Filipe

1 Husi Paulo no Timóteo, Kristu Jesus nia atan, hakerek ba santu sira hotu iha Filipe neʼebé ida deʼit ho Kristu Jesus, no mós ba katuas no atan ba kongregasaun:*

2 Haʼu harohan katak ita-nia Aman Maromak no Naʼi Jesus Kristu sei hatudu laran-diʼak ba imi no haraik dame ba imi.

3 Haʼu sempre hatoʼo agradese ba haʼu-nia Maromak kuandu haʼu hanoin-hetan imi 4 iha haʼu-nia orasaun. Haʼu sempre haksolok hodi harohan kona-ba imi hotu 5 tanba buat neʼebé imi halo atu habelar liafuan diʼak hahú husi loron primeiru toʼo agora. 6 Tanba haʼu fiar metin kona-ba neʼe, katak ida neʼebé hahú halo serbisu diʼak iha imi, nia mós sei kontinua halo ida-neʼe toʼo kompletu iha Jesus Kristu nia loron. 7 La sala ba haʼu atu hanoin ida-neʼe kona-ba imi hotu, tanba imi iha haʼu-nia laran. Imi hotu hola parte ho haʼu iha Maromak nia laran-diʼak neʼebé boot hodi apoia haʼu iha dadur laran no mós apoia haʼu hodi defende* liafuan diʼak iha ukun-naʼin sira-nia oin.

8 Tanba Maromak hatene katak haʼu hanoin tebes imi, haʼu hadomi imi hotu hanesan domin neʼebé Kristu Jesus hatudu. 9 No ida-neʼe mak haʼu husu nafatin iha haʼu-nia orasaun, katak imi-nia domin bele sai boot liután hamutuk ho matenek neʼebé loos no komprende ho didiʼak Maromak nia hakarak; 10 haʼu mós harohan katak imi bele buka-hatene loloos buat sira neʼebé importante liu, atu nuneʼe imi la halo sala ida no la halo ema seluk sidi toʼo Kristu nia loron, 11 no liuhusi Jesus Kristu imi bele sai nakonu ho hahalok loos hodi fó glória no hahiʼi ba Maromak.

12 No maun-alin sira, haʼu hakarak imi hatene katak tuir loloos buat neʼebé mosu ona ba haʼu loke dalan atu habelar liután liafuan diʼak, 13 basá Guarda husi Liurai Roma nian no mós ema seluk hotu rona ona katak haʼu sai dadur-naʼin tanba Kristu. 14 No, maun-alin barak iha Naʼi mós hetan aten-brani tanba haʼu-nia situasaun nuʼudar dadur, no sira sai brani liután atu koʼalia Maromak nia liafuan la ho taʼuk.

15 Maski iha ema balu haklaken kona-ba Kristu liuhusi laran-moras no haksesuk-malu, maibé ema seluk haklaken ho hanoin neʼebé diʼak. 16 Sira neʼebé iha hanoin diʼak haklaken kona-ba Kristu tanba domin, basá sira hatene katak Maromak hili ona haʼu atu defende liafuan diʼak; 17 maibé sira neʼebé haklaken ho laran-moras, sira halo ida-neʼe hodi buka atu manán malu, no sira-nia laran la moos, tanba sira hakarak atu hamosu problema ba haʼu iha haʼu-nia situasaun nuʼudar dadur. 18 Entaun buat sira-neʼe katak sá? Neʼe katak, maski sira haklaken ho laran-moos ka lae, maibé ema rona mensajen kona-ba Kristu no haʼu kontente kona-ba neʼe. Tuir loloos, haʼu sei kontinua haksolok 19 tanba haʼu hatene katak ida-neʼe sei lori salvasaun ba haʼu liuhusi imi-nia harohan no liuhusi apoia espíritu santu nian neʼebé Jesus Kristu fó. 20 Haʼu fiar metin no iha esperansa katak haʼu sei la sai moe kona-ba buat ida. No hodi koʼalia ho aten-brani, haʼu fó hahiʼi ba Kristu agora, hanesan haʼu halo uluk. Haʼu* sei fó hahiʼi ba nia maski haʼu moris ka mate.

21 No kona-ba haʼu, se haʼu moris, neʼe ba Kristu, no se haʼu mate, neʼe lori diʼak ba haʼu. 22 No se haʼu kontinua moris iha isin neʼe, haʼu bele fó fuan barak tan iha haʼu-nia serbisu. Maibé, kona-ba mate ka moris, haʼu la fó sai ida neʼebé mak haʼu hili. 23 No husi buat rua neʼe haʼu la hatene atu hili ida neʼebé; tanba haʼu hakarak atu sai livre no atu hamutuk ho Kristu, klaru katak ida-neʼe mak diʼak liu hotu. 24 Maibé buat neʼebé diʼak liu ba imi mak atu haʼu kontinua moris iha mundu* neʼe. 25 Entaun, tanba haʼu fiar duni ida-neʼe, haʼu hatene katak haʼu sei moris no sei hela ho imi hotu atu nuneʼe imi bele laʼo ba oin no hetan ksolok husi imi-nia fiar, 26 no mós atu imi-nia ksolok iha Kristu Jesus bele sai nakonu liután tanba haʼu hamutuk fali ho imi.

27 Hatudu hahalok nuʼudar ema neʼebé hafolin liafuan diʼak kona-ba Kristu, atu nuneʼe, maski haʼu laʼo ba imi hodi haree imi ka haʼu dook husi imi, haʼu bele rona kona-ba imi no hatene katak imi hamriik metin ho neon ida deʼit, nuʼudar ema* ida deʼit, no hakaʼas an atu apoia malu kona-ba fiar husi liafuan diʼak, 28 no iha buat hotu keta sai taʼuk ba ema neʼebé kontra imi. Tanba buat sira-neʼe mak prova neʼebé hatudu katak sira sei lakon no imi sei hetan salvasaun; no prova neʼe mak husi Maromak. 29 Basá imi hetan ona knaar espesiál iha Kristu, laʼós deʼit atu tau imi-nia fiar ba nia, maibé mós atu terus tanba nia. 30 Tanba susar neʼebé imi hasoru hanesan ho susar neʼebé imi haree ona iha haʼu, no neʼebé imi rona katak haʼu hasoru daudaun.

2 Se imi ida deʼit ho Kristu, no se imi fó laran-manas no fó kmaan ba ema seluk tan imi-nia domin, no mós se imi hatudu katak imi hanoin ema seluk, imi hadomi sira no hatudu laran-sadiʼa ba sira, 2 entaun halo haʼu-nia ksolok sai kompletu hodi hatudu katak imi iha hanoin ida deʼit no hadomi malu, no imi sai ida deʼit, hodi iha neon ida. 3 Keta halo buat ida hodi buka atu manán deʼit ka foti-an, maibé ho haraik-an hodi haree ema seluk boot liu imi. 4 Keta buka deʼit imi rasik nia diʼak, maibé buka mós ema seluk nia diʼak.

5 Kontinua hatudu hahalok neʼebé Kristu Jesus mós hatudu. 6 Maski nia hanesan Maromak nia ilas, nia la hanoin atu hadau Maromak nia pozisaun hodi sai hanesan ho Maromak. 7 Maibé nia husik buat hotu neʼebé nia iha no sai nuʼudar atan ida no sai hanesan ho ema. 8 Liután neʼe, kuandu nia moris nuʼudar ema, nia haraik an hodi halo tuir toʼo mate, sin, mate iha ai-riin terus nian. 9 Tan razaun neʼe mós Maromak foti nia ba pozisaun neʼebé aas liu no ho laran-diʼak Maromak fó ba nia naran ida neʼebé boot liu naran sira seluk, 10 atu nuneʼe, iha Jesus nia naran, ain-tuur hotu tenke hakneʼak, sira neʼebé iha lalehan no sira neʼebé iha rai no mós sira neʼebé iha rai okos, 11 no nanál hotu tenke fó sai iha ema nia oin katak Jesus Kristu mak Naʼi ba Maromak no Aman nia glória.

12 Tan neʼe, haʼu-nia maluk doben sira, hanesan imi sempre halo tuir bainhira haʼu iha imi-nia leet, agora imi mós halo liután kuandu haʼu la iha; entaun kontinua hakaʼas an atu hetan imi-nia salvasaun ho taʼuk no nakdedar. 13 Tanba Maromak mak ida neʼebé halo imi iha forsa, hodi fó ba imi hakarak no kbiit atu halo buat neʼebé monu loos ba nia laran. 14 Kontinua halo buat hotu hodi la muramura no la haksesuk malu, 15 atu imi sai laran-moos no la iha sala ida, nuʼudar Maromak nia oan neʼebé sala-laek iha jerasaun neʼebé aat no kleʼuk nia leet. No iha sira-nia leet mak imi sai nabilan hodi lori naroman iha mundu. 16 Kaer metin nafatin ba liafuan moris nian, atu nuneʼe haʼu bele iha razaun atu haksolok iha Kristu nia loron tanba hatene katak haʼu la halai saugati deʼit ka haʼu-nia serbisu makaʼas la saugati deʼit. 17 No se haʼu sai ona nuʼudar sakrifísiu hemu nian neʼebé fakar ona iha imi-nia sakrifísiu nia leten, katak imi-nia serbisu atu ajuda ema, serbisu neʼebé imi-nia fiar mak book imi atu halo, haʼu kontente no haksolok ho imi hotu. 18 No iha dalan neʼebé hanesan, imi mós tenke sai kontente no haksolok ho haʼu.

19 Maibé, haʼu hein atu haruka Timóteo ba imi lakleur tan se neʼe tuir Naʼi Jesus nia hakarak, atu nuneʼe haʼu bele hetan laran-manas kuandu haʼu rona liafuan ruma kona-ba imi. 20 Basá haʼu la iha ema seluk neʼebé iha hahalok hanesan nia, no nia sei tau matan ba imi ho laran. 21 Basá sira seluk hotu buka deʼit sira-nia hakarak rasik, laʼós Kristu Jesus nia hakarak. 22 Maibé imi hatene prova neʼebé nia hatudu ona kona-ba nia an, katak hanesan oan hamutuk ho aman, nia serbí hamutuk ho haʼu atu habelar liafuan diʼak. 23 Tan neʼe, nia mak ida neʼebé haʼu hakarak atu haruka ba imi bainhira haʼu haree tiha buat neʼebé atu mosu ba haʼu. 24 Tuir loloos, haʼu fiar duni iha Naʼi katak lakleur tan haʼu rasik sei toʼo ba imi.

25 Maibé agora haʼu sente katak haʼu presiza atu haruka haʼu-nia alin Epafrodito ba imi, nia mak haʼu-nia maluk serbisu-naʼin no luta-naʼin hamutuk ho haʼu, neʼebé uluk imi haruka mai haʼu atu fó tulun ba haʼu-nia presiza. 26 Nia hakarak tebes atu haree imi hotu no nia laran-triste tanba imi rona katak nia moras. 27 Sin, nia sai moras toʼo besik mate; maibé Maromak hatudu laran-sadiʼa ba nia, tuir loloos, laʼós deʼit ba nia, maibé mós ba haʼu, atu nuneʼe haʼu labele sai triste liután. 28 Tan neʼe, haʼu haruka nia lalais ba imi, atu nuneʼe kuandu imi haree nia, imi bele haksolok fali no haʼu mós la hanoin barak tan. 29 Nuneʼe, simu nia bá hodi tuir imi-nia toman atu simu Naʼi nia dixípulu sira ho haksolok; no kontinua hafolin ema sira hanesan neʼe, 30 basá nia besik atu mate tanba halo Naʼi nia serbisu, hodi tau nia moris* iha perigu laran atu taka imi-nia fatin kuandu imi la iha neʼe hodi fó ajuda ba haʼu.

3 Ikusliu, maun-alin sira, kontinua haksolok iha Naʼi. No atu hakerek fali ba imi buat neʼebé haʼu hakerek ona, neʼe la todan ba haʼu, tanba ida-neʼe proteje imi.

2 Kuidadu bá ho asu sira,* kuidadu bá ho sira neʼebé halo buat aat, kuidadu bá ho sira neʼebé habelar sirkunsizaun. 3 Tuir loloos, ita mak ema sira neʼebé hetan sirkunsizaun loloos, tanba ita halo serbisu santu liuhusi Maromak nia espíritu no ita gaba an iha Kristu Jesus no ita la tau ita-nia fiar iha isin. 4 No se haʼu hakarak tau fiar iha isin, haʼu iha duni razaun atu halo ida-neʼe.

Se ema ruma hanoin katak nia iha razaun atu tau fiar iha isin, haʼu iha razaun barak liu fali sira; 5 haʼu hetan sirkunsizaun bainhira haʼu foin loron ualu, haʼu moris mai nuʼudar ema Izraél, husi suku Benjamin, haʼu ema ebreu neʼebé moris mai husi ema ebreu; kona-ba ukun-fuan, haʼu ema farizeu; 6 kona-ba laran-manas, haʼu fó-terus ba kongregasaun; kona-ba sai ema loos liuhusi ukun-fuan, ema hatene katak haʼu la iha sala ida. 7 Maibé buat neʼebé uluk folin-boot ba haʼu, haʼu haree ona nuʼudar folin-laek tanba Kristu.* 8 Tan neʼe, haʼu haree duni buat hotu nuʼudar folin-laek tanba matenek boot kona-ba Kristu Jesus haʼu-nia Naʼi. No tanba nia mak haʼu husik ona buat hotu no haree buat sira-neʼe nuʼudar foʼer deʼit, atu haʼu bele manán Kristu 9 no bele sai ida deʼit ho nia, laʼós tanba haʼu rasik sai ema loos hodi halo tuir ukun-fuan, maibé tanba sai ema loos liuhusi fiar ba Kristu; katak sai ema loos tuir Maromak tanba fiar. 10 Haʼu-nia hakarak mak atu hatene Kristu no hatene kona-ba kbiit neʼebé halo nia moris hiʼas husi mate. No haʼu hakarak atu terus hanesan nia no mós mate hanesan nia, 11 hodi haree se haʼu bele ka lae atu hetan moris-hiʼas uluk nian husi mate.

12 Laʼós katak haʼu simu ona haʼu-nia kolen ka haʼu sai kompletu ona, maibé haʼu hakaʼas an daudaun atu haʼu bele hetan kolen neʼe, basá Kristu Jesus hili ona haʼu atu simu ida-neʼe. 13 Maun-alin sira, haʼu seidauk hanoin katak haʼu kaer metin ona ida-neʼe; maibé buat ida deʼit mak haʼu hatene: Haʼu haluha ona buat neʼebé iha kotuk no hakaʼas an atu hetan buat neʼebé iha oin. 14 Haʼu kontinua halai ho hakarak atu simu kolen neʼebé Maromak bolu haʼu atu simu, katak moris iha lalehan liuhusi Kristu Jesus. 15 Entaun, ita hotu neʼebé laʼo ba oin ona, mai ita kontinua iha hanoin hanesan neʼe; no se imi iha hanoin neʼebé oin-seluk, Maromak sei hatudu sai ba imi hanoin neʼebé loos. 16 Maski nuneʼe, nuʼudar ita laʼo ba oin ona, mai ita kontinua laʼo ba oin ho didiʼak iha dalan neʼebé hanesan.*

17 Maun-alin sira, banati-tuir haʼu ho laran ida deʼit, no hateke ba sira neʼebé laʼo tuir ezemplu neʼebé ami hatudu ona. 18 Tanba iha ema barak neʼebé uluk haʼu sempre temi, maibé agora haʼu temi sira ho matan-been, basá sira laʼo nuʼudar inimigu ba Kristu nia ai-riin terus nian. 19 Sira-nia rohan mak mate, no sira-nia maromak mak sira-nia kabun, no sira-nia glória mak buat neʼebé lori moe ba sira, no sira tau sira-nia hanoin ba buat mundu neʼe nian. 20 Maibé ita-nia hela-fatin* mak iha lalehan, no ita mós hein namanas ba ita-nia salvadór neʼebé husi neʼebá, neʼe mak Naʼi Jesus Kristu. 21 Nia sei uza ninia kbiit boot atu halo buat hotu hakruʼuk ba nia; no ho kbiit neʼe nia sei troka ita-nia isin-lolon neʼebé fraku hodi sai hanesan ninia isin-lolon neʼebé iha glória.

4 Tan neʼe, haʼu-nia maun-alin doben sira, haʼu hakarak tebes atu haree imi, no imi mak haʼu-nia ksolok no koroa; imi hamriik metin bá iha Naʼi hanesan haʼu temi ona.

2 Haʼu fó laran-manas ba Evódia no mós Síntike atu iha hanoin neʼebé hanesan iha Naʼi. 3 Sin, haʼu mós husu ó, nuʼudar haʼu-nia maluk serbisu-naʼin loloos, atu kontinua tau matan ba feto sira-neʼe. Basá sira hakaʼas an ho haʼu atu apoia liafuan diʼak hamutuk mós ho Clemente no haʼu-nia maluk serbisu-naʼin sira seluk, neʼebé naran hakerek ona iha livru moris nian.

4 Haksolok nafatin bá iha Naʼi. Dala ida tan haʼu dehan, haksolok bá! 5 Halo ema hotu haree imi-nia haraik-an.* Naʼi besik hela. 6 Keta laran-taridu kona-ba buat ida, maibé iha buat hotu hatoʼo imi-nia laran-susar ba Maromak liuhusi orasaun no harohan no mós fó-agradese; 7 no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin liuhusi Kristu Jesus.

8 Ikusliu, maun-alin sira, buat naran deʼit neʼebé loos, buat naran deʼit neʼebé importante, buat naran deʼit neʼebé diʼak tuir Maromak nia haree, buat naran deʼit neʼebé moos, buat naran deʼit neʼebé haburas domin, buat naran deʼit neʼebé merese respeitu, buat naran deʼit neʼebé santu no merese hahiʼi, kontinua hanoin kona-ba buat sira-neʼe. 9 Buat neʼebé imi aprende no mós simu no rona no haree iha haʼu, halo tuir buat sira-neʼe bá; no Maromak dame nian sei hamutuk ho imi.

10 Haʼu haksolok tebes iha Naʼi tanba imi hahú hanoin fali kona-ba haʼu. Maski imi hanoin kona-ba haʼu, maibé imi ladún iha oportunidade atu hatudu ida-neʼe. 11 Haʼu koʼalia ida-neʼe laʼós tanba haʼu kuran buat ruma; basá iha situasaun naran deʼit haʼu aprende ona atu sai kontente ho buat neʼebé haʼu iha. 12 Haʼu hatene ona oinsá moris ho sasán uitoan no sasán barak. Basá iha buat hotu no iha situasaun hotu haʼu aprende ona segredu kona-ba oinsá moris kontente maski bosu ka hamlaha, iha sasán barak ka sasán uitoan. 13 Tanba iha buat hotu haʼu hetan forsa liuhusi nia neʼebé fó kbiit mai haʼu.

14 Maski nuneʼe, imi halo diʼak hodi ajuda haʼu iha haʼu-nia susar. 15 Tuir loloos, imi ema Filipe sira, imi mós hatene katak foufoun kuandu imi aprende tiha liafuan diʼak, no kuandu haʼu sai husi Masedónia, la iha kongregasaun ida mak ajuda haʼu ka simu haʼu-nia ajuda, só deʼit imi; 16 tuir loloos kuandu haʼu iha Tesalónika, imi haruka buat ruma ba haʼu laʼós dala ida deʼit maibé dala rua hodi ajuda haʼu. 17 Neʼe laʼós katak haʼu buka prezente ruma, maibé haʼu hakarak katak imi-nia hahalok diʼak halo imi sai riku liután. 18 Maibé, haʼu iha ona buat hotu neʼebé haʼu presiza no barak liután. Agora haʼu la kuran buat ida tanba haʼu simu ona buat neʼebé imi haruka liuhusi Epafrodito, prezente neʼebé diʼak, buat morin, no monu loos ba Maromak nia laran. 19 Nuneʼe mós, haʼu-nia Maromak sei fó buat hotu neʼebé imi presiza tuir ninia rikusoin glória nian liuhusi Kristu Jesus. 20 No glória ba ita-nia Maromak no Aman ba nafatin. Amen.

21 Fó haʼu-nia kumprimentus ba santu sira hotu neʼebé ida deʼit ho Kristu Jesus. Maun-alin sira neʼebé hamutuk ho haʼu haruka sira-nia kumprimentus ba imi. 22 Santu sira hotu, liuliu sira neʼebé iha umakain Liurai Roma nian,* haruka sira-nia kumprimentus ba imi.

23 Haʼu harohan katak Naʼi Jesus Kristu nia laran-diʼak neʼebé boot sei hamutuk ho imi tuir hahalok diʼak neʼebé imi hatudu.

[Nota–rodapé]