Éfeso

1 Husi Paulo, neʼebé nuʼudar Kristu Jesus nia apóstolu ida liuhusi Maromak nia hakarak, hakerek ba santu sira iha Éfeso neʼebé laran-metin no ida deʼit ho Kristu Jesus:

2 Haʼu harohan katak ita-nia Aman Maromak no Naʼi Jesus Kristu sei hatudu laran-diʼak ba imi no haraik dame ba imi.

3 Hahiʼi ba Maromak no Aman husi ita Naʼi Jesus Kristu, basá liuhusi espíritu, nia haraik ona ba ita bensaun hotu husi lalehan tanba ita ida deʼit ho Kristu. 4 Antes mundu hahú,* nia hili ita atu sai ida deʼit ho Kristu, atu ita bele hatudu domin no sai santu no sala-laek iha nia oin. 5 Basá nia deside nanis ona atu hakiak ita nuʼudar ninia oan rasik liuhusi Jesus Kristu, tuir buat neʼebé halo nia kontente no tuir ninia hakarak; 6 ida-neʼe mosu atu ema bele hahiʼi Maromak tanba nia haraik ninia laran-diʼak boot ba ita liuhusi ninia Oan-Mane neʼebé nia hadomi. 7 Nia sosa fali ita liuhusi ninia Oan nia raan, no ita sai livre ona, neʼe katak ita-nia sala sira hetan perdua, ida-neʼe tuir Maromak nia laran-diʼak neʼebé boot.

8 Maromak halo ita nakonu ho ninia laran-diʼak neʼe hamutuk ho matenek no ho hanoin diʼak hotu, 9 no nia halo ita hatene segredu santu kona-ba ninia hakarak. No segredu santu neʼe mak monu loos ba ninia laran no nia rasik deside ona kona-ba neʼe. 10 Segredu santu neʼe inklui organiza buat hotu iha tempu neʼebé deside tiha ona nia rohan, katak atu halibur iha Kristu buat sira neʼebé iha lalehan no buat sira neʼebé iha rai. Sin, buat hotu sei halibur iha Kristu. 11 Ami ida deʼit ho nia no ami sei simu liman-rohan hamutuk ho nia, basá Maromak hili nanis ona ami tuir ninia hakarak; nia mak ida neʼebé kumpre buat hotu nuʼudar nia deside ona tuir ninia hakarak. 12 Ami mak ema primeiru atu tau esperansa iha Kristu, no Maromak hili ami nanis ona atu fó glória ba nia no hahiʼi nia. 13 Maibé imi mós tau esperansa ba nia bainhira imi rona tiha liafuan lia-loos nian, liafuan diʼak kona-ba imi-nia salvasaun. Bainhira imi fiar ona, Maromak uza ninia espíritu santu neʼebé nia promete ona atu tau sinál ba imi no nia halo ida-neʼe liuhusi Kristu. 14 Espíritu santu mak hanesan garantia ida neʼebé hatudu katak ita sei simu ita-nia liman-rohan. Maromak halo ida-neʼe atu ninia povu bele sai livre liuhusi Jesus nia sakrifísiu nia folin, no ida-neʼe sei fó hahiʼi barak liután ba nia.

15 Nuneʼe, tanba haʼu rona ona kona-ba imi-nia fiar ba Naʼi Jesus no imi hatudu fiar neʼe ba santu sira hotu, haʼu mós 16 la para atu fó-agradese kona-ba imi. Haʼu nafatin temi kona-ba imi iha haʼu-nia orasaun, 17 atu nuneʼe ita Naʼi Jesus Kristu nia Maromak, Aman glória nian, bele fó imi espíritu matenek no espíritu atu hatene buat neʼebé nia fó sai. 18 Nia loke imi-nia laran* atu imi bele haree no atu imi bele hatene kona-ba esperansa neʼebé nia fó ona ba imi, no hatene kona-ba glória neʼebé nia sei fó nuʼudar liman-rohan ba santu sira, 19 no mós hatene kona-ba kbiit boot neʼebé nia hatudu ba ita neʼebé fiar-naʼin. Nia hatudu ninia kbiit boot neʼe liuhusi buat neʼebé nia kumpre ona; 20 no ho kbiit neʼe nia fó moris-hiʼas ba Kristu husi mate no lori Kristu tuur iha ninia liman sorin loos iha lalehan, 21 no nia sai aas liu fali governu hotu, ukun-naʼin hotu, kbiit hotu, naʼi hotu, no naran hotu, laʼós deʼit iha mundu ohin neʼe nian, maibé mós iha ida neʼebé atu mai. 22 Maromak mós tau buat hotu iha Kristu nia ain okos, no halo nia sai nuʼudar ulun ba kongregasaun. 23 No kongregasaun neʼe mak ninia isin-lolon neʼebé sai nakonu liuhusi nia, no nia mak ida neʼebé halo kompletu buat hotu.

2 Liután neʼe, Maromak halo imi moris maski imi mate ona iha imi-nia sala sira. 2 Uluk imi toman atu laʼo tuir mundu neʼe, tuir ukun-naʼin ba anin, katak hahalok no hanoin sira neʼebé agora book an iha ema kontradór sira-nia laran. 3 Sin, iha sira-nia leet mak uluk ita halaʼo ita-nia moris tuir isin hodi kumpre ita-nia hakarak no hanoin isin nian, no husi moris kedas ita merese simu Maromak nia hirus hanesan sira seluk. 4 Maibé, Maromak neʼebé riku ho laran-sadiʼa no neʼebé iha domin boot ba ita, 5 nia halo ita moris ho Kristu maski ita mate iha ita-nia sala; no liuhusi ninia laran-diʼak neʼebé boot mak imi hetan salvasaun. 6 Liután neʼe, tanba ita ida deʼit ho Kristu Jesus, Maromak halo ita moris hamutuk ho Kristu no fó fatin ba ita atu tuur hamutuk ho nia iha lalehan, 7 atu nuneʼe iha mundu foun neʼebé atu mai, nia sei hatudu ninia laran-diʼak neʼebé boot hodi halo buat diʼak ba ita neʼebé ida deʼit ho Kristu Jesus.

8 No tanba ninia laran-diʼak neʼe mak imi hetan salvasaun liuhusi fiar; no ida-neʼe laʼós tanba imi. Maibé, ida-neʼe mak prezente husi Maromak. 9 No salvasaun neʼe laʼós liuhusi imi-nia hahalok, atu nuneʼe ema ida la iha razaun atu gaba an. 10 Basá ita mak Maromak nia kriasaun, no ita ida deʼit ho Kristu Jesus, no Maromak kria ita atu halo serbisu diʼak, serbisu neʼebé Maromak deside nanis ona ba ita atu halo.

11 Tan neʼe, hanoin-hetan katak uluk imi mak ema husi nasaun seluk iha isin, no iha tempu uluk sira neʼebé hetan sirkunsizaun husi ema, sira bolu imi nuʼudar “ema neʼebé la hetan sirkunsizaun”. 12 Iha tempu neʼebá imi la hatene Kristu, imi ketak husi nasaun Izraél, imi la sai parte iha aliansa sira neʼebé tuir Maromak nia promesa, imi la iha esperansa no la hatene Maromak iha mundu neʼe. 13 Maibé hodi sai ida deʼit ho Kristu Jesus, imi neʼebé uluk dook husi Maromak agora hakbesik ona ba nia liuhusi Kristu nia raan. 14 Basá nia mak ita-nia dame, nia mak halo grupu rua sai ida deʼit no harahun tiha moru neʼebé haketak sira. 15 Liuhusi ninia isin, nia halakon buat neʼebé halo sira odi malu, neʼe mak Ukun-Fuan neʼebé inklui mandamentu no lei sira, no nia halo grupu rua neʼe sai ema foun ida, no sira sai ida deʼit ho nia no iha dame; 16 hodi nuneʼe nia hadame grupu rua neʼe ba Maromak liuhusi ninia ai-riin terus nian atu grupu rua neʼe sai isin-lolon ida, tanba liuhusi ninia an rasik nia oho tiha ona buat neʼebé halo sira odi malu. 17 No nia mai no fó sai liafuan diʼak dame nian ba imi neʼebé dook husi Maromak no ba sira neʼebé besik ba Nia; 18 basá liuhusi nia mak ita neʼebé iha grupu rua neʼe bele hakbesik ba Aman tanba ita hotu simu espíritu santu ida deʼit.

19 Tan neʼe, imi laʼós tan nuʼudar ema husi rai seluk, maibé imi mós nuʼudar sidadaun hamutuk ho santu sira no sai parte husi Maromak nia umakain, 20 no nuʼudar uma ida, imi harii tiha ona iha apóstolu no profeta sira-nia leten no sira mak uma neʼe nia hun, maibé Kristu Jesus rasik mak nuʼudar fatuk importante iha uma hun neʼe. 21 Uma tomak neʼe ida deʼit ho nia no parte hotu tutan hamutuk ho didiʼak, no uma neʼe sai boot ba daudaun toʼo sai templu santu ida ba Jeová. 22 Nuneʼe, tanba imi sai ida deʼit ho Kristu, Maromak harii imi hamutuk hodi sai uma ida neʼebé nia hela bá, basá ninia espíritu iha neʼebá.

3 Kona-ba neʼe, haʼu Paulo, haʼu nuʼudar dadur-naʼin tanba Kristu Jesus no mós tanba imi neʼebé husi nasaun sira seluk. 2 Klaru katak imi rona ona kona-ba knaar neʼebé haʼu simu atu ajuda imi liuhusi Maromak nia laran-diʼak, 3 basá Maromak fó sai ba haʼu kona-ba segredu santu, no uluk haʼu hakerek uitoan ona ba imi kona-ba neʼe. 4 Tan neʼe, kuandu imi lee ida-neʼe, imi bele hatene matenek neʼebé haʼu iha kona-ba segredu santu husi Kristu. 5 Maromak la hatudu sai segredu neʼe ba jerasaun uluk nian, maibé agora nia hatudu sai ona ba ninia apóstolu santu sira no profeta sira liuhusi espíritu santu, 6 katak, ema husi nasaun seluk tenke sai ida deʼit ho Kristu Jesus. No liuhusi liafuan diʼak mak sira sei simu liman-rohan ho ami, no sai parte ba isin ida deʼit ho ami, no mós hola parte iha Maromak nia promesa hamutuk ho ami. 7 Haʼu sai nuʼudar atan ba segredu santu neʼe tanba Maromak nia laran-diʼak neʼebé boot. No laran-diʼak neʼe mak prezente neʼebé Maromak fó ba haʼu nuʼudar dalan atu hatudu sai ninia kbiit.

8 Ba haʼu neʼebé kiʼik liu husi santu sira hotu mak Maromak fó ninia laran-diʼak boot neʼe, atu nuneʼe haʼu tenke fó sai ba nasaun sira liafuan diʼak kona-ba rikusoin Kristu nian neʼebé la bele sura 9 no haʼu tenke halo ema haree oinsá mak Maromak, ida neʼebé kria buat hotu, kumpre ninia segredu santu neʼebé nia subar hela ba tempu kleur. 10 Maromak halo ida-neʼe, atu nuneʼe agora liuhusi kongregasaun mak governu sira no ukun-naʼin sira iha lalehan bele hatene Maromak nia matenek boot oioin, 11 no ida-neʼe tuir ninia hakarak neʼebé nia harii iha Kristu Jesus ita Naʼi. No hakarak neʼe ba tempu neʼebé la bele sura. 12 No liuhusi nia mak ita bele koʼalia ho aten-brani no hakbesik ba Maromak ho fiar-metin, tanba ita tau fiar ba Kristu. 13 Tan neʼe, haʼu husu imi atu la husik imi-nia fiar tan deʼit susar sira neʼebé haʼu hetan tanba ajuda imi, basá susar sira-neʼe lori glória ba imi.

14 Kona-ba neʼe mak haʼu hakneʼak ba Aman, 15 tanba liuhusi nia mak família hotu iha lalehan no rai mosu mai,* 16 no haʼu harohan atu nia, neʼebé iha kbiit boot, sei uza kbiit husi ninia espíritu* atu hametin imi-nia laran no neon. 17 Haʼu harohan ba Maromak katak liuhusi imi-nia fiar mak Kristu bele hela iha imi-nia laran hamutuk ho domin; atu imi bele sai hanesan ai-hun ho abut neʼebé metin no hanesan uma neʼebé harii iha hun neʼebé metin; 18 atu nuneʼe hamutuk ho santu sira hotu, imi bele komprende didiʼak kona-ba luan, naruk, aas no kleʼan, 19 no hatene kona-ba Kristu nia domin neʼebé aas liu fali matenek, hodi nuneʼe imi bele sai nakonu ho Maromak nia hahalok hotu.

20 No liuhusi Maromak nia kbiit neʼebé book an iha ita-nia laran, Maromak bele halo barak liu fali buat hotu neʼebé ita husu no hanoin. 21 Entaun, nia deʼit mak merese simu glória ba nafatin iha jerasaun hotu liuhusi kongregasaun no mós liuhusi Kristu Jesus. Amen.

4 Tan neʼe, haʼu, neʼebé nuʼudar dadur-naʼin iha Naʼi, husu ba imi atu moris ho loloos nuʼudar ema neʼebé Maromak hili ona, 2 hodi sempre hatudu haraik-an no laran-maus, hodi hatudu pasiénsia, no tahan malu iha domin, 3 no hakaʼas an atu nafatin iha unidade liuhusi espíritu santu*, atu imi iha dame iha imi-nia leet. 4 Basá, iha isin ida deʼit no espíritu* ida deʼit, nuneʼe mós Maromak bolu ona imi ba esperansa ida deʼit; 5 Naʼi ida deʼit, fiar ida deʼit, batizmu ida deʼit; 6 Maromak ida deʼit neʼebé nuʼudar Aman ba ema hotu; no nia aas liu buat hotu, nia uza ita hotu atu halaʼo ninia hakarak, no ninia kbiit book an iha ita hotu.

7 No Maromak fó ninia laran-diʼak neʼebé boot ba ita ida-idak. Ita bele haree ida-neʼe iha dalan neʼebé Kristu fahe prezente neʼebé lalika selu. 8 Tan neʼe, nia dehan: “Kuandu nia saʼe ba leten nia lori tiha dadur sira; nia fó ema nuʼudar prezente.” 9 Entaun, liafuan “nia saʼe ba leten” katak sá? Neʼe katak nia mós tun ona ba kraik, katak, rai neʼe. 10 Ida neʼebé tun ba kraik mak ida neʼebé saʼe ba leten toʼo aas liu fali lalehan, hodi nuneʼe nia bele halo buat hotu sai kompletu.

11 No nia fó ema balu nuʼudar apóstolu, balu nuʼudar profeta, balu nuʼudar haklaken-naʼin kona-ba liafuan diʼak, balu nuʼudar bibi-atan no mestre, 12 atu bele ajuda santu sira laʼo tuir dalan loos, atu serbí ema seluk, no atu harii Kristu nia isin-lolon 13 toʼo ita hotu sai ida deʼit iha fiar no hetan matenek loloos kona-ba Maromak nia Oan-Mane, hodi sai nuʼudar ema boot, neʼe katak sai kompletu nuʼudar ema boot loloos hanesan ho Kristu. 14 Ita labele tan atu sai nuʼudar labarik kiʼik hodi tuir deʼit ema lohidór sira-nia hanorin sala oioin, atu ita la sai hanesan ró iha tasi laran neʼebé anin no laloran baku bá baku mai. 15 Maibé, ita tenke koʼalia lia-loos no hatudu domin, atu nuneʼe ita bele sai boot iha dalan hotu no moris tuir Kristu nuʼudar ita-nia ulun. 16 Husi nia mak isin-lolon tomak tutan hamutuk ho didiʼak no parte ida-idak apoia malu hodi fó buat neʼebé isin presiza. Kuandu parte ida-idak halo ninia serbisu ho loloos, ida-neʼe ajuda isin-lolon atu sai boot hodi isin tomak sai metin iha domin.

17 Nuneʼe, haʼu fó sasin iha Naʼi nia naran hodi dehan katak imi labele kontinua moris hanesan nasaun sira, basá sira moris tuir deʼit sira-nia hanoin neʼebé folin-laek. 18 Sira-nia hanoin iha nakukun laran, sira dook husi moris neʼebé mai husi Maromak, basá sira la hatene Maromak no sira-nia laran sai toos. 19 Sira la hatene buat neʼebé loos no sala, no ho kaan-teen sira entrega sira-nia an ba hahalok neʼebé la iha moe hodi halo hahalok foʼer oioin.

20 Maibé imi aprende no hatene katak Kristu la hanesan neʼe. 21 Imi rona ona nia no simu hanorin liuhusi nia, tanba lia-loos mak iha Jesus. 22 Tan neʼe, imi tenke husik tiha hahalok tuan nian,* katak imi-nia moris uluk nian, tanba hahalok tuan neʼe sai aat ba beibeik liuhusi imi-nia hakarak aat neʼebé lohi imi. 23 No imi tenke kontinua hafoun imi-nia dalan atu hanoin, 24 no imi tenke tau hahalok foun nuʼudar imi-nia hatais, katak hahalok foun neʼebé Maromak kria tuir ninia hakarak; no hahalok neʼe mak loos no laran-metin.

25 Nuneʼe, tanba agora imi husik tiha lia-bosok, imi ida-idak tenke koʼalia lia-loos ba malu, basá ita mak liman-ain husi isin-lolon ida. 26 Se imi hirus karik, keta halo sala; keta husik loro-matan monu bainhira imi hirus hela, 27 no keta fó fatin ba Diabu. 28 Ema neʼebé naʼok labele naʼok tan, maibé nia tenke halo serbisu ho badinas. Nia tenke halo serbisu neʼebé diʼak ho nia liman, atu nuneʼe nia iha buat ruma atu fahe ba ema neʼebé presiza. 29 Keta husik liafuan aat sai husi imi-nia ibun maibé koʼalia deʼit buat neʼebé presiza atu hametin ema seluk, hodi nuneʼe imi-nia liafuan bele fó buat neʼebé diʼak ba sira neʼebé rona. 30 No mós, keta halo Maromak nia espíritu santu laran-susar; basá hodi espíritu neʼe mak Maromak tau sinál ba imi toʼo loron neʼebé imi sai livre husi imi-nia isin liuhusi Jesus nia sakrifísiu.

31 Hadook tiha husi imi-nia leet laran-moras oioin, hirus, laran-nakali, hakilar malu, koʼalia aat, no mós buat hotu neʼebé hakanek malu. 32 Maibé hatudu laran-diʼak ba malu, hanoin malu, perdua malu ho laran hanesan Maromak mós fó perdua ho laran ba imi liuhusi Kristu.

5 Tan neʼe, banati-tuir Maromak nuʼudar ninia oan doben sira, 2 no kontinua laʼo iha domin, hanesan Kristu mós hadomi imi no fó nia moris ba imi nuʼudar sakrifísiu neʼebé morin ba Maromak.

3 Iha imi-nia leet keta temi hahalok sala-foʼer,* hahalok la moos hotu, ka hahalok kaan-teen, tanba ida-neʼe la loos ba ema santu sira; 4 no imi keta hatudu hahalok la respeitu, ka koʼalia buat neʼebé la iha folin, ka konta istória neʼebé aat, tanba buat sira-neʼe la loos, maibé diʼak liu atu fó-agradese. 5 Basá imi rasik hatene ida-neʼe ho loloos, katak ema neʼebé halo sala-foʼer ka hatudu hahalok la moos ka kaan-teen, neʼebé hanesan adora estátua, sira sei la simu liman-rohan iha Kristu no Maromak nia Ukun.

6 Keta husik ema ida lohi imi ho liafuan folin-laek, basá tanba buat sira-neʼe mak Maromak sei hatudu ninia hirus ba ema kontradór sira. 7 Tan neʼe, keta hola parte hamutuk ho sira; 8 basá uluk imi iha nakukun laran, maibé agora imi iha naroman tanba imi Naʼi nian. Entaun kontinua laʼo nuʼudar naroman nia oan sira, 9 tanba naroman hamosu hahalok diʼak oioin no hahalok loos no lia-loos. 10 Kontinua atu buka-hatene kona-ba buat neʼebé halo Naʼi kontente; 11 keta hola parte iha hahalok folin-laek neʼebé nakukun nian, maibé hatudu sai katak hahalok sira-neʼe mak aat. 12 Basá ita moe atu konta kona-ba buat neʼebé sira halo subasubar. 13 No buat hotu hatudu sai liuhusi naroman, entaun buat hotu neʼebé sai klaru ona mak naroman. 14 Tan neʼe mak Maromak dehan: “Hadeer bá, ó neʼebé toba hela, no hadeer husi mate, no Kristu sei fó naroman ba ó.”

15 Kontinua haree didiʼak oinsá imi laʼo, atu imi la laʼo nuʼudar ema beik maibé nuʼudar ema matenek 16 hodi uza didiʼak imi-nia tempu,* tanba loron sira-neʼe mak aat. 17 Tan neʼe, keta sai hanesan ema beik, maibé kontinua buka-hatene saida mak Jeová hakarak imi atu halo. 18 No mós, keta lanu ho tua-uvas, tanba ida-neʼe lori imi atu halo arbiru deʼit, maibé kontinua sai nakonu ho espíritu. 19 Koʼalia ba malu ho salmu, ho knananuk no hahiʼi ba Maromak. Kanta no halo múzika ba Jeová iha imi-nia laran, 20 no sempre fó obrigadu ba ita-nia Maromak no Aman kona-ba buat hotu, liuhusi ita Naʼi Jesus Kristu nia naran.

21 Haraik an ba malu tanba imi respeitu Kristu. 22 Feen sira tenke hakruʼuk an ba sira-nia laʼen hanesan ba Naʼi, 23 tanba laʼen mak ulun ba nia feen hanesan Kristu mak ulun ba kongregasaun neʼebé nuʼudar ninia isin-lolon, no nia mak fó salvasaun ba isin-lolon neʼe. 24 Tuir loloos, hanesan kongregasaun hakruʼuk an ba Kristu, feen sira mós tenke hakruʼuk an ba sira-nia laʼen iha buat hotu. 25 Laʼen sira, kontinua hadomi imi-nia feen, hanesan Kristu mós hadomi kongregasaun no fó nia moris ba kongregasaun, 26 atu nia bele halo santu ida-neʼe hodi hamoos ho bee, katak liuhusi Maromak nia liafuan; 27 nia halo ida-neʼe atu kongregasaun sai furak iha ninia matan, laiha foʼer ida ka namkurut ka buat seluk hanesan neʼe, maibé atu kongregasaun sai santu no laiha aat ida.

28 Nuneʼe mós laʼen sira tenke hadomi sira-nia feen nuʼudar sira-nia isin rasik. Ema neʼebé hadomi nia feen hadomi nia an rasik, 29 tanba la iha mane ida neʼebé odi ninia isin rasik; maibé nia fó han no hafolin ida-neʼe, hanesan Kristu mós halo ba kongregasaun, 30 tanba ita mak liman-ain ba ninia isin-lolon. 31 “Tan razaun neʼe mak mane ida sei husik ninia inan no aman no nia sei hela* ho nia feen no sira naʼin-rua sei sai isin ida deʼit.” 32 Segredu santu neʼe mak importante. No haʼu koʼalia ba imi kona-ba Kristu no kongregasaun. 33 Maski nuneʼe, imi ida-idak tenke hadomi imi-nia feen nuʼudar imi hadomi imi-nia an rasik; no feen tenke hatudu respeitu kleʼan ba ninia laʼen.

6 Oan sira, halo tuir imi-nia inan-aman bá hodi tuir Naʼi nia hakarak, tanba ida-neʼe mak buat neʼebé loos: 2 “Hatudu respeitu ba ó-nia inan no aman”; ida-neʼe mak ukun-fuan uluk nian neʼebé iha promesa dehan: 3 “Atu ó bele hetan buat diʼak no ó bele moris naruk iha rai.” 4 No aman sira, keta halo imi-nia oan sai laran-hirus, maibé kontinua haboot sira hodi fó dixiplina no matadalan neʼebé tuir Jeová nia hakarak.

5 Imi atan sira, halo tuir imi-nia naʼi iha rai, ho taʼuk no nakdedar no ho laran-moos, hanesan imi halo tuir Kristu, 6 laʼós deʼit kuandu ema seluk haree tanba imi hakarak halo kontente ema, maibé nuʼudar Kristu nia atan, imi halo Maromak nia hakarak ho laran tomak. 7 Serbí imi-nia naʼi ho laran, nuʼudar imi halo ba Jeová, laʼós ba ema, 8 tanba imi hatene katak buat diʼak neʼebé ema ida-idak halo, nia sei simu fali husi Jeová, maski nia mak atan ka ema livre. 9 No imi neʼebé nuʼudar naʼi, halo nuneʼe mós ba imi-nia atan sira, keta ameasa sira, tanba imi hatene katak Naʼi ba imi no ba sira mak iha lalehan, no nia la todan ba sorin.

10 Ikusliu, hakaʼas an nafatin atu hetan kbiit husi Naʼi no husi ninia forsa boot. 11 Tau hatais funu nian hotu husi Maromak atu nuneʼe imi bele hamriik metin hodi kontra Diabu nia lasu sira; 12 tanba ita halo funu laʼós hasoru raan no isin, maibé hasoru governu sira, hasoru ukun-naʼin sira, hasoru ulun-naʼin sira ba mundu neʼebé nakukun neʼe, hasoru anju aat sira iha lalehan. 13 Tan neʼe, tau hatais funu nian hotu husi Maromak, atu imi bele tahan hasoru loron neʼebé aat, no depois imi halo tiha buat hotu ho didiʼak, imi bele hamriik metin.

14 Tan neʼe, hamriik metin bá, hodi uza sintu lia-loos nian, no taka imi-nia hirus-matan ho hahalok neʼebé loos, 15 no sai prontu atu haklaken liafuan diʼak dame nian nuʼudar imi-nia sapatu. 16 Iha situasaun hotu, lori imi-nia fiar nuʼudar eskudu boot, hodi imi bele hamate rama-oan ho ahi nian neʼebé husi aat-naʼin. 17 No taka kapasete salvasaun nian iha imi-nia ulun, no lori surik espíritu nian, katak Maromak nia liafuan; 18 ho orasaun oioin no harohan, halo orasaun beibeik iha situasaun hotu ho espíritu. No matan-moris nafatin bá, hodi harohan ba santu sira hotu, 19 no mós ba haʼu, atu nuneʼe kuandu haʼu loke haʼu-nia ibun haʼu bele koʼalia ho aten-brani hodi halo ema hatene segredu santu husi liafuan diʼak. 20 Kona-ba neʼe mak haʼu sai nuʼudar Maromak nia embaixadór, neʼebé iha dadur laran; halo orasaun ba haʼu atu nuneʼe haʼu bele koʼalia ida-neʼe ho aten-brani, tanba haʼu tenkesér halo nuneʼe.

21 Tíkiko, ita-nia maluk doben ida no haklaken-naʼin ida neʼebé laran-metin iha Naʼi, nia sei fó-hatene imi kona-ba buat neʼebé haʼu halo no kona-ba haʼu-nia situasaun. 22 Haʼu haruka nia ba imi tan razaun ida-neʼe, katak imi bele hatene ami-nia situasaun no atu nia bele fó kmaan ba imi-nia laran.

23 Haʼu harohan atu maun-alin sira bele iha dame no domin hamutuk ho fiar husi Aman Maromak no Naʼi Jesus Kristu. 24 No haʼu mós harohan katak Maromak nia laran-diʼak neʼebé boot hamutuk ho sira hotu neʼebé hadomi ita Naʼi Jesus Kristu ho domin neʼebé sei la lakon.

[Nota–rodapé]