1 Timóteo

1 Husi Paulo, Kristu Jesus nia apóstolu tan Maromak ita-nia Salvadór nia hakarak no tan Kristu Jesus ita-nia esperansa nia hakarak, 2 ba Timóteo, haʼu-nia oan doben iha fiar:

Haʼu harohan katak Aman Maromak no ita Naʼi Kristu Jesus sei haraik ba ó laran-diʼak neʼebé boot, laran-sadiʼa, no dame.

3 Hanesan haʼu fó laran-manas ba ó atu hela iha Éfeso kuandu haʼu atu laʼo ba Masedónia, agora haʼu mós husu ó atu halo nuneʼe, hodi ó bele fó mandamentu ba ema balu atu la hanorin doutrina neʼebé oin-seluk, 4 ka atu la see tilun ba istória falsu ka rona ba lista kona-ba beiʼala sira-nia naran, neʼebé ikusmai la iha folin, tanba buat sira-neʼe lakon tempu deʼit hodi hamosu pergunta oioin no sira laʼós parte husi buat neʼebé Maromak fó atu hametin ita-nia fiar. 5 Tuir loloos, mandamentu neʼe hanorin ita atu hatudu domin ho laran neʼebé moos no ho laran* neʼebé diʼak no ho fiar neʼebé la laran-makerek. 6 Ema balu laʼo sees ona husi buat sira-neʼe hodi envolve an ho liafuan sira neʼebé la iha folin. 7 Sira hakarak sai nuʼudar mestre ukun-fuan nian, maibé sira la hatene buat neʼebé sira koʼalia ka buat neʼebé sira hanorin ho laran-manas.

8 No ita hatene katak Ukun-Fuan lori buat diʼak se ema uza neʼe ho loloos 9 hodi hatene katak ukun-fuan neʼe laʼós halo ba ema loos, maibé ba sira neʼebé la iha ukun-fuan no kontradór, ema aat no sala-naʼin, ema neʼebé la laran-metin no la respeitu buat santu, ema neʼebé oho inan no aman, no ohodór sira, 10 ema neʼebé halo sala-foʼer, mane neʼebé toba ho mane, sira neʼebé naʼok ema, bosok-teen, jura falsu, no buat seluk tan neʼebé kontra hanorin neʼebé loos. 11 Hanorin neʼe mai husi Maromak neʼebé kontente, no hanorin neʼe tuir liafuan diʼak kmanek neʼebé nia fó ona mai haʼu.

12 Haʼu agradese tebes ba Kristu Jesus ita Naʼi, ida neʼebé fó kbiit mai haʼu, tanba nia haree haʼu nuʼudar ema neʼebé laran-metin hodi fó knaar mai haʼu atu halo ninia serbisu, 13 maski uluk haʼu koʼalia kontra Maromak no fó-terus no koʼalia aat ninia povu. Maibé nia hatudu laran-sadiʼa ba haʼu, basá uluk haʼu halo buat sira-neʼe tanba la hatene no la iha fiar. 14 No ita-nia Naʼi nia laran-diʼak mai haʼu sai barak liután hamutuk ho fiar no domin neʼebé liuhusi Kristu Jesus. 15 Liafuan tuirmai neʼe mak loos no ita bele fiar duni: Kristu Jesus mai iha mundu atu salva sala-naʼin sira. Husi sira hotu haʼu mak halo sala boot liu. 16 Maski nuneʼe, nia hatudu laran-sadiʼa mai haʼu atu nuneʼe liuhusi haʼu, neʼebé halo sala boot liu, Kristu Jesus bele hatudu ninia pasiénsia boot nuʼudar ezemplu ba sira neʼebé sei tau fiar ba nia hodi hetan moris ba nafatin.

17 Fó hahiʼi no glória nafatin ba ita-nia Liurai neʼebé laiha rohan, neʼebé moris ba nafatin, neʼebé ema la bele haree, no neʼebé nuʼudar Maromak mesak deʼit. Amen.

18 Haʼu fó matadalan neʼe ba ó, haʼu-nia oan, Timóteo, atu nuneʼe ó bele kontinua halo funu neʼebé diʼak, hodi tuir profeta nia liafuan neʼebé fó sai ona kona-ba ó; 19 no kaer metin ba fiar no nafatin sai moos iha laran.* Ema balu husik ona ida-neʼe, no sira harahun sira-nia fiar hanesan ró neʼebé mout. 20 Himeneo no Alexandre mak parte ba ema sira-neʼe, no haʼu entrega ona sira ba Satanás atu nuneʼe, liuhusi dixiplina, sira bele aprende atu la koʼalia kontra Maromak.

2 Tan neʼe, ulukliu, haʼu husu ema hotu atu harohan, halo orasaun no fó-agradese kona-ba ema oioin, 2 kona-ba liurai sira no mós kona-ba sira hotu neʼebé iha pozisaun aas; atu nuneʼe ita bele moris ho dame no hakmatek hodi serbí Maromak ho laran-metin no halo buat hotu ho badinas.* 3 Maromak, ita-nia Salvadór, haree katak ida-neʼe diʼak no nia kontente ho neʼe. 4 Ninia hakarak mak atu ema hotu hetan salvasaun no hatene didiʼak kona-ba lia-loos. 5 Tanba iha Maromak ida deʼit no iha mane ida deʼit neʼebé halo dame entre Maromak no ema, neʼe mak Kristu Jesus, 6 neʼebé fó nia moris nuʼudar sakrifísiu hodi sosa fali ema hotu. No ema sei fó sasin kona-ba neʼe iha tempu neʼebé loos. 7 Kona-ba lia-sasin neʼe mak Maromak hili haʼu nuʼudar haklaken-naʼin no nuʼudar apóstolu ida. Haʼu koʼalia lia-loos, haʼu la bosok. Nia hili haʼu nuʼudar mestre ba nasaun sira kona-ba fiar no lia-loos.

8 Tan neʼe, haʼu hakarak katak iha fatin hotu mane sira neʼebé laran-metin ba Maromak tenke kontinua halo orasaun hodi hiʼit saʼe sira-nia liman ba Maromak, laʼós hodi laran-nakali no haksesuk malu. 9 Nuneʼe mós haʼu hakarak katak feto sira hatais ho loloos, ho respeitu no ho hanoin loos, laʼós hodi halo fuuk ho modelu oioin* ka tau osan-mean ka fatuk-murak ka roupa neʼebé karun loos. 10 Maibé sira tenke halo furak sira-nia an ho hahalok diʼak, katak hatais iha dalan neʼebé loos ba feto sira neʼebé dehan sira adora Maromak.

11 Feto sira tenke aprende ho nonook no haraik-an. 12 Haʼu la fó lisensa ba feto ida atu hanorin, ka sai nuʼudar ulun ba mane sira, maibé nia tenke kontinua nonook. 13 Tanba Maromak kria uluk Adão, no tuirmai mak Eva. 14 No mós, Diabu la lohi Adão, maibé feto neʼe monu duni ba Diabu nia lohi no kontra Maromak nia lei. 15 Entaun, hodi sai inan mak feto sira proteje sira-nia an, maibé sira mós tenke kontinua iha fiar no domin no sai santu iha Maromak nia oin ho hanoin neʼebé moos.

3 Liafuan sira-neʼe mak loos: Se mane ida hakarak atu sai nuʼudar katuas,* nia hakarak serbisu neʼebé diʼak. 2 Katuas ida tenke halaʼo nia moris ho didiʼak atu ema la hetan sala iha nia, tenke iha feen ida deʼit, kontrola ninia hahalok, iha hanoin neʼebé loos, moris iha dalan neʼebé loos,* laran-diʼak, iha matenek atu hanorin, 3 la lanu-teen, la halo violénsia, la ulun-toos, la istori malu, la hadomi osan. 4 Nia tenke tau matan ba ninia umakain iha dalan neʼebé diʼak, no iha oan sira neʼebé halo tuir no hatudu hahalok diʼak; 5 tuir loloos, se ema ida la hatene tau matan ba ninia umakain rasik, oinsá mak nia sei tau matan ba Maromak nia kongregasaun? 6 Nia laʼós ema neʼebé foin sai fiar-naʼin, atu nuneʼe nia la sai foti-an no simu tesi-lia neʼebé Diabu mós simu ona. 7 Liután neʼe, nia tenke iha naran diʼak ho ema iha liʼur, atu nuneʼe ema labele duun nia no nia monu ba Diabu nia lasu.

8 Atan ba kongregasaun tenke sériu, la laran-makerek, la hemu tua barak, la kaan-teen atu buka osan, 9 kaer metin ba segredu santu kona-ba fiar ho laran neʼebé moos.*

10 No mós, koko nia uluk atu haree se nia diʼak ba knaar neʼe ka lae, no tuirmai nia bele serbí nuʼudar atan tanba la iha ema neʼebé hetan sala iha nia.

11 Feto sira mós tenke sériu, la konta ema nia vida, kontrola ninia hahalok, no laran-metin iha buat hotu.

12 Atan ba kongregasaun tenke iha feen ida deʼit, tau matan ba ninia oan sira no ninia umakain iha dalan neʼebé diʼak. 13 Tanba mane sira neʼebé serbí iha dalan neʼebé diʼak, sira hetan naran diʼak ba sira-nia an no sente livre atu koʼalia kona-ba fiar iha Kristu Jesus.

14 Maski haʼu hein katak lakleur tan haʼu sei bá haree ó, maibé haʼu hakerek buat sira-neʼe ba ó, 15 atu nuneʼe, se karik haʼu demora, ó bele hatene oinsá mak ó tenke moris iha Maromak nia umakain, katak kongregasaun husi Maromak neʼebé moris, neʼebé nuʼudar ai-riin hodi tahan lia-loos. 16 Tuir loloos, segredu santu kona-ba laran-metin ba Maromak mak boot duni: ‘Nia hatudu sai nia an iha isin, Maromak fó sai katak nia ema loos kuandu nia sai espíritu ida, nia mosu ba anju sira, ema haklaken kona-ba nia iha nasaun sira, mundu tau fiar ba nia, no Maromak simu nia iha lalehan ho glória.’

4 Maibé, Maromak nia espíritu dehan ho momoos katak tempu sei mai kuandu ema balu sei husik hela fiar hodi rona fali ba liafuan la loos neʼebé haree hanesan mai husi Maromak, no mós rona ba anju aat sira-nia hanorin; 2 sira sei husik hela fiar tanba mane sira neʼebé laran-makerek no koʼalia bosok, no neʼebé laran* sai toos ona hanesan ho kulit neʼebé hanas ho besi. 3 Sira sei bandu ema atu la kaben no sei haruka ema atu hadook an husi ai-han neʼebé Maromak kria atu ema neʼebé iha fiar no hatene didiʼak lia-loos bele han ho agradese. 4 Basá Maromak nia kriasaun hotu mak diʼak, no la iha buat ida neʼebé ema la bele han se nia hatoʼo ona agradese, 5 tanba ida-neʼe sai santu ona liuhusi Maromak nia liafuan no liuhusi orasaun neʼebé hatoʼo ona kona-ba neʼe.

6 Hodi fó konsellu neʼe ba maun-alin sira, ó sei sai Kristu Jesus nia atan neʼebé diʼak, nuʼudar ema neʼebé hetan treinu ona kona-ba liafuan fiar nian no kona-ba hanorin diʼak neʼebé ó halo tuir ona ho loloos. 7 Maibé la simu istória falsu neʼebé la hatudu respeitu ba Maromak, hanesan istória sira neʼebé fó sai husi feto ferik sira. Iha parte seluk, treinu ó-nia an ho hakarak atu serbí Maromak ho laran-metin. 8 Basá maski treinu ita-nia isin lori buat diʼak uitoan, maibé serbí Maromak ho laran-metin lori diʼak iha buat hotu, tanba ida-neʼe iha promesa ba moris agora no ba moris neʼebé atu mai. 9 Liafuan sira-neʼe mak loos no ó tenke simu ho laran tomak. 10 Tan neʼe mak ita serbisu makaʼas no hakaʼas an, tanba ita tau ona ita-nia esperansa ba Maromak neʼebé moris, ida neʼebé sai nuʼudar Salvadór ba ema hotu, liuliu ba sira neʼebé laran-metin.

11 Kontinua hatoʼo no hanorin mandamentu sira-neʼe. 12 Keta husik ema ida la respeitu ó tanba ó joven. Maibé, sai nuʼudar ezemplu ba ema laran-metin sira liuhusi ó-nia koʼalia, no iha buat neʼebé ó halo, iha ó-nia domin, fiar, no hahalok moos. 13 Kontinua hakaʼas an iha ó-nia knaar atu lee iha ema nia oin, hodi fó laran-manas, no hodi hanorin toʼo tempu neʼebé haʼu toʼo ba ó. 14 Keta husik leet deʼit prezente neʼebé fó ona ba ó liuhusi profeta nia liafuan kuandu grupu katuas nian tau liman ba ó-nia leten. 15 Hanoin didiʼak kona-ba buat sira-neʼe; fó ó-nia an tomak ba buat sira-neʼe, atu nuneʼe ema hotu bele haree ho momoos oinsá ó laʼo ba oin. 16 Haree didiʼak ó-nia an no ó-nia hanorin. Kaer metin ba buat sira-neʼe, tanba hodi halo ida-neʼe mak ó sei salva ó-nia an rasik no mós sira neʼebé rona ba ó.

5 Keta koʼalia makaʼas ba katuas sira. Maibé, haree sira nuʼudar ó-nia aman, no haree mane joven sira nuʼudar ó-nia alin, 2 haree ferik sira nuʼudar ó-nia inan, no haree feto joven sira nuʼudar ó-nia feton ho laran-moos.

3 Respeitu no tau matan ba feto-faluk sira neʼebé loloos faluk duni. 4 Maibé se feto-faluk ida iha oan ka bei-oan, husik sira hatudu uluk sira-nia laran-metin ba Maromak hodi tau matan ba sira-nia umakain rasik. Sira tenke fó ba sira-nia inan-aman no avó sira buat neʼebé sira merese, tanba ida-neʼe diʼak iha Maromak nia oin. 5 No feto neʼebé loloos faluk duni no la iha ema atu tau matan, nia tau nia fiar tomak ba Maromak no kontinua harohan no halo orasaun loron no kalan. 6 Maibé, ida neʼebé halaʼo nia moris tuir hakarak isin nian mak mate ona maski nia sei moris. 7 Entaun, kontinua fó mandamentu sira-neʼe, atu nuneʼe ema ida la bele koʼalia aat kona-ba sira. 8 Tuir loloos, se ema ida la tau matan ba ninia família, no liuliu ba sira neʼebé iha ninia uma laran rasik, nia nega ona ninia fiar no aat liu fali ema neʼebé la iha fiar.

9 Ó bele hakerek feto-faluk nia naran iha lista se nia tinan neenulu ona ka liu no mós se uluk nia laran-metin ba nia laʼen.* 10 Nia mós tenke iha naran diʼak kona-ba ninia hahalok, treinu ona ninia oan sira ho didiʼak, hatudu laran-diʼak ba bainaka sira, nia fase santu sira-nia ain,* nia ajuda sira neʼebé iha susar laran, no nia badinas hodi halo serbisu diʼak hotu.

11 Iha parte seluk, keta hakerek feto-faluk neʼebé sei foin-saʼe nia naran, tanba sira-nia hakarak seksuál nian bele hanetik sira-nia relasaun ho Kristu, no sira sei hakarak atu kaben. 12 Sira sei hetan kastigu tanba sira husik ona sira-nia promesa uluk nian.* 13 Iha tempu neʼebé hanesan sira mós sai toman atu la halo buat ida, laʼo husi uma ida ba uma seluk; sin, laʼós deʼit la halo buat ida, maibé mós konta ema nia vida no mete iha ema seluk nia moris, no sira koʼalia kona-ba buat neʼebé sira la iha direitu atu koʼalia. 14 Tan neʼe, haʼu hakarak feto-faluk neʼebé foin-saʼe atu kaben, iha oan, tau matan ba ninia umakain, hodi la fó fatin ba kontra naʼin sira atu koʼalia aat kona-ba ita. 15 Tuir loloos, sira balu fila kotuk ona hodi halo tuir Satanás. 16 Se feto fiar-naʼin iha família ida neʼebé faluk, nia tenke ajuda feto-faluk neʼe atu la fó todan ba kongregasaun. Hodi nuneʼe kongregasaun bele ajuda feto-faluk sira neʼebé presiza duni ajuda.

17 Hatudu respeitu neʼebé kleʼan liu ba katuas sira neʼebé tau matan didiʼak ba kongregasaun, liuliu sira neʼebé serbisu makaʼas atu koʼalia no hanorin. 18 Tanba eskritura dehan: “Ó keta taka netik karau-aman nia ibun kuandu nia sama hela trigu fulin”, no eskritura mós dehan: “Serbisu-naʼin merese atu simu nia kolen.” 19 Se ema ida duun hasoru katuas ida, keta simu ida-neʼe, só deʼit kuandu ema naʼin-rua ka tolu mak fó sasin kona-ba neʼe. 20 Kona-ba ema neʼebé iha ona toman atu halo sala, fó dixiplina ba nia iha ema hotu nia oin, hodi sai nuʼudar avizu ba sira seluk. 21 Haʼu haruka ó iha Maromak no Kristu Jesus no anju* sira-nia oin atu halo tuir mandamentu sira-neʼe hodi la todan ba sorin ka fihir ema.

22 Keta lalais atu tau liman ba mane ruma; keta hola parte iha ema seluk nia sala; kontinua halo ó-nia an moos nafatin.

23 Keta hemu deʼit bee, maibé hemu mós tua-uvas uitoan tanba neʼe diʼak ba ó-nia kabun no tanba ó moras beibeik.

24 Ema balu nia sala hatudu sai kedas iha ema nia oin, tan neʼe bele tesi lia lalais ba sira; maibé ema seluk nia sala hatudu sai iha tempu tuirmai. 25 Nuneʼe mós ema bele haree kedas hahalok neʼebé diʼak, no hahalok diʼak neʼebé ema la haree kedas sei la subar ba nafatin.

6 No sira neʼebé sai nuʼudar atan ba ema tenke kontinua hanoin kona-ba sira-nia naʼi nuʼudar ida neʼebé merese simu respeitu tomak, atu nuneʼe ema labele koʼalia aat kona-ba Maromak nia naran no ninia hanorin. 2 Liután neʼe, se sira-nia naʼi mak fiar-naʼin ida, entaun sira keta haree nia la diʼak tan deʼit nia mak maluk fiar-naʼin. Maibé, sira tenke serbí ho badinas liután, tanba ema neʼebé simu buat diʼak husi sira-nia serbisu mak sira-nia maluk fiar-naʼin neʼebé sira hadomi.

Kontinua hanorin buat sira-neʼe no fó sai mandamentu sira-neʼe. 3 Ema neʼebé hanorin doutrina seluk neʼebé la hanesan ho hanorin loos husi ita Naʼi Jesus Kristu, ka la hanesan ho hanorin kona-ba oinsá atu serbí Maromak ho laran-metin, 4 ema neʼe mak foti-an no la komprende buat ida. Nia gosta deʼit atu haksesuk malu kona-ba liafuan sira. Buat sira-neʼe hamosu laran-moras, diskute-malu, koʼalia aat, la fiar malu; 5 buat sira-neʼe mós book ema neʼebé neon la loos ona no neʼebé la komprende tan lia-loos atu haksesuk malu makaʼas kona-ba buat kiʼik. Sira hanoin katak liuhusi adorasaun ba Maromak, sira bele manán buat ruma ba sira-nia an. 6 Loloos se ita kontente ho buat neʼebé ita iha ona, ita bele duni manán buat diʼak barak liuhusi ita-nia adorasaun ba Maromak. 7 Ita la lori buat ida mai mundu neʼe, no ita mós la bele lori sai buat ida husi mundu neʼe. 8 Entaun, se ita iha ai-han, hatais no hela-fatin, ita kontente ona ho buat sira-neʼe.

9 Maibé, sira neʼebé hakarak atu sai riku monu ba tentasaun no lasu no hakarak aat oioin neʼebé folin-laek no buat sira-neʼe lori ema atu lakon. 10 Basá domin ba osan mak hun ba buat aat oioin, no tanba hadomi osan ema balu hadook an ona husi fiar no fó kanek oioin ba sira-nia an.*

11 Kona-ba ó, Maromak nia atan, ó tenke halai-sees husi buat sira-neʼe. Maibé buka hahalok loos, laran-metin ba Maromak, fiar, domin, tahan, no laran-maus. 12 Ó tenke halo funu neʼebé loos atu defende fiar, no ó tenke kaer metin ba moris rohan-laek neʼebé Maromak hili ona ó atu simu no neʼebé ó fó sai ona ba ema barak.

13 Iha Maromak nia oin, ida neʼebé fó moris ba buat hotu, no iha Kristu Jesus nia oin, ida neʼebé fó sasin ho aten-brani ba Pónsio Pilatos, haʼu haruka ó 14 atu halo tuir mandamentu neʼe iha dalan neʼebé kompletu no laiha sala toʼo ita-nia Naʼi Jesus Kristu hatudu nia an. 15 No iha tempu neʼebé hili tiha ona, Naʼi neʼebé iha kbiit boot no neʼebé ksolok sei hatudu sai ninia an, nia mak Liurai ba sira neʼebé ukun nuʼudar liurai no Naʼi ba sira neʼebé ukun nuʼudar naʼi, 16 nia deʼit mak ida neʼebé iha moris neʼebé sei la lakon, nia hela iha fatin neʼebé naroman tebes toʼo ema ida mós la bele hakbesik, ema ida seidauk haree nia ka bele haree nia. Nia merese simu hahiʼi no kbiit ba nafatin. Amen.

17 Haruka sira neʼebé riku iha mundu neʼe atu labele foti-an, no mós haruka sira atu la tau fiar ba sira-nia riku, maibé tau fiar ba Maromak, ida neʼebé fó ho laran-luak buat hotu neʼebé halo ita kontente. 18 No dehan ba sira atu halo hahalok diʼak, sai riku ho hahalok loos, hatudu laran-luak, sai prontu atu fahe buat neʼebé sira iha, 19 hodi halo ida-neʼe sira halibur rikusoin husi Maromak. Neʼe katak sira sei harii fundasaun neʼebé diʼak ba futuru, hodi nuneʼe sira bele kaer metin ba moris neʼebé loloos.

20 Oh Timóteo, proteje buat neʼebé fó ona ba ó, keta rona liafuan sira neʼebé la iha folin neʼebé kontra Maromak, no mós keta rona ba ideia sira neʼebé mai husi ema neʼebé hanoin katak sira iha matenek, maibé sira-nia matenek kontra buat neʼebé loos. 21 Ema balu sai foti-an ho matenek hanesan neʼe no hasees an ona husi fiar.

Haʼu harohan katak Maromak nia laran-diʼak neʼebé boot hamutuk ho imi.

[Nota–rodapé]