Setembru

Maromak fó kbiit ba Jesus atu hadiʼa ema nia problema. Bainhira Jesus halo milagre, nia hatudu katak nia bele hadiʼa problema hotu neʼebé ema labele rezolve. Porezemplu, nia iha kbiit atu halo ita livre husi sala neʼebé ita hetan husi Adão no rezultadu oioin husi sala neʼe, inklui moras no mate. (Mt 9:​1-6; Rom 5:​12, 18, 19) Jesus nia milagre hatudu katak nia bele kura “moras hotu” no mós fó moris-hiʼas ba ema mate. (Mt 4:23; João 11:​43, 44) Jesus mós iha kbiit atu kontrola anin-fuik no halo ema livre husi anju aat. (Mc 4:​37-39; Lc 8:2) Ita sente kmaan tanba Jeová fó kbiit hanesan neʼe ba ninia Oan-Mane. Ita bele fiar metin katak Maromak sei kumpre buat hotu neʼebé nia promete ona liuhusi ninia Ukun. Milagre sira neʼebé Jesus halo iha rai, hanorin ita katak nia sei halo ida-neʼe iha mundu tomak tanba nia mak Liurai ba Maromak nia Ukun. w23.04 p. 3 par. 5-7

Se Ita-nia kongregasaun mak boot no irmaun neʼebé dirije ladún hili Ita, karik Ita hanoin atu rende an. Maibé keta rende an atu fó komentáriu. Prepara komentáriu balu ba reuniaun ida-idak atu nuneʼe se irmaun neʼebé dirije la hili kedas Ita, Ita sei iha oportunidade seluk atu fó komentáriu. Bainhira Ita prepara Livru Haklaken, hanoin kona-ba oinsá parágrafu ida-idak liga ho lisaun nia tema. Se Ita halo nuneʼe, Ita sei iha komentáriu diʼak neʼebé Ita bele hatoʼo durante lisaun ida. Liután neʼe, Ita mós bele prepara atu fó komentáriu iha parágrafu neʼebé koʼalia kona-ba lia-loos neʼebé kleʼan neʼebé susar atu esplika. Tanbasá? Tanba baibain ema uitoan deʼit mak hiʼit liman durante parágrafu sira-neʼe. Oinsá se Ita seidauk hetan oportunidade atu fó komentáriu ba semana balu? Antes reuniaun Ita bele fó-hatene irmaun neʼebé dirije estudu kona-ba parágrafu neʼebé ita hakarak hatán. w23.04 p. 21-22 par. 9-10

José prontu atu aplika Jeová nia matadalan, no neʼe ajuda nia atu sai laʼen neʼebé diʼak liu. Iha situasaun tolu, Maromak fó matadalan ba nia kona-ba ninia família. Nia halo tuir kedas matadalan ida-idak, maski neʼe katak nia tenke halo mudansa boot. (Mt 1:20; 2:​13-15, 19-21) Hodi halo tuir Jeová nia matadalan, José proteje, apoia no tau matan ba Maria. Klaru katak José nia hahalok ajuda Maria hadomi no respeitu liután nia. Laʼen sira, Ita bele banati-tuir José nia hahalok hodi buka Bíblia nia matadalan kona-ba tau matan ba família. Bainhira Ita aplika matadalan sira-neʼe, Ita hatudu domin ba Ita-nia feen no hametin Ita-nia moris kaben nian, maski neʼe katak Ita presiza halo mudansa ruma. Irmán ida iha rai-Vanuatu neʼebé kaben ona ba tinan 20 liu hatete: “Bainhira haʼu-nia laʼen buka no aplika Jeová nia matadalan, haʼu respeitu nia liután, sente seguru, no haʼu tau fiar tomak ba ninia desizaun sira.” w23.05 p. 21 par. 5

Ema Judeu neʼebé fila fali husi Babilónia tenke sai “povu neʼebé santu” ba sira-nia Maromak. (Deut 7:6) Maski nuneʼe, sira nafatin presiza halo mudansa atu halo Jeová kontente. Ema Judeu barak moris iha Babilónia no sai toman ho buat neʼebé ema Babilónia halo no hanoin. Tinan barak depois ema Judeu grupu primeiru fila fali ba Izraél, Governadór Neemias mós hakfodak bainhira hatene katak labarik sira neʼebé moris iha Izraél la aprende ema Judeu nia língua. (Deut 6:​6, 7; Neem 13:​23, 24) Klaru katak sira labele hadomi no adora Jeová se sira la komprende língua Ebraiku, língua neʼebé ema uza atu hakerek Maromak nia Liafuan. (Ezras 10:​3, 44) Ema Judeu sira-neʼe presiza duni halo mudansa boot, no fasil liu ba sira atu halo nuneʼe iha Izraél, fatin neʼebé sira komesa harii fali adorasaun loos.—Neem 8:​8, 9. w23.05 p. 15 par. 6-7

Maski karik ita iha motivasaun no dixiplina an, maibé karik buat ruma mosu no halo susar ba ita atu kumpre ita-nia planu. Porezemplu, “situasaun neʼebé mosu derrepente” bele hadau ita-nia tempu. (Ecle 9:11) Karik ita hasoru susar neʼebé halo ita sente laran-kraik no lakon forsa. (Prov 24:10) Tanba la perfeitu, karik ita halo sala no neʼe halo susar ba ita atu kumpre ita-nia planu. (Rom 7:23) Ka karik ita sente kole ona. (Mt 26:43) Saida mak bele ajuda ita atu manán buat neʼebé hanetik ita? Hanoin-hetan se buat ruma hanetik Ita, neʼe la dehan katak Ita falla. Bíblia hatete katak karik ita sei hasoru problema beibeik. Maibé Bíblia mós fó sai ho klaru katak ita bele hamriik fali. Sin, hodi kontinua hakaʼas an maski susar, Ita hatudu ba Jeová katak Ita hakarak halo nia kontente. Jeová sei kontente tebes bainhira haree Ita kontinua hakaʼas an atu kumpre Ita-nia planu! w23.05 p. 30 par. 14-15

Bainhira irmaun joven ida serbí nuʼudar pioneiru, neʼe ajuda nia aprende atu serbisu ho ema oioin. Neʼe mós ajuda nia atu aprende oinsá atu uza osan ho didiʼak no la gasta osan demais. (Flp 4:​11-13) Hakat ida atu hahú serbí Jeová tempu-tomak mak hodi foti pioneiru estra, no neʼe ajuda ita sai prontu atu serbí nuʼudar pioneiru regulár. Serbí nuʼudar pioneiru mós loke dalan seluk tan atu serbí tempu-tomak, inklui serbí nuʼudar serbisu-naʼin ba konstrusaun ka Betel. Irmaun sira presiza iha planu atu kumpre kritéria hodi serbí irmaun-irmán sira nuʼudar katuas kongregasaun. Bíblia hatete katak mane neʼebé hakaʼas an atu simu knaar neʼe, “nia hakarak halo serbisu neʼebé diʼak”. (1 Tim 3:1) Maibé antes neʼe, irmaun ida presiza kumpre kritéria atu serbí nuʼudar atan ba kongregasaun. Atan sira ajuda katuas sira atu tau matan ba irmaun-irmán sira. Katuas no atan ba kongregasaun presiza serbí irmaun-irmán sira ho haraik an no halaʼo serbisu haklaken ho laran-manas. w23.12 p. 28 par. 14-16

Liurai Josias tinan 16 bainhira nia hahú buka Jeová. Nia hakarak aprende kona-ba Jeová no halo tuir Jeová nia hakarak. Maibé neʼe la fasil ba nia. Iha tempu neʼebá, ema barak halaʼo adorasaun falsu, tan neʼe nia presiza hatudu aten-brani hodi halaʼo fali adorasaun loos. No nia halo nuneʼe! Antes Josias tinan 20, nia komesa halakon tiha adorasaun falsu iha nasaun Judá. (2 Krón 34:​1, 2) Maski Ita mak labarik, maibé Ita bele deside atu banati-tuir Josias hodi buka Jeová no aprende atu hafolin ninia hahalok sira. Bainhira Ita halo nuneʼe, neʼe sei book Ita atu dedika an ba Jeová. Ita-nia dedikasaun ba Jeová sei book Ita atu halo saida? Luke neʼebé hetan batizmu bainhira tinan 14 hatete: “Komesa agora ba oin, haʼu sei tau uluk Jeová iha haʼu-nia moris no sei hakaʼas an atu halo Jeová kontente.” (Mc 12:30) Ita sei hetan bensaun se Ita mós hakaʼas an atu halo nuneʼe! w23.09 p. 11 par. 12-13

Bainhira apóstolu Paulo hakerek ninia karta, kongregasaun iha Tesalónika foin harii la toʼo tinan ida. Mane sira neʼebé tau matan kongregasaun karik ladún iha esperiénsia no halo sala oioin. Maski nuneʼe, sira merese atu hetan respeitu. Nuʼudar terus boot besik daudaun, karik ita sei hetan matadalan barak liután husi katuas sira. Karik ita sei lakon kontaktu ho sede-jerál no sukursál. Tan neʼe importante atu aprende hatudu domin no respeitu ba katuas sira ohin loron. Mai ita kontinua matan-moris no la tau fokus ba sira-nia fraku, maibé tau fokus ba oinsá Jeová dirije sira liuhusi Kristu. Hanesan kapasete proteje soldadu nia ulun, ita-nia esperansa proteje ita-nia hanoin. Ita rekoñese katak buat neʼebé mundu oferese mak la iha folin. (Flp 3:8) Ita-nia esperansa ajuda ita atu kalma nafatin no la pániku. w23.06 p. 11-12 par. 11-12

Sira neʼebé rona ba “feto neʼebé beik” tenke deside atu simu ninia konvite ka lae. Iha razaun neʼebé diʼak atu hasees an husi sala seksuál. “Feto neʼebé beik” dehan: “Bee naʼok nian mak midar.” (Prov 9:17) Saida mak “bee naʼok nian”? Bíblia kompara relasaun seksuál entre feen-laʼen ho bee neʼebé fresku. (Prov 5:​15-18) Feto no mane neʼebé kaben ona tuir lei mak bele haksolok hodi halo relasaun seksuál. “Bee naʼok nian” bele refere ba sala seksuál no neʼe la lori ksolok. Dala barak ema halo sala seksuál subasubar hanesan naʼok-teen. “Bee naʼok nian” sente midar tebes bainhira sira hanoin katak la iha ema ida mak hatene buat neʼebé sira halo. Sira lohi sira-nia an tanba Jeová haree buat hotu. Bainhira Jeová la simu ita, neʼe mak buat neʼebé moruk ka aat tebes, no la halo ita kontente.—1 Kor 6:​9, 10. w23.06 p. 22 par. 7-9

Oinsá se Ita sente katak Ita-nia orasaun la ho laran, ka Ita la sente kontente iha serbisu haklaken hanesan uluk? Keta hanoin katak Ita lakon Jeová nia espíritu. Ita la perfeitu no Ita-nia sentimentu bele tun-saʼe. Se Ita-nia laran-manas komesa sai menus, hanoin kona-ba apóstolu Paulo nia ezemplu. Maski nia koko atu banati-tuir Jesus, nia hatene katak dala ruma nia sente la iha motivasaun atu halo buat neʼebé nia presiza halo. Paulo deside ona atu kumpre ninia serbisu ba Maromak maski ninia laran-manas sai menus ba tempu balu. Nuneʼe mós ho Ita, keta husik Ita-nia sentimentu neʼebé la perfeitu kona Ita-nia desizaun. Deside metin atu halo buat neʼebé loos maski Ita lakohi atu halo ida-neʼe. Se Ita kontinua halo buat neʼebé loos, ikusmai Ita-nia sentimentu mós sei sai diʼak.—1 Kor 9:16. w24.03 p. 11-12 par. 12-13

Ita bele hatudu domin ba irmaun-irmán sira liuhusi simu sira hodi sai ita-nia belun. (2 Kor 6:​11-13) Klaru katak irmaun-irmán sira iha ita-nia kongregasaun iha hahalok no situasaun moris neʼebé la hanesan. Ita bele hametin ita-nia domin ba sira liuhusi tau fokus ba sira-nia hahalok diʼak. Bainhira ita aprende atu haree ema seluk tuir Jeová nia haree, ita hatudu katak ita hadomi sira. Importante atu hatudu domin durante terus boot. Bainhira terus boot hahú, oinsá mak Jeová sei proteje ita? Hanoin toʼok matadalan neʼebé Jeová fó ba ninia povu bainhira ema ataka Babilónia iha tempu uluk. Jeová hatete: “Oh haʼu-nia povu, bá, tama ba imi-nia kuartu laran, no taka odamatan sira. Subar imi-nia an ba tempu uitoan toʼo Maromak nia hirus liu tiha ona.” (Isa 26:20) Durante terus boot, karik ita mós presiza halo tuir ida-neʼe. w23.07 p. 6-7 par. 14-16

Iha reputasaun diʼak kona-ba la ulun-toos. Husu ba Ita-nia an: ‘Ema haree haʼu nuʼudar ema neʼebé la ulun-toos no simu ema seluk nia ideia ka lae? Ka ema haree haʼu nuʼudar ema neʼebé la laran-maus no ulun-toos? Haʼu prontu atu rona no simu ema seluk nia ideia ka lae?’ Bainhira ita la ulun-toos, neʼe hatudu katak ita banati-tuir Jeová no Jesus. Ita labele ulun-toos bainhira ita-nia situasaun troka. Mudansa sira bele hamosu problema neʼebé ita nunka espera. Karik ita hasoru situasaun kona-ba emerjénsia médiku. Ka karik situasaun polítiku ka ekonómiku troka derrepente no afeta ita-nia moris. (Ecle 9:11) Bainhira ita-nia knaar iha organizasaun troka, dala ruma neʼe mós bele halo susar. Maibé ita bele hetan susesu atu sai toman ho ita-nia situasaun foun hodi halo tuir hakat haat tuirmai: (1) simu realidade, (2) hanoin kona-ba futuru, (3) iha hanoin pozitivu, no (4) ajuda ema seluk. w23.07 p. 21-22 par. 7-8

Profeta Daniel sei joven hela kuandu tropa Babilónia lori nia nuʼudar dadur no dook husi Jeruzalein. Maibé, ema neʼebé serbisu ba liurai nota kona-ba Daniel. Sira “haree deʼit buat neʼebé iha liʼur”, katak Daniel iha “isin-diʼak, bonitu”, no nia mai husi família importante. (1 Sam 16:7) Tanba razaun sira-neʼe, ema Babilónia treinu nia atu sai ema importante iha sira-nia ukun. (Dan 1:​3, 4, 6) Jeová hadomi Daniel tanba dalan neʼebé nia halaʼo ninia moris nuʼudar joven. Daniel maizumenus tinan 20 deʼit kuandu Jeová temi ninia naran hamutuk ho Noé no Job. Entaun Jeová haree Daniel nuʼudar ema laran-loos hanesan ho Noé no Job neʼebé laran-metin ba Maromak durante tinan barak. (Gén 5:32; 6:​9, 10; Job 42:​16, 17; Eze 14:14) No Jeová kontinua hadomi Daniel durante Daniel nia moris tomak.—Dan 10:​11, 19. w23.08 p. 2 par. 1-2

Bainhira Ita planu atu sosa uma ida, klaru katak Ita hakarak haree didiʼak ho Ita-nia matan rasik buat hotu kona-ba uma neʼe. Ita mós bele halo buat neʼebé hanesan kuandu lee no estuda Bíblia. Se Ita lee liu deʼit, karik Ita sei aprende deʼit “buat báziku husi Maromak nia liafuan sagradu”. (Ebr 5:12) Hanesan ita presiza tama ba uma laran atu bele hatene liután kona-ba uma neʼe, ita mós presiza estuda didiʼak Bíblia hodi bele komprende liután. Dalan diʼak liu atu estuda Bíblia mak hodi haree oinsá eskritura sira iha Bíblia liga malu. Hakaʼas an atu komprende kona-ba saida mak Ita fiar, no tanbasá Ita fiar ida-neʼe. Atu komprende didiʼak Bíblia, ita tenke estuda kona-ba hanorin kleʼan husi Bíblia. Apóstolu Paulo anima irmaun-irmán sira atu estuda Maromak nia Liafuan ho badinas, hodi nuneʼe sira bele “komprende didiʼak kona-ba luan, naruk, aas no kleʼan” husi lia-loos. Neʼe sei ajuda sira atu “iha abut metin no sai metin iha fundasaun fiar nian”. (Éf 3:​14-19) Ita mós presiza halo nuneʼe. w23.10 p. 18 par. 1-3

Iha ezemplu barak husi Bíblia kona-ba ema neʼebé hatudu pasiénsia. Diʼak atu estuda liután kona-ba sira. Porezemplu, David mak joven deʼit bainhira Jeová deside katak nia sei sai liurai ba nasaun Izraél iha futuru, no David presiza hein ba tinan barak atu sai liurai. Simeão no Ana serbí Jeová ho laran-metin nuʼudar sira hein ba Mesias neʼebé Bíblia promete nanis. (Lc 2:​25, 36-38) Nuʼudar Ita estuda, koko buka resposta ba pergunta sira-neʼe: Saida mak ajuda ema neʼe atu hatudu pasiénsia? Nia hetan benefísiu saida hodi hatudu pasiénsia? Oinsá haʼu bele banati-tuir nia? Ita mós bele hetan benefísiu hodi aprende kona-ba sira neʼebé la hatudu pasiénsia. (1 Sam 13:​8-14) Karik Ita bele husu: ‘Saida mak book sira atu la hatudu pasiénsia? Sira hetan konsekuénsia saida deʼit?’ w23.08 p. 25 par. 15

Apóstolu Pedro nafatin laran-metin, nia la husik buat naran deʼit atu hapara nia hodi laʼo tuir Jesus. Nia hatudu laran-metin bainhira Jesus koʼalia buat ruma neʼebé dixípulu sira la komprende. (João 6:68) Dixípulu barak lakohi husu ba Jesus nia esplikasaun, no sira para atu laʼo tuir Jesus. Maibé Pedro la halo nuneʼe. Nia rekoñese katak só Jesus deʼit mak “iha liafuan moris rohan-laek nian”. Jesus hatene katak Pedro no apóstolu sira seluk sei husik hela nia. Maski nuneʼe, Jesus fó-hatene Pedro katak nia fiar duni Pedro sei fila fali no hatudu laran-metin. (Lc 22:​31, 32) Jesus komprende katak “laran hakarak maibé isin fraku”. (Mc 14:38) Maski Pedro nega Jesus, maibé Jesus la rende an atu ajuda nia. Bainhira Jesus moris hiʼas, nia mosu ba Pedro kuandu Pedro mesak hela. (Mc 16:7; Lc 24:34; 1 Kor 15:5) Klaru katak neʼe hametin tebes Pedro! w23.09 p. 22 par. 9-10

Maromak fó perdua ka hamoos sala husi ema sira neʼebé tau fiar ba nia. Nia fó perdua iha dalan neʼebé kompletu no la hanoin tan sira-nia sala. (Sal 32:​1, 2) Nia haree sira nuʼudar ema neʼebé iha hahalok loos no laran-loos tanba sira-nia fiar. Maski Maromak bolu Abraão, David, no fiar-naʼin sira seluk nuʼudar ema laran-loos, maibé sira nafatin sala-naʼin. Maibé tanba sira-nia fiar, Maromak haree sira nuʼudar ema ho hahalok loos, liuliu bainhira kompara sira ho ema neʼebé la adora nia. (Éf 2:12) Iha apóstolu Paulo nia karta, nia esplika katak ita presiza iha fiar atu bele sai Maromak nia belun. Abraão no David bele sai Maromak nia belun tanba sira hatudu fiar, nuneʼe mós ho ita. w23.12 p. 3 par. 6-7

Ema Kristaun ohin loron hetan priviléjiu atu fó sakrifísiu ba Jeová liuhusi uza sira-nia tempu, enerjia, no rikusoin atu apoia Maromak nia Ukun. Ita bele hatudu katak ita hafolin priviléjiu atu adora Jeová liuhusi fó ita-nia sakrifísiu neʼebé diʼak liu. Apóstolu Paulo hakerek kona-ba buat neʼebé ita presiza halo nafatin hodi adora Jeová. (Ebr 10:​22-25) Neʼe mak halo orasaun ba Jeová, haklaken kona-ba ita-nia esperansa, tuir reuniaun sira, no anima malu ‘liuliu bainhira ita haree katak Maromak nia loron besik daudaun ona’. Iha livru Apokalipse nia parte ikus, Jeová nia anju hatete dala rua hodi tau énfaze: “Adora Maromak bá.” (Apok 19:10; 22:9) Mai ita hanoin-hetan nafatin lia-loos kleʼan neʼe kona-ba Maromak nia templu espirituál no hafolin priviléjiu neʼebé ita iha atu adora ita-nia Maromak! w23.10 p. 29 par. 17-18

Ita hotu hakarak “hatudu nafatin domin ba malu”. Maski nuneʼe, ita presiza hanoin-hetan Jesus nia avizu kona-ba “ema barak nia domin sei sai malirin”. (Mt 24:12) Jesus la dehan katak ninia dixípulu barak sei la hatudu domin ba malu. Maibé ohin loron ema barak iha mundu la hatudu domin ba malu, tan neʼe ita presiza kuidadu atu sira-nia hahalok la fó influénsia ba ita. Agora, mai ita koʼalia kona-ba pergunta importante ida: Saida mak sei ajuda ita atu hatene se ita-nia domin ba irmaun-irmán sira mak boot? Dalan ida atu hatene katak ita iha domin neʼebé boot mak hodi hanoin kona-ba ita-nia hahalok iha situasaun balu. (2 Kor 8:8) Apóstolu Pedro temi kona-ba situasaun ida: “Buat neʼebé importante liu mak imi tenke hadomi malu tebetebes, tanba ema neʼebé iha domin, sempre prontu atu fó perdua ba sala barak.” (1 Ped 4:8) Entaun buat neʼebé ita halo kuandu irmaun-irmán sira hakanek ita-nia laran ka halo sala, sei ajuda ita hatene se ita-nia domin ba sira mak boot ka lae. w23.11 p. 10 par. 12-13

Se ita hatudu domin ba ema balu deʼit iha kongregasaun laran maibé seluk lae, neʼe katak ita la halo tuir Jesus nia mandamentu kona-ba domin. Hanesan Jesus, karik ita sente besik liu ba ema balu duké ema seluk. (João 13:23; 20:2) Maibé apóstolu Pedro fó-hanoin ita katak ita presiza hakaʼas an atu hadomi irmaun-irmán hotu tanba sira mak parte ba ita-nia família. (1 Ped 2:17) Pedro anima ita atu ‘hadomi malu tebetebes husi laran’. (1 Ped 1:22) Iha kontestu neʼe, “hadomi malu tebetebes” envolve nafatin hatudu domin maski susar atu halo ida-neʼe. Porezemplu, oinsá se irmaun ida halo ita laran-kanek? Karik ita hakarak atu selu fali ninia hahalok aat duké hatudu domin. Pedro aprende husi Jesus katak hahalok hanesan neʼe la halo Maromak kontente. (João 18:​10, 11) Pedro hakerek: “Keta selu aat ho aat ka liafuan kroʼat ho liafuan kroʼat. Maibé, koʼalia ho laran-diʼak bá.” (1 Ped 3:9) Bainhira Ita hadomi malu tebetebes, neʼe sei book Ita atu hatudu laran-diʼak no hanoin sira. w23.09 p. 28-29 par. 9-11

Ita kontente hodi haree oinsá labarik sira sai boot lalais. Haree hanesan labarik sira la presiza hakaʼas an atu sai boot. Maibé ita presiza hakaʼas an atu sai ema Kristaun neʼebé maduru. (1 Kor 13:11; Ebr 6:1) Atu bele kumpre planu neʼe, ita presiza iha relasaun neʼebé besik ho Jeová. Ita mós presiza ninia espíritu santu atu bele haburas hahalok diʼak, haburas abilidade oioin neʼebé bele ajuda ita, no prepara atu simu knaar iha futuru. (Prov 1:5) Jeová kria mane no feto. (Gén 1:27) Klaru katak, mane no feto mak diferente iha dalan fíziku, maibé mós iha dalan seluk tan. Porezemplu, Jeová kria mane no feto atu halo knaar neʼebé la hanesan, tan neʼe sira presiza hahalok diʼak no abilidade oioin atu bele ajuda sira kumpre sira-nia knaar.—Gén 2:18. w23.12 p. 18 par. 1-2

Jesus hakarak ema seluk atu uza ninia Aman nia naran ka lae? Sin. Iha tempu neʼebá, karik ulun-naʼin relijiaun balu fiar katak tanba Maromak nia naran mak sagradu, ema labele temi ida-neʼe. Maibé Jesus la husik tradisaun neʼebé kontra Bíblia atu hanetik nia fó hahiʼi ba ninia Aman nia naran. Hanoin toʼok kona-ba tempu neʼebé Jesus kura mane ida neʼebé anju aat mak domina kuandu nia iha ema Gerasa nia área. Ema barak sai taʼuk no husu Jesus atu sai husi sira-nia área, tan neʼe nia la hela iha neʼebá. (Mc 5:​16, 17) Maibé Jesus hakarak ema iha neʼebá hatene Jeová nia naran. Tan neʼe nia haruka mane neʼebé nia foin kura atu fó-hatene ba ema kona-ba buat neʼebé Jeová halo ona. (Mc 5:19) Nuneʼe mós ohin loron, nia hakarak ita atu fó-hatene ninia Aman nia naran ba ema hotu iha mundu tomak! (Mt 24:14; 28:20) Bainhira ita halo nuneʼe, ita halo ita-nia Liurai Jesus kontente. w24.02 p. 10 par. 10

Ita hetan bensaun oioin tanba sai parte ba Jeová nia organizasaun durante loron ikus sira neʼebé susar. Maski mundu nia situasaun sai aat ba beibeik, Jeová ajuda ita liuhusi irmaun-irmán sira neʼebé iha unidade. (Sal 133:1) Nia ajuda ita atu iha moris família nian neʼebé kontente. (Éf 5:33–6:1) No nia fó ita matenek neʼebé ita presiza atu bele tahan hasoru sentimentu laran-kraik no iha kontente neʼebé loos. Ita presiza hakaʼas an atu kontinua serbí Jeová ho laran-metin. Tanbasá? Tanba karik dala ruma ema nia liafuan no hahalok hakanek ita-nia laran. Karik ita sente laran-kraik tanba ita-nia fraku, liuliu se ita repete beibeik sala neʼebé hanesan. Ita presiza kontinua serbí Jeová (1) kuandu ita-nia maluk fiar-naʼin hakanek ita-nia laran, (2) kuandu hasoru problema iha moris kaben nian, no (3) kuandu ita sente laran-kraik tanba ita-nia fraku. w24.03 p. 14 par. 1-2

Dala ruma Ita rona kona-ba irmaun-irmán sira neʼebé deside atu aumenta sira-nia serbisu ba Jeová. Karik sira tuir Eskola ba Haklaken-Naʼin Tempu-Tomak ka muda ba fatin neʼebé presiza liután haklaken-naʼin. Se Ita bele halo planu hanesan neʼe, neʼe mak planu neʼebé diʼak tebes. Jeová nia povu hakarak tebes atu aumenta liután sira-nia serbisu ba nia. (Após 16:9) Maibé oinsá se agora daudaun Ita labele halo nuneʼe? Keta hanoin katak Ita mak folin-laek se kompara ho sira neʼebé bele halo ida-neʼe. Importante mak Ita kontinua tahan iha halai-taru ba moris. (Mt 10:22) Keta haluha katak Jeová kontente bainhira Ita serbí nia tuir Ita-nia kbiit no situasaun. Neʼe mak dalan importante ida atu Ita bele kontinua laʼo tuir Jesus depois hetan tiha batizmu.—Sal 26:1. w24.03 p. 10 par. 11

Ita-nia Aman iha lalehan promete atu fó perdua ba ita se ita arrepende an. (Sal 86:5) Entaun se ita arrepende an ho laran, ita bele fiar katak Jeová perdua ona ita. Hanoin-hetan katak Jeová mak fleksivel no la ulun-toos. Nia nunka husu ita atu halo buat neʼebé liu fali ita-nia kbiit. Nia hafolin buat neʼebé ita halo ba nia, naran katak ita halo ida-neʼe ho laran tomak. Ita mós bele hanoin kona-ba sira neʼebé temi iha Bíblia neʼebé serbí Jeová ho laran tomak. Porezemplu, apóstolu Paulo hakaʼas an ba tinan barak, nia halo viajen dook ba fatin oioin no harii kongregasaun barak. Maibé kuandu ninia situasaun troka no neʼe hanetik nia atu haklaken, Maromak la kontente ona ho nia ka lae? Lae. Nia kontinua halo buat neʼebé nia bele, no Jeová haraik bensaun ba nia. (Após 28:​30, 31) Nuneʼe mós ho ita, dala ruma buat neʼebé ita bele fó ba Jeová mak la hanesan husi tempu ba tempu. Maibé buat neʼebé importante ba Jeová mak tanbasá ita halo ida-neʼe. w24.03 p. 27 par. 7, 9

Jesus hatudu ezemplu kapás ba ninia dixípulu sira kona-ba halo orasaun ba Jeová. Durante Jesus nia serbisu haklaken iha mundu, nia halo orasaun beibeik. Nia presiza fahe tempu atu halo orasaun tanba nia okupadu no ema barak sempre haleʼu nia. (Mc 6:​31, 45, 46) Nia hadeer sedu iha dadeer hodi nuneʼe nia bele iha tempu atu halo orasaun mesak. Iha situasaun ida, Jesus halo orasaun kalan tomak antes halo desizaun importante ida. (Lc 6:​12, 13) No Jesus halo orasaun fila-fila iha kalan antes nia mate nuʼudar nia hanoin kleʼan kona-ba ninia knaar neʼebé susar tebes. (Mt 26:​39, 42, 44) Jesus nia ezemplu hanorin ita katak maski ita okupadu tebes, ita presiza fahe tempu atu halo orasaun. Porezemplu hadeer sedu iha dadeer ka fó tempu uitoan antes toba iha kalan atu halo orasaun. Bainhira ita halo nuneʼe, ita hatudu ba Jeová katak ita hafolin prezente espesiál neʼebé nia fó. w23.05 p. 3 par. 4-5

Iha lian orijinál, versíkulu neʼebé temi iha leten fó sai ideia katak Jeová nia domin ba ema neʼebé iha esperansa atu bá lalehan mak boot tebes no bele kompara ho mota neʼebé suli makaʼas. Sira hatene katak Maromak hadomi tebes sira. (Jud 1) Apóstolu João fó sai sira-nia sentimentu bainhira nia hakerek: “Haree oinsá Aman nia domin boot tebes ba ita, tanba nia bolu ona ita nuʼudar ninia oan!” (1 João 3:1) Jeová hadomi deʼit ema neʼebé iha esperansa atu bá lalehan ka lae? Lae, Jeová hatudu katak nia hadomi ema hotu. Saida mak hatudu katak Jeová hadomi tebes ita? Jeová hatudu domin neʼebé boot tebes ba ita hotu hodi fó Jesus nuʼudar sakrifísiu!—João 3:16; Rom 5:8. w24.01 p. 28 par. 9-10

Eskritura iha leten fó sai dalan oinsá David manán ninia sentimentu taʼuk. Maski nia iha perigu laran, nia medita kona-ba saida mak Jeová sei halo ba nia iha futuru. David hatene katak Jeová sei salva nia iha tempu neʼebé loos. Liután neʼe, Jeová mós dehan ona katak David sei sai Izraél nia liurai tuirmai. (1 Sam 16:​1, 13) Ba David, Jeová nia promesa hotu mak diʼak no sei kumpre duni. Saida mak Jeová promete atu halo ba Ita? Ita hatene katak Jeová sei la proteje ita husi problema hotu neʼebé ita hasoru agora. Maibé iha mundu paraízu, nia sei halakon susar naran deʼit neʼebé ita hasoru ohin loron. (Isa 25:​7-9) Ita-nia Kriadór iha duni kbiit boot atu fó moris-hiʼas ba ema mate, kura ita, no halakon kontradór hotu.—1 João 4:4. w24.01 p. 6 par. 12-13

Medita kona-ba Ita-nia dedikasaun no batizmu. Ita hetan batizmu tanba hakarak atu apoia Jeová. Hanoin fali saida mak ajuda Ita atu fiar katak Ita hetan ona lia-loos. Ita aprende kona-ba Jeová no komesa respeitu no hadomi nia nuʼudar Ita-nia Aman iha lalehan. Ita haburas fiar no neʼe motiva Ita atu arrepende an. Ita husik tiha toman neʼebé sala no komesa moris tuir Jeová nia hakarak. Ita sente kmaan tanba hatene katak Jeová perdua ona ita. (Sal 32:2) Ita asiste reuniaun sira no komesa haklaken ba ema seluk. Depois neʼe, Ita dedika an no hetan batizmu, no agora Ita komesa laʼo iha dalan neʼebé lori ba moris. Ita hakaʼas an atu kontinua laʼo iha dalan neʼe. (Mt 7:​13, 14) Mai ita hamriik metin hodi laran-metin ba Jeová no mós kontinua halo tuir ninia matadalan sira. w23.07 p. 17 par. 14; p. 19 par. 19

Hodi hanoin fali orasaun kona-ba Ita-nia dedikasaun ba Jeová, neʼe sei ajuda Ita tahan hasoru tentasaun naran deʼit. Porezemplu, Ita sei hatudu sentimentu romántiku ba ema seluk nia kaben ka lae? Lae duni! Ita promete ona ba Jeová katak Ita sei nunka halo hanesan neʼe. Ita sei proteje Ita-nia an husi problema oioin tanba la husik sentimentu sala mosu no sai abut iha Ita-nia laran. Ita sei sees husi “ema laran-aat sira-nia dalan”. (Prov 4:​14, 15) Hanoin kleʼan kona-ba Jesus nia ezemplu bele ajuda Ita. Nia deside metin atu halo ninia Aman kontente. Hanesan Jesus, Ita hakarak deside metin atu la simu kedas buat naran deʼit neʼebé halo Maromak la kontente. (Mt 4:10; João 8:29) Bainhira Ita hasoru susar no tentasaun, neʼe fó oportunidade mai Ita atu hatudu katak Ita deside metin ona atu “kontinua laʼo tuir” Jesus. Ita bele fiar katak Jeová sei ajuda Ita. w24.03 p. 9-10 par. 8-10