Taratasy Voaloha’e Hoahy o Korintianao
3 Naho fa nirehake ama’areo areke raho ry rahalahy, le tsy afake nirehake manahake ty firehafagne amo o ndaty arake ty fagnahio, fa manahake ty mirehake amo o ndaty arake ty nofotseo, manahake o anak’ajaja amy i Kristy aò. 2 Ronono ty nafahako anareo fa tsy venten-kanegne, satria nareo mbe naleme. Ndra amy izao aza nareo le mbe maleme avao, 3 satria mbe arake ty nofotse. Tena arake ty nofotse vata’e nareo sady manao ty raha atao ty ndaty amy ty tontolo toy eto, satria mifampialogne naho mifanointoigne. 4 Naho mirehake ty raike ama’areo tie: “Iraho ahy i Paoly”, fa ty hafa mirehake tie: “Iraho ahy i Apolosy”, tsy mitovy amy ty raha atao o ndatio avao vao ty raha atao’areo?
5 Ia moa ty Apolosy sady ia ty Paoly? Mpanompo nagnampe anareo mba hanjare mpino avao zahay, arake ze nanendrea i Tompo anay tsikiraidraike. 6 Iraho nambole, i Apolosy nanondrake, fa i Andrianagnahare ro nampitombo aze avao. 7 Tsy i namboley ndra i nanondrakey areke ro ino, fa i Andrianagnahare nampitombo azey. 8 Raike avao ty tanjo* i ndaty mamboley naho i ndaty manondrakey, faie sambe hahazo ty valesoa’e ty tsikiraidraike, arakarake ty asa atao’e. 9 Ty anto’e mpiara-miasa aman’Agnahare zahay, le inareo teten’Agnahare ambolea’e naho anjomba aore’e.
10 Noho ty hasoa fagnahy miambake nasehon’Agnahare tamako, le nagnoregne fototse manahake ty atao o mpamboatse tragno mahaio* raho, faie ndaty hafa ty nagnoregne ambone i fototsey ey. Faie mila mitao soa lognandro ty tsikiraidraike tie, raha manao akore ty aore’e ambone i fototsey eo. 11 Tsy misy afake magnoregne fototse hafa ankoatse i fa naoregne teoy, le i Jesosy Kristy. 12 Naho misy ndaty magnoregne volamena, volafotsy, vatosoa sarobily, hatae, akata ndra ahetse ambone i fototsey ey, 13 le hibaribary ty asa natao ty tsikiraidraike, amy i andro hampibaribariagne aze amy ty alala ty afoy. Ty anto’e, i afoy ro hanoro tie manao akore ty asa natao ty tsikiraidraike tambone i fototsey eo. 14 Naho mijanogne eo avao ty asa naore i ndatỳ eo, le hahazo valesoa reke. 15 Fa naho mae ty asa naore ty ndaty raike, le ho mateantoke reke faie ho voavonje. Faie ndra tie eo zay, le hanahake o ndaty nivoavonje boake agnate afo aò reke.
16 Tsy fanta’areo vao fa tempolin’Agnahare nareo sady ama’areo ao i fagnahin’Agnaharey? 17 Naho misy ndaty mandrava i tempolin’Agnaharey, le horavàn’Agnahare reke, satria masigne i tempolin’Agnaharey. Inareo ze tempoly zay.
18 Ao nareo tsy hamitake ty vata’areo! Naho misy ama’areo mihevetse ty vata’e tie mahilala amy ty tontolo toy eto, le toko’e hanjare minegne reke mba hahavy aze hanjare hahilala. 19 Ty anto’e, ty hilala ty tontolo toy le hagegeagne aman’Agnahare satria voasoratse tie: “Ty hafetsea o mahilalao avao ro amandriha’e aze.” 20 Naho tihoe: “Ony i Jehovah fa tsisy dika’e ty fisaigna o ndaty mahilalao.” 21 Ao areke tsy hisy ndaty hanao o ndatio ho rehareha’e, satria anareo ze kila raha: 22 Ndra i Paoly zay, ndra i Apolosy, ndra i Kefasy, ndra ty tontolo toy, ndra fiaignagne, ndra fate, ndra ty raha amy izao, ndra ty raha amy ty hoavy. Anareo ze kila raha, 23 le inareo ahy i Kristy, le i Kristy an’Agnahare.