Dezembru

Jeová iha kbiit atu fó moris-hiʼas ba ema ka lae? Sin. Nia mak “Ida neʼebé Kbiit Boot Liu Hotu”. (Apok 1:8) Tan neʼe nia iha duni kbiit atu halakon inimigu naran deʼit, inklui mate. (1 Kor 15:26) Razaun seluk tanbasá ita hatene katak Maromak iha kbiit atu fó moris-hiʼas ba ema mate mak tanba ninia memória la iha rohan. Nia bolu fitun ida-idak ho sira-nia naran. (Isa 40:26) No mós nia hanoin-hetan ema neʼebé mate ona. (Job 14:13; Lc 20:38) Fasil deʼit ba nia atu hanoin-hetan ema nia oin no toman, inklui sira-nia jenétiku, esperiénsia moris, no sira-nia memória. Entaun ita bele tau fiar ba Jeová nia promesa kona-ba moris-hiʼas iha futuru tanba ita hatene katak nia hakarak no iha kbiit atu kumpre promesa neʼe. Hanoin kona-ba razaun seluk atu fiar Maromak nia promesa kona-ba moris-hiʼas: Jeová fó ona moris-hiʼas ba ema balu. Iha Bíblia nia tempu, nia fó kbiit ba ema balu, inklui Jesus atu fó moris-hiʼas ba ema mate. w23.04 p. 9 par. 7-9

Se ita koʼalia ho laran-maus no matenek, ema sei kontente atu rona no hakarak atu kontinua koʼalia ho ita. Maibé se ema hakarak debate ka hatún ita-nia fiar, diʼak atu la kontinua koʼalia ho nia. (Prov 26:4) Maski ema balu lakohi rona, maibé karik iha ema barak neʼebé mós hakarak atu rona ba ita. Ita sei hetan benefísiu barak bainhira ita aprende atu hatudu laran-maus. Ita bele halo orasaun ba Jeová hodi husu ajuda atu bele hatán ho laran-maus bainhira ema kritika ka husu pergunta neʼebé susar. Hanoin-hetan, bainhira ita hatán ho laran-maus, neʼe bele ajuda atu halo situasaun sai kalma. No dalan neʼebé ita hatán ho laran-maus no respeitu bele book ema atu troka sira-nia hanoin kona-ba ita no kona-ba lia-loos husi Bíblia. Tan neʼe, sai “prontu nafatin atu defende” ita-nia fiar “ho laran-maus no respeitu kleʼan”. (1 Ped 3:15) Sin, mai ita hotu hatudu laran-maus! w23.09 p. 19 par. 18-19

Iha dalan haat neʼebé ita bele hatudu pasiénsia. Primeiru, ema neʼebé pasiénsia la hirus lalais. Nia sei kalma nafatin no la selu aat fali bainhira ema provoka ka iha situasaun estrese. (Éx 34:6) Segundu, ema neʼebé pasiénsia sei hein ho kalma. Bainhira hein kleur ba buat ruma, ema neʼebé pasiénsia sei hakaʼas an atu sente kalma nafatin no la estrese. (Ecle 7:8) Terseiru, ema neʼebé pasiénsia la ansi atu halo buat ruma. Se ita mak ema neʼebé pasiénsia, bainhira iha knaar importante atu halo, ita sei la ansi atu komesa no halo buat hotu lalais. Ita sei uza tempu atu halo planu kona-ba saida mak ita atu halo. Hodi halo nuneʼe, ita sei halo didiʼak ita-nia knaar. Haat, ema neʼebé pasiénsia hakaʼas an atu tahan susar hodi la muramura. Nia sei hakaʼas an atu iha hanoin pozitivu maski hasoru susar. (Kol 1:11) Nuʼudar ema Kristaun, ita presiza hatudu pasiénsia iha dalan haat neʼe. w23.08 p. 20-21 par. 3-6

Jeová buka-hatene ema nia laran. Neʼe katak nia haree ita mak ema oinsá loos, laʼós deʼit buat neʼebé matan bele haree. Tan neʼe importante atu proteje ita-nia laran. Nia sei hadomi ita se ita kontinua hanoin kona-ba ninia konsellu neʼebé bele ajuda ita atu hetan moris ba nafatin. (João 4:14) Se ita halo nuneʼe, neʼe sei ajuda ita hasees an husi Satanás nia lia-bosok no ema nia morál neʼebé aat. (1 João 5:​18, 19) Bainhira ita hakbesik liután ba Jeová, ita sei hadomi no respeitu liután nia. Tanba lakohi hakanek ita-nia Aman nia laran, ita sei nunka hanoin atu halo sala. Irmán Marta husi rai-Kroásia hetan tentasaun atu halo sala seksuál, nia hatete: “Susar ba haʼu atu iha hanoin neʼebé loos no luta hasoru hakarak atu halo sala. Maibé hamtaʼuk ba Jeová proteje duni haʼu.” Oinsá hamtaʼuk ba Maromak ajuda Marta? Nia hatete katak nia hanoin kleʼan kona-ba konsekuénsia husi desizaun neʼebé sala. Ita mós bele halo nuneʼe. w23.06 p. 20-21 par. 3-4

Jesus hatene katak Jeová nia hakarak mak atu halo santu Ninia naran no prova katak Satanás bosok kona-ba Nia. Tan neʼe ita-nia Naʼi hanorin ninia dixípulu sira atu halo orasaun: “Ami Aman iha lalehan, halo Ita-nia naran sai santu.” (Mt 6:9) Jesus komprende katak neʼe mak asuntu importante liu ba kriasaun hotu. La iha kriatura ida mak halo santu Jeová nia naran liu fali buat neʼebé Jesus halo. Maibé bainhira ema kaer Jesus, ninia inimigu sira duun katak nia la respeitu ninia Aman. Jesus sente duni katak hafoʼer ninia Aman nia naran neʼebé santu mak sala neʼebé aat tebes. Nia laran-susar tebes tanba ema sei duun no tesi-lia ba nia kona-ba sala neʼe. Karik neʼe mak razaun ida tanbasá Jesus “sente laran-susar tebetebes” iha oras neʼebé ema besik atu kaer nia.—Lc 22:​41-44. w24.02 p. 11 par. 11

Iha ita-nia halai-taru ba moris, ita presiza hadomi Jeová no Jesus liu fali ita-nia família. (Mt 10:37) Maibé neʼe la dehan katak ita la presiza tau matan ba ita-nia família. Atu halo kontente Maromak no Kristu, ita presiza kumpre ita-nia responsabilidade iha família laran. (1 Tim 5:​4, 8) Bainhira ita halo ida-neʼe, neʼe sei halo ita kontente. Jeová hatene katak família sira sei moris kontente bainhira feen-laʼen hadomi no respeitu malu, inan-aman hadomi no treinu sira-nia oan, no oan sira halo tuir inan-aman. (Éf 5:33; 6:​1, 4) Maski Ita mak laʼen, feen, ka oan ida, Ita presiza aplika Bíblia nia matadalan. Ita labele halo tuir deʼit Ita-nia hakarak rasik, Ita-nia kultura, ka buat neʼebé matenek-naʼin sira fó sai. Aproveita didiʼak ita-nia publikasaun sira neʼebé fó sai sujestaun kona-ba oinsá ita bele aplika Bíblia nia prinsípiu. w23.08 p. 28 par. 6-7

Irmán ida presiza haburas abilidade oioin neʼebé bele ajuda nia iha ninia moris loroloron. Abilidade balu neʼebé feto ida haburas bainhira sei kiʼik sei ajuda nia durante ninia moris tomak. Porezemplu, aprende atu lee no hakerek ho didiʼak. Iha kultura balu, ema hanoin katak lee no hakerek mak la importante ba feto sira atu aprende. Maski nuneʼe, importante ba ema Kristaun hotu atu aprende lee no hakerek. (1 Tim 4:13) Tan neʼe, keta husik buat ida hanetik Ita atu aprende lee no hakerek ho didiʼak. Ita sei hetan benefísiu saida? Karik neʼe sei ajuda Ita atu hetan serbisu no la lakon ida-neʼe. No mós fasil liu ba Ita atu estuda Bíblia no hanorin ema seluk kona-ba Bíblia. Importante liu mak Ita sei hakbesik liután ba Jeová nuʼudar Ita lee ninia Liafuan no medita.—1 Tim 4:15. w23.12 p. 20 par. 10-11

Husu Jeová nia ajuda atu bele tahan hasoru tentasaun. Nuʼudar ema neʼebé la perfeitu, ita tenke kontra hasoru beibeik tentasaun atu halo buat neʼebé sala. Satanás koko buat oioin atu halo susar ba ita atu tahan. Dalan ida mak nia koko hafoʼer ita-nia hanoin liuhusi atividade halimar nian neʼebé la morál. Ida-neʼe bele halo ita-nia neon nakonu ho hanoin la morál neʼebé bele halo ita la moos iha Jeová nia matan no bele book ita atu halo sala sériu. (Mc 7:​21-23; Tgo 1:​14, 15) Ita presiza Jeová nia ajuda se ita hakarak atu manán hasoru tentasaun atu halo buat neʼebé sala. Jesus mós temi kona-ba neʼe iha ninia orasaun: “Keta husik ami monu ba tentasaun, maibé salva ami husi aat-naʼin.” (Mt 6:13) Jeová hakarak atu ajuda ita, maibé ita presiza husu ninia ajuda. Ita mós presiza halo buat ruma tuir ita-nia orasaun. w23.05 p. 6-7 par. 15-17

Bainhira feen-laʼen hafolin sira-nia relasaun ho Aman iha lalehan, sira sei prontu atu aplika ninia konsellu no neʼe bele ajuda sira atu rezolve no hasees an husi problema neʼebé bele halo sira-nia domin sai malirin. Ema espirituál mós hakaʼas an atu banati-tuir Jeová nia hahalok, hanesan laran-diʼak, pasiénsia no prontu atu fó perdua. (Éf 4:32–5:1) Bainhira feen-laʼen halo ida-neʼe, sira-nia domin ba malu sei sai boot liután. Irmán Lena neʼebé kaben ona ba tinan 25 hatete: “Fasil liu atu hadomi no respeitu ema neʼebé espirituál.” Hanoin toʼok ezemplu ida husi Bíblia. Bainhira Jeová presiza hili feen-laʼen ida atu sai Mesias nia inan-aman, nia hili José no Maria duké feen-laʼen seluk neʼebé mós mai husi David nia liña jerasaun. Tanbasá? Tanba José no Maria iha relasaun diʼak ho Jeová, no Jeová hatene katak sira sei tau uluk nia iha sira-nia moris. w23.05 p. 20-21 par. 3-4

Jesus mak Ulun ba kongregasaun no nia perfeitu, maibé sira neʼebé nia uza iha rai atu dirije ninia organizasaun mak la perfeitu. Dala ruma susar atu halo tuir sira, liuliu se sira husu ita atu halo buat neʼebé ita la gosta. Apóstolu Pedro mós dada an atu halo tuir. Kuandu anju ida husu nia atu han animál neʼebé la moos tuir Moisés nia Ukun-Fuan, Pedro lakohi halo tuir, laʼós dala ida deʼit, maibé dala tolu! (Após 10:​9-16) Tanbasá? Tanba ba nia matadalan neʼe la lójiku. Iha situasaun seluk apóstolu Paulo halo tuir katuas sira iha Jeruzalein neʼebé husu nia atu lori mane naʼin-haat ba templu no hamoos ninia an rasik hodi hatudu katak nia nafatin halo tuir Ukun-Fuan. Paulo hatene katak ema Kristaun la presiza tan halo tuir Moisés nia Ukun-Fuan no nia la halo sala ida. Maski nuneʼe, “iha loron tuirmai Paulo lori mane sira-neʼe no hamoos nia an rasik tuir ukun-fuan hamutuk ho sira”. (Após 21:​23, 24, 26) Tanba Paulo halo tuir, neʼe lori unidade ba sira.—Rom 14:​19, 21. w23.10 p. 10 par. 15-16

Ema neʼebé hakarak habelun ho Jeová tenke hamtaʼuk nia. Tan neʼe hamtaʼuk mós hahalok neʼebé importante. Maski ita serbí Jeová ba tempu kleur ona, maibé ita hotu tenke nafatin hamtaʼuk ba nia. Entaun hamtaʼuk ba Maromak katak sá? Hamtaʼuk ba Jeová katak ita hadomi nia, no taʼuk atu halo buat neʼebé bele estraga ita-nia relasaun diʼak ho nia. Jesus sente hanesan neʼe kona-ba ninia Aman. (Ebr 5:7) Duké sente taʼuk, Jesus haksolok hodi hamtaʼuk Jeová. (Isa 11:​2, 3) Nia hadomi tebes Jeová no hakarak halo tuir nia. (João 14:​21, 31) Hanesan Jesus, ita respeitu no hamtaʼuk ba Jeová tanba nia iha domin, matenek, justisa no kbiit neʼebé boot. Ita mós hatene katak Jeová hadomi ita no nia interese atu haree oinsá ita halo tuir ninia matadalan sira. Se ita la halo tuir Jeová, nia sei sente laran-kanek, maibé se ita halo tuir nia, ita sei halo nia laran-kontente.—Sal 78:41; Prov 27:11. w23.06 p. 14 par. 1-2; p. 15 par. 5

Bainhira Liurai Uzias hetan tiha kbiit boot, nia haluha katak Jeová mak Hun ba ninia kbiit no susesu. Saida mak ita aprende? Diʼak atu hanoin-hetan katak bensaun no priviléjiu neʼebé ita simu mak mai husi Jeová. Duké gaba an kona-ba buat neʼebé ita kumpre ona, diʼak atu fó glória ba Jeová. (1 Kor 4:7) Ita presiza hatudu haraik an no rekoñese katak ita la perfeitu no presiza konsellu. Irmaun ida neʼebé maizumenus tinan 60 dehan: “Haʼu aprende atu la sai laran-kraik kuandu ema korrije haʼu. Bainhira ema korrije haʼu tanba sala kiʼik neʼebé haʼu halo, haʼu koko atu halo mudansa no kontinua serbí Jeová ho haʼu-nia laran tomak.” Bainhira ita hamtaʼuk Jeová no hatudu haraik an, ita bele moris kontente.—Prov 22:4. w23.09 p. 10 par. 10-11

Ema Kristaun iha tempu uluk presiza tahan susar oioin. Sira hasoru susar neʼebé baibain ema seluk mós hasoru, maibé sira mós tenke tahan susar seluk tan. Sira barak hetan terus husi ulun-naʼin relijiaun Judeu nian, ema-boot Roma nian, no mós husi sira-nia família rasik. (Mt 10:21) No sira mós presiza hakaʼas an atu la hetan influénsia husi apóstata sira-nia hanorin falsu neʼebé bele haketak kongregasaun. (Após 20:​29, 30) Maibé ema Kristaun sira-neʼe tahan ho laran-metin. (Apok 2:3) Oinsá? Sira hanoin kleʼan kona-ba fiar-naʼin sira-nia ezemplu hanesan Job. (Tgo 5:​10, 11) Sira halo orasaun atu hetan kbiit. (Após 4:​29-31) No sira kontinua hanoin-hetan katak Jeová sei fó kolen ba sira se sira tahan ho laran-metin. (Após 5:41) Ita mós bele tahan susar sira se ita estuda no medita beibeik kona-ba fiar-naʼin sira-nia ezemplu husi Bíblia no ita-nia publikasaun sira. w23.07 p. 3 par. 5-6

Jeová no Jesus sei nunka husik hela ita. Depois apóstolu Pedro nega tiha Jesus, Pedro presiza halo desizaun importante ida. Nia sei kontinua atu laʼo tuir Jesus ka lae? Jesus harohan ba Jeová atu Pedro la lakon fiar. Jesus fó-hatene Pedro kona-ba ninia orasaun, no katak Pedro sei hametin maluk fiar-naʼin sira. (Lc 22:​31, 32) Bainhira Pedro hanoin fali Jesus nia liafuan sira-neʼe, neʼe hametin duni nia! Bainhira ita presiza halo desizaun importante ruma, Jeová bele uza katuas sira atu fó matadalan mai ita hodi bele hametin ita-nia fiar. (Éf 4:​8, 11) Hanesan Jeová tau matan ba Pedro no apóstolu sira seluk nia presiza, nia mós sei tau matan ba ita-nia presiza bainhira ita tau uluk serbisu haklaken iha ita-nia moris. w23.09 p. 24-25 par. 14-15

Jeová haree hahalok diʼak neʼebé ita hatudu ba ema seluk maski neʼe kiʼik deʼit. Nia haree ida-neʼe nuʼudar sakrifísiu neʼebé folin-boot no nuʼudar debe neʼebé nia presiza selu fali. Se uluk Ita serbí nuʼudar atan ba kongregasaun ka katuas ida, Jeová hanoin-hetan serbisu neʼebé Ita halo iha tempu uluk no mós Ita-nia domin neʼebé book Ita atu halo serbisu neʼe. (1 Kor 15:58) Nia mós haree oinsá Ita kontinua hatudu domin. Jeová hakarak ita hotu atu haburas domin ba nia no ba ema seluk. Ita bele haburas domin ba Jeová liuhusi lee no medita ninia Liafuan, no mós halo orasaun beibeik. Ita bele haburas domin ba irmaun-irmán sira liuhusi fó ajuda ba sira. Bainhira ita-nia domin sai boot liután, ita sei hakbesik liután ba Jeová no ba irmaun-irmán sira. No ita-nia relasaun belun sei dura ba nafatin! w23.07 p. 10 par. 11; p. 11 par. 13; p. 13 par. 18

Ema Kristaun ida-idak tenke deside rasik oinsá atu tau matan ba sira-nia saúde. Bainhira ema Kristaun hili tratamentu médiku, sira presiza halo tuir Bíblia nia ukun-fuan kona-ba hasees an husi raan no espiritizmu. (Após 15:20; Gal 5:​19, 20) Maibé kona-ba tratamentu seluk, sira bele deside rasik. Karik ita rasik sente katak tratamentu balu mak diʼak ka la diʼak, maibé ita presiza respeitu irmaun-irmán sira-nia direitu atu halo desizaun rasik kona-ba tratamentu médiku. Tan neʼe ita tenke hanoin-hetan pontu sira tuirmai: (1) Só Maromak nia Ukun deʼit mak bele kura ema nia moras ba nafatin. (Isa 33:24) (2) Ema Kristaun ida-idak tenke “fiar metin” kona-ba buat neʼebé diʼak ba nia. (Rom 14:5) (3) Ita labele tesi-lia ba ema seluk ka halo sira sidi. (Rom 14:13) (4) Ema Kristaun hatudu domin no komprende katak unidade iha kongregasaun mak importante liu fali sira-nia hanoin rasik.—Rom 14:​15, 19, 20. w23.07 p. 24 par. 15

Ita hafolin Ita-nia relasaun ho Jeová ka lae? Klaru katak Ita hafolin! Husi uluk kedas ema barak mós sente buat neʼebé hanesan ho Ita. (Sal 104:​33, 34) Ema barak halo sakrifísiu oioin atu adora Jeová. Neʼe mak buat neʼebé ema Nazireu, ka “ema neʼebé dedika ona”, halo iha Izraél antigu. Ema Nazireu mak ema Izraél neʼebé hatudu laran-manas no halo sakrifísiu oioin atu serbí Jeová iha dalan espesiál. Moisés nia Ukun-Fuan fó lisensa ba mane no feto Izraél atu halo juramentu espesiál ba Jeová hodi hili moris nuʼudar ema Nazireu ba tempu balu. (Núm 6:​1, 2) Bainhira ema Izraél ida halo juramentu neʼe, nia tenke halo tuir matadalan neʼebé ema Izraél seluk la halo tuir. Entaun, tanbasá mak ema Izraél ida hili atu halo juramentu neʼe? Karik tanba nia hadomi tebes Jeová no hafolin bensaun hotu neʼebé nia simu husi Jeová.—Deut 6:5; 16:17. w24.02 p. 14 par. 1-2

Iha Bíblia, liafuan “laran-metin”, ka “domin neʼebé laran-metin”, fó ideia kona-ba domin neʼebé Maromak hatudu ba ninia atan sira, no mós domin neʼebé Maromak nia atan sira hatudu ba malu. (2 Sam 9:​6, 7) Ita-nia laran-metin bele sai buras husi tempu ba tempu. Haree oinsá Daniel nia laran-metin bele sai buras. Daniel nia laran-metin ba Jeová hetan koko durante ninia moris tomak. Maibé koko ida neʼebé boot liu mak bainhira nia tinan 90 liu. Sira neʼebé serbí iha liurai nia palásiu la gosta Daniel no la hatudu respeitu ba Daniel nia Maromak. Tan neʼe sira halo planu atu oho Daniel. Sira husu liurai atu halo lei foun ida neʼebé sei hatudu se Daniel laran-metin ba Maromak ka ba liurai. Daniel bele prova ninia laran-metin ba liurai hodi la halo orasaun ba Jeová ba loron 30. Daniel hili atu laran-metin ba Jeová.—Dan 6:​12-15, 20-22. w23.08 p. 5 par. 10-12

Jeová hakarak ita atu kontinua hatudu domin ba irmaun-irmán sira. Se ema ruma la hatudu hahalok Kristaun, diʼak atu hanoin pozitivu katak nia hakanek ita-nia laran la ho neon no hakaʼas an ona atu halo tuir Bíblia nia prinsípiu. (Prov 12:18) Maromak hadomi ninia atan sira neʼebé laran-metin maski sira la perfeitu. Maski ita halo sala, Jeová kontinua hakarak sai ita-nia belun no la rai hirus. (Sal 103:9) Importante tebes ba ita atu banati-tuir ita-nia Aman neʼebé prontu atu fó perdua! (Éf 4:32–5:1) Hanoin-hetan, nuʼudar mundu nia rohan besik daudaun, ita presiza kontinua iha relasaun diʼak ho irmaun-irmán sira. Ita hatene katak ema sei fó-terus makaʼas liután ba ita. Karik ema sei hatama ita ba komarka tanba ita-nia fiar. Iha situasaun hanesan neʼe, ita presiza tebes irmaun-irmán sira.—Prov 17:17. w24.03 p. 15-16 par. 6-7

Bíblia konta kona-ba joven sira neʼebé hakbesik ba Jeová, simu ninia bensaun, no moris kontente. Ezemplu ida mak kona-ba David. Bainhira joven, nia hili atu adora Jeová no nia sai liurai neʼebé laran-metin. (1 Reis 3:6; 9:​4, 5; 14:8) Ita bele hetan benefísiu no anima hodi estuda kona-ba David nia moris no buat neʼebé nia halo atu serbí Maromak. Ita mós bele aprende husi Marcos no Timóteo nia ezemplu. Sira serbí Jeová husi tempu joven kedas no kontinua hatudu laran-metin ba nia. Sira-nia desizaun neʼe halo Jeová kontente. Dalan neʼebé Ita halaʼo Ita-nia moris agora sei fó impaktu ba Ita-nia moris iha futuru. Se Ita tau fiar ba Jeová no la sadere ba Ita-nia matenek rasik, nia sei ajuda Ita halo desizaun neʼebé matenek. Ita bele moris ho kontente. Hanoin-hetan, Jeová hafolin buat neʼebé Ita halo ba nia. Dalan diʼak liu atu uza Ita-nia moris mak hodi serbí Ita-nia Aman iha lalehan. w23.09 p. 13 par. 18-19

Apóstolu Paulo hatene katak irmaun-irmán sira la perfeitu. Porezemplu, ema balu iha kongregasaun la fiar katak nia sai ona dixípulu ida. (Após 9:26) Ema balu mós koʼalia aat kona-ba nia atu hafoʼer ninia naran. (2 Kor 10:10) Tuirmai, Paulo haree irmaun ida neʼebé iha responsabilidade halo desizaun sala neʼebé karik halo ema balu sidi. (Gal 2:​11, 12) No Paulo nia belun ida naran Marcos hakanek ninia laran. (Após 15:​37, 38) Karik situasaun sira-neʼe bele hanetik Paulo atu la ransu tan ho irmaun-irmán sira. Maibé nia nafatin iha hanoin pozitivu kona-ba irmaun-irmán sira no kontinua serbí Jeová ho laran-metin. Saida mak ajuda Paulo? Paulo hadomi irmaun-irmán sira. Ninia domin book nia atu fokus ba sira-nia hahalok diʼak duké sira-nia fraku. Tanba Paulo hadomi ema, neʼe mós ajuda nia atu fó perdua ba sira, hanesan hakerek iha eskritura ba ohin. w24.03 p. 15 par. 4-5

Bíblia fó sai istória barak neʼebé hatudu katak hahalok laran-maus mak folin-boot. Ezemplu ida mak kona-ba Isaac. Bainhira nia hela iha rai-Filístia iha área Gerar, ema Filístia sai laran-moras ba nia no taka tiha bee-posu neʼebé ninia aman nia atan sira keʼe. Duké hirus, nia no ninia família muda husi fatin neʼe no keʼe fali bee-posu seluk. (Gén 26:​12-18) Maibé ema Filístia dehan katak bee-posu sira-neʼe mós sira-nian. Maski nuneʼe, Isaac nafatin buka dame. (Gén 26:​19-25) Saida mak ajuda nia atu nafatin laran-maus maski ema seluk hakarak atu provoka nia? Nia aprende husi ninia inan-aman nia ezemplu, Abraão neʼebé toman atu buka dame, no Sara neʼebé “kalma no laran-maus”.—1 Ped 3:​4-6; Gén 21:​22-34. w23.09 p. 15 par. 4

Jeová fó ninia Oan-Mane mesak hodi mai mundu atu hanorin ema kona-ba ninia Ukun no fó ninia Oan-Mane nia moris atu salva ita husi sala no mate. Tuirmai, Jesus hetan moris-hiʼas no saʼe ba lalehan atu ukun nuʼudar Liurai iha Maromak nia Ukun. Mensajen importante husi Bíblia mak kona-ba Jeová nia naran sei sai santu nuʼudar nia kumpre ninia hakarak ba mundu liuhusi ninia Ukun no Kristu nuʼudar Liurai. Jeová nia hakarak la troka. Nia garantia katak nia sei kumpre ida-neʼe. (Isa 46:​10, nota; Ebr 6:​17, 18) Iha tempu neʼebá, mundu tomak sei sai paraízu, no Adão ho Eva nia bei-oan sira neʼebé perfeitu sei “moris ba nafatin”. (Sal 22:26) Liután neʼe, Jeová sei kumpre buat seluk tan. Nia sei lori unidade ba kriatura hotu iha lalehan no rai. Tuirmai, kriatura hotu sei hakruʼuk ba nia nuʼudar Ukun-Naʼin. (Éf 1:​8-11) Furak tebes hodi haree dalan neʼebé Jeová kumpre ninia hakarak. w23.10 p. 20 par. 7-8

Lakleur depois ema Judeu neʼebé hela iha Babilónia toʼo iha Jeruzalein, sira mós hasoru problema ekonomia, problema polítiku, no ema kontra. Neʼe halo sira balu la fokus atu harii fali Jeová nia templu. Tan neʼe, Jeová haruka profeta Ageu no Zacarias atu ajuda povu hetan fali laran-manas, neʼebé anima povu. (Ageu 1:1; Zac 1:1) Maibé maizumenus liutiha tinan 50, ema Judeu presiza hetan fali anima. Tan neʼe, Ezras, eskriba ida neʼebé hatene didiʼak Moisés nia Ukun-Fuan, mai toʼo Jeruzalein hodi anima Maromak nia povu atu tau uluk adorasaun ba Maromak. (Ezras 7:​1, 6) Ageu no Zacarias nia profesia ajuda Maromak nia povu iha tempu uluk atu kontinua tau fiar ba Jeová durante tempu susar, neʼe mós bele ajuda ita atu kontinua fiar katak Jeová sei ajuda ita bainhira hasoru susar.—Prov 22:19. w23.11 p. 14-15 par. 2-3

Oinsá mak ita hatudu domin ba irmaun-irmán sira? Dalan ida mak hodi fó kmaan ba sira. Se ita hanoin ema seluk, neʼe sei book ita atu “kontinua fó kmaan ba malu”. (1 Tes 5:​11, nota) Oinsá ita bele kontinua hametin ita-nia domin ba malu? Hodi fó perdua ba irmaun-irmán sira maski neʼe susar. Tanbasá importante tebes atu hatudu domin ohin loron? Haree toʼok razaun neʼebé Pedro hatete: “Maibé buat hotu nia rohan besik daudaun ona. Tan neʼe, . . . imi tenke hadomi malu tebetebes.” (1 Ped 4:​7, 8) Tanba ita moris iha loron ikus sira, saida mak sei akontese? Jesus hatete ba ninia dixípulu sira: “Nasaun sira hotu sei odi imi tanba haʼu-nia naran.” (Mt 24:9) Atu tahan hasoru ida-neʼe, ita presiza mantein unidade. Se ita halo nuneʼe, Satanás sei labele haketak ita tanba domin mak kesi ita hamutuk.—Flp 2:​1, 2. w23.11 p. 13 par. 18-19

Lia-loos neʼebé fó sai iha Bíblia iha kbiit boot. Hodi hanorin ema seluk kona-ba Jeová no ninia hahalok sira, ita sei hetan rezultadu neʼebé furak. Ema sei la fiar tan Satanás nia lia-bosok no bele haree ita-nia Aman nia hahalok furak oioin. Sira admira tebes ho ninia forsa neʼebé boot. (Isa 40:26) Sira aprende atu tau fiar ba Maromak tanba ninia justisa neʼebé perfeitu. (Deut 32:4) Sira aprende buat barak husi ninia matenek. (Isa 55:9; Rom 11:33) Sira hetan kmaan hodi hatene katak nia mak domin. (1 João 4:8) No nuʼudar sira hakbesik ba Jeová, sira-nia esperansa atu moris ba nafatin nuʼudar ninia oan sai metin liután. Ita iha priviléjiu boot atu ajuda ema seluk hakbesik ba Jeová! Bainhira ita halo nuneʼe, Jeová sei haree ita nuʼudar ninia “maluk serbisu-naʼin”.—1 Kor 3:5. w24.02 p. 12 par. 15

Se Ita mak estudante Bíblia ida ka boot iha lia-loos, Ita hanoin atu hetan batizmu ka lae? Neʼe mak planu neʼebé diʼak tebes! Maibé antes hetan batizmu, Ita presiza dedika an ba Jeová. Oinsá atu dedika an ba Jeová? Ita promete ba nia liuhusi orasaun katak Ita sei adora deʼit nia no tau uluk ninia hakarak iha Ita-nia moris. Ita promete ba Jeová katak Ita sei kontinua hadomi nia ‘ho Ita-nia laran tomak, ho Ita-nia moris tomak, ho Ita-nia neon tomak no ho Ita-nia kbiit tomak’. (Mc 12:30) Kuandu Ita dedika an ba Jeová, neʼe entre Ita ho Jeová deʼit. Maibé kuandu Ita hetan batizmu, neʼe iha ema barak nia oin no hatudu ba sira katak Ita dedika an ona ba Jeová. Ita-nia dedikasaun mak juramentu neʼebé sériu. Jeová hakarak Ita atu moris tuir Ita-nia dedikasaun, no Ita mós hakarak kumpre juramentu neʼe.—Ecle 5:4. w24.03 p. 2 par. 2; p. 3 par. 5

Kaben-naʼin hotu sei hasoru susar. Bíblia koʼalia ho klaru katak ema neʼebé kaben sei hasoru “susar iha sira-nia moris”. (1 Kor 7:28) Tanbasá? Tanba feen no laʼen mak la perfeitu, iha hahalok neʼebé la hanesan, no gosta ka la gosta buat neʼebé la hanesan. Karik laʼen no feen mai husi kultura no situasaun moris neʼebé la hanesan. Karik depois kaben tiha, feen ka laʼen foin nota kona-ba ninia pár nia hahalok neʼebé antes neʼe nia la hatene. Buat sira-neʼe bele hamosu problema iha moris kaben nian. Duké rekoñese sira ida-idak nia fraku no rezolve problema hamutuk, sira fó-sala ba malu. Karik kaben-naʼin balu hanoin katak solusaun diʼak mak atu haketak malu ka soe-malu. Maibé neʼe sei rezolve sira-nia problema ka lae? Lae. Jeová hakarak feen no laʼen atu kontinua moris hamutuk maski sira naʼin-rua sente susar atu hela hamutuk ho dame. w24.03 p. 16 par. 8; p. 17 par. 11

Depois Ita dedika an no hetan tiha batizmu, Ita-nia esperansa atu moris ba nafatin iha mundu paraízu mós kontinua sai metin nuʼudar Ita kontinua aprende no sai maduru liután. (Ebr 5:13–6:1) Karik Ita rasik mós sente ona buat neʼebé temi iha Roma 5:​2-4. Ita hasoru susar oioin, maibé Ita tahan ida-neʼe no haree oinsá Jeová simu Ita. Tanba Ita hatene Jeová hadomi Ita, Ita iha razaun liután atu fiar katak ninia promesa sei sai loos. Ita-nia esperansa sai metin liután se kompara ho uluk. No Ita hafolin liután esperansa neʼe. Neʼe fó impaktu boot ba Ita-nia moris tomak, inklui dalan neʼebé Ita halo desizaun, uza Ita-nia tempu, no mós dalan neʼebé Ita trata Ita-nia família. Apóstolu Paulo temi tan pontu importante seluk kona-ba esperansa neʼebé Ita hetan kuandu Maromak simu ita. Paulo hatete katak Ita-nia esperansa sei sai loos.—Rom 15:13. w23.12 p. 12-13 par. 16-19

Bainhira ita hasoru susar, ita-nia hanoin, sentimentu, no reasaun karik la balansu hanesan baibain. Ita bele deʼit sente katak ita-nia sentimentu troka bá-mai hanesan ró neʼebé laloran baku bá-mai. Oinsá mak Jeová ajuda ita bainhira ita-nia sentimentu troka bá-mai? Nia sei ajuda ita atu iha hanoin neʼebé balansu ka hamriik metin. Bainhira tasi komesa siʼak, ró bele iha perigu laran tanba laloran baku bá-mai. Atu ró bele balansu nafatin, ró barak iha liras husi sorin-sorin iha bee laran. Liras sira-neʼe bele ajuda ró atu la nakdoko demais, no neʼe halo ema iha ró laran sente seguru no hakmatek. Maski nuneʼe, atu liras sira-neʼe bele serbisu ho didiʼak, ró tenke kontinua halai. Hanesan neʼe mós, Jeová sei ajuda ita atu iha balansu se ita kontinua serbí nia ho laran-metin durante tempu susar. w24.01 p. 22 par. 7-8

Bainhira Ita sente taʼuk, husu Ita-nia an: ‘Saida mak Jeová halo ona?’ Medita kona-ba Jeová nia kriasaun. Porezemplu, bainhira ita “haree didiʼak” oinsá Jeová tau matan ba manu no ai-funan sira neʼebé nia kria laʼós tuir ninia ilas, no mós labele adora nia, neʼe sei hametin ita-nia fiar katak nia mós sei tau matan ba ita. (Mt 6:​25-32) Hanoin mós kona-ba saida mak Jeová halo ona ba ninia atan sira. Karik Ita bele estuda kona-ba ema iha Bíblia neʼebé hatudu fiar metin, ka karik Ita bele lee kona-ba Jeová nia atan nia esperiénsia iha tempu modernu. Ita mós bele hanoin kleʼan kona-ba oinsá Jeová tau matan ona ba Ita. Porezemplu, oinsá mak nia dada Ita tama ba lia-loos? (João 6:44) Oinsá mak nia hatán ba Ita-nia orasaun? (1 João 5:14) No oinsá mak Ita hetan benefísiu loroloron husi ninia Oan-Mane nia sakrifísiu?—Éf 1:7; Ebr 4:​14-16. w24.01 p. 3 par. 6; p. 7 par. 17