Talily Soa Nisorate i Matio
22 Mbe nanao fagnoharagne avao ka ty Jesosy naho fa nirehake tamy iareo tie: 2 “I Fanjakà i lagnitseỳ, le azo ampitoviegne amy ty mpanjaka raike nanao fete bey tamy ty mariaze ty ana-dahi’e. 3 Nirahe’e i mpanompo’e rey mba hangalake i ndaty nasaegne amy i fetey rey, faie tsy nimete niavy iareo. 4 Nagnirake mpanompo hafa indraike reke, le nirehake tie: ‘Rehafo i ndaty nasaegne rey tie: “Fa nagnomagne hanegne atoandro raho. Fa vinonoko i agnombeko naho i bibiko nivondrahekoy. Fa voaomagne iaby ze kila raha. Miavia areke nareo amo o fete bey iohoe.”’ 5 Faie tsy nidarea i ndaty nasaegne rey zay, fa ndra nandeha an-teteke agne ty raike, le ty raike nandeha namarotse, 6 fa ty ila’e nitsepake i mpanompo rey, le nagnompa naho nijera vaho namono iareo.
7 “Niboseke i mpanjakay, le nagnirake tafike mba hamonovono i ndaty mpamono ndaty rey naho hagnoro i tanà iareoy. 8 Tafara izay, le hoe i mpanjakay tamy i mpanompo’e rey: ‘Fa vita omagne iaby ze kila raha, faie i ndaty nasaegne rey ro tsy fagneva i fetey. 9 Akia areke nareo mandehana amy i lalagne miboake i tanàgneỳ, le asao’areo hagnatreke i fetey iaby ze ndaty trea’areo ey.’ 10 Le nandeha amy i lalagney ey i mpanompo rey, le navory iareo iaby ze ndaty nitrea iareo tey, ndra ndaty raty fagnahy ndra ndaty soa fagnahy. Le nifeno ndaty nihinagne* ty tamy i efetse fanoagne mariazey.
11 “Naho fa nizilike i mpanjakay mba hagnente i ndaty nasaegne rey, le nitrea’e tie, nisy lahilahy raike tsy nagnisy akanjo fagnisiagne amy ty mariaze. 12 Le hoe i mpanjakay tama’e: ‘Inao hey, ino ty nahatafilitse azo ato, ie amy izao rehe tsy magnisy akanjo fagnisiagne amy ty mariaze?’ Le tsy naharehake i ndatỳ. 13 Le hoe i mpanjakay tamy i mpanompo’e rey: ‘Rohizo’areo ty tombo’e naho ty tagna’e, le atoraho’areo amy i iegne ivela’e agney reke. Agne reke ro hangoihoy ty tagny naho hampikodri-nife.’
14 “Ty anto’e, maro ty nasaegne faie tsy ampe ty jibognegne.”
15 Nandeha o Fariseò naho fa niavy eo, le niarake nipay hevetse mba hamandrihagne i Jesosy amy ty raha rehafe’e. 16 Nirahe iareo mbamy i Jesosy mbeo areke i mpiana iareo rey naho i ndaty mpanohagne i Heroda rey. Le nirehake iareo tie: “O Mpagnanatse, fanta’ay fa mirehake ty maregne lognandro rehe sady mampianatse ty maregne miomba an’Agnahare. Fanta’ay ka fa tsy mipay sitrake ndra amy ia ndra amy ia rehe, sady tsy mifily volo o ndaty. 17 Rehafo ama’ay areke ty heve’o, azo atao vao sa tsy azo atao ty mandoa hetra amy i Kaisara?” 18 Faie nihay i Jesosy tie raty saigne iareo, le hoe reke: “O ry mpanao soa miatreke, nagnino inareo ie mitsapa hevetse ahio? 19 Omeo’areo vola denaria raike atoy raho.” Le nimea iareo vola denaria raike reke. 20 Hoe reke tamy iareo: “Sare ia io, le agnara ia o misoratse eò?” 21 Le hoe ty navale iareo aze: “I Kaisara.” Le hoe ty Jesosy tamy iareo: “Aloao amy i Kaisara areke ze ahy i Kaisara, fa aman’Andrianagnahare ze an’Andrianagnahare.” 22 Tena nilatsa iareo naho fa naharey izay, hafarà iareo nandeha.
23 Tamy i andro ignehoe avao, le nimbamy i Jesosy mbeo o Sadoseò. Mirehake iareo tie tsy misy ze o famelomagne ty mate zao. Le nagnontenea iareo ty Jesosy tie: 24 “O Mpagnanatse, nirehafe i Mosesy tie: ‘Naho misy lahilahy raike manambaly faie nimate tsy niterake, le tsy maintsy valie ty rahalahi’e i valy nenga’ey, mba hagnomey taranake i rahalahi’e fa nimatey.’ 25 A nisy fito mirahalahy zay anio ty tama’ay tetoagne! Nanambaly i raike voaloha’ey, le nimate tsy nanagne taranake, le nivalie i rahalahi’ey amy izay i vali’ey. 26 Nimate tsy nanagne taranake ka i rahalahi’e faharoey naho i rahalahi’e fahateloy hatrake amy i rahalahi’e fahafitoy. 27 Nimate ka i ampelay tamy ty fara’e. 28 Naho fa ho avy amy izay areke ty famelomagne indraike iareo fito mirahalahy, ia amy iareo ty hovaly i ampelay, satria iareo sambe fa nanambaly aze iaby?”
29 Le hoe ty navale i Jesosy iareo: “Diso hevetse nareo, satria sambe tsy hai’areo ndra ty Soratse Masigne ndra ty herin’Andrianagnahare. 30 Ty anto’e, naho fa hovelomegne o ndaty nimateo, le tsy hisy lahilahy hagnenga vao ndra ampela hengaem-bao. Hanahake o anjely an-dagnitse agneo iareo. 31 Miomba ze famelomagne ty ndaty nimate zay, mbe tsy nivakie’areo vao i nisaontsien’Agnahare tihoey tie: 32 ‘Iraho le Andrianagnahare i Abrahama naho Andrianagnahare i Isaka vaho Andrianagnahare i Jakoba’? Tsy Andrianagnahare ty mate areke reke, fa Andrianagnahare ty velogne.” 33 Naho fa naharey izay i vahoakey, le nilatsa tamy ty fampianara’e.
34 Naho fa nirey o Fariseò tie natao i Jesosy tsy nahafirehake o Sadoseò, le niarake nandeha mbamy i Jesosy mbeo iareo. 35 Nitsapa hevetse i Jesosy ze raike amy iareo nahay lalàna zay, le nagnontane tie: 36 “O Mpagnanatse, inogne ty lily fara’e lahibey amy i Lalànay ao?” 37 Le hoe reke tama’e: “‘Teavo amy ty fo’o iaby naho amy ty tegna’o iaby vaho amy ty sai’o iaby ty Jehovah Andrianagnahare’o.’ 38 Io ty lily fara’e lahibey sady voaloha’e. 39 Manahake izay avao ka ty faharoe, le tihoe: ‘Teavo manahake ty vata’o ty nama’o.’ 40 O lily roe reo ty foto i Lalànay iaby naho o Mpaminanio.”
41 Tamo o Fariseò mbe nivorivory teoy, le nagnontane iareo ty Jesosy tie: 42 “Akore ty heve’areo miomba i Kristy? Ana ia irekeo?” Le hoe iareo: “Ana i Davida.” 43 Le nagnontane iareo reke tie: “Akore ty hahamete izay, ie amy izao naho fa nahazo fagnahy masigne ty Davida, le nitoka aze tihoe Tompo? Izao ohatse ty nirehafe’e: 44 ‘Hoe ty Jehovah tamy i Tompokoy: “Mitoboha an-kavanako eo, amparake ty anoako o fahavalo’ò ambane tombo’o eo.”’ 45 Akore areke ty maha ana i Davida aze, ie amy izao ty Davida nitoka aze tihoe Tompo?” 46 Tsy nisy nahavale i fagnontenea’ey ndra raike i ndaty teo rey. Nanomboke tamy izay ka, le tsy nisy nahavany nagnontane aze sasa.