Talily Soa Nisorate i Matio

20 “I Fanjakà i lagnitseỳ, le manahake ty lahilahy raike tompon-tragno nagnalegnalegne maraindray bey, mba hipay mpiasa hiasa i teteke fambolea’e voalobokey. 2 Naho fa boake nifagnarake tamy i mpiasa rey reke tie denaria raike ty hokarama iareo agnate ty andro raike, le nampandehane’e an-tete’e agne iareo. 3 Nandeha niboake indraike reke tamy ty lera fahatelo* teo ho eo, le nahatrea ndaty hafa nitsangagne avao ta bezara ey. 4 Hoe reke tamy iareo: ‘Mandehana nareo miasa amy i teteko famboleagne voalobokey agne ka, fa homeako anareo ty karama toko’e hoazo’areo.’ 5 Le nandeha iareo. Mbe nandeha niboake indraike reke tamy ty lera fahaenegne naho tamy ty lera fahasive,* le nanao manahake i taloha teo rey. 6 Nandeha niboake fara’e reke tamy ty lera faha-11,* le mbe nahatrea ndaty hafa nitsangagne avao, le hoe reke tamy iareo: ‘Nagnino nareo hoe mitsangagne eto avao tie androany fa tsy nandeha niasao?’ 7 Hoe ty navale iareo: ‘Satria tsy nisy ndaty nagnomey asa anay.’ Le hoe reke tamy iareo: ‘Akia ka nareo hiasa amy i teteko famboleagne voalobokey agne.’

8 “Naho fa niharivariva i androy, le hoe i tompo i tanem-boalobokeỳ tamy i lahilahy nampiandraikete’e i asa’eỳ: ‘Tokavo iaby i mpiasa rey, le aloao i karama iareoy. I ila’e niavy fara’e rey ty anombohagne aze, le faragno amy i ila’e niavy voaloha’e rey.’ 9 Naho fa niavy i ila’e niasa tamy ty lera faha-11 rey, le nahazo denaria raike isa’e. 10 Naho fa niavy areke i ila’e niasa voaloha’e rey, le nieretseretse fa hahazo mihoatse izay, faie kay ndra mbe denaria raike isa’e avao ka ty nimeagne iareo. 11 Ie niazo iareo i karama iareoy, le nigneogneogne tamy i tompon-tragnoy iareo, 12 sady nirehake tie: ‘Nagnino nampitovie’o tamy i niasa tafara rey avao ty karama’aio? Ie amy izao iareo niasa lera’e raike avao, fa izahay niasa avao tagnate i androy sady dinemo i tarignandrokey.’ 13 Faie izao ty navale’e ty raike amy iareo: ‘Tsy manao ty tsy rare’e ama’o raho ragnetse. Ataoko denaria raike ty nifagnarahantika, sa tsy izay? 14 Rambeso areke i karama’oy, le akia rehe mandehana. Teako hampitoviegne amy ty nimeiko azo avao ka ty homeako i ila’e niavy fara’e rey. 15 Tsy managne fahefagne hanao ze teako hatao amo o fanagnakò vao raho? Sa rehe mialogne* satria raho soa fagnahy?’* 16 Le hoe izay ka fa ty ndaty fara’e hanjare voaloha’e, le ty voaloha’e hanjare fara’e.”

17 Tamy i Jesosy nionjogne mba Jerosalema mbeoy, le nente’e nikisake kede i mpiana’e 12 rey, le hoe reke tamy iareo: 18 “Hai’areo, mionjogne mba Jerosalema mbeo itikagne hinane zao, le hatolotse o lahibey ty mpisorogneo naho o mpampianatse lalànao* i Ana o ndatỳ. Homelohe iareo mba hovonoegne ka reke, 19 le hatolo iareo o ndaty boake amy ty firenena hafao. Hotsikihe iareo naho hokaravasie iareo reke, le avy eo hopehe iareo amy ty boda-katae. Faie hovelomegne indraike reke amy ty andro fahatelo.”

20 Naho fa niavy eo, le nimbamy i Jesosy mbeo i valy i Zebedioy naho i ana’e roe lahy rey. Le niankohoke tamy i Jesosy eo reke, satria misy raha tea’e hangatahegne ama’e. 21 Le hoe ty Jesosy tama’e: “Ino ty tea’o hataoko ama’o?” Le hoe i rakembay tama’e: “Naho avy amy i Fanjakà’oy agne rehe, le mirehafa mba hatoboke agnila’o eo ty ana-dahiko roe retoa. Ty raike ankavia’o eo, le ty raike ankavana’o eo.” 22 Le hoe ty Jesosy: “Tsy hai’areo ty raha angatahe’areo. Vita’areo vao ty hinogne amy i kope hinomakoy?” Le hoe iareo tie: “Vita’ay.” 23 Le hoe reke tamy iareo: “Maregne fa hinogne amy i kope hinomakoy nareo, fa ty hitoboke ankaviako eo naho ankavanako eo, le tsy iraho ty manendre aze, fa ze fa nomane i Raeko ho amy izay avao.”

24 Naho fa naharey ty miomba izay i folo lahy rey, le niboseke tamy iareo mirahalahy. 25 Faie nitokave i Jesosy mbama’e mbeo iareo, le hoe reke: “Fanta’areo fa manjakazaka amy ty firenena indese’e o mpitondrao, le o lahibeio magnampatse fahefagne amy iareo. 26 Faie tsy toko’e hisy hoe izay ty ama’areo eo. Fa ze te ho lahibey ama’areo, le tsy maintsy ho mpanompo’areo. 27 Ze te ho voaloha’e ama’areo, le tsy maintsy manompo anareo. 28 Hoe izay ka i Ana o ndatỳ: Tsy niavy mba hotompoegne reke fa mba hanompo, le hagnomey ty fiai’e ho solovoigne mba hotakalo ty maro.”

29 Naho fa niboake boake a Jeriko ao iareo, le nisy vahoake maro nagnorike aze. 30 Nisy goa roe lahy nitoboke ta moron-dalagne eo rezay, naharey tie nandalo ty Jesosy, le nitoka mafe hoe izao: “O Tompo Ana i Davida, mba iferegneso zahay!” 31 Faie nendaha i ndaty maroy naho nampitsigne iareo iareo roe. Faie ndra tie teo zay, le vao mainke nitoka mafe iareo tie: “O Tompo Ana i Davida, mba iferegneso zahay.” 32 Nijanogne areke ty Jesosy sady nitoka iareo, le hoe reke: “Ino ty raha tea’areo hataoko ama’areo?” 33 Le hoe iareo tama’e: “O Tompo, mba ampahatreavo zahay.” 34 Niferegnesa i Jesosy iareo, le nitsapae’e i maso iareoy. Eo naho eo avao, le avy le nahatrea iareo sady nagnorike aze.