1 Tesalónika

1 Husi Paulo, Silvano, no Timóteo, hakerek ba kongregasaun Tesalónika neʼebé ida deʼit ho Aman Maromak no Naʼi Jesus Kristu:

Haʼu harohan ba Maromak atu haraik ninia laran-diʼak neʼebé boot no dame ba imi.

2 Ami sempre fó obrigadu ba Maromak kuandu ami temi kona-ba imi hotu iha ami-nia orasaun, 3 basá iha ita-nia Aman Maromak nia oin ami nunka haluha serbisu neʼebé imi halo ho fiar no domin, no oinsá imi tahan susar tanba imi-nia esperansa iha Naʼi Jesus Kristu. 4 Maun-alin sira, ami hatene katak Maromak hadomi imi no nia hili ona imi, 5 tanba kuandu ami haklaken liafuan diʼak ba imi, ami la halo ida-neʼe ho liafuan deʼit, maibé ho kbiit no ho espíritu santu no fiar, nuʼudar imi rasik hatene buat neʼebé ami halo ba imi-nia diʼak. 6 No imi banati-tuir ona ami no mós Naʼi tanba imi simu liafuan neʼe ho haksolok husi espíritu santu maski hasoru terus barak. 7 No imi sai ezemplu diʼak ba fiar-naʼin hotu iha Masedónia no Akaia.

8 Tuir loloos, laʼós deʼit iha Masedónia no Akaia mak ema rona Maromak Jeová nia liafuan tanba imi, maibé iha fatin hotu imi-nia fiar ba Maromak sai belar toʼo ami la presiza koʼalia buat ida. 9 Tanba sira rasik kontinua fó-hatene kona-ba oinsá ami hasoru imi ba dala primeiru no oinsá imi fila ba Maromak hodi husik imi-nia estátua sira no sai atan ba Maromak neʼebé loos no moris. 10 Sira mós fó-hatene oinsá imi hein ba Maromak nia Oan-Mane husi lalehan, ida neʼebé moris hiʼas ona husi mate, katak Jesus, neʼebé halo ita livre husi Maromak nia hirus neʼebé atu mai.

2 Tuir loloos, maun-alin sira, imi rasik hatene oinsá ami-nia vizita ba imi la saugati deʼit. 2 Maibé hanesan imi hatene ona, depois ami hetan tiha susar no ema hamoe tiha ami iha Filipe, ami sai aten-brani liuhusi ami-nia Maromak hodi fó-hatene ba imi liafuan diʼak husi Maromak maski hasoru terus barak. 3 Tanba avizu neʼebé ami fó ba imi la mai husi ideia sala ka husi laran-makerek ka husi lohi, 4 maibé, hanesan Maromak hili ona ami atu simu knaar hodi fó sai liafuan diʼak, entaun ami koʼalia, laʼós atu halo kontente ema maibé halo kontente Maromak, ida neʼebé buka-hatene ita-nia laran.

5 Tuir loloos, imi hatene katak ami nunka uza lia midar oioin ka hatudu hahalok laran-makerek hodi taka ami-nia hakarak kaan-teen nian, no Maromak mak sai sasin kona-ba neʼe! 6 Maski nuʼudar Kristu nia apóstolu ami bele hatodan imi atu tau matan ami, maibé ami la buka glória husi ema ida, laʼós husi imi ka ema seluk. 7 Maibé, hanesan inan neʼebé fó-susu no tau matan didiʼak ba nia oan, ami mós tau matan didiʼak ba imi. 8 Entaun, ami hanoin tebes imi, no ami kontente atu fahe ba imi laʼós deʼit liafuan diʼak kona-ba Maromak, maibé mós fó ami-nia moris* hodi ajuda imi, tanba ami hadomi imi tebetebes.

9 Maun-alin sira, haʼu hatene katak imi la haluha ami-nia serbisu no ami-nia hakaʼas-an. Basá kuandu ami haklaken liafuan diʼak kona-ba Maromak ba imi, ami serbisu loron no kalan atu la hatodan imi ida. 10 Imi no mós Maromak sai sasin katak ami laran-metin no laran-loos no la halo sala ida iha dalan neʼebé ami ajuda imi. 11 Imi hatene ho didiʼak katak ami kontinua fó laran-manas no fó kmaan no fó avizu ba imi ida-idak, hanesan aman ida halo ba ninia oan, 12 atu nuneʼe, imi bele kontinua laʼo iha dalan neʼebé halo kontente Maromak, ida neʼebé bolu imi ba ninia Ukun no glória.

13 Tuir loloos, tan neʼe mak ami fó-agradese nafatin ba Maromak, tanba kuandu imi simu Maromak nia liafuan, neʼebé imi rona husi ami, imi simu ida-neʼe, laʼós nuʼudar ema nia liafuan, maibé, nuʼudar Maromak nia liafuan neʼebé mós book an iha imi fiar-naʼin sira. 14 Basá maun-alin sira, imi hasoru situasaun neʼebé hanesan ho Maromak nia kongregasaun sira iha Judeia neʼebé ida deʼit ho Kristu Jesus, tanba ema husi imi-nia rai rasik mak fó-terus ba imi, hanesan kongregasaun sira iha Judeia mós hetan terus husi ema judeu sira. 15 Ema judeu sira-neʼe mós oho Naʼi Jesus no profeta sira no haterus ami. Liután neʼe, sira la halo kontente Maromak no kontra buat neʼebé diʼak ba ema hotu, 16 tanba sira koko atu hanetik ami hodi koʼalia ba ema husi nasaun seluk atu ema sira-neʼe bele hetan salvasaun. Hodi halo nuneʼe, sira halo sala barak. Maibé ikusmai Maromak nia hirus tun ba sira.

17 Maun-alin sira, uluk ema haketak ami husi imi ba tempu uitoan iha isin, maibé laʼós iha ami-nia laran. No iha tempu neʼebá, ami hakarak tebes atu bá haree imi no ami hakaʼas an liután atu toʼo ba imi. 18 Tan razaun neʼe mak ami hakarak laʼo ba imi; sin, haʼu Paulo, koko laʼós dala ida deʼit maibé ba dala rua, maski nuneʼe Satanás hanetik ami-nia dalan. 19 Basá, saida mak ami-nia ksolok ka esperansa ka koroa kontente nian iha ita Naʼi Jesus nia oin kuandu nia toʼo ona mai?* Neʼe mak imi, loos ka lae? 20 Sin, imi mak ami-nia glória no ksolok.

3 Kuandu ami la bele ona atu tahan, ami hanoin katak diʼak atu ami hein deʼit iha Atenas; 2 no ami haruka Timóteo, ami-nia alin no Maromak nia atan neʼebé haklaken liafuan diʼak kona-ba Kristu, atu nia fó kmaan ba imi no hametin imi-nia fiar, 3 atu nuneʼe la iha ema ida lakon fiar tanba susar sira-neʼe. Basá imi rasik hatene katak ita la bele hasees an husi susar sira hanesan neʼe. 4 No kuandu ami hamutuk ho imi, ami sempre fó sai nanis ba imi katak ita sei hasoru susar, no neʼe mak buat neʼebé mosu duni, hanesan imi hatene ona. 5 Tan neʼe mak kuandu haʼu la bele ona atu tahan, haʼu haruka Timóteo ba imi atu hatene imi-nia laran-metin, tanba karik Diabu tenta ona imi iha dalan balu, no ami-nia serbisu sei sai leet deʼit.

6 Maibé agora, Timóteo foin fila mai ami no nia fó-hatene ami liafuan diʼak kona-ba imi-nia laran-metin no domin, no katak imi sempre kontinua hanoin-hetan ami ho haksolok, no katak imi hakarak tebes atu haree ami nuʼudar ami mós hakarak tebes atu haree imi. 7 Tan neʼe, maun-alin sira, iha ami-nia susar no terus hotu, ami hetan kmaan tanba imi no tanba laran-metin neʼebé imi hatudu. 8 Ami hetan fali forsa tanba imi hamriik metin iha Naʼi. 9 Ami agradese tebes ba Maromak kona-ba imi tanba imi halo ami haksolok tebes iha Maromak nia oin. 10 Loron no kalan ami harohan ho laran-manas atu ami bele haree imi-nia oin no fó buat neʼebé imi presiza atu hametin imi-nia fiar.

11 No agora, ami hein katak ami-nia Maromak no Aman no ami-nia Naʼi Jesus loke dalan hodi ami bele toʼo ba imi. 12 Liután neʼe, ami harohan katak Naʼi sei halo imi nakonu ho domin ba malu no mós ba ema hotu, hanesan ami-nia domin ba imi; 13 atu nuneʼe nia sei hametin imi-nia laran, hodi sai ema sala-laek no santu iha Aman Maromak nia oin kuandu ita Naʼi Jesus toʼo ona mai* hamutuk ho santu sira hotu.

4 Ikusliu maun-alin sira, imi simu ona hanorin husi ami kona-ba oinsá imi tenke halaʼo imi-nia moris hodi halo kontente Maromak, no tuir loloos imi halo neʼe daudaun. No agora ami hakarak fó laran-manas ba imi no husu imi iha Naʼi Jesus nia naran atu kontinua halo ida-neʼe ho diʼak liután. 2 Tanba imi hatene mandamentu sira neʼebé ami fó ba imi liuhusi Naʼi Jesus nia naran.

3 Basá Maromak nia hakarak mak neʼe, katak imi tenke sai santu no hasees an husi sala-foʼer.* 4 Imi ida-idak tenke hatene oinsá kontrola ninia isin rasik atu imi sai santu no atu Maromak simu imi,* 5 laʼós ho hakarak seksuál nian neʼebé kaan-teen hanesan ho ema husi nasaun sira neʼebé la hatene Maromak. 6 Ema ida keta hakanek ka halo sala hasoru ninia maun-alin hodi halo buat sira-neʼe, basá Jeová mak fó kastigu tanba hahalok sira-neʼe, hanesan ami fó-hatene nanis ona ba imi no mós fó sasin ba imi ho didiʼak. 7 Tanba Maromak bolu ita, laʼós atu moris foʼer, maibé atu moris santu. 8 Entaun, ema neʼebé la simu hanorin neʼe, nia la simu, laʼós ema, maibé Maromak, ida neʼebé fó espíritu santu ba imi.

9 Maibé, kona-ba hadomi malu nuʼudar maun-alin, ami la presiza hakerek ba imi, tanba Maromak rasik hanorin imi atu hadomi malu. 10 Tuir loloos, imi halo daudaun ida-neʼe ba maun-alin hotu iha Masedónia tomak. Maski nuneʼe, ami husu imi, maun-alin sira, atu kontinua halo ida-neʼe liután. 11 Hakaʼas an atu moris iha dame laran no keta mete ema seluk nia moris no halo serbisu ho imi-nia liman, hanesan ami haruka ona imi atu halo; 12 atu nuneʼe imi bele halaʼo imi-nia moris ho didiʼak iha ema seluk* nia oin hodi la kuran buat ida.

13 Liután neʼe, maun-alin sira, ami hakarak atu imi hatene ho loloos kona-ba sira neʼebé mate ona;* atu nuneʼe imi labele triste hanesan ema seluk neʼebé la iha esperansa. 14 Se ita iha fiar katak Jesus mate no moris fali, entaun, ita mós fiar katak Maromak sei halibur sira neʼebé mate ona* liuhusi Jesus, hodi nuneʼe sira sei hamutuk ho Jesus. 15 Tanba ida-neʼe mak ami fó-hatene ba imi liuhusi Jeová nia liafuan, katak ita neʼebé moris hela iha loron neʼebé Naʼi toʼo ona mai,* ita sei la saʼe ba lalehan ulukliu fali sira neʼebé mate ona;* 16 Tanba Naʼi rasik sei tun husi lalehan no nia sei bolu makaʼas ho lian arkanju nian no ho Maromak nia trombeta, no ninia dixípulu sira neʼebé mate ona sei moris hiʼas uluk. 17 Depois neʼe, ita neʼebé moris hela, sei lori saʼe tiha iha kalohan laran hodi hamutuk ho sira atu hasoru Naʼi iha leten; nuneʼe ita sei hamutuk ho Naʼi ba nafatin. 18 Tan neʼe, kontinua fó laran-manas ba malu ho liafuan sira-neʼe.

5 Maun-alin sira, kona-ba tempu no loron sira neʼebé deside ona, ema ida la presiza hakerek ba imi. 2 Tanba imi rasik hatene ho didiʼak katak Jeová nia loron sei mai hanesan naʼok-teen iha kalan. 3 Iha tempu neʼebé sira dehan: “Haree! Iha dame no hakmatek!” tuirmai mak terus sei mosu ba sira derrepente deʼit, hanesan ho moras tuur-ahi nian neʼebé feto ida sente; no sira sei la bele halai-sees. 4 Maibé imi, maun-alin sira, imi laʼós iha nakukun laran, atu loron neʼe la kaer-toman imi derrepente deʼit hanesan naʼok-teen sira, 5 tanba imi hotu mak naroman nia oan no loron nia oan sira. Ita laʼós parte ba kalan ka nakukun nian.

6 Entaun, ita labele toba hanesan ema seluk, maibé mai ita hadeer nafatin no kontinua oin-moos. 7 Tanba sira neʼebé toba, baibain toba iha kalan no sira neʼebé hemu-lanu, baibain lanu iha kalan. 8 Maibé kona-ba ita, ita mak loron nia oan sira, entaun mai ita oin-moos nafatin, tau fiar no domin nuʼudar hatais funu nian atu proteje ita-nia hirus-matan, no tau esperansa salvasaun nian nuʼudar kapasete; 9 tanba Maromak hili ita laʼós atu simu ninia hirus, maibé atu hetan salvasaun liuhusi Naʼi Jesus Kristu. 10 Nia mate ba ita, atu nuneʼe, maski ita hadeer nafatin ka toba, ita sei moris hamutuk ho nia. 11 Tan neʼe, kontinua fó aten-brani ba malu no hametin malu, hanesan imi halo daudaun ona.

12 No ami husu imi maun-alin sira, atu hatudu respeitu ba sira neʼebé serbisu makaʼas iha imi-nia leet no sira neʼebé dirije imi iha Naʼi no fó avizu ba imi; 13 hatudu bá katak imi hafolin tebes sira no hadomi sira tanba sira-nia serbisu. Buka dame iha imi-nia leet. 14 No iha parte seluk, ami husu imi, maun-alin sira, fó konsellu ba sira neʼebé la tuir ukun-fuan, fó laran-manas ba sira neʼebé laran-tun, apoia sira neʼebé fraku, hatudu pasiénsia ba ema hotu. 15 Kuidadu bá katak ema ida la selu aat ho aat ba ema seluk, maibé sempre buka atu halo buat neʼebé diʼak ba malu no mós ba ema seluk hotu.

16 Haksolok nafatin bá. 17 Halo orasaun beibeik. 18 Fó-agradese kona-ba buat hotu, tanba ida-neʼe mak Maromak nia hakarak ba imi iha Kristu Jesus. 19 Keta hanetik espíritu* nia serbisu iha imi.* 20 Keta haree liafuan profeta nian nuʼudar buat neʼebé la iha folin. 21 Buka-hatene katak buat hotu mak loos; kaer metin ba buat neʼebé diʼak. 22 Hasees an husi buat aat hotu.

23 Haʼu harohan katak Maromak neʼebé fó imi dame sei halo imi santu ba ninia serbisu. No mós katak imi-nia hahalok diʼak,* imi-nia moris* no imi-nia isin-lolon sai sala-laek nafatin no diʼak toʼo* tempu neʼebé ita Naʼi Jesus Kristu toʼo ona mai.* 24 Nia neʼebé hili imi mak laran-metin, no nia sei halo duni ida-neʼe.

25 Maun-alin sira, kontinua harohan ba ami.

26 Kumprimenta maun-alin sira hotu ho reʼi santu nian.

27 Haʼu husu imi iha Naʼi nia naran atu lee karta neʼe ba maun-alin sira hotu.

28 Haʼu harohan katak Naʼi Jesus Kristu nia laran-diʼak neʼebé boot hamutuk ho imi.

[Nota–rodapé]