Oinsá Ita bele hatudu agradese ba Jesus nia sakrifísiu?

1-2. Jesus nia sakrifísiu book makaʼas ita atu halo saida, no tanbasá? (2 Korinto 5:​14, 15) (Haree mós dezeñu.)

SE EMA ruma salva Ita husi uma neʼebé monu no hanehan Ita, Ita sei sente oinsá kona-ba ema neʼe? Klaru katak Ita sei agradese tebes no hakarak fó-hatene ema neʼe katak Ita sei nunka haluha buat neʼebé nia halo ona ba Ita.

² Hanesan ita aprende iha lisaun antes neʼe, ita presiza ema ida atu halo ita livre husi sala no mate. Tan neʼe, Jeová fó Jesus nuʼudar sakrifísiu atu ita bele hetan perdua, iha esperansa atu sai perfeitu, no bele sai Maromak nia belun. Rezultadu mak neʼe loke dalan mai ita atu moris ba nafatin iha mundu foun. Jesus hatudu ninia domin boot ba ema hodi fó ninia moris nuʼudar sakrifísiu. No nia hadomi ema kleur antes nia mai mundu. (Prov 8:​30, 31) Apóstolu Paulo hatete: “Kristu nia domin book ami makaʼas.” (Lee 2 Korinto 5:​14, 15.) Neʼe katak ita mós presiza sente hanesan ho apóstolu Paulo hodi hatudu agradese ba Jesus no nunka haluha buat neʼebé nia halo ona mai ita.

3. Tanbasá mak dalan neʼebé ema ida-idak hatudu agradese ba Jesus nia sakrifísiu la hanesan?

³ Saida mak Ita sei halo atu hatudu agradese ba Jesus nia sakrifísiu? Karik ita ida-idak nia resposta la hanesan. Tanbasá? Nuʼudar ilustrasaun, imajina toʼok ema naʼin-tolu halo viajen ba fatin neʼebé hanesan, maibé ema ida-idak hahú viajen husi sidade neʼebé la hanesan. Dalan neʼebé sira liu sei la hanesan. Nuneʼe mós, “dalan” neʼebé Ita hili atu hatudu agradese ba Jesus nia sakrifísiu mós la hanesan, depende ba Ita-nia situasaun. Iha lisaun neʼe, ita sei aprende oinsá mak estudante Bíblia, ema Kristaun neʼebé batizmu ona, no ema neʼebé dook husi kongregasaun bele hatudu agradese ba Jesus nia sakrifísiu.

ESTUDANTE BÍBLIA

4. Jeová sente oinsá kona-ba estudante Bíblia sira?

⁴ Se Ita mak estudante Bíblia, hanoin kona-ba neʼe: Se Ita hakarak aprende kona-ba Jeová no Bíblia nia hanorin, neʼe katak Jeová hakarak Ita atu sai ninia belun. (João 6:44; Após 13:48) “Jeová mak buka-hatene didiʼak ema nia laran”, no nia kontente bainhira haree Ita halo mudansa iha Ita-nia moris atu halo nia kontente. (Prov 17:3; 27:11) Jesus nia sakrifísiu loke dalan ba Ita atu iha relasaun besik ho Jeová. (Rom 5:​10, 11) Keta haluha kona-ba neʼe.

5. Oinsá mak estudante Bíblia bele aplika konsellu iha Filipe 3:16?

⁵ Oinsá mak Ita bele hatudu agradese ba Jesus nia sakrifísiu? Dalan ida mak hodi halo tuir apóstolu Paulo nia konsellu ba ema iha Filipe: “Nuʼudar ita laʼo ba oin ona, mai ita kontinua laʼo ba oin iha dalan neʼebé hanesan.” (Flp 3:16) Tan neʼe, keta husik ema ka buat naran deʼit hapara Ita atu kontinua laʼo ba oin iha dalan neʼebé lori ba moris.—Mt 7:14; Lc 9:62.

6. Saida mak Ita bele halo se Ita sente susar atu halo mudansa? (Deuteronómio 30:​11-14) (Haree mós foto.)

⁶ Karik la fasil ba Ita atu fiar kedas buat neʼebé Ita aprende husi Bíblia. Se nuneʼe, Ita bele halo saida? Halo peskiza kona-ba buat neʼebé Ita aprende, no halo orasaun ba Jeová atu ajuda Ita komprende didiʼak. (Sal 86:11) Se Ita nafatin sente susar atu komprende hanorin neʼe, keta hanoin barak, maibé kontinua estuda Bíblia. Karik tempu tuirmai Ita sei komprende ho didiʼak. Oinsá se Ita sente susar atu para halo buat neʼebé kontra Bíblia? Hanoin-hetan katak Jeová nunka husu Ita atu halo buat neʼebé liu fali Ita-nia kbiit. Ita bele halaʼo moris iha dalan neʼebé halo nia kontente. (Lee Deuteronómio 30:​11-14.) No Jeová promete atu ajuda Ita. (Isa 41:​10, 13; 1 Kor 10:13) Tan neʼe, keta rende an. Duké hanoin kona-ba susar neʼebé Ita hasoru, fokus atu hatudu agradese ba buat neʼebé Jeová halo ona ba Ita, inklui arranju kona-ba Jesus nia sakrifísiu. Nuʼudar Ita-nia domin ba Jeová aumenta, Ita sei haree katak “ninia ukun-fuan sira la susar liu atu kumpre”.—1 João 5:3.a

7. Joven sira neʼebé boot iha lia-loos presiza hanoin kona-ba saida?

⁷ Oinsá ho imi joven sira neʼebé boot iha lia-loos? Imi mós estudante Bíblia ida. Tuir loloos, imi mak inan-aman nia estudante Bíblia neʼebé importante liu. Bíblia hatete: “Hakbesik ba Maromak, no nia sei hakbesik ba imi.” (Tgo 4:8; 1 Krón 28:9) Bainhira Ita rasik foti inisiativu atu hakbesik ba Jeová, nia mós sei hakbesik ba Ita. Neʼe laʼós tanba Ita sai boot iha lia-loos mak Jeová tau atensaun ba Ita, maibé tanba nia hakarak Ita rasik sai ninia belun. Saida mak Jeová halo ona atu ajuda Ita sai ninia belun? Nia fó ninia Oan-Mane. Keta haluha kona-ba prezente espesiál neʼe neʼebé nia fó ona ba Ita. (Rom 5:​1, 2) Tan neʼe, antes tuir Memoriál ba tinan neʼe, hanoin kleʼan kona-ba buat neʼebé Jeová no Jesus halo ona ba Ita. Tuirmai, hanoin kona-ba oinsá neʼe bele book makaʼas Ita atu halo planu espirituál hodi bele hatudu agradese ba Jesus nia sakrifísiu.b

EMA KRISTAUN NEʼEBÉ BATIZMU ONA

8. Oinsá mak ema neʼebé batizmu ona hatudu agradese ba Jesus nia sakrifísiu?

⁸ Se Ita batizmu ona, Ita halo ona buat barak atu hatudu agradese ba Jesus nia sakrifísiu. Porezemplu, Ita halo mudansa iha Ita-nia moris atu halo Jeová kontente no sai ninia belun. Ita halo tuir Jesus nia mandamentu atu haklaken no hanorin ema sai ninia dixípulu. Ita dedika Ita-nia an ba Jeová no hetan batizmu. No karik ema fó-terus tanba Ita serbí Jeová. (2 Tim 3:12) Maibé Ita kontinua serbí Jeová ho laran-metin, no neʼe hatudu katak Ita hadomi Jeová no hafolin Jesus nia sakrifísiu.—Ebr 12:​2, 3.

9. Ema neʼebé hetan ona batizmu presiza kuidadu kona-ba perigu saida?

⁹ Nuʼudar ema neʼebé hetan ona batizmu, ita presiza kuidadu kona-ba perigu sira. Nuʼudar tempu liu daudaun, ita-nia agradesimentu ba Jesus nia sakrifísiu bele sai menus. Oinsá mak neʼe bele akontese? Hanoin toʼok kona-ba ema Kristaun iha Éfeso. Jesus neʼebé hetan ona moris-hiʼas gaba kona-ba sira-nia hahalok tahan. Maski nuneʼe, nia hatete: “Haʼu la kontente ho ó kona-ba buat ida: ó husik ona ó-nia domin uluk nian.” (Apok 2:​3, 4) Liafuan neʼe hatudu katak ema Kristaun ida bele halo buat ruma ba Maromak tanba deʼit neʼe mak toman ida. Ema hanesan neʼe halo orasaun, tuir reuniaun, no bá haklaken tanba neʼe mak toman deʼit, laʼós tanba domin. Saida mak Ita bele halo se Ita sente katak Ita-nia domin ba Jeová la hanesan uluk ona?

10. Oinsá mak Ita bele “hanoin kleʼan” no ‘fó Ita-nia an tomak’ iha Ita-nia adorasaun ba Jeová? (1 Timóteo 4:​13, 15)

¹⁰ Apóstolu Paulo husu Timóteo atu “hanoin kleʼan” no ‘fó ninia an tomak’ ba ninia atividade Kristaun. (Lee 1 Timóteo 4:​13, 15.) Atu halo tuir konsellu neʼe, Ita mós bele hanoin kona-ba saida mak Ita bele halo atu kontinua laran-manas iha Ita-nia adorasaun ba Jeová. (Rom 12:11) Porezemplu, karik Ita bele uza tempu barak liután atu prepara ba reuniaun sira hodi bele tau atensaun liután bainhira tuir reuniaun. Ka kuandu Ita halaʼo estudu pesoál, Ita bele buka fatin neʼebé hakmatek atu bele hanoin kleʼan kona-ba buat neʼebé Ita aprende. Neʼe sei ajuda Ita atu hetan benefísiu liután. Hanesan ita presiza aumenta ai atu ahi kontinua lakan, Ita mós presiza kontinua halo buat sira-neʼe atu bele nafatin hatudu agradese ba Jesus nia sakrifísiu no buat hotu neʼebé Jeová halo ona ba Ita. No mós, durante semana antes Memoriál, Ita bele hanoin kona-ba bensaun furak neʼebé Ita hetan nuʼudar Testemuña ba Jeová. Neʼe sei book Ita makaʼas atu sente agradese liután ba Jesus nia sakrifísiu, neʼebé nuʼudar baze atu Ita bele sai belun ho Jeová.

11-12. Se dala ruma Ita sente ladún laran-manas, neʼe katak Ita lakon ona Jeová nia espíritu ka lae? Esplika toʼok. (Haree mós foto.)

¹¹ Se dala ruma Ita sente ladún laran-manas atu serbí Jeová hanesan tempu uluk, neʼe la dehan katak Ita lakon ona Jeová nia espíritu. Hanoin toʼok apóstolu Paulo nia liafuan ba ema Korinto kona-ba ninia serbisu haklaken: “Se haʼu fó sai liafuan diʼak ho laran-todan, haʼu halo nafatin serbisu neʼe tanba Naʼi fó ona mai haʼu.” (1 Kor 9:17) Ninia liafuan katak sá?

¹² Paulo mós dala ruma sente laran-todan kona-ba ninia serbisu haklaken. Maibé, nia deside metin atu kontinua haklaken maski nia sente hanesan neʼe. Hanesan Paulo, Ita mós bele deside metin atu halo buat neʼebé loos maski Ita ladún iha motivasaun. Tan neʼe, halo orasaun ba Jeová atu husu “hakarak no kbiit atu halo buat neʼebé nia hakarak”. (Flp 2:13) Kontinua halaʼo Ita-nia toman espirituál, no fiar bá katak nuʼudar tempu liu daudaun, Ita sei laran-manas fali no Ita-nia domin ba Jeová sei sai metin fali.

13. Oinsá mak ita bele haree didiʼak ita-nia an katak ita “moris tuir fiar”?

¹³ Diʼak atu hanoin kona-ba oinsá ita halaʼo ita-nia moris hodi halo tuir Paulo nia konsellu iha 2 Korinto 13:5: “Kontinua koko imi-nia an atu hatene se imi moris tuir fiar ka lae. Kontinua haree didiʼak imi ema oinsá.” Porezemplu, Ita bele husu ba Ita-nia an: ‘Haʼu tau uluk Jeová iha haʼu-nia moris ka lae?’ (Mt 6:33) ‘Buat neʼebé haʼu nonton ka halo hatudu katak haʼu odi buat neʼebé aat ka lae?’ (Sal 97:10) ‘Haʼu haburas dame no unidade iha kongregasaun ka lae?’ (Éf 4:​2, 3) Memoriál mak tempu neʼebé diʼak atu hanoin kona-ba buat sira-neʼe. Bainhira ita hanoin kona-ba buat neʼebé Jeová no Jesus halo ona mai ita, neʼe sei book ita atu hatudu agradese ba Jeová no hatudu katak ita moris ba Kristu, laʼós ba ita-nia an rasik.

EMA NEʼEBÉ DOOK ONA HUSI KONGREGASAUN

14. Tanbasá irmaun-irmán balu para atu tuir reuniaun?

¹⁴ Irmaun-irmán balu para atu tuir reuniaun maski sira serbí ona Jeová ho laran-metin ba tinan barak. Tanbasá? Sira balu “hanoin resin kona-ba moris neʼe” toʼo lakon forsa atu serbí Jeová. (Lc 21:34) Sira seluk fali sidi ho maluk Kristaun nia liafuan ka hahalok. (Tgo 3:2) No ema seluk tan halo sala neʼebé sériu no dada an atu buka ajuda. Maski nuneʼe, saida mak Ita bele halo se Ita dook ona husi kongregasaun? Oinsá mak Jesus nia sakrifísiu no domin ba Jeová no Jesus bele book makaʼas Ita?

15. Oinsá mak Jeová hatudu katak nia hanoin bibi neʼebé lakon? (Ezequiel 34:​11, 12, 16)

¹⁵ Hanoin toʼok saida mak Jeová sente kona-ba sira neʼebé dook ona husi kongregasaun. Nia la haluha sira. Maibé, nia buka sira hanesan bibi neʼebé lakon. Nia tau matan no ajuda sira atu fila fali ba nia. (Lee Ezequiel 34:​11, 12, 16.) Jeová mós halo hanesan neʼe ba Ita ka lae? Sin! Tanba Ita lee informasaun neʼe, neʼe hatudu katak Ita nafatin hakarak halo nia kontente. Hanesan Jeová haree Ita-nia laran no dada ita tama ba lia-loos, nia mós sei dada ita atu fila fali ba nia.

16. Saida mak bele ajuda bibi neʼebé lakon atu fila fali ba Jeová? (Haree mós foto.)

¹⁶ Broxura Kembalilah kepada Yehuwa fó sai liafuan neʼebé fó kmaan hodi dehan: “Fiar bá katak Jeová sei ajuda Ita iha buat hotu neʼebé Ita halo atu fila fali ba nia. Nia sei ajuda Ita atu tahan hasoru laran-taridu, kura Ita-nia laran-kanek, no sente dame iha neon no laran tanba iha konxiénsia neʼebé moos. Neʼe sei halo fasil ba Ita atu serbí fali Jeová hamutuk ho irmaun-irmán sira.” Hanoin-hetan katak katuas sira mós hakarak tebes atu ajuda Ita. Sira bele sai hanesan “subar-fatin husi anin, no fatin mahon husi udan boot”. (Isa 32:2) Ami fiar katak Ita hafolin duni Jesus nia sakrifísiu. Tan neʼe, husu Ita-nia an: ‘Hakat saida mak haʼu bele halo atu “hadiʼa problema” ho Jeová?’ (Isa 1:18; 1 Ped 2:25) Porezemplu, Ita bele tuir reuniaun iha Reuniaun-Fatin ka lae? Ita bele koʼalia ba katuas ida katak Ita hakarak fila fali ba Jeová ka lae? Karik katuas neʼe sei arranja ema ida atu estuda Bíblia ho Ita ba tempu balu. Ita bele fiar katak Jeová sei haraik bensaun ba Ita-nia hakaʼas an atu hatudu agradese ba ninia Oan-Mane nia sakrifísiu.

SAIDA MAK ITA SEI HALO?

17-18. Oinsá mak ita bele uza didiʼak ita-nia tempu iha loron sira antes Memoriál ba tinan neʼe?

¹⁷ Jesus hatete katak Jeová haruka nia mai mundu atu fó ninia moris nuʼudar sakrifísiu, “atu nuneʼe ema hotu neʼebé hatudu fiar ba nia sei la lakon, maibé hetan moris rohan-laek”. (João 3:16) Tanba Jesus mate ba ita, Jeová bele halo ita livre husi sala no mate. Ita lakohi haluha kona-ba neʼe. (Rom 3:​23, 24; 2 Kor 6:1) Iha loron sira antes Memoriál, uza tempu atu hanoin kona-ba domin neʼebé Jeová no Jesus hatudu ona. Neʼe sei ‘book ita makaʼas’ atu hatudu agradese ba sira-nia domin.

¹⁸ Oinsá mak Ita bele hatudu ida-neʼe? Karik Ita-nia resposta mak la hanesan ho ema seluk. Maibé Ita bele fiar katak Jeová sei haraik bensaun ba Ita no mós irmaun-irmán barak iha mundu tomak nia hakaʼas an atu “moris ba ida neʼebé mate ba sira no moris hiʼas ona”.—2 Kor 5:15.