Jesus mak Amlulik Boot neʼebé hanoin ita

1-2. (a) Tanbasá Jeová haruka ninia Oan-Mane mai mundu? (b) Iha lisaun neʼe, ita sei koʼalia kona-ba saida? (Ebreu 5:​7-9)

MAIZUMENUS tinan 2.000 liubá, Maromak Jeová haruka ninia Oan-Mane mesak mai mundu. Tanbasá? Razaun ida mak atu salva ema husi sala no mate no atu halakon tiha problema hotu neʼebé Satanás hamosu. (João 3:16; 1 João 3:8) Jeová mós hatene katak Jesus nia moris nuʼudar ema bele prepara nia atu sai Amlulik Boot neʼebé laran-sadiʼa no hanoin ema. Jesus komesa serbí nuʼudar Amlulik Boot bainhira nia hetan batizmu iha tinan 29 EC.a

² Iha lisaun neʼe, ita sei koʼalia kona-ba oinsá Jesus nia moris iha mundu ajuda nia atu sai Amlulik Boot neʼebé diʼak liu no hanoin ema. Bainhira ita komprende ho loloos kona-ba oinsá Jesus “sai perfeitu” atu halaʼo ninia knaar, neʼe sei halo fasil ba ita atu hakbesik ba Jeová maski ita sente laran-kraik tanba ita-nia sala ka fraku sira.—Lee Ebreu 5:​7-9.

MAROMAK NIA OAN-MANE MESAK MAI MUNDU

3-4. Jesus husik saida deʼit atu mai iha mundu, no ninia moris iha mundu mak oinsá?

³ Ita barak hasoru ona mudansa iha ita-nia moris, porezemplu muda ba fatin seluk hodi husik hela ita-nia família no belun sira. La fasil atu halo mudansa hanesan neʼe, maibé la iha ema ida mak hasoru mudansa boot hanesan Jesus. Jesus mak anju primeiru neʼebé importante liu iha lalehan. Jeová kontente tebes ho nia no nia sempre haksolok atu serbisu hamutuk ho ninia Aman. (Sal 16:11; Prov 8:30) Maski nuneʼe, Filipe 2:7 hatete katak nia ho hakarak rasik “husik buat hotu” iha lalehan hodi mai iha mundu atu moris hamutuk ho ema neʼebé la perfeitu.

⁴ Hanoin mós situasaun neʼebé Jesus hasoru kuandu nia moris no bainhira nia sei labarik. Jesus nia família mak kiak. Ita hatene ida-neʼe tanba Jesus nia inan-aman fó deʼit manu kiʼik rua nuʼudar sakrifísiu iha templu. (Lev 12:8; Lc 2:24) Bainhira Liurai Herodes hatene katak Jesus moris, nia koko atu oho Jesus. Tan neʼe, Jesus nia inan-aman lori nia ba Ejitu no hela iha neʼebá ba tempu balu. (Mt 2:​13, 15) Jesus nia moris iha mundu mak la hanesan duni ho ninia moris iha lalehan!

5. Saida deʼit mak Jesus haree iha mundu, no oinsá neʼe ajuda nia atu halaʼo ninia knaar nuʼudar Amlulik Boot? (Haree mós dezeñu.)

⁵ Durante Jesus iha mundu, nia haree susar oioin neʼebé ema barak hasoru. Nia haree oinsá ema sente triste bainhira sira-nia família ka belun mate. Karik nia mós sente triste bainhira ninia aman-hakiak José mate. Jesus mós hasoru ema neʼebé moras-lepra, matan-delek, isin-matek, inan-aman neʼebé triste tanba oan mate, no nia hanoin tebes sira. (Mt 9:​2, 6; 15:30; 20:34; Mc 1:​40, 41; Lc 7:13) Klaru katak Jesus haree ona ema nia susar bainhira nia iha lalehan. Maibé kuandu nia moris nuʼudar ema iha mundu, nia bele komprende liután ema nia susar no terus. (Isa 53:4) Neʼe ajuda nia atu hatene didiʼak ema nia sentimentu iha situasaun oioin no oinsá situasaun susar afeta ema nia moris. Jesus mós sente kole, laran-susar no triste hanesan ho ema seluk.

JESUS HANOIN EMA

6. Ita aprende saida husi Isaias nia profesia kona-ba Jesus nia hahalok? (Isaias 42:3)

⁶ Durante iha rai, Jesus kumpre profesia iha livru Isaias hodi hatudu laran-sadiʼa no hanoin sira neʼebé ema seluk trata aat. Dala ruma, Eskritura Lian Ebraiku kompara ema neʼebé riku no kbiit boot hanesan jardín neʼebé iha bee barak, ka ai-hun boot no forte. (Sal 92:12; Isa 61:3; Jer 31:12) Maibé ema kbiit-laek no sira neʼebé ema seluk hanehan mak hanesan duʼut-kain neʼebé kleʼuk ona no ahi-oan neʼebé besik atu mate. (Lee Isaias 42:3.) Jeová dirije profeta Isaias atu uza komparasaun neʼe hodi fó-hatene nanis katak Jesus sei hatudu domin boot no laran-sadiʼa ba ema baibain neʼebé ema seluk la hafolin.

7-8. Oinsá Jesus kumpre Isaias nia profesia?

⁷ Mateus hatudu katak Jesus kumpre Isaias nia profesia neʼebé dehan: “Nia sei la halo tohar duʼut-kain neʼebé kleʼuk ona, no nia sei la hamate ahi-oan neʼebé besik atu mate.” (Mt 12:20) Jesus halo milagre barak atu ajuda sira neʼebé la iha kbiit no sente la iha esperansa. Porezemplu, Jesus hasoru mane ida neʼebé isin nakonu ho moras-lepra. Karik mane neʼe sente katak nia la iha esperansa atu sai diʼak fali no bele ransu ho ninia família no belun sira. (Lc 5:​12, 13) Jesus mós hasoru mane ida neʼebé tilun-diuk no koʼalia la moos. Imajina toʼok mane neʼe nia sentimentu bainhira nia haree ema seluk koʼalia ba malu no nia la komprende buat ida. (Mc 7:​32, 33) Maibé sira mós hasoru susar seluk tan.

⁸ Iha Jesus nia tempu, ema Judeu barak fiar katak ema hetan moras ka sai aleijadu mak nuʼudar malisan tanba sira-nia sala ka inan-aman nia sala. (João 9:2) Tan neʼe, sira hetan susar husi ema seluk no sente la iha folin. Jesus kumpre Isaias nia profesia hodi kura ema sira-neʼe no halo sira fiar katak Maromak hanoin sira. Neʼe hanorin saida mai ita?

9. Oinsá mak Ebreu 4:​15, 16 hatudu katak ita-nia Amlulik Boot Jesus hanoin ita?

⁹ Lee Ebreu 4:​15, 16. Liafuan Gregu neʼebé tradús nuʼudar “hanoin no komprende” iha eskritura neʼe signifika katak sente ema seluk nia triste no moras. Paulo mós uza liafuan neʼebé hanesan iha Ebreu 10:34 kuandu anima ema Kristaun atu hanoin maluk sira neʼebé iha komarka laran. Bainhira ita lee istória kona-ba Jesus nia milagre sira, ita bele komprende katak Jesus hanoin tebes ema. Nia kura ema laʼós tanba neʼe mak ninia knaar, maibé tanba hadomi sira no hakarak ajuda sira. Porezemplu, bainhira Jesus kura mane neʼebé moras-lepra, nia bele halo nuneʼe husi dook, maibé nia hakbesik hodi kona mane neʼe. Karik neʼe mak dala primeiru neʼebé ema ida kona mane neʼe durante tinan barak. Bainhira Jesus kura mane tilun-diuk, nia lori mane neʼe dook husi ema-lubun. Hanoin mós kona-ba buat neʼebé akontese bainhira feto ida neʼebé arrepende an mak hakbesik ba Jesus no fase Jesus nia ain ho ninia matan-been. Ema Farizeu ida la hatudu laran-diʼak ba feto neʼe, maibé Jesus korrije makaʼas ema Farizeu neʼe. (Mt 8:3; Mc 7:33; Lc 7:44) Ita bele haree katak Jesus la hakribi ema sira neʼebé moras ka halo ona sala neʼebé sériu. Duké halo nuneʼe, nia konvida sira atu hakbesik nia no nia hatudu domin ba sira. Ita bele fiar katak nia mós hanoin ita ida-idak.

BANATI-TUIR ITA-NIA AMLULIK BOOT

10. Saida deʼit mak ita bele uza atu ajuda ema neʼebé defisiente tilun no matan? (Haree mós foto.)

¹⁰ Nuʼudar Jesus nia dixípulu, ita hakaʼas an atu banati-tuir nia hodi hatudu domin, laran-sadiʼa, no hanoin ema. (1 Ped 2:21; 3:8) Maski ita labele kura ema neʼebé defisiente tilun no matan, maibé ita bele ajuda sira atu hakbesik ba Jeová. Porezemplu, ohin loron ita iha publikasaun iha língua jestuál hamutuk 100 liu. No atu ajuda ema neʼebé defisiente matan, ita-nia organizasaun halo publikasaun iha letra braile iha língua 60 liu no prodús vídeo ho esplikasaun áudio iha língua 100 liu. Buat sira-neʼe ajuda ema defisiente tilun no matan atu hakbesik ba Jeová no ninia Oan-Mane.

11. Oinsá mak Jeová nia organizasaun haleno Jesus nia hahalok hanoin ema? (Apóstolu 2:​5-7, 33) (Haree mós foto.)

¹¹ Jeová nia organizasaun hakaʼas an atu ajuda ema oioin. Hanoin-hetan katak depois Jesus moris hiʼas, nia haraik espíritu santu ba ninia dixípulu sira atu ema hotu neʼebé mai tuir festa Pentekostes bele rona liafuan diʼak iha ‘sira ida-idak nia lian rasik’. (Lee Apóstolu 2:​5-7, 33.) Ohin loron Jesus dirije ita-nia organizasaun atu prodús publikasaun iha língua 1.000 liu, inklui língua neʼebé ema uitoan deʼit mak koʼalia. Porezemplu, organizasaun halo publikasaun iha ema Amérika orijinál nia língua 160 neʼebé uza iha Amérika Norte no Súl, hodi nuneʼe ema hotu bele iha oportunidade atu aprende liafuan diʼak. Ita-nia publikasaun mós tradús ona ba língua Romani oioin hamutuk 20 liu. Ema rihun ba rihun neʼebé koʼalia língua sira-neʼe komesa serbí Jeová.

12. Jeová nia organizasaun halo saida tan atu ajuda ema ohin loron?

¹² Jeová nia organizasaun laʼós deʼit ajuda ema atu hatene liafuan diʼak, maibé mós ajuda sira neʼebé hasoru susar tanba dezastre naturais. Irmaun-irmán rihun ba rihun prontu atu sai voluntáriu hodi bele ajuda sira-nia maluk neʼebé hasoru susar. Organizasaun mós harii fatin adorasaun neʼebé simples atu ema bele halibur hamutuk hodi aprende kona-ba oinsá Jeová hadomi sira.

ITA-NIA AMLULIK BOOT BELE AJUDA ITA

13. Iha dalan saida deʼit mak Jesus ajuda ita?

¹³ Nuʼudar bibi-atan neʼebé diʼak, Jesus tau matan ba ita ida-idak nia presiza hodi bele iha relasaun diʼak ho Jeová. (João 10:14; Éf 4:7) Dala ruma situasaun moris bele halo ita sente hanesan ahi-oan neʼebé besik atu mate ka duʼut-kain neʼebé kleʼuk ona. Karik ita sai laran-kraik tebes tanba moras neʼebé sériu, halo sala ruma, ka iha problema ho maluk fiar-naʼin ruma. Neʼe halo ita hanoin barak kona-ba ita-nia problema no susar atu tau fokus ba ita-nia esperansa kona-ba futuru. Maibé, hanoin-hetan katak Jesus komprende Ita-nia sentimentu no susar. Tan neʼe, nia hakarak ajuda Ita. Porezemplu, nia bele uza espíritu santu atu fó kbiit ba Ita bainhira Ita fraku. (João 16:7; Tito 3:6) Jesus mós bele uza katuas sira no irmaun-irmán sira iha kongregasaun atu anima, ajuda, no apoia Ita.—Éf 4:8.

14. Ita bele halo saida bainhira sente laran-kraik?

¹⁴ Se Ita laran-kraik, hanoin kleʼan kona-ba Jesus nia knaar nuʼudar ita-nia Amlulik Boot. Hanoin-hetan katak Jeová haruka nia mai mundu laʼós deʼit atu mate ba ita, maibé mós atu nia bele komprende liután problema neʼebé ema sala-naʼin hasoru. Kuandu ita laran-kraik tanba ita-nia sala ka fraku ruma, Jesus sempre prontu atu ajuda ita “iha tempu neʼebé loloos”.—Ebr 4:​15, 16.

15. Saida mak ajuda irmaun ida atu fila fali ba kongregasaun?

¹⁵ Jesus mós dirije ninia povu atu buka no ajuda ema neʼebé dook ona husi Jeová nia bibi-lubun. (Mt 18:​12, 13) Porezemplu, Stefanob neʼebé kongregasaun hasai durante tinan 12, deside atu tuir fali reuniaun. Kona-ba tempu neʼe, nia hatete: “Neʼe la fasil, maibé haʼu hakarak serbí fali Jeová hamutuk ho irmaun-irmán sira. Katuas sira neʼebé hasoru haʼu, halo haʼu sente kmaan. Dala ruma haʼu sente la iha folin no hakarak rende an deʼit. Maibé katuas sira fó-hanoin haʼu katak Jeová no Jesus lakohi haʼu atu rende an. Bainhira kongregasaun simu fali haʼu, irmaun-irmán hotu ho domin fó benvindu mai haʼu no haʼu-nia família. Ikusmai haʼu-nia feen estuda Bíblia, no agora ami serbí Jeová hamutuk.” Klaru katak ita-nia Amlulik Boot kontente tebes bainhira haree irmaun-irmán hotu ajuda ema neʼebé arrepende an atu fila fali ba kongregasaun!

16. Tanbasá ita agradese hodi iha Amlulik Boot neʼebé hanoin ita?

¹⁶ Bainhira Jesus iha mundu, nia ajuda ema barak iha tempu neʼebé loos. Ohin loron, ita bele fiar metin katak nia sei ajuda ita bainhira ita presiza. No lakleur tan iha mundu foun, nia sei ajuda ita atu livre husi susar hotu neʼebé ita hasoru tanba sala no kondisaun la perfeitu. Ita agradese tebes ba Maromak Jeová tanba nia hatudu domin boot hodi fó ninia Oan-Mane nuʼudar Amlulik Boot neʼebé hanoin ita!