2 Tesalónika

1 Husi Paulo, Silvano, no Timóteo, hakerek ba kongregasaun Tesalónika neʼebé ida deʼit ho ita-nia Aman Maromak no Naʼi Jesus Kristu:

2 Haʼu harohan katak Aman Maromak no Naʼi Jesus Kristu sei hatudu laran-diʼak ba imi no haraik dame ba imi.

3 Ami tenke fó obrigadu beibeik ba Maromak kona-ba imi, maun-alin sira. Diʼak ba ami atu halo nuneʼe tanba imi-nia fiar sai boot daudaun no imi ida-idak nia domin ba malu aumenta ba beibeik. 4 Tan neʼe ami gaba imi ba Maromak nia kongregasaun sira tanba iha terus no susar hotu neʼebé imi hasoru imi tahan ho fiar. 5 Ida-neʼe hatudu katak Maromak tesi lia ho loloos, no tan neʼe mak nia sei sura imi nuʼudar ema neʼebé merese atu simu Maromak nia ukun, no ba ida-neʼe mak imi hetan terus daudaun.

6 Maromak nia tesi-lia neʼe mak loos tanba nia selu fali terus ba sira neʼebé fó-terus ba imi. 7 No ba imi neʼebé agora hetan terus, Maromak sei halo imi sai livre hamutuk ho ami iha tempu neʼebé Naʼi Jesus mosu mai husi lalehan hamutuk ho ninia anju sira neʼebé iha kbiit boot, 8 ho ahi neʼebé lakan, no nia sei selu aat ba sira neʼebé la hatene Maromak no ba sira neʼebé la halo tuir liafuan diʼak kona-ba ita Naʼi Jesus. 9 Ita-nia Naʼi sei tesi lia ba ema sira-neʼe. Sira-nia kastigu mak atu lakon ba nafatin husi Naʼi nia oin no la haree tan ninia kbiit boot. 10 Ida-neʼe sei mosu kuandu Naʼi mai atu simu glória hamutuk ho ninia santu sira no sira hotu neʼebé hatudu fiar ba nia sei hateke ho hakfodak. No imi sei sai parte ho sira tanba imi tau fiar ba lia-sasin neʼebé ami fó ba imi.

11 Tan neʼe, ami sempre halo orasaun ba imi, atu nuneʼe ita-nia Maromak bele sura imi nuʼudar ema neʼebé merese atu simu kolen neʼebé nia promete ona ba imi. No ami mós harohan atu Maromak uza nia kbiit hodi halo kompletu buat diʼak neʼebé nia hakarak, no mós halo kompletu buat neʼebé imi halo daudaun liuhusi imi-nia fiar neʼebé book imi. 12 Atu nuneʼe, ita Naʼi Jesus nia naran bele simu glória liuhusi imi, no imi hetan glória tanba sai ida deʼit ho nia, hodi tuir laran-diʼak neʼebé boot husi ita-nia Maromak no husi Naʼi Jesus Kristu.

2 Maibé maun-alin sira, kona-ba tempu neʼebé ita Naʼi Jesus Kristu toʼo ona mai* no halibur ita hamutuk ho nia, ami husu imi 2 atu la husik ema seluk troka lalais imi-nia hanoin neʼebé loos no la sai hakfodak kona-ba mensajen neʼebé dehan katak Jeová nia loron iha neʼe ona, maski mensajen neʼe haree hanesan husi Maromak, ka ema mak fó sai ka imi simu karta neʼebé haree hanesan husi ami.

3 Keta husik ema ida lohi imi kona-ba buat naran deʼit, tanba loron neʼe sei la mai antes sira neʼebé kontra lia-loos mosu uluk no mane neʼebé aat hatudu sai nia an; nia mak ida neʼebé sei halakon tiha. 4 Nia mak inimigu ida no nia foti nia an aas liu fali ema hotu neʼebé bolu nuʼudar “maromak” no aas liu fali sasán sira neʼebé ema hanaʼi; nuneʼe nia tuur iha Maromak nia templu hodi bolu nia an nuʼudar maromak ida. 5 Imi hanoin-hetan ka lae katak kuandu haʼu sei hamutuk ho imi, haʼu fó-hatene beibeik buat sira-neʼe ba imi?

6 Entaun agora imi hatene kona-ba buat neʼebé satan netik mane neʼe hodi nia la hatudu sai nia an antes tempu neʼebé hili ona. 7 Loloos mane aat neʼe nia serbisu halaʼo daudaun ona no neʼe sei kontinua nuʼudar segredu ida toʼo ida neʼebé satan netik nia la iha tan. 8 Tuirmai, mane aat neʼe sei hatudu sai nia an, nia mak ida neʼebé Naʼi Jesus sei halakon tiha ho espíritu husi nia ibun no harahun tiha kuandu Naʼi hatudu katak nia toʼo ona mai.* 9 Maibé mane aat neʼe iha hela* tanba Satanás. Satanás fó nia kbiit atu halo milagre, halo sinál bosok, halo hahalok furak 10 no halo hahalok aat oioin hodi lohi sira neʼebé atu lakon, ida-neʼe mak sira-nia kastigu tanba sira la hadomi no la simu lia-loos neʼebé bele salva sira. 11 Tan neʼe mak Maromak husik hanoin sala hodi lohi sira, atu sira bele tau fiar ba lia-bosok, 12 hodi nuneʼe sira hotu bele hetan tesi-lia tanba sira la fiar ba lia-loos maibé haksolok ho buat neʼebé la loos.

13 Maibé, ami tenke fó obrigadu beibeik ba Maromak kona-ba imi, maun-alin sira neʼebé Jeová hadomi, basá husi tempu uluk kedas Maromak hili imi atu hetan salvasaun hodi halo imi santu liuhusi ninia espíritu tanba imi-nia fiar ba lia-loos. 14 Nia bolu imi ba salvasaun neʼe liuhusi liafuan diʼak neʼebé ami haklaken, atu nuneʼe imi bele hetan ita Naʼi Jesus Kristu nia glória. 15 Entaun, maun-alin sira, hamriik metin no kaer metin nafatin ba toman neʼebé hanorin ona ba imi, maski neʼe liuhusi liafuan ka liuhusi karta husi ami. 16 Liután neʼe, ami harohan katak Naʼi Jesus Kristu rasik no mós ita-nia Aman Maromak, neʼebé hadomi ita no fó kmaan ba ita nafatin no fó ita esperansa furak liuhusi laran-diʼak neʼebé boot, 17 sei fó kmaan ba imi-nia laran no hametin imi atu imi nafatin halo no koʼalia buat neʼebé diʼak.

3 Ikusliu, maun-alin sira, kontinua atu harohan ba ami, atu nuneʼe Jeová nia liafuan nafatin sai belar ho lalais no ema simu ho respeitu hanesan iha imi-nia leet; 2 no mós harohan atu Maromak salva ami husi ema aat sira, tanba laʼós ema hotu mak fiar-naʼin. 3 Maibé Naʼi mak laran-metin no nia sei hametin imi no proteje imi husi aat-naʼin. 4 Liután neʼe, ami fiar metin iha Naʼi kona-ba imi, katak imi halo daudaun no sei kontinua halo buat neʼebé ami haruka. 5 Ami harohan atu Naʼi kontinua hatudu dalan ba imi-nia laran, atu nuneʼe imi hadomi Maromak no tahan susar tanba Kristu.

6 No agora ami fó mandamentu ba imi maun-alin sira, iha Naʼi Jesus Kristu nia naran, atu imi hasees an husi maun-alin sira neʼebé la laʼo tuir dalan neʼebé loos no la tuir toman neʼebé imi simu husi ami. 7 Tanba imi rasik hatene kona-ba oinsá imi tenke banati-tuir ami, tanba iha imi-nia leet ami halaʼo ami-nia moris ho loloos 8 no ami mós la han ema nia hahán hodi la selu. Maibé, ami hakaʼas an makaʼas loron no kalan, hodi halo serbisu atu ami la hatodan imi ida. 9 Neʼe laʼós katak ami la iha direitu atu simu buat ruma husi imi, maibé ami halo nuneʼe atu bele sai nuʼudar ezemplu ba imi atu banati-tuir ami. 10 Tuir loloos, kuandu ami hamutuk ho imi, ami sempre fó ukun-fuan neʼe ba imi: “Se ema ida lakohi atu serbisu, keta fó ai-han ba nia.” 11 Tanba ami rona katak iha imi-nia leet iha ema balu neʼebé la laʼo tuir dalan neʼebé loos, sira la halo serbisu ida maibé envolve an iha problema neʼebé laʼós sira-nian. 12 Ba ema sira hanesan neʼe, ami fó ukun-fuan no husu iha Naʼi Jesus Kristu nia naran katak sira tenke serbisu ho nonook no han ai-han neʼebé sira rasik hetan.

13 No kona-ba imi, maun-alin sira, keta sai kole atu halo buat neʼebé diʼak. 14 Maibé se ema ida lakohi atu halo tuir ami-nia liafuan liuhusi karta neʼe, tau marka ba ema neʼe, no keta ransu tan ho nia, atu nuneʼe nia bele sai moe. 15 Maski nuneʼe, keta haree nia nuʼudar inimigu, maibé kontinua fó konsellu ba nia nuʼudar maun-alin ida.

16 No haʼu harohan katak Naʼi dame nian bele fó dame nafatin ba imi iha dalan hotu. Naʼi hamutuk ho imi hotu.

17 Haʼu Paulo, haʼu hakerek kumprimentus neʼe ho haʼu-nia liman rasik, neʼe mak sinál iha haʼu-nia karta hotu, no ida-neʼe mak dalan neʼebé haʼu hakerek.

18 Haʼu harohan katak Naʼi Jesus Kristu nia laran-diʼak neʼebé boot hamutuk ho imi hotu.

[Nota–rodapé]