1 Pedro

1 Husi Pedro, Jesus Kristu nia apóstolu ida, hakerek ba sira neʼebé nuʼudar sidadaun temporáriu nian neʼebé namkari iha Pontus, Galásia, Kapadósia, Ázia, no Bitínia, ba sira neʼebé Maromak hili tiha ona. 2 Maromak mak Aman lalehan nian no nia hili imi tuir ninia hakarak neʼebé nia deside nanis ona. Nia fó imi espíritu santu neʼebé halo imi santu. Nia halo nuneʼe atu imi bele halo tuir nia, no halo imi sai moos liuhusi Jesus Kristu nia raan:

Haʼu harohan katak Maromak sei hatudu ninia laran-diʼak boot ba imi no aumenta dame ba imi.

3 Hahiʼi bá Maromak no Aman husi ita Naʼi Jesus Kristu, tanba tuir ninia laran-sadiʼa neʼebé boot mak nia halo ita moris mai dala ida tan ho esperansa rohan-laek nian liuhusi Jesus Kristu nia moris-hiʼas husi mate. 4 Nia halo ita moris mai fali atu simu liman-rohan neʼebé la sai dodok, santu, no sei tahan ba nafatin. Maromak rai hela liman-rohan neʼe ba imi iha lalehan, 5 no Maromak proteje imi liuhusi ninia kbiit tanba imi-nia fiar, nia proteje imi atu hetan salvasaun. No salvasaun neʼe sei hatudu sai iha tempu ikus. 6 Tan neʼe mak imi haksolok boot, maski ba tempu uitoan karik imi sente laran-tun tanba hetan koko oioin. 7 Atu nuneʼe, imi-nia fiar neʼebé hetan ona koko bele halo imi hetan hahiʼi no glória no respeitu iha tempu neʼebé Jesus Kristu hatudu sai ninia an. Imi-nia fiar neʼe iha folin boot liu fali osan-mean neʼebé bele mohu maski hetan ona koko ho ahi. 8 Maski imi la haree Kristu, maibé imi hadomi nia. Maski imi la hateke ba nia agora daudaun, maibé imi hatudu fiar ba nia no sai kontente tebes ho ksolok boot, no liafuan la toʼo atu esplika kona-ba ksolok boot neʼe; 9 basá imi hatene katak rezultadu ikus husi imi-nia fiar mak salvasaun ba imi-nia moris.

10 Profeta sira neʼebé fó sai nanis kona-ba Maromak nia laran-diʼak boot neʼebé fó ona ba imi, sira ho badinas husu no buka didiʼak kona-ba salvasaun neʼe. 11 Sira kontinua buka kona-ba saida mak sei mosu no iha oras saida mak espíritu neʼebé iha sira-nia laran hatudu sai kona-ba Kristu. Tanba espíritu santu fó sasin nanis kona-ba Kristu nia terus no kona-ba glória neʼebé nia simu depois neʼe. 12 Maromak hatudu sai ba profeta sira katak sira serbí laʼós sira-nia an rasik, maibé serbí imi. Basá profeta sira hakerek kona-ba buat neʼebé agora fó sai ona ba imi, no imi rona ida-neʼe liuhusi sira neʼebé haklaken liafuan diʼak ba imi ho ajuda husi espíritu santu neʼebé haruka mai husi lalehan. Kona-ba buat sira-neʼe mak anju sira hakarak namanas atu buka-hatene.

13 Tan neʼe, prepara imi-nia hanoin atu halo serbisu boot, kontinua matan-moris bá; tau imi-nia esperansa ba Maromak nia laran-diʼak boot neʼebé sei fó ba imi iha tempu neʼebé Jesus Kristu hatudu sai ninia an. 14 Nuʼudar oan neʼebé halo tuir ho didiʼak, imi keta moris tuir imi-nia hakarak uluk nian neʼebé imi iha kuandu imi la hatene Maromak, 15 maibé sai santu bá iha imi-nia hahalok hotu hodi tuir Ida neʼebé Santu neʼebé bolu imi, 16 tanba hakerek nanis ona: “Imi tenke santu, tanba haʼu santu.”

17 Liután neʼe, se imi harohan ba Aman neʼebé tesi lia ho loloos tuir ema ida-idak nia hahalok, imi tenke hatudu katak imi hamtaʼuk Maromak durante tempu neʼebé imi hela nuʼudar ema estranjeiru iha mundu neʼe. 18 Tanba imi hatene katak laʼós ho buat neʼebé sei mohu hanesan osan-mutin ka osan-mean mak Maromak halo imi sai livre husi imi-nia dalan moris nian neʼebé la iha folin, neʼebé imi simu husi imi-nia beiʼala sira. 19 Maibé nia salva imi ho raan neʼebé folin-boot, neʼebé hanesan raan husi bibi-malae nia oan neʼebé la iha aat ida no la foʼer, katak Kristu nia raan. 20 Sin, Maromak hili ona Kristu antes mundu hahú,* maibé Maromak hatudu sai nia iha tempu neʼe nia rohan tanba imi-nia diʼak. 21 Liuhusi nia mak imi sai fiar-naʼin ba Maromak, ida neʼebé halo nia moris hiʼas husi mate no fó glória ba nia; atu nuneʼe imi bele tau fiar no esperansa iha Maromak.

22 No agora imi hamoos tiha ona imi-nia moris* hodi halo tuir lia-loos no imi iha domin neʼebé loos ba malu, entaun hadomi malu bá husi laran. 23 Tanba imi moris mai dala ida tan, laʼós ho fini neʼebé sei dodok, maibé ho fini neʼebé la bele dodok, liuhusi Maromak nia liafuan. Nia mak Maromak neʼebé moris no neʼebé la iha rohan. 24 Tanba “ema hotu* mak hanesan duʼut, no sira-nia glória hotu mak hanesan duʼut nia funan; duʼut sai namlaek, no ninia funan mós monu, 25 maibé Jeová nia liafuan tahan ba nafatin”. No “liafuan” neʼe mak liafuan diʼak neʼebé haklaken ona ba imi.

2 Hasai tiha husi imi-nia an buat aat hotu, lohi, laran-makerek, laran-moras, no liafuan aat hotu kona-ba ema seluk. 2 Nuʼudar bebé neʼebé foin moris, haburas hakarak ba susubeen moos neʼebé husi Maromak nia liafuan, atu nuneʼe, liuhusi nia mak imi bele sai boot hodi hetan salvasaun, 3 tanba imi koko ona katak Naʼi mak laran-diʼak.

4 Tanba imi hakbesik ba nia neʼebé nuʼudar fatuk moris nian, no maski ema la simu nia, maibé Maromak hili ona nia no nia folin-boot ba Maromak. 5 Imi mós sai nuʼudar fatuk moris nian neʼebé harii daudaun nuʼudar uma ida liuhusi Maromak nia espíritu atu sai grupu amlulik santu nian. Atu nuneʼe imi sei hasaʼe sakrifísiu neʼebé Maromak simu liuhusi Jesus Kristu hodi tuir matadalan husi espíritu santu. 6 Tanba Eskritura dehan: “Haree! Iha Siaun haʼu tau fatuk neʼebé haʼu hili, neʼebé folin-boot no nuʼudar fatuk importante ba uma nia hun; no ema hotu neʼebé hatudu fiar ba nia sei la sai moe.”

7 Tan neʼe, nia sai folin-boot ba imi, basá imi mak fiar-naʼin; maibé ba sira neʼebé la fiar, Eskritura dehan: “Fatuk neʼebé badain sira la simu, sai ona fatuk importante liu”, 8 no sai “fatuk sidi nian no fatuk-boot neʼebé taka dalan ba sira”. Sira sidi tanba sira la halo tuir Maromak nia liafuan. No ema hanesan neʼe sei sidi duni. 9 Maibé imi mak “suku neʼebé Maromak hili ona, no imi mak amlulik sira neʼebé serbí nuʼudar liurai, nasaun santu ida, no povu neʼebé nia hili ba nia an rasik, atu nuneʼe imi tenke fó sai kona-ba kmanek” husi ida neʼebé bolu imi atu sai husi nakukun hodi tama fali ba naroman neʼebé furak. 10 Basá uluk imi laʼós nuʼudar povu, maibé agora imi mak Maromak nia povu; uluk imi la simu Maromak nia laran-sadiʼa, maibé agora imi simu ona ninia laran-sadiʼa.

11 Maluk doben sira, imi mak hanesan ema husi rai seluk no hanesan sidadaun temporáriu, no haʼu husu namanas ba imi atu kontinua hasees an husi hakarak isin nian neʼebé halo funu hasoru imi-nia moris.* 12 Hatudu nafatin hahalok diʼak iha nasaun sira-nia leet, atu nuneʼe maski sira duun imi nuʼudar ema aat, sira bele sai sasin ba imi-nia hahalok diʼak, no rezultadu mak, sira sei hahiʼi Maromak iha tempu neʼebé nia mai atu haree didiʼak ema.

13 Tanba Naʼi, imi hakruʼuk an ba ema nia ukun hotu: ba liurai nuʼudar ida neʼebé aas, 14 no ba ukun-naʼin sira nuʼudar sira neʼebé nia haruka atu fó kastigu ba ema sira neʼebé halo sala no fó hahiʼi ba sira neʼebé halo diʼak. 15 Tanba Maromak nia hakarak mak atu imi halo buat neʼebé diʼak, hodi nuneʼe imi bele halo lakon liafuan folin-laek husi sira neʼebé beik. 16 Moris bá hanesan ema livre, no keta uza liberdade neʼe nuʼudar razaun atu halo hahalok aat, maibé uza ida-neʼe nuʼudar Maromak nia atan. 17 Hatudu respeitu ba ema oioin, hadomi maluk fiar-naʼin hotu, hamtaʼuk Maromak, no hatudu respeitu ba liurai.

18 Atan sira tenke hakruʼuk an ba sira-nia naʼi ho taʼuk, laʼós deʼit ba sira neʼebé halo diʼak no la ulun-toos, maibé hakruʼuk an mós ba sira neʼebé susar atu halo kontente. 19 Kuandu ema ida tahan hasoru susar no hetan terus tanba nia hakarak atu iha laran* neʼebé moos iha Maromak nia oin, Maromak kontente ho ida-neʼe. 20 Imi manán saida se imi tahan terus tanba hahalok aat? Maibé se imi tahan terus tanba halo diʼak, Maromak kontente ho ida-neʼe.

21 Tuir loloos, ba ida-neʼe mak Maromak bolu imi, basá Kristu rasik terus ba imi, no nia husik hela ezemplu atu imi laʼo tuir ninia ain-fatin ho didiʼak. 22 Nia la halo sala ida, no lia-bosok ida la sai husi ninia ibun. 23 Kuandu ema koʼalia aat hasoru nia, nia la koʼalia aat fali ba sira. Kuandu nia hetan terus, nia la ameasa sira neʼebé fó-terus ba nia, maibé nia entrega nia an ba ida neʼebé tesi lia ho loloos. 24 Nia rasik mak lori ita-nia sala sira iha nia isin iha ai-riin leten, atu nuneʼe ita bele sai livre husi sala no moris atu halo buat neʼebé loos. No “liuhusi ninia kanek sira mak imi hetan kura”. 25 Tanba uluk imi mak hanesan bibi-malae neʼebé laʼo-lakon ona; maibé agora imi fila fali ona ba bibi-atan neʼebé tau matan ba imi-nia moris.*

3 Nuneʼe mós, imi feen sira, hakruʼuk an ba imi-nia laʼen, atu nuneʼe, se sira la halo tuir Maromak nia liafuan, imi bele lori sira ba fiar laʼós liuhusi imi-nia liafuan maibé liuhusi imi-nia hahalok, 2 tanba sira haree ho matan rasik imi-nia hahalok neʼebé moos hamutuk ho respeitu neʼebé kleʼan. 3 Keta hafurak imi-nia an tuir deʼit buat neʼebé ema haree, katak fuuk ho modelu oioin ka tau osan-mean ka roupa furak, 4 maibé buat neʼebé imi tenke hafurak mak imi-nia laran, hodi tau hatais neʼebé la bele mohu, katak hahalok laran-maus no laran-diʼak neʼebé iha folin boot iha Maromak nia oin. 5 Basá feto santu sira iha tempu uluk neʼebé tau ona esperansa ba Maromak, sira hafurak sira-nia an iha dalan neʼe hodi hakruʼuk an ba sira-nia laʼen, 6 nuʼudar Sara halo tuir Abraão hodi bolu nia “naʼi”. No imi sai ona nuʼudar ninia oan sira se imi kontinua halo hahalok diʼak no la husik buat ida halo imi taʼuk.*

7 Nuneʼe mós, imi laʼen sira, kontinua moris ho imi-nia feen hodi komprende sira ho didiʼak. Hatudu respeitu ba feto sira nuʼudar sanan-rai neʼebé fraku liu, basá imi mós sei simu prezente moris nian nuʼudar liman-rohan hamutuk ho sira; hodi halo nuneʼe imi-nia orasaun sira bele laʼo ho loloos.

8 Ikusliu, imi hotu tenke iha neon ida deʼit, hanoin malu, hadomi malu nuʼudar maun-alin, hatudu laran-sadiʼa no haraik-an. 9 Keta selu aat ho aat ka hirus-malu ho hirus-malu. Maibé, koʼalia ho laran-diʼak, tanba Maromak bolu imi ba dalan neʼe, atu nuneʼe imi bele simu bensaun nuʼudar liman-rohan.

10 Basá “ema neʼebé hadomi moris no hakarak haree loron diʼak sira, nia tenke kontrola ninia nanál husi buat aat no ninia ibun husi koʼalia bosok. 11 Nia tenke hasees an husi buat neʼebé aat no halo buat neʼebé diʼak; nia tenke buka dame no halo dame. 12 Tanba Jeová nia matan hateke ba ema loos sira, no nia see tilun ba sira-nia harohan; maibé Jeová fila kotuk* ba sira neʼebé halo aat.”

13 Tuir loloos, sé mak sei halo aat ba imi se imi sai laran-manas atu halo buat diʼak? 14 Maski nuneʼe, se imi hetan duni terus tanba buat neʼebé loos, imi sei haksolok. Maibé, keta taʼuk kona-ba buat neʼebé ema seluk taʼuk, no keta sai laran-susar. 15 Iha imi-nia laran, kontinua simu Kristu nuʼudar Naʼi no nuʼudar ida neʼebé santu. Sai prontu nafatin atu defende imi-nia fiar iha ema hotu nia oin hodi esplika ba sira neʼebé husu kona-ba imi-nia esperansa, maibé halo ida-neʼe ho laran-maus no respeitu.

16 Kontinua iha laran* neʼebé moos, atu nuneʼe, maski ema koʼalia kontra imi, maibé ema sira-neʼe bele sai moe tanba imi-nia hahalok diʼak nuʼudar Kristu nia dixípulu. 17 Basá diʼak liu atu imi hetan terus tanba halo buat diʼak, se neʼe Maromak nia hakarak, duké hetan terus tanba halo buat aat. 18 Tanba Kristu mós mate dala ida deʼit ba nafatin ba ema nia sala, katak ema loos ida mate ba ema aat sira, atu nuneʼe nia lori imi ba Maromak. Ema oho nia iha isin, maibé nia moris fali ho isin espíritu* nian. 19 Iha dalan neʼe mak nia bá no haklaken ba anju aat sira neʼebé iha dadur laran, 20 neʼebé uluk kontra Maromak kuandu Maromak hein ho pasiénsia iha Noé nia loron sira. Iha tempu neʼebá Noé harii daudaun ró* boot, no ho ró neʼe mak ema uitoan deʼit, katak, ema* naʼin-ualu, hetan salvasaun liuhusi bee.

21 Batizmu mós hanesan ho situasaun neʼe, no agora batizmu salva imi liuhusi imi-nia fiar ba Jesus Kristu nia moris-hiʼas. Batizmu laʼós atu hasai tiha foʼer husi isin, maibé atu husu ba Maromak hodi ita bele iha laran neʼebé moos. 22 Nia saʼe ona ba lalehan, iha Maromak nia liman sorin loos; no anju sira, ukun-naʼin sira, no kbiit-naʼin sira tau ona iha ninia ain okos.

4 Neʼe duni, tanba imi hatene katak Kristu hetan terus iha isin, imi mós hametin imi-nia an bá ho hanoin neʼebé hanesan Kristu nian; basá ema neʼebé hetan terus iha isin, nia la halo tan sala, 2 atu nuneʼe nia bele moris hodi halo Maromak nia hakarak durante ninia moris iha isin, no la moris tan ba hakarak isin nian. 3 Uluk imi uza ona tempu barak atu halo tuir hakarak husi nasaun sira-nian hodi halo hahalok neʼebé la iha moe, hakarak aat, hemu tua barak liu, festa arbiru, halibur malu hodi hemu tua deʼit, no adora estátua. 4 Sira sai bilán tanba imi la laʼo tan hamutuk sira tuir dalan moris nian neʼebé aat, tan neʼe sira koʼalia aat kona-ba imi. 5 Maibé ema sira-neʼe sei hatán ba ida neʼebé prontu ona atu tesi lia ba ema moris no ema mate. 6 Tuir loloos, tan razaun neʼe mak Maromak mós fó sai liafuan diʼak ba ema mate sira atu nuneʼe, maski sira hetan tesi-lia iha isin tuir ema nia haree, maibé sira bele moris tuir espíritu iha Maromak nia haree.

7 Maibé buat hotu nia rohan besik daudaun ona. Tan neʼe, iha hanoin neʼebé loos bá, no matan-moris bá atu harohan. 8 Buat neʼebé importante liu mak imi tenke hadomi malu tebetebes, tanba domin taka sala barak. 9 Hatudu laran-diʼak ba malu hodi la muramura. 10 No hodi tuir prezente neʼebé ema ida-idak simu, uza ida-neʼe atu serbí malu nuʼudar atan diʼak neʼebé simu ona Maromak nia laran-diʼak neʼebé boot, neʼebé nia hatudu ona iha dalan oioin. 11 Se ema ruma koʼalia, nia tenke halo ida-neʼe nuʼudar ema neʼebé koʼalia lia-menon husi Maromak; se ema ruma serbí, nia tenke halo ida-neʼe tuir kbiit neʼebé Maromak fó; atu nuneʼe iha buat hotu Maromak bele hetan glória liuhusi Jesus Kristu. Nia mak iha glória no kbiit ba nafatin. Amen.

12 Maluk doben sira, keta hakfodak ho terus* neʼebé koko imi, basá ida-neʼe laʼós katak buat oin-seluk ida mak mosu ba imi. 13 Maibé, haksolok bá tanba imi hola parte iha Kristu nia terus, atu nuneʼe imi mós bele sai nakonu ho ksolok durante tempu neʼebé nia hatudu sai ninia glória. 14 Se ema koʼalia aat imi tanba Kristu nia naran, imi haksolok bá, basá espíritu glória nian, katak Maromak nia espíritu, hela iha imi.

15 Maibé, haʼu lakohi atu imi ida hetan terus tanba sai nuʼudar ohodór ka naʼok-teen ka ema aat ka gosta atu mete iha ema seluk nia moris. 16 Se ema ida hetan terus nuʼudar ema kristaun, nia labele sente moe, maibé nia tenke kontinua fó glória ba Maromak hodi lori naran neʼe. 17 Basá ida-neʼe mak tempu neʼebé hili tiha ona atu tesi lia, no tesi-lia neʼe hahú ho Maromak nia umakain. No se ida-neʼe hahú husi ita, entaun saida mak sei mosu ba sira neʼebé la halo tuir liafuan diʼak husi Maromak? 18 “No se ema loos tenke hakaʼas an atu hetan salvasaun, entaun saida mak sei mosu ba ema aat no sala-naʼin sira?” 19 Neʼe duni, sira neʼebé hetan terus tanba halo Maromak nia hakarak tenke kontinua entrega sira-nia moris ba Kriadór neʼebé laran-metin nuʼudar sira halo buat neʼebé diʼak.

5 Neʼe duni, nuʼudar maluk katuas ida, no sasin-naʼin ba Kristu nia terus no nuʼudar ida neʼebé hola parte iha glória neʼebé sei hatudu sai, haʼu husu makaʼas ba katuas sira iha imi-nia leet kona-ba ida-neʼe: 2 Tau matan ba Maromak nia bibi sira neʼebé iha imi-nia liman, laʼós hodi obriga an, maibé ho hakarak rasik; laʼós hodi manán buat ruma ho kaan-teen, maibé ho laran tomak; 3 laʼós hodi domina sira neʼebé Maromak nian, maibé sai nuʼudar ezemplu ba bibi-lubun. 4 No kuandu bibi-atan boot hatudu sai nia an, imi sei simu koroa glória nian neʼebé sei la mohu.

5 Nuneʼe mós mane joven sira, hakruʼuk an ba katuas sira. No imi hotu tenke hatudu haraik-an ba malu, tanba Maromak la simu ema neʼebé foti-an, maibé nia hatudu ninia laran-diʼak neʼebé boot ba ema neʼebé haraik-an.

6 Neʼe duni, haraik imi-nia an ba Maromak kbiit-naʼin,* atu nuneʼe nia bele foti saʼe imi iha tempu loloos; 7 no entrega imi-nia laran-susar hotu ba nia, tanba nia hanoin imi. 8 Sai matenek bá, no matan-moris bá. Imi-nia inimigu, katak Diabu, laʼo bá-mai hanesan leaun ida neʼebé hasai lian makaʼas no buka atu han ema ruma. 9 Maibé hamriik metin hodi kontra nia no sai metin iha fiar, hodi hatene katak imi-nia maluk fiar-naʼin iha mundu tomak mós tahan terus neʼebé hanesan imi-nian. 10 No kuandu imi hetan tiha terus ba tempu uitoan, Maromak neʼebé nakonu ho laran-diʼak hotu, ida neʼebé bolu imi atu hetan glória ba nafatin hamutuk ho Kristu, nia rasik sei halo kompletu imi-nia treinu, nia sei halo imi hamriik metin, nia sei halo imi iha kbiit. 11 Nia mak iha kbiit ba nafatin. Amen.

12 Liuhusi Silvano, ida neʼebé haʼu hafolin nuʼudar maluk fiar-naʼin neʼebé laran-metin, haʼu hakerek ba imi ho liafuan balu, atu fó laran-manas ba imi no atu fó sasin ho loloos katak Maromak hatudu duni ba imi ninia laran-diʼak neʼebé boot. Kaer metin ba laran-diʼak neʼe. 13 Feto neʼebé iha Babilónia, ida neʼebé Maromak hili ona hanesan imi, haruka ninia kumprimentus ba imi, nuneʼe mós ho Marcos, haʼu-nia oan. 14 Kumprimenta malu ho reʼi domin nian.

Haʼu harohan katak Maromak haraik dame ba imi hotu neʼebé ida deʼit ho Kristu.

[Nota–rodapé]