Galásia

1 Husi Paulo, neʼebé sai nuʼudar apóstolu ida laʼós tanba ema mak hili no laʼós liuhusi ema ida, maibé liuhusi Jesus Kristu no Aman Maromak, ida neʼebé fó moris-hiʼas fali ba Jesus husi mate; 2 haʼu no maun-alin hotu neʼebé hamutuk ho haʼu, hakerek ba kongregasaun sira iha Galásia:

3 Haʼu harohan katak ita-nia Aman Maromak no Naʼi Jesus Kristu sei hatudu laran-diʼak no haraik dame ba imi. 4 Jesus fó nia an rasik tanba ita-nia sala atu nuneʼe nia bele salva ita husi mundu aat neʼe tuir ita-nia Aman Maromak nia hakarak. 5 Fó glória nafatin ba Maromak. Amen.

6 Haʼu hakfodak tanba imi lalais liu atu fila kotuk ba Ida neʼebé bolu imi liuhusi Kristu nia laran-diʼak neʼebé boot, hodi simu fali liafuan diʼak seluk. 7 Maibé la iha liafuan diʼak seluk; só iha deʼit ema balu neʼebé hamosu problema no hakarak atu koʼalia bobar kona-ba liafuan diʼak Kristu nian. 8 Maibé, se ami ka anju ida husi lalehan fó sai ba imi liafuan diʼak neʼebé la hanesan ho liafuan diʼak neʼebé ami fó sai ona ba imi, nia hetan malisan bá. 9 Hanesan ami dehan ona iha leten, haʼu mós dehan fali katak, ema naran deʼit neʼebé fó sai ba imi liafuan diʼak neʼebé la hanesan ida neʼebé imi simu, nia hetan malisan bá.

10 Tuir loloos, haʼu buka atu halo kontente ema ka halo kontente Maromak? Se haʼu buka atu halo kontente ema, haʼu la bele sai Kristu nia atan. 11 Haʼu hakarak imi hatene, maun-alin sira, katak liafuan diʼak neʼebé haʼu fó sai ba imi laʼós husi ema; 12 tanba haʼu la simu ida-neʼe husi ema, no laʼós ema mak hanorin ba haʼu, maibé Jesus Kristu rasik fó sai ida-neʼe.

13 Imi rona tiha ona kona-ba haʼu-nia hahalok kuandu haʼu sei tuir relijiaun judeu nian, katak haʼu fó-terus makaʼas ba Maromak nia kongregasaun no koko atu halakon ida-neʼe; 14 no iha relijiaun judeu nian haʼu laʼo ba oin diʼak liu fali sira neʼebé tinan hanesan haʼu iha haʼu-nia nasaun, basá haʼu laran-manas liu kona-ba beiʼala sira-nia lisan. 15 Maibé Maromak, ida neʼebé halo haʼu moris* no bolu haʼu liuhusi ninia laran-diʼak neʼebé boot, nia hanoin katak diʼak 16 atu hatudu sai ninia Oan liuhusi haʼu, atu nuneʼe haʼu bele fó sai liafuan diʼak kona-ba nia ba nasaun sira. Kuandu nia hili haʼu, haʼu la husu konsellu husi ema ruma. 17 No haʼu mós la saʼe ba Jeruzalein atu hasoru sira neʼebé sai apóstolu ulukliu haʼu, maibé haʼu laʼo ba Arábia, no tuirmai haʼu fila fali ba Damasku.

18 No tinan tolu depois neʼe, haʼu saʼe ba Jeruzalein atu vizita Cefas, no haʼu hela ho nia ba loron sanulu-resin-lima. 19 Maibé haʼu la hasoru apóstolu sira seluk, só deʼit Tiago Naʼi nia alin. 20 No haʼu hatete ba imi iha Maromak nia oin katak buat sira neʼebé haʼu hakerek ba imi laʼós bosok.

21 Depois neʼe, haʼu laʼo ba área Síria no Silísia nian. 22 Maibé Kristu nia kongregasaun sira iha Judeia la koñese haʼu; 23 sira rona deʼit husi ema seluk dehan: “Mane neʼebé uluk fó-terus ba ita agora fó sai liafuan diʼak kona-ba fiar neʼebé uluk nia koko atu halakon.” 24 Tan neʼe, sira hahú fó glória ba Maromak tanba haʼu.

2 No depois tinan sanulu-resin-haat liu tiha, haʼu laʼo fali ba Jeruzalein hamutuk ho Barnabé, no haʼu lori mós Tito. 2 Haʼu saʼe ba Jeruzalein tanba Naʼi hatudu sai mai haʼu katak haʼu tenke bá. No haʼu konta ba sira kona-ba liafuan diʼak neʼebé haʼu haklaken iha nasaun sira-nia leet. Maibé haʼu konta neʼe mesamesak ba mane sira neʼebé nuʼudar ulun-naʼin, tanba haʼu hakarak hatene se haʼu-nia serbisu uluk nian ka agora nian saugati deʼit ka lae. 3 No kona-ba Tito, neʼebé laʼo hamutuk ho haʼu, ema la obriga nia atu hetan sirkunsizaun, maski nia ema gregu ida. 4 Maibé problema neʼe mosu tanba maun-alin falsu sira neʼebé tama ba kongregasaun nuʼudar espiaun. Sira hakarak atu estraga ami-nia liberdade neʼebé ami iha tanba sai ida deʼit ho Kristu Jesus. Sira hakarak obriga ami atu sai fali atan ba ukun-fuan. 5 No kona-ba ema sira-neʼe, ami la hakruʼuk an ba sira, maski ba tempu uitoan deʼit mós lae, atu nuneʼe lia-loos husi liafuan diʼak bele kontinua hela iha imi.

6 Maibé kona-ba sira neʼebé nuʼudar ulun-naʼin, tuir loloos ulun-naʼin sira-neʼe la hanorin buat neʼebé foun ba haʼu. Sin, maski uluk sira mak ema importante, maibé neʼe la folin ba haʼu, tanba Maromak la haree ema tuir deʼit buat neʼebé iha liʼur. 7 Maibé, sira haree katak haʼu simu ona knaar atu fó sai liafuan diʼak ba ema neʼebé la hetan sirkunsizaun, hanesan Pedro mós simu ona knaar atu haklaken ba ema neʼebé hetan sirkunsizaun. 8 Tanba Ida neʼebé fó kbiit ba Pedro atu halaʼo knaar nuʼudar apóstolu ba ema neʼebé hetan sirkunsizaun, nia mós fó kbiit ba haʼu atu halaʼo knaar ba ema husi nasaun sira seluk; 9 sin, kuandu sira hatene katak Maromak fó ninia laran-diʼak neʼebé boot ba haʼu, entaun Tiago, Cefas, no João, neʼebé hanesan ai-riin iha kongregasaun, sira tula sira-nia liman-loos ba haʼu no Barnabé, hodi hatudu katak sira apoia ami atu halaʼo knaar ba nasaun sira, maibé sira sei halaʼo knaar ba ema neʼebé hetan ona sirkunsizaun. 10 Buat ida deʼit neʼebé sira husu ba ami mak atu hanoin kona-ba ema kiak sira. No haʼu hakaʼas an ona atu halo ida-neʼe.

11 Maibé, kuandu Cefas toʼo iha Antiokia, haʼu hasoru nia no koʼalia nakloke ba nia, katak nia halo buat neʼebé la loos. 12 Tanba antes ema sira neʼebé Tiago haruka toʼo mai, nia toman atu han hamutuk ema husi nasaun seluk; maibé kuandu sira toʼo ona, nia para atu halo ida-neʼe no haketak nia an, tanba taʼuk sira neʼebé hetan ona sirkunsizaun. 13 Ema judeu sira seluk mós halo tuir ninia hahalok laran-makerek neʼe, toʼo Barnabé mós halo tuir sira. 14 Maibé kuandu haʼu haree katak sira la laʼo iha lia-loos tuir liafuan diʼak, haʼu dehan ba Cefas iha sira hotu nia oin: “Ó ema judeu, maibé ó moris hanesan ema husi nasaun seluk, laʼós hanesan ema judeu, se nuneʼe, oinsá mak ó bele book ema husi nasaun seluk atu moris tuir toman judeu nian?”

15 Ita neʼebé moris mai nuʼudar ema judeu, no laʼós nuʼudar sala-naʼin husi nasaun seluk, 16 ita hatene katak ema ida bele sai loos iha Maromak nia oin, laʼós liuhusi ukun-fuan, maibé liuhusi deʼit fiar ba Kristu Jesus. Entaun ita tau fiar ba Kristu Jesus, atu ita bele sai ema loos liuhusi fiar iha Kristu, no laʼós hodi halo tuir ukun-fuan, tanba ema ida la bele sai ema loos hodi halo tuir ukun-fuan. 17 No se ema haree ita hanesan ema sala-naʼin tanba ita buka atu sai ema loos iha Maromak nia oin liuhusi Kristu, entaun Kristu mak book ema atu halo sala ka? Lae duni! 18 Tanba se haʼu harii fali buat neʼebé haʼu rasik harahun, haʼu hatudu katak haʼu kontra ukun-fuan. 19 No hodi simu ukun-fuan, haʼu mate ona tuir ukun-fuan, atu nuneʼe haʼu bele moris ba Maromak. 20 No haʼu hedi tiha hamutuk ho Kristu. Entaun agora laʼós tan haʼu mak moris, maibé Kristu mak ida neʼebé moris iha haʼu. Neʼe duni, agora haʼu moris nuʼudar ema ida liuhusi fiar iha Maromak nia Oan-Mane, ida neʼebé hadomi haʼu no fó nia moris ba haʼu. 21 Haʼu sei la fila kotuk ba Maromak nia laran-diʼak neʼebé boot; tanba se ema bele sai loos iha Maromak nia oin liuhusi ukun-fuan, neʼe katak Kristu nia mate mak saugati deʼit.

3 Oh ema Galásia sira, imi beik-teen, sé mak lohi imi? Basá uluk imi simu hanorin ho momoos kona-ba Jesus Kristu nia mate iha ai-riin. 2 Haʼu hakarak husu ba imi kona-ba ida-neʼe: Imi simu espíritu tanba imi halo tuir ukun-fuan ka tanba imi fiar ba buat neʼebé imi rona? 3 Imi beik ona ka? Imi hahú laʼo hodi tuir matadalan husi espíritu, maibé agora imi laʼo toʼo rohan hodi sadere fali ba buat isin nian ka? 4 Imi tahan terus barak ona, no neʼe saugati deʼit ka? Haʼu fiar duni katak neʼe laʼós saugati deʼit. 5 Tan neʼe, ida neʼebé fó imi espíritu no halo milagre iha imi-nia leet, nia halo ida-neʼe tanba imi halo tuir ukun-fuan ka tanba imi fiar ba buat neʼebé imi rona ona? 6 Basá, Abraão “tau fiar ba Jeová, no tan neʼe mak Maromak haree nia nuʼudar ema loos”.

7 Imi hatene ho didiʼak katak ema sira neʼebé iha fiar mak Abraão nia oan sira. 8 No Eskritura fó sai nanis katak Maromak sei haree ema husi nasaun seluk nuʼudar ema loos tan sira-nia fiar, no tan neʼe fó sai nanis liafuan diʼak ba Abraão, hodi dehan: “Liuhusi ó nasaun hotu sei simu bensaun.” 9 Tan neʼe, sira hotu neʼebé iha fiar simu bensaun hamutuk ho Abraão, ema neʼebé fiar metin.

10 Ema hotu neʼebé sadere deʼit ba ukun-fuan simu malisan; tanba hakerek nanis ona: “Malisan ba ema sira neʼebé la halo tuir nafatin buat hotu neʼebé hakerek iha livru Ukun-Fuan nian.” 11 Liután neʼe, klaru katak ema ida la bele sai loos iha Maromak nia oin liuhusi ukun-fuan tanba “ema loos sei moris liuhusi fiar”. 12 No Ukun-Fuan nia hun laʼós fiar. Basá hakerek ona: “Ema neʼebé halo tuir Ukun-Fuan sei moris liuhusi ida-neʼe.” 13 Kristu sosa ita, no nia halo ita livre husi malisan Ukun-Fuan nian tanba nia simu ita-nia malisan, basá hakerek nanis ona: “Malisan ba ema sira neʼebé tara iha ai-riin.” 14 Ida-neʼe mosu atu Abraão nia bensaun bele toʼo ba nasaun sira seluk liuhusi Jesus Kristu, atu nuneʼe liuhusi ita-nia fiar ita bele simu espíritu neʼebé promete ona.

15 Maun-alin sira, haʼu koʼalia ba imi ho ai-knanoik husi moris loroloron nian: Kuandu aliansa sai vale, maski neʼe husi ema deʼit, la iha ema ida bele halakon ka troka ida-neʼe. 16 Entaun, Abraão no ninia bei-oan mak simu Maromak nia promesa sira. No Eskritura la dehan “ba bei-oan sira”, katak bei-oan barak, maibé dehan “ba bei-oan”, katak bei-oan ida deʼit, neʼe mak Kristu. 17 No, haʼu dehan ida-neʼe: Ukun-Fuan neʼebé mosu tinan 430 liu tiha, la halakon aliansa neʼebé uluk Maromak halo ona, katak promesa neʼe. 18 Neʼe duni, se Maromak fó liman-rohan liuhusi ukun-fuan, entaun neʼe laʼós tan liuhusi promesa; maibé Maromak ho laran-diʼak fó ida-neʼe ba Abraão liuhusi promesa ida.

19 Entaun, tansá mak Maromak fó Ukun-Fuan? Nia fó Ukun-Fuan atu hatudu sai sala neʼebé ema halo, toʼo bei-oan mosu mai, ida neʼebé simu promesa neʼe; Maromak fó Ukun-Fuan liuhusi anju sira no hatoʼo ida-neʼe liuhusi Moisés. 20 Maibé kuandu ema ida deʼit mak halo promesa, entaun la presiza ema ida seluk atu ajuda hodi hatoʼo promesa neʼe. Nuneʼe mós ho Maromak, nia halo promesa neʼe mesak deʼit. 21 Tan neʼe, Ukun-Fuan kontra Maromak nia promesa ka lae? Lae duni! Basá se ema simu ukun-fuan ida neʼebé bele fó moris, entaun ema bele sai loos liuhusi ukun-fuan. 22 Maibé Eskritura entrega buat hotu ba sala nia ukun, atu nuneʼe promesa neʼebé mai husi fiar iha Jesus Kristu bele fó ba sira neʼebé hatudu fiar.

23 Maibé, antes fiar neʼebé loloos toʼo mai, ukun-fuan mak proteje ita no kontrola ita, no ita hein ba tempu neʼebé Maromak sei hatudu sai fiar neʼe. 24 Tan neʼe, Ukun-Fuan sai nuʼudar matadalan* ba ita hodi lori ita ba Kristu, atu nuneʼe ita bele sai ema loos iha Maromak nia oin tanba fiar. 25 Maibé agora fiar toʼo mai ona, entaun ukun-fuan la sai tan nuʼudar matadalan ba ita.

26 Tuir loloos, imi hotu mak Maromak nia oan sira liuhusi imi-nia fiar iha Kristu Jesus. 27 Tanba imi hotu neʼebé hetan batizmu iha Kristu, imi tau ona Kristu nuʼudar imi-nia hatais. 28 La iha tan ema judeu ka gregu, atan ka ema livre, mane ka feto; tanba imi hotu sai ida deʼit ho Kristu Jesus. 29 Liután neʼe, se imi Kristu nian, imi mak Abraão nia bei-oan duni, imi sei simu Maromak nia promesa nuʼudar liman-rohan.

4 No haʼu dehan katak se ema ida neʼebé atu simu liman-rohan mak labarik kiʼik hela, nia hanesan deʼit ho atan ida, maski nia mak naʼi ba buat hotu; 2 basá ema mak tau matan ba nia no ba ninia uma toʼo tempu neʼebé ninia aman deside ona. 3 Nuneʼe mós ho ita, kuandu ita sei labarik kiʼik, ita sai atan ba hanoin no hahalok mundu neʼe nian. 4 Maibé kuandu tempu toʼo ona, Maromak haruka ninia Oan-Mane, ida neʼebé moris mai husi feto ida no mós moris mai iha ukun-fuan nia okos. 5 Nia halo livre sira neʼebé iha ukun-fuan nia okos hodi sosa fali sira, atu nuneʼe Maromak bele simu ita nuʼudar oan-hakiak.

6 No tanba imi mak Maromak nia oan sira, Maromak tau ona ninia espíritu santu iha ita-nia laran. Neʼe mak espíritu neʼebé iha ninia Oan-Mane. No espíritu neʼe book ita atu hatete: “Abba, Aman!” 7 Entaun imi laʼós tan atan maibé nuʼudar oan; no se imi mak oan, imi mós simu liman-rohan liuhusi Maromak.

8 Maski nuneʼe, bainhira imi seidauk hatene Maromak, imi sai atan ba buat sira neʼebé laʼós maromak. 9 Maibé agora imi hatene ona Maromak, ka haʼu bele dehan katak Maromak hatene ona imi, entaun oinsá mak imi fila hodi sai atan fali ba buat neʼebé fraku no buat neʼebé la iha folin iha mundu neʼe? 10 Imi hakaʼas an atu halo tuir kona-ba loron sira no fulan sira no tempu no tinan sira. 11 No haʼu taʼuk kona-ba imi, tanba karik haʼu-nia hakaʼas-an atu ajuda imi saugati deʼit.

12 Maun-alin sira, haʼu husu imi: Sai hanesan haʼu bá, tanba uluk haʼu mós hanesan imi. No imi la halo sala ruma hasoru haʼu. 13 Maibé imi hatene katak uluk kuandu haʼu sai moras, ida-neʼe fó haʼu oportunidade primeiru atu fó sai liafuan diʼak ba imi. 14 Imi la hakribi haʼu-nia moras neʼe, maski neʼe koko ida ba imi, no imi la tafui kabeen hodi hatudu imi hakribi haʼu; maibé imi simu haʼu hanesan haʼu mak anju ida husi Maromak, ka haʼu mak hanesan Kristu Jesus. 15 Entaun, imi-nia ksolok neʼe agora iha neʼebé? Tanba haʼu fó sasin katak, uluk imi prontu atu hasai imi-nia matan no fó ba haʼu se imi bele halo ida-neʼe. 16 Nuneʼe, haʼu sai ona nuʼudar imi-nia inimigu tanba haʼu fó-hatene lia-loos ba imi ka? 17 Ema sira seluk ho laran-manas hakaʼas an atu manán imi, laʼós ba buat diʼak, maibé sira hakarak atu haketak imi husi haʼu, atu nuneʼe imi bele laʼo tuir sira ho laran-manas. 18 Maibé, se ema ida buka atu manán imi ho laran-manas tan razaun neʼebé loos, entaun neʼe diʼak; no neʼe laʼós deʼit kuandu haʼu hamutuk ho imi maibé iha tempu hotu; 19 haʼu-nia oan sira, dala ida tan haʼu sente moras tanba imi, no moras neʼe hanesan ho inan neʼebé atu tuur ahi. No haʼu sei kontinua sente moras hanesan neʼe toʼo imi haleno Kristu nia hahalok. 20 Haʼu hakarak katak haʼu bele hamutuk ho imi agora hodi koʼalia ho laran-diʼak liután, tanba haʼu la hatene atu halo saida ba imi.

21 Imi neʼebé hakarak atu hela iha ukun-fuan nia okos, fó-hatene toʼok mai haʼu: Imi rasik rona ba buat neʼebé Ukun-Fuan fó sai ka lae? 22 Porezemplu, hakerek nanis ona katak Abraão iha oan-mane rua, ida husi atan-feto no ida husi feto neʼebé livre; 23 maibé oan husi atan-feto moris mai tuir isin, no oan husi feto neʼebé livre moris mai liuhusi promesa. 24 Buat sira-neʼe mosu nuʼudar ilas; tanba feto sira-neʼe reprezenta aliansa rua, ida husi Foho Sinai, no neʼe mak Agar neʼebé fó moris ba oan nuʼudar atan. 25 No Agar reprezenta Sinai, foho ida iha Arábia, no nia hanesan ho Jeruzalein agora nian, tanba nia sai atan hamutuk ho ninia oan sira. 26 Maibé Jeruzalein lalehan nian mak livre, no nia mak ita-nia inan.

27 Tanba hakerek nanis ona: “Haksolok bá, feto neʼebé la bele iha oan; haklalak bá ho haksolok, feto neʼebé la sente moras tuur-ahi nian; basá feto neʼebé la bele iha oan, nia iha oan barak liu fali feto neʼebé iha laʼen.” 28 No maun-alin sira, ita mak oan liuhusi promesa hanesan mós ho Isaac. 29 Maibé hanesan iha tempu neʼebá, oan neʼebé moris mai liuhusi isin hahú fó-terus ba oan neʼebé moris mai liuhusi espíritu, nuneʼe mós ho ohin. 30 Maski nuneʼe, Eskritura dehan sá? “Duni sai atan-feto neʼe no ninia oan, tanba oan husi atan-feto neʼe sei la simu liman-rohan hamutuk ho oan husi feto neʼebé livre.” 31 Tan neʼe, maun-alin sira, ita laʼós oan husi atan-feto, maibé oan husi feto neʼebé livre.

5 Ita sai livre ona liuhusi Kristu atu nuneʼe ita bele haksolok ho liberdade neʼe; neʼe duni hamriik metin bá, no keta husik imi an atu sai atan fali.

2 Haʼu, Paulo, haʼu fó-hatene imi katak se imi hetan sirkunsizaun, buat neʼebé Kristu halo ona la iha folin ba imi. 3 Dala ida tan haʼu fó-hanoin ba mane sira neʼebé hetan sirkunsizaun katak sira ida-idak tenkesér halo tuir Ukun-Fuan tomak. 4 Se imi balu koko atu halo imi-nia an sai ema loos liuhusi ukun-fuan, imi haketak ona imi an husi Kristu. Imi husik ona Maromak nia laran-diʼak. 5 Maibé liuhusi espíritu santu no mós liuhusi ita-nia fiar, ita hein namanas atu sai ema loos iha Maromak nia oin. 6 Basá sira neʼebé ida deʼit ho Kristu Jesus, maski sira hetan sirkunsizaun ka la hetan, neʼe la iha folin, maibé fiar neʼebé laʼo hamutuk ho domin mak iha folin.

7 Uluk imi halo tuir lia-loos ho didiʼak.* Entaun, sé mak hanetik imi atu kontinua halo tuir lia-loos? 8 Hanoin hanesan neʼe la mai husi Ida neʼebé bolu imi. 9 Fermentu uitoan deʼit halo masa sai boot. 10 Haʼu fiar katak imi neʼebé ida deʼit ho Kristu sei iha hanoin neʼebé hanesan ho haʼu. Maibé kona-ba ema neʼebé hamosu problema ba imi, maski nia ema-boot ka ema baibain, nia sei simu kastigu neʼebé nia merese. 11 Maibé ba haʼu, maun-alin sira, se haʼu kontinua haklaken kona-ba sirkunsizaun, tanbasá mak haʼu nafatin hetan terus? Se neʼe loos, entaun, ai-riin terus nian sei la sai tan buat neʼebé halo ema sidi. 12 Haʼu hein katak mane sira neʼebé koko atu halo imi monu, sei halo aat liután ba sira-nia an rasik.*

13 Kona-ba imi, maun-alin sira, Maromak bolu imi atu sai livre. No tan neʼe, keta uza liberdade neʼe atu buka deʼit hakarak isin nian, maibé ho domin imi serbí malu nuʼudar atan. 14 Tanba Ukun-Fuan tomak sai loos liuhusi mandamentu ida deʼit, neʼe mak: “Ó tenke hadomi ó-nia maluk hanesan ó-nia an rasik.” 15 Maibé se imi kontinua atu hakanek malu no halo susar ba malu, kuidadu bá katak imi labele halakon malu.

16 Maibé haʼu dehan ba imi: Kontinua moris tuir espíritu hodi imi la halo tuir hakarak isin nian. 17 Basá isin nia hakarak la hanesan ho espíritu nia hakarak, no espíritu la hanesan ho isin. No tanba buat rua neʼe kontra malu, entaun, imi la halo buat neʼebé imi hakarak halo. 18 Liután neʼe, se Maromak nia espíritu mak dirije imi, neʼe katak imi la hela tan iha ukun-fuan nia okos.

19 No isin nia hahalok sira bele haree ho momoos, neʼe mak sala-foʼer,* hahalok la moos, hahalok neʼebé la iha moe, 20 adora estátua, envolve an ho anju aat, odi malu, istori malu, laran-moras ba malu, sai hirus, buka atu manán deʼit, haketak malu, tuir deʼit ema nia hanorin, 21 kaan-teen, lanu-teen, festa arbiru, no buat sira seluk neʼebé hanesan neʼe. Haʼu fó avizu kona-ba buat sira-neʼe, hanesan haʼu fó avizu ona ba imi, katak sira neʼebé halo buat sira-neʼe sei la simu Maromak nia Ukun nuʼudar liman-rohan.

22 Maibé, hahalok* sira neʼebé mai husi espíritu santu mak domin, kontente, dame, pasiénsia, laran-diʼak, hahalok diʼak, fiar, 23 laran-maus, no kontrola an. La iha ukun-fuan ida neʼebé kontra buat sira-neʼe. 24 Liután neʼe, sira neʼebé ida deʼit ho Kristu Jesus oho* ona sira-nia isin hamutuk ho hakarak no hanoin isin nian.

25 Se ita moris tuir espíritu, mai ita kontinua laʼo tuir espíritu. 26 No keta sai foti-an, la buka atu provoka malu, no la laran-moras ba malu.

6 Maun-alin sira, se ema ida laʼo iha dalan sala no nia la hatene ida-neʼe, imi neʼebé kumpre Maromak nia kritériu tenke koko atu hadiʼa ema hanesan neʼe ho laran-maus. Maibé tau matan ba imi-nia an rasik, tanba taʼuk katak imi mós bele hetan tentasaun. 2 Kontinua ajuda malu iha susar laran, no hodi halo ida-neʼe mak ita kumpre Kristu nia ukun-fuan. 3 No se ema ruma hanoin katak nia ema-boot maski tuir loloos lae, nia lohi ninia an rasik. 4 Maibé ema ida-idak tenke buka-hatene ninia hahalok rasik, no tuirmai nia sei iha razaun atu gaba an kona-ba ninia an rasik, laʼós hodi kompara nia an ho ema seluk. 5 Tanba ema ida-idak sei lori ninia todan rasik.

6 Liután neʼe, ema neʼebé simu hanorin kona-ba Maromak nia liafuan, diʼak ba nia atu fahe buat diʼak hotu ba ida neʼebé fó hanorin neʼe.

7 Keta lohi imi-nia an: Ita la bele bosok Maromak. Tanba buat naran deʼit neʼebé ema kari, nia mós sei koʼa ida-neʼe; 8 tanba ema neʼebé kari ho hakarak isin nian sei koʼa mate* husi nia isin, maibé ema neʼebé kari ho espíritu sei koʼa moris rohan-laek husi espíritu neʼe. 9 Entaun, mai ita la para atu halo buat neʼebé diʼak, tanba se ita la sai baruk, ita sei koʼa iha tempu neʼebé loos. 10 Nuneʼe, kuandu ita iha oportunidade, mai ita halo buat neʼebé diʼak ba ema hotu, maibé liuliu ba ita-nia maluk fiar-naʼin.

11 Haree toʼok, ho haʼu-nia liman rasik haʼu hakerek karta neʼe ba imi ho letra boboot.

12 Sira hotu neʼebé hakarak atu ema simu sira mak ema neʼebé koko atu obriga imi hodi hetan sirkunsizaun, maibé sira halo ida-neʼe tanba sira lakohi atu hetan terus husi Kristu Jesus nia ai-riin terus nian. 13 Tuir loloos, sira neʼebé hetan ona sirkunsizaun la halo tuir Ukun-Fuan, maibé sira hakarak imi atu hetan sirkunsizaun hodi nuneʼe sira bele iha razaun atu gaba an kona-ba imi. 14 Maibé haʼu lakohi atu gaba an, só deʼit kona-ba Naʼi Jesus Kristu nia ai-riin terus nian. No liuhusi nia mak mundu mate* tiha ona ba haʼu, no ba mundu haʼu mós mate tiha ona. 15 Hetan sirkunsizaun ka la hetan sirkunsizaun, neʼe la iha folin, maibé kriasaun foun ida mak iha folin. 16 No haʼu hein katak Maromak haraik dame no laran-sadiʼa ba sira hotu neʼebé moris tuir ukun-fuan neʼe; sin, ba Izraél Maromak nian.

17 Hori ohin ba oin, ema ida keta halo susar tan mai haʼu, tanba haʼu lori fitar iha haʼu-nia isin-lolon nuʼudar Jesus nia atan ida.

18 Maun-alin sira, haʼu harohan katak ita Naʼi Jesus Kristu nia laran-diʼak neʼebé boot sei hamutuk ho imi tuir hahalok diʼak neʼebé imi hatudu. Amen.

[Nota–rodapé]