2 Korinto

1 Husi Paulo, Kristu Jesus nia apóstolu liuhusi Maromak nia hakarak, no husi Timóteo ita-nia alin, ba Maromak nia kongregasaun iha Korinto, hamutuk ho santu sira hotu neʼebé hela iha Akaia tomak:

2 Haʼu harohan katak ita-nia Aman Maromak no Naʼi Jesus Kristu sei hatudu laran-diʼak ba imi no haraik dame ba imi.

3 Hahiʼi ba Maromak, ita Naʼi Jesus Kristu nia Aman, Aman neʼebé laran-sadiʼa no Maromak neʼebé fó kmaan ba ema iha situasaun hotu, 4 nia fó kmaan ba ita iha ita-nia susar hotu, atu nuneʼe ita bele fó kmaan ba ema seluk iha sira-nia susar hotu ho kmaan neʼebé ita simu ona husi Maromak. 5 Ita hetan susar barak nuʼudar Kristu nia dixípulu, no liuhusi Kristu ita mós simu kmaan barak. 6 Entaun se ami iha terus laran, ida-neʼe atu imi hetan kmaan no salvasaun; no se ami hetan kmaan, ida-neʼe atu imi mós bele hetan kmaan; kmaan neʼe bele ajuda imi atu tahan terus neʼebé ami mós hasoru. 7 No ami-nia esperansa ba imi la namlele, hodi hatene katak, nuʼudar imi mós hetan susar hanesan ami, nuneʼe mós imi sei hetan kmaan hanesan ami.

8 Maun-alin sira, ami hakarak atu imi hatene kona-ba terus neʼebé ami hasoru iha área Ázia nian, katak ami hasoru susar neʼebé boot liu fali ami-nia kbiit, toʼo ami mós la hatene se ami sei moris ka lae. 9 Tuir loloos, ami sente duni katak ami sei mate. Ida-neʼe mosu atu ami tau fiar laʼós ba ami-nia an, maibé ba Maromak neʼebé fó moris-hiʼas ba ema mate sira. 10 No nia salva ami husi perigu mate nian no nia sei salva tan ami; no ami iha esperansa ba nia katak nia sei kontinua atu salva ami. 11 Imi mós bele ajuda hodi harohan ba ami, basá Maromak sei hatán ema barak nia orasaun, ho ida-neʼe ema barak sei hatoʼo agradese tanba buat neʼebé ami simu.

12 Tanba buat neʼebé halo ami gaba an mak neʼe; ami-nia laran* fó sasin katak iha mundu neʼe, no liuliu iha imi-nia leet, ami hatudu ona hahalok santu no laran-moos iha Maromak nia oin, laʼós ho matenek mundu neʼe nian maibé ho Maromak nia laran-diʼak neʼebé boot. 13 Tanba ami hakerek ba imi laʼós kona-ba buat seluk maibé kona-ba buat neʼebé imi hatene ona no simu ona; no haʼu hein katak imi sei kontinua simu buat sira-neʼe toʼo rohan. 14 Nuʼudar imi mós simu katak imi bele gaba an tanba ami, nuneʼe mós ami bele gaba an tanba imi iha Naʼi Jesus nia loron.

15 Tanba haʼu fiar ida-neʼe, uluk haʼu hakarak atu toʼo ba imi hodi nuneʼe imi bele haksolok ba dala segundu. 16 Haʼu hakarak atu para iha imi kuandu haʼu atu bá Masedónia no mós fila husi Masedónia, no depois neʼe imi bele lori haʼu toʼo dalan klaran nuʼudar haʼu bá Judeia. 17 Maibé bainhira haʼu halo desizaun neʼe, haʼu la haree ida-neʼe nuʼudar buat baibain deʼit, loos ka lae? Ka haʼu halo planu tuir deʼit hakarak isin nian, atu nuneʼe haʼu dehan “sin, sin” no tuirmai “lae, lae”? 18 Imi bele tau fiar ba Maromak katak buat neʼebé ami dehan ba imi mak loos. Ami la dehan uluk Sin no tuirmai dehan Lae. 19 Tanba Maromak nia Oan-Mane, Kristu Jesus, neʼebé haʼu, no Silvano, no Timóteo fó sai iha imi-nia leet, laʼós sai nuʼudar Sin no tuirmai Lae, maibé Sin mak Sin iha ninia situasaun neʼe. 20 Maromak nia promesa hotu sai loos* liuhusi nia. Tan neʼe mós liuhusi nia mak ita dehan “Amen” ba Maromak hodi fó glória ba Maromak. 21 No Maromak deside ona katak imi no ami mak Kristu nian no nia neʼebé hili* ita mak Maromak. 22 Nia mós tau ona ninia sinál iha ita. No sinál neʼe mak espíritu santu neʼebé iha ita-nia laran, no neʼe mak nuʼudar promesa kona-ba buat neʼebé atu mai.

23 No agora haʼu jura hodi haʼu-nia moris no iha Maromak nia oin, katak haʼu seidauk toʼo ba Korinto tanba haʼu lakohi halo imi triste liután. 24 Neʼe laʼós katak ami mak domina imi-nia fiar, maibé ami mak maluk serbisu-naʼin ba imi-nia ksolok, tanba liuhusi imi-nia fiar mak imi hamriik.

2 Haʼu deside ona katak haʼu sei la halo imi triste iha haʼu-nia vizita tuirmai. 2 Tanba se haʼu halo imi hotu triste, entaun sé mak bele halo haʼu sente haksolok? 3 Kona-ba buat neʼebé haʼu hakerek uluk, haʼu hakerek neʼe atu haʼu la sai triste kuandu haʼu toʼo ba imi, tanba haʼu lakohi sai triste kona-ba sira neʼebé tenkesér fó ksolok ba haʼu. Haʼu fiar metin katak buat neʼebé fó ksolok ba haʼu fó ksolok mós ba imi. 4 Tanba husi terus barak no laran-triste mak haʼu hakerek ba imi ho matan-been barak, laʼós atu halo imi triste, maibé atu imi hatene haʼu-nia domin boot ba imi.

5 No se ema ida halo imi triste, nia halo triste laʼós haʼu maibé imi hotu. No deskulpa tanba haʼu koʼalia la taka. 6 Kastigu neʼebé imi barak fó ba mane neʼe toʼo ona ba nia. 7 Tan neʼe, agora imi tenke fó perdua no fó kmaan ba nia, atu nuneʼe ema neʼe la mout iha ninia triste. 8 Entaun, haʼu husu imi atu hatudu sai imi-nia domin ba nia. 9 Tan razaun neʼe mak haʼu hakerek ba imi: atu hatene se imi sei halo tuir iha buat hotu ka lae. 10 Se imi fó perdua ba ema kona-ba buat naran deʼit, haʼu mós fó perdua. Tuir loloos, kuandu haʼu fó perdua ona ba sala ida, ida-neʼe tanba imi-nia diʼak iha Kristu nia oin; 11 atu nuneʼe Satanás labele kaer-toman ita, tanba ita hatene ninia lasu sira.

12 No kuandu haʼu toʼo ba Tróade atu fó sai liafuan diʼak kona-ba Kristu, iha odamatan ida loke mai haʼu iha Naʼi. 13 No haʼu* sente laran-taridu tebes tanba haʼu la hetan Tito haʼu-nia maluk, tan neʼe haʼu fó adeus ba sira no haʼu sai hodi bá Masedónia.

14 Maibé obrigadu ba Maromak, ida neʼebé lori ita hodi marxa hamutuk ho Kristu, hanesan soldadu neʼebé marxa tanba sira manán. No Maromak nia matenek neʼebé hanesan buat morin sai belar ba fatin hotu liuhusi ita-nia serbisu. 15 Ba Maromak, ita mak hanesan buat morin nuʼudar ita fó sai kona-ba Kristu. No sira neʼebé hetan salvasaun horon morin neʼe, no sira neʼebé sei lakon mós horon morin neʼe. 16 Ba sira neʼebé sei lakon, morin neʼe lori ba mate, no ba sira neʼebé sei hetan salvasaun, morin neʼe lori ba moris. No sé mak bele kumpre kritériu atu halo serbisu neʼe? 17 Ita mak kumpre. Tanba ita la faʼan Maromak nia liafuan hanesan ema barak halo, maibé nuʼudar ema neʼebé Maromak haruka, ita koʼalia ho laran-moos hamutuk ho Kristu, no ita halo ida-neʼe iha Maromak nia oin.

3 Ami presiza fó-koñese fali ami-nia an ba imi ka? No hanesan ema balu, ami mós presiza karta ba imi ka karta husi imi hodi esplika kona-ba ami ka? 2 Imi rasik mak ami-nia karta neʼebé hakerek iha ami-nia laran, no ema hotu hatene no lee kona-ba neʼe. 3 Tanba imi mak Kristu nia karta neʼebé hakerek liuhusi ami nuʼudar Maromak nia serbisu-naʼin, no ida-neʼe hakerek laʼós ho tinta maibé ho espíritu husi Maromak neʼebé moris, laʼós iha fatuk-belar, maibé iha isin, iha fuan-laran.

4 No liuhusi Kristu mak ami fiar metin ba Maromak kona-ba neʼe. 5 Ami la dehan katak ami rasik mak kumpre kritériu atu halo serbisu neʼe, maibé Maromak mak halo ami kumpre kritériu neʼe. 6 No liuhusi Maromak mak ami kumpre kritériu atu sai nuʼudar haklaken-naʼin ba aliansa foun, no ida-neʼe laʼós ukun-fuan neʼebé hakerek, maibé ida-neʼe mai husi espíritu santu; basá ukun-fuan neʼebé hakerek lori kastigu-mate, maibé espíritu lori ba moris.

7 Liután neʼe, ukun-fuan neʼebé lori ba mate bahat iha fatuk, no neʼe mosu mai ho glória boot toʼo Izraél nia oan sira la bele hateke ba Moisés nia oin tanba glória neʼebé nabilan husi ninia oin, maibé glória neʼe atu mohu lakon. 8 Entaun, buat neʼebé espíritu santu bele kumpre tenke iha glória neʼebé boot liu, loos ka lae? 9 Tanba se Ukun-Fuan neʼebé lori kastigu-mate iha glória boot, nuneʼe serbisu neʼebé halo ema atu sai nuʼudar ema loos tenke iha glória neʼebé boot liután. 10 Tuir loloos, buat neʼebé uluk simu glória agora lakon ona ninia glória tanba ida seluk iha glória boot liu nia. 11 Neʼe duni, se ida neʼebé atu mohu lakon lori mai ho glória, entaun ida neʼebé iha agora sei hetan glória boot liután.

12 Nuneʼe, tanba ita iha fiar neʼebé metin, ita koʼalia ho aten-brani, 13 no ami la halo hanesan Moisés kuandu nia taka nia oin ho hena atu nuneʼe Izraél nia oan sira labele hateke ba glória husi buat neʼebé sei mohu lakon. 14 Maibé sira-nia neon iha nakukun laran. Tanba toʼo agora, hena neʼe sei taka netik sira-nia oin bainhira sira lee aliansa tuan nian, basá hena neʼe halakon liuhusi deʼit Kristu. 15 Tuir loloos, toʼo agora kuandu sira lee Moisés nia livru, hena ida taka sira-nia laran. 16 Maibé kuandu ema ida fila fali ba Jeová, hena neʼe sei hasai tiha. 17 No Jeová mak Espíritu;* no sira neʼebé iha Jeová nia espíritu, sira sai livre ona. 18 No ita hotu, tanba la iha hena ida taka netik ita-nia oin, ita haleno Jeová nia glória hanesan espellu, no ita nakfila an ho glória ida ba glória seluk hodi sai ninia ilas, no ida-neʼe tuir buat neʼebé Jeová halo nuʼudar Espíritu* ida.

4 Neʼe duni, ami simu serbisu neʼe tuir Maromak nia laran-sadiʼa neʼebé nia hatudu ona ba ami, tan neʼe ami la rende an; 2 maibé ami husik tiha hahalok subasubar neʼebé halo moe, ami la laran-makerek, no ami la troka Maromak nia liafuan, maibé ami fó sai lia-loos hodi hatudu ezemplu diʼak ba ema hotu* iha Maromak nia oin. 3 No agora, se liafuan diʼak neʼebé ami fó sai mak taka netik hela ho hena, entaun neʼe taka deʼit ba sira neʼebé atu lakon, 4 sira mak ema fiar-laek neʼebé maromak mundu neʼe nian taka netik sira-nia neon, atu nuneʼe sira labele haree nabilan glória nian husi liafuan diʼak kona-ba Kristu, ida neʼebé Maromak nia ilas. 5 Tanba ami la haklaken kona-ba ami-nia an rasik, maibé kona-ba Kristu Jesus nuʼudar Naʼi, no katak ami mak imi-nia atan iha Jesus. 6 Tanba Maromak mak dehan: “Halo naroman nabilan husi nakukun laran”, no liuhusi Kristu nia oin nia leno ona ita-nia laran hodi halo nabilan ho matenek neʼebé furak husi Maromak.

7 Maibé, ami iha rikusoin iha sanan-rai nia laran, atu nuneʼe kbiit neʼebé la hanesan baibain mosu mai husi Maromak, laʼós husi ami rasik. 8 Terus oioin haleʼu ami husi fatin hotu, maibé ami bele book an; ami la hatene atu halo saida, maibé neʼe laʼós katak laiha dalan sai; 9 ema fó-terus ami, maibé ami la mesamesak; ema soe ami ba rai, maibé ami la rahun. 10 Iha ami-nia isin ami sempre hasoru perigu mate hanesan Jesus, atu nuneʼe ami-nia moris sai hanesan ho Jesus nian.* 11 Maski ami moris maibé ami-nia moris sempre iha perigu laran tanba Jesus. Ida-neʼe atu hatudu ba ema katak ami terus hanesan mós ho Jesus. 12 Nuneʼe, ami tenke hasoru perigu mate, hodi imi bele iha moris.

13 Neʼe mak buat neʼebé hakerek nanis ona: “Haʼu hatudu fiar, tan neʼe mak haʼu koʼalia.” No ami mós iha fiar hanesan neʼe, no tan neʼe mak ami koʼalia. 14 Basá ami hatene katak nia neʼebé fó moris-hiʼas ba Jesus sei fó moris-hiʼas mós ba ita hamutuk ho Jesus, no nia sei lori ami ho imi ba Jesus nia oin. 15 Tanba buat hotu neʼe mosu ba imi-nia diʼak, atu nuneʼe Maromak nia laran-diʼak neʼebé boot bele aumenta liután basá ema barak liu sei fó-agradese ba Maromak, no ida-neʼe lori glória barak liután ba nia.

16 Tan neʼe mak ami la rende an. Maski ami-nia isin sai fraku iha liʼur, maibé iha laran ami simu kbiit foun loroloron. 17 Tanba maski terus sira mak ba tempu uitoan deʼit no kmaan, maibé ida-neʼe lori glória ba ami, no glória neʼe boot liután no ba nafatin; 18 no ami la hateke ba buat neʼebé matan bele haree, maibé ba buat neʼebé matan la bele haree. Tanba buat neʼebé matan bele haree mak ba tempu uitoan deʼit, maibé buat neʼebé matan la bele haree mak ba nafatin.

5 Ita hatene katak ita-nia uma rai neʼe nian,* katak tenda neʼe, sei harahun tiha no Maromak sei fó ba ita uma ida neʼebé hela ba nafatin iha lalehan, uma neʼe laʼós halo ho ema nia liman. 2 Iha uma agora nian ita halerik, no ita hakarak namanas atu tau ita-nia hela-fatin neʼebé husi lalehan nuʼudar ita-nia hatais, 3 atu nuneʼe, kuandu ita tau ona ida-neʼe, ita la sai isin-tanan tan. 4 Tuir loloos, ita neʼebé sei hela iha tenda neʼe halerik no lori todan boot; laʼós tanba ita lakohi atu hasai ida-neʼe, maibé tanba ita hakarak atu tau fali ida seluk, hodi nuneʼe moris ba nafatin bele tolan tiha buat neʼebé sei mohu. 5 No ida neʼebé prepara ita ba ida-neʼe mak Maromak, neʼebé fó ita espíritu nuʼudar promesa kona-ba buat neʼebé atu mai.

6 Tan neʼe, ita aten-brani nafatin no hatene katak, nuʼudar ita sei hela iha ita-nia uma neʼe iha isin, ita dook husi Naʼi, 7 tanba ita laʼo hodi fiar, laʼós hodi haree. 8 Maibé ita aten-brani no hakarak atu husik isin neʼe no halo ita-nia uma ho Naʼi. 9 Tan neʼe, maski ita hela ho nia ka dook husi nia, ita-nia hakarak mak atu nia simu ita. 10 Tanba ita hotu tenke hamriik iha Kristu nia kadeira tesi-lia nian nia oin, atu nuneʼe ita ida-idak sei hetan kolen hodi tuir buat neʼebé ita halo kuandu ita iha isin, maski ida-neʼe diʼak ka aat.

11 Nuneʼe, tanba ami hatene atu hamtaʼuk Naʼi, ami kontinua book ema seluk atu fiar, no Maromak hatene didiʼak ami. Maibé, haʼu hein katak imi-nia laran* ajuda imi atu hatene didiʼak kona-ba ami. 12 Ami lakohi tan atu gaba an ba imi, maibé ami koʼalia buat sira-neʼe ba imi hodi book imi, atu nuneʼe imi bele hatán ba sira neʼebé gaba an kona-ba buat neʼebé iha liʼur maibé laʼós gaba an kona-ba buat neʼebé iha laran. 13 Basá se ami bulak karik, ida-neʼe tanba Maromak; se ami-nia neon moos, ida-neʼe ba imi. 14 Basá Kristu nia domin book ami makaʼas, no ida-neʼe mak ami hatene: Mane ida mate ba ema hotu; tanba loloos ema hotu mate ona; 15 no nia mate ba ema hotu atu nuneʼe sira neʼebé moris sei la moris tan ba sira-nia an rasik, maibé moris ba ida neʼebé mate ba sira no neʼebé moris hiʼas ona.

16 Tan neʼe, husi ohin ba oin ita la haree tan ema tuir isin. Maski se uluk ita haree Kristu tuir isin, maibé agora ita labele tan halo ida-neʼe. 17 Nuneʼe, se ema ruma sai ida deʼit ho Kristu, nia mak kriasaun foun ida; buat uluk nian liu tiha ona, no buat foun nian mosu ona. 18 Maibé buat hotu husi Maromak, ida neʼebé halo ita dame malu ho nia liuhusi Kristu no fó ita knaar hadame-malu nian, 19 katak Maromak halo mundu hadame malu ho nia liuhusi Kristu, hodi la sura sira-nia sala. No nia tau fiar ba ita hodi fó ba ita liafuan hadame-malu nian.

20 Nuneʼe ita mak Kristu nia embaixadór, neʼe hanesan Maromak bolu ema liuhusi ita. Tan neʼe, nuʼudar Kristu nia embaixadór ita husu: “Hadame malu ho Maromak bá.” 21 Ida neʼebé la hatene sala, Maromak halo nia sai nuʼudar sakrifísiu ba ita-nia sala, atu nuneʼe liuhusi nia ita bele sai ema loos iha Maromak nia oin.

6 Hodi serbisu hamutuk ho Maromak, ami mós husu namanas ba imi atu la simu Maromak nia laran-diʼak neʼebé boot ho saugati deʼit. 2 Tanba nia dehan: “Iha tempu neʼebé diʼak haʼu rona ó, no iha loron salvasaun nian haʼu ajuda ona ó.” Haree! Agora mak tempu diʼak neʼe. Haree! Agora mak loron salvasaun nian.

3 Ami la halo ema ida sidi kona-ba buat naran deʼit, atu nuneʼe ema la hetan sala ida ho ami-nia serbisu; 4 maibé iha buat hotu ami hatudu ami-nia an nuʼudar Maromak nia serbisu-naʼin hodi tahan susar no terus, hodi moris kiak, tahan iha situasaun neʼebé aat; 5 ema baku ami, ami tama komarka, ami hasoru ema-lubun neʼebé siʼak, ami serbisu makaʼas, la toba iha kalan, hamlaha. 6 Ami hatudu ami-nia an nuʼudar Maromak nia serbisu-naʼin hodi hatudu hahalok moos, matenek, pasiénsia, laran-diʼak, hodi espíritu santu, hodi domin neʼebé la laran-makerek, 7 hodi koʼalia buat neʼebé loos, hodi Maromak nia kbiit, hodi kaer kroʼat hahalok loos nian iha liman-loos no liman-karuk, 8 hodi glória no moe. Ema koʼalia aat no koʼalia diʼak kona-ba ami, ema haree ami nuʼudar lohidór maibé ami koʼalia buat loos, 9 ema haree ami nuʼudar ema fuik maibé Maromak hatene didiʼak ami, ema haree ami nuʼudar ema neʼebé merese atu mate maibé ami moris, maski ema fó dixiplina ba ami maibé ami la mate, 10 ema haree ami nuʼudar ema neʼebé triste maibé ami haksolok nafatin, nuʼudar ema kiak maibé ami halo ema barak sai riku, nuʼudar ema neʼebé la iha buat ida maibé ami iha buat hotu.

11 Ami loke ona ami-nia ibun hodi koʼalia ba imi ema Korinto sira, no ami loke ami-nia laran ba imi. 12 Ami la hanetik ami-nia domin ba imi, maibé imi hanetik imi-nia domin ba ami. 13 Entaun, haʼu koʼalia ba imi hanesan ba haʼu-nia oan sira: Haree ami bá hanesan ami haree imi; loke luan imi-nia laran bá.

14 Keta kesi imi-nia an hamutuk ho ema neʼebé laʼós fiar-naʼin. Basá oinsá mak hahalok loos bele liga ho hahalok aat? Ka oinsá mak naroman bele liga ho nakukun? 15 Liután neʼe, saida mak hanesan entre Kristu no Belial?* Ka saida mak hanesan entre ema fiar-metin no ema fiar-laek? 16 No oinsá mak Maromak nia templu bele liga ho estátua? Ita mak Maromak moris nia templu; hanesan Maromak rasik dehan: “Haʼu sei hela iha sira-nia leet no laʼo iha sira-nia leet, no haʼu sei sai sira-nia Maromak, no sira sei sai haʼu-nia povu.” 17 “‘Tan neʼe, sai husi sira-nia leet, no haketak imi-nia an’, Jeová dehan, ‘no keta* kona buat neʼebé la moos’”; “‘no haʼu sei simu imi’”. 18 “‘No haʼu sei sai aman ba imi, no imi sei sai oan-mane no oan-feto ba haʼu’, Jeová, Ida neʼebé iha Kbiit Boot Liu Hotu mak dehan.”

7 Nuneʼe, haʼu-nia maluk doben sira, tanba ita iha promesa sira-neʼe, mai ita hamoos ita-nia an husi buat hotu neʼebé hafoʼer isin no laran,* no sai santu loloos hodi taʼuk ba Maromak.

2 Fó fatin ba ami iha imi-nia laran. Ami la halo sala hasoru ema ida, ami la hakanek ema ida, ami la lohi ema ida atu hetan buat ruma. 3 Haʼu koʼalia ida-neʼe laʼós atu tesi lia ba imi. Neʼe duni, hanesan uluk haʼu dehan ona, imi mak iha ami-nia laran no tan neʼe ita sei mate hamutuk no moris hamutuk. 4 Haʼu bele koʼalia nakloke ba imi. Haʼu gaba an duni kona-ba imi. Haʼu-nia laran sente kmaan duni, haʼu sente haksolok duni iha ami-nia terus hotu.

5 Tuir loloos, kuandu ami toʼo iha Masedónia, ami la hetan kmaan, maibé ami nafatin hetan terus oioin. Ema kontra ami no ami mós hanoin barak kona-ba kongregasaun. 6 Maski nuneʼe, Maromak, ida neʼebé fó kmaan ba ema laran-kraik sira, fó kmaan ba ami bainhira Tito vizita* ami; 7 no ami sente kmaan laʼós deʼit tanba ninia vizita, maibé mós tanba ninia ksolok kona-ba imi; basá nia lori lia-menon ba ami katak imi hakarak tebes hasoru haʼu, no katak imi halerik no laran-manas atu haree haʼu; no tan neʼe haʼu sai haksolok liután.

8 Maski haʼu halo imi triste ho haʼu-nia karta uluk nian, maibé haʼu la sente sala kona-ba neʼe. Haʼu haree katak haʼu-nia karta uluk nian halo imi triste ba tempu uitoan. Foufoun haʼu sente la diʼak kona-ba neʼe, 9 maibé agora haʼu haksolok. Haʼu haksolok laʼós tanba haʼu halo imi triste, maibé tanba imi sai triste hodi hakribi sala. Basá imi sai triste tanba hanoin tuir Maromak, hodi nuneʼe imi la hetan kanek husi ami. 10 Tanba triste tuir Maromak lori ema atu hakribi sala hodi lori ba salvasaun no ita sei la arrepende kona-ba ida-neʼe; maibé triste tuir mundu lori ba mate. 11 Haree toʼok ba buat diʼak neʼebé imi hetan hodi sai triste tuir Maromak: Ida-neʼe book imi atu badinas, hamoos imi-nia an, laran-nakali kona-ba sala, sai taʼuk, hakarak tebes atu hakribi sala, sai laran-manas, halo loos buat neʼebé sala! Iha buat hotu imi hatudu imi-nia an moos kona-ba neʼe. 12 Maski haʼu hakerek ba imi, haʼu la halo ida-neʼe ba ema neʼebé halo sala, ka ba ida neʼebé hetan laran-kanek, maibé haʼu halo ida-neʼe hodi imi bele hatudu sai iha Maromak nia oin katak imi laran-manas atu rona ba ami-nia liafuan. 13 Tan ida-neʼe mak ami simu kmaan.

Liután neʼe, ami laʼós deʼit sente kmaan maibé ami haksolok liután tanba Tito nia ksolok, basá imi hotu halo nia* sente kmaan. 14 Tanba haʼu gaba imi ba nia, no haʼu la sai moe kona-ba buat neʼebé haʼu dehan; maibé hanesan buat hotu neʼebé ami hatoʼo ba imi mak loos, nuneʼe mós ami-nia gaba an ba Tito mós sai loos. 15 No mós, ninia domin ba imi sai boot liután nuʼudar nia hanoin fali kona-ba oinsá imi hotu halo tuir, no kona-ba oinsá imi simu nia ho respeitu. 16 Haʼu haksolok tanba iha dalan hotu haʼu sai aten-brani liuhusi imi.

8 No maun-alin sira, ami hakarak fó-hatene ba imi kona-ba Maromak nia laran-diʼak boot neʼebé hatudu ona ba kongregasaun sira iha Masedónia, 2 katak maski sira terus tanba hetan koko neʼebé makaʼas, sira sai nakonu ho ksolok no sira-nia situasaun kiak halo sira sai riku ho sira-nia laran-luak neʼebé boot. 3 Sira halo ida-neʼe tuir sira-nia kbiit; no haʼu fó sasin ho loloos katak neʼe liu fali sira-nia kbiit, 4 basá sira husu ami fila-fila ho hakarak rasik atu bele fó prezente laran-diʼak nian no hola parte atu serbí santu sira. 5 No loloos, sira fó prezente neʼe laʼós deʼit hanesan ami hanoin, maibé sira entrega sira-nia an rasik ba Naʼi no ba ami tuir Maromak nia hakarak. 6 Tan neʼe, ami fó laran-manas ba Tito atu halo hotu serbisu neʼebé nia rasik hahú ona iha imi-nia leet, katak halibur buat neʼebé imi fó ho hakarak rasik. 7 Tuir loloos, imi halo diʼak iha buat hotu: Imi fiar metin ona; imi iha kbiit atu koʼalia; imi iha matenek barak; imi hakaʼas an duni iha buat hotu neʼebé imi halo; no imi hadomi malu duni hanesan ami hadomi imi. Nuneʼe mós haʼu hein katak imi kontinua atu sai prontu hodi fó prezente hanesan neʼe husi laran.

8 Haʼu koʼalia ida-neʼe laʼós nuʼudar ukun-fuan ba imi, maibé haʼu hakarak imi atu hatene kona-ba ema seluk nia serbisu makaʼas no oinsá sira prontu atu fó buat ruma. Haʼu mós hakarak atu haree imi-nia domin neʼebé loloos. 9 Tanba imi hatene ita Naʼi Jesus Kristu nia laran-diʼak neʼebé boot, katak maski nia riku maibé nia sai kiak tanba imi-nia diʼak, atu nuneʼe imi bele sai riku liuhusi ninia kiak.

10 No haʼu-nia hanoin mak neʼe: Serbisu neʼe sei lori buat diʼak ba imi. Tanba tinan ida liubá, imi laʼós deʼit hahú serbisu neʼe maibé imi mós hatudu katak imi hakarak tebes atu halo ida-neʼe. 11 No agora, halo kompletu bá buat neʼebé imi hahú ona atu halo. Atu nuneʼe imi bele halo hotu serbisu neʼe tuir imi-nia kbiit, hanesan uluk imi iha hakarak atu halo ida-neʼe. 12 Maromak kontente se ema fó buat ruma husi laran, tanba Maromak hakarak ema atu fó tuir buat neʼebé nia iha, laʼós tuir buat neʼebé nia la iha. 13 Basá haʼu lakohi atu halo fasil ba ema seluk no halo susar ba imi; 14 atu nuneʼe buat neʼebé imi iha resin bele taka sira-nia kuran, no buat neʼebé sira iha resin bele taka imi-nia kuran, hodi ita hotu bele sai hanesan deʼit. 15 Hanesan hakerek nanis ona: “Ema neʼebé iha buat barak, nia la iha barak liu, no ema neʼebé iha uitoan, nia la kuran liu.”

16 No agora, ami agradese ba Maromak katak Tito mós hanoin tebes imi hanesan ami hanoin tebes imi, 17 tanba nia simu buat neʼebé ami hatete ba nia, no nia mós hakarak tebes halo buat neʼebé ami husu, tan neʼe ho nia hakarak rasik nia sei laʼo ba imi. 18 Maibé ami mós haruka hamutuk ho nia, ita-nia alin neʼebé hetan gaba iha kongregasaun hotu tanba buat neʼebé nia halo ona kona-ba liafuan diʼak. 19 Laʼós neʼe deʼit, maibé kongregasaun mós hili nia atu laʼo hamutuk ho ami atu lori prezente neʼebé ami sei fahe ba Naʼi nia glória no neʼe mós hatudu katak ami prontu atu ajuda ema seluk. 20 Tan neʼe, ami kuidadu atu ema la hetan sala iha ami kona-ba knaar neʼebé ami simu atu fahe prezente neʼebé imi fó ho laran. 21 Tanba ami “tau matan didiʼak ba buat hotu ho laran-moos, laʼós deʼit iha Jeová nia oin, maibé mós iha ema nia oin”.

22 Liután neʼe, hamutuk ho sira ami haruka ami-nia alin neʼebé hatudu ona katak nia laran-manas iha buat barak, maibé agora nia laran-manas liután tanba nia tau fiar ba imi. 23 Maibé se imi iha pergunta ruma kona-ba Tito, haʼu hakarak fó-hatene imi katak nia mak haʼu-nia maluk serbisu-naʼin no ami halo serbisu hamutuk ba imi-nia diʼak; ka se iha pergunta ruma kona-ba ami-nia maun-alin, sira mak apóstolu husi kongregasaun sira no sira lori glória ba Kristu. 24 Tan neʼe, hatudu imi-nia domin ba sira no hatudu ba sira tansá mak ami gaba imi ba kongregasaun sira.

9 No kona-ba imi-nia ajuda ba santu sira, haʼu la presiza hakerek ba imi, 2 tanba haʼu hatene katak imi prontu duni atu ajuda, no haʼu gaba imi ba ema Masedónia sira. Haʼu fó-hatene sira katak ba tinan ida ona, imi iha Akaia prontu atu ajuda. No imi-nia laran-manas neʼe book ona sira barak. 3 Maibé haʼu haruka maun-alin sira ba imi, atu nuneʼe imi bele hatudu katak ami-nia gaba an kona-ba imi laʼós saugati deʼit, maibé katak imi prontu duni, hanesan haʼu rasik dehan ona katak imi prontu. 4 Lae karik, se ema Masedónia sira toʼo ba imi no haree katak imi seidauk prontu, ami, no mós imi, sei sai moe tanba ami-nia fiar metin ba imi. 5 Tan neʼe mak haʼu hanoin katak haʼu presiza fó laran-manas ba maun-alin sira atu laʼo ba imi ulukliu ami, atu bele halibur prezente boot neʼebé imi promete ona, hodi nuneʼe imi-nia prezente sei sai prontu no hatudu katak imi fó ho laran-luak no laʼós tanba ami obriga.

6 Maibé kona-ba neʼe, ema neʼebé kari uitoan sei koʼa mós uitoan; no ema neʼebé kari barak sei koʼa mós barak. 7 Diʼak atu ema ida-idak fó tuir buat neʼebé nia deside ona iha laran, laʼós ho laran-todan ka obriga an, tanba Maromak hadomi ema neʼebé fó ho laran-ksolok.

8 Liután neʼe, Maromak bele halo ninia laran-diʼak neʼebé boot sai barak liután iha imi, atu nuneʼe imi sempre iha buat neʼebé imi presiza, no imi mós sei iha buat barak ba hahalok diʼak hotu. 9 (Hanesan hakerek nanis ona: “Nia fahe ho laran-luak, nia fó ona ba ema kiak sira, ninia hahalok loos kontinua ba nafatin.” 10 No ida neʼebé fó fini barak ba ema neʼebé kari no fó paun ba ema atu han, nia sei fó fini no aumenta fini barak liután ba imi atu kari no nia mós sei aumenta imi-nia hahalok loos.) 11 Maromak haraik bensaun barak ba imi atu nuneʼe imi mós bele hatudu laran-luak iha dalan oioin, no liuhusi ami-nia serbisu mak imi-nia laran-luak neʼe sei book ema atu fó-agradese ba Maromak; 12 tanba serbisu* neʼe laʼós deʼit atu fó buat neʼebé santu sira presiza, maibé mós atu book ema barak hodi fó-agradese ba Maromak. 13 Sira hahiʼi Maromak tanba imi-nia ajuda neʼe hatudu katak imi halo tuir duni liafuan diʼak neʼebé imi fó sai kona-ba Kristu, no mós tanba ho laran-luak imi fó ona buat barak ba sira no ba ema hotu; 14 no sira harohan ba Maromak kona-ba imi no sira iha domin ba imi tanba Maromak nia laran-diʼak neʼebé boot ba imi.

15 Obrigadu ba Maromak tanba ninia prezente boot liu neʼebé nia fó ona ba ita.

10 No haʼu, Paulo, haʼu husu imi ho Kristu nia laran-maus no laran-diʼak atu imi simu buat neʼebé haʼu dehan ba imi. No maski imi haree haʼu nuʼudar ema fraku kuandu haʼu iha imi-nia leet, no nuʼudar aten-brani kuandu dook husi imi, 2 maibé, haʼu hein katak kuandu haʼu hamutuk ho imi, haʼu la presiza siʼak makaʼas hasoru sira neʼebé hanoin katak ami halaʼo ami-nia moris hodi tuir mundu nia hanoin. 3 Basá maski ami laʼo iha isin, maibé ami la halo funu tuir isin. 4 Tanba kroʼat sira neʼebé ami uza ba funu laʼós isin nian, maibé kbiit husi Maromak hodi sobu rahun moru neʼebé metin. 5 Tanba ami sobu rahun hanoin neʼebé sala no ideia hotu neʼebé foti an hasoru Maromak nia matenek; neʼe hanesan ita kaer no lori ema nia hanoin hotu hodi halo tuir Kristu; 6 no kuandu imi hotu hatudu ona katak imi halo tuir ho loloos, ami sei prontu atu fó kastigu ba sira hotu neʼebé lakohi atu halo tuir.

7 Imi tesi lia ba buat ruma tuir deʼit buat neʼebé haree husi liʼur. Se ema ida fiar katak nia mak Kristu nian, nia tenke hanoin kona-ba ida-neʼe: Nuʼudar nia mak Kristu nian, nuneʼe mós ho ami. 8 No Naʼi fó kbiit ba ami laʼós atu hakanek imi maibé atu hametin imi, no maski haʼu gaba an uitoan kona-ba kbiit neʼe, maibé haʼu sei la sente moe. 9 Haʼu koʼalia ida-neʼe tanba haʼu lakohi halo imi taʼuk liuhusi haʼu-nia karta. 10 Tanba sira dehan: “Ninia karta sira mak makaʼas no iha kbiit, maibé kuandu nia rasik iha neʼe, nia fraku no ninia koʼalia la iha folin.” 11 Ema neʼe tenke hanoin ida-neʼe, katak buat neʼebé ami dehan iha ami-nia karta kuandu ami dook husi imi, ami sei halo nuneʼe kuandu ami iha imi-nia leet. 12 Basá ami la brani atu dehan katak ami hanesan deʼit ho sira neʼebé foti sira-nia an, no ami la tesi lia ba ami-nia an tuir buat neʼebé sira halo. Maibé kuandu sira kompara sira-nia an tuir deʼit sira-nia hanoin rasik no tesi lia ba sira-nia an rasik, sira hatudu katak sira la hatene buat ida.

13 Ami sei la gaba an kona-ba buat neʼebé ami la halo, maibé ami gaba an kona-ba knaar neʼebé ami simu husi Maromak, no ami-nia knaar neʼe inklui mós imi. 14 Tuir loloos, uluk kuandu ami toʼo ba imi, ami la halo buat neʼebé Maromak la haruka ami atu halo, maibé ami mak ema primeiru neʼebé fó sai liafuan diʼak kona-ba Kristu ba imi. 15 No ami gaba an kona-ba buat neʼebé ami halo, laʼós kona-ba buat neʼebé ema seluk halo. Ami hein katak imi-nia fiar sei aumenta ba beibeik, atu nuneʼe imi sei hafolin duni serbisu neʼebé ami halo ona. Ida-neʼe sei book ami atu aumenta liután ami-nia serbisu, 16 katak serbisu atu fó sai liafuan diʼak iha rai sira seluk, atu nuneʼe ami sei la gaba an kona-ba serbisu neʼebé ema seluk halo ona tuir knaar neʼebé sira simu. 17 “Maibé ema neʼebé gaba an, nia tenke gaba an iha Jeová.” 18 Basá Jeová la simu ema neʼebé foti nia an rasik, maibé nia simu ema neʼebé nia rasik mak foti.

11 Haʼu hein katak imi hatudu pasiénsia tanba haʼu gaba an uitoan. Maibé, tuir loloos, imi hatudu duni pasiénsia ba haʼu! 2 Basá haʼu hanoin tebes imi hanesan Maromak hanoin imi,* tanba haʼu rasik entrega imi hodi kaben ho laʼen ida, neʼe mak Kristu, no haʼu hakarak imi atu fó imi-nia an ba nia nuʼudar virjen ida. 3 Maibé haʼu taʼuk katak, nuʼudar samea ho matenek lohi Eva, ema mós bele hafoʼer imi-nia neon no lori imi dook husi hahalok laran-moos no santu neʼebé tuir Kristu. 4 Tanba se ema ida mai no haklaken kona-ba Jesus neʼebé oin-seluk husi ida neʼebé ami haklaken, ka fó espíritu oin-seluk husi ida neʼebé imi simu ona, ka haklaken liafuan diʼak oin-seluk husi ida neʼebé imi rona ona, imi simu ema neʼe. 5 Tanba haʼu hanoin katak haʼu la kiʼik liu fali imi-nia apóstolu boot sira iha buat naran deʼit. 6 No maski haʼu la hatene atu koʼalia ho didiʼak, maibé haʼu iha duni matenek; ami fó sai momoos matenek neʼe ba imi iha situasaun hotu no iha buat hotu.

7 Haʼu haksolok atu fó sai liafuan diʼak kona-ba Maromak ba imi hodi la simu kolen. Maibé, haʼu halo sala tanba haʼu haraik an atu imi bele simu hahiʼi ka? 8 Haʼu simu ajuda husi kongregasaun seluk no neʼe hanesan haʼu naʼok husi sira atu bele serbí imi; 9 maibé kuandu haʼu hamutuk ho imi no haʼu presiza buat ruma, haʼu la hatodan ema ida, basá maun-alin sira neʼebé mai husi Masedónia fó buat barak neʼebé haʼu presiza. Sin, iha buat hotu haʼu kuidadu atu la hatodan imi no haʼu sei kontinua halo nuneʼe. 10 Se haʼu nafatin sai nuʼudar Kristu nia dixípulu, la iha buat ida neʼebé bele hanetik haʼu atu gaba an kona-ba neʼe iha Akaia tomak. 11 Tan razaun saida? Tanba haʼu la hadomi imi ka? Maromak hatene haʼu hadomi imi.

12 Iha ema balu neʼebé gaba an no dehan katak sira apóstolu hanesan ami. Entaun, buat neʼebé haʼu halo ona haʼu sei kontinua halo hodi nuneʼe haʼu bele halakon sira-nia razaun atu gaba an. 13 Tanba ema sira hanesan neʼe mak apóstolu falsu, sira lohi ema seluk no troka sira-nia an sai nuʼudar Kristu nia apóstolu. 14 No haʼu la hakfodak kona-ba neʼe, basá Satanás rasik kontinua hatudu nia an nuʼudar anju naroman nian. 15 Tan neʼe mak haʼu la hakfodak kuandu ninia ema sira mós hatudu sira-nia an nuʼudar serbisu-naʼin ba hahalok loos. Maibé sira-nia rohan sei tuir sira-nia hahalok.

16 Haʼu dehan fali, keta hanoin katak haʼu bulak. Maibé se ema ida hanoin nuneʼe, simu haʼu bá nuʼudar ema bulak, atu nuneʼe haʼu mós bele gaba an uitoan. 17 No buat neʼebé haʼu koʼalia agora laʼós tuir Naʼi nia ezemplu, maibé hanesan ema bulak ida, hodi gaba an nuʼudar ema neʼebé fiar an demais. 18 Tanba ema barak gaba an tuir isin, haʼu mós sei gaba an. 19 Imi “matenek” loos hodi simu deʼit sira neʼebé hanesan ema bulak. 20 Tuir loloos, imi simu deʼit ema neʼebé halo imi nuʼudar atan, ema neʼebé tolan imi-nia rikusoin, ema neʼebé hadau buat neʼebé imi iha, ema neʼebé foti nia an iha imi leet, no ema neʼebé tuku imi-nia oin.

21 Haʼu sente moe atu koʼalia buat sira-neʼe, tanba neʼe katak ami sai fraku.

Maibé se ema ruma aten-brani, haʼu mós bele sai aten-brani, no haʼu koʼalia neʼe hanesan ema bulak ida. 22 Sira ema ebreu ka? Haʼu mós ema ebreu ida. Sira ema Izraél ka? Haʼu mós ema Izraél ida. Sira Abraão nia bei-oan ka? Haʼu mós Abraão nia bei-oan ida. 23 Sira Kristu nia serbisu-naʼin ka? Haʼu hatán hanesan ema bulak ida, haʼu Kristu nia serbisu-naʼin boot liu: Haʼu halo ona serbisu barak liu, tama komarka dala barak liu, hetan baku dala barak, no mós dala barak besik mate. 24 Ba dala lima haʼu hetan tuku hamutuk tolunulu-resin-sia* husi ema judeu, 25 dala tolu ema baku haʼu ho ai-tonka, dala ida ema tuda haʼu ho fatuk, dala tolu ró neʼebé haʼu saʼe naksobu, kalan ida no loron ida haʼu iha tasi klaran; 26 haʼu halo viajen barak, no haʼu hasoru perigu husi mota, perigu husi naʼok-teen sira, perigu husi haʼu-nia nasaun rasik, perigu husi nasaun sira seluk, perigu iha sidade, perigu iha rai-fuik, perigu iha tasi, no perigu iha maun-alin falsu sira-nia leet. 27 Haʼu halo serbisu makaʼas no hakaʼas an, dala barak la toba iha kalan, hamlaha no hamrook, dala barak la iha ai-han, malirin no roupa la toʼo.

28 Laʼós buat sira-neʼe deʼit, maibé mós loron-loron haʼu hanoin barak tanba kongregasaun hotu. 29 Haʼu sai laran-taridu se ema ida fraku, no haʼu sai laran-nakali se ema ida halo ema seluk sidi.

30 Se haʼu tenke gaba an, haʼu sei gaba an kona-ba buat sira neʼebé hatudu haʼu-nia fraku. 31 Naʼi Jesus nia Maromak no Aman, Ida-neʼebé sei hetan hahiʼi ba nafatin, nia hatene katak haʼu la bosok. 32 Iha Damasku, governadór neʼebé iha Liurai Aretas nia okos, nia tau matan ba sidade no nia hakarak atu kaer haʼu, 33 maibé maun-alin sira hatún haʼu liuhusi janela iha moru sidade nian hodi uza raga ida no haʼu halai husi nia liman.

12 Haʼu tenke gaba an duni. Maibé agora haʼu sei koʼalia kona-ba vizaun sira no buat neʼebé Naʼi hatudu sai ba haʼu, maski koʼalia kona-ba neʼe la lori buat diʼak ba haʼu. 2 Haʼu hatene mane ida neʼebé nuʼudar Kristu nia dixípulu. Tinan sanulu-resin-haat liubá, Naʼi lori nia ba lalehan terseiru nian, maski neʼe iha isin ka laʼós iha isin, haʼu la hatene, maibé Maromak mak hatene. 3 Sin, haʼu hatene mane neʼe, no maski neʼe iha isin ka laʼós iha isin, haʼu la hatene, maibé Maromak mak hatene. 4 No Naʼi kaer nia hodi lori nia ba paraízu* no nia rona liafuan neʼebé la bele temi no sala ba ema ida atu dehan sai. 5 Haʼu sei gaba ema hanesan neʼe, maibé haʼu la gaba haʼu-nia an rasik, haʼu gaba deʼit kona-ba haʼu-nia fraku sira. 6 Maibé, se haʼu hakarak gaba an, haʼu sei la koʼalia hanesan ema bulak, tanba haʼu sei koʼalia lia-loos. Maski nuneʼe haʼu sei la halo ida-neʼe, atu ema ida labele gaba haʼu liu fali buat neʼebé nia haree iha haʼu ka nia rona husi haʼu. 7 Ema ida la bele hanoin liu kona-ba haʼu tanba vizaun furak sira neʼebé haʼu simu.

No haʼu simu ai-tarak iha haʼu-nia isin atu haʼu la sai foti-an liu; ai-tarak neʼe mak anju ida husi Satanás neʼebé kontinua basa haʼu, atu nuneʼe haʼu la sai foti-an demais. 8 Tan neʼe, ba dala tolu haʼu husu makaʼas ba Naʼi kona-ba neʼe, atu bele hasai tiha neʼe husi haʼu; 9 maski nuneʼe nia dehan ba haʼu: “Haʼu-nia laran-diʼak neʼebé boot toʼo ona ba ó; tanba haʼu-nia kbiit sai kompletu iha ó-nia fraku.” Tan neʼe, haʼu kontente atu gaba an kona-ba haʼu-nia fraku, atu nuneʼe Kristu nia kbiit bele hela iha haʼu hanesan tenda neʼebé taka haʼu. 10 Neʼe duni, tan Kristu mak haʼu haksolok iha haʼu-nia fraku, iha tempu neʼebé ema koʼalia aat haʼu, iha tempu neʼebé haʼu presiza ajuda, iha terus no susar laran. Tanba kuandu haʼu fraku, haʼu iha kbiit.

11 Haʼu sai ona hanesan ema bulak tan imi. Imi obriga haʼu atu halo nuneʼe, basá imi la koʼalia kona-ba buat diʼak neʼebé haʼu halo ona. No haʼu la kiʼik liu fali imi-nia apóstolu boot sira iha buat naran deʼit, maski haʼu la vale buat ida. 12 Tuir loloos, imi rasik haree ona prova neʼebé haʼu hatudu iha imi-nia leet kona-ba haʼu-nia knaar nuʼudar apóstolu. Basá haʼu hatudu ona ida-neʼe hodi tahan buat barak, hodi halo milagre, no liuhusi sinál furak no hahalok boot oioin. 13 Basá iha dalan saida mak imi kiʼik liu fali kongregasaun seluk? Tuir loloos, iha dalan ida deʼit, neʼe mak haʼu rasik la sai nuʼudar buat todan ba imi. Favór ida, fó perdua ba haʼu kona-ba sala neʼe.

14 Haree! Agora mak dala terseiru neʼebé haʼu prontu ona atu laʼo ba imi, no dala ida tan haʼu sei la hatodan imi. Tanba haʼu la buka imi-nia rikusoin, maibé haʼu buka imi; basá oan sira la rai rikusoin ba sira-nia inan-aman, maibé inan-aman mak rai ba oan sira. 15 Kona-ba haʼu, haʼu kontente tebes atu fó buat hotu no fó haʼu-nia an rasik ba imi-nia moris. Se haʼu hadomi imi liután, haʼu merese atu simu domin neʼebé kiʼik liu fali ida-neʼe ka lae? 16 No maski haʼu la hatodan imi, maibé imi dehan katak haʼu “lohi” no haʼu kaer imi “liuhusi lasu”. 17 Haʼu la buka atu simu buat ruma husi imi liuhusi sira neʼebé haʼu haruka, loos ka lae? 18 Haʼu husu Tito atu laʼo ba imi no haʼu haruka maun-alin ida hamutuk ho nia. Tito la buka atu simu buat ruma husi imi, loos ka lae? Ami laʼo ho hanoin ida deʼit, loos ka lae? Ami laʼo tuir ain-fatin neʼebé hanesan, loos ka lae?

19 Nuʼudar imi lee karta neʼe, imi hanoin katak ami koʼalia ba imi hodi defende ami-nia an ka? Maibé, maluk doben sira, nuʼudar Kristu nia dixípulu ami koʼalia buat loos iha Maromak nia oin, no buat hotu neʼebé ami halo mak atu harii imi. 20 Tanba haʼu taʼuk katak kuandu haʼu toʼo, imi-nia hahalok sei la tuir buat neʼebé haʼu hakarak no haʼu-nia hahalok mós la tuir imi-nia hakarak; sin, haʼu taʼuk katak imi sei istori malu, laran-moras ba malu, hirus malu, buka atu manán deʼit, koʼalia aat malu, konta ema nia vida, foti an, no halo runguranga. 21 Karik, kuandu haʼu toʼo ba imi, haʼu-nia Maromak sei hamoe haʼu iha imi-nia oin, no haʼu tenke tanis kona-ba ema barak neʼebé uluk halo sala maibé seidauk arrepende an husi sira-nia hahalok foʼer, sala-foʼer,* no hahalok neʼebé la iha moe neʼebé sira toman atu halo.

13 Ida-neʼe mak dala terseiru neʼebé haʼu prontu atu bá vizita imi. “Ita bele hametin lia hotu liuhusi sasin naʼin-rua ka tolu nia liafuan.” 2 Maski agora haʼu dook husi imi, maibé imi bele haree haʼu-nia liafuan sira-neʼe hanesan haʼu hamutuk ho imi ba dala segundu. No dala ida tan haʼu fó avizu nanis ba sira neʼebé uluk halo sala, no mós ba sira hotu, katak se haʼu bá fali, haʼu sei la husik ema ida atu hasees an husi dixiplina. 3 Hodi halo nuneʼe haʼu sei hatudu ba imi katak Kristu koʼalia liuhusi haʼu. No Kristu laʼós fraku iha imi-nia leet, maibé nia hatudu kbiit boot. 4 Tuir loloos, ema hedi nia tanba fraku,* maibé nia moris fali tanba Maromak nia kbiit. No ami mós sai fraku hamutuk ho nia, maibé ami sei moris hamutuk ho nia liuhusi Maromak nia kbiit neʼebé mós iha imi.

5 Kontinua koko imi-nia an atu hatene se imi hela iha fiar ka lae, kontinua haree didiʼak imi ema oinsá. Ka, imi hatene ka lae katak Jesus Kristu ida deʼit ho imi? Maibé se Maromak la simu ona imi, Kristu laʼós ida deʼit ho imi. 6 Haʼu hein atu imi sei hatene katak Maromak simu ami.

7 No ami halo orasaun ba Maromak atu imi la halo sala ruma, neʼe laʼós atu ema seluk bele hanoin katak Maromak simu ami, maibé atu imi bele halo buat neʼebé diʼak, maski ema hanoin katak Maromak la simu ami. 8 Basá ami la bele halo buat ida kontra lia-loos, maibé ami halo deʼit buat neʼebé apoia lia-loos. 9 Ami haksolok duni kuandu ami fraku no imi iha kbiit; no ami harohan katak imi sei hadiʼa imi-nia hanoin. 10 Tan neʼe mak haʼu hakerek buat sira-neʼe kuandu haʼu dook husi imi, atu nuneʼe kuandu haʼu toʼo ba imi, haʼu la presiza uza haʼu-nia kbiit iha dalan neʼebé makaʼas, tanba Naʼi fó kbiit neʼe mai haʼu atu harii laʼós atu harahun.

11 Ikusliu maun-alin sira, kontinua atu haksolok bá, atu hadiʼa imi-nia hanoin, atu simu kmaan, atu iha hanoin neʼebé hanesan, atu moris iha dame laran; no Maromak domin no dame nian sei hamutuk ho imi. 12 Kumprimenta malu ho reʼi nuʼudar maun-alin. 13 Santu sira hotu haruka sira-nia kumprimenta ba imi.

14 Haʼu harohan katak Naʼi Jesus Kristu nia laran-diʼak neʼebé boot, no Maromak nia domin, no espíritu santu* neʼebé haraik tiha ba ita hotu sei hamutuk ho imi.

[Nota–rodapé]