“Kaer metin nafatin unidade neʼebé imi hetan ona liuhusi espíritu”
APÓSTOLU PAULO hatete ba ema Kristaun iha Éfeso: “Tahan malu ho domin, hakaʼas an atu kaer metin nafatin unidade neʼebé imi hetan ona liuhusi espíritu hodi moris iha dame laran.”—Éf 4:2, 3.
“Unidade” neʼebé ita hetan mak “liuhusi espíritu”. Neʼe katak Maromak nia forsa mak ajuda ita atu iha unidade. Maibé hanesan Paulo hatete, ita presiza hakaʼas an atu mantein unidade neʼe. Atu halo nuneʼe, ita ida-idak iha responsabilidade atu “kaer metin nafatin” unidade neʼe.
Nuʼudar ezemplu, imajina toʼok ema ruma fó karreta foun ba Ita. Sé mak iha responsabilidade atu tau matan ba karreta neʼe? Klaru katak neʼe mak Ita. Se Ita la tau matan no karreta neʼe sai aat, Ita labele fó-sala ba ema neʼebé fó karreta.
Hanesan neʼe mós, unidade Kristaun mak prezente husi Maromak, maibé ita ida-idak mak iha responsabilidade atu mantein ida-neʼe. Se ita la iha relasaun diʼak ho irmaun ka irmán ida, ita presiza husu ba ita-nia an: ‘Haʼu halo haʼu-nia parte atu mantein unidade ka lae?’
“HAKAʼAS AN” ATU MANTEIN UNIDADE
Hanesan Paulo hatete, dala ruma ita presiza hakaʼas an duni atu iha unidade, liuliu kuandu irmaun ka irmán ida hakanek ita-nia laran. Kuandu neʼe akontese, ita tenke hakbesik ba ema neʼe no koʼalia kona-ba problema ka lae? Dala ruma lae. Husu Ita-nia an: ‘Se haʼu koʼalia ba nia kona-ba problema, neʼe sei ajuda atu hadiʼa situasaun ka lae? Ka bele halo situasaun sai aat liután?’ Dala ruma diʼak liu mak fó perdua no haluha deʼit.—Prov 19:11; Mc 11:25.
Husu Ita-nia an: ‘Se haʼu koʼalia kona-ba problema, neʼe sei ajuda atu hadiʼa situasaun ka lae? Ka bele halo situasaun sai aat liután?’
Mai ita aplika Paulo nia matadalan atu “tahan malu ho domin”. (Éf 4:2) Tuir livru referénsia ida, fraze neʼe bele fó ideia katak “simu sira hodi la espera atu sira troka sira-nia hahalok”. Kuandu ita halo nuneʼe, ita simu realidade katak ita-nia maluk fiar-naʼin sira mak sala-naʼin, nuneʼe mós ho ita. Klaru katak ita hotu hakaʼas an atu ‘tau hahalok foun nuʼudar ita-nia roupa’, maibé la iha ida mak perfeitu. (Éf 4:23, 24; Rom 3:23) Hodi simu realidade neʼe halo fasil ba ita atu tahan malu, prontu atu fó perdua, no ‘kaer metin nafatin unidade neʼebé ita hetan ona liuhusi espíritu’.
Se ita fó perdua ba ema neʼebé hakanek Ita-nia laran no haluha kona-ba buat neʼebé akontese, ita bele goza ‘unidade hodi moris iha dame laran’. Iha lian orijinál, Éfeso 4:3 uza liafuan neʼebé hanesan ho liafuan iha Koloso 2:19 neʼebé tradús nuʼudar “tutan hamutuk”. Neʼe mak liafuan neʼebé bele refere ba uat ka nervu neʼebé liga metin ruin sira. Hanesan neʼe mós, dame no domin sei ajuda ita atu hametin ita-nia relasaun ho ita-nia maluk maski dala ruma ita la kontente ho buat neʼebé sira koʼalia ka halo.
Tan neʼe, kuandu ita sai hirus ka sente la diʼak kona-ba ita-nia maluk ruma nia hahalok, koko toʼok atu komprende sira duké kritika sira. (Kol 3:12) Tanba ema hotu sala-naʼin, Ita rasik mós dala ruma hakanek ema seluk nia laran. Hanoin-hetan ida-neʼe sei ajuda Ita atu ‘kaer metin nafatin unidade neʼebé ita hetan ona liuhusi espíritu’.