Talily Soa Nisorate i Matio

21 Naho fa narine i Jerosalema iareo, le niavy a Betifaga ao, tanàgne raike amy i Vohitse Olivay ey. Le nagnirake roe lahy tamy i mpiana’e rey reke. 2 Hoe reke tamy iareo: “Mandehana amy ty tanàgne kedekede roy ey nareo, fa le avy le hahatrea birìke mirohy reketse ty ana’e nareo naho fa avy ao. Hahao’areo iareo, le ento mbamako mbetoa. 3 Naho misy ndaty mirehake anareo, le valeo’areo tie: ‘Palie i Tompo ty birìke retoa.’ Le avy le henga’e hindese’areo iareo.”

4 Niseho ze raha zay, mba hahatanterake ty raha nirehafe o mpaminanio tihoe toy tie: 5 “Rehafo i anak’ampela i Zionay tie: ‘Ho avy ama’o eo i mpanjaka’oy. Maleme fagnahy reke sady mitingitse birìke. Ie, anam-birìke, i biby mpinday entagne rey.’”

6 Nandeha areke i mpianatse roe lahy rey, le nanoe iareo iaby i raha nampanoe i Jesosy iareoy. 7 Nindese iareo mbamy i Jesosy mbeo i birìkey reketse i ana’ey, le natao iareo ambone i birìkey ey i akanjo iareo ivela’e rey, le nitoboke ambone irey ey ty Jesosy. 8 Maro amy i vahoake rey ty nagnafake ty akanjo iareo ivela’e, le nalafy iareo tagn’arabey ey. Misy amy iareo ka ty nanapake ran-katae, le nalaha iareo an-dalagne eo. 9 Nandeha taloha’e ao ty ila i vahoakey, le ty ila’e tafara’e tao, sady nirehake mafe tie: “Mba rombaho i Ana i Daviday! Hotahiegne abey i avy amy ty tahina i Jehovah-y! Mba rombaho reke, ihe miambesatse an-dindìgne ao!”

10 Naho fa nizilike ta Jerosalema ao reke, le nisamborohotake ty ndaty amy i tanàgney ao iaby, sady nagnontane tie: “Ia iò?” 11 Le nagnerenkeregne nirehake i vahoake rey tie: “I Jesosy io, i mpaminany boake a Nazareta a Galelia agney.”

12 Nizilike tamy i tempolỳ ao ty Jesosy naho fa niavy eo, le niroahe’e iaby i ndaty mpamarotse naho mpivily raha amy i tempolỳ aoy. Natonta’e ty lataba o ndaty mpanakalo volao naho ty seza o mpamarotse voromahilalao. 13 Le hoe reke tamy iareo: “Voasoratse tie: ‘Ty tragnoko hotokavegne tihoe tragno fivavahagne’, fa inareo manao aze ho lakato fietaha o malasò.” 14 Nisy ndaty goa naho kepeke ka nagnatogne aze tamy i tempolỳ tao, le nisitragne’e.

15 Niboseke o lahibey ty mpisorogneo naho o mpampianatse lalànao* naho fa nahatrea i raha mahalatsa natao i Jesosỳ, naho i ajaja lahilahy nirehake mafe tamy i tempolỳ ao tihoey tie: “Mba rombaho i Ana i Daviday!” 16 Le hoe iareo tama’e: “Rei’o vao ze raha rehafe iareo zao?” Le hoe ty navale i Jesosy iareo: “Eka. Mbe tsy nivakie’areo vao i tihoey tie: ‘Irehe ty nahavy ty vava o ajajao naho o anak’ajaja mbe minonò hidera azo’?” 17 Nenga’e eo iareo, le niala i tanàgney reke. Niavy tamy i tanàgne raike atao tihoe Betania zay reke, le tagne ty niroro tamy i halegney.

18 Ie naho fa nimaraindray bey, le niheregne ta Jerosalema agne ty Jesosy. Nikeré reke tamy izay. 19 Nahatrea fihamy* reke naho fa nandeha an-dalagne ey, le nimbeo. Faie tsy nisy voa’e i fihamỳ fa rave’e avao. Le nirehafe’e i fihamỳ tie: “Lelia’e tsy hamoa nainai’e rehe!” Eo naho eo avao, le avy le nalazo i fihamỳ. 20 Nilatsa i mpianatse rey naho fa nahatrea izay, le hoe iareo: “Nagnino i fihamỳ le avy le nimateo?” 21 Le hoe ty navale i Jesosy iareo: “Volagneko ama’areo to vata’e, fa naho managne finoagne nareo sady tsy misalasala, le tsy ty raha nataoko tamy i fihamỳ avao ro hovita’areo, fa ndra ty vohitse tia aza ro rehafe’areo tie: ‘Miongaha, le mitontà an-driake agne’, le hiseho zay. 22 Naho manam-pinoagne ka nareo, le hoazo’areo ze raha angatahe’areo amy ty vavake.”

23 Nizilike tamy i tempolỳ ao ty Jesosy, le nampianatse. Tamy ireke mbe nampianatsey, le nimbama’e mbeo o lahibey ty mpisorogneo naho o mpitarike jiosio, sady nagnontane aze tihoe: “Fahefagne boake aia ty anoa’o izao? Le ia ty nagnomey azo ze fahefagne zay?” 24 Hoe ty navale i Jesosy iareo: “Hagnontane raha raike anareo ka raho. Le naho ambara’areo ahy ty vale’e, le hambarako anareo ka tie, fahefagne boake aia ty anoako i raha rey. 25 Boake aia ty nahazoa i Jaona fahefagne hanao badisa? Boake an-dagnitse agne sa boake ama o ndaty?” Le nifampirehake iareo tie: “Naho mirehake tika tie: ‘Boake an-dagnitse agne’, le hagnontane antika reke tie: ‘A nagnino ie tsy ino’areò?’ 26 Faie naho manao izao ka tika tie: ‘Boake ama o ndaty’, le o vahoakeo ka ro hatahorantika, satria mihevetse iareo iaby tie mpaminany ty Jaona.” 27 Hoe areke ty navale iareo i Jesosy: “Tsy fanta’ay.” Le namale ka ty Jesosy tie: “Tsy horehafeko ama’areo ka areke tie, fahefagne boake aia ty anoako o raha rehoe.

28 “Akore ty heve’areo amy itoy? Nisy ndaty nanagn’anake roe lahy. Nimbamy i voalohan’ana’ey mbeo reke, le nirehake tie: ‘O anake, akia rehe hiasa an-tanem-boaloboke agne tie androany.’ 29 Le namale i ana’ey tie: ‘Iraho tsy ho agne.’ Faie nanegnegne reke naho fa niavy eo, le nandeha avao. 30 Nandeha mbamy i ana’e faharoey mbeo reke, le manahake igne avao ka ty raha nirehafe’e. Le namale io tie: ‘Eka baba, handeha raho.’ Faie tsy nandeha reke. 31 Ia amy iareo roe lahy ty nanao ty zoton’arofon-drae’e?” Le hoe iareo: “I ana’e voaloha’ey.” Le hoe ty Jesosy tamy iareo: “Volagneko ama’areo to vata’e, fa hizilike aloha’areo amy i Fanjakàn’Andrianagnaharey ao o mpitake hetrao naho o makorelio. 32 Ty anto’e, niavy tama’areo eo ty Jaona mba hanoro anareo ty lala i hamaregnagney, faie tsy ninoa’areo. Fa o mpitake hetrao naho o makorelio tena nino aze. Faie ndra tie fa nahatrea izay aza nareo, le mbe tsy nanegnegne avao sady tsy nino aze.

33 “Tsanogno areo ty fagnoharagne hafa toy: Nisy lahilahy nanagne tane, le nambolea’e voaloboke ty tao sady nifahera’e ty magnodidigne aze. Nihaly lavake fandiàliàgne voaloboke agnate’e ao ka reke, sady namboatse tragno abo.* Nampagnofae’e ndaty mpambole i tete’ey, le nandeha an-tane hafa agne reke. 34 Naho fa niavy ty fotoagne fimasaha i voalobokey, le nagnirake amo o mpanompo’eo mbamy i mpamboley mbeo reke, mba hangalake ty anjara’e. 35 Faie nitsepahe i mpambole rey i mpanompo rey, le ty raike jinera iareo, ty raike vinono iareo, ty raike nitorahe iareo vato. 36 Le mbe nagnirake mpanompo maro mandikoatse i taloha rey indraike reke. Faie mbe manahake i taloha rey avao ka ty nanoa i mpambole rey aze. 37 Tamy ty fara’e, le nirahe’e ho amy iareo agne i ana-dahi’ey, satria nieretseretse reke tie: ‘Mba hohajae iareo i ana-dahikoy.’ 38 Faie naho fa nitrea i mpambole rey i ana-dahi’ey, le nifampirehake iareo tie: ‘Itike i mpandovay, andao hovonoentika reke mba hahazoantika i lova’ey.’ 39 Nitsepahe iareo reke sady nitaritarihe iareo ivela i teteke famboleagne voalobokey agne, le avy eo vinono iareo. 40 Naho fa avy areke i tompo i teteke famboleagne voalobokeỳ, hatao’e akore o mpambole rehoe? 41 Le hoe iareo tama’e: “Hovonovonoe’e iaby iareo, satria raty saigne. Fa i teteke famboleagne voalobokey hampagnofae’e mpambole hafa hagnomey ty anjara’e, naho fa avy i famoriagne vokatsey.”

42 Le hoe ty Jesosy tamy iareo: “Mbe tsy nivakie’areo agnate Soratse Masigne ao vao i tihoey tie: ‘Ty vato niheje o mpamboatse tragnò ro hanjare vato fara’e lahibey* amy i tragnoy. Boake amy i Jehovah zay sady tena mahalatsa antikagne’? 43 Izay mahavy ahy mirehake ama’areò tie hafahagne ama’areo i Fanjakàn’Agnaharey, le homeigne ze firenena mamoa voa mifagnentagne ama’e. 44 Ze ndaty mitonta amo o vato iohoe, le hopotepoteke. Le ze itontà’e ka, le hotorotoro.”

45 Naho fa nirey o lahibey ty mpisorogneo naho o Fariseò ze fagnoharagne zay, le nihay iareo tie iareo o rehafe’eo. 46 Faie ndra tie te ho nitsepake aze aza iareo, le natahotse o vahoakeo satria nihevetse o vahoakeo tie mpaminany ty Jesosy.