Roma

1 Husi Paulo, Jesus Kristu nia atan neʼebé bolu atu sai apóstolu, no nia hili* haʼu atu fó sai liafuan diʼak kona-ba Maromak. 2 No Maromak promete nanis ona kona-ba liafuan diʼak neʼe liuhusi ninia profeta sira iha Eskritura santu. 3 Liafuan diʼak neʼe kona-ba ninia Oan-Mane, ida neʼebé moris iha rai nuʼudar David nia bei-oan. 4 No liuhusi espíritu santu nia kbiit, Oan-Mane neʼe hetan moris-hiʼas husi mate, no ida-neʼe hatudu katak nia mak Maromak nia Oan. Oan-Mane neʼe mak ita Naʼi Jesus Kristu. 5 Nia hatudu laran-diʼak mai haʼu* no hili haʼu nuʼudar apóstolu ida, atu nuneʼe ema husi nasaun hotu bele hatudu fiar no halo tuir nia hodi fó hahiʼi ba nia naran. 6 Imi mós parte husi nasaun sira-neʼe no Maromak mós bolu imi atu bele sai Jesus Kristu nian. 7 Haʼu hakerek ba imi hotu neʼebé iha Roma nuʼudar ema sira neʼebé Maromak hadomi, neʼebé bolu nuʼudar santu:

Haʼu harohan ba ita-nia Aman Maromak no Naʼi Jesus Kristu atu hatudu laran-diʼak ba imi no haraik dame ba imi.

8 Uluknanain, haʼu fó obrigadu ba haʼu-nia Maromak liuhusi Jesus Kristu kona-ba imi hotu, tanba mundu tomak koʼalia ona kona-ba imi-nia fiar. 9 Basá haʼu halo serbisu santu ho haʼu-nia laran tomak ba Maromak hodi apoia liafuan diʼak kona-ba ninia Oan-Mane, no Maromak neʼe mak sai sasin ba haʼu katak haʼu nunka para atu temi kona-ba imi iha haʼu-nia orasaun, 10 no haʼu husu katak se bele karik haʼu sei toʼo ba imi se ida-neʼe mak Maromak nia hakarak. 11 Basá haʼu hakarak tebes atu haree imi, atu haʼu bele fahe liafuan ruma* neʼebé sei ajuda imi atu hametin imi-nia relasaun ho Maromak; 12 ka, atu nuneʼe ita bele fó laran-manas ba malu liuhusi ita-nia fiar, imi-nia fiar no mós haʼu-nian.

13 Maibé maun-alin sira, haʼu hakarak imi hatene katak, dala barak ona haʼu planu atu toʼo ba imi, hodi nuneʼe haʼu bele hetan rezultadu diʼak husi haʼu-nia serbisu haklaken iha neʼebá hanesan mós iha nasaun sira seluk, maibé toʼo agora sempre iha buat ruma hanetik haʼu. 14 Haʼu iha tusan ba ema gregu no ba ema husi rai seluk, ba ema matenek no ba ema beik: 15 tan neʼe, haʼu hakarak tebes atu fó sai mós liafuan diʼak ba imi neʼebé iha Roma. 16 Haʼu la moe kona-ba liafuan diʼak neʼe; tuir loloos, ida-neʼe mak Maromak nia dalan atu fó salvasaun ba ema hotu neʼebé iha fiar, ulukliu ba ema judeu no mós ba ema gregu; 17 tanba sira neʼebé iha fiar haree katak liuhusi liafuan diʼak neʼe, Maromak hatudu sai ninia hahalok loos no ida-neʼe hametin sira-nia fiar, hanesan hakerek nanis ona: “Maibé ema loos sei moris liuhusi ninia fiar.”

18 Basá husi lalehan Maromak hatudu sai ninia hirus hasoru ema neʼebé la halo tuir nia no mós ema neʼebé la hatudu hahalok loos. Sira halo buat neʼebé la loos hodi hanetik ema atu hatene lia-loos. 19 Maromak sai hirus ba sira tanba nia fó sai tiha ona ba sira buat barak atu sira bele hatene kona-ba nia. 20 No maski ema la bele haree Maromak nia hahalok ho matan, maibé ida-neʼe hatudu sai ona ho klaru ba ema husi tempu neʼebé nia kria mundu,* basá kuandu ema hanoin kona-ba buat neʼebé nia kria, sira bele haree ninia kbiit neʼebé iha ba nafatin no ninia pozisaun nuʼudar Maromak. Tan neʼe, sira la bele nega katak Maromak iha duni; 21 basá maski sira hatene Maromak, sira la fó glória ba nia nuʼudar Maromak no sira la fó-agradese ba nia, maibé sira-nia neon mamuk ona no sira la komprende. 22 Maski sira dehan katak sira matenek, maibé sira beik 23 basá sira la fó glória ba Maromak neʼebé la bele mate hodi fó fali glória ba estátua husi ema neʼebé bele mate no ba estátua husi manu sira, animál ain haat sira, no animál neʼebé dolar.

24 Tan neʼe, Maromak husik sira atu halo tuir deʼit sira-nia hakarak foʼer husi sira-nia laran hodi hafoʼer sira-nia isin. 25 Sira troka lia-loos kona-ba Maromak ho lia-bosok no fó hahiʼi no halo serbisu santu ba kriasaun duké ba Kriadór, Ida neʼebé merese atu simu hahiʼi ba nafatin. Amen. 26 Tan neʼe, Maromak husik sira atu tuir deʼit sira-nia hakarak seksuál nian neʼebé foʼer, basá feto sira iha sira-nia leet husik hakarak seksuál nian neʼebé loos hodi halo fali buat neʼebé la loos; 27 nuneʼe mós ho mane sira, sira la hanoin ona atu toba ho feto. Sira-nia laran sai lakan makaʼas atu halo buat neʼebé foʼer ho mane sira. Sira halo buat neʼebé aat no simu kastigu ba sira-nia an rasik tanba sira-nia sala.

28 Sira lakohi atu hatene Maromak ho didiʼak, nuneʼe Maromak husik sira atu iha hanoin neʼebé sala no halo buat neʼebé la diʼak, 29 tanba sira nakonu ho buat hotu neʼebé la loos, buat aat, kaan-teen, hahalok aat, nakonu ho laran-moras, oho ema, istori malu, lohi ema, hakarak atu halo ema seluk terus, konta ema nia vida, 30 koʼalia aat ema seluk, odi Maromak, la respeitu ema, foti-an, gaba-an, halo planu aat oioin, kontra inan-aman, 31 beik, la tuir buat neʼebé sira promete, la hatene hadomi ema, la hatudu laran-sadiʼa. 32 Maski ema sira-neʼe hatene didiʼak Maromak nia ukun-fuan neʼebé loloos, neʼebé dehan katak ema neʼebé halo hahalok sira-neʼe merese mate, maibé sira kontinua halo nuneʼe no mós apoia ema neʼebé halo buat sira-neʼe.

2 Tan neʼe, haʼu-nia maluk, ó la bele tesi lia ba ema seluk. Basá se ó tesi lia ba ema kona-ba buat ruma, ó mós sei hetan tesi-lia kona-ba neʼe; tanba ó neʼebé tesi lia ba ema, ó mós halo sala neʼebé sira halo. 2 Ita hatene katak Maromak tesi lia hasoru sira neʼebé moris hanesan neʼe no Maromak tesi lia tuir lia-loos.

3 Maibé, haʼu-nia maluk, se ó tesi lia ba sira neʼebé moris hanesan neʼe no ó rasik mós halo buat sira-neʼe, ó hanoin katak ó sei halai husi Maromak nia tesi-lia ka? 4 Ó hakribi Maromak nia laran-diʼak, kontrola an, no pasiénsia neʼebé boot ka? Ó la hatene katak Maromak nia laran-diʼak neʼe hakarak lori ó atu hakribi sala ka? 5 Maibé tanba ó ulun-toos no ó lakohi hakribi sala, Maromak rai hela ninia hirus ba ó. Nia sei hatudu sai ida-neʼe iha loron neʼebé nia tesi lia ba ema, no nia sei tesi lia iha dalan neʼebé loos. 6 No nia sei selu fali ba ema ida-idak tuir sira-nia hahalok: 7 Nia sei fó moris rohan-laek no fó isin neʼebé la bele dodok ba sira neʼebé mak buka glória no hahiʼi hodi kontinua halo serbisu neʼebé diʼak; 8 maibé Maromak sei hatudu ninia laran-nakali no hirus ba sira neʼebé gosta haksesuk malu no la halo tuir lia-loos hodi halo tuir deʼit buat neʼebé la loos. 9 Iha tempu neʼebá ema hotu neʼebé halo aat sei hetan terus no susar, ulukliu ba ema judeu no mós ba ema gregu; 10 maibé ema hotu neʼebé halo buat diʼak sei hetan glória no hahiʼi no dame, ulukliu ba ema judeu no mós ba ema gregu. 11 Basá Maromak la todan ba sorin.

12 Sira hotu neʼebé la hatene ukun-fuan no halo sala, sira sei mate maski la hatene ukun-fuan; maibé sira hotu neʼebé hatene ukun-fuan no halo sala, sira sei hetan tesi-lia tuir ukun-fuan neʼe. 13 Basá laʼós sira neʼebé rona ukun-fuan mak ema loos iha Maromak nia oin, maibé sira neʼebé moris tuir ukun-fuan mak sei sai ema loos. 14 Kuandu ema husi nasaun sira neʼebé la hatene ukun-fuan, halo tuir buat neʼebé ukun-fuan haruka, ema sira-neʼe hatudu katak sira iha ona ukun-fuan iha sira-nia laran. 15 Ema sira-neʼe hatudu sai katak ukun-fuan neʼe hakerek ona iha sira-nia laran, no sira-nia laran* fó sasin hamutuk ho sira, no liuhusi sira-nia hanoin sira hatene katak buat neʼebé sira halo mak loos ka sala. 16 Buat sira-neʼe sei mosu kuandu Maromak, liuhusi Kristu Jesus, tesi lia ba buat neʼebé ema hanoin no halo subasubar deʼit, no ida-neʼe tuir liafuan diʼak neʼebé haʼu haklaken.

17 No ó bolu ó-nia an nuʼudar ema judeu, no sadere ba ukun-fuan, no haksolok ho ó-nia relasaun ho Maromak, 18 no ó hatene ninia hakarak, no hatene buat neʼebé iha folin tanba ema hanorin ó kona-ba Ukun-Fuan; 19 no ó fiar katak ó mak matadalan ba ema matan-delek no naroman ba sira neʼebé iha nakukun laran, 20 ó hanorin sira neʼebé beik, ó mestre ba labarik kiʼik sira, no liuhusi Ukun-Fuan ó simu ona matenek no lia-loos simples* kona-ba Maromak; 21 se nuneʼe, ó neʼebé hanorin ema seluk, ó la hanorin ó-nia an ka? Ó neʼebé dehan: “Keta naʼok”, ó rasik la naʼok ka? 22 Ó neʼebé dehan: “Keta halo sala-foʼer”,* ó la halo sala-foʼer ka? Ó neʼebé fó sai katak ó hakribi estátua sira, ó la naʼok husi templu ka? 23 Ó neʼebé gaba-an kona-ba ukun-fuan, ó rasik la respeitu Maromak hodi kontra Ukun-Fuan ka? 24 Basá hanesan hakerek nanis ona: “Ema koʼalia kontra Maromak nia naran iha nasaun seluk nia leet tanba imi-nia hahalok.”

25 Tuir loloos, sirkunsizaun bele lori buat diʼak só deʼit se ó halo tuir ukun-fuan; maibé se ó halo sala ida kontra ukun-fuan, ó-nia sirkunsizaun la iha folin. 26 Tan neʼe, se ema ida neʼebé la hetan sirkunsizaun mak halo tuir Maromak nia matadalan neʼebé hakerek iha Ukun-Fuan, Maromak sei sura nia nuʼudar ema neʼebé hetan ona sirkunsizaun, loos ka lae? 27 No kuandu ema husi nasaun seluk neʼebé la hetan sirkunsizaun mak halo tuir buat neʼebé Ukun-Fuan haruka, sira-nia hahalok neʼe sei tesi lia ba imi neʼebé kontra ukun-fuan, maski imi iha ona ukun-fuan no hetan ona sirkunsizaun. 28 Tanba ema judeu neʼebé loloos, neʼe laʼós deʼit kona-ba buat neʼebé haree husi liʼur, no sirkunsizaun neʼebé loloos, neʼe laʼós deʼit kona-ba isin. 29 Maibé buat neʼebé iha ema nia laran mak halo nia nuʼudar ema judeu neʼebé loloos, no sirkunsizaun neʼebé loloos mak iha ema nia laran liuhusi espíritu, laʼós liuhusi ukun-fuan. No ema neʼe simu hahiʼi, laʼós husi ema maibé husi Maromak.

3 Entaun, saida mak halo ema judeu diʼak liu fali ema seluk? Ka, sirkunsizaun iha folin saida? 2 Tuir loloos, iha buat diʼak barak. Ulukliu tanba Maromak fó sira liafuan santu. 3 Maibé, oinsá se ema judeu balu la hatudu fiar? Neʼe katak ema labele ona tau fiar ba Maromak ka? 4 Lae duni! Maromak mak loos maski ema hotu bosok-teen, hanesan hakerek nanis ona: “Ita-nia liafuan sira sei hatudu katak Ita mak loos, no kuandu sira duun Ita kona-ba buat ruma Ita sei hatudu sai katak sira sala.” 5 Maibé, kuandu ita ema halo hahalok aat, neʼe halo ema haree katak Maromak nia dalan sira mak loos. Se nuneʼe, ida-neʼe dehan katak Maromak halo buat neʼebé la loos kuandu nia kastigu ita ka? Ema balu hanoin nuneʼe. 6 Maibé neʼe la bele. Se Maromak halo buat neʼebé la loos, oinsá mak nia sei tesi lia ba mundu neʼe?

7 Se haʼu bosok, no lia-bosok neʼebé haʼu dehan hatudu katak buat neʼebé Maromak hatete mak loos no halo ema hahiʼi nia, entaun tansá mak Maromak tesi lia ba haʼu nuʼudar sala-naʼin ida? 8 No tansá ita la koʼalia hanesan ema balu duun matak ita katak ita dehan: “Mai ita halo buat neʼebé aat atu nuneʼe buat diʼak bele mosu”? Ema sira hanesan neʼe merese duni atu simu sira-nia kastigu.

9 Neʼe duni, ita hanoin oinsá? Ita diʼak liu fali ema seluk ka? Lae duni! Basá ita hatudu ona ho klaru katak ema judeu no ema gregu sira hotu mak iha sala nia okos; 10 hanesan hakerek nanis ona: “La iha ema loos, ida deʼit mós lae; 11 la iha ema ida neʼebé iha matenek loloos, la iha ema ida neʼebé buka ba Maromak. 12 Ema hotu fila ona ba dalan seluk, sira hotu sai ona buat neʼebé folin-laek; la iha ema ida neʼebé halo buat diʼak, ida deʼit mós lae.” 13 “Sira-nia garganta nakloke hanesan rate, sira lohi ho sira-nia nanál.” “Liafuan husi sira-nia ibun mak hanesan samea kiʼik neʼebé iha venenu.” 14 “No sira-nia ibun nakonu ho hotar no liafuan aat.” 15 “Sira-nia ain halai lalais atu fakar raan.” 16 “Sira sempre fó susar no terus ba ema 17 no sira la hatene dalan ba dame.” 18 “Iha sira-nia matan sira la taʼuk Maromak.”

19 Agora ita hatene katak buat hotu neʼebé fó sai iha Ukun-Fuan, ida-neʼe fó sai ba sira neʼebé moris tuir Ukun-Fuan. Atu nuneʼe ibun ida-idak bele nonook no mundu tomak merese atu simu kastigu husi Maromak. 20 Tan neʼe, ema ida la bele sai ema loos iha Maromak nia oin hodi halo tuir ukun-fuan, basá liuhusi ukun-fuan mak ita hatene loloos kona-ba sala.

21 Maibé agora, sai klaru ona katak ema ida bele sai loos iha Maromak nia oin maski ketak husi ukun-fuan. Buat sira-neʼe fó sai nanis ona iha Ukun-Fuan no iha liafuan profeta sira-nian; 22 sin, ema bele sai loos iha Maromak nia oin liuhusi sira-nia fiar ba Jesus Kristu, no neʼe ba sira hotu neʼebé iha fiar. Basá ema judeu no ema gregu hanesan deʼit. 23 Tanba ema hotu halo sala ona no la bele hetan Maromak nia glória. 24 Maibé Maromak haree sira nuʼudar ema loos tanba folin neʼebé Kristu Jesus selu ona atu salva sira. Neʼe mak prezente ida neʼebé Maromak fó tanba ninia laran-diʼak neʼebé boot. 25 Maromak fó nia nuʼudar sakrifísiu ida atu nuneʼe ema bele hadame malu ho Maromak liuhusi sira-nia fiar ba Kristu nia raan. Ida-neʼe atu hatudu katak Maromak mak loos hodi hatudu pasiénsia no fó perdua ba sala sira neʼebé mosu iha tempu uluk; 26 no mós atu hatudu iha tempu neʼe katak nia mak loos kuandu nia fó sai katak ema neʼebé tau fiar ba Jesus mak ema loos.

27 Se nuneʼe, ita iha razaun atu foti an ka? Lae duni. Tanbasá? Tanba ukun-fuan fiar nian hatudu ho klaru katak la iha razaun atu ema foti an. 28 Basá ita hatene katak Maromak haree ema ida nuʼudar ema loos tanba fiar, laʼós tanba moris tuir ukun-fuan. 29 Entaun, nia laʼós Maromak ba ema judeu deʼit, loos ka lae? Nia mós Maromak ba ema husi nasaun seluk, loos ka lae? Loos duni, nia mós Maromak ba ema husi nasaun seluk. 30 Tanba Maromak ida deʼit, nia sei haree ema neʼebé hetan sirkunsizaun nuʼudar ema loos liuhusi sira-nia fiar, no nia mós sei haree ema neʼebé la hetan sirkunsizaun nuʼudar ema loos liuhusi sira-nia fiar. 31 Entaun, ita halakon ukun-fuan tanba ita-nia fiar ba Jesus ka? Lae duni! Tuir loloos, ita hatudu katak ukun-fuan mak loos.

4 Se nuneʼe, saida mak ita bele dehan kona-ba Abraão, ita-nia beiʼala tuir isin? 2 Porezemplu, se Abraão sai nuʼudar ema loos liuhusi ninia hahalok, nia iha razaun atu foti an; maibé ida-neʼe la tuir Maromak nia haree. 3 Tanba eskritura dehan sá? “Abraão hatudu fiar ba Jeová, no tan neʼe Maromak haree nia nuʼudar ema loos.” 4 Entaun, ema neʼebé halo serbisu hetan nia kolen nuʼudar buat neʼebé nia merese atu simu, no ida-neʼe laʼós nuʼudar prezente ida.* 5 Maibé tuir Maromak, atu sai ema loos, neʼe la depende ba buat neʼebé ema ida halo; basá hodi tau fiar ba Maromak mak ema neʼe sai ema loos maski nia sala-naʼin. 6 No David mós koʼalia kona-ba ksolok husi ema neʼebé Maromak haree nuʼudar ema loos, maski ema neʼe nia hahalok la kumpre ukun-fuan tomak. David dehan: 7 “Ksolok ba sira neʼebé hetan ona perdua husi sira-nia hahalok aat no sira-nia sala taka ona; 8 ksolok ba ema neʼebé ninia sala Jeová la hanoin-hetan tan.”

9 Entaun, ksolok neʼe ba deʼit ema neʼebé hetan sirkunsizaun ka ba mós ema neʼebé la hetan sirkunsizaun? Ita dehan ona: “Tanba Abraão nia fiar, Maromak haree nia nuʼudar ema loos.” 10 Maibé, horibainhira mak Maromak haree nia nuʼudar ema loos? Kuandu nia hetan ona sirkunsizaun ka seidauk hetan sirkunsizaun? Kuandu nia seidauk hetan sirkunsizaun. 11 Basá Maromak dehan ba nia atu hetan sirkunsizaun. Ida-neʼe mak sinál neʼebé hatudu katak nia ema loos liuhusi fiar neʼebé nia hatudu kuandu nia seidauk hetan sirkunsizaun. Nuneʼe nia sai nuʼudar aman ba sira hotu neʼebé iha fiar maski sira la hetan sirkunsizaun, no Maromak haree ema sira-neʼe nuʼudar ema loos; 12 no Abraão mak aman laʼós deʼit ba sira neʼebé hetan ona sirkunsizaun iha isin, maibé mós ba sira neʼebé halo tuir duni dalan fiar nian. Neʼe mak ita-nia aman Abraão nia fiar kuandu nia seidauk hetan sirkunsizaun.

13 Basá laʼós liuhusi ukun-fuan mak Abraão ka ninia bei-oan simu promesa katak nia sei simu mundu ida nuʼudar liman-rohan, maibé nia simu promesa neʼe tanba Maromak haree nia nuʼudar ema loos liuhusi fiar. 14 Tanba se sira neʼebé moris tuir ukun-fuan mak simu liman-rohan, fiar sai folin-laek no promesa neʼe la iha folin ona. 15 Tuir loloos, Ukun-Fuan hamosu laran-nakali, maibé se la iha ukun-fuan, sei la iha mós sala.

16 Nuneʼe, Abraão simu promesa neʼe tanba ninia fiar, no ida-neʼe hatudu sai Maromak nia laran-diʼak neʼebé boot. No ninia bei-oan mós simu promesa neʼe. Neʼe laʼós deʼit ba sira neʼebé moris tuir Ukun-Fuan, maibé mós ba sira neʼebé iha fiar hanesan Abraão. Loloos Abraão mak aman ba ita hotu, 17 hanesan hakerek nanis ona: “Haʼu hili ona ó nuʼudar aman ba nasaun barak.” Maromak nia promesa tenkesér sai loos no Abraão tau fiar ba Maromak, Ida neʼebé halo ema mate sira moris fali no koʼalia kona-ba buat sira neʼebé seidauk mosu hanesan ida-neʼe mosu ona. 18 Maski esperansa neʼe haree hanesan la bele atu sai loos, maibé tan esperansa neʼe nia iha fiar katak nia bele sai aman ba nasaun barak hodi tuir buat neʼebé dehan sai ona: “Nuneʼe ó-nia bei-oan sira sei sai hanesan neʼe.” 19 No maski ninia fiar la sai fraku, maibé nia hanoin kona-ba ninia isin rasik neʼebé hanesan mate ona tanba nia besik tinan atus ida, no mós Sara la bele ona atu iha oan. 20 Maibé tanba Maromak nia promesa neʼe, ninia fiar la namlele, no nia hetan kbiit liuhusi ninia fiar no fó glória ba Maromak. 21 Nia fiar metin duni katak Maromak bele kumpre buat neʼebé nia promete ona. 22 No “tan neʼe Maromak haree nia nuʼudar ema loos”.

23 Maibé, liafuan iha eskritura neʼebé dehan: “Tan neʼe Maromak haree nia nuʼudar ema loos”, laʼós deʼit ba Abraão, 24 maibé mós ba ita neʼebé Maromak hili ona hodi haree ita nuʼudar ema loos, tanba ita fiar ba nia neʼebé fó moris-hiʼas ba ita Naʼi Jesus. 25 Maromak husik ema atu oho Jesus tanba ita-nia sala, no nia simu moris hiʼas atu Maromak bele haree ita nuʼudar ema loos.

5 Agora Maromak haree ona ita nuʼudar ema loos tanba fiar, tan neʼe mai ita hela nafatin iha dame ho Maromak liuhusi ita Naʼi Jesus Kristu. 2 No hodi tau fiar ba Jesus, ita hetan ona dalan atu simu Maromak nia laran-diʼak neʼebé boot, no ita simu daudaun ida-neʼe. No mai ita haksolok ho ita-nia esperansa katak Maromak sei foti ita ba pozisaun neʼebé aas. 3 Liután neʼe, mai ita haksolok kuandu iha susar laran, tanba ita hatene katak liuhusi susar ita aprende atu tahan, 4 no hodi tahan, Maromak sei simu ita; no kuandu Maromak simu ita, ita iha esperansa, 5 no esperansa neʼe sei la halo ita laran-tun; tanba liuhusi ninia espíritu santu* neʼebé nia fó ba ita, nia hatudu katak nia hadomi ita.

6 Basá maski ita sei kbiit-laek,* Kristu mate ba ema sala-naʼin hodi tuir tempu neʼebé Maromak hili ona. 7 Tuir loloos, karik la iha ema ida neʼebé sei mate ba ema laran-loos; no kona-ba ema diʼak, karik sei iha ema ida neʼebé brani atu mate ba nia. 8 Maibé Maromak hatudu nia domin ba ita nuneʼe: Kristu mate ba ita kuandu ita sei sala-naʼin hela. 9 Entaun, tanba Maromak haree ita nuʼudar ema loos liuhusi Kristu nia raan, ita bele fiar duni katak ida-neʼe sei salva ita husi Maromak nia hirus. 10 Basá uluk, kuandu ita sei sai hela Maromak nia inimigu, ita hadame malu fali ho Maromak liuhusi ninia Oan-Mane nia mate. Nuneʼe, tanba agora ita iha dame ona ho Maromak, ita bele fiar duni katak ita sei hetan salvasaun liuhusi Kristu nia moris. 11 Liután neʼe, ita mós haksolok kona-ba Maromak liuhusi ita Naʼi Jesus Kristu, basá husi nia mak ita hadame malu fali ho Maromak.

12 Basá liuhusi ema ida mak sala tama iha mundu, no mate tanba sala. Nuneʼe mate habelar ba ema hotu tanba ema hotu sala. 13 Antes Ukun-Fuan iha, sala iha ona iha mundu, maibé se ukun-fuan la iha, sala neʼebé ema halo la sura. 14 Maski nuneʼe, mate ukun nuʼudar liurai husi Adão toʼo Moisés. Mate ukun mós ba sira neʼebé la halo sala hanesan sala neʼebé Adão halo. No Adão mak ilas ba ida neʼebé atu mai.

15 Maibé Maromak nia prezente la hanesan ho sala. Basá liuhusi mane ida nia sala mak ema barak mate, maibé Maromak nia laran-diʼak neʼebé boot no ninia prezente neʼebé lalika selu mai liuhusi mane ida, Jesus Kristu, no ida-neʼe lori buat diʼak ba ema barak. 16 Liután neʼe, prezente neʼebé lalika selu no mós sala neʼebé mane ida halo, sira lori rezultadu neʼebé la hanesan. Tanba mane ida nia sala, Maromak haree ema hotu nuʼudar ema neʼebé merese simu kastigu, maibé depois ema barak sala ona, Maromak fó prezente neʼebé lalika selu. No tan prezente neʼe mak Maromak haree ema nuʼudar ema loos. 17 Liuhusi ema ida nia sala mak mate ukun nuʼudar liurai. Tan neʼe, ita bele fiar katak Maromak nia laran-diʼak neʼebé boot no ninia prezente neʼebé lalika selu mak boot liu no lori rezultadu diʼak liu. No ema neʼebé simu buat sira-neʼe sei moris no ukun nuʼudar liurai liuhusi ema ida, Jesus Kristu.

18 Entaun, liuhusi sala ida deʼit mak ema oioin hetan kastigu, nuneʼe mós liuhusi hahalok loos ida deʼit mak Maromak haree ema oioin nuʼudar ema loos no sira sei hetan moris. 19 Basá liuhusi mane ida deʼit neʼebé lakohi halo tuir, ema hotu sai sala-naʼin, nuneʼe mós liuhusi ema ida deʼit neʼebé halo tuir, Maromak sei haree ema barak nuʼudar ema loos. 20 Maromak fó Ukun-Fuan atu ema bele hatene katak sira halo sala barak. Maibé kuandu ema nia sala sai barak, Maromak nia laran-diʼak sai barak liután. 21 Tanbasá mak Maromak halo nuneʼe? Hanesan sala no mate ukun nuʼudar liurai, nuneʼe mós Maromak nia laran-diʼak sei ukun nuʼudar liurai ho hahalok loos, atu nuneʼe lori moris rohan-laek liuhusi ita Naʼi Jesus Kristu.

6 Tan neʼe, ita sei dehan sá? Ita bele kontinua halo sala atu nuneʼe Maromak nia laran-diʼak neʼebé boot bele sai barak liután ka? 2 Lae duni! Tanba sala la ukun tan ita,* entaun ita labele kontinua atu moris iha sala laran, loos ka lae? 3 Ka imi hatene ka lae katak ita hotu neʼebé hetan ona batizmu iha Kristu Jesus, ita hetan batizmu iha nia mate? 4 Tan neʼe, ita hakoi tiha ona hamutuk ho nia liuhusi ita-nia batizmu iha nia mate, atu nuneʼe, hanesan Kristu moris fali husi mate liuhusi Aman nia glória, ita mós tenke laʼo iha moris neʼebé foun. 5 Tanba se ita mate hanesan nia, ita sei moris fali duni hanesan nia, no iha buat sira-neʼe mak ita sai ida deʼit ho nia; 6 basá ita hatene katak ita-nia hahalok tuan nian hedi tiha ona hamutuk ho nia, atu nuneʼe ita-nia isin neʼebé sala la domina tan ita, no ita la kontinua tan sai atan ba sala. 7 Basá tuir Maromak nia haree, ema neʼebé mate, selu ona tusan hotu husi ninia sala.

8 Liután neʼe, se ita mate ho Kristu, ita fiar katak ita mós sei moris ho nia. 9 Basá ita hatene katak Kristu moris fali ona husi mate, no nia sei la mate tan; mate la iha tan kbiit atu ukun nia. 10 Nia mate dala ida deʼit atu halakon sala, no nia sei la mate tan ba nafatin; maibé nia moris ona atu bele halo Maromak nia hakarak. 11 Nuneʼe mós ho imi: imi tenke haree imi-nia an rasik hanesan mate ona kona-ba sala. No mós haree katak imi moris atu halo Maromak nia hakarak liuhusi Kristu Jesus.

12 Tan neʼe, keta husik sala ukun nafatin imi nuʼudar liurai iha imi-nia isin neʼebé sei mate, hodi halo tuir isin nia hakarak sira. 13 No mós keta kontinua fó imi-nia liman-ain ba sala nuʼudar kroʼat atu halo hahalok la loos. Maibé fó imi-nia an ba Maromak nuʼudar ema sira neʼebé moris ona husi mate, no mós fó imi-nia liman-ain ba Maromak nuʼudar kroʼat atu halo hahalok loos. 14 Basá sala labele sai nuʼudar imi-nia naʼi, tanba imi laʼós iha ukun-fuan nia okos, maibé imi simu ona Maromak nia laran-diʼak neʼebé boot.

15 Neʼe katak sá? Neʼe katak ita bele halo sala tanba ita laʼós tan iha ukun-fuan nia okos maibé simu ona Maromak nia laran-diʼak ka? Lae duni! 16 Imi hatene ka lae katak se imi sempre halo tuir ema ida, imi mak ninia atan? Tan neʼe, se imi atan ba sala, ida-neʼe sei lori imi ba mate. Maibé se imi atan ba Maromak no halo tuir nia, imi sei sai ema loos. 17 No haʼu fó obrigadu ba Maromak tanba uluk imi atan ba sala, maibé agora imi halo tuir husi laran kona-ba hanorin neʼebé fó ona ba imi. 18 Neʼe duni, tanba imi sai livre ona husi sala, imi sai atan ba Maromak no halo buat neʼebé loos. 19 No imi fraku tanba sala, entaun haʼu uza liafuan neʼebé simples: hanesan uluk imi uza imi-nia liman-ain nuʼudar atan ba buat la moos no kontra lei hodi halo hahalok neʼebé la tuir lei, nuneʼe agora fó imi-nia liman-ain nuʼudar atan ba buat loos hodi halo hahalok santu. 20 Basá kuandu imi sei atan ba sala, hahalok loos laʼós nuʼudar imi-nia naʼi.

21 Neʼe duni, saida mak rezultadu husi buat neʼebé imi halo iha tempu neʼebá? Neʼe mak hahalok neʼebé agora halo imi moe. Buat sira-neʼe lori ba mate. 22 Maibé agora, tanba imi sai livre ona husi sala no sai atan ba Maromak, ida-neʼe lori imi ba moris santu, no ikusmai hetan moris rohan-laek. 23 Tanba sala nia kolen mak mate, maibé prezente neʼebé Maromak fó mak moris rohan-laek liuhusi Kristu Jesus ita Naʼi.

7 Maun-alin sira, (haʼu koʼalia ba sira neʼebé hatene ukun-fuan,) imi hatene ka lae katak Ukun-Fuan mak naʼi ba ema ida kuandu nia sei moris hela? 2 Porezemplu, feto ida neʼebé kaben kesi metin ona ba nia laʼen tuir ukun-fuan kuandu nia laʼen sei moris; maibé se nia laʼen mate, nia sai livre husi ninia laʼen nia ukun-fuan. 3 Entaun, kuandu nia laʼen sei moris, ema sei haree nia nuʼudar feto neʼebé halo sala-foʼer se nia kaben ho mane seluk. Maibé se nia laʼen mate ona, nia sai livre husi nia laʼen nia ukun-fuan, no tan neʼe se nia kaben fali ho mane seluk, nia la halo sala-foʼer.

4 Tan neʼe, haʼu-nia maun-alin sira, imi mós livre ona husi Ukun-Fuan* liuhusi Kristu nia isin atu imi bele sai fali Kristu nian, ida neʼebé moris fali husi mate, hodi nuneʼe ita bele halo buat neʼebé fó ksolok ba Maromak. 5 Basá kuandu ita moris tuir isin nia hakarak, Ukun-Fuan hatudu sai sala iha ita-nia isin neʼebé lori ita ba mate. 6 Maibé agora ita sai livre ona husi Ukun-Fuan neʼe, tanba ita mate ona kona-ba Ukun-Fuan neʼebé uluk kesi metin ita. Tan neʼe, ita bele sai atan iha dalan foun hodi halo tuir espíritu santu nia matadalan, laʼós iha dalan tuan hodi halo tuir ukun-fuan neʼebé hakerek ona.

7 Neʼe duni, ita bele dehan sá? Ukun-Fuan mak sala ka? Lae duni! Tuir loloos, haʼu la hatene sala se la iha Ukun-Fuan; porezemplu, se haʼu la hatene Ukun-Fuan neʼebé dehan: “Ó keta kaan buat neʼebé ema seluk nian”, haʼu sei la hatene katak sala atu kaan ida-neʼe. 8 Maibé liuhusi ukun-fuan mak sala hetan dalan hodi hamosu hakarak atu kaan buat oioin, basá la ho ukun-fuan sala mate ona. 9 Tuir loloos, uluk haʼu moris ketak husi ukun-fuan; maski nuneʼe, kuandu ukun-fuan toʼo mai, sala hahú moris, maibé haʼu mate. 10 No kona-ba ukun-fuan neʼe, haʼu haree katak ida-neʼe lori ba mate laʼós lori ba moris. 11 Basá sala uza ukun-fuan hodi lohi haʼu no oho haʼu liuhusi ida-neʼe. 12 Nuneʼe Ukun-Fuan mak santu, no mandamentu mak santu no loos no diʼak.

13 Entaun, neʼe katak buat neʼebé diʼak oho haʼu ka? Lae duni! Maibé sala mak oho duni haʼu. No liuhusi buat neʼebé diʼak sala lori haʼu ba mate, no ida-neʼe hatudu sai saida mak sala neʼe. No ukun-fuan hatudu sai katak sala mak aat tebes. 14 Ita hatene katak Ukun-Fuan mak husi Maromak; maibé haʼu mak isin nian, no faʼan ona hodi sai atan ba sala. 15 Haʼu la hatene saida mak haʼu halo. Basá buat neʼebé haʼu hakarak, haʼu la halo; maibé buat neʼebé haʼu odi, haʼu halo. 16 Se haʼu halo buat neʼebé haʼu lakohi halo, haʼu simu katak Ukun-Fuan mak diʼak. 17 Entaun, laʼós haʼu mak halo ida-neʼe. Maibé sala neʼebé iha haʼu-nia isin mak halo ida-neʼe. 18 Haʼu hatene katak haʼu mak ema deʼit, no la iha buat diʼak ida iha haʼu-nia isin; basá maski haʼu hakarak atu halo buat neʼebé loos, maibé haʼu la iha kbiit atu halo ida-neʼe. 19 Basá buat diʼak neʼebé haʼu hakarak, haʼu la halo; maibé buat aat neʼebé haʼu lakohi, haʼu halo beibeik. 20 Entaun se haʼu halo buat neʼebé haʼu lakohi, neʼe katak laʼós tan haʼu mak halo ida-neʼe, maibé sala neʼebé hela iha haʼu.

21 Nuneʼe, haʼu haree ukun-fuan neʼe iha haʼu: katak bainhira haʼu hakarak halo buat neʼebé loos, buat neʼebé aat mós hamutuk ho haʼu. 22 Iha haʼu-nia laran, haʼu haksolok duni ho Maromak nia ukun-fuan, 23 maibé haʼu haree ukun-fuan seluk iha haʼu-nia isin neʼebé halo funu kontra ukun-fuan iha haʼu-nia neon, no ida-neʼe lori haʼu hodi sai atan ba sala nia ukun-fuan neʼebé iha haʼu-nia isin-lolon. 24 Haʼu kasian loos duni! Sé mak sei salva haʼu husi isin neʼebé lori haʼu ba mate neʼe? 25 Obrigadu ba Maromak liuhusi Jesus Kristu ita Naʼi! Tan neʼe, ho haʼu-nia neon, haʼu atan ba Maromak nia ukun-fuan, maibé haʼu-nia isin mak atan ba sala nia ukun-fuan.

8 Tan neʼe, sira neʼebé ida deʼit ho Kristu Jesus la hetan tesi-lia nuʼudar ida neʼebé merese mate. 2 Basá ukun-fuan espíritu nian neʼebé fó moris ba sira neʼebé ida deʼit ho Kristu Jesus mak halo imi livre ona husi ukun-fuan sala nian no mate nian. 3 No buat neʼebé Ukun-Fuan la bele halo tanba fraku isin nian, Maromak halo ida-neʼe hodi haruka nia Oan-Mane ho isin hanesan ema* atu halakon sala. Iha dalan neʼe mak nia tesi lia hasoru sala isin nian, 4 atu nuneʼe ita bele halo buat loos husi Ukun-Fuan hodi la husik ita-nia isin neʼebé sala mak ukun ita, maibé husik Maromak nia espíritu mak ukun ita. 5 Tanba sira neʼebé halo tuir buat isin nian tau sira-nia hanoin ba buat isin nian, maibé sira neʼebé halo tuir espíritu tau sira-nia hanoin ba buat espíritu nian. 6 Basá hodi hanoin buat isin nian lori ba mate, maibé hodi hanoin buat espíritu nian lori ba moris no dame; 7 tanba tau hanoin ba buat isin nian halo ema sai inimigu ho Maromak, basá isin la tuir Maromak nia ukun-fuan. Tuir loloos, isin sei nunka halo tuir ukun-fuan. 8 Entaun, ema sira neʼebé halo tuir buat isin nian la bele halo Maromak kontente.

9 Se Maromak nia espíritu hela duni ho imi, imi la halo tuir buat isin nian, maibé halo tuir espíritu. Basá se ema ida la iha Kristu nia espíritu, ema neʼe laʼós Kristu ninian. 10 Se Kristu ida deʼit ho imi, maski imi-nia isin mate tanba sala, maibé espíritu santu fó moris tanba Maromak haree imi nuʼudar ema loos. 11 Entaun, se Maromak nia espíritu neʼebé halo Kristu Jesus moris fali mak hamutuk ho imi, Maromak sei uza ninia espíritu atu fó moris ba imi-nia isin.

12 Tan neʼe maun-alin sira, ita labele husik ita-nia isin ukun ita hodi halo buat neʼebé isin hakarak; 13 tanba se imi moris tuir isin imi sei mate duni; maibé se imi hamate hahalok isin nian liuhusi espíritu, imi sei moris. 14 Basá ema hotu neʼebé husik Maromak nia espíritu hatudu dalan ba sira, sira mak Maromak nia oan. 15 Tanba Maromak nia espíritu la lori ita atu sai atan no halo ita taʼuk, maibé lori ita atu sai nuʼudar oan-hakiak, no ho espíritu* neʼe mak ita bolu: “Abba, Aman!” 16 Espíritu neʼe rasik fó sasin iha ita-nia laran* katak ita mak Maromak nia oan sira. 17 Entaun, se ita mak Maromak nia oan sira, ita sei simu duni liman-rohan. Maromak sei fó liman-rohan ba ita hanesan nia fó ba Kristu; naran katak ita hetan terus hamutuk ho nia, atu ita mós bele simu pozisaun aas hamutuk ho nia.

18 Tan neʼe, haʼu haree katak terus neʼebé ita hasoru agora, neʼe la iha folin se ita kompara ho tempu neʼebé Maromak sei hatudu mai ita prezente furak neʼebé ita sei simu. 19 Tanba Maromak nia kriasaun hotu hein namanas ba tempu neʼebé Maromak sei hatudu sai ninia oan sira. 20 Basá kriasaun sira entrega tiha ona ba moris neʼebé folin-laek, laʼós ho ninia hakarak rasik, maibé liuhusi Maromak nia hakarak tanba esperansa neʼe, 21 katak kriasaun neʼe rasik sei sai livre husi atan ba isin neʼebé dodok, no hetan liberdade neʼebé furak nuʼudar Maromak nia oan sira. 22 Basá ita hatene katak kriasaun hotu kontinua halerik hamutuk no sente moras toʼo agora. 23 Laʼós neʼe deʼit, maibé ita neʼebé simu ona espíritu santu nuʼudar parte primeiru husi ita-nia liman-rohan, ita mós halerik iha ita-nia laran rasik nuʼudar ita hein namanas atu sai oan-hakiak no sai livre husi ita-nia isin liuhusi folin neʼebé Kristu selu ona. 24 Ita hetan salvasaun ho esperansa neʼe; maibé esperansa neʼebé bele haree ho matan, neʼe laʼós esperansa, basá kuandu ema haree ona buat ida, nia sei tau esperansa ba ida-neʼe ka lae? 25 Maibé se ita tau esperansa ba buat neʼebé ita la haree, ita hein namanas ba ida-neʼe ho pasiénsia.

26 Liután neʼe, Maromak nia espíritu bele ajuda ita iha tempu neʼebé ita fraku. Basá dala ruma ita la hatene atu dehan sá iha ita-nia orasaun. Iha tempu hanesan neʼe, maski ita la iha liafuan atu fó sai ita-nia halerik iha laran, maibé Maromak nia espíritu bele harohan ba ita. 27 No Maromak neʼebé buka ema hotu nia laran, nia hatene buat neʼebé hatoʼo liuhusi espíritu neʼe. Tanba espíritu santu husu buat neʼebé tuir Maromak nia hakarak no neʼe mak atu ajuda santu sira.

28 Agora ita hatene katak Maromak halo ninia serbisu hotu laʼo hamutuk ho loloos hodi lori diʼak ba sira neʼebé hadomi nia, sira neʼebé nia bolu ona tuir ninia hakarak; 29 tanba husi uluk kedas nia hanoin kona-ba sira neʼebé nia hili nanis, no nia deside katak sira-neʼe sei sai nuʼudar ilas husi ninia Oan-Mane, hodi nuneʼe Oan neʼe sei sai oan primeiru iha ninia alin barak nia leet. 30 Liután neʼe, sira neʼebé nia hili nanis ona mak sira neʼebé nia bolu; no sira neʼebé nia bolu mak sira neʼebé nia dehan katak sira ema loos. Ikusliu, sira neʼebé nia dehan katak ema loos mak sira neʼebé nia fó ona glória.

31 Entaun, saida mak ita sei dehan kona-ba buat sira-neʼe? Se Maromak hamutuk ho ita, sé mak sei kontra ita? 32 Nia husik nia Oan-Mane atu hetan terus hodi entrega nia ba mate tanba ita hotu. Nuneʼe ita hatene katak Maromak no ninia Oan-Mane mós prontu atu fó ba ita buat seluk hotu, loos ka lae? 33 Sé mak bele foti lia hasoru sira neʼebé Maromak hili ona? Maromak mak fó sai katak sira ema loos. 34 Sé mak sei tesi lia hasoru sira? La iha ema ida, basá Kristu Jesus mate ona no moris fali husi mate, nia tuur iha Maromak nia liman sorin loos, no nia harohan ba ita.

35 Sé mak sei haketak ita husi Kristu nia domin? Terus, laran-susar, ameasa, hamlaha, isin-tanan, perigu ka surik bele haketak ita ka lae? 36 Hanesan hakerek nanis ona: “Tanba Ita mak ami hasoru perigu mate nian iha tempu hotu, ami hanesan bibi-malae neʼebé prontu ona atu oho.” 37 Maibé, iha buat sira-neʼe hotu, ami sei manán liuhusi nia neʼebé hadomi ami. 38 Tanba haʼu fiar duni katak mate ka moris ka anju ka governu sira ka buat neʼebé iha agora ka buat neʼebé atu mai ka kbiit 39 ka aas ka kleʼan ka kriasaun sira seluk sei la bele haketak ita husi Maromak nia domin neʼebé liuhusi ita Naʼi Kristu Jesus.

9 Haʼu koʼalia lia-loos nuʼudar Kristu nia dixípulu, haʼu la bosok: Liuhusi espíritu santu haʼu-nia laran* fó sasin 2 katak haʼu laran-susar tebes no hanoin barak iha haʼu-nia laran. 3 Haʼu prontu atu simu kastigu neʼebé atu fó ba haʼu-nia maun-alin sira, katak ema judeu sira neʼebé la halo tuir Kristu, se ida-neʼe ajuda sira. 4 Sira mak ema Izraél neʼebé Maromak hili nuʼudar oan-hakiak. Maromak foti aas sira, no halo aliansa ho sira, no fó Ukun-Fuan ba sira. Sira halo serbisu santu ba nia no nia fó promesa ba sira; 5 sira mós iha beiʼala sira neʼebé naran-boot, no husi beiʼala sira-neʼe mak Kristu mosu mai iha isin: Maromak, ida neʼebé aas liu hotu, hetan glória ba nafatin. Amen.

6 Maibé, neʼe la dehan katak Maromak nia liafuan la sai loos ona. Basá laʼós sira hotu neʼebé mosu husi Izraél mak nuʼudar “Izraél” neʼebé loloos. 7 No maski sira mak Abraão nia bei-oan, sira hotu laʼós Abraão nia oan loloos, maibé hanesan hakerek nanis ona: “Ida neʼebé bolu nuʼudar ‘ó-nia bei-oan’ sei mai husi Isaac.” 8 Ida-neʼe katak laʼós Abraão nia oan tuir isin mak Maromak nia oan loloos, maibé sira neʼebé moris tanba promesa, sira mak Abraão nia oan loloos. 9 Tanba Maromak fó promete neʼe hodi dehan: “Iha tempu neʼe haʼu sei mai no Sara sei iha oan-mane ida.” 10 Laʼós neʼe deʼit, maibé husi ita-nia beiʼala Isaac, Rebeka koʼus oan-mane kaduak: 11 basá Maromak deside ona oinsá atu hili ema ida, no ida-neʼe la depende ba ema neʼe nia serbisu. Maibé nia rasik sei hili ida neʼebé nia bolu. Tan neʼe, kuandu sira naʼin-rua seidauk moris ka seidauk halo buat neʼebé diʼak ka aat, 12 Maromak dehan ba Rebeka: “Ida neʼebé boot sei sai atan ba ida neʼebé kiʼik.” 13 Hanesan hakerek nanis ona: “Haʼu hadomi Jacob maibé odi Esaú.”

14 Neʼe duni, ita sei dehan sá? Maromak nia hahalok la loos ka? Lae duni! 15 Basá nia dehan ba Moisés: “Haʼu sei hatudu domin ba sira neʼebé haʼu deside ona atu hatudu domin, no haʼu sei hatudu laran-sadiʼa ba sira neʼebé haʼu deside ona atu hatudu laran-sadiʼa.” 16 Entaun, ida-neʼe depende ba Maromak, neʼebé iha laran-sadiʼa, laʼós depende ba ema nia hakarak ka ema nia hakaʼas-an. 17 Basá Eskritura dehan ba Liurai Ejitu* nian: “Tan razaun neʼe mak haʼu sei husik ó moris, atu liuhusi ó mak haʼu bele hatudu haʼu-nia kbiit, no atu haʼu-nia naran bele fó sai iha mundu tomak.” 18 Tan neʼe, nia hatudu laran-sadiʼa ba ema neʼebé nia hakarak, maibé nia husik ema seluk sai ulun-toos.

19 Imi sei dehan ba haʼu: “Se ema ida la bele kontra buat neʼebé nia deside ona, tansá mak nia fó-sala ba ema?” 20 Maibé sé mak ó hodi hatán fali ba Maromak? Buat neʼebé ema halo ho liman bele dehan fali ba ema neʼe: “Tansá ó halo haʼu hanesan neʼe?” 21 Basá ho rai-mean ida deʼit mak badain iha kbiit atu halo sanan-rai neʼebé uza iha tempu espesiál, no mós sanan-rai neʼebé uza iha tempu baibain, loos ka lae? 22 Nuneʼe mós ho Maromak. Nia hakarak atu hatudu sai ninia laran-nakali ba ema no halo ema hatene ninia kbiit. Maski nuneʼe, nia hein ho pasiénsia ba ema neʼebé nia hirus* no neʼebé merese atu halakon tiha. 23 Nia halo ida-neʼe atu hatudu sai ninia glória neʼebé boot ba ema* neʼebé nia hatudu laran-sadiʼa, no sira sei simu kolen neʼebé nia prepara ona ba sira. 24 Neʼe mak ita neʼebé nia bolu ona, laʼós deʼit husi ema judeu, maibé mós ema husi nasaun seluk. 25 Hanesan nia mós dehan iha livru Oséias: “Sira neʼebé laʼós haʼu-nia povu haʼu sei bolu ‘haʼu-nia povu’, no feto neʼebé haʼu la hadomi haʼu sei bolu nuʼudar ‘doben’; 26 no iha fatin neʼebé uluk haʼu dehan ba sira: ‘imi laʼós haʼu-nia povu’, iha fatin neʼe mak haʼu sei bolu sira ‘oan husi Maromak neʼebé moris’.”

27 Liután neʼe, Isaías fó sai kona-ba Izraél hodi dehan: “Maski Izraél nia oan sira sai barak hanesan rai-henek iha tasi, maibé sira uitoan deʼit mak sei hetan salvasaun. 28 Tanba Jeová sei tesi lia ba sira neʼebé hela iha rai, no nia sei halo hotu ida-neʼe ho lalais.” 29 No mós, hanesan Isaías fó-hatene nanis ona hodi dehan: “Se Jeová, ukun-naʼin ba tropa lalehan nian, la husik bei-oan balu atu moris hela, ita-nia situasaun sei sai hanesan ho Sodoma no Gomorra.”

30 Entaun, ita sei dehan saida? Maski ema husi nasaun seluk la buka atu sai ema loos, maibé sira sai ema loos iha Maromak nia oin tanba fiar; 31 maibé kona-ba Izraél, sira buka atu halo buat loos hodi tuir ukun-fuan, maski nuneʼe sira la kumpre ukun-fuan. 32 Tanba razaun saida? Tanba sira hanoin katak sira bele sai ema loos liuhusi hahalok, laʼós liuhusi fiar. Sira sidi iha “fatuk sidi nian”; 33 hanesan hakerek nanis ona: “Haree! Haʼu tau fatuk sidi nian iha Siaun no fatuk-boot neʼebé halo sira monu, maibé ema neʼebé tau fiar ba nia sei la sai moe.”

10 Maun-alin sira, tuir loloos haʼu hakarak ho laran no harohan ba Maromak atu ema Izraél sira hetan salvasaun. 2 Basá haʼu fó sasin katak sira laran-manas ba Maromak; maibé laʼós tuir lia-loos kona-ba Maromak. 3 Sira la hatene buat neʼebé loos tuir Maromak nia hakarak, maibé sira buka dalan atu sai ema loos tuir sira-nia hakarak rasik, tan neʼe sira la halo tuir buat neʼebé loos husi Maromak. 4 Tanba Kristu mak Ukun-Fuan nia rohan, atu nuneʼe ema hotu neʼebé tau fiar bele sai ema loos iha Maromak nia oin.

5 Moisés hakerek katak ema neʼebé halo buat loos tuir Ukun-Fuan sei hetan moris husi ida-neʼe. 6 Maibé Eskritura mós hatudu katak liuhusi fiar mak ema bele sai loos. Basá hakerek nanis ona dehan: “Keta koʼalia iha imi-nia laran: ‘Sé mak sei saʼe ba lalehan?’ katak, atu lori Kristu tun mai; 7 ka: ‘Sé mak sei tun ba rai-kuak kleʼan?’ katak, atu lori Kristu sai husi mate.” 8 Maibé Eskritura dehan sá? “Maromak nia liafuan besik ó, ida-neʼe iha ó-nia ibun no iha ó-nia laran”; neʼe mak “liafuan” fiar nian neʼebé ami haklaken. 9 Basá se iha ema nia oin ó fó sai ‘liafuan neʼe iha ó-nia ibun’, katak Jesus mak Naʼi, no ó hatudu fiar iha ó-nia laran katak Maromak halo nia moris fali husi mate, ó sei hetan salvasaun. 10 Tanba ho laran mak ema hatudu fiar hodi sai ema loos, maibé ho ibun mak ema fó sai iha ema barak nia oin hodi hetan salvasaun.

11 Tanba Eskritura dehan: “La iha ema neʼebé tau fiar ba nia sei sai moe.” 12 Basá ema judeu no ema gregu hanesan deʼit, tanba iha Naʼi ida deʼit ba ema hotu, Naʼi neʼebé fó bensaun barak ba sira hotu neʼebé bolu nia. 13 Tanba “ema hotu neʼebé bolu Jeová nia naran sei hetan salvasaun”. 14 Maibé, oinsá mak sira sei bolu nia neʼebé sira la tau fiar? No, oinsá mak sira sei tau fiar ba nia se sira la rona kona-ba nia? No, oinsá mak sira sei rona kona-ba nia se la iha ema ida atu haklaken? 15 No, oinsá mak sira sei haklaken se ema ida la haruka sira?* Hanesan hakerek nanis ona: “Furak duni ba ain sira neʼebé haklaken liafuan diʼak kona-ba buat neʼebé diʼak!”

16 Maski nuneʼe, laʼós sira hotu halo tuir liafuan diʼak. Tanba Isaías dehan: “Jeová, sé mak tau fiar ba buat neʼebé ami fó sai?”* 17 Entaun, fiar mai husi buat neʼebé ema rona. No buat neʼebé ema rona mak liuhusi liafuan kona-ba Kristu. 18 Neʼe katak sira seidauk rona mensajen neʼe ka? Lae duni, tuir loloos “iha mundu tomak ema rona mensajen neʼe, no sira neʼebé hela iha fatin dook liu iha mundu rona liafuan neʼe”. 19 Entaun, neʼe katak Izraél seidauk hatene ka? Lae duni, basá uluk Moisés hatete: “Liuhusi nasaun seluk mak haʼu sei book imi hodi sai laran-moras; liuhusi nasaun neʼebé beik mak haʼu sei halo imi sai hirus loos.” 20 No Isaías sai aten-brani no dehan: “Sira neʼebé la buka haʼu hetan haʼu; haʼu hatudu haʼu-nia an ba sira neʼebé la husu kona-ba haʼu.” 21 Maibé kona-ba Izraél, nia dehan: “Ba loron hotu haʼu lolo haʼu-nia liman ba povu ida neʼebé la halo tuir no koʼalia kontra haʼu.”

11 Entaun, neʼe katak Maromak la simu ona ninia povu ka? Lae duni! Tanba haʼu mós ema Izraél ida, Abraão nia bei-oan, no husi suku Benjamin nian. 2 Maromak la husik ninia povu neʼebé nia hili uluk. Imi hatene ka lae buat neʼebé Eskritura dehan kona-ba Elias kuandu nia koʼalia ho Maromak hodi duun Izraél? 3 “Jeová, sira oho tiha ona Ita-Boot nia profeta sira, no sira sobu tiha Ita-nia altár, no haʼu mesak mak hela, no agora sira buka hela haʼu-nia moris.”* 4 Maibé, saida mak Maromak dehan ba nia? “Haʼu sei iha mane naʼin-7.000 neʼebé la hakneʼak ba Baal.” 5 Nuneʼe mós, iha tempu neʼe iha restu balu neʼebé Maromak hili ona tuir ninia laran-diʼak neʼebé boot. 6 Entaun, neʼe katak nia hili sira tanba ninia laran-diʼak, no laʼós tanba buat neʼebé sira halo; se lae karik, ninia laran-diʼak neʼe laʼós tan nuʼudar laran-diʼak.

7 Nuneʼe, ita sei dehan sá? Buat neʼebé Izraél buka namanas sira la hetan, maibé sira neʼebé Maromak hili ona mak hetan ida-neʼe. Sira seluk lakohi atu rona; 8 hanesan hakerek nanis ona: “Maromak halo sira toba-dukur loos, atu sira-nia matan labele haree no sira-nia tilun labele rona. Toʼo loron neʼe, sira-nia situasaun sei hanesan deʼit.” 9 No mós David dehan: “Sira-nia meza* rasik sei sai hanesan rede ida, lasu ida, fatuk sidi nian ida, no buat todan ida ba sira; 10 no sira-nia matan sei sai nakukun hodi la haree, no sira tenke lori nafatin naha todan iha sira-nia kotuk.”

11 Entaun, neʼe katak sira sidi no monu toʼo la bele hamriik fali ka? Lae duni! Maibé tan sira-nia hakat neʼebé sala, iha salvasaun ba ema husi nasaun seluk, no neʼe halo sira sai laran-moras. 12 No se sira-nia hakat neʼebé sala lori bensaun ba mundu, no buat neʼebé sira kuran lori bensaun ba nasaun seluk, entaun sei iha bensaun barak liután bainhira sira-nia númeru sai kompletu, loos ka lae?

13 No agora haʼu koʼalia ba imi neʼebé husi nasaun seluk: Haʼu mak nuʼudar apóstolu neʼebé haruka ba nasaun sira, no haʼu hafolin haʼu-nia serbisu haklaken, 14 atu nuneʼe haʼu bele book ema balu hanesan haʼu, katak ema judeu, atu sira sai laran-moras hodi sira balu bele hetan salvasaun. 15 Tanba Maromak soe tiha sira no ida-neʼe loke dalan ba mundu atu hadame malu ho Maromak, entaun se Maromak simu fali sira, ida-neʼe katak sira moris husi mate. 16 Liután neʼe, se parte primeiru husi paun neʼebé ema ida foti mak santu, neʼe katak paun hotu mak santu, no se ai nia abut mak santu, neʼe katak ninia sanak hotu mós santu.

17 Maibé, Maromak halo tohar tiha sanak balu husi ai-oliveira, no maski imi mak sanak husi ai-oliveira fuik, nia tutan fali imi ba ai neʼe no imi mós hetan buat diʼak husi ninia abut. 18 Neʼe duni, keta sai foti-an kona-ba sanak sira neʼebé Maromak halo tohar ona, tanba laʼós imi mak apoia ai nia abut, maibé ai-abut mak apoia imi. 19 Imi sei dehan: “Maromak halo tohar tiha ai-sanak sira-neʼe hodi bele tutan fali haʼu ba ai-hun.” 20 Neʼe loos! Sira la iha fiar no tan neʼe Maromak halo tohar tiha sira, maibé imi hamriik tanba imi-nia fiar. Tan neʼe, keta foti an, maibé sai taʼuk bá. 21 Tanba se Maromak la husik ai-sanak loloos atu kontinua moris, nia mós sei la husik imi atu kontinua moris. 22 Tan neʼe, hanoin kona-ba Maromak nia laran-diʼak no kastigu. Maromak fó kastigu ba sira neʼebé monu, maibé nia hatudu laran-diʼak ba imi se imi hela nafatin iha nia laran-diʼak; se lae karik, imi mós sei tesi sai tiha. 23 No kona-ba sira, se sira hatudu fali fiar, sira sei tutan fali ba ai-hun; basá Maromak bele duni atu tutan fali sira. 24 Basá Maromak tesi imi husi ai-oliveira fuik no tutan imi ba ai-oliveira neʼebé moris iha toʼos, maski ida-neʼe laʼós buat neʼebé baibain. Se nuneʼe, fasil liu ba nia atu tutan fali ai-oliveira neʼe nia sanak rasik, loos ka lae?

25 Maun-alin sira, haʼu hakarak imi atu hatene segredu santu neʼe, atu nuneʼe imi la sai matenek iha imi-nia matan rasik. Segredu neʼe mak: Ema Izraél balu lakohi atu rona. Ida-neʼe sei kontinua toʼo númeru ba ema husi nasaun seluk nian sai kompletu ona, 26 no iha dalan neʼe mak ema Izraél hotu sei hetan salvasaun. Hanesan hakerek nanis ona: “Ida neʼebé fó salvasaun sei mosu husi Siaun no nia sei halo Jacob nia bei-oan sira husik sira-nia hahalok aat. 27 No neʼe mak haʼu-nia aliansa ho sira, iha tempu neʼebé haʼu hamoos tiha sira-nia sala.” 28 Loloos, sira sai Maromak nia inimigu tanba sira la simu liafuan diʼak, no tan neʼe imi hetan buat diʼak husi ida-neʼe. Maibé tanba promesa neʼebé Maromak halo ona ho sira-nia beiʼala, nia hili sira balu atu sai ninia belun. 29 Tanba Maromak sei la troka nia hanoin kona-ba prezente neʼebé nia fó no ema neʼebé nia hili. 30 Basá uluk imi la halo tuir Maromak, maibé agora nia hatudu laran-sadiʼa ba imi tanba ema judeu la halo tuir. 31 Entaun, nia hatudu laran-sadiʼa ba imi tanba ema judeu la halo tuir, no tan neʼe mak nia mós bele hatudu laran-sadiʼa ba sira. 32 Maromak haree sira hotu hanesan ema dadur tanba sira la halo tuir, atu nuneʼe nia bele hatudu laran-sadiʼa ba sira hotu.

33 Oh, bensaun husi Maromak mak barak tebes! Ninia matenek no komprende mak kleʼan tebes! Ita-nia hanoin la toʼo atu komprende kona-ba ninia tesi-lia no ita la bele hatene ninia dalan hotu! 34 Basá hakerek nanis ona: “Sé mak hatene Jeová nia hanoin sira, ka sé mak bele fó-hatene ba nia buat neʼebé loos atu halo?” 35 Ka, “Sé mak fó uluk buat ruma ba Maromak, hodi nuneʼe Maromak tenke selu fali ba nia?” 36 Tanba buat hotu hahú husi nia, no sira iha tan nia no ba nia hakarak. Glória nafatin ba nia. Amen.

12 Nuneʼe maun-alin sira, haʼu husu imi tanba Maromak nia laran-sadiʼa, atu imi fó imi-nia isin nuʼudar prezente neʼebé moris, santu, no neʼebé Maromak simu, katak halo serbisu santu ho imi-nia kbiit atu hanoin. 2 No keta halo tuir mundu ohin neʼe nian, maibé troka imi-nia an hodi hafoun imi-nia hanoin, atu imi bele hatene ho loloos kona-ba Maromak nia hakarak neʼebé diʼak no loos no neʼebé nia simu.

3 Maromak hatudu laran-diʼak neʼebé boot mai haʼu, no tan neʼe mak haʼu koʼalia ba ema hotu iha imi-nia leet atu la hanoin nia an diʼak liu fali buat neʼebé loos; maibé atu hanoin ho neon neʼebé loos tuir sukat fiar nian neʼebé Maromak fó tiha ona ba imi ida-idak. 4 Hanesan isin-lolon iha parte barak, no parte ida-idak iha knaar neʼebé la hanesan; 5 entaun, maski ita barak, maibé ita isin-lolon ida deʼit ho Kristu, no parte ida-idak liga malu. 6 Tanba Maromak nia laran-diʼak neʼebé boot, nia fó ba ita kbiit oioin atu halo serbisu espesiál. Se nia fó ita kbiit atu fó sai ninia mensajen, mai ita fó sai ida-neʼe tuir fiar neʼebé fó ona ba ita; 7 ka se ita simu knaar atu serbí ema seluk, mai ita serbí bá; ka ema neʼebé hanorin, halo serbisu hanorin bá; 8 ka ema neʼebé fó laran-manas, fó laran-manas bá; ema neʼebé fahe, halo ida-neʼe ho ksolok; ema neʼebé dirije, halo ida-neʼe ho badinas; ema neʼebé hatudu laran-sadiʼa, halo ida-neʼe ho laran-kontente.

9 Imi-nia domin tenke ho laran-moos.* Hadook an husi buat neʼebé aat no kaer metin ba buat neʼebé diʼak. 10 Hadomi malu tebetebes hanesan maun-alin. Buka uluk atu hatudu respeitu ba malu. 11 Sai badinas bá, keta baruk. Sai laran-manas bá ho espíritu santu. Serbí nuʼudar atan ba Jeová. 12 Haksolok iha imi-nia esperansa. Tahan kuandu hasoru terus. La kole atu halo orasaun. 13 Fahe buat neʼebé imi iha ba santu sira tuir sira-nia presiza. Haburas toman atu hatudu laran-diʼak. 14 Kontinua husu Maromak atu fó bensaun ba sira neʼebé haterus imi; husu Maromak nia bensaun ba ema no keta hotar ema. 15 Haksolok ho sira neʼebé haksolok; tanis ho sira neʼebé tanis. 16 Haree ema seluk hanesan imi-nia an rasik; keta haburas hanoin neʼebé foti-an maibé iha hanoin neʼebé haraik-an. Keta sai matenek iha imi-nia matan rasik.

17 Keta selu aat ho aat ba ema. Buka atu halo buat diʼak iha ema hotu nia oin. 18 Hakaʼas imi-nia an atu nuneʼe, se bele karik, imi bele moris iha dame ho ema hotu. 19 Doben sira, keta selu aat ba ema, maibé husik ida-neʼe ba Maromak nia hirus; basá hakerek nanis ona: “Jeová dehan, haʼu mak iha direitu atu selu aat; haʼu sei selu fali sira-nia hahalok aat.” 20 Maibé, “se imi-nia inimigu hamlaha, fó han ba nia; se nia hamrook, fó buat ruma ba nia atu hemu; basá hodi halo ida-neʼe, imi sei tau ahi-klaak lakan iha nia ulun leten”. 21 Keta husik buat aat manán imi, maibé kontinua manán buat aat ho buat neʼebé diʼak.

13 Ema* ida-idak tenke hakruʼuk ba ukun-naʼin sira, basá ukun hotu mai husi Maromak; no ukun sira-neʼe simu kbiit oioin husi Maromak. 2 Tan neʼe, ema neʼebé kontra ukun-naʼin sira, nia kontra Maromak nia arranju; ema neʼebé kontra ida-neʼe sei hetan kastigu. 3 Ukun-naʼin sira-neʼe ukun laʼós atu halo taʼuk ema neʼebé halo diʼak, maibé atu halo taʼuk ema neʼebé halo aat. Entaun, imi hakarak atu livre husi taʼuk ba ukun-naʼin sira ka? Se nuneʼe, kontinua halo buat diʼak, no imi sei simu hahiʼi husi ukun-naʼin sira; 4 tanba sira mak Maromak nia atan ba imi-nia diʼak. Maibé se imi halo buat neʼebé aat, imi sai taʼuk bá; basá ukun-naʼin sira-neʼe la kaer leet deʼit kbiit* atu fó kastigu. Ukun-naʼin sira-neʼe mak Maromak nia atan atu fó kastigu ba sira neʼebé halo aat.

5 Nuneʼe, imi tenke hakruʼuk an ba sira laʼós deʼit tanba sira-nia hirus, maibé atu imi-nia laran* la fó-sala ba imi. 6 Tan neʼe mak imi mós selu impostu; basá sira mak Maromak nia atan no sira kontinua halo serbisu iha dalan neʼe ba ema hotu. 7 Fó ba ema hotu buat neʼebé sira merese simu, selu impostu ba sira neʼebé husu impostu; selu osan ba sira neʼebé husu atu selu osan; hatudu respeitu ba sira neʼebé husu atu simu respeitu; fó hahiʼi ba sira neʼebé husu atu simu hahiʼi.

8 Keta iha tusan ho ema ida, maibé imi-nia tusan mak hadomi malu; basá ema neʼebé hadomi nia maluk halo tuir ona ukun-fuan. 9 Tanba ukun-fuan sira inklui mandamentu neʼebé dehan: “Ó keta halo sala-foʼer,* ó keta oho, ó keta naʼok, ó keta kaan buat neʼebé ema seluk nian”, no mandamentu seluk hotu habadak ho liafuan tuirmai neʼe: “Ó tenke hadomi ó-nia maluk hanesan ó-nia an rasik.” 10 Domin la halo aat ba nia maluk; tan neʼe domin kumpre ukun-fuan.

11 Halo ida-neʼe, liuliu tanba imi hatene kona-ba tempu, katak tempu ona ba imi atu hadeer husi toba, basá agora ita-nia salvasaun besik liu fali tempu neʼebé ita foin sai fiar-naʼin. 12 Kalan toʼo ona nia rohan; loron besik daudaun ona. Tan neʼe, mai ita hasai tiha hahalok sira neʼebé nakukun nian no mai ita tau fali hatais funu naroman nian. 13 Mai ita halaʼo ita-nia moris ho loloos hanesan ema neʼebé laʼo iha loron. Keta festa arbiru ka lanu, keta halo hahalok sala-foʼer naranaran deʼit ka halo hahalok neʼebé la iha moe, keta istori malu ka laran-moras. 14 Tau ita Naʼi Jesus Kristu nia hahalok sira nuʼudar imi-nia hatais, no keta planu nanis kona-ba oinsá atu halo hakarak isin nian.

14 Simu bá ema neʼebé iha fraku ruma kona-ba ninia fiar, no keta tesi lia ba nia tuir imi-nia hanoin rasik. 2 Ema ida iha fiar atu han buat naran deʼit, maibé ema neʼebé fraku han deʼit modo. 3 Ema neʼebé han ai-han naran deʼit keta hatún ema neʼebé la han, no ema neʼebé la han ai-han naran deʼit keta tesi lia ba ema neʼebé han, basá Maromak simu ema neʼe. 4 Imi neʼe sé hodi tesi lia ba ema seluk nia atan? Iha nia naʼi nia oin mak nia hamriik ka monu. Tuir loloos, nia sei hamriik, basá Jeová bele halo nia hamriik.

5 Ema ida hanoin katak loron ida folin liu fali loron seluk; ema seluk hanoin katak loron hotu mak hanesan deʼit; ema ida-idak tenke laran-metin ba buat neʼebé nia deside ona. 6 Ema neʼebé hafolin loron ida, nia halo ida-neʼe ba Jeová. No mós, ema neʼebé han, nia han ba Jeová, basá nia fó-agradese ba Maromak; no ema neʼebé la han, nia la han ida-neʼe ba Jeová, maski nuneʼe nia mós fó-agradese ba Maromak. 7 Tuir loloos, ita hotu moris laʼós deʼit ba ita-nia an rasik, no ita mate laʼós deʼit ba ita-nia an rasik; 8 tanba se ita moris, ita moris ba Jeová, no se ita mate, ita mate ba Jeová. Tan neʼe, ita moris ka mate, ita mak Jeová nian. 9 Basá tan razaun neʼe mak Kristu mate no moris hiʼas fali, atu nuneʼe nia sai nuʼudar Naʼi ba ema mate no ema moris.

10 Maibé tansá mak ó tesi lia ba ó-nia maun-alin? Ka tansá mak ó hatún ó-nia maun-alin? Ita hotu sei hamriik iha Maromak nia kadeira tesi-lia nian nia oin; 11 hanesan hakerek nanis ona: “‘Nuʼudar haʼu moris’, Jeová dehan, ‘ba haʼu mak ema hotu sei hakneʼak, no nanál hotu sei fó sai iha ema nia oin katak haʼu mak Maromak’.” 12 Entaun, ita ida-idak sei hatán ba Maromak kona-ba ita-nia hahalok rasik.

13 Tan neʼe, keta tesi lia tan ba malu, maibé halo buat tuirmai neʼe: Hakaʼas an atu la tau fatuk sidi nian iha imi-nia maun-alin nia oin ka tau buat ruma neʼebé halo nia monu. 14 Haʼu hatene no haʼu fiar duni iha Naʼi Jesus katak la iha buat ida neʼebé sai foʼer mesak deʼit; maibé kuandu ema haree buat ruma nuʼudar foʼer, neʼe foʼer ba nia. 15 Se imi halo imi-nia maun-alin laran-kanek tan deʼit ai-han, imi la laʼo ona tuir domin. Kristu mate ba imi-nia maun-alin, tan neʼe keta estraga ninia fiar tan deʼit ai-han. 16 Nuneʼe, keta halo buat neʼebé imi fiar katak diʼak se ida-neʼe halo ema seluk koʼalia la diʼak kona-ba imi. 17 Basá Maromak nia Ukun laʼós kona-ba han no hemu, maibé kona-ba hahalok loos no dame no haksolok ho espíritu santu. 18 Tanba ema neʼebé iha hahalok sira-neʼe nuʼudar Kristu nia atan mak ida neʼebé Maromak simu no ema respeitu nia.

19 Entaun, mai ita buka buat neʼebé haburas dame no buat neʼebé hametin malu. 20 Keta halo rahun Maromak nia serbisu tan deʼit ai-han. Tuir loloos buat hotu mak moos, maibé se ema han ai-han ruma no neʼe halo ema seluk sidi, ida-neʼe la diʼak. 21 Diʼak liu atu la han naʼan, la hemu tua-uvas ka la halo buat naran deʼit neʼebé halo imi-nia maun-alin sidi. 22 Kona-ba fiar neʼebé imi iha, fiar neʼe entre imi ho Maromak. Ksolok ba ema neʼebé la tesi lia hasoru nia an rasik kona-ba buat neʼebé nia deside ona atu halo. 23 Maibé se nia han maski nia laran-rua, nia tesi lia ona ba nia an, tanba nia han la tuir nia fiar. Tuir loloos, buat naran deʼit neʼebé la tuir fiar mak sala.

15 No ita neʼebé metin iha fiar tenke ajuda sira neʼebé kbiit-laek atu tahan buat neʼebé todan liu ba sira, no la buka atu fó ksolok ba ita-nia an rasik. 2 No mai ita ida-idak buka atu fó ksolok ba ita-nia maluk liuhusi buat neʼebé diʼak atu hametin sira. 3 Basá Kristu rasik mós la buka atu fó ksolok ba nia an; maibé hanesan hakerek nanis ona: “Buat neʼebé ema dehan no halo atu hamoe Ita monu ba haʼu-nia leten.” 4 Tanba buat hotu neʼebé hakerek ona horiuluk kedas, hakerek hodi hanorin ita no fó ita esperansa, basá Eskritura sira-neʼe ajuda ita atu tahan no fó kmaan mai ita. 5 Maromak mak fó kmaan mai ita no hametin ita atu tahan, no haʼu harohan katak nia sei ajuda imi hotu atu iha hanoin hanesan Kristu Jesus nian, 6 atu nuneʼe ho neon ida deʼit no ho lian ida deʼit imi sei fó glória ba Maromak no Aman husi ita Naʼi Jesus Kristu.

7 Tan neʼe simu malu bá, hanesan Kristu mós simu ita, atu nuneʼe Maromak bele simu glória. 8 Haʼu hakarak imi hatene katak loloos Kristu sai nuʼudar atan ba sira neʼebé hetan ona sirkunsizaun. Ida-neʼe atu hatudu ba sira katak Maromak sempre koʼalia loos no katak Maromak nia promete ba sira-nia beiʼala mak loos, 9 no atu nasaun sira seluk bele fó glória ba Maromak tan ninia laran-sadiʼa. Hanesan hakerek nanis ona: “Tan neʼe mak haʼu hahiʼi Ita iha ema nia oin iha nasaun sira-nia leet no ba Ita-nia naran mak haʼu sei kanta knananuk hahiʼi nian.” 10 No nia dehan tan: “Imi ema nasaun seluk nian, haksolok bá hamutuk ho ninia povu.” 11 Liután neʼe: “Hahiʼi Jeová, imi hotu neʼebé husi nasaun seluk, no ema hotu hahiʼi nia bá.” 12 No dala ida tan Isaías dehan: “Abut husi Jesse sei mosu mai, no ida neʼebé sei ukun nasaun sira sei mosu mai; ba nia mak nasaun sira sei tau sira-nia esperansa.” 13 Haʼu harohan katak Maromak neʼebé fó esperansa sei halo imi nakonu ho ksolok no dame liuhusi imi-nia fiar ba nia, atu nuneʼe imi sei sai nakonu ho esperansa liuhusi espíritu santu nia kbiit.

14 No agora haʼu-nia maun-alin sira, haʼu rasik fiar katak imi nakonu ona ho hahalok diʼak no nakonu ona ho matenek, no mós katak imi bele hanorin malu. 15 Maibé, haʼu hakerek ba imi hodi fó sai momoos buat balu, atu fó-hanoin fali ba imi. No haʼu halo ida-neʼe tanba Maromak nia laran-diʼak boot neʼebé nia hatudu ona mai haʼu. 16 Basá nia hili haʼu atu sai nuʼudar atan ba Kristu Jesus atu haklaken liafuan diʼak Maromak nian ba ema husi nasaun seluk. Haʼu halo serbisu santu neʼe atu nuneʼe Maromak simu sira nuʼudar sakrifísiu neʼebé halo santu ona liuhusi espíritu santu.

17 Entaun, haʼu iha razaun atu haksolok, tanba haʼu mak Kristu Jesus nia dixípulu no haʼu halo Maromak nia serbisu. 18 Basá haʼu sei la koʼalia tan kona-ba buat naran deʼit neʼebé haʼu halo. Maibé haʼu sei koʼalia deʼit kona-ba serbisu neʼebé Kristu halo ona liuhusi haʼu, atu nuneʼe ema husi nasaun seluk bele halo tuir Kristu. No nia halo ida-neʼe liuhusi haʼu-nia liafuan no hahalok, 19 no mós liuhusi sinál no milagre sira, no liuhusi kbiit espíritu santu nian. Tan neʼe, husi Jeruzalein toʼo Ilíriko haʼu fó sasin ho didiʼak kona-ba liafuan diʼak Kristu nian. 20 Iha dalan neʼe mak haʼu hakaʼas an hodi la haklaken liafuan diʼak iha fatin neʼebé ema rona ona Kristu nia naran, atu nuneʼe haʼu la harii fali iha fatin neʼebé ema seluk hahú ona atu harii; 21 maibé, hanesan hakerek nanis ona: “Sira neʼebé ema seidauk fó-hatene kona-ba nia sei haree, no sira neʼebé seidauk rona kona-ba nia sei komprende.”

22 Dala barak ida-neʼe hanetik haʼu atu laʼo ba imi. 23 Maibé agora haʼu haklaken tiha ona iha fatin hotu iha área sira-neʼe, no ba tinan balu ona haʼu hakarak tebes atu laʼo ba imi. 24 Haʼu hein katak kuandu haʼu bá España, haʼu mós bele vizita imi, no depois haʼu haksolok tiha hamutuk ho imi, imi bele lori haʼu toʼo dalan klaran. 25 Maibé agora haʼu atu bá Jeruzalein hodi serbí santu sira, 26 tanba sira neʼebé iha Masedónia no Akaia ho haksolok fó kontribuisaun atu fahe ba sira neʼebé kiak iha santu sira-nia leet iha Jeruzalein. 27 Klaru katak sira kontente atu halo ida-neʼe, no loloos sira iha tusan ba santu sira-neʼe; basá se ema husi nasaun seluk hola parte ona ho santu sira-neʼe kona-ba buat neʼebé husi Maromak, ema sira-neʼe mós iha tusan hodi serbí santu sira-neʼe ho sira-nia sasán. 28 Tan neʼe, depois haʼu halo hotu tiha ida-neʼe no sira simu ona kontribuisaun neʼe, haʼu sei husik hela sira no haʼu sei vizita imi nuʼudar haʼu bá España. 29 Liután neʼe, haʼu hatene katak kuandu haʼu toʼo ba imi, haʼu sei toʼo ho bensaun barak husi Kristu.

30 Agora, maun-alin sira, liuhusi ita Naʼi Jesus Kristu no liuhusi domin neʼebé mai husi espíritu, haʼu husu imi ho laran atu hakaʼas an ho haʼu atu halo orasaun ba Maromak kona-ba haʼu, 31 atu nuneʼe iha Judeia haʼu labele monu ba ema fiar-laek sira-nia liman no katak santu sira iha Jeruzalein simu haʼu-nia ajuda ho laran. 32 No se Maromak hakarak, haʼu sei toʼo ba imi ho ksolok no hetan kmaan hamutuk ho imi. 33 Haʼu harohan katak Maromak, ida neʼebé fó dame sei hamutuk ho imi hotu. Amen.

16 Haʼu haruka ita-nia feton Febe ba imi; nia serbí iha kongregasaun iha Sénkreas. 2 Imi simu nia bá iha Naʼi no iha dalan neʼebé merese ba santu sira, no imi bele fó ajuda naran deʼit neʼebé nia presiza, basá nia rasik mós proteje ona maun-alin barak, neʼe inklui mós haʼu rasik.

3 Fó haʼu-nia kumprimentus ba Priska no Ákuila neʼebé mak haʼu-nia maluk serbisu-naʼin iha Kristu Jesus. 4 Sira tau sira-nia moris* iha perigu laran tanba haʼu.* Tuir loloos, laʼós haʼu deʼit maibé mós kongregasaun hotu husi ema nasaun seluk nian fó obrigadu ba sira; 5 no fó kumprimentus mós ba kongregasaun neʼebé iha sira-nia uma. Fó kumprimentus ba Epéneto neʼebé haʼu hadomi, nia mós Kristu nia dixípulu primeiru iha área Ázia nian. 6 Kumprimentus ba Maria neʼebé halo serbisu barak ba imi. 7 Kumprimentus ba Andróniko no Junias haʼu-nia família no maluk dadur-naʼin, sira mak ema neʼebé iha naran diʼak iha apóstolu sira-nia leet no sira sai ona Kristu nia dixípulu kleur liu fali haʼu.

8 Fó haʼu-nia kumprimentus ba Ampliato, ida neʼebé haʼu hadomi iha Naʼi. 9 Kumprimentus ba Urbano ita-nia maluk serbisu-naʼin iha Kristu, no ba Estaki neʼebé haʼu hadomi. 10 Kumprimentus ba Apeles, ida neʼebé laran-metin iha Kristu. Kumprimentus ba sira hotu neʼebé iha Aristóbulo nia umakain. 11 Kumprimentus ba Herodiaun haʼu-nia família. Kumprimentus ba sira husi Narsijo nia umakain neʼebé laʼo tuir Naʼi. 12 Kumprimentus ba Trifena no Trifosa, feto sira-neʼe serbisu makaʼas iha Naʼi. Kumprimentus ba Pérsike neʼebé ita hadomi, tanba feto neʼe halo serbisu barak iha Naʼi. 13 Kumprimentus ba Rufo neʼebé Naʼi hili, no ba ninia inan neʼebé haʼu mós haree nuʼudar inan. 14 Kumprimentus ba Asínkrito, Flegon, Hermes, Pátrobas, Hermas, no mós maun-alin sira neʼebé hamutuk ho sira. 15 Kumprimentus ba Filologo no Júlia, Nereu no ninia feton, no Olimpas, no mós santu hotu neʼebé hamutuk ho sira. 16 Kumprimenta malu ho reʼi nuʼudar maun-alin. Kristu nia kongregasaun hotu fó kumprimentus ba imi.

17 Agora haʼu husu imi maun-alin sira, kuidadu bá ho sira neʼebé halo ema haketak malu no halo ema sidi. Ida-neʼe kontra buat neʼebé imi aprende ona. Imi tenke hadook an husi sira. 18 Tanba ema sira hanesan neʼe laʼós atan ba ita Naʼi Kristu, maibé atan ba sira-nia hakarak rasik; no liuhusi liafuan midar no liafuan gaba nian mak sira lohi ema neʼebé la hatene buat aat. 19 Basá ema hotu haree ona imi-nia laran-metin, tan neʼe haʼu sente haksolok kona-ba imi. Maibé haʼu hakarak imi atu sai matenek kona-ba buat neʼebé diʼak, no beik kona-ba buat neʼebé aat. 20 No lakleur tan, Maromak neʼebé fó dame sei harahun Satanás iha imi-nia ain okos. Haʼu harohan katak ita Naʼi Jesus nia laran-diʼak neʼebé boot hela ho imi.

21 Timóteo haʼu-nia maluk serbisu-naʼin fó kumprimentus ba imi, nuneʼe mós ho Lúsio, Jason, Sosípatro haʼu-nia família.

22 Haʼu, Térsio, fó kumprimentus ba imi iha Naʼi. Haʼu mak ida neʼebé hakerek karta neʼe nuʼudar Paulo fó sai ba haʼu.

23 Gaio haʼu-nia uma-naʼin no kongregasaun hotu kumprimenta imi. Erasto ida neʼebé tau matan ba sidade nia osan no mós ninia alin* Kuartus fó kumprimentus ba imi. 24 ——*

25 No Maromak bele halo imi hamriik metin hodi tuir liafuan diʼak neʼebé haʼu fó sai, katak mensajen kona-ba Jesus Kristu. Liafuan diʼak neʼe liga ho segredu santu neʼebé Maromak hatudu sai ona. Segredu neʼe subar hela ba tempu kleur 26 maibé agora segredu neʼe hatudu sai ona ba ema. No liuhusi profeta nia liafuan, nasaun hotu aprende kona-ba segredu neʼe. Ida-neʼe tuir mandamentu husi Maromak neʼebé moris ba nafatin. Ninia hakarak mak atu nasaun hotu fiar ba nia no halo tuir nia. 27 Liuhusi Jesus Kristu, fó glória nafatin ba Maromak, neʼebé mesak deʼit mak matenek. Amen.

[Nota–rodapé]