Taratasy Voaloha’e Hoahy o Korintianao

15 Tiahiveko ama’areo ry rahalahy, i talily soa nitorieko tama’areoy, i neke’areo sady ipiteha’areo mafey. 2 Ho voavonje nareo naho tana’areo mafe i talily soa nitorieko tama’areoy. Fa naho tsy izay, le montso antoke avao ty nanjarea’areo mpino.

3 Agnisa ty raha nianarako naho nampitaeko tama’areo voaloha’e tihoe, nimate noho ty fahotantikagne ty Kristy, arake ty Soratse Masigne. 4 Nalevegne ka reke, le nivelomegne indraike tamy ty andro fahatelo, arake ty Soratse Masigne. 5 Niseho tamy i Kefasy* reke, le avy eo tamy i 12 lahy rey. 6 Tafara izay reke, le niseho tamy ty rahalahy 500 mahery tamy iareo niarake nivory tamy ty toeragne raikey. Mbe amantikagne eto ty ankamaroa iareo, fa ty ila’e fa nimate. 7 Tafara izay reke niseho tamy i Jakoba, le avy eo tamy i apostoly rey iaby. 8 Faie iraho ty nisehoa’e fara’e, manahake o ajaja aterake tsy ampe volagneo.

9 Iraho ty fara’e kidikidy amo o apostolio sady tsy fagneva ty hotokavegne tihoe apostoly aza raho, satria nagnenjeke o fiangonan’Andrianagnahareo. 10 Faie noho ty hasoa fagnahy miambake nasehon’Agnahare tamako ro nahavy ahy hoe izao. Tsy montso antoke ze hasoa fagnahi’e naseho’e tamako zay, satria miasa mafe mihoatse iareo iaby raho. Faie tsy ty heriko manokagne ty nahavitako izay, fa noho i hasoa fagnahy miambake naseho’e tamakoy. 11 Ndra iraho areke ndra iareo, le miomba izay ty hafatse torie’ay, sady inoa’areo ze hafatse zay.

12 Naho toriegne tie fa nivelomegne tamy ty mate ty Kristy, nagnino ty ila’e ama’areo ro mirehake tie tsy misy ty famelomagne ty mate? 13 Naho tsy misy ty famelomagne amy ty mate, le tsy ho nivelomegne amy ty mate ty Kristy. 14 Naho tsy nivelomegne amy ty mate ka ty Kristy, le tsy misy dika’e ty fitoriantika, sady tsy misy dika’e ty finoa’areo. 15 Hotrea ka tie mirehake vande miomba an’Agnahare tika, satria mirehake tika tie nivelomen’Agnahare tamy ty mate ty Kristy. Faie naho tsy hovelomen’Agnahare vata’e o ndaty nimateo, le tsy ho nivelome’e ty Kristy. 16 Ty anto’e, naho tsy hovelomegne o ndaty nimateo, ndra i Kristy aza tsy ho nivelomegne. 17 Naho tsy nivelomegne ka ty Kristy, le tsy misy dika’e ty finoa’areo sady mbe tsy afake ty fahota’areo. 18 Ho montso antoke ka ze mpanonjohy ty lia i Kristy nimate. 19 Naho amo ze o fiaignagne zao avao tika ro mitama i Kristy, le itika ro tena mampalahelo amo o ndatio iaby.

20 Faie fa nivelomegne tamy ty mate ty Kristy, i lohavoa amy ze nimatey. 21 Ty anto’e, ndaty raike ty niavia o fateo, le ndaty raike ka ty iavia o famelomagne amy ty mateo. 22 Manahake ty nimateza ty ndaty iaby noho ty natao i Adama, ro hamelomagne iareo iaby noho ty natao i Kristy. 23 Faie ho arake ty filahara’e ty hamelomagne ty tsikiraidraike. I Kristy ty lohavoa, vaho izay ze ahy i Kristy, agnate i fotoagne agnatreha’ey. 24 Amy ty fara’e reke, le hanolotse i Fanjakagney amy i Zagnahare’e sady Rae’ey, naho fa boake nifoagna’e o fitondragneo iaby naho o fahefagneo iaby vaho o herio. 25 Tsy maintsy hanjaka reke, amparake ty hanoan’Agnahare o fahavalo’eo iaby ho ambane tombo’e eo. 26 Ty fahavalo fara’e hofoagnagne, le o fateo. 27 Ty anto’e, nampagneken’Agnahare “aze iaby ze kila raha, le natao’e ho ambane tombo’e eo.” Faie naho fa nisaontsy ty Andrianagnahare tie, ‘nampagnekegne aze iaby ze kila raha’, le mazava hoaze fa tsy agnisa’e, i nahavy aze ho eke ze kila rahay. 28 Faie naho fa magneke i Anakey iaby ze kila raha, le ty vatategna’e ro hanoro tie, magneke i nahavy aze ho eke ze kila rahay reke, amy izay i Andrianagnahare ro ho ambone ze kila raha.*

29 Naho tsy izay, le hanao akore iareo natao badisa mba ho mate rey? Naho tena tsy hovelomegne ty mate, nagnino iareo ro natao badisa mba ho mate? 30 Nagnino zahay ro fa ho niazon-doza lognandro?* 31 Isan’andro raho, le fa ho nimate. Tena maregne zay ry rahalahy, sady fifaleako amy i Kristy Jesosy Tompontikagne ao nareo. 32 Naho nialy tamy ty bibihako raho, tamy iraho ta Efesosy agney manahake ty natao ty ndaty ila’e, ino ty soa azoko amy izay? Naho tsy hovelomegne ty mate, “le andao tika hihinagne naho hinogne fa homate naho hamaray.” 33 Ko magneke ho fitahegne nareo. Ty ragnetse raty, le manimba o fahazaragne soao. 34 Mba mandineha nareo, le manoa ty maregne sady ko zatse manota. Ty anto’e, tsy mahafantatse an’Agnahare ty ndaty ila’e. Ty hahamegnatse anareo ty irehafako izay.

35 Faie ndra tie eo zay, le hisy ty hirehake tie: “Hatao akore ty famelomagne o ndaty fa nimateo? Karazam-batagne manao akore ty homeagne iareo?” 36 Tsy misaigne nareo! Tsy hovelogne ty raha tongise’areo naho tsy mate hey. 37 Naho fa mitongy nareo, le tsy hatae fa mitiry* ro tongise’areo fa tabiry. Va’e ho vare zay ndra karaza tabiry hafa. 38 Fa i Andrianagnahare ty magnomey vatagne i tabirỳ arake ze iteava’e aze, sady omea’e vatagne ty tabiry tsikiraidraike. 39 Tsy mitovy o nofotseo iaby. Hafa ty ahy o ndatio, hafa ty nofo o agnombeo, hafa ty nofo o vorogneo, le hafa ty ahy o fiagneo. 40 Hafa ty vata ty an-dagnitse agne, le hafa ty vata ty an-tane etoy. Hafa ty voninahy ty vatagne an-dagnitse agne, le hafa ty voninahy ty vatagne an-tane etoy. 41 Hafa ty voninahy i masoandroy, le hafa ty voninahy i volagney, hafa ty voninahy o vasiagneo. Naho ty maregne aza, le sambe managne ty voninahi’e ka o vasiagneo.

42 Hoe izay ka i famelomagne amy ty matey. Lo ze raha tongisegne faie naho fa velogne reke, le tsy mete lo. 43 Afahagne baraka ty raha tongisegne, faie naho fa velogne reke, le mahazo voninahitse. Maleme reke naho fa tongisegne, faie mahery reke naho fa velogne. 44 Vatagne ara-nofo reke naho fa tongisegne, fa vatagne ara-pagnahy reke naho fa velogne. Naho misy ty vatagne ara-nofo, le misy ka ty vatagne ara-pagnahy. 45 Voasoratse tie: “Nanjare raha managn’aigne ty Adama, i lahilahy voaloha’ey.” Fa i Adama fara’ey nanjare fagnahy magnomey havelogne. 46 Faie tsy i ara-pagnahỳ ty voaloha’e fa i ara-nofoy, vaho izay i ara-pagnahỳ. 47 Boake an-tane etoy i lahilahy voaloha’ey sady namboaregne tamy ty lembon-tane. Fa i lahilahy faharoey boake an-dagnitse agne. 48 Mitovy amy i namboaregne tamy ty lembon-taney, ze an-tane eto. Fa mitovy amy i raike an-dagnitse agney, ze an-dagnitse agne. 49 Manahake ty anahafantika i namboaregne tamy ty lembon-taney, ty anahafantikagne ka i raike an-dagnitse agney.

50 Faie izao ty rehafeko ama’areo ry rahalahy, tsy ho afake handova i Fanjakàn’Andrianagnaharey o nofotse naho o liò, ndra o mete lò tsy ho afake handova i tsy mete lòy. 51 Izao ty raha mietake masigne rehafeko ama’areo: Tsy homate iaby tikagne, fa itika iaby, le hovagne 52 agnate ty fotoagne fohe, tsy tra ty maso mipie, naho fa tiofegne i trompetra fara’ey. Naho fa tiofegne i trompetray, le hanjare tsy mete lo, i hovelomegne amy ty matey sady hovagne tikagne. 53 Tsy maintsy hovagne tsy mete lo ty vatagne mete lo toy, le tsy maintsy hovagne tsy mete mate ty vatagne mete mate toy. 54 Faie naho fa hovagne tsy mete lo ty vatagne mete lo toy sady hovagne tsy mete mate ty vatagne mete mate toy, le hotanterake ty raha voasoratse toy tie: “Hofoagne tsy hisy nainai’e o fateo.” 55 “O ry fate, aia rehe vaho tsy mahareseo? O ry fate, aia i fitseve’oy?”* 56 I otay o fitseveke mahavy o fateò, le i Lalànay ty nagnomey hery i otay. 57 Faie isaoragne ty Andrianagnahare, satria magnomey antikagne fandreseagne amy ty alala i Jesosy Kristy Tompontikagne!

58 Mioregna soa areke nareo ry rahalahiko teako, fa ko mete hozongozognegne. Mikezaha ka hahavita bey amy ty asa i Tompo lognandro, satria hai’areo tie tsy ho montso antoke ty asa atao’areo hoahy i Tompo.