Talily Soa Nisorate i Matio

19 Naho fa boake nirehake ze raha zay ty Jesosy, le niala ta Galelia tao. Nitsake ty Renerano i Jordana reke, le niavy amy ty efe-tane i Joda agne. 2 Nisy vahoake maro nagnorike aze ka ty tagne, le nisitragne’e iaby ze narare.

3 Tafara izay, le nimbama’e mbeo o Fariseò mba hitsapa hevetse aze. Nagnontane iareo tie: “Azo ty lahilahy atao vao ty misarake amy ty vali’e ndra inogn’ino ty anto’e?” 4 Le hoe ty navale’e iareo: “Mbe tsy nivakie’areo vao fa i namorogne o ndatio tam-boaloha’e tagney, le namboatse iareo ho lahilahy naho ampela. 5 Le nisaontsy reke tie: ‘Izay ty anto’e mahavy o lahilahio hienga ty rae’e naho ty rene’e, le hiharo amy ty vali’e sady hanjare ho nofotse raike avao iareo.’ 6 Fa tsy roe sasa iareo fa nofotse raike avao. Ao areke ze naharon’Andrianagnahare baogne, tsy hosarahe o ndaty.” 7 Le hoe iareo tama’e: “A nagnino ty Mosesy ro nirehake tie afake misarake amy ty vali’e ty lahilahy, sady afake magnomey taratasy fisaraham-panambaliagne aze?” 8 Le hoe ty Jesosy tamy iareo: “Noho inareo mafe fo ty nahavy i Mosesy nagnenga anareo hisarake amy ty vali’areo. Faie tsy hoe izay ty nanoan’Agnahare aze tam-boaloha’e tagne. 9 Rehafeko ama’areo, fa ndra ia ndra ia misarake amy ty vali’e sady manambaly ndaty hafa, le magnitsakitsa-baly, naho tsy tihoe fijangajangagne avao, ty anto’e isaraha iareo.”

10 Le hoe i mpiana’e rey tama’e: “Naho toe izay ty manjò o lahilahy manambalio, le ndra aleo tsy manambaly.” 11 Le hoe reke tamy iareo: “Tsy ze kila ndaty ro afake manao izay, fa ze nahazo i fagnomezagney avao. 12 Ty anto’e, misy zao tsy manambaly satria misy handra’e boake an-troke agne. Misy ka tsy manambaly satria nivosire* o ndaty. Faie misy ka ty mijobogne ty tsy hanambaly noho i Fanjakà i lagnitseỳ. Soa areke ty tsy manambaly hoahy ze mahavita manao izay.”

13 Ie naho fa niavy eo, le nisy ajaja nindesegne mbama’e mbeo mba hametraha’e tagnagne naho hovavahe’e. Faie nendaha i mpianatse rey i ndaty ninday i ajaja reỳ. 14 Faie hoe ty Jesosy tamy iareo: “Engao’areo avao o ajaja reo fa ko sakana’areo tsy ho mbamako mbetoa, satria ze ndaty manahake iareo ro hahazo i Fanjakà i lagnitseỳ.” 15 Nametraha’e tagnagne areke i ajaja rey, le nandeha naho fa niavy eo.

16 Nisy ajalahy raike zay nagnantogne aze tafara izay, le nirehake tie: “O Mpagnanatse, ino ty raha soa tsy maintsy ataoko mba hahazoako i havelogne nainai’ey?” 17 Le hoe reke tama’e: “Nagnino rehe ro magnontane ahy miomba ty atao tihoe soa? Raike avao ty soa. Faie naho tea’o ty hahazo i havelogney, le oriho lognandro i lily rey.” 18 Le hoe reke tamy i Jesosy: “I manao akore rey zay?” Le hoe ty Jesosy: “Ko mamono ndaty, ko magnitsakitsa-baly, ko mangalatse, ko mitsangagne ho vavolombelogne mavande, 19 hajao ty rae’o naho ty rene’o, le teavo manahake ty vata’o ty nama’o.” 20 Le hoe i ajalahỳ tamy i Jesosy: “Fa noriheko iaby i raha rezay. Ino ka ty mbe mila ataoko?” 21 Le hoe ty Jesosy tama’e: “Naho tea’o ty tsy hisy tsiko’e,* le mandehana avaroto iaby ty fanagna’o, le zarao amo o mahantrao ty vili’e, le hanagne harena mihaja an-dagnitse agne rehe. Andao ka hagnorike ty liako.” 22 Nalahelo i lahilahỳ naho fa naharey izay, le nandeha. Ty anto’e, nimaro ty fanagna’e. 23 Hoe ty Jesosy tamy i mpiana’e rey naho fa niavy eo: “Volagneko ama’areo to vata’e, fa ho sarotse amo o mpagnarivò ty hizilike amy i Fanjakà i lagnitsey ao. 24 Rehafeko ama’areo ka, fa ndra mbe ho moramora ty hiziliha o ramevao amo o lavam-pinjaitseo ta tie hiziliha o mpagnarivò amy i Fanjakàn’Andrianagnaharey ao.”

25 Tena nilatsa i mpianatse rey naho fa naharey izay, le hoe iareo: “Ia maregne zane ty ndaty ho voavonje?” 26 Le nihentea i Jesosy soa iareo, sady hoe reke tamy iareo: “Naho amo o ndatio le tsy hovita zay, faie tsisy raha tsy hovitan’Agnahare.”

27 Le hoe ty navale i Petera aze: “Fa nafoe’ay iaby ze kila raha, le nagnorike azo zahay. Ino zane ty raha hoazo’ay?” 28 Le hoe ty Jesosy tamy iareo: “Volagneko ama’areo to vata’e, fa amy i fotoagne fagnavaozagne ze kila rahay, naho fa mitoboke amy ty sezan-droandriagne mamilepiletse eo i Ana o ndatỳ, le inareo nagnorike ty liako reo, hitoboke amy ty sezan-droandriagne 12, hitsara ty foko 12 o Israelio. 29 Le ze ndaty fa nahafoe tragno, ndra rahalahy, ndra rahavave, ndra rae, ndra rene, ndra anake, ndra tane noho ty agnarako, le hahazo raha mihoatse lavitse* o raha nafoe’e reo sady handova i havelogne nainai’ey.

30 “Faie maro amy ze voaloha’e ro hanjare fara’e, le ze fara’e hanjare voaloha’e.