Taratasy Voaloha’e Hoahy o Korintianao
4 Toko’e ho mpanompo i Kristy naho ho mpanompo miandraikitse ty raha mietake masin’Agnahare ty fihevera o ndatio antika. 2 Takegne amy ty mpanompo hoe izay ty ho azo atokisagne. 3 Tsy lahibey amako ty fitsara’areo* ahy ndra ty fitsara o ndatio. Ndra iraho aza tsy mitsara ty vatako. 4 Ty anto’e, tsy treako ty hadisoako, faie tsy mahavy ahy ho maregne zay, satria i Jehovah ro mandineke ahy. 5 Ko mitsara ndra inogn’ino aloha i fotoagne fa tinondroy areke amparake ty iavia i Tompo. Ireke ro hampibaribary i raha mietake amy i iegney aoy naho hampahafantatse ty fikasa ty fo, amy izay ty tsikiraidraike ro hahazo fideragne boake aman’Agnahare.
6 Naho fa nirehake o raha rehoe tama’areo raho ry rahalahy, le ty tegnako naho i Apolosy ty nampiasaeko mba hahasoa anareo, amy izay amy ty alala’ay ty hianara’areo i fitsipike manao tihoey tie: “Ko mihoatse ze voasoratse.” Amy izay nareo tsy hirehareha, le hihevetse tie ambone ty ndaty hafa ty ndaty raike. 7 Noho ty amy ia ty mahavy azo tsy hitovy amy ty hafa? Ino moa ty raha anagna’o faie tsy nimeagne azo? Naho nimeagne azo ze raha zay, nagnino rehe ro mirehareha, le ndra kitra’e ka tie tsy nisy nagnomey?
8 Fa afa-po sahady nareo? Fa manan-karena sahady nareo? Fa nanomboke nanjaka nareo, ie amy izao tsy niarake ama’ay? Mba niteako vata’e naho fa nanomboke nanjaka nareo, amy izay manjaka miarake ama’areo ka zahay. 9 Naho amako, le izahay apostolio ro nataon’Andrianagnahare niakatse an-tsehatse fara’e manahake o ndaty hovonoegneo, satria hoe manao fampisehoagne zahay mba hohentea ty tontolo toy naho o anjelio vaho o ndatio. 10 Minegne zahay noho ty amy i Kristy, fa inareo mahimbagne amy i Kristy ao. Izahay maleme fa inareo matanjake. Inareo omeam-boninahitse fa izahay afa-baraka. 11 Hatrake amy ze o lera zao, le mbe keré, maeake ty arandrano, zara’e naho miakanjo, trinabotraboke naho tsy manan-tragno, 12 vaho demoke ty miasa mafe amy ty tagna’ay zahay. Naho fa misy manivetive zahay, le misalala raha soa hoahy ze ndaty zay. Naho fa enjehegne zahay, le miaretse avao, 13 naho fa misy magnaratiraty zahay, le mamale am-pahalemem-pagnahy. Nanjare fako* ty tontolo toy naho potepoten-draha zahay hatrake amy izao.
14 Manoratse o raha rehoe ama’areo raho, tsy tihoe mba hanalaragne anareo, fa hanoroagne anareo amy ty maha anako teako anareo. 15 Ndra tie managne mpiteza 10 000 amy i Kristy ao aza nareo, le azo antoke fa tsy managne rae maro. Faie nanjare baba’areo amy i Kristy Jesosy ao raho noho i talily soay. 16 Mandrisike anareo areke raho mba hanahake ahy. 17 Izay ty mahavy ahy magnirake i Timoty ho ama’areo agne, satria anake tena teako sady azo atokisagne amy i Tompo ao reke. Ie ty haniahy anareo ty fomba fiasako amy i Kristy Jesosy ao, agnisa izay ty fomba fampianarako tamy ty fiangonagne iaby ndra aia ndra aia ty misy aze.
18 Mirehareha ty ila’e ama’areo, satria atao’e tsy ho avy ama’areo agne raho. 19 Faie ho avy ama’areo agne raho tsy ho ela naho zoton’arofo i Jehovah, amy izay tsy ty reha o ndaty mirehareha rehoe avao ro ho fantako fa ty hery iareo ka. 20 Ty anto’e, tsy ty rehake ro tena lahibey amy i Fanjakàn’Andrianagnaharey fa ty raha atao.* 21 Ty aia ty tea’areo? Tie iraho avy ama’areo agne minday kobaigne vao sa tie iraho haneho hatea naho haleme fagnahy?