Watchtower BIBLIOTEKA ONLINE
Watchtower
BIBLIOTEKA ONLINE
Tetun Dili
Á
  • Á
  • á
  • É
  • é
  • Í
  • í
  • Ó
  • ó
  • Ú
  • ú
  • Ã
  • ã
  • Ç
  • ç
  • Ñ
  • ñ
  • ʼ
  • BÍBLIA
  • LIVRU SIRA
  • REUNIAUN SIRA
  • w25 Juñu p. 8-13
  • Aprende husi Jacob nia lia-menon ikus—Parte 2

La iha video neʼebé bele loke.

Deskulpa, la bele loke vídeo.

  • Aprende husi Jacob nia lia-menon ikus—Parte 2
  • Livru Haklaken fó sai Maromak Jeová nia Ukun (Estudu)—2025
  • Subtítulu
  • Informasaun seluk neʼebé hanesan
  • ZEBULÃO
  • ISSACAR
  • DAN
  • GAD
  • ASER
  • NAFTALI
  • JOSÉ
  • BENJAMIM
  • Aprende husi Jacob nia lia-menon ikus—Parte 1
    Livru Haklaken fó sai Maromak Jeová nia Ukun (Estudu)—2025
  • Jacob no Esaú hadame malu
    Aprende husi Istória iha Bíblia
  • Hanoin-hetan, Jeová mak “Maromak neʼebé moris”
    Livru Haklaken fó sai Maromak Jeová nia Ukun (Estudu)—2024
  • Desizaun neʼebé hatudu katak ita sadere ba Jeová
    Moris Kristaun no Haklaken—Programa no nota—2023
Haree barak liután
Livru Haklaken fó sai Maromak Jeová nia Ukun (Estudu)—2025
w25 Juñu p. 8-13

LISAUN ESTUDU 25

KNANANUK 96 Maromak nia Liafuan mak rikusoin

Aprende husi Jacob nia lia-menon ikus—Parte 2

“Nia fó bensaun espesiál ba sira ida-idak.”—GÉN 49:28.

OBJETIVU

Aprende lisaun husi Jacob nia lia-menon ikus ba ninia oan-mane naʼin-ualu.

1. Iha lisaun neʼe, ita sei aprende kona-ba saida?

JACOB nia oan-mane sira tuur haleʼu nia no rona didiʼak nuʼudar sira-nia aman haraik bensaun ba sira ida-idak. Hanesan ita aprende ona iha lisaun antes neʼe, Jacob nia lia-menon ba Ruben, Simeão, Levi, no Judá karik halo sira hakfodak. Tan neʼe, karik sira hotu hein namanas ba saida mak Jacob sei hatete ba sira naʼin-ualu seluk. Mai ita haree lisaun saida mak ita bele aprende husi Jacob nia lia-menon ba Zebulão, Issacar, Dan, Gad, Aser, Naftali, José, no Benjamim.a

ZEBULÃO

2. Jacob hatete saida ba Zebulão, no oinsá mak ninia liafuan sai loos? (Génesis 49:13) (Haree mós kaixa.)

2 Lee Génesis 49:13. Jacob fó sai katak Zebulão nia jerasaun sei hela besik tasi-ibun iha parte norte iha rai neʼebé Maromak promete. Liutiha tinan 200, suku Zebulão simu duni sira-nia rai besik tasi-ibun iha área entre Tasi Galileia no Tasi Mediterráneu. Moisés fó sai nanis: “Haksolok bá, oh Zebulão, kuandu ó halo viajen sira.” (Deut 33:18) Karik Moisés nia liafuan neʼe hatudu katak sei fasil ba ema Zebulão atu halo viajen no negósiu tanba sira hela iha área entre tasi rua. Klaru katak ema Zebulão iha razaun atu haksolok.

Jacob nia lia-menon ikus neʼebé sai nuʼudar profesia

Zebulão.

Oan

Zebulão

Profesia

“Zebulão sei hela besik tasi-ibun . . . no ninia fronteira neʼebé dook liu mak besik Sidon.”—Gén 49:13.

Sai loos

Zebulão hela iha área norte entre Tasi Galileia no Tasi Mediterráneu.—Jos 19:​10-16.

3. Saida mak bele ajuda ita atu sente kontente?

3 Ita bele aprende saida? Ita sempre iha razaun atu haksolok maski ita hela iha fatin naran deʼit, ka hasoru situasaun saida deʼit. Atu mantein ita-nia ksolok, ita presiza sente kontente ho buat neʼebé ita iha. (Sal 16:6; 24:5) Dala ruma fasil ba ita atu fokus ba buat neʼebé ita la iha, duké hanoin kona-ba buat diʼak neʼebé ita iha ona. Tan neʼe, koko atu iha hanoin pozitivu kona-ba ita-nia situasaun.—Gal 6:4.

ISSACAR

4. Jacob hatete saida ba Issacar, no oinsá mak ninia liafuan sai loos? (Génesis 49:​14, 15) (Haree mós kaixa.)

4 Lee Génesis 49:​14, 15. Jacob gaba Issacar tanba nia serbisu makaʼas. Nia hatete katak Issacar mak forte hanesan kuda-burru neʼebé bele lori sasán todan. Jacob mós hatete katak Issacar sei hetan rai neʼebé furak. Jacob nia profesia neʼe sai loos bainhira Issacar nia jerasaun simu rai neʼebé bokur besik Mota Jordaun. (Jos 19:22) Sira serbisu makaʼas atu tau matan ba sira-nia rai hodi prodús ai-han, maibé sira mós hakaʼas an atu ajuda ema seluk. (1 Reis 4:​7, 17) Porezemplu, bainhira Juís Barac no profeta Débora husu ema Izraél atu funu hasoru Sísera, suku Issacar mak ida neʼebé prontu atu ajuda.—Juís 5:15.

Jacob nia lia-menon ikus neʼebé sai nuʼudar profesia

Issacar.

Oan

Issacar

Profesia

“Nia sei see nia kabaas hodi lori naha todan.”—Gén 49:​14, 15.

Sai loos

Issacar serbisu makaʼas atu lori benefísiu ba nasaun Izraél.—Juís 5:15; 1 Reis 4:​1, 7, 17.

5. Tanbasá ita presiza halo serbisu makaʼas?

5 Ita bele aprende saida? Jeová hafolin ita-nia hakaʼas an atu halo ninia serbisu hanesan nia hafolin suku Issacar nia serbisu makaʼas. (Ecle 2:24) Porezemplu, hanoin toʼok irmaun sira neʼebé tau matan ba kongregasaun ho badinas. (1 Tim 3:1) Irmaun sira-neʼe la halo funu iha dalan fíziku, maibé sira presiza hakaʼas an atu proteje Maromak nia povu husi perigu oioin iha dalan espirituál. (1 Kor 5:​1, 5; Jud 17-23) Sira mós badinas atu prepara no hatoʼo diskursu neʼebé hametin kongregasaun.—1 Tim 5:17.

DAN

6. Knaar saida mak suku Dan halo? (Génesis 49:​17, 18) (Haree mós kaixa.)

6 Lee Génesis 49:​17, 18. Jacob hatete katak Dan mak hanesan samea neʼebé ataka animál boot sira, hanesan kuda neʼebé uza ba funu. Suku Dan hatudu aten-brani no prontu ataka Izraél nia inimigu sira. Bainhira nasaun Izraél laʼo daudaun atu tama ba rai neʼebé Maromak promete, suku Dan mak “laʼo iha kotuk no sai hanesan guarda” hodi proteje nasaun neʼe. (Núm 10:25) Neʼe mak knaar neʼebé importante maski suku seluk labele haree buat neʼebé suku Dan halo iha sira-nia kotuk.

Jacob nia lia-menon ikus neʼebé sai nuʼudar profesia

Dan.

Oan

Dan

Profesia

“Dan . . . tata kuda nia ain-tuban.”—Gén 49:​16-18.

Sai loos

Bainhira ema Izraél tama ba rai neʼebé Maromak promete, suku Dan “laʼo iha kotuk no sai hanesan guarda”.—Núm 10:25.

7. Ita presiza iha hanoin saida kona-ba knaar neʼebé ita halo iha Jeová nia organizasaun?

7 Ita bele aprende saida? Karik Ita halo knaar ruma no hanoin katak la iha ema ida mak nota kona-ba neʼe. Porezemplu, Ita ajuda hamoos ka tau matan ba Reuniaun-Fatin, halo serbisu voluntáriu iha reuniaun boot, ka halo serbisu seluk tan. Se nuneʼe, Ita merese hetan gaba! Hanoin-hetan, Jeová haree no hafolin buat hotu neʼebé Ita halo ba nia. No nia sei kontente tebes bainhira Ita serbí nia tanba domin, laʼós tan deʼit hakarak ema seluk gaba Ita.—Mt 6:​1-4.

GAD

8. Tanbasá fasil ba inimigu sira atu ataka área Gad? (Génesis 49:19) (Haree mós kaixa.)

8 Lee Génesis 49:19. Jacob fó sai katak grupu naʼok-teen sei ataka Gad. Liutiha tinan 200, suku Gad hetan sira-nia rai iha área leste husi Mota Jordaun, neʼebé fronteira ho nasaun inimigu sira. Tan neʼe, fasil ba inimigu sira atu ataka suku Gad. Maski nuneʼe, ema Gad hakarak hela iha neʼebá tanba área neʼe diʼak atu hakiak animál sira. (Núm 32:​1, 5) Suku Gad mak aten-brani. Liután neʼe, sira tau fiar ba Jeová katak nia sei ajuda sira atu proteje sira-nia rai husi inimigu sira. Ba tinan barak, sira mós haruka sira-nia soldadu atu ajuda suku seluk hodi bele manán área parte oeste husi rai neʼebé Maromak promete, neʼe mak iha Mota Jordaun nia sorin seluk. (Núm 32:​16-19) Sira fiar katak Jeová sei proteje sira-nia feen no oan nuʼudar sira dook husi família. No Jeová haraik bensaun ba sira tanba sira hatudu aten-brani no tau uluk ema seluk nia diʼak.—Jos 22:​1-4.

Jacob nia lia-menon ikus neʼebé sai nuʼudar profesia

Gad.

Oan

Gad

Profesia

“Grupu naʼok-teen sei ataka nia.”—Gén 49:19.

Sai loos

Gad hela iha área parte leste husi Mota Jordaun, no neʼe mak fatin neʼebé fasil ba inimigu sira atu ataka.—Jos 13:​24-28.

9. Se ita tau fiar ba Jeová, oinsá neʼe kona ita-nia desizaun sira?

9 Ita bele aprende saida? Atu serbí Jeová iha situasaun susar, ita tenke kontinua tau fiar ba nia. (Sal 37:3) Ema barak ohin loron hatudu sira-nia fiar ba Jeová hodi halo sakrifísiu oioin atu apoia projetu konstrusaun, serbí iha fatin neʼebé presiza liután haklaken-naʼin, ka halaʼo knaar seluk tan. Sira halo nuneʼe tanba fiar metin katak Jeová sei sempre tau matan ba sira.—Sal 23:1.

ASER

10. Suku Aser lakohi halo saida? (Génesis 49:20) (Haree mós kaixa.)

10 Lee Génesis 49:20. Jacob fó sai katak suku Aser sei sai riku, no neʼe sai loos duni. Ema Aser nia área inklui rai neʼebé bokur liu se kompara ho fatin seluk iha Izraél tomak. (Deut 33:24) Sira-nia rai besik Tasi Mediterráneu no inklui ema Fenísia nia ponte-kais Sidon neʼebé riku. Maibé suku Aser la duni sai ema Kanaan hotu husi rai neʼe. (Juís 1:​31, 32) Tanba sai riku no hetan influénsia neʼebé la diʼak husi ema Kanaan, karik neʼe halo sira lakon sira-nia laran-manas ba adorasaun loos. Bainhira Juís Barac husu ema Izraél atu funu hasoru ema Kanaan, suku Aser lakohi apoia. Rezultadu mak sira la haree buat furak neʼebé Jeová halo atu ajuda ema Izraél manán funu “besik mota iha Megido”. (Juís 5:​19-21) Karik suku Aser sente moe bainhira Barac no Débora kanta knananuk vitória nian ho liafuan: “Aser tuur baruk deʼit iha tasi-ibun.”—Juís 5:17.

Jacob nia lia-menon ikus neʼebé sai nuʼudar profesia

Aser.

Oan

Aser

Profesia

“Aser sei iha ai-han barak loos.”—Gén 49:20.

Sai loos

Aser moris riku iha rai neʼebé Maromak promete.—Deut 33:24.

11. Tanbasá ita presiza nafatin iha hanoin neʼebé loos kona-ba rikusoin?

11 Ita bele aprende saida? Ita hakarak fó buat neʼebé diʼak liu ba Jeová. Atu halo nuneʼe, ita presiza hasees an husi mundu nia hanoin kona-ba rikusoin. (Prov 18:11) Ita hakaʼas an atu nafatin iha hanoin neʼebé loos kona-ba osan. (Ecle 7:12; Ebr 13:5) Ita lakohi gasta tempu no enerjia atu buka buat neʼebé loloos ita la presiza, tanba neʼe bele hanetik ita-nia serbisu ba Maromak. Duké buka deʼit rikusoin, ita hakarak fó ita-nia tempu no enerjia ba Jeová, tanba hatene katak Jeová sei fó mai ita moris neʼebé diʼak no seguru iha futuru.—Sal 4:8.

NAFTALI

12. Oinsá mak Jacob nia liafuan ba Naftali sai loos? (Génesis 49:21) (Haree mós kaixa.)

12 Lee Génesis 49:21. Jacob fó sai katak Naftali sei koʼalia “liafuan neʼebé furak”. Karik neʼe refere ba dalan neʼebé Jesus koʼalia bainhira haklaken. Jesus neʼebé hanorin ho matenek uza tempu barak iha Kafarnaum, iha Naftali nia rai. Tan neʼe, Bíblia temi Kafarnaum nuʼudar ‘sidade neʼebé Jesus hela’. (Mt 4:13; 9:1; João 7:46) Kona-ba Jesus, Isaias fó sai nanis katak ema Zebulão no Naftali sei haree “naroman boot ida”. (Isa 9:​1, 2) Dalan neʼebé Jesus hanorin hatudu katak nia mak “naroman loloos neʼebé fó nabilan ba ema oioin”.—João 1:9.

Jacob nia lia-menon ikus neʼebé sai nuʼudar profesia

Naftali.

Oan

Naftali

Profesia

“Nia sei koʼalia liafuan neʼebé furak.”—Gén 49:21.

Sai loos

Jesus uza tempu barak liu iha suku Naftali nia rai atu haklaken.—Mt 4:13; 9:1.

13. Oinsá mak ita bele koʼalia iha dalan neʼebé halo Jeová kontente?

13 Ita bele aprende saida? Jeová interese kona-ba saida mak ita koʼalia no oinsá ita koʼalia. Oinsá mak ita bele koʼalia ‘liafuan furak’ neʼebé halo Jeová kontente? Primeiru, ita presiza koʼalia buat neʼebé loos. (Sal 15:​1, 2) Tuirmai, ita bele koʼalia atu hametin ema seluk hodi gaba no la kritika. (Éf 4:29) No ita bele koko atu hahú dada lia ho ema iha dalan neʼebé diʼak liu hodi fó sasin kona-ba Jeová.

JOSÉ

14. Oinsá mak Jacob nia profesia kona-ba José sai loos? (Génesis 49:​22, 26) (Haree mós kaixa.)

14 Lee Génesis 49:​22, 26. Klaru katak Jacob sente orgullu tebes ho José, “ida neʼebé hili ona husi ninia maun-alin sira-nia leet”. Jacob bolu José nuʼudar “dikin husi ai-hun neʼebé iha fuan barak”. Jacob rasik mak ai-hun, no José mak ninia dikin. José mak oan primeiru husi Raquel, feen neʼebé Jacob hadomi. Jacob fó sai nanis katak José sei simu liman-rohan ba dala rua hodi troka fali Ruben, Jacob nia oan primeiru husi Lea. (Gén 48:​5, 6; 1 Krón 5:​1, 2) Profesia neʼe sai loos kuandu José nia oan-mane Efraim no Manasés sai suku rua husi Izraél, no suku rua neʼe hetan sira-nia rai rasik.—Gén 49:25; Jos 14:4.

Jacob nia lia-menon ikus neʼebé sai nuʼudar profesia

José.

Oan

José

Profesia

“Bensaun sira sei hela nafatin iha José nia ulun, ida neʼebé hili ona husi ninia maun-alin sira-nia leet.”—Gén 49:​22-26.

Sai loos

José simu liman-rohan nuʼudar oan-mane primeiru, no ninia oan-mane naʼin-rua sai suku rua.—Jos 14:4; 1 Krón 5:​1, 2.

15. Saida mak José halo maski hasoru situasaun la justisa?

15 Jacob mós temi hanadór sira neʼebé ‘hana José no nafatin rai odi ba nia’. (Gén 49:23) Neʼe refere ba ninia maun sira neʼebé laran-moras ba nia, trata aat nia, no halo nia hasoru situasaun la justisa. Maibé, José la odi ninia maun sira no la fó-sala Jeová. Jacob dehan: “[José nia] rama metin nafatin, no ninia liman forte nafatin no hana lalais.” (Gén 49:24) José bele deʼit hana fali ninia maun sira ka selu aat ba sira, maibé nia sadere ba Jeová durante ninia susar, no fó perdua ba ninia maun sira no trata sira ho laran-diʼak. (Gén 47:​11, 12) Susar neʼebé José hasoru halo nia sai ema neʼebé diʼak liután. (Sal 105:​17-19) Rezultadu mak Jeová bele uza nia iha dalan neʼebé boot liu.

16. Oinsá mak ita bele banati-tuir José nia ezemplu bainhira hasoru susar?

16 Ita bele aprende saida? Keta husik susar sira neʼebé Ita hasoru halakon Ita-nia domin ba Jeová no irmaun-irmán sira. Hanoin-hetan katak Jeová bele deʼit uza susar sira atu treinu ita. (Ebr 12:​7, nota) Treinu hanesan neʼe bele ajuda ita atu haburas hahalok Kristaun, hanesan laran-sadiʼa no fó perdua. (Ebr 12:11) Ita bele fiar metin katak Jeová sei fó kolen ba ita, hanesan nia halo ona ba José.

BENJAMIM

17. Oinsá mak Jacob nia profesia kona-ba Benjamim sai loos? (Génesis 49:27) (Haree mós kaixa.)

17 Lee Génesis 49:27. Jacob fó sai katak ema Benjamim sei matenek atu halo funu hanesan asu-lobu. (Juís 20:​15, 16; 1 Krón 12:2) Liafuan “iha dadeer” refere ba tempu neʼebé Saul husi suku Benjamim sai liurai primeiru iha nasaun Izraél. Saul hatudu aten-brani bainhira nia halo funu hasoru ema Filístia. (1 Sam 9:​15-17, 21) No liafuan “iha lokraik” refere ba tempu neʼebé Liurai-Feto Ester no Mordecai husi suku Benjamim salva povu Izraél bainhira ema koko atu halakon sira hotu iha nasaun Pérsia.—Ester 2:​5-7; 8:3; 10:3.

Jacob nia lia-menon ikus neʼebé sai nuʼudar profesia

Benjamim.

Oan

Benjamim

Profesia

“Iha dadeer nia han animál neʼebé nia kaer, no iha lokraik nia sei fahe buat neʼebé nia foti.”—Gén 49:27.

Sai loos

Saul mak Izraél nia liurai primeiru. (1 Sam 9:​15-17) Tuirmai, Ester no Mordecai salva Jeová nia povu.—Ester 2:​5-7; 8:3; 10:3.

18. Oinsá mak ita bele banati-tuir suku Benjamim nia ezemplu?

18 Ita bele aprende saida? Ita fiar katak ema Benjamim kontente tebes bainhira Saul neʼebé husi sira-nia suku mak sai liurai. Maibé, bainhira Jeová fó fali pozisaun liurai ba David husi suku Judá, ema Benjamim apoia mudansa neʼe. (2 Sam 3:​17-19) Tinan barak liu tiha, bainhira suku sanulu kontra suku Judá, suku Benjamim apoia suku Judá no liurai neʼebé Jeová hili ona. (1 Reis 11:​31, 32; 12:​19, 21) Ita mós hakarak hatudu laran-metin hodi apoia sira neʼebé Jeová hili atu dirije ninia povu ohin loron.—1 Tes 5:12.

19. Oinsá mak ita bele hetan benefísiu husi Jacob nia lia-menon ikus?

19 Jacob nia profesia antes nia mate lori benefísiu mai ita. Hodi aprende kona-ba oinsá Jacob nia profesia sai loos, neʼe hametin ita-nia fiar katak Jeová nia promesa sira iha Bíblia sei sai loos. No ita mós bele komprende liután oinsá ita bele halo Jeová kontente.

SAIDA MAK ITA APRENDE HUSI JACOB NIA LIA-MENON IKUS BA . . .

  • Zebulão, Issacar, no Dan?

  • Gad, Aser, no Naftali?

  • José no Benjamim?

KNANANUK 128 Tahan toʼo rohan

a Bainhira Jacob haraik bensaun ba ninia oan naʼin-haat primeiru, nia fó bensaun tuir sé mak moris uluk. Maibé, bainhira Jacob fó bensaun ba ninia oan naʼin-ualu seluk, nia la fó bensaun tuir sé mak moris uluk.

    Livru sira iha lian Tetun Dili (1993-2026)
    Log Out
    Log In
    • Tetun Dili
    • Fahe
    • Organiza tuir Ita-nia hakarak
    • Copyright © 2025 Watch Tower Bible and Tract Society of Pennsylvania
    • Kondisaun atu Uza
    • Informasaun Privadu
    • Setting kona-ba privasidade
    • JW.ORG
    • Log In
    Fahe