1 Korinto

1 Husi Paulo, ida neʼebé Jesus Kristu bolu ona atu sai ninia apóstolu liuhusi Maromak nia hakarak, hamutuk ho ita-nia maluk Sóstenes; 2 ami haruka karta neʼe ba Maromak nia kongregasaun neʼebé iha Korinto, hamutuk ho sira hotu neʼebé iha fatin oioin neʼebé bolu ita Naʼi Jesus Kristu nia naran; nia mak sira-nia Naʼi no ita-nian. Maromak haketak ona imi atu sai ida deʼit ho Kristu Jesus no nia bolu imi atu sai nuʼudar ema santu:

3 Haʼu harohan katak ita-nia Aman Maromak no Naʼi Jesus Kristu sei hatudu laran-diʼak boot ba imi no haraik dame ba imi.

4 Haʼu sempre fó obrigadu ba Maromak kona-ba imi tanba Maromak hatudu ninia laran-diʼak neʼebé boot ba imi iha Kristu Jesus; 5 basá imi simu ona buat hotu iha nia, neʼe inklui kbiit boot atu koʼalia no matenek neʼebé kompletu, 6 no mós lia-sasin kona-ba Kristu harii metin ona iha imi-nia leet; 7 tan ida-neʼe mak imi la kuran buat ida nuʼudar imi hein namanas ba tempu neʼebé ita Naʼi Jesus Kristu sei hatudu sai ninia kbiit. 8 Maromak mós sei halo imi metin toʼo rohan, atu nuneʼe la iha ema ida sei iha razaun atu duun imi iha ita Naʼi Jesus Kristu nia loron. 9 Maromak mak laran-metin no nia bolu ona imi atu sai ida deʼit ho nia Oan Jesus Kristu ita Naʼi.

10 Maun-alin sira, agora haʼu husu imi liuhusi ita Naʼi Jesus Kristu nia naran atu imi hotu tenke sai laran ida deʼit iha imi-nia koʼalia, no labele haketak malu iha imi-nia leet, maibé imi tenke sai ida deʼit iha imi-nia neon no iha hanoin neʼebé hanesan. 11 Basá ema balu husi Kloe nia umakain fó-hatene haʼu kona-ba imi, haʼu-nia maun-alin sira, katak imi diskute malu. 12 Haʼu koʼalia nuneʼe tanba imi ida-idak dehan: “Haʼu Paulo nian”, “Haʼu Apolo nian”, “Haʼu Cefas nian”, ka “Haʼu Kristu nian”. 13 Se ida-neʼe loos, neʼe katak Kristu fahe an ona, loos ka lae? Maibé, ema hedi Paulo ba imi ka? No imi hetan batizmu iha Paulo nia naran ka? 14 Haʼu agradese ba Maromak katak haʼu la fó batizmu ba imi ida só deʼit Krispo no Gaio, 15 atu nuneʼe la iha ema ida bele dehan katak imi hetan batizmu iha haʼu-nia naran. 16 Liután neʼe, haʼu mós fó batizmu ba Estéfanas nia umakain. Maibé, kona-ba sira seluk, haʼu la hatene se haʼu fó batizmu ba ema ruma tan ka lae. 17 Tanba Kristu haruka haʼu bá, laʼós atu fó batizmu, maibé atu haklaken liafuan diʼak, no laʼós ho liafuan ema matenek nian, atu nuneʼe Kristu nia ai-riin terus nian la sai folin-laek.

18 Basá mensajen kona-ba ai-riin terus nian mak buat beik ba ema sira neʼebé atu lakon, maibé ba ita neʼebé hetan daudaun salvasaun, neʼe mak Maromak nia kbiit. 19 Tanba hakerek nanis ona: “Haʼu sei halo lakon matenek husi ema matenek sira, no ema matenek nia hanoin haʼu sei la simu.” 20 Ema matenek sira iha mundu neʼe iha neʼebé? Eskriba sira iha neʼebé? Ema neʼebé gosta haksesuk malu iha mundu neʼe iha neʼebé? Maromak halo matenek mundu neʼe nian sai buat beik, loos ka lae? 21 Mundu fiar ba ninia matenek rasik no tan neʼe la hatene Maromak. Maibé hodi tuir Maromak nia matenek, nia haree katak diʼak atu salva sira neʼebé fiar, no nia halo neʼe liuhusi mensajen neʼebé ita haklaken neʼebé ema seluk haree nuʼudar buat beik.

22 Tanba ema judeu buka sinál no ema gregu buka matenek; 23 maibé ita haklaken kona-ba Kristu nia mate iha ai-riin, no ida-neʼe sai fatuk sidi nian ba ema judeu no sai nuʼudar buat beik ba ema husi nasaun seluk; 24 maibé, ba ema judeu no gregu neʼebé Maromak bolu ona, sira haree Kristu nuʼudar Maromak nia kbiit no matenek Maromak nian. 25 Tanba buat neʼebé beik husi Maromak, neʼe matenek liu fali ema. No buat neʼebé fraku husi Maromak, neʼe iha kbiit liu fali ema.

26 Basá maun-alin sira, imi rasik bele haree iha imi-nia leet ema neʼebé Maromak hili ona, katak Maromak la hili ema barak neʼebé iha matenek tuir ema nia haree, no la hili ema barak neʼebé iha kbiit, no la hili mós ema barak neʼebé iha raan liurai nian; 27 maibé Maromak hili buat beik husi mundu neʼe, atu hamoe ema matenek sira; no Maromak hili buat fraku husi mundu neʼe, atu hamoe buat sira neʼebé kbiit boot; 28 no Maromak hili buat neʼebé ema haree nuʼudar folin-laek no buat neʼebé ema hakribi, buat neʼebé la iha, atu nia bele halakon tiha buat sira neʼebé iha, 29 hodi nuneʼe la iha ema ida bele foti an iha Maromak nia oin. 30 Maibé tanba Maromak mak imi sai ida deʼit ho Kristu Jesus. Kristu hatudu sai ona Maromak nia matenek no Maromak nia hahalok loos. Liuhusi Jesus mak ema bele sai santu, no liuhusi ninia mate atu sosa fali ita mak ita bele sai livre. 31 Tan neʼe, hanesan hakerek nanis ona: “Ema neʼebé gaba an, nia tenke gaba an iha Jeová.”

2 No maun-alin sira, uluk kuandu haʼu toʼo ba imi, haʼu fó sai Maromak nia segredu santu ba imi hodi la uza liafuan aas ka hatudu matenek. 2 Basá, kuandu haʼu iha imi-nia leet, haʼu deside atu la hanoin kona-ba buat seluk só deʼit kona-ba Jesus Kristu no ninia mate iha ai-riin. 3 No kuandu haʼu toʼo ba imi, haʼu sente taʼuk, fraku, no laran-nakdedar tebes; 4 no haʼu-nia koʼalia no buat neʼebé haʼu haklaken laʼós atu dada imi ho liafuan matenek husi ema maibé ho espíritu no kbiit, 5 atu nuneʼe imi sei la fiar ba ema nia matenek, maibé ba Maromak nia kbiit.

6 No agora ita koʼalia kona-ba matenek ba sira neʼebé boot ona,* maibé laʼós kona-ba matenek mundu neʼe nian ka matenek husi ukun-naʼin mundu neʼe nian neʼebé sei lakon. 7 Maibé ita koʼalia kona-ba Maromak nia matenek neʼebé iha segredu santu ida, katak matenek neʼebé subar hela, ida neʼebé Maromak deside nanis ona ba ita-nia glória antes mundu aat neʼe iha. 8 La iha ukun-naʼin ida iha mundu aat neʼe mak hatene matenek neʼe, tanba se sira hatene, karik sira la hedi Naʼi neʼebé kmanek boot. 9 Basá hanesan hakerek nanis ona: “Matan seidauk haree no tilun seidauk rona, no nunka mosu iha ema ida nia hanoin kona-ba buat neʼebé Maromak prepara ona ba sira neʼebé hadomi nia.” 10 Tanba Maromak hatudu sai ona neʼe ba ita liuhusi ninia espíritu, basá espíritu neʼe buka didiʼak buat hotu, neʼe inklui mós buat kleʼan husi Maromak.

11 La iha ema ida neʼebé hatene ema seluk nia hanoin, só deʼit ema neʼe rasik* mak hatene buat neʼebé iha ninia laran. Nuneʼe mós la iha ema ida mak hatene buat neʼebé husi Maromak, só deʼit Maromak nia espíritu mak hatudu sai sira-neʼe. 12 No agora ita simu ona espíritu neʼebé husi Maromak, laʼós espíritu mundu neʼe nian, atu nuneʼe ita bele hatene buat sira neʼebé Maromak haraik ona mai ita ho laran-diʼak. 13 Ita mós koʼalia buat sira-neʼe, laʼós ho liafuan husi ema nia matenek, maibé ho liafuan neʼebé ita aprende husi Maromak nia espíritu. No ita uza liafuan neʼebé ita simu husi espíritu hodi esplika kona-ba buat neʼebé Maromak nian.

14 Maibé ema neʼebé moris tuir deʼit hakarak isin nian la simu buat neʼebé mai husi Maromak nia espíritu, tanba nia haree buat sira-neʼe hanesan buat neʼebé beik; no nia la hatene buat neʼebé Maromak nian tanba ema bele buka-hatene buat sira-neʼe só deʼit ho ajuda husi espíritu santu. 15 Maibé, ema neʼebé moris tuir espíritu santu buka-hatene didiʼak buat hotu, no ema ida la iha kbiit atu bele tesi lia ba nia. 16 Basá “sé mak hatene ona Jeová nia hanoin atu bele hanorin nia?” Maibé ita iha Kristu nia hanoin.

3 Tan neʼe maun-alin sira, haʼu la bele koʼalia ba imi nuʼudar ema neʼebé moris tuir espíritu, maibé nuʼudar ema neʼebé hanoin tuir isin nian, hanesan labarik kiʼik iha Kristu. 2 Haʼu fó susu-been ba imi, laʼós ai-han neʼebé toos, basá imi seidauk prontu atu han. Tuir loloos, toʼo agora mós imi seidauk bele han, 3 basá imi sei iha hanoin isin nian. Tanba iha imi-nia leet imi laran-moras ba malu no istori malu, neʼe katak imi moris hanesan ema iha mundu neʼe, loos ka lae? 4 Basá kuandu imi dehan: “Haʼu Paulo nian”, maibé seluk dehan: “Haʼu Apolo nian”, neʼe katak imi hanesan deʼit ho ema iha mundu neʼe, loos ka lae?

5 Entaun, sé mak Apolo? No sé mak Paulo? Tuir loloos, sira mak atan hodi halo serbisu neʼebé Naʼi fó ba ita, no liuhusi sira mak imi sai fiar-naʼin. 6 Haʼu kuda, Apolo rega, maibé Maromak mak halo moris; 7 neʼe duni laʼós ema neʼebé kuda ka ema neʼebé rega mak simu hahiʼi, basá Maromak mak ida neʼebé halo moris. 8 No ida neʼebé kuda no mós ida neʼebé rega halo serbisu hanesan, maibé ema ida-idak sei simu nia kolen tuir ninia serbisu rasik. 9 Basá ita mak Maromak nia maluk serbisu-naʼin. Imi mak Maromak nia toʼos neʼebé nia kuda daudaun, no imi mak uma neʼebé Maromak harii.

10 Maromak hatudu ona laran-diʼak neʼebé boot mai haʼu, no hanesan badain neʼebé matenek, haʼu harii uma nia hun, maibé ema seluk mak harii iha uma hun neʼe nia leten. No ema ida-idak tenke haree didiʼak kona-ba oinsá mak nia harii iha uma hun neʼe nia leten. 11 Tanba ema ida la bele harii uma hun seluk hodi troka fali ida neʼebé harii tiha ona, neʼe mak Jesus Kristu. 12 No se ema ida harii iha uma hun neʼe nia leten hodi uza osan-mean, osan-mutin, fatuk-murak, ai, ka duʼut oioin, 13 tempu sei toʼo mai atu koko ninia serbisu neʼe, no ahi sei hatudu sai ema ida-idak nia serbisu; basá ahi rasik sei fó sai kona-ba ema sira-neʼe harii husi saida. 14 Se ahi la han buat neʼebé ema ida harii iha uma hun, nia sei simu kolen; 15 no se ahi han tiha buat neʼebé ema harii, nia sei lakon buat barak, maibé nia rasik sei hetan salvasaun; no nia sai hanesan ema ida neʼebé salva husi ahi.

16 Imi hatene ka lae katak imi mak Maromak nia templu no Maromak nia espíritu hela iha imi? 17 Se ema ida halakon Maromak nia templu, Maromak sei halakon ema neʼe; tanba Maromak nia templu mak santu, no imi mak templu neʼe.

18 Keta lohi imi-nia an rasik: Se ema ruma iha imi-nia leet hanoin katak nia matenek tuir mundu nia hanoin, nia presiza sai beik, atu nuneʼe nia bele sai matenek. 19 Tanba matenek mundu neʼe nian mak buat beik ba Maromak; basá hakerek nanis ona: “Nia husik ema matenek sira monu ba sira-nia lasu rasik neʼebé matenek.” 20 No dala ida tan: “Jeová hatene katak ema matenek nia hanoin mak la iha folin.” 21 Tan neʼe, imi keta gaba an kona-ba buat neʼebé ema halo; tanba buat hotu mak imi-nian. 22 Maski Paulo ka Apolo ka Cefas ka mundu neʼe ka moris ka mate ka buat neʼebé iha neʼe ka buat neʼebé atu mai, buat hotu mak imi-nian; 23 no mós imi mak Kristu nian; no Kristu mak Maromak nian.

4 Ami hakarak atu ema haree ami nuʼudar atan neʼebé serbisu iha Kristu nia okos no nuʼudar atan* neʼebé tau matan ba Maromak nia segredu santu. 2 Liután neʼe, ema neʼebé sai nuʼudar atan, nia tenke laran-metin. 3 No se haʼu hetan tesi-lia husi imi ka husi ema nia tribunál, neʼe la iha folin ba haʼu. Tuir loloos, haʼu mós la tesi lia ba haʼu-nia an rasik. 4 Tanba haʼu-nia laran moos kona-ba buat hotu. Maibé neʼe la dehan katak haʼu ema loos ona, tanba ida neʼebé tesi lia ba haʼu mak Maromak Jeová. 5 Tan neʼe, keta tesi lia ba buat ida antes ninia tempu, katak toʼo Naʼi mai. Naʼi sei hatudu sai iha naroman buat neʼebé subar iha nakukun laran no sei hatudu sai ema ida-idak nia hanoin neʼebé iha sira-nia laran, no tuirmai ema ida-idak sei simu gaba husi Maromak tuir buat neʼebé nia merese.

6 Maun-alin sira, haʼu koʼalia buat sira-neʼe kona-ba haʼu-nia an rasik no kona-ba Apolo nuʼudar ezemplu ba imi-nia diʼak, atu nuneʼe imi bele aprende lei tuirmai neʼe: “Imi keta halo liu fali buat neʼebé hakerek tiha ona”, hodi nuneʼe imi labele sai nakonu ho foti-an no haree ema ida diʼak liu ema seluk. 7 Basá sé mak halo imi la hanesan ema seluk? Loloos, buat hotu neʼebé imi iha ona, imi simu neʼe husi Maromak, loos ka lae? Se imi simu ida-neʼe husi Maromak, tansá mak imi gaba an hanesan imi simu ida-neʼe ho imi-nia kbiit rasik?

8 Imi bosu ona ka? Imi riku ona ka? Imi ukun ona nuʼudar liurai maski la ho ami ka? Haʼu hakarak tebes katak imi hahú ukun ona nuʼudar liurai atu nuneʼe ami mós bele ukun hamutuk ho imi nuʼudar liurai. 9 Basá haʼu sente katak Maromak halo ona ami apóstolu sira sai hanesan grupu ikus neʼebé tama ba estádiu atu ema hotu bele haree, nuʼudar ema neʼebé atu simu kastigu-mate. Mundu tomak no anju sira no mós ema hateke ba ami. 10 Ami sai beik tanba Kristu, maibé imi matenek iha Kristu; ami fraku, maibé imi iha kbiit; imi simu glória, maibé ami hetan moe. 11 Toʼo oras neʼe ami kontinua hamlaha no hamrook no ladún iha hatais* no ema halo aat ba ami no ami la iha uma 12 no ami serbisu makaʼas ho ami-nia liman rasik. Kuandu ema koʼalia aat ami, ami husu bensaun ba sira; kuandu ema fó-terus ba ami, ami tahan ho pasiénsia; 13 kuandu ema koʼalia bosok kona-ba ami, ami hatán ho laran-maus; toʼo agora ami sai ona hanesan buat foʼer ba mundu neʼe, no nuʼudar buat hotu nia foʼer.

14 Haʼu hakerek buat sira-neʼe, laʼós atu hamoe imi, maibé atu hanorin imi nuʼudar haʼu-nia oan doben sira. 15 Tanba maski imi iha mestre naʼin-10.000 iha Kristu, maibé loloos imi ladún iha aman barak; basá iha Kristu Jesus haʼu sai ona nuʼudar imi-nia aman liuhusi liafuan diʼak. 16 Entaun haʼu husu imi atu banati-tuir haʼu. 17 Tan neʼe mak haʼu haruka Timóteo ba imi, tanba nia mak ida neʼebé haʼu hadomi no oan neʼebé laran-metin iha Naʼi; no nia sei halo imi hatene haʼu-nia dalan sira kona-ba Kristu Jesus, hanesan haʼu hanorin ona iha fatin oioin iha kongregasaun hotu.

18 Ema balu husi imi hanoin katak haʼu sei la bá toʼo imi, no tan neʼe sira foti an. 19 Maibé lakleur tan haʼu sei toʼo ba imi se neʼe Jeová nia hakarak, no haʼu lakohi atu hatene ema foti-an nia koʼalia, maibé haʼu hakarak atu hatene sira-nia kbiit.* 20 Tanba Maromak nia Ukun hatudu nia an laʼós ho liafuan, maibé ho kbiit. 21 Entaun saida mak imi hakarak? Imi hakarak haʼu toʼo ba imi ho ai-dona, ka ho domin no laran-maus?

5 Tuir loloos, haʼu rona ona katak iha mane ida iha imi-nia leet neʼebé halo sala-foʼer* hodi moris hamutuk fali ho ninia aman nia feen. No sala-foʼer hanesan neʼe seidauk mosu iha nasaun seluk nia leet. 2 No imi foti an kona-ba neʼe ka? Tuir loloos, imi tenke tanis no hasai tiha ema neʼebé halo hahalok aat neʼe husi imi-nia leet. 3 Maski haʼu la iha neʼebá iha isin, maibé haʼu iha neʼebá iha laran* no haʼu tesi lia ona ba mane neʼebé halo sala neʼe hanesan haʼu iha neʼebá ho imi. 4 Neʼe duni, kuandu imi halibur hamutuk, haʼu-nia laran no mós Naʼi Jesus nia kbiit hamutuk ho imi. Tan neʼe iha Naʼi Jesus nia naran 5 imi tenke entrega mane hanesan neʼe ba Satanás atu halakon buat isin nian neʼebé iha imi leet, hodi nuneʼe, iha Naʼi nia loron, kongregasaun bele nafatin iha hanoin* neʼebé loos kona-ba hahalok sala.

6 Imi-nia razaun atu foti an mak la loos. Imi la hatene katak fermentu uitoan bele halo masa tomak saʼe ka? 7 Hamoos tiha fermentu tuan nian, atu nuneʼe imi bele sai masa foun, tanba tuir loloos imi livre ona husi fermentu. Basá Kristu neʼebé nuʼudar bibi-oan ba festa salvasaun nian, mate tiha ona nuʼudar sakrifísiu. 8 Tan neʼe, ita keta halo festa hodi uza fali fermentu neʼebé tuan, no ita mós la uza fermentu neʼebé reprezenta sala no hahalok aat. Maibé, ita tenke han paun neʼebé la iha fermentu, katak hahalok laran-moos no lia-loos.

9 Iha haʼu-nia karta uluk nian haʼu hakerek ba imi atu la ransu tan ho sira neʼebé halo sala-foʼer, 10 maibé neʼe la dehan katak imi tenke hadook an husi ema hotu iha mundu neʼe neʼebé halo sala-foʼer ka ema neʼebé kaan-teen ka naʼok-teen ka adora estátua. Basá se lae karik, imi tenke sai husi mundu neʼe. 11 Maibé agora haʼu hakerek ba imi atu la ransu tan ho ema neʼebé bolu an nuʼudar maun-alin maibé nia halo sala-foʼer, kaan-teen, adora estátua, koʼalia aat ema seluk, lanu-teen, naʼok-teen, imi keta han ho ema sira hanesan neʼe. 12 Tansá mak haʼu tesi lia ba sira neʼebé iha liʼur?* Tuir loloos, imi tenke tesi lia deʼit ba sira neʼebé iha laran, 13 no Maromak mak tesi lia ba sira neʼebé iha liʼur. “Hasai tiha husi imi-nia leet ema neʼebé halo hahalok aat.”

6 Se imi ida iha lia ruma hasoru imi-nia maluk, imi brani atu lori nia ba tribunál husi ema fiar-laek sira-nian duké lori ba santu sira ka? 2 Ka, imi hatene ka lae katak santu sira sei tesi lia ba mundu? No se imi mak sei tesi lia ba mundu, entaun imi iha matenek atu tesi lia ba buat kiʼik, loos ka lae? 3 Imi hatene ka lae katak ita sei tesi lia ba anju sira? Nuneʼe, tansá mak imi mós la bele tesi lia kona-ba moris neʼe nian? 4 Neʼe duni, se imi tesi lia kona-ba problema ruma iha moris neʼe, tansá mak imi hili sira neʼebé kongregasaun la simu atu sai nuʼudar tesi-lia naʼin ba imi? 5 Haʼu koʼalia ida-neʼe atu halo imi moe. Iha imi-nia leet la iha ema matenek ida neʼebé bele tesi lia ba imi ka? 6 Maibé duké halo nuneʼe, imi lori fali imi-nia maun-alin ba tribunál, no tribunál neʼe mak ema fiar-laek nian!

7 Kuandu imi lori imi-nia maun-alin ba tribunál, neʼe katak imi lakon ona. Tansá mak imi la simu deʼit hodi tahan buat neʼebé la justisa? Tansá mak la husik deʼit atu imi mak lakon? 8 Tuir loloos, imi halo sala no lohi ema, no imi halo neʼe ba imi-nia maun-alin rasik.

9 Imi hatene ka lae katak ema aat sei la simu Maromak nia Ukun nuʼudar liman-rohan? Keta husik ema lohi imi. Ema neʼebé halo sala-foʼer, ka adora estátua, ka halo sala-foʼer ho kaben-naʼin, ka mane neʼebé sai hanesan feen ba mane seluk, ka mane neʼebé toba ho mane, 10 ka naʼok-teen, ka kaan-teen, ka lanu-teen, ka koʼalia aat ema seluk, ka lohi ema atu manán osan, sira sei la hetan Maromak nia Ukun nuʼudar liman-rohan. 11 Tuir loloos, imi balu mós uluk halo hanesan neʼe. Maibé agora imi fase moos ona, no sai santu ona, no Maromak haree ona imi nuʼudar ema loos hodi ita Naʼi Jesus Kristu nia naran no hodi ita-nia Maromak nia espíritu.

12 Tuir lei, buat hotu la sala ba haʼu; maibé laʼós buat hotu lori diʼak. Tuir lei, buat hotu la sala ba haʼu; maibé haʼu sei la husik buat naran deʼit atu kontrola haʼu. 13 Ai-han mak ba kabun, no kabun mak ba ai-han; maibé Maromak sei halakon ai-han no kabun. No isin laʼós ba sala-foʼer, maibé ba Naʼi; no Naʼi mak ba isin-lolon. 14 Maibé Maromak mak ida neʼebé fó moris-hiʼas ba Naʼi no nia mós sei fó moris-hiʼas ba ita husi mate liuhusi ninia forsa.

15 Imi hatene ka lae katak imi-nia isin-lolon mak parte husi Kristu? Entaun haʼu bele foti parte husi Kristu nia isin-lolon no tutan fali ba feto-aat nian ka lae? Lae duni! 16 Imi hatene ka lae katak ema neʼebé halo relasaun ho feto-aat, sira sai isin ida deʼit? Basá Maromak dehan: “Sira naʼin-rua sei sai isin ida deʼit.” 17 Maibé ema neʼebé hamutuk ho Naʼi iha hanoin* ida deʼit ho nia. 18 Halai-sees husi sala-foʼer. Kuandu ema halo sala sira seluk, sala neʼe ketak husi ninia isin, maibé ema neʼebé halo sala-foʼer, nia halo sala kontra ninia isin-lolon rasik. 19 Imi hatene ka lae katak imi sai hanesan isin-lolon ida? No isin-lolon neʼe mak templu ba espíritu santu neʼebé iha imi-nia laran, ida neʼebé imi simu husi Maromak. No mós, imi-nia isin-lolon laʼós imi-nian rasik, 20 basá Maromak sosa ona imi ho folin karun. Tan neʼe, uza imi-nia isin-lolon hodi fó hahiʼi ba Maromak.

7 No kona-ba buat sira neʼebé imi hakerek ona ba haʼu: Diʼak ba mane ida atu la kona* feto ida; 2 maibé tanba sala-foʼer sai barak tebes, diʼak atu mane ida-idak iha ninia feen rasik no feto ida-idak iha ninia laʼen rasik. 3 Laʼen tenke fó ba nia feen buat neʼebé nia feen iha direitu atu simu;* no feen mós tenke halo hanesan ba nia laʼen. 4 Feen la ukun nia isin rasik maibé ninia laʼen mak ukun; nuneʼe mós, laʼen la ukun nia isin rasik, maibé ninia feen mak ukun. 5 Keta hanetik imi-nia kaben nia direitu,* só deʼit se imi konkorda ona ba tempu balu, atu imi bele uza tempu hodi harohan, no tuirmai imi bele hamutuk fali, atu nuneʼe Satanás labele kontinua atu tenta imi tanba imi ladún bele kontrola an. 6 Maibé, haʼu koʼalia liafuan sira-neʼe hodi ajuda imi, laʼós nuʼudar ukun-fuan. 7 Tuir loloos, haʼu hakarak atu ema hotu klosan hanesan haʼu. Maski nuneʼe, ema ida-idak simu ninia prezente rasik husi Maromak, ema ida iha dalan neʼe, ida fali iha dalan seluk.

8 Agora haʼu koʼalia ba sira neʼebé la kaben no ba faluk sira, katak diʼak ba sira atu nafatin moris hanesan haʼu. 9 Maibé se sira la bele kontrola an, sira bele kaben, tanba diʼak liu atu kaben duké sai lakan ho hakarak seksuál nian.

10 Ba kaben-naʼin sira, haʼu hatoʼo liafuan sira-neʼe, laʼós husi haʼu maibé husi Naʼi, katak feen labele haketak an husi nia laʼen; 11 maibé se nia haketak an, nia tenke hela mesak nafatin ka hadame malu fali ho nia laʼen; no laʼen ida labele husik nia feen.

12 Maibé ba sira seluk haʼu dehan, sin husi haʼu, laʼós husi Naʼi: Se maun-alin ida iha feen neʼebé laʼós fiar-naʼin, maibé nia feen kontente atu nafatin moris ho nia, nia labele husik ninia feen; 13 no se feto ida iha laʼen neʼebé laʼós fiar-naʼin, maibé nia laʼen kontente atu nafatin moris ho nia, nia labele husik nia laʼen. 14 Tanba laʼen neʼebé laʼós fiar-naʼin sai santu tan nia feen, no feen neʼebé laʼós fiar-naʼin sai santu tan nia laʼen neʼebé fiar-naʼin; se lae karik, imi-nia oan sira sei sai nuʼudar buat neʼebé la moos, maibé agora sira santu ona. 15 Maski nuneʼe, se kaben neʼebé laʼós fiar-naʼin hili atu haketak an, husik nia bá. Iha situasaun hanesan neʼe, fiar-naʼin neʼe la presiza atu hela ho nia kaben; Maromak bolu ona imi ba dame. 16 Basá feen sira, oinsá mak imi hatene katak imi sei la salva imi-nia laʼen? Ka, laʼen sira, oinsá mak imi hatene katak imi sei la salva imi-nia feen?

17 Maski nuneʼe, diʼak atu ema ida-idak moris tuir buat neʼebé Jeová fó ona ba nia hodi tuir ninia situasaun kuandu Maromak bolu nia atu sai fiar-naʼin. No tan neʼe mak haʼu fó ukun-fuan neʼe ba kongregasaun sira hotu. 18 Iha mane ruma neʼebé simu ona sirkunsizaun no sai fiar-naʼin ka lae? Diʼak atu nia nafatin moris iha situasaun neʼe. Iha mós mane ruma neʼebé la hetan sirkunsizaun no sai fiar-naʼin ka lae? Diʼak atu nia nafatin moris hanesan neʼe. 19 Tuir loloos, sirkunsizaun la iha folin ida, no la simu sirkunsizaun mós la iha folin ida, maibé halo tuir Maromak nia ukun-fuan sira mak iha folin. 20 Iha situasaun naran deʼit neʼebé Maromak bolu ema ida, diʼak atu nia nafatin moris iha situasaun hanesan neʼe. 21 Se Maromak bolu ó kuandu ó sei sai nuʼudar atan, keta hanoin demais kona-ba ida-neʼe; maibé se ó bele sai livre, kaer metin ba oportunidade neʼe. 22 Basá Naʼi nia dixípulu neʼebé Maromak bolu kuandu nia sei sai hela nuʼudar atan, nia sai livre ona nuʼudar Naʼi ninian; nuneʼe mós ema neʼebé Maromak bolu nuʼudar ema livre, nia sai atan ba Kristu. 23 Maromak sosa imi ho folin neʼebé karun; nuneʼe keta sai tan nuʼudar atan ba ema. 24 Entaun maun-alin sira, iha situasaun naran deʼit neʼebé Maromak bolu imi, diʼak atu nafatin hela iha situasaun hanesan neʼe iha Maromak nia oin.

25 No kona-ba virjen sira, haʼu la iha ukun-fuan husi Naʼi, maibé haʼu fó sai haʼu-nia hanoin nuʼudar ida neʼebé laran-metin tanba Naʼi hatudu ona laran-sadiʼa mai haʼu. 26 Entaun, haʼu hanoin katak diʼak liu atu mane ida kontinua moris hanesan nia moris ona tanba situasaun neʼebé mosu daudaun. 27 Ó kesi metin ba feen ida ka? Para atu buka hodi sai livre. Ó sai livre ona husi feen ida ka? Para atu buka feen. 28 Maibé se ó atu kaben karik, ó la halo sala ida. No se ema virjen ida atu kaben, nia la halo sala ida. Maibé, sira neʼebé kaben sei hetan susar iha sira-nia isin. No haʼu lakohi atu imi hasoru susar hanesan neʼe.

29 Liután neʼe, haʼu dehan ida-neʼe ba imi maun-alin sira, katak tempu badak liu ona. Hahú husi ohin ba oin, diʼak atu sira neʼebé iha feen moris hanesan sira laiha feen, 30 no mós sira neʼebé tanis moris hanesan sira neʼebé la tanis; no sira neʼebé haksolok moris hanesan sira neʼebé la haksolok, no sira neʼebé sosa sasán moris hanesan sira neʼebé la iha sasán, 31 no sira neʼebé uza mundu neʼe moris hanesan sira neʼebé la uza hotu mundu neʼe; basá situasaun iha mundu neʼe troka daudaun. 32 Tuir loloos, haʼu hakarak atu imi livre husi laran-susar. Ema neʼebé la kaben hanoin liu kona-ba buat neʼebé Naʼi ninian, kona-ba oinsá Naʼi bele simu nia. 33 Maibé ema neʼebé kaben ona hanoin resin kona-ba buat mundu neʼe nian, kona-ba oinsá atu halo ninia feen kontente, 34 no ninia hanoin fahe ba rua. Liután neʼe, ba feto neʼebé la kaben no feto virjen, nia hanoin liu kona-ba buat neʼebé Naʼi ninian, atu nuneʼe nia bele sai santu iha isin no hanoin. Maibé, feto neʼebé kaben hanoin resin kona-ba buat mundu neʼe nian, kona-ba oinsá atu halo ninia laʼen kontente. 35 Haʼu koʼalia neʼe ba imi hodi ajuda imi, no laʼós atu kesi metin imi, maibé hodi book imi atu halo buat neʼebé diʼak no kontinua fó adorasaun deʼit ba Maromak hodi la fahe imi-nia hanoin.

36 Maibé se ema ruma liu ona tempu foin-saʼe nian no nia hanoin katak nia la bele kontrola ninia hakarak seksuál nian, entaun ida-neʼe mak nia tenke halo: nia bele kaben se neʼe mak ninia hakarak; nia la halo sala ida. 37 Maibé se ema ida deside ona iha nia laran no kaer metin ba ninia desizaun neʼe, no sente katak nia la presiza kaben, no nia iha kbiit atu kontrola ninia hakarak hodi nafatin moris nuʼudar ema neʼebé la kaben, neʼe diʼak ba nia. 38 Tan neʼe, ema neʼebé kaben halo buat diʼak, maibé ema neʼebé la kaben halo diʼak liután.

39 Feen ida kesi metin ba nia laʼen kuandu nia laʼen sei moris hela. Maibé se nia laʼen mate,* nia livre atu kaben fali ho ema neʼebé nia hakarak, naran katak iha Naʼi. 40 Maibé tuir haʼu-nia hanoin, nia sei kontente liu se nia la kaben fali. No haʼu hanoin duni katak haʼu mós iha Maromak nia espíritu.

8 No kona-ba ai-han neʼebé hasaʼe ona ba estátua: ita hatene katak ita hotu iha matenek kona-ba neʼe. Matenek halo ema foti an, maibé domin harii. 2 Maski ema ida hanoin katak nia hetan ona matenek kona-ba buat ruma, maibé loloos nia seidauk hatene buat hotu kona-ba neʼe. 3 Maibé se ema ida hadomi Maromak, nia hatene ona kona-ba nia.

4 No kona-ba han ai-han neʼebé hasaʼe ona ba estátua, ita hatene katak estátua la iha folin ida, no la iha maromak seluk maibé iha Maromak ida deʼit. 5 Iha buat barak neʼebé ema bolu nuʼudar “maromak sira” iha lalehan ka iha rai, no maski loos katak iha “maromak” barak no “naʼi” barak, 6 maibé ba ita, iha Maromak loos ida deʼit no nia mak Aman, no husi nia mak buat hotu iha no ita moris ba nia; no iha Naʼi ida deʼit, Jesus Kristu, no buat hotu liuhusi nia, no ita moris liuhusi nia.

7 Maski nuneʼe, laʼós ema hotu hatene kona-ba neʼe. No ba ema balu neʼebé uluk adora estátua, toʼo agora sira hanoin hela kona-ba ai-han balu nuʼudar buat neʼebé hasaʼe ona ba estátua, no tan neʼe se sira han ida-neʼe, sira hafoʼer sira-nia laran* neʼebé fraku. 8 Maibé ai-han sei la halo ita hakbesik liu ba Maromak; se ita la han, ita la lakon buat ida, no, se ita han, ita la manán buat ida. 9 Maibé kontinua matan-moris atu nuneʼe imi-nia direitu atu hili la sai fali nuʼudar fatuk sidi nian ba sira neʼebé fraku. 10 Entaun, oinsá se ema ida haree ó neʼebé iha matenek tuur atu han iha templu estátua nian? Ó-nia hahalok neʼe bele book ema fraku nia laran atu nia sai brani hodi han ai-han neʼebé hasaʼe tiha ba estátua, loos ka lae? 11 Tuir loloos, liuhusi ó-nia matenek mak ó hakanek ema neʼebé fraku, katak ó-nia maun-alin neʼebé Kristu mate ba nia. 12 Entaun, kuandu imi halo sala hasoru imi-nia maun-alin no hakanek sira-nia laran neʼebé fraku, imi halo sala hasoru Kristu. 13 Tan neʼe, se ai-han halo haʼu-nia maun-alin sidi, haʼu sei la han tan naʼan, atu nuneʼe haʼu sei la halo haʼu-nia maun-alin sidi.

9 Haʼu laʼós ema livre ka? Haʼu laʼós apóstolu ida ka? Haʼu seidauk haree ita Naʼi Jesus ka? Laʼós imi mak haʼu-nia serbisu iha Naʼi ka? 2 No se haʼu laʼós apóstolu ba ema seluk, haʼu apóstolu duni ba imi, basá imi sai ona nuʼudar sinál neʼebé hatudu katak haʼu mak Naʼi nia apóstolu.

3 Ba sira neʼebé tesi lia ba haʼu, haʼu hatán nuneʼe: 4 Ami iha direitu atu han no hemu, loos ka lae? 5 No hanesan ho apóstolu seluk no Naʼi nia alin sira no Cefas, ami mós iha direitu atu kaben ho feto neʼebé fiar-naʼin no lori hamutuk ho ami, loos ka lae? 6 Imi hanoin katak haʼu no Barnabé deʼit mak la iha direitu hodi la halo tan serbisu atu buka moris ka? 7 Sé mak sai nuʼudar tropa hodi uza nia osan rasik? Sé mak kuda toʼos uvas nian no la han nia fuan? Ka sé mak sai nuʼudar bibi-atan no la hemu bibi nia susu-been balu?

8 Haʼu la koʼalia buat sira-neʼe tuir deʼit ema nia hanoin, maibé Ukun-Fuan mós dehan kona-ba buat sira-neʼe, loos ka lae? 9 Basá ukun-fuan Moisés nian dehan: “Ó keta taka netik karau-aman nia ibun kuandu nia sama hela trigu fulin.” Ida-neʼe katak Maromak hanoin deʼit kona-ba karau-aman ka? 10 Ka nia dehan nuneʼe ba ita-nia diʼak? Tuir loloos, Moisés hakerek ba ita-nia diʼak, tanba ema neʼebé fila rai no ema neʼebé haketak fini husi nia kain, sira halo ida-neʼe ho esperansa atu bele han fini balu.

11 Se ami kuda ona iha imi-nia leet buat sira neʼebé mai husi Maromak, tansá mak la diʼak se ami koʼa fali buat isin nian husi imi? 12 Se ema seluk iha direitu atu simu buat ruma husi imi, ami iha direitu liután, loos ka lae? Maski nuneʼe, ami la aproveita direitu neʼe, maibé ami tahan buat hotu, atu nuneʼe la iha buat ruma husi ami neʼebé bele hanetik liafuan diʼak kona-ba Kristu. 13 Imi hatene ka lae katak mane sira neʼebé halo knaar santu, sira mós han buat neʼebé iha templu? No sira neʼebé halaʼo knaar iha altár simu parte balu husi altár, loos ka lae? 14 Iha dalan hanesan neʼe mós, Naʼi haruka katak sira neʼebé fó sai liafuan diʼak tenke moris husi liafuan diʼak neʼe.

15 Maibé haʼu la aproveita buat sira-neʼe. Tuir loloos, haʼu hakerek ida-neʼe laʼós atu obriga imi hodi halo buat sira-neʼe ba haʼu, tanba diʼak liu se haʼu mate deʼit duké husik ema halakon haʼu-nia razaun atu gaba an. 16 Se haʼu fó sai liafuan diʼak, neʼe laʼós razaun ba haʼu atu gaba an, basá haʼu tenke halo ida-neʼe. Tuir loloos, se haʼu la fó sai liafuan diʼak neʼe, susar boot mai haʼu! 17 Se haʼu halo ida-neʼe ho laran-kontente, haʼu sei hetan kolen; maibé se haʼu halo ida-neʼe ho laran-todan, maski nuneʼe haʼu halo serbisu neʼebé Naʼi fó tiha ona mai haʼu. 18 Entaun, haʼu-nia kolen mak saida? Katak bainhira haʼu fó sai liafuan diʼak, haʼu fó sai ida-neʼe la hodi hetan osan, atu nuneʼe haʼu labele uza sala haʼu-nia direitu nuʼudar haklaken-naʼin kona-ba liafuan diʼak.

19 Maski haʼu livre husi ema hotu, maibé haʼu halo haʼu-nia an nuʼudar atan ba ema hotu, atu nuneʼe haʼu bele manán ema barak liu. 20 Entaun, ba ema judeu haʼu sai hanesan ema judeu, atu nuneʼe haʼu bele manán ema judeu; no ba sira neʼebé iha ukun-fuan nia okos haʼu sai hanesan ema neʼebé iha ukun-fuan nia okos, maski haʼu laʼós iha ukun-fuan nia okos, atu nuneʼe haʼu bele manán sira neʼebé iha ukun-fuan nia okos. 21 Ba sira neʼebé la iha ukun-fuan, haʼu mós sai hanesan ema neʼebé la iha ukun-fuan, maski ba Maromak haʼu iha ukun-fuan no haʼu iha Kristu nia ukun-fuan nia okos, atu nuneʼe, haʼu bele manán sira neʼebé la iha ukun-fuan. 22 Ba sira neʼebé fraku haʼu mós sai fraku, atu nuneʼe haʼu bele manán ema neʼebé fraku. Haʼu sai tiha buat hotu ba ema oioin, atu nuneʼe bele salva sira balu. 23 Haʼu halo tiha buat hotu tan liafuan diʼak, atu nuneʼe haʼu mós bele fahe ida-neʼe ba ema seluk.

24 Imi hatene katak sira neʼebé halai-taru, sira hotu halai atu manán, maibé ida deʼit mak simu prémiu, loos ka lae? Halai bá atu imi bele manán. 25 Liután neʼe, ema hotu neʼebé hola parte atu halai-taru, sira kontrola an iha buat hotu. No loloos sira halo ida-neʼe atu sira bele hetan koroa neʼebé bele mohu, maibé ita simu koroa neʼebé la bele mohu. 26 Tan neʼe, haʼu halai laʼós hanesan ema neʼebé la hatene atu bá neʼebé; haʼu tuku laʼós hanesan tuku anin deʼit; 27 haʼu kontrola* haʼu-nia isin-lolon no ukun nia hanesan atan, atu nuneʼe, kuandu haʼu haklaken tiha ba ema seluk, haʼu rasik la sai fali ema neʼebé Maromak la simu.

10 No haʼu hakarak imi, maun-alin sira, atu hatene katak ita-nia beiʼala sira hotu laʼo iha kalohan nia okos no sira hotu laʼo liuhusi tasi, 2 no sira hotu simu batizmu iha Moisés liuhusi kalohan no tasi; 3 no Maromak fó ba sira hotu ai-han neʼebé hanesan atu sira han 4 no Maromak fó ba sira hotu bee neʼebé hanesan atu sira hemu. Sira hemu bee husi fatuk-boot neʼebé laʼo tuir sira. No fatuk neʼe reprezenta Kristu. 5 Maski nuneʼe, Maromak la simu sira barak, tanba Maromak oho sira iha rai-fuik.

6 No buat sira-neʼe sai nuʼudar ezemplu ba ita, atu ita labele kaan buat neʼebé aat, hanesan sira kaan. 7 Keta adora estátua, hanesan sira balu halo; nuʼudar hakerek nanis ona: “Povu sira tuur atu han no hemu, no sira hamriik hodi haksolok boot.” 8 Keta halo sala-foʼer, hanesan sira balu halo sala-foʼer, no iha loron ida deʼit ema naʼin-23.000 mate. 9 Ita mós keta koko Jeová, hanesan sira balu neʼebé koko nia, no sira mate tanba samea. 10 Keta muramura hanesan sira balu muramura, no sira mate tanba anju oho sira. 11 Buat sira neʼebé mosu ba sira mak sai nuʼudar ezemplu ba ita, no neʼe hakerek nuʼudar avizu ba ita neʼebé moris iha mundu neʼe nia rohan.

12 Tan neʼe, ema neʼebé hanoin katak nia hamriik, kuidadu bá atu nia la monu. 13 Imi hetan tentasaun neʼebé baibain ema seluk mós hetan. Maibé Maromak mak laran-metin, no nia sei nunka husik imi atu hetan tentasaun liu fali buat neʼebé imi bele tahan, maibé kuandu imi hasoru tentasaun neʼe nia mós sei hatudu dalan ba imi atu sai, atu nuneʼe imi bele tahan nia.

14 Tan neʼe, maluk doben sira, halai husi adora estátua. 15 Haʼu koʼalia ba imi hanesan ema neʼebé iha kbiit atu hanoin; entaun deside ba imi-nia an rasik se buat neʼebé haʼu dehan mak loos ka lae. 16 Ita hatoʼo agradese ba Maromak kona-ba kopu tua-uvas nian no ida-neʼe reprezenta Kristu nia raan, loos ka lae? No paun neʼebé ita silu reprezenta Kristu nia isin, loos ka lae? 17 Iha paun ida deʼit, entaun maski ita barak, maibé ita isin ida deʼit, basá ita han paun ida deʼit.

18 Haree ba Izraél tuir isin nian: Kuandu sira han sakrifísiu, sira hola parte iha altár, loos ka lae? 19 Entaun, ida-neʼe katak sá? Neʼe katak buat neʼebé ema hasaʼe ba estátua mak iha folin ka? Ka estátua sira mak iha folin? 20 Lae; maibé haʼu dehan katak buat neʼebé nasaun sira hasaʼe, sira hasaʼe neʼe ba anju aat, laʼós ba Maromak; no haʼu lakohi imi atu hola parte ho anju aat sira. 21 Imi labele hemu husi Jeová nia kopu no anju aat nia kopu; imi labele han husi “Jeová nia meza” no anju aat nia meza. 22 Entaun, ita koko atu halo saida? “Ita koko atu halo Jeová sente laran-moras ka”? Ita la forsa liu nia, loos ka lae?

23 Tuir lei buat hotu la sala; maibé laʼós buat hotu lori diʼak. Tuir lei buat hotu la sala; maibé laʼós buat hotu harii. 24 Ema ida-idak tenke kontinua buka uluk ema seluk nia diʼak, laʼós nia rasik nia diʼak.

25 Imi bele kontinua han naʼan sira neʼebé faʼan iha merkadu, no lalika husu hodi halo imi-nia laran* sente hakmatek; 26 tanba “rai tomak no mós buat hotu neʼebé iha rai mak Jeová nian”. 27 Se ema neʼebé laʼós fiar-naʼin konvida imi no imi hakarak atu bá, han buat naran deʼit neʼebé sira tau iha imi-nia oin, lalika husu hodi halo imi-nia laran sente hakmatek. 28 Maibé se ema ruma dehan ba imi: “Neʼe mak buat neʼebé hasaʼe ona ba estátua”, keta han ida-neʼe tanba ema neʼebé fó-hatene ba imi no mós tanba ema nia laran. 29 Haʼu la koʼalia kona-ba ó-nia laran, maibé ema neʼe nia laran. Entaun, tansá mak ema seluk nia laran tenke tesi lia kona-ba haʼu-nia liberdade? 30 Maski haʼu han no hatoʼo ona agradese ba Maromak kona-ba neʼe, maibé se ema koʼalia aat kona-ba haʼu kuandu haʼu han ida-neʼe, entaun diʼak ba haʼu atu han ka lae?

31 Tan neʼe, se imi han ka hemu ka halo buat naran deʼit, halo buat hotu-hotu ba Maromak nia glória. 32 Kuidadu bá atu la halo sidi ema judeu sira no ema gregu no mós Maromak nia kongregasaun, 33 hanesan haʼu mós halo kontente ema hotu iha buat hotu, no la buka haʼu-nia diʼak deʼit maibé ema barak nia diʼak, atu nuneʼe sira bele hetan salvasaun.

11 Halo tuir haʼu-nia ezemplu bá, hanesan haʼu mós halo tuir Kristu nia ezemplu.

2 Haʼu gaba imi tanba imi sempre hanoin-hetan haʼu no imi kaer metin ba hanorin sira neʼebé haʼu fó ona ba imi. 3 Maibé, haʼu hakarak imi hatene katak mane ida-idak nia ulun mak Kristu, no feto nia ulun mak mane, no Kristu nia ulun mak Maromak. 4 Mane ida neʼebé halo orasaun ka fó sai Maromak nia liafuan hodi taka nia ulun, nia hamoe nia ulun; 5 maibé feto ida neʼebé halo orasaun ka fó sai Maromak nia liafuan hodi la taka nia ulun, nia hamoe nia ulun, tanba ida-neʼe hanesan deʼit nia koi nia fuuk. 6 Basá, se feto ida la taka nia ulun, diʼak liu ba nia atu tesi nia fuuk; maibé se tesi fuuk ka koi fuuk mak buat neʼebé hamoe feto, entaun diʼak liu ba nia atu taka nia ulun.

7 Basá mane ida labele taka nia ulun, tanba nia mak Maromak nia ilas no Maromak nia glória; maibé feto mak mane nia glória. 8 Tanba mane la mai husi feto, maibé feto husi mane; 9 liután neʼe, Maromak la kria mane ba feto, maibé feto ba mane. 10 Tan razaun neʼe no mós tan anju sira mak feto tenke tau sinál iha nia ulun hodi hatudu katak nia hakruʼuk an ba nia laʼen.

11 Maski nuneʼe, iha Naʼi, mane la moris ketak husi feto no feto la moris ketak husi mane. 12 Basá, hanesan feto mai husi mane, nuneʼe mós mane mai husi feto; maibé buat hotu mai husi Maromak. 13 Imi deside rasik bá: Se feto ida halo orasaun ba Maromak hodi la taka nia ulun, ida-neʼe loos ka lae? 14 Imi aprende ona husi dalan neʼebé Maromak kria ema, katak se mane ida nia fuuk naruk, ida-neʼe hamoe nia; 15 maibé se feto ida nia fuuk naruk, ida-neʼe fó glória ba nia, loos ka lae? Tanba Maromak fó fuuk neʼe ba feto atu taka nia ulun. 16 Maibé, se ema ida la simu hanorin neʼe tanba toman seluk, imi tenke fó-hatene nia katak ita la iha toman seluk no Maromak nia kongregasaun sira mós la iha toman seluk.

17 No nuʼudar haʼu hatoʼo liafuan sira-neʼe, haʼu la gaba imi, tanba bainhira imi halibur hamutuk, ida-neʼe lori susar ba imi laʼós lori buat diʼak. 18 Basá, ulukliu, haʼu rona katak kuandu imi halibur hamutuk nuʼudar kongregasaun, imi-nia hanoin la tuir malu; no haʼu fiar karik ida-neʼe loos. 19 Tanba klaru katak iha mós grupu oioin iha imi-nia leet, maibé ida-neʼe mosu atu hatudu sai sira neʼebé Maromak simu iha imi-nia leet.

20 Tan neʼe, kuandu imi halibur hamutuk, imi-nia hahalok la husik imi atu selebra Naʼi nia han-kalan ho loloos. 21 Basá, bainhira imi han ida-neʼe, imi han uluk ona imi-nia han-kalan, entaun ema ida hamlaha maibé seluk lanu tanba hemu barak liu. 22 Tuir loloos, imi iha uma atu han no hemu, loos ka lae? Ka imi la respeitu Maromak nia kongregasaun no hakarak atu hamoe ema kiak sira ka? Haʼu sei dehan saida ba imi? Haʼu presiza gaba imi ka? Kona-ba neʼe haʼu la gaba imi.

23 Tanba haʼu simu husi Naʼi no mós haʼu hatoʼo ona ba imi, katak iha kalan antes ema entrega Naʼi Jesus ba inimigu, nia foti paun ida 24 no depois fó tiha agradese, nia silu hodi dehan: “Neʼe reprezenta haʼu-nia isin neʼebé haʼu fó tanba imi. Kontinua halo ida-neʼe hodi hanoin haʼu.” 25 Nia mós halo hanesan ho kopu neʼe, depois han kalan tiha, nia dehan: “Kopu neʼe reprezenta aliansa foun liuhusi haʼu-nia raan. Kontinua halo ida-neʼe. No bainhira imi hemu, halo neʼe hodi hanoin haʼu.” 26 Tanba kuandu imi han paun neʼe no hemu tua-uvas neʼe, imi kontinua fó sai kona-ba Naʼi nia mate, toʼo nia mai fali.

27 Tan neʼe, ema naran deʼit neʼebé han paun ka hemu tua-uvas Naʼi nian la ho respeitu, nia halo sala hasoru Naʼi nia isin no raan. 28 Entaun, ulukliu ema ida tenke buka-hatene didiʼak kona-ba nia an se nia merese ka lae, no tuirmai mak nia bele han paun no hemu tua-uvas neʼe. 29 Tanba ema neʼebé han no hemu hodi la hatene buat neʼebé isin neʼe reprezenta, nia lori kastigu ba nia an. 30 Tan neʼe mak ema barak iha imi-nia leet agora fraku no moras, no mós ema barak tan husi imi mate ona.* 31 Maibé se ita hatene didiʼak ita-nia an karik, ita sei la hetan tesi-lia. 32 Maibé, bainhira ita hetan tesi-lia, neʼe katak ita simu dixiplina husi Jeová, atu nuneʼe ita sei la simu kastigu-mate hamutuk ho mundu neʼe. 33 Tan neʼe, haʼu-nia maun-alin sira, kuandu imi halibur hamutuk atu han ida-neʼe, hein malu bá. 34 Se ema ida hamlaha, diʼak atu nia han iha ninia uma, atu nuneʼe imi sei la hetan tesi-lia kuandu imi halibur hamutuk. Maibé kona-ba buat sira seluk, haʼu sei hadiʼa bainhira haʼu toʼo neʼebá.

12 Maun-alin sira, haʼu hakarak imi atu hatene didiʼak kona-ba prezente sira husi Maromak. 2 Imi hatene katak bainhira imi seidauk sai fiar-naʼin, ema lori imi atu adora estátua neʼebé la iha lian no imi halo tuir deʼit ema sira-neʼe nia hakarak. 3 Tan neʼe, haʼu hakarak imi atu hatene katak ema neʼebé koʼalia hodi espíritu santu sei la dehan: “Malisan ba Jesus!” no ema mós sei la dehan: “Jesus mak Naʼi!” só deʼit se ema neʼe koʼalia liuhusi espíritu santu.

4 Iha prezente oioin, maibé iha espíritu ida deʼit; 5 no iha serbisu oioin, maibé iha Naʼi ida deʼit; 6 espíritu santu book ema iha dalan oioin, maibé iha Maromak ida deʼit neʼebé halo buat hotu liuhusi ema hotu. 7 Espíritu santu hatudu sai ninia kbiit iha ema ida-idak, no Maromak fó ida-neʼe atu ajuda ema seluk. 8 Porezemplu, ba ema ida espíritu santu fó kbiit atu komprende; ho espíritu neʼebé hanesan, ema seluk hetan kbiit atu koʼalia ho matenek; 9 ema seluk simu fiar liuhusi espíritu neʼebé hanesan, no ema seluk tan simu kbiit atu kura liuhusi espíritu neʼe; 10 ema seluk fali simu kbiit atu halo milagre, ema seluk simu kbiit atu koʼalia nuʼudar profeta, ema seluk simu kbiit atu hatene se buat neʼebé ema fó sai mak mai husi Maromak ka lae, ema seluk simu kbiit atu koʼalia lia oioin, no ema seluk tan simu kbiit atu tradús lia oioin. 11 Maibé espíritu ida deʼit mak halo buat sira-neʼe hotu, no espíritu neʼe fahe kbiit ba ema ida-idak tuir ninia hakarak.

12 Maski isin-lolon ida deʼit, maibé iha parte barak; no maski parte isin nian mak barak, maibé iha isin ida deʼit, nuneʼe mós ho Kristu. 13 Basá tuir loloos, liuhusi espíritu ida deʼit mak ita hotu hetan batizmu iha isin ida, maski ita ema judeu ka gregu, atan ka ema livre; no ita hotu hemu espíritu ida deʼit.

14 No loloos, isin-lolon laʼós iha parte ida deʼit, maibé barak. 15 Se ain dehan: “Tanba haʼu laʼós liman, haʼu laʼós parte ba isin-lolon”, neʼe katak nia laʼós parte ba isin-lolon ka? 16 No se tilun dehan: “Tanba haʼu laʼós matan, haʼu laʼós parte ba isin-lolon”, neʼe katak nia laʼós parte ba isin-lolon ka? 17 Se isin-lolon tomak mak matan, ita sei rona ho saida? Se isin-lolon tomak mak tilun, ita sei horon ho saida? 18 Maibé Maromak tau ona parte ida-idak iha isin tuir ninia hakarak.

19 Se sira hotu mak parte ida deʼit husi isin, entaun isin-lolon iha neʼebé? 20 Tuir loloos, sira iha parte barak, maibé sira isin ida deʼit. 21 Matan la bele dehan ba liman: “Haʼu la presiza ó”, ka ulun mós la bele dehan ba ain: “Haʼu la presiza ó.” 22 Tuir loloos, parte isin nian neʼebé haree nuʼudar la iha kbiit, sira mak importante, 23 no parte isin nian neʼebé ita haree nuʼudar ladún diʼak, ita taka ho didiʼak. Entaun neʼe katak parte isin nian neʼebé halo ita moe, ita tau matan ho didiʼak. 24 Maibé ita-nia parte isin nian neʼebé haree furak la presiza buat ida. Maski nuneʼe, Maromak halo isin-lolon iha dalan neʼe hodi fó glória liu ba parte neʼebé ladún furak, 25 atu nuneʼe isin-lolon sei la haketak malu, maibé parte sira husi isin-lolon sei hanoin malu. 26 No se isin-lolon nia parte ida hetan terus, parte hotu mós terus hamutuk nia; ka se parte ida simu glória, parte hotu mós haksolok hamutuk ho nia.

27 Imi mak Kristu nia isin-lolon, no imi ida-idak mak parte ba ninia isin. 28 No Maromak tau ona ema oioin iha kongregasaun, ulukliu apóstolu, segundu profeta, terseiru mestre; tuirmai halo milagre; no tuirmai kbiit atu kura; kbiit atu fó ajuda, kbiit atu dirije, no kbiit atu koʼalia lia oioin. 29 Laʼós ema hotu apóstolu, loos ka lae? Laʼós ema hotu profeta, loos ka lae? Laʼós ema hotu mestre, loos ka lae? Laʼós ema hotu halo milagre, loos ka lae? 30 Laʼós ema hotu simu kbiit atu kura, loos ka lae? Laʼós ema hotu koʼalia lia oioin, loos ka lae? Laʼós ema hotu simu kbiit atu tradús, loos ka lae? 31 Maski nuneʼe, kontinua hakaʼas an atu hetan prezente neʼebé boot liu. Maibé haʼu sei hatudu ba imi dalan neʼebé diʼak liu.

13 Se haʼu koʼalia ema nia lian oioin no anju nia lian, maibé haʼu la iha domin, haʼu sai hanesan sinu nia lian ka tambór nia tarutu. 2 No se haʼu simu kbiit atu koʼalia nuʼudar profeta no se haʼu hatene didiʼak Maromak nia segredu santu hotu no matenek hotu, no se haʼu iha fiar boot hodi muda foho, maibé la iha domin, haʼu la vale buat ida. 3 No se haʼu fó haʼu-nia rikusoin tomak atu fó han ba ema seluk, no se haʼu fó haʼu-nia moris, atu nuneʼe haʼu bele gaba an, maibé se haʼu la iha domin, haʼu la manán buat ida.

4 Domin mak pasiénsia no laran-diʼak. Domin la laran-moras, la gaba an, la foti-an. 5 Domin hatudu respeitu, la buka nia rasik nia diʼak, la sai hirus lalais. Domin la hanoin fali buat aat neʼebé nia simu. 6 Domin la haksolok ho hahalok laloos, maibé haksolok ho lia-loos. 7 Domin lori todan hotu,* fiar buat hotu, tau esperansa iha buat hotu, no tahan buat hotu.

8 Domin nunka lakon. Maibé se ita simu kbiit atu koʼalia nuʼudar profeta, neʼe sei lakon; se ita iha kbiit atu koʼalia lia oioin, neʼe sei para; se ita iha matenek, neʼe sei lakon. 9 Tanba ita-nia matenek la kompletu no ita-nia koʼalia nuʼudar profeta la kompletu; 10 maibé kuandu buat neʼebé kompletu toʼo mai, buat neʼebé la kompletu sei halakon tiha. 11 Bainhira haʼu sei labarik, haʼu koʼalia hanesan labarik, hanoin hanesan labarik, buka-hatene buat ruma hanesan labarik; maibé agora haʼu sai boot ona, haʼu halakon tiha hahalok labarik nian. 12 No iha tempu agora ita haree la moos liuhusi espellu besi nian, maibé tuirmai ita sei haree oin ba oin. Agora haʼu hatene buat balu deʼit, maibé tuirmai haʼu sei hatene ho loloos hanesan Maromak hatene haʼu ho loloos. 13 Maibé, buat tolu neʼebé hela mak fiar, esperansa, no domin; maibé ida neʼebé boot liu mak domin.

14 Hakaʼas an atu hadomi malu, no hakaʼas an atu hetan prezente husi Maromak, liuliu prezente atu koʼalia nuʼudar profeta. 2 Basá ema neʼebé koʼalia lia oioin, nia koʼalia laʼós ba ema, maibé ba Maromak. Maski la iha ema ida rona, maibé nia koʼalia segredu santu liuhusi espíritu. 3 Maibé, ema neʼebé koʼalia nuʼudar profeta, nia halo ida-neʼe atu harii, fó laran-manas, no fó kmaan liuhusi ninia koʼalia. 4 Ema neʼebé koʼalia lia oioin harii ninia an rasik, maibé ema neʼebé koʼalia nuʼudar profeta harii kongregasaun. 5 No haʼu hakarak katak imi hotu koʼalia lia oioin, maibé diʼak liu se imi koʼalia nuʼudar profeta. Tuir loloos, koʼalia nuʼudar profeta mak diʼak liu duké koʼalia lia oioin. Tanba loloos, ema neʼebé koʼalia lia oioin sei la harii kongregasaun se nia la tradús. 6 Maibé maun-alin sira, se agora haʼu toʼo ba imi hodi koʼalia lia oioin, oinsá mak ida-neʼe sei ajuda imi? Se haʼu hakarak ajuda imi, haʼu tenke fó sai ba imi segredu ida husi Maromak ka koʼalia ho matenek ka koʼalia nuʼudar profeta ka fó sai hanorin ida.

7 Tuir loloos, buat sira neʼebé laiha moris hanesan flauta ka arpa bele fó sai lian múzika nian. Maibé, se ema huu flauta ka toka arpa hodi hasai lian ida deʼit, oinsá mak ema bele hatene múzika neʼe? 8 Neʼe duni, se trombeta ida la fó sai lian ho momoos, sé mak sei sai prontu atu bá funu? 9 Nuneʼe mós, se imi koʼalia liafuan neʼebé susar atu komprende, entaun oinsá mak ema sei hatene buat neʼebé imi dehan? Tuir loloos, imi sei koʼalia deʼit ba anin. 10 Iha lian barak iha mundu neʼe, no sira hotu iha folin. 11 Entaun se haʼu la komprende buat neʼebé ema koʼalia, haʼu sai hanesan ema estranjeiru ba ema neʼebé koʼalia neʼe, no ema neʼe sai hanesan estranjeiru ba haʼu. 12 No kona-ba imi, tanba imi hakarak tebes atu simu prezente husi espíritu santu, entaun buka bá atu sai nakonu ho prezente sira neʼebé sei harii kongregasaun.

13 Tan neʼe, ema neʼebé koʼalia lian seluk, harohan bá atu nia bele tradús. 14 Se haʼu halo orasaun ho lian ida seluk, haʼu halo orasaun tanba prezente husi espíritu santu, maibé iha haʼu-nia neon haʼu la komprende. 15 Entaun, haʼu sei halo saida? Haʼu sei halo orasaun ho prezente husi espíritu santu, maibé haʼu mós sei halo orasaun ho haʼu-nia neon. Haʼu sei kanta hahiʼi nian ho prezente husi espíritu, maibé haʼu mós sei kanta hahiʼi nian ho haʼu-nia neon. 16 Lae karik, kuandu ó fó hahiʼi ho prezente husi espíritu, oinsá mak ema baibain iha ó-nia leet sei dehan “Amen” ba ó-nia orasaun agradese nian, basá nia la hatene saida mak ó dehan? 17 Maski ó fó-agradese iha dalan neʼebé diʼak, maibé ó la harii ema neʼe. 18 Haʼu fó-agradese ba Maromak tanba haʼu koʼalia lian barak liu fali imi hotu. 19 Maski nuneʼe, iha kongregasaun laran haʼu hakarak hanorin hodi uza deʼit liafuan lima atu nuneʼe ema bele komprende, duké uza liafuan 10.000 iha lian seluk.

20 Maun-alin sira, keta sai hanesan labarik kiʼik kona-ba imi-nia kbiit atu hatene, maibé sai hanesan labarik kiʼik kona-ba hahalok aat; no sai boot ho imi-nia kbiit atu hatene. 21 Iha Ukun-Fuan hakerek nanis ona: “‘Ho lian estranjeiru nian no ho ibun ema estranjeiru nian haʼu sei koʼalia ba povu neʼe, maski nuneʼe sira lakohi atu rona ba haʼu’, Jeová dehan.” 22 Tan neʼe, koʼalia lia oioin laʼós nuʼudar sinál ba fiar-naʼin, maibé ba sira neʼebé laʼós fiar-naʼin, no koʼalia nuʼudar profeta laʼós ba sira neʼebé la fiar-naʼin, maibé ba fiar-naʼin. 23 Nuneʼe, se ema hotu iha kongregasaun halibur hamutuk iha fatin ida no sira hotu koʼalia lia oioin, maibé ema baibain ka ema neʼebé laʼós fiar-naʼin mai, sira sei dehan katak imi bulak, loos ka lae? 24 Maibé se imi hotu koʼalia nuʼudar profeta no ema neʼebé laʼós fiar-naʼin ka ema baibain mai, imi-nia liafuan sira sei book nia laran no tesi lia ba nia, atu nuneʼe nia haree didiʼak ba ninia an rasik. 25 No nia sei hatene buat neʼebé subar hela iha ninia laran, atu nuneʼe nia sei hakruʼuk an no adora Maromak, no dehan sai: “Maromak iha duni imi-nia leet.”

26 Neʼe duni maun-alin sira, imi presiza halo saida? Kuandu imi halibur hamutuk, ema ida iha salmu, ema seluk iha hanorin ida, ema seluk fali hatudu sai segredu ida, ema seluk koʼalia lia oioin, no ema seluk tan tradús. Halo buat hotu atu hametin malu. 27 No kona-ba koʼalia iha lian seluk, diʼak liu atu ema naʼin-rua ka tolu deʼit mak koʼalia ida-neʼe hodi bele troka malu; no ema seluk tenke tradús. 28 Maibé se la iha ema atu tradús, nia sei nonook deʼit iha kongregasaun laran no koʼalia deʼit ba nia an no ba Maromak. 29 Liután neʼe, diʼak atu profeta naʼin-rua ka tolu mak koʼalia, no sira seluk buka-hatene liafuan sira-neʼe katak sá. 30 Maibé se ema ida simu liafuan husi Maromak nuʼudar nia tuur hela iha neʼebá, diʼak ba ida neʼebé koʼalia uluk atu nonook deʼit. 31 Tanba imi hotu bele koʼalia nuʼudar profeta hodi troka malu, atu nuneʼe imi hotu bele aprende no bele hetan laran-manas. 32 No profeta sira tenke kontrola dalan neʼebé sira uza prezente husi espíritu. 33 Basá Maromak laʼós Maromak runguranga nian, maibé Maromak dame nian.

Hanesan iha santu sira-nia kongregasaun hotu, 34 diʼak atu feto sira kontinua nonook iha kongregasaun laran, tanba la iha lisensa ba sira atu koʼalia, maibé diʼak ba sira atu hakruʼuk an hanesan Ukun-Fuan mós hatete. 35 Entaun, se sira hakarak atu aprende buat ruma, sira tenke husu sira-nia laʼen iha uma, tanba se feto ida koʼalia iha kongregasaun laran neʼe mak buat neʼebé aat tebes.

36 Maromak nia liafuan hahú husi imi ka? No ida-neʼe hatoʼo deʼit ba imi ka?

37 Se ema ruma hanoin katak nia mak profeta ida ka hetan prezente husi espíritu santu, nia tenke simu katak buat neʼebé haʼu hakerek ba imi mak Naʼi nia ukun-fuan. 38 Maibé se ema ruma la komprende, nia sei kontinua hanesan neʼe. 39 Tan neʼe maun-alin sira, hakaʼas an hodi hetan prezente atu koʼalia nuʼudar profeta, maibé keta bandu ema atu koʼalia lia oioin. 40 Maibé halo buat hotu iha dalan neʼebé loloos no momoos.

15 No maun-alin sira, haʼu fó-hanoin imi kona-ba liafuan diʼak neʼebé haʼu fó sai ona ba imi, neʼebé imi simu, no neʼebé imi mós kontinua halo tuir. 2 Se imi nafatin kaer metin ba imi-nia fiar kona-ba liafuan diʼak neʼebé haʼu fó sai ona ba imi, imi hetan ona salvasaun. Maibé se lae, imi-nia fiar sei sai saugati deʼit.

3 Tanba haʼu hatoʼo ona ba imi buat folin-boot neʼebé haʼu mós simu, neʼe mak: Kristu mate ba ita-nia sala hodi tuir Eskritura; 4 no ema hakoi nia, no liutiha loron tolu nia moris hiʼas fali hodi tuir Eskritura; 5 no nia mosu ba Cefas, no tuirmai ba sira naʼin sanulu-resin-rua. 6 Depois neʼe, nia mosu ba maun-alin naʼin-500 liu iha tempu ida, no sira barak sei hamutuk hela ho ita, maski balu mate* ona. 7 Depois neʼe, nia mosu ba Tiago, tuirmai ba apóstolu hotu; 8 maibé ikus liu nia mosu ba haʼu nuʼudar ema neʼebé moris mai sedu liu.

9 Basá haʼu kiʼik liu fali apóstolu sira seluk, no haʼu la merese atu bolu nuʼudar apóstolu ida, tanba haʼu fó-terus ba Maromak nia kongregasaun. 10 Maibé liuhusi Maromak nia laran-diʼak neʼebé boot mak haʼu simu knaar neʼe. No ninia laran-diʼak ba haʼu la saugati deʼit; haʼu serbisu makaʼas liu sira hotu, maski nuneʼe laʼós haʼu maibé Maromak nia laran-diʼak mak hamutuk ho haʼu. 11 Maski sira ka haʼu mak haklaken ba imi, maibé ami hotu koʼalia mensajen ida deʼit no imi fiar ona kona-ba neʼe.

12 Entaun, se ita haklaken katak Kristu moris hiʼas ona husi mate, oinsá mak imi balu dehan katak la iha moris-hiʼas husi mate? 13 Tuir loloos, se la iha moris-hiʼas husi mate, entaun Kristu mós la hetan moris-hiʼas. 14 Maibé se Kristu la hetan moris-hiʼas, ita-nia haklaken saugati deʼit, no ita-nia fiar saugati deʼit. 15 Liután neʼe, se ema mate sira la moris hiʼas, neʼe katak Maromak mós la fó moris-hiʼas ba Kristu; nuneʼe ita-nia sasin kona-ba Maromak mak falsu kuandu ita dehan katak nia fó moris-hiʼas ba Kristu. 16 Basá, se ema mate la hetan moris-hiʼas, se nuneʼe Kristu mós la hetan moris-hiʼas. 17 Liután neʼe, se Kristu la hetan moris-hiʼas, imi-nia fiar saugati deʼit, no imi sei hela iha sala laran. 18 No tuir loloos, sira neʼebé mate* iha Kristu mós lakon ba nafatin. 19 Se ita-nia fiar iha Kristu mak ba moris neʼe deʼit, ita kasian liu ema hotu.

20 Maibé tuir loloos, Kristu moris hiʼas ona husi mate, nia mak hanesan ai-fuan primeiru husi ema hotu neʼebé mate.* 21 Tanba mate mosu liuhusi ema ida, nuneʼe mós moris-hiʼas husi mate mosu liuhusi ema ida. 22 Nuʼudar iha Adão ema hotu mate, nuneʼe mós iha Kristu ema hotu sei hetan moris. 23 Maibé, ida-idak tuituir malu: Kristu mak hanesan ai-fuan primeiru, depois neʼe mak sira neʼebé Kristu nian durante tempu neʼebé nia toʼo ona mai.* 24 Ikusliu kuandu nia halakon tiha governu hotu no ukun-naʼin hotu no kbiit hotu, nia sei entrega ukun neʼe ba ninia Maromak no Aman. 25 Tanba nia tenke ukun nuʼudar liurai toʼo Maromak tau ona ninia inimigu hotu iha nia ain okos. 26 No inimigu ikus neʼebé nia sei harahun tiha mak mate. 27 Basá Maromak mak “tau buat hotu iha Kristu nia ain okos”. Maibé kuandu nia dehan ‘buat hotu tau tiha iha nia ain okos’, neʼe la hatudu katak Maromak tau nia an rasik iha Kristu nia okos, lae, maibé Maromak mak tau buat hotu iha Kristu nia ain okos. 28 Maibé bainhira buat hotu tau ona iha nia ain okos, tuirmai Oan-Mane rasik mós sei hakruʼuk an ba Ida neʼebé tau buat hotu iha nia ain okos, atu nuneʼe Maromak bele sai buat hotu ba ema hotu.

29 Se ema mate sira la moris hiʼas fali, saida mak sei mosu ba sira neʼebé hetan batizmu ba mate? Tansá mak sira hetan batizmu hanesan neʼe? 30 Tansá mak ita mós hasoru perigu iha tempu hotu? 31 Maun-alin sira, haʼu koʼalia loloos kuandu haʼu dehan katak haʼu hasoru perigu mate nian loron ba loron, nuneʼe mós haʼu koʼalia loloos kuandu haʼu dehan katak haʼu gaba an kona-ba imi neʼebé iha Kristu Jesus ita Naʼi. 32 Se haʼu luta hasoru animál fuik iha Éfeso hanesan mós ema seluk halo, ida-neʼe lori buat diʼak saida mai haʼu? Se mate sira la moris hiʼas, “mai ita han no hemu, tanba aban ita sei mate”. 33 Keta husik ema seluk lohi imi. Ransu hamutuk ho ema aat sei estraga toman diʼak. 34 Hadeer bá hodi halo buat neʼebé loos no keta kontinua atu halo sala, tanba ema balu la iha matenek kona-ba Maromak. Haʼu koʼalia neʼe atu halo imi moe.

35 Maski nuneʼe, ema balu sei dehan: “Oinsá mak ema mate sira sei moris hiʼas? Sira sei moris hiʼas ho isin saida?” 36 Imi beik duni! Buat neʼebé ó kuda tenke mate uluk foin mak nia bele moris; 37 No kona-ba buat neʼebé ó kuda, maski neʼe mak trigu ka buat seluk, ó la kuda nia kain neʼebé moris ona, maibé ó kuda nia fini; 38 no Maromak mak halo nia moris hodi tuir Maromak nia hakarak no nuʼudar fini ida-idak moris, sira hotu la hanesan. 39 No ita hatene katak isin hotu mak la hanesan. Iha isin ida ba ema, isin seluk ba karau, no isin seluk ba manu, no seluk tan ba ikan. 40 No iha isin lalehan nian, no iha isin rai nian; no glória husi isin lalehan nian mak oin ida, no glória husi isin rai nian mak oin ida seluk. 41 Glória husi loro-matan mak oin ida, no glória husi fulan mak oin ida seluk, no glória husi fitun mak oin ida seluk tan; tuir loloos fitun ida-idak iha glória neʼebé la hanesan.

42 Nuneʼe mós ho ema sira neʼebé hetan moris-hiʼas. Ita kari buat neʼebé bele dodok, maibé buat neʼebé moris hiʼas la bele dodok. 43 Ita kari buat neʼebé la simu hahiʼi, maibé moris fali ho glória. Ita kari buat neʼebé fraku, maibé moris fali ho kbiit. 44 Ita kari isin ema nian, maibé moris fali ho isin lalehan nian. Se iha isin ema nian, iha mós isin lalehan nian. 45 Hanesan hakerek ona: “Mane primeiru Adão sai nuʼudar ema* neʼebé moris.” No Adão neʼebé ikus moris fali ho isin lalehan* nian ho kbiit atu fó moris. 46 Maibé, laʼós isin lalehan nian mak primeiru. Isin nuʼudar ema mak primeiru, no tuirmai mak isin lalehan nian. 47 Mane primeiru mak mai husi rai no halo husi rai-rahun; mane segundu mai husi lalehan. 48 No ema iha mundu neʼe mak hanesan ho ida neʼebé Maromak halo husi rai-rahun. No sira neʼebé iha lalehan mak hanesan ho ida neʼebé mai husi lalehan. 49 No hanesan ita sai nuʼudar ilas ba ida neʼebé halo husi rai-rahun, ita mós sei sai ilas ba ida neʼebé husi lalehan.

50 Maibé maun-alin sira, haʼu dehan katak isin no raan la bele simu Maromak nia Ukun nuʼudar liman-rohan, nuneʼe mós buat neʼebé dodok la bele simu buat neʼebé la dodok nuʼudar liman-rohan. 51 Haʼu dehan ba imi segredu santu ida: Laʼós ita hotu sei mate,* maibé ita hotu sei nakfila an 52 kedas, no neʼe lalais liu fali ho piska matan. Ida-neʼe sei mosu durante trombeta ikus nia lian. Basá trombeta neʼe sei lian no mate sira sei moris fali ho isin neʼebé la dodok no ita sei nakfila an. 53 Tanba ida neʼebé dodok tenke tau fali ida neʼebé la dodok, no ida neʼebé bele mate tenke tau fali ida neʼebé la bele mate. 54 No kuandu ida neʼebé dodok tau fali ida neʼebé la dodok, no ida neʼebé bele mate tau fali ida neʼebé la bele mate, iha tempu neʼebá buat neʼebé hakerek ona sei sai loos: “Mate halakon tiha ba nafatin.” 55 “Mate, ó-nia kbiit iha neʼebé? Mate, ó-nia venenu iha neʼebé?” 56 Sala mak hanesan venenu neʼebé halo mate, no sala nia kbiit mai husi Ukun-Fuan. 57 Maibé fó-agradese ba Maromak, tanba nia halo ita manán liuhusi ita Naʼi Jesus Kristu.

58 Tan neʼe, maun-alin doben sira, laran-metin bá, no hamriik metin bá, no sai badinas nafatin iha Naʼi nia serbisu, tanba imi hatene katak imi-nia serbisu iha Naʼi sei la sai saugati deʼit.

16 Kona-ba halibur osan ba santu sira, imi bele halo tuir matadalan neʼebé haʼu fó ona ba kongregasaun sira iha Galásia. 2 Iha loron primeiru semana nian, imi ida-idak tenke tau ketak buat ruma tuir imi-nia kbiit, atu nuneʼe imi la presiza tan atu halibur osan kuandu haʼu toʼo neʼebá. 3 No kuandu haʼu toʼo ona, haʼu sei haruka mane sira neʼebé imi hili no temi ona iha imi-nia karta, atu sira lori imi-nia prezente neʼebé imi fó ho laran-diʼak hodi bá Jeruzalein. 4 Maibé se haʼu mós presiza bá Jeruzalein, sira sei bá neʼebá hamutuk ho haʼu.

5 Maibé kuandu haʼu laʼo tiha liuhusi Masedónia haʼu sei toʼo ba imi, tanba haʼu hakarak laʼo liu Masedónia; 6 no karik haʼu sei hela tempu uitoan ho imi, ka karik hela durante tempu malirin, atu nuneʼe imi bele lori haʼu toʼo dalan klaran nuʼudar haʼu laʼo ba fatin neʼebé haʼu sei bá. 7 Haʼu lakohi atu haree imi lalais deʼit nuʼudar haʼu laʼo liu imi-nia fatin, tanba haʼu hakarak atu hela hamutuk imi ba tempu balu se neʼe Jeová nia hakarak. 8 Maibé haʼu sei hela iha Éfeso toʼo Festa Pentekostes; 9 tanba Maromak loke tiha ona odamatan boot mai haʼu, atu haʼu bele halo serbisu barak liután, maibé iha ema barak neʼebé kontra.

10 No se Timóteo toʼo ba imi, apoia nia bá atu nuneʼe nia la sai taʼuk kuandu nia iha imi-nia leet, tanba nia halo Jeová nia serbisu hanesan haʼu mós halo. 11 Tan neʼe, ema ida labele haree nia la diʼak. Laʼo hamutuk nia bá toʼo dalan klaran, atu nuneʼe nia bele mai toʼo haʼu, tanba haʼu no mós maun-alin sira hein hela nia.

12 No kona-ba Apolo, ita-nia maluk, haʼu husu namanas ona ba nia atu laʼo hamutuk ho maun-alin sira kuandu sira vizita imi, maski nuneʼe agora nia lakohi atu laʼo ba imi; maibé kuandu nia iha tempu nia sei toʼo ba imi.

13 Matan-moris nafatin bá, kaer metin ba imi-nia fiar, sai aten-brani bá,* sai kbiit-naʼin bá. 14 Iha buat hotu neʼebé imi halo, halo neʼe ho domin.

15 Imi hatene katak Estéfanas nia umakain mak hanesan ai-fuan primeiru iha Akaia no katak sira fó sira-nia an atu serbí santu sira. Neʼe duni haʼu husu imi maun-alin sira: 16 Diʼak atu imi mós kontinua hakruʼuk an ba ema hanesan neʼe no ba ita-nia maluk serbisu-naʼin hotu neʼebé serbisu makaʼas. 17 Haʼu haksolok tanba Estéfanas, Fortunato, no Arkaiko mai iha neʼe, no maski imi la iha neʼe, maibé sira bele taka imi-nia fatin. 18 Tanba sira fó kmaan ba haʼu* no mós ba imi. Tan neʼe, hafolin bá ema sira hanesan neʼe.

19 Kongregasaun sira iha Ázia haruka kumprimentus ba imi. Ákuila no Priska no mós kongregasaun neʼebé iha sira-nia uma haruka domin ba imi iha Naʼi. 20 Maun-alin hotu kumprimenta imi. Kumprimenta malu bá ho reʼi santu nian.

21 Haʼu, Paulo, hakerek kumprimentus neʼe ho haʼu-nia liman rasik.

22 Se ema ruma la hadomi Naʼi, nia hetan malisan bá. Oh ita-nia Naʼi, mai bá! 23 Haʼu harohan katak Naʼi Jesus nia laran-diʼak neʼebé boot hela ho imi. 24 Haʼu-nia domin hela ho imi hotu iha Kristu Jesus.

[Nota–rodapé]