Apóstolu

1 Iha livru primeiru neʼebé haʼu hakerek ba Ita, Teófilo, haʼu konta buat hotu neʼebé Jesus halo no hanorin 2 toʼo loron neʼebé Maromak foti saʼe nia ba lalehan. Nia saʼe ba lalehan depois nia fó tiha mandamentu liuhusi espíritu santu ba apóstolu sira neʼebé nia hili ona. 3 Basá kuandu nia hetan tiha terus, dala barak nia mosu ba sira hodi hatudu ho klaru katak nia moris ona; sira haree nia durante loron haatnulu nia laran no nia esplika ba sira kona-ba Maromak nia Ukun. 4 No nuʼudar nia hasoru sira, nia fó mandamentu ba sira dehan: “Keta husik Jeruzalein, maibé kontinua hein buat neʼebé Aman promete ona, neʼebé imi rona ona husi haʼu; 5 tanba loloos, João fó batizmu ba imi ho bee, maibé lakleur tan imi sei hetan batizmu iha espíritu santu.”

6 No kuandu sira halibur hamutuk ona, sira husu ba nia: “Naʼi, Ita-Boot sei hadiʼa fali Izraél nia ukun iha tempu neʼe ka lae?” 7 Nia dehan ba sira: “Imi la presiza hatene oras no tempu, tanba Aman deʼit mak iha direitu atu deside. 8 Maibé kuandu espíritu santu* tun ba imi, imi sei simu kbiit, no imi sei sai haʼu-nia sasin iha Jeruzalein, iha Judeia tomak no iha Samaria, no toʼo rai nia rohan.” 9 No depois koʼalia tiha buat sira-neʼe, nia saʼe ba lalehan nuʼudar sira hateke hela, no kalohan ida taka netik nia hodi sira la haree tan nia. 10 No bainhira nia saʼe ba lalehan no sira hateke daudaun, derrepente deʼit mane naʼin-rua neʼebé hatais unuk mutin hamriik iha sira-nia sorin, 11 no mane sira-neʼe dehan: “Ema Galileia sira, tanbasá mak imi hamriik hodi hateke ba lalehan? Jesus neʼe, neʼebé saʼe ona ba lalehan, sei fila fali* iha dalan neʼebé hanesan nuʼudar imi haree nia saʼe ba lalehan.”

12 Tuirmai, sira fila fali ba Jeruzalein husi foho ida neʼebé bolu nuʼudar Foho Oliveira, neʼebé dook maizumenus kilómetru ida* husi Jeruzalein. 13 Entaun, kuandu sira toʼo ona, sira saʼe ba kuartu iha andár leten iha neʼebé sira hela bá; iha neʼebá iha Pedro, João, Tiago, André, Filipe, Tomé, Bartolomeu, Mateus, Tiago Alfeu nia oan-mane, Simão ida neʼebé laran-manas, no Judas Tiago nia oan-mane. 14 Sira hotu neʼe laran ida deʼit hodi kontinua halo orasaun, no sira hamutuk ho feto balu no Maria Jesus nia inan, no mós Jesus nia alin sira.

15 No iha loron sira neʼebá, kuandu maizumenus ema naʼin-120 halibur an hamutuk, Pedro hamriik iha sira-nia klaran no dehan: 16 “Maun-alin sira, liafuan neʼebé espíritu santu fó-hatene nanis liuhusi David tenke sai loos duni. David koʼalia kona-ba Judas, ida neʼebé sai nuʼudar matadalan ba sira neʼebé kaer Jesus; 17 basá uluk nia mós sura ona hamutuk ho ita no hola parte ho ita iha serbisu neʼe. 18 Mane neʼe mak sosa toʼos ida ho osan husi ninia hahalok la loos, no nia monu ho ulun tun uluk, no ninia kabun nakfera ho lian makaʼas no ninia tee-oan hotu fakar sai. 19 Ema hotu neʼebé hela iha Jeruzalein rona kona-ba buat neʼebé mosu, nuneʼe sira bolu toʼos neʼe iha sira-nia lian nuʼudar Akéldama, katak Toʼos Raan Nian. 20 Basá hakerek nanis ona iha livru Salmu dehan: ‘Husik ninia hela-fatin sai mamuk, no iha neʼebá ema sei la hela’, no: ‘Husik ema seluk kaer fali ninia knaar atu tau matan.’ 21 Tan neʼe, presiza duni ema ida atu troka Judas. Entaun, ita tenke hili ema ida husi ema hotu neʼebé sempre laʼo ho ita durante tempu hotu neʼebé Naʼi Jesus sei hamutuk ho ita 22 hahú husi tempu neʼebé nia simu batizmu husi João toʼo loron neʼebé nia saʼe ba lalehan. Ema neʼe tenke haree ona kona-ba Jesus nia moris-hiʼas hanesan ho ita.”

23 Entaun, sira bolu ema naʼin-rua, José neʼebé ema hanaran Barsabas, neʼebé mós bolu nuʼudar Justus, no Matias. 24 Tuirmai, sira halo orasaun no dehan: “Oh Jeová, Ita-Boot hatene ema hotu nia laran. Hatudu mai ami ema ida husi sira naʼin-rua neʼe neʼebé Ita fihir ona 25 hodi simu serbisu neʼe no sai apóstolu. Basá Judas husik ona knaar neʼe hodi laʼo tuir nia dalan rasik.” 26 Nuneʼe, sira dada sorte kona-ba sira naʼin-rua neʼe, no neʼe monu ba Matias; entaun sira sura nia hamutuk ho apóstolu naʼin sanulu-resin-ida.

2 No iha loron Festa Pentekostes nian, dixípulu sira halibur hamutuk iha fatin ida deʼit. 2 Nuʼudar sira tuur hela, derrepente deʼit tarutu ida mosu husi lalehan hanesan anin makaʼas, no uma laran tomak sai nakonu ho lian neʼe. 3 No sira bele haree ahi-lakan sira neʼebé hanesan nanál, no neʼe tun hodi hela iha sira ida-idak nia leten, 4 no sira hotu sai nakonu ho espíritu santu, no sira hahú koʼalia lia oioin hodi tuir buat neʼebé espíritu fó ba sira atu koʼalia.

5 Iha tempu neʼebá ema judeu sira neʼebé hamtaʼuk Maromak, neʼebé mai husi nasaun hotu iha mundu tomak, sira hela iha Jeruzalein. 6 Nuneʼe, kuandu tarutu neʼe mosu, ema-lubun mai halibur hamutuk no sai bilán basá sira rona dixípulu sira koʼalia iha sira ida-idak nia lian. 7 Loloos, sira sai hakfodak liu no dehan: “Haree toʼok, ema sira-neʼe neʼebé koʼalia daudaun mak ema Galileia, loos ka lae? 8 Tan neʼe, oinsá mak ita ida-idak rona ita-nia lian rasik? 9 Ita mak ema husi Pártia, Média, Elam, Mesopotámia, Judeia, Kapadósia, Pontus, área Ázia nian, 10 Fríjia, Pamfília, Ejitu, área Líbia nian neʼebé besik Sirene, no ita neʼebé mai husi Roma, ema judeu no mós ema neʼebé simu ona relijiaun judeu nian, 11 ema Kreta no Arábia, ita rona sira koʼalia iha ita-nia lian kona-ba buat furak oioin neʼebé Maromak halo.” 12 Sin, sira hotu hakfodak no bilán hodi dehan ba malu: “Ida-neʼe katak sá?” 13 Maibé, sira balu goza no hahú dehan: “Ema sira-neʼe lanu ho tua-uvas.”

14 Maibé Pedro hamriik hamutuk ho sira naʼin sanulu-resin-ida no koʼalia ba sira ho lian makaʼas dehan: “Imi ema Judeia sira no ema neʼebé hela iha Jeruzalein, rona didiʼak ba haʼu-nia liafuan sira no hatene bá kona-ba ida-neʼe. 15 Tuir loloos, ema sira-neʼe la lanu hanesan imi hanoin, basá agora mak tuku sia dadeer. 16 Maibé, ida-neʼe mak buat neʼebé fó sai ona liuhusi profeta Joel: 17 ‘“No iha loron ikus sira”, Maromak dehan, “Haʼu sei fakar haʼu-nia espíritu ba ema oioin, no imi-nia oan-mane no oan-feto sira sei koʼalia nuʼudar profeta no imi-nia joven-mane sira sei haree vizaun no imi-nia katuas sira sei mehi; 18 no iha loron sira neʼebá haʼu mós sei fakar haʼu-nia espíritu ba haʼu-nia atan-feto no atan-mane sira, no sira sei fó sai haʼu-nia liafuan. 19 No haʼu sei hatudu sai sinál iha lalehan no halo milagre iha rai; ho raan, ahi no suar; 20 loro-matan sei sai nakukun no fulan sei sai raan antes loron Jeová nian neʼebé boot no kmanek toʼo mai. 21 No ema hotu neʼebé bolu Jeová nia naran sei hetan salvasaun.”’

22 “Ema Izraél sira, imi rona liafuan sira-neʼe bá: Jesus Nazaré mak mane neʼebé Maromak haruka mai. No ida-neʼe hatudu sai momoos ba imi liuhusi milagre no sinál no buat furak oioin neʼebé Maromak halo iha imi-nia leet liuhusi nia, hanesan imi rasik hatene. 23 Mane neʼe imi kaer no entrega ba ema aat nia liman hodi hedi nia ba ai-riin no oho nia. No ida-neʼe tuir Maromak nia hakarak no Maromak hatene nanis ona kona-ba neʼe. 24 Maibé Maromak halo nia livre husi mate hodi fó moris-hiʼas ba nia, tanba mate la iha kbiit atu kontinua kaer metin nia. 25 Basá David koʼalia kona-ba nia dehan: ‘Haʼu sempre haree Jeová iha haʼu-nia oin; no haʼu sei nunka nakdedar tanba nia iha haʼu-nia liman-loos. 26 Tan neʼe mak haʼu-nia laran sai kontente no haʼu-nia ibun koʼalia ho ksolok. Liután neʼe, haʼu sei moris ho esperansa; 27 tanba Ita sei la husik hela haʼu* iha rate laran,* no mós Ita sei la husik ida neʼebé laran-metin ba Ita atu nia isin sai dodok. 28 Ita halo haʼu hatene ona dalan ba moris, Ita halo haʼu nakonu ho ksolok iha Ita-nia oin.’

29 “Maun-alin sira, husik haʼu koʼalia nakloke ba imi kona-ba ita-nia beiʼala David, neʼebé mate no hakoi ona, no ninia rate sei iha ita-nia leet toʼo ohin loron. 30 Nia mak profeta ida no nia hatene katak Maromak promete ona ba nia hodi jura katak ninia bei-oan ida sei tuur iha ninia kadunan. 31 Nuneʼe nia haree nanis ona no koʼalia kona-ba Kristu nia moris-hiʼas, katak Maromak sei la husik nia iha rate laran* no mós la husik nia isin sai dodok. 32 Jesus neʼe mak Maromak halo moris-hiʼas ona, no ami hotu sai sasin kona-ba neʼe. 33 Nuneʼe, tanba nia saʼe ona ba lalehan no tuur iha Maromak nia liman-loos no simu ona espíritu santu* neʼebé Aman promete, nia fakar ida-neʼe ba ami, no neʼe mak imi haree no rona. 34 Tuir loloos David la saʼe ba lalehan, maibé nia rasik dehan: ‘Jeová hatete ba haʼu-nia Naʼi: “Tuur iha haʼu-nia liman-loos, 35 toʼo haʼu tau ó-nia inimigu sira iha ó-nia ain okos.”’ 36 Nuneʼe, Izraél nia umakain hotu hatene ho loloos bá katak Jesus neʼe, neʼebé imi hedi ba ai-riin, Maromak halo ona nia nuʼudar Naʼi no Kristu.”

37 No kuandu sira rona ida-neʼe, sira-nia laran kanek tebes no sira dehan ba Pedro no apóstolu sira seluk: “Maluk sira, ami tenke halo saida?” 38 Pedro hatete ba sira: “Hakribi sala bá, no imi ida-idak hetan batizmu hodi Jesus Kristu nia naran atu imi-nia sala bele hetan perdua, no imi sei simu prezente neʼebé lalika selu, katak espíritu santu. 39 Tanba promesa neʼe mak ba imi, ba imi-nia oan sira, no ba sira hotu neʼebé dook tebes, sira hotu neʼebé Jeová ita-nia Maromak hili.” 40 No ho liafuan barak seluk Pedro fó sasin ho momoos no kontinua fó laran-manas hodi dehan: “Salva imi-nia an bá husi jerasaun aat neʼe.” 41 Tan neʼe, sira hotu neʼebé simu ninia liafuan ho laran hetan batizmu, no iha loron neʼe maizumenus ema* naʼin-3.000 sai dixípulu. 42 No sira ho laran-manas kontinua aprende husi apóstolu sira no fahe ba malu buat hotu neʼebé sira iha, no sira han hamutuk no kontinua halo orasaun.

43 Loloos, ema* hotu hahú hamtaʼuk Maromak, no milagre no sinál barak hahú mosu liuhusi apóstolu sira. 44 No sira hotu neʼebé sai fiar-naʼin halibur hamutuk no fahe ba malu buat hotu neʼebé sira iha, 45 no sira faʼan sira-nia sasán no rikusoin, no fahe neʼe ba ema hotu tuir ema ida-idak nia presiza. 46 No loron ba loron, sira kontinua halibur iha templu ho hanoin ida deʼit, no sira han hamutuk iha sira-nia uma ida-idak. Sira han ho haksolok no halo buat hotu ho laran-moos. 47 Sira hahiʼi Maromak no ema hotu haree sira ho diʼak. No loron-loron Jeová kontinua lori ema barak tan neʼebé nia salva hodi sai dixípulu hamutuk ho sira.

3 No Pedro ho João saʼe ba templu iha oras halo orasaun nian, katak tuku tolu lokraik, 2 no iha neʼebá ema lori mane ida neʼebé ain-aat husi moris-mai kedas. Loron-loron sira tau nia besik odamatan templu nian neʼebé bolu nuʼudar Furak, atu nuneʼe nia bele husu ezmola ba ema sira neʼebé tama ba templu. 3 Kuandu mane neʼe haree Pedro no João atu tama ba templu, nia hahú husu sira atu fó ezmola. 4 Maibé Pedro no mós João hateke ba nia no dehan: “Haree mai ami.” 5 Entaun nia hateke ba sira, hodi hein katak nia bele simu buat ruma husi sira. 6 No Pedro dehan: “Haʼu la iha osan-mutin no osan-mean, maibé buat neʼebé haʼu iha mak haʼu fó ba ó: Hodi Jesus Kristu husi Nazaré nia naran, haʼu hatete bá ó, laʼo bá!” 7 Ho ida-neʼe, Pedro kaer nia liman-loos no nia hamriik. Iha tempu neʼe kedas nia ain sai forsa, 8 no nia haksoit hodi hamriik no hahú laʼo. Nia tama ho sira ba templu, no nia laʼo no haksoit hodi fó hahiʼi ba Maromak. 9 No ema hotu haree nia laʼo no fó hahiʼi ba Maromak. 10 Sira hahú koñese nia, katak nia mak mane neʼebé baibain tuur hodi husu ezmola iha odamatan templu nian neʼebé bolu nuʼudar Furak, no sira sai hakfodak tebes ho buat neʼebé mosu ba nia.

11 Nuʼudar mane neʼe kaer hela Pedro no João nia liman, ema hotu mai besik sira iha fatin neʼebé bolu nuʼudar dalan Salomão nian, no ema sira-neʼe hakfodak loos ho buat neʼebé mosu. 12 Kuandu Pedro haree ida-neʼe, nia dehan: “Ema Izraél sira, tansá mak imi hakfodak loos ho ida-neʼe, ka tansá imi hateke ami hodi hanoin katak ho ami-nia kbiit rasik ka ho ami-nia laran-metin ba Maromak mak ami halo nia laʼo? 13 Abraão nia Maromak, Isaac nia Maromak no Jacob nia Maromak, ita-nia beiʼala sira-nia Maromak fó glória ona ba ninia atan Jesus, ida neʼebé imi entrega no nega iha Pilatos nia oin kuandu Pilatos deside atu husik nia livre. 14 Imi nega ema santu no ema loos neʼe, no imi husu Pilatos atu husik livre mane ida seluk ba imi, mane neʼebé ohodór, 15 maibé imi oho ona Ulun-Naʼin Moris nian. Maski nuneʼe, Maromak halo nia moris hiʼas fali husi mate, no kona-ba neʼe mak ami sai nuʼudar sasin. 16 Tan neʼe, liuhusi nia naran no liuhusi ami-nia fiar ba ninia naran mak ema neʼe, neʼebé imi haree no hatene, sai forsa fali. Fiar neʼebé liuhusi Jesus mak halo ona mane neʼe nia isin tomak sai diʼak iha imi leet. 17 No agora, maun-alin sira, haʼu hatene katak imi halo ida-neʼe tan imi la hatene, hanesan mós ho imi-nia ukun-naʼin sira halo. 18 Maibé, liuhusi ida-neʼe mak Maromak kumpre buat neʼebé nia fó-hatene nanis ona liuhusi profeta sira-nia ibun, katak Kristu tenke hetan terus.

19 “Tan neʼe, hakribi sala bá no fila fali ba Maromak, atu nuneʼe Jeová bele hamoos tiha imi-nia sala sira no fó kmaan ba imi. 20 No nia sei haruka Kristu neʼebé nia hili ona ba imi, neʼe mak Jesus, 21 Ida neʼebé tenke hela iha lalehan* toʼo tempu neʼebé Maromak halo loos buat hotu hodi tuir buat neʼebé nia koʼalia ona liuhusi ninia profeta santu sira-nia ibun. 22 Tuir loloos, Moisés dehan: ‘Maromak Jeová sei hili profeta ida hanesan haʼu husi imi-nia leet. Imi tenke rona ba buat naran deʼit neʼebé nia dehan ba imi. 23 Loloos, ema* naran deʼit neʼebé la rona ba Profeta neʼe sei halakon tiha husi povu nia leet.’ 24 Tuir loloos, profeta hotu, husi Samuel no mós sira neʼebé tuir nia, koʼalia sai ho momoos kona-ba loron sira-neʼe. 25 Imi mak profeta sira-nia oan no oan husi aliansa neʼebé Maromak halo ona ho imi-nia beiʼala sira. Nia dehan ba Abraão: ‘No husi ó-nia bei-oan mak família hotu iha mundu sei simu bensaun.’ 26 Maromak hili tiha ona nia Atan no nia haruka atan neʼe ulukliu ba imi atu fó bensaun ba imi hodi ajuda imi ida-idak atu hasees an husi imi-nia hahalok aat sira.”

4 No kuandu sira naʼin-rua neʼe koʼalia hela ho povu, derrepente deʼit ulun-naʼin amlulik sira, kapitaun templu nian, no saduseu* sira mai. 2 Sira hirus tanba dixípulu naʼin-rua neʼe hanorin povu no fó sai momoos kona-ba Jesus nia moris-hiʼas husi mate. 3 No sira kaer dixípulu naʼin-rua neʼe no hatama iha komarka laran toʼo loron tuirmai basá rai kalan ona. 4 Maibé povu barak neʼebé rona liafuan sira-neʼe sai fiar-naʼin, no sira maizumenus mane naʼin-5.000.

5 Loron tuirmai, ema judeu nia ukun-naʼin sira, katuas povu nian no eskriba sira halibur an hamutuk iha Jeruzalein, 6 ema sira-neʼe inklui mós Anas ulun-naʼin amlulik nian no Caifás, João, Alexandre, no mós sira hotu husi família ulun-naʼin amlulik nian. 7 No sira bolu dixípulu naʼin-rua neʼe hodi hamriik iha sira-nia klaran no sira hahú husu: “Sé mak fó imi kbiit atu halo ida-neʼe? Hodi sé-nia naran mak imi halo ida-neʼe?” 8 Tuirmai, Pedro nakonu ho espíritu santu dehan ba sira:

“Ukun-naʼin no katuas povu nian sira, 9 se imi hakarak hatene kona-ba hahalok diʼak neʼebé ami halo ona ba mane ain-aat neʼe no kona-ba oinsá mak nia sai isin-diʼak, 10 entaun, imi hotu no mós Izraél nia povu hotu hatene bá katak liuhusi Jesus Kristu husi Nazaré nia naran mak mane neʼe hamriik iha imi-nia oin ho isin-diʼak; no Jesus Kristu neʼe mak ida neʼebé imi hedi ona maibé Maromak halo nia moris fali husi mate. 11 Nia mak ‘fatuk neʼebé imi badain sira la simu, maibé sai ona fatuk neʼebé importante liu’.* 12 Liután neʼe, la iha salvasaun liuhusi ema seluk, basá la iha naran seluk iha lalehan nia okos neʼebé Maromak hili tiha ona atu salva ita.”

13 No kuandu sira haree Pedro no João nia aten-brani, no hatene katak sira naʼin-rua mak ema la eskola no ema baibain deʼit, sira sai hakfodak. No sira hahú hatene katak ema sira-neʼe uluk hamutuk ho Jesus. 14 No nuʼudar sira hateke ba mane neʼebé hetan ona isin-diʼak hamriik hela ho dixípulu naʼin-rua neʼe, sira la iha tan liafuan ida atu koʼalia. 15 Entaun sira haruka mane naʼin-tolu neʼe sai husi fatin Sinédriu nian no sira hahú koʼalia ba malu 16 hodi dehan: “Ita tenke halo saida ba mane sira-neʼe? Tanba tuir loloos sira halo sinál ida neʼebé la hanesan baibain, no ema hotu neʼebé hela iha Jeruzalein haree; no ita la bele nega ida-neʼe. 17 Maski nuneʼe, atu ida-neʼe la sai belar tan iha povu nia leet, mai ita ameasa sira atu sira la koʼalia tan ba ema seluk hodi naran neʼe.”

18 Ho ida-neʼe, sira bolu dixípulu naʼin-rua neʼe no haruka sira atu labele tan koʼalia buat ruma ka hanorin iha fatin naran deʼit hodi Jesus nia naran. 19 Maibé Pedro no João dehan ba sira: “Se imi hanoin katak rona ba imi duké rona ba Maromak mak buat loos iha Maromak nia oin, imi rasik deside bá. 20 Maibé ba ami, ami labele para atu koʼalia kona-ba buat neʼebé ami haree no rona.” 21 Kuandu sira ameasa tiha dala ida tan, sira husik livre dixípulu naʼin-rua neʼe tanba sira la hetan razaun ida hodi fó kastigu no mós sira taʼuk ba povu, basá povu hotu fó glória ba Maromak kona-ba buat neʼebé foin mosu. 22 No mane neʼebé hetan isin-diʼak liuhusi sinál neʼe, nia tinan haatnulu liu.

23 Depois sai livre ona, sira bá hasoru dixípulu sira seluk no konta buat neʼebé ulun-naʼin amlulik sira no katuas povu nian dehan ba sira. 24 Rona tiha ida-neʼe, sira hotu ho laran ida deʼit harohan ba Maromak dehan:

“Naʼi Ukun-Naʼin Boot Liu, Ita-Boot mak Ida neʼebé halo lalehan, rai, tasi, no buat hotu neʼebé iha nia, 25 no hodi espíritu santu Ita koʼalia liuhusi Ita-nia atan David, ami-nia beiʼala, nia ibun hodi dehan: ‘Tansá mak nasaun sira sai hirus no povu sira hanoin kona-ba buat folin-laek? 26 Liurai sira rai neʼe nian prepara an no ukun-naʼin sira halibur an hamutuk hodi sai ida deʼit atu kontra Jeová no kontra ida neʼebé nia hili.’ 27 Neʼe mosu duni kuandu Herodes no Pónsio Pilatos, hamutuk ho ema husi nasaun sira no mós povu Izraél nian halibur iha sidade neʼe hodi kontra Ita-nia atan santu, Jesus, neʼebé Ita hili ona. 28 Sira halibur hamutuk atu halo buat neʼebé Ita fó-hatene nanis ona. Buat sira-neʼe mosu tanba Ita iha kbiit* no tanba Ita-nia hakarak. 29 No agora, Jeová, haree ba sira-nia ameasa, no husik Ita-nia atan sira kontinua haklaken Ita-nia liafuan ho aten-brani, 30 no kontinua lolo Ita-nia liman atu kura no mós kontinua hatudu sinál no milagre sira liuhusi Ita-nia atan santu, Jesus, nia naran.”

31 No kuandu sira harohan tiha, fatin neʼebé sira halibur hamutuk sai nakdoko, no sira hotu sai nakonu ho espíritu santu no koʼalia Maromak nia liafuan ho aten-brani.

32 Liután neʼe, sira hotu neʼebé fiar ona, sira iha laran no neon ida deʼit, no la iha ida mak dehan katak sasán neʼebé sira iha mak sira-nian, maibé sira fahe buat hotu ba malu. 33 No mós, ho kbiit boot apóstolu sira kontinua fó sasin kona-ba Naʼi Jesus nia moris-hiʼas; no Maromak hatudu nia laran-diʼak neʼebé boot ba sira hotu. 34 Tuir loloos, iha sira-nia leet la iha ema ida neʼebé kuran buat ruma; tanba sira hotu neʼebé iha toʼos ka uma, sira faʼan buat sira-neʼe no lori folin husi buat neʼebé sira faʼan 35 no fó neʼe ba apóstolu sira, tuirmai apóstolu sira fahe neʼe ba ema ida-idak tuir sira-nia presiza. 36 No iha ema Levi ida husi rai Xipre naran José, neʼebé apóstolu sira bolu nuʼudar Barnabé, katak Oan Ksolok nian. 37 Nia iha rai ida, no nia mós faʼan ida-neʼe no lori osan hodi fó ba apóstolu sira.

5 Maibé, mane ida naran Ananias, hamutuk ho ninia feen Safira, faʼan sira-nia rai, 2 no nia rai subar osan balu ba nia an, no ninia feen mós hatene kona-ba neʼe. No nia lori balu deʼit no fó ba apóstolu sira. 3 Maibé Pedro dehan: “Ananias, tansá mak ó husik Satanás halo ó brani atu bosok espíritu santu hodi rai subar osan balu husi ó-nia toʼos nia folin? 4 Antes ó faʼan, rai neʼe mak ó-nian, loos ka lae? No kuandu faʼan tiha, ó bele uza osan neʼe tuir ó-nia hakarak, loos ka lae? Tansá mak ó hanoin iha ó-nia laran atu halo hanesan neʼe? Ó la bosok deʼit ema, maibé bosok mós Maromak.” 5 Rona tiha liafuan sira-neʼe, Ananias monu no mate. No ema hotu neʼebé rona ida-neʼe sai taʼuk tebetebes. 6 Mane joven sira hamriik no falun nia ho hena, no lori nia sai hodi bá hakoi.

7 No maizumenus oras tolu liu tiha, ninia feen toʼo mai, maibé nia la hatene buat neʼebé foin mosu. 8 Pedro hatete ba nia: “Fó-hatene mai haʼu, imi naʼin-rua faʼan toʼos neʼe ho osan hanesan neʼe ka?” Nia dehan: “Loos, nuneʼe duni.” 9 Entaun, Pedro dehan ba nia: “Tansá mak imi naʼin-rua halo planu atu koko Jeová nia espíritu? Haree! Ema sira neʼebé hakoi ó-nia laʼen, sira-nia ain iha ona odamatan no sira sei lori ó sai.” 10 Iha oras neʼe kedas nia monu no mate. Kuandu mane joven sira-neʼe tama, sira haree nia mate ona, no sira lori nia sai no hakoi iha nia laʼen nia sorin. 11 Ho ida-neʼe, kongregasaun tomak no ema hotu neʼebé rona buat sira-neʼe sai taʼuk tebetebes.

12 Liután neʼe, sinál no milagre barak mosu iha ema nia leet liuhusi apóstolu sira; no ho hanoin ida deʼit sira hotu halibur iha fatin neʼebé bolu nuʼudar dalan Salomão nian. 13 Maibé ema seluk la brani atu halibur an ho sira, maski nuneʼe povu koʼalia diʼak kona-ba sira. 14 Liután neʼe, mane no feto barak tan hatudu fiar ba Naʼi no sai dixípulu. 15 Sira mós lori ema moras bá iha dalan boot sira no hatoba sira iha kama kiʼik, atu nuneʼe nuʼudar Pedro liu, ninia lalatak bele kona sira. 16 No mós, ema-lubun husi sidade sira neʼebé besik Jeruzalein kontinua mai hamutuk, no sira lori ema moras no lori sira neʼebé anju aat haterus, no sira hotu hetan isin-diʼak.

17 Maibé amlulik boot no ema sira neʼebé hamutuk ho nia, katak sira neʼebé apoia ema saduseu sira, sai laran-moras tebes, no sira hamriik 18 no kaer apóstolu sira no tau iha komarka sidade nian. 19 Maibé iha kalan, Jeová nia anju loke odamatan komarka nian no lori sira sai ba liʼur no dehan: 20 “Laʼo bá no hamriik iha templu no kontinua koʼalia ba ema hotu liafuan kona-ba moris.” 21 Rona tiha ida-neʼe, sira tama ba templu kuandu rai naroman ona no sira hahú hanorin.

No kuandu amlulik boot no sira neʼebé hamutuk ho nia toʼo mai, sira halibur Sinédriu no katuas husi povu Izraél nian, no sira haruka guarda sira ba komarka atu lori apóstolu sira mai. 22 Maibé kuandu guarda sira-neʼe toʼo neʼebá, sira la hetan apóstolu sira iha komarka laran. Entaun guarda sira fila no fó-hatene sira, 23 dehan: “Ami haree komarka xave metin hela no seguru, no guarda sira hamriik iha odamatan, maibé kuandu ami loke ami la hetan ema ida iha laran.” 24 No kuandu kapitaun templu nian no ulun-naʼin amlulik nian rona liafuan sira-neʼe, sira sai bilán no la hatene buat sira-neʼe sei sai oinsá loos. 25 Maibé mane ida toʼo mai no dehan ba sira: “Haree! Mane sira neʼebé imi hatama iha komarka, sira hamriik iha templu no hanorin ema.” 26 Tuirmai, kapitaun neʼe bá hamutuk ho nia guarda sira no lori apóstolu sira mai, maibé sira la halo aat ba apóstolu sira tanba taʼuk povu sei tuda sira.

27 Entaun, sira lori apóstolu sira ba fatin Sinédriu nian. No amlulik boot husu sira 28 no dehan: “Ami haruka ona imi atu la koʼalia tan hodi naran neʼe, maibé, haree! imi halo nakonu Jeruzalein ho imi-nia hanorin, no imi hakaʼas an atu fó todan ba ami kona-ba ema neʼe nia raan.” 29 Pedro no apóstolu sira seluk dehan: “Ami tenke halo tuir Maromak nuʼudar ukun-naʼin duké halo tuir ema. 30 Ita-nia beiʼala nia Maromak halo moris Jesus, neʼebé imi oho, no tara iha ai-riin ida. 31 Maromak foti ema neʼe iha nia liman sorin loos nuʼudar Naʼi-Ulun no Salvadór, atu Izraél bele hakribi sala no hetan perdua. 32 No ami sai nuʼudar sasin kona-ba buat sira-neʼe, no nuneʼe mós ho espíritu santu, ida neʼebé Maromak fó ona ba sira neʼebé halo tuir nia nuʼudar ukun-naʼin.”

33 Kuandu sira rona ida-neʼe, sira sai hirus tebes no hakarak atu oho apóstolu sira. 34 Maibé mane ida iha Sinédriu hamriik, nia mak ema farizeu ida naran Gamaliel, mestre Ukun-Fuan nian neʼebé povu hotu respeitu, no nia haruka atu lori ema sira-neʼe sai ba liʼur ba tempu uitoan. 35 No nia dehan: “Ema Izraél sira, kuidadu imi-nia an bá kona-ba buat neʼebé imi hakarak atu halo ba mane sira-neʼe. 36 Porezemplu, antes loron sira-neʼe, Teudas mosu no dehan katak nia mak ema-boot ida no iha ema balu tuir nia. Maizumenus ema naʼin-400 apoia nia. Maibé ikusmai ema oho tiha nia, no sira hotu neʼebé halo tuir nia halai namkari no lakon. 37 Depois nia, iha loron sira atu tau naran, Judas husi Galileia mosu mai, no nia dada povu hodi tuir nia. Maibé mane neʼe lakon, no ema hotu neʼebé tuir nia namkari hotu. 38 Entaun, kona-ba neʼe, haʼu dehan ba imi: Keta hanetik ema sira-neʼe, maibé husik sira bá; tanba se hanorin neʼe ka serbisu neʼe mak husi ema, ida-neʼe sei lakon tiha; 39 maibé se ida-neʼe husi Maromak, imi la bele halakon sira; tanba se imi hanetik sira, karik imi halo funu hasoru Maromak rasik.” 40 Ho ida-neʼe, ema sira-neʼe simu ninia konsellu, no sira bolu apóstolu sira, baku sira ho xikote, no haruka sira para atu koʼalia hodi Jesus nia naran, no husik sira bá.

41 Nuneʼe apóstolu sira sai husi Sinédriu nia oin no sira haksolok, basá Maromak husik ema atu hamoe sira tanba Jesus nia naran. 42 No loron-loron iha templu no husi uma ba uma, sira la para atu hanorin no haklaken liafuan diʼak kona-ba Jesus, katak Kristu.

6 No iha loron sira neʼebá, kuandu dixípulu sira aumenta ba beibeik, ema judeu sira neʼebé koʼalia lia-gregu hahú muramura hasoru ema judeu neʼebé koʼalia lia-ebraiku, tanba sira-nia feto-faluk sira la hetan ai-han neʼebé fahe loron-loron. 2 Tan neʼe, sira naʼin sanulu-resin-rua bolu dixípulu hotu hodi halibur hamutuk no dehan: “La diʼak se ami husik Maromak nia liafuan atu fahe ai-han iha meza. 3 Entaun, maun-alin sira, buka mane naʼin-hitu husi imi-nia leet, sira neʼebé iha naran diʼak, nakonu ho espíritu santu no matenek, atu nuneʼe ami bele foti sira atu kaer knaar neʼe; 4 maibé ami sei fó ami-nia forsa no tempu atu halo orasaun no atu halo serbisu ba Maromak nia liafuan.” 5 No dixípulu hotu kontente ho buat neʼebé apóstolu sira dehan, no sira hili Estevão, mane ida neʼebé fiar metin no nakonu ho espíritu santu, Filipe, Prókoro, Nikanor, Timaun, Pármenas, no Nicolau, ema Antiokia ida neʼebé simu ona relijiaun judeu nian. 6 Sira lori ema sira-neʼe ba apóstolu sira, no halo tiha orasaun apóstolu sira tau liman ba ema sira-neʼe.

7 Tan neʼe Maromak nia liafuan kontinua sai buras, no dixípulu kontinua aumenta barak tan iha Jeruzalein; no amlulik lubun mós sai fiar-naʼin.

8 No Estevão, nakonu ho Maromak nia laran-diʼak no kbiit, halo milagre no sinál boot sira iha povu nia leet. 9 Maibé ema balu husi grupu neʼebé bolu nuʼudar Sinagoga Ema Livre nian mai hamutuk ho ema Sirene, Alexandria, no sira neʼebé husi Silísia no Ázia, atu diskute malu ho Estevão. 10 Maibé sira la bele tahan hasoru ninia matenek no espíritu neʼebé ajuda nia atu koʼalia. 11 Tan neʼe, ho subasubar deʼit sira book ema atu dehan: “Ami rona nia koʼalia kontra Moisés no Maromak.” 12 No sira soran povu no katuas povu nian no eskriba sira, no sira mai hasoru nia derrepente deʼit, no kaer nia hodi obriga no lori nia ba Sinédriu. 13 Tuirmai, sira lori sasin falsu sira neʼebé dehan: “Mane neʼe la para atu koʼalia kontra fatin santu neʼe no kontra Ukun-Fuan. 14 Porezemplu, ami rona nia dehan katak Jesus Nazaré sei harahun tiha fatin neʼe no sei troka kostume sira neʼebé Moisés fó ona ba ita.”

15 No nuʼudar sira hotu neʼebé tuur iha Sinédriu hateke ba nia, sira haree katak ninia oin hanesan anju ida nia oin.

7 Maibé amlulik boot hatete: “Buat sira-neʼe loos ka lae?” 2 Nia dehan: “Maun-alin no aman sira, rona haʼu bá. Maromak glória nian mosu ba ita-nia beiʼala Abraão kuandu nia hela iha Mesopotámia, antes nia muda hodi hela iha Haran. 3 Maromak dehan ba nia: ‘Sai husi ó-nia rai no husi ó-nia família sira no laʼo ba rai neʼebé haʼu sei hatudu ba ó.’ 4 Tuirmai, nia laʼo sai husi ema Kaldeia nia rai no hela iha Haran. No husi neʼebá, kuandu nia aman mate ona, Maromak haruka nia atu muda hodi hela iha rai neʼebé agora imi hela daudaun. 5 Maibé Maromak la fó ba nia liman-rohan ida iha rai neʼe, rai rohan ida* mós lae; maibé Maromak promete atu fó rai neʼe ba nia atu sai ninian, no ba ninia bei-oan sira depois nia, maski nia seidauk iha oan. 6 Liután neʼe, Maromak fó-hatene ba nia katak ninia bei-oan sira sei hela nuʼudar ema estranjeiru iha rai seluk no ema iha rai neʼe sei halo sira nuʼudar atan no sei haterus sira ba tinan 400. 7 ‘No haʼu sei tesi lia ba nasaun neʼebé halo sira sai atan’, Maromak dehan, ‘no depois neʼe sira sei sai husi rai neʼebá no sira sei halo serbisu santu ba haʼu iha fatin neʼe.’

8 “Maromak mós fó aliansa sirkunsizaun nian ba Abraão; no nuneʼe nia sai aman ba Isaac no nia fó sirkunsizaun ba Isaac iha loron ualu, no Isaac sai aman ba Jacob, no Jacob sai aman ba família nia ulun sanulu-resin-rua. 9 No família nia ulun sira-neʼe sai laran-moras ba José no faʼan nia ba ema Ejitu. Maibé Maromak hamutuk ho nia, 10 no salva nia husi nia terus hotu, no Maromak fó matenek ba nia no halo Faraun,* liurai Ejitu, haree nia ho diʼak. No Faraun foti nia atu tau matan ba rai-Ejitu no ba liurai nia uma tomak. 11 Tuirmai, rai-hamlaha mosu iha rai-Ejitu no Kanaán, no ida-neʼe hamosu terus boot, no ita-nia beiʼala sira mós la hetan ai-han. 12 Maibé Jacob rona katak iha ai-han iha rai-Ejitu. Entaun, ba dala primeiru nia haruka ita-nia beiʼala sira atu bá neʼebá. 13 No kuandu sira bá Ejitu ba dala segundu, José fó sai nia an ba ninia maun-alin sira, no Liurai Ejitu nian komesa hatene kona-ba José nia família. 14 Entaun, José haruka mensajen no bolu ninia aman Jacob no ninia família hotu husi fatin neʼebá, sira hamutuk ema* naʼin hitunulu-resin-lima. 15 Nuneʼe Jacob laʼo tun ba Ejitu no nia mate iha neʼebá; nuneʼe mós ho ita-nia beiʼala sira. 16 No ema lori sira-nia ruin ba Sikém no tau iha rate neʼebé Abraão sosa ona husi Hamor nia oan sira iha Sikém ho folin osan-mutin balu.

17 “Nuʼudar tempu besik toʼo ona atu kumpre Maromak nia promete neʼebé fó sai ona ba Abraão, povu sai barak no aumenta liután iha Ejitu. 18 No tuirmai, liurai Ejitu nian seluk mosu no nia la hatene José. 19 Liurai neʼe halo aat hasoru ita-nia beiʼala sira no obriga aman sira atu husik sira-nia oan kiʼik, atu nuneʼe sira labele moris. 20 Iha tempu sira-neʼe mak Moisés moris, no nia bonitu tebes. No ninia família rasik mak tau matan ba nia iha ninia aman nia uma ba fulan tolu. 21 Maibé kuandu ninia inan-aman tenke husik nia, Liurai Ejitu nia oan-feto foti nia no hakiak nia nuʼudar oan rasik. 22 Tan neʼe, Moisés simu hanorin kona-ba Ejitu nia matenek hotu. No tuir loloos, nia koʼalia ho kbiit no halo hahalok boot sira.

23 “No kuandu nia tinan haatnulu ona, nia hanoin atu bá haree ninia maun-alin sira, katak Izraél nia oan sira-nia situasaun. 24 No kuandu nia haree ema Ejitu ida halo aat ba ema Izraél ida, nia defende ninia maluk no selu fali hahalok aat neʼe hodi baku mate ema Ejitu neʼe. 25 Nia hanoin katak ninia maun-alin sira bele komprende katak Maromak fó ona salvasaun ba sira liuhusi nia liman, maibé sira la komprende ida-neʼe. 26 No loron tuirmai nia mosu ba sira no nia haree ema naʼin-rua baku malu. Nia koko atu hapara sira no dehan: ‘Imi naʼin-rua mak maun-alin, entaun tansá mak imi baku malu?’ 27 Maibé, ida neʼebé baku nia maluk dudu sees Moisés hodi dehan: ‘Sé mak foti ó nuʼudar ukun-naʼin no tesi-lia naʼin ba ami? 28 Ó hakarak atu oho haʼu hanesan ó oho ema Ejitu neʼe horisehik ka?’ 29 Rona tiha ida-neʼe, Moisés halai no hela nuʼudar ema estranjeiru iha rai-Midian, no iha neʼebá mak nia sai aman ba oan-mane naʼin-rua.

30 “Kuandu tinan haatnulu liu tiha, anju ida mosu ba nia liuhusi ai-hun* neʼebé lakan iha rai-fuik iha Foho Sinai. 31 No bainhira Moisés haree ida-neʼe, nia hakfodak. Maibé nuʼudar nia hakbesik atu haree didiʼak, nia rona Jeová nia lian, dehan: 32 ‘Haʼu mak ó-nia beiʼala sira-nia Maromak, Abraão nia Maromak, Isaac nia Maromak, no Jacob nia Maromak.’ Tanba Moisés nakdedar tebes, nia la brani tan atu haree. 33 Jeová hatete ba nia: ‘Hasai tiha sandálias husi ó-nia ain, tanba fatin neʼebé ó hamriik mak santu. 34 Haʼu haree tiha ona terus neʼebé haʼu-nia povu iha Ejitu hasoru, no haʼu rona tiha ona sira-nia tanis no haʼu tun ona atu salva sira. Neʼe duni, mai, no haʼu sei haruka ó ba Ejitu.’ 35 Moisés neʼe mak ida neʼebé sira nega ona hodi dehan: ‘Sé mak foti ó nuʼudar ukun-naʼin no tesi-lia naʼin ba ami?’, maibé liuhusi anju neʼebé mosu ba Moisés iha ai-hun neʼebé lakan, Maromak haruka nia nuʼudar ukun-naʼin no ida neʼebé fó salvasaun. 36 Mane neʼe mak lori sira sai, no halo milagre no sinál sira iha Ejitu, iha Tasi Mean, no iha rai-fuik ba tinan haatnulu.

37 “Moisés neʼe rasik mak dehan ba Izraél nia oan sira: ‘Maromak sei hili profeta ida hanesan haʼu husi imi-nia leet.’ 38 Moisés mak ida neʼebé hamutuk ho povu Izraél iha rai-fuik, no nia mak hamutuk ho anju neʼebé koʼalia ho nia iha Foho Sinai, no nia koʼalia ho ita-nia beiʼala sira. Nia simu mensajen moris nian husi Maromak atu hatoʼo ba imi. 39 Ita-nia beiʼala sira lakohi atu halo tuir nia, maibé sira fila kotuk ba nia, no iha sira-nia laran, sira hakarak atu fila fali ba Ejitu. 40 No sira dehan ba Aarão: ‘Halo ba ami maromak sira hodi laʼo iha ami-nia oin. Tanba Moisés neʼe, ida neʼebé lori ami sai husi Ejitu, ami la hatene saida mak mosu ona ba nia.’ 41 Entaun, iha loron sira neʼebá, sira halo karau-oan ida no hasaʼe prezente ba estátua neʼe no sira haksolok ho serbisu neʼebé sira halo ona ho sira-nia liman. 42 Nuneʼe Maromak fila kotuk ba sira no husik sira atu adora tropa lalehan nian, hanesan hakerek nanis ona iha livru profeta sira-nian: ‘Oh umakain Izraél nian, durante tinan haatnulu nia laran iha rai-fuik, imi hasaʼe animál neʼebé imi oho no prezente oioin, maibé ida-neʼe laʼós ba haʼu, loos ka lae? 43 Maibé, imi lori fali tenda maromak Moluk* nian no fitun husi maromak Refan, katak sira-nia ilas neʼebé imi halo hodi adora. Tan neʼe, haʼu sei soe imi dook liu fali Babilónia.’

44 “Ita-nia beiʼala sira iha tenda sasin nian iha rai-fuik. Maromak hatete ba Moisés atu halo ida-neʼe no sira halo tuir ezemplu neʼebé Maromak hatudu ona ba Moisés. 45 No ita-nia beiʼala nia oan sira no mós Josué foti tenda neʼe no lori hodi tama ba nasaun sira seluk nia rai. No Maromak hasai tiha nasaun sira-neʼe tanba ita-nia beiʼala sira. No tenda hela iha rai neʼe toʼo David nia tempu. 46 David monu loos ba Maromak nia laran, no nia husu lisensa atu halo uma ida ba Jacob nia Maromak. 47 Maski nuneʼe, Salomão mak harii uma ba nia. 48 Maibé, Ida neʼebé Aas Liu Hotu la hela iha uma neʼebé ema nia liman mak halo; hanesan profeta hatete nanis ona: 49 ‘Lalehan mak haʼu-nia kadunan, no rai mak haʼu-nia ain-fatin. Uma saida mak imi sei harii ba haʼu? Jeová dehan. Ka iha neʼebé mak imi sei harii hela-fatin ba haʼu atu hela? 50 Laʼós ho haʼu-nia liman mak haʼu halo buat sira-neʼe hotu?’

51 “Imi ema ulun-toos, imi taka imi-nia tilun no laran,* imi sempre kontra espíritu santu; hanesan imi-nia beiʼala sira halo, imi mós halo nuneʼe. 52 Profeta ida neʼebé mak imi-nia beiʼala sira la haterus? Sin, sira oho ema sira neʼebé fó-hatene nanis katak ema loos ida sei mai. No foin lalais neʼe imi entrega ema loos neʼe ba inimigu sira hodi oho. 53 Imi simu ona Ukun-Fuan neʼebé anju sira hatoʼo, maibé imi la halo tuir ida-neʼe.”

54 Rona tiha liafuan sira-neʼe, sira sai hirus tebes no ruun nehan hasoru nia. 55 Maibé Estevão, nakonu ho espíritu santu, hateke ba lalehan no haree Maromak nia glória no Jesus hamriik iha Maromak nia liman sorin loos, 56 no nia dehan: “Haʼu haree lalehan nakloke no Oan-Mane husi ema hamriik iha Maromak nia liman sorin loos.” 57 Ho ida-neʼe sira hakilar makaʼas tebes no taka sira-nia tilun no sira hotu ataka nia. 58 No soe tiha nia ba sidade nia liʼur, sira hahú tuda fatuk ba nia. No sasin sira tau sira-nia unuk iha mane joven ida nia ain, no mane neʼe nia naran mak Saul. 59 Nuʼudar sira tuda nia, nia dehan: “Naʼi Jesus, simu haʼu-nia moris* bá.” 60 Tuirmai, hakneʼak tiha, nia hakilar ho lian makaʼas: “Jeová, keta fó kastigu ba sira kona-ba sala neʼe.” Depois koʼalia tiha ida-neʼe nia mate.*

8 Iha Saul nia laran, nia mós apoia ema sira neʼebé oho Estevão.

Iha loron neʼe ema hahú fó-terus boot hasoru kongregasaun iha Jeruzalein; tan neʼe dixípulu sira hotu namkari ba área Judeia no Samaria nian, só deʼit apóstolu sira mak hela iha Jeruzalein. 2 Maibé ema sira neʼebé hamtaʼuk Maromak lori Estevão hodi bá hakoi, no sira tanis makaʼas kona-ba nia. 3 Maibé Saul hahú kontra makaʼas hasoru kongregasaun. Nia tama-sai uma ida-idak no dada sai mane no feto, no lori sira ba komarka.

4 No sira neʼebé namkari, sira laʼo husi fatin ida ba fatin seluk iha rai sira-neʼe no haklaken liafuan diʼak. 5 No Filipe tun ba sidade Samaria, no hahú haklaken kona-ba Kristu iha neʼebá. 6 Ho hanoin ida deʼit ema-lubun simu buat neʼebé Filipe hatoʼo. Sira rona ba buat neʼebé nia dehan no haree sinál neʼebé nia halo. 7 Iha neʼebá, iha ema barak neʼebé anju aat domina, no anju aat sira-neʼe hakilar ho lian makaʼas no sai husi ema. Liután neʼe, iha mós ema barak neʼebé isin-matek no ain-kudeʼik, no sira hetan kura. 8 Entaun, ema sira iha sidade neʼe haksolok tebetebes.

9 No iha sidade neʼe iha mane ida naran Simão no nia dehan katak nia ema-boot ida. Nia halo buat oioin ho anju aat nia ajuda no ema iha rai-Samaria hakfodak kona-ba nia. 10 No ema hotu, husi kiʼik toʼo boot, rona didiʼak ba nia no dehan: “Mane neʼe iha kbiit boot husi Maromak.” 11 No ba tempu kleur ona nia halo sira hakfodak ho buat oioin neʼebé nia halo ho anju aat nia ajuda, nuneʼe sira gosta tuir nia. 12 Maibé kuandu Filipe haklaken liafuan diʼak kona-ba Maromak nia Ukun no kona-ba Jesus Kristu nia naran, sira tau fiar ba nia, no mane no feto sira hetan batizmu. 13 Simão rasik mós sai fiar-naʼin, no depois hetan tiha batizmu, nia kontinua hamutuk ho Filipe; no nia hakfodak hodi haree sinál no milagre boot sira neʼebé mosu.

14 Kuandu apóstolu sira iha Jeruzalein rona katak ema iha Samaria simu ona Maromak nia liafuan, sira haruka Pedro no João toʼo neʼebá. 15 Entaun, sira naʼin-rua tun ba Samaria no halo orasaun ba ema sira-neʼe atu sira bele simu espíritu santu, 16 basá sira hetan ona batizmu hodi Naʼi Jesus nia naran maibé espíritu seidauk tun ba sira. 17 Tuirmai, sira naʼin-rua tau liman ba ema sira-neʼe, no sira hahú simu espíritu santu.

18 Kuandu Simão haree katak ema neʼebé apóstolu sira tau liman iha sira-nia leten simu espíritu santu, nia promete atu fó osan ba apóstolu sira 19 hodi dehan: “Fó mós kbiit neʼe ba haʼu, atu nuneʼe ema hotu neʼebé haʼu tau liman iha nia leten bele simu espíritu santu.” 20 Maibé Pedro dehan ba nia: “Ó-nia osan-mutin sei lakon ho ó, tanba ó hanoin katak ho osan mak ó bele hetan Maromak nia prezente neʼebé lalika selu. 21 Ó sei la hetan parte ida iha serbisu neʼe tanba ó-nia laran la loos iha Maromak nia oin. 22 Tan neʼe, hakribi sala bá no husik ó-nia dalan sira neʼebé aat. Harohan ba Jeová no troka ó-nia hanoin aat, atu nuneʼe nia sei fó perdua ba ó. 23 Basá haʼu haree katak ó-nia laran nakonu ho venenu no ó atan ba hahalok la loos.” 24 Simão hatán: “Maluk sira, harohan ba Jeová tanba haʼu, atu nuneʼe buat hotu neʼebé imi koʼalia ona labele kona haʼu.”

25 Tan neʼe, kuandu sira haklaken tiha ho didiʼak no koʼalia tiha kona-ba Jeová nia liafuan, sira hahú fila fali ba Jeruzalein, no tuir dalan sira kontinua haklaken liafuan diʼak iha knua barak iha Samaria.

26 Maibé, Jeová nia anju dehan ba Filipe: “Hamriik no bá parte súl hodi laʼo tuir dalan neʼebé tun husi Jeruzalein atu bá Gaza.” Dalan neʼe liu rai-fuik maran. 27 Ho ida-neʼe, nia hamriik no bá, no nia hasoru ema-boot Etiópia nian ida, nia mak mane neʼebé iha kbiit iha liurai-feto Etiópia* nia okos, no nia tau matan ba liurai-feto nia rikusoin tomak. Nia bá Jeruzalein atu adora Maromak, 28 maibé nia fila daudaun no tuur iha ninia kuda-karreta laran no lee ho lian makaʼas livru profeta Isaías nian. 29 Entaun, espíritu santu dehan ba Filipe: “Bá tuir kuda-karreta neʼe no hakbesik nia.” 30 Filipe halai iha sorin no rona nia lee ho lian makaʼas livru profeta Isaías nian, no Filipe husu ba nia: “Ita hatene buat neʼebé Ita lee ka lae?” 31 Nia dehan: “Oinsá mak haʼu bele hatene se la iha ema ida esplika mai haʼu?” No nia konvida Filipe atu saʼe no tuur ho nia. 32 Eskritura neʼebé nia lee ho lian makaʼas mak neʼe: “Hanesan bibi-malae ida, ema lori nia ba oho, no hanesan bibi-malae oan neʼebé la hakilar bainhira ema tesi nia fulun, nia la loke nia ibun. 33 Ema hamoe nia no tesi lia ba nia la tuir buat neʼebé loos. No ema sei la koʼalia tan kona-ba nia mai husi neʼebé, basá ninia moris sei hasai tiha husi mundu neʼe.”

34 Ema Etiópia neʼe dehan ba Filipe: “Favór ida fó-hatene ba haʼu, profeta neʼe koʼalia kona-ba sé? Nia koʼalia kona-ba ninia an ka kona-ba mane seluk?” 35 Hahú husi Eskritura neʼe, Filipe loke nia ibun no fó sai ba ema neʼe liafuan diʼak kona-ba Jesus. 36 No nuʼudar sira laʼo daudaun iha dalan neʼe, sira toʼo ba fatin neʼebé iha bee-lihun, no ema-boot neʼe dehan: “Haree! Bee mak neʼebá; saida tan mak hanetik haʼu atu hetan batizmu?” 37 ——* 38 Ho ida-neʼe, nia haruka atu para kuda-karreta, no Filipe no ema-boot neʼe tama ba bee; no Filipe fó batizmu ba nia. 39 Kuandu nia sai husi bee laran, Jeová nia espíritu lori sai Filipe lalais, no ema-boot neʼe la haree tan nia, no ema neʼe kontinua laʼo tuir dalan ho haksolok. 40 Maibé Filipe laʼo ba Asdod, no nia laʼo liu área neʼe no kontinua haklaken liafuan diʼak iha sidade hotu toʼo nia tama ba sidade Sezareia.

9 Maibé Saul kontinua ameasa Naʼi nia dixípulu sira no hakarak tebes atu halakon sira hotu. No nia bá hasoru amlulik boot, 2 no husu surat husi amlulik boot hodi hatudu ba sinagoga sira iha Damasku, atu nuneʼe nia bele kesi no lori ba Jeruzalein feto no mane sira neʼebé halo tuir Dalan Neʼe.*

3 No kuandu nia besik bá Damasku, derrepente deʼit naroman ida nabilan husi lalehan hodi haleʼu nia, 4 no nia monu ba rai no nia rona lian ida dehan ba nia: “Saul, Saul, tansá mak ó fó-terus ba haʼu?” 5 Saul hatán: “Sé mak Ita, Naʼi?” Nia dehan: “Haʼu mak Jesus, ida neʼebé ó fó-terus daudaun. 6 Maibé, hamriik bá no tama ba sidade, no iha neʼebá mak ó sei hatene saida mak ó tenke halo.” 7 Ema sira neʼebé laʼo hamutuk ho nia hakfodak toʼo la bele koʼalia buat ida, no loloos, sira rona lian neʼe, maibé sira la haree ema ida. 8 No Saul hamriik husi rai, no maski nia matan nakloke hela maibé nia la haree buat ida. Entaun, sira kaer nia liman no lori nia hodi tama ba Damasku. 9 Ba loron tolu nia la haree buat ida, no nia la han no la hemu.

10 Iha Damasku iha dixípulu ida naran Ananias, no Naʼi koʼalia ba nia iha vizaun ida dehan: “Ananias!” Nia hatán: “Haʼu mak neʼe, Naʼi.” 11 Naʼi dehan ba nia: “Hamriik no laʼo ba dalan neʼebé bolu nuʼudar Loos, no iha Judas nia uma buka mane ida naran Saul, nia husi Tarsu. Basá agora daudaun nia halo hela orasaun. 12 No iha vizaun ida nia haree ona ema ida naran Ananias tama no tau liman iha nia leten atu nuneʼe nia bele haree fali.” 13 Maibé Ananias hatán: “Naʼi, haʼu rona ona husi ema barak kona-ba mane neʼe, kona-ba buat aat sira neʼebé nia halo ba Ita-Boot nia povu santu sira iha Jeruzalein. 14 No nia mai iha neʼe ho kbiit husi ulun-naʼin amlulik sira atu hatama ba komarka ema sira neʼebé bolu Ita-nia naran.” 15 Maibé Naʼi dehan ba nia: “Laʼo bá, tanba haʼu hili tiha ona mane neʼe atu lori haʼu-nia naran ba nasaun sira, liurai sira, no ba Izraél nia oan sira. 16 Basá haʼu sei hatudu momoos ba nia kona-ba susar hotu neʼebé nia tenke hasoru tanba haʼu-nia naran.”

17 Entaun, Ananias bá no tama iha uma neʼe, no nia tau liman ba Saul nia leten no dehan: “Saul, haʼu-nia maun, Naʼi Jesus neʼebé mosu ba ó iha dalan bainhira ó laʼo daudaun mai iha neʼe, nia mak haruka haʼu mai atu ó bele haree fali no sai nakonu ho espíritu santu.” 18 No iha tempu neʼe kedas, buat ruma hanesan ikan nia kulit monu husi nia matan, no nia bele haree fali; tuirmai nia hamriik no hetan batizmu, 19 depois neʼe nia han no hetan fali forsa.

No nia hela hamutuk ho dixípulu sira iha Damasku ba loron balu, 20 no nia hahú kedas atu haklaken iha sinagoga sira kona-ba Jesus, katak nia mak Maromak nia Oan-Mane. 21 Maibé ema hotu neʼebé rona nia sai hakfodak tebes no dehan: “Mane neʼe mak haterus sira neʼebé iha Jeruzalein, neʼebé bolu naran neʼe, no nia mai iha neʼe tanba hakarak atu kaer sira no lori sira ba ulun-naʼin amlulik sira, loos ka lae?” 22 Maibé Saul kontinua hetan kbiit liután no nia halo ema judeu sira neʼebé hela iha Damasku sai hakfodak nuʼudar nia esplika ho klaru katak Jesus mak Kristu.

23 No liutiha loron balu, ema judeu sira koʼalia hamutuk atu oho nia. 24 Maibé, Saul rona sira-nia planu neʼe. Sira mós hein odamatan boot sidade nian loron no kalan atu bele oho nia. 25 Entaun, ninia dixípulu sira lori nia no iha kalan sira hatún nia ho raga liuhusi janela iha moru sidade nian.

26 Kuandu toʼo Jeruzalein, nia koko atu halibur an ho dixípulu sira; maibé sira hotu taʼuk, tanba sira la fiar katak nia sai ona dixípulu ida. 27 Entaun, Barnabé ajuda nia no lori nia ba apóstolu sira, no Barnabé fó-hatene ho klaru ba sira oinsá Saul haree Naʼi iha dalan no katak Naʼi koʼalia ona ho nia, no mós oinsá nia koʼalia ho aten-brani hodi Jesus nia naran iha Damasku. 28 No nia kontinua hamutuk ho sira, no nia laʼo ho livre* iha Jeruzalein, no koʼalia ho aten-brani kona-ba Naʼi nia naran; 29 nia koʼalia no diskute malu ho ema judeu sira neʼebé koʼalia lia-gregu. Maibé ema sira-neʼe koko atu oho nia. 30 Kuandu maun-alin sira hatene kona-ba neʼe, sira lori nia hodi tun ba Sezareia no haruka nia ba Tarsu.

31 Tuirmai, kongregasaun hotu iha Judeia, Galileia, no Samaria tomak tama iha tempu dame nian, no sira kontinua sai metin liután iha fiar; no dixípulu barak aumenta liután tanba sira moris ho hamtaʼuk ba Jeová no moris tuir kbiit neʼebé sira simu liuhusi espíritu santu.

32 No bainhira Pedro laʼo hodi vizita área hotu, nia mós tun hodi vizita santu sira neʼebé hela iha Lida. 33 Iha neʼebá nia haree mane ida naran Eneias, mane neʼe toba deʼit iha nia kama ba tinan ualu ona, tanba nia isin-matek. 34 No Pedro dehan ba nia: “Eneias, Jesus Kristu fó isin-diʼak ba ó. Hamriik no hadiʼa ó-nia kama bá.” No nia hamriik kedas. 35 No ema hotu neʼebé hela iha Lida no Saron haree ida-neʼe, no ema sira-neʼe tau fiar ba Naʼi.

36 No iha Jope, iha dixípulu ida naran Tabita, katak Dorkada. Nia halo hahalok diʼak barak no nia ajuda ema kiak sira. 37 Maibé iha loron sira neʼebá nia sai moras no mate. Entaun, sira fó-hariis nia no tau nia iha kuartu iha andár leten. 38 No tanba sidade Lida besik Jope, entaun kuandu dixípulu sira rona katak Pedro iha Lida, sira haruka mane naʼin-rua bá no husu Pedro: “Favór ida, mai lalais toʼo ami.” 39 Ho ida-neʼe Pedro hamriik no bá hamutuk ho sira. No kuandu nia toʼo, sira lori nia ba kuartu iha leten; no feto-faluk hotu mai hodi tanis no hatudu ba nia roupa hotu neʼebé Dorkada halo kuandu nia sei hamutuk ho sira. 40 Maibé Pedro haruka ema hotu sai ba liʼur, no nia hakneʼak no halo orasaun. Tuirmai, nia fila oin ba mate-isin neʼe, no dehan: “Tabita, hadeer!” No feto neʼe loke nia matan, no kuandu nia haree Pedro, nia tuur loos. 41 Pedro lolo nia liman no ajuda nia hamriik, no Pedro bolu santu sira no mós feto-faluk sira no hatudu ba sira katak Tabita moris ona. 42 No ema hotu iha Jope hatene kona-ba neʼe, no ema barak tau fiar ba Naʼi. 43 No Pedro hela iha Jope ba loron balu; nia hela iha Simão, badain-kulit, nia uma.

10 No iha Sezareia iha mane ida naran Cornélio, nia mak kapitaun ida ba tropa sira neʼebé bolu nuʼudar batallaun Itália nian. 2 Nia hamtaʼuk Maromak no adora Maromak hamutuk ho ninia família tomak, no nia halo buat diʼak barak ba ema kiak sira no harohan beibeik ba Maromak. 3 No maizumenus iha tuku tolu lokraik nia haree iha vizaun Maromak nia anju ida mai no dehan ba nia: “Cornélio!” 4 No Cornélio sai taʼuk tebes no hateke ba nia hodi dehan: “Saida, Naʼi?” Anju neʼe dehan ba nia: “Maromak rona ona no simu ó-nia orasaun no nia haree ona buat neʼebé ó halo ba ema kiak sira. 5 Entaun agora haruka ema ba Jope no bolu ema ida naran Simão neʼebé ema hanaran Pedro. 6 Mane neʼe hela iha Simão, badain-kulit, nia uma besik tasi.” 7 Kuandu anju neʼebé koʼalia ho nia bá tiha, nia bolu kedas ninia atan naʼin-rua no nia mós hili soldadu ida neʼebé hamtaʼuk Maromak husi sira neʼebé sempre serbí nia, 8 no nia konta buat hotu ba sira no haruka sira ba Jope.

9 Loron tuirmai nuʼudar sira laʼo daudaun no besik ona sidade, Pedro saʼe ba uma-leten atu halo orasaun no neʼe maizumenus tuku sanulu-resin-rua meiudia. 10 Maibé nia sai hamlaha tebes no hakarak atu han. Kuandu sira prepara hela ai-han, nia simu vizaun ida 11 no nia haree lalehan nakloke no buat neʼebé hanesan hena boot ida tun mai toʼo rai, no ida-neʼe tun mai hanesan ema kaer metin hela nia lidun haat; 12 no iha hena neʼe nia laran iha animál oioin, iha animál ain haat, iha animál neʼebé dolar iha rai, no mós iha manu sira iha lalehan. 13 No lian ida dehan ba nia: “Pedro, hamriik bá, oho no han!” 14 Maibé Pedro hatete: “Naʼi, haʼu sei la halo ida-neʼe, tanba haʼu nunka han buat neʼebé foʼer no la moos.” 15 No lian neʼe koʼalia ba nia ba dala segundu dehan: “Ó keta bolu buat neʼebé Maromak hamoos tiha ona nuʼudar buat foʼer.” 16 No lian neʼe mosu tan ba dala terseiru, no tuirmai hena neʼe foti saʼe kedas ba lalehan.

17 No nuʼudar Pedro hanoin kleʼan kona-ba vizaun neʼe katak sá, mane sira neʼebé Cornélio haruka toʼo mai. Sira husu tiha ona Simão nia uma iha neʼebé no agora sira hamriik hela iha odamatan boot. 18 No sira bolu uma-naʼin no husu se Simão neʼebé ema hanaran Pedro hela iha neʼe. 19 Nuʼudar Pedro hanoin daudaun kona-ba vizaun neʼe, espíritu santu dehan: “Haree! Mane naʼin-tolu buka ó. 20 Tan neʼe, hamriik, tun ba kraik no bá hamutuk ho sira, keta laran-rua, tanba haʼu mak haruka sira.” 21 Nuneʼe Pedro tun no dehan ba sira: “Haʼu mak ida neʼebé imi buka. Tanbasá mak imi mai iha neʼe?” 22 Sira dehan: “Cornélio, kapitaun tropa nian, mak mane ida neʼebé hamtaʼuk Maromak no ema judeu hotu koʼalia diʼak kona-ba nia. No liuhusi anju santu ida, Maromak haruka Cornélio atu konvida Ita-Boot ba nia uma no rona buat neʼebé Ita sei fó sai.” 23 Tan neʼe nia konvida sira tama ba uma no tau matan ba sira.

Loron tuirmai nia hamriik no bá ho sira, no maluk kristaun balu husi Jope mós bá hamutuk ho nia. 24 Loron tuirmai, nia toʼo ba Sezareia. Tuir loloos, Cornélio hein hela sira no nia bolu hamutuk ona ninia família no belun diʼak sira. 25 Kuandu Pedro tama, Cornélio mai hasoru nia no monu ain hodi adora nia. 26 Maibé Pedro kaer nia no dehan: “Hamriik bá; haʼu mós ema deʼit.” 27 No nuʼudar Pedro koʼalia hela ba nia, Pedro tama no haree ema barak neʼebé halibur hamutuk, 28 no nia dehan ba sira: “Imi hatene ona katak tuir lei ema judeu ida la bele halibur an ka hakbesik ba ema husi nasaun seluk; maski nuneʼe, Maromak hatudu ona ba haʼu katak haʼu labele bolu ema ida foʼer ka la moos. 29 Nuneʼe, kuandu Maromak haruka haʼu, haʼu mai la ho laran-todan. Tan neʼe haʼu husu ba imi: Tansá mak imi bolu haʼu mai?”

30 Ho ida-neʼe Cornélio dehan: “Loron haat liubá, iha oras hanesan neʼe, katak tuku tolu lokraik, haʼu halo orasaun, no derrepente deʼit mane ida ho hatais neʼebé nabilan hamriik iha haʼu-nia oin 31 no dehan: ‘Cornélio, Maromak rona ona ó-nia orasaun no nia hanoin-hetan buat neʼebé ó halo ba ema kiak sira. 32 Tan neʼe, haruka ema ba Jope no bolu Simão, neʼebé ema hanaran Pedro, nia hela iha Simão, badain-kulit, nia uma besik tasi.’ 33 Tan neʼe, haʼu haruka kedas ema ba Ita-Boot, no Ita hatudu laran-diʼak hodi mai iha neʼe. Entaun agora, ami halibur iha neʼe iha Maromak nia oin hodi rona buat neʼebé Jeová haruka Ita atu fó sai ba ami.”

34 Ho ida-neʼe Pedro loke nia ibun no dehan: “Agora haʼu hatene ho didiʼak katak Maromak la todan ba sorin, 35 maibé iha nasaun hotu, Maromak simu ema hotu neʼebé taʼuk ba nia no halo buat loos. 36 Nia haruka liafuan diʼak kona-ba dame ba Izraél nia oan sira liuhusi Jesus Kristu: Jesus neʼe mak Naʼi ba ema hotu. 37 Imi hatene ona buat neʼebé ema koʼalia depois tempu neʼebé João haklaken kona-ba batizmu; basá hahú husi Galileia toʼo Judeia tomak 38 ema koʼalia kona-ba Jesus Nazaré, ida neʼebé Maromak hili nuʼudar Kristu liuhusi espíritu santu no kbiit, no nia laʼo haleʼu rai neʼe hodi halo diʼak no kura ema sira neʼebé Diabu haterus; tanba Maromak hamutuk ho nia. 39 No ami mak sasin ba buat hotu neʼebé nia halo iha ema judeu nia rain no iha Jeruzalein; maibé sira oho nia hodi tara nia iha ai-riin ida. 40 Maromak halo nia moris hiʼas iha loron terseiru no fó lisensa ba nia atu mosu ba ema, 41 maski nuneʼe laʼós ema hotu haree nia, só deʼit sasin sira neʼebé Maromak hili nanis ona, katak ami neʼebé han no hemu ho nia depois nia moris fali husi mate. 42 No nia mós haruka ami atu haklaken ba ema no fó sasin ho didiʼak katak nia mak Ida neʼebé Maromak hili atu tesi lia ba ema mate no ba ema moris. 43 Profeta hotu fó sasin kona-ba nia, atu nuneʼe ema hotu neʼebé tau fiar ba nia hetan perdua ba sira-nia sala liuhusi ninia naran.”

44 Nuʼudar Pedro koʼalia daudaun kona-ba buat sira-neʼe, espíritu santu tun ba sira hotu neʼebé rona Maromak nia liafuan. 45 No fiar-naʼin judeu sira* neʼebé mai hamutuk ho Pedro, sira hakfodak tanba ema husi nasaun seluk mós simu Maromak nia prezente neʼebé lalika selu, katak espíritu santu. 46 Basá sira rona ema sira-neʼe koʼalia lia oioin no fó hahiʼi ba Maromak. Tuirmai, Pedro dehan: 47 “Ema sira-neʼe simu ona espíritu santu hanesan ita, tan neʼe sé mak bele bandu sira atu labele hetan batizmu ho bee?” 48 Ho ida-neʼe, nia haruka atu fó batizmu ba sira iha Jesus Kristu nia naran. Tuirmai, sira husu nia atu hela tan hamutuk ho sira ba loron balu.

11 Apóstolu sira no mós maun-alin sira iha Judeia rona katak ema husi nasaun seluk mós simu ona Maromak nia liafuan. 2 Entaun, kuandu Pedro toʼo iha Jeruzalein, sira neʼebé apoia sirkunsizaun hahú haksesuk malu ho nia, 3 no sira dehan katak nia tama ona iha ema neʼebé la hetan sirkunsizaun nia uma no nia han hamutuk ho sira. 4 Ho ida-neʼe, Pedro hahú esplika ba sira dehan:

5 “Kuandu haʼu iha Jope no halo hela orasaun, haʼu simu vizaun ida, no haʼu haree buat neʼebé hanesan hena boot ida tun husi lalehan, no ida-neʼe tun mai hanesan ema kaer metin hela nia lidun haat, no neʼe tun mai toʼo haʼu. 6 Kuandu haʼu hateke didiʼak ba laran, haʼu haree iha animál ain haat husi rai, iha animál fuik, iha animál neʼebé dolar, no iha manu sira iha lalehan. 7 No haʼu mós rona lian ida dehan mai haʼu: ‘Pedro, hamriik bá, oho no han!’ 8 Maibé haʼu hatete: ‘Naʼi, haʼu sei la halo ida-neʼe, tanba haʼu nunka han buat neʼebé foʼer no la moos.’ 9 No ba dala segundu lian neʼe dehan: ‘Ó keta bolu buat neʼebé Maromak hamoos tiha ona nuʼudar buat foʼer.’ 10 Lian neʼe mosu tan ba dala terseiru, no tuirmai hena neʼe foti saʼe fali ba lalehan. 11 No, haree! iha tempu neʼe duni mak mane naʼin-tolu hamriik iha uma oin, tanba ema ida mak haruka mane sira-neʼe mai husi Sezareia atu buka haʼu. 12 Entaun espíritu santu fó-hatene haʼu atu bá tuir sira hodi la laran-rua. No maun-alin naʼin-neen sira-neʼe mós bá hamutuk ho haʼu, no ami tama ba mane neʼe nia uma.

13 “Nia konta ba ami oinsá anju ida hamriik iha nia uma no dehan: ‘Haruka ema ba Jope no bolu Simão, neʼebé hanaran Pedro, 14 no nia sei fó-hatene ó kona-ba buat neʼebé sei fó salvasaun ba ó no ó-nia umakain tomak.’ 15 No kuandu haʼu hahú koʼalia ba sira, espíritu santu tun ba sira hanesan tempu neʼebé espíritu neʼe tun ba ita dala primeiru. 16 Ho ida-neʼe haʼu hanoin fali Naʼi nia liafuan, neʼebé dala ruma nia dehan: ‘João fó batizmu ba imi ho bee, maibé imi sei hetan batizmu hodi espíritu santu.’ 17 Tan neʼe, se Maromak fó ba sira prezente neʼebé lalika selu hanesan nia fó ba ita neʼebé fiar ona Jesus Kristu, entaun sé mak haʼu atu haʼu bele hanetik Maromak?”

18 No kuandu sira rona buat sira-neʼe, sira la haksesuk malu tan ho Pedro, no sira hahiʼi Maromak hodi dehan: “Loos duni, Maromak loke ona dalan ba ema husi nasaun seluk atu hakribi sala hodi bele hetan moris.”

19 No sira neʼebé laʼo namkari tanba terus neʼebé mosu depois Estevão nia mate, sira laʼo toʼo Fenísia, Xipre, no Antiokia, no sira haklaken deʼit ba ema judeu sira. 20 Maibé husi sira-neʼe, iha mane balu neʼebé mai husi Xipre no Sirene, no sira laʼo ba Antiokia no hahú haklaken ba ema neʼebé koʼalia lia-gregu, no sira fó sai liafuan diʼak kona-ba Naʼi Jesus. 21 Liután neʼe, Jeová hamutuk ho sira, no ema barak sai fiar-naʼin no laʼo tuir Naʼi.

22 Kongregasaun iha Jeruzalein rona kona-ba neʼe, no sira haruka Barnabé hodi bá Antiokia. 23 Kuandu nia toʼo no haree Maromak nia laran-diʼak, nia haksolok no hahú fó laran-manas ba sira hotu atu kontinua laran-metin ba Naʼi; 24 tanba nia mak ema neʼebé diʼak no nakonu ho espíritu santu no fiar. Tan neʼe mak ema-lubun tau fiar ba Naʼi. 25 Entaun, nia laʼo ba Tarsu atu buka Saul 26 no depois hetan tiha nia, Barnabé lori nia ba Antiokia. Ba tinan ida tomak sira halibur hamutuk ho kongregasaun no hanorin ema-lubun boot. No iha Antiokia mak dixípulu sira simu naran kristaun ba dala primeiru tuir Maromak nia hakarak.

27 No iha loron sira neʼebá, profeta sira tun husi Jeruzalein hodi toʼo Antiokia. 28 No profeta ida naran Ágabo hamriik, no liuhusi espíritu santu nia fó sai katak hamlaha boot besik ona atu mosu ba rai tomak; no ida-neʼe mosu duni iha Cláudio nia tempu. 29 Entaun dixípulu sira-neʼe deside katak sira ida-idak sei fó ajuda tuir sira-nia kbiit, no haruka neʼe ba maun-alin sira neʼebé hela iha Judeia; 30 no sira halo nuneʼe duni hodi haruka ajuda neʼe ba katuas sira liuhusi Barnabé no Saul.

12 Iha tempu neʼe Liurai Herodes hahú fó-terus ba sira balu iha kongregasaun neʼebá. 2 No ho surik nia oho Tiago, João nia maun.* 3 Kuandu nia haree katak ema judeu sira kontente ho ida-neʼe, nia mós kaer Pedro. Iha tempu neʼe mak Festa Paun Fermentu-Laek nian. 4 Nia kaer Pedro no hatama iha komarka, no nia tau guarda grupu haat hodi troka malu atu hein nia. Grupu ida-idak iha soldadu naʼin-haat. No nia hakarak atu hatudu Pedro iha povu nia oin depois Festa Salvasaun nian. 5 No kuandu Pedro iha hela komarka laran, kongregasaun halo orasaun ho laran-manas ba Maromak kona-ba nia.

6 No iha kalan antes Herodes atu hatudu sai Pedro ba povu, Pedro toba hela iha komarka no ema kesi nia ho korrente hamutuk ho soldadu naʼin-rua, no iha mós guarda sira neʼebé hein odamatan komarka nian. 7 Maibé, haree! Jeová nia anju hamriik besik, no naroman sai nabilan iha komarka laran. No anju neʼe book Pedro nia sorin no fanu nia dehan: “Hamriik lalais!” No korrente monu sai husi Pedro nia liman. 8 Anju neʼe dehan ba nia: “Prepara ó-nia an no tau ó-nia sandálias.” Nia halo nuneʼe duni. Ikusmai, anju neʼe dehan tan ba nia: “Tau ó-nia unuk no laʼo tuir haʼu.” 9 No nia sai hodi kontinua laʼo tuir anju neʼe, maibé nia la hatene katak buat neʼebé mosu daudaun liuhusi anju neʼe mak loos duni. Nia hanoin katak buat neʼebé nia haree mak vizaun deʼit. 10 Depois laʼo liu tiha guarda primeiru no segundu, sira toʼo ba odamatan besi neʼebé atu sai husi komarka hodi tama ba sidade, no odamatan neʼe nakloke mesak ba sira. Kuandu sira sai tiha, sira laʼo hamutuk iha dalan, no derrepente deʼit anju neʼe husik hela nia. 11 No iha tempu neʼe, Pedro foin komprende no dehan: “Agora haʼu hatene ho didiʼak katak Jeová haruka nia anju atu salva haʼu husi Herodes nia liman no husi buat naran deʼit neʼebé ema judeu sira hakarak atu halo ba haʼu.”

12 Depois hanoin tiha ida-neʼe, nia laʼo ba Maria nia uma. Maria mak João, neʼebé bolu Marcos, nia inan. Iha uma neʼe iha dixípulu balu neʼebé halibur hamutuk no halo hela orasaun. 13 No kuandu nia tuku odamatan boot, atan-feto ida naran Rode sai atu haree sé mak iha odamatan. 14 Bainhira nia hatene Pedro nia lian, nia haksolok tebetebes toʼo haluha loke odamatan boot, no nia halai tama ba laran hodi fó-hatene katak Pedro mak hamriik iha odamatan. 15 Sira dehan ba nia: “Ó bulak ona.” Maibé nia dehan nafatin katak Pedro mai duni. Sira hatete: “Neʼe mak ninia anju.” 16 Maibé Pedro kontinua tuku odamatan. Kuandu sira loke, sira haree nia no sira hakfodak. 17 No nia halo sinál ba sira ho nia liman atu nonook no nia konta ba sira oinsá Jeová hasai nia husi komarka, no nia dehan: “Fó-hatene buat sira-neʼe ba Tiago no maun-alin sira seluk.” Depois neʼe, nia sai no laʼo fali ba fatin seluk.

18 No kuandu rai loron ona, soldadu sira hanoin barak kona-ba Pedro bá tiha neʼebé. 19 Herodes haruka atu buka nia ho didiʼak, no kuandu la hetan nia, Herodes husu guarda sira kona-ba neʼe, no tuirmai nia haruka ema atu lori guarda sira bá hodi hetan kastigu. No Herodes laʼo tun husi Judeia hodi toʼo ba Sezareia no hela iha neʼebá ba loron balu.

20 Herodes hirus tebes ho ema Tiro no Sidon. Entaun, ema sira-neʼe hotu ho hanoin ida deʼit mai hasoru Herodes. Ulukliu sira halo Blasto apoia sira, nia mak mane neʼebé tau matan ba liurai nia umakain. Tuirmai sira hahú buka dame ho liurai, tanba sira-nia nasaun hetan ai-han husi liurai nia rai. 21 Maibé iha loron-boot ida, Herodes tau hatais liurai nian no tuur iha kadeira tesi-lia nian no hahú koʼalia ba sira hotu. 22 No ema sira neʼebé halibur hamutuk hahú hakilar dehan: “Neʼe maromak ida nia lian, laʼós ema nian!” 23 Iha tempu neʼe kedas, Jeová nia anju fó moras ba nia, tanba nia la fó glória ba Maromak, no ular kiʼik han nia no nia mate.

24 Maibé Jeová nia liafuan kontinua sai belar no fiar-naʼin foun sai barak liután.

25 Kona-ba Barnabé no Saul, depois sira halaʼo tiha sira-nia knaar atu fó ajuda iha Jeruzalein, sira fila fali no sira lori mós João, neʼebé bolu nuʼudar Marcos.

13 No kongregasaun iha Antiokia iha profeta no mestre sira; sira-neʼe mak Barnabé no Simeaun neʼebé bolu mós Metan, Saul, Lúsio husi Sirene no Manaen neʼebé eskola hamutuk ho Herodes, ukun-naʼin distritu nian. 2 No nuʼudar sira serbí Jeová no halo jejún, espíritu santu dehan: “Imi haketak Barnabé no Saul ba haʼu hodi sira bele halo serbisu neʼebé haʼu bolu sira atu halo.” 3 Entaun, dala ida tan sira halo jejún no halo orasaun no tau liman ba sira naʼin-rua no husik sira bá.

4 Ho ida-neʼe, espíritu santu haruka sira hodi tun ba Seleúsia no husi neʼebá sira saʼe ró bá Xipre. 5 No kuandu sira toʼo ba Salamina, sira hahú haklaken Maromak nia liafuan iha ema judeu nia sinagoga sira. João mós laʼo hamutuk ho sira hodi ajuda sira.

6 Sira husik hela Salamina no laʼo toʼo Pafos, no sira hasoru mane judeu ida naran Barjesus; mane neʼe mak ema matan-dook no profeta falsu. 7 Nia halo serbisu ba governadór Sérgio Paulo, governadór neʼe mak ema matenek ida. No governadór neʼe bolu Barnabé no Saul tanba nia hakarak tebes atu rona Maromak nia liafuan. 8 Maibé Elimas, ema matan-dook neʼe, hahú kontra sira no koko atu halo governadór la rona ba sira. (Naran Elimas iha arti katak matan-dook.) 9 Saul, neʼebé mós bolu nuʼudar Paulo, sai nakonu ho espíritu santu no hateke didiʼak ba nia 10 hodi dehan: “Ó mak ema neʼebé nakonu ho lia-bosok no buat aat oioin, ó Diabu nia oan no inimigu ba buat loos. Tansá mak ó kontinua hanetik Jeová nia dalan neʼebé loos? 11 No agora, Jeová foti nia liman hasoru ó, no ó sei sai matan-delek, no la haree tan loro-matan ba tempu balu.” Iha tempu neʼe kedas abuabu mahar taka netik nia matan, no nia matan sai nakukun. No nia laʼo haleʼu hodi buka ema atu kaer nia liman hodi lori nia. 12 No kuandu governadór haree buat neʼebé foin mosu, nia mós sai ema fiar-naʼin ida basá nia hakfodak ho Jeová nia hanorin.

13 Paulo hamutuk ho ninia maluk sira saʼe ró iha Pafos no toʼo ba Perga iha Pamfília. Maibé João haketak an husi sira no fila fali ba Jeruzalein. 14 No sira sai husi Perga no kontinua laʼo hodi bá Antiokia iha Pisídia, no iha loron Sábadu sira tama ba sinagoga no tuur iha neʼebá. 15 Kuandu ema lee tiha husi Ukun-Fuan no mós husi livru profeta sira-nian, sinagoga nia ulun-naʼin husu ba Paulo no Barnabé dehan: “Maluk sira, se imi iha liafuan ruma atu fó laran-manas ba povu, bele fó-hatene bá.” 16 Entaun Paulo hamriik, no halo sinál ho nia liman no dehan:

“Imi, ema Izraél sira no mós ema seluk neʼebé hamtaʼuk Maromak, rona haʼu bá. 17 Maromak Izraél sira-nian hili ona ita-nia beiʼala sira, no nia ajuda povu neʼe kuandu sira sei hela nuʼudar ema estranjeiru iha rai-Ejitu no nia lori sira sai ho kbiit neʼebé boot.* 18 No ba tinan haatnulu iha rai-fuik nia tahan sira hodi hatudu pasiénsia. 19 Tuirmai, depois nia halakon tiha nasaun hitu iha rai-Kanaán, nia fahe rai neʼe no fó ba Izraél nia suku ida-idak: 20 buat hotu neʼe mosu maizumenus iha tinan 450 nia laran.

“No depois ida-neʼe nia fó juis ba sira toʼo tempu profeta Samuel nian. 21 Maibé hahú husi tempu neʼe sira husu liurai ida, no Maromak fó ba sira Kis nia oan Saul, neʼebé husi suku Benjamin, no nia ukun ba tinan haatnulu. 22 Depois hasai tiha Saul, Maromak foti David nuʼudar sira-nia liurai. Kona-ba mane neʼe mak nia fó sasin dehan: ‘Haʼu hetan ona Jesse nia oan David, nia mak ema neʼebé monu loos ba haʼu-nia laran, no nia sei halo buat hotu neʼebé haʼu hakarak.’ 23 No Maromak foti ona salvadór ida ba Izraél husi mane neʼe nia bei-oan hodi tuir buat neʼebé Maromak promete ona. No salvadór neʼe mak Jesus. 24 Antes ema neʼe mai, João haklaken iha ema hotu nia oin atu povu Izraél hetan batizmu hodi hatudu katak sira hakribi sala. 25 Maibé nuʼudar João kumpre daudaun ninia knaar, nia dehan: ‘Imi hanoin haʼu neʼe sé? Haʼu laʼós nia. Maibé, haree! ida neʼebé mai tuir haʼu, ninia sandálias iha nia ain mós haʼu la merese atu kore.’

26 “Maun-alin sira, Abraão nia bei-oan sira no mós ema seluk neʼebé hamtaʼuk Maromak: Maromak haruka ona liafuan salvasaun nian neʼe mai ita. 27 No ema neʼebé hela iha Jeruzalein no sira-nia ukun-naʼin sira la simu mane neʼe nuʼudar Mesias, maibé kuandu sira tesi lia ba nia, sira kumpre buat neʼebé fó sai liuhusi profeta sira, katak buat neʼebé sira lee Sábadu-Sábadu ho lian makaʼas. 28 Maski sira la hetan razaun ida atu fó kastigu-mate ba nia, maibé sira husu Pilatos atu oho nia. 29 No kuandu sira kumpre tiha ona buat hotu neʼebé hakerek nanis kona-ba nia, sira foti nia husi ai-riin no hakoi nia iha rate ida. 30 Maibé Maromak halo nia moris fali husi mate; 31 no ba loron barak nia mosu ba sira neʼebé uluk laʼo hamutuk ho nia husi Galileia hodi toʼo ba Jeruzalein, no agora sira mak sai nuʼudar ninia sasin ba povu sira.

32 “Entaun, ami haklaken ba imi liafuan diʼak kona-ba promesa neʼebé halo ona ho ita-nia beiʼala sira. 33 Maromak kumpre duni ida-neʼe ba ita, nuʼudar sira-nia bei-oan, hodi fó moris-hiʼas ba Jesus; hanesan hakerek nanis ona iha salmu segundu: ‘Ó mak haʼu-nia oan-mane, iha loron neʼe haʼu sai ona ó-nia Aman.’ 34 Maromak halo nia moris hiʼas husi mate no nia sei nunka sai fali ema ho isin neʼebé bele mate no dodok. Maromak hatudu katak neʼe loos kuandu nia dehan: ‘Ho laran-metin haʼu sei hatudu ba imi domin neʼebé haʼu promete ona ba David.’ 35 No nia dehan tan iha salmu seluk: ‘Ita sei la husik ida neʼebé laran-metin ba Ita atu nia isin sai dodok.’ 36 Kona-ba David, nia halo Maromak nia hakarak durante ninia moris tomak no depois neʼe nia mate,* no ema hakoi nia hamutuk ho ninia beiʼala sira, no ninia isin sai dodok. 37 Maibé, kona-ba ida neʼebé Maromak fó moris-hiʼas, ninia isin la sai dodok.

38 “Tan neʼe, maun-alin sira, haʼu fó-hatene ba imi katak Maromak fó perdua ba sala sira liuhusi ema neʼe. 39 Ukun-fuan Moisés nian la bele halo imi sai ema loos, maibé liuhusi ema neʼe, Maromak dehan sai katak ema hotu neʼebé fiar mak ema loos. 40 Tan neʼe, kuidadu bá atu buat neʼebé profeta sira dehan la mosu ba imi, katak: 41 ‘Imi neʼebé hamnasa kona-ba buat neʼebé haʼu halo, imi sei haree ida-neʼe no sei hakfodak. Tuirmai imi sei lakon. Basá imi sei nunka fiar buat neʼebé haʼu halo iha imi-nia loron sira maski ema ruma esplika ba imi ho didiʼak.’”

42 No kuandu sira laʼo sai daudaun, ema sira-neʼe hahú husu sira atu bele koʼalia tan kona-ba buat sira-neʼe iha loron Sábadu tuirmai. 43 Depois sira hotu husik tiha sinagoga neʼe, ema judeu barak no mós sira neʼebé simu ona relijiaun judeu nian bá hodi laʼo tuir Paulo no Barnabé. No sira naʼin-rua koʼalia hodi fó laran-manas ba sira atu kontinua simu Maromak nia laran-diʼak.

44 No iha loron Sábadu tuirmai, besik ema hotu iha sidade tomak halibur an hamutuk atu rona Jeová nia liafuan. 45 Kuandu ema judeu sira haree ema-lubun neʼe, sira sai laran-moras tebes no hahú koʼalia aat hodi kontra buat neʼebé Paulo dehan. 46 Tuirmai, Paulo no Barnabé ho aten-brani dehan ba sira: “Maromak nia liafuan tenke fó sai uluk ba imi. Maibé imi la simu ida-neʼe no tan neʼe imi hatudu sai ona katak imi la merese ba moris rohan-laek. Neʼe duni, agora ami fó sai fali ida-neʼe ba ema husi nasaun seluk. 47 Tuir loloos, Jeová haruka ami ho liafuan sira tuirmai neʼe: ‘Haʼu hili ona ó nuʼudar naroman ba nasaun sira atu ó lori salvasaun ba mundu tomak.’”*

48 Kuandu ema husi nasaun sira rona kona-ba neʼe, sira sai haksolok no fó glória ba Jeová nia liafuan, no ema hotu neʼebé prontu atu simu lia-loos neʼebé lori ba moris rohan-laek, ema sira-neʼe sai fiar-naʼin. 49 Liután neʼe, Jeová nia liafuan sai belar iha rai neʼe tomak. 50 Maibé ema judeu sira lori lia ba feto naran-boot sira neʼebé adora Maromak no mós ba ema-boot sira iha sidade neʼe, no sira book ema atu fó-terus ba Paulo no Barnabé no soe sira ba sidade nia liʼur. 51 Sira naʼin-rua liki rai-rahun* husi sira-nia ain hasoru ema sira-neʼe. Tuirmai, sira laʼo ba Ikónio. 52 No dixípulu sira kontinua haksolok no sai nakonu ho espíritu santu.

14 No iha Ikónio, Paulo no Barnabé tama ba ema judeu sira-nia sinagoga no koʼalia ho matenek toʼo ema-lubun husi ema judeu no ema gregu sai fiar-naʼin. 2 Maibé ema judeu sira seluk neʼebé la fiar, sira book ema neʼebé laʼós judeu hodi halo sira hanoin aat hasoru maun-alin sira. 3 Tan neʼe, ba semana balu tan, Paulo no Barnabé hela iha Ikónio hodi haklaken ho aten-brani liuhusi Jeová nia kbiit. No Maromak uza sira atu halo sinál no milagre oioin atu hatudu katak mensajen neʼebé sira haklaken mak mensajen kona-ba Maromak nia laran-diʼak. 4 Maibé ema iha sidade neʼe haketak malu, balu apoia ema judeu sira no balu apoia apóstolu sira. 5 Tuirmai, ema husi nasaun sira hamutuk ho ema judeu no mós sira-nia ukun-naʼin sira koko atu halo aat ba Paulo no Barnabé hodi tuda sira. 6 Maibé kuandu ema fó-hatene ba Paulo no Barnabé kona-ba neʼe, sira hasees an hodi bá sidade Likaónia, Listra, no Derbe no ba sidade sira neʼebé besik, 7 no sira kontinua haklaken liafuan diʼak iha fatin sira-neʼe.

8 Iha Listra iha mane ida neʼebé ain-kudeʼik. Nia ain-kudeʼik husi moris-mai kedas no nia nunka laʼo. 9 Mane neʼe rona Paulo koʼalia, no Paulo hateke didiʼak ba nia no haree katak nia iha fiar atu sai isin-diʼak, 10 no Paulo koʼalia ho lian makaʼas: “Hamriik loos bá.” No mane neʼe haksoit no hahú laʼo. 11 Kuandu ema-lubun haree buat neʼebé Paulo halo, sira hakilar iha lian Likaónia nian dehan: “Maromak sira fila an ba ema no tun tiha mai ita!” 12 No sira hahú bolu Barnabé nuʼudar Zeus no Paulo nuʼudar Hermes tanba Paulo mak koʼalia barak ba sira. 13 No templu maromak Zeus nian besik sidade neʼe; no amlulik Zeus nian lori karau-aman no koroa neʼebé halo husi ai-tahan, no nia mai iha odamatan sidade nian no hakarak atu oho karau sira-neʼe hodi fó adorasaun ba Paulo no Barnabé.

14 Maibé kuandu apóstolu Barnabé no Paulo rona kona-ba neʼe, sira lees sira-nia unuk no halai tama ba ema-lubun nia leet, no koʼalia ho lian makaʼas 15 hodi dehan: “Maluk sira, tansá mak imi halo buat sira-neʼe? Ami mós ema no iha fraku hanesan imi, no ami fó sai liafuan diʼak ba imi atu imi bele hasees an husi buat sira-neʼe neʼebé la iha folin no adora fali Maromak neʼebé moris, ida neʼebé halo lalehan, rai, tasi, no buat hotu neʼebé iha sira. 16 Iha tempu uluk, nia husik nasaun hotu atu laʼo tuir deʼit sira-nia dalan rasik. 17 Maibé, nia fó sasin kona-ba nia an liuhusi buat diʼak neʼebé nia halo, nia fó udan husi lalehan no fó ai-fuan iha nia tempu, hodi fó imi ai-han barak no halo nakonu imi-nia laran ho ksolok.” 18 Maski sira koʼalia liafuan sira-neʼe, maibé sira presiza hakaʼas an liután toʼo ikusmai sira bele hanetik ema-lubun neʼe atu adora sira.

19 Maibé ema judeu toʼo mai husi Antiokia no Ikónio no sira soran ema-lubun, no sira tuda Paulo no lori sai nia ba sidade nia liʼur no sira hanoin katak nia mate ona. 20 Maibé, kuandu dixípulu sira halibur haleʼu nia, nia hamriik no tama ba sidade laran. No loron tuirmai nia no Barnabé husik fatin neʼe hodi laʼo ba Derbe. 21 No depois haklaken tiha liafuan diʼak iha sidade neʼe no ajuda tiha ema barak atu sai dixípulu, sira fila fali ba Listra, Ikónio, no Antiokia. 22 No iha neʼebá, sira hametin dixípulu sira no fó laran-manas ba sira atu laran-metin nafatin iha fiar hodi dehan: “Ita tenke tama ba Maromak nia Ukun liuhusi susar barak.” 23 Liután neʼe, sira hili katuas sira iha kongregasaun ida-idak, no sira hasaʼe orasaun ho jejún, tuirmai sira entrega katuas sira-neʼe ba Jeová, ida neʼebé sira fiar ona.

24 Depois neʼe, sira laʼo liu Pisídia hodi toʼo ba Pamfília, 25 no kuandu koʼalia tiha Maromak nia liafuan iha Perga, sira tun ba Atália. 26 No husi neʼebá, sira saʼe ró hodi bá Antiokia. Iha sidade neʼe mak uluk maun-alin sira husu Maromak nia laran-diʼak ba Paulo no Barnabé atu bele halo serbisu neʼebé agora sira halo hotu ona.

27 Kuandu sira toʼo no halibur tiha kongregasaun hamutuk, sira hahú konta buat barak neʼebé Maromak halo ona liuhusi sira, no katak Maromak loke ona odamatan ba nasaun sira atu sai fiar-naʼin. 28 Ho ida-neʼe, sira hela ho dixípulu sira ba tempu balu.

15 No ema balu tun husi Judeia no hahú hanorin maun-alin sira dehan: “Se imi la simu sirkunsizaun hodi tuir ukun-fuan Moisés nian, imi sei la hetan salvasaun.” 2 Maibé kuandu Paulo no Barnabé haksesuk malu makaʼas ho sira, dixípulu sira halo arranju atu Paulo no Barnabé, no mós dixípulu balu atu saʼe ba Jeruzalein hodi koʼalia ho apóstolu no katuas sira kona-ba ida-neʼe.

3 Entaun, ema sira iha kongregasaun lori sira toʼo dalan klaran, no tuirmai ema sira-neʼe fila fali. No Paulo, Barnabé no mós dixípulu sira-neʼe kontinua laʼo hodi liu husi Fenísia no Samaria, no sira konta buat hotu kona-ba oinsá mak ema husi nasaun seluk sai fiar-naʼin, no sira mós lori ksolok ba maun-alin sira hotu. 4 Kuandu sira toʼo iha Jeruzalein, apóstolu sira, katuas sira, no mós kongregasaun simu sira ho laran-diʼak, no sira konta buat barak neʼebé Maromak halo ona liuhusi sira. 5 Maibé, ema balu husi ema farizeu* sira neʼebé agora sai ona fiar-naʼin, sira hamriik husi sira-nia tuur-fatin no dehan: “Ema sira-neʼe tenke hetan sirkunsizaun no ita tenke haruka sira atu halo tuir ukun-fuan Moisés nian.”

6 Ho ida-neʼe, apóstolu no katuas sira halibur an atu koʼalia hamutuk kona-ba problema neʼe. 7 Kuandu sira haksesuk malu ba tempu balu ona, Pedro hamriik no dehan ba sira: “Maun-alin sira, imi hatene ho didiʼak katak uluk Maromak hili haʼu husi imi-nia leet, atu nuneʼe liuhusi haʼu-nia ibun, ema husi nasaun sira tenke rona liafuan diʼak no sai fiar-naʼin. 8 No Maromak, neʼebé hatene ema nia laran, fó sasin hodi haraik espíritu santu ba sira, hanesan nia mós haraik ba ita. 9 Nia haree sira hanesan deʼit ho ita, no nia hamoos ona sira-nia laran tanba sira-nia fiar. 10 Entaun agora, tansá mak imi koko Maromak hodi fó naha todan ba dixípulu sira-neʼe? Naha neʼe ita no ita-nia beiʼala sira la iha kbiit atu lori. 11 Maibé, ita iha fiar katak ita hetan salvasaun liuhusi Naʼi Jesus nia laran-diʼak, no sira mós iha fiar neʼebé hanesan ho ita.”

12 Ho ida-neʼe, ema hotu sai nonook, no sira hahú rona ba Barnabé no Paulo nuʼudar sira konta kona-ba oinsá Maromak uza sira atu halo sinál no milagre oioin iha ema husi nasaun seluk nia leet. 13 Depois sira konta hotu tiha, Tiago hatán hodi dehan: “Maun-alin sira, rona haʼu bá. 14 Simeaun konta ona buat hotu kona-ba oinsá ba dala primeiru Maromak fila oin ba ema husi nasaun seluk atu foti povu ida ba nia naran. 15 No profeta sira-nia liafuan mós apoia ida-neʼe, hanesan hakerek nanis ona: 16 ‘Neʼe hotu tiha, haʼu tenke fila fali no harii fali David nia uma neʼebé monu tiha ona; haʼu tenke hadiʼa fali buat neʼebé rahun no halo fali uma neʼe, 17 atu nuneʼe, restu husi ema sira-neʼe, no mós ema husi nasaun hotu, katak povu neʼebé lori haʼu-nia naran, sira hotu bele buka Jeová ho laran-manas, Jeová, ida neʼebé kumpre buat sira-neʼe mak dehan nuneʼe, 18 nia hatene buat sira-neʼe horiuluk kedas.’ 19 Tan neʼe, haʼu-nia hanoin mak atu ita la halo susar ba ema husi nasaun seluk neʼebé tau fiar ba Maromak, 20 maibé atu hakerek ba sira hodi hasees an husi buat neʼebé iha relasaun ho estátua, husi sala-foʼer,* husi animál neʼebé ema buti mate, no mós husi raan. 21 Basá husi tempu uluk kedas iha ema sira neʼebé haklaken husi Moisés nia livru iha sidade ida-idak, tanba iha loron Sábadu ida-idak sira lee ho lian makaʼas husi livru sira-neʼe iha sinagoga sira.”

22 Depois neʼe, apóstolu no katuas sira hamutuk ho ema hotu iha kongregasaun deside atu haruka mane neʼebé sira hili hodi bá Antiokia ho Paulo no Barnabé. Ema sira-neʼe mak Judas neʼebé bolu nuʼudar Barsabas, no Silas, mane sira neʼebé dirije iha maun-alin sira-nia leet; 23 no liuhusi ema sira-neʼe, sira haruka karta tuirmai neʼe:

“Husi apóstolu no katuas sira, imi-nia maun-alin sira, ba maluk sira husi nasaun seluk neʼebé iha Antiokia, Síria, no Silísia: Ami-nia kumprimentus ba imi! 24 Ami rona ona katak balu husi ami halo imi laran-susar ho sira-nia liafuan, no sira koko atu estraga imi-nia fiar, maski ami la haruka sira atu halo nuneʼe. 25 Ami hotu foti desizaun ho laran ida deʼit atu haruka ema balu hamutuk ho Barnabé no Paulo neʼebé ami hadomi. 26 Sira naʼin-rua fó sira-nia moris* ba ita-nia Naʼi Jesus Kristu nia naran. 27 Tan neʼe, ami haruka Judas no Silas, atu nuneʼe sira mós bele konta buat sira-neʼe ba imi. 28 Tanba espíritu santu no mós ami rasik deside ona atu la fó todan tan ba imi, só deʼit ho buat neʼebé presiza, neʼe mak 29 kontinua hasees an husi buat sira neʼebé hasaʼe ona ba estátua, husi raan, husi animál neʼebé buti mate, no husi sala-foʼer. Se imi halo tuir buat sira-neʼe ho didiʼak, imi-nia moris sei sai diʼak. Adeus!”

30 Tuirmai, mane sira-neʼe sai hodi tun ba Antiokia no sira halibur ema-lubun hamutuk no fó karta neʼe ba sira. 31 Depois lee tiha ida-neʼe, sira sai haksolok ho liafuan sira-neʼe. 32 Judas no Silas, neʼebé mós nuʼudar profeta, sira fó laran-manas ba maun-alin sira liuhusi diskursu barak no hametin sira. 33 Entaun kuandu sira hela tiha tempu balu iha neʼebá, maun-alin sira fó adeus ba sira no sira fila fali ba Jeruzalein. 34 ——* 35 Maibé Paulo no Barnabé kontinua hela iha Antiokia, no hamutuk ho ema barak seluk, sira hanorin no haklaken mensajen furak kona-ba Jeová nia liafuan.

36 No loron balu liu tiha, Paulo dehan ba Barnabé: “Mai ita bá fali hodi vizita maun-alin sira iha sidade ida-idak iha neʼebé ita haklaken ona Jeová nia liafuan, atu ita bele haree sira-nia situasaun.” 37 No Barnabé hakarak tebes atu lori João, neʼebé bolu Marcos. 38 Maibé Paulo lakohi atu lori João tanba uluk nia husik hela sira iha Pamfília no la laʼo tuir sira hodi halo serbisu. 39 Ho ida-neʼe, sira diskute malu makaʼas, tan neʼe sira haketak malu; no Barnabé lori Marcos hamutuk nia no sira saʼe ró hodi bá Xipre. 40 Paulo hili Silas, no depois maun-alin sira husu tiha Jeová nia laran-diʼak ba nia, sira naʼin-rua bá. 41 No nia laʼo liu Síria no Silísia hodi hametin kongregasaun sira.

16 Entaun, nia toʼo ba Derbe no Listra, iha neʼebé iha dixípulu ida naran Timóteo; no Timóteo nia inan mak feto judeu ida neʼebé fiar-naʼin, maibé ninia aman ema gregu; 2 no maluk fiar-naʼin sira iha Listra no Ikónio koʼalia diʼak kona-ba nia. 3 Paulo dehan katak nia hakarak atu dixípulu neʼe laʼo hamutuk ho nia. Entaun, Paulo lori nia no fó sirkunsizaun ba nia tanba ema judeu sira iha fatin sira neʼebá, basá ema hotu hatene katak nia aman mak ema gregu ida. 4 No nuʼudar sira laʼo liu sidade oioin, sira fó sai ba maun-alin sira iha fatin sira-neʼe atu halo tuir ukun-fuan neʼebé apóstolu no katuas sira deside ona iha Jeruzalein. 5 Tan neʼe, kongregasaun sira-nia fiar kontinua sai metin liután no loron ba loron fiar-naʼin sira aumenta ba beibeik.

6 Depois neʼe, sira laʼo liuhusi Fríjia no Galásia, tanba espíritu santu bandu sira atu la bele haklaken Maromak nia liafuan iha área Ázia nian. 7 No kuandu sira toʼo ba Mísia, sira koko atu laʼo ba Bitínia, maibé Jesus nia espíritu la husik sira. 8 Entaun, sira laʼo liu Mísia no tun ba Tróade. 9 No iha kalan Paulo haree iha vizaun ema Masedónia ida hamriik iha nia oin no husu nia dehan: “Hakat liu mai iha Masedónia no ajuda ami.” 10 No depois nia haree tiha vizaun neʼe, ami laʼo ba Masedónia hodi hatene katak Maromak bolu ona ami atu haklaken liafuan diʼak ba sira.

11 Tan neʼe, ami saʼe ró husi Tróade no bá loos deʼit toʼo Samotrásia, no iha loron tuirmai ami toʼo ba Neápolis. 12 No husi neʼebá ami toʼo ba Filipe, sidade neʼebé Roma mak ukun. No sidade neʼe mak sidade importante liu iha área Masedónia nian. Ami hela iha sidade neʼe ba loron balu. 13 No iha loron Sábadu ami laʼo sai ba odamatan sidade nian hodi toʼo besik mota nia sorin, iha neʼebé ami rona katak iha fatin atu ema halo orasaun; no ami tuur no hahú koʼalia ba feto sira neʼebé halibur ona iha neʼebá. 14 No iha feto ida naran Lídia neʼebé faʼan hena kór-uvas, nia husi sidade Tiatira no nia hamtaʼuk Maromak. Feto neʼe rona no Jeová loke nia laran atu simu buat neʼebé Paulo koʼalia. 15 No kuandu nia no ninia umakain hetan batizmu, nia husu ami ho laran-manas dehan: “Se imi haree haʼu nuʼudar ema neʼebé laran-metin ba Jeová, mai no hela iha haʼu-nia uma.” No nia hakaʼas ami atu bá nia uma.

16 Loron ida kuandu ami laʼo daudaun hodi bá fatin orasaun nian, atan-feto ida hasoru ami, no anju aat ida mak domina nia. Nia bele siʼik futuru, no tan neʼe, ninia naʼi sira bele hetan osan barak husi ida-neʼe. 17 Feto neʼe kontinua laʼo tuir ami, no nia hakilar dehan: “Ema sira-neʼe mak Maromak Aas Liu Hotu nia atan, sira haklaken ba imi kona-ba dalan atu hetan salvasaun.” 18 Nia halo ida-neʼe ba loron barak. Ikusmai, Paulo sai baruk ona ho ida-neʼe no tan neʼe nia fila oin no dehan ba anju aat neʼe: “Hodi Jesus Kristu nia naran, haʼu haruka ó atu sai husi feto neʼe.” No iha oras neʼe kedas anju aat neʼe sai husi nia.

19 Kuandu feto neʼe nia naʼi sira haree katak sira-nia dalan atu hetan osan lakon ona, sira kaer Paulo no Silas no lori sira ba ukun-naʼin sira iha merkadu. 20 Lori tiha sira ba ukun-naʼin, ema sira-neʼe dehan: “Mane judeu sira-neʼe halo runguranga iha ita-nia sidade, 21 no sira hanorin lisan sira neʼebé bandu ba ita, tanba ita mak ema Roma.” 22 No ema-lubun hotu koʼalia ho hirus hasoru sira; no depois lees tiha Paulo no Silas nia unuk, ukun-naʼin sira-neʼe haruka ema atu baku sira ho ai. 23 Depois baku tiha sira ba dala barak, sira hatama Paulo no Silas iha komarka laran no haruka guarda hein didiʼak atu nuneʼe sira labele halai lakon. 24 Entaun, tanba guarda neʼe hetan mandamentu neʼe, nia tau sira iha fatin komarka nian neʼebé seguru liu no kesi sira-nia ain metin ba ai ida.*

25 Maibé iha kalan fahe-rua, Paulo no Silas halo orasaun no hahiʼi Maromak ho knananuk, no ema iha komarka laran rona sira. 26 Derrepente deʼit rai nakdoko makaʼas, no uma komarka nian sai nakdoko. Liután neʼe, odamatan hotu nakloke kedas, no korrente neʼebé kesi hela ema dadur sira sai namkore. 27 Kuandu guarda komarka nian hadeer no haree katak odamatan sira nakloke tiha ona, nia losu ninia surik atu oho an, tanba nia hanoin katak dadur sira halai tiha ona. 28 Maibé Paulo hakilar ho lian makaʼas dehan: “Keta oho an, tanba ami hotu iha neʼe!” 29 Ho ida-neʼe, nia husu ahi-oan no halai tama, no ho nakdedar nia monu ain iha Paulo no Silas nia oin. 30 No nia lori sira sai no dehan: “Señór sira, saida mak haʼu tenke halo atu hetan salvasaun?” 31 Sira hatán: “Tau fiar ba Naʼi Jesus, no ó hamutuk ho ó-nia umakain sei hetan salvasaun.” 32 No sira fó sai Jeová nia liafuan ba nia no mós ba sira hotu neʼebé iha ninia umakain. 33 Iha oras neʼe kuandu kalan hela, nia lori sira bá no fase sira-nia kanek. Tuirmai, guarda neʼe no ninia família tomak hetan batizmu iha tempu neʼe kedas. 34 No nia lori sira tama ba nia uma no prepara ai-han iha meza, no nia haksolok tebes hamutuk ho ninia umakain tomak tanba agora nia tau fiar ona ba Maromak.

35 Kuandu rai loron ona, ukun-naʼin sira haruka guarda sira atu dehan: “Husik ema sira-neʼe livre.” 36 Entaun guarda komarka nian lori sira-nia lia-menon ba Paulo no dehan: “Ukun-naʼin sira haruka ema mai atu husik imi naʼin-rua livre. Tan neʼe, sai mai liʼur no laʼo bá ho dame.” 37 Maibé Paulo dehan ba sira: “Sira baku ami iha ema hotu nia oin, no hatama ami iha komarka maski ami mak ema Roma, no sira la tesi lia uluk ba ami; no agora sira hakarak atu hasai ami subasubar deʼit ka? Neʼe labele! Husik sira mai rasik no lori ami sai.” 38 Entaun ukun-naʼin sira-nia guarda bá hodi fó sai Paulo nia liafuan ba sira. No kuandu sira rona katak ema sira-neʼe mak ema Roma, sira sai taʼuk tebes. 39 Tan neʼe, ukun-naʼin sira mai no husu deskulpa ba Paulo no Silas, no depois lori sai tiha sira, ema sira-neʼe husu atu sira husik sidade neʼe. 40 Kuandu Paulo no Silas sai husi komarka, sira laʼo ba Lídia nia uma, no bainhira sira haree maun-alin sira, sira naʼin-rua fó laran-manas ba maun-alin sira-neʼe no tuirmai sira sai husi sidade neʼe.

17 No sira laʼo liuhusi Amfípolis no Apolónia no toʼo ba Tesalónika. No iha neʼebá iha ema judeu sira-nia sinagoga ida. 2 Entaun, hodi tuir Paulo nia toman, nia tama ba sinagoga iha loron Sábadu tolu tuituir malu hodi hanorin sira husi Eskritura, 3 no nia esplika no uza liafuan sira-neʼe atu hatudu katak Kristu presiza hetan terus no moris-hiʼas husi mate, no nia dehan: “Kristu neʼe mak Jesus neʼebé haʼu haklaken ba imi.” 4 Ho ida-neʼe, sira balu sai fiar-naʼin no halibur an hamutuk ho Paulo no Silas. No ema gregu barak neʼebé hamtaʼuk Maromak no feto balu neʼebé naran-boot, sira mós sai fiar-naʼin.

5 Maibé, ema judeu sira sai laran-moras, no sira halibur hamutuk ema aat balu neʼebé badiu deʼit iha merkadu no sira sai lubun boot ida no hahú halo sidade sai runguranga. Sira ataka Jason nia uma no buka atu lori sai Paulo no Silas ba ema-lubun. 6 Kuandu sira la hetan Paulo no Silas, sira lori Jason no maun-alin balu ba ukun-naʼin sidade nian, no hakilar dehan: “Mane sira neʼebé hamosu problema iha mundu tomak mai ona iha neʼe, 7 no Jason simu ema sira-neʼe ho laran-diʼak. No mane sira-neʼe hotu kontra Liurai Roma* nia ukun-fuan, tanba sira dehan katak iha liurai seluk, katak Jesus.” 8 Kuandu ema-lubun no mós ukun-naʼin sidade nian rona ida-neʼe, sira-nia laran sai la hakmatek; 9 no depois haruka tiha Jason no sira seluk atu selu osan seguransa nian, ulun-naʼin sira-neʼe husik sira bá.

10 No kuandu rai kalan ona, maun-alin sira haruka kedas Paulo no Silas atu bá Bereia. Bainhira sira toʼo, sira tama ba ema judeu nia sinagoga. 11 Se kompara ho sira neʼebé iha Tesalónika, ema judeu sira iha Bereia hakarak tebes atu aprende, basá sira simu Maromak nia liafuan ho laran-manas, no loron-loron sira buka-hatene didiʼak Eskritura atu haree se buat sira-neʼe loos ka lae. 12 Tan neʼe, sira barak sai fiar-naʼin; no feto no mane gregu balu neʼebé naran-boot mós sai fiar-naʼin. 13 Maibé kuandu ema judeu sira iha Tesalónika rona katak Paulo haklaken mós Maromak nia liafuan iha Bereia, sira mai hodi book no soran ema-lubun atu kontra dixípulu sira. 14 Tuirmai, maun-alin sira haruka kedas Paulo atu laʼo tun ba tasi; maibé Silas no Timóteo hela nafatin. 15 Sira balu lori Paulo toʼo Atenas. Tuirmai, sira fila no lori lia-menon ba Silas no Timóteo atu bá toʼo Paulo lalais.

16 No nuʼudar Paulo hein hela sira iha Atenas, nia sente la kontente iha laran* tanba nia haree katak sidade neʼe nakonu ho estátua sira. 17 Tan neʼe nia tama iha sinagoga no hahú hanorin Eskritura ba ema judeu sira no ba ema seluk neʼebé adora Maromak. No loron-loron nia mós hanorin ema sira neʼebé nia hasoru iha merkadu. 18 Maibé ema balu neʼebé halo tuir hanorin epikureu nian no stoiku* nian, sira koʼalia hodi kontra nia, no sira balu dehan: “Saida mak manu-loriku neʼe hakarak fó sai ba ita?” No sira seluk dehan: “Nia haklaken kona-ba maromak rai seluk nian.” Sira dehan ida-neʼe tanba Paulo fó sai liafuan diʼak kona-ba Jesus no ninia moris-hiʼas. 19 Entaun, sira lori nia ba Areópago no dehan: “Ó bele fó-hatene ami kona-ba hanorin foun neʼebé ó fó sai ka lae? 20 Basá ó koʼalia kona-ba buat neʼebé foun ba ami. Tan neʼe, ami hakarak hatene buat sira-neʼe katak sá.” 21 Tuir loloos, ema Atenas hotu no mós ema husi rai seluk neʼebé hela iha neʼebá, sira uza deʼit sira-nia tempu halimar nian hodi konta ka rona ba buat ruma neʼebé foun. 22 No Paulo hamriik iha Areópago nia klaran no dehan:

“Ema Atenas sira, haʼu haree katak iha buat hotu imi-nia hamtaʼuk ba maromak sira mak boot liu fali ema seluk. 23 Porezemplu, kuandu haʼu laʼo liu sidade haʼu haree didiʼak buat sira neʼebé imi adora, no haʼu mós haree altár ida neʼebé hakerek dehan: ‘Ba Maromak neʼebé ami la hatene.’ Tan neʼe, buat neʼebé imi adora maski la hatene, kona-ba neʼe mak haʼu haklaken ba imi. 24 Maromak neʼebé halo mundu no buat hotu neʼebé iha nia, Maromak neʼe la hela iha templu neʼebé ema nia liman mak halo tanba nia mak Naʼi ba lalehan no rai. 25 Nia la presiza ema nia liman hodi serbí nia tanba nia la kuran buat ida; basá nia rasik mak fó iis, fó moris no fó buat hotu ba ema. 26 No husi ema ida deʼit mak nia halo nasaun hotu atu hela iha rai tomak, no nia halo desizaun kona-ba tempu ba buat hotu no kona-ba fatin neʼebé ema sei hela bá. 27 Basá Maromak hakarak atu ema buka nia. No se karik ema raba hodi buka nia, sira sei hetan duni nia, maski tuir loloos nia la dook husi ita ida-idak. 28 Tanba liuhusi nia mak ita hetan moris, book an no iha, hanesan hakerek-naʼin balu iha imi-nia leet mós dehan ona: ‘Ita hotu mak ninia oan sira.’

29 “Tanba ita mak ninia oan sira, entaun ita keta hanoin katak Maromak neʼe mak hanesan osan-mean, osan-mutin ka fatuk, neʼebé ema nia liman mak halo hodi tuir sira-nia hanoin. 30 Uluk Maromak husik deʼit hahalok sira hanesan neʼe, maibé agora nia fó sai ba ema hotu katak sira tenke hakribi sala. 31 Basá nia hili tiha ona loron ida, no iha loron neʼe nia sei tesi lia ho loloos ba ema hotu iha rai. Nia sei halo ida-neʼe liuhusi mane ida neʼebé nia foti tiha ona, no ema hotu bele fiar ida-neʼe tanba nia fó moris-hiʼas ona ba mane neʼe.”

32 Kuandu povu rona kona-ba moris-hiʼas husi mate, sira balu hahú goza nia, maibé balu seluk dehan: “Tempu seluk ami hakarak rona tan husi ó kona-ba neʼe.” 33 Ho ida-neʼe, Paulo sai husi sira-nia leet, 34 no ema balu tuir nia no sai fiar-naʼin, neʼe inklui Dionísio neʼebé nuʼudar juis ida iha Areópago, no feto ida naran Damaris, no mós ema seluk tan.

18 Neʼe hotu tiha, nia sai husi Atenas no bá Korinto. 2 No nia hetan ema judeu ida naran Ákuila neʼebé moris iha Pontus. Ákuila ho nia feen Prisila foin mai husi Itália tanba Cláudio haruka atu ema judeu hotu sai husi Roma. Entaun, Paulo vizita sira 3 no tanba sira halo serbisu neʼebé hanesan atu halo tenda, nia hela ho sira no halo serbisu hamutuk. 4 Maibé, Sábadu-Sábadu nia hatoʼo diskursu iha sinagoga hodi halo ema judeu no gregu sira atu sai fiar-naʼin.

5 No bainhira Silas no Timóteo tun mai ona husi Masedónia, Paulo fó nia tempu tomak hodi haklaken Maromak nia liafuan no fó sasin ba ema judeu sira atu hatudu katak Jesus mak Kristu. 6 Maibé sira kontra nafatin nia no koʼalia aat hasoru nia, ho ida-neʼe nia liki ninia hatais no dehan: “Husik imi-nia raan fila fali ba imi-nia leten. Haʼu la iha sala. Husi ohin ba oin, haʼu sei laʼo ba ema husi nasaun seluk.” 7 Nuneʼe, nia muda husi neʼebá no bá fali Tísio Justus nia uma. Ema neʼe adora Maromak no ninia uma iha sinagoga nia sorin. 8 Maibé Krispo, sinagoga nia ulun, hamutuk ho ninia umakain tomak tau fiar ba Naʼi. No mós ema Korinto barak neʼebé rona hahú sai fiar-naʼin no hetan batizmu. 9 Liután neʼe, iha kalan ida, Naʼi koʼalia ba Paulo liuhusi vizaun ida dehan: “Keta taʼuk, maibé kontinua koʼalia no keta nonook deʼit, 10 tanba haʼu hamutuk ho ó no la iha ema ida sei ataka ó atu halo aat ba ó; tanba ema barak iha sidade neʼe mak haʼu-nian.” 11 Entaun, nia hela iha neʼebá ba tinan ida no fulan neen hodi hanorin ema sira kona-ba Maromak nia liafuan.

12 No iha tempu neʼebé Gálio mak governadór iha Akaia, ema judeu sira kontra makaʼas Paulo no lori nia ba fatin tesi-lia nian, 13 no sira dehan: “Mane neʼe hanorin ema atu adora Maromak iha dalan neʼebé kontra ukun-fuan.” 14 Kuandu Paulo atu koʼalia, Gálio hatete ba ema judeu sira: “Imi ema judeu sira, se mane neʼe halo duni sala boot ka krime boot ruma, haʼu iha razaun atu rona ba imi. 15 Maibé se imi haksesuk malu kona-ba liafuan ruma, kona-ba ema ruma, ka kona-ba imi-nia ukun-fuan, imi rasik tenke rezolve bá. Haʼu lakohi atu tesi lia ba imi kona-ba buat sira-neʼe.” 16 Ho ida-neʼe, nia haruka sira sai husi fatin tesi-lia nian. 17 Entaun, sira kaer Sóstenes, sinagoga nia ulun, no hahú baku nia iha fatin tesi-lia nian. Maibé Gálio lakohi mete ho buat sira-neʼe.

18 No depois hela tiha ba loron balu tan, Paulo fó adeus ba maun-alin sira no saʼe ró hodi ba Síria, no Prisila no Ákuila mós bá hamutuk nia. No iha Sénkreas Paulo tesi badak nia fuuk, tanba nia halo promesa ida. 19 Kuandu sira toʼo iha Éfeso, nia husik sira hela iha sidade, maibé nia rasik tama ba sinagoga no hanorin ema judeu sira kona-ba eskritura. 20 Maski sira kontinua husu nia atu hela kleur liután, maibé nia lakohi. 21 No nia fó adeus no dehan: “Haʼu sei fila fali ba imi, se neʼe mak Jeová nia hakarak.” Tuirmai, nia saʼe ró no sai husi Éfeso 22 no nia toʼo ba Sezareia. Tuirmai, nia bá hodi kumprimenta kongregasaun, depois neʼe nia tun ba Antiokia.

23 No kuandu nia hela tiha ba tempu balu iha neʼebá, nia sai no laʼo husi sidade ida ba sidade seluk iha Galásia no Fríjia hodi hametin dixípulu sira hotu.

24 No ema judeu ida naran Apolo, neʼebé moris iha sidade Alexandria, nia matenek atu koʼalia. Mane neʼe toʼo ba Éfeso; no nia hatene didiʼak kona-ba Eskritura. 25 Mane neʼe simu hanorin kona-ba Jeová nia dalan no nia laran-manas ho espíritu hodi hanorin ho loloos kona-ba Jesus, maibé nia hatene deʼit kona-ba João nia batizmu. 26 No nia hahú koʼalia ho laran-manas iha sinagoga. Kuandu Prisila no Ákuila rona nia, sira lori nia mesamesak no esplika diʼak liután ba nia kona-ba Maromak nia dalan. 27 Liután neʼe, tanba nia hakarak atu ba Akaia, entaun maun-alin sira hakerek karta ba dixípulu sira, hodi husu sira atu simu nia ho laran-luak. Nuneʼe, kuandu nia toʼo iha neʼebá, nia fó ajuda ba sira neʼebé sai ona fiar-naʼin tanba Maromak nia laran diʼak; 28 basá iha ema hotu nia oin no ho laran-manas nia hatudu ho klaru katak ema judeu nia hanorin mak sala, no liuhusi Eskritura nia hatudu ho loloos katak Jesus mak Kristu.

19 Kuandu Apolo sei iha Korinto, Paulo laʼo liuhusi área foho nian no tun ba Éfeso, no nia hetan dixípulu balu. 2 Nia dehan ba sira: “Imi simu ona espíritu santu kuandu imi sai fiar-naʼin ka lae?” Sira hatán: “Ami seidauk rona buat ida kona-ba espíritu santu.” 3 No nia dehan ba sira: “Entaun, imi simu batizmu ida neʼebé?” Sira hatán: “João nia batizmu.” 4 Paulo hatete: “João fó batizmu hodi ema bele hatudu katak sira hakribi sala, no nia fó sai ba povu atu tau fiar ba ida neʼebé sei mai tuir nia, neʼe mak Jesus.” 5 Rona tiha ida-neʼe, sira hetan batizmu hodi Naʼi Jesus nia naran. 6 No kuandu Paulo tau liman iha sira-nia leten, espíritu santu tun ba sira, no sira hahú koʼalia lia oioin no mós koʼalia nuʼudar profeta. 7 Sira hotu hamutuk mane naʼin sanulu-resin-rua.

8 Durante fulan tolu nia laʼo ba sinagoga hodi fó diskursu no koʼalia iha dalan neʼebé book ema atu fiar kona-ba Maromak nia Ukun. 9 Maibé kuandu ema balu ho ulun-toos lakohi fiar no koʼalia la diʼak kona-ba Dalan Neʼe* iha ema-lubun nia oin, Paulo sai husi sira-nia leet no haketak dixípulu sira husi ema sira-neʼe, no loron-loron nia hatoʼo diskursu iha sala eskola nian iha Tirano. 10 Nia halo ida-neʼe ba tinan rua, no ema judeu no ema gregu hotu neʼebé hela iha área Ázia nian rona Naʼi nia liafuan.

11 No liuhusi Paulo, Maromak kontinua halo hahalok kmanek oioin ho kbiit; 12 neʼe duni ema foti Paulo nia hatais ka lensu no lori neʼe ba ema sira neʼebé moras, no sira-nia moras neʼe lakon kedas husi sira, no anju aat sira mós sai husi ema. 13 Maibé ema judeu balu neʼebé laʼo haleʼu atu duni sai anju aat sira, mós koko atu uza Naʼi Jesus nia naran hodi dehan ba ema neʼebé anju aat domina: “Haʼu haruka ó hodi Jesus nia naran, ida neʼebé Paulo haklaken.” 14 No Eskeva, neʼebé ulun-naʼin amlulik judeu nian ida, ninia oan-mane naʼin-hitu mós halo ida-neʼe. 15 Maibé anju aat hatán ba sira: “Haʼu hatene Jesus no mós hatene kona-ba Paulo; maibé imi neʼe sé?” 16 Ho ida-neʼe, mane neʼebé anju aat domina haksoit ba sira-nia leten, no hanehan sira hotu, no sira halai sai husi uma neʼe ho isin-tanan no kanek. 17 Ema judeu no ema gregu hotu neʼebé hela iha Éfeso rona kona-ba neʼe; no sira hotu sai taʼuk, no ema fó glória liután ba Naʼi Jesus nia naran. 18 No ema barak neʼebé sai ona fiar-naʼin mai hodi fó sai iha ema hotu nia oin kona-ba sala neʼebé sira halo. 19 No ema barak neʼebé uluk halo buat oioin ho anju aat nia ajuda, sira halibur sira-nia livru hamutuk no sunu iha ema hotu nia oin. Sira sura hamutuk no haree katak livru sira-neʼe nia folin osan-mutin 50.000. 20 No Jeová nia liafuan kontinua sai belar no ema barak tan sai fiar-naʼin.*

21 No kuandu buat sira-neʼe ramata ona, Paulo deside katak, depois laʼo liu tiha Masedónia no Akaia, nia sei laʼo ba Jeruzalein, nia dehan: “Kuandu haʼu toʼo tiha neʼebá, haʼu mós tenke bá haree Roma.” 22 Entaun, nia haruka ema naʼin-rua husi sira neʼebé ajuda nia, Timóteo no Erasto, hodi bá Masedónia, maibé nia sei hela tan ba tempu balu iha área Ázia nian.

23 No iha tempu neʼebá duni mak susar boot mosu ba Dalan Neʼe.* 24 Tanba mane ida naran Demétrius neʼebé badain osan-mutin nian, nia ajuda ninia maluk badain seluk atu hetan osan barak hodi halo templu kiʼik Ártemis nian husi osan-mutin; 25 no nia halibur nia maluk sira no mós badain osan-mutin seluk no dehan: “Maluk sira, imi hatene ho didiʼak katak husi serbisu neʼe mak ita hetan moris diʼak. 26 No imi haree no rona oinsá iha Éfeso no mós besik fatin hotu iha área Ázia nian, Paulo neʼe halo ema-lubun boot fiar no troka sira-nia hanoin, hodi dehan katak maromak sira neʼebé ema halo ho liman mak laʼós maromak tebes. 27 Liután neʼe, haʼu taʼuk katak ema sei koʼalia aat kona-ba ita-nia serbisu. No haʼu mós taʼuk katak ema sei haree templu husi ita-nia maromak boot Ártemis nuʼudar buat neʼebé la iha folin. No maski ema hotu iha área Ázia nian no ema iha mundu tomak adora nia, maibé ninia kmanek hotu sei lakon.” 28 Kuandu rona ida-neʼe, ema sai hirus tebes no hahú hakilar dehan: “Ema Éfeso nia maromak-feto Ártemis mak boot!”

29 Nuneʼe sidade sai runguranga loos, no ho hanoin ida deʼit sira halai ba estádiu, no sira kaer no lori Gaio no Aristarko, husi Masedónia, neʼebé laʼo rai hamutuk ho Paulo. 30 Kona-ba Paulo, nia hakarak atu tama ba laran hodi hasoru povu, maibé dixípulu sira la husik nia. 31 No ulun-naʼin balu husi sira neʼebé organiza festa no jogu sira, neʼebé habelun ho nia, haruka mensajen ba nia no husu atu nia la tau nia an iha perigu laran hodi tama ba estádiu. 32 Tuir loloos, ema balu hakilar dehan buat ida no balu dehan buat seluk; basá ema-lubun bilán, no sira barak la hatene tansá mak sira mai halibur hamutuk. 33 Entaun, sira lori sai Alexandre husi ema-lubun nia leet no ema judeu sira dudu nia ba oin; no Alexandre halo sinál ho nia liman tanba hakarak atu koʼalia ba povu. 34 Maibé kuandu povu hatene katak nia mak ema judeu ida, sira hotu hahú hakilar hamutuk maizumenus ba oras rua, hodi dehan: “Ema Éfeso nia maromak-feto Ártemis mak boot!”

35 Ikusmai, administradór sidade nian halo kalma ema-lubun no nia dehan: “Ema Éfeso sira, ema hotu hatene katak sidade Éfeso mak tau matan ba templu husi Ártemis boot no mós ninia estátua neʼebé monu husi lalehan, loos ka lae? 36 Tanba buat sira-neʼe ema ida la bele nega, neʼe duni imi tenke hakmatek nafatin no keta halo naranaran deʼit. 37 Basá imi lori ema sira-neʼe mai maski sira la naʼok buat ida husi templu no la koʼalia aat kona-ba ita-nia maromak-feto. 38 Tan neʼe, se Demétrius no mós badain sira neʼebé hamutuk ho nia iha lia ruma hasoru ema ida, tribunál bele rezolve ida-neʼe no iha mós tesi-lia naʼin; husik sira mak koʼalia hasoru malu. 39 Maibé se imi buka buat seluk tan, ida-neʼe sei rezolve tuir lei kuandu povu sidade nian halibur hamutuk. 40 Tuir loloos, ita iha perigu laran tanba ulun-naʼin sira bele foti lia hasoru ita kona-ba buat neʼebé mosu ohin, basá ita la iha razaun ida atu hatudu tansá mak ema-lubun halibur iha neʼe ho runguranga.” 41 No kuandu nia koʼalia tiha buat sira-neʼe, nia haruka ema-lubun sira fahe malu.

20 Kuandu sidade hakmatek ona, Paulo bolu dixípulu sira, no depois fó laran-manas tiha ba sira no fó adeus, nia hahú laʼo ba Masedónia. 2 No nia vizita fatin balu iha área neʼe no koʼalia liafuan barak hodi fó laran-manas ba dixípulu sira iha neʼebá, no tuirmai nia laʼo ba Grésia. 3 Nia hela ba fulan tolu iha neʼebá, maibé kuandu nia atu saʼe ró hodi bá Síria, ema judeu sira planu atu oho nia, entaun nia deside atu fila liuhusi Masedónia. 4 Sira neʼebé laʼo hamutuk ho nia mak Sóprato, Pirro husi Bereia nia oan-mane; Aristarko no Sekundus neʼebé husi Tesalónika; Gaio husi Derbe; Timóteo; no mós Tíkiko no Trófimo neʼebé husi área Ázia nian. 5 Sira-neʼe bá uluk no hein ami iha Tróade. 6 Maibé, kuandu Festa Paun Fermentu-Laek nian hotu ona, ami saʼe ró husi Filipe, no loron lima tuirmai ami toʼo ba sira iha Tróade; no ami hela loron hitu iha neʼebá.

7 Iha loron primeiru semana nian kuandu ami halibur hamutuk atu han, Paulo hahú hatoʼo diskursu ba sira tanba nia atu sai husi neʼebá iha loron tuirmai; no nia hanaruk ninia diskursu toʼo kalan-boot. 8 No iha ahi-oan barak iha andár leten iha neʼebé ami halibur hamutuk. 9 Mane joven ida naran Éutiko tuur iha janela, no nuʼudar Paulo kontinua koʼalia, Éutiko toba dukur loos toʼo nia monu husi andár tolu, no kuandu sira tun atu haree nia, nia mate ona. 10 Maibé Paulo tun ba kraik no hakruʼuk hodi hakoʼak nia no dehan: “Imi keta tanis, tanba agora nia moris fali.” 11 Tuirmai, Paulo saʼe ba andár leten, no nia silu paun no hahú han. No nia koʼalia tan ba oras balu toʼo rai naroman, depois neʼe nia sai husi neʼebá. 12 No sira lori labarik-mane neʼe fila no sira haksolok tebes tanba nia moris fali ona.

13 Tuirmai, ami saʼe ró hodi bá uluk Assos, tanba iha neʼebá mak ami atu tula Paulo, basá nia haruka ami atu halo nuneʼe, maibé nia rasik hakarak bá neʼebá hodi laʼo ain deʼit. 14 Entaun, kuandu nia hasoru ami iha Assos, nia saʼe ró hamutuk ho ami hodi bá Mitilene. 15 No loron tuirmai ami sai husi fatin neʼe no toʼo ba Kio nia sorin bá, maibé loron tuirmai ami para uitoan iha Samos, no iha loron neʼebé tuirmai ami toʼo ba Mileto. 16 Basá Paulo deside ona atu liu deʼit Éfeso hodi nuneʼe nia labele lakon tempu iha área Ázia nian, tanba nia hakaʼas an atu toʼo ba Jeruzalein iha loron Festa Pentekostes nian.

17 No husi Mileto, Paulo haruka lia-menon ba Éfeso hodi bolu katuas sira iha kongregasaun neʼe. 18 Kuandu sira toʼo, nia dehan ba sira: “Imi hatene ho didiʼak oinsá haʼu halaʼo haʼu-nia moris iha imi-nia leet hahú husi loron primeiru haʼu toʼo iha área Ázia nian, 19 basá haʼu sai atan ba Naʼi ho haraik-an, ho matan-been no mós ho terus sira neʼebé haʼu hasoru tanba ema judeu sira-nia planu aat. 20 Haʼu la dada an hodi fó-hatene imi buat hotu neʼebé diʼak ba imi no haʼu hanorin imi iha ema nia oin no husi uma ba uma. 21 Tuir loloos, haʼu fó sasin ho didiʼak ba ema judeu no ba ema gregu katak sira tenke hakribi sala hodi fila fali ba Maromak no tau fiar ba ita Naʼi Jesus. 22 No agora, espíritu santu haruka haʼu atu laʼo ba Jeruzalein, maski haʼu la hatene buat neʼebé sei mosu ba haʼu iha neʼebá, 23 maibé husi sidade ba sidade espíritu santu fó avizu beibeik ba haʼu katak haʼu sei tama komarka no hetan terus. 24 Maski nuneʼe, haʼu la haree haʼu-nia moris* nuʼudar buat neʼebé iha folin; haʼu hanoin deʼit atubele halai toʼo rohan no halo hotu serbisu neʼebé haʼu simu husi Naʼi Jesus, hodi fó sasin ho loloos kona-ba liafuan diʼak husi Maromak nia laran-diʼak neʼebé boot.

25 “Maibé agora, haʼu hatene katak imi hotu, imi neʼebé haʼu vizita hodi haklaken kona-ba Maromak nia Ukun, imi sei la haree tan haʼu-nia oin. 26 Tan neʼe, haʼu bolu imi atu sai nuʼudar sasin iha loron neʼe katak haʼu moos ona husi ema hotu nia raan 27 tanba haʼu la dada an atu fó-hatene ba imi Maromak nia hakarak hotu. 28 Tau matan didiʼak ba imi-nia an no ba bibi-lubun tomak, ida neʼebé espíritu santu hili ona imi atu dirije nuʼudar bibi-atan, hodi tau matan ba Maromak nia kongregasaun neʼebé nia sosa ona ho ninia Oan rasik nia raan. 29 Haʼu hatene katak depois haʼu bá tiha, asu-fuik sira sei tama iha imi-nia leet no sei halo aat ba bibi-lubun neʼe, 30 no husi imi-nia leet rasik sei mosu mane sira neʼebé sei koʼalia lia-bobar oioin hodi dada sees dixípulu sira atu tuir sira.

31 “Tan neʼe, matan-moris nafatin bá, no hanoin-hetan bá katak ba tinan tolu, loron no kalan, haʼu la para atu fó konsellu ba imi ida-idak ho matabeen. 32 No agora haʼu entrega imi ba Maromak no mós ba liafuan kona-ba ninia laran-diʼak neʼebé boot; liafuan neʼe bele hametin imi no bele loke dalan ba imi atu simu liman-rohan iha santu hotu nia leet. 33 Haʼu la kaan ema ida nia osan-mutin, osan-mean, ka hatais. 34 Imi rasik hatene katak ho haʼu-nia liman haʼu serbisu atu tau matan ba haʼu-nia presiza no ba sira neʼebé hamutuk ho haʼu. 35 Iha buat hotu-hotu haʼu hatudu ona ba imi katak hodi halo serbisu hanesan haʼu halo, imi tenke tau matan ba sira neʼebé fraku. No imi tenke hanoin-hetan Naʼi Jesus nia liafuan kuandu nia rasik dehan: ‘Kontente liu atu fó duké simu.’”

36 No kuandu nia koʼalia tiha buat sira-neʼe, nia hakneʼak hamutuk ho sira hotu no halo orasaun. 37 Tuir loloos, sira hotu tanis makaʼas, no sira hakoʼak Paulo no reʼi nia. 38 Sira triste, liuliu tanba nia dehan katak sira sei la haree tan nia oin. Tuirmai, sira lori nia ba ró.

21 Ho triste ami husik hela sira no saʼe ró hodi bá loos deʼit toʼo Kos, maibé loron tuirmai ami bá Rodes, no husi neʼebá ami bá Patara. 2 No kuandu ami hetan ró neʼebé atu bá Fenísia, ami saʼe ró neʼe no bá. 3 No kuandu ami haree ona illa Xipre iha ami-nia sorin karuk, ami liu deʼit hodi bá Síria, no ami para iha Tiro, tanba iha neʼebá mak ró neʼe hatún sasán sira. 4 Ami buka no hetan dixípulu sira no hela iha neʼebá toʼo loron hitu. Maibé liuhusi espíritu santu, sira fó avizu beibeik ba Paulo atu la sama ain iha Jeruzalein. 5 Liutiha ida-neʼe, ami husik fatin neʼe hodi kontinua ami-nia viajen; maibé sira hotu, inklui mós feto no labarik sira, lori ami toʼo tasi. No ami hakneʼak hamutuk iha tasi-ibun no halo orasaun. 6 Tuirmai, ami fó adeus ba malu no ami saʼe ró, no sira fila fali ba sira-nia uma.

7 Ami husik hela Tiro, no ho ró ami toʼo ba Tolome, no ami kumprimenta maun-alin sira no hela ho sira loron ida. 8 Loron tuirmai ami sai husi neʼe no toʼo ba Sezareia, no ami laʼo ba Filipe nia uma, nia haklaken-naʼin ba liafuan diʼak, no nia mós ida husi ema naʼin-hitu neʼebé apóstolu sira hili, no ami hela ho nia. 9 Nia iha oan-feto naʼin-haat neʼebé hatoʼo Maromak nia liafuan nuʼudar profeta no sira sei klosan hela.* 10 No depois ami hela ba loron balu, profeta ida naran Ágabo tun mai husi Judeia, 11 no nia mai hasoru ami no foti Paulo nia sintu hodi kesi nia rasik nia ain ho liman no dehan: “Espíritu santu dehan nuneʼe: ‘Iha Jeruzalein, ema judeu sei kesi sintu neʼe nia naʼin iha dalan hanesan neʼe no sei entrega nia ba ema husi nasaun seluk nia liman.’” 12 Rona tiha ida-neʼe, ami no mós sira neʼebé husi fatin neʼe, husu beibeik ba nia atu labele saʼe ba Jeruzalein. 13 Tuirmai Paulo hatán: “Tansá mak imi tanis hodi halo haʼu laran-susar? Hatene bá katak, haʼu laʼós deʼit prontu atu ema kesi haʼu, maibé haʼu mós prontu atu mate iha Jeruzalein tan Naʼi Jesus nia naran.” 14 Kuandu ami la bele ona troka ninia hanoin, ami la obriga tan nia no dehan: “Naʼi Jeová nia hakarak sai loos bá.”

15 Liutiha loron balu, ami prepara an hodi laʼo no ami saʼe ba Jeruzalein. 16 No dixípulu balu husi Sezareia mós laʼo hamutuk ho ami atu lori ami ba Nason nia uma. Nia husi Xipre, no nia mós ida husi dixípulu sira neʼebé primeiru, no ami atu hela iha nia uma. 17 Kuandu ami toʼo ba Jeruzalein, maun-alin sira simu ami ho kontente. 18 No iha loron tuirmai Paulo bá hamutuk ami atu hasoru Tiago; no katuas sira hotu mós iha neʼebá. 19 Nia kumprimenta sira no hahú konta ba sira buat hotu neʼebé Maromak halo ona iha nasaun sira-nia leet liuhusi ninia serbisu haklaken.

20 Depois rona tiha ida-neʼe, sira fó glória ba Maromak, no sira dehan ba nia: “Ami-nia belun, ó hatene katak iha ona ema judeu rihun ba rihun neʼebé sai fiar-naʼin, no sira hotu laran-manas kona-ba Ukun-Fuan. 21 Maibé sira rona lia-anin katak ó hanorin ona ema judeu hotu iha nasaun seluk nia leet kona-ba buat neʼebé kontra Moisés nia Ukun-Fuan no atu husik Ukun-Fuan neʼe, hodi fó-hatene sira atu la fó sirkunsizaun ba sira-nia oan no la halo tuir ita-nia toman. 22 Entaun, saida mak ita sei halo? Basá sira sei rona katak ó iha neʼe ona. 23 Tan neʼe, halo tuir bá buat neʼebé ami atu dehan ba ó: Iha mane naʼin-haat iha ami-nia leet neʼebé halo ona promesa. 24 Lori mane sira-neʼe ho ó no hamoos ó-nia an tuir lei hamutuk ho sira no selu buat neʼebé presiza, atu nuneʼe sira bele koi tiha sira-nia fuuk. Ho ida-neʼe, ema hotu sei hatene katak lia-anin neʼebé ema koʼalia kona-ba ó mak la loos, maibé katak ó-nia hahalok loos no ó rasik mós halo tuir Ukun-Fuan. 25 No kona-ba fiar-naʼin neʼebé husi nasaun seluk, ami haruka tiha ona ami-nia desizaun ba sira katak sira tenke hasees an husi buat neʼebé ema hasaʼe ona ba estátua, husi raan, husi animál neʼebé ema buti mate no husi sala-foʼer.”

26 No iha loron tuirmai Paulo lori mane sira-neʼe no hamoos nia an rasik tuir lei hamutuk ho sira, no sira tama ba templu atu hatudu sai kona-ba bainhira mak sira-nia loron sira atu hamoos an nian sei ramata hodi nuneʼe amlulik bele hasaʼe prezente ba Maromak ba sira ida-idak.

27 No kuandu loron hitu neʼe besik ona atu hotu, ema judeu sira husi Ázia haree nia iha templu no sira hahú halo ema-lubun sai hirus. No sira kaer nia 28 hodi hakilar dehan: “Ema Izraél sira, ajuda ami! Mane neʼe mak ida neʼebé hanorin iha fatin hotu hodi kontra ita-nia povu no ita-nia Ukun-Fuan no mós fatin neʼe, liután neʼe, nia lori ema gregu mai iha templu neʼe no halo foʼer ona fatin santu neʼe.” 29 Sira dehan ida-neʼe tanba uluk sira haree Trófimo husi Éfeso hamutuk ho nia iha sidade, no sira hanoin katak Paulo lori ona nia hodi tama ba templu. 30 No sidade tomak sai runguranga, no povu halai hamutuk ba templu no sira kaer Paulo no dada nia ba templu nia liʼur, no sira taka kedas odamatan. 31 No nuʼudar sira koko atu oho nia, ema fó-hatene ba komandante tropa nian* katak Jeruzalein tomak agora runguranga loos; 32 entaun komandante neʼe lori kedas ninia tropa no kapitaun sira no halai tun ba sira. Kuandu ema sira-neʼe haree komandante no mós tropa sira, sira para atu baku Paulo.

33 Tuirmai, komandante neʼe mai besik no kaer Paulo no haruka atu kesi nia ho korrente rua; no komandante neʼe hahú husu ba sira kona-ba nia mak sé no saida mak nia halo. 34 No ema-lubun neʼe hahú hakilar no balu dehan buat ida, maibé balu fali dehan buat seluk. Tanba ema-lubun runguranga loos, entaun komandante neʼe la hatene ho loloos saida mak mosu, no nia haruka atu lori Paulo ba fatin tropa nian. 35 Maibé kuandu nia toʼo iha eskada, situasaun sai aat liu toʼo soldadu sira tenke hiʼit no lori nia tanba violénsia neʼebé ema-lubun halo; 36 basá ema-lubun kontinua laʼo tuir no hakilar dehan: “Oho nia!”

37 No kuandu tropa sira besik ona atu lori tama nia ba fatin tropa nian, Paulo dehan ba komandante: “Haʼu bele koʼalia buat ruma ba Ita?” Nia hatán: “Ó hatene koʼalia lia-gregu ka? 38 Ó laʼós ema Ejitu neʼebé foin lalais neʼe book ema atu kontra governu no lori ema ohodór naʼin-4.000 hodi bá rai-fuik?” 39 Tuirmai Paulo dehan: “Loloos, haʼu mak ema judeu ida, husi Tarsu iha Silísia, haʼu sidadaun ba sidade ida neʼebé naran-boot. No haʼu husu Ita, fó lisensa mai haʼu atu koʼalia ba povu neʼe.” 40 Depois hetan tiha lisensa, Paulo hamriik iha eskada no nia halo sinál ho nia liman ba povu neʼe. Kuandu ema hotu nonook ona, nia koʼalia ba sira ho lia ema ebreu nian hodi dehan:

22 “Maun-alin no aman sira, rona haʼu bá no haʼu sei esplika ba imi.” 2 No kuandu sira rona nia koʼalia ba sira ho lia-ebraiku, sira hotu sai hakmatek liután no nia dehan: 3 “Haʼu ema judeu, haʼu moris iha Tarsu iha Silísia, maibé haʼu simu hanorin iha sidade neʼe, no Gamaliel rasik mak hanorin haʼu. Haʼu simu hanorin atu halo tuir ho loloos ita-nia beiʼala sira-nia Ukun-Fuan, no haʼu hatudu laran-manas ba Maromak hanesan imi mós hatudu agora. 4 Haʼu kesi mane no feto neʼebé tuir Dalan neʼe no hatama sira ba komarka, no haʼu fó-terus ba sira toʼo mate. 5 Amlulik boot no katuas povu nian bele sai sasin kona-ba neʼe. Haʼu mós simu karta husi sira hodi lori ba maun-alin sira iha Damasku, no haʼu laʼo ba fatin neʼebá hodi bele kesi no lori sira mai iha Jeruzalein atu hetan kastigu.

6 “Maibé, maizumenus iha meiudia, kuandu haʼu laʼo daudaun no besik ona ba Damasku, derrepente deʼit naroman ida sai husi lalehan no nabilan haleʼu haʼu, 7 no haʼu monu ba rai no haʼu rona lian ida dehan: ‘Saul, Saul, tansá mak ó fó-terus ba haʼu?’ 8 Haʼu hatán: ‘Sé mak Ita, Naʼi?’ No nia dehan ba haʼu: ‘Haʼu mak Jesus Nazaré, ida neʼebé ó fó-terus daudaun.’ 9 No ema sira neʼebé hamutuk ho haʼu bele haree naroman neʼe, maibé sira la bele rona lian neʼebé koʼalia ba haʼu. 10 Ho ida-neʼe haʼu dehan: ‘Saida mak haʼu sei halo, Naʼi?’ Naʼi dehan ba haʼu: ‘Hamriik, no laʼo tama ba Damasku, no iha neʼebá haʼu sei fó-hatene ba ó kona-ba buat hotu neʼebé ó tenke halo.’ 11 No tanba naroman neʼe nabilan tebes, haʼu la bele ona atu haree, entaun sira neʼebé hamutuk ho haʼu kaer haʼu-nia liman hodi lori haʼu ba Damasku.

12 “Iha neʼebá, iha mane ida naran Ananias, no tuir Ukun-Fuan nia mak ema neʼebé hamtaʼuk Maromak, no ema judeu hotu iha fatin neʼebá koʼalia diʼak kona-ba nia. 13 Nia mai hasoru haʼu, no hamriik besik haʼu hodi dehan: ‘Saul haʼu-nia maun, haree fali bá!’ No iha oras neʼe kedas haʼu bele haree fali no hateke ba nia. 14 Nia dehan: ‘Ita-nia beiʼala sira-nia Maromak hili ona ó atu hatene ninia hakarak, no atu haree Ida neʼebé Loos, no atu rona ninia lian, 15 tanba nia hili ona ó atu fó sasin kona-ba buat hotu neʼebé ó haree no rona ona husi nia. 16 Entaun, tansá mak ó sei demora? Hamriik hodi hetan batizmu no hamoos ó-nia sala hodi bolu nia naran.’

17 “No kuandu haʼu fila fali ba Jeruzalein no halo hela orasaun iha templu, haʼu simu vizaun ida, 18 no haʼu haree Jesus dehan ba haʼu: ‘Lalais, no sai kedas husi Jeruzalein, tanba sira sei la simu ó-nia sasin kona-ba haʼu.’ 19 No haʼu dehan: ‘Naʼi, sira rasik hatene ho didiʼak katak uluk haʼu sempre laʼo husi sinagoga ida ba sinagoga seluk hodi hatama ba komarka no baku ema sira neʼebé fiar Ita; 20 no kuandu ema oho Ita-Boot nia sasin Estevão, haʼu rasik mós apoia, no haʼu hamriik besik hodi tau matan ba unuk liʼur husi ema sira neʼebé oho nia.’ 21 Maibé nia dehan ba haʼu: ‘Hamriik no laʼo bá, tanba haʼu sei haruka ó ba nasaun sira neʼebé dook.’”

22 Sira kontinua rona nia toʼo liafuan sira-neʼe, tuirmai sira hakilar dehan: “Halakon tiha mane neʼe husi rai, tanba nia la merese atu moris!” 23 No sira hakilar no soe sira-nia unuk no soe rai-rahun ba leten, 24 tan neʼe komandante tropa nian haruka atu lori nia ba fatin soldadu nian no haruka atu baku nia hodi buka-hatene loloos tansá mak ema-lubun hakilar hasoru nia. 25 Maibé kuandu sira kesi tiha nia atu baku nia ho xikote, Paulo dehan ba kapitaun tropa nian neʼebé hamriik besik: “Tuir lei, imi bele baku ema Roma ida maski seidauk tesi lia ba nia ka lae?” 26 Kuandu kapitaun tropa nian rona ida-neʼe, nia bá no fó-hatene komandante dehan: “Saida mak Ita hakarak halo ba nia? Mane neʼe mak ema Roma ida.” 27 Entaun, komandante neʼe hakbesik ba Paulo no dehan: “Fó-hatene haʼu, ó ema Roma ka?” Nia hatán: “Loos.” 28 Komandante tropa nian hatete: “Haʼu selu osan barak atu hetan direitu hodi sai sidadaun Roma nian.” Paulo hatán: “Maibé haʼu moris mai nuʼudar sidadaun Roma nian.”

29 Ho ida-neʼe, mane sira neʼebé atu baku nia hasees an kedas husi nia; no kuandu komandante neʼe rona katak Paulo mak ema Roma ida, komandante sai taʼuk tanba nia mak haruka ema kesi Paulo ho korrente.

30 Neʼe duni, loron tuirmai, tanba nia hakarak nafatin atu hatene ho loloos tansá mak ema judeu sira duun Paulo, nia kore Paulo no haruka ulun-naʼin amlulik sira no Sinédriu tomak atu halibur hamutuk. Tuirmai, nia lori Paulo no haruka nia hamriik iha sira-nia klaran.

23 Paulo hateke didiʼak ba Sinédriu no dehan: “Maun-alin sira, toʼo agora haʼu sempre moris ho laran-moos* iha Maromak nia oin.” 2 Ho ida-neʼe amlulik boot Ananias haruka sira neʼebé hamriik besik nia atu tuku Paulo nia ibun. 3 Tuirmai Paulo dehan ba nia: “Maromak mós sei baku ó, ó ema laran-makerek.* Ó tuur atu tesi lia ba haʼu tuir Ukun-Fuan, maibé ó rasik kontra Ukun-Fuan hodi haruka ema tuku haʼu ka?” 4 Sira neʼebé hamriik besik dehan: “Ó koʼalia aat hasoru Maromak nia amlulik boot ka?” 5 No Paulo dehan: “Maun-alin sira, haʼu la hatene katak nia mak amlulik boot. Basá hakerek nanis ona: ‘Ó labele koʼalia aat hasoru ó-nia povu nia ukun-naʼin.’”

6 No kuandu Paulo haree katak sira balu mak ema saduseu no balu seluk mak ema farizeu, nia hahú koʼalia ho lian makaʼas iha Sinédriu dehan: “Maun-alin sira, haʼu ema farizeu ida, no farizeu nia oan. Ohin haʼu hetan tesi-lia tanba haʼu fiar katak ema mate sira sei moris hiʼas.” 7 Kuandu nia dehan ida-neʼe, ema farizeu no saduseu sira haksesuk malu, no ema-lubun fahe malu. 8 Tanba ema saduseu dehan katak la iha moris-hiʼas, la iha anju, ka la iha espíritu, maibé ema farizeu sira fiar buat sira-neʼe. 9 Entaun, ema barak hahú hakilar ho lian makaʼas, no ema eskriba balu husi grupu farizeu hamriik no koʼalia ho hirus dehan: “Ami la hetan sala ida iha ema neʼe; tanba karik espíritu ida ka anju ida mak koʼalia ba nia.” 10 No kuandu haksesuk-malu sai makaʼas liután, komandante tropa nian sai taʼuk katak sira sei oho Paulo, tan neʼe nia haruka soldadu sira hodi tun no foti Paulo husi sira-nia leet no lori nia ba fatin soldadu nian.

11 Maibé iha kalan neʼe, Naʼi hamriik iha Paulo nia sorin no dehan: “Aten-brani nafatin bá! Tanba hanesan ó fó sasin ho didiʼak kona-ba haʼu iha Jeruzalein, ó mós tenke fó sasin kona-ba haʼu iha Roma.”

12 No kuandu rai naroman ona, ema judeu sira halo planu no jura katak sira sei hetan malisan se sira han ka hemu buat ruma toʼo sira oho tiha nia. 13 Iha mane naʼin haatnulu liu mak jura atu halo ida-neʼe; 14 no sira bá hasoru ulun-naʼin amlulik sira no katuas sira hodi dehan: “Ami jura ona katak ami tenke hetan malisan se ami han buat ruma toʼo ami oho Paulo. 15 Entaun agora imi hamutuk ho Sinédriu tomak tenke fó sai ba komandante tropa nian katak nia tenke lori Paulo tun mai imi, hodi halo finje katak imi hakarak buka-hatene didiʼak kona-ba nia. Maibé antes nia besik, ami sei prontu atu oho nia.”

16 Maibé, Paulo nia feton nia oan-mane rona kona-ba sira-nia planu atu hein Paulo, entaun nia bá hodi tama iha fatin soldadu nian no fó-hatene ba Paulo. 17 No Paulo bolu kapitaun tropa nian ida no dehan: “Lori labarik joven neʼe bá hasoru komandante tanba nia iha buat ruma atu fó-hatene ba komandante.” 18 Tan neʼe, mane neʼe lori nia ba komandante tropa nian no dehan: “Paulo neʼebé iha dadur laran bolu haʼu no nia husu atu lori mane joven neʼe ba Ita tanba nia iha buat ruma atu fó-hatene Ita.” 19 Komandante tropa nian kaer nia liman no lori nia ketak hodi husu mesamesak ba nia dehan: “Saida mak ó hakarak fó-hatene ba haʼu?” 20 Nia dehan: “Ema judeu sira koʼalia hamutuk ona atu husu Ita-Boot atu lori tun Paulo ba Sinédriu aban hodi finje katak sira hakarak atu buka-hatene didiʼak buat ruma kona-ba nia. 21 Maibé, keta fiar sira, tanba iha mane naʼin-haatnulu liu hein hela nia iha dalan, no sira jura ba sira-nia an katak sira sei hetan malisan se sira han ka hemu buat ruma toʼo sira oho nia; no sira agora prontu ona hodi hein deʼit Ita-Boot nia desizaun.” 22 Tan neʼe, komandante tropa nian husik mane joven neʼe bá hodi dehan: “Keta fó-hatene ema ida katak ó fó sai ona buat neʼe mai haʼu.”

23 No nia bolu kapitaun tropa nian naʼin-rua no dehan: “Prepara soldadu naʼin-200 atu laʼo ba Sezareia iha tuku sia kalan, no prepara mós soldadu hitunulu neʼebé saʼe kuda no soldadu naʼin-200 neʼebé lori diman. 24 No mós prepara kuda ba Paulo atu saʼe hodi nuneʼe nia bele toʼo ba governadór Feliks ho seguru.” 25 No nia hakerek karta hanesan tuirmai neʼe:

26 “Haʼu Cláudio Lísias, haʼu hakerek karta neʼe ba Ita-Boot, Governadór Feliks, neʼebé kmanek liu: Haʼu haruka haʼu-nia kumprimentus ba Ita! 27 Ema judeu sira kaer mane neʼe no besik atu oho nia, maibé haʼu toʼo lalais hamutuk ho soldadu sira no salva nia, tanba haʼu rona katak nia ema Roma ida. 28 No haʼu hakarak hatene loloos tansá mak sira duun nia, entaun haʼu lori tun nia ba sira-nia Sinédriu. 29 Tuirmai, haʼu haree katak sira duun nia kona-ba sira-nia Ukun-Fuan, maibé la iha lia ida neʼebé halo nia merese atu hetan kastigu-mate ka sai nuʼudar dadur. 30 Tanba ema fó-hatene ona ba haʼu kona-ba sira-nia planu atu oho nia, haʼu haruka nia lalais ba Ita no haʼu fó-hatene ona ba sira neʼebé duun nia atu lori lia neʼe ba Ita.”

31 Tan neʼe, soldadu sira-neʼe halo tuir lei neʼebé sira simu no lori Paulo iha kalan hodi ba Antipátride. 32 Loron tuirmai, soldadu sira neʼebé saʼe kuda deʼit mak kontinua bá hamutuk ho Paulo, maibé soldadu sira seluk fila fali ba sira-nia fatin. 33 Soldadu sira neʼebé saʼe kuda toʼo ba Sezareia no fó karta ba governadór no mós entrega Paulo ba nia. 34 Depois lee tiha karta neʼe, nia husu Paulo mai husi neʼebé, no tuirmai nia hatene katak Paulo husi Silísia. 35 Nia dehan: “Haʼu sei rona didiʼak kona-ba ó-nia kazu kuandu sira neʼebé duun ó toʼo mai.” No nia haruka guarda sira atu tau matan ba nia iha Herodes nia palásiu.

24 Loron lima liu tiha, amlulik boot Ananias tun mai hamutuk ho katuas balu no advogadu ida naran Tertulo, no sira hatoʼo ba governadór informasaun neʼebé kontra Paulo. 2 Kuandu sira bolu Paulo mai, Tertulo hahú duun nia iha Feliks nia oin no nia dehan:

“Liuhusi Ita-Boot mak ami hetan duni dame, no buat barak iha nasaun neʼe laʼo ba oin tanba Ita-nia planu. 3 Oh Feliks neʼebé kmanek boot, ami sempre agradese tebes kona-ba buat sira-neʼe hotu. 4 Maibé haʼu sei la halo Ita lakon tempu tan, nuneʼe haʼu husu Ita-Boot tanba Ita-nia laran-diʼak atu rona ami ba tempu uitoan. 5 Ami hatene mane neʼe sempre hamosu problema no book ema judeu hotu hodi kontra governu, no nia mak ulun-naʼin ba grupu ida neʼebé bolu nuʼudar Ema Nazaré. 6 Nia mós koko atu halo foʼer templu no tan neʼe ami kaer nia. 7 ——* 8 Kuandu Ita-Boot rasik husu didiʼak nia, Ita sei hatene kona-ba buat hotu neʼebé ami duun hasoru nia.”

9 Ho ida-neʼe, ema judeu sira mós hahú duun Paulo, no dehan katak buat sira-neʼe loos. 10 Kuandu governadór halo sinál ba Paulo atu koʼalia, Paulo hatán:

“Haʼu hatene ho didiʼak katak Ita-Boot mak juis ba nasaun neʼe ba tinan barak ona, tan neʼe haʼu kontente atu koʼalia hodi defende haʼu-nia an. 11 Ita-Boot rasik bele buka-hatene buat neʼebé haʼu dehan tuirmai neʼe: Seidauk liu loron sanulu-resin-rua husi tempu neʼebé haʼu saʼe ba Jeruzalein atu halo adorasaun; 12 no sira la haree haʼu diskute malu ho ema ida iha templu ka book ema-lubun iha sinagoga sira ka iha sidade tomak. 13 No sira mós la bele hatudu ba Ita katak buat neʼebé sira foin duun haʼu mak loos. 14 Maibé, haʼu simu duni katak haʼu halaʼo haʼu-nia moris hodi tuir buat neʼebé sira bolu nuʼudar ‘relijiaun foun ida’, ho ida-neʼe mak haʼu halo serbisu santu ba haʼu-nia beiʼala sira-nia Maromak, basá haʼu fiar buat hotu neʼebé iha Ukun-Fuan no neʼebé hakerek ona iha livru profeta sira-nian; 15 no haʼu iha esperansa hanesan ema sira-neʼe, katak Maromak sei fó moris-hiʼas ba ema diʼak no ema aat. 16 Tan neʼe, haʼu sempre hakaʼas an atu nuneʼe haʼu iha laran* neʼebé moos iha Maromak nia oin no mós iha ema nia oin. 17 Entaun, liutiha tinan barak, haʼu bá Jeruzalein atu fó osan hodi ajuda haʼu-nia povu no atu hasaʼe prezente ba Maromak. 18 No kuandu haʼu hamoos an ona tuir lei no haʼu iha templu laran, sira hetan haʼu maski haʼu la hamutuk ho ema-lubun ka halo runguranga. Maibé, ema judeu balu husi área Ázia nian 19 duun haʼu, no se sira iha buat ruma kontra haʼu, sira tenke mai iha neʼe hodi koʼalia iha Ita-Boot nia oin. 20 Ka, husik ema sira neʼebé hamriik iha fatin neʼe mak fó sai rasik se haʼu halo duni sala kuandu sira tesi lia ba haʼu iha Sinédriu nia oin. 21 Karik sira bele duun haʼu kona-ba buat ida deʼit. Kuandu haʼu hamriik iha sira-nia leet haʼu koʼalia ho lian makaʼas dehan: ‘Ohin haʼu hetan tesi-lia iha imi-nia oin tanba haʼu fiar kona-ba moris-hiʼas husi mate!’”

22 Maibé, Feliks husik problema neʼe ba tempu seluk, basá nia hatene didiʼak kona-ba Dalan neʼe no nia dehan: “Kuandu komandante Lísias tun mai haʼu sei halo desizaun kona-ba buat neʼebé imi duun.” 23 No nia haruka kapitaun tropa nian atu hatama Paulo iha komarka, maibé atu fó nia liberdade uitoan, no keta bandu ninia belun sira atu tau matan ba buat neʼebé nia presiza.

24 Loron balu liu tiha, Feliks mai ho nia feen Drusila, neʼebé mós ema judeu ida, no nia haruka atu bolu Paulo no rona nuʼudar Paulo esplika kona-ba fiar ba Kristu Jesus. 25 Maibé nuʼudar nia koʼalia kona-ba hahalok loos, kontrola an, no kona-ba tesi-lia neʼebé atu mai, Feliks sai taʼuk no dehan: “Agora ó bele bá ona, no kuandu haʼu iha tan tempu mak haʼu bolu fali ó.” 26 Maibé, iha tempu hanesan, nia mós hein katak Paulo sei fó osan ba nia. Tan razaun neʼe mak nia bolu beibeik Paulo atu koʼalia ho nia. 27 No tinan rua liu tiha, Pórsio Festo troka fali Feliks, no tanba Feliks hakarak atu ema judeu sira gosta nia, nia husik Paulo iha komarka laran.

25 Nuneʼe, Festo toʼo ba provínsia neʼe no hahú atu ukun, no liutiha loron tolu nia laʼo husi Sezareia hodi saʼe ba Jeruzalein. 2 No ulun-naʼin amlulik sira no ema-boot judeu nian fó sai ba nia informasaun neʼebé kontra Paulo. Nuneʼe, sira hahú husu Festo 3 atu hatudu laran-diʼak ba sira no haruka Paulo bá Jeruzalein, tanba sira halo planu atu ema hein nia iha dalan hodi oho nia. 4 Maibé, Festo dehan katak Paulo tenke hela iha komarka laran iha Sezareia no mós katak lakleur tan, nia rasik sei fila fali ba neʼebá. 5 Nia dehan: “Tan neʼe, imi-nia ulun-naʼin sira neʼebé iha imi-nia leet tenke mai hamutuk ho haʼu, atu nuneʼe se mane neʼe halo sala ruma, sira bele duun nia.”

6 Entaun, nia hela hamutuk ho sira la liu loron ualu ka sanulu, depois neʼe nia tun ba Sezareia, no iha loron tuirmai nia tuur iha kadeira tesi-lia nian no haruka ema atu lori Paulo mai. 7 Kuandu Paulo toʼo mai ona, ema judeu sira neʼebé tun husi Jeruzalein hamriik haleʼu nia, no sira foti lia barak hasoru nia no duun nia ho sala todan maski sira la bele hatudu buat ida atu apoia sira-nia liafuan.

8 Maibé Paulo defende nia an hodi dehan: “Haʼu la halo sala ida hasoru Ukun-Fuan judeu nian ka hasoru templu ka hasoru Liurai Roma nian.”* 9 No tanba Festo hakarak atu ema judeu sira gosta nia, nia dehan ba Paulo: “Ó hakarak atu saʼe ba Jeruzalein no hetan tesi-lia iha neʼebá kona-ba buat sira-neʼe ka lae?” 10 Maibé Paulo dehan: “Haʼu hamriik daudaun iha Liurai Roma nia kadeira tesi-lia nian nia oin, iha neʼe mak haʼu tenke hetan tesi-lia. Haʼu la halo sala ida hasoru ema judeu, no Ita-Boot rasik mós hatene kona-ba neʼe. 11 Se haʼu halo duni sala no halo ona buat aat ruma neʼebé merese kastigu-mate, haʼu prontu atu hetan kastigu-mate; maibé se la iha buat ida atu apoia lia neʼebé mane sira-neʼe duun hasoru haʼu, entaun ema ida la iha direitu atu entrega haʼu ba sira tan deʼit hakarak atu halo sira kontente. Haʼu husu atu lori lia neʼe ba Liurai Roma nian!” 12 Depois koʼalia tiha ho ema matenek sira, Festo dehan: “Tanba ó husu atu lori lia neʼe ba Liurai Roma nian, neʼe duni ó sei bá Liurai Roma.”

13 No loron balu liu tiha, liurai Agripa no Berenike toʼo ba Sezareia atu vizita Festo hodi fó parabéns. 14 Entaun, tanba sira hela iha neʼebá loron balu, Festo konta ba liurai kona-ba Paulo hodi dehan:

“Iha ema dadur ida neʼebé Feliks husik hela, 15 no kuandu haʼu iha Jeruzalein, ulun-naʼin amlulik sira no katuas judeu nian fó sai ba haʼu informasaun kona-ba nia, no sira husu haʼu atu tesi lia hasoru nia. 16 Maibé haʼu dehan ba sira katak laʼós ema Roma nia toman atu entrega ema ruma ba sira neʼebé duun nia tan deʼit halo sira kontente. Basá ulukliu nia tenke hasoru ho sira oin ba oin atu nia iha oportunidade hodi defende nia an. 17 Tan neʼe, kuandu sira toʼo iha neʼe, haʼu la demora tan, maibé loron tuirmai haʼu tuur iha kadeira tesi-lia nian no haruka ema atu lori mane neʼe mai. 18 No sira neʼebé duun nia hamriik hodi koʼalia, maibé sira la hatudu sai kona-ba buat aat ruma neʼebé haʼu hanoin nia halo ona. 19 Tuir loloos, sira haksesuk malu deʼit ho nia kona-ba sira-nia adorasaun ba maromak ida no kona-ba mane ida naran Jesus neʼebé mate ona, maibé Paulo nafatin dehan katak nia moris hela. 20 Entaun, tanba haʼu ladún hatene oinsá atu rezolve sira-nia haksesuk-malu neʼe, haʼu husu nia se nia hakarak atu bá Jeruzalein no hetan tesi-lia kona-ba buat sira-neʼe iha neʼebá. 21 Maibé kuandu Paulo husu atu hela nafatin iha komarka hodi hein desizaun husi Liurai Boot, haʼu fó mandamentu atu husik nia iha komarka laran toʼo haʼu tenke haruka nia ba Liurai Roma nian.”

22 No Agripa dehan ba Festo: “Haʼu rasik mós hakarak atu rona ba mane neʼe.” Festo hatán: “Aban Ita sei rona ba nia.” 23 Tan neʼe, loron tuirmai, Agripa no Berenike mai ho glória boot no tama iha tribunál hamutuk ho komandante sira no mós ema-boot sira iha sidade neʼe, no tuirmai Festo haruka atu lori Paulo mai. 24 No Festo dehan: “Liurai Agripa no imi hotu neʼebé ohin hamutuk ho ami, imi haree bá mane neʼebé ema judeu hotu hakilar hodi husu haʼu iha Jeruzalein no mós iha neʼe atu oho nia. 25 Maibé haʼu haree katak nia la halo sala ida neʼebé merese atu mate. Tan neʼe, kuandu mane neʼe rasik husu atu lori lia neʼe ba Liurai Boot, haʼu deside atu haruka nia bá. 26 Maibé kona-ba nia, haʼu la iha buat ida atu hakerek ba haʼu-nia Naʼi. Tan neʼe, haʼu lori nia ba imi-nia oin, no liuliu ba Ita-Boot, Liurai Agripa, atu nuneʼe, kuandu buka-hatene didiʼak tiha kona-ba lia neʼe, haʼu bele hetan buat ruma atu hakerek. 27 Tanba tuir haʼu-nia hanoin, kuandu haruka ema dadur ida, presiza mós atu hakerek kona-ba lia neʼebé ema duun hasoru nia.”

26 Agripa dehan ba Paulo: “Agora ó bele koʼalia hodi defende ó-nia an.” Tuirmai, Paulo lolo nia liman no hahú koʼalia hodi dehan:

2 “Liurai Agripa, ohin haʼu kontente atu hamriik iha Ita-Boot nia oin hodi defende haʼu-nia an kona-ba buat hotu neʼebé ema judeu sira duun hasoru haʼu, 3 liuliu tanba Ita-Boot hatene ho didiʼak kona-ba ema judeu nia toman sira no mós sira-nia haksesuk-malu. Tan neʼe, haʼu husu favór ida atu Ita-Boot rona ba haʼu ho pasiénsia.

4 “Tuir loloos, ema judeu barak hatene ona kona-ba haʼu husi joven kedas toʼo tempu neʼebé haʼu iha Jeruzalein. 5 Se sira hakarak, sira bele fó-hatene Ita-Boot katak uluk haʼu mós ema farizeu ida. No ema farizeu nia dalan atu halaʼo adorasaun mak makaʼas liu fali ema judeu seluk. 6 Maibé agora, haʼu hamriik iha neʼe atu hetan tesi-lia tanba haʼu-nia esperansa kona-ba promesa neʼebé Maromak halo ho ita-nia beiʼala sira. 7 Ita-nia suku sanulu-resin-rua mós hakarak haree promesa neʼe sai loos nuʼudar sira kontinua halo serbisu santu loron no kalan ho laran-manas. Oh liurai, kona-ba esperansa neʼe mak ema judeu sira duun haʼu.

8 “Tanbasá mak imi hanoin katak Maromak la bele fó moris-hiʼas ba ema mate? 9 Uluk haʼu fiar duni katak haʼu tenke halo buat barak atu kontra hasoru Jesus Nazaré nia naran. 10 Tuir loloos, haʼu halo duni ida-neʼe iha Jeruzalein, no ho kbiit husi ulun-naʼin amlulik sira haʼu hatama ema santu barak iha komarka; no haʼu mós fó apoia kuandu ema oho sira. 11 No dala barak haʼu haterus sira iha sinagoga hotu hodi koko obriga sira atu nega sira-nia fiar; no tanba haʼu hirus tebes hasoru sira, haʼu mós laʼo ba sidade sira seluk atu fó-terus ba sira.

12 “Nuʼudar haʼu halo ida-neʼe, haʼu laʼo ba Damasku ho kbiit no mandamentu husi ulun-naʼin amlulik sira. 13 No iha dalan kuandu meiudia ona, oh liurai, haʼu haree naroman husi lalehan neʼebé nabilan liu fali loron hodi haleʼu haʼu no mós haleʼu sira neʼebé laʼo hamutuk ho haʼu. 14 No kuandu ami hotu monu ba rai, haʼu rona lian ida koʼalia ba haʼu ho lia-ebraiku dehan: ‘Saul, Saul, tansá mak ó fó-terus mai haʼu? Ó hakanek deʼit ó-nia an hodi luta hasoru Maromak nia serbisu.’* 15 No haʼu dehan: ‘Sé mak Ita, Naʼi?’ No Naʼi hatete ba haʼu: ‘Haʼu mak Jesus, ida neʼebé ó fó-terus. 16 Maski nuneʼe, hamriik bá. Haʼu hatudu ona haʼu-nia an ba ó atu hili ó nuʼudar atan no sasin kona-ba buat neʼebé ó haree ona no kona-ba buat neʼebé ó sei haree. 17 No haʼu sei salva ó husi povu neʼe no husi nasaun sira seluk neʼebé haʼu haruka ó atu bá. 18 Haʼu haruka ó hodi loke sira-nia matan, no halo sira fila husi nakukun ba naroman no husi kbiit Satanás nian ba Maromak. Nuneʼe, liuhusi sira-nia fiar ba haʼu, sira bele hetan perdua ba sira-nia sala no hetan liman-rohan hamutuk ho sira neʼebé sai santu ona.’

19 “Tan neʼe, Liurai Agripa, haʼu halo tuir vizaun neʼebé haʼu simu husi lalehan. 20 No ulukliu haʼu lori mensajen ba ema Damasku sira no tuirmai ba sira neʼebé iha Jeruzalein, no mós ba sira neʼebé iha área Judeia nian no ba nasaun sira seluk; no mensajen neʼebé haʼu hatoʼo mak sira tenke hakribi sira-nia sala no fila ba Maromak hodi halo hahalok neʼebé hatudu katak sira hakribi sala. 21 Tan neʼe mak ema judeu sira kaer haʼu iha templu no koko atu oho haʼu. 22 Maibé, tanba haʼu hetan ajuda husi Maromak, toʼo ohin haʼu kontinua fó sasin ba ema-boot no kiʼik, hodi koʼalia tuir deʼit buat neʼebé profeta sira no mós buat neʼebé Moisés fó sai ona atu mosu, 23 katak Kristu tenke hetan terus, no mós nuʼudar ida neʼebé hetan moris-hiʼas ulukliu husi mate, nia sei haklaken hodi fó naroman ba povu neʼe no ba nasaun sira seluk.”

24 No nuʼudar nia koʼalia buat sira-neʼe atu defende ninia an, Festo koʼalia ho lian makaʼas dehan: “Ó bulak ona, Paulo! Ó estuda barak liu no neʼe halo ó sai bulak ona!” 25 Maibé Paulo hatán: “Festo neʼebé kmanek, haʼu la bulak, maibé haʼu koʼalia liafuan lia-loos nian ho hanoin neʼebé loos. 26 Tuir loloos, liurai hatene didiʼak kona-ba buat sira-neʼe, tan neʼe haʼu bele koʼalia nakloke ba nia; haʼu fiar duni katak nia hatene buat sira-neʼe hotu, basá buat sira-neʼe la halo ho subasubar deʼit. 27 Ita-Boot, Liurai Agripa, Ita fiar profeta sira ka lae? Haʼu hatene katak Ita fiar.” 28 Maibé Agripa dehan ba Paulo: “Iha tempu badak nia laran ó sei halo haʼu sai ema kristaun.” 29 Ho ida-neʼe Paulo dehan: “Haʼu harohan ba Maromak katak iha tempu badak ka iha tempu naruk laʼós deʼit Ita-Boot, maibé mós sira hotu neʼebé rona haʼu ohin sei sai ema hanesan haʼu, maibé la ho dadur hanesan neʼe.”

30 Tuirmai liurai hamriik, inklui governadór no Berenike no mós ema sira neʼebé tuur hamutuk sira. 31 Maibé nuʼudar sira laʼo sai daudaun, sira koʼalia ba malu dehan: “Mane neʼe la halo sala ida neʼebé merese kastigu-mate ka sai dadur.” 32 Liután neʼe, Agripa dehan ba Festo: “Se mane neʼe la husu atu lori lia neʼe ba Liurai Roma nian, nia bele livre ona.”

27 No kuandu sira deside ona atu ami saʼe ró hodi bá Itália, sira entrega Paulo no ema dadur sira seluk ba kapitaun ida naran Júlio husi batallaun Agusto nian. 2 Ami saʼe ró ida husi Adramítio no hahú bá. Ró neʼe atu bá fatin oioin iha área Ázia nian. Aristarko, ema Masedónia ida husi Tesalónika, nia mós hamutuk ho ami. 3 Loron tuirmai ami toʼo Sidon, no Júlio hatudu laran-diʼak* ba Paulo no fó lisensa ba nia atu bá hasoru nia belun sira no sira tau matan ba nia.

4 Ami-nia ró sai husi fatin neʼe no laʼo liu besik Xipre tanba ida-neʼe proteje ami husi anin neʼebé huu hasoru ami, 5 no ami hakur liuhusi tasi besik Silísia no Pamfília no toʼo ba Mira iha Lísia. 6 No iha neʼebá, kapitaun tropa nian hetan ró ida husi Alexandria neʼebé atu bá Itália. No nia haruka ami saʼe ba ró neʼe. 7 Depois ró neʼe laʼo neineik tiha ba loron barak, ami toʼo iha Knido ho susar oioin tanba anin la husik ami atu kontinua bá. Nuneʼe, ami liu husi Salmona iha Kreta hodi proteje ami husi anin. 8 Maski anin halo susar ba ró, maibé ami toʼo ba fatin ida neʼebé bolu Portu Diʼak, besik sidade Laseia.

9 Tempu balu liu tiha ona no agora perigu tebes atu saʼe ró tanba loron jejún nian liu ona,* tan neʼe Paulo fó konsellu 10 hodi dehan ba sira: “Maluk sira, se ita kontinua bá, haʼu haree katak ita sei hetan susar no lakon buat barak; laʼós deʼit sasán no ró maibé mós ita-nia moris* rasik.” 11 Maibé kapitaun tropa nian rona liu ba kapitaun ró nian no ba ró-naʼin duké rona ba buat neʼebé Paulo dehan. 12 No tanba portu neʼe ladún diʼak hodi hela durante tempu malirin, ema barak fó konsellu atu lori ró sai husi fatin neʼe, atu koko se sira bele toʼo iha Fenix, iha Kreta, hodi hela iha neʼebá durante tempu malirin. Fatin neʼe iha portu ida neʼebé loke ba parte besik norte no parte besik súl.

13 Liután neʼe, kuandu anin husi parte súl huu neineik, sira hanoin katak neʼe mak tempu diʼak hodi bá toʼo Fenix, entaun sira dada saʼe ankor no hahú bá hodi tuir tasi-ibun Kreta nian. 14 Maibé, lakleur deʼit anin makaʼas neʼebé bolu nuʼudar Anin Norte* huu mai. 15 Tanba anin huu makaʼas hasoru ró neʼe no la bele ona atu tahan hasoru anin, ami husik deʼit bá no anin mak lori ró neʼe. 16 No ami toʼo ba illa kiʼik ida neʼebé bolu Kauda neʼebé proteje ami, maski nuneʼe susar tebes atu kontrola ró kiʼik neʼebé iha ró nia kotuk. 17 Maibé depois hasaʼe tiha ró kiʼik neʼe ba ró boot nia laran, sira hahú halo metin tan ró boot neʼe hodi kesi tali haleʼu nia; no tanba taʼuk ró sei kona rai-henek iha tasi okos iha Sirte, sira hatún sasán sira* no anin lori ró neʼe bá. 18 Maibé tanba anin-boot halo laloran baku makaʼas hasoru ami-nia ró, entaun loron tuirmai sira hahú halo kmaan ró; 19 no iha loron terseiru, sira rasik mak soe tiha ró talin balu.

20 Tuirmai, depois loro-matan no fitun la mosu ba loron barak ona, no anin boot tebes mak huu hasoru ami, ami lakon ona ami-nia esperansa atu hetan salvasaun. 21 Kuandu ema hotu la han ba tempu kleur, Paulo hamriik iha sira-nia klaran no dehan: “Maluk sira, se imi rona karik haʼu-nia konsellu atu la sai husi Kreta, imi sei la lakon sasán no la hetan susar hanesan neʼe. 22 Maibé agora, haʼu husu imi atu aten-brani bá, basá imi ida mós sei la lakon imi-nia moris,* só deʼit ró neʼe mak sei lakon. 23 Tanba horikalan, anju ida husi Maromak neʼebé haʼu adora no neʼebé haʼu halo serbisu santu, nia hamriik besik haʼu 24 no dehan: ‘Keta taʼuk Paulo. Ó tenke hamriik iha Liurai Roma nia oin, no haree! tanba ó mak Maromak sei hatudu laran-diʼak hodi salva ema hotu neʼebé saʼe ró hamutuk ho ó.’ 25 Tan neʼe maluk sira, sai aten-brani bá; basá haʼu fiar ba Maromak katak buat neʼebé nia fó sai ona ba haʼu sei sai loos hotu. 26 Maibé, ita-nia ró sei kona duni rai iha illa ida.”

27 No anin no laloran baku ami-nia ró bá-mai iha tasi Adriátiku nian toʼo kalan sanulu-resin-haat ona, no iha kalan-boot serbisu-naʼin iha ró neʼe hanoin katak sira besik ona ba rai ida. 28 Entaun sira sukat tasi nia kleʼan no hetan metru tolunulu-resin-neen; no depois bá oin uitoan tan, sira sukat fali no hetan metru ruanulu-resin-hitu. 29 No tanba taʼuk katak ró sei xoke fatuk sira, entaun sira soe ankor haat husi ró nia kotuk no hahú hein atu rai sai loron lalais. 30 Maibé kuandu serbisu-naʼin iha ró neʼe buka atu halai no hatún ró kiʼik ba tasi hodi finje katak atu hatún ankor sira husi ró nia oin, 31 Paulo dehan ba kapitaun tropa nian no mós soldadu sira: “Se ema sira-neʼe la hela nafatin iha ró laran, imi sei lakon.” 32 Ho ida-neʼe, soldadu sira tesi tiha ró kiʼik nia talin no husik ró kiʼik neʼe.

33 Kuandu rai besik naroman ona, Paulo fó laran-manas ba ema hotu atu han buat ruma hodi dehan: “Agora mak loron sanulu-resin-haat ona no imi kontinua hein hodi la han buat ida. 34 Tan neʼe, haʼu husu imi atu han ai-han ruma, basá neʼe ba imi-nia diʼak; tanba imi-nia fuuk-lahan ida husi imi-nia ulun mós sei la lakon.” 35 Depois koʼalia tiha ida-neʼe, nia foti paun ida, fó obrigadu ba Maromak iha sira hotu nia oin, silu ida-neʼe no han. 36 Ho ida-neʼe, sira hotu sai haksolok no hahú foti ai-han ruma no han. 37 No ami hotu iha ró laran hamutuk ema naʼin-276.* 38 Kuandu sira sai bosu ona, sira hahú halo kmaan ró hodi soe sai trigu ba tasi.

39 Ikusmai kuandu naroman ona, sira haree rai-henek iha tasi-ibun, maibé sira la hatene rai neʼe, no sira hakarak atu lori ró bá toʼo tasi-ibun neʼe. 40 Entaun, sira tesi ankor nia talin no husik neʼe monu ba tasi, no iha tempu hanesan sira mós halo mamar kamudi talin no dada laan hodi anin bele huu ró ba tasi-ibun. 41 Kuandu sira-nia ró kona rai-henek iha tasi okos, ró neʼe xoke rai no ró nia ulun sai metin no la bele book an, maibé laloran baku hasoru ró nia kotuk no hahú sai rahun. 42 Ho ida-neʼe, soldadu sira deside atu oho ema dadur sira, atu nuneʼe sira ida mós labele nani hodi halai lakon. 43 Maibé kapitaun tropa nian hakarak atu lori Paulo ho seguru no nia hapara sira-nia planu. Tuirmai, nia haruka sira neʼebé bele nani atu haksoit tun ba tasi hodi toʼo uluk ba rai-maran, 44 no sira seluk mós tuir, balu uza ai-kabelak no balu tan uza buat ruma seluk husi ró neʼe. No sira hotu toʼo iha rai-maran ho seguru.

28 Kuandu ami toʼo ba tasi-ibun ho seguru, ami foin hatene katak illa neʼe bolu nuʼudar Malta. 2 No rai-naʼin sira* hatudu laran-diʼak ba ami. Sira sunu ahi no simu ami hotu hodi ajuda ami tanba udan tun no rai malirin. 3 Maibé kuandu Paulo halibur ai balu no tau ba ahi, samea neʼebé iha venenu halai sai tanba manas, no samea neʼe tata metin Paulo nia liman. 4 Kuandu rai-naʼin sira haree samea neʼe tata metin hela nia liman, sira hahú dehan ba malu: “Mane neʼe mak ohodór duni, tanba maski nia toʼo tasi-ibun ho seguru, maibé nia la bele kontinua moris basá neʼe mak kastigu ba nia.” 5 Maski nuneʼe, nia liki samea neʼe ba ahi laran no nia la hetan moras ida. 6 Maibé sira hein katak nia sei hetan bubu ka derrepente deʼit nia sei mate. Kuandu sira hein kleur no haree katak la iha buat ida mosu ba nia, sira troka sira-nia hanoin no dehan katak nia mak maromak ida.

7 No besik iha fatin neʼe, iha toʼos balu, no toʼos-naʼin mak ema-boot iha rai neʼe no nia naran Públio. Nia simu ami ho laran-diʼak no tau matan ba ami durante loron tolu. 8 No Públio nia aman toba hela tanba isin-manas no moras iha kabun, entaun Paulo tama hodi hasoru nia no halo orasaun, no tau liman ba nia no kura nia. 9 Depois halo tiha ida-neʼe, ema moras seluk iha illa neʼe mai toʼo nia no nia kura sira. 10 No sira mós hatudu agradese ba ami hodi fó prezente barak, no kuandu ami atu saʼe ró, sira fó ami sasán barak neʼebé ami presiza.

11 Fulan tolu liu tiha, ami saʼe ró ida neʼebé iha símbolu “Zeus nia Oan sira”. Ró neʼe husi Alexandria no para iha illa neʼe durante tempu malirin. 12 No kuandu toʼo ba Sirakusa, ami hela iha neʼebá ba loron tolu. 13 No husi neʼebá ami bá toʼo Régio. No liutiha loron ida anin súl nian huu no ami toʼo ba Putéoli iha loron segundu. 14 Iha fatin neʼe ami hetan maun-alin sira no sira husu ami atu hela ho sira ba loron hitu; depois neʼe ami husik hela sira hodi bá Roma. 15 Kuandu maun-alin sira iha Roma rona katak ami atu bá neʼebá, sira mai hasoru ami iha merkadu Ápio, iha fatin neʼebé bolu nuʼudar Uma Tolu.* Bainhira haree tiha sira, Paulo fó-agradese ba Maromak no sai aten-brani. 16 Ikusmai ami toʼo ba Roma, no Paulo simu lisensa atu hela mesak iha uma no soldadu halo seguransa ba nia.

17 Maibé liutiha loron tolu, nia bolu hamutuk ema-boot judeu nian, no kuandu sira halibur ona nia dehan ba sira: “Maun-alin sira, maski haʼu la halo sala ida hasoru povu ka hasoru ita-nia beiʼala sira-nia toman, maibé husi Jeruzalein ema entrega haʼu ba ema Roma nuʼudar dadur. 18 No depois ema sira-neʼe haree didiʼak tiha kona-ba haʼu, sira hakarak atu husik haʼu livre tanba la iha buat ida neʼebé halo haʼu merese atu hetan kastigu-mate. 19 Maibé kuandu ema judeu sira la simu ida-neʼe, haʼu tenke husu atu lori lia neʼe ba Liurai Roma nian,* maibé neʼe la dehan katak haʼu iha buat ruma hodi duun hasoru haʼu-nia nasaun. 20 Entaun, tan razaun neʼe mak haʼu husu atu hasoru imi no koʼalia ho imi. Basá korrente sira-neʼe bobar haleʼu haʼu tanba Izraél nia esperansa.” 21 Sira dehan ba nia: “Ami seidauk simu karta ida husi Judeia kona-ba ó, no mós la iha maun-alin ida neʼebé mai husi fatin neʼebá hodi konta ka koʼalia buat aat ruma kona-ba ó. 22 Maibé ami hanoin katak diʼak atu rona husi ó kona-ba ó-nia hanoin, basá ami rona ona katak ema koʼalia kontra relijiaun foun neʼe iha fatin hotu.”

23 Entaun, sira marka loron ida ho nia, no ema barak loos bá toʼo nia hela-fatin. No hahú husi dadeer toʼo kalan, nia esplika ba sira hodi fó sasin ho didiʼak kona-ba Maromak nia Ukun. No nia koko atu halo sira fiar kona-ba Jesus hodi hanorin husi ukun-fuan Moisés nian no husi liafuan profeta sira-nian. 24 No ema balu hahú fiar buat neʼebé nia dehan; maibé balu seluk la fiar. 25 Entaun, tanba sira iha hanoin neʼebé la hanesan, Paulo koʼalia liafuan tuirmai neʼe nuʼudar sira laʼo sai daudaun. Nia dehan:

“Espíritu santu fó-hatene ho loloos liuhusi profeta Isaías ba imi-nia beiʼala sira, 26 hodi dehan: ‘Laʼo bá, no hatete ba povu neʼe: “Imi sei rona, maibé sei la komprende, no imi sei hateke, maibé sei la haree momoos. 27 Basá povu neʼe nia laran sai toos ona, no maski sira rona ho sira-nia tilun maibé sira la halo tuir, no sira mós taka sira-nia matan. Ho ida-neʼe, sira hatudu katak maski sira iha matan maibé sira lakohi haree no maski sira iha tilun maibé sira lakohi rona; sira lakohi atu komprende iha sira-nia laran hodi fila fali ba haʼu atu haʼu bele kura sira.”’ 28 Tan neʼe, imi hatene bá katak mensajen kona-ba dalan neʼebé Maromak salva ema, fó sai daudaun ona ba nasaun sira seluk, no sira sei rona duni ida-neʼe.” 29 ——*

30 No nia hela ba tinan rua iha uma neʼebé nia aluga, no ho laran-diʼak nia simu ema hotu neʼebé mai hasoru nia. 31 No nia haklaken ba sira ho aten-brani no la husik buat ida hanetik nia atu fó sai Maromak nia Ukun no hanorin buat oioin kona-ba Naʼi Jesus Kristu.

[Nota–rodapé]