“Ó mak ema neʼebé folin-boot tebes”!

1-2. Saida mak bele ajuda ita atu fiar katak ita iha folin boot ba Jeová?

JEOVÁ hafolin ninia atan hotu, maibé sira balu sente katak sira la iha folin. Karik sira sente hanesan neʼe tanba ema seluk haree sira la vale. Ita mós hasoru situasaun hanesan neʼe ka lae? Se nuneʼe, saida mak bele ajuda Ita atu fiar katak Ita iha folin boot ba Jeová?

² Buat ida neʼebé bele ajuda ita mak hodi lee no hanoin kleʼan kona-ba istória sira iha Bíblia neʼebé hatudu katak Jeová hafolin ninia atan sira. Ninia Oan-Mane Jesus trata ema ho laran-diʼak no respeitu. Neʼe hatudu katak Jesus no Jeová hafolin tebes sira neʼebé sente la iha folin. (João 5:19; Ebr 1:3) Iha lisaun neʼe, ita sei aprende kona-ba: (1) oinsá mak Jesus ajuda ema rekoñese katak sira iha folin no (2) oinsá mak ita rasik bele hametin ita-nia fiar katak ita iha folin boot ba Jeová.—Ageu 2:7.

OINSÁ MAK JESUS AJUDA EMA REKOÑESE KATAK SIRA IHA FOLIN

3. Oinsá mak Jesus trata ema Galileia neʼebé buka ajuda husi nia?

³ Bainhira Jesus haklaken iha Galileia, ema barak hakbesik Jesus atu rona ba nia no hetan kura. Jesus hanoin sira tanba haree katak “ema hanehan no la tau matan ba sira, no sira hanesan bibi neʼebé bibi-atan la iha”. (Mt 9:36) Sira-nia ulun-naʼin relijiaun hatún sira no bolu sira nuʼudar ema neʼebé “hetan malisan”. (João 7:​47-49) Maibé Jesus trata sira ho laran-diʼak no respeitu hodi uza ninia tempu atu hanorin no kura sira. (Mt 9:35) Nia mós treinu apóstolu sira atu haklaken no fó sira kbiit atu “kura ema moras” hodi bele ajuda ema barak liután.—Mt 10:​5-8.

4. Saida mak ita aprende husi dalan neʼebé Jesus trata ema neʼebé ema seluk la hafolin?

⁴ Jesus hatudu laran-diʼak no respeitu ba ninia rona-naʼin sira, no neʼe hatudu katak nia no ninia Aman hafolin tebes sira neʼebé ema seluk la hafolin. Se Ita serbí Jeová maibé sente la iha folin, hanoin kona-ba dalan neʼebé Jesus trata ema hanesan neʼe, neʼebé hakarak aprende husi nia. Hodi halo nuneʼe sei ajuda Ita komprende katak Ita iha folin boot ba Jeová.

5. Esplika toʼok feto ida iha Galileia hasoru susar saida deʼit.

⁵ Jesus laʼós hanorin deʼit ema-lubun, maibé nia mós tau atensaun ba ema ida-idak. Porezemplu, durante haklaken iha Galileia, Jesus hasoru feto ida neʼebé moras raan suli ba tinan 12 ona. (Mc 5:25) Tuir Ukun-Fuan, kondisaun neʼe halo feto neʼe la moos no ema neʼebé kona nia mós sai la moos. Tan neʼe, nia la livre atu ransu ho ema seluk no karik mesamesak deʼit ba tempu barak ona. Nia mós labele tuir selebrasaun no bá sinagoga atu adora Jeová hamutuk ho ema seluk. (Lev 15:​19, 25) Klaru katak feto neʼe hasoru susar laʼós deʼit iha dalan fíziku, maibé mós emosaun.—Mc 5:26.

6. Oinsá mak feto neʼebé moras hetan kura?

⁶ Feto neʼebé moras hakarak Jesus kura nia. Maibé nia la husu kedas ba Jesus. Tanbasá? Karik nia sente moe ka la iha folin tanba ninia kondisaun. Ka karik nia taʼuk katak Jesus sei haruka nia atu hadook an husi ema-lubun. Tan neʼe nia kona deʼit Jesus nia roupa hodi fiar katak neʼe sei halo nia diʼak fali. (Mc 5:​27, 28) Feto neʼe iha fiar neʼebé metin, no hetan duni kura. Kuandu Jesus husu sé mak kona nia, feto neʼe fó-hatene katak nia mak kona Jesus. Jesus nia reasaun mak oinsá?

7. Jesus trata feto neʼe iha dalan oinsá? (Marcos 5:34)

⁷ Jesus trata feto neʼe ho laran-diʼak no respeitu. Nia nota katak feto neʼe “taʼuk no nakdedar”. (Mc 5:33) Tan neʼe, Jesus koʼalia ho laran-diʼak hodi fó kmaan ba nia. Jesus mós bolu nia “oan-feto”. Hodi uza liafuan neʼe, Jesus hatudu katak nia laʼós deʼit respeitu feto neʼe maibé mós hatudu laran-diʼak no domin. (Lee Marcos 5:34.) Neʼe mak dala ida deʼit neʼebé Bíblia temi katak Jesus bolu feto ida nuʼudar “oan-feto”. Karik nia uza liafuan neʼe tanba haree katak feto neʼe taʼuk tebes. Imajina toʼok feto neʼe sente oinsá! Se Jesus la koʼalia hodi fó kmaan ba nia, karik nia sai diʼak iha dalan fíziku maibé sei sente laran-susar no fó-sala ba ninia an. Jesus laʼós deʼit hakarak feto neʼe hetan kura, maibé mós hakarak feto neʼe hatene katak nia mak oan-feto neʼebé folin-boot ba Aman iha lalehan.

8. Irmán ida husi Brazíl hasoru susar saida deʼit?

⁸ Ohin loron, Jeová nia povu balu mós hasoru problema saúde no neʼe afeta sira-nia emosaun. Pioneiru regulár ida husi Brazíl naran Mariaa moris mai ain la iha no liman karuk la iha. Nia hatete: “Kolega sira iha eskola goza beibeik haʼu tanba haʼu aleijadu. Sira bolu haʼu ho naran neʼebé hakanek haʼu-nia laran. Haʼu-nia família rasik mós halo haʼu sente la iha folin.”

9. Saida mak ajuda Maria atu sente katak nia iha folin boot ba Jeová?

⁹ Saida mak ajuda Maria? Bainhira nia sai Testemuña ba Jeová ida, irmaun-irmán sira hatudu domin boot ba nia no ajuda nia atu haree ninia an tuir Jeová nia haree. Nia hatete: “Irmaun-irmán barak tebes ajuda ona haʼu! Haʼu agradese tebes ba Jeová tanba fó família espirituál neʼebé furak mai haʼu.” Irmaun-irmán sira ajuda Maria atu sente katak nia iha folin boot ba Jeová.

10. Maria Madalena hasoru susar saida deʼit? (Haree mós dezeñu.)

¹⁰ Hanoin toʼok kona-ba ema ida tan neʼebé Jesus ajuda, neʼe mak Maria Madalena neʼebé uluk anju aat hitu mak domina. (Lc 8:2) Karik anju aat sira halo nia hatudu hahalok oin-seluk no rezultadu mak ema seluk hadook an husi nia. Durante tempu neʼe, ita bele fiar katak nia sente ema la hadomi nia no la iha ida mak bele ajuda nia. Maibé ikusmai Jesus duni sai anju aat sira-neʼe husi nia, no nia sai dixípulu ida neʼebé laran-metin. Iha dalan saida tan mak Jesus ajuda Maria Madalena komprende katak nia iha folin boot ba Maromak?

11. Oinsá mak Jesus ajuda Maria Madalena komprende katak nia iha folin boot ba Jeová? (Haree mós dezeñu.)

¹¹ Jesus konvida Maria Madalena atu akompaña nia no dixípulu sira seluk hodi haklaken iha fatin oioin.b Neʼe ajuda Maria atu aprende liután kuandu rona Jesus hanorin ema seluk. No mós iha loron neʼebé Jesus moris hiʼas, nia mosu uluk ba Maria no koʼalia ho nia. Jesus mós fó knaar ba Maria atu fó-hatene dixípulu seluk katak nia moris hiʼas ona. Hodi halo nuneʼe, Jesus ajuda Maria komprende katak nia iha folin boot ba Jeová!—João 20:​11-18.

12. Saida mak halo Lídia sente la iha folin?

¹² Hanesan Maria Madalena, ema barak ohin loron mós sente la iha folin. Irmán Lídia husi España hatete katak antes nia moris, ninia amá hanoin atu halo abortu. Lídia mós hanoin-hetan, kuandu sei labarik ninia amá la tau matan nia no trata aat nia. Nia hatete: “Haʼu sempre hakarak atu ema seluk hadomi haʼu no sai haʼu-nia belun. Haʼu taʼuk katak la iha ema ida mak sei hadomi haʼu tanba haʼu-nia amá halo haʼu sente haʼu mak ema neʼebé aat.”

13. Saida mak ajuda Lídia komprende katak nia iha folin boot ba Jeová?

¹³ Bainhira Lídia komesa estuda Bíblia, ninia sentimentu troka. Liuhusi orasaun, lee Bíblia, no irmaun-irmán sira-nia liafuan no hahalok ajuda nia komprende katak nia iha folin boot ba Jeová. Nia dehan: “Haʼu-nia laʼen sempre hatete katak nia hadomi tebes haʼu no fó-hanoin beibeik haʼu kona-ba haʼu-nia hahalok diʼak sira. Haʼu-nia belun sira mós halo hanesan neʼe mai haʼu.” Ita mós bele ajuda ema ruma iha kongregasaun komprende katak nia iha folin boot ba Jeová ka lae?

OINSÁ ATU HAREE ITA-NIA AN TUIR JEOVÁ NIA HAREE

14. Oinsá mak 1 Samuel 16:7 ajuda ita komprende dalan neʼebé Jeová haree ita? (Haree mós kaixa “Tanbasá Jeová hafolin ninia atan sira?”)

¹⁴ Hanoin-hetan katak Jeová nia haree kona-ba ita la hanesan ho mundu nia haree. (Lee 1 Samuel 16:7.) Jeová hafolin ita laʼós tanba ita mak bonita ka bonitu, iha pozisaun, ka edukasaun boot. (Isa 55:​8, 9) Tan neʼe koko haree ita-nia an tuir Jeová nia haree, laʼós mundu nia haree. Karik ita bele lee istória iha Bíblia neʼebé hatudu katak Jeová hafolin ninia atan neʼebé dala ruma sente la iha folin, hanesan Elias, Noemi, no Ana. Ita mós bele hakerek Ita rasik nia esperiénsia neʼebé hatudu katak Jeová hadomi no hafolin tebes Ita. Ita mós bele haree informasaun husi ita-nia publikasaun sira kona-ba sente folin-laek.c

15. Tanbasá Jeová haree Daniel nuʼudar “ema neʼebé folin-boot tebes”? (Daniel 9:23)

¹⁵ Rekoñese katak Ita-nia laran-metin halo Ita iha folin boot ba Jeová. Bainhira profeta Daniel tinan besik 100, nia sente “fraku tebes” no laran-kraik. (Dan 9:​20, 21) Oinsá mak Jeová fó kmaan ba nia? Jeová haruka anju Gabriel atu fó-hatene Daniel katak nia mak “ema neʼebé folin-boot tebes” no Jeová rona ona ninia orasaun. (Lee Daniel 9:23.) Tanbasá Daniel iha folin boot tebes ba Jeová? Tanba Daniel laran-metin no hadomi hahalok loos. (Eze 14:14) Istória neʼe hakerek iha Bíblia atu fó kmaan mai ita. (Rom 15:4) Jeová mós rona Ita-nia orasaun no hafolin Ita tanba Ita hadomi justisa no serbí nia ho laran-metin.—Miq 6:​8, nota; Ebr 6:10.

16. Saida mak bele ajuda Ita atu haree Jeová nuʼudar Aman neʼebé hadomi Ita?

¹⁶ Haree Jeová nuʼudar Aman neʼebé hadomi Ita. Nia hakarak ajuda Ita, laʼós buka Ita-nia sala. (Sal 130:3; Mt 7:11; Lc 12:​6, 7) Hodi hanoin kleʼan kona-ba neʼe ajuda ona ema barak neʼebé uluk sente la iha folin. Porezemplu, irmán ida naran Michelle husi España sente la iha folin tanba ninia laʼen trata nia ho liafuan la diʼak ba tinan barak. Michelle hatete: “Bainhira haʼu sente la iha folin, haʼu koko imajina Jeová koʼus haʼu no hatudu domin no proteje haʼu.” (Sal 28:9) Irmán ida naran Laura husi Áfrika Súl fó-hanoin ninia an: “Jeová ho domin dada haʼu ba nia, ajuda haʼu atu nafatin besik ho nia, no fó haʼu knaar atu hanorin ema seluk kona-ba nia, neʼe katak nia haree haʼu iha folin boot.”—Os 11:4.

17. Saida mak bele ajuda Ita atu fiar katak Jeová kontente ho Ita? (Salmo 5:12) (Haree mós foto.)

¹⁷ Fiar bá katak Jeová kontente ho Ita. (Lee Salmo 5:12.) David hatete katak Jeová kontente ho ema laran-loos, no Nia sai hanesan “eskudu boot” neʼebé proteje sira. Hodi hatene katak Jeová kontente ho Ita no apoia Ita, neʼe sei proteje Ita husi sentimentu dúvida katak Ita la iha folin. Oinsá mak Ita bele hatene katak Jeová kontente ho Ita? Hanesan ita aprende ona, liuhusi Bíblia Jeová fó sai katak ita iha folin boot. Jeová mós uza katuas sira, belun, no ema seluk atu fó-hanoin Ita katak Nia hafolin tebes Ita. Saida mak Ita presiza halo se ema ruma koʼalia liafuan atu anima Ita?

18. Bainhira ema gaba Ita, tanbasá Ita presiza simu ida-neʼe?

¹⁸ Se ema neʼebé koñese didiʼak Ita no hadomi Ita mak gaba Ita ho laran, simu ida-neʼe. Hanoin-hetan, karik Jeová mak uza sira atu ajuda Ita hatene katak Nia kontente ho Ita. Irmán Michelle neʼebé temi ona, hatete: “Neineik-neineik, haʼu aprende atu simu ema seluk nia liafuan neʼebé hametin haʼu. Susar ba haʼu atu halo ida-neʼe, maibé haʼu hatene katak neʼe mak buat neʼebé Jeová hakarak haʼu atu halo.” Katuas sira mós ajuda Michelle atu fiar katak Jeová kontente ho nia. Agora nia serbí nuʼudar pioneiru no mós ajuda iha Betel.

19. Tanbasá Ita bele fiar katak Ita iha folin boot ba Jeová?

¹⁹ Jesus ho laran-diʼak fó-hanoin ita katak ita-nia Aman Jeová interese no tau matan ba ita ida-idak. (Lc 12:24) Tan neʼe, ita bele fiar katak ita iha folin boot ba Jeová. Ita labele haluha ida-neʼe! No mai ita hakaʼas an atu ajuda ema seluk komprende katak sira mós iha folin boot ba Jeová!