Pergunta husi lee-naʼin
Iha futuru, Jeová sei tau “hanoin” saida iha nasaun sira-nia laran?
Kona-ba oinsá terus boot hahú, Apokalipse 17:16, 17 hatete: “Kona-ba dikur sanulu neʼebé ó haree no mós animál fuik neʼe, sira sei odi feto-aat neʼe no sei halakon nia no halo nia isin-tanan, no sei han ninia isin no sunu hotu nia iha ahi. Tanba Maromak tau ninia hanoin iha sira-nia laran atu kumpre Maromak nia hakarak, sin, atu kumpre sira-nia hanoin neʼebé ida deʼit, hodi fó sira-nia ukun ba animál fuik neʼe.” Uluk ita-nia publikasaun sira esplika katak “hanoin” neʼebé Jeová sei tau iha nasaun sira-nia laran mak kona-ba atu halakon relijiaun falsu.
Maibé, ita presiza halo mudansa ba kumpriensaun neʼe. “Hanoin” neʼebé Jeová sei tau iha nasaun sira-nia laran mak atu “fó sira-nia ukun ba animál fuik”. Atu komprende oinsá mak profesia neʼe sei kumpre, haree toʼok pergunta sira tuirmai.
Profesia neʼe temi kona-ba saida deʼit? “Feto-aat” neʼebé hanaran “Babilónia Boot” reprezenta relijiaun falsu hotu iha mundu. ‘Animál fuik neʼebé kór-mean’ reprezenta Nasoins Unidas. Organizasaun neʼe foufoun harii iha tinan 1919 nuʼudar Liga Nasaun sira-nian atu promove dame iha mundu. (Apok 17:3-5) “Dikur sanulu” reprezenta governu hotu neʼebé apoia animál fuik neʼe.
Relasaun entre feto-aat no animál fuik neʼebé kór-mean mak oinsá? Feto-aat neʼe “tuur hela iha animál fuik nia leten”, neʼe katak nia apoia no koko atu kontrola animál fuik neʼe.
Saida mak sei akontese ba feto-aat? Animál fuik no dikur sanulu “sei odi feto-aat neʼe” toʼo sira sei foti feto-aat nia rikusoin hotu no fó sai ninia hahalok aat. No sira sei halakon tiha feto-aat neʼe tuir buat neʼebé Jeová fó sai nanis ona. (Apok 17:1; 18:8) Neʼe mak tempu neʼebé relijiaun falsu hotu lakon mohu. Maibé, antes ida-neʼe akontese, Jeová sei book nasaun sira atu halo buat neʼebé sira seidauk halo durante ema nia istória.
Jeová sei book nasaun sira atu halo saida? Nia sei tau “ninia hanoin” iha dikur sanulu nia laran, neʼe mak atu “sira fó sira-nia kbiit no podér ba animál fuik neʼe”. (Apok 17:13) Animál fuik kór-mean mak Nasoins Unidas. Neʼe katak sá? Governu sira sei deside rasik atu entrega sira-nia kbiit no podér ba animál fuik neʼe ka lae? Lae! Profesia fó sai katak Maromak mak sei book sira atu halo nuneʼe. (Prov 21:1; kompara ho Isaias 44:28.) Mudansa neʼe sei akontese derrepente deʼit. Tuirmai, animál fuik neʼebé hetan ona kbiit boot sei halaʼo Jeová nia tesi-lia hodi halakon relijiaun falsu hotu dala ida deʼit ba nafatin.
Saida mak ita espera atu akontese? Ita la presiza espera katak neineik-neineik governu sira sei apoia liután Nasoins Unidas. Buat neʼebé ita bele espera mak: Derrepente deʼit, Jeová sei book governu hotu atu entrega sira-nia kbiit ba Nasoins Unidas. Kuandu ida-neʼe akontese, ita sei hatene katak terus boot foin atu hahú. Nuʼudar ita hein ba tempu neʼe, “mai ita hadeer nafatin no kontinua matan-moris” tanba mudansa neʼe besik loos ona atu akontese!—1 Tes 5:6.