi mós tenke fase imi-nia maluk nia ain. 15 Haʼu fó ezemplu ba imi, hodi nuneʼe imi mós tenke banati-tuir buat neʼebé haʼu halo. 16 Tebes haʼu hatete loloos ba imi: Atan ida la boot liu fali ninia naʼi, no ida neʼebé mai la boot liu fali ida neʼebé haruka nia. 17 Se imi hatene buat sira-neʼe, ksolok ba imi kuandu imi halo tuir. 18 Haʼu la koʼalia kona-ba imi hotu; haʼu hatene sira neʼebé haʼu hili ona. Maibé ida-neʼe atu Eskritura neʼe bele sai loos: ‘Nia neʼebé han haʼu-nia paun mak hamriik ona hodi kontra haʼu.’* 19 Agora haʼu fó-hatene ba imi antes ida-neʼe mosu, atu nuneʼe kuandu ida-neʼe mosu imi bele fiar katak haʼu mak nia. 20 Tebes haʼu hatete loloos ba imi: Ema neʼebé simu ida neʼebé haʼu haruka, nia simu mós haʼu. No ema neʼebé simu haʼu, nia simu mós ida neʼebé haruka haʼu mai.”

21 Koʼalia tiha buat sira-neʼe, Jesus sai neon-susar tebes,* no nia fó sasin hodi dehan: “Tebes haʼu hatete loloos ba imi katak imi ida sei entrega haʼu ba inimigu nia liman.” 22 Ninia dixípulu sira hahú hateke ba malu tanba sira la hatene nia koʼalia kona-ba sé loos. 23 Iha dixípulu ida neʼebé tuur besik iha Jesus nia sorin, no Jesus hadomi nia. 24 Tan neʼe, Simão Pedro halo sinál ba dixípulu neʼe no dehan ba nia: “Fó-hatene ami, nia koʼalia kona-ba sé.” 25 Nuneʼe dixípulu neʼe sadere besik liu ba Jesus no dehan: “Naʼi, sé mak ema neʼe?” 26 Ho ida-neʼe, Jesus dehan: “Nia mak ida neʼebé haʼu sei fó paun neʼebé haʼu habokon iha bikan laran.” Tuirmai, nia habokon paun no fó ba Judas, Simão Iscariotes nia oan. 27 Kuandu Judas simu tiha paun neʼe, Satanás tama iha nia. Tan neʼe, Jesus dehan ba nia: “Buat neʼebé ó halo, halo ida-neʼe bá ho lalais.” 28 Maibé, la iha ema ida neʼebé tuur iha meza neʼe hatene tansá mak Jesus koʼalia hanesan neʼe ba nia. 29 Tuir loloos, tanba Judas mak kaer kaixa osan nian, sira balu hanoin katak Jesus dehan ba nia: “Sosa buat neʼebé presiza ba festa”, ka nia tenke fó buat ruma ba ema kiak sira. 30 Tan neʼe, kuandu Judas simu tiha paun, nia sai kedas. No rai kalan ona.

31 Kuandu nia sai ona, Jesus dehan: “Agora Oan-Mane husi ema simu ona glória, no Maromak hetan glória tanba Oan-Mane. 32 No Maromak rasik sei fó glória ba nia, no besik ona ba Maromak atu fó glória ba nia. 33 Oan doben sira, tempu uitoan deʼit ona atu haʼu hamutuk ho imi. Imi sei buka haʼu; no hanesan haʼu fó-hatene ona ba ema judeu sira, agora haʼu mós dehan ba imi: ‘Iha fatin neʼebé haʼu bá, imi la bele bá.’ 34 Haʼu fó ba imi ukun-fuan foun ida, katak imi hadomi malu; hanesan haʼu hadomi ona imi, atu imi mós hadomi malu. 35 Ho ida-neʼe mak ema hotu sei hatene katak imi haʼu-nia dixípulu sira, se imi iha domin ba malu.”

36 Simão Pedro dehan ba nia: “Naʼi, Ita atu bá neʼebé?” Jesus hatán: “Fatin neʼebé haʼu bá, agora ó la bele bá, maibé depois neʼe mak ó sei tuir.” 37 Pedro hatete ba nia: “Naʼi, tansá mak agora haʼu la bele laʼo tuir Ita? Haʼu prontu atu fó haʼu-nia moris tanba Ita.” 38 Jesus hatán: “Ó prontu duni atu fó ó-nia moris* tanba haʼu ka? Tebes haʼu hatete loloos ba ó: Antes manu kokoreek ó sei nega haʼu ba dala tolu.”

14 “Keta husik imi-nia laran sai susar. Hatudu fiar ba Maromak, no hatudu fiar mós ba haʼu. 2 Iha haʼu-nia Aman nia uma iha fatin barak atu hela. Se lae karik, haʼu sei la dehan neʼe ba imi. Maibé agora haʼu bá atu prepara fatin ba imi. 3 No mós, se haʼu bá no prepara fatin ba imi, haʼu sei mai fali no lori imi ba haʼu-nia fatin, atu nuneʼe iha fatin neʼebé haʼu hela, imi mós sei hela bá. 4 No fatin neʼebé haʼu bá, imi hatene nia dalan.”

5 Tomé hatete ba nia: “Naʼi, ami la hatene Ita atu bá neʼebé. Entaun, oinsá mak ami hatene dalan?”

6 Jesus hatete ba nia: “Haʼu mak dalan no lia-loos no moris. Ema ida la bele hakbesik Aman se nia la liu husi haʼu. 7 Se imi hatene ona haʼu, imi hatene ona mós Aman; hahú husi ohin ba oin imi hatene nia no haree ona nia.”

8 Filipe hatete ba nia: “Naʼi, hatudu Aman mai ami, no neʼe toʼo ona ba ami.”

9 Jesus hatete ba nia: “Haʼu hamutuk ho imi ba tempu kleur ona, entaun Filipe, tansá mak ó seidauk hatene haʼu? Ema neʼebé haree ona haʼu, haree ona mós Aman. Nuneʼe, tansá mak ó dehan: ‘Hatudu Aman mai ami’? 10 Imi la fiar katak haʼu ida deʼit ho Aman no Aman ida deʼit ho haʼu ka? Buat neʼebé haʼu koʼalia ba imi, haʼu la koʼalia tuir deʼit haʼu-nia hanoin; maibé Aman neʼebé ida deʼit nafatin ho haʼu mak halo serbisu sira-neʼe. 11 Fiar haʼu bá katak haʼu ida deʼit ho Aman no Aman ida deʼit ho haʼu; se lae karik, fiar bá tanba haʼu-nia serbisu sira. 12 Tebes haʼu hatete loloos ba imi: Ema neʼebé hatudu fiar mai haʼu, ema neʼe sei halo serbisu neʼebé haʼu halo; no nia sei halo serbisu neʼebé boot liu fali sira-neʼe, tanba haʼu atu laʼo ba Aman. 13 No mós, buat naran deʼit neʼebé imi husu hodi haʼu-nia naran, haʼu sei halo ida-neʼe, atu nuneʼe Aman bele hetan glória liuhusi Oan-Mane. 14 Se imi husu buat naran deʼit hodi haʼu-nia naran, haʼu sei halo ida-neʼe.

15 “Se imi hadomi haʼu, imi sei halo tuir haʼu-nia ukun-fuan sira; 16 no haʼu sei husu ba Aman no nia sei fó ajuda-naʼin* seluk atu hamutuk ho imi ba nafatin. 17 Ajuda-naʼin neʼe mak espíritu santu neʼebé hatudu sai lia-loos. Mundu la simu ida-neʼe, tanba mundu la bele haree no la hatene espíritu neʼe. Maibé imi hatene, tanba espíritu neʼe hamutuk ho imi no espíritu neʼe iha imi. 18 Haʼu sei la husik imi sai oan-kiak. Haʼu sei fila fali ba imi. 19 Lakleur tan mundu sei la haree haʼu, maibé imi sei haree haʼu, tanba haʼu moris no imi sei moris. 20 Iha loron neʼebá imi sei hatene katak haʼu ida deʼit ho Aman no imi ida deʼit ho haʼu no haʼu ida deʼit ho imi. 21 Ema neʼebé hatene haʼu-nia ukun-fuan no halo tuir sira, ema neʼe mak hadomi haʼu. No ema neʼebé hadomi haʼu, haʼu-nia Aman mós sei hadomi nia, no haʼu sei hadomi nia, no haʼu sei halo nia hatene didiʼak kona-ba haʼu.”

22 Judas, neʼebé laʼós Iscariotes, dehan ba nia: “Naʼi, tansá mak Ita-Boot hakarak atu halo ami hatene didiʼak kona-ba Ita maibé la halo ida-neʼe ba mundu?”

23 Jesus dehan ba nia: “Se ema ida hadomi haʼu, nia sei halo tuir haʼu-nia liafuan, no haʼu-nia Aman sei hadomi nia, no ami sei mai hasoru nia no nia sei hela hamutuk ho ami. 24 Ema neʼebé la hadomi haʼu la halo tuir haʼu-nia liafuan sira; no liafuan neʼebé imi rona laʼós haʼu-nian, maibé neʼe mak liafuan husi Aman neʼebé haruka haʼu mai.

25 “Kuandu haʼu hamutuk ho imi, haʼu koʼalia buat sira-neʼe ba imi. 26 Maibé ajuda-naʼin neʼe, katak espíritu santu* neʼebé Aman sei haruka ba imi hodi haʼu-nia naran, espíritu neʼe sei hanorin imi buat hotu no halo imi hanoin-hetan fali buat hotu neʼebé haʼu hatete ona ba imi. 27 Haʼu husik dame ba imi. Haʼu fó haʼu-nia dame ba imi. Dame neʼebé haʼu fó ba imi la hanesan ho dame neʼebé mundu fó. Keta husik imi-nia laran sai triste no keta husik imi-nia laran sai taʼuk. 28 Imi rona katak haʼu dehan ba imi, Haʼu sei bá no haʼu sei fila fali ba imi. Se imi hadomi haʼu, imi sei haksolok tanba haʼu laʼo ba Aman, basá Aman mak boot liu haʼu. 29 No agora haʼu fó-hatene ona ba imi antes ida-neʼe mosu, atu nuneʼe, kuandu neʼe mosu, imi bele fiar. 30 Haʼu sei la koʼalia buat barak tan ba imi, tanba ukun-naʼin mundu neʼe nian mai daudaun. No nia la iha kbiit atu kontrola haʼu. 31 Maibé atu mundu hatene katak haʼu hadomi Aman, haʼu halo tuir buat neʼebé Aman haruka haʼu atu halo. Hamriik no mai ita sai husi neʼe.

15 “Haʼu mak uvas-hun neʼebé loos, no haʼu-nia Aman mak toʼos-naʼin. 2 Ai-sanak hotu husi haʼu neʼebé la fó fuan nia tesi tiha, no sanak sira neʼebé fó fuan nia hamoos, atu nuneʼe fó fuan barak tan. 3 Imi sai moos ona tanba liafuan neʼebé haʼu koʼalia ba imi. 4 Hela nafatin hamutuk ho haʼu, no haʼu hamutuk ho imi. Basá hanesan uvas-sanak la bele fó fuan se nia la hamutuk ho uvas-hun, nuneʼe mós se imi la hamutuk ho haʼu, imi sei la fó fuan. 5 Haʼu mak uvas-hun, no imi mak sanak sira. Ema neʼebé hela nafatin hamutuk ho haʼu, no haʼu hamutuk ho nia, ema neʼe fó fuan barak, tanba se imi ketak husi haʼu imi la bele halo buat ida. 6 Se ema ruma la hela nafatin hamutuk ho haʼu, nia hanesan ai-sanak neʼebé tesi tiha no sai maran; no ema sei halibur ai-sanak sira-neʼe no soe ba ahi hodi sunu tiha. 7 Se imi nafatin hamutuk ho haʼu no haʼu-nia liafuan nafatin ho imi, husu buat naran deʼit neʼebé imi hakarak no ida-neʼe sei fó ba imi. 8 Haʼu-nia Aman hetan glória ho ida-neʼe, katak imi kontinua fó fuan barak no hatudu imi-nia an nuʼudar haʼu-nia dixípulu sira. 9 Hanesan Aman hadomi haʼu no haʼu hadomi imi, nuneʼe hela nafatin iha haʼu-nia domin bá. 10 Se imi halo tuir haʼu-nia ukun-fuan, imi sei hela nafatin iha haʼu-nia domin, hanesan haʼu mós halo tuir Aman nia ukun-fuan, no hela nafatin iha nia domin.

11 “Haʼu koʼalia buat sira-neʼe ba imi, atu haʼu-nia ksolok bele hela ho imi no imi-nia ksolok bele sai nakonu. 12 Haʼu-nia ukun-fuan mak neʼe, atu imi hadomi malu hanesan haʼu hadomi imi. 13 La iha ema ida iha domin boot liu fali ema neʼebé fó nia moris* ba ninia belun sira. 14 Imi mak haʼu-nia belun sira se imi halo buat neʼebé haʼu haruka imi atu halo. 15 Haʼu la bolu tan imi nuʼudar atan sira, tanba atan la hatene saida mak nia naʼi halo. Maibé haʼu bolu imi belun sira, tanba buat hotu neʼebé haʼu rona husi Aman haʼu fó-hatene ona ba imi. 16 Laʼós imi mak hili haʼu, maibé haʼu mak hili imi atu imi kontinua fó fuan, fuan neʼebé la lakon; atu nuneʼe buat naran deʼit neʼebé imi husu ba Aman hodi haʼu-nia naran, nia sei fó ba imi.

17 “Haʼu haruka buat sira-neʼe ba imi atu nuneʼe imi bele hadomi malu. 18 Se mundu odi imi, imi hatene katak nia odi ona haʼu antes nia odi imi. 19 Se imi mundu neʼe nian, mundu sei haksolok ho buat neʼebé ninian. Maibé agora, imi laʼós mundu neʼe nian tanba haʼu hili ona imi husi mundu neʼe. Tan neʼe mak mundu odi imi. 20 Hanoin-hetan bá liafuan neʼebé haʼu hatete ba imi: Atan ida la boot liu fali nia naʼi. Se sira fó-terus ona ba haʼu, sira mós sei fó-terus ba imi; se sira halo tuir ona haʼu-nia liafuan, sira mós sei halo tuir imi-nia liafuan. 21 Maibé sira sei halo buat hotu neʼe ba imi tanba haʼu-nia naran, basá sira la hatene ida neʼebé haruka haʼu mai. 22 Se haʼu seidauk mai atu koʼalia ba sira, sira la iha sala; maibé agora sira la bele nega sira-nia sala. 23 Ema neʼebé odi haʼu, odi mós haʼu-nia Aman. 24 Se haʼu seidauk halo milagre sira iha sira-nia leet, milagre neʼebé ema seluk seidauk halo, sira la iha sala; maibé agora sira haree ona no sira odi haʼu no mós odi Aman. 25 Maibé ida-neʼe mosu atu kumpre liafuan neʼebé hakerek ona iha sira-nia Ukun-Fuan neʼebé dehan: ‘Sira odi haʼu la ho razaun.’ 26 Haʼu sei haruka ajuda-naʼin ida ba imi husi Aman, neʼe mak espíritu neʼebé hatudu sai lia-loos, no neʼebé mai husi Aman. Kuandu ajuda-naʼin neʼe mai, ida-neʼe sei fó sasin kona-ba haʼu; 27 no kona-ba imi, imi tenke fó sasin kona-ba haʼu, tanba imi hamutuk ona ho haʼu kuandu haʼu hahú haʼu-nia serbisu.

16 “Haʼu fó-hatene ona buat sira-neʼe ba imi atu nuneʼe imi labele sidi. 2 Ema sei hasai imi husi sinagoga. No tuir loloos, oras sei toʼo mai kuandu ema hotu neʼebé oho imi hanoin katak sira halo serbisu santu ba Maromak. 3 Maibé sira sei halo buat sira-neʼe tanba sira la hatene Aman no haʼu. 4 Haʼu koʼalia buat sira-neʼe ba imi atu nuneʼe kuandu oras ba buat sira-neʼe toʼo mai, imi bele hanoin-hetan katak haʼu fó-hatene ona ba imi kona-ba neʼe.

“Uluk haʼu la fó-hatene buat sira-neʼe ba imi tanba haʼu sei hamutuk ho imi. 5 Maibé agora haʼu sei laʼo ba ida neʼebé haruka haʼu mai, maski nuneʼe imi ida mós la husu haʼu: ‘Ita atu bá neʼebé?’ 6 Maibé tanba haʼu koʼalia buat sira-neʼe ba imi, ida-neʼe halo imi-nia laran sai triste tebes. 7 Maski nuneʼe, haʼu koʼalia lia-loos ba imi: Haʼu bá tanba imi-nia diʼak. Basá se haʼu la bá, haʼu sei la haruka ajuda-naʼin ba imi; maibé se haʼu bá, haʼu sei haruka ida-neʼe ba imi. 8 No kuandu ajuda-naʼin neʼe mai, nia sei hatudu sai momoos mundu nia sala. No ajuda-naʼin neʼe sei hatudu sai kona-ba buat loos no kona-ba tesi-lia: 9 Ulukliu nia sei hatudu sai momoos mundu nia sala, tanba mundu la hatudu fiar ba haʼu; 10 tuirmai hatudu sai buat loos, tanba haʼu laʼo ba Aman no imi sei la haree tan haʼu; 11 depois neʼe kona-ba tesi-lia, basá ukun-naʼin mundu neʼe nian hetan ona tesi-lia.

12 “Iha buat barak tan neʼebé haʼu atu fó sai ba imi, maibé agora imi seidauk bele komprende hotu. 13 Maibé kuandu imi simu ajuda-naʼin neʼe, katak espíritu santu neʼebé hatudu sai lia-loos, nia sei hanorin imi kona-ba lia-loos hotu, basá nia sei koʼalia laʼós ho nia hakarak rasik, maibé nia koʼalia buat neʼebé nia rona, no nia sei fó sai ba imi buat neʼebé atu mai. 14 Nia sei fó glória ba haʼu, tanba nia simu buat neʼebé haʼu-nian no sei fó sai ida-neʼe ba imi. 15 Buat hotu neʼebé Aman iha mak haʼu-nian. Tan neʼe mak haʼu dehan katak buat neʼebé espíritu simu mak haʼu-nian no nia fó sai neʼe ba imi. 16 Lakleur tan imi sei la haree ona haʼu, no mós lakleur tan imi sei haree fali haʼu.”

17 Tan neʼe, ninia dixípulu balu husu ba malu: “Ninia liafuan neʼe katak sá hodi dehan: ‘Lakleur tan imi sei la haree ona haʼu, no mós lakleur tan imi sei haree fali haʼu’, no, ‘tanba haʼu laʼo ba Aman’?” 18 Nuneʼe sira hatete: “Tansá mak nia dehan: ‘lakleur tan’? Ita la komprende nia koʼalia kona-ba saida.” 19 Jesus hatene katak sira hakarak atu husu ba nia, entaun nia dehan ba sira: “Imi husu ba malu tanba haʼu dehan: Lakleur tan imi sei la haree ona haʼu, no mós lakleur tan imi sei haree fali haʼu? 20 Tebes haʼu hatete loloos ba imi: Imi sei tanis no lelir, no mundu sei haksolok. Imi sei triste, maibé imi-nia triste sei sai fali ksolok. 21 Kuandu feto ida tuur ahi, nia sente moras, tanba ninia oras toʼo ona; maibé kuandu nia tuur ahi ona, nia sei la hanoin-hetan tan ninia moras tanba nia sente haksolok katak ema ida moris ona iha mundu. 22 Nuneʼe, agora imi mós laran-triste; maibé haʼu sei haree fali imi no imi-nia laran sei sente haksolok, no la iha ema ida sei hasai imi-nia ksolok husi imi. 23 Iha tempu neʼebá imi sei la husu tan pergunta ida ba haʼu. Tebes haʼu hatete loloos ba imi: Se imi husu buat naran deʼit ba Aman, nia sei fó ba imi hodi haʼu-nia naran. 24 Toʼo agora imi seidauk husu buat ida hodi haʼu-nia naran. Husu bá no imi sei simu, atu nuneʼe imi-nia ksolok bele sai kompletu.

25 “Haʼu koʼalia ona buat sira-neʼe ba imi ho ai-knanoik. Maski nuneʼe oras sei toʼo mai bainhira haʼu sei la koʼalia tan ba imi ho ai-knanoik, maibé haʼu sei fó-hatene momoos ba imi kona-ba Aman. 26 Iha loron neʼe imi sei husu ba Aman hodi haʼu-nia naran; maibé haʼu la dehan katak haʼu mak sei husu ba Aman kona-ba imi. 27 Tanba Aman rasik hadomi imi, basá imi hadomi ona haʼu no fiar ona katak haʼu mai hodi reprezenta Aman. 28 Haʼu mai husi Aman no mai toʼo mundu neʼe. Agora haʼu sei husik hela mundu no haʼu sei laʼo ba Aman.”

29 Ninia dixípulu sira dehan: “Haree! Agora Ita koʼalia ho momoos, no Ita la uza ai-knanoik. 30 Agora ami hatene katak Ita la presiza atu ema ida husu pergunta ba Ita, tanba Ita hatene buat hotu. Ho ida-neʼe ami fiar katak Ita mai husi Maromak.” 31 Jesus dehan ba sira: “Agora imi fiar ona ka? 32 Haree! Oras sei mai, no tuir loloos, oras toʼo ona, kuandu imi ida-idak sei namkari ba nia uma rasik, no imi sei husik haʼu mesak; maibé haʼu la mesak, tanba Aman ho haʼu. 33 Haʼu dehan ona buat sira-neʼe ba imi atu liuhusi haʼu imi bele hetan dame. Iha mundu imi hasoru susar, maibé aten-brani bá! Basá haʼu manán tiha ona mundu.”

17 Depois Jesus koʼalia tiha buat sira-neʼe, nia foti nia matan ba lalehan no dehan: “Aman, oras toʼo ona; fó glória ba Ita-nia oan-mane atu nuneʼe Ita-nia oan mós bele fó glória ba Ita. 2 Ita fó ona ba nia kbiit atu ukun ema hotu atu nuneʼe nia bele fó moris rohan-laek ba sira hotu neʼebé Ita fó ona ba nia. 3 Neʼe mak moris rohan-laek: Katak sira hatene didiʼak Ita, Maromak loos mesak deʼit, no ida neʼebé Ita haruka mai, Jesus Kristu. 4 Haʼu fó ona glória ba Ita iha rai neʼe, hodi halo hotu serbisu neʼebé Ita fó mai haʼu atu halo. 5 Agora Aman, fó glória ba haʼu iha Ita-nia sorin ho glória neʼebé haʼu iha ona antes mundu iha.

6 “No ema sira neʼebé Ita fó mai haʼu husi mundu neʼe, haʼu halo sira hatene kona-ba Ita-nia naran. Sira mak Ita-nian, no Ita fó sira ba haʼu, no sira halo tuir ona Ita-nia liafuan. 7 Agora sira hatene ona katak buat naran deʼit neʼebé Ita fó mai haʼu mak mai husi Ita; 8 basá liafuan sira neʼebé Ita fó mai haʼu, haʼu fó ona ba sira, no sira simu ida-neʼe no sira hatene ona katak haʼu mai hodi reprezenta Ita, no sira fiar katak Ita mak haruka haʼu mai. 9 Haʼu harohan kona-ba sira; haʼu la harohan kona-ba mundu neʼe, maibé kona-ba sira neʼebé Ita fó ona mai haʼu; basá sira mak Ita-nian, 10 no buat hotu neʼebé haʼu-nian mak Ita-nian no Ita-nian mak haʼu-nian, no haʼu hetan glória iha sira-nia leet.

11 “No mós, haʼu sei husik hela mundu neʼe, maibé sira sei iha mundu neʼe no haʼu sei laʼo ba Ita. Aman Santu, tau matan ba sira tanba Ita-nia naran neʼebé Ita fó ona mai haʼu, atu nuneʼe sira bele sai ida deʼit hanesan haʼu no Ita. 12 Kuandu haʼu hamutuk hela ho sira, haʼu sempre tau matan ba sira tanba Ita-nia naran neʼebé Ita fó ona mai haʼu; no haʼu proteje ona sira, no la iha ida mak lakon, só deʼit ida, nia mak ida neʼebé sei halakon tiha, atu nuneʼe eskritura bele sai loos. 13 Maibé agora haʼu sei laʼo ba Ita, no haʼu koʼalia buat sira-neʼe iha mundu atu nuneʼe sira bele sente duni haʼu-nia ksolok. 14 Haʼu fó ona Ita-nia liafuan ba sira, maibé mundu odi sira, tanba sira laʼós parte husi mundu neʼe, hanesan mós haʼu laʼós parte husi mundu neʼe.

15 “Haʼu husu Ita laʼós atu hasai sira husi mundu, maibé atu tau matan ba sira tanba ida neʼebé bolu nuʼudar aat-naʼin. 16 Sira laʼós parte husi mundu neʼe, hanesan haʼu mós laʼós parte husi mundu neʼe. 17 Halo sira santu ho lia-loos; Ita-nia liafuan mak lia-loos. 18 Hanesan Ita haruka haʼu ba mundu, haʼu mós haruka sira ba mundu. 19 Haʼu halo haʼu-nia an santu nafatin tanba sira, atu nuneʼe sira bele sai santu ho lia-loos.

20 “Haʼu husu Ita, laʼós deʼit kona-ba sira-neʼe, maibé mós kona-ba sira neʼebé sei tau fiar mai haʼu liuhusi sira-nia liafuan; 21 atu nuneʼe sira hotu bele sai ida deʼit, hanesan Ita, Aman, Ita ida deʼit ho haʼu no haʼu ida deʼit ho Ita, atu sira mós bele sai ida deʼit ho ita naʼin-rua, hodi nuneʼe mundu bele fiar katak Ita mak haruka haʼu mai. 22 No mós, haʼu fó tiha ona ba sira glória neʼebé Ita fó mai haʼu, atu nuneʼe sira bele sai ida deʼit hanesan Ita no haʼu ida deʼit. 23 Haʼu ida deʼit ho sira no Ita ida deʼit ho haʼu, atu nuneʼe sira bele sai kompletu nuʼudar ida deʼit, hodi mundu neʼe bele hatene katak Ita mak haruka haʼu mai no katak Ita hadomi sira hanesan Ita hadomi ona haʼu. 24 Aman, haʼu hakarak atu sira neʼebé Ita fó ona mai haʼu mós hamutuk ho haʼu iha fatin neʼebé haʼu hela, atu nuneʼe sira bele haree haʼu-nia glória neʼebé Ita fó ona mai haʼu, tanba Ita hadomi haʼu antes mundu neʼe hahú.* 25 Aman, Ita-nia hahalok sempre loos, no loloos mundu la hatene Ita; maibé haʼu hatene ona Ita, no sira-neʼe hatene ona katak Ita mak haruka haʼu mai. 26 No haʼu fó sai tiha ona Ita-nia naran ba sira no sei kontinua fó sai ida-neʼe, atu nuneʼe domin neʼebé Ita hatudu mai haʼu bele hamutuk ho sira no haʼu hamutuk ho sira.”

18 Koʼalia tiha buat sira-neʼe, Jesus sai ho ninia dixípulu sira hodi laʼo ba foho-leet Sedrom nia sorin bá; iha neʼebá iha jardín ida, no nia tama ba jardín neʼe hamutuk ho nia dixípulu sira. 2 Judas, ida neʼebé entrega nia ba inimigu, mós hatene fatin neʼe tanba Jesus sempre halibur ho ninia dixípulu sira iha neʼebá. 3 Tan neʼe, Judas lori soldadu lubun no guarda husi ulun-naʼin amlulik sira no mós ema farizeu sira, no sira mai ho ahi-oan no kroʼat. 4 Jesus hatene buat hotu neʼebé sei mosu ba nia, nuneʼe nia hakat ba oin no dehan ba sira: “Imi buka sé?” 5 Sira hatán ba nia: “Jesus Nazaré.” Nia dehan ba sira: “Haʼu mak neʼe.” No Judas, ida neʼebé sai traidór mós hamriik hamutuk sira.

6 Maibé, kuandu nia dehan ba sira: “Haʼu mak neʼe”, sira hakiduk ba kotuk no monu ba rai. 7 Tan neʼe, nia husu tan ba sira: “Imi buka sé?” Sira dehan: “Jesus Nazaré.” 8 Jesus hatete ba sira: “Haʼu dehan ona ba imi, haʼu mak neʼe. No se haʼu mak imi buka, entaun husik sira-neʼe bá.” 9 Ninia liafuan neʼe kumpre buat neʼebé nia dehan: “Husi sira neʼebé Ita fó ona mai haʼu, sira ida mós la lakon.”

10 Tuirmai, Simão Pedro losu surik neʼebé nia kaer hela no ataka amlulik boot nia atan ida no sabir tiha nia tilun sorin loos. Atan neʼe naran Malko. 11 Maibé Jesus dehan ba Pedro: “Hatama fali surik neʼe iha nia fatin. Kopu neʼebé Aman fó ona mai haʼu, haʼu tenke hemu ida-neʼe, loos ka lae?”

12 Tuirmai, soldadu lubun neʼe no komandante tropa nian no mós guarda judeu sira-nian kaer no kesi Jesus, 13 no sira lori nia uluk ba Anas; tanba Anas mak Caifás nia banin-mane. Iha tinan neʼebá Caifás mak serbí nuʼudar amlulik boot. 14 Loloos Caifás mak ida neʼebé fó konsellu ba ema judeu sira katak diʼak liu atu mane ida mak mate ba povu.

15 Simão Pedro no mós dixípulu ida tan laʼo tuir Jesus. Amlulik boot hatene dixípulu seluk neʼe, nuneʼe nia tama ho Jesus iha amlulik boot nia uma laran, 16 maibé Pedro hamriik deʼit iha odamatan liʼur. Tan neʼe, dixípulu seluk neʼebé amlulik boot hatene, sai mai no koʼalia ho ema neʼebé hein odamatan no lori Pedro tama. 17 Tuirmai, atan-feto neʼebé hein odamatan dehan ba Pedro: “Ó mós ema neʼe nia dixípulu ida, loos ka lae?” Nia hatán: “Haʼu lae.” 18 Iha tempu neʼe, atan sira no guarda sira hamriik hela iha neʼebá. No tanba malirin tebes, nuneʼe sira halo lakan ahi, no sira haneruk daudaun. Pedro mós hamriik ho sira hodi haneruk ahi.

19 No ulun-naʼin amlulik husu Jesus kona-ba ninia dixípulu sira no mós kona-ba ninia hanorin. 20 Jesus dehan ba nia: “Haʼu koʼalia iha ema hotu nia oin. Haʼu sempre hanorin iha sinagoga no iha templu, iha neʼebé ema judeu hotu halibur hamutuk; haʼu la koʼalia buat ida subasubar. 21 Tansá Ita-Boot husu haʼu? Husu ba sira neʼebé rona kuandu haʼu koʼalia. Sira hatene saida mak haʼu dehan.” 22 Kuandu Jesus koʼalia tiha buat sira-neʼe, guarda ida neʼebé hamriik besik basa nia oin no dehan: “Neʼe mak dalan ó koʼalia ba ulun-naʼin amlulik nian ka?” 23 Jesus dehan ba nia: “Se haʼu koʼalia sala, fó sai sala neʼe ba haʼu; maibé se haʼu loos, tansá mak Ita baku haʼu?” 24 Tuirmai Anas haruka sira atu lori Jesus neʼebé sei kesi hela, hodi bá amlulik boot Caifás.

25 No Simão Pedro sei hamriik hela hodi haneruk ahi. Tuirmai sira dehan ba nia: “Ó mós nia dixípulu ida, loos ka lae?” Pedro nega no dehan: “Haʼu lae.” 26 Amlulik boot nia atan ida, neʼebé sei família hela ho ema neʼebé Pedro sabir nia tilun, dehan: “Haʼu haree ó hamutuk ho nia iha jardín, loos ka lae?” 27 Maibé, Pedro nega dala ida tan; no iha oras neʼe kedas manu ida kokoreek.

28 Tuirmai sira lori sai Jesus husi Caifás nia uma hodi bá governadór nia palásiu. Tempu neʼe mak dadeer ona. Maibé sira rasik la tama ba governadór nia palásiu, atu nuneʼe sira labele sai foʼer hodi bele han ai-han Festa Salvasaun nian. 29 Tan neʼe Pilatos sai ba liʼur hodi hasoru sira no dehan: “Ema neʼe halo hahalok aat saida hodi imi duun nia?” 30 Sira hatán: “Se mane neʼe laʼós ema aat, ami sei la lori nia ba Ita.” 31 Tan neʼe Pilatos dehan ba sira: “Imi rasik mak lori nia bá no tesi lia ba nia tuir imi-nia ukun-fuan.” Ema judeu sira dehan: “Tuir lei ami labele oho ema ida.” 32 Ida-neʼe atu kumpre liafuan neʼebé Jesus fó sai hodi hatudu kona-ba dalan oinsá mak nia sei mate.

33 Entaun, Pilatos tama fali ba governadór nia palásiu no bolu Jesus hodi dehan ba nia: “Ó mak liurai judeu sira-nian ka?” 34 Jesus hatán: “Ita koʼalia ida-neʼe husi Ita-nia hanoin rasik, ka ema seluk mak fó-hatene Ita kona-ba neʼe?” 35 Pilatos dehan: “Haʼu laʼós ema judeu, loos ka lae? Ó-nia nasaun rasik no ulun-naʼin amlulik sira mak lori ó mai haʼu. Entaun, saida mak ó halo?” 36 Jesus hatán: “Haʼu-nia ukun laʼós parte husi mundu neʼe. Se haʼu-nia ukun mak parte husi mundu neʼe, haʼu-nia atan sira sei halo funu atu nuneʼe ema judeu sira labele kaer haʼu. Maibé loloos, haʼu-nia ukun laʼós husi mundu neʼe.” 37 Tan neʼe Pilatos dehan ba nia: “Se nuneʼe, ó mak liurai ida ka?” Jesus hatán: “Ita rasik mak dehan katak haʼu liurai ida. Tan ida-neʼe mak haʼu moris mai, no tan ida-neʼe mak haʼu mai iha mundu, atu haʼu fó sasin kona-ba lia-loos. Ema hotu neʼebé halo tuir lia-loos rona haʼu-nia lian.” 38 Pilatos husu ba nia: “Saida mak lia-loos?”

Koʼalia tiha ida-neʼe, Pilatos sai fali ba liʼur hodi hasoru ema judeu sira no dehan ba sira: “Haʼu la hetan sala ida iha ema neʼe. 39 Liután neʼe, imi iha toman katak haʼu tenke husik ema ida ba imi iha tempu Festa Salvasaun nian. Entaun, imi hakarak haʼu husik livre liurai judeu sira-nian ba imi ka?” 40 Ho ida-neʼe, sira hakilar fali hodi dehan: “Laʼós ema neʼe, maibé Barrabas!” No Barrabas neʼe mak ema naʼok-teen ida.

19 Entaun, Pilatos haruka soldadu sira atu lori Jesus no baku ho xikote. 2 No soldadu sira bobar ai-tarak hodi halo koroa ida no sira tau iha nia ulun, no sira mós tau hena kór-uvas ba nia; 3 no sira hakbesik ba nia no dehan: “Dame hela ho Ita-Boot, Liurai judeu sira-nian!” No sira mós basa nia oin. 4 No Pilatos sai fali ba liʼur hodi dehan ba sira: “Haree! Haʼu lori sai nia mai liʼur atu nuneʼe imi bele hatene katak haʼu la hetan sala ida iha nia.” 5 Ho ida-neʼe, Jesus sai mai liʼur ho koroa ai-tarak iha nia ulun no hatais hena kór-uvas. No Pilatos dehan ba sira: “Haree! Nia mak neʼe!” 6 Maibé, kuandu ulun-naʼin amlulik sira no guarda sira haree nia, sira hakilar dehan: “Hedi nia! Hedi nia!” Pilatos hatete ba sira: “Imi rasik mak lori nia bá no hedi, tanba haʼu la hetan sala ida iha nia.” 7 Ema judeu sira hatán: “Ami iha ukun-fuan ida, no tuir ukun-fuan neʼe nia tenke mate tanba nia halo nia an nuʼudar Maromak nia oan.”

8 No kuandu Pilatos rona buat neʼebé sira dehan, nia sai taʼuk liután; 9 no nia tama fali ba governadór nia palásiu no husu ba Jesus: “Ó mai husi neʼebé?” Maibé Jesus la hatán buat ida ba nia. 10 Tan neʼe Pilatos dehan: “Ó la hatán buat ida ba haʼu ka? Ó la hatene katak haʼu iha kbiit atu halo ó livre no haʼu mós iha kbiit atu hedi ó?” 11 Jesus dehan ba nia: “Se Ita-Boot la simu kbiit husi leten, Ita la iha kbiit atu halo buat ruma kontra haʼu. Tan neʼe, ema neʼebé entrega haʼu ba Ita-nia liman, nia mak iha sala boot liu fali Ita.”

12 Ho ida-neʼe Pilatos kontinua buka dalan atu husik nia livre. Maibé ema judeu sira hakilar dehan: “Se Ita husik mane neʼe livre, Ita laʼós Liurai Roma* nia belun. Ema naran deʼit neʼebé halo nia an nuʼudar liurai ida, nia koʼalia kontra Liurai Roma nian.” 13 No rona tiha ida-neʼe, Pilatos lori Jesus sai ba liʼur, no Pilatos tuur iha kadeira tesi-lia nian iha fatin neʼebé bolu nuʼudar Fatin Fatuk nian* no iha lia-ebraiku bolu nuʼudar Gabata. 14 Iha tempu neʼe mak loron atu prepara ba Festa Salvasaun nian; no oras neʼe maizumenus tuku sanulu-resin-rua meiudia. Pilatos dehan ba ema judeu sira: “Haree bá! Imi-nia liurai mak neʼe!” 15 Maibé, sira hakilar dehan: “Lori nia bá! Lori nia bá! Hedi nia!” Pilatos hatete ba sira: “Haʼu tenke hedi imi-nia liurai ka?” Ulun-naʼin amlulik sira hatán: “Ami la iha liurai seluk só deʼit Liurai Roma nian.” 16 Neʼe duni, Pilatos fó nia ba sira no sira lori nia bá atu hedi.

Tuirmai sira lori Jesus bá. 17 No Jesus lori nia ai-riin terus nian, no sai hodi bá fatin ida neʼebé bolu nuʼudar Fatin Ulun-Ruin nian, iha lia-ebraiku bolu nuʼudar Gólgota; 18 no sira hedi nia iha neʼebá, no sira mós tau ema naʼin-rua ho nia, ida iha sorin loos no ida iha sorin karuk, no Jesus iha klaran. 19 Pilatos hakerek liafuan iha ai-kabelak ida no tau iha ai-riin terus nian. Liafuan neʼe dehan: “Jesus Nazaré, Liurai judeu sira-nian.” 20 No tanba fatin neʼebé ema hedi Jesus mak besik sidade, entaun ema judeu barak lee liafuan sira-neʼe; no liafuan sira-neʼe hakerek iha lia-ebraiku, latín no gregu. 21 Tan neʼe, ema judeu sira-nia ulun-naʼin amlulik nian hahú dehan ba Pilatos: “Keta hakerek ‘Liurai judeu sira-nian’, maibé hakerek katak mane neʼe dehan: ‘Haʼu mak Liurai judeu sira-nian.’” 22 Pilatos hatán: “Buat neʼebé haʼu hakerek, haʼu hakerek ona!”

23 No kuandu soldadu sira hedi tiha Jesus, sira foti ninia unuk neʼebé nia uza iha liʼur no fahe ba haat, ida ba soldadu ida. Sira mós foti ninia unuk neʼebé nia uza iha laran. No unuk neʼe la suku hamutuk, maibé ema soru tomak deʼit husi leten toʼo okos. 24 Ho ida-neʼe sira dehan ba malu: “Keta lees fahe unuk neʼe, maibé mai ita dada sorte atu hatene sé mak sei hetan unuk neʼe.” Ida-neʼe mosu hodi kumpre eskritura neʼebé dehan: “Sira fahe haʼu-nia unuk liʼur, no kona-ba haʼu-nia unuk laran sira dada sorte.” No buat neʼebé soldadu sira halo mak tuir duni buat neʼebé eskritura dehan.

25 No Jesus nia inan, no nia inan nia alin, no Maria neʼebé Klopas nia feen, no mós Maria Madalena hamriik besik Jesus nia ai-riin terus nian. 26 Tan neʼe, kuandu Jesus haree ninia inan no mós dixípulu ida neʼebé nia hadomi hamriik besik, nia dehan ba ninia inan: “Feto, haree bá! Ita-nia oan!” 27 Tuirmai, nia dehan ba dixípulu neʼe: “Haree bá! Ó-nia inan!” No hahú husi tempu neʼebá dixípulu neʼe lori nia ba ninia uma rasik.

28 Depois neʼe, Jesus hatene katak toʼo agora nia halo tiha ona buat hotu neʼebé ninia Aman haruka. Tuirmai nia dehan: “Haʼu hamrook.” Nia koʼalia ida-neʼe atu bele kumpre eskritura. 29 Iha neʼebá, iha buli ida neʼebé nakonu ho tua-uvas siin. Tan neʼe sira habokon esponja iha tua-uvas siin no tau iha ai-sanak* no lolo ba nia ibun. 30 No kuandu Jesus koko tiha tua-uvas siin neʼe, nia dehan: “Buat hotu kumpre ona!” no nia hakruʼuk nia ulun no iis kotu.

31 Loron neʼe mak loron Prepara nian, no loron Sábadu neʼe mak loron-boot ida. Tan neʼe, ema judeu sira husu Pilatos atu halo tohar ema sira-neʼe nia ain no hasai tiha sira-nia mate-isin, atu nuneʼe sira-nia mate-isin labele hela nafatin iha ai-riin terus nian iha loron Sábadu. 32 Tan neʼe, soldadu sira mai hodi halo tohar ema naʼin-rua nia ain, sira neʼebé tau iha ai-riin iha Jesus nia sorin-sorin. 33 Maibé kuandu sira toʼo ba Jesus, sira haree nia mate ona, nuneʼe sira la halo tohar nia ain. 34 Maski nuneʼe, soldadu ida sona ninia sorin ho diman, no bee ho raan suli sai kedas. 35 No ema neʼebé haree ida-neʼe mak fó sasin, no ninia sasin mak loos. No ema neʼe hatene katak buat neʼebé nia koʼalia mak loos, atu nuneʼe imi mós bele fiar. 36 Tuir loloos, buat sira-neʼe mosu atu eskritura tuirmai neʼe bele sai loos: “Ninia ruin ida sei la tohar.” 37 No mós, eskritura seluk dehan: “Sira sei hateke ba Ida neʼebé sira sona ho diman.”

38 Liutiha buat sira-neʼe, José husi Arimateia, neʼebé mós Jesus nia dixípulu ida, maibé subasubar deʼit tanba taʼuk ema judeu sira, nia mai hodi husu Pilatos se nia bele foti Jesus nia mate-isin; no Pilatos fó lisensa ba nia. Tan neʼe nia bá no foti Jesus nia mate-isin. 39 No Nicodemos, ema neʼebé mai hasoru Jesus dala primeiru iha kalan, mós mai no lori buat morin rua naran mirra no ai-aloés, maizumenus kilograma tolunulu. 40 Entaun, sira foti Jesus nia mate-isin no falun ho hena diʼak hamutuk ho buat morin sira-neʼe, hodi tuir ema judeu sira-nia toman kona-ba prepara mate-isin atu hakoi. 41 No fatin neʼebé ema hedi Jesus iha jardín ida, no jardín neʼe iha rate foun ida neʼebé seidauk uza atu hakoi ema. 42 No tanba neʼe mak loron Prepara nian ba ema judeu sira, nuneʼe sira tau Jesus iha rate neʼe, basá rate neʼe mak besik liu.

20 Iha loron primeiru semana nian, kuandu rai sei nakukun hela, Maria Madalena bá sedu toʼo rate, no nia haree katak fatuk duir sai tiha ona husi rate. 2 Tan neʼe, nia halai hodi bá hasoru Simão Pedro no mós dixípulu ida seluk neʼebé Jesus hadomi, no nia dehan ba sira: “Sira foti tiha ona Naʼi husi rate, no ami la hatene sira tau nia iha neʼebé.”

3 Ho ida-neʼe, Pedro no dixípulu ida seluk sai hodi bá rate. 4 Sira naʼin-rua halai hamutuk, maibé dixípulu ida seluk halai lalais liu fali Pedro no nia toʼo uluk iha rate. 5 No kuandu nia hakruʼuk hodi hateke ba laran, nia haree hena latan hela, maibé nia la tama ba laran. 6 No Simão Pedro mós toʼo tuir nia iha fatin neʼe, no Simão tama ba rate laran no nia haree hena sira neʼebé latan hela. 7 No hena neʼebé kesi nia ulun la latan hamutuk ho hena sira seluk, maibé lulun tiha hodi tau ketak. 8 Tuirmai, dixípulu ida seluk neʼebé toʼo uluk rate mós tama ba laran, no nia haree no fiar. 9 Basá sira seidauk komprende eskritura neʼebé dehan katak nia tenke moris hiʼas husi mate. 10 Entaun dixípulu sira-neʼe fila fali ba sira-nia uma.

11 Maibé, Maria kontinua hamriik iha liʼur besik rate hodi tanis. Tuirmai, nuʼudar nia tanis hela, nia hakruʼuk hodi hateke ba rate laran, 12 no nia haree anju rua ho hatais mutin tuur hela iha fatin neʼebé uluk ema tau Jesus nia mate-isin, ida tuur iha ulun no ida tuur iha ain. 13 No sira dehan ba nia: “Feto, tansá mak ó tanis?” Nia dehan: “Sira foti tiha haʼu-nia Naʼi, no haʼu la hatene sira tau nia iha neʼebé.” 14 Koʼalia tiha buat sira-neʼe, nia fila no haree Jesus hamriik hela, maibé nia la hatene neʼe mak Jesus. 15 Jesus hatete ba nia: “Feto, tansá ó tanis? Ó buka sé?” Maria hanoin katak nia mak ema neʼebé tau matan ba jardín, tan neʼe Maria dehan: “Señór, se Ita mak foti tiha nia karik, fó-hatene mai haʼu, Ita tau nia iha neʼebé, no haʼu bele lori nia bá.” 16 Jesus hatete ba nia: “Maria!” No kuandu fila oin tiha, nia dehan ba Jesus, iha lia-ebraiku: “Raboni!” (katak “Mestre!”) 17 Jesus hatete ba nia: “Keta kaer metin haʼu. Tanba haʼu seidauk saʼe ba Aman. Maibé ó bá hasoru haʼu-nia belun sira no dehan ba sira: ‘Haʼu sei saʼe ba haʼu-nia Aman no imi-nia Aman no haʼu-nia Maromak no imi-nia Maromak.’” 18 Maria Madalena lori liafuan ba dixípulu sira hodi dehan: “Haʼu haree ona Naʼi!” No nia konta ba sira buat neʼebé Naʼi dehan.

19 Iha loron neʼe, katak loron primeiru semana nian, kuandu rai kalan ona, dixípulu sira halibur hamutuk no odamatan hotu xave tanba sira taʼuk ema judeu sira. No iha tempu neʼe Jesus mai no hamriik iha sira-nia klaran no dehan ba sira: “Dame hela ho imi.” 20 Dehan tiha ida-neʼe, nia hatudu ba sira ninia liman rua no nia sorin. Tuirmai, dixípulu sira haksolok tanba haree ona Naʼi. 21 No Jesus dehan tan ba sira: “Dame hela ho imi. Hanesan Aman haruka haʼu mai, haʼu mós sei haruka imi.” 22 Koʼalia tiha ida-neʼe, nia huu ba sira no dehan: “Simu espíritu santu bá. 23 Se imi perdua ema ida nia sala, Maromak perdua ona sira-nia sala; se imi la perdua ema ida nia sala, nia sala iha nafatin.”

24 Maibé Tomé, ida husi sira naʼin sanulu-resin-rua, neʼebé mós bolu nuʼudar Kaduak, nia la hamutuk ho sira kuandu Jesus mai. 25 Tan neʼe, dixípulu sira seluk dehan ba nia: “Ami haree ona Naʼi!” Maibé nia dehan ba sira: “Se haʼu seidauk haree pregu-fatin iha nia liman sira no haʼu seidauk hatama haʼu-nia liman-fuan iha pregu-fatin neʼe no seidauk hatama haʼu-nia liman ba nia sorin, haʼu sei la fiar duni.”

26 No loron ualu liu tiha, ninia dixípulu sira halibur hamutuk fali iha uma laran no Tomé mós hamutuk ho sira. Maski odamatan xave hela, maibé Jesus mai no hamriik iha sira-nia klaran no dehan: “Dame hela ho imi.” 27 Tuirmai Jesus dehan ba Tomé: “Tau ó-nia liman-fuan iha haʼu-nia liman, no haree haʼu-nia liman sira, no hatama ó-nia liman ba haʼu-nia sorin, no keta duvida tan, maibé fiar bá.” 28 Tomé hatán dehan: “Haʼu-nia Naʼi, no haʼu-nia Maromak!” 29 Jesus hatete ba nia: “Tanba ó haree haʼu mak ó fiar ka? Ksolok ba sira neʼebé fiar maski la haree.”

30 Tuir loloos, Jesus mós halo milagre barak tan iha dixípulu sira-nia oin, no buat sira-neʼe la hakerek iha livru neʼe. 31 Maibé kona-ba buat sira neʼebé hakerek ona, ida-neʼe atu imi bele fiar katak Jesus mak Kristu, Maromak nia Oan-Mane, no mós tanba fiar neʼe, imi bele iha moris liuhusi nia naran.

21 Liutiha buat sira-neʼe, Jesus mosu fali ba ninia dixípulu sira besik Tasi Tiberiades; nia mosu ba sira iha dalan hanesan tuirmai neʼe. 2 Simão Pedro, Tomé, neʼebé bolu nuʼudar Kaduak, Natanael husi Kaná iha Galileia, Zebedeu nia oan-mane sira, no mós dixípulu rua seluk halibur hamutuk iha neʼebá. 3 Simão Pedro dehan ba sira: “Haʼu atu bá kaer ikan.” Sira dehan ba nia: “Ami mós bá hotu ho Ita.” Nuneʼe sira bá no saʼe ró, maibé durante kalan neʼe sira la hetan ikan ida.

4 Kuandu rai naroman ona, Jesus hamriik iha tasi-ibun, maibé ninia dixípulu sira la hatene katak neʼe mak Jesus. 5 Tuirmai Jesus dehan ba sira: “Belun sira, imi iha buat ruma atu han ka lae?” Sira hatán ba nia: “La iha.” 6 Nia dehan ba sira: “Soe imi-nia rede iha ró nia sorin loos no imi sei hetan ikan.” Ho ida-neʼe sira soe sira-nia rede, no sira la bele dada sai tanba ikan barak tebes. 7 Tan neʼe dixípulu ida neʼebé Jesus hadomi dehan ba Pedro: “Neʼe mak Naʼi!” Kuandu Pedro rona ida-neʼe, nia tau fali ninia hatais, basá nia isin-tanan, no nia haksoit ba tasi laran. 8 Maibé dixípulu seluk neʼebé nafatin iha ró kiʼik laran mós sai tuir nia hodi dada rede neʼebé nakonu ho ikan, basá sira ladún dook husi rai-maran, maizumenus metru atus ida.

9 Maibé kuandu sira toʼo rai-maran, sira haree ahi-klaak ho ikan iha leten no mós paun. 10 Jesus hatete ba sira: “Lori mai ikan balu neʼebé imi foin kaer.” 11 Nuneʼe, Simão Pedro saʼe ba ró no dada rede ba tasi-ibun, rede neʼe nakonu ho ikan boot hamutuk 153. Maski iha ikan barak maibé rede neʼe la naklees. 12 Jesus hatete ba sira: “Mai, han imi-nia matabixu.” No dixípulu ida mós la brani atu husu: “Ita mak sé?” tanba sira hatene katak nia mak Naʼi. 13 Jesus mai no foti paun hodi fó ba sira, no nia mós halo hanesan ho ikan. 14 No neʼe mak dala tolu neʼebé Jesus mosu ba nia dixípulu sira depois nia moris hiʼas husi mate.

15 No kuandu sira matabixu hotu tiha, Jesus dehan ba Simão Pedro: “Simão, João nia oan, ó hadomi* haʼu liu fali sira-neʼe ka lae?” Nia hatán: “Sin, Naʼi, Ita hatene katak haʼu hadomi* Ita.” Jesus dehan ba nia: “Fó-han haʼu-nia bibi-oan sira.” 16 Ba dala segundu Jesus dehan tan ba nia: “Simão, João nia oan, ó hadomi* haʼu ka lae?” Nia hatete ba Jesus: “Sin, Naʼi, Ita hatene katak haʼu hadomi* Ita.” Jesus dehan: “Tau matan ba haʼu-nia bibi-oan sira.” 17 Ba dala terseiru Jesus dehan ba nia: “Simão, João nia oan, ó hadomi* haʼu ka lae?” Ho ida-neʼe Pedro sai triste tanba Jesus husu dala tolu ona hodi dehan: “Ó hadomi haʼu ka lae?” Entaun nia hatete ba Jesus: “Naʼi, Ita hatene buat hotu; Ita hatene katak haʼu hadomi* Ita.” Jesus dehan: “Fó-han haʼu-nia bibi-oan sira. 18 Tebes haʼu hatete loloos ba ó: Kuandu ó sei joven, ó mak hatais rasik no laʼo bá-mai tuir ó-nia hakarak. Maibé kuandu ó sai katuas ona, ó sei lolo ó-nia liman no ema seluk mak sei fó-hatais ó no lori ó ba fatin neʼebé ó lakohi.” 19 Jesus koʼalia ida-neʼe hodi hatudu oinsá mak Pedro sei mate hodi fó glória ba Maromak. No dehan tiha ida-neʼe, Jesus hatete ba Pedro: “Kontinua laʼo tuir haʼu.”

20 Kuandu Pedro fila oin, nia haree dixípulu ida neʼebé Jesus hadomi laʼo tuir sira, nia mak ida neʼebé mós tuur besik Jesus kuandu han-kalan no dehan: “Naʼi, sé mak sei entrega Ita ba inimigu?” 21 Nuneʼe, kuandu Pedro haree nia, Pedro dehan ba Jesus: “Naʼi, nia sei halo saida?” 22 Jesus dehan ba nia: “Se haʼu hakarak katak nia hela nafatin toʼo haʼu mai fali, tansá ó hanoin barak kona-ba neʼe? Ó kontinua laʼo tuir haʼu.” 23 Ho ida-neʼe, liafuan sira-neʼe toʼo ba dixípulu sira katak, dixípulu neʼe sei la mate. Tuir loloos, Jesus la dehan katak dixípulu neʼe sei la mate, maibé dehan: “Se haʼu hakarak katak nia hela nafatin toʼo haʼu mai fali, tansá ó hanoin barak kona-ba neʼe?”

24 Neʼe mak dixípulu neʼebé fó sasin kona-ba buat sira-neʼe no hakerek buat sira-neʼe, no ita hatene katak sasin neʼebé nia fó mak loos.

25 Tuir loloos, Jesus halo buat barak tan, maibé se hakerek hotu buat sira-neʼe, haʼu hanoin katak mundu neʼe rasik mós sei la iha fatin atu rai livru sira-neʼe.

[Nota–rodapé]