Ajuda ba feto neʼebé hetan abuzu
“FETO ho idade oioin iha mundu tomak hetan abuzu. Neʼe mós akontese ona ba Ita ka lae? Buka-hatene tanbasá importante ba Maromak atu feto sira sente seguru no saida mak nia sei halo kona-ba hahalok aat oioin neʼebé feto sira hasoru.”
Neʼe mak introdusaun ba informasaun ida husi jw.org ho títulu “Protesaun ba feto—Saida mak Bíblia hatete?” Parte ikus iha informasaun neʼe fó sai link atu bele download versaun PDF hodi print no hikar sai panfletu. Irmán ida iha Estadus Unidus naran Stacy hatete: “Haʼu print balu, no tuirmai haʼu no irmán ida bá vizita uma mahon ba feto sira iha ami-nia kongregasaun nia territóriu.”
Serbisu-naʼin ida ba uma mahon neʼe husu panfletu barak tan atu fahe ba feto sira neʼebé hela iha fatin neʼe, no irmán sira-neʼe fó tan panfletu 40 ho kartaun kontaktu jw.org 30. Bainhira sira vizita fali, administradora ba uma mahon neʼe husu atu hatudu ba feto sira iha neʼebá kona-ba oinsá atu halaʼo estudu Bíblia.
Stacy no irmán naʼin-rua tan mós bá uma mahon ida seluk no fahe panfletu lima, no ema mós husu atu lori tan panfletu neʼe. Serbisu-naʼin ida dehan: “Panfletu neʼe sei ajuda feto sira iha neʼe, no ami presiza ida-neʼe.” Bainhira sira vizita fali, feto balu halibur hamutuk atu haree oinsá atu estuda Bíblia, no naʼin-rua fó sai katak sira hakarak tuir reuniaun findesemana tuirmai.
Stacy hatete: “Ami hakfodak katak ema barak gosta informasaun neʼe. Panfletu neʼebé ami print loke dalan mai ami atu fahe mensajen kona-ba Maromak nia Ukun ba feto sira neʼebé sai vítima. Ami kontente haree sira-nia reasaun no oinsá Jeová sei haraik bensaun ba ami-nia hakaʼas an atu fahe liafuan diʼak ba feto sira-neʼe.”