Outubru

Dala ruma Ita sente susar atu halo tuir ka lae? Liurai David sente hanesan neʼe, tan neʼe nia halo orasaun ba Maromak: “Book haʼu-nia fuan-laran hodi prontu atu halo tuir Ita.” (Sal 51:12) David hadomi Jeová. Maibé dala ruma susar ba nia atu halo tuir, hanesan mós ho ita. Tanbasá? Primeiru, ita moris-mai ho sala husi Adão no Eva. Segundu, Satanás kontinua koko atu halo ita kontra Jeová hanesan buat neʼebé nia halo. (2 Kor 11:3) Terseiru, ita moris iha Satanás nia mundu “neʼebé agora book ema kontradór sira-nia neon”. (Éf 2:2) Ita presiza hakaʼas an atu kontra hasoru ita-nia fraku, Diabu, no mós mundu neʼebé obriga ita atu hatudu hahalok kontra. Ita mós presiza hakaʼas an atu halo tuir Jeová no mós sira neʼebé simu podér uitoan husi nia. w23.10 p. 6 par. 1

Saida mak ita bele aprende husi Jesus nia milagre neʼe? Ita aprende kona-ba hahalok haraik an. Jesus la gaba an kona-ba milagre neʼe. Tuir loloos, nia nunka gaba an kona-ba buat neʼebé nia halo. Duké halo nuneʼe, nia hatudu haraik an hodi fó glória hotu ba ninia Aman. (João 5:​19, 30; 8:28) Se ita banati-tuir Jesus hodi kontinua haraik an, ita sei la gaba an kona-ba buat neʼebé ita kumpre. Ita lakohi gaba an, maibé ita gaba Maromak neʼebé ita serbí. (Jer 9:​23, 24) Ita tenke fó glória hotu ba nia. Tuir loloos se Jeová la ajuda ita, ita labele kumpre buat diʼak oioin. (1 Kor 1:​26-31) Se ita haraik an, ita la buka atu hetan glória tanba buat diʼak neʼebé ita halo ba ema seluk. Ita kontente tanba hatene katak Jeová haree no hafolin buat neʼebé ita halo. (Kompara ho Mateus 6:​2-4; Ebr 13:16) Ita halo Jeová kontente bainhira ita banati-tuir Jesus hodi hatudu hahalok haraik an.—1 Ped 5:6. w23.04 p. 4 par. 9; p. 5 par. 11-12

Jeová dirije apóstolu Paulo atu anima ema Kristaun atu hanoin ema seluk nia diʼak. Oinsá ita bele aplika konsellu neʼe durante reuniaun sira? Hanoin-hetan katak hanesan ho ita, ema seluk mós hakarak fó komentáriu. Hanoin toʼok kona-ba neʼe. Bainhira Ita konversa ho belun sira, baibain Ita la koʼalia barak liu toʼo sira la iha oportunidade atu koʼalia. Ita hakarak sira mós koʼalia. Nuneʼe mós ho reuniaun sira, ita hakarak fó oportunidade ba ema barak atu fó komentáriu. Tuir loloos, dalan diʼak atu anima irmaun-irmán sira mak liuhusi fó oportunidade ba sira atu fó komentáriu. (1 Kor 10:24) Fó komentáriu neʼebé badak, atu nuneʼe ema seluk mós bele fó komentáriu. Maski Ita fó komentáriu neʼebé badak, maibé keta koʼalia kona-ba pontu barak liu. Se Ita koʼalia kona-ba pontu hotu iha parágrafu laran, la iha tan pontu seluk ba ema atu koʼalia. w23.04 p. 22-23 par. 11-13

Importante atu ajuda ema seluk, liuliu hodi haklaken. Iha serbisu haklaken ita presiza fleksivel. Baibain ita hasoru ema neʼebé iha hanoin, fiar no situasaun moris neʼebé la hanesan. Apóstolu Paulo halo mudansa tuir situasaun no ita bele banati-tuir nia. Jesus hili Paulo nuʼudar “apóstolu ba nasaun sira”. (Rom 11:13) Tan neʼe, Paulo haklaken ba ema Judeu, ema Gregu, ema matenek, ema la eskola, ema-boot no liurai sira. Atu bele book ema oioin nia laran, Paulo tenke “sai buat hotu ba ema oioin”. (1 Kor 9:​19-22) Nia hanoin didiʼak kona-ba ema nia kultura, situasaun moris no fiar, tan neʼe nia halo mudansa ba dalan neʼebé nia haklaken ba sira. Ita mós bele aumenta ita-nia matenek atu haklaken se ita fleksivel no hanoin kona-ba oinsá ita bele ajuda ema. w23.07 p. 23 par. 11-12

Hahalok laran-maus mak folin-boot. Ema neʼebé hatudu laran-maus la dehan katak nia mak fraku. Ita presiza hakaʼas an atu kalma nafatin bainhira hasoru situasaun susar. Laran-maus mak ‘hahalok ida neʼebé mai husi espíritu santu’. (Gal 5:​22, 23) Liafuan Gregu neʼebé refere ba “laran-maus” dala ruma uza atu esplika kona-ba kuda fuik neʼebé hetan ona treinu. Hanoin toʼok kona-ba kuda fuik neʼebé hetan ona treinu no sai maus. Maski kuda neʼe maus, maibé nia nafatin forsa. Entaun, oinsá mak ita bele haburas hahalok laran-maus no nafatin iha forsa? Ita labele halo ida-neʼe mesak deʼit. Ita presiza halo orasaun husu Jeová nia espíritu santu, no husu ninia ajuda atu haburas hahalok furak neʼe. Ema barak aprende ona atu haburas hahalok neʼe. Porezemplu, Testemuña barak hatudu laran-maus bainhira ema provoka sira, no neʼe ajuda ema seluk atu iha hanoin neʼebé loos kona-ba Testemuña sira.—2 Tim 2:​24, 25. w23.09 p. 14 par. 3

Liuhusi vizaun kmanek ida, apóstolu João haree katuas naʼin-24 iha lalehan neʼebé adora Jeová. Sira hahiʼi Maromak, no sira rekoñese katak Jeová mak merese atu simu “glória, respeitu no kbiit”. (Apok 4:​10, 11) Anju sira neʼebé laran-metin mós iha razaun oioin atu fó hahiʼi no glória ba Jeová. Sira hamutuk ho Jeová iha lalehan no sira koñese nia didiʼak. Sira haree ninia hahalok furak sira liuhusi buat neʼebé nia halo. Nuʼudar sira haree didiʼak ba Jeová nia hahalok sira, neʼe motiva sira atu hahiʼi nia. (Job 38:​4-7) Ita mós hakarak atu fó hahiʼi ba Jeová liuhusi orasaun hodi fó sai buat neʼebé ita gosta no hafolin kona-ba nia. Nuʼudar Ita lee no estuda Bíblia, buka toʼok Jeová nia hahalok neʼebé Ita rasik gosta. (Job 37:23; Rom 11:33) Tuirmai fó sai ba Jeová tanbasá Ita gosta ninia hahalok neʼe. Ita mós bele fó hahiʼi ba Jeová tanba nia ajuda ita no ita-nia família espirituál.—1 Sam 2:​1, 2. w23.05 p. 3-4 par. 6-7

Iha tinan 1919, Babilónia Boot la kontrola tan Maromak nia povu. Iha tinan neʼe, “atan laran-metin no matenek” komesa halo serbisu atu nuneʼe ema laran-loos sira bele hahú laʼo iha “Dalan Santu”. (Mt 24:​45-47; Isa 35:8) Serbisu neʼebé ema seluk halo iha tempu uluk atu prepara dalan neʼe, ajuda ema neʼebé komesa laʼo iha dalan neʼe atu aprende kona-ba Jeová no ninia hakarak. (Prov 4:18) Sira mós bele moris tuir Maromak nia matadalan sira. Jeová la husu ninia povu atu halo mudansa hotu dala ida deʼit. Maibé, nia hamoos sira neineik-neineik. Ita sei kontente tebes iha futuru bainhira ita bele halo kontente ita-nia Maromak iha buat hotu! Estrada ida-idak presiza manutensaun beibeik. Hahú husi tinan 1919, serbisu manutensaun ba “Dalan Santu” kontinua nafatin atu nuneʼe ema barak tan bele husik Babilónia Boot. w23.05 p. 17 par. 15; p. 19 par. 16

Grupu Administradór rasik fó treinu ba ajuda-naʼin sira husi komisaun oioin ba Grupu Administradór. Agora daudaun ajuda-naʼin sira-neʼe kaer responsabilidade oioin iha Jeová nia organizasaun. Sira simu treinu ho didiʼak atu kontinua tau matan ba Kristu nia bibi-malae sira. Bainhira Kristu nia alin sira hotu saʼe ona ba lalehan iha terus boot nia parte ikus, Maromak nia povu iha rai sei kontinua halaʼo adorasaun neʼebé loos. Iha tempu neʼebá, grupu nasaun sira neʼebé Bíblia bolu nuʼudar Gog husi rai-Magog sei ataka Maromak nia povu. (Eze 38:​18-20) Maibé ataka neʼe sei la susesu, neʼe sei la hapara Maromak nia povu atu adora Maromak. Nia sei salva ninia povu! Iha apóstolu João nia vizaun, nia haree “ema-lubun boot” husi Kristu nia bibi-malae seluk. João haree “ema-lubun boot” neʼe “liu terus boot”. (Apok 7:​9, 14) Sin, Jeová sei salva sira! w24.02 p. 5-6 par. 13-14

Saida mak ita bele halo atu simu espíritu santu? Ita bele halo orasaun atu husu ida-neʼe, estuda Bíblia no mós sai parte ba Jeová nia organizasaun. Neʼe sei ajuda ita haburas hahalok neʼebé mai husi espíritu santu. (Gal 5:​22, 23) Maromak fó deʼit ninia espíritu santu ba ema neʼebé iha hanoin neʼebé moos no hahalok moos. Nia sei la fó ninia espíritu santu ba ita se ita kontinua hanoin kona-ba buat neʼebé la moos no halo hahalok la moos. (1 Tes 4:​7, 8) Atu kontinua simu espíritu santu, ita labele “hakribi profesia sira”. (1 Tes 5:20) Liafuan “profesia” iha eskritura neʼe refere ba mensajen neʼebé Maromak fó ba ita liuhusi ninia espíritu santu, inklui mensajen kona-ba Jeová nia loron no tanbasá ita-nia tempu mak urjente. Ita labele hanoin katak Jeová nia loron ka Armagedon sei la akontese iha ita-nia tempu. Duké halo nuneʼe, ita kontinua hanoin kona-ba neʼe hodi hatudu hahalok loos no mós ‘hatudu hahalok laran-metin ba Maromak’.—2 Ped 3:​11, 12. w23.06 p. 12 par. 13-14

Ita presiza halo saida se dezeñu pornografia mosu derrepente iha ita-nia telemovel ka sasán eletróniku seluk? Ita presiza taka kedas no labele haree ida-neʼe. Fasil liu atu halo ida-neʼe se ita hanoin-hetan katak ita-nia relasaun ho Jeová mak folin-boot liu. Tuir loloos, dezeñu sira neʼebé laʼós pornografia bele mós hamosu hanoin neʼebé la morál. Tanbasá ita presiza hasees an husi ida-neʼe? Tanba ita mós lakohi atu hanoin kona-ba halo hahalok la morál. (Mt 5:​28, 29) Irmaun David neʼebé serbí nuʼudar katuas iha rai-Tailándia hatete: “Haʼu husu ba haʼu-nia an: ‘Maski dezeñu sira-neʼe laʼós pornografia, maibé Jeová kontente ka lae se haʼu kontinua haree ida-neʼe?’ Neʼe ajuda haʼu atu foti desizaun neʼebé matenek.” Bainhira ita hamtaʼuk Jeová no lakohi halo nia laran-kanek, neʼe sei ajuda ita atu halo desizaun neʼebé matenek. “Hamtaʼuk Jeová mak hakat primeiru atu bele hetan matenek.” w23.06 p. 23 par. 12-13

Liafuan “kuartu laran” karik refere ba kongregasaun. Jeová promete katak nia sei proteje ita se ita kontinua serbí nia hamutuk ho irmaun-irmán sira. Tan neʼe, agora ita tenke hakaʼas an atu hadomi irmaun-irmán sira. Ita-nia salvasaun depende ba ida-neʼe! “Jeová nia loron boot” sei lori susar ba ema. (Sof 1:​14, 15) Jeová nia povu mós sei hasoru susar. Maibé se ita prepara agora, ita sei kalma nafatin no bele ajuda ema seluk. Ita sei tahan susar naran deʼit neʼebé mosu. Bainhira maluk fiar-naʼin sira hasoru susar, ita sei hakaʼas an atu ajuda sira hodi hatudu laran-sadiʼa no fó buat neʼebé sira presiza. No bainhira ita aprende atu hatudu domin ba irmaun-irmán sira agora, ita mós sei hatudu domin ba sira iha futuru. Jeová sei fó kolen ba ita atu moris ba nafatin iha mundu foun neʼebé la iha tan dezastre ka susar.—Isa 65:17. w23.07 p. 7 par. 16-17

Bíblia sempre temi kona-ba mane fiar-naʼin sira nuʼudar ema neʼebé iha kbiit. Maski sira iha kbiit, neʼe la dehan katak sira sempre sente hanesan neʼe. Porezemplu, dala ruma Liurai David sente katak nia mak “metin hanesan foho ida”, maibé iha situasaun balu, nia “sai taʼuk loos”. (Sal 30:7) Maromak nia espíritu fó kbiit neʼebé boot tebes ba Sansão, no Sansão hatene katak se Maromak la fó kbiit ba nia, nia “sei sai fraku no sai hanesan ema baibain”. (Juís 14:​5, 6; 16:17) Mane fiar-naʼin sira-neʼe bele iha kbiit tanba Jeová mak fó ida-neʼe ba sira. Apóstolu Paulo hatete katak nia mós presiza kbiit husi Jeová. (2 Kor 12:​9, 10) Nia mós hasoru problema saúde. (Gal 4:​13, 14) Dala ruma nia sente susar atu halo buat neʼebé loos. (Rom 7:​18, 19) No dala ruma nia sente laran-taridu no taʼuk kona-ba buat ruma neʼebé sei akontese ba nia. (2 Kor 1:​8, 9) Maibé bainhira Paulo sai fraku, nia iha kbiit. Oinsá? Jeová fó ba Paulo kbiit neʼebé nia presiza atu tahan hasoru susar sira. w23.10 p. 12 par. 1-2

Se dala ruma ita sente folin-laek, hanoin-hetan katak Jeová mak dada ita ba nia. (João 6:44) Nia haree buat diʼak husi ita maski ita rasik labele haree, no nia hatene ita-nia laran. (2 Krón 6:30) Tan neʼe ita bele fiar katak nia hafolin ita. (1 João 3:​19, 20) Antes aprende lia-loos, karik ita balu halo buat ruma neʼebé halo ita nafatin fó-sala ba ita-nia an. (1 Ped 4:3) Karik ema balu neʼebé serbí Jeová ho laran-metin mós nafatin luta hasoru sira-nia fraku. Oinsá ho Ita? Ita-nia laran mós fó-sala ba Ita ka lae? Se nuneʼe, Ita bele sente kmaan hodi hatene katak Jeová nia atan seluk mós sente hanesan neʼe. Porezemplu, Bíblia dehan katak apóstolu Paulo sente nia mak ema neʼebé kuitadu loos bainhira hanoin kona-ba ninia fraku sira. (Rom 7:24) Klaru katak Paulo arrepende ninia sala no hetan batizmu. Maski nuneʼe, nia nafatin haree ninia an nuʼudar ema neʼebé “kiʼik liu fali apóstolu sira seluk” no “sala-naʼin neʼebé aat liu”.—1 Kor 15:9; 1 Tim 1:15. w24.03 p. 27 par. 5-6

Lisaun neʼebé ita bele aprende husi Liurai Jeoas nia desizaun neʼebé sala mak ita presiza hili belun neʼebé bele lori influénsia diʼak mai ita, katak belun neʼebé hadomi Jeová no hakarak halo Jeová kontente. Ita bele habelun ho ema husi idade naran deʼit. Hanoin-hetan, Jeoas idade kiʼik liu fali ninia belun Jeoada. Kona-ba Ita-nia belun sira, husu ba Ita-nia an: ‘Sira ajuda haʼu atu hametin haʼu-nia fiar ba Jeová ka lae? Sira ajuda haʼu atu moris tuir Jeová nia matadalan ka lae? Sira koʼalia kona-ba Jeová no lia-loos ka lae? Sira respeitu Jeová nia matadalan sira ka lae? Sira fó konsellu mai haʼu bainhira haʼu presiza tebes ida-neʼe ka lae?’ (Prov 27:​5, 6, 17) Se Ita-nia belun la hadomi Jeová, diʼak liu atu la habelun ho sira. Maibé se Ita iha belun neʼebé hadomi Jeová, sira sei sempre prontu atu ajuda Ita!—Prov 13:20. w23.09 p. 9 par. 6-7

Iha alfabetu lian Gregu letra primeiru mak alfa no letra ikus mak ómega. Hodi uza liafuan “Alfa no Ómega”, Jeová hatudu katak kuandu nia hahú buat ruma, nia sei halo ida-neʼe toʼo hotu no susesu. Depois Jeová kria tiha Adão no Eva, Nia dehan ba sira: “Iha oan no sai barak bá, halo nakonu no domina rai neʼe.” (Gén 1:28) Iha tempu neʼebá, neʼe hanesan Jeová hatete “Alfa” tanba Jeová fó sai ninia hakarak ba mundu no ema. Iha futuru, nia sei hatete “Ómega” bainhira nia kumpre ninia hakarak iha dalan neʼebé kompletu, no Adão no Eva nia bei-oan sira neʼebé laran-metin halo nakonu mundu no halo mundu sai Paraízu. Depois Jeová “kria hotu ona lalehan no rai ho buat hotu neʼebé iha laran”, tuirmai Jeová fó garantia. Nia garantia katak nia sei kumpre duni ninia hakarak ba ema no rai. Neʼe sei sai loos duni iha loron hitu neʼe nia rohan.—Gén 2:​1-3. w23.11 p. 5 par. 13-14

Baibain viajen husi Babilónia ba Izraél bele han fulan haat, maibé Jeová promete katak nia sei hasai tiha buat naran deʼit neʼebé hanetik ema Judeu atu fila fali ba Izraél. Ema Judeu sira neʼebé laran-metin hatene katak fila fali ba Izraél sei lori bensaun barak liu duké sakrifísiu neʼebé sira sei halo. Bensaun boot liu mak liga ho sira-nia adorasaun. La iha templu ba Jeová iha Babilónia. La iha altár neʼebé ema Izraél bele uza atu hasaʼe sakrifísiu hodi tuir Moisés nia Ukun-Fuan, no la iha arranju kona-ba amlulik sira neʼebé hasaʼe sakrifísiu. Liután neʼe, iha Babilónia, Jeová nia povu mak uitoan liu se kompara ho ema neʼebé adora maromak falsu, no sira la hafolin Jeová no ninia matadalan sira. Tan neʼe, ema Judeu rihun ba rihun neʼebé hamtaʼuk Jeová hein namanas atu fila fali ba sira-nia rai hodi bele halaʼo fali adorasaun neʼebé loos. w23.05 p. 14-15 par. 3-4

Ita presiza Maromak nia espíritu santu atu bele “kontinua laʼo nuʼudar naroman nia oan sira”. Tanbasá? Tanba la fasil atu moos nafatin iha mundu neʼebé nakonu ho hahalok la morál. (1 Tes 4:​3-5, 7, 8) Espíritu santu bele ajuda ita atu luta hasoru mundu neʼe nia hanoin, inklui ema nia hanorin no hanoin neʼebé kontra malu ho Maromak nia hanoin. Espíritu santu mós bele ajuda ita atu hatudu sai “hahalok diʼak oioin, [no] hahalok loos”. (Éf 5:9) Dalan ida atu simu espíritu santu mak liuhusi orasaun hodi husu ida-neʼe. Jesus hatete katak Jeová sei “fó duni espíritu santu ba ema neʼebé husu ba nia”. (Lc 11:13) No bainhira ita adora Jeová hamutuk iha reuniaun, ita mós simu espíritu santu. (Éf 5:​19, 20) Ho espíritu santu nia ajuda, ita bele moris iha dalan neʼebé halo Maromak kontente. w24.03 p. 23-24 par. 13-15

Ita presiza hatudu pasiénsia liután ka lae? Ita bele halo orasaun kona-ba neʼe. Pasiénsia mak hahalok ida neʼebé mai husi espíritu santu. (Gal 5:​22, 23) Tan neʼe ita presiza halo orasaun ba Jeová hodi husu espíritu santu atu bele haburas liután hahalok neʼe. Se ita hasoru situasaun neʼebé koko ita-nia pasiénsia, ita presiza “kontinua husu” Jeová nia espíritu santu atu ajuda ita. (Lc 11:13) Ita mós bele husu Jeová atu ajuda ita haree situasaun tuir ninia haree. Kuandu halo tiha orasaun, ita mós presiza hakaʼas an atu hatudu pasiénsia loroloron. Se ita kontinua halo orasaun no hakaʼas an atu hatudu pasiénsia, Jeová sei ajuda ita atu haburas liután pasiénsia, maski uluk ita laʼós ema neʼebé pasiénsia. Medita mós kona-ba ezemplu sira husi Bíblia. Bíblia konta ezemplu barak kona-ba ema neʼebé hatudu pasiénsia. Hodi medita kona-ba ezemplu sira-neʼe, bele ajuda ita aprende oinsá atu hatudu pasiénsia. w23.08 p. 22-23 par. 10-11

Jesus promete ba apóstolu Pedro katak Jeová sei tau matan nia. Depois Jesus moris hiʼas, nia halo milagre ida tan hodi ajuda Pedro no apóstolu sira kaer ikan. (João 21:​4-6) Milagre neʼe hametin Pedro nia fiar katak Jeová sei tau matan ba ninia presiza fíziku nian. Karik Pedro hanoin-hetan Jesus nia liafuan katak Jeová sei tau matan ba sira neʼebé kontinua “buka uluk Maromak nia Ukun”. (Mt 6:33) Tan neʼe Pedro tau uluk serbisu haklaken duké kaer ikan. Iha loron Pentekostes tinan 33 EC, nia haklaken ho aten-brani no ema rihun ba rihun mak hetan lia-loos. (Após 2:​14, 37-41) Nia mós ajuda ema Samaria no ema husi nasaun seluk atu hatudu fiar ba Kristu. (Após 8:​14-17; 10:​44-48) Jeová uza Pedro iha dalan neʼebé boot atu ajuda ema oioin tama ba kongregasaun. w23.09 p. 20 par. 1; p. 23 par. 11

Maizumenus tinan rua depois Babilónia harahun Jeruzalein, Liurai Nabukodonozór husi Babilónia hetan mehi kona-ba estátua boot no mehi neʼe halo nia taʼuk. Se Daniel no matenek-naʼin sira labele fó-hatene kona-ba saida mak liurai mehi no esplika ninia signifikadu, liurai sei oho sira. (Dan 2:​3-5) Daniel presiza halo buat ruma lalais se nia lakohi ema barak mate. Nia “tama no husu ba liurai atu fó tempu ba nia atu esplika mehi neʼe nia signifika ba liurai”. (Dan 2:16) Nia presiza duni aten-brani no fiar. Antes neʼe, nia nunka esplika kona-ba ema nia mehi. Nia husu ninia kolega sira “atu halo orasaun ba Maromak iha lalehan atu hatudu laran-sadiʼa no fó sai segredu neʼe ba sira”. (Dan 2:18) Jeová hatán sira-nia orasaun. Ho Maromak nia ajuda, Daniel esplika kona-ba liurai nia mehi. Daniel no ninia kolega sira-nia moris seguru ona. w23.08 p. 3 par. 4

Hanoin kona-ba benefísiu husi hatudu pasiénsia. Bainhira ita hatudu pasiénsia, ita sente kontente liu no sente hakmatek. Hodi hatudu pasiénsia ita bele iha saúde fíziku no mentál neʼebé diʼak. Bainhira ita hatudu pasiénsia ba ema seluk, ita bele iha relasaun diʼak ho sira. Ita-nia kongregasaun sei iha unidade se ita hatudu pasiénsia. Se ita la sai hirus lalais bainhira ema ruma provoka ita, neʼe bele hapara situasaun atu la sai aat liután. (Sal 37:​8, nota; Prov 14:29) Maibé importante liu mak, ita banati-tuir ita-nia Aman iha lalehan no hakbesik liután ba nia. Hahalok pasiénsia mak furak no lori benefísiu! Maski dala ruma la fasil atu hatudu pasiénsia, maibé ho Jeová nia ajuda ita bele kontinua haburas hahalok neʼe. Nuʼudar ita hein ho pasiénsia ba mundu foun, ita bele iha konfiansa katak “Jeová nia matan hateke ba sira neʼebé hamtaʼuk nia, sira neʼebé hein ba ninia domin neʼebé laran-metin”. (Sal 33:18) Mai ita hotu kontinua hakaʼas an atu tau pasiénsia nuʼudar ita-nia roupa. w23.08 p. 22 par. 7; p. 25 par. 16-17

Tiago dehan katak mane ida karik hanoin katak nia iha fiar, maibé ninia hahalok hatudu katak nia la iha fiar. (Tgo 2:​1-5, 9) Tiago mós temi kona-ba ema ida neʼebé haree ninia ‘maluk fiar-naʼin presiza roupa no ai-han’, maibé nia la ajuda ninia maluk neʼe. Maski ema neʼe dehan katak nia iha fiar, maibé ninia hahalok hatudu katak nia la iha fiar. (Tgo 2:​14-16) Tiago temi Raab nuʼudar ezemplu diʼak kona-ba ema neʼebé hatudu fiar liuhusi hahalok. (Tgo 2:​25, 26) Raab rona ona kona-ba Jeová no rekoñese katak Jeová apoia povu Izraél. (Jos 2:​9-11) Nia hatudu fiar liuhusi hahalok hodi proteje espiaun naʼin-rua husi Izraél bainhira sira-nia moris iha perigu laran. Rezultadu mak Maromak haree Raab nuʼudar ema laran-loos maski la perfeitu no laʼós ema Izraél hanesan ho Abraão. Raab nia ezemplu hatudu katak importante tebes atu hatudu fiar liuhusi hahalok. w23.12 p. 5 par. 12-13

Nuʼudar ema Kristaun, ita lakohi atu komprende deʼit Bíblia nia hanorin neʼebé báziku. Ita hakarak tebes atu aprende “buat kleʼan husi Maromak”, no ho Jeová nia espíritu santu, ita bele halo neʼe ho susesu. (1 Kor 2:​9, 10) Karik Ita bele estuda mesak hodi bele hakbesik liután ba Jeová. Porezemplu, Ita bele buka-hatene oinsá mak nia hatudu domin ba ninia atan sira iha tempu uluk, no oinsá ida-neʼe fó prova katak nia mós hadomi Ita. Ita mós bele estuda kona-ba oinsá Jeová hakarak povu Izraél atu adora nia, no oinsá nia hakarak ita adora nia ohin loron. Ka karik Ita bele estuda kleʼan kona-ba profesia neʼebé Jesus kumpre durante ninia moris no ninia serbisu haklaken. Ita sei sente ksolok boot kuandu estuda tópiku oioin hodi uza Livru atu ajuda Testemuña ba Jeová buka informasaun. Bainhira Ita estuda kleʼan Bíblia, neʼe sei hametin Ita-nia fiar no ajuda Ita atu “hetan koñesimentu kona-ba Maromak”.—Prov 2:​4, 5. w23.10 p. 18-19 par. 3-5

Liafuan neʼebé apóstolu Pedro uza nuʼudar “tebetebes” signifika “halo boot liután”. Parte segundu husi versíkulu neʼe esplika rezultadu husi hadomi malu tebetebes. Bainhira ita hadomi malu tebetebes, ita prontu atu fó perdua ba malu. Imajina toʼok ita iha meza ida neʼebé iha riska barak. Klaru katak ita sei uza hena ruma neʼebé boot atu taka riska sira-neʼe, laʼós riska ida ka rua deʼit, maibé riska hotu. Iha dalan neʼebé hanesan, se ita hadomi tebetebes irmaun-irmán sira, ita laʼós perdua sala ida ka rua deʼit, maibé ita “fó perdua ba sala barak”. Ita-nia domin ba irmaun-irmán sira tenke boot, hodi nuneʼe ita bele fó perdua ba sira maski dala ruma susar tebes atu halo ida-neʼe. (Kol 3:13) Bainhira ita fó perdua ba ema seluk, ita hatudu katak ita hadomi tebes sira no ita hakarak halo Jeová kontente. w23.11 p. 10-12 par. 13-15

Bainhira Liurai Josias tinan 26, nia haruka ema atu hadiʼa fali templu. Durante halaʼo serbisu, sira “hetan livru Ukun-Fuan neʼebé Jeová fó sai liuhusi Moisés”. Bainhira liurai rona tiha buat neʼebé hakerek iha livru neʼe, neʼe book nia atu halo kedas mudansa hodi tuir buat neʼebé livru neʼe hatete. (2 Krón 34:​14, 19-21) Ita hakarak haburas toman atu lee beibeik Bíblia ka lae? Se Ita koko ona atu halo nuneʼe, Ita gosta ka lae? Ita tau marka ba eskritura sira neʼebé bele ajuda Ita rasik ka lae? Bainhira Josias maizumenus tinan 39, nia halo sala no rezultadu mak nia mate. Nia sadere liu ba ninia an rasik duké buka matadalan husi Jeová. (2 Krón 35:​20-25) Saida mak ita aprende? Maski ita mak idade boot ka serbí Jeová ba tempu kleur ona, ita tenke buka nafatin Jeová. Atu halo ida-neʼe, ita presiza halo orasaun hodi husu ninia matadalan, estuda Bíblia, no rona ba konsellu husi ema Kristaun neʼebé maduru. Neʼe sei ajuda ita atu la halo sala no lori kontente mai ita.—Tgo 1:25. w23.09 p. 12 par. 15-16

Bíblia temi kona-ba feto barak neʼebé hadomi no serbí Jeová. Sira ‘kontrola sira-nia hahalok’, no “laran-metin iha buat hotu”. (1 Tim 3:11) Irmán sira mós bele aprende no banati-tuir ezemplu husi irmán maduru iha kongregasaun. Se Ita mak irmán joven ida, diʼak atu buka-hatene irmán maduru neʼebé Ita koñese neʼebé hatudu ezemplu diʼak no banati-tuir sira-nia ezemplu. Haree didiʼak sira-nia hahalok diʼak no tuirmai hanoin kona-ba oinsá Ita bele hatudu hahalok neʼebé hanesan. Atu sai ema neʼebé maduru ita presiza haraik an. Se feto ida mak haraik an, nia sei iha relasaun diʼak ho Jeová no ema seluk. Porezemplu, feto neʼebé hadomi Jeová sei hatudu haraik an hodi hili atu halo tuir arranju ulun nian. Iha 1 Korinto 11:3 Jeová esplika kona-ba sé mak iha responsabilidade atu tau matan ba kongregasaun no mós família. w23.12 p. 18-19 par. 3-5

Jeová hakarak laʼen atu hadomi no tau matan ninia feen iha dalan fíziku, emosaun, no espirituál. Hahalok sira hanesan, kbiit atu hanoin, hatudu respeitu ba feto sira, no halaʼo knaar ho didiʼak, sei ajuda Ita atu sai laʼen neʼebé diʼak. Depois kaben tiha, karik Ita sei sai aman ida. Saida mak Ita bele aprende husi Jeová atu sai aman neʼebé diʼak? (Éf 6:4) Jeová koʼalia nakloke ba ninia Oan-Mane Jesus katak nia hadomi no simu Jesus. (Mt 3:17) Se Ita sai aman ida, fó sai beibeik ba Ita-nia oan katak Ita hadomi sira. Gaba beibeik kona-ba buat diʼak neʼebé sira halo. Aman neʼebé banati-tuir Jeová bele ajuda sira-nia oan atu sai ema Kristaun neʼebé maduru. Ita bele prepara ba knaar neʼe agora hodi hatudu domin ba ema seluk iha família no kongregasaun, no aprende atu fó sai katak Ita hadomi no hafolin sira.—João 15:9. w23.12 p. 28-29 par. 17-18

Maski ita serbí Jeová ho laran-metin, ita nafatin hasoru susar no sai moras hanesan buat neʼebé akontese ba ema barak. Karik ita presiza tahan tanba ema neʼebé odi Maromak nia povu fó-terus no kontra ita. Maski Jeová la halakon kedas susar neʼebé ita hasoru, maibé nia promete atu ajuda ita. (Isa 41:10) Ho ninia ajuda, ita bele kontinua haksolok, halo desizaun diʼak, no nafatin laran-metin ba nia maski hasoru situasaun neʼebé susar tebes. Jeová promete atu fó ita buat neʼebé Bíblia bolu nuʼudar “Maromak nia dame”. (Flp 4:​6, 7) Dame neʼe refere ba sentimentu kalma, no mós neon no laran hakmatek neʼebé ita sente tanba ita iha relasaun besik ho Jeová. Dame neʼe “aas liu ema nia hanoin hotu”, no furak liu fali buat neʼebé ita bele imajina. Porezemplu, Ita sente ona ka lae, kuandu Ita harohan ba Jeová, tuirmai Ita-nia laran sente kalma no dame? Ita bele sente hanesan neʼe tanba “Maromak nia dame”. w24.01 p. 20 par. 2; p. 21 par. 4

Ema neʼebé hadomi Maromak hakarak hahiʼi ninia naran ho laran tomak. Liurai David komprende katak bainhira ita hahiʼi Jeová nia naran, neʼe hanesan ita fó hahiʼi ba Jeová nia reputasaun, ninia hahalok furak sira, no buat kmanek oioin neʼebé nia halo. David hakarak atu halo santu no hahiʼi ninia Aman nia naran. Nia hakarak halo nuneʼe “ho laran tomak”. Hanesan neʼe mós ho ema Levi, sira dirije povu atu fó hahiʼi ba Jeová. Ho haraik an, sira rekoñese katak sira-nia liafuan la toʼo atu bele hahiʼi Jeová nia naran neʼebé santu iha dalan neʼebé kompletu. (Neem 9:5) Ita bele fiar katak Jeová sente kontente bainhira sira fó hahiʼi ba nia ho laran tomak. w24.02 p. 9 par. 6

Jeová sei la hanoin katak Ita falla bainhira Ita la kumpre planu neʼebé Ita la iha kbiit atu halo. (2 Kor 8:12) Se buat ruma hanetik Ita kumpre Ita-nia planu, koko atu aprende husi ida-neʼe. Hanoin-hetan buat neʼebé Ita kumpre ona. Bíblia hatete katak “Maromak nunka hatudu hahalok aat hodi haluha imi-nia serbisu”. (Ebr 6:10) Entaun ita mós labele haluha buat neʼebé Ita kumpre ona, hanesan haburas relasaun diʼak ho Jeová, haklaken kona-ba nia ka hetan batizmu. Hanesan Ita laʼo ba oin ona no kumpre ona Ita-nia planu uluk nian, Ita mós bele kontinua hakaʼas an atu kumpre Ita-nia planu agora nian. Ho Jeová nia ajuda, Ita bele duni kumpre Ita-nia planu. Bainhira Ita kontinua hakaʼas an atu kumpre Ita-nia planu espirituál, keta haluha atu haree oinsá Jeová ajuda no haraik bensaun ba Ita. (2 Kor 4:7) Se Ita la rende an, Ita sei hetan bensaun barak liután.—Gal 6:9. w23.05 p. 31 par. 16-18

Jeová hakarak tebes atu hatudu ba ninia povu katak nia hadomi no kontente ho sira. Bíblia fó sai kona-ba akontesimentu rua bainhira Jeová koʼalia ba Jesus katak nia hadomi Jesus no Jesus halo ninia laran kontente. (Mt 3:17; 17:5) Ita sei agradese tebes se Jeová hatete mai ita katak nia kontente ho ita. Klaru, Jeová la koʼalia mai ita husi lalehan, maibé nia koʼalia mai ita liuhusi Bíblia. Ita bele hatene Jeová kontente ho ita bainhira ita lee Jesus nia liafuan iha Evanjellu sira. Jesus haleno ninia Aman nia hahalok iha dalan neʼebé perfeitu. Tan neʼe bainhira ita lee Jesus nia liafuan katak nia kontente ho ninia dixípulu sira neʼebé la perfeitu, ita mós bele imajina katak Jeová hatete liafuan sira-neʼe ba ita. (João 15:​9, 15) Bainhira ita hasoru susar, neʼe la dehan katak Maromak la kontente ona ho ita. Maibé, neʼe fó oportunidade mai ita atu hatudu katak ita hadomi tebes Maromak no tau fiar ba nia.—Tgo 1:12. w24.03 p. 28 par. 10-11