Koloso

1 Husi Paulo, Kristu Jesus nia apóstolu liuhusi Maromak nia hakarak, no husi Timóteo ita-nia alin, 2 ba santu sira no maun-alin sira iha Koloso neʼebé laran-metin hodi sai ida deʼit ho Kristu:

Haʼu harohan katak ita-nia Aman Maromak haraik ninia laran-diʼak boot ba imi no dame ba imi.

3 Kuandu ami halo orasaun ba imi, ami sempre fó-agradese ba Maromak, ita Naʼi Jesus Kristu nia Aman, 4 tanba ami rona ona kona-ba imi-nia fiar iha Kristu Jesus no kona-ba imi-nia domin ba santu sira, 5 basá imi iha esperansa atu simu buat neʼebé rai hela ba imi iha lalehan. Uluk imi rona ona kona-ba esperansa neʼe liuhusi mensajen lia-loos nian husi liafuan diʼak 6 neʼebé hatoʼo ona ba imi. No liafuan diʼak neʼe fó fuan no kontinua aumenta iha mundu tomak, no mós iha imi-nia leet, hahú husi loron neʼebé imi rona no hatene didiʼak lia-loos husi Maromak nia laran-diʼak neʼebé boot. 7 Neʼe mak buat neʼebé imi aprende ona husi Epafras, ita-nia maluk doben, nia serbí ho laran-metin nuʼudar atan ba Kristu hodi reprezenta ami. 8 Nia mós fó-hatene ami kona-ba imi-nia domin neʼebé imi haburas liuhusi espíritu.

9 No tan neʼe, hahú husi loron neʼebé ami rona kona-ba neʼe, ami la para atu halo orasaun kona-ba imi no husu katak Maromak ajuda imi atu hatene didiʼak ninia hakarak ho matenek hotu no kbiit atu komprende buat neʼebé mai husi espíritu santu. 10 Nuneʼe, imi bele laʼo ho loloos iha Jeová nia oin toʼo halo kontente nia iha dalan neʼebé kompletu. No imi bele kontinua fó fuan iha serbisu diʼak oioin no aumenta imi-nia matenek loloos kona-ba Maromak. 11 No imi bele hetan forsa ho kbiit hotu tuir Maromak nia kbiit neʼebé furak atu nuneʼe imi bele tahan buat hotu ho pasiénsia no ksolok, 12 no fó-agradese ba Aman neʼebé ajuda imi atu kumpre kritériu hodi hola parte iha liman-rohan ba santu sira neʼebé simu naroman.

13 Nia halo ita livre husi nakukun nia ukun no lori ita ba ninia Oan doben nia ukun. 14 Liuhusi ninia Oan mak ita sai livre tanba ninia sakrifísiu, katak ita hetan ona perdua ba ita-nia sala sira. 15 Nia mak ilas husi Maromak neʼebé matan la bele haree, oan primeiru husi kriasaun sira hotu; 16 tanba liuhusi nia mak Maromak kria buat hotu iha lalehan no iha rai, buat neʼebé matan haree no buat neʼebé matan la haree, maski neʼe mak kadunan ka naʼi-ulun ka governu ka ukun-naʼin sira. Maromak kria ona buat seluk hotu liuhusi nia no ba nia. 17 No mós, nia mak ulukliu buat seluk hotu no liuhusi nia mak Maromak kria buat hotu, 18 nia mak nuʼudar ulun ba isin-lolon, katak kongregasaun. Nia mak hun, ida neʼebé moris uluk husi mate, atu nuneʼe nia bele sai nuʼudar ida neʼebé primeiru iha buat hotu; 19 tanba Maromak kontente atu halo buat hotu sai kompletu iha nia, 20 no liuhusi nia mak Maromak halo dame fali ba ninia an ho buat hotu, maski neʼe mak buat neʼebé iha rai ka iha lalehan, no nia halo ida-neʼe liuhusi raan neʼebé fakar iha ai-riin terus nian.

21 Tuir loloos, uluk imi dook husi Maromak no sai nuʼudar inimigu tanba imi hanoin liu kona-ba hahalok aat sira, 22 maibé agora Maromak hadame malu ona ho imi liuhusi ema neʼe nia isin neʼebé nia fó ba mate nuʼudar sakrifísiu. Nia halo ida-neʼe atu imi sai nuʼudar buat santu no sala-laek, no atu ema ida labele koʼalia aat kona-ba ita iha ninia oin. 23 Maibé imi tenke kontinua hela iha fiar, harii metin iha fiar neʼe nia hun no hamriik metin hodi la husik ema hadook imi husi esperansa ba liafuan diʼak neʼebé imi rona no neʼebé haklaken ona ba ema hotu iha lalehan nia okos. No kona-ba liafuan diʼak neʼe mak haʼu Paulo sai nuʼudar atan.

24 Agora, haʼu haksolok atu hetan terus tanba imi. Haʼu hatene katak haʼu sei kontinua atu hasoru terus nuʼudar parte ba Kristu nia isin-lolon. Terus neʼe sei lori buat diʼak ba Kristu nia isin-lolon, katak kongregasaun. 25 Haʼu sai nuʼudar atan hodi serbí kongregasaun neʼe tuir knaar neʼebé Maromak fó ona mai haʼu atu haklaken Maromak nia liafuan ho didiʼak, no neʼe ba imi-nia diʼak. 26 No haʼu haklaken segredu santu neʼebé subar hela husi mundu uluk nian no husi jerasaun uluk nian, maibé agora hatudu sai ona ba ninia santu sira. 27 Maromak haksolok atu hatudu sai ba santu sira rikusoin furak husi segredu santu neʼe neʼebé nia fó sai ona iha nasaun sira-nia leet. Segredu santu neʼe mak Kristu, ida neʼebé sai ida deʼit ho imi, no imi iha esperansa atu simu glória hamutuk ho nia. 28 Ami haklaken kona-ba nia hodi fó avizu ba ema hotu no hanorin ema hotu ho matenek neʼebé loos, atu ami bele entrega ema ida-idak ba Maromak nuʼudar Kristu nia dixípulu loloos. 29 Tan neʼe mak haʼu serbisu makaʼas no hakaʼas an ho ajuda husi ninia kbiit neʼebé book an iha haʼu.

2 Basá haʼu hakarak imi atu hatene kona-ba oinsá haʼu hakaʼas an makaʼas ba imi no ba sira neʼebé iha Laodiseia no mós ba sira hotu neʼebé seidauk haree haʼu-nia oin. 2 Haʼu halo neʼe atu ema hotu nia laran bele hetan kmaan no sira bele sai ida deʼit iha domin. Nuneʼe sira bele hetan rikusoin hotu hodi komprende no hetan matenek loloos kona-ba Maromak nia segredu santu, katak Kristu. 3 Matenek nia rikusoin hotu subar iha nia. 4 Haʼu koʼalia ida-neʼe atu ema ida labele lohi imi ho liafuan midar oioin. 5 No maski loos katak haʼu la hamutuk ho imi iha isin, maibé haʼu-nia laran hamutuk ho imi, haʼu haksolok atu haree oinsá imi laʼo ho didiʼak no imi-nia fiar metin ba Kristu.

6 Tan neʼe, nuʼudar imi simu ona ita-nia Naʼi Kristu Jesus, kontinua laʼo hamutuk ho nia. 7 Hanesan ai nia abut neʼebé metin, imi tenke hamriik metin iha Jesus hodi tuir buat neʼebé imi aprende ona, no kuandu imi fó-agradese ba Maromak, imi-nia fiar bele sai nakonu liután.

8 Kuidadu bá atu ema ida la kaer imi ho lasu liuhusi ema nia matenek no hanorin bosok neʼebé la iha folin. Buat sira-neʼe tuir deʼit ema nia lisan no tuir dalan mundu neʼe nian, laʼós tuir Kristu. 9 Basá Maromak nia hahalok hotu kompletu iha nia. 10 No imi sai kompletu ona liuhusi nia, neʼebé nuʼudar ulun ba governu hotu no ukun-naʼin hotu. 11 Liuhusi nia mak imi mós hetan ona sirkunsizaun, laʼós ho ema nia liman maibé hodi hasai hahalok sala husi isin, tanba neʼe mak dalan neʼebé Kristu nia atan sira hetan sirkunsizaun. 12 Basá hodi hetan batizmu iha nia, imi hakoi tiha ona hamutuk ho nia, no liuhusi nia mak imi mós moris fali hamutuk ho nia tanba imi-nia fiar ba Maromak nia kbiit. Maromak mak ida neʼebé halo nia moris hiʼas husi mate.

13 Liután neʼe, maski imi mate ona iha imi-nia sala sira no imi mós la hetan sirkunsizaun iha imi-nia isin, maibé Maromak halo imi moris hamutuk ho nia. Nia ho laran-diʼak fó perdua ba ita-nia sala hotu 14 no nia hamoos tiha ukun-fuan neʼebé kontra ita, neʼebé inklui mandamentu sira. Nia hasai tiha ida-neʼe hodi hedi iha ai-riin terus nian. 15 No liuhusi ai-riin terus nian neʼe, nia manán tiha governu sira no ukun-naʼin sira no lori sira nuʼudar dadur, nia hamoe sira iha ema barak nia oin hodi hatudu sai katak nia manán sira.

16 Nuneʼe, keta husik ema ida tesi lia ba imi kona-ba buat neʼebé imi han no hemu ka kona-ba selebra festa ka fulan foun ka loron Sábadu; 17 tanba buat sira-neʼe mak nuʼudar lalatak husi buat neʼebé atu mai, maibé buat neʼebé loloos mak Kristu. 18 Ema balu hatudu haraik-an ho finje deʼit no adora anju sira, maibé keta husik ema hanesan neʼe hanetik imi atu hetan imi-nia kolen. Sira gaba an kona-ba buat neʼebé sira haree. No sira sai foti-an kona-ba buat neʼebé la iha folin tanba sira hanoin tuir isin deʼit. 19 Ema hanesan neʼe la kaer metin ba ulun, katak ida neʼebé fó buat neʼebé isin tomak presiza, no halo parte ida-idak tutan hamutuk, no liuhusi nia mak Maromak halo isin-lolon tomak sai boot ba daudaun.

20 Se imi la simu dalan mundu neʼe nian no mate ona ho Kristu, tansá mak imi kontinua moris hanesan imi parte ba mundu neʼe no tansá mak imi halo tuir ukun-fuan sira tuirmai neʼe: 21 “Keta foti, keta koko, keta kona”? 22 Tanba buat sira-neʼe koʼalia kona-ba buat neʼebé lakon tiha kuandu ita han no hemu. No ukun-fuan sira-neʼe mak lei no hanorin husi ema. 23 Maski ukun-fuan sira-neʼe haree hanesan matenek, maibé neʼe la ajuda ema atu luta hasoru hakarak isin nian, no ema halo tuir ukun-fuan sira-neʼe tanba sira hakarak hili rasik dalan atu halaʼo adorasaun. Sira fó-terus ba sira-nia isin rasik tanba sira hakarak ema atu hanoin katak sira haraik-an.

3 Maibé se Maromak halo imi moris fali hamutuk ho Kristu, entaun kontinua buka buat leten nian, iha neʼebé Kristu tuur iha Maromak nia liman sorin loos. 2 Kontinua hanoin kona-ba buat leten nian, laʼós kona-ba buat neʼebé iha rai. 3 Basá imi mate ona, no imi-nia moris subar ona iha Kristu hodi tuir Maromak nia hakarak. 4 Kuandu Kristu, ida neʼebé lori moris, hatudu sai ona ninia kbiit, iha tempu neʼe mós Maromak sei hatudu sai imi hamutuk ho nia no imi sei halo parte iha ninia glória.

5 Tan neʼe, hamate hakarak isin nian* neʼebé book imi atu halo hahalok hanesan sala-foʼer,* hahalok la moos, hakarak seksuál neʼebé foʼer, hakarak aat, no kaan buat neʼebé ema seluk nian, neʼebé hanesan adora estátua. 6 Maromak nia hirus sei tun ba ema sira neʼebé halo buat sira-neʼe. 7 Uluk imi mós iha toman atu halo buat sira-neʼe. 8 Maibé agora imi tenke soe tiha buat sira-neʼe hotu, katak laran-nakali, hirus, hahalok aat, koʼalia aat, no keta husik liafuan aat ida sai husi imi-nia ibun. 9 Keta bosok malu. Hasai tiha ema tuan nian hamutuk ho ninia hahalok sira, 10 no tau fali ema foun neʼebé Maromak fó ba ita; basá liuhusi matenek loloos ita kontinua hafoun ita-nia an hodi tuir Maromak nia ilas. 11 Nuneʼe, la iha ema gregu ka ema judeu, ema neʼebé hetan sirkunsizaun ka la hetan sirkunsizaun, ema husi rai seluk ka ema husi Seta, atan ka ema livre, maibé Kristu sai buat hotu ba ita no ita hotu ida deʼit ho nia.

12 Tan neʼe, nuʼudar ema neʼebé Maromak hili ona, santu no neʼebé nia hadomi, tau hahalok domin ho laran-sadiʼa nuʼudar imi-nia hatais hamutuk ho laran-diʼak, haraik-an, laran-maus, no pasiénsia. 13 Kontinua hatudu pasiénsia ba malu no fó perdua ba malu ho laran tomak maski ema halo buat ruma hasoru imi. Nuʼudar Jeová fó perdua ba imi ho laran tomak, imi mós tenke halo nuneʼe. 14 Maibé, iha buat sira-neʼe hotu nia leten, tau domin nuʼudar imi-nia hatais, tanba domin mak kesi ita hamutuk iha dalan neʼebé kompletu.

15 No mós, husik Kristu nia dame ukun iha imi-nia laran, tanba tuir loloos, Maromak bolu ona imi ba dame neʼe hodi sai isin ida. No hatudu bá katak imi agradese. 16 Husik Kristu nia liafuan hela iha imi no halo imi nakonu ho matenek. Kontinua hanorin no fó laran-manas ba malu ho salmu no hahiʼi ba Maromak, no kanta knananuk adorasaun nian ho agradese, kanta ba Jeová iha imi-nia laran. 17 No iha buat naran deʼit neʼebé imi koʼalia no halo, halo buat hotu iha Naʼi Jesus nia naran, no fó obrigadu ba Aman Maromak liuhusi nia.

18 Imi feen sira, hakruʼuk an ba imi-nia laʼen, tanba neʼe mak buat neʼebé diʼak iha Naʼi. 19 Imi laʼen sira, kontinua hadomi imi-nia feen no keta sai hirus makaʼas ba sira. 20 Imi oan sira, halo tuir imi-nia inan-aman iha buat hotu, tanba ida-neʼe monu loos ba Naʼi nia laran. 21 Imi aman sira, keta halo imi-nia oan sai hirus, atu nuneʼe sira la sai laran-tun. 22 Imi atan sira, halo tuir imi-nia naʼi rai neʼe nian iha buat hotu, laʼós kuandu sira haree imi tanba imi hakarak halo kontente ema, maibé ho laran-moos no taʼuk ba Jeová. 23 Buat naran deʼit neʼebé imi halo, halo ida-neʼe ho laran tomak hanesan imi halo ba Jeová, laʼós ba ema, 24 tanba imi hatene katak imi sei simu liman-rohan nuʼudar imi-nia kolen husi Jeová. No nuʼudar atan ida, serbí imi-nia Naʼi, neʼe mak Kristu. 25 Tuir loloos, ema neʼebé halo sala sei simu fali nia kolen tuir sala neʼebé nia halo, basá Maromak la todan ba sorin.

4 Imi neʼebé nuʼudar naʼi, imi tenke hatudu hahalok diʼak no loos ba imi-nia atan sira, tanba imi hatene katak imi mós iha Naʼi iha lalehan.

2 La para atu harohan. No kontinua matan-moris hodi halo orasaun no fó-agradese. 3 Maibé iha tempu hanesan harohan mós ba ami atu Maromak bele loke odamatan ba ami atu haklaken ninia liafuan, hodi nuneʼe ami bele fó sai segredu santu kona-ba Kristu, no tuir loloos tanba segredu santu neʼe mak haʼu sai nuʼudar dadur; 4 sin, harohan atu haʼu bele koʼalia ho momoos kona-ba neʼe nuʼudar haʼu tenke halo.

5 Kontinua hatudu matenek iha dalan neʼebé imi halaʼo imi-nia moris kuandu imi hamutuk ho ema iha liʼur; uza didiʼak imi-nia tempu. 6 Sempre koʼalia ho laran-diʼak hodi tau masin uitoan atu imi bele hatene oinsá imi tenke hatán ba ema ida-idak.

7 Tíkiko, haʼu-nia alin doben no serbisu-naʼin neʼebé laran-metin no maluk atan iha Naʼi, nia sei fó-hatene imi kona-ba haʼu-nia serbisu hotu. 8 Haʼu haruka nia ba imi hodi nuneʼe imi sei hatene ami-nia situasaun, atu nia bele fó kmaan ba imi-nia laran. 9 Haʼu mós haruka Onésimo, neʼebé husi imi-nia leet, nia mak haʼu-nia maluk neʼebé fiar metin no neʼebé haʼu hadomi. Sira naʼin-rua sei fó-hatene imi kona-ba buat hotu neʼebé mosu iha neʼe.

10 Aristarko haʼu-nia maluk dadur-naʼin haruka ninia kumprimentus ba imi, no nuneʼe mós ho Marcos, Barnabé nia primu, kona-ba nia mak imi rona lia-menon atu simu nia ho liman rua se nia toʼo ba imi, 11 no Jesus neʼebé mós bolu nuʼudar Justus haruka nia kumprimentus ba imi; ema sira-neʼe mós parte ba ema neʼebé hetan ona sirkunsizaun. Sira deʼit mak haʼu-nia maluk serbisu-naʼin ba Maromak nia Ukun, no sira fó kmaan mai haʼu. 12 Epafras, Kristu Jesus nia atan, neʼebé mós mai husi imi-nia leet, haruka ninia kumprimentus ba imi. Nia sempre halo orasaun kona-ba imi ho laran-manas, atu ikusmai imi bele sai kompletu hodi hamriik metin no fiar metin iha Maromak nia hakarak hotu. 13 Tanba haʼu sai nuʼudar sasin katak nia hakaʼas an makaʼas kona-ba imi no kona-ba sira neʼebé iha Laodiseia no Hierópolis.

14 Doutór Lucas, neʼebé ema barak hadomi, haruka ninia kumprimentus ba imi, nuneʼe mós ho Demas. 15 Fó haʼu-nia kumprimentus ba maun-alin sira iha Laodiseia no ba Ninfa no mós ba kongregasaun neʼebé iha ninia uma. 16 No kuandu imi lee tiha ona karta neʼe, haruka ida-neʼe ba kongregasaun husi Laodiseia atu sira bele lee, no imi mós lee fali karta neʼebé haʼu haruka ba Laodiseia. 17 No mós, fó-hatene Arkipo: “Kontinua matan-moris atu ó bele kumpre ó-nia knaar neʼebé ó simu iha Naʼi.”

18 Haʼu Paulo, haʼu hakerek kumprimentus neʼe ho haʼu-nia liman rasik. Kontinua hanoin haʼu-nia situasaun nuʼudar dadur-naʼin. Maromak nia laran-diʼak neʼebé boot hamutuk ho imi.

[Nota–rodapé]