Novembru

Inan-aman sira bele ajuda oan sira atu prepara komentáriu neʼebé diʼak tuir sira-nia idade. Dala ruma, tópiku neʼebé ita estuda mak sériu hanesan problema iha moris kaben nian ka ema nia morál, maibé karik iha parágrafu ida ka rua neʼebé labarik ida bele fó komentáriu. Inan-aman sira mós bele ajuda sira-nia oan komprende tanbasá irmaun neʼebé dirije estudu sei la hili sira iha tempu ida-idak neʼebé sira hiʼit liman. Bainhira esplika ida-neʼe, neʼe bele ajuda oan sira atu la sente triste kuandu ema seluk mak fó komentáriu duké sira. (1 Tim 6:18) Ita hotu bele prepara komentáriu neʼebé fó hahiʼi ba Jeová no anima maluk fiar-naʼin sira. (Prov 25:11) Maski dala ruma ita bele fó sai ita-nia esperiénsia neʼebé badak, maibé diʼak atu la koʼalia barak liu kona-ba ita-nia an. (Prov 27:2; 2 Kor 10:18) Duké halo nuneʼe, ita hakarak tau fokus ba Jeová, ninia Liafuan no ninia povu.—Apok 4:11. w23.04 p. 24-25 par. 17-18

Domin mak importante atu kontinua matan-moris nafatin no la pániku. (Mt 22:​37-39) Domin ba Maromak ajuda ita atu kontinua haklaken maski neʼe bele lori susar ruma ba ita. (2 Tim 1:​7, 8) Tanba hadomi ema sira neʼebé seidauk serbí Jeová, ita kontinua haklaken ba sira, inklui husi karta no telefone. Ita iha esperansa katak loron ida sira sei halo mudansa no komesa halo buat neʼebé loos. (Eze 18:​27, 28) Ita mós hadomi irmaun-irmán sira. Ita hatudu domin neʼe liuhusi “fó aten-brani ba malu no hametin malu”. (1 Tes 5:11) Hanesan soldadu neʼebé apoia malu durante funu, ita mós fó aten-brani ba malu. Ita lakohi hakanek irmaun-irmán sira ho neon ka selu aat fali ba sira. (1 Tes 5:​13, 15) Ita mós hatudu domin hodi respeitu irmaun sira neʼebé tau matan ba kongregasaun.—1 Tes 5:12. w23.06 p. 10 par. 6; p. 11 par. 10-11

Dalan ida atu hametin ita-nia fiar mak liuhusi medita kona-ba Jesus nia sakrifísiu. Jesus nia sakrifísiu mak garantia katak Maromak nia promesa sira sei sai loos. Bainhira ita hanoin kleʼan kona-ba tanbasá Jeová fó Jesus nuʼudar sakrifísiu no saida mak envolve iha sakrifísiu neʼe, neʼe sei hametin ita-nia fiar katak Maromak nia promesa kona-ba moris ba nafatin iha mundu foun sei sai loos. Tanbasá? Jesus nia sakrifísiu envolve saida deʼit? Jeová haruka ninia Oan-Mane primeiru neʼebé nia hadomi tebes atu husik lalehan hodi moris mai nuʼudar ema perfeitu ida. Bainhira iha mundu, Jesus tahan hasoru susar oioin. Tuirmai nia hetan terus no mate. Jeová selu folin neʼebé boot tebes! Maromak sei la husik ninia Oan-Mane atu hetan terus no mate tanba deʼit atu fó ita moris neʼebé diʼak liu ba tempu badak deʼit. (João 3:16; 1 Ped 1:​18, 19) Jeová selu folin neʼebé boot tebes, tan neʼe nia sei kumpre ninia promesa atu fó moris ba nafatin ba ema iha mundu foun. w23.04 p. 27 par. 8-9

Jeová hakarak duni atu fó moris-hiʼas ba ema neʼebé mate ona ka lae? Sin, nia hakarak duni. Nia dirije ema balu neʼebé hakerek Bíblia atu fó sai ninia promesa kona-ba moris-hiʼas iha futuru. (Isa 26:19; Apok 20:​11-13) Bainhira Jeová fó sai promesa ruma, nia sempre kumpre ida-neʼe. (Jos 23:14) Jeová hakarak duni atu fó moris-hiʼas ba ema neʼebé mate ona. Hanoin toʼok Job nia liafuan. Nia fiar metin katak maski nia mate, Jeová sei hanoin ka hakarak tebes atu haree Job moris fali. (Job 14:​14, 15) Jeová mós hakarak tebes atu halo nuneʼe ba ninia atan hotu neʼebé mate ona. Nia hakarak atu halo sira moris fali ho saúde diʼak no kontente. Oinsá ho ema millaun ba millaun neʼebé mate ona no la iha oportunidade atu aprende lia-loos kona-ba Jeová? Ita-nia Maromak neʼebé domin mós hakarak fó moris-hiʼas ba sira. (Após 24:15) Nia hakarak sira atu iha oportunidade atu sai ninia belun no moris ba nafatin iha rai.—João 3:16. w23.04 p. 9 par. 5-6

Oinsá Ita bele hametin Ita-nia esperansa? Se Ita iha esperansa atu moris ba nafatin iha rai, Ita bele lee husi Bíblia kona-ba Paraízu no hanoin kleʼan kona-ba neʼe. (Isa 25:8; 32:​16-18) Imajina toʼok kona-ba Ita-nia moris iha mundu foun. Se ita kontinua hanoin kona-ba mundu foun, ita-nia problema sira sei “ba tempu uitoan deʼit no kmaan”. (2 Kor 4:17) Esperansa neʼebé Jeová fó ba Ita, sei ajuda Ita tahan hasoru susar sira. Nia fó ona buat neʼebé Ita presiza atu bele simu kbiit husi nia. Tan neʼe, kuandu Ita presiza ajuda atu kumpre knaar ruma, tahan hasoru susar, ka atu kontinua iha ksolok, husu Jeová nia ajuda liuhusi orasaun no buka ninia matadalan liuhusi estuda mesak. Simu anima husi irmaun-irmán sira, no kontinua hanoin kona-ba Ita-nia esperansa ba futuru. Hodi halo nuneʼe, Ita bele hetan ‘forsa ho kbiit hotu tuir Maromak nia kbiit neʼebé furak atu nuneʼe Ita bele tahan buat hotu ho pasiénsia no ksolok’.—Kol 1:11. w23.10 p. 17 par. 19-20

Ita iha razaun barak atu fó agradese ba Jeová liuhusi orasaun. Ita bele fó obrigadu ba nia kona-ba buat diʼak neʼebé ita iha tanba prezente diʼak hotu mai husi nia. (Tgo 1:17) Porezemplu, ita bele fó sai ita-nia agradese ba Jeová kona-ba mundu neʼebé furak no mós kriasaun kmanek sira. Ita bele fó agradese kona-ba ita-nia moris, ita-nia família no mós ita-nia esperansa. No ita hakarak atu fó obrigadu ba Jeová tanba ita bele sai ninia belun. Karik ita presiza hakaʼas an atu hanoin kona-ba razaun neʼebé ita iha atu hatoʼo agradese ba Jeová. Ohin loron, ema barak la hatene atu hatoʼo agradese. No dala barak sira tau fokus deʼit ba sira-nia hakarak, duké hatoʼo agradese ba buat neʼebé sira iha. Se ita la kuidadu, hahalok sira-neʼe bele kona ita, no ita sei komesa husu buat barak iha ita-nia orasaun. Atu ida-neʼe la akontese, ita presiza kontinua haburas no fó sai agradese ba buat hotu neʼebé Jeová halo ona mai ita.—Lc 6:45. w23.05 p. 4 par. 8-9

Nuʼudar Aman domin nian, Jeová lakohi ita atu hasoru susar. (Isa 63:9) Maski nuneʼe, nia la hanetik susar neʼebé ita hasoru neʼebé hanesan mota no ahi neʼebé lakan. (Isa 43:2) Maibé nia promete katak nia sei ajuda ita atu liu susar sira-neʼe. No nia sei la husik ita-nia susar sira estraga ita-nia relasaun ho nia. Jeová mós fó ninia espíritu santu atu ajuda ita tahan. (Lc 11:13; Flp 4:13) Tan neʼe, ita bele iha konfiansa katak nia sempre fó buat neʼebé ita presiza atu bele tahan no laran-metin ba nia. Jeová hakarak ita atu tau fiar ba nia. (Ebr 11:6) Dala ruma, ita bele sente katak susar tebes atu tahan ita-nia problema sira. Karik ita bele sente duvida katak Jeová sei ajuda ita. Maibé Bíblia hatete katak ho Maromak nia kbiit ita bele “saʼe moru aas ida”. (Sal 18:29) Duké sai duvida liután, ita bele halo orasaun ho fiar metin katak Jeová sei hatán ita-nia orasaun.—Tgo 1:​6, 7. w23.11 p. 22 par. 8-9

Neʼe mak esplikasaun kapás kona-ba domin neʼebé loos! Liafuan sira-neʼe hatudu katak feen-laʼen sira bele hatudu domin neʼebé loos ba malu. Feen-laʼen presiza duni hakaʼas an atu hadomi malu toʼo mate. Hanoin toʼok ezemplu neʼe, ahi ida bele kontinua lakan só deʼit se ema ida kontinua tau ai ba ahi neʼe. Se ema ruma la halo ida-neʼe, ikusmai ahi neʼe sei mate. Nuneʼe mós feen-laʼen nia domin bele kontinua metin nafatin só deʼit se sira hametin sira-nia relasaun. Dala ruma, feen-laʼen bele sente katak sira-nia domin malirin ona, liuliu bainhira sira estrese tanba problema ekonomia, saúde, ka susar atu haboot sira-nia oan. Tan neʼe atu halo “ahi husi Jah” lakan nafatin, feen no laʼen tenke hakaʼas an hametin sira ida-idak nia relasaun diʼak ho Jeová. w23.05 p. 20 par. 1-3

Saida mak ita bele halo atu haburas aten-brani? Karik ita-nia inan-aman husu ita atu sai aten-brani. Maski inan-aman mak aten-brani, neʼe la dehan katak ita moris-mai ho aten-brani kedas. Haburas aten-brani mak hanesan aprende buat foun. Dalan ida atu bele aprende lalais mak hodi haree didiʼak ba mestre nia hahalok no halo tuir ninia ezemplu. Nuneʼe mós, ita bele aprende atu sai aten-brani hodi haree didiʼak oinsá ema seluk hatudu hahalok neʼe no halo tuir sira-nia ezemplu. Hanesan Daniel, ita presiza hatene didiʼak Bíblia. Ita tenke iha relasaun besik ho Jeová hodi halo orasaun beibeik ba nia no fó sai ita-nia sentimentu. Ita presiza tau fiar ba Jeová, no fiar metin katak nia apoia ita. Tuirmai bainhira ita-nia fiar hetan koko, ita sei hatudu aten-brani. Baibain ema neʼebé hatudu aten-brani sei simu respeitu husi ema seluk. Sira mós bele book ema neʼebé laran-moos atu serbí Jeová. Klaru katak ita iha razaun diʼak atu haburas aten-brani. w23.08 p. 2 par. 2; p. 4 par. 8-9

Liafuan Gregu “buka-hatene” refere ba dalan neʼebé ema koko osan-mean no osan-mutin atu haree se neʼe tebes ka lae. Entaun ita tenke koko atu haree se buat neʼebé ita rona ka lee mak loos ka lae. Ida neʼe importante liután ba ita atu halo tanba terus boot besik daudaun ona. Duké tau fiar ba buat hotu neʼebé ema seluk hatete, uza ita-nia kbiit atu hanoin hodi kompara buat neʼebé ita lee ka rona ho buat neʼebé Bíblia no Jeová nia organizasaun fó sai. Hodi halo nuneʼe, ita sei la fiar ba lia-bosok ka propaganda husi anju aat sira. (Prov 14:15; 1 Tim 4:1) Nuʼudar grupu, Maromak nia atan sei liu terus boot. Maibé ita ida-idak la hatene saida mak sei akontese aban-bainrua. (Tgo 4:14) Maski ita sei moris liu terus boot ka mate antes tempu neʼe, ita sei hetan moris ba nafatin se ita kontinua laran-metin. Mai ita hotu tau fokus ba ita-nia esperansa furak no kontinua sai prontu ba Jeová nia loron! w23.06 p. 13 par. 15-16

Ita la hatene oinsá Bíblia ninia profesia balu sei sai loos. (Dan 12:​8, 9) Tanba deʼit ita la hatene ho loloos oinsá profesia ruma sei sai loos, neʼe la dehan katak profesia neʼe sei la kumpre duni. Maibé ita bele fiar katak Jeová sei ajuda ita atu komprende ida-neʼe iha tempu neʼebé loos hanesan nia halo ona iha tempu uluk. Iha futuru, sei iha deklarasaun kona-ba “dame no hakmatek”. (1 Tes 5:3) Tuirmai governu sira sei ataka relijiaun falsu no halakon sira. (Apok 17:​16, 17) Sira mós sei ataka Maromak nia povu. (Eze 38:​18, 19) No funu Armagedon sei hahú. (Apok 16:​14, 16) Ita bele fiar metin katak akontesimentu sira-neʼe sei akontese lakleur tan. Antes tempu neʼe, mai ita kontinua hatudu agradese ba ita-nia Aman iha lalehan hodi tau atensaun didiʼak ba Bíblia nia profesia no mós ajuda ema seluk atu halo nuneʼe. w23.08 p. 13 par. 19-20

Bainhira apóstolu Paulo koʼalia kona-ba fiar, esperansa, no domin, nia dehan katak hahalok “ida neʼebé boot liu mak domin”. (1 Kor 13:13) Tanbasá Paulo dehan nuneʼe? Iha futuru, ita la presiza iha fiar ba Maromak nia promesa sira kona-ba mundu foun, ka iha esperansa katak promesa sira-neʼe sei sai loos tanba buat hotu sai loos ona. Maibé ita nafatin presiza hatudu domin ba Jeová no ba ema seluk. Ita-nia domin ba sira sei kontinua sai boot ba beibeik. Ita mós prova katak ita mak ema Kristaun neʼebé loos. Jesus hatete ba ninia apóstolu sira: “Se imi hadomi malu, ema hotu sei hatene katak imi mak haʼu-nia dixípulu.” (João 13:35) Liután neʼe, se ita hadomi malu, neʼe sei ajuda ita atu mantein unidade. Paulo hatete katak “domin mak kesi ita hamutuk iha dalan neʼebé perfeitu”. (Kol 3:14) Apóstolu João hakerek ba irmaun-irmán sira: “Ema neʼebé hadomi Maromak tenke hadomi mós ninia maluk.” (1 João 4:21) Bainhira ita hatudu domin ba malu, ita hatudu katak ita hadomi Maromak. w23.11 p. 8 par. 1, 3

Bíblia kompara ema Kristaun nia moris ho halai-taru. Ema neʼebé halai toʼo rohan mak sei hetan moris rohan-laek. (2 Tim 4:​7, 8) Ita presiza hakaʼas an atu kontinua halai, liuliu tanba ita besik ona rohan. Apóstolu Paulo fó sai buat neʼebé bele ajuda ita atu halai toʼo rohan. Nia anima ita atu “soe tiha buat hotu neʼebé hatodan ita . . . , no mai ita tahan hodi halai toʼo rohan iha halai-taru neʼebé iha ita-nia oin”. Paulo la dehan katak la iha todan ida neʼebé ema Kristaun presiza lori. Maibé ninia liafuan signifika katak ita presiza husik tiha todan sira neʼebé ita la presiza. Todan sira-neʼe bele hanetik ita atu halai ka halo ita sente kole. Atu bele halai toʼo rohan, ita presiza buka-hatene no soe tiha todan sira neʼebé ita la presiza. Maibé ita mós lakohi husik todan ka responsabilidade neʼebé ita presiza lori. Se ita la lori todan sira-neʼe, ita sei labele kontinua halai iha halai-taru.—2 Tim 2:5. w23.08 p. 26 par. 1-2

Bainhira ita la ulun-toos, ita sei respeitu ema seluk nia hanoin. Porezemplu, irmán balu gosta atu pinta oin, maibé irmán seluk la gosta. Ema Kristaun balu gosta hemu tua, maibé ema seluk deside atu la hemu. Ema Kristaun hotu hakarak iha saúde neʼebé diʼak, maibé sira hili tratamentu médiku neʼebé la hanesan. Se ita sente katak ita-nia desizaun deʼit mak sempre loos no koko habelar ita-nia hanoin neʼe iha kongregasaun, karik ita bele halo ema seluk sidi no halakon unidade. (1 Kor 8:9; 10:​23, 24) Porezemplu, Jeová la fó ukun-fuan espesífiku kona-ba dalan neʼebé ita hatais, maibé nia fó prinsípiu sira ba ita. Ita presiza hatais iha dalan neʼebé lori glória ba Maromak, ho respeitu no “ho hanoin neʼebé loos”. (1 Tim 2:​9, 10) Tan neʼe, ita lakohi dada atensaun demais ba ita-nia an liuhusi dalan neʼebé ita hatais. Bíblia nia prinsípiu sira sei ajuda katuas sira atu la halo lei oioin kona-ba dalan neʼebé ema hatais no sira-nia modelu fuuk. w23.07 p. 23 par. 13-14

Jeová hatudu oinsá ita bele hetan futuru neʼebé diʼak. Ema neʼebé simu konvite husi “feto neʼebé beik” koko atu hetan ksolok husi hahalok la morál. Sira-nia hahalok sei lori sira ba “rate laran neʼebé kleʼan”. (Prov 9:​13, 17, 18) Maibé ema sira neʼebé simu konvite husi feto neʼebé reprezenta “matenek neʼebé loos” sei hetan futuru neʼebé diʼak. (Prov 9:1) Ita aprende atu gosta buat neʼebé Jeová gosta no odi buat neʼebé Jeová odi. (Sal 97:10) No ita kontente tanba bele konvida ema seluk atu aprende husi “matenek neʼebé loos”. Ita hanesan atan neʼebé hamriik “iha fatin aas sidade nian no bolu ho lian makaʼas, hodi dehan: ‘Ema naran deʼit neʼebé la iha esperiénsia, mai iha neʼe.’” Bainhira ita no ema seluk simu konvite husi matenek neʼebé loos, ita laʼós deʼit hetan benefísiu agora, maibé mós ba nafatin. Neʼe ajuda ita atu “moris” ba nafatin nuʼudar ita “laʼo ba oin ho kbiit atu komprende”.—Prov 9:​3, 4, 6. w23.06 p. 24-25 par. 17-18

Ita sente oinsá bainhira Ita-nia kolega serbisu, ka kolega eskola husu kona-ba Ita-nia fiar? Ita sente taʼuk? Karik ita hotu sente hanesan neʼe. Bainhira ema husu kona-ba ita-nia fiar, neʼe bele ajuda ita atu komprende sira-nia hanoin no fiar, no loke dalan mai ita atu haklaken ba sira. Maibé dala ruma sira husu pergunta tanba hakarak koko ka haksesuk malu ho ita. Ita la hakfodak kona-ba neʼe. Dala ruma ema balu rona informasaun neʼebé la loos kona-ba ita-nia fiar. (Após 28:22) Liután neʼe, ita moris iha “loron ikus sira” neʼebé ema barak mak “la rona malu” no “siʼak”. (2 Tim 3:​1, 3) Karik Ita hanoin: ‘Oinsá mak haʼu bele kalma nafatin bainhira ema ruma koko atu haksesuk malu ho haʼu kona-ba haʼu-nia fiar?’ Saida mak bele ajuda Ita? Hahalok laran-maus. Ema neʼebé laran-maus kalma nafatin bainhira ema provoka nia, ka la hatene oinsá atu hatán. w23.09 p. 14 par. 1-2

Dala ruma ita simu matadalan husi organizasaun neʼebé bele proteje ita husi materializmu no atividade neʼebé bele book ita atu kontra Maromak nia ukun-fuan. Iha situasaun sira-neʼe, ita mós hetan benefísiu hodi halo tuir matadalan husi Jeová. (Isa 48:​17, 18; 1 Tim 6:​9, 10) Klaru katak Jeová sei kontinua uza ema atu dirije ninia povu durante terus boot no durante Kristu nia Ukun ba Tinan Rihun Ida. Ita sei halo tuir matadalan neʼebé ita simu ka lae? Fasil ba ita atu halo ida-neʼe se ita kontinua halo tuir Jeová nia matadalan agora. Tan neʼe, mai ita kontinua halo tuir Jeová nia matadalan, inklui matadalan neʼebé Jeová fó mai ita liuhusi ema neʼebé nia hili atu dirije ita. (Isa 32:​1, 2; Ebr 13:17) Bainhira ita halo nuneʼe, ita sei iha razaun barak atu tau fiar ba Jeová nuʼudar nia dirije ita atu sees husi perigu neʼebé bele estraga ita-nia espiritualidade, no lori ita ba moris ba nafatin iha mundu foun. w24.02 p. 25 par. 17-18

Apóstolu Paulo kontente atu serbí Jeová, maibé nia mós hasoru susar oioin. Dala barak Paulo presiza halo viajen dook, no iha tempu neʼebá la fasil atu halo viajen. Durante viajen nia “hasoru perigu iha mota” no “perigu husi naʼok-teen sira”. Inimigu sira mós baku nia. (2 Kor 11:​23-27) No dala ruma irmaun-irmán sira mós la hafolin ninia hakaʼas an atu ajuda sira. (2 Kor 10:10; Flp 4:15) Saida mak ajuda Paulo atu kontinua serbí Jeová? Paulo aprende buat barak kona-ba Jeová nia hahalok husi Eskritura sira no mós husi ninia esperiénsia rasik. Paulo fiar metin katak Maromak Jeová hadomi nia. (Rom 8:​38, 39; Éf 2:​4, 5) No nia mós hadomi tebes Jeová. Paulo hatudu domin ba Jeová hodi “kontinua serbí ema santu sira”.—Ebr 6:10. w23.07 p. 9 par. 5-6

Ema barak komprende katak ita presiza ema nia governu no presiza halo tuir lei balu neʼebé “autoridade sira” fó. Maibé ema sira-neʼe dada an atu halo tuir lei neʼebé sira sente la justu ka la gosta. Bíblia dehan katak ema nia governu hamosu susar, Satanás mak kontrola, no lakleur tan sei lakon. (Sal 110:​5, 6; Ecle 8:9; Lc 4:​5, 6) Bíblia mós dehan katak “ema neʼebé kontra autoridade, nia kontra Maromak nia arranju”. Agora daudaun Jeová husik ema nia governu atu ukun hodi kontrola buat hotu no nia husu ita atu halo tuir sira. Tan neʼe ita presiza “fó ba ema hotu buat neʼebé sira merese simu”, inklui selu taxa, respeitu, no halo tuir. (Rom 13:​1-7) Karik ita haree lei balu hanesan la justu, susar atu halo tuir, ka ita la gosta. Maibé ita halo tuir Jeová, no nia husu ita atu halo tuir autoridade sira, naran katak sira la husu ita atu kontra ninia ukun-fuan.—Após 5:29. w23.10 p. 8 par. 9-10

Bainhira Sansão moris, ema Filístia mak ukun nasaun Izraél no hanehan povu. (Juís 13:1) Ema Filístia nia ukun lori susar oioin ba ema Izraél. Jeová hili Sansão atu “salva ema Izraél husi ema Filístia nia liman”. (Juís 13:5) Atu bele kumpre knaar neʼe, Sansão presiza tau fiar ba Jeová. Loron ida, tropa Filístia mai atu kaer Sansão iha Lehi, karik iha Judá. Mane Judá sira sai taʼuk, tan neʼe sira deside atu entrega Sansão ba inimigu. Mane sira-neʼe kesi metin Sansão ho tali foun rua no lori Sansão ba ema Filístia. (Juís 15:​9-13) Maibé “Jeová nia espíritu fó kbiit” ba Sansão no nia halo tali iha ninia liman namkore. Tuirmai, “nia hetan kuda-burru aman neʼebé foin mate nia hasan-ruin”, no nia foti no uza ida-neʼe atu oho ema Filístia naʼin-1.000!—Juís 15:​14-16. w23.09 p. 2 par. 3-4

Neineik-neineik Jeová fó sai “ninia hakarak neʼebé iha ba nafatin” iha Bíblia. Jeová bele hili dalan naran deʼit atu bele kumpre ninia hakarak, no nia sempre susesu tanba nia “halo ona buat hotu hodi kumpre ninia hakarak”. (Prov 16:4) No rezultadu husi buat neʼebé Jeová halo sei iha ba nafatin. Saida mak Jeová nia hakarak? Saida mak Jeová halo atu kumpre ninia hakarak? Maromak fó sai ba Adão no Eva kona-ba ninia hakarak ba sira. Sira presiza “iha oan no sai barak bá, halo nakonu no domina rai neʼe, . . . no kriatura hotu neʼebé book an iha rai”. (Gén 1:28) Bainhira Adão no Eva kontra Maromak, sala tama ba mundu, maibé neʼe la hanetik Jeová atu kumpre ninia hakarak. Nia troka dalan neʼebé nia sei kumpre ninia hakarak. Jeová deside kedas atu harii Ukun ida iha lalehan neʼebé sei kumpre ninia hakarak ba ema no mundu.—Mt 25:34. w23.10 p. 19-20 par. 6-7

Jeová bele ajuda ita atu la rende an. Dala ruma la fasil ba ita atu serbí nia, liuliu se ita luta daudaun hasoru ita-nia fraku. Dala ruma ita sente katak ita-nia fraku mak boot liu fali buat neʼebé apóstolu Pedro hasoru. Maibé Jeová bele fó ita kbiit atu la rende an. (Sal 94:​18,19) Porezemplu, irmaun ida antes nia aprende kona-ba lia-loos, nia halo hahalok omoseksuál ba tinan barak. Ikusmai nia husik tiha ninia toman neʼe no moris tuir Bíblia nia hanorin. Maski nuneʼe, dala ruma nia nafatin luta hasoru ninia hakarak neʼebé sala. Saida mak ajuda nia atu la rende an? Nia dehan: “Jeová fó kbiit mai ita. Ho Jeová nia espíritu, haʼu aprende katak ita bele kontinua moris tuir lia-loos. Jeová uza ona haʼu, no maski haʼu iha fraku oioin nia nafatin kontinua hametin haʼu.” w23.09 p. 23 par. 12

Se Ita mak irmaun joven ida, hakaʼas an atu sai ema Kristaun neʼebé maduru. Ita presiza hili ezemplu diʼak atu banati-tuir, haburas kbiit atu hanoin, halaʼo knaar ho didiʼak, haburas abilidade neʼebé bele ajuda Ita, no prepara atu simu knaar iha futuru. Bainhira Ita hanoin kona-ba buat neʼebé Ita presiza halo, karik Ita hanoin katak neʼe susar. Maibé Ita bele kumpre ida-neʼe. Hanoin-hetan katak Jeová hakarak tebes atu ajuda Ita. (Isa 41:​10, 13) Klaru katak, irmaun-irmán sira mós hakarak ajuda Ita. Bainhira Ita sai ema Kristaun neʼebé maduru, Ita-nia moris sei kontente! Ami hein katak Jeová sei haraik bensaun ba Ita-nia hakaʼas an atu sai ema Kristaun neʼebé maduru. w23.12 p. 29 par. 19-20

Hanoin toʼok komparasaun tuirmai. Ita han hamutuk ho irmaun-irmán sira, goza tempu hamutuk ho sira, no ita hasai foto hamutuk. Ita hasai foto dala rua ka dala tolu. Maibé ita haree foto ida iha irmaun ida neʼebé ninia oin haree ladún diʼak. Klaru katak, ita sei hamoos foto neʼe tanba ita sei iha foto rua seluk neʼebé ema hotu haree oin-midar. Baibain ita iha memória diʼak kona-ba tempu neʼebé ita goza ho irmaun-irmán sira. Maibé oinsá se loron ida irmaun ka irmán ida hakanek Ita-nia laran? Diʼak atu koko haluha deʼit hanesan Ita hamoos foto neʼebé Ita la gosta. (Éf 4:32) Ita bele halo nuneʼe tanba ita iha memória furak barak hamutuk ho sira no ita hakarak rai didiʼak memória furak sira-neʼe. w23.11 p. 12 par. 16-17

Liafuan Gregu neʼebé temi iha eskritura neʼe hatudu katak feto sira presiza hatais iha dalan neʼebé diʼak no mós hanoin kona-ba ema seluk nia sentimentu. Ami orgullu ho irmán maduru sira neʼebé hatais ho respeitu! Irmán maduru sira mós presiza iha kbiit atu tetu didiʼak. Saida mak kbiit atu tetu didiʼak? Neʼe mak kbiit atu hatene saida mak loos no sala, no tuirmai hili atu halo buat neʼebé loos. Hanoin toʼok kona-ba Abigail. Ninia laʼen halo desizaun beik neʼebé bele lori impaktu boot ba ninia família tomak. Abigail halo lalais buat ruma atu hadiʼa situasaun. Tanba nia iha kbiit atu tetu didiʼak, neʼe salva sira-nia moris. (1 Sam 25:​14-23, 32-35) Kbiit atu tetu didiʼak mós bele ajuda ita hatene bainhira atu koʼalia no bainhira atu nonook. No neʼe mós bele ajuda ita atu iha balansu bainhira hatudu interese ba ema seluk.—1 Tes 4:11. w23.12 p. 20 par. 8-9

Apóstolu Paulo hakerek liafuan sira-neʼe ba kongregasaun iha Roma. Irmaun-irmán sira iha neʼebá aprende ona kona-ba Jeová no Jesus, hatudu ona fiar, no sai ona ema Kristaun. Nuneʼe “Maromak haree ona [sira] nuʼudar ema laran-loos tanba fiar” no hili sira liuhusi ninia espíritu santu. (Rom 5:1) Sira bele hein namanas ba esperansa furak no fiar metin katak sira sei simu ida-neʼe. Paulo mós hakerek ba ema Kristaun iha Éfeso kona-ba esperansa neʼebé Maromak fó ba sira. Sira sei simu liman-rohan nuʼudar ema santu sira. (Éf 1:18) Paulo mós fó-hatene ema Kristaun iha Koloso kona-ba esperansa neʼebé sira sei simu. Nia bolu ida-neʼe “esperansa neʼebé rai hela ba [sira] iha lalehan”. (Kol 1:​4, 5) Ema neʼebé Maromak hili liuhusi espíritu santu iha esperansa atu bá lalehan no ukun hamutuk ho Jesus.—1 Tes 4:​13-17; Apok 20:6. w23.12 p. 9 par. 4-5

Liafuan orijinál neʼebé tradús nuʼudar “proteje” refere ba soldadu neʼebé halo seguransa ba sidade no proteje sidade husi inimigu neʼebé mai ataka. Ema neʼebé hela iha sidade neʼe sente seguru tanba hatene katak soldadu proteje sira. Hanesan neʼe mós, bainhira Maromak nia dame proteje ita-nia laran no kbiit atu hanoin, ita sente kalma tanba hatene katak ita seguru. (Sal 4:8) Hanesan Ana neʼebé temi iha Bíblia, dala ruma ita-nia situasaun la troka kedas, maski nuneʼe ita bele nafatin sente dame. (1 Sam 1:​16-18) No bainhira ita sente kalma, baibain fasil ba ita atu hanoin ho klaru no halo desizaun neʼebé matenek. Saida mak ita presiza halo? Bainhira ita sente laran-susar, ita bele husu Jeová nia ajuda. Oinsá? Halo orasaun toʼo ita sente Maromak nia dame. (Lc 11:9; 1 Tes 5:17) Bainhira Ita hasoru susar, halo orasaun, no Ita sei sente Jeová nia dame proteje Ita-nia neon no laran.—Rom 12:12. w24.01 p. 21 par. 5-6

Atu halo santu ninia Aman nia naran, Jesus tenke hasoru susar barak, ema insulta no duun matak nia. Nia hatene katak nia halo tuir ninia Aman iha buat hotu no la presiza sente moe. (Ebr 12:2) Nia mós hatene katak Satanás ataka nia iha tempu susar neʼe. (Lc 22:​2-4; 23:​33, 34) Satanás hakarak atu halakon Jesus nia integridade. Maibé Satanás la susesu! Jesus prova ho klaru katak Satanás mak bosok-teen no katak sei iha ema neʼebé serbí Jeová ho laran-metin no kontinua hatudu integridade maski hasoru situasaun neʼebé susar tebes! Ita hakarak halo kontente Ita-nia Liurai ka lae? Kontinua hahiʼi Jeová nia naran hodi ajuda ema seluk atu hatene Maromak nia hahalok diʼak. Bainhira Ita halo nuneʼe, Ita banati-tuir Jesus nia ezemplu. (1 Ped 2:21) Hanesan Jesus, Ita halo Jeová kontente no prova katak Satanás mak bosok-teen! w24.02 p. 11-12 par. 11-13

Husi tinan 2018 toʼo 2022, iha ema naʼin-millaun ida liu mak hetan batizmu nuʼudar Testemuña ba Jeová. Bainhira Ita dedika an ba Jeová, Ita hili atu sai Jesus Kristu nia dixípulu no halo tuir Maromak nia hakarak mak buat neʼebé importante liu iha Ita-nia moris. Ema Kristaun nia dedikasaun katak sá? Jesus hatete: “Se ema ruma hakarak tuir haʼu, nia tenke nega ninia an rasik.” (Mt 16:24) Liafuan Gregu neʼebé tradús nuʼudar “nia tenke nega ninia an rasik” bele mós tradús nuʼudar “laʼós moris tan ba ninia an rasik”. Bainhira Ita dedika an ba Jeová, Ita lakohi halo buat neʼebé Jeová la gosta. (2 Kor 5:​14, 15) Neʼe inklui la halo “hahalok sira neʼebé husi isin”, hanesan sala seksuál. (Gal 5:​19-21; 1 Kor 6:18) Matadalan sira-neʼe lori susar ba Ita ka lae? Neʼe sei la lori susar ba Ita se Ita hadomi Jeová no fiar metin katak ninia matadalan sira lori diʼak ba Ita.—Sal 119:97; Isa 48:​17, 18. w24.03 p. 2 par. 1; p. 3 par. 4

Jeová haraik ninia espíritu santu ba sira neʼebé halo nia kontente. (Mt 12:18) Husu ba ita-nia an: ‘Haʼu hatudu ona hahalok neʼebé mai husi espíritu santu ka lae?’ Ita nota katak Ita sai ema neʼebé pasiénsia liután se kompara ho tempu neʼebé Ita seidauk koñese Jeová ka lae? Tuir loloos bainhira Ita aprende liután atu hatudu sai hahalok neʼebé mai husi espíritu santu, Ita bele fiar metin katak Jeová kontente ho Ita! Liuhusi folin husi Jesus nia sakrifísiu, Jeová bele fó perdua ba sira neʼebé halo nia kontente. (1 Tim 2:​5, 6) Maibé, oinsá se ita sente katak Jeová la kontente ho ita maski ita hatudu fiar ba Jesus nia sakrifísiu no hetan batizmu? Hanoin-hetan, dala ruma ita labele tau fiar ba ita-nia sentimentu, maibé ita bele tau fiar ba Jeová. Nia haree sira neʼebé hatudu fiar ba Jesus nia sakrifísiu nuʼudar ema laran-loos, no nia promete atu haraik bensaun ba sira.—Sal 5:12; Rom 3:26. w24.03 p. 30 par. 15; p. 31 par. 17