Taratasy Voaloha’e Hoahy o Korintianao
16 Ty miomba i famoriam-bola hoahy ty ndaty masigney, le azo’areo atao ty magnorike i toromareke nimeako o fiangonagne a Galatia agneoy. 2 Isake amy i andro voaloha’e amy ty heregnandroy, le toko’e hanokagne vola arakarake ze azo’e omeagne ty tsikiraidraike, amy izay tsy hisy famoriam-bola hatao sasa naho fa avy raho. 3 Faie naho fa avy agne raho, le hiraheko hangalake i fagnomeza’areoy naho hinday aze mba Jerosalema mbeo, ze ndaty eke’areo hanao izay amy i taratasi’areoy ao. 4 Faie naho mila mandeha agne raho, le hiarake amako iareo.
5 Faie ho avy ama’areo agne raho naho fa boake mandalo a Makedonia agne, satria handalo a Makedonia agne raho. 6 Va’e hijanogne ama’areo eo kedekede raho ndra hijanogne agne amparake ty itampera i asotrỳ, amy izay raho hatetere’areo lavidavitse amy ze hombako. 7 Fa tsy teako naho amy i fandalovako aoy avao raho ro hahatrea anareo, satria mitama ty hijanogne ama’areo eo elaela raho, naho enga i Jehovah. 8 Faie amparake ty iavia i fete Pentekostaỳ, le hijanogne a Efesosy etoa raho. 9 Satria misy lalam-bey misokake ty alohako eo, mba hahafahako mampitombo ty fanompoako, faie maro ty mpanohetse.
10 Naho fa avy ama’areo agne ty Timoty, le anò’areo ze hahavy aze tsy hatahotahotse, satria manao ty asa i Jehovah manahake ahy avao ka reke. 11 Tsy toko’e hisy ndaty hivazavaza aze areke. Anò’areo ze hahavy aze ho tolisoa amako atoy, satria mandigne aze zahay amo o rahalahy reo.
12 Ty miomba i Apolosy rahalahintikagne, le fa niangaviako mafe reke mba hiarake amo o rahalahy ho ama’areo agne reo. Faie tsy nieretseretse ty handeha reke amy izao, fa mbe ho avy agne reke naho fa afake.
13 Miambena avao, mioregna mafe amy ty finoagne, managna herim-po sady mikezaha ka mba hatanjake. 14 Anò aman-katea ze raha iaby atao’areo.
15 Hai’areo fa ze ndaty mitoboke an-tragno i Stefanasy ao ty lohavoa ta Akaia agne, sady nahafoe tegna iareo, le nikarakara o ndaty masigneo. Izao areke ty andrisihako anareo ry rahalahy: 16 Lonike abey nareo mba hagneke lognandro ty ndaty hoe izay naho ze miasa mafe vaho ze miara-miasa amy iareo. 17 Faie fale raho fa amako eto ty Stefanasy naho i Fortonato vaho i Akaiko, satria nagnampe ahy iareo nisolo ty toera’areo. 18 Ty anto’e, namelombelogne ahy naho namelombelogne anareo iareo. Ankasitraho’areo ty ndaty hoe ireo.
19 Mampamangy anareo o fiangonagne a Azia atoio. Mampamangy anareo amy i Tompo aò ty Akoila naho i Priska vaho o fiangonagne mivory an-tragno amy iareo aò. 20 Mampamangy anareo o rahalahio iaby. Mifanalamà amy ty oroke masigne.
21 Itoy ty fanoam-beloma nisorate ty tagnako, izaho Paoly.
22 Naho misy tsy tena tea i Tompo, le ho voaozogne. O Tompo, mba miavia rehe! 23 Lonike abey ty Jesosy Tompo mba haneho hasoa fagnahy miambake ama’areo. 24 Teako iaby nareo tafaharo amy i Kristy Jesosy aò.